Gakenke: Rwiyemezamirimo ashobora kudatanga ifumbire niba atishyuwe iya mbere
Top Service yatsindiye isoko ryo kugemura inyongeramusaruro mu Karere ka Gakenke iravuga ko ishobora kudatanga ifumbire mu gihembwe cy’ihinga gitaha mu gihe yaba itishyuwe iyo yatanze mu gihembwe gishize.
Umukozi wa Top Service, Jean Paul Makuza Ntwari avuga ko afitiwe amafaranga miliyoni 135 na koperative ya Huguka Muhinzi ihuriwemo n’abashinzwe kugeza ifumbire mu baturage kuko yagiye abaha ifumbire akaba atarishyurwa.
Aya mafaranga ngo ni ayo yahereye ifumbire abashinzwe kuyigeza ku baturage (Agro dealers) guhera kuwa 20/08/2014 gusa akaba atarishurwa, ku buryo ashidikanya ku kuzatanga inyongeramusaruro mu gihe azaba atarishurwa.
Gusa ngo ikibazo kiri kuri koperative kuko bamwe mu banyamuryango bishuye bakaba bafite n’inyemezabwishyu koperative ikaba itarayashyikiriza rwiyemezamirimo.
Agira ati “jyewe nabahaye ifumbire muri koperative aba Agro dealer baverisa (bishyura) amafaranga kuri koperative, koperative ntiyanyishura amafaranga kuko n’imyenda ihari hari aba agro dealer bafite bordereau (inyemezabwishyu) bishuriyeho kuri koperative, ku bwanjye rero batarazana ayo mafaranga nta rindi fumbire nzabaha keretse bivuye kuri nyiri company”.
Umuyobozi wa koperative Huguka Muhinzi, Jean Niyitegeka asobanura ko ubusanzwe abanyamuryango bishyuraga kuri konti ya koperative nyuma bakaza kwoherezwa ubutumwa bubabuza kwongera kwishyura kuri konti ya koperative.
Ati “konte zabaye 2 baverisaho amafaranga ku buryo ayanyuze kuri konti ya Top service ntabwo nyazi. Ahubwo Jean Paul adufashe aduhe amazina y’abantu baverishije kuri konte ya Top service n’amafaranga baverishijeho nibyo bakiriye”.
Bamwe mu bagize iyi koperative ihuriwemo n’abacuruzi binyongera musaruro nabo bemeza ko batorohewe kuko harimo abishyuzwa na rwiyemezamirimo kandi barishyuye hakaba n’abishyuzwa na koperative kandi barishuye ku buryo ibintu bitarasobanuka.
Umuyobozi w’Akarere ka Gakenke, Deogratias Nzamwita asobanura ko atari ikibazo giteye impungenge gusa batumije inama yo kubyigaho.
Ati “twavuze ko kuwa kane utaha, twasabye ko bazaba bahuje imibare koperative igahuza n’ushinzwe kuzana inyongeramusaruro noneho bamara guhuza iyo mibare twebwe tukareba niba ari bariya bantu bacuruza inyongeramusaruro batarishura kandi bakagombye kuba barishuye. Niho tuzabona ikinyuranyo kiri hagati y’amafaranga bavuga”.
Koperative Huguka Muhinzi ihurimo n’abashinzwe kugeza ifimbire ku baturage bazwi nk’abagro dealears 42 bakorera mu bice bitandukanye bigize Akarere ka Gakenke.
Abdul Tarib
Ibitekerezo
Ohereza igitekerezo
|