Uwizeyimana yikorera akazi ko kwanika urusenda rwe

Uwizeyimana Charles yatangiye guhinga urusenda mu mwaka wa 2017 akorana na kompanyi ya Abahinde yitwa AQUE.

Iyi kompanyi ngo imugurira umusaruro we ku idolari rimwe (1$ Dollar) ku kilo cy’urusenda rwumye.

Aruhinga ku buso bwa hegitari imwe y’ubutaka agasaruraho toni 3 ku gihembwe cy’ihinga.

Gusa ngo iyo yakoresheje neza ifumbire akabona n’imvura nziza ashobora kubona toni 5 kuri hegitari.

Ati “Natangiriye kuri hegitari n’ubu niyo nkiriho, iyo urusenda rweze nkuramo toni 3 zihwanye na miliyoni 3. Nakoresheje neza abakozi nibura sinabura miliyoni n’ibihumbi 200 ku musaruro, urebye agafaranga karimo.”

Uwizeyimana avuga ko we na begenzi be uko ari 23, ngo batabasha guhaza isoko bafite kuko batarabasha kubona toni 1000 basabwa kuri buri musaruro uretse kwifashisha abahinzi banini.

Avuga ko aramutse abonye ubushobozi yahinga ubutaka bugari akongera ishoramari.

Agira ati “Twumva nk’izo za BDF ariko hari igihe usanga hakirimo imbogamizi nkatwe b’ingaragu batarashaka usanga dufite ikibazo cyo kutagira ingwate nibura ngo imishinga yacu yishingirwe.”

Baguma Dominique, umukozi w’akarere ka Nyagatare uyobora ishami rishinzwe ubucuruzi n’iterambere ry’umurimo avuga ko nta muntu w’urubyiruko ukwiye kubura igishoro kubera ingwate, kuko BDF yishingira imishinga yabo ku kigero cya 75%.

Asaba urubyiruko rufite imishinga kugana akarere bakabahuza n’iki kigega kikishingira imishinga yabo.

Ati “Urubyiruko rudafite ingwate kandi rukeneye inguzanyo muri Banki, iyo afite umushinga cyangwa igitekerezo araza tukamufasha tukamuhuza na BDF ikishingira umushinga we ku kigero cya 75% we akishakaho 25%.”

Uwizeyimana Charles asaba urubyiruko bagenzi be kwihangira imirimo aho gutegereza guhabwa akazi kuko nta w’ukira akorera abandi.

MENYA UMWANDITSI

Emmanuel Gasana Sebasaza

Umunyamakuru

@ SEBASAZAGEmman1

Reba inkuru zose nanditse ( 1820 )