Musanze: Abaturage bakirije abadepite uruhuri rw’ibibazo byo mu buhinzi

Abaturage bibumbiye mu makoperative yo mu Karere ka Musanze bagaragarije abadepite babasuye ko bari mu bihombo batewe n’ibibazo byinshi biri mu makperative.

JPEG - 1.4 Mb
Abadepite basuye bimwe mu bigo biri gukorerwamo ubushakashatsi butubura imbuto

Ibyo biganiro byabaye kuwa Mbere tariki 11 Ukuboza 2018, mu rugendo itsinda ry’abadepite bagize komosiyo y’ubuhinzi, ubworozi n’ibidukikije bagiriye muri aka karere, mu ngendo bakomeje kugirira hirya no hino mu gihugu.

Izo ngendo zigamije kureba uko umusaruro ukomoka k’ubuhinzi n’ubworozi uboneka, uko utunganywa, uko ugezwa ku isoko n’akamaro ufitiye abaturage.

Ikindi kigamijwe ni ukureba aho ubushakashatsi bwo gutubura imbuto mu gihugu bugeze no kureba uburyo abahinzi bagezwaho inyongeramusaruro.

Abaturage bavuze ko umusaruro wabo uri hasi ugereranyije n’igishoro bashyira mu buhinzi, aho nko ku musaruro w’ibirayi kuri bamwe wavuye kuri toni zisaga 15 kuri hegitari ukagera ku icyenda.

JPEG - 1.5 Mb
Depite Murebwayire Christine yumva ibibazo by’abaturage

Ndungutse François yavuze ko icyo gihombo gituruk ku mbuto mbi, kuko inzima itabageraho bose n’uyibonye akayigura imuhenze hakiyongeraho n’ikibazo cy’izamuka ry’ibiciro by’inyongeramusaruro.

Yagize ati “Turahinga tugatahira aho, nta bwisanzure k’umusaruro wacu, barishyiriraho ibiciro uko bishakiye, muri iyi myaka ibiri ni ibihombo gusa. Ni gute wagura imbuto ya 700Frw ibirayi ukabigurisha ku 150Frw ukavuga ngo uzunguka.”

Ruhakana Joseph avuga ko benshi muri bo bakoresha inguzanyo za banki, ariko bakabona umusaruro babona utabafasha kwishyura.

Ati “Duhinga ku nguzanyo za banki, urahinga wasarura ugasanga ubuze ayo kwishyura banki. Imbuto na yo iraza ikerewe ugasanga umuhinzi ntabwo ahingiye ku gihe, yajya gusarura akabona ubusa”.

Nyuma y’isuzuma ryakozwe n’abadepite kuri bamwe mu bahinzi harebwa ibyo binjiza n’ibyo basohora, basanze umusaruro umuhinzi abona koko uri hasi y’igishoro.

No mu bahinzi b’ibigori basanzemo ibihombona k’umuhinzi aho basanze uwunguka menshi yinjiza ibihumbi 15 ku kwezi.

JPEG - 1.5 Mb
Abadepite mu mu mushinga wa SOPYRWA utubura imbuto z’ibirayi

Depite Nyirahirwa Veneranda ukuriye iryo tsinda, yavuze ko hakwiye kubaho amahugurwa ku muhinzi no kwihutishwa gahunda yo gutubura imbuto kandi zikagerera ku baturage igihe.

Ati “Abahinzi mu by’ukuri bafite ibibazo bitandukanye, cyane cyane ikibazo kiri ku mbuto bahinga ishaje, cyane cyane ko usigaye ubuna umusaruro wabo ugabanuka kuri toni bahinga kuri hegitari.

Yongeyeho ati “Mu bigori naho umusaruro kuri hegitari uracyari hasi, n’amakoperative ntariyubaka, hakenewe ko abahinzi bahabwa ubushobozi n’amahugurwa kuko byagaragaye ko ibyo bahinga batabikuramo.”

Ikigo cy’Igihugu gishinzwe ubuhinzi n’ubworozi (RAB), cyatangaje ko gikomeje gahunda yo gukorana n’abafatanyabikorwa banyuranye hagamijwe guhaza imbuto mu bahinzi.

Nuwumuremyi Jeannine uhagarariye RAB i Musanze, avuga ko ariko hakiri ikindi cy’abahinzi badakurikiza inama bagirwa mu buhinzi. Ngo ibyo nabyo bituma umusaruro itakarira mu buhinzi, mu kuyisarura no kuyihunika ahatizewe.

MENYA UMWANDITSI

PROMOTED STORIES

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka