Ibibazo by’imirire mibi ntibyiganje mu turere dukennye ku biribwa gusa - MINAGRI

Musabyimana Jean Claude, umunyamabanga uhoraho muri Minisiteri y’ubuhinzi n’ubworozi, yafunguye inama idasanzwe yiga kuri gahunda yo kwinjiza muri Politike y’ubuhinzi, gahunda yo kurwanya igwingira n’indwara zituruka ku mirire mibi.

JPEG - 125.9 kb
Musabyimana Jean Claude umunyamabanga uhoraho muri MINAGRI

Ni inama y’iminsi ine, yatangijwe tariki 19 Gashyantare 2019 mu karere ka Musanze, yitabirwa n’abafite mu nshingano ubuhinzi bwita ku mirire y’abaturage, inshingano z’ubuzima bw’umwana n’umugore n’abafite inshingano z’umuryango baturutse mu bigo binyuranye mu Rwanda.

Iyo nama yateguwe ku nkunga y’Ishami ry’Umuryango w’abibumbye ryita ku biribwa n’ubuhinzi (FAO), igamije kwinjiza gahunda yo gukemura ikibazo cy’imirire mibi mu buhinzi mu gukangurira abaturage kwita ku mirire bifashishije ibyo bahinga.

Musabyimana, avuga ko bateguye iyo nama nyuma yo kubona ko mu Rwanda imibare y’abagaragayeho ikibazo cy’imirire mibi ikomeje kuzamuka.

Agira ati “imibare dufite yabagaragaraho indwara ziterwa n’imirire mibi ari nyinshi. Ntabwo njya mu mibare ariko ikibazo cy’abana bagwingira n’abana bafite ibimenyetso by’imirire mibi kirakomeye, niyo mpamvu twese twahuye mu kubirwanya kandi tuzabigeraho byanze bikunze kuko ibuye ryagaragaye riba ritacyishe isuka kandi ko agahagurukije abagabo baragatahana”.

Musabyimana avuga ko ingengo y’imari ikoreshwa mu buhinzi ari amafaranga agera kuri Miliyari 100 nyamara icyo kibazo kigakomeza kwiyongera. Niyo mpamvu hagiye gukorwa uburyo bwo kwinjiza gahunda y’imirire mu buhinzi.

JPEG - 134.8 kb
Abaturuka mu bigo na za minisiteri bifite aho bihurira n’imirire biyemeje guhagurukira iki kibazo

Avuga ko ahantu higanje ibibazo by’imirire atari mu turere dukennye ku biribwa gusa, ahubwo ko imyumvire niyo ikiri hasi aho usanga umuturage yeza amatoni ariko ugasanga abana baragwingiye, ariyo mpamvu ngo bagiye kurushaho kwegera abaturage mu bukangurambaga.

Bamwe mu bitabiriye iyo nama bavuga ko bagiye guhuza ibitekerezo binyuranye bakazataha biteguye gufasha abaturage kurandura ikibazo cy’igwingira n’indwara zituruka ku mirire mibi.

Adeline Ufitinema agira ati“hari abaturage batarumva neza uburyo bategura indyo ifite intungamubizi kandi batabibuze, niyo mpamvu kuba twaje, dufite ubumenyi bunyuranye, tugiye guhuza ibitekerezo tugamije kugira uruhare mu kurandura ibibazo by’imirire mibi tubihuza n’ubuhinzi”.

Mugenzi we witwa Mukayiranga Agnes ati“iyo urebye hirya no hino usanga mu Rwanda nta kibazo cy’ibiribwa dufite, ariko tubona ikibazo cy’imirire mibi, haracyari ikibazo cy’imyumvire aho umuntu yuzuza isahani ibinyampeke ngo ubwo arariye, niyo mpamvu ikibazo cy’imirire gishyirwa mu buhinzi abaturage bagakangurirwa kurya neza ibyo bahinga”.

Gualbert Gbehounou uhagarariye FAO mu Rwanda avuga ko hakwiye Politike yo kwegera umuhinzi agasarura yaramenye uko akwiye gutegura amafunguro.

Ngo ikibazo cy’imirire gihangayikishije Afurika kizakemuka ari uko mu buhinzi hashyizwe umurongo unoze wo gufasha abaturage gukoresha neza ibyo bejeje.

Ati“abaturage bahinga byose,ibitoki, ibishyimbo, imbuto zinyuranye, ariko ukabona bahuye n’ikibazo cy’imirire, niyo mpamvu gahunda y’ubukangurambaga ku mirire twayishyize mu buhinzi, kugira ngo ubukangurambaga bugere kuri wa muhinzi atangire guhinga azi neza icyo bizamumarira mu mibereho ye myiza,tuzamanuka tubagereho”.

Iyo gahunda yo kurwanya imirire mibi binyuze mu buhinzi ihuriwemo na Minisiteri y’Ubuhinzi n’ubworozi, Ministeri y’ubutegetsi bw’Igihugu, Minisiteri y’iterambere ry’umuryango, Minisiteri y’Ubuzima, Minisiteri y’ibikorwa remezo na Minisiteri y’ibikorwa by’ubutabazi.

Muri 2019, akarere ka Nyabihu niko kari ku isonga mu kugira umubare munini w’abana bagwingiye ku kigereranyo gikabakaba 50%.

MENYA UMWANDITSI

PROMOTED STORIES

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka