Minisitiri Kalibata yagize ati “niba mushaka kuzamura abaturage muyobora, bizaturuka ku kuntu mufasha abahinzi mu mihingire yabo. Naho ubundi, umuhinzi utahinze ngo yeze bihagije, ntazabona amafaranga ya mituweri, ntazanabasha kwikura mu bukene, …”.

Yunzemo ati “nta we nsaba guhigira kongera umusaruro, ahubwo ibyakorwa kugira ngo wiyongere. Urugero nko kwifashisha imbuto z’indobanure, umubare w’abaturage bazifashisha ifumbire yaba imvaruganda ndetse n’imborera haba mu buhinzi bw’urutoki, ubw’imyumbati, … gutunganya ibimpoteri rusange by’imborera, …”.

Minisitiri w’ubuhinzi yasabye aba bayobozi gushishikariza abahinzi kwifashisha ifumbire mvaruganda ndetse n’imborera mu mihingire yabo kugira ngo babashe kongera umusaruro.

Aha yatanze urugero rw’uko iyo umuhinzi ahinze umuceri atifashishije amafumbire ya ngombwa yeza toni enye kuri hegitari, nyamara yayifashisha akabasha gusarura toni esheshatu kuri hegitari.

Yakomeje agira ati “twegere abantu, urugo ku rundi, tubasobanurire kandi tubashishikarize gukora ibibafitiye inyungu. Tubereke ko kutifashisha ifumbire bibahombya, twifashishije ingero zifatika.”

Yunzemo agira ati “muzakore ku buryo ku ngo icumi zihinga, byibura zirindwi zizakoresha ifumbire. Abahuje ubutaka bo, ntihazagire n’umwe uhinga atifashishije ifumbire ya ngombwa.”

Na none kandi, mu rwego rwo gushishikariza abaturage kwifashisha inyongeramusaruro, hifujwe ko mu nama bakora nyuma y’umuganda, hajya hagira bagenzi babo batanga ubuhamya ku nyungu bakuye mu kuzifashisha.

Ibi kandi bizaherekezwa n’uko hazabaho amatsinda akurikirana ishyirwa mu bikorwa ry’uko abahinzi bifashisha inyongeramusaruro ku gipimo cyahigiwe.

Marie Claire Joyeuse