Abadepite bifuza ko abana bose basambanye babihanirwa

Ibyo byagaragaye mu Nteko ishinga amategeko, kuri uyu wa kane tariki ya 07 Ukuboza 2017, ubwo komisiyo ya politike n’uburinganire yari iri mu gikorwa cyo kwiga ku ngingo zigize itegeko ngenga riri kuvugururwa.

Ingingo ya 146 muri uwo mushinga ivuga ku cyaha cyo gusambanya abana, ni imwe mu ngingo 14 Abadepite batahise bemeza, aho zari zasubijwe guverinoma ngo igire ibyo ikosoramo, zikaba zongeye kugarurirwa komisiyo.

Muri iyo ngingo harimo igika kivuga ko umwana uri hagati y’imyaka 18 na 14 usamabanije undi na we uri hagati y’iyo myaka ariko akaba amurusha imyaka 3 ahanishwa gufungwa hagati y’imyaka 25 na 20.

Ibyo bivuze ko umwana usambanije uwo arusha imyaka itegeze kuri 3 adahanwa.

Kuri icyo gika, Abadepite bagaragaje ibyifuzo bitandukanye aho bamwe basanga gishyigikira ubusambanyi mu bana.

Depite Mukama Abbas agira ati “Murebe abana bafite imyaka 16, cyangwa 17 ni bakuru mu gihagararo pe. Aba bana turavuga ko nibasambana batazahanwa, ntibazashirira mu busambanyi ?”

Depite Mukamana Elisabeth we ati “Sinumva ukuntu abana b’imyaka 17 na 16 basambana ngo ntibahanwe. Ni ukuri aha harimo koreka abana.”

Perezida wa komisiyo ya politike n’uburinganire, Alfred Rwasa avuga ko nk’uko umwana utarageza ku myaka y’ubukure hari ibyo agenerwa ngo ni ngombwa ko ahanwa yasambanye.

Agira ati “Niba umwana w’imyaka 16 mu mategeko tuvuga ko yemerewe gukora akagenerwa umushahara, uwa 18 akaba yemerewe gutora, kuki batabazwa ko basambanye?”

Akomeza agira ati “Cyangwa se byaba byiza iki gika tukiretse ntigisohoke mu mategeko, ariko niba twanditse ibi bintu bigasohoka nabifata nko guha icyuho aba bana cyo gusambana.”

Me Uwizeyimana Evode, Umunyamabanga wa Leta ushinzwe itegeko nshinga n’andi mategeko muri Minisiteri y’ubutabera

Me Uwizeyimana Evode, Umunyamabanga wa Leta ushinzwe itegeko nshinga n’andi mategeko muri Minisiteri y’ubutabera agaragaza ko mu kugena icyo gika habanje kurebwa byinshi muri sosiyeti nyarwanda.

Agira ati “Ku ngingo nk’izi twashyize uruhare runini mu kubaka umuryango nyarwanda. Kandi ntituze kwitiranya kubura inshingano z’umubyeyi ku mwana ngo tubikemurire mu bihano by’amategeko.”

Akomeza agira ati “Twaricaye dusanga nibura mu kwirinda kugwa mu nzira y’ibi bihano binagira ingaruka ku miryango, umwana uruta undi imyaka ibiri baba basa n’abajya kungana.”

Muri uwo mushinga kandi, hateganijwe ko umwana w’imyaka hagati ya 18 na 14 wasambanije undi uri munsi y’imyaka 14 ahanishwa kimwe cya kabiri cy’igihano yagahawe aramutse afite imyaka y’ubukure.

Babigaragaje kuri uyu wa gatatu tariki ya 06 Ukuboza 2017, ubwo iyo komisiyo yagiranaga ibiganiro n’ibigo bicuruza amashanyarazi akomoka ku mirasire y’izuba birimo Mobisol, BBOXX, Serve and Smile, Wakawaka, Innotech na Tech Grand Lac.

Ibigo bikwirakwiza amashanyarazi y’imirasire y’izuba bihamagarirwa guhindura imikorere

Bibaye mu gihe intego ya Leta mu gihe cy’imyaka irindwi iri imbere ari uko abazaba bakoresha amashanyarazi afatiwe ku miringo mito (Off-grid) bazaba bari ku kigero cya 48% mu gihe ubu ari 11% gusa.

Abasenateri bagaragaje ko mu ngendo bakoze mu gihugu, bahasanze kompanyi zicuruza ingufu z’amashanyarazi akomoka ku mirasire y’izuba nyinshi, ariko ibikorwa byazo ntibigaragare.

Uretse ibyo kandi ngo hari n’imikorere irimo akajagari ndetse itanahwitse nk’uko byatangiye bigaragazwa na perezidente w’iyo komisiyo, Senateri Muhongayire Jacqueline.

Agira ati “Muri benshi pe ariko ugera hasi ukabura ibikorwa byanyu. Ni henshi twageze tugasanga ibikoresho mutanga byarapfuye ariko byabuze ubisana. Ibintu byanyu birimo akajagari.”

Senateri Bizimana Evariste we agira ati “N’ibi byose mutubwira, abantu banyu mu turere nta na kimwe bazi.Bahari badahari kuko nta makuru bafite haba ku ntego yanyu n’aho mugeze.”

Akomeza atanga urugero rw’umuturage basanze mu Karere ka Bugesera yaraguze ibikoresho bitanga amashanyarazi y’imirasire y’izuba, bikaza gupfa ariko yabwira abahagarariye kompanyi, bakamubwira ko niba atabishaka yabisubiza.

Yavuze ko hari undi wo mu Karere ka Rubavu waguze ibikiresho bya Mobisol birimo na televiziyo ikaza gupfa, yabibwira umukozi wayo, akamubwira ko agomba kujya kubibariza i Kigali.

Abahagarariye izo kompanyi bavuze ko babangamirwa n’ibibazo birimo amikoro y’abaturage batishyura neza n’abagifite imyumvire y’uko imirasire idatanga amashanyarazi ahagije.

Kuri ibyo ngo hiyongeraho abahabwa ibikoresho bakabyica kuko bikiri muri garanti, abakozi b’uturere nabo batumva akamaro k’imirasire,ariko cyane cyane kuba leta yabafunguriye imiryango nta gahunda y’imikorere yabo yagennye.

Abasenateri bagaragaje ko ibigo bikwirankwiza amashanayarazi akomoka ku mirasire bikora mu kajagari

Karekezi Benoit, uhagarariye Innotech agira ati “Tugera ahantu tugiye kubaha imirasire bakatubwira ngo aha hazashyirwa amashanyarazi, sinagura umurasire. Abaturage badufitiye imyenda myinshi, ugasanga nk’uko Leta igenda ifasha izindi gahunda, ariko twe ntawe udufasha kwishyuza.”

Akomeza avuga ko Minisiteri y’Ibikorwa remezo itaberetse ahari abaturage bagomba kugezwaho umuriro w’amashanyarazi n’abakeneye amashanyarazi y’imirasire y’izuba.

Gusa ariko uwitwa Kayitesi Jeannette uhagarariye kompanyi yitwa Waka Waka hari ibyo atumvikanaho na bagenzi be.

Agira ati “Turi abacuruzi ariko hari bamwe muri twe bakabya. Bakishimira kwakira amafaranga ariko batabanje kureba ubushobozi bw’umukiriya. Umuntu ari mu nzu y’icyumba kimwe, umuhaye Televiziyo ngo azishyure!”

Akomeza agira ati “Abenshi kandi iyo babonye ayo mafaranga ntawe usubira inyuma kureba ko ibikoresho bigikora neza. Turakemura ikibazo kimwe, dutera ibindi.”

Abasenateri bavuze ko niba amasezerano basinyanye na Leta atanagaragaza ibijyanye n’imikorere, amakosa ashingiye kuri kompanyi zemeye kuyasinya.

Senateri Bizimana ati “Wasinye iki niba utari uzi ibyo ugiye gukora n’uburyo ubikora? Ni mwe rero mwabuze gahunda y’imikorere nk’abantu mwari mugamije ubucuruzi.”

Abasenateri bakomeze bizeza izo kompanyi ko hari gahunda ya Leta iri gukorwa hagamijwe kuzifasha kuvugurura imikorere.

Minisitiri Amb. Gatete ubwo yitabaga Sena y’u Rwanda

Minisitiri w’imari n’igenamigambi (MINECOFIN), Amb. Gatete Claver yabitangaje ubwo yari mu nteko ishinga amategeko, umutwe wa Sena kuri uyu wa kabiri tariki ya 28 Ugushyingo 2017.

Yari yatumijwe ngo asubize ibibazo bitandukanye birimo icy’abana barokotse Jenoside bambuwe imitungo y’ababyeyi babo ntibahabwe ingurane n’ikibazo kijyanye n’amafaranga y’ababyeyi babo yaheze kuri konti ziri mu bigo by’imari bitandukanye.

Minisitiri Amb. Gatete yavuze ko iyo dosiye ijyanye n’aya makonti n’amafaranga yari ariho,cyakurikiranywe na Banki Nkuru (BNR), gusa hakaba harabonetse make.

Agira ati “Ni urutonde twashyikirijwe na AVEGA rw’abantu 48, rujya gusesengurwa na BNR yandikira amabanki yose. Ariko muri zose, muri Banki y’Abaturage (BPR), twabonye konti eshatu gusa, no muri banki ya Kigali (BK) habashije kubonekamo konti ebyiri.”

Akomeza avuga ko izo konti zabonetse muri BPR, harimo umwe wari wariyanditseho umutungo ku buryo ntawemerewe kumuzungura.

Avuga kandi ko abo bandi babonewe konti z’abari ababyeyi babo, nabo bagomba guca mu nkiko kugira ngo bemererwe kuzungura.

Visi perezida wa Sena Harerimana Fatu ni umwe mu bagaragaje kutanyurwa n’ibyavuye muri iyo raporo ya BNR, aho yagaragaje impungenge afite ku kuba banki zishobora kuba zihishira ayo makonti.

Agira ati “Ese ko mugaragaje ko abo bana hari abatagomba kuzungura, n’abagomba kuzungura mukavuga ko bizaca mu nkiko, tuziko bisaba avoka uzatwara ibihumbi 500RWf, kandi aba bana tuzi neza ko ari impfumbyi, bizihombere?”

Akomeza agira ati “Ikindi aba bana baribaza bati imyenda ababyeyi bacu bari bafitiye amabanki twarayishyujwe,ni gute amafaranga ababyeyi bafite muri banki ataboneka? Aha hakomeza kuzamo ikibazo bishobora kugaragaza ko amabanki afitemo uburiganya.”

Abasenateri bagaragaje ko bahangayikishijwe n’ayo mafaranga y’abazize Jenoside ataboneka

Senateri Ntawukuriryayo Jean Damascene we agira ati “Ibi bintu byabaye aba bana ari bato, aho bakuriye biciwe ababyeyi, bahanganye n’ibibazo by’ihungabana n’ibindi, natwe twarangiza ngo ngaho barakuze nibabyikurikiranire?”

Akomeza agira ati “Numva ko sosiyeti twareba ukuntu iki kibazo twakiganira, aba bana bagafashwa kigakemuka burundu.”

Minisitiri Amb. Gatete yasubije ko ku bijyanye no kwiyambaza inkiko mu kuzungura, nta bundi buryo bushobora kwifashishwa ngo abo bana bahabwe amafaranga y’ababyeyi babo. Hagomba kurebwa uburyo Leta yabafasha mu kubaha ababunganira mu mategeko.

Yavuze kandi ko basabye AVEGA na Ibuka kongera gusubira hasi bakareba neza mu mazina n’imyirondoro yari yatanzwe kuko kubusanaho gato bishobora gutuma izo konti zitaboneka.

Me Uwizeyimana Evode, umunyamabanga wa Leta muri Minisiteri y’Ubutabera ushinzwe Itegeko Nshinga n’andi mategeko

Yabivugiye mu Nteko ishinga amategeko ubwo yari kumwe na Komisiyo ya Politiki n’uburinganire mu gikorwa cyo kwiga ku mushinga mushya w’amategeko ahana y’u Rwanda, kuri uyu wa mbere tariki ya 27 Ugushyingo 2017.

Dipite Kayiranga Alfred Rwasa, ukuriye iyo komisiyo avuga ko usanga hirya no hino mu gihugu abagore batandukanye bafatwa ku ngufu n’abo bashakanye. N’ubwo ngo nta mibare ihari ariko mu miryango imwe n’imwe birahari.

Agira ati “Niba hari icyaha gifite uburemere muri iki gihugu ariko kitavugwa, ni abagore bafatwa ku ngufu. Guhana abagabo bakora ibi ndumva ari ngombwa!”

Me Evode yagaragaje ko bigoye kumenya ko umuntu yafashwe ku ngufu n’uwo bashakanye bitewe n’uko imibonano mpuzabitsina isanzwe mu nshingano bafite.

Bityo rero ngo umucamanza akaba ari we ugomba gusuzuma ahereye ku bimenyetso byatanzwe n’urega, ari nayo mpamvu icyo cyaha kidashobora kugenerwa ingingo yacyo.

Agira ati “Ubwo abantu bavugaga ngo dukore itegeko ryihariye rijyanye n’icyaha cyo gufata ku ngufu uwo mwashakanye, iyo turebye mu bijyanye no gufata ku ngufu, mbere na mbere bigizwe no kuba haba hatabayeho kumvikana, niyo mpamvu byitwa gusambanya ku gahato.

Akomeza agira ati “Twajya ku bashakanye, tugasanga umugore yaremeye gukora imibonano mpuzabitsina by’igihe cyose. Iyo umugore afashe ibendera, aba arahiriye gukora imibonano mpuzabitsina imyaka yose azamarana n’uwo muntu.”

Akomeza avuga aho kuvuga ko umugore yafashwe ku ngufu n’umugabo we ahubwo byavugwa ko yahohotewe.

Ati “Byakwinjira mu gice cy’ihohoterwa kuko umugabo n’umugore ni abantu kumvikana bitajya birangira, kuko habanje kubaho guhohoterwa, ni kimwe no kwangiza umutungo mutabyumvikanyeho.”

Dipite Kayiranga Alfred Rwasa, ukuriye Komisiyo ya Politiki n’uburinganire

Ingingo ya 147 muri uyu mushinga mushya ivuga ko umuntu wese ukoresha undi ibikorwa bikurikira nta bwumvikane bubayeho, hakoreshejwe imbaraga, iterabwoba, uburiganya, ububasha amufiteho cyangwa abikoze ku bw’intege nke z’uwakorewe icyaha, aba akoze icyaha cyo gukoresha undi imibonano mpuzabitsina ku gahato.

Ibyo bikorwa ni ugushyira igitsina mu gitsina, mu kibuno cyangwa mu kanwa k’undi muntu, gushyira urugingo urwo ari rwo rwose rw’umubiri w’umuntu cyangwa ikindi kintu icyo ari cyo cyose mu gitsina cyangwa mu kibuno by’undi muntu.

Iyo ngingo ivuga kandi ko umuntu wese uhamijwe n’urukiko gukoresha imibonano mpuzabitsina ku gahato, ahanishwa igifungo kitari munsi y’imyaka icumi n’ihazabu y’amafaranga y’u Rwanda atari munsi ya miliyoni imwe.

Inavuga ko iyo ibikorwa bivugwa mu gika cya mbere cy’iyi ngingo bikozwe hagati y’abashyingiranywe, nabyo bifatwa nko gukoresha undi imibonano mpuzabitsina ku gahato.

Igihano kiba igifungo cya burundu iyo gukoresha imibonano mpuzabitsina ku gahato byakozwe n’abantu barenze umwe, byateye urupfu uwabikorewe, byakozwe ku muntu bafitanye isano kugeza ku gisanira cya kabiri bikaba kandi byakozwe hagamijwe kumwanduza indwara idakira.

Minisitiri w’intebe Eduard Ngirente aganira na Guverineri Gatabazi, ku munsi w’irahira ryabo

Abatawe muri yombi ni visi Perezida n’undi munyamigabane w’ikusanyirizo ry’ibirayi ryo mu Murenge wa Gahunga, Akarere ka Burera.

Guverineri w’Intara y’Amajyaruguru, Gatabazi JMV yatangarije Kigali Today ko hagishakishwa perezida w’iryo kusanyirizo, usanzwe ari na perezida w’inama njyanama y’uwo Murenge ku cyaha bakurikiranyweho cyo kwiba abaturage.

Yagize ati “Niba igiciro cyemejwe muri iki cyumweru ku kiro cy’ibirayi ari 145Frw, bo barekaga umuturage akaza, bakamupimira, wenda niba azanye ibiro 500, bakamubwira bati turakwishyura 80Frw ku kiro, niba ubyanze ubijyane ahandi.

“Nyuma y’ibyo, wa muturage bahaye 80Frw ku kiro kuko bazi ko tubigenzura, bakandika mu bitabo ko bamuhereye 145Frw ku kiro, urumva ni ubujura bukabije.”

Gatabazi akomeza avuga ko ubusanzwe ibiciro ku makusanyirizo bishyirwaho buri cyumweru bibanje kumvikanwaho n’ubuyobozi bw’ikusanyirizo, ubwa koperative y’abahinzi n’ubuyobozi bw’Akarere.

Amakuru agera kuri Kigali Today, avuga ko ikibazo cy’abo baturage cyamenyekanye ubwo Minisitiri w’Intebe ari kumwe n’abandi ba Minisitiri batatu barimo uw’Ubuhinzi n’ubworozi basuraga uwo murenge.

Bari baje mu gikorwa cyo gusura ibikorwa bitandukanye by’ubuhinzi mu Turere twa Nyabihu, Musanze na Burera, ku wa Gatatu tariki 22 Ugushyingo 2017.

Abo bayobozi bari kumwe na Guverineri w’Intara y’Amajyaruguru, ngo bakimara kubwirwa icyo kibazo ntibabyihanganiye, bahita basaba inzego z’umutekano guta muri yombi abatungwa agatoki n’abaturage, bahava bamaze gufatwa.

Uretse uburiganya ariko, ikibazo cy’ibiciro bito by’amakusanyirizo y’ibirayi kimaze igihe kigaragazwa n’abahinzi muri iyo Ntara izwiho kweza ibirayi.

Guverineri Gatabazi avuga ko umuti bari gushakira iki kibazo, ari ugushishikariza abaturage kwishyira hamwe mu makoperative, akaba ari bo bishyiriraho amakusanyirizo yabo mu rwego rwo kwirinda abamamyi.

Kugeza ubu, umuhinzi ntiyemerewe kugurisaha ibirayi yejeje, atabijyanye ku ikusanyirizo.

Gahunda y’amakusanyirizo y’ibirayi yashyizweho muri 2015, ku bufatanye bw’Urugaga rw’abikorera mu Rwanda (PSF), Minisiteri y’Ubucuruzi n’Inganda n’iy’ ubuhinzi, ibi bikorwa bigacungwa na sosiyete ya RPT (Regional Potatoes Trade).

Minisiteri y’ Ubucuruzi yagaragazaga ko igamije kurengera inyungu z’umuhinzi w’ ibirayi no kunoza ubucuruzi bwabyo.

Abadepite bifuza ko ubushakashatsi mu buhinzi bwashyirwamo ingufu

Byagaragajwe ku itariki ya 20 Ugushyingo 2017, ubwo Minisitiri w’imari n’igenamigambi, Amb. Gatete Claver yari ari mu Nteko ishingamategeko mu gikorwa cyo kwemeza amasezerano y’impano yashyiriweho umukono i Kigali ku wa 09 Ukwakira 2017, hagati y’u Rwanda n’ikigega mpuzamahanga gitsura amajyambere (IDA).

Iyo mpano ingana n’Amadolari ya Amerika miliyoni icyenda n’ibihimbi 250 (arenga miliyari 7RWf), agenewe gahunda yo kuvugurura urwego rw’ubuhinzi, icyiciro cya gatatu, PSTA3 (2013-2018).

Iyo gahunda, igomba kurangira ku itariki ya 30 Nzeli 2018, igizwe n’ibyiciro bine aribyo kongera ibikomoka ku buhinzi n’ubworozi, ubushakashatsi, ikoranabuhanga, no gufasha abahinzi gukora ubuhinzi bw’umwuga.

Ubuke bw’iyo mpano n’uburyo yashyizwe mu bice byinshi ni kimwe mu byagarutsweho n’abadepite, aho basanga yagashyizwe mu bushakashatsi nk’urwego babona rukiri inyuma mu Rwanda; nk’uko byavuzwe na Depite Nyirarukundo Ignacienne.

Agira ati “Turebye icyo aya mafaranga azakoreshwa, ni ibintu bine! Wenda nta mafaranga aba make, ariko umuntu akaba yavuga ati kuki atajya mu gikorwa kimwe!”

Akomeza agira ati “Twakavuze tuti ajye mu mu bushakashatsi nk’urwego ubona ko rukeneye imbaraga, byibura mu gihe cy’umwaka umwe cyangwa ibiri tube twifitiye imbuto, tutagomba kuzishakisha n’ibiza by’indwara bidutungura tukaba twabasha guhangana nabyo.”

Depite Mukayijore Suzan we agira ati “Iyo urebye uyu munsi, usanga umunyarwanda akiri muri bwa buhinzi bw’amarariro y’umunsi, ntago turabasha kugera ku buhinzi bw’umwuga.”

Akomeza agira ati “Nanjye navuga nti ‘kuki aya mafaranga atashyirwa mu gikorwa cy’ubushaskashatsi, icyo cyazarangira abantu bakabona gufata ikindi?”

Abaterankunga nibo bahitamo aho igomba gukoreshwa

Minisitiri Gatete Claver yagaragaje ko ibyifuzo by’aba badepite byumvikana, ariko mu kugena ibyo byaturutse ku bushake bw’abaterankunga.

Agira ati “Iyo dushaka abadutera inkunga, nabo buriya hari aho bakura amafaranga kandi bashaka kuzasobanurira uburyo yakoreshejwe.”

Akomeza agira ati “Ushobora kuyashyira mu gikorwa kimwe, ugasanga abayaguha nabo baravuze bati niba ari ikingiki twe ntitugishaka, kandi ni impano si inguzanyo.”

Minisitiri w’imari n’igenamigambi, Amb. Gatete Claver

Akomeza avuga ko mu mwaka wa 2018 u Rwanda ruteganya kubona indi mpano ya miliyoni 100 (arenga miliyari 80RWf) azajya mu rwego rw’ubuhinzi.

Abahinzi nabo bagaragaza ko urwego rw’ubushakashatsi mu buhinzi rukiri hasi kuko ngo bajya babura imbuto zijyanye n’ubutaka bahingaho; nkuko uwitwa Habimana Felix wo muri Karongi abisobanura.

Agira ati “Ndi mu bantu bakora ubuhinzi babukunze kandi babushoramo ariko haracyakenewe ubushakshatsi ku mbuto zikwiranye n’ubutaka bwacu kuko hari nyinshi baduha batwizeza umusaruro, bikanga, nk’ibigori, imyumbati n’ibindi.”

Minisitiri w’Ubuhinzi n’ubworozi, Mukeshimana Gelardine we avuga ko ariko ubushakashatsi ari kimwe mu byo minisiteri ayoboye ishyize imbere.

Akomeza avuga ko bimwe mu byahereweho harimo inyigo y’imiterere y’ubutaka bwa buri gace, mu Rwanda. Hakaba ngo hagiye no gutangizwa uruganda rukora inyongeramusaruro zijyanye na buri gace hagendewe kuri iyo miterere.

Abadepite bahangayikishijwe n’uko ubutaka bwagenewe guhingwaho buri kuzamurwamo amazu

Urugero abadepite baheraho banenga imikoreshereze y’ubutaka bwakagombye guhingwaho ni ahazwi nko ku Muyumbu mu Karere ka Rwamagana hari kuzamurwa imiturire igezweho.

Iki kibazo bakibajije Minisitiri w’Ubuhinzi n’Ubworozi Gerardine Mukeshimana ubwo yitabaga inteko kuwa Kabiri tariki Ugushyingo 2017.

Umwe mu badepite yabajije Minisitiri Mukeshimana impamvu nta gikorwa kugira ngo ahantu nko ku Muyumbu hari hasanzwe hazwiho kwera imyaka ngo habungabungwe.

Yagize ati “Mwatubwiye ngo muzongera ubuso bw’ubutaka buhingwaho, ariko ahangaha ntago byoroshye kuko n’ubuhari buri kurangira, burubakwaho ibibuga by’indege, amasitade, imidugudu n’ibindi bikorwa remezo.”

Abade pite bafite impungenge ku butaka bwera bukomeje gukoreshwa ibindi

Yabibajije nyuma y’uko Minisitiri Mukeshimana amaze gutangaza ko guverinoma ifite gahunda yo kongera ubutaka buhingwaho ariko ntibyanyura abadepite.

Depite Rwaka nawe yagize ati “Imyubakire ni ikintu kigenda gifata umwanya munini ku butaka, ubutaka buragenda buba buke, hakagombye kugira igikorwa.”

Minisitiri Mukeshimana yavuze ko igihemwbe cy’ihinga cyatangiye mu kwezi kwa Nzeri kizasiga ubutaka buhingwaho bugeze kuri hegitari ibihumbi 800 buvuye kuri hegitari ibihumbi 300 zari zisanzwe zihingwaho.

Yongeraho kohari gahunda zigaragaza ubushake mu kongera ubu buso buhingwaho zirimo kubaka abantu bagerekeranyije amazu no gutunganya ibishanga bidakoreshwa. Yavuze ko ibyo bizajyana no gusimbuza ubutaka bwera ubusanzwe buzwiho kutera.

Minisitiri Mukeshima (iburyo) avuga ko gahunda y’iterambere ry’ubuhinzi nshya izagabanya ubukene cyane

Minisitiri Mukeshimana yagaragarije inteko ishinga amategeko ko gahunda y’imyaka itandatu y’iterambere ry’ubuhinzi igomba gutangira muri 2018 bazongera umusaruro ku buso buhingwaho ariko hanabungabungwa ubutaka buhingwaho.

Minisitiri w’Imari n’iganamigambi Amb Gatete Claver yavuze ko zimwe mu ngero zigaragaza ubushake bwa leta mu kubungabunga ubutaka buhingwaho ari gahunda yatangije yo kubaka amazu azwi nka ‘4 in 1’, aho inzu enye zubakwa muri imwe mnini.

Abana b’ababyeyi bajya gusoroma icyayi bibasiwe n’imirire mibi

Ibi biratangazwa mu gihe ishami ry’umuryango w’abibumbye ryita ku bana (UNICEF) mu Rwanda rivuga ko mu bugenzuzi ryakoze ryasanze abana bafite ikibazo cy’imirire mibi biganje mu duce duhingwamo icyayi.

Nidhi Joshi, umukozi wa UNICEF mu Rwanda avuga ko icyo kibazo cy’imirire mibi gishingiye cyane ku kuba ababyeyi bakora mu mirima y’icyayi batabona umwanya wo kwita ku bana babo.

Agira ati “Twasanze abenshi mu babyeyi bakora muri icyo cyayi, nta mwanya bagira ngo bite ku bana babo. Hari n’abagore twabazaga, bakatubwira ngo bakora mu cyayi batwite, bamara kubyara, nyuma y’umwaka umwe bakagaruka gukora.”

Akomeza agira ati “Hari abo twabajije icyo baha uwo mwana baba birirwanye mu murima, bakatubwira ko bateka igikoma batwara muri kano gacupa kabamo amazi, umwana akaba aricyo yiririrwa umunsi wose.”

Akomeza avuga ko ikibazo cy’abana bafite imirire mibi bagisanze cyane mu Ntara y’Iburengerazuba n’agace k’amajyaruguru n’amajyepfo.

Ikigo cy’igihugu gishinzwe guteza imbere iyoherezwa mu mahanga ry’ibikomoka k’ubuhinzi (NAEB) kivuga ko kiri gushakisha uburyo abana bafite ababyeyi bakora mu cyayi babona uburengenzira bwabo.

Nidhi Joshi, umukozi wa UNICEF avuga ko basanze abana bafite imirire mibi mu bice bihingwamo icyayi, biterwa ahanini no kutitabwaho n’ababyeyi

Umuyobozi wungirije wa NAEB, Urujeni Sandrine avuga ko iki kibazo bakimara kukibona, biyemeje gufatanya na UNICEF kugira ngo barebere hamwe uburyo bwo gushyiraho amarerero iruhande y’imirima y’icyayi.

Agira ati “Dushaka uburengenzira bw’umwana uko bukwiye bwubahirizwa, ni muri urwo rwego hazashyirwaho amarerero kandi hamwe yaratangiye, noneho mu gihe umubyeyi ari gukora, umwana nawe akaba ari ku ruhande ari kwitabwaho.”

Akomeza avuga ko iyo gahunda itagamije uburengenzira bw’umwana gusa, kuko umubyeyi uzajya akora yisanzuye kuko umwan ari kwitabwaho ku ruhande, nawe azajya acyura umusaruro mwinshi.

Mujawimana Dancille, wo mu Karere ka Karongi, ukora mu cyayi avuga ko icyo gikorwa kigezweho, yaba ari intambwe yindi bateye mu kazi kabo.

Agira ati “Twari twararenganye, ukirirwa wunamye n’umwana mu mugongo, umwana yarira ukicara mu rume ukamuha ibere. Abana bacu nabo bazacya kandi bitabweho bagire imirire myiza.”

Issa Nkurunziza ,ushinzwe icyayi muri NAEB avuga ko mu mwaka wa 2018 buri ruganda cyangwa koperative izaba yatangiye igikorwa cyo kubaka ku buryo uzarangira nibura 75% baratangiye kuyarereramo.

Umuyobozi wungirije wa NAEB, Urujeni Sandrine avuga ko bagiye gufatanya na UNICEF mu gukemura icyo kibazo

Ku bafite inganda z’icyayi, basabwa gushyiraho ayo marerero nta kindi batse umukozi, naho NAEB yo uruhare rwayo ruzaba guhugura ababyeyi n’abazita kuri abo bana.

Abahagarariye amakoperative n’inganda z’icyayi ngo nabo basanga iyo gahunda y’amarerero ntacyo ikwiye kandi irengera impande zombie; nk’uko bivugwa na Rushayigi Innocent uhagarariye uruganda rwa Shagasha.

Agira ati “Iyi gahunda twese tugomba kuyishyigikira kuko mu by’ukuri uretse no kuba ari ukubahiriza uburengenzira bwa muntu, amafaranga tuzakoresha mu gushyiraho ayo mashuri, azagarukira mu musaruro ababyeyi barerewe abana bazatanga kuko uziyongera.”

Minisitiri Mukeshimana Geraldine arasaba abaturage bose kuba maso kubera indwara y’uburenge

Iyi ndwara yibasiye Intara y’Iburasirazuba kuva mu kwezi kwa gatanu uyu mwaka, aho yahise ishyirwa mu kato ku bijyanye n’ubucuruzi bw’inka cyangwa inyama zazo, ibintu byateye igihombo igihugu nk’uko byagaragajwe na Minisitiri Mukeshimana Gelardine.

Yagize ati” Iyi ntara yagiye mu kato kari gatewe n’inka zifite agaciro ka miliyoni 600 zinjiye mu gihugu, ariko amezi 4 yarangiye hafi miliyari 5 z’igihombo zimaze kugera muri iriya ntara.

Nta n’ubwo ari muri iriya ntara gusa kuko byagize n’ingaruka zikomeye ku bukungu bw’igihugu. Kuko ayo matungo niyo ducuruza mu bihugu duturanye, inyama nizo ducuruza mu bihugu duturanye.”

Minisitiri Mukeshimana akomeza avuga ko kugeza mu kwezi kwa 9 w’umwaka wa 2016, amatungo yari amaze kwinjiza miliyoni 28 z’amadolari, ariko muri uyu mwaka wa 2017 mu mezi 4 iriya ntara yamaze mu kato, igihugu cyagize igihombo cy’amadorali miliyoni 10.

Ikigo cy’igihugu gishinzwe guteza imbere ubuhinzi n’ubworozi RAB, kivuga ko iyi ndwara y’uburenge yakunze kwibasira intara y’Iburasirazuba kubera abakura inka zanduye muri Tanzaniya na Uganda.

Izi nka ziganjemo iziba zije gucuruzwa mu Rwanda ndetse no mu bihugu bituranyi nka Congo Kinshasa n’Uburundi.

Ibi ngo byatumye mu mwaka 2000 hafatwa icyemezo cy’uko uwinjije inka mu gihugu agomba kuba afite icyemezo cyo muri laboratoire ko zapimwe ku bintu bitandukanye birimo kuba mu gace zivuyemo nta burenge bwahagaragaye mu gihe cy’imyaka 5.

Gusa ngo uko hashyirwagaho ingamba, niko abaturage barushagaho kuzinjiza mu buryo bwa magendu nk’uko bivugwa n’umuyobozi ushinzwe imirimo y’ubuvuzi bw’amatungo muri RAB, Dr Isidore Gafarasi.

Ati”Uko abaturage babonaga dushyizeho ibyo byemezo nabo batangiye gushakisha uburyo bajya bazinjiza rwihishwa, mbese aho usangamo n’ikintu cyo guhishirana. “

RAB ivuga ko nyuma y’uko icyo cyorezo cyongeye kugaragara kuva mu kwezi kwa 5, hahise hafatwa ingamba zo gukingirana inka zose, gukingira no kuvura izirwaye, hakajyaho ikiswe ibipakiriro (Ahazajya hapakirirwa inka) ku buryo zizajya zibanza zigasuzumwa.

Ivuga kandi ko muri urwo rwego yatanze hafi miliyoni 200FRW yatanzwe mu gukingira, aho inka imwe yaterwaga urushinge rufite agaciro ka 1500Frw.

Kuba iki cyorezo cyongeye kugaragara muri iyi Ntara muri uku kwezi, ngo byatewe n’umuntu wazanye inka ze nyuma y’umutekano mucye wabaye muri Tanzaniya zirwaye, akazihisha mu kigo cya Gabiro, mu gihe cy’ikingirwa zo ntiyazikingiza ahubwo akazivura rwihishwa, azijyanye mu zindi zirazanduza.

Dr Gafarasi avuga ko kuva icyorezo cyongera kugaragara muri kuno kwezi, inka zimaze kugaragaraho ibimenyetso ari 13, naho kuva mu kwezi kwa 5 uyu mwaka zose hamwe akaba ari izisaga 2000.

Avuga ko ubu imbaraga ziyongera ku zisanzwe bagiye kuzishyira mu gukorana n’inzego zitandukanye ariko cyane bakangurira abaturage kumva uburemere bw’igihombo iyo ndwara iteza ndetse no kudahishirana.

Indwara y’uburenge yongeye kugaragara mu ntara y’Iburasirazuba

Minisiteri y’ubuhinzi n’ubworozi kandi yasabye Polisi ubufasha mu guhangana n’iki kibazo.
Polisi ivuga ko ubu burwayi bw’inka ari kimwe mu bihungabanya umutekano kuko biteza ubukene muri iyo Ntara, bityo ikaba yariyemeje uruhare mu kubukumira nk’uko bivugwa n’umuvugizi wayo, ACP Theos Badege.

Ati” Twagiye muri komite ihuriweho n’inzego zitandukanye mu kurwanya iyi ndwara, tugira uruhare mu kwigisha abaturage icyo amategeko ateganya, no mu gukurikirana abakwirakwiza uburwayi bagahanwa hifashishijwe amategeko.”

Ingingo ya 437 mu gitabo cy’amategeko ahana y’u Rwanda ivuga ko hagendewe ku biteganywa n’izindi ngingo z’iri tegeko ngenga, umuntu wese utuma mu gihugu habaho ikwirakizwa ry’indwara zanduza amatungo, arabihanirwa.

Ahanishwa igifungo kuva ku kwezi kumwe ariko kitarenze amezi atandatu n’ihazabu y’amafaranga y’u Rwanda kuva ku bihumbi ijana kugeza kuri miliyoni imwe cyangwa kimwe gusa muri ibyo bihano.

Ku ruhande rw’abaturage bo muri iyi Ntara bo bavuga ko nabo bababazwa na bagenzi babo bakomeje kurenga ku mabwiriza bakabateza ibihombo nk’uko bivugwa na Kamanzi Godfrey

Ati”Ikibazo ni abantu wagira ngo ntibumva. Ariko biratubabaza cyane, njye nagize igihombo nabarira mu mafaranga miliyoni 2 kuko narwaje inka 3, imwe irapfa, izindi bapfa kumpa ayo babonye.”

Imyaka yatwawe

Iyi mvura yamaze amasaha agera muri 5, ikaba yaraguye amazi yayo yiyongera mu y’iyaguye tariki 6 nayo yari nyinshi maze Nyabarongo iruzura amazi ayivuyemo atangira guhura n’ay’utundi tugezi tuyegereye.

Ushinzwe ubuhinzi mu Murenge wa Murundi, Nshimiyimana Bernard aganira na Kigali Today yavuze ko n’ubwo ibyangijwe n’uyu mwuzure bitaramenyekana neza byose hari ibyamaze kumenyekana bigizwe n’imirima n’imyaka ndetse numwana w’imyaka 7 wari uvuye kwiga akaba yahise apfa.

Ati “Muri byo hari hegitari 150 zihurijweho ubutaka kuri site 8, buhinzeho ibishyimbo n’ibigori zarengewe, ibijumba, imyumbati, amateke, imboga byari ku buso bwa hegitari 50 byagiye, ihene 2 n’ingurube 3 zagiye, ubutuburiro bw’insina (Macro propagation) n’ubw’ibiti 3 bwagiye.”

Imihanda yangiritse

Arongera ati “Hanagiye kandi amateme 4 yahuzaga utugari tugize uyu Murenge ndetse n’iryawuhuzaga n’uwa Murambi nawo muri Karongi. Tubaze ibyo tumaze kumenya ariko hatarimo ubuzima bw’umuntu, twasanze bifite agaciro k’amafaranga miliyoni 350”

Avuga ko hari aho igice kinini cy’ubutaka cyagiye ku buryo kuzongera kuhahinga bizatwara gutegereza igihe kuko hasigaye ubutaka bwo hasi budashobora kwera.

Habimana Felix ni umuturage mu kagari ka Kareba ko muri uyu murenge wa Murundi akaba asanzwe ari umuhinzi w’icyitegererezo, yatangarije Kigali Today ko yatikije ibifite agaciro k’amafaranga angana na miliyoni 2.

Ati” Amazi yantwariye ari 60 zari zihinzeho ibijumba bya Orange na ari 40 zari zihinzeho ibigori, ni igihombo gikomeye nagize, nibura miliyoni ebyiri z’amafaranga ndazihombye. Ubuyobozi ni ukureba uko buduhuhiramo.”

imvura yangije imihanda

Bimwe ibyo uyu Murenge uri guteganya mu guhangana n’inzara ishobora guterwa n’iri yangirika ry’imyaka harimo gushishikariza imiryango y’abafatanyabikorwa kwihutira gutegura imishinga itanga akazi ku baturage bagahembwa ibyo kurya.

Hari kandi guhumuriza abaturage, kubasaba kwita ku bihingwa bihinze imusozi bitangiritse, kurwanya isuri, gushaka imigozi y’ibijumba bya oranje (Orange) byera vuba.

Amashyamba mu Rwanda asanzwe ari ku buso bungana na hegitari 704,997 ariko hari gahunda yo kongeraho ubundi buso bungana na kuri hegitari 9,105

Minisitiri wa MINILAF Tumushime Francine avuga ko u Rwanda rukeneye gutera ibiti n’amashyamba no kubungabunga ibisanzweho bigatanga umusaruro uhagije. Bigakorwa hagamijwe kubungabunga ibidukikije no guhaza serivisi nyinshi bikenewemo nko mu bwubatsi no gucanwa.

Atanga urugero rugaragaza uburemere bw’ikibazo avuga ko muri 2017 kuri toni miliyoni esheshatu z’ibikomoka ku mashyamba u Rwanda rukeneye, rufite toni miliyoni 1,2 gusa.

Agira ati “Ibikomoka ku mashyamba mu gihugu biracyari bike cyane bigatuma hari ibitumizwa hanze kandi turi kwimakaza umuco wo kwigira.”

Minisitiri Tumushime avuga kandi ko indi nzira yo kugera ku gisubizo ariko uko abantu bahagurukira gukoresha izindi mbaraga zifashishwa mu gucana nka gazi, Biogaz na Nyiramugengeri bakareka gukoresha ibikomoka ku mashyamba.

Avuga ko kubungabunga amashyamba ari bumwe mu buryo bwafasha u Rwanda kugera ku iterambere rirambye, kuko birufasha mu guhangana n’ikibazo kirwugarije n’isi yose cy’ihindagurika ry’ibihe.

Kugeza ubu mu Rwanda hateye amashyamba ku buso bwa hegitari 704,997.

Ikigo cy’igihugu gishinzwe amazi n’amashyamba cyemeza ko habura ubuso bwa hegitari 9,105 ngo u Rwanda rube ruteye amashyamba kuri 30% by’ubuso burugize.

Uyu mubare ngo waba uhagije mu kwihaza ku bikomoka ku mashyamba mu gihe waba utanga umusaruro ukwiye.

Muri urwo rwego Polisi y’igihugu yiyemeje kugira uruhare mu kubungabunga amashyamba, ifasha leta kongera ibiti biteye.

Kuri uyu wa Kabiri tariki 7 Ugushyingo 2017, MINILAF yagiranye amasezerano na Polisi y’igihugu y’imyaka itanu azatuma Polisi itera ibiti bivangwa n’imyakaibihumbi 22, inatere ibiti by’ishyamba ibihumbi ibihumbi bitanu.

Umuyobozi wa polisi y’u Rwanda IGP Emmanuel Gasana avuga ari mu rwego rwo gushyira mu bikorwa gahunda za Leta.

Ati “Muri kino gihe turi mu bibazo bikomeye by’umutungo kamere ukomeje kwangirika, aho leta yacu iri gushyira ingufu mu kuwubungabunga.”

IGP Gasana avuga ko gutera ibiti n’amashyamba bidahagije, kuko byagiye bigaragara ko biterwa bikangizwa. Avuga ko ari ho bagomba kuhashyira ingufu haba mu bukangurambaga no gukurikirana ko amategeko abigenga yubahirizwa.

Mu Rwanda amashyamba afatwa mu buryo butatu, hari amashyamba y’abaturage n’ibigo byigenga angana na 71%, hakaba n’aya Leta angana na 27% n’ay’uturere angana na 2%.

Radiographie, kimwe mu bikoresho bikoresha imirasire yangiza (Photo: internet)

Iyi mirasire igira ingaruka zitandukanye ku muntu, zigizwe n’izitinda zirimo kurwara kanseri n’ubugumba. Naho izishobora guhita zigaragara ku wangijwe n’iyo mirasire, harimo urupfu, kuruka cyangwa guta umutwe.

Umunyamabanga wa Leta muri MININFRA ushinzwe ingufu, Kamayirese Germaine avuga ko iyi mirasire ubusanzwe ikoreshwa hagamijwe ibikorwa byiza ariko yakoreshwa nabi ikagira ingaruka ku bantu.

Avuga ko kugeza ubu mu Rwanda ikoreshwa ku kigero cyo hasi cyane aho iboneka cyane mu buvuzi, ariko bagateganya ko iziyongera.

Yagize ati “Biri hasi cyane, yakoreshwaga nko mu bitaro muri za radiographie. Turi kwitegura ko iki kigero kigiye kwiyongera, kuko urugero mu Rwanda bavuraga Kanseri mu buryo bwo kubagwa, hagatangwa imiti ya kanseri (Chimiotherapie).

Umunyamabanga wa Leta muri MININFRA ushinzwe ingufu, Kamayirese Germaine

Yavuze ko hari gutegurwa uburyo bushya aho indwara ya kanseri izajya ivurwa hakoreshejwe uburyo bwa radiotherapie. Hakazajya hakoreshwa ibizwi nka Rayon Gamma, zoherezwa ako kanya mu mubiri imbere zigashiririza kanseri.

Ati “Ibi bishobora no kuzagera no mu buhinzi ndetse n’ahandi, niyo mpamvu dushaka kwitegura, iyo mirasire igakoreshwa haragenwe imikoreshereze yayo.”

Ikigo cy’igihugu gishinzwe kugenzura imirimo ifitiye igihugu akamaro (RURA), nicyo cyamaze guhabwa inshingano zo kugenzura imikoreshereze y’iyi mirasire hagamijwe kwirinda ingaruka zayo.

Abakozi ba RURA mu mahugurwa ku bufatanye n’ikigo Mpuzamahanga mu by’Ingufu (International Atomic Energy Agence, IAEA)

RURA ivuga ko kugeza ubu ahantu hamaze kumenyekana haboneka iyo mirasire ari kwa muganga ahakoreshwa ibyuma bifite imirasire izwi nka Rayon-X n’ibyifashishwa mu gusaka abantu (Scanner de sécurité).

Maj Nyirishema Patrick, umuyobozi wa RURA avuga ko hazakurikiraho gukora ubushakashatsi ku handi hose hakekwa nk’ahaboneka amabuye y’agaciro ashobora kuba afite iyo mirasire n’ahandi nk’uko bivugwa

Ati “Ni amahugurwa ya mbere, ariko hazagenda hanakurikiraho andi kugira ngo tubashe kubaka ubushobozi, tubone gushyiraho amabwiriza azagenga imikoreshereze y’iyo mirasire.”

RUR ivuga kandi ko ariyo ya mbere igomba kugira uruhare mu gukumira ingaruka zituruka kuri iyi mirasire.

Ikazabikora ibanza kugaragaza ahantu hose ishobora kuboneka hakamenyeshwa abantu ngo bahirinde no gushyiraho uburyo butuma imikoreshereze y’iyi mirasire muri serivisi zitandukanye, ntigire ingaruka ku bantu.

Aha abagore batwite ngo nibo baburirwa cyane kuko uturemangingo tw’abana batwite tuba tutarakomera, bikaba byabagiraho ingaruka kimwe n’abana batwise mu kwirema kw’ingingo, biturutse mu guca mu byuma bisaka.

Iyi mirasire yangiza iboneka cyane mu bihugu bikoresha uburyo bwo guhindurira imbuto imiterere hongerwamo uturemangingo tw’ikindi kintu (Genetic Modified Organism GMO) gifite ubudahangarwa, ibifite amabuye ya Uranium no muri bimwe mu byuma byifashishwa gupima imihanda.

U Rwanda rwasinye amasezerano yo guhangana n’imirasire yangiza muri 2010.

Umuyobozi w’umujyi wa Kigali (hagati wambaye umupira ujya gusa n’umweru) afatanya n’inzego z’umutekano gusukura umujyi

Atangaza ibyo mu gihe Polisi y’igihugu iri mu cyumweru cyahariwe ubukangurambaga ku isuku yateguye ku bufatanye n’umujyi wa Kigali, cyatangiye ku itariki ya 31 Ukwakira kikazarangira ku itariki 31 ukuboza 2017.

Nyamurinda avuga ko isuku nke ikigaragara mu bice bimwe by’umujyi ishingiye cyane ku myanda ituruka ku bikoresho biba byakoreshejwe.

Agira ati “Iyo turebye urwego dushaka kugeraho (mu isuku), dusanga mu ngo zacu, mu midugudu muri za ruhurura, mu mirima y’abaturage hari ahakigaragara umwanda cyane uterwa n’ibikoresho abantu bajugunya aho biboneye nk’uducupa n’ibindi.”

Akomeza agira ati “Ibyo nibyo tugira ngo bicike, n’umuturage mu mibereho ye ya buri munsi yumve ko kubona umwanda ari ikintu kidasanzwe.”

Polisi y’igihugu yo ihamagarira abatuye umujyi wa Kigali n’Abanyarwanda muri rusange kwita ku isuku kuko iyo ibuze, bihungabanya umutekano.

Polisi y’igihugu iri gufatanya n’abaturage gusukura umujyi wa Kigali

Ubwo yifatanyaga n’abatuye umujyi wa Kigali mu muganda wabereye mu Karere ka Kicukiro ku itariki ya 02 Ugushyingo 2017, Komiseri ushinzwe ibikorwa bya polisi, CP Butera Emmanuel yavuze ko isuku ari kimwe mu bigize umutekano w’Abanyarwanda.

Agira ati “Iyo isuku ibuze mu baturage, ni intandaro y’umutekano mucye, kuko nugira umwanda ubuzima bwawe ntibuzamera neza, uzarwara, ube wakurizamo no gupfa, icyo gihe umutekano uba wabuze, ni yo mpamvu twayihagurukiye, kuko dukeneye igihugu gitekanye.”

Abaturage nabo bemeza ko isuku nke ishingiye ku myumvire nk’uko bivugwa na Ntirandekura Emmanuel.

Agira ati “Umwanda tubona, si uko abaturage dukennye kuko uzarebe hari n’umukire utambuka ari mu modoka, akanywa amazi akajugunya ku muhanda cyangwa akihanagura na papier mouchoir akajugunya.”

Komiseri ushinzwe ibikorwa bya Polisi, CP Butera Emmanuel

Mugenzi we witwa Mukantabana Alice nawe ati “Ikibazo n’imitekerereze yacu, naho ubundi isuku nta kindi isaba.”

Ubwo bukangurambaga ku isuku bushingiye ku masezerano yihariye Polisi y’igihugu n’umujyi wa Kigali bafitanye agamije kubungabunga isuku n’umutekano.

Buzibanda ku gutema ibigunda, gukangurira abaturage kunywa amazi asukuye, gukaraba intoki, kwirinda kujugunya imyanda ahabonetse hose n’ibindi bikorwa by’isuku n’umutekano.

Guverineri Munyantwari avuga ko bagiye gukora urutonde rw’abateye abana inda bagahanwa

Ikibazo cy’abana b’abakobwa bari munsi y’imyaka 18 baterwa inda cyatunguye ubuyobozi muri iyo ntara, bituma abayobozi n’abarezi batunga agatoki ababyeyi badohotse mu burere baha abana babo.

Ntaganira Callixte ahagarariye ababyeyi mu ishuri ryisumbuye rya Ruganda riherutse kugaragaramo abana batatu batwaye inda muri uyu mwaka, nyuma yo gusanga hari n’abandi babiri babyaye mu mwaka ushize. Avuga ko intandaro y’icyo kibazo ari bamwe mu babyeyi badohotse mu gutanga uburere ku bana babo.

Agira ati “Ubu wumva ngo muri kiriya kigo hari inda zihari, nta mubyeyi wigeze ugenda ngo avuge ati ‘kuki umwana wanjye yatwise cyangwa yabyaye.’ Uburere ababyeyi b’ubu batanga ntabwo, ahubwo akenshi nibo batanga urugero rubi, aho na bo basinda, bagasambana abana bareba.”

Biyemeje kujya guhugura abandi bagore bakamenya kuganiriza abana babo kandi bakajya batanga amakuru

Nirora Clemantine, umunyeshuri wiga mu mwaka wa gatandatu muri iri shuri na we asanga uruhare runini ari urw’ababyeyi.

Ati “Nkatwe umuntu agera imbere ya mwarimu ari kumwigisha, ubundi aba arebererwa n’ababyeyi be. Ariko ababyeyi b’iki gihe ntibaganiriza abana ku buryo bagomba kwitwara, ahubwo rimwe na rimwe nibo usanga baduha ingero mbi.”

Mu nama yahuje inama y’igihugu y’abagore mu Ntara y’Uburengerazuba n’ubuyobozi bw’iyo ntara, niho icyo kibazo cyagaragarijwe.
Mukandekezi Francoise uhagarariye inama y’igihugu y’abagore avuga ko iyo mibare ikabije, nk’urwego rushinzwe kureberera umuryango by’umwihariko igitsina gore, bakaba badashobora kureberera.

Ati “Tugomba guhagurukira rimwe, cyane twe abagore kuko ibi ni ihungabana ry’imirayngo tureberera kandi duhagarariye.”

Munyantwari Alphonse, Guverineri w’Intara y’Uburengerazuba, avuga ko bagiye gukurikirana buri wese wagize uruhare mu gutera inda abo bana, ariko banakore ubukangurambaga ku bana n’imiryango yabo ku bijyanye n’ubuzima bw’imyororokere.

ati “Ikindi ni ugushyira imbaraga mu kumvisha ababyeyi kurushaho gutanga uburere, ariko kandi bagasobanurira abana babo ibijyanye n’ubuzima bw’imyororokere n’uburyo bagomba kubwitwaramo kuko na byo biri mu bituma ibi bibazo bibaho.”

Munyatwari kandi avuga ko abana benshi bakunze guhishira ababateye inda kubera kutamenya uburengenzira bwabo n’ingaruka bizabagiraho, bityo na bo bakaba bagomba kwegerwa bagahindura imyumvire.

Abahagarariye abagore bahawe umukoro ko babicishije mu mugoroba w’ababyeyi bagomba guhamagarira ababyeyi kongera kwisuzuma bakita ku bana babo.

Basabwe no kwihutira gutanga amakuru ku mwana wese wahohotewe, inzego zibishinzwe na zo zigashyikiriza ubutabera abo byagaragayeho.

Inkongi y’umuriro yibasiye igisenge cy’inzu

Abaturanyi ba Tabu bavuga ko iyo nzu yatangiye gushya mu masaha ya saa moya z’ijoro aho inkongi yamaze igihe kigera ku isaha yose,igisenge cyayo kirashya kirakongoka.

Umwana wo muri uru rugo avuga ko yatangiye kubona iyo nkongi iturutse mu gisenge cy’inzu, ari bwo yatabazaga abaturanyi kuko nyina atari ahari.

Agira ati “Nari nicaye mu cyumba kimwe, ngiye kumva numva inkoko irasakuje. Ndasohoka, ninjiye mu kindi cyumba nkinguye urugi mbona kiri kugurumana hejuru mu gisenge. Njyewe ndakeka ko haba habayeho nka ‘circuit’ y’amashanyarazi.”

Hifashishijwe kizimyamwoto zaturutse kuri sitasiyo ya ‘essence’ iri hafi aho n’umucanga maze babasha guhashya iyo nkongi mu buryo bugoranye.

Yari inkongi y’umuriro ikomeye

Tabu we amaze kumenya ko inzu ye yibasiwe n’inkongi yahise ahungabana, ntiyaza kureba ibyabaye.

Abaturanyi be bavuga ko yahise agenda baramubura bazi ko yagiye kwiyahura. Ariko ngo bakomeje kumushaka baramubona bahita bamushinga umukecuru baturanye amwitaho ijoro ryose.

Kuri ubu ariko ngo Tabu yakize ku buryo yabashije kwakira ibyamubayeho.

Kanyankore Eric umwe mu bagize uruhare mu kuzimya iyo nkongi avuga ko yari nyinshi ku buryo kwiyemeza guhangana nayo byasabaga ubutwari.

Agira ati “Kugira ngo twiyemeze kujya hejuru y’inzu gusambura ngo tubone uko tuzimya ariho duhereye kuko ariho inkongi yaturukaga byasabye ubutwari kuko abenshi babitinye. Hari hanashyushye cyane kandi mu gisenge harimo n’umwotsi mwinshi.”

Abaturage batabaye babasha gukura bimwe mu bikoresho mu nzu

Umuyobozi w’Umurenge wa Rubengera, Niyonsaba Cyriaque avuga ko icyo bakoze ari ukuba bashatse abacumbikira uwo muryango ugizwe n’uwo mugore n’abana batatu n’abuzukuru babiri, ariko hakaba hari no kurebwa ubundi bufasha bawuha.

Agira ati “Turacyanarebera hamwe icyo tuzafasha uyu muryango nk’umuganda w’abaturage mu gusana iyi nzu kuko bigaragara ko yangiritse cyane. Turanabivuganaho n’Akarere turebe ikindi kirenzeho yafashwa kuko n’ibikoresho byinshi byahiye.”

Niyonsaba avuga ko bikigoye kumenya neza agaciro k’ibyatwitswe n’iyo nkongi, gusa ngo abaturanyi hari bimwe mu bikoresho babashije guhita basohora, ntibyashya.

Avuga kandi ko kugeza ubu,igikekwa cyaba cyateye iyo nkongi, ari umuriro w’amashanyarazi.

Minisitiri Dr Gashumba yasabye umusanzu abajyanama mu kurwanya imirire mibi mu bana

Ni nyuma y’aho yari amaze gutaha inzu yubatswe n’abajyanama b’ubuzima muri aka Karere, bishyize hamwe ari 1611, bakubaka inzu ya miliyoni 350Frw.

Yagize ati” Kwita ku bana n’ababyeyi byatumye u Rwand aruza mu bihugu bya mbere byageze kuri gahunda y’ikinyagihumbi. Mbasabe mukomeze mudufashe, mwitange kugira ngo ikibazo cy’imirire mibi kikigaragara tukirandure”

Yongeraho ati “Twatangije gahunda y’Igikoni cy’umudugudu, iyi gahunda mukaba arimwe murangaza imbere nk’uko mwabikoze no mu kurwanya impfu z’abana n’ababyeyi.”

Minisitiri Dr Gashumba yabwiye aba bajyanama b’ubuzima ko akurikije umuhate asanzwe abaziho kucyo biyemeje, yizeye ko n’ibyo abasabye bitazatinda gushyirwa mu bikorwa.

Ku ruhande rw’abajyanama nabo ngo ibyo basabwe na Minisitiri biteguye kubyuzuza nk’uko bivugwa na Mukandayisenga Joseline.

Ati” Ibyo Minisitiri adusabye twabyumvise, kandi n’ubusanzwe dusanzwe turi nkore bandebereho. Tugiye kugenda mu midugudu yacu iwacu abe ariho habarizwa igikoni cy’umudugudu, tuzage tukigishirizamo ababyeyi ndetse n’abana bahafatire ifunguro ryuzuye.”

Nyiraminani Anne Marie nawe ati ” Ntago twifuza gushimimwa rimwe, dushimiwe iyi nyubako twagezeho, ariko kandi ubu dukurikijeho urugamba rwo guhangana n’ikibazo cy’imirire mibi nk’uko Minisitiri yabidusabye.”

Imibare iheruka y’ikigo cy’igihugu gishinzwe ibarurishamibare ivuga ko muri Karongi 49% by’abana bagwingiye, kandi iyi ndwara ikaba idakira, naho ibarura ryakozwe n’aka karere mu mpera z’ukwezi kwa gatanu uyu mwaka yo igaragaza ko abana 658 bafite imirire mibi, ariko ishobora kuvurwa igakira.

Abajyana b’ubuzima ku nyubako yabo bujuje

Iyi nyubako y’abajyanama b’ubuzima b’i Karongi yuzuye itwaye miliyoni 350RWf

Iyo nyubako yitwa "Agaciro Legacy" yuzuye itwaye miliyoni 350RWf, yatashywe ku mugaragaro na Minisitiri w’Ubizima, Dr Diane Gashumba, kuri uyu wa gatanu tariki ya 22 Nzeli 2017.

Iyo inzu ifite ibyumba 26, yubatswe n’amafaranga yatanzwe n’abajyanama b’ubuzima bibumbiye mu cyitwa “Karongi Community Health Workers Investiment Group (CHWIG)”. Bose hamwe ni 1611 baturuka mu makoperative 22. Buri koperative yatanze asaga miliyoni 15RWf.

Izakorerwamo ibikorwa by’ubucuruzi bitandukanye birimo Resitora, Farumasi (Pharmacies), utubari n’ibindi. Kugeza ubu ariko ntiratangira gukorerwamo kuko yuzuye neza muri Kanama 2017 yaratangiye kubakwa muri Gashyantare 2017.

Runombe Fulgence, umwe mu bajyanama b’ubuzima avuga ko batiyumvishaga uburyo bazuzuza iyo nzu.

Agira ati “Dutangira ntitwiyumvishaga ko tuzabigeraho ariko turabibonye kwishyira hamwe ntacyo bitatuma abantu bageraho. Ubu mfite icyizere cy’ejo hazaza kuko tugiye gutangira kunguka abana bacu bige neza, tubeho neza.”

Iyi nyubako izajya ikorerwamo ubucuruzi butandukanye

Patience Mazimpaka, ukuriye abajyanama b’ubuzima muri Karongi ahamya ko amafaranga yubatse iyo nzu nta nguzanyo irimo.

Akomeza avuga ko buri metero kare ku nyubako yo hasi bazajya bayikodesha 9000RWf n’aho ku nyubako yo hejuru bayikodeshe 5000RWf.

Mazimpaka ahamya ko bigenze neza bakabona abayikoreramo bajya binjiza miliyoni zirenga 7RWf ku kwezi.

Ayo mafaranga abajyanama b’ubuzima bashyize hamwe bakubaka iyo nzu y’ubucuruzi ni ayo Minisiteri y’ubuzima mu Rwanda (MINISANTE) igenera amakoperative y’abajyanama b’ubuzima buri gihembwe.

Ubwo Minisitiri w’ubuzima, Dr Diane Gashumba na Guverineri Munyantwari Alphonse bafunguraga ku mugaragaro iyo nyubako y’abajyanama b’ubuzima yitwa "Agaciro Legacy"

Iyabagenera bitewe n’uburyo banogeje serivisi basabwa gukora zirimo gushishikariza abaturage kuboneza urubyaro, kubakangurira kwirinda Marariya, gukangurira ababyeyi kubyarira kwa muganga, kurwanya imirire mibi n’ibindi.

Abajyanama b’ubuzima bo muri Karongi bavuga ko mu bihembwe bishize, buri koperative bagiye bayiha amafaranga ari hagati ya miliyoni imwe na miliyoni imwe n’ibihumbi 800RWf.

Imbere muri iyo nyubako

Iyi Bisi yakoze impanuka abari bayirimo ntihagira n’umwe ukomereka

Iyo mpanuka yabereye mu Murenge wa Rugengera mu Karere ka Karongi, mu ma saa sita zo kuri uyu wa kane tariki ya 21 Nzeli 2017.

Iyo bisi ifite nimero za puraki RAD273K, yakoze impanuka igeze ahantu hari ikorosi, ita umuhanda yegama mu muferege uri ruguru y’umuhanda.

Umushoferi wari uyitwaye avuga ko iyo mpanuka yatewe no kubura feri. Abagenzi na bo bahamya yagendaga ku muvuduko muto.

Nyuma y’igihe gito iyo mpanuka ibaye abo bagenzi bohererejwe indi modoka bakomeza urugendo rwabo bajya i Rusizi.

Abagenzi bari bayirimo bavuyemo ari bazima bakomeza urugendo

Abo bahinzi bavuga ko bakurikije igihe imvura imaze igwa, iyo baza kubonera imbuto ku gihe, ubu baba barateye ndetse byarameze.

Abahinzi bavuga ko barangije gutegura imirima yabo ariko imbuto y’ibigori ikaba ari yo kibazo

Uwera Honorine umwe muri abo bahinzi, avuga ko bafite impungenge z’uko iyi mbuto nikomeza gutinda, izasanga igihe cyo gutera cyarabasize bigatuma barumbya.

Yagize ati” Twakabaye twaramaze gutera ibigori byaratangiye kumera, ariko iyo tugeze ku bacuruza imbuto batubwira ko yabuze nabo bategereje, bakatubwira ngo izaboneka vuba aha.”

Akomeza agira ati” Icyizere ni gike ko umusaruro wazagenda neza, kuko nitunayibona ishobora kuzahura n’izuba ntibyere.”

Bizirema Felicien na we avuga ko imvura yagwiriye igihe kandi ibigori bisaba guhinga kare kugira ngo bizere neza. Uku kubura kw’imbuto rero ngo nta kabuza kuzateza ingaruka mu igabanuka ry’umusaruro.

Safari Fabien ushinzwe ubuhinzi mu Karere ka Karongi, avuga ko icyo kibazo cy’ibura ry’imbuto y’ibigori, cyatewe n’ Ikigo cy’igihugu gishinzwe guteza imbere ubuhinzi n’ubworozi, RAB, ari nacyo gifite mu nshingano gutumiza iyo mbuto hanze.

Ati” Icyo kibazo tumaze iminsi tukirimo, imbuto yo tumaze iminsi twohereza imodoka rimwe zikayibura, ubundi zikazana nke kuko nta yindi ihari. Ariko ntabwo umuntu yavuga ko ari ikibazo cy’imyiteguro yacu, ahubwo ikibazo ni uburyo imbuto igezwa mu gihugu.”

Safari akomeza agira ati” Nk’ubu tutabaze imbuto wenda abaturage baba baramaze kugenda bishakira ku ruhande, ariko twari twateganyije gukoresha toni 170 z’imbuto y’ibigori, ariko imaze kugera mu karere no ku baturage ni toni 16 zonyine.”

Gutinda kubona imbuto y’ibigori ngo bizatuma barumbya nibayibona batinze

Ku ruhande rwa RAB, Dr Ndabamenye Telesphore ushinzwe kwihaza mu biribwa no kongera umusaruro, ari nawe ufite mu nshingano imbuto ku rwego rw’igihugu, atangaza ko nta kibazo cy’imbuto gihari.

Ati “Ntabwo imbuto y’ibigori yabuze. Imbuto ihingwa mu misozi miremire nka Karongi ntiyigeze ibura, ahubwo imbuto yo mu misozi migufi niyo yari yabanje gutinda.

Impamvu itinda kugera ku bahinzi biterwa n’ubuyobozi bwabo bushyira imbaraga nke mu gukurikirana iby’iyo mbuto”.

Ukuriye abacuruza imbuto n’ifumbire mu Karere ka Karongi bazwi nka "Agro dealers", Ange Ngabonziza, ntiyemeranya na RAB ivuga ko imbuto y’ibigori ihari, ngo kuko kenshi bagiye bayitumiza, ariko RAB ikavuga ko itaraboneka.

Ati “Iyo duhamagaye ngo badutegurire imbuto tujye kuyizana i Kigali, batubwira ko ntayihari. Rwose twaranishyuye, ariko n’uwo twoherejeyo ejobundi yasanze muri stock nta ziriyo.”

Ikibazo cy’ibura ry’imbuto y’ibigori si muri aka karere gusa cyumvikanye, kuko kimaze iminsi kivugwa mu turere tw’igihugu turimo Musanze, Nyamagabe n’utundi.

Muri icyo kibaya ku nkombe z’ikiyaga cya Kivu niho ngo hatabye ubwo bwato bw’Abadage

Ubwo bwato bivugwa ko butabye ahazwi ku izina ryo mu Rwintare, akaba ari mu Mudugudu wa Kagugu, Akagari ka Sure, Umurenge wa Mushubati mu Karere ka Rutsiro, aho kagabanira n’aka Karongi.

Ambasaderi Masozera Richard, Umuyobozi wa INMR avuga ko ubu bwato bwageze mu Rwanda muri 1909 buzanywe n’Abamisiyoneri bitwaga Abaruteri bo mu Budage.

Akomeza avuga ko ubwo bwato mu ntambara ya mbere y’isi, bwaje kwifashishwa n’uwari ukuriye ibikorwa bya gisirikare by’Abadage mu Rwanda.

Uwo musirikare Abanyarwanda bitaga Tembage. Yari yarashyize imbunda nini izwi nka “Mitrailleuse” kuri ubwo bwato akabwifashisha mu kurwana n’Ababiligi bari muri Congo Kinshasa.

Agira ati “Uwo mukoloni yaje gutsindwa, acukura ku nkengero afatanije n’abaturage batabamo ubwo bwato kugira ngo babuhishe.”

Amb. Masozera avuga ko kubera isuri, uko imyaka yagiye igenda, ubwato bwarushagaho gupfukwa n’itaka ryinshi ku buryo na ba nyirabwo mu myaka ya 1988 bagarutse kubucukuramo, bukabananira.

Avuga ko ubu bwato ari kimwe mu bimenyetso bikomeye mu mateka y’intamabara y’Abakoloni bahanganye n’Ababiligi n’Abongereza, aho amateka yabwo yajya agaragara no mu ngoro y’umurage y’amateka y’Abadage mu Rwanda iri ahazwi nko kwa Richard Kant.

Ati “Kubucukura bizaba ari igikorwa kitoroshye, ikipe yacu iri gukora ubushakashatsi ngo turebe ko bwashobora gucukurwa. Dusanze ari gikorwa twakwishoboza cyaba ari ikimenyetso cyiza tuzifashisha mu gusobanura ayo mateka.”

Hagiye humvikana amajwi y’abaturiye ahavugwa ko hatabwe ubwo bwato,bivugwa ko bufungiyemo imitungo itandukanye irimo amabuye y’agaciro.

Aha niho ngo bacukuye bwa mbere bashaka ubwo bwato

Bimenyimana Onesme w’imyaka 57 avuga ko babishingira ku kuba ngo hari abagiye bacukura ahabaga Teritwari (Teritoire) ya Musaho ari naho habaga abo Badage, bakabihabona.

Akomeza avuga ko hari andi makuru afite avuga ko uretse ubwo butunzi muri ubwo bwato harimo n’ibikoresho bya gisirikare.

Agira ati ″Ubu bwato twabubwirwaga n’ababyeyi, ariko hari bimwe mu bimenyetso twari twatangiye kubona ubwo bahacukuraga. Nari kapita mu gikorwa abazungu bari batangiye cyo gucukura ngo tubukuremo muri 1988, ariko intamabara yo muri 1990 yateye tutarakigeraho."

Akomeza agira ati "Ariko iyo tubikorana ubushake, twari kukigeraho, ahubwo twacukuraga tugana ku ruhande kuko muri icyo gihe muri bino bice ahantu henshi, abantu bagendaga bacukura bakuragamo imari abo bazungu basize. Natwe rero twaravugaga ngo tubatinze barambirwe bagende, tuzabyicukurire.″

Bimenyimana Onesme yereka umunyamakuru wa Kigali Today ahatabye ubwo bwato

Rwasibo Raphael ufite imyaka 70 y’amavuko na we ati “Icyo gihe bacukura, twari twageze ahantu hari ibisima bifashe iminyururu iziritse ubwo bwato, ku buryo iyo dukomeza twari kubugeraho.

Ababyeyi batubwiraga ko harimo ubutunzi bwinshi, ariko urebye n’uburyo bariya bazungu bagarutse kubureba bifite icyo bivuze.”

Abo baturage bavuga ko atari abo bazungu bonyine bashatse gukuramo ubwo bwato, kuko ngo hari n’abantu batandukanye bajyaga bahaza rwihishwa, ariko bikarangira bibananiye.

Aba Dasso ba Karongi bashishikarizwa gutangira kwizigamira.

Babisabwe n’umuyobozi wabo Nzamurambaho Emmanuel mu nama bakoranye ku bufatanye n’Ikigo gishinzwe ibigega by’umugabane ku ishoramari (RNIT), kuri uyu wa Kane tariki 14 Nzeri 2017.

Yagize ati "Abenshi muri mwe muracyari ingaragu, ariko ejo muzaba mufite ingo n’imiryango. Ni ngombwa rero gutangira gutekereza uko amafaranga atari menshi umuntu abona yayabyaza inyungu, kandi birashoboka.

Yavuze ko icyo bibasaba ari ubushake kuko nta mafaranga yo guheraho aba make. Avuga ko icy’ingenzi ari ukubishyira mu mutwe.

Mugenzi Emmanuel umukozi wa RNIT arashishikariza aba Dasso kugana iki kigo.

Ati “Ukumva ko hari aho ushaka kuva n’aho ushaka kugera, noneho ugashyiraho ingamba mu nzira nyinshi igihugu kigenda giharura."

Abagize urwego rwa DASSO na bo bagaragaje ko inama bagiriwe n’ubuyobozi bwabo ziramutse zukurikijwe, byahindura ubuzima bwa benshi, nk’uko bivugwa na Mushimiyimana Immaculee.

Ati "Ibi bintu batubwiye byatumye nicara nitekerezaho nsanga koko hari igihe nataye, ariko bigomba kurangira uyu munsi, ngahindura nkareka kubaho nta ntego. Niba umuntu ahembwa amafaranga agera ku bihumbi 50, kuki agomba kurangirana n’ukwezi yose ashize!"

Mugenzi we witwa Mundere Innocent nawe ati “kwizigamira kuri njye si ibintu bishya, ariko bitumye ngiye kongeramo ingufu.”

Emmanuel Mugiraneza, umukozi wa RNIT avuga ko mu gushyiraho icyo kigo batekereje cyane ku bantu bafite ubushobozi buke, aho uguze imigabane atanga nibura 2.000Frw ahwanye n’imigagabane 100, akungukirwa 9.5% ku mwaka.

Ati “Ni amahirwe cyane ku bakozi basanzwe bafite umushahara muto, cyangwa abaturage bafite ubushobozi buke kuko uhereye ku musaruro w’uyu munsi muke, usanga nyuma y’igihe umeze neza.”

Mugiraneza avuga ko mu gihe cy’umwaka icyo kigega kimaze, gifite abanyamuryango basaga igihumbi.

Ibi bitunguru byose babihinze mu mpeshyi

Abatuye muri uwo mudugudu babarirwa muri 43 bihurije hamwe, bahuza ubuso bungana hegitari 40, babukoramo amaterasi babifashijwemo n’umushinga LWH.

Mu bihe bisanzwe by’ubuhinzi mu mwaka, abo baturage bahinga imyaka isanzwe nk’ibishyimbo n’ibigori kuri ayo materasi ariko mu gihe cy’impeshyi bagahingaho ibutunguru.

Abo baturage bamaze imyaka itatu bahinga ibyo bitunguru. Babihinga mu mpeshyi bakabivomerera kubera ko imirima yabo ikikijwe n’imiyoboro y’amazi aturuka mu mpinga z’imisozi bahingaho.

Mukandahiro M. Claire avuga ko amaze imyaka itatu ahinga ibyo bitunguru ku butaka bungana na are 32.

Ahamya ko mu mpeshyi yo mu mwaka wa 2016 ibitunguru yejeje yabigurishije agakuramo imihumbi 600RWf.

Agira ati "Aha hantu hagera kuri ari (Are) 32, mu gihe cy’izuba wasangaga nta kintu gihinzeho, ariko nk’umwaka ushize wonyine nahejeje ibitunguru nakuyemo ibihumbi 600RWf, ari nayo nakozemo ntanga ibihumbi 100RWf mbona umuriro.

Ubu ndarihirira umwana wanjye wiga muri kaminuza. Twararebye kandi dusanga tuba mu kizima kandi hakurya yacu barara bacanye, turavuga tuti twishyire hamwe tuzane umuriro natwe mu mazu yacu turabikora."

Mukandahiro M. Claire avuga ko amashanyarazi yashyize mu nzu ayakesha ubuhinzi bw’ibitunguru

Si uyu muturage wenyine uvuga uburyo guhinga mu mpeshyi bimwinjiriza amafaranga ku buryo amaze kwikura mu bukene.

Bahamya ko mbere batiyumvishaga uburyo mu gihe cy’impeshyi bahinga bakeza ariko ubu ngo bamaze kubona ko kuvomerera bifite akamaro gakomeye ; nk’uko Nsengimana Pierre abisobanura.

Ahamya ko guhinga ibitunguru bimwinjiriza atubutse kuko ibyo yejeje mu mwaka wa 2016 yabikuyemo ibihumbi 420RWf kandi yari yarabihinze bimutwaye ibihumbi 28RWf.

Agira ati ʺKubera ibitunguru, ndacana umuriro w’amashanyarazi, maze kugura ikibanza cy’ibihumbi 350RWF, kandi ndumva nzagera no ku bindi byinshi."

Uwo mushinga wo guhinga ibitunguru mu mpeshyi, bawufashijwemo kandi na Minisiteri w’Ubuhinzi (MINAGRI) yabakoreye imiyoboro y’amazi ikikije iyo mirima bahingamo.

Abo bahinzi bavuga ko ibyo bitunguru byerera amezi atatu. Iyo byeze babigurisha ku bantu batandukanye aho ikiro kimwe bashobora kukigurisha 500RWf. Ariko ngo hari n’abaza mu murima bagatigira bakagura ubutarasarurwa.

Umukozi ushinzwe imboga n’imbuto mu mushinga LWH, Tumusabemungu Jean de Dieu avuga ko bakomeza kuba hafi abo baturage babagira inama kandi banabafasha mu kubona ifumbire n’imbuto z’indobanure.

Bahinga ibyo bitunguru kuri hegitari 40

Umukozi ushinzwe iterambere ry’ibihingwa ngengabukungu mu Karere ka Karongi, Munyankindi Angelique avuga ko bari gushakira abo bahinzi uburyo bwizewe kandi buhoraho bwo kugurishamo umusaruro wabo.

Agira ati ʺUretse kuba bakunze kweza umusaruro wabo ushakwa na benshi, urumva niba umuhinzi bamusanga mu murima ahashobora no kubaho guciririkanya, haziramo kuba yahendwa.

Nk’Akarere turi kureba uburyo dufatanije n’Ikigo cy’igihugu gishinzwe kohereza mu mahanga ibikomoka ku buhinzi mu Rwanda (NAEB) twababonera isoko ryujuje ibyangombwa kandi rihoraho.ʺ

Kimwe muri ibi byuma bishyushya amazi byamaze kumanikwa muri Hotel Saint Jean.

Iyo ni intambwe ikomeye mu gukomeza guhanga udushya dukorerwa mu Rwanda, kuko bene ibyo byuma byari bisanzwe bitumizwa hanze.

Umuyobozi wa IPRC West, Ir Mutangana Frederic Avuga kandi ko ubu buryo buhendutse ugereranije n’uburyo busanzwe bwo gukoresha umuriro, cyangwa ubwo gukoresha imirasire y’izuba hifashishijwe ibyuma byatumizwaga hanze.

Agira ati ʺNi uburyo buhendutse, kuko twe dushyiramo uburyo niba hoteli yakoreshaga 200Frw kuri Kilowati ishyushya amazi, ubu buryo buzajya bubara bugabanijeho 20% kandi ikatwoherereza ubutumwa bugufi, ari twe na hoteli bakayibona ku buryo bwikoze.”

Iyi gahunda bayifashijwemo n’itsinda ry’impuguke zo Busuwisi.

Yavuze ko kiriya cyuma bagitangira ubuntu, kuko ubusanzwe umuntu ugitumije hanze akigura miliyoni 5Frw.

Ati “Icyo tukwishyuza ni ya mazi washyuhije kandi yakoresheje nayo agabanijeho 20% ku giciro gisanzwe. Icyo tugusaba ni ugukoresha icyo cyuma, nyuma y’imyaka 15 tukakikwegurira.”

Mu gutangira gukoresha ibyo byuma bahereye kuri Hotel Saint Jean ya Diyoseze Nyundo, iri mu Mujyi wa Kibuye.

Aka kuma ni ko kagira uruhare mu kumenya ingano y’amazi yashyuhijwe n’icyuma yakoreshejwe kakohereza ubutumwa k’ugakoresha no k’uwagakoze.

Padiri Utuje Theodose umuyobozi wayo yemeza ko mu guhitamo gukoresha ibyo byuma, babanje kwirebera uburyo kubyifashisha bihendutse.

Ati “Bari kudushyiriraho ibyuma bitatu kandi twizera ko bizadufasha. Mu kwezi twishyuraga umuriro ugera ku bihumbi 500Frw, uretse ko aha hahurizwaga n’ukoreshwa n’imashini ebyiri dufite zikoreshwa mu gikoni, ariko twizeye ko azagabanuka.ʺ

Niyonzima Denis umukozi wa IPRC West uri mu itsinda ry’abakoze icyo cyuma, avuga ko ubuziranenge bwacyo bwizewe kuko cyakorewe igerageza rihagije kandi bakanifashisha n’inzobere.

Ir Mutangana Frederic avuga ko bazahera ku bigo bikenera cyane amazi ashyushye, ariko bakazanagera no ku ngo bwite.

Ati: ʺTumaze umwaka wose tugerageza ubu buryo, tunarushaho kubonoza, kandi twisunze itsinda ry’impuguke zo mu gihugu cy’Ubusuwisi ku buryo nta mpungenge dufite kuri ibi byuma.ʺ

Avuga ko bagiye gutanga ibyo byuma bahereye ku bigo bisanzwe bikoresha amafaranga menshi mu gushyushya amazi nk’amahoteli, ariko ngo intego ni ukuzagera no ku baturage basanzwe.

Ubuyobozi burahamagarira aborozi kororera mu kiraro no gukingiza inka zabo

Ubuyobozi bw’Akarere ka Karongi butangaza ko mu minsi icyenda, inka esheshatu zo muri uwo murenge zari zimaze gupfa.

Dr Samson Ntegeyibizaza, umukozi w’Ikigo cy’igihugu gishinzwe guteza imbere ubuhinzi n’ubworozi (RAB) ushinzwe ubworozi mu Ntara y’Iburengerazuba, yatangarije Kigali Today ko ibizamini byagaragaje ko izo nka ziri kwicwa n’indwara yitwa ubutaka.

Agira ati “Mu nka zimaze gupfa, twapimye ebyiri kandi dusanga ari iyo ndwara yazihitanye. Iterwa n’agakoko gashobora kuba mu gisambu imyaka igera ku ijana nyuma y’uko haba haramenetse amaraso y’indi nka yari irwaye iyo ndwara.”

Akomeza avuga ko iyo inka irishije ahari utwo dukoko, ihita ipfa nta bindi bimenyetso byihariye bimara umwanya ibanza kugaragaza kuko utwo dukoko tugira ubumara bukomeye.

Yongeraho ko, mu guhangana n’iyo ndwara bari gukingira inka. Ahamya ko batangiye gukingira inka zo mu Murenge wa Mubuga n’izo mu mirenge bihana imbibi. Abwira aborozi kandi ko bakwirinda kuragira mu gasozi.

Dr Ntegeyibizaza avuga ko inka bigaragaye ko yishwe n’iyo ndwara, igomba guhita itwikwa.

Aborozi bavuga ko bahora bakangurirwa gukingiza inka ariko bamwe ntibabyitabire; nk’uko bivugwa na Ndayizeye Gedeon.

Agira ati “Ibi byose bihabwa icyuho no kutitabira gukingiza inka zacu kuko ubundi byakabaye buri mwaka. Ariko n’ubuyobozi sinabura kubutunga urutoki nk’abashinzwe kutureberera, usanga bibuka kutubwiriza gukingiza iyo hari indwara runaka yadutse iwacu cyangwa mu baturanyi.”

Mugenzi we witwa Mungwarakarama Eugene avuga ko kubera gukuraho gahunda zo kuragira ku gasozi, bigorana kugeza inka aho zikingirirwa.

Agira ati “Inka z’iki gihe ziragorana kubera kororerwa mu biraro, iyo uzisohoye, kuzigeza aho zikingirirwa zirakugora, ntiziba zizi kugenda. Kandi iyo usabye veterineri kuza kuyikingirira mu rugo agusaba kumutegera moto.”

Umuyobozi w’Akarere ka Karongi, Ndayisaba Francois yongera kwibutsa aborozi ko kuragira ku gasozi bibujijwe. Aho ngo byaba bikorwa ni uguca ubuyobozi mu rihumye.

Abahohoterwa cyangwa imiryango yabo batinda kugana ibigo byabashyiriweho

Kuva muri Nyakanga 2016 kugeza muri kamena 2017, iki kigo cyakiriye abakorewe ihohoterwa rishingiye ku gitsina 215, barimo 145 bakorewe ihohoterwa ku mubiri muri rusange (Physical Violence).

Abagera ku 160 bakorewe ihohoterwa ryakorewe ku gitsina (Sexuel violence), aho muri bo 157 ari igitsina gore, naho 3 gusa bakaba igitsina gabo.

Mu gihe muri rusange abakorewe iri hohoterwa ku gitsina bahabwa imiti irinda ubwandu bwa Sida naho irinda gusama igahabwa ab’igitsina gore bari mu gihe kibemerera gusama, mu 160, abahawe imiti irinda ubwandu ni 50 naho muri 157 abahawe imiti rinda gusama ni 31.

Ibi ngo byatewe no gutinda gutanga amakuru ku bahohotewe cyangwa imiryango yabo, byose kandi bikaba ingaruka z’imyumvire ndetse n’ubumenyi buke nk’uko bivugwa na Uwamariya Francoise uhagarariye iki kigo.

Ati ʺKubera ko umuntu ashobora kuba aribwo acyandura Virus ya Sida, twapima ntitubibone, niyo mpamvu uwafashwe ku ngufu wese duhitamo kumuha imiti irinda ubwandu.

Gusa nk’uko mubibona abenshi bahageraga igihe cyarenze, gusa ntawe twasanganye ubu bwandu.

Abayobozi batandukanye batambagizwa ibice bigize inyubako ya Isange One Stop Center Kibuye

Ku gitsina gore ho harimo nk’abana bari munsi y’imyaka 12 dufata ko badashobora gusama, ariko muri bariya 157, abana bari muri icyo kigero ntibarenze 20, ariko abo twabashije guha iriya miti irinda gusama ni 31 gusa kuko nabo bazaga bakerewe.

Ni ikibazo rero gishingiye ku myumvire n’ubumenyi buke, ariyo mpamvu uruhare runini turusaba inzego z’ibanze kuko nizo ziri kumwe na bariya bantu batugana, ngo zibigishe zongera ubukangurambaga.ʺ

Ku ruhande rw’abaturage bavuga ko guhishira amakuru ku ihohoterwa babiterwa n’impamvu zitandukanye nk’uko bivugwa na Nyiramasuhuko Pelagie.

Ati ʺN’umuco wacu utubuza kwishyira hanze. Muzi imvugo ngo ʺNi ko zubakwaʺ n’izindi. Ariko hari n’igihe tuba tutazi aho twageza ayo makuru.ʺ

Umuyobozi w’Akarere ka Karongi wungirije ushinzwe imibereho myiza y’abaturage, Mukashema Drocelle yavuze ko bagiye gukorana n’inzego zose guhera ku Mudugudu, bakajya bagenzura umunsi ku munsi ahakorwa ihohotera.

Ibitaro bya Kibuye bikorerwamo n’ikigo Isange One Stop Center Kibuye

"Igiti cy’Imana y’abagore" imashini yarakirimbuye cyose kuko hagiye kunyura umuhanda wa kaburimbo

Ku mugoroba wo ku cyumweru tariki ya 23 Kanama 2017, nibwo imashini ikora umuhanda Rutsiro-Karongi, yarimbuye icyo giti kuko cyari kiri ahagomba kunyura uwo muhanda wa kaburimbo.

Mu mizi y’icyo giti habagamo umwobo umeze nk’ubuvumo. Umugore wabaga yananiwe kubyara yinjiragamo agahita abyara. Icyo giti ngo cyanatumaga abakobwa bagumiwe babona abagabo ; nk’uko bivugwa na Habimana Amri.

Agira ati ʺNi igiti cy’amateka, natwe twavutse tubyumvana ababyeyi bacu. Umubyeyi yabaga ari ku nda yananiwe kubyara, akaza akinjiramo, agahita abyara.

Abakobwa babaga bagize imyaka myinshi batarabona abagabo nabo barazaga, bakahava babonye abagabo, niyo mpamvu tutifuza ko amateka yacyo yibagirana.ʺ

Kiriya giti imashini iri kurimbura ngo cyatumaga abagore bananiwe kubyara babyara neza ndetse ngo kigaha abakobwa abagabo

Mugenzi we witwa Munganyinka Leocadie agira ati ʺIgiti nka kiriya nticyakagombye gukurwaho, bari kureba uburyo bagica ku ruhande kuko gifite amateka akomeye ku Banya-Karongi.

Ariko niba n’ibyo bibaye, nibura nibahashyire ikimenyetso ku buryo n’abazavuka bazamenya ayo mateka.ʺ

Umuyobozi wungirije w’Akarere ka Karongi ushinzwe imibereho myiza y’abaturage, Mukashema Drocelle avuga ko uburemere bw’amateka y’icyo giti n’ubw’umuhanda uri gukorwa ntaho bihuriye, akaba ari yo mpamvu cyakuweho.

Avuga kandi ko nyuma yo kureba neza agaciro k’ayo mateka bashobora kuzafata umwanzuro wo kugira ikimenyetso bahashyira nk’uko bikomeje kwifuzwa n’abaturage.

Agira ati ʺUfashe ayo mateka yacyo ntago wayagereranya n’igikorwa remezo nk’umuhanda wahacishijwe.

Gusa tuzicara turebe uburemere bw’ayo mateka, noneho harebwe niba,nk’uko babyifuza hashyirwa ikimenyetso kibutsa ayo mateka.ʺ

Abaturage bifuza ko ahari "Igiti cy’Imana y’abagore" hashyirwa ikindi kimenyetso kigaragaza amateka y’icyo giti

Iyi nzu y’ubucuruzi niyo abajyanama b’ubuzima biyubakiye babikesha kwishyira hamwe

Abo bajyanama b’ubuzima bibumbiye mu ihuriro ryitwa ʺKarongi Community Health Workers Investment Group (CHWIG) ʺ iyo nzu bayubatse mu Murenge wa Bwishyura. Imirimo yose yo kuyubaka izatwara Miliyoni 295RWf.

Iyo nzu yatangiye kubakwa muri Gashyantare 2017. Biteganyijwe ko igomba gutahwa bitarenze impera z’ukwezi kwa Nyakanga 2017.

Izakorerwamo ibikorwa by’ubucuruzi bitandukanye birimo Resitora, Farumasi (Pharmacies), utubari n’ibindi.

Ihuriweho n’amakoperative 22 y’abajyanama b’ubuzima bo mu Karere ka Karongi, agizwe n’abanyamuryango 1164.

Mazimpaka Patience, umuyobozi wa CHWIG avuga ko ibi babikesha kwicara bakumva ko bagomba kwishyira hamwe kugira ngo begeranye imbaraga.

Agira ati ʺIbi byose turi kubigeraho kubera kwishyira hamwe kuko aya mafaranga yose nta nkunga irimo.

Ibi ni urugero rw’uko abishyize hamwe nta kibananira kandi tuzakomeza gutekereza n’indi mishinga migari ku buryo imibereho y’abanyamuryango bacu izakomeza guhinduka.ʺ

Iyi nzu izatahwa muri uku kwezi kwa Nyakanga 2017

Abajyanama b’ubuzima bibumbiye muri iryo huriro bavuga ko iyo nzu ibereka ko n’ibindi bazatekereza mu rwego rwo kwikura mu bukene bazabigeraho; nk’uko bivugwa na Bwantabire Yohani.

Agira ati "Nta kindi twarushije abandi, kitari ukumva ko ibintu bishoboka. Iyi nzu rero itweretse ko hari n’ibindi byinshi bikomeye twageraho tukarushaho gutera imbere. Ni icyizere rero cy’uko amasaziro yacu azaba meza.ʺ

Aya mafaranga bashyize hamwe ni ayo Minisiteri y’ubuzima mu Rwanda (MINISANTE) igenera amakoperative y’abajyanama b’ubuzima buri gihembwe.

Iyabagenera bitewe n’uburyo banogeje serivisi basabwa gukora zirimo gushishikariza abaturage kuboneza urubyaro, kubakangurira kwirinda Malaria, gukangurira ababyeyi kubyarira kwa muganga, kurwanya imirire mibi n’ibindi.

Abajyanama b’ubuzima bo muri Karongi bavuga ko mu bihembwe bishize, buri koperative bagiye bayiha amafaranga ari hagati ya miliyoni imwe na miliyoni imwe n’ibihumbi 800RWf.

Iyi nzu izakorerwamo ubucuruzi butandukanye

Muri uko kwishyira hamwe, ayo makoperative 22 yo muri ako karere, buri koperative yatanze Miliyoni 15RWf.

Umuyobozi wungirije w’Akarere ka Karongi ushinzwe imibereho myiza, Mukashema Drocelle avuga ko iyo nzu ari urugero rwiza n’abandi bareberaho bagashyira hamwe.

Agira ati ʺMu ntangiriro byari bigoranye kumvisha abantu ko bashobora kugera ku nzu nk’iriya, ariko ubu na bo ubwabo bari mu buryohe bukomeye nyuma yo kwibonera ko igeze ku musozo."

Kubona amazi meza bigiye kubafasha kurwanya umwanda

Abahawe ayo mazi bavuga ko umwanya bamaraga bajya gushaka amazi, ubu biteguye kuwushyira mu bindi bikorwa bibabyarira inyungu.

Abo baturage kandi bavuga ko amazi bahawe abafasha gukumira umwanda nk’uko bivugwa na Rurangwa Claver wo mu Kagari ka Nyarusazi, Umurenge wa Bwishyura

Yagize ati ʺNi ibyishimo, sinabona uko mbivuga, nk’uko mubibona dutuye mu misozi miremire, ku buryo kubona amazi twakoraga nibura ibirometero bibiri.

Icyo gihe cyose twataga mu gushaka amazi, tugiye kugishyira mu bikorwa bindi bibyara inyungu.ʺ

Munganyinka Adelphine wo mu Murenge wa Rubengera we ati ʺIyo udafite amazi, isuku irakugora. Ubu hehe n’umwanda mu ngo zacu.

Umuntu yagiraga ijerekani imwe akayicungacunga kugira ngo izamugeze ejo, ariko noneho amazi tuyafite ku irembo iwacu.ʺ

Umuyobozi w’’Akarere Ndayisaba François avuga ko uyu muhigo wo kugeza amazi meza ku baturage ari umwe mu yabashoboye kugerwaho 100%, ukaba weshejwe utwaye amafaranga asaga miliyoni 430FRW, agasaba abayegerejwe kuyafata neza.

Ati ʺNi kenshi twagiye tubona imiyoboro y’amazi yangirika kubera ko abaturage batayifata nk’iyabo.

Icyo tubasaba rero ni ukumva ko ayo mazi ari ayabo, gusa mu rwego rwo kubafasha kuyabungabunga twabashyiriyeho amakoperative azajya acunga aya mazi.

Umuturage azajya avoma yishyuye amafaranga atarenze icumi (10) ku munsi, aya akazakusanywa ku buryo yakoreshwa mu gusana icyaba cyangiritse.ʺ

Abantu bashyikirijwe amazi biganje mu bice by’imisozi miremire

Aba baturage kandi bemeza ko amafaranga 5 cyangwa 10 ku munsi ntacyo ahungabanije ku bushobozi bwabo.

Izo ngo 9000 zagejejweho amazi ziganjemo iziri mu misozi miremire, zibarizwa mu Mirenge ya Gashari, Mutuntu, Rubengera na Bwishyura.

Ubuyobozi bw’ako Karere buvuga ko buzakomeza gukora ibishoboka abagerwaho n’amazi meza bakiyongera kuko kugeza ubu abafite amazi meza ari 85% gusa.

Mu mwaka wa 2017-2018 ako Karere karateganya kongeraho ingo zisaga 5000.

Zimwe mu nka zagabiwe Abasesero barokotse Jenoside

Ubwo basuraga urwo Rwibutso, tariki ya 07 Kamena 2017, banagabiye inka 15 imiryango y’Abanya-Bisesero barokotse Jenoside yakorewe Abatutsi.

Abo bakozi babanje gusobanurirwa uburyo abashyinguye muri urwo rwibutso bishwe babanje kugira ubutwari budasanzwe aho bahanganaga n’ibitero by’interahamwe n’abasirikare bitwaje intwaro nini mu gihe bo bakoreshaga amabuye gusa.

Umunyamabanga wa Leta muri MINALOC, ushinzwe imibereho myiza y’abaturage, Dr. Mukabaramba Alivera, yahamagariye Abanya-Bisesero barokotse Jenoside gukomeza kurangwa n’ubutwari bagaragaje birwanaho.

Agira ati ʺUbutwari mwahoranye mwanakoresheje mu kwirwanaho munabukoreshe kugira ngo turwane no kuva mu ntambara y’ubukene, mubukoreshe mu iterambere.

Kandi ntabwo muri mwenyine kuko Leta y’u Rwanda ntizahwema kureberera abarokotse Jenoside yakorewe Abatutsi.ʺ

Umunyamabanga wa Leta muri MINALOC, ushinzwe imibereho myiza y’abaturage, Dr. Mukabaramba Alvera yahamagariye Abasesero gukomeza kurangwa n’ubutwari

Abahawe izo nka bashimiye MINALOC uburyo yabatekerejeho; nk’uko byavuzwe na Musabyimana Ezra.

Agira ati ʺNyakubahwa Minisitiri turabashimira kuba mwaricaye mugatekereza koroza abatishoboye barokotse Jenoside bari mu Bisesero ariko mudushimirire Perezida wa Repubulika uhora atureberera buri munsi mumutubwirire muti turamushimiye Abanya-Karongi by’umwihariko Abanya-Bisesero.”

Ikindi ni uko tuzorozanya, kandi kuva kera niwo muco w’Abanya-Bisesero ntawatungaga mugenzi we adafite icyo atunze.ʺ

Babanje gutemberezwa mu rwibutso rwa Jenoside rwa Bisesero

Muri gihe Abanyarwanda bakomeje Kwibuka ku nshuro ya 23 Jenoside yakorewe Abatutsi, MINALOC imaze gutanga inka 100 mu Mirenge yose igize Akarere ka Karongi.

Guverineri w’Intara y’Iburengerazuba Munyantwari Alphonse

Ubwo yifatanyaga n’abaturage b’Umurenge wa Rubengera muri Karongi mu muganda usoza ukwezi kwa Mata nibwo Guverineri w’Intara y’Iburengerazuba Munyantwari Alphonse yatangaje ko abagabo bakubita abagore bazajya bashyirwa mu ruhame bagasobanura ikibibatera.

Agira ati ʺBiriya bintu ni ubunyamusozi n’uwari ukibifite mu mutwe abihanaguremo, ubutaha tuzajya tureba izo ngo zibanye nabi, za zindi murara mukiza, badusobanurire. Umutekano twese dufite ugomba kugaragara mu ngo z’Abanyarwanda.

N’ubwo haba hari ibyo abantu batumvikanaho, barabiganira. Byanze nka Leta twemera ko banatandukana.

Ariko n’abatandukanye bagomba kubahana nk’Abanyarwanda, ntugomba kureba umuntu ngo ubone itama rye ribereye urushyi, cyangwa mu maso he habereye igipfunsi.ʺ

Akomeza avuga ko amakimbirane mu miryango ariyo mpamvu nyamukuru usanga bamwe mu bashakanye barahindutse nabi.

Ati ʺUvuye mu bana barindwi nawe avuye mu bandi barindwi, murabanye mukunduna mushobora gusangira ikiro cy’isukari kikamara ukwezi kuko muri babiri gusa. Ariko ugasanga nyuma y’umwaka umuntu yaracuye! Nta yindi mpamvu ni ya makimbirane.ʺ

Abaturage batandukanye bo muri Karongi basanga gushyira mu ruhame abahohotera abagore bizagabanya amakimbirane, nk’uko byemezwa n’uwitwa Ntawigira Yoramu.

Agira ati ʺIriya gahunda ni nziza, umugabo wakubise umugore bajye bamushyira mu ruhame, nibiba na ngombwa ahite ashyikirizwa inzego zibishinzwe ahanwe, kandi bizakuraho iki kibazo.ʺ

Mugenzi we witwa Uwiringiyimana Jacqueline agira ati ʺBizadufasha kuko uwakubise umugore nashyirwa imbere y’abaturage bose atazapfa kubyongera.ʺ

utunyana dutanu twavutse tutagejeje igihe tugahita dupfa

Inka y’uwitwa Habyarimana Francois utuye mu Mudugudu wa Gaseke, Akagari ka Bushaka, Umurenge wa Boneza, yaburaga ukwezi kumwe ngo ibyare.

Ibi ni ibyatangajwe na Nirere Etienne, Umunyamabanga Nshingwabikorwa w’uwo Murenge ku murongo wa telefone.

Yagize ati ʺIyi nka yaburaga ukwezi ngo ibyare kandi nawe unareba ubona ko izo nyana zaburaga igihe gito ngo zivuke.

Bwari ubwa gatatu ibyaye ariko izindi nshuro zose yari yaragiye ibyara imwe. ʺ

Uyu muyobozi yakomeje avuga ko inyana eshatu n’ibimasa bibiri iyi nka yaramburuye byahise bipfa, gusa nyina yo kugeza ubu ikaba imeze neza kandi izi nka zose uko ari eshanu ikaba yazibyaye bitayigoye.

Inka yabyaye yo ni nzima

Ngo kuba inka yabyara inka eshanu icyarimwe, ni ibintu bishoboka nk’uko bivugwa na Ntegeyibizaza Samson, ushinzwe ubworozi mu kigo cy’igihugu gishinzwe guteza imbere ubuhinzi n’ubworozi, (RAB) ku rwego rw’Intara y’Iburengerazuba.

Ati ʺBirashoboka ko inka mu gihe cyo gusohora intanga ngore igomba guhura n’intanga ngabo ngo zikore igi rizakora inyana, hasohoka nyinshi, zahura na ya ntanga ngabo hakavuka inka eshanu.

Cyangwa se mu gihe hasohotse intanga ngore imwe ikaba ari nayo ihura n’intanga ngabo, ariko mu mikurire yayo bitewe n’impamvu zidasanzwe zitandukanye zibaye ku buzima bwayo ikigabanyamo gatanu, hakavamo inyana eshanu.ʺ

Ntegeyibizaza yavuze ko kuba izi nyana zitabashije kubaho,bishobora kuba byatewe n’uko zari nyinshi nyina ntibe ikizibashije kugera zivutse, ikindi kandi ikaba yari inka nkuru ibyaye ubwa gatatu.

Umunara wa Karongi wifashishwa mu gusakaza KT Radio mu Burengerazuba kuri 103.3.

Kuva kuwa Gatanu tariki 13 Mata 2017, abatuye iyi ntara bari kumvira iyi radiyo ku murongo wa 103.3 Fm, nyuma y’uko muri iyi ntara hageraga radiyo ishatu gusa mu zivugira i Kigali.

Abatuye Intara y’Iburengerazuba batandukanye bavuga ko uyu murongo mushya ugiye kubakura mu bwigunge bamenya amakuru yabereye mu gihugu hose, nk’uko bivugwa na Karangwa Aphonse wo mu Karere ka Rutsiro.

Bamwe mu bagize itsinda ry’abatekinisiye bari mu gikorwa cyo gushyiraho iyi mirongo mishya ya KT Radio.

Yagize ati ʺAha mu gace kacu muri radiyo zivugira I Kigali twumvaga Flash na Radiyo Rwanda gusa, ariko twumvishe Kt Radiyo biradushimisha kuko amakuru yayo twajyaga tuyabona ku rubuga gusa akadushimisha, iyi radiyo rero iradufasha kuva mu bwigunge.”

Munyakayanza Thadee wo mu Karere ka Karongi, nawe ati ʺKuva kera nkurikira amaradiyo cyane, ariko numvise iyi nshya ya Kiti radiyo (KT Radio) numvise amakuru yayo azajya amfasha kumenya uko igihugu cyose kiriwe cyangwa cyaraye.ʺ

Bitembeka-Prosper-(Hagati), umwe mu bayobozi ba Kigali Today Ltd bakurikirana iki gikorwa.

Kanamugire Charles, umuyobozi w’ikigo cy’itangazamakuru cya Kigali Today Ltd, avuga ko ari muri gahunda yacyo yo kugeza ku banyarwanda bose amakuru y’igihugu cyabo.

Ati ʺNi mu rwego rwo kuzuza intego yacu yo kugera kuri buri munyarwanda aho ari hose, uri mu gihugu tukabikora cyane tubinyujije kuri radiyo ariko by’akarusho n’abari hirya no hino ku isi tukabageraho duciye kuri interineti ku rubuga.ʺ

Yavuze ko ari umurongo wa kane KT Radio ishyizeho, ukazakurikirwa n’uwa gatanu uzashyirwa i Mugogo mu Karere ka Nyabihu.

Ati “Umwihariko wacu ni ukwita ku makuru cyane kurusha izindi gahunda, tukayageza ku banyarwanda tubicishije k’mwihariko wacu na none wo kugira abanyamakuru mu gihugu hose.ʺ

Uyu murongo wa 103.3 uje usanga uwa 107.9 wumvikanira mu Burasirazuba (wasimbuye uwa 102), uwa 96.7 wumvikanira mu bice by’umujyi wa Kigali n’ahandi henshi mu gihugu, n’uwa 107.9 wumvikanira mu Majyepfo.

Umurongo mushya uri gukorwa ku munara wa Mugogo mu Karere ka Nyabihu wa 101.1 niwo ugomba kuzorohereza abatuye Intara y’amajyaruguru kubasha kumva neza KT Radio.

Nyuma yo kugira imirongo itanu mu gihugu, KTRadio ikaba aza ku mwanya wa kabiri nyuma ya Radio Rwanda mu kumvikana ahantu henshi mu gihugu.

Mugiraneza Modeste umukozi w’urwego rwa GMO avuga ko ihame ry’ubuiringanire ritubahirizwa mu maraporo akorwa

GMO itangaza ibi ivuga ko hari abashyira mu bikorwa ihame ry’uburinganire ariko ari nko kwikiza; nkuko Mugiraneza Modeste umukozi w’urwo rwego abisobanura.

Agira ati « Murebe mu gutegura igenamigambi ry’Akarere, rimwe na rimwe bagashyiramo ngo abagore aba n’aba bazahabwa imirimo mu gukora igikorwa runaka, nibura uhagarariye abagore ntiyigeze atumirwa ngo yicarane n’ukora iri genamigambi amwereke ibyafasha.ʺ

Akomeza agaragaza ko muri za raporo zitangwa ku mibereho y’abaturage naho hakagombye kwibandwa ku buringanire bw’impande zombi kugirango abagore n’abagabo bazamukire rimwe mu iterambere.

Ati ʺIyo muri raporo tuvuze ngo mu Karere runaka abaturage igihumbi bavuye mu bukene, ariko ntitugaragaze ngo abagore ni bangahe, abagabo ni bangahe nta hame ry’uburinganire riba ryubahirijwe.

Ibi kandi byanagarutsweho mu biganiro uru rwego rwagiranye n’abahagarariye inama y’igihugu y’abagore n’abashinzwe imibereho myiza mu turere twa Karongi na Rutsiro tariki ya 03 Werurwe 2017.

Muri ibyo biganiro hagaragajwe ko icyatuma abantu barushaho gusobanukirwa n’uburinganire ari uko isomo ry’Ubiringanire ryashyirwa mu masomo yigishwa mu mashuri.

Abahagarariye inama y’igihugu y’abagore n’abashinzwe imibereho myiza turere twa Karongi na Rutsiro bifuza ko ihame ry’uburinganire ryakwigishwa mu mashuri

Mukashema Drocelle, umuyobozi w’Akarere ka Karongi wungirije ushinzwe imibereho myiza y’abaturage abisobanura agira ati ʺNiba tubyibonera ko abantu benshi badasobanukiwe uburinganire, kuki bitashyirwa mu masomo yigishwa mu mashuri abantu bagakura babizi.ʺ

Butasi Herman nawe ushinzwe imibereho myiza mu Karere ka Rutsiro ahamya ko abantu batangiye kwiga iby’ubiringanire bakiri bato byazamura imyumvire.

Agira ati ʺGutangira kwigishwa ibijyanye n’uburinganire abantu bakiri abana byafasha mu guhangana n’ikibazo cy’ababyumva ukundi.ʺ

Nubwo batangaza ibi, ariko hibazwa uko bizagenda cyangwa ikizakorwa kugira ngo ihame ry’uburinganire rijye mu masomo yigishwa.

Abahinzi ba Kawa muri Karongi bishimira ko igiciro kuri Kawa y’ibitumbwe cyongerewe

Kuri ubu ikiro cya Kawa y’ibitumbwe kigura 264RWf mu gihe mu mwaka wa 2016 cyaguraga 150RWf.

Abahinzi ba Kawa b’i Karongi bavuga ko kuba igiciro cya Kawa cyazamutse bigaragara ko Leta ikomeje gushakisha icyatuma umuhinzi wa Kawa arushaho gutera imbere; nk’uko bivugwa na Karangwa Evode.

Agira ati ʺTwashimishijwe no kumva iyi nkuru, ubu umuhinzi wa Kawa arumva iyi sizeni (Saison) izamufasha muri byinshi kuko ariya amafaranga 264 ku kiro yenda gukuba kabiri ayo twari dusanzwe dufata.”

Mugenzi we witwa Sebahutu Aaron we agira ati ʺUmuhinzi wa Kawa amaze kumva icyo giciro aho yicaye arisetsa n’ubwo n’uwacyongera kurushaho bitatugwa nabi.ʺ

Abafite inganda zitunganya umusaruro wa Kawa nabo bavuga ko kugurira abahinzi kuri icyo giciro nta kibazo bibateye; nkuko bivugwa na Mutagengwa Gerard nyiri uruganda rwitwa Twumva Coffee.

Agira ati “Izamuka ry’igiciro nta kintu rizaduhombyaho, kuko NAEB (Ikigo cy’igihugu gishinzwe guteza imbere ibikomoka ku buhinzi n’ubworozi bw’ibyoherezwa mu mahanga) igishyiraho yabanje kureba uko bihagaze ku isoko mpuzamahanga, ubu rero natwe biradufasha kuko abahinzi barushaho kuduha Kawa nziza kandi nyinshi.ʺ

Umuhuzabikorwa wa NAEB mu Ntara y’Iburengerazuba, Albert Bizimana avuga ko ubu ari bumwe mu buryo bwo gushyigikira umuhinzi wa Kawa ariko anakangurirwa kurushaho kuyitaho.

Agira ati ʺIgiciro nk’iki kirafasha umuhinzi wa Kawa kurushaho kwiteza imbere, ariko na none iyo yishimiye igiciro arushaho kwita kuri Kawa ye bigatuma turushaho kugira Kawa nziza kandi nyinshi ku isoko mpuzamahanga.ʺ

Mu rwego rwo gukomeza kongerera ishyaka umuhinzi wa Kawa, mu Karere ka Karongi, abafite inganda za Kawa biyemeje kugura ikawa kuri icyo giciro cyashyizweho na NAEB ndetse bakongeraho 20 RWf ku kiro.

Intara y’Iburengerazuba yihariye 49% bya Kawa yose yoherezwa mu mahanga. Akarere ka Nyamasheke akaba ariko kaza ku mwanya wa mbere, mu gihe Akarere ka Karongi kaza ku mwanya wa kane.

Iyi nzu izaba igizwe n’igorofa imwe izajya ikorerwamo ubucuruzi

Iyi nzu, yubakwa mu Murenge wa Bwishyura izakorerwamo ubucuruzi butandukanye, ihuriweho n’amakoperative 22 y’abajyanama b’ubuzima bo muri Karongi,izo koperative zigizwe n’abanyamuryango 1164.

Mazimpaka Patience, umuyobozi wa CHWIG avuga ko iki gikorwa batangiye bagikesha kwishyira hamwe kugira ngo bahuze imbaraga.

Agira ati ʺIbi byose tubikesha kwishyira hamwe kuko aya mafaranga yose nta nkunga irimo.

Ibi ni urugero rw’uko abishyize hamwe ntakibananira kandi tuzakomeza gutekereza n’indi mishinga migari ku buryo imibereho y’abanyamuryango bacu izakomeza guhinduka.ʺ

Aya mafaranga bashyize hamwe ni ayo Minisiteri y’ubuzima mu Rwanda (MINISANTE) igenera amakoperative y’abajyanama b’ubuzima buri gihembwe.

Iyabagenera bitewe n’uburyo banogeje serivisi basabwa gukora zirimo, gushishikariza abaturage kuboneza urubyaro, kubakangurira kwirinda Malaria, gukangurira ababyeyi kubyarira kwa muganga, kurwanya imirire mibi n’ibindi.

Abajyanama b’ubuzima bo muri Karongi bavuga ko mu bihembwe bishize, buri koperative bagiye bayiha amafaranga ari hagati ya miliyoni imwe na miliyoni imwe n’ibihumbi 800RWf.

Muri uko kwishyira hamwe, ayo makoperative 22 yo muri ako karere, buri koperative yatanze miliyoni 15RWf.

Abajyanama b’ubuzima bibumbiye muri CHWIG bavuga ko igikorwa nk’icyo kibaha icyizere cyo kwiteza imbere mu gihe kiri imbere; nkuko bivugwa na Uwamungu Clemance.

Agira ati ʺUbu ndaryama nkabona ubuzima bwanjye mu gihe kiri imbere buzarushaho kuba bwiza, kuko biriya ni ibintu bigomba kutubyarira inyungu ku buryo burambye.ʺ

Umuyobozi w’Akarere ka Karongi, Ndayisaba Francois avuga ko iyi nzu iri mu bizatuma Umujyi wa Karongi urushaho kuba mwiza ndetse ikaba no mu bikorwa bigamije kuzamura ubukungu bw’abaturage.

Agira ati ʺNi igikorwa natwe tuzakomeza gukurikirana no kujya inama n’abanyamuryango b’ayo makoperative kuko inzu nk’iriya niyuzura izaba iri mu bituma umujyi wacu ugaragara neza.

Uretse ibyo rero, bariya banyamuryango nta gushidikanya ko bazarushaho gukomeza gutera imbere kuko izaba ibinjiriza.ʺ

Imirimo yo kubaka iyi nzu yatangiye muri Gashyantare 2017, bikaba biteganyijwe ko igomba kurangira mu mpera z’ukwezi kwa Gicurasi 2017.

Christian University of Rwanda ifite icyicaro gikuru mu Karere ka Karongi

Abamaze gutangira muri iyo kaminuza, yafunguye imiryango yayo mu Ukuboza 2016, bavuga ko bamaze kwizera ko nta bashomeri bazabamo, nkuko bivugwa na Munyantore Elie.

Agira ati “Tukigera hano twahise twumva ko tugiye guca ukubiri n’ubushomeri, aha umunyeshuri aratangira gutozwa kwihangira umurimo agitangira.

Aho dutangiye kwiga imishinga bakadufasha kuyinoza kandi bakaba baratwijeje kuyiha inkunga tukayitangira tukiri mu ishuri.”

Mugenzi we witwa Uwizeye Joseline avuga ko yageze muri Christian University of Rwanda agasanga hari itandukaniro n’ahandi.

Agira ati “Aha naje nzi ko ari amashuri nk’ayandi ariko ntaho bihuriye, no muri bimwe uzi nk’imikoro buri wese ahabwa uwe wihariye akawukorera muri konti ye yahawe ku buryo nta gukoperana.

Kimwe n’iyo mishinga iratandukanye, ariko yo abantu bashobora kwishyira hamwe bakawuhuriza hamwe, ariko pe nizeye ko ntakibaye umushomeri.”

Iyi Kaminuza ifite icyicaro mu Karere ka Karongi, ifitanye amasezerano y’imikoranire n’ikigo cy’imari cya Inkunga Finance Ltd.

Dr Habumuremyi Pierre, ukuriye abatangije CHUR avuga ko umubare w’abize kaminuza ukiri muke kandi ngo hashyizwemo kwita ku ireme ry’uburezi ntawarangiza ari umushomeri

Ayo masezerano atuma Christian University of Rwanda ifasha abayigamo gukora imishinga igahabwa inkunga; nk’uko bisabonurwa na Dr Habumuremyi Pierre Damien, ukuriye abashinze iyo Kaminuza.

Agira ati “Umwana azajya atangira mu wa mbere afite umushinga, Kaminuza imufashe kuwiga neza ku buryo mu wa kabiri Inkunga Finance Ltd, izajya ihita iwuha inkunga ugatangira gushyirwa mu bikorwa, akarangiza kwiga umushinga waratangiye kubyara inyungu.”

Dr Habumuremyi akomeza avuga ko kugira ngo iterambere rigerweho igihugu kigomba kugira nibura 5% by’abaturage bize kaminuza, kugeza ubu bakaba bataragera no kuri 2%.

Umuyobozi wa Inkunga Finance Ltd, Nsengimana Claudien avuga ko guhitamo gukorana n’iyi kaminuza ari uko basanze ifite imikorere yihariye aho iha agaciro ubumenyingiro.

Dr Gasana Sebastien, umuyobozi wa CHUR avuga ko bahisemo amashami bagendeye ku bikorerwa mu gace irimo

Ibi abihurizaho n’Umuyobozi w’iyi kaminuza, Dr Gasana Sebastien uvuga ko ikintu cy’ingenzi bashyize imbere ari ukugaragaza ireme ry’uburezi rikwiye.

Avuga kandi ko mu gushyira icyicaro muri Karongi bashingiye ku kuba ikikijwe n’uturere nka Rutsiro, Nyabihu, Nyamagabe, na Ngororero tutagira kaminuza.

Christian University of Rwanda yigisha amasomo ajyanye n’Ubukerarugendo, Ubuhinzi, n’ibindi bigaragara cyane muri utwo turere.

Bamwe mu banyeshuri ba CHUR basobanurirwa gahunda yo kwiga imishinga izatuma barangiza bafite ibyo bakora

Urubyiruko rwo muri Karongi ntirwitabira ibikorwa by’ubuhinzi.

Mbabarira Anastase, Umuyobozi ushinzwe ubuhinzi muri ako Karere, avuga ko nubwo nta kigereranyo kizwi, ariko bigaragara ko urubyiruko rugenda biguruntege mu buhinzi.

Agira ati ʺNta mibare ifatika ihari ariko biragaragara aho tunyura hose ko urubyiruko rutitabira ubuhinzi cyane , kandi si uko rufite ibindi rukora. Birasaba uruhare rwa buri wese kurushishikariza kwitabira ubuhinzi bwa kijyambere kuko butanga inyungu."

Mu cyumweru gishize, itsinda ry’abadepite rihagarariwe na Hon. Musabyimana Samuel, ryagiriye urugendo rw’iminsi 10 muri aka karere mu rwego rwo kureba aho kageze mu bikorwa by’iterambere. Gusa Hon.Musabyimana nawe yagaragaje izi mpungenge.

Ati ʺBigaragara ko urubyiruko ruritabira ibikorwa by’ubuhinzi cyane, kandi bizwi ko muri aka gace hera ikawa cyane, igihingwa tuzi ko gifitiye akamaro abayihinga. Birasaba rero kongera ubukangurambaga narwo rukagaragara muri ibi bikorwa.ʺ

Urubyiruko rwo ruvuga ko kutitabira ubuhinzi biterwa n’impamvu zitandukanye zirimo n’amikoro, nk’uko bivugwa na Murindabigwi Charles.

Ati ʺSi ukwanga ubuhinzi, ahubwo ni ukubura ubushobozi, nko kuba abenshi tutagira ubutaka bwo guhingaho, kuko usanga ari ubw’ababyeyi kandi nabo bakoresha.ʺ

Mukamurera Angelique nawe ati: ʺNtiwakora ubuhinzi bwa kijyambere utatse inguzanyo, ariko nk’urubyiruko nta ngwate tuba dufite.ʺ

Minisiteri y’Ubuhinzi n’Ubworozi (MINAGRI) igaragaza ko kugeza ubu, ubuhinzi bwihariye 31% by’ubukungu bw’igihugu. Nubwo itagaragaza ikigereranyo cy’urubyiruko, igaragaza kandi ko 75% by’Abanyarwanda batunzwe n’ubuhinzi, muri bo 52% akaba ari abagore.

Babangamiwe no kuba nta bwiherero buhari kandi hahurira abantu benshi bateze ibinyabiziga

Aha hantu, haherereye mu Murenge wa Rubengera, nubwo hamaze kumenyerwa nk’ahategerwa imodoka na moto cyane cyane izerekeza mu Karere ka Rutsiro, nta cyapa cyangwa ikindi kimenyetso kihagaragaza nk’ahagomba gutegerwa hemewe.

Igiti gihari kuba kitwa "Imana y’Abagore" byaturutse ku kuba ngo mu gihe cyo hambere umugore wese wabaga byananiye kubyarira mu rugo, iyo yakigeraga munsi yahitaga abyara.

Abagenzi bategera aho hantu ibinyabiziga bavuga ko bibagora kubona ubwiherero iyo bibaye ngombwa kandi ngo akenshi bahamara igihe kirenga isaha bategereje ibyo binyabiziga ; nk’uko bivugwa na Karangwa Jean.

Agira ati ʺIcya mbere, imodoka ya hano kugira ngo uzayibone uba uhamaze amasaha menshi utegereje, hari n’ababa bahategerereje bisi, ariko iyo umuntu akubwe bimusaba kujya mu ngo z’abaturage gutira ubwiherero.ʺ

Mujyambere Leonard ukora umurimo wo gutwara abantu kuri moto avuga ko nabo bibabangamira bitaretse n’abagenzi baba bagiye gutwara.

Agira ati ʺUretse natwe, hari igihe umugenzi mbere yuko umutwara akubwira ko akeneye kubanza kujya kwiherera ukabura aho umwohereza, rimwe na rimwe ukamujyana aho nawe usanzwe ujya gutira.ʺ

Si abagenzi cyangwa abatwara abantu gusa babangamirwa no kuba aho hantu hatagira ubwiherero kuko ngo n’abahaturiye batorohewe ; nk’uko umuturage utifuje ko izina rye ritangazwa abivuga.

Agira ati ʺNatwe ntibidushimisha kwirirwa ubona abantu bagukomangira bakubwira ngo batize ubwiherero, icyo gihe n’isuku yabwo iragorana.ʺ

Igiti cy’Imana y’avagore ni icyo kiri inyuma ya Bisi, kinini gifite amashami menshi

Umukozi ushinzwe gukurikirana ibikorwa by’ubuzima mu Karere ka Karongi, Sagahutu Jean Baptiste avuga ko icyo kibazo kizakemuka vuba, kuko hari ahategerwa imodoka hashya hagiye kubakwa muri uyu Murenge wa Rubengera.

Agira ati ʺIcyo kibazo turakizi, hariya hantu hategerwa n’abantu benshi ariko twafashe umwanzuro ko kuva ku itariki ya 15 Gashyantare (2017), ntawe uzongera kuhategera.

Igisubizo ni uko hagiye kubakwa gare nshya iruhande y’ahasanzwe Agakiriro, ni naho hagiye kubakwa ubwiherero, ariko hagati aho n’ubundi abantu barasabwa kuba batira ubwiherero mu baturage.ʺ

Ikibazo cy’ubwiherero ku hahurira abantu benshi no mu ngo z’abaturage kiragaragara ahenshi mu Karere ka Karongi ariko ntigikemuka burundu.

Inkuru ku "Mana y’Abagore" kanda hano: Ntibumva uburyo igiti kizwi nk”Imana y’abagore” kigiye gutemwa.

Umuyobozi wungirije ushinzwe imibereho myiza mu Karere ka Rutsiro, Butasi Herman avuga ko hari byinshi bagiye guhindura kuko bamenye ibiteganywa n’itegeko.

Kuwa kane tariki 26 Mutarama 2017, bagiranye inama n’ikigo cy’igihugu gishinzwe imiyoborere (RGB), ku bufatanye n’urwego rw’abanyamakuru rwigenzura (RMC) n’urwego rw’umuvunyi hagamijwe kubasobanurira ibijyanye n’iri tegeko.

Umuyobozi w’ishami rishinzwe itangazamakuru n’itumanaho muri RGB, Mbanda Gerard yavuze ko iyi nama bayiteguye kuko bazi neza ko abenshi mu bayobozi kandi barebwa cyane n’itegeko rigena imitangire y’amakuru batarifiteho ubumenyi buhagije.

Iri tegeko ryasobanuriwe abayobozi mu Karere ka rutsiro batandukanye ngo nabo bazarimenyeshe abaturage.

Ati ʺKuva itegeko rigena imitangire y’amakuru ryavugururwa, tuzi neza ko hari abayobozi benshi batabifiteho amakuru, kandi nibo basabwa gutanga amakuru buri munsi haba mu itangazamakuru ndetse no mu baturage, ariyo mpamvu twifuje kuganira n’abo mu Rutsiro uyu munsi."

Umuyobozi w’Akarere ka Rutsiro wungirije ushinzwe imibereho myiza y’abaturage, Butasi Jean Herman yavuze ko hari byinshi batari bazi kuri iri tegeko, bityo ngo ibyo basobanuriwe bikaba bigiye guhindura imikorere yabo cyane mu mitangire y’amakuru.

Abasobanuye ibijyanye n’iri tegeko baturutse muri RGB, m’urwego rw’Umuvunyi na RMC.

Ati ʺIki gikorwa twacyakiriye neza hano mu Karere kacu ka Rutsiro, ubuzima bwacu bwa buri munsi ni ugutanga amakuru ariko nta bumenyi twari tubifiteho, ubu rero hari byinshi bigiye guhinduka kuko hari abayobozi bamwe batangaga amakuru bigoranye cyangwa bitinze.ʺ

Ndayisenga Jean Baptiste umuyobozi w’Umurenge wa Gihango w’agateganyo nawe ati ʺHari byinshi tutari tuzi, nk’ubu twari tuzi ko amakuru uyaha umuntu iyo mwegeranye murebana gusa, ariko tumenye ko no kuri telefone cyangwa kuri interineti bymewe.ʺ

Umuyobozi w’ishami rishinzwe itangazamakuru muri RGB, Gerard Mbanda avuga ko abayobozi benshi bataramenya impinduka ku itegeko rigena imitangire y’amakuru.

Abayobozi mu nzego zitandukanye basobanuriwe ibijyanye n’iri tegeko, bahawe inshingano zo kurisobanurira abaturage nabo bakarimenya.

Iyo miryango yose izubakirwa inzu zimeze nk’iyi. Iyi ni iyubatswe mbere ngo yerekwe abazimurwa

Izo nzu ziri kubakirwa abo baturage bazimurwa, zizubakwa mu buryo bw’inzu imwe muri enye cyangwa "4 in 1". Bivuze ko inzu imwe izajya ibamo imiryango ine ariko buri muryango ufite igice cyawo wihariye.

Abo baturage bazimurwa ahazahingwa icyayi hangana na Hegitari 4000, mu Kagari ka Gitega bimurirwe mu kagari ka Ngoma, ahari kubakwa uwo mudugudu. Nibamara kwimurwa, buri muryango uzahabwa inka imwe.

Ikindi ni uko ngo iyo miryango izanahabwa amafaranga aguze ubwo butaka bazimukaho bityo akazabafasha kuba bagura ubundi butaka bahingaho nibamara kwimuka.

Izo nzu bazimukiramo zirubakwa ku bufatanye n’ikigo cy’igihugu gishinzwe kohereza umusaruro w’ubuhinzi mu mhanga (NAEB) na Minisiteri y’ubutegetsi bw’igihugu (MINALOC).

Biteganyijwe ko izo nzu 35 zigize uwo mudugudu zizuzura bitarenze Kamena 2017. Zose hamwe zizuzura zitwaye miliyari 1 na miliyoni 600RWf.

Nyuma yaho muri uwo mdugudu ngo hazubakwa izindi nzu 46 zizatuzwamo abandi baturage batandukanye barimo abatuye mu manegeka.

Umunyamabanga wa Leta muri MINALOC, Munyeshyaka na Guverineri Munyantwari bashyira ibuye ry’ifatizo ahari kubakwa umudugudu w’icyitegererezo wa Rugabano

Tariki ya 26 Mutarama 2017, ubwo Umunyamabanga wa Leta muri MINALOC, Munyeshyaka Vincent yatangizaga ku mugaragaro ibikorwa byo kubaka uwo mudugudu, yahamagariye abo baturage kwitabira gutura muri uwo mudugudu.

Agira ati ʺAbaturage ba Karongi by’umwihariko abatuye Rugabano bazatura muri uyu mudugudu icyo nababwira, uyu mudugudu ni uwabo bafate neza ibikorwa begerejwe.

Ariko muri rusange turasaba abaturage abishoboye n’abatishoboye kwitabira kuwuturamo.ʺ

Guverineri w’Intara y’Iburengerazuba, Munyantwari Alphonse yabwiye abo baturage ko kugera ku iterambere bisaba kugira ibyo umuntu yihanganira.

Agira ati ʺKugira ngo mugere ku iterambere bisaba ko mwihanganira impinduka zimwe na zimwe, kandi namwe mwagaragaje ko byabanje kubagora kubyumva, ariko ubu murishimye.ʺ

Abiteguye gutura muri uyu mudugudu bavuga ko mbere batabyumva ; nk’uko bivugwa na Mugabo Clement, umwe muri bo.

Agira ati ʺNtitwabyumvaga mbere, ariko twarasobanuriwe kandi inzu imwe imaze kuzura turayireba tukumirwa kubera ubwiza bwayo. Ntawabura gushimira ubuyobozi bwatekereje iki gikorwa.ʺ

Abagiye gutuzwa muri uyu mudugudu barishimira uburyo bazaba babayeho

Biteganyijwe ko umushinga witwa PSGL w’Abasuwisi nawo uzatanga inkunga yo kubaka ivuriro naho ikigega cya DFID gitange inkunga mu kubaka imihanda ijya muri uwo mudugudu.

Akarere ka Karongi ko kazubaka inzu imwe ya "4 in 1", kubake inzu mberabyombi kanageze muri uwo mdugudu umuriro n’amazi.

Abagore bo mu Karere ka Karongi bavuga ko abenshi mu bagabo badakozwa ibyo kubaherekeza bagiye gupimisha inda.

Iyi gahunda yo guherekeza umugore yashyizweho mu rwego rwo kugira ngo, bapimwe niba nta ndwara bafite ishobora kugira ingaruka ku buzima bw’umwana uri mu nda, bakanamenyeshwa hamwe uko ubuzima bw’uwo mwana mu nda buhagaze.

Abenshi mu bagabo ngo banga guherekeza abagore babo bavuga ko iyo gahunda ari iy’abagore nk’uko bivugwa n’uwitwa Mujawamaliya Clemantine.

Yagize ati ʺUmugabo wanjye narabimukojeje yari anyirengeje, ngo nta mugabo wagiye gupimisha inda, ngo ni iby’abagore.ʺ

Mugenzi we Uwiyera Francoise nawe ati ʺAbagabo mu kubyangira rero njye nabonye batanazi n’akamaro kabyo, uwanjye yarambwiye ngo ubwo ndamukekaho Sida, ati genda bagupime wowe wikeka, njye ndi muzima ndabizi.”

Abagabo batitabira guherekeza abagore babo ngo biri mu bibangamira abaganga bakurikirana ubuzima bw’umwana n’umubyeyi, nk’uko bivugwa na Yamfashije Herene, umubyaza mu kigo nderabuzima cya Rubengera.

Ati ʺIyo twakiye umubyeyi umwe ubuzima bw’umwana ntibuba bukurikiranywe uko byari biteganyijwe, biba byiza iyo ababyeyo bose tubakiriye hamwe, bagapimwa kandi bakanagaragarizwa n’uko ubw’umwana uhagaze bagahererwa amabwiriza hamwe.ʺ

Sagahutu Jean Baptiste, ushinzwe gukurikirana no kugenzura ubukorwa by’ubuzima mu karere, avuga ko ikibazo cy’abo ababyeyi batitabira kwipimisha gihari ariko bazakomeza gushyira imbaraga mu bukanguramabaga.

Ati ʺBiracyari ku kigero cya hasi cyane, aho mu gihembwe gishize twari kuri 22% gusa. Turi gushyira imbaraga mu bukangurambaga kugira ngo n’abagabo bumve ko bibareba kuko ubuzima bw’umwana bureba umuryango wose, umugore n’umugabo.ʺ

Iyi gahunda iba ireba umugore ugiye gupimisha inda bwa mbere aho agomba kujyana n’umugabo we, ariko akaba ashobora kwakirwa mu gihe agaragaje impamvu ituma umugabon ataboneka, ari naho benshi bashakisha impamvu mpimbano kuko babyanze.

Iri soko riremwa cyane n’abaturanyi bo muri Congo Kinshasa bambuka baciye mu Kivu.

Iri soko risanzwe riremera iruhande rw’ahari kubakwa isoko mpuzamipaka rya Karongi, ryari risanzwe rirema ku wa gatanu none hongeweho no kuwa kabiri.

Umuyobozi w’Akarere ka Karongi Ndayisaba Francois, avuga ko uyu mwanzuro bawufashe mu rwego rwo gutangira gutegura abazarema isoko mpuzamipaka riri kubakwa.

Ryegereye neza ku kiyaga cya Kivu.

Agira ati ʺNi mu rwego rwo kugira ngo abantu barimenyere, abarizagamo umunsi umwe cyane abaturanyi bo muri Congo bajye barizamo kabiri mu cyumweru. Nabwo nitubona bamenyereye tubigire buri munsi kugira ngo ririya riri kubakwa rizabone abarigana."

Abarikoreramo bemeza ko ari bumwe mu buryo bwo gutuma inyungu barikuragamo yiyongere nk’uko bivugwa na Nzabamwita Alphonse uricururizamo ibitoki.

Ribonekamo ibiribwa bitandukanye.

Ati ʺNiba nacuruzaga umunsi umwe mu cyumweru nkagira inyungu mbona, birumvikana ko noneho nzajya nyikuba kabiri mu cyumweru. Ni ibintu byo kwishimira, abayobozi bacu batweretse ko bahora badutekerereza.ʺ

Mugenzi we Nyinawumuntu Alice nawe ati ʺByaradushimishije kumva icyo cyemezo. Ubu n’abo twahorerezaga ibicuruzwa baturusha ubushobozi bajyaga batugaya ariko tuzabasha kuboherereza inshuro nyinshi mu cyumweru.ʺ

Kuba isoko mpuzamipaka riri kubakwa ryegereye aharemera iri biriha amahirwe yo kuzabona abaryitabira.

Urimubenshi Aimable, umuyobozi w’Urugaga rw’abikorera (PSF) mu Murenge wa Bwishyura akaba n’umwe mu bagize iki cyifuzo, avuga ko inyungu zitari gusa ku bakorera cyangwa abarema iri soko.

Ati ʺIyo ririya soko ryaremye n’utarikoreramo ucururiza muri uyu mujyi yinjiza menshi kuko Abanye-Congo baba baje kurirema ari benshi, kandi iyo baje bagera no mu mujyi hose bagahaha.ʺ

Me Gatari Stiven, umunyamategeko muri GLHID avuga ko hari abagwa mu cyaha cyo gukuramo inda kandi bari bafite uburyo bubarengera

Mukamana Pelagie, utuye mu Murenge wa Bwishyura avuga ko atariyumvisha uburyo gukuramo inda byemewe kandi hari abazikuramo bakabihanirwa.

Agira ati « Tujya twumva ngo haje itegeko ryemerera abantu gukuramo inda, ariko ntituzi ngo biva he bikajya he, kandi byagorana kubinsobanurira kuko tubona n’ubikinishije afatwa agafungwa. »

Mugenzi we witwa Maniriho Anne mu gace atuyemo batazi ibijyanye n’itegeko ryo gukuramo inda kuko ntawe uraribasobanurira.

Agira ati ʺIryo tegeko twarimenya gute ko ntawe uraridusobanurira haba mu nama cyangwa ku muganda? Tuzi ko ukuyemo inda afatwa agafungwa nta kindi. Cyeretse ahari ugize uburwayi ikikuramo.ʺ

Umuryango uharanira uburenganzira bwa muntu mu biyaga bigari (GLHID) ubushakashatsi nabwo bugaragaza ko hari abatarasobanukirwa n’itegeko ryo gukuramo inda.

Uyu muryango uvuga ko kuba abantu badasobanukiwe n’iryo tegeko, aribyo bituma bagwa mu makosa kandi nyamara hari uburyo bagombaga gucamo ntibahanwe ; nkuko Me Gatari Stiven, umunyamategeko muri GLHID abisobanura.

Agira ati ʺKutarisobanukirwa ni byo bituma ubona abagore cyangwa abakobwa bafungwa kuko bakuyemo inda kandi nyamara hari inzira bagombaga gucamo bakemererwa gukuramo inda.ʺ

Mukandekezi Francoise, umuhuzabikorwa wa CNF ku rwego rw’Intara y’Iburengerazuba ahamagarira abo bahuje inshingano gusobanurira abagore n’abakobwa ibijyanye n’itegeko ryo gukuramo inda

Mukandekezi Francoise, umuhuzabikorwa w’inama y’igihugu y’abagore (CNF) mu Ntara y’Iburengerazuba nawe yemeza ko abarebwa n’iri tegeko batararisobanukirwa.

Agira ati ʺNi byo koko ubajije abagore n’abakobwa bo mu cyaro ntiwapfa kubona abazi iri tegeko kandi nibo rireba cyane. Ni yo mpamvu rero twe nk’abahagariye bagenzi bacu dusabwa gukora ibishoboka bakarigiraho amakuru.ʺ

Itegeko ryo gukuramo inda rivuga ko nta buryozwacyaha ku mugore no ku muganga wakuyemo inda bitewe no kuba yakoreshejwe imibonano mpuzabitsina ku ngufu; yarashyingiwe ku ngufu; yatewe inda n’uwo bafitanye isano ya hafi kugera ku gisanira cya kabiri; no kuba inda itwiswe ibangamiye cyane ubuzima bw’umwana cyangwa ubw’umubyeyi.

Uku kutaryozwa icyaha kwemerwa iyo nyirugusaba gukurwamo inda yagaragarije muganga icyemezo cy’urukiko rubifitiye ububasha cyemeza kimwe muri ibi cyangwa bigaragarijwe urukiko n’ukurikiranyweho icyaha cyo gukuramo inda.

Gusa ariko umuryango GLHID uvuga ko iryo tegeko naryo ricyirimo ibigora ushaka gukuramo inda.

Abatuye umurenge wa Mukura muri Rutsiro barinubira amafaranga ibihumbi 10RWf acibwa uwabyariye mu rugo

Abaturage baganiriye na Kigali Today, bayitangariza icyo kibazo, ntibemera ko amazina yabo atangazwa.

Umwe muri bo agira ati “Baduca ibihumbi icumi (10000RWf) iyo utabyariye kwa muganga ariko tubona ari akarengane kuko bishobora no gutungura umubyeyi wari utwite mu gihe yari atarajya kwa muganga.”

Mugenzi we nawe ati “Turabizi ko kubyarira kwa muganga ari byiza kuko abaganga babasha kwita ku mubyeyi, ariko na none guca ibihumbi 10 utashoboye kujya kubyarirayo. mbona ari akarengane gakomeye, hari n’igihe bayaguca kandi wabyariye mu nzira uri kujyayo.”

Umunyamabanga nshingwabikorwa w’Umurenge wa Mukura w’agateganyo, Icyizihiza Alida avuga ko bashyizeho ayo mafaranga kugira ngo bagerageze kugabanya imfu z’ababyeyi bapfa babyara.

Agira ati “Muri uyu Murenge hagaragaraga imfu nyinshi kubera abaturage babyarira mu urugo, ariya mafaranga rero ni amande kugira ngo babyumve cyane, yumve ko natajya kubyarira kwa muganga ahanwa.”

Akomeza avuga ko nta mubyeyi upfa gutungurwa n’inda kuko abajyanama b’ubuzima baba bakurikiranira hafi ababyeyi batwite bari mu Midugudu.

Ikindi ngo ni uko iyo bibayeho bagasanga koko umuntu yatunguwe ntabwo acibwa ayo mafaranga.

Uyu muyobozi ariko ntavuga umubare w’ababyeyi baba baritabye Imana bazira kubyarira mu rugo.

Umuyobozi w’Akarere ka Rutsiro, Ayinkamiye Emerance avuga ko agiye gukurikiran iby’icyo kibazo

Umuyobozi w’Akarere ka Rutsiro, Ayinkamiye Emerance avuga ko ibyo bintu ntacyo abiziho akaba agiye gukurikirana.

Agira ati “Nta makuru mbifiteho, wenda umuntu yakurikirana, gusa urumva ko ari uburyo bwo gukangurira abantu kubyarira kwa muganga.

Ariko nawe urumva ko icyo giciro ari kinini kandi sintekereza ko baba baragishyizeho babanje kumvikana n’abaturage.”

Ababyeyi b’i Rubavu basiga impinja ku mupaka bakajya gukorera amafaranga i Goma (Photo Archives)

Icyo cyemezo gifashwe nyuma yo kubona ko ababyeyi batandukanye bo mu Karere ka Rubavu bakomeje gusiga abana babo ku mupaka ahazwi nka "Petite Barrière" bakajya gukorera amafaranga i Goma, abana bagasigara bicwa n’inzara n’izuba.

Guverineri w’Intara y’Iburengerazuba, Munyantwari Alphonse avuga ko hari ingamba zagiye zifatwa ariko zikaba zitaratanze ibisubizo bihamye.

Agira ati "Hari ingamba zagiye zifatwa ariko ikibazo nticyashira. Ubu rero tugiye guhera ku babyeyi tuganire nabo tumenye abo ari bo.

Ikindi hagiye gushyirwaho amarerero kugira ngo mu gihe abo babyeyi bagiye gucuruza abana basigare berererwa ahantu hizewe n’ababyigiye."

Abana basigwa kuri uwo mupaka biganjemo impinja zitaranageza ku myaka ibiri y’amavuko. Rimwe na rimwe usanga izo mpinja ziri kurerwa n’abandi bana baba bataye ishuri, bagahembwa amafaranga make.

Sinamenye Jeremie, umuyobozi w’Akarere ka Rubavu avuga ko uburyo bw’amarerero buzafasha mu kurandukara ikibazo cy’ababyeyi basiga abana babo ku mupaka.

Akomeza avuga ko icyo kibazo kigaragara cyane mu mirenge ya Nyamwumba, Gisenyi, Rugerero, Rubavu na Cyanzarwe. Akomeza avuga ko mirenge ya Rubavu na Gisenyi ariho bazahera bashyira ayo marerero.

Bamwe mu bana bata ishuri bakajya kurera impinja ziba zasizwe ku mupaka, bagahembwa

Tariki ya 23 Ukuboza 2016, ubwo Urwego rushinzwe kugenzura iyubahirizwa ry’ihame ry’uburinganire (GMO) rwagiranaga ibiganiro n’ubuyobozi bw’Intara y’Iburengerazuba, rwabwiye ubuyobozi bw’iyo ntara ko abana basigwa na ba nyina ku mupaka bagiye gucuruza muri Congo, ari ihohotera babakorera.

Rose Rwabuhihi, umuyobozi mukuru ushinzwe gukurikirana iyubahirizwa ry’uburinganire muri GMO yavuze ko ari ikibazo gikomeye gikwiye gushakirwa umuti.

Agira ati ʺNi ikibazo gikomeye, uhasanga abana bato barimo abahetse barumuna babo basigiwe na ba nyina bagiye hakurya muri Congo gucuruza. Iryo rero ni ihohoterwa rikorerwa abo bana kandi rigomba gucika.ʺ

Guverineri Munyantwari avuga ko hagiye gushyirwaho amarerero yo kurereramo abana basigwa ku mupaka

Ikibazo cy’ababyeyi basiga abana babo ku mupaka bakajya gushaka amaramuko muri Congo cyavuzwe kuva mu myaka ishize.

Bagiye bakoreshwa inama kenshi ngo hashakwe umutiwacyo ariko ntihaboneke umwanzuro uhamye.

Inzego zishinzwe abinjira n’abasohoka zivuga ko umunyagihugu wese agomba gusohoka mu gihugu afite urupapuro rubimwemerera.

Ababyeyi basiga abana ku mupaka bavuga ko bo ubwabo kwambuka bajya muri Congo biborohera kuko berekana indangamuntu gusa bakambuka mu gihe ngo bari kumwe n’abana babo basabwa urupapuro rw’inzira.

Impamvu abo babyeyi berekana indangamuntu gusa ni uko abaturage bo mu mirenge ihana imbibi na Congo bemerewe kwambuka berekanye indangamuntu gusa. Ariko bakaba batarenza umunsi umwe batarataha mu Rwanda.

Abo babyeyi bakomeza bavuga ko ibihumbi birenga 10RWf basabwa nggo babone urupapuro rw’inzira rw’abana babo, ari menshi kuburyo kuyabona bibagoye. Iki kandi ngo kubona amafaranga bahemba abakozi barera abana babo biragoye.

Abagize koperative mu gikorwa cyo gufata Kawa yo kunywa.

Ni nyuma y’uko ubuyobozi bwa Koperative bufashe umwanzuro wo kujya bugira Kawa iteguye bugenera buri munyamuryango, kugira ngo nawe abashe kumenya uburyohe bwa Kawe ye kuko aba ariwe wayivunikiye.

Iki gitekerezo bakigize nyuma yo kunengwa muri rusange na Perezida Paul Kagame, ubwo yari mu Karere ka Karongi mu kiganiro yagiranye n’abavuga rikijyana mu kwezi kwa Gatanu uyu mwaka.

Abanyamuryango ba Kopakaki Dutegure mu nteko rusange.

Perezida Kagame yagaragaje ko abanyarwanda benshi barimo n’abayobozi batazi uko Kawa y’u Rwanda imera kandi iba yaturutse mu mirima y’abanyagihugu, ahubwo bakabibwirwa n’abanyamahanga mu gihe bo banywa ibimeze nk’ibisigazwa byayo.

Ntawugashira Frodouard umuyobozi w’iyi Koperative agira ati “Nyakubahwa Perezida wa Repubulika ubwo aheruka kudusura yavuze ririya jambo twese twumva turigaye, nahise ntekereza ku banyamuryango bacu babyuka buri munsi bajya mu mirima gukorera iyo Kawa.

Nasanze koko batazi uko iyo Kawa beza iryoha uretse kubibwirwa n’abanyamahanga baza kuyitugurira. N’ubwo tutaragera ku ruganda ruyitunganya ariko twahise twiyemeza ko aho twayitanze nyuma yo kuyitunganya bazajya batugarurira iyo duha abayivunikiye.”

Mu Nteko rusange y’iyi koperative yateranye tariki 9 Ukuboza 2016, buri munyamuryango yagiye ahabwa garama 500 z’Ikawa itunganyije banasobanurirwa muri rusange uburyo bwo kuyitegura aho bagaragaje ko ari igikorwa cyabashimisjije cyane.

Habarurema Michael ati “Ibi bintu biradushimishije, twajyaga twumva ngo Kawa yacu iraryoha ariko twe ntawe urasomaho. Banatwigishije uburyo tuzajya tuyiteka kandi batwizaze ko bazajya baduha indi kugira ngo natwe nk’abahinzi bayo tumenye ibyiza byayo.”

Mugenzi we Uwambajemariye Dativa nawe ati “Ibi biri mu kwihesha agaciro nk’uko umuyobozi w’igihugu ahora abivuga. Dushimishijwe no kuba ntawe uzongera kuturatira uburyohe bwa Kawa yacu kandi aritwe twayihingiye.”

Umuyobozi w’Akarere ka Rutsiro Ayinkamiye Emerance avuga ko kwandikisha umwana biri mu kumuha agaciro ke.

Kuva tariki 23 Ugushyingo 2016 mu gihugu hatangijwe ukwezi kwahariwe irangamimerere, aho abari baracikanywe kwandikisha abana bakomorewe bakabasha kubandikisha nta kindi basabwe.

Ayinkamiye avuga ko kwandikisha abana batari banditse bizoroshya mu kumenya imibare nyayo y’abaturage ndetse n’ibyiciro barimo, ibi bigafasha cyane mu igenamigambi.

Yagize ati ʺTwabaga ahongaho ukavuga umubare w’abaturage wagiye ubara umwe umwe ariko nta kintu gifatika uhereyeho, ubu rero tuzagira imibare y’abaturage izwi ufite n’ahantu wahera uyibarurira, umuturage uvutse akaba afite aho yanditswe kimwe n’uvutse akandukuzwa.

Ariko kandi ibi ni no guha umwana agaciro ke kuko kutandikwa hari uburenganzira bishobora kumuvutsa kuko aba atazwi.ʺ

Ku ruhande rw’abaturage barebwa n’iyi gahunda nabo bavuga ko aya mahirwe babonye kuba batiyumvishaga ko ashoboka, atagomba kubacika nk’uko bivugwa na Kamatari Leonidas.

Ati ʺNi ibintu byiza Leta yacu idukoreye tutatekerezaga ko byabaho, sinari kubona ukuntu bandokoye amande n’igarama ry’Urukiko ngo ntindiganye, nagiraga abana babiri ariko nta n’umwe nari narandikishije, none mvuye kubirangiza.ʺ

Mukamurenzi Phelomenenawe ati ʺNabanye n’umugabo tudasezeranye, nyuma aza kwitaba Imana asize abana batatu ariko nta n’umwe twandikishije. Ni amahirwe tubonye tutagomba kwitesha kuko najyaga mpora ntekereza inzira nzacamo ngo mbandikishe ngasanga biransaba byinshi ntafite.ʺ

Ikibazo cyo kuba hari umubare w’abanyarwanda benshi batagaragara mu bitabo by’irangamimerere kiri mu byakunze kugaragaragazwa n’imiryango itegamiye kuri Leta yita ku bana itandukanye.

Ubusanzwe umwana yajyaga yandikishwa mu gihe kitarenze ukwezi avutse, umubyeyi yarenza icyo gihe akazemererwa kumwandikisha abanje guca mu rukiko aho yishyura igarama ndetse akanatanga amande.

Mukankusi Marisiyana, avuga ko umwana we agifatwa n’indwara y’igicuri yabanje gukeka ibindi nk’amashitani

Ibi barabitangaza mu gihe Handicap International, umuryango wateguye iyo gahunda, iri gusoza bimwe mu bikorwa bikubiye mu mishinga yayo irimo uwo kurwanya indwara y’igicuri wari umaze imyaka itatu.

Mukankusi Marisiyana, umubyeyi ufite umwana wafashwe n’indwara y’igicuri afite imyaka itandatu y’amavuko, avuga ko uwo mushinga watumye umwana we agira ubuzima bwiza.

Agira ati ʺAfatwa bwa mbere namuhereje isahani ayikubita hasi, uko iminsi igenda indwara ikaza umurego kugeza aho numvise ko bindenze nta kindi nabikoraho ku mutima nanjye nkumva bishobora kuba hari n’ikindi kibitera nk’amashitani.

Bangiriye inama njya kumusuzumisha igicuri, bamuha imiti, inshuro yafatwaga zatangiye kugabanuka yemwe bambwira kumutangiza ishuri, ubu ariga, agira ikibazo gacye cyane.

Niyo mpamvu nanjye ngomba gusobanurira bagenzi banjye bakamenya uko bayifatamo batunguwe.ʺ

Mugenzi we witwa Maniragaba Celestin ufata imiti y’iyo ndwara agira ati ʺAmashitani nicyo gitekerezo gihita kikuzamo iyo wafashwe, ariko twe twamenye ukuri, rero ntago twatuma abandi bahamana imyumvire nk’iyo.ʺ

Mu mushinga wo kurwanya igicuri hakozwe ibikorwa bitandukanye birimo guhugura abakozi 76 b’ibigo Nderabuzima 18.

Batanze imiti ku barwayi, guhugura abajyanama b’ubuzima 1450 ku ndwara zo mu mutwe harimo n’iy’igicuri, abantu 805 barasuzumwe habonekamo 750 bahabwa imiti.

Abayobozi b’ibigo nderabuzima, ab’imirenge yakorewemo n’umushinga wo kurwanya igicuri mu muhango wo kuwusoza

Mutabazi Phenias umukozi wa Handicap International, wari ushinzwe umushinga wo kurwanya igicuri avuga ko urwego basizeho ibikorwa ruhagije kugira ngo bikwirakwizwe hose.

Agira ati ʺTurabasaba kurushaho kubungabunga no kunoza ibi bikorwa kandi biroroshye. Niba twarahuguye abangana gutyo, mutekereze buri wese nawe ahuguye abandi bagenzi be nibura 4, nabo bakazahugura abandi.

Abantu bose basobanurirwe ko igicuri ari indwara nk’izindi, atari amashitani.ʺ

Umuyobozi w’Akarere ka Rutsiro, Ayinkamiye Emmerance yizeza inkunga y’Akarere mu gukurikirana ko ibi bikorwa bidasibangana ahubwo bikarushaho gukura.

Uretse uwo kurwanya igicuri, hasojwe kandi umushinga wo kongera ubushobozi amashyirahamwe y’abantu bafite ubumuga.

Abafashamyumvire mu buhinzi bagiye kujya bahembwa

Umukozi ushinzwe ubuhinzi mu karere ka Karongi Safari Fabien avuga ko bagiye kujya batanga amanota bakurikije imikorere y’abafashamyumvire, akaba ari nayo bagenderaho babagenera ibihembo.

Yagize ati« Tugiye kujya dusura abafashamyumvire, dusure imirirma bigishirizaho, turebe imikorere yabo dutange amanota, bahabwe ishimwe hakurikijwe uko barushanyijwe. »

Abafashamyumvire mu buhinzi ubusanzwe bafasha abahinzi gusobabukirwa uburyo bagomba guhinga hakurikijwe amabwiriza.

Ubuyobozi buvuga ko bwizeye neza ko bizanoza imikorere yabo bikanazamure ubuhinzi muri rusange, kuko umuntu ukorera igihembo n’ukorera ubushake batanga umusaruro utandukanye cyane.

Ku ruhande rw’abafashamyumvire, nabo bemeza ko ubu buryo bushya ari bumwe mu nzira zo guha ingufu imikorere yabo nk’uko bivugwa na Semanza Henritier.

Ati « Mbere twajyaga dukorera ubuntu, ingufu zacu zose tukazishora mu bwitange ariko ubu kuba tuzi ko hagiye kujyaho ibihembo bizatuma buri wese akora ashaka amanota menshi kugira ngo ahembwe »

Mugenzi we Uwamahoro Floride we yemeza ko muri bo hari abakoranaga umwete muke kuko babaga bazi ko nta gihembo.

Ati « Ubusanzwe abenshi twabigendagamo biguru ntege kubera ko kwari ugukorera ubushake nta kintu duhabwa, ariko ibi bihembo bigiye gutuma dushyiramo umuhate.»

Igihembo gikuru ku bafashamyumvire bagize amanota ya mbere kizaba ari amafaranga ibihumbi 120, abagize munsi ya 50% bo nta gihembo bazajya bahabwa, ibi bikazajya bikorwa muri buri gihembwe cy’ihinga.

Iyi gahunda ishyizweho mu gihe n’ubwo ubuhinzi butunze abarenga 80% muri aka Karere, bigaragara ko bukiri hasi.

Nkundabakura Karima umugenzuzi mukuru w’umurimo muri MIFOTRA avuga ko umushahara w’umuntu ari ndakorwaho

Nkundabakura Karima Java, umugenzuzi mukuru w’umurimo muri MIFOTRA avuga ko umushahara w’umukozi ari ari ndakorwaho.

Akomeza avuga ko abakoresha bafatira umushahara wose cyangwa igice cyawo ku bakozi bakoze amakosa cyangwa bagize ibikoresho bangiza mu kazi. Ibyo ngo bikunze kugaragara mu bakoresha bigenga.

Agira ati "Cyane nko mu mahoteli n’utubari ibi bibazo bikunze kumvikanamo, ngo umukozi niba amennye ikirahure, shebuja we agakata agaciro kacyo ku mushahara kandi nyamara ntibyemewe na gato kuko umushahara w’umuntu ni ndakorwaho.

Niba koko umukozi akoze ikosa cyangwa akaba yangije ibikoresho nkana, we n’umukoresha bagomba kubiganiraho bakurikije n’amasezerano bagiranye.

Niyo habayemo kuriha ibyangiritse, uwabyangije niwe wemera kuzafata amafaranga ye akariha, hatabayeho kuyafatira.ʺ

Umukozi wo muri Hoteli imwe yo mu mujyi wa Karongi, utifuje ko amazina ye atangazwa avuga ko gukatwa umushahara yari aziko ari nk’ihame.

Agira ati ʺIbyo twe tuzi ko ari nk’ihame, umennye ikirahure cyangwa icupa agomba guhembwa havuyeho ay’ibyangiritse kandi si hano iwacu gusa n’ahandi abaseriveri bakunze gukatwa umushahara.ʺ

Mugenzi we agira ati ʺNubwo umuntu yamenya ko itegeko ritemerera umukoresha gukata umushahara w’umukozi we ku ngufu, biragoye kubyigobotora kuko usanga nutera hejuru, azakwirukana kandi ako kazi ugakeneye, ugatuza.ʺ

Abakoresha mu nzego zitandukanye n’abahagarariye abakozi bo mu Karere ka Karongi bavuga ko bikwiye ko umukoresha agirana amasezerano n’umukozi

Kudasobanukirwa amategeko agenga umurimo haba ku ruhande rw’abakoresha n’abakozi ngo niyo nyirabayazana w’iki kibazo; nk’uko Yambabariye Theophile ufite akabari abisobanura.

Agira ati ʺTubyumva henshi, ariko biterwa no kutamenya amategeko, abakozi ntibamenye uburengenzira bwabo ngo babanze kumvikane na ba shebuja ku masezerano azabagenga.

Ariko n’abakoresha bakamenye ko gukoresha utagira masezerano bitemewe.ʺ

Guverineri Munyantwari yasabye abayobozi b’uturere gukorera hamwe nk’ikipe imwe y’amagare

Yabibasabye mu nama yamuhuje n’abayobozi b’uturere n’abikorera hagamijwe kwiga ku mbanziriza mushinga y’igenamigambi ry’uturere mu mwaka w’imihigo ya 2017-2018, tariki ya 14 Ugushyingo 2016.

Agira ati "Turi gutegura ibigomba gukorwa mu igenamigambi ariko kugira ngo bizashyirwe mu bikorwa neza icyo bisaba ni ugufatanya, twese tukajyana turi ikipe imwe ntawe ugomba kugira akarere ka mbere ngo agire n’aka nyuma.

Ba nyakubahwa, abantu bagakurikirana ibikorwa, abantu bakagenda bafatanye nk’ikipe y’amagare kwa kundi igenda ikururana irindana kuko ihabwa ihererwa amanota hamwe.ʺ

Kaligirwa Ernestine, umukozi w’Ikigo cy’igihugu gishinzwe guteza imbere ibikorwa by’iterambere mu nzego z’ibanze (LODA) nawe abwira abayobozi b’uturere kunganirana, aho kamwe kagejeje akandi kagakomerezaho.

Agira ati “Igenamigambi rihuriweho ni ikintu cyo gushyigikira kuko niba ndi hano Karongi nkaba mfite urumuri ku muhanda, ni byiza ko ningera aho ngabanira na Nyamasheke nayo ikomeza urwo rumuri na Rusizi igakomerezaho kandi bitagoranye cyane.”

Abayobozi b’uturere nabo bashimangira ko gukorera hamwe byagura imitekerereze y’uturere nk’uko byemezwa na Ndayisaba Francois, umuyobozi w’Akarere ka Karongi.

Agira ati “Nta kiruta gukorera hamwe kuko bituma uburyo abantu batekereza bwaguka bagahuza ibitekerezo, utaranogeje bikamufasha kubona ibyo akosora.

Ndetse n’ibyo yaba ataratekerejeho kandi byamugirira akamaro bikaba uburyo bwo kubyibutswa.”

Umuyobozi w’Akarere ka Rutsiro, Ayinkamiye Emmerance gungamo ati “Gukorera hamwe bizadufasha kungurana inama, bityo tubashe gukora neza.”

Muri iyo mbanzirizamushinga hagaragaramo imishinga migari nko kubaka Sitade mu Karere ka Karongi, ibibuga by’indege nto mu rwego rwo guteza imbere ubukerarugendo, kubaka ibitaro bikuru muri Rutsiro, ibyambu n’amahoteri.

Guverineri Munyantwari nawe yijeje ubufasha ubuyobozi bw’Akarere ka Karongi

Guverineri Munyantwari Alphonse yabitangaje ubwo yifatanyaga n’abatuye mu Karere ka Karongi, mu gikorwa cy’umuganda usoza ukwezi ku Ukwakira 2016.

Yabitanganye nyuma yuko umuyobozi w’akarere ka Karongi, Ndayisaba Francois yasabaga ubufasha Guverineri Munyantwari kugira ngo ako karere kazaze ku mwanya wa mbere mu mihigo.

Agira ati “Nyakubahwa Guverineri turabizi ko ufite ubwo butwari kuko uturere tw’Amajyepfo tutahwemye kuza imbere mu gihe Iburengerazuba twabaga turi inyuma.

None nagira ngo mbisabire mudufashe Karongi yongere kugaragara imbere nk’uko byahoze.”

Umuyobozi w’Akarere ka Karongi yisabiye ubufasha Guverineri Munyantwari ngo akarere ke kabashe kwesa imihigo

Guverineri yijeje uyu muyobozi ubufatanye ariko amubwira ko kuza imbere mu migiho bitoroshye kuko bisaba gutimo ibikomeye, ibyoroshye bikajya ku ruhande.

Agira ati “Nyakubahwa Muyobozi w’Akarere tuzafatanya! Niba dufite guhitamo ari ugukora ibihanitse cyangwa ibyoroshye, kuki umuntu yahitamo ibyoroshye? Niba hari imyanya kuki umuntu yahitamo iy’inyuma kandi iy’imbere ihari? Ntugire umususu turi kumwe.”

Umuyobozi w’Akarere ka Karongi yisabiye ubufasha Guverineri Munyantwari ngo akarere ke kabashe kwesa imihigo

Abaturage b’Akarere ka Karongi bavuga ko bishimye nyuma yo kumva ko Guverineri Munyantwari ariwe ugiye kuyobora intara yabo; nk’uko Munganyinka Alphonse abivuga.

Agira ati “Tucyumva inkuru y’uko baduhaye Munyantwari byaradushimishije, kuko turabizi twese uburyo Intara y’Amajyepfo yagiye ikunda kuza imbere, tukumva ko n’iyacu azahindura ibintu tukaza imbere.”

Mugenzi we witwa Uwamariya Josephine agira ati “Uyu muguverineri twajyaga tumwumva tukumva ko Uturere two mu Ntara ye tuza imbere y’utundi, natwe azadufasha guhiga abandi turabyizeye.”

Mu mihigo y’umwaka wa 2015-2016, Akarere ka Karongi kaje ku mwanya wa 25 mu turere 30 tugize igihugu. Mu gihe mu mwaka wa 2014-2016 ho kari kaje ku mwanya wa 29.

Uturere tune muri turindwi tugize Intara y’Iburengerazuba, mu mihigo ya 2015-2016 twaje inyuma y’umwanya wa 20.

Akarere ka Rubavu kari ku mwanya wa 21, aka Nyabihu ku wa 23, aka Karongi ku wa 25 n’aka Rutsiro ku mwanya wa 29.

Minisitiri Mukantabana avuga ko bigoye kugira umutima mwiza ukennye

Ibi yabivugiye mu Karere ka Karongi ubwo yifatanyaga n’abatuye ako karere mu muganda usoza ukwezi k’Ukwakira 2016.

Yakanguriye abo baturage kugira umuco wo gukora no kwizigamira kuko ariyo nzira yo guca ukubiri n’ubukene butuma hari bamwe bagira umutima mubi kuko babuze ibyo kurya.

Agira ati “Gukora, kwizigamira niyo nzira yo kugera ku ntego yacu yo kwigira, kandi no kugira umutima mwiza. Sintekereza ko hari umuntu ushobora kugira umutima mwiza akennye, azi ko atari burye.”

Minisitiri Mukantabana kandi avuga ko Abanyarwanda benshi bagifite imyumvire y’uko umuntu yizigamira nyuma yo kubanza gukemura ibindi byose. Uwo muco ngo ukwiye gucika.

Ati “Abantu benshi nanjye ndimo, umuntu afata umushahara we akabara ibyo akeneye byose, yabirangiza asigaye akaba ariyo azigama, kandi siko byakagenze ahubwo banza utekereze ayo uzigama, ukoreshe asigaye.”

Yakomeje avuga ko mu isesengura bakoranye n’ubuyobozi bw’Akarere ka Karongi, basanze amafaranga agendera mu tubari duhari yenda kungana n’ingengo y’imari y’Akarere mu gihe cy’umwaka.

Yakomeje abwira ababyeyi ko bagomba gutangira gutoza abana babo umuco wo kwizigamira kugira ngo bazawukurane. Kuko ukutabyitabira kwa bamwe ubu bituruka ku kuba batarabitojwe bakiri bato.

Abaturage batandukanye bo mu Karere ka Karongi bavuga ko kwizigamira ari ngomba; nkuko Renzaho Shaban abisobanura.

Agira ati “Njye kuzigama sinabigira ibya nyuma kuko nasanze icyo uzigamye nicyo kikugirira akamaro mu gihe kiri imbere, naho byo rwose ntago wapfa kumwenyura ukennye.”

Mugenzi we witwa Mukamana Leocadie avuga ko kwizigamira atabishobora mu gihe atabanje gukemura ibibazo afite.

Agira ati “Byagorana gufata amafaranga ugahita ukuramo ayo kuzigama utabanje gukemura utubazo ufite, simbabeshye sinabishobora.”

Abaturage baributswa kwizigamira mu gihe hari gusozwa icyumweru cyahariwe kuzigama cyatangiye tariki ya 24 kugeza kuwa 31 Ukwakira 2016.

Bamwe mu bagize itsinda ry’abarangije amahugurwa muri Isiraheli nyuma y’igikorwa cyo kubumbira utishoboye amatafari yo kubaka

Abo banyeshuri 20 bahagarariye bagenzi babo 123, baremeye izo hene abo baturage batuye mu Murenge wa Rubengera, ku itariki ya 26 Ukwakira 2016.

Bavuga ko gufasha abaturage ari umuhigo bihaye bashingiye ku bumenyi n’ubushobozi bakuye muri Isiraheli; nkuko Kansiime George uhagarariye aba banyeshuri abivuga.

Agira ati “Ni intangiriro y’inshingano twihaye yo gutanga umusanzu wacu mu kuzamura igihugu kuko nacyo cyadufashije kugera kuri byinshi birimo ubumenyi twahawe haba mu gihugu ndetse no hanze yacyo kitwishyuriye.”

Akomeza avuga ko ibyo bikorwa byabo bigamije guteza imbere igihugu n’abagituye bizakomeza.

Abo banyeshuri ni abagize icyiciro cya kane kirangije amahugurwa y’umwaka mu gihugu cya Isiraheli.

Bishyuriwe na Leta y’u Rwanda nyuma yo kurangiza Kaminuza mu bijyanye n’ubuhinzi ndetse n’ubworozi. Bahize ko bagomba kwitura Leta yabohereje kwiga.

Ihene 50 batanze ngo ni intangiriro y’ibikorwa bigamije kwitura Leta ibyo yabakoreye

Abahawe ihene n’abo banyeshuri babijeje ko bazazifata neza kandi zikaba zigiye kubabera intangiriro y’iterambere ryabo; Nkurikiyimana Eliyezeri, umwana w’imfubyi abisobanura

Agira ati “Iyi hene ngomba kuyifata neza ikororoka ikazangeza ku nka kandi ndabibijeje.”

Mugenzi we witwa Murebwayire Genevieve agira ati “Ndishimye cyane kuko iri tungo rizamfasha kubona agafumbire mpinge neze, nzarifata neza rimbyarire inyungu.”

Mutabazi Moise, umuhuzabikorwa wa Komisiyo yo kurwanya Jenoside mu Karere ka Karongi na Rutsiro, avuga ko igikorwa nk’iki kigaragaza ko igihugu gifite urubyiruko rugamije kucyubaka.

Agira ati “Kwicara nk’urubyiruko bagatekereza gufasha kandi bahereye ku batishoboye barokotse Jenoside ni ibigaragaza ko u Rwanda rufite urubyiruko ruharanira guhindura igihugu cyiza.”

Babumbiye utagira inzu yo kubamo amatafari azamufasha mu kubona inzu yo kubamo

Ihene 50 zatanzwe zifite agaciro k’ibihumbi 800RWf yaturutse ku bwitange bwa buri wese muri abo banyeshuri.

Usibye kuba barahaye ihene abatishoboye hari banabumbiye amatafari umukecuru witwa Nyiranzabahimana Yozafina, uba mu icumbi, mu rwego rwo kumufasha kubona aho aba.

Amwe mu matiyo y’amazi yangirika yangizwa n’abaturage

Nteziyaremye Fidele ushinzwe guhuza ibikorwa by’abafatanyabikorwa bakora mu mazi n’isuku na gahunda za Leta muri MININFRA avuga ko abaturage bafite uruhare mu iyangirika ryayo.

Yagize ati”Si ko imyinshi muri yo ishaje, ahubwo ni ukubura Ownership ku baturage (ukugira bino bikorwa ibyabo), bivuga ngo muri iyi miyoboro harimo n’iyangizwa n’abaturage.”

Mu gushakira umuti iki kibazo, mu ngamba zafashwe hashyizweho komite zishinzwe kwita ku mazi kuva ku rwego rw’Akarere kugera ku Midugudu.

Izi komite zikazazajya zikorana inama n’abaturage ku buryo buhoraho.

Ibi bikazafasha abaturage barushaho kwita kuri iyi miyoboro nk’uko Ndayisaba Francois umuyobozi w’akarere abivuga.

Ati”Izi komite zizadufasha, urumva guhera ku Mudugudu nibagira igihe cyo gusobanurirwa, nta kabuza biriya bikorwa bazabigira ibyabo.”

Nteziyaremye Fidele umukozi muri MININFRA asaba abaturage gufata neza ibikorwa remezo

N’ubwo nta muturage werura ngo yemere ko agira uruhare mu kwangiza iriya miyoboro, biyemerera ko koko hari ababikora, nk’uko Nishyirimbere Pierre abivuga.

Ati”Hariho n’umuturage ureba agasanga atagira amazi iwe, agahitamo kumena itiyo ngo yivomere atagombye kujya kuyagura cyangwa kuyasaba mu baturanyi.”

Muri iyi Ntara, Akarere ka Ngororero ni ko kaza ku mwanya wa mbere mu kugira imiyoboro myinshi yangiritse.

Mu miyoboro 60, idakora ni 46 igereranywa na 77%, ikazasanwa na Miliyari 1,4 Frw.

Mu Karere ka Karongi habarurwa imiyoboro 51, idakora akaba ari 17 igereranywa na 33,3%, aho igomba gutwara miliyoni 473,787,680 Frw yo kuyisana.

Iyangirika ry’iyi miyoboro ni imwe mu mbogamizi kuri gahunda Leta y’u Rwanda yihaye yo kuba buri munyarwanda afite amazi meza muri 2017-2018.

Guverineri Munyentwari yijeje kuzamura uturere twazaga inyuma mu mihigo

Guverineri Munyantwari Alphonse yabitangaje nyuma y’umuhango w’ihererekanyabubasha hagati ye n’uwo asimbuye ku buyobozi bw’iyo ntara, Madame Mukandasira Caritas, tariki ya 11 Ukwakira 2016.

Agira ati “Tuzafasha uturere guhoza ijisho ku mihigo ariko tuzanakomeza kutuba hafi kugira ngo buri wese yubahirize inshingano ze duhereye ku muturage kugeza ku muyobozi.”

Ni nyuma yaho mu mihigo y’umwaka wa 2015-2016, uturere tune muri turindwi tugize Intara y’Iburengerazuba, twaje inyuma y’umwanya wa 20.

Aka Rubavu kari ku mwanya wa 21, aka Nyabihu kari ku wa 23, aka Karongi kari ku wa 25 naho aka Rutsiro kari ku wa 29.

Munyantwari yavuze ko azaharanira ko iterambere ry’intara rihera mu muryango, abawugize bakicara bakiha intego, Leta ikabunganira.

Munyantwari yari amaze imyaka irindwi ayobora Intara y’Amajyepfo, uwo asimbuye, Mukandasira yari ayoboye Intara y’Iburengerazuba imyaka itatu.

Mukandasira yasabye Guverineri Munyentwari kunoza ibitaranogejwe neza

Mukandasira yavuze ko hari bimwe mu bibazo bicyugarije abaturage bigomba guherwaho. Yanagaragaje imishinga minini yari itararangira igomba gukurikiranwa ikabyazwa umusaruro, irimo umuhanda wa Karongi-Rubavu.

Harimo kandi mahoteri atangiye kubakwa n’ayendaga kurangira n’ikaragiro rya Mukamira ryuzuye rikaba ritaratangira gukora.

Agira ati “Haracyari abaturage bangirijwe imyaka hirya no hino batarishyurwa, ubukungu dufite ntibujyanye n’ubwiyongere bw’abaturage bacu, baracyakeneye kwigishwa kuboneza urubyaro.”

Ifoto y’urwibutso hamwe n’abayobozi b’uturere n’ab’inzego zishinzwe kubungabunga umutekano

Umunyamabanga wa Leta muri Minisiteri y’ubutegetsi bw’igihugu, ushinzwe iterambere ry’abaturage, Munyeshyaka Vincent yabwiye Guverineri Munyentwari ko agomba kwita ku mahirwe iyi ntara ifite bakayabyaza umusaruro.

Agira ati “Iyo urebye amahirwe ari muri ino ntara ntibihura n’imibereho y’abayituye.

Muzi ikibazo y’imirire mibi ifite, kugira abaturage benshi bari munsi y’umurongo w’ubukene, ni uguhera rero kuri aya mahirwe hakemurwa ibi bibazo.”

Yakomeje agaragaza ko intara y’Iburengerazuba ariyo ya mbere yeza cyane ibihingwa ngandurabukungu, nka Kawa n’Icyayi no kugira ahantu nyaburanga hakurura abakerarugendo.

Umuyobozi w’akarere ka Rutsiro asaba abayobozi b’utugari kujya muri buri rugo rutarishyura Mitiweli

Akarere ka Rutsiro kari ku kigereranyo cya 46% mu kwitabira kwishyura amafaranga y’ubwisungane mu kwivuza (Mituweli). Kaza ku mwanya wa 29 mu turere 30 tugize igihugu.

Abanyarutsiro batandukanye bahamya ko bibasiwe n’ubukene butuma batabona 3000RWf kuri buri muntu, yo kwishyura Mitiweli. Bakinubira ko ariko banashyizwe mu byiciro by’ubudehe bitabakwiye; nkuko Nyirahabiyambere Beatrice abivuga.

Agira ati “Abenshi dufite ubukene bukabije nyamara mu kudushyira mu byiciro wasangaga umuntu bamushyira mu cyiciro kirenze ubushobozi bwe, gusa hari n’abatishyura kubera imyumvire mike.”

Mugenzi we witwa Mugabo Alphonse nawe aahamya ko ubukene no gushyirwa mu byiciro by’ubudehe bidakwiriye abaturage byazamuye abagomba kwishyura Mitiweli.

Agira ati “Byose biraterwa n’ubukene, hari abantu benshi usanga batishoboye badashobora kubona ariya mafaranga. Amakosa yabaye ni uko babashyize mu byiciro by’uko bishoboye, bikazamura imibare y’abagomba kwishyura.”

Umuyobozi w’Akarere ka Rutsiro, Ayinkamiye Emmerance asaba abayobozi b’urugari gutangira kuzenguruka mu ngo zitarishyura Mituweli kugira ngo iki kibazo gikemuke.

Agira ati “Ingamba ni uko umuyobozi agiye kujya kuri buri rugo kwigisha umuturage kugira ngo yumve agaciro ka Mituweli, kandi udafite ubushobozi nawe tumushakishirize ahandi yabukura, ariko ubufite yishyure kugira ngo uyu muhigo tuwese.”

Abanyamabanga nshingwabikorwa b’utugari nabo ngo basanga ubu buryo buzatanga umusaruro kuko butari bwarigeze bukoreshwa; nkuko Munyaneza Etienne, uyobora Akagari ka Remera mu Murenge wa Rusebeya, abisobanura.

Agira ati “Twari tutaragera kuri wa muturage ufite ubwishyu nyamara atarishyura, tugiye kugenda tubegere, abatishoboye nabo tubabumbire mu bimina babashe kwaka inguzanyo kuri za SACCO, bizongera imibare, uriya mwanya wa 29 tuwuveho byihuse.”

NCC mu Karere ka Karongi igaragaza bimwe mu bibazo bituma abana bava mu miryango baba bashyizwemo

Mu karere ka Karongi habarurwa abana 18 bahoze mu bigo by’impfubyi, nyuma yo gushyirwa mu miryango (yabo cyangwa iy’abagiraneza) bayivamo.

Theodore Mutuyimana uhagarariye NCC mu Karere ka Karongi avuga ko imwe mu mpamvu babonye ari uko abana ndetse n’imiryango bari bashyizwemo batari bateguwe neza.

Yagize ati”Abo bana ndetse n’imiryango yari yabakiriye ntibari babanje gutegurwa bihagije.

Byabaye cyane ku bavuye mu kigo cya Esperance kuko umwanzuro wafashwe utunguranye, ariko ubu basubijwe mu miryango.”

Izindi mpamvu zigaragazwa na NCC, zirimo amakimbirane abana basanga muri iyo miryango ibakira n’ubukene bukabije.

Ivuga kandi ko hari bamwe biyemeza gufata abana, badafitanye isano bagamije kubakoresha nk’abakozi babo cyangwa kubabyaza izindi nyungu.

Umuyobozi w’Akarere ka Karongi wungirije ushinzwe imibereho myiza Mukashema Drocelle, avuga ko mu gukemura iki kibazo uruhare rwa buri wese mu muryango nyarwanda ari ngombwa.

Ati”Icya mbere dusaba abaturage ni ukubana neza, ababanye neza nta mwana wifuza kubacika, aricara agatozwa uburere akiri muto.

Abantu barangwe n’umutima wa kibyeyi, bumve ko uwo mwana w’impfubyi yigeze ababyeyi nawe.”

Abashinzwe imibereho myiza mu Mirenge biyemeje kwita ku bana bava mu bigo by’imfubyi

Abashinzwe imibereho myiza mu Mirenge biyemeje gutegura no gushyira ingufu mu biganiro bihabwa abaturage, mu rwego rwo kubumvisha ingaruka ziterwa n’iki kibazo.

Bavuga ko hagiye no gutegurwa uburyo bwo kuganiriza abana, bakajya bagaragaza ibibabangamira mu miryango yabo, cyangwa iyo babamo.

Abana bashyizwe mu miryango nyuma y’uko iyi gahunda itangijwe mu Karere ka Karongi ni 223, bavanywe mu bigo bibiri ikitwa “Esperance” na “Village Ineza”.

Uretse abana bakuwe mu bigo by’impfubyi, hari n’abari inzererezi bagiye bakurwa ku mihanda.

Inkuba yakubise abana batatu bo muri Rutsiro bahita bapfa

Yatangiye kugwa mu masaha ya kumi n’ebyiri z’umugoroba, imara igihe kigera ku masaha abiri ikigwa. Muri icyo gihe nibwo inkuba yakubise abana batatu bava inda imwe, bo mu Mudugudu wa Kimishishi, Akagari ka Kageyo, mu murenge wa Mukura.

Umuyobozi wungirije w’Akarere ka Rutsiro ushinzwe imibereho myiza y’abaturage, Butasi Herman, yatangarije Kigali Today ko abana bakubiswe n’inkuba bari inkurikirane.

Agira ati “Ni abana bakurikirana kuko umwe yari afite imyaka 14 undi 10 undi 6. Aho bari mu nzu bugamye bari hafi y’ababyeyi babo.”

Akomeza avuga ko nta kintu kigaragara hafi cyaba cyakuruye iyo nkuba. Abaturage ariko basabwa gukomeza kwirinda ibikurura inkuba mu gihe bikomeje kugaragara ko Akarere ka Rutsiro gakunze kwibasirwa n’inkuba.

Ati “Ni ugukomeza kwirinda kugama munsi y’ibiti, kwirinda kujya kuri moto, kwirinda kwegera amapoto y’amashanyarazi igihe imvura igwa n’ibindi! Mu gihe Leta igikora ubushakashatsi ngo harebwe uburyo burambye.”

Mu kwezi kwa Nzeli 2016 inkuba yakubise abantu batanu mu Karere ka Rutsiro.

Kunywa igikoma ku ishuri byatumye bamwe mu barivuyemo bagaruka

Munyaneza Edouard uyobora ikigo cya mashuri cya Kibari, mu murenge wa Ruganda avuga ko usibye no guta ishuri nta munyeshuri ugisiba.

Agira ati “Byonyine nta munyeshuri ukererwa kuko baza batanguranwa ngo badasanga igikoma cyanyowe. Kandi iyo urebye no gusiba byaragabanutse kandi uzi ko ari byo ntandaro yo kuva mu ishuri.”

Gahunda yo kunywa igikoma ku bigo by’amashuri abanza ishyirwa mu bikorwa ku nkunga y’Ishami ry’Umuryango w’Abibumbye ryita ku biribwa (WFP).

Ikorera mu turere tune tw’igihugu ari two Karongi, Rutsiro, Nyamagabe na Nyaruguru, twatoranyijwe hakurikijwe ikibazo cy’imirire mibi cyagaragaye mu bana bahatuye.

Munyabarinzi Thomas umuyobozi w’ikigo cy’amashuri abanza cya Sanza mu Murenge wa Murundi, ahamya ko iyo gahunda yatumye abana 61 bari barataye ishuri bagaruka kwiga.

Agira ati “Twari dufite abanyeshuri ubonamo bamwe bafite inzara, wababaza bakakubwira ko batariye, ubu byarakemutse, twagiraga abanyeshuri 994 none dufite 1053, bivuga ko hari abari bararitaye bagarutse.”

Abanyeshuri nabo bahamya ko guta ishuri akenshi babiterwa n’inzara; nkuko umwe wiga mu kigo cy’amashuri cya Sanza abisobanura.

Agira ati “Nari mfite ikibazo cy’ubukene, ariko cyane nagorwaga no kujya mu ishuri nshonje.”

Nyirarukundo Veneranda ngo asanga ubuzima bw’umwana we bumaze guhinduka kubera iyi gahunda

Ababyeyi bo mu Karere ka Karongi bavuga ko gahunda yo kunywa igikoma ku ishuri yafashije abana babo cyane kuko yatumye babyibuha; nkuko Nyirarukundo Veneranda abisobanura.

Agira ati “Iyi gahunda yaradufashije cyane, hari igihe ujya guhinga umwana akajya kwiga atariye, ubu rero nta kibazo kuko agerayo akanywa igikoma, kandi mbona uwanjye yarabyibushye.”

Umuyobozi ushinzwe uburezi mu Karere ka Karongi, Hitumukiza Robert nawe yemeza ko kunywa igikoma ku ishuri yatumye abanyeshuri bagaruka mu ishuri ariko ntagaragaza umubare nyawo w’abataye.

Agira ati “Ku bigendanye n’ubuzima bw’abana ubona ko bigenda neza bameze neza, ariko igikomeye ni ku myigire kuko byagabanyije guta ishuri.”

Muri Karongi, gahunda yo kunywa igikoma ku ishuri yatangiye muri Kanama 2016. Igera ku bana ibihumbi 83 bo mu bigo 34, ikaba igomba kumara imyaka.

Umwanya wa 25 bagize ntiwabashimishije

N’ubwo aka karere kigiye imbere ho gato ugereranyije n’umwaka wabanje, kuko kavuye ku mwanya wa 29, Mujyambere Eugene umwe mu baturage, avuga ko bidashimishije.

Yagize ati ”Uyu mwanya ntushimishije na gato ndetse waratubabaje, nk’umuturage w’akarere ka Karongi numva ko ubuyobozi bwacu butakoze ibyo bwasabwaga ngo tugire umwanya mwiza.”

Mukandutiye Palagie undi mururage, avuga ko abayobozi bategera abaturage uko bikwiye, aribyo afata nk’intandaro yo kugira umwanya w’inyuma mu mihigo.

Ati ”Bavuga ko akarere ka Karongi kabonekamo icyayi cya mbere, ikawa, ubukerarugendo n’ibindi.

Begere abaturage kuko akenshi umuturage ntaba yasobanuriwe ibyo agomba gukora ndetse n’ubuyobozi ntibumenye icyo umuturage akeneye.”

Umuyobozi w’Akarere Ndayisaba Francois we avuga ko n’ubwo umwanya babonye udashimishije, ibyo biyemeje bari babikoze, ahubwo bakabura amanota yo kuba nta bikorwa bifatika bahize.

Ati ”Twabaye aba 25, uyu mwanya ntiwadushimishije ariko nanone hari icyari cyakozwe ugereranyije n’uko byagenze mbere.

Navuga ko nta bikorwa bifatika twari dufite, ubu rero turi kureba ibikorwa binini kandi bigirira akamaro abaturage benshi.”

Kuba ubuyobozi butegera abaturage Ndayisaba avuga ko ataribyo, kuko ibigerwaho mu mihigo aribo babikora bafatanyije n’abayobozi babo. Gusa abizeza ko hazongerwamo imbaraga.

Akarere ka Karongi kaje ku mwanya wa 25 mu mihigo y’umwaka wa 2015-2016, mu gihe mu mwaka wabanje wa 2014-2015 kari kaje ku mwanya wa 29.

Dr Ngomiraronka Emmanuel umukozi wa Minagri (foto interineti)

Dr Ngomiraronka Emmanuel umukozi muri MINAGRI avuga ko wasangaga ubucuruzi bw’imiti n’ifumbire bikorwa mu kajagari, akaba ariyo mpamvu bigomba kunozwa.

Yagize ati « Wasangaga umuntu acuruza butike irimo ibiribwa, akagira atya hirya y’ifu y’ubugari akahashyira umuti w’imbeba cyangwa uwica udukoko mu murima. »

Avuga ko ibi byashoboraga kugira ingaru ku buzima bw’abantu.

Ni muri urwo rwego bamwe mu bakozi b’iyi Minisiteri bari kuzenguruka mu turere baganira n’abafite ubuhinzi mu nshingano, n’abasanzwe bacuruza imiti n’ifumbire.

Babaganiriza ibikubiye mu Iteka rya Minisitiri No 002/11301 ryo kuwa 14 Nyakanga 2016, rigena amabwiriza agenga imiti n’ifumbire mvaruganda.

Imwe mu ngingo ziririmo, ivuga ko abashaka gucuruza imiti n’ifumbire mvaruganda, bagomba kujya babisabira uruhushya kandi bagasabwa kugaragaza ko uzabikora afite impamyabushobozi ijyanye nabyo.

Benimana Christophe usanzwe acuruza inyongeramusaruro mu Murenge wa Ruganda, akarere ka Karongi, avuga ko aya mabwiriza mashya bayishimiye kuko azatuma ubucuruzi bwabo bukorwa kinyamwuga.

Ati ʺTwakoraga mu kajagari ariko ubu tugiye kuba abanyamwuga, ziriya mpushya zizadufasha, wasangaga buri wese abyuka mu iduka rye agashyiramo inyongeramusaruro, ariko ubu bizajya bikorwa n’umuntu wabiteguye neza. ʺ

Kamaliza Lucie ucuruza inyongeramusaruro mu Murenge wa Mubuga nawe avuga ko iyi gahunda igiye gutuma barushaho gukora neza, kuko hari abivangaga mu kazi kabo kandi bo batabifitiye ubumenyi.

Usaba gukora ubu bucuruzi, agomba kuba afite impamyabushobozi y’amashuri yisumbuye mu ishami ry’Ubutabire (chimie), ibinyabuzima n’ubutabire (Bio-chimie), no mu buhinzi (agronomie).

Asabwa kandi kwishyura amafaranga ibihumbi 50 Frw, agahabwa icyemezo kimara imyaka itanu.

Umurambo we watowe ku nkombe z’umugezi wa Nyacyondo

Karasanyi Nicolas, umunyamabanga nshingwabikorwa w’umurenge wa Gashari Munyakazi akomokamo, avuga ko kugeza ubu bakeka ko yaba yishwe n’amazi y’uyu mugezi wari wuzuye kubera imvura yagwaga.

Yagize ati “Yavuye mu rugo ejo agiye mu itsinda abamo ryo kwizigamira mu isantere ya Rusovu mu Murenge wa Murundi ari naho asanzwe akorera ubucuruzi bwa butike. Mu kugaruka rero birashoboka ko yasanze amazi y’uriya mugezi yabaye menshi ukamutwara”.

Umugezi wa Nyacyondo ukunda kuzuzura iyo imvura yaguye, nk’uko Karasanyi abivuga.

Avuga kandi ko yari yamaze amasaha menshi igwa ku mugoroba wo kuwa 19 Nzeli 2016.

Umurambo wa Munyakazi wabonetse ku nkombe z’uyu mugezi, ku musenyi, mu gitondo cyo kuwa 20 Nzeli 2016.

Karasanyi yasabye abaturage kwirinda kwishora mu migezi itemba mu gihe imvura igwa, avuga ko ingufu z’amazi ziba ziyongereye ugereranyije n’uburyo umugezi uba usanzwe.

Abana 450 bo mu karere ka Rutsiro batangiye kwizigamira

Ayinkamiye avuga ko gahunda yo kuzigama iyo abanyarwanda bayigishwa kera, hari ibibazo byinshi abantu bahura nabyo ubu baba baraciye ukubiri nabyo.

Yagize ati” Ubu hari ibibazo byinshi duhura nabyo kuko uyu muco tutawutojwe tukiri bato ngo tube twaratangiye kwizigamira kera. Umuntu aratungurwa n’ikibazo runaka akabura aho ahera kuko atigeze atekereza ku guteganyiriza iminsi iri imbere ye.”

Mukeshimana Alphonsine, umukozi w’ikigo cy’Abadage gishinzwe ubutwererane “Savings banks foundation for international cooperation”, (SBFIC) avuga ko byoroshye gutoza umwana kuzigama kurusha kubitoza ugeze mu zabukuru.

Ati”Ababyeyi ubu biratugora kubumvisha akamaro ko kuzigama kubera imyaka bagezemo, ariko nibabitoza abana bakiri bato bakabikurana bazabifata nk’umuco.”

Nzimenya Munyentwari umwana w’imyaka 10 wiga mu mashuri abanza mu Murenge wa Rusebeya, avuga ko kuri konti ye afiteho amafaranga ibihumbi icyenda (9000Frw), akaba agenda ayarundanya uko ababyeyi bamuhaye igiceri.

Ati”Maze amezi atanu mbitsa none maze kugira ibihumbi 9, nkoze neza cyangwa nk’iyo nagize amanota meza, nkabona ababyeyi barampembye nanjye nkayizigama.”

Ndorimana Côme, umucungamari wa Sacco Rusebeya, avuga ko muri uyu murenge bamaze kugira amakonti y’abana 450 bafiteho amafaranga asaga ibihumbi 500frw bose hamwe.

Umwana ufunguje konti muri Sacco, mu gihe abandi basabwa gutanga umugabane shingiro we arabisonerwa kimwe n’andi mafaranga acibwa abanyamuryango.

Umuyobozi w’umudugudu mu karere ka Rutsiro,bamusanze yiyahuye

Migabo wari ufite imyaka 54, yayoboraga umudugudu wa Gisunzu mu kagari ka Hanira, umurenge wa Manihira. Bamubonye mu gitondo cyo kuri uyu wa 18 Nzeli 2016.

Umunyamabanga Nshingwabikorwa w’Umurenge wa Manihira, Jules Niyodusenga avuga ko nta mpamvu nyayo izwi yaba yamuteye kwiyambura ubuzima.
Yagize ati “Nta kindi twari tumuziho yari umuntu w’inyangamugayo kuko yari n’umukuru w’umudugudu”

Kimwe mu bikekwa nka nyirabayaza ni ikimwaro yaba yaragize ku munsi w’ejo, nyuma yo gushinjwa n’umugore yari yahaye ikiraka cyo kumuhurira ingano, wavuze ko yamusambanyije, nk’uko Niyodusenga abivuga.

Abaturanyi ba Migabo bavuga ko uyu mugore ataha, abana bamufatanye ingano bahuruza ababyeyi babo n’abaturanyi, umugore yisobanura avuga ko ingano yazihawe n’uwamukoresheje nyuma yo kumusambanya.

Niyodusenga uyobora uyu murenge avuga ko iki aricyo bakeka ko cyamuteye kwiyahura.

Ati “Wasanga ari ipfunwe ryabimuteye, ariko jye twanahuye ku mugoroba mbona nta kibazo afite. Gusa yari umuntu wagize abagore benshi, kuko uwambere yarapfuye, uwa kabiri barananiranwa, uwa gatatu niwe bari kumwe”

Migabo yari afitanye abana bane n’umugore asize yashatse ku nshuro ya gatatu.
Ubwo Migabo bamusangaga yiyahuye, umugore we ntiyari ahari kuko yari yaraye mu masengesho.

Muri Karongi inkuba yakubise abantu batatu bahita bapfa

Umuyobozi wungirije w’Akarere ka Karongi, ushinzwe imibereho myiza y’abaturage, Mukashema Drocelle, yatangarije Kigali Today ko imvura yaguye muri ako karere yari nyinshi. Irimo umuyaga mwinshi n’inkuba.

Inkuba yakubise umubyeyi n’umwana we w’imyaka 15 bahasiga ubuzima. Inakubita umwana w’imyaka ine y’amavuko nawe ahita apfa. Bose batuye mu murenge wa Bwishyura.

Inkuba kandi yishe inka y’uwitwa Nsengiyumva Eliyazari, utuye mu murenge wa Gitesi. Iyo nka yari yarayihawe muri gahunda ya Girinka.

Umuyaga wari uri muri iyo mvura washenye amazu abiri y’abaturage. Wanasambuye urusengero rwa ADEPR Gomba.

Mukashema yasabye abaturage kwirinda kuko Akarere ka Karongi kari mu dukunze kwibasirwa cyane n’imiyaga n’inkuba.

Agira ati “Nk’uko bisanzwe, turasaba abaturage kunoza imyubakire, bakazirika ibisenge cyane kuko usanga ibitwarwa n’umuyaga ari ibidafashe.

Turabasaba kandi kwirinda ibikurura inkuba byose, bakambara inkweto, kwirinda kugama munsi y’ibiti, gufunga amaradiyo na telefone mu gihe imvura iri kugwa.”

Abaturage bahangayikishijwe n’izi nsinga zidafunitse zibanyura hafi zishobora guteza impanuka

Izi nsinga ngo zishobora guteza impanuka zikica abantu, kuko hari izegereye ubutaka, nk’uko Murigo Ezekiel utuye mu Kagari ka Gacaca muri uyu murenge abitangaza.

Agira ati " Icya mbere ziriya nsinga zirimo umuriro
mwinshi. Ikindi kandi zirashishuye, ku buryo umwana cyangwa undi muntu wese akozeho yahita yipfira."

Umuhire Alphonsine utuye muri aka gace, avuga ko hashize imyaka itatu ikigo cy’igihugu gishinzwe gukwirakwiza amashanyarazi cyarabijeje igisubizo, ariko ngo barahebye.

Agira ati " Twibaza niba harabuze ubushobozi bwo gusimbuza izi nsinga bikatuyobera. “

Dusingizimana Damien ukorera ikigo cy’igihugu gishinzwe gukwirakwiza amashanyarazi muri Karongi na Rutsiro, avuga ko iki kibazo kikiri gushakirwa umuti.

Ati:" Ubu turi gutumiza izindi nsinga zo gusimbuza ziriya."

Ubusanzwe insinga zidafunitse zikoreshwa mu gutwara umuriro ucishwa kure y’abaturage, zigacishwa ku mapoto y’ibyuma maremare, byizewe neza ko atapfa kugwa.

Ikoreshwa ryazo hafi y’ingo z’abaturage muri uyu Murenge, ryatewe n’iyangirika ritunguranye ry’insinga zari zisanzwe, hitabazwa izidafunitse kugirango abaturage bakomeze bacane.

Niyonsaba Elina, avuga ko kutamenya gusoma no kwandika byamuteraga ipfunwe mu bandi

Abagera kuri 302, nyuma y’umwaka bigishwa n’umushinga ADRA- Rwanda, ubu bemeza ko hari ibikorwa bakora nyamara mbere byarabagoraga bitewe no kutamenya kubara, gusoma no kwandika.

Niyonsaba Elina yagize ati “Numva mu buzima bwanjye hari byinshi byahindutse kuko byonyine nagiraga isoni zo kujya mu bandi, nkumva ninjyayo ntaribubone icyo mvuga.”

Mushinzimana Olive, avuga ko yageraga ku cyapa akayoberwa icyo gisobanura, akagira isoni zo gusobanuza.

Nyirandatira Francine ushinzwe uburezi muri ADRA-Rwanda, mu Turere twa Nyamasheke na Karongi, avuga ko batekereje kwigisha abatazi gusoma no kwandika kuko ariyo mbarutso y’iterambere.

Ati “Gusoma no kwandika nibyo musingi w’iterambere, byagorana kugira aho wigeza utarabimenya. Nyuma yo kubimenya tunabigisha gukora imishinga, tukabashyira mu makoperative, noneho bagatangira bakazamuka.”

Umuyobozi w’Akarere wungirije ushinzwe imibereho myiza y’abaturage, Mukashema Drocelle asaba abarangije iyi gahunda kuzirikana abakiri mu icuraburindi ryo kutamenya gusoma no kwandika.

Ati “Turabasaba umusanzu, bazirikane abakiri aho bo bavuye badufashe nabo bamenye gusoma no kwandika.”

Kuva mu mwaka wa 2010, umushinga ADRA-Rwanda umaze kwigisha gusoma no kwandika abantu bagera ku bihumbi 6000 bo mu Karere ka Karongi.

Abagomba kwigishwa muri aka karere ni 33000. Leta y’u Rwanda yihaye intego yo kuba abanyarwanda bagera kuri 90% bazaba bazi gusoma no kwandika, mu mwaka wa 2017.

Niyomugabo acanga amakarita abakinnyi bagakurikira ngo batsinde

Uyu mukino ugizwe n’amakarita atatu, imwe isa ukwayo.Ukina asabwa gutanga amafaranga, agakurikirana ucanga amakarita, yafindura aho ikarita idasa n’izindi iri, agakubirwa kabiri amafaranga yatanze, yatsindwa akayahomba.

N’ubwo ntawerura ngo yemere ko akina uyu mukino, Maniragaba Alphonse umwe mubo twasanze iruhande rw’aho ukinirwa, avuga ko abona benshi bahahombera amafaranga bari gukoresha ibindi.

Yagize ati “Dore nk’ubu hari uwo bamaze kurya ibihumbi bitanu yari agiye kwishyura mituweli, ubu se arasubira mu rugo abwira ngo iki umugore?”

Uwimana Immaculée avuga ko abona uyu mukino ari ubujura, kuko ntawe arabona uwutsinda. Avuga ko ubuyobozi bukwiye guca imikono nk’iyi kuko iteza ibibazo abaturage, igihe batungutse uko babyifuzaga.

Niyomugabo umwe mu bacanga aya makarita, avuga ko asanga nta kibazo, uyu mukino uteye, kuko umuntu ashobora kugerageza amahirwe akareba ko atsinda.

Ati” Ntawe mpatira gushyiraho ibye, kandi erega na Yesu yatubuye amafi, sinjye mutubuzi wa mbere. Ukurikiye neza ararya akunguka.”

Ndayisaba Francois, umuyobozi w’akarere ka Karongi, avuga ko nta minsi ishize bamenye amakuru kuri uyu mukino. Avuga ko agiye gusaba inzego z’umutekano kubafasha kuwuhagarika.

Ati ” Ngiye kubwira polisi, inkeragutabara na Dasso, dufatanye tubirwanye, ariko tunashishikariza abaturage kwirinda gukomeza kuhatakariza amafaranga, kuko hari aho mperutse gusanga umugore bamaze gutwara ibihumbi 5000 yari agiye guhahisha.”

Uretse kuba umukino w’urusimbi utwara amafaranga abaturage, unabatwara umwanya kuko aho ukinirwa hahora hahagaze abakina n’abareba uko ukinwa.

Ahakinirwa urusimbi hahora abantu bakina cyangwa bareba abakina

Umugore n’umusore bashinjwa gusambana.

Byabaye mu ijoro rishyira kuri uyu wa gatatu tariki 31 Kanama 2016, mu Kagari ka Kibirizi, Umurenge wa Rubengera, Akarere ka Karongi umusore. Bivugwa ko yitwikiriye ijoro akajya gusambanya umugore w’abandi, kuko azi ko nyir’urugo ataha muri wikendi gusa avuye mu kazi.

Ubwo umunyamakuru wa Kigali Today yahageraga mu masaha ya saa sita z’ijoro, imbaga y’abaturage na nyir’urugo arimo bari barugose, bamaze gushyira ingufuri inyuma kugira ngo abarimo batabasha gusohoka ubuyobozi bamenyesheje butarahagera.

Umunyamabanga Nshingwabikorwa w’Akagari ka Kibirizi yahageraga ahagaze mu idirishya, yabajije ushinjwa gusambanya umugore w’abandi wari mu cyumba niba ashobora gusohoka, amusubiza ko bidashoboka kubera imbaga iri aho hanze.

Abaturanyi bari benshi ku rugi bategereje kureba uko uwo bashinja gusambanya umugore w’abandi asohoka.

Nyuma yo guhuruza umunyamabanga Nshingwabikorwa w’Umurenge, nawe yasabye uyu mugabo gusohoka, arabyemera. Amubajije icyo yaje gukora aho, ntiyamuhishe kuko yamubwiye ko asanzwe akundana n’uwo mugore kandi akunda kuhaza.

Yagize ati “Mba naje kureba umukunzi wanjye, si ubwa mbere ndaza kandi tukishimana kuko uwari wamushatse yamutaye.”

Uyu mugore ushinjwa guca inyuma y’umugabo we, nawe avuga ko umugabo we afite abandi bagore nubwo atavuga abo ari bo.

Umugabo we ariko avuga ko kuba umugore amuca inyuma atari bishya kuko amaze igihe abibona akabura gihamya yo gusaba ko batandukana, ariko hahakana ko nawe yaba afite izindi ncoreke.

Avuga ko ku munsi wari wabanje yatashye akahasanga uwo mugabo yita incoreke y’umugore we ariko agahita agenda akahamusiga. Avuga ko yababeshye ko asubiye mu kazi ariko yari yarangije gushyiraho ubugenzuzi, kugira ngo abone gihamya.

Uyu mugore n’uwo bashinjwa gusambana ubu bacumbikiwe kuri sitasiyo ya Polisi ya Rubengera, mu gihe bagitegerejwe gushyikirizwa ubutabera.

Aganira na Kigali Today, Umunyamabanga Nshingwabikorwa w’Umurenge wa Rugabano, Mukama Lubert, yavuze ko ibi byabaye ku munsi w’ejo tariki ya 30 Kanama 2016 mu ma saa kumi n’igice.

Yagize ati “Ejo ku mugoroba ni bwo twamenye ayo makuru ko uwo mwana yagiye mu mugezi witwa Gasumo uri hagati y’Umudugudu wa Bihembe n’uwa Nyagasozi hamwe n’abandi bana akarohama agapfa.”

Mukama kandi yakomeje agira ababyeyi inama yo gukumira impanuka nk’izi bacunga abana babo kandi bakababuza kujya mu mazi bari bonyine.

Ati “Si n’ababyeyi gusa, ahubwo twese hamwe nk’umuryango nyarwanda tukarinda abana kwegera ahatera impanuka, buri wese akaba ijisho rya mugenzi we kandi tugakomeza gukangurira abana na bo kwirinda impanuka.”

Tuvugana, Mukama yatubwiraga ko ari bwo bari bagishakisha uburyo umurambo wa nyakwigendera wagezwa ku Bitaro bya Kibuye kugira ngo ubashe gukorerwa isuzumwa.

Minisitiri Makantabana yifatanya n’abaturage ba Karongi mu bikorwa byo kubungabunga Umugezi wa Mashyiga.

Ni mu gihe bamwe mu bagenerwabikorwa bakomeje kwangiza urubingo n’imigano byatewe ku nkengero z’uyu mugezi n’umushinga LIVEMP (Lake Victoria Environmental Management Project) baragiramo amatungo cyangwa bakawucukura munsi bashaka amabuye.

Ubwo yari mu Karere ka Karongi ku wa 27 Kanama 2016 mu muganda wo kubungabunga uyu mugezi, Minisitiri ushinzwe Gucyura Impunzi no Gukumira Ibiza, Mukantabana Séraphine, yasabye abaturiye ibi bikorwa kumva ingaruka ku iyangirika ryabyo.

Yagize ati “Ni ku nyungu zacu si ku bw’ababihashyize, turasabwa kubibungabunga kandi tukumva akamaro kabyo; ko nibyangirika umugezi uzakama kandi amazi yawo tuyakoresha muri byinshi mu buzima bwa buri munsi.”

Minisitiri Mukantabana kandi yibukije abaturiye uyu mugezi kuwubyaza umusaruro mu gihe nk’iki cy’izuba ntibawurebe ugenda gusa, ahubwo bakawifashisha mu kuvomera imyaka yabo.

Ku ruhande rw’abagenerwabikorwa, nubwo ntawerura ngo yishinje uruhare mu kwangiza ibi bikorwa, ngo akamaro kabyo barakazi.

Mugabarigira Jean, utuye mu Murenge wa Murambi, ati “Natwe erega akamaro bidufitiye turakazi! Uzi uru rubingo rutaraterwa ukuntu imirima yacu ikikije aha yahoraga igenda, reba nk’ubu mu Mpeshyi turahinga kuko tubona amazi yo kuvomera!”

Mugenzi we Sengabo Aroni ati “Aba umwe agatukisha bose, si ko twese tubyangiza, ahubwo ni babandi usanga bahora badashaka kumva iterambere.”

Umugezi wa Mashyiga ukora ku Mirenge ya Murambi, Rugabano, Gashari na Murundi, ukaba wiroha muri Nyabarongo.

Muri uyu muganda hatemwe urubingo rushaje kugira ngo rwongere kumera neza, habagarwa imigano iteye ku nkengero byose biri ku burebure bwa kirometero 6 ndetse hanasiburwa imiringoti mu rwego rwo guhangana n’amazi aturuka ku misozi akamanuramo ubutaka.

Hamwe na hamwe mu Karere ka Karongi amatsinda ya Twigire Muhinzi aracyagaragaramo abahinzi ba baringa.

Mu rwego rwo kwitegura igihembwe cy’ihinga cya A, itariki ya 13 Kanama 2016 ni yo Akarere ka Karongi kari kihaye ngo amatsinda ya "Twigire Muhinzi" avuguruye abe yamaze gukorwa, nyuma y’uko byagaragaye ko ayariho yari yiganjemo abahinzi ba baringa, bikica igenamigambi mu buhinzi.

Ni igikorwa abashinzwe iterambere mu tugari bagombaga gufatanya n’abajyanama b’ubuhinzi mu midugudu. Ku matsinda ibihumbi 2 na 992 ateganyijwe, ubu hamaze gukorwa 1895, bikaba biri ku kigereranyo cya 63%, ibintu Umuyobozi w’Akarere Wungirie ushinzwe Ubukugu, Bagwire Esperance, afata nko kutita ku nshingano.

Agira ati ”Ikigereranyo kiri hasi ugereranyije n’igihe cyari cyatanzwe, si uko izo mbaraga zabuze, ahubwo ni uko ababikora batabigira ibyabo.”

Ku ruhande rw’abashinzwe iterambere mu tugari, bo bavuga ko bahuye n’imbogamizi zitandukanye.

Mbabazi Jimmy, ushinzwe iterambere mu Kagari ka Nyarugenge, Umurenge wa Rubengera, ati ”Ibyo twagombaga gukora twagombaga kugendera ku buso, kandi abaturage usanga batazi ubuso bw’ubutaka bwo guhinga bafite, bikadusaba gupima buri murima.”

Muzindutsi Jean, ushinzwe iterambere mu Kagari ka Ruragwe, we ati “Kuzenguruka iyo mirima rero ukorana n’umujyanama w’ubuhinzi udahembwa ntiwamubona buri munsi cyangwa n’ibyo akoze akabyica kubera ko nta gihembo ategereje.”

Mu nama yahuje Ubuyobozi bw’Akarere ka Karongi, abashinzwe iterambere mu tugari n’abashinzwe ubuhinzi mu mirenge ku wa 26 Kanama 2016, hafashwe umwanzuro ko hifashishwa urubyiruko ruvuye ku rugerero rukagira icyo rugenerwa kugira ngo mu gihe cy’iminsi ine iki gikorwa kibe cyarangiye.

Uretse iri dindira, hari hamwe na hamwe aya matsinda yongeye kugaragaramo amakosa, nk’aho babazaga umuturage ubuso bw’ubutaka bwo guhinga afite, ibyo ababwiye bagahita babishyira ku ifishi batabanje kugenzura ko ari byo, aba na bo bakaba basabwa kongera gusubiramo.

Minisitiri Mukantabana yasabye uruhare rwa buri wese mu kwita ku mpfubyi.

Minisitiri wa MIDIMAR, Mukantabana Séraphine, asaba buri wese ubishoboye kugira uruhare ngo ntihagire umwana wongera kurererwa mu kigo cy’impfubyi.

Yifatanya n’abaturage b’Akarere ka Karongi mu muganda usoza Kanama 2016, Minisitiri Mukantabana mu biganiro bagiranye yanenze abifite kuko ngo bagira
ubushake buke mu kwita ku mpfubyi.

Yagize ati ″Iyo urebye usanga abaciriritse ari bo bakunze gufata abana b’impfubyi bakiyemeza kubagira ababo, ariko ugasanga abifite ari bake ugereranyije n’abo ubonaho ubushobozi twakwita ko buhagije cyangwa burenze ubw’ababikora.″

Minisitiri Mukantabana kandi yakomeje avuga ko kera nta mwana w’impfubyi wabagaho kuko uwaburaga ababyeyi, abandi bahitaga bamufata bakamugira umwana mu muryango ku buryo yumva ko atari wenyine ndetse akumva ari bo babyeyi be.

Umuyobozi w’Akarere ka Karongi, Ndayisaba Francois, na we avuga ko abishoboye bagize ubushake haterwa intambwe ndende mu gukemura ibibazo by’abana b’impfubyi.

Maniriho Eugenie, umugore w’umupfakazi ufite umwana w’impfubyi arera, avuga ko ikibazo gishingiye ku kwiyumvisha uburyo ari ngombwa ndetse n’uburyo abana bose bafite uburenganzira bungana.

Ati "Ikibazo si ubushobozi, nkanjye utagira n’umugabo navuga ngo abana 5 nsanganywe ntacyo nakora, ariko nafashe umwana kuko natekereje ko na we agomba uburenganzira kandi na we yahoranye ababyeyi, abakire rero babangamirwa no kubibara mu mafaranga kurusha ibindi.″

Muri uyu muganda, hatemwe urubingo rusanzwe rutewe ku nkengero z’umugezi wa Mashyiga ukora ku Mirenge ya Murambi, Gashari, Rugabano na Murundi kugira ngo rumere neza, habagarwa imigano ku burebure bw’ibirometero 6, ndetse hanasiburwa imiringoti.

Ibi bikorwa ni ibyashyizweho n’umushinga LIVEMP mu rwego rwo kubungabunga Ikiyaga cya Victoria uyu mugezi wirohamo uciye mu Ruzi rwa Nyabarongo.

Umunyamabanga Nshingwabikorwa w’Umurenge wa Gitesi, Habimana Protogene, yatangarije Kigali Today ko amakuru bafite ari uko aba bantu bashyamiranye ku mugoroba wo ku wa 25 Kanama 2016 mu masaha ya saa moya z’umugoroba.

Ubwo bushyamirane ngo bwavuyemo imirwano yahitanye Habaguhirwa Isaac, gusa bagerageza kubihisha ariko amakuru aza kumenyekana mu gitondo cyo kuri uyu wa 26 Kanama atanzwe na bamwe mu baturanye n’uwo muryango.

Yagize ati ″ Twabimenye mu gitondo kuko bagerageje kubihisha, kandi hari na mushiki wa nyakwigendera ndetse na nyina bivugwa ko na bo bagize uruhare mu kumwica ariko bahise bacika turacyabashakisha.″

Habimana yakomeje avuga ko bivugwa ko aba bavandimwe bapfaga amasambu, aho nyakwigendera yashinjaga se umubyara kuba hari umuhungu uherutse gushinga urugo ahora aha imirima abandi ntabahe.

Yadutangarije kandi ko nubwo bagerageje gushakisha icyo bamwicishije bakakibura, ba nyiri kubikora bavuga ko bamwicishije inkoni , ingumi n’imigeri.

Twagerageje kuvugana n’Umuvugizi wa Polisi mu Ntara y’Iburengerazuba, CIP Kanamugire Theobald, atubwira ko ayo makuru ari mashya kuri we ko agiye kubanza kuyagenzura, twongeye gushaka kumuvugisha ntibyadukundira.

Aba bavandimwe ari bo Ndikuryayo Emmanuel na Nzabamwita Jean hamawe n’umuturanyi wabo Mushimiyimana Anastase ubu bacumbikiwe kuri Sitasiyo ya Polisi ya Bwishyura mu Karere ka Karongi, mu gihe umurambo wa nyakwigendera wajyanywe ku Bitaro bya Kibuye ngo ukorerwe isuzumwa.

Nyakwigendera Habarugira Isaac asize umwana umwe n’umugore utwite mwana wa kabiri.

Mugambira, nyiri Hotel Golf Eden Rock bakunze kwita Golf, akurikiranyweho icyaha cyo gushishikariza, koshya cyangwa kuyobya umuntu umushora mu buraya, bivugwa ko yagikoze ategeka abakobwa akoresha muri hoteli ye kuryamana n’abakiriya bayigana.

Urukiko rwavuze ko impamvu zose zatanzwe na Mugambira ajuririra gufungwa by’agateganyo ziririmo kuba ahakana icyaha, impapuro zigaragaza ko arwaye, gutanga umwishingizi ndetse n’amafaranga y’ingwate angana na miliyoni imwe, zitahawe agaciro.

Rwavuze ko k’ubw’uburemere bw’icyaha, kuba mu batangabuhamya harimo abagikora muri hoteli ye kandi batarabazwa no kuba hari umutangabuhamya wari watanze ubuhamya amushinja nyuma akivuguruza bigaragaza ko irekurwa rye ryabangamira iperereza.

Rwakomeje ruvuga ko kimwe hari hari umwe mu bakora kwa Mugambira wari watanze ubuhamya amushinja ko yamusabye kuryamana n’umukuriya wa hoteli yabyanga akamukubita, ariko ngo nyuma akaza kongera kwivuguruza akabihakana.

Iri somwa ribaye nyuma y’uko urubanza rwabanje gusubikwa, aho perezida w’uru rukiko wari wahawe inshingano zo kuruyobora yasabye kurukurwamo kubera byinshi bimuhuza na Mugambira mu buzima busanzwe.

Muri byo, harimo kuba Mugambira ari incuti ye ya hafi ndetse no kuba ari we umucumbikiye.

Urukiko rw’Ibanze rwa Bwishyura ku wa 12 Kanama 2016 rwari rwamukatiye gufungwa iminsi 30 y’agateganyo mu gihe hagikorwa iperereza ryimbitse.

Iki cyaha Mugambira akurikiranyweho gihanwa n’ingingo ya 206 yo mu gitabo cy’amategeko ahana ibyaha mu Rwanda.

Iyi ngingo iteganya igihano cy’igifungo kuva ku mwaka umwe kugeza ku myaka 3 n’ihazabu y’amafaranga y’u Rwanda kuva ku bihumbi magana atanu (500.000) kugeza kuri miliyoni ebyiri (2.000.000) cyangwa kimwe gusa muri ibyo bihano.

Mu Karere ka Karongi, umwarimu yatawe muri yombi afite ibiyobyabwenge bya kanyanga n’urumogi.

Uyu mwarimu yatawe muri yombi ku mugoroba wo ku wa Kabiri tariki ya 23 Kanama 2016, akaba acumbikiwe kuri Sitasiyo ya Polisi ya Rubengera.

Bivugwa ko yafashwe nyuma y’uko hari hashize igihe akekwaho iki cyaha, ari bwo yagubwaga gitumo iwe mu nzu n’inzego z’umutekano.

Umuvugizi wa Polisi y’u Rwanda mu Ntara y’Iburengerazuba, CIP Theobald Kanamugire, yatangarie Kigali Today ko uyu mwarimu yafatanywe udupfunyika (boules) turindwi tw’urumogi ndetse n’igice cya litiro cy’inzoga ya Kanyanga.

CIP Kanamugire yavuze ko bigayitse kubona umuntu w’umurezi agaragara mu bikorwa by’ibiyobyabwenge bihungabanya umutekano.

Yagize ati “Ni amahano, nta murezi wo gucuruza ibiyobyabwenge, n’abandi babonereho, n’uwabitekerezaga abyirinde.”

Uyu mwarimu ukurikiranyweho icyaha cyo gucuruza ibiyobyabwenge, kimuhamye yahanwa n’igingingo ya 594 mu gitabo cy’amategeko ahana y’u Rwanda, iteganya igifungo kuva ku myaka 3 kugeza ku myaka 5 n’ihazabu y’amafaranga y’u Rwanda kuva ku bihumbi 500 kugeza kuri miliyoni eshanu.

Umuyobozi w’Akarere ka Karongi Wungirije ushinzwe Imibereho Myiza, Mukashema Drocelle, na we asaba abarezi kuba ’bandebereho’, kugira ngo babashe guha urugero rwiza abana barera.

Yagize ati “Umuntu atanga icyo afite. Niba umurezi na we ubwe nta burere afite, ntacyo ari buhe abana. Icyo tubasaba rero ni ukuba inyangamugayo bakaba bandebereho, bityo ibyo bigisha bikagaragara ko na bo babikora.”

Uwo mwarimu wafatanywe ibiyobyabwenge yigishaga amasomo y’ubumenyi mu cyiciro rusange cy’amashuri yisumbuye.

Hotel Eden Golf Rock ya Mugambira Aphrodis (Photo internet).

Kuri uyu wa kabiri tariki 23 Kanama 2016, nibwo Mugambira yongeye kugaragara imbere y’Urukiko rwisumbuye rwa Karongi ajurira kudafungwa by’agateganyo, nyuma yo kumva ubujurire bwe urukiko rwemeza ko ruzafata umwanzuro kuwa Kane, nyuma y’iminsi ibiri.

Bitandukanye n’ibisanzwe, Mugambira yagejejwe mu Rukiko mu mwambaro w’imfungwa.

Abitabiriye urubanza basabwe gusohoka rukaburanishwa mu muhezo, nk’uko byagenze no mu rw’ibanze, gusa abarwitabiriye baza gutungurwa n’uko rurangiye batamenyeshejwe umwanzuro cyangwa ikindi gihe cyo kuwumenyeshwa.

Umwanditsi w’urukiko yavuze ko isomwa ry’umwanzuro kuri uru rubanza ari kuwa kane tariki 25 Kanama 2016 ku isaha ya saa munani.

Ubushinjacyaha bwari bwagaragaje ko mu batangabuhamya harimo abagikora muri iyi hoteli ya Mugambira bikaba byakwica iperereza, rutera utwatsi icyifuzo cy’uko yarekurwa.

Mugambira kandi yari yasabye gutanga umwishingizi n’amafaranga y’ingwate angana na miliyoni 1Frw, ariko ntibyahabwa agaciro kubera imbogamizi zagaragajwe n’ubushinjacyaha.

Icyaha akurikiranyweho cyo gushishikariza, koshya cyangwa kuyobya umuntu umushora mu buraya gihanwa n’ingingo ya 206 yo mu gitabo cy’amategeko ahana ibyaha mu Rwanda.

Bivugwa ko yagikoze abwira abakobwa akoresha muri hoteli ye kuryamana n’abakiriya bayigana.

Iyi ngingo iteganya igihano cy’igifungo kuva ku mwaka umwe kugeza ku myaka itatu n’ihazabu iva ku magana 500Frw kugeza kuri miliyoni 2Frw cyangwa kimwe gusa muri ibyo bihano.

Tariki 12 Kanama 2016, nibwo Urukiko rw’ibanze rwa Bwishyura rwari rwamukatiye gufungwa iminsi 30 y’agateganyo, mu gihe hagikorwa iperereza ryimbitse ku cyaha aregwa.

Byabaye mu masaha ya saa mbiri n’igice z’ijoro ryo kuri iki cyumweru tariki ya 21 Kanama 2016, nyuma y’ubushyamirane hagati y’abaturage babiri basiganiraga kwishyura amafaranga 700 y’inzoga banyweye nk’uko twabitangarijwe n’Umunyamabanga Nshingwabikorwa w’aka Kagari Bigirimana jean Paul.

Ahatukura ni ho habereye igikorwa.

Yagize ati ″Bari bari mu kabari kandi hari hakiri saa mbiri ku buryo umuntu atavuga ngo ni ugusinda, uwitwa Kabandana Deo yashwanye na Shyirambere Martin basangiraga bapfuye amafaranga 700 yo kwishyura inzoga.

Abaturage n’uyu muyobozi bagerageje kubumvikanisha, ariko uyu Kabandana yikoza hanze, ariko n’ahantu yavanye umuhoro nta we uhazi, ubwo aragaruka asanga Nsabimana ahagaze mu muryango ahita amutema mu mutwe ariruka na n’ubu ntituzi aho ari.″

Bigirimana akomeza avuga ko ntakindi kibazo uyu muturage asanganywe n’umuyobozi yatemye, gusa ngo uwakoze aya mahano akaba hari n’ikindi kibazo cy’ubujura bw’ihene ashinwa yari afite ku Kagari, aho avuga ko ari nacyo bamwe mu baturage bari kwitwaza.

Uwatemwe yahise ajyanwa ku kigo nderabuzima cya Kavumu ariko nyuma yoherezwa ku bitaro bya Ngoma biri mu Murenge wa Gishyita.

Umuvugizi wa polisi mu Ntara y’Iburengerazuba CIP Theobald Kanamugire na we yemeje aya makuru aho avuga ko uyu muyobozi yatemwe ubwo yashakaga gukiza abashyamiranye, avuga ko n’ubwo uwabikoze agishakishwa, ariko akurikiranyweho icyaha cyo gukomeretsa ku bushake ku buryo bubaba

Icyi cyaha gihanwa n’ingingo ya 148 mu gitabo cy’amategeko ahana y’u Rwanda iteganya igihano cy’igifungo kuva ku mezi atandatu kugeza ku myaka ibiri n’ihazabu y’amafaranga y’u Rwanda kuva ku bihumbi 100 kugeza kuri 500.

Bamwe mu babyeyi basanga gahunda ya mudasobwa kuri buri mwana itazaborohera kubera ubushobozi.

Minisiteri y’Uburezi (MINEDUC) ikomeje gukangurira ababyeyi kumva ko nk’uko umwana ajya ku ishuri yitwaje amafaranga y’ishuri n’amakayi, na mudasobwa ari kimwe mu by’ingenzi agomba kwitwaza.

Gusa bamwe mu babyeyi basanga iyi gahunda itazaborohera na gato kubera ubushobozi buke basanganywe, nk’uko umwe muri bo witwa Mwitende Alphonse abivuga.

Agira ati ″N’ubundi umuntu arabona ibikoresho by’umunyeshuri abanje kugurisha itungo cyangwa akarima, none mudasobwa ukumva ko yashoborwa na bangahe? Ntago ari ibya buri wese.″

Rwamukwaya avuga ko gukorera ku mihigo bizatuma ireme ry’uburezi rizamuka.

Umwe mu barezi nawe yunga mu ry’aba babyeyi, avuga ko bitazorohera ababyeyi, keretse harebwe ubundi buryo bwo kuborohereza.

Ati “Keretse nihabaho inkunga idasanzwe kuri iyi gahunda, kuko byashoborwa n’ababyeyi mbarwa. Babyige neza bitongera abata ishuri kubera kubura ubushobozi.″

Biteganyijwe ko buri kigo kigomba kugira nibura icyumba kibonekamo mudasobwa nibura 50, interineti, n’ibindi byose bishobora kwifashishwa kigatangirwamo amasomo hakoreshejwe ikoranabuhanga, umunyeshuri akaza gukoresha iye asubira mu masomo, cyangwa akora imikoro.

Uretse kuba buri munyeshuri asabwa kugira mudasobwa, haracyari n’ikibazo cy’uko abenshi mu barezi nabo batazigira.

Tariki 17 Kanama 2016, ubwo yari muri aka karere, Umunyamabanga wa Leta muri MINEDUC ushinzwe amashuri abanza n’ayisumbuye Olivier Rwamukwaya, yasobanuriye ababyeyi n’abarezi akamaro ko kwigana mudasobwa ku bana.

Ati “Muri ubu buryo umwana azaya yigishwa hakoreshejwe mudasobwa aho kwirirwa handikwa mu makayi no ku bibaho.

Ni byiza rero ko buri mubyeyi atangira kumva ko nk’uko umwana amwohoreza amuhaye amafaranga y’ishuri n’ibindi bikoresho by’ibanze, na mudasobwa igomba kubamo.″

Nubwo atagaragaza igiciro, Rwamukwaya avuga ko batangiye gukorana n’uruganda rwa Positivo rukorera mudasobwa mu Rwanda, aho umuntu ashobora kuzajya ayishyura mu gihe kirekire abicishije mu mu kigo cy’imari, kandi akayibona ku giciro gito.

Umunyamabanga wa Leta muri MINEDUC, ushinzwe Amashuri Abanza n’Ayisumbuye, Olivier Rwamukwaya, avuga ko gukorera ku mihigo bizazamura ireme ry’uburezi.

Ni nyuma y’uko Minisiteri y’Uburezi itangaje ko mu rwego rwo guha umwarimu amahirwe yo kuzamuka ku mushahara ndetse no kunoza ireme ry’uburezi, azajya akorera ku mihigo kimwe n’umyobozi we.

Ubwo yari muri ako karere, ku wa 17 Kanama 2016, Umunyamabanga wa Leta ushinzwe Amashuri Abanza n’Ayisumbuye, Olivier Rwamukwaya, yagize ati ″Bizongera umubare w’abana batsinda, bikureho abata ishuri kuko ni byo bya mbere bazaheraho bahiga.″

Umuyobozi ushinzwe Uburezi mu Karere ka Karongi, Hitumukiza Robert, avuga ko imihigo izatuma buri wese yikoresha atagombeye kubwirizwa kandi agaharanira kugera ku ntego yihaye.

Abarimu na bo bahamya ko imihigo izakuraho gukora akazi umuntu agamije gusa kwandikirwa umubyizi nk’uko bitangazwa na Martin Sebagabo, umwarimu mu ku Kigo cy’Amashuri Abanza cya Rubengera.

Ati ″Umuntu azerekana ibyo agomba kuzuza byanze bikunze, icyo gihe rero ntawe uzakora akazi yikiza, ahubwo azaharanira kuzuza ibyo yahigiye, ari byo uzasanga byagize umusaruro muzima.″

Abayobozi b’ibigo by’amashuri n’abashinzwe uburezi mu mirenge y’Akarere ka Karongi na bo bahamya ko imihigo izatuma bazamura ireme ry’uburezi.

Mukamana Eugenie, Umubyeyi wo mu Murenge wa Bwishyura, na we yemeza ko icyo cyaba kimwe mu bisubizo bikomeye ku kibazo cy’ireme ry’uburezi ndetse n’abana bata ishuri.

Ati ″Diregiteri cyangwa mwarimu ntibashobora kwicara ngo biturize kandi barahigiye ko nta mwana wiga iwabo n’umwe uzava mu ishuri, bazamukurikira bamugarure. Kwigisha bagamije kugira amanota meza mu bizamini na byo birumvikana.″

Abaturage bo mu Murenge wa Bwishyura, kimwe n’abo mu yindi mirenge igize Akarere ka Karongi, barasabwa ubushoshozi mu guhitamo abarinzi b’igihango.

Umutahira w’Intore ku rwego rw’Akarere ka Karongi, Ndagijimana jean Damascene, avuga ko umwaka washize iki gikorwa kitagenze neza uko byifuzwaga, bityo hakaba hagomba gushyirwamo ubushishozi.

Ati ″Abaturage turabasaba gutanga amakuru nyayo kandi ntibarebere ku gakorwa gato umuntu yakoze cyangwa ngo abe yarakoze neza ariko akaba hari n’ibibi yakoze,bakareba umuntu w’umwizerwa ureberwaho, ntibarebe wa wundi warokoye 5 ariko nyuma agasahura.”

Akomeza agira ati “Umwaka ushize abantu bari batarabyumva neza, umuntu akumva ko uzatoranywa azashimwa rimwe na rimwe akabyitiranya n’igihembo, bityo hakabaho guhitamo abatabikwiye.″

Kanyemera Laurent, umusaza w’imyaka 80 wo mu Murenge wa Rubengera avuga ko kugendera ku gihango biri mu byatumaga Abanyarwanda birinda ikibi bakabana neza.

Ati ″Umuntu yagiranaga igihango n’undi bigatuma amwitwararikaho, uko ukigirana na benshi bigatuma abantu babana neza. Ni byiza ko rero dushishoza tukareba abagize ubu butwari mu gihe abandi bari mu bikorwa bigayitse bakabushimirwa.

Umurinzi w’igihango ni umuntu wakoze cyangwa se ugikora ibikorwa by’indashyikirwa mu bumwe n’ubwiyunge bw’Abanyarwanda hagamijwe gukomeza kwimakaza ubunyarwanda, gufasha Abanyarwanda kumva isano bafitanye n’igihugu ndetse no gushyira inyungu zacyo imbere, ariko cyane cyane bakabigira ubuzima bwa buri munsi.

Mu gutoranya indashyikirwa hasuzumwa ubudashyikirwa n’imyitwarire yihariye mu bihe bikomeye byaranze amateka y’igihugu nko mu gihe cy’itangira ry’urugamba rwo kubohora igihugu (1990), igihe cy’ivuka ry’amashyaka menshi, mu gihe cya Jenoside yakorewe Abatutsi mu 1994, nyuma ya Jenoside yakorewe Abatutsi, igihe cy’intambara y’abacengezi, n’igihe cy’Inkiko Gacaca na nyuma yazo.

Biteganyijwe ko ku itariki ya 24 Kanama 2016 buri kagari kazaba kamaze gutoranya indashyikirwa zikarimo, umunsi ukurikiyeho bagatoranywamo abo ku rwego rw’umurenge, naho kuri 30 Kanama hagatoranywamo abo ku rwego rw’akarere na bo bazahatana ku rwego rw’igihugu.

Ibarura rusange ryo muri 2012, ryagaragaje ko Abanyarwanda bazi gusoma no kwandika ari 68.3%, ubu bakaba bageze ku kigereranyo cya 73% nk’uko Minisiteri y’uburezi ibigaragaza mu gihe Leta yihaye intego yo kuba bageze kuri 90% muri 2017.

Nyirahabimana Donathile avuga ko yabenzwe n’uwo bakundanaga kubera ko uwamwandikiraga amabaruwa yamuhimbiraga ibyo atamubwiye kubera kutamenya gusoma no kwandika.

Umuyobozi ushinzwe uburezi mu karere, Hitumukiza Robert avuga ko bagiye kwifashisha urubyiruko ruvuye ku rugerero ndetse n’abagize inama y’igihugu y’abagore ku nzego zitandukanye mu kwigisha aba bantu.

Ati “Iriya mibare yagabanuka ku buryo bwihuse, simvuga ngo ni 100% ariko birashoboka kandi biri no mu mihigo y’Akarere. Turafatanya n’urubyiruko ndetse n’inama y’igihugu y’abagore yabitwemereye, ku mubare muto wigishijwe n’abantu bake mu myaka itanu, bitwereka ko abenshi bakwigisha benshi mu gihe gito. ”

Umuyobozi w’aka Karere Ndayisaba Francois we avuga ko ari umusanzu wa buri munya Karongi uzi gusoma no kwandika guharanira ko n’abandi babimenya kuko nawe yabimenye abikesheje abamwigishije.

Kuba ikibazo gishingiye cyane ku myumvire y’abagomba kwigishwa rimwe na rimwe banga kubyitabira, niyo mpamvu hemejwe gukaza ubukangurambaga bikagarukwaho ahahurira abantu benshi hose nko ku miganda, mu nsengero n’ahandi.

Munyankindi Augustin, umusaza w’imyaka 70, avuga ko hari byinshi bimugora kubera kutamenya gusoma no kwandika, ariko kandi agasanga kugana isomero ngo nabyo bidakwiye uwo mu myaka ye.

Ati”Ibintu byinshi birangora kubisobanuza kuko ntazi gusoma, iyo nza kugira imyaka mito nagana amasomero, ariko iyi yanjye si iyo kujya kwiga.”

Nyirahabimana Donathile w’imyaka 50, ukomoka mu Murenge wa Murambi, avuga ko kutamenya gusoma byaje gutuma uwo yizeraga wamufashaga mu gusoma amabaruwa yandikiwe n’uwamurambagizaga ndetse no kuyasubiza amutwara umugabo.

Mu rwego rwo gushyira mu bikorwa iyi ntego igihugu kihaye, Akarere ka Karongi karasabwa kuba mu mezi atarenga icumi gasigaranye kamaze kwigisha abatazi gusoma no kwandika nibura ibihumbi 33.

Umunyamabanga wa Leta muri MINEDUC, ushinzwe Amashuri Abanza n’Ayisumbuye, Olivier Rwamukwaya (ibumoso), asaba ko abayobozi b’ibigo baba hafi y’abanyeshuri.

Muri aba banyeshuri, harimo 516 bigaga mu mashuri abanza naho 311 bigaga mu yisumbuye.

Umunyamabanga wa Leta muri Minisiteri y’Uburezi (MINEDUC) ushinzwe Amashuri Abanza n’Ayisumbuye, Olivier Rwamukwaya, avuga ko bamwe mu bayobozi b’ibigo bagira uruhare mu gutuma abana bata ishuri kubera kutita ku nshingano zabo.

Ubwo yari mu Karere ka Karongo tariki 17 Kanama 2016, yagize ati “Hari abayobozi bagera gake cyane ku bigo byabo. Ubwo se uwo yamenya abanyeshuri basibye n’abaje kwiga ku munsi runaka?”

Yakomeje agira ati “Guta ishuri ni ibintu bibanzirizwa no gusiba nta mpamvu, abarimu ntibabimenye, abarimu batigisha n’ibindi. Bisaba rero ko umuyobozi w’ikigo aba hafi y’abarezi n’abakirererwamo, akamenya ubuzima bwaho bwa buri munsi.”

Kanyange Marie Rose uyobora ishuri ribanza rya Gasura mu Murenge wa Bwishyura na we asanga uruhare rw’umuyobozi w’ikigo mu kurinda ko abana bata ishuri ari urwa mbere.

Ati “Uruhare rw’umuyobozi ni urwa mbere kuko ni we ukurikirana ubuzima bw’ikigo n’abakirimo umunsi ku munsi. Ubu twe iyo umwana asibye kabiri mu cyumweru, turamanuka tukajya iwabo, tukarebera hamwe impamvu n’ababyeyi ndetse n’umuyobozi w’Umudugudu.”

Umuyobozi ushinzwe uburezi mu Karere ka Karongi, Robert Hitumukiza, avuga ko kimwe mu bigiye kubafasha gukemura ikibazo cy’abata ishuri ari ukuba abarezi n’abayobozi babo bagiye kujya bakorera ku mihigo.

Ati “Kimwe mu bisubizo kuri kiriya kibazo ni uko abarimu ndetse n’abayobozi babo bagiye kujya bahiga kandi ni byo bazaheraho bahiga. Turakomeza kandi kwibutsa n’abashinzwe uburezi mu mirenge kudufasha gukurikirana amashuri kuko biri mu nshingano zabo.”

Abafite uburezi mu nshingano bibukijwe ko mu kugarura abataye ishuri, hagomba kubanza kurebwa n’impamvu barivuyemo, bityo hakirindwa ko abagarurwa babisikana n’abandi bagenda barivamo.

Umunyamabanga wa Leta muri MINEDUC ushinzwe amashuri abanza n’ayisumbuye, Olivier Rwamukwaya avuga ka muri gahunda yayo y’imyaka 10, Leta y’u Rwanda yiyemeje ko umwaka wa 2016-2017 uzarangira nibura buri mudugudu ufite ishuri ry’incuke riciriritse.

Umunyamabanga wa leta muri MINEDUC Olivier Rwamukwaya asanga buri wese nabigira ibye bizabasha kugerwaho.

Ubwo yari muri aka Karere kuri uyu wa wa gatatu tariki ya 17 Kanama 2016 yagize ati” Imibare y’abana bajya mu mashuri abanza banyuze mu mashuri y’incuke baracyari bake, ariko binyuze mu kubikangurira inzego zose bireba, ubuyobozi bw’akarere, abafatanyabikorwa, amatorero buri wese nabigiramo uruhare, bizagerwaho.

Kuba tukiri inyuma rero nicyo cyatumye duhaguruka kugira ngo guteza imbere uburezi bw’incuke babashe kubigira ibyabo, buri Mudugudu ubashe kugira ishuri ry’incuke ndetse buri Kagari nibura kagire iry’icyitegererezo.”

N’ubwo Rwamukwaya atagaragaza ikigereranyo igihugu kigezeho muri iyi gahunda, Akarere ka Karongi ko kavuga ko kageze kuri 20% aho gafite amashuri y’incuke 87 mu Midugudu 537 ikagize, ubukangurambaga mu babyeyi akaba ari bwo bugomba guherwaho mu gukemura iki kibazo nk’uko bitangazwa n’umuyobozi ushinzwe uburezi mu karere, Robert Hitumukiza.

Yagize ati” Amahirwe ni uko abafatanyabikorwa barabyumva, ahubwo ubu imbaraga ni ugushyirwa mu bukangurambaga ababyeyi bakajyanamo abana, kandi mwabyumvise ko amazu ahari akoreshwa gake nko ku nsengero n’ahandi mu bafatanyabikorwa nayo yakwifashishwa muri ubu burezi ariko bugakorwa.”

Abayobozi b’amashuri abashinzwe uburezi mu mirenge ya Karongi n’abafatanyabikorwa biyemeje umusanzu wabo mu mezi 10 buri mudugudu ukaba ufite ishuri ry’incuke.

Padiri mukuru wa Paruwasi Birambo Safari Laurent nk’umwe mu bafatanyabikorwa ati:” Abaturage nibo bakirisitu bacu, icyo dukora turongera ingufu mu kubumvisha akamaro no kubashishikariza kujyana abana muri aya mashuri kandi no mu kubafasha kubaherekeza.”

Kugira ngo iyi ntego ibashe kugerwaho, hanzuwe ko nibura mu mashuri ya Leta n’afashwa nayo, hashobora gushyirwaho umwaka umwe utegura ababura umwaka ngo batangire amashuri abanza, ariko hakirindwa ko bavangwa n’abatarageza igihe kuko bibagiraho ingaruka

Buri mu kozi azajya ava ku kazi buri munsi ahite yinjiza mu ikoranabuhanga ibyo yakoze ku buryo abamukurikirana bahita babibona batiriwe bava aho bari.

Muri ubu buryo bushya, umukozi ahabwa konti akaba ari yo yinjizamo ibyo ahize n’igihe bizashyirirwa mu bikorwa, icyo akoze ku muhigo runaka akongera kwinjira muri ya konti akabigaragaza, ku buryo abamukurikirana bibafasha kureba aho agejeje batiriwe bamugeraho ahubwo bakoresheje ikoranabuhanga.

Niyihaba Thomas, Umunyambanga Nshingwabikorwa w’Umurenge wa Murambi, avuga ko ubu buryo buzatuma umuntu yihozaho ijisho aho kurihozwaho n’abamuyobora ndetse bikarinda n’amarangamutima y’abakoresha mu gutanga amanota.

Agira ati ˝Kuba aho umuntu yicaye hose areba ibyo wakoze, bizakuraho amarangamutima ndetse bizavanaho kutavuga rumwe hagati y’abakoresha n’abakozi aho wasangaga umukozi avuga ati ‘iki naragikoze’ umukoresha na we ati ‘ntacyo wakoze’, ariko buri wese azaba areba icyakozwe.˝

IMbabazi Jimy, ushinzwe Imibereho Myiza n’iterambere mu Kagari ka Nyarugenge, Umurenge wa Rubengera, we ati ˝Bizatanga umusaruro kurushaho, umuntu azajya ava kuri terrain ahite agaragaza icyo yakoze, byonyine hari n’igihe wasangaga n’impapuro wahigiyeho zatakaye.˝

Umuyobozi w’Akarere ka Karongi, Ndayisaba Francois, we avuga ko bizanarinda icyo yise baringa.

Ati ˝Ubu buryo buratuma buri wese yinjira mu gikorwa agomba gukora kuko iyi sisiteme ubwayo iramuhwitura, agomba kugira ibyo agomba gukora mu kwezi, mu gihembwe, ku buryo nanebwa sisiteme ubwayo izaba yerekana ngo ntiyakoze iki, mbese bizaturinda icyo nakwita baringa.˝

Nubwo havugwa ibyiza byinshi by’ubu buryo bushya ariko, ngo hari imbagamizi ya interineti ikiri nke cyane mu bice bimwe na bimwe by’icyaro, ishobora kubangamira ishyirwa mu bikorwa ryabwo.

Hotel Golf Eden Rock ya Mugambira Aphrodice.

Ni nyuma y’iburanisha ku ifungwa n’ifungurwa ry’agateganyo ryabaye mu muhezo kuri uyu wa 11 Kanama 2016.

Kuri uyu wa 12 Kanama, mu gusoma imyanzuro y’’urubanza, urukiko rukaba rwagaragaje ko kubera impungenge z’uko uyu nyiri Hotel Golf Eden Rock yabangamira iperereza hemejwe ko afungwa iminsi 30 y’agateganyo agafungirwa muri Gereza ya Muhanga.

Urukiko rwavuze ko mu iburanisha, ubushinjacyaha bwagaragaje ko mu batangabuhamya harimo abagikora muri iyi hoteli ya Mugambira, bityo rutera utwatsi ibigaragazwa n’abamwunganira bavugaga ko abamushinja na bo bari gukurikiranwa n’izindi nzego.

Rwavuze kandi ko Mugambira yasabye gutanga umwishingizi ndetse n’amafaranga y’ingwate angana na miliyoni imwe, ariko bikaba bitahawe agaciro kubera imbogamizi zagaragajwe n’ubushinjacyaha.

Urukiko rwibukije Mugambira n’ubushinjacyaha ko iki cyemezo gishobora kujuririrwa bitarenze iminsi itanu.

Mugambira Aphrodice yatawe muri yombi ku wa kane w’icyumweru gishize, akurikiranyweho icyaha cyo gushishikariza, koshya cyangwa kuyobya umuntu umushora mu buraya kikaba gihanwa n’ingingo ya 206 yo mu gitabo cy’amategeko ahana ibyaha mu Rwanda.

Iki cyaha bivugwa ko yagikoze abwira abakobwa akoresha muri hoteli ye kuryamana n’abakiriya bayigana.

Iyi ngingo iteganya igihano cy’igifungo kuva ku mwaka umwe kugeza ku myaka 3 n’ihazabu y’amafaranga y’u Rwanda kuva ku bihumbi magana atanu (500.000) kugeza kuri miliyoni ebyiri (2.000.000) cyangwa kimwe gusa muri ibyo bihano.

Abaturage barizezwa ko mu kubagezaho serivisi zitandukanye hatazabaho gutsimbarara ku byiciro by’ubudehe.

Umuyobozi w’aka karere Ndayisaba Francois, yibutsa abaturage ko mu gihe cyose ibintu bikorwa n’abantu kandi bafite inshingano zo kurengera abo bayobora, bagomba guharanira ko ntawe urengana.

Yagize ati ˝Abayobozi babereyeho abaturage, nta mpungenge zakabayeho kuko ababikora ni abantu, kumva ikibazo cy’umuntu bakamugenera icyo agomba si ibintu bikomeye, abafite impungenge rero nazibamara.˝

Ubwo aheruka muri aka Karere muri Nyakanga 2016, Umunyamabanga uhoraho muri Minisiteri y’ubutegetsi bw’igihugu, Munyeshyaka Vincent yasabye abayobozi kwirinda gutsimbarara kuri ibi byiciro mu guha serivisi abaturage.

Umuyobozi w’Akarere yizeza abaturage ko ntawuzabuzwa icyo agomba kubera icyiciro.

Ati ˝Muri gahunda runaka zigenerwa abaturage, mugerageze kudatsimbarara ku byiciro by’Ubudehe barimo kurusha gusuzuma koko ibibazo bafite.

Hari ibintu bibiri tugomba gutandukanya, ibyiciro by’ubudehe ni uburyo budufasha mu iganamigambi mu gushyiraho za porogaramu zitandukanye ndetse no kugira ngo tumenye imibereho y’abanyarwanda.”

Ku ruhande rw’Abaturage nabo ngo kubanza kureba uko umuntu ahagaze mu gihe cya gahunda runaka byarengera benshi, nk’uko uwitwa Mbarira Donatien abivuga.

Ati “Ibyiciro by’ubudehe birafasha, ariko hari umuturage usanga yari aha ejo, uyu munsi akaba ari aha, kandi wongereho ko hari n’abo bibeshyeho.˝

Mukamugenza Léocadie we ati “Hari igihe rwose umuntu bamurenganya ngo ari mu cyiciro cy’abishoboye ntahabwe ibi n’ibi kandi uramutse utagendeye kuri ibyo ukajya kureba iwe, ntacyo atunze.˝

Hari abatari bake bakunze kugaragaza kutishimira ibyiciro by’ubudehe bashyizwemo, bagaragaza ko amikoro yabo ari make ugereranyije n’ay’abagomba kukibamo, gusa ntawe ugaragaza ko yashyizwe mu cyiciro arengeje ubushobozi bwacyo.

Hotel Golf Eden Rock.

Urubanza rw;uyu munyemari, nyiri Hotel Golf Eden Rock, iri ku Kivu muri Karongi yaburanye ifungwa n’ifungurwa ry’agateganyo kuri uyu wa 11 Kanama 2016.

Umucamanza yabanje kugaragariza abitabiriye urwo rubanza ibaruwa y’ubushanjacyaha yo ku wa 11/08/2016 isaba ku uru rubanza ruba mu muhezo.

Ubushinjacyaha muri iyi baruwa buvuga ko bwashingiye ku kuba hari abatangabuhamya bakoze cyangwa abagikorera muri iyi hoteli, kuba mu iburanisha haribugarukemo amagambo ajyanye n’imibonano mpuzabitsina yagira ingaruka ku Muco Nyarwanda ndetse no kuba Mugambira akora ubucuruzi bikaba bishobora kugira ingaruka kuri bizinesi ze kandi atarahamwa n’icyaha.

Mugambira wari kumwe n’abamwunganira batatu ari bo Me Sam Nkubayingoga, Me Jerome Musafiri na Me Manirakiza Claude, yabanje kubazwa niba icyaha akurikiranyweho acyemera, avuga ko atakemera ndetse anabazwa icyo avuga kuri iyi baruwa y’ubushinjacyaha, avuga ko na we yifuza kuburana mu muhezo.

Nyuma y’iburanisha muri uyu muhezo, ryamaze amasaha abiri n’igice, urukiko rwemeje ko umwanzuro ku ifunga n’ifungura uzasomwa ejo ku wa gatanu saa yine.

Uru rubanza rwimuwe inshuro ebyiri, aho rwari kuburanishwa ku wa kabiri w’iki cyumweru, nyuma rwimurirwa ku wa gatatu, hageze na bwo rwongera kwimurirwa uyu munsi.

Mugambira Aphrodice yatawe muri yombi ku wa kane w’icyumweru gishize, akurikiranyweho icyaha cyo gushishikariza, koshya cyangwa kuyobya umuntu umushora mu buraya, gihanwa n’ingingo ya 206 yo mu gitabo cy’amategeko ahana ibyaha mu Rwanda.

Iyi ngingo iteganya igihano cy’igifungo kuva ku mwaka umwe kugeza ku myaka 3 n’ihazabu y’amafaranga y’u Rwanda kuva ku bihumbi magana atanu (500.000) kugeza kuri miliyoni ebyiri (2.000.000) cyangwa kimwe gusa muri ibyo bihano.

Iki cyaha bivugwa ko yagikoze ahatira abakobwa akoresha muri hoteli ye kuryamana n’abakiriya bayigana.

Abayobozi mu nzego zitandukanye z’Akarere ka Karongi basobanurirwa imiterere y’Umudugudu wa Mbuganzeri muri Rweru mu Karere ka Bugesera.

Byatangajwe n’abayobozi ndetse n’abakozi b’aka karere 41 bari mu itsinda ryasuye, kuri uyu wa 09 Kanama 2016, umudugudu ugizwe n’amazu 104 yatujwemo ababaga ku birwa bya Mazani na Sharita muri Rweru, mu Karere ka Bugesera.

Ni mu rwego rwo kwitegura gutangira gushyira mu bikorwa icyifuzo cya Perezida wa Repubulika, Paul Kagame, yagaragaje ubwo yawufunguraga ku mugaragaro, avuga ko intara zose zagakwiye kubamo imidugudu nk’uwo.

Umuyobozi w’Akarere ka Karongi, Ndayisaba Francois, avuga ko nyuma y’ibyo basobanurirwaga kuri uwo mudugudu, babashije kwibonera byinshi utandukaniyeho n’indi, bikaba bibahaye isomo rizabafasha mu kunoza imiturire no kwihutisha iterambere ku batuye akarere ke.

Ati ˝Twarabirwaga tukumva ari byiza, noneho turabibonye dusanga ni byiza kurusha uko twabyumvaga. Ni isomo ryiza kandi rizadufasha muri gahunda nk’izo kunoza imiturire, kwegereza ibikorwa remezo abaturage benshi icyarimwe n’ibindi.˝

Niyihaba Thomas, Umunyamabnga Nshingwabikorwa w’Umurenge wa Murambi mu Karere ka Karongi, na we wari muri iri tsinda, agira ati “Ni byiza ko abayobozi bacu ahubwo batwijeje ko bazaharanira ko umudugudu nk’uyu ugezwa mu mirenge yose, kuko wafasha henshi mu iterambere.˝

Uyu mudugudu wubatse muri Rweru mu Karere ka Bugesera ufite ibyangombwa byose.

Gashyekero Pascal, wari uhagarariye abaturage akaba n’umwe mu bazimurwa ahagomba guterwa icyayi bagatuzwa mu mudugudu nk’uwo mu Murenge wa Rugabano, ati ˝Umuntu agira impungenge iyo atabona neza ikinyuranyo hagati y’aho avanywe n’aho agiye, ariko nihubahirizwa ibyo twiboneye, ni paradizo kuri twe.˝

Akarere ka Karongi kavuga ko mu gihe cy’amezi 12 kazaba kubatse umudugudu ugizwe n’amazu ari hagati ya 100 na 200, ariko nyuma y’iki gihe igikorwa kikazakomeza ku buryo bazagera ku mazu 500.

Uyu mudugudu ugomba kuba ugaragaramo ibikorwa by’ingenzi nk’amashuri, laboratwari, isomero, ubwiherero n’ibikoni bigezweho, ibibuga, ivuriro riciriritse (poste de santé), amazi meza, imihanda, interineti n’ibindi.

Transit Center ni ahantu haba hagenewe kwakira abantu by’agateganyo mu gihe bategerejwe koherezwa ahabugenewe (zimwe muri zo zifatwa nk’ibigo ngororamuco).

Guverineri w’Intara y’Iburengerazuba, Mukandasira Caritas, avuga ko basanze Transit Centers muri iyi ntara nta bakozi bihariye zigira, agasanga bisa n’aho umuntu ajyanwayo akavayo uko yagiyeyo, rimwe na rimwe ndetse bikaba byamugira mubi kurushaho.

Guverineri w’Intara y’Iburengerazuba Mukandasira Caritas avuga ko Transit Center nyinshi basanze zitagira gahunda zigenderaho

Ubwo yari mu Nama y’Intara y’umutekano yaguye yagize ati ˝Niba nta mukozi wihariye ushinzwe Transit Center, biragoye gupanga uko abahari bahabwa amasomo, ubwo twahora mu ruziga, umuntu ajyayo akavayo uko yagiye, ejo agasubirayo, gutyo gutyo.˝

Umuyobozi wa Polisi mu Ntara y’Iburengerazuba ACP Bertin Mutezintare we yagaye bamwe mu bayobozi bumva ko uwoherejwe muri Transit Center aba agiye guhanwa, yibutsa ko ari ahantu hacishwa umuntu igihe gito kugira ngo agororwe.

Urugero rwatanzwe ni urwagaragaye muri Transit Center ya Nyabushongo mu Karere ka Rubavu aho abahacishwaga batari bafashwe neza, bikaba ngombwa ko ubuyobozi bw’Akarere busabwa kunoza imikorere yayo.

Mu bisobanuro byatanzwe n’abayobozi b’Uturere batandukanye, bagiye bagaragaza ko ibikorerwa muri transit center zabo ari ukwirwanaho.

Umuyobozi w’Akarere ka Rusizi, Harerimana Frederic, yagize ati ˝Twagerageje kugira icyo dukora, wenda nta mukozi ikigo kigira ugicunga, ariko hari DASSO, gusa hari byinshi tugomba kunonosora kugira ngo tunoze uyu mwanzuro.˝

Umuyobozi w’Akarere ka Rutsiro, Ayinkamiye Emerance, we ati ˝Nubwo itujuje ibisabwa byose, ariko duherutse kuyisana, na twe nta mukozi uhoraho ifite, abayobozi batandukanye muri nyobozi dusimburanwayo gutanga amasomo.˝

Akarere ka Ngororero ni ko kashimiwe kuba karagaragaje gushyiraho gahunda ihamye muri Transit Center yayo, aho gafite umukozi uhoraho, hakaba ingengabihe y’amasomo ahatangirwa ndetse n’abayatanga.

Kuri iki kibazo, hamejwe ko hashyirwaho itsinda rigena imikorere ya buri transit center hakurikijwe amabwiriza ashyiraho iki kigo, igashyikirizwa buri Karere mu byumweru bibiri, ku buryo ihita itangira gukurikizwa.

Bizera ko umuganda w’abahuje umwuga utanga umusaruro.

Musabeyezu Charlotte, umuyobozi ushinzwe imiyoborere myiza akanagira igikorwa cy’umuganda mu nshingano avuga ko kuva hafatwa icyemezo ko abantu bahuje umurimo bakora umuganda ujyanye n’umurimo bakora, isura yawo igenda ihinduka n’agaciro kawo kakiyongera.

Atanga urugero rwo mu bitaro bya Kabaya, aho abakozi bubakiye abaturage ubwiherero 120, mu rwego rwo kunoza isuku nk’isoko y’ubuzima.

Agira ati “Abantu bahuriye ku mwuga baba ari nk’abavandimwe, icyo bakoze babishaka baba bumva cyagira isura nziza. Niyo mpamvu n’umuganda bashobora kuwukora nk’umwuga kandi byaratangiye.”

Ashishikariza buri kiciro gufata umuganda nk’igikorwa cy’abo. Ati “Urubyiruko rw’abanyeshuri rwakora umuganda wo kujijura abaturage, abarimu bashobora guhurira mu gikorwa cyo kwigisha abakuze gusoma no kwandika, abacuruzi bagakora umuganda wo kugenzura ukuri kw’ibiciro n’iminzani yiba abaturage n’ibindi.”

Gukorera umuganda mu matsinda muri aka karere byatangiriye mu murenge wa Muhororo muri 2012.

Harerimana Adrien, umunyamabanga nshingwabikorwa wawo avuga ko byatumye bihangira umuhanda wa 17km ahantu byari byarananiranye.

Gusa ngo hari ahakorwa amakosa ku bijyanye n’igenagaciro ry’umuganda, aho hari abagereranya ugasanga agaciro karabarirwa mu mafaranga menshi kandi igikorwa ari gito.

Akarere kahise gashyiraho ibipimo bishya bizajya bikoreshwa mu guha agaciro ibikorwa by’umuganda.

Urugero nko gusibura imiferege y’amazi ku muhanda metero 1 izahabwa agaciro ka 150frws, gutema ibihuru bikikije umuhanda metero 1 ni 300frws, kubakira utishoboye akarima k’igikoni gafite umurambararo wa metero 3 bizahingana na 50.000frw.

Mu 2016/2017 mu Karere ka Ngororero gateganijwe ko umuganda uzava mu mbaraga z’abaturage nk’umusanzu wo kunganira ingengo y’imari ya Leta karangana na miliyoni 804frw.

Umuyobozi w’aka Karere Ndayisaba Francois avuga ko ubusanzwe hari imyaro itatu yemewe ikoreshwa ku butaka bwako bwo ku Kivu, ariko hakaba n’indi abaturage bagenda biyongereraho mu buryo butazwi, bityo ikaba igomba gufungwa kuko ibangamira umutekano.

Bamwe mu barobyi n’abakoresha ubwato mu ngendo bemera nabo ko harimo akajagari

Ati ˝Ubundi hano muri Karongi dufite imyaro itatu izwi hariho n’inkeragutabara ziyirinda, ariko bariya baturage bagiye begereye ikivu hari ukuntu afata nk’akavure ke avanye mu rugo yengeramo nk’ibitoki agahita agashyira mu Kivu, ugasanga bihimbiye umwaro.˝

Turabanza gukora ubukangurambaga tubumvishe ingaruka ziri mu gupfa kwiroha mu Kivu, icya kabiri turegera inzego z’ibanze, aba baturge navuga basa n’abiba bakiha inzira bagenda, bajya Congo n’ahandi bashatse bakabakumira.˝

Ni nyuma y’uko iki kibazo kigaragajwe mu nama y’Intara y’Iburengerazuba y’umutekano yaguye yo kuwa 02 Kanama 2016, mu byavuye mu igenzura ryakozwe n’itsinda rihuriweho n’inzego zitandukanye ku burobyi n’ingendo bikorerwa mu Kivu.

Komanda w’abasirikare barwanira mu mazi (marine), Colonel Thedomir Bahizi umwe mu bari bagize iri tsinda yavuze ko ikibazo cy’imyaro itazwi ku kivu gikomeje guteza umutekano mucye ndetse hakaba hari n’ababikurizamo impfu bikamenyekana bitinze cyangwa ntibinamenyekane.

Hatanzwe urugero rwo mu Karere ka Rutsiro ahari abaturage bajya muri Congo mu buryo butemewe gushaka imitego y’amafi nayo itemewe, ahari umuryango basanze uri gukora ikiriyo rwihishwa nyuma yo kumenya ko umuntu wawo yaguyeyo ariko udashobora kumenya ahaherereye umurambo kandi ntunashake kubimnyesha ubuyobozi.

Murindabigwi Celestin umwe bakora umurimo wo gutwara abantu mu bwato, avuga ko ingamba zose zafatwa zigamije guca akajagari mu kivu bazubahiriza bishimye.

Imyaro izwi izajya ishyirwaho abayirinda, aho bagomba kubanza kugenzura buri wese uhagurutse mu bwato, kumenya aho agiye, no kureba niba ubwo bwato bwujuje ibisabwa, aha hakaba hakaziyongeraho irondo rigenzura ko ntabaca mu nzira zindi zitemewe.

Buri karere k’u Rwanda karasabwa kugira umudugudu nk’uyu wa Rweru.

Babisabwe kuri uyu wa 2 Kanama 2016 n’itsinda rihuriweho n’inzego zitandukanye rishinzwe gukurikirana gahunda ya Leta yiswe “Gutura neza, heza, amashanyarazi kuri bose”, aho buri karere kagomba kugira nibura Umudugudu w’Icyitegererezo umwe, uzwi nka “IDP Model Village”.

Iyi gahunda ni icyifuzo cya Perezida wa Repubulika, Paul Kagame, ubwo yatahaga umudugudu ugizwe n’amazu 104 yatujwemo ababaga ku birwa bya Mazani na Sharita muri Rweru, mu Karere ka Bugesera ku wa 04 Nyakanga 2016 hanizihizwaga umunsi wo kwibihora, aho yashoje ijambo rye agira ati ˝Harakabaho Rweru nyinshi, mu ntara zose.

Kuba iyi gahunda ije itaragenewe ingengo y’imari buri karere kakaba kagomba kwishakamo ubushobozi, biri mu byashingiweho basaba abayobozi kwirinda kuyigira urwitwazo ngo babe bakora ibyo batemererwa n’amategeko, bakanibutswa ko ari igikorwa kizabatera ishema.

Semwaga Angel, umwe mu bagize iri tsinda yagize, ati ˝Iyi project nirangira ni ishema kuri wowe muyobozi uzaba warayishyize mu bikorwa, ariko niba utangiye gutekereza ngo urabonamo amafaranga, ni akazi kawe, hari abayobozi bashakisha amafaranga nk’abayataye.˝

Guverineri w’iyi Ntara, Mukandasira Caritas, na we yagize ati ˝Ba Mayors ntabwo bigoye ariko aka ni akayunguruzo,….reka dukore tugarageze ko bishoboka kandi bizashoboka, dupfa kubigira ibyacu.˝

Umuyobozi w’Akarere ka Karongi, Ndayisaba Francois, avuga ko asanga iyi midugudu uretse kuba ivanaho ingaruka ku bari batuye nabi, izanafasha mu gutuma hari serivisi nyinshi abantu bazajya babonera hafi.

Ndayisaba avuga ko bazifashisha Ikigo cy’Igihugu cy’Ibikomoka ku Buhinzi byoherezwa mu Mahanga (NAEB) muri iki gikorwa kuko ngo cyari gisanganywe gahunda yo kubakira abimuwe ahazahingwa icyayi mu Murenge wa Rugabano, bakazagerageza no kwegera abandi bafatanyabikorwa.

Avuga kandi ko bateganya kubaka amazu 500 azubakwa mu byiciro, ariko bagateganya ko mu gihe cy’amezi 12 bagomba kuba bubatse hagati ya 100 na 200.

Uyu mudugudu ugomba kuba ugaragaramo ibikorwa by’ingenzi nk’amashuri afite laboratwire, isomero, ubwiherero n’ibikoni bigezweho, ibibuga, ivuriro riciriritse (poste de santé), amazi meza, imihanda n’ibindi, kandi buri nzu enye zikaba zubatse muri imwe (4 in one).

Umunyamabanga Nshingwabikorwa w’Intara y’Iburengerazuba, Paul Jabo, avuga ko abayobozi b’uturere bazarenza itariki bahawe baragaragaza urutonde rw’abanyereje amafaranga ya VUP bazafatwa nk’abafatanyacyaha.

Muri Werurwe 2016, Intara y’Iburengerazu yari yatanze amezi atatu kugira ngo abayobozi bihaye amafaranga muri VUP batayakwiye bayagarure.

Iki cyemezo cyagombaga kurangirana na tariki 30 Kamena 2016, nyuma y’iyi tariki abatarabyubahirije bakaba baragombaga gukurikiranwa bakayagarura ku ngufu za Leta.

Mu gutanga urutonde rw’abagomba gukurikiranwa, uturere ngo twakozemo amakosa nk’uko byasobanuwe n’Umunyamabanga Nshingwabikorwa w’Intara, Jabo Paul, mu nama y’umutekano y’intara yaguye yo kuri uyu wa 02 Knama 2016.

Ati ˝Itariki ya 30 Kamena igeze, twatse lisiti ariko baduha izirimo amakosa, twarongeye dusubiza ayo malisiti mu turere tubasaba raporo nzima, ariko na n’ubu. Izo raporo nimurenza kuri 15 Kanama mutaziduhaye, tuzabagaragaza nk’abafatanyije n’abanyereje, izo na zo zizaba ari baringa.˝

Jabo avuga ko bibabaje kuba abakozi bahembwa na Leta, ibaha amafaranga yo kugeza ku baturage batishoboye bakayitwarira, ndetse ntibagire ubushake bwo kuyasubiza.

Ku ruhande rw’abayobozi b’uturere, nubwo batagaragaza impavu yo gukereza aya malisiti, bavuga ko bagiye guhita bayatanga, aho bavuga ko ibyari bigoye babirangije.

Umuyobozi w’Akarere ka Karongi, Ndayisaba Francois, ati ˝Amazina yose turayafite, abapfuye, abahunze n’abahari, igisigaye ni ukunoza gahunda mu minsi mike tukaba twatanze urutonde.˝

Imibare yo muri Kamena 2016 yagaragazaga ko mu Ntara y’Iburengerazuba habarurwa agera kuri miliyari 2 n’ibihumbi 100FRW ya VUP yanyerejwe n’abayobozi mu nzego zitandukanye mu gihe yari ayagenewe abatishoboye.

Ubwo yari mu Karere ka Karongi kuwa 28 Nyakanga 2016, Nsanganira yagize ati˝Igihugu cyose gifite ubutaka butagera kuri hegitari miliyoni 1.5 bushobora guhingwa, burimo n’ubu tubona bwo mu misozi, ndetse ni nabwo bunini kuko igihugu cyacu kigizwe n’imisozi cyane.

Umunyamabanga wa leta muri MINAGRI avuga ko ubutaka bwo guhinga igihugu gifite butarenze miliyoni 1.5

Mutekereze ubwo butaka ubugabanyije abanyarwanda bagera kuri miliyoni 12, ndagira ngo mbasigire uwo mukoro muze kureba buri munyarwanda ubwo yabona bugabanywe, iyo tuvuze rero kubuhuriza hamwe hagamijwe kubwitaho mwakagombye kumva inyungu zabyo.˝

Nsanganira avuga ko imwe mu nzira zo kubyaza umusaruro ubutaka bucye iguhugu gifite ari ukubuhuriza hamwe bakirinda kuba ba nyamwigendaho kuko bituma serivisi zitandukanye leta ibagenera zibageraho neza.

Ku ruhande rw’abahinzi, ngo nabo basanga uru rugero rwakabateye ubushake bwo kwita no kubyaza umusaruro ushoboka ubutaka bucye batunze.

Murenzi Jonathan, umuhinzi wo mu Murenge wa Rubengera ati: ˝Akenshi turabyumva tukabikinisha, ariko urugero nk’urwo rusobanura imiterere nyayo y’ikibazo, bikatwereka intege tugomba gukoresha twita ku butaka bwacu.˝

Nyiramatama Liberée nawe wo muri uyu Murenge ati: ˝Buri munyarwanda wese abashije kumenya iyo mibare, ndakeka tutakongera kubona ibisambu bidahinze cyangwa abahinga uko biboneye.˝

Hakurikijwe iyi mibare itangazwa n’umunyamabanga wa leta muri MINAGRI, bivuze ko bibaye ngombwa ko abanyarwanda bagabana ubutaka bwo guhinga, buri wese yagira ubutarenze hagitari 0.125.

Izi nkende zituma abaturage batisanzura mu buhinzi kuko zibonera (Photo Internet)

Aba baturage batunzwe n’ubuhinzi bavuga ko nta bundi buryo bafite bwo guhangana n’iki kibazo, bahitamo guhinga ibihingwa inkende zidakunda kona.

Izo nkende zikunda konona ibigori, isoya, amashaza, ibitoki, amavoka n’amatunda, nk’uko Nzabandora Aloys umuhinzi mu Murenge wa Gishyita abitangaza.

Agira ati ˝Ubu isaha zitatwonera ni iza nijoro, ariko ntawahinga ibigori, soya. Ni imikumbi utabara, kuzirinda ni uguhinga iyo myaka zidakunda nk’ibyo bijumba, iyo myumbati ntizibasha kuyikura, ariko turugarijwe pe.˝

Kimwe na bagenzi be, bavuga ko ubushobozi bwabo ntacyo bwakora kuri iki kibazo kimaze imyaka myinshi, ariko bagasanga Leta itabura icyo igikoraho gifatika.

Nsanganira yazeje abafite ikibazo cyo konerwa kubakorera ubuvugizi kigakemuka.

Umuyobozi w’akarere Ndayisaba Francois, yemeza ko iki kibazo kibangamiye imirenge itandukanye yegereye iri shyamba kandi kikaba kirushaho gukaza umurego.

Ati ˝Iki kibazo kimaze igihe inaha, izo nkende ziratubangamiye kuko hamwe na hamwe nko mu kigo nderbuzima cya hariya usanga naho zinjiyemo.˝

Ubwo yari muri aka Karere tariki 28 Nyakanga 2016, Umunyamabanga wa leta muri Minisiteri y’Ubuhinzi n’Ubworozi, Tony Nsanganira yijjeje aba baturage ubuvugizi kuri iki kibazo.

Ati ˝Uburemere bwacyo numvise bukeneye ubuvugizi ku buryo zigera ku bitaro n’ahandi, bazibarira mu bwinshi cyane, twumvishe kubera inkende basigaye bahinga ibintu bidatanga inyungu kuko zitbirya, turakor ubuvigizi byihuse.˝

Aba baturage bavuga ko umunsi ku wundi amashyo y’izi nkende yiyongera kubera kororoka, bigatuma zirushaho kona n’ibyo zitari zisanzwe zirya.

Abahinzi barasabwa kubyaza umusaruro ibikorwaremezo byo kuhira imyaka bahawe.

Yabibasabye kuri uyu wa 29 Nyakanga 2016 ubwo yari yo mu gikorwa cyo gutangiza igihembwe cy’ihinga C ndetse no muri gahunda ngari y’ubukangurambaga ku guhora biteguye ntibatungurwe n’imihindukire y’ikirere.

Yasuye ahakozwe amaterasi y’indinganire hahinzwe imboga ku buso bwa hegitari 80, hakaba harashyizwe idamu (icyobo cy’amazi yifashishwa mu kuvomerera imyaka) n’imiyoboro y’amazi akwirakwizwa mu myaka hifashishijwe imipira; byakozwe ku bufatanye n’umushinga LWH.

Yagize ati ˝Kuba mushobora kuhira iyi myaka yanyu ni amahirwe akomeye, kandi ni imari itari ntoya yashowe muri ibi bikorwa. Tuba tugira ngo buri wese uhinga muri aya materasi abashe kuyabyaza umusaruro uko bikwiye.˝

Minisitiri Nsanganira yasabye abahinzi muri rusange kutajya batungurwa n’izuba kandi hafi yabo hari amazi, abasaba guhora biteguye uburyo bwo kuyafata bakaba bayakoresha mu kuvomerera imyaka.

Minisitiri Nsanganira yifatanya n’abahinzi bo mu Murenge wa Rubengera muri Karongi mu gutangiza igihembwe cy’ihinga C.

Umuhuzabikorwa w’umushinga LWH mu turere twa Karongi na Rutsiro, Emile R urangwa, avuga ko nubwo batangiranye n’imyumvire y’abaturage yari hasi cyane, aho benshi bumvaga kubashyirira amaterasi ku butaka ari ukubateza inzara, ubu bagenda bumva akamaro abafitiye.

Mporanyi Jean, umwe mu bahinga muri aya materasi, ati ˝Badusaba kuvanaho urutoki rwa ntakigenda rwari kuri uyu musozi ntitwabyumvaga, ariko reba no mu mpeshyi turahinga tukeza. Akamaro bidufiteye twarakabonye, ndizera ko umusaruro ukwiye Minisitiri adusaba tuzawugeraho.˝

Hanasuwe kandi igishanga cya Mwumviro kiri mu Murenge wa Gishyita ahahurijwe hamwe ubuso bwa hegitari 8. Bakaba babasha kuvomerera bakoresheje imashini ikwirakwiza amazi.

Kubera ko igihembwe cy’ihinga C kirangwa n’izuba ryinshi gihingwamo imboga, abahinzi bagasabwa guhinga cyane mu bishanga ndetse no mu misozi aho bashobora kuvomerera.

Ngo haracyari imisoro itikirira muri magendu inyura mu Kivu.

Umunyamabanga Nshingwabikorwa w’iyi Ntara, Jabo Paul, avuga ko hari icyizere ko ababikoraga bazabireka kuko ngo ubusanzwe abaturage ari bantu bumva iyo beretswe akamaro k’ibyo babwirwa.

Ati ˝Ubu twafashe gahunda yo kugena ahantu hemewe abaturage bashobora kwambukira bagenda cyangwa baza, tuzafatanya n’inzego nk’inkeragutabara, abacuruzi bacururiza hafi y’ibyo byambu,.. kugira ngo dukumire abanyura hanze y’ahagenwe.

Avuga ko bazagena ahantu henshi hashoboka kugira ngo borohereze abaturage kugera aho bambukira.

Ati “Ibyo rero bizatuma abantu bakorera mu mucyo, abaturage bacu barumva, iyo ubabwiye baremera. Tuzakorana inama na bo kugira ngo tubereke ububi bwa magendu, n’inyungu zo gukorere ahagaragara. ˝

Umunyamabanga Nshingwabikorwa w’Intara y’Iburengerazuba, Paul Jabo, yijej Rwanda Revenue ko bafashe ingamba zo guca iyo magendu.

Ubuyobozi bwa RRA mu Ntara y’Iburengerazuba buvuga ko ikigereranyo cy’imisoro yagatanzwe ariko igacikira muri izi magendu kiri kuri miliyoni 3 buri kwezi.

Avuga ko ibicuruzwa bihacishwa byiganjemo ibitenge, salsa, amata ya Nido ndetse n’inzoga zo mu bwoko bwa likeri (liqueur).

Urimubenshi Aimable, umwe bakora ubucuruzi mu Karere ka Karongi, akaba n’umwe mu bahembewe kuba indashyikirwa mu gutanga imisoro ku bushake, avuga ko magendu nk’izo zibabangamira, bitewe n’uko abazikora baba batasoze, bagacuruza ku mafaranga make zikanahombya Leta.

Ati ˝Zibangamira abakorera ubucuruzi bwabo mu mucyo, ariko kandi zihombya Leta kuko iyo nta misoro, nta mihanda, nta mavuriro… mbese nta bikorwa remezo muri rusange. ˝

Komiseri Mukuru wungirije muri RRA, Rugenintwari Pascal, avuga ko hashyizweho uburyo butandukanye bugamije korohoreza abasora, ariko bazakomeza kurushaho kubegera kugira ngo babasobanurire akamaro kabyo.

Mu rwego rwo kwigisha abataritabira gusora kubikora, hemejwe ko ku bufatanye bw’iyi Ntara, RRA ndetse n’abikorera, hatangira kubarurwa abacuruzi bose kugira ngo bakangurirwe kwinjira mu rugaga rw’abakorera.

Gukoresha Inkeragutabara mu kugeza inyongeramusaruro ku baturage ngo bizarinda uburiganya.

Inama yahuje abashinzwe ubuhinzi mu Karere ka Karongi tariki 26 Nyakanga 2016, igamije kwiga ku mitegurire y’igihembwe cy’ihinga cya 2017 A, yemeje ko hagomba gutegurwa inyongeramusaruro zihagije kandi zujuje ubuziranenge.

Ikigo cy’Igihugu gishinzwe Ubuhinzi n’Ubworozi (RAB) kivuga ko kwegurira iki gikorwa Inkeragutabara bizagabanya uburiganya bwakunze kugaragara muri iyi gahunda, aho bamwe bagezaga izi nyongeramusaruro ku baturage, bashinjwa kongera umubare w’abo bazihaye bagamijwe kwishyuza Leta amafaranga y’umurengera.

Nuwumuremyi Jeaninne uhagarariye RAB mu Ntara y’Iburengerazuba, avuga ko kugeza inyongeramusaruro ku bahinzi hari aho byagaragayemo uburiganya, cyane nko kubeshya imibare y’abazihawe.

Yagize ati “Mu rwego rwo kunoza gutanga izi nyongeramusaruro, ubu bizajya bikorwa n’Inkeragutabara kuko byagaragaye ko harimo ibintu bitanoze mu gutanga amafumbire n’imbuto, kandi byagiraga ingaruka bikanahombya Leta.”

Abafite ubuhinzi mu nshingano mu Karere ka Karongi bitabiriye inama.

Mbabarira Anastasie, umuyobozi ushinzwe ubuhinzi mu Karere ka Karongi, na we avuga ko imibare ipfuye igaragaza abahawe inyongeramusaruro yicaga igenamigambi.

Agira ati “Niba twakoraga igenamigambi tugendeye ku rutonde rw’abahawe inyongeramusaruro kandi atari rwo, urumva ko na ryo ryabaga ripfuye cyangwa no mu byagezweho dutangaza na ho bikabamo ibitari ukuri.”

Ndayisenga Stanislas, umwe mu basanzwe bashinzwe kugeza inyongeramusaruro ku baturage, avuga ko iyi ngeso yo kwandika imibare ya baringa yabagaho nubwo ababikora baba bazi ko ari bibi.

Yagize ati “Ntaho nagiye gukoresha iperereza, ariko ibyo bintu numvaga ko bibaho kandi byabangamiraga iterambere.”

Mugenzi we utashatse ko amazina ye atangazwa, ati “Abagiye babikora nabi nyine baraduhemukiye kandi koko biriya byose byarakorwaga.”

Kubera ikibazo cy’ubusharire bw’ubutaka bw’Akarere ka Karongi, kari mu twagenewe inkunga izwi ku izina rya “Nkunganire”, aho Leta y’u Rwanda yishyurira umuturage 25% ku ifumbire na 80% ku mbuto y’indobanure, na we akiyishyurira igice gisigaye.

Ubwo Kigali Today yasuraga uyu mukecuru w’imyaka 88 mu ntangiriro z’ukwezi kwa gatatu uyu mwaka, twamusanze mu nzu y’ibyumba bibiri n’uruganiriro (sallon), idasakaye ndetse ntigire n’imiryango, yenda kumugwaho, akaba yari ayimazemo imyaka ibiri.

Ubuyobozi bw’umurenge bwadutangarije ko butigeze bumenya icyo kibazo, bukagaya abayobozi b’akagari n’umudugudu abarizwamo kuba butaragaragaje icyo kibazo, gusa buhita bushaka ahandi bumucumbikira ndetse bumwizeza kumwubakira bitarenze Kanama 2016.

Iki gihe ariko nticyubahirijwe kuko ubwo twongeraga gusura uyu mukecuru nyuma y’uko igihe cyari cyatanzwe ngo abe yubakiwe cyarangiye, twasanze nta kirakorwa mu gutangira kumwubakira.

Umunyamabanga Nshingwabikorwa w’uyu Murenge, Mutuyimana Emmanuel, avuga ko habayemo uburangare hagati y’ubuyobozi bw’Akagari ka Kayenzi n’Umudugudu wa Ruhanda uyu mukecuru abarizwamo, ariko akizeza ko noneho mu gihe cy’ukwezi azaba yamaze kubakirwa.

Yagize ati˝Twaherutse dutanga amabati, ariko ngo mu mudugudu baje kubura ibiti batangira gushaka ukuntu bakwishakamo ubushobozi ntibatubwira ni ko umuyobozi w’akagari amaze kumbwira, ariko rwose namugaye, iki kibazo cyakabaye cyaravuye mu nzira.˝

Umuyobozi w’uyu mudugudu na we avuga ko ikibazo cy’ibiti ari cyo cyadindije kubakira uyu mukecuru, bakaba bari bacyegeranya ubufasha kugira ngo babashe kubigura babone gutangira kumwubakira.

Ku ruhande rwe, Mukabagema avuga ko azakomeza kwihangana agategereza kuko uko byamera kose ntaho bihuriye n’aho yabaga mbere imvura igwa ikamucikiraho, izuba naryo ryava ntagire aho arihungira.

Umuyobozi w’Akarere ka Karongi, Ndayisaba Francois, avuga ko uyu mukino w’amahirwe ukomeje gutikiza imitungo y’abaturage.

Agira ati “Ubu dufite Ibiryabarezi bigera muri 70 mu Karere kacu, ariko iyo urebye abaturage bacu bakomeje kuhahombera, kuko hari n’abo wumva ko bagurishije inka zikahashirira! Turabasaba ko bakwirinda gukinisha abana mu biruhuko, ababyeyi na bo bakababa hafi.˝

Mayor Ndayisaba asaba abatanze abahaye ibyangombwa “ibiryabarezi” gushyiraho uburyo bwo kureberera abaturage bo hasi. aho asanga atari umukino wo kujyana mu baturage bafite imyumvire nk’iyo mu cyaro.

Ati “Buri kimwe nibura ku munsi kinjiza ibihumbi 200, Umushinwa yagiteguye ku buryo nibura niba kiriye ibihumbi 200, gisohora ibihumbi 20. Ni ukuvuga ngo umuturage wacu arahomba cyane. Ababishinzwe bakarebereye n’uyu muturage wo hasi w’imyumvire iri hasi.˝

Abaturage batandukanye na bo bemeza ko uyu mukino ubabangamiye kuko imitungo ya benshi ihashirira ukanararura urubyiruko.

Muhirwa Donatien, utuye mu Murenge wa , ati “Nta mukino urimo ni urusimbi nk’urundi! Imitungo yashize mu miryango, abana bari kuba ibirara kubera ibyo ‘biryabarezi’, batuvuganire babifunge.˝

Ibitaro bya Kirinda uyu mubyeyi n’umwana atwite baguyemo.

Uyu mubyeyi yajyanywe ku kigo nderabuzima ashaka kubyara, biza gusaba ko ajyanwa ku bitaro bya Kirinda nabyo bifatanye n’iki kigo nderabuzima, ariko akihagera arapfa n’umwana yari atwite, nk’uko Umuyobozi w’Akarere wungirije ushinzwe imibereho myiza y’abaturage, Mukasehama Drocelle yabivuze.

Yagize ati “Twamenye ko bafashwe na polisi, bakaba bakurikiranyweho icyaha cyo kurangarana umubyeyi wari ugiye kubyara bikamuviramo urupfu ndetse n’umwana yari atwite. Buriya ibintu byo kwa muganga bigira tekiniki zabyo, bafatanyije na polisi nibo bazagaragaza ukuri kuri byo.”

Umuvugizi wa polisi mu Ntara y’Iburengerazuba, CIP Theobald Kanamugire yavuze ko abaforomo bafatanywe n’umuyobozi washatse gutanga ngo abafashwe barekurwe, bafungiye kuri sitasiyo ya polisi ya Gashari.

Ati “Bafashwe kuwa kane w’icyumweru gushize bakurikiranyweho icyaha cyo kurangarana uri mu kaga. Naho umuyobozi wabo yafashwe ejo ubwo yari atumijwe ngo abazwe, ariko agahita ashaka guha ruswa umupolisi ngo arekure bagenzi be.”

CIP Kanamugire avuga ko aba baforomo bahamwe n’icyaha cyo kudatabara uri uri mu kaga, bahanishwa ingingo ya 570 mu gitabo cy’amategeko ahana y’u Rwanda, iteganya igifungo cy’imyaka ibiri kugeza kuri itanu n’ihazabu y’ibihumbi 100 Frw kugeza kuri miliyoni 1Frw.

Avuga kandi ko uyu muyobozi w’ikigo nderabuzima nawe ahamwe n’icyaha gutanga impano agira ngo hakorwe ibinyuranyije n’amategeko yahanishwa ingingo ya 641, igena igifungo cy’imyaka 5 kugeza kuri 7.

Umuyobozi w’Akarere ka Karongi, Ndayisaba Francois avuga ko hagenda hashakishwa uburyo bwakwifashishwa ngo inka zitangwa muri gahunda ya Girinka zifatwe neza kandi harindwe ko zibwa, nabwo bakaba basanga buzafasha.

Basanga kugaragaza mbere uziturwa bizajya bifasha mu kwita no kurinda inka yatanzwe

Ati˝Ni igitekerezo nk’Akarere twagize, twasanze hari igihe umuntu wahawe inka ashobora kurwara nta wundi umufasha kuyitaho, ashobora kuyifata nabi kubera izindi mpamvu cyangwa ikaba yanagurishwa.

Uyu muntu rero wa kabiri uzajya aba yagaragajwe nk’uziturwa, yafasha muri cya gihe uwayihawe yagize ikibazo, mu gihe ari kubona ayifata nabi akamuhwitura cyangwa agatanga amakuru yemwe anayicungira hafi ku buryo itagurishwa rwihishwa.˝

Ku ruhande rw’abaturage, nabo ngo basanga ubu buryo bwafasha ku kwita no kurinda inka zitangwa muri gahunda ya Girinka.

Uwamahoro Valentine utuye mu Murenge wa Gashari ati ˝Umuntu yamaze gutangazwa ko ariwe inka itanzwe iziturwa, yatangira kuyitekereza agaharanira icyatuma ibaho neza kuko niyo abateho amakiriro, ntawayifata nabi rero cyangwa ngo ayigurishe ahari areba.˝

Umuyobozi w’Akarere ka Karongi Ndayisaba Francois asanga ubu buryo buzatanga umusaruro mwiza

Rubayiza Cléophace wo mu Murenge wa Gitesi nawe ati: ˝Iyo gahunda yafasha cyane,kuko ubwo nyuma y’ubuyobozi haba hari umuntu wundi ucungira hafi.˝

Akarere ka Karongi karatangaza ibi nyuma y’uko kugeza ubu kemeza ko inka 214 mu zimaze gutangwa muri gahunda ya Girinka zaburiwe irengero burundu, 190 muri zo zikab ari izagurishijwe rwihishwa, naho 24 zikibwa.

Ibi byatangajwe kuri uyu wa Kane tariki ya 21 Nyakanga 2016 mu nama y’iminsi itatu ihuje abahagarariye inzego zitandukanye z’aka Karere n’abakozi b’umuryango World Vision wita ku bana mu rwego rwo gutegura igenamigambi ry’uyu muryango mu gihe cy’imyaka 5 iri imbere.

Umuhuzabikorwa wa World Vision mu karere ka Karongi (ufite mikoro) avuga ko gukorana igenamigambi n’abagenerwabikorwa bitanga umusaruro

Umuyobozi w’Akarere, Ndayisaba Francois yagize ati: ˝Aba bose ni abahagarariye abaturage, bazanye ibitekerezo by’abaturage kugira ngo bicare hamwe, iri genamigambi ry’imyaka 5 bakora barikore bashingiye ku byifuzo by’abaturage

Hari abandi bafatanyabikorwa usanga batuzanira gahunda zabo bagashaka kuzitwemeza nk’aho bazi ibyifuzo byacu cyangwa ibiabzo dufite, ariko World Vision yo iricarana n’abantu bahagarariye abaturage ikumva ibyo bakeneye.˝

Umuhuzabikorwa wa World Vision mu Karere ka Karongi, Ruganzu Jonas avuga ko kugendera ku byifuzo n’ibitekerezo by’abagenerwabikorwa mu igenamigambi ryabo, aribyo bituma ubu babona impinduka nziza buzima bw’abana n’ubw’abaturage muri rusange.

Ati˝Imitsindire y’abana mu mashuri yarazamutse, hagabanutseho 15% ku bana bari bafite imirire mibi muri aka gace….. iyo ugereranyije ubu n’igihe twari tutaratangira gukorera hano usanga abana bafite ubuzima bwiza muri rusange.˝

Mukafuraha Consolé utuye mu Murenge wa Rubengera, nawe avuga ko uyu muryango hari byinshi wahinduye ku buzima bw’abana babo. Ati: ˝Abana bacu ubu babayeho neza, baranywa amata, baravuzwa, mbese ibintu byarahindutse.˝

Kugeza ubu, World vision iza mu bafatanyabikorwa ba mbere mu kunganira ingeno y’imari y’Akarere ka Karongi, muri gahunda zayo zo kwita ku mwana, ikaba igaragara mu bikorwa bitandukanye nk’ibyo kubaka amavuriro, kubaka amashuri, kugeza amazi meza ku baturage, gutanga amatungo maremare ndetse n’amagufi n’ibindi.

Abenshi mu bakozi b’imirenge usanga ngo badasobanukiwe n’impapuro zifashishwa mu gutanga serivisi ziswe "Service Charter". Aha RGB yari mu bugenzuzi mu Murenge wa Mubuga.

Izi mpapuro biteganywa ko zishyirwa ku biro bya buri rwego rw’ibanze kuva ku kagari kugeza ku karere, zikaba zigaragaza servisi zitangirwa kuri buri rwego ndetse n’ibyo usaba izo serivisi asabwa ngo azibone, nk’igihe bitwara, ikiguzi n’ibindi.

Uwizeye Solange, Umukozi wa RGB ushinzwe Gukurikirana Imiyoborere n’Imitangire ya Serivisi mu nzego za Leta, avuga ko we n’itsinda ayoboye mu kureba imikoreshereze y’izi mpapuro basanze muri Karongi ziri ku mirenge gusa, kandi abenshi mu bayobozi bakaba badasobanukiwe imikoresehereze yazo.

Ati ˝Ku mirenge hafi ya yose izi mpapuro ziramanitse, ariko wagera ku kagari ukazibura, ikindi twabonye, ntabwo abantu bazisobanukiwe, baba abakozi bo ku mirenge no ku kagari! Ni ukwirwariza, nta mahugurwa bigeze bazihabwaho,….. abaturage bo twasanze ari mu gicuku.˝

Itsinda rya RGB mu kugenzura imikoresherezo ya "Service charter" ryasanze abaturage ntacyo bazi kuri izo mpapuro kandi ari zo zibayobora mu kwaka serivisi.

Uwizeye akomeza avuga ko izi mpapuro zihabwa uturere tukanasabwa kuzikwirakwiza mu nzego zo hasi, habanje guhugurwa abakozi bo ku turere kugira ngo bazahugure abandi bikanegezwa no ku baturage kuko ari bo bagerwabikorwa ba mbere bazo.

Umunyamabanga Nshingwabikorwa w’Akarere, Muhire Emmanuel, avuga ko ikibazo cyabayeho ari uko impapuro bari bahawe zabaye nke.

Ati ˝Hari aho basanze ziriya Service charter zitari kuko izo bari baduhaye zari nke, twabashije kuzishyira ku mirenge hagasigara iy’akagari kamwe, n ayo tugahitamo kuyishyira ku murenge kugira ngo abahagera babashe kuyibona.˝

RGB yasanze abayobozi mu nzego z’ibanze n’abaturage muri Karongi batazi imikoreshereze y’izi mpapuro kandi ari zo zigaragaza serivisi zitangwa.

Aha RGB ivuga ko nubwo itabashije guhuza imibare neza n’aho izi mpapuro zagombaga kujya hose, ariko akarere katigeze kagaragaza ko hari aho zitagejejwe kandi ari ngombwa. Hanzuwe ko akarere kagaragaza imibare y’izibura RGB ikazazibaha.

Iri genzura mu Karere ka Karongi, ryabaye kuva ku wa 18-19 Nyakanga, ikaba ikomereje mu Karere ka Rutsiro.

Komite nshya ya SACCO Rubengera ngo izaharanira ko serivise zihabwa abakiliya zinozwa.

Ibi babisabwe mu nteko rusange idasanzwe y’iyi SACCO yateranye ku wa Mbere tariki ya 18 Nyakanga 2016.

Iyi nteko idasanzwe yanasimbuje komite y’inama y’ubutegetsi yari irangije manda yayo. Umukoro wa mbere komite nshya yahawe ukaba ari ukwita ku kunoza serivisi zihabwa abakiliya.

Nyamurinda Protais wari uyoboye komite icyuye igihe, yagize ati ˝Imwe mu mbogamizi twahuye na yo, ni ukuba tutaragera ku rwego twifuza rwo kunoza serivisi dutanga,. Ni cyo dusaba komite igiyeho ikabyitaho, umukiliya ni umwami kandi ni we utumye bariya bakozi bose baba hariya.˝

Nyamurinda agaragaza ko indi mbogamizi bahuye na yo ari iy’abakozi bibye amafaranga ya SACCO, cyakora inkiko zikaba zaramaze kwemeza ko bayishyura, ariko akavuga ko kuyiba na byo bituruka ku kudaha agaciro abayabikijemo.

Abakozi bibukijwe ko bgomba kubaha abakiriya kuko ari bo bakesha akazi.

Usabyimana Gellas watorewe kuyobora komite nshya, avuga ko ibyo basabwe bazabikurikiza uko biri.

Agira ati ˝Tugiye kwicara n’abakozi tuganire, bumve ko inyungu z’ikigo ari zo z’umukiliya, ndetse zikaba ari na zo nyungu zabo bwite, bityo duharanire kunoza serivisi. ˝

Nyinawumukobwa Confiance, umunyamuryango w’iki kigo cy’imari, ati ˝Icyo dusaba iyi komite twashyizeho ni ugukoresha neza imyanya babonye, bakabikora mu nyungu z’umuyamuryango muri rusange ari na ko bamuha serivisi akwiye.˝

Uretse imitangire ya serivisi ku babagana, komite nshya irasabwa guhangana n’ikibazo cy’abahabwa inguzanyo batazishyura uko bikwiye. Kugeza ubu, ikigereranyo cy’ubukerewe mu kwishyura inguzanyo kiri kuri 29%, mu gihe Banki Nkuru y’u Rwanda (BNR) iteganya ko kitagomba kurenga 5%.

Abaturage ntibitabira gufata umuriro ku miyoboro bagezwaho.

Umunyamabanga Nshingwabikorwa w’aka Karere, Muhire Emmanuel avuga ko hari gahunda yo kugeza imiyoboro mishya mu mirenge ya Mubuga, Rwankuba, Twumba, Gitesi, Mutuntu, Ruganda, na Twumba igomba kugaburira abaturage 7,751 izatwara miliyari 5,8Frw.

Agita ati “Imiyoboro y’amashanyarazi iragenda yiyongera mu Karere, ariko ugasanga abaturage bacu ntibakoresha amashanyarazi, nta witabira kuyafata ku muyoboro ngo ayajyane iwe.”

Asaba abayobozi mu nzego z ‘ibanze zitandukanye gukoresha uburyo bwose bushoboka ibikorwa nk’ibi biba byatwaye akayabo bikabyarira inyungu abaturage.

Umuyobozi w’Inama Njyanama y’Akarere ka Karongi, Mutangana Frederic asanga ikibazo gishingiye ku bukangurambaga bukiri hasi, agasaba abayobozi kwegera abaturage.

Ati “Igikenewe ni ubukangurambaga, ubu abaturage benshi bafite abana biga, kumbwira ko umwana we uri kwigira azarwara ibihaha, kandi nyamara biciro byenda kungana, umuturage wacu bisaba ngo tumwegere, ibikorwa remezo abigiremo uruhare.”

Mutuyeyezu Alphonse wo mu Murenge wa Bwishyura, umwe mu yigize umujyi, utaritabiriye gukurura umuriro, agaragaza ko bagifite imbogamizi z’amafaranga.

Ati “Akamaro k’amashanyarazi turakazi cyane, ariko amafaranga yo kuyageza mu nzu ntago ajyanye n’ubukungu bwa buri wese.”

Kugeza ubu Akarere ka Karongi kari ku kigereranyo cya 15,6% mu gukoresha umuriro w’amashanyarazi mu ngo, mu gihe umurenge umwe muri 13 igize aka karere ari wo utagerwamo n’amashyanyarazi.

Ubwo u Rwanda rwizihizaga umunsi wo kwibihora, Umunyamabanga Nshingwabikorwa w’aka Karere, Muhire Emmanuel yibukije urubyiruko ko aheza h’igihugu hategurwa haherewe kuri rwo.

Hamwe ku masantere ibiceri byatangiye kubura kubera kubijyana muri uyu mukino

Yagize ati ˝U Rwanda rukeneye urubyiruko ruzi aho igihugu cyavuye n’aho kigana, kandi kikazahagera rubigizemo uruhare, ntago urubyiruko rwirirwa mu Biryabarezi rero rwagira icyo rugeza ku gihugu.˝

Muhire kandi avuga ko uretse gushukwa, ugiye gukina uyu mukino w’Ikiryabarezi yakagombye no kubanza kumva iryo zina ubwaryo. Ati ˝Ese iryo zina ryo ntubanza ngo unaryumve? Kirya ˝Abarezi˝ nyine, usobanukiwe ntacyegera! ˝

Ni mu gihe uyu mukino benshi bavuga ko urarura urubyiruko ukomeje kwitabirwa ari nako ugera mu bice bitandukanye by’igihugu, aho uwukina ashyira igiceri cyangwa ibiceri mu cyuma agategereza ko kimwungikira cyangwa kimuhombya, bakaba basaba ko wahagarikwa.

Maniriho Pélagie utuye mu Murenge wa Bwishyura ati˝Uyu si umukino ni ˝Urusimbi˝ kandi dusanzwe tuzi ko Leta irurwanya, nawo badufashe bawuhagarike, kuko nta kindi umaze uretse kurarura abana, nibikomeza gutya nta mubyeyi uzongera gutunga amafaranga afite abana.˝

Hari kandi n’abemeza ko atari abana gusa uyu mukino wagiraho ingaruka, kuko ngo hari n’abakuru bawubyukiramo bakawirirwamo aho kujya gukora, kandi ngo birangira n’ayo bajyanyemo ntayo batahanye.

Mivumbi Léopold, umusaza w’imyaka 80 ati: ˝Si urubyiruko gusa rwibasiwe, ko mbona se hari n’abakuru n’abakuru aho kujya gushakira amaramuko mu kazi baza kuyashakira kuri iki cyuma!˝

Ubuyobozi bw’Akarere busaba ababyeyi gukurikirana abana babo no kubasobanurira ingaruka ziri muri uyu mukino, mu gihe hakigwa ku ngamba zirambye kuri wo.

Umuyobozi w’Akarere ka Karongi Wungirije ushinzwe Imibereho Myiza y’Abaturage asuzuma ko moto ari nzima.

Hari kuri uyu wa 14 Nyakanga 2016, ubwo umushinga w’Abasuwisi ushinzwe kwita ku buzima bw’umwana n’umubyeyi wabashyikirizaga moto 12 zizabafasha mu ngendo ndetse no gutwara imiti n’ibikoresho bagera ku bo baha serivisi.

Muhire Bonaventure, Umuyobozi w’Ikigo Nderabuzima cya Mwendo, avuga ko byabahendaga cyane kujya gukingira abana, kugera ku bajyanama b’ubuzima no kugera ku baturage mu bukangurambaga butandukanye.

Ati “Byadusabaga gukodesha moto duteze, ubundi ugasanga hari igihe bitwaye nk’ukwezi ngo tugere ku baturage.”

Mushimiyimana Collete, uyobora Ikigo Nderabuzima cya Bisesero, we agira ati “Nsanzwe mfite uruhushya rwo gutwara, ariko natangaga gahunda mu baturage nko gukingira, gupima abagore tubasanze aho bari n’ibindi nkabura uko ngerayo kuko nta moto, none ndayibonye.”

Mukashema Drocelle, Umuyobozi w’Akarere ka Karongi Wungirije ushinzwe Imibereho Myiza y’Abaturage, yasabye abahawe izi moto kuzifata neza, kandi bakagaragaza impinduka ku mitangire ya serivisi nyuma yo kuzihabwa.

Ati “Mu kazi kabo ni bo zizafasha umunsi ku munsi, turabasaba kuzifata neza bazirikana agaciro kazo, ariko kandi tukaba tubategerejeho impinduka ku kurushaho kunoza serivisi batanga mu gihe nk’iki bamaze kuzibona.”

Ngizinshuti Protegene, uhagarariye uyu mushinga mu Karere ka Karongi, Rutsiro na Nyamasheke yavuze ko batekereje iki gikorwa mu gufasha Leta muri gahunda zo kwegereza abaturage ubuvuzi.

Ati “Ni ugufasha Leta muri gahunda yayo isanzwe yo kwegera abaturage bakabaganiriza kuri gahunda zitandukanye z’ubuzima, gukingira abana … izi moto rero zizafasha mu gusanga aba baturage.”

Moto 12 zatanzwe zifite agaciro ka miliyoni 38 n’ibihumbi 400. Uretse Karongi Akarere ka Nyamasheke na ko kakaba kahawe moto 10, aka Rutsiro gahabwa 12, zose hamwe uko ari 34 zikaba zifite agaciro ka miliyoni 120 habariwemo n’ibyangombwa byazo.

Madamu Jeannette Kagame ubwo yagezaga ibihembo ku turere twitwaye neza mu kurwanya ubwandu bwa SIDA ku bana bavuka ku babyeyi banduye, tariki 7 Nyakanga 2016.

Ni igihembo Umuyobozi w’Akarere yashyikirijwe na Madamu Jeannette Kagame mu gutangiza ubukangurambaga bugamije gusaba buri wese kugira uruhare mu kurwanya ubwandu bwa SIDA mu bangavu n’ingimbi. Hari kuri Stade Amahoro tariki 7 Nyakanga 2016.

Umuyobozi w’Akarere ka Karongi, Ndayisaba Francois, avuga ko bamaze guhembwa byabashimishije kandi ngo icyo gihembo kizabatera ishyaka ryo gukomeza ubukangurambaga.

Ndayisaba avuga ko kugera kuri iyo ntambwe, babikesha ubufatanye hagati y’inzego z’ubuyobozi, iz’ubuzima ndetse n’abaturage bose muri rusange.

Icyemezo cy’ishimwe cyahawe Akarere ka Karongi.

Agira ati “Byose ni ingufu, ni ubufatanye guhera ku mujyanama w’ubuzima kugera ku muyobozi w’ibitaro, umuyobozi w’umudugudu kugera ku w’akarere n’abaturage bacu bose, aho buri wese watwitaga yajyaga kwipimisha, uwanduye bakamubwira uko yitwara atanduje umwana.”

Ku ruhande rw’ababyeyi, ngo ni inkuru ishimishije kumva ko akarere kabo kahembwe kubera uruhare rukomeye mu kubungabunga ubuzima bw’abana babyara ndetse n’ubw’Abanyarwanda bose muri rusange.

Nyirakanyana Solange utuye mu Murenge wa Rubengera ati “Iyo iba ari inkuru nziza twumvise, kumva ko akarere kacu kaciye agahigo mu kurengera ubuzima bw’abana bacu. Biradushimisha cyane ahubwo abayobozi bacu bakomereze aho.”

Undi witwa Mukeshimana Alphonsine agira ati “Kumva ko iwacu ari ho haza imbere mu bikorwa nk’ibyo, ni byiza cyane, turabishima.”

Uretse Akarere ka Karongi, utundi twahawe iki gihembo ni utwa Nyanza, Kirehe na Gakenke.

Umuyobozi w’aka Karere Ndayisaba Francois ati “Iyo tubatumije hano bose na ba Gitifu b’Imirenge yabo bose bahari , umuturage agahaguruka akavuga ikibazo cye n’icyo Umurenge wagikozeho bituma ntawe ujya kwihererana ubuyobozi abeshya ku miterere yacyo, kuko iyo abeshye aho, abamuzi baramubeshyuza.”

Abaturage barimo kugeza ibibazo byabo ku muyobozi w’Akarere

Ibi yavuze kuri uyu wa Kabiri tariki ya 12 Nyakanga 2016 nyuma y’uko hari harangiye igikorwa cyo gukemura ibibazo byagiye bigezwa ku Karere biturutse mu Mirenge ikagize, bigakorwa abaturage n’Abanyamabanga Nshingwabikorwa b’iyi Mirenge byavuyemo bahari.

Ku ruhande rwabo, abaturage nabo bavuga ko ubu buryo ari bwiza kuko ngo n’ubwo abayobozi bo hasi ari bo baba bazi imiterere y’ibibazo, basanga bamwe muri bo babogama mu kubikemura.

Mukakarangwa Pelagie umwe bakemuriwe ibibazo ati “Ni uburyo bwiza kandi buzahoreho, wagize ngo tuza hano se, hasi atari bo batuzi neza ? Bakagushyira mu cyiciro cy’ubudehe kitagukwiye bakuzi ! Hari gihe hasi batutrenganya babizi neza.”

Mugenzi we Munyampundu Venant ati “Nabonye ari ibintu bizima, tuzira bariya bayobozi ba hasi, badakoresha ukuri ahubwo bakakwicira urubanza.”

Uburiganya mu kugaragaza imiterere y’ikibazo mu gihe umuturage ageze ku rwego ruri hejuru y’urwo yakigejejeho ni imwe mu ngeso Perezida wa Repubulika akunze kunenga, aho iyo yasuye ahantu runaka hari abashaka kumugaragariza ko barenganyijwe n’inzego baciyemo, nyamara atari ko bimeze.

Ibi ariko akabihuza n’abayobozi badakemura ibibazo bafite mu nshingano, bakabirindiriza izindi nzego zisumbuyeho.

Abakirisito bo muri KICC barashinja pasiteri kubatekera umutwe.

Abakirisito basengera muri iryo torero bavuga ko amakosa yabakoreye yatumye bamwandikira bamuhagarika ku murimo bita uw’Imana nyuma ngo yo kumenyesha umuyobozi w’iryo torero utari mu gihugu agatinda gufata umwanzuro.

Umwe mu bayoboke be baryo yagize ati “Nk’abakirisito twahisemo kumuhagarika kuko yagiye akora amakosa menshi, twamubuza akavuga ko yashyizweho n’umushumba mukuru uri mu butumwa mu gihugu cya Canada. »

Mu makosa bamushinja harimo gukoresha umutungo w’itorero nabi, abagore n’ibindi bavuga ko batishimye mu myitwarire ye.

Yagize ati « Hari amakuru avuga ko abagore batabyara baza baturutse za Gisenyi n’ahandi akabaka amafaranga ngo azabaterakamo abana! Twahawe bibiliya z’impano arazigurisha avuga ko yari afite akabazo gakomeye.”

Bamwe muri abo bakirisitu bavuga kandi ko uwo mupasiteri yagiraga umuco wo gusaba abantu gutura ibyo bafite bumva bakunze cyane, kwitwarira ibya cumi biturwa, ngo no kuba atajya aba hafi y’aho akorera umurimo w’Imana, ahubwo agahora mu ngendo zidafitanye isano n’akazi.

Pasiteri Hitimana Pascal ushinjwa aya makosa, avuga ko adashobora gukoresha nabi umutungo w’Itorero kandi ko ntaho ahurira na wo, ndetse akavuga ko ibaruwa imweguza nta gaciro ifite kuko itanditswe n’umuyobozi we mukuru.

Ati “Umutungo w’itorero ntaho mpurira na wo kuko simba kuri konti yaryo kimwe n’ibyo byose ni ibinyoma, naho rero iriya baruwa nyifata nk’impimbano kuko ntiyanditswe na Représentant wanshyizeho. ”

Mutuyimana Emmanuel, Umunyamabanga Nshingwabikorwa w’Umurenge wa Bwishyura ubarizwamo urusengero rw’iri torero, avuga ko ikibazo yakimenye akigejejweho n’uyu mupasiteri, akurikiranye asanga iyo nyandiko nta gaciro ifite, asaba ko yongera agakingurirwa ibiro agakomeza imirimo ye uko bisanzwe.

Mutuyimana yakomeje avuga ko yasabye abayoboke b’iryo torero ko niba babona imikorere y’umushumba wabo idahwitse babimenyesha ubuyobozi bw’itorero babicishije mu nzira zikwiye.

Kuva tariki ya 01 Werurwe kugeza tariki ya 30 Kamena 2016 nicyo gihe cyari cyatanzwe n’inama y’umutekano y’Intara y’Iburengerazuba kugira ngo abanyereje amafaranga muri gahunda ya VUP biganjemo abayobozi babe bayagaruye, bitaba ibyo bagakurikiranwa.

Umunyamabanga Nshingwabikorwa w’Intara y’Iburengerazuba Jabo Paul avuga ko igihe cy’amezi atatu ngo abacumuye bave mu cyaha gihagije

Ni kuri iyo mpamvu mu nama njyanama y’aka Karere yateranye kuri uyu wa Kane tariki ya 30 Kamena, hemejwe ko abaturabahirije iyi gahunda batangira gushyikirizwa inzego zibishinzwe bakabiryozwa.

Umunyamabanga Nshingwabikorwa w’Intara y’Iburengerazuba, Jabo Paul na we wari witabiriye iyi nama yagaragaje ko igihe cyatanzwe cyari gihagije kandi ari amahirwe adasanzwe yari yatanzwe akemeza ko hagaragaramo cyane abayobozi.

Ati “Twarebye urutonde dusangamo abakozi b’imirenge, abakozi mu nzego zitandukanye turavuga tuti reka dutange igihe abantu babanze bave mu cyaha, ubu igihe cyatanzwe cyarangiye, uwayatanze tugiye kumwigisha ntazongere, utarayatanze tumushyikirize inzego zibishinzwe.”

Umuyobozi w’Akarere ka Karongi wungirije ushinzwe ubukungu, Bagwire Esperance, avuga ko ubu amakuru yose ku banyereje aya mafaranga, kimwe n’ibindi byose bisabwa ngo aba bantu batangire gutabwa muri yombi ubu byamaze gutegurwa.

Ku ruhande rw’Abaturage, ngo hagakoreshejwe ibishoboka byose ibyari bigenewe abatishoboye byatwawe abayobozi bikagarurwa kandi bagahanwa.

Ndahayo Benjamin umuturage mu Murenge wa Rubengera ati “Nta bundi buryo, babibazwe, niba koko barahawe n’amezi yo kwishyura, ni gisebo kumva ko amafaranga yari agenewe umuturage nka njye yitwariwe n’umuyobozi wanjye utanashaka kuyishyura.”

Amafaranga yari yanyerejwe muri gahunda ya VUP muri aka Karere angana na 670.268.039Frw, amaze kugaruzwa akaba ari 465.702.087Frw, amenshi muri yo akaba ari ayagiye atwarwa n’abayobozi bihimbiye amatsinda ya baringa.

Umunyamabanga Nshingwabikorwa wa Komisiyo ishinzwe Abakozi ba Leta, Angelina Muganza.

Mu Ntara y’Iburengerazuba, ibyo bigo ngo byiganjemo iby’abihayimana, bikagaragaramo cyane ibitaro, aho ba nyirabyo birukana abakozi kandi amasezerano baba barayasinyanye n’uturere.

Umunyamabanga Nshingwabikorwa wa Komisiyo y’Abakozi ba Leta, Angelina Muganza, avuga ko hagomba gushyirwa imbaraga mu guhugura abayobozi b’ibi bigo mu bijyanye n’amategeko agenga abakozi ndetse no kuganira hagati y’izi nzego zombi ku micungire y’abakozi kugira ngo hirindwe igihombo.

Agira ati «Uriya mukozi iyo areze atsinda Leta, mu kubahiriza amategeko umuyobozi uhana umukozi ni uwamushyize mu mwanya, basinyanye amasezerano.»

Ku ruhande rw’abihayimana, na bo ngo koko hari abakora aya makosa nubwo atari bose, bigatuma Leta ari yo ibazwa ibyo itakoze.

Umwe mu bayobozi b’ibigo nderabuzima bicungwa n’amadini, yagize ati “Si ukubeshya kuko hari aho byabaye, gusa nta gikuba cyacitse kuko si hose, mbona byaterwaga n’uburangare cyangwa kutamenya amategeko, ariko ntibikwiye ku muyobozi wagiriwe icyizere.”

Mu gihe cy’imyaka itatu ishize (2013 - 2015), uturere tugize Intara y’Iburengerazuba tumaze kwishyura amafaranga agera kuri miliyoni 12 mu manza twagiye dutsindwamo n’abakozi birukanywe mu buryo bunyuranyije n’amategeko.

Abaturage barashinja inzego z’ibanze uburangare mu gucunga inga za "Gira inka".

Umuyobozi w’Akarere Wungirije w’Akarere ka Karongi ushinzwe Imibereho Myiza y’Abaturage, Mukashema Drocelle, avuga ko inyinshi muri izo nka ari izagurshijwe rwihishwa n’abari barazihawe.

Ati “Muri rusange mu Karere ka Karongi hamaze gutangwa inka ibihumbi 5 na 589, ariko muri zo 190 zaragurishijwe rwihishwa ziburirwa irengero, naho inka 24 ziribwa na zo zirabura burundu.”

Abaturage batandukanye muri ako karere bavuga ko bitumvikana uburyo igihugu nk’u Rwanda gifite umutekano usesuye, inka zingana gutyo zibura burundu, cyane ko n’ababa bazihawe baba bazwi.

Kayiranga Aloys, utuye mu Murenge wa Rubengera, ati “Twagaya intege nke z’ubuyobozi bw’ibanze! None se inka zingana gutyo zagiye zica he muri iki gihugu cyacu ku buryo wumva ngo zarabuze burundu ! umutekano ni wose, amakuru aratangwa,….ntibyumvikana !”

Mujawamariya Gaudence wo mu Murenge wa Bwishyura we ati “Birababaje kumva ko inka zatanzwe ku bakene zigenda zigahera zikaba imwe zikagera kuri 200, ariko rero biranagoye kubyumva, zibura zite se kandi ba yirazo bazwi, hakorwa amarondo!”

Inama Njyanama y’Akarere ka Karongi, na yo ivuga ko bidasobanutse, ndetse igasaba Ubuyobozi bw’Akarere gukora raporo irambuye igaragaza buri mwirondoro w’umuturage wabuze inka burundu n’uburyo yayibuzemo kugira ngo yigweho.

Mukankaka Bernadette, umukobwa w’impfubyi ufite abandi bana b’impfubyi arera, yishimiye ko babonye inzu nziza yo kubamo.

Mukankaka Bernedette, umukobwa w’impfubyi ufite abandi arera akaba umwe mu bashyikirijwe inzu, avuga ko akurikije ubuzima yabagamo, atiyumvishaga ko ashobora kuba mu nzu nk’iyo yahawe dore ku buri nzu ifite agaciro ka miliyoni 6 n’ibihumbi 600FRW.

Ati “Sinashoboraga gutekereza ko nshobora kuva mu nzu yendaga kungwaho nkajya mu nzu nk’iyi mpawe, mfite abana mpagarariye bari ku ishuri nibaza bazajya babona aho barara kandi bazatungurwa, n’abandi bana b’impfubyi benshi ni njye baza basanga, bazajya babona aho barara. ”

Uwitwa Nzabitega Emmanuel, we ati “Ndishimye birenze kwishima, nijoro icyakomaga navugaga nti inzu igiye kungwaho, umuyaga wahuha nti karabaye, ariko Imana ishimwe ngiye kujya ndyama nsinzire.”

Bahawe inzu zikomeye kandi nziza.

Benjamin Kayumba, Umuyobozi w’umuryango ufasha abana, abapfakazi n’abatishoboye (Good News international) mu Rwanda, avuga ko batekereje gufasha abanya-Bisesero nyuma yo kumenya akaga bahuye na ko.

Ati “Twumvise amateka y’abarokotse mu Bisesero n’uburyo amazu babayemo yagiye asenyuka kuko ngo yagiye yubakwa ari ubutabazi bwihuse, dusanga hari mu hantu tugomba kugeza ubufasha bwacu kuko bababaye.”

Byari ibyishimo bikomeye.

Umuyobozi w’Akarere ka Karongi Wungirije ushinzwe Imibereho Myiza, Mukashema Drocelle, yashimye ubu bufasha, yizeza n’abandi batarubakirwa ko akarere kagiye gutangira igikorwa cyo kubasanira ndetse no kubakira abafite inzu bigaragara ko zidashobora gusanwa.

Good News International irateganya no ku bakira abandi bacitse ko icumu rya Jenoside batishoboye bafite amazu yangiritse.

Uyu muryango, na wo ufite gahunda yo gukomeza kubakira abandi mu byiciro bitandukanye, bityo hakaba hanakozwe umuganda wo gusiza no gutunda bimwe mu bikoresho by’ibanze bizifashishwa.

Abanyura mu Ishuri Ryisumbuye rya Nyange barasabwa kurangwa n’umuco w’ubutwari nk’uwaranze bakuru babo.

Bamwe mu banyeshuri bigaga i Nyange bishwe ku wa 18 Werurwe 1997, nyuma yo kubasaba kwivangura bakurikije ubwoko, ariko bakabyanga bagaragaza ko bose ari Abanyarawanda.

Umuyobozi wa ES Nyange, Gapasi Uwamungu Leonard, avuga ko bazakomeza guharanira ko umunyeshuri unyuze muri iryo shuri azajya agira umwihariko ahavana, agasaba abana bahiga kubiharanira birinda gusiba umusingi waciwe na bakuru babo.

Ati “Duhora duharanira ko abanyeshuri bacu bumva ko hari umusanzu basabwa mu gukomeza umuco w’ubutwari bwaranze bakuru babo. Si ukugeza aho gupfa gusa, ahubwo mu bikorwa byabo bya buri munsi turabasaba kugaragaza ubutwari.”

Mu rwego rwo kuzirikana ubutwari bw’aba bana, abahize mu bihe bitandukanye bagira igihe cyo gusubira ku kigo cyabareze bakaganira kuri bimwe mu byarangaga izi ntwari kugira ngo bisuzume ko bakigendera muri uwo murongo.

Abize i Nyange basura ikigo cyabo ngo bashishikarize barumuna babo guhora baharanira ubutwari.

Niyonzima Ramesh, umwe barangije muri ES Nyange, agira ati “Kugaruka hano bidufasha kwisuzuma ko tukigendera mu murongo intwari zacu zarimo, kandi bikanadufasha gukomeza gushishikaza abakiri muri iki kigo kudatezuka ku muco w’ubutwari.”

Mugenzi we Mpagazahimana Louis, we agira ati “N’aho ndi ibyo nakuye i Nyange nemera ko bimfasha kuko n’iyo nsitaye ku muntu numva bimbabaje kuko twese turi bamwe.”

Aba banyeshuri bibukwa buri tariki ya 01 Gashyantare, aho u Rwanda ruba rwibuka muri rusange intwari zaharaniye inyungu z’u Rwanda n’Ubunyarwanda kurusha inyungu zabo bwite, ari zo : Imanzi, Imena n’Ingenzi.

Abadepite bahagarariye u Rwanda muri EALA bifatanyije na CNF mu gukangurira abahagarariye abandi kumvikanisha ihame ry’uburinganire.

Ibi babisabwe mu nama yahuje abagore bahagarariye abandi bo mu Ntara y’Iburengerazuba, yabereye mu Karere ka Karongi tariki 22 Kamena 2016. Iyi nama yari igamije gusobanurira komite nshya ziherutse gutorwa imikorere y’Inama y’Igihugu y’Abagore (CNF).

Nyiranzeyimana Esperance wari ukuriye CNF muri iyi Ntara muri manda icyuye igihe, yagaragaje ko kimwe mu bibazo basize kigomba kwibandwaho na komite nshya ari icy’ihame ry’uburinganire ritarumvikana neza kuri bose.

Ati “Hari aho uburinganire bwumvikanye nabi. Abantu bakitwaza uburinganire, cyane cyane abagore, bakica inshingano zabo mu ngo, bigatuma havuka amakimbirane. Icyo rero ni ikintu mugomba gukoraho, ihame ry’uburinganire rikumvikana neza.”

Guverineri w’Intara y’Iburengerazuba, Mukandasira Caritas, avuga ko uretse kwigiza nkana kwa bamwe, ihame ry’uburinganire ryoroshye kumvikana, akagaragaza ko ntawe riha uburenganzira ngo ribwime undi, nk’uko abashaka kurirengaho babivuga.

Abagore bahagarariye abandi biyemeje gushyira ingufu mu kumvikanisha ihame ry’uburinganire.

Nyirinkwaya Faustin ushinzwe iterambere ry’umugore muri CNF ku rwego rw’igihugu, yibukije ko imwe mu nzira yo kugera ku iterambere rirambye ari ukubanza gusobanukirwa no kubahiriza ihame ry’uburinganire.

Ati “Ingero dufite z’abagore bamaze kuba indashyikirwa ni ababanje gukurikiza aihame ry’uburinganire mu miryango yabo, bagashyira hamwe bagafashanya, bakarebera hamwe icyabazamura, nta watera imbere mu muryango we bahozanya ku nkeke.”

Kamagaju Domithile uhagarariye abagore mu Murenge wa Kabaya, Akarere ka Ngororero avuga ko kuba bagaragarijwe iki kibazo, ari cyo bagiye guheraho nyuma yo gusubira aho batuye, bakagishakira igisubizo bashyira imbaraga mu gusobanura icyo uburinganire buvuze mu muryango nyarwanda.

Ibindi komite nshya zasabwe kwitaho birimo guhangana n’ikibazo cy’abangavu batwara inda zitateguwe, isuku nke mu miryango, imibanire mibi mu ngo, imirire mibi n’imirimo ivunanye ikoreshwa abana, bikanabaviramo guta ishuri.

Harimo kandi gukangurira abagore gukoresha ikoranabuhanga mu mirimo ibateza imbere no kwitabira umugoroba w’ababyeyi.

Abanyamuryang ba FPR - Inkotanyi bo mu Ntara y’Iburengerazuba basabwe guharanira igiteza imbere umuturage.

Komiseri muri FPR, Sindikubwabo Jean Nepomuscene akaba n’Umusenateri mu Nteko ishinga Amategeko y’u Rwanda, yabasabye ibi ku wa 18 Kamena 2016, ubwo bari mu nteko rusange y’uyu muryango ku rwego rw’Intara y’Iburengerazuba.

Senateri Sindikubwabo yanenze uburyo abatuye mu Ntara y’Iburengerazuba ari bo bagifite imibereho mibi ugereranyije n’izindi ntara kandi ngo hari amahirwe bakwifashisha biteza imbere.

Ati “Ntibyumbikana ukuntu iyi ntara (Iburengerazuba) hakiri abakene, abafite imirire mibi n’abantu bagwingiye kandi mufite imirima year, mufite ikigega cy’ibiribwa. Harabura iki mwa banyamuryango mwe ngo ibi byose bicike kandi ko mubishoboye? Murasabwa kubigira ibyanyu kandi byashoboka.”

Komiseri muri FPR - Inkotanyi, Sindikubwabo Jean Nepomuscene.

Umukuru wa FPR Inkotanyi mu Ntara y’Iburengerazuba, Nkurikiyinka Jean Nepomuscene, yavuze ko abanyamuryango b’iri shyaka biyemeje guhaguruka bagakora cyane, begera abaturage kugira ngo babashe kwigobotora ubukene bucyugarije bamwe muri bo.

Yagize ati “Ikintu cya mbere tugiye gukora ni ukwegera abaturage kuko ari bo bagenerwabikorwa, bityo ndumva nk’uko twabyiyemeje aha muri iyi nama, tuzabishobora kuko icyaburaga ni ukumanuka hasi tukabegera.”

Bamwe mu banyamuryango ba FPR Inkotanyi batanze ubuhamya ko gutera imbere bishoboka bagendeye ku mahirwe aboneka mu Ntara y’Iburengerazuba.

Mukasine Florence, umwarimu mu mashuri abanza waturutse mu Karere ka Rubavu, yavuze ko yiteje imbere akaba afite ubwato butwara abagenzi 150 mu Kiyaga cya Kivu bufite agaciro ka miliyoni 100Frw kandi ngo abikesha imiyoborere myiza irangajwe imbere n’umuryango FPR Inkotanyi.

Umukuru wa FPR - Inkotanyi mu Ntara y’Iburengerazuba, Nkurikiyinka Jean Nepomuscene.

Uretse kuba abanyamuryango b’iri shyaka biyemeje kurwanya ubukene bukigaragara mu Ntara y’Iburengerazuba, baniyemeje kongera umubare w’abanyamuryango bakava kuri 83% bakazamuka, ndetse no kongera imisanzu y’umunyamuryango.

Minisitiri Mukantabana avuga ko bidakwiye ko ababyeyi batura agahinda k’imirimo bakoze mu gihe cyabo abana babo.

Nyagahene Silas, umwe mu baturage, avuga ko imirimo ikoreshwa abana atari mu rwego rwo kubanga ahubwo aba ari mu nyungu za bose, gusa ngo rimwe na rimwe hakabaho gucikwa.

Agira ati “Nta mubyeyi wanga umwana we, hari igihe umusaba kugufasha akarimo kubera amaboko make ari mu rugo ukaba waza kurengera atari ukumwanga, ahubwo kuko wacitswe gato, naho ubundi turabizi ko afite uburenganzira tugomba kubahiriza.”

Nyiransabimana Dancille w’imyaka 80, we ngo asanga kuba abana b’iki gihe barindwa gukora imirimo y’ingufu ari intandaro y’ubunebwe.

Ati “Kera twarakoraga guhera mu gitondo kugeza nijoro, kandi ntawabarushaga kuramba, umwana uramurinda gukora ube umuhaye uwuhe murage? Ni ko uzasanga dufite abanebwe.”

Umuyobozi w’Akarere ka Karongi, Ndayisaba Francois, avuga ko abakoresha abana imirimo ivunanye akenshi usanga ari na bo babavutsa amahirwe yo kujya mu ishuri.

Ati “Umwana akora imirimo igenewe abana ariko ntakora igenewe abakuru kuko batanganya ingufu. Kandi ikibazo ni uko usanga bene abo bakoresha abana imirimo ivunanye, akenshi ari na bo bagira uruhare mu kubavutsa amahirwe yo kwiga.”

Minisitiri ushinzwe gucyura impunzi no gukumira ibiza, Mukantabana Seraphine, akaba n’imboni y’Akarere ka Karongi, avuga ko bidakwiye ko ababyeyi bakoresha abana babo imirimo nk’iyo bakoraga mu gihe cyabo.

Ati “Umwana ye gukoreshwa imirimo imurenze, aba kera bazi ukuntu umuntu yicwaga n’ikibindi, ukajya kuvomesha ikibindi kikurusha ingufu. Ababyeyi rero bitura abana babo agahinda k’imirimo bagize kera.”

Minisitiri Mukantabana ariko yakomeje asaba abana na bo kwirinda kwigira ba bajeyi ngo bumve ko nta murimo n’umwe ubareba.

Ubuyobozi buvuga ko imirimo mibi ikoreshwa abana ibangamira imikurire yabo, ikabatesha agaciro, ikabangiza ku mubiri wabo no mu mitekerereze. Byose bigira ingaruka ku mikurire n’imyigire y’abana, abandi bikabaviramo kurikurwamo igihe kitageze cyangwa akiga nabi.

Aba banyeshuri biga guteka muri VTC Rubengera bavuga ko hari byinshi bamaze kumenya byakorwaga n’abanyamahanga.

Ni mu gihe Leta y’u Rwanda ikomeje gushishikariza abanyagihugu gukunda ibikorerwa mu gihugu no kugira ubushake bwo kubyongera aho kwibanda mu gukoresha ibitumizwa mu mahanga kugira ngo ubukungu bw’igihugu bubungabungwe.

Minisitiri w’Uburezi, Dr Musafiri Papias, ubwo yafunguraga ibigo 5 by’imyuga n’ubumenyingiro mu Ntara y’Iburengerazuba, kuri uyu wa 15 Kamena 2016, yagize ati “ Amashuri nk’aya y’imyuga azadufasha mu gushyira mu bikorwa gahunda ya ‘Made in Rwanda’ kuko usanga ibiyakorerwamo byasimbura bya bindi twagatumije hanze.”

Abiga imyuga n’ubumenyingiro, na bo bemeza ko uko porogaramu bigiraho zizagenda zinozwa, Abanyarwanda bazisanga nta bindi bagikenera hanze.

Uwamaliya Alphonsine, wiga muri IPRC WEST, ati ”Nk’ubu naje nzi guteka ibiryo bisanzwe, ariko maze kumenya guteka bimwe tuzi ko ari ibya kizungu, nko gukora Pizza, Boulette n’ibindi byinshi nta kigoye ahubwo muri gahunda y’ibyigwa bashyiremo byinshi.”

Minisitiri Dr Musafili Papias malimba asura bimwe mu bikorerwa muri VTC Rubengera.

Karangwa Egide, na we wiga ubukanishi muri IPRC WEST, ati “Ibitumizwa hanze mfite icyizere ko bizagabanuka byagera aho tukanabireka, urebye imashini hano tumaze gukora nta cyo umuzungu aturusha!

Twakoze izisya, izitanga umuriro, ibyuma bikontorora umutekano wo mu rugo cyangwa uw’imodoka kandi hano hari n’uwagerageje gukora indege irahaguruka.”

Matabaro Francois, umuturage mu Murenge wa Rubengera, we avuga ko nta n’akarusho azi ku bikomoka hanze, agasaba Abanyarwanda gutsimbarara ku bikorerwa iwabo.

Ati “Iby’abazungu ni iby’abazungu, ubundi se birusha iki ibyo mu Rwanda! Buriya ikintu cyose bise ikinyarwanda kiba ari kizima, uzarebe ugiye kugura igi abaza irinyarwanda, ushaka ubuki akabaza ubunyarwanda,…dutsindagire uwo muco.”

Nubwo iyi gahunda ya ‘Made in Rwanda’ ikomeje gushyirwamo ingufu, imyumvire, ni kimwe mu bikomeje kuyibera imbogamizi, kandi akenshi bikagaragara ku bazwi nk’abifite.

Uyu mugezi ugenda utwara igice cy’umuhanda ku buryo niba nta gikozwe, mu minsi mike iri mbere nta kinyabiziga kizaba kigishobora kuwucamo.

Umugezi wa Makamabazi ugenda usatira umuhanda ku buryo utabungabunzwe vuba umuhanda uhuza Uumurenge wa Gashari n’uwa Rugabano uzaba amateka.

Amazu awegerewe na yo agenda asatirwa ku buryo bamwe bamaze kuyimukamo batinya ko wabatwara dore ko kugeza ubu umaze gutwara amazu abiri.

Ngayabateranyi Emmanuel, umuturage wo mu Murenge wa Gashari, adutungira agatoki, ati “Aha mureba hahoze amazu abiri uyu mugezi urayatwara, none dore aho ugeze ukukumura umuhanda. Dufite impungenge ko uyu muhanda ushobora kugenda burundu.„

Uwitwa Habimna Jean Marie we agira ati “Ikibazo twakivuze kuva kera, kandi turabona nta kintu na n’ubu gikorwaho, ubuyobozi turabusaba kudufasha uyu muhanda ukubakirwa igikuta. Ubu se mwe murabona mu minsi iri imbere hari uzabasha kuva mu murenge umwe ajya mu wundi!„

Bagwire Esperance, Umuyobozi w’Akarere ka Karongi Wungirije ushinzwe Ubukungu, nyuma yo kwigerera ahari iki kibazo, avuga ko haburaga ukwezi ngo Ikigo cy’Igihugu gishinzwe Ubwikorezi, RTDA, gitangire kugira icyo ikora, ariko kuko ikibazo gikomeye cyane nk’akarere ngo bakaba bagiye kureba ubufasha bwihuse batanga.

Yagize ati “RTDA yatwijeje ko mu mezi abiri izatangira kuwukora, ubu hashize ukwezi, ariko kuko mbonye ikibazo gikomeye amazu yandi agiye kugenda, ndakora ubuvugizi ku Karere ko twaba dukoze urukuta, ubutaka budakomeza kugenda kandi turinde n’umutekano w’aba baturage.„

Ikibazo cy’uyu mugezi kimaze igihe kigera ku mwaka kizwi, ubuyobozi bw’akarere bukemeza ko cyagejejwe mu nzego zitandukanye zirimo MIDMAR na REMA.

Abenshi mu bahanyura ariko batunga agatoki ubucukuzi bw’amabuye y‘agaciro buhakorerwa kuba inyuma y’iyangirika ry’uwo mugezi n’umuhanda.

Abanyamuryango bashya 28 nabo biyemeje gufatanya n’abandi mu guhangana n’ikibazo cy’abana bata amashuri.

Mu nteko rusange yabahuje kuri iki cyumweru tariki 5 Kamena 2016, hagaragajwe ko muri uyu Murenge 80% by’abana bari barataye ishuri ari bo bamaze kugarurwa buri wese yiyemeza uruhare rwe kugira ngo 20% basigaye bakagarurwa.

Mukankuzi Marie umunyamuryango ukomoka mu Kagari ka Nyarugenge ati “Tutitaye ku kuba abacu biga, twiyemeje kwegera abaturanyi tugafatanya gusubiza aba bana ku ishuri ndetse no kubashakisha aho bari hose.”

Yambabariye Theophile, umuyobozi w’umuryango FPR Inkotanyi mu Murenge wa Rubengera, avuga ko umunyamuryango wa FPR aho ari hose agomba kurangwa no kuba bandebereho, avuga ko ibyo biyemeje bizatanga umusaruro ku kibazo cyari gihangayikishije igihugu.

Hanamuritswe bimwe mu bikorwa by’indashyikirwa byagezweho n’abanyamuryango.

Bagwire Esperance, umuyobozi w’Akarere ka Karongi wungirije ushinzwe ubukungu akaba n’umunyamuryango wa FPR Inkotanyi, avuga ko buri mubyeyi yakagombye kumva ko umunani wa mbere ku mwana we ari ishuri.

Ati “Ni ugufatanya mu gukangurira ababyeyi kubahiriza inshingano zabo zo kurera, ariko kandi birakwiye ko umubyeyi yumva ko umunani wa mbere ku mwana we ari ishuri.”

Uyu muyobozi avuga ko imibare bahabwa n’ubusesenguzi igaragaza ko igikorwa cyo kugarura abana bataye ishuri muri aka Karere kiri hagati ya 60 na 70%.

Umuyobozi w’akarere wungirije ushinzwe imibereho myiza n’uhagarariye umushinga w’Abasuwisi baha umwe mu bayobozi b’ibigo nderabuzima ibikoresho.

Babitangaje kuri uyu wa gatanu tariki 3 Kamena 2016, ubwo umushinga w’Abasuwisi ushinzwe kwita ku buzima bw’umwana n’umubyeyi wabashyikirizaga ibikoresho bazifashisha mu gihe babyaza.

Bimenyimana Aphrodice, uyobora ivuriro rya Rufungo mu murenge wa Rugabano, yavuze ko babibonyemo igisubizo, kuko bizatuma birinda abana n’abagore bapfa babyara.

Yagize ati “Ibi bikoresho twahawe bizadufasha kunoza serivisi ndetse tunirinde ko twagira umugore cyangwa umwana wapfa mu gihe turi kubyaza, kuko n’icyo twishimira cyane twahawe akuma gapima uko umutima w’umwana uri munda utera iki gikoresho kikaba nta vuriro na rimwe ryari rigifite.”

Ibikoresho byatanzwe birimo ibitanda abbyeyi babyarizwa ho n’ibitanda baryaaho bamaze kubyara.

Mukashema Drocelle Umuyobozi w’akarere wungirije ushinzwe imibereho myiza, yasabye abayobozi b’amavuriro yahawe ibyo bikoresho kwita ku bikoresho bahawe, bakanarushaho kwita kubabagana.

Ati “Muhawe ibikoresho mwibuke kubifata neza birusheho kumara igihe kinini kandi ikindi mwibukeko mushobora kubona ibi bikoresho, ariko mukabura serivisi nziza ntacyo byaba bimaze ndabasabye rwose muzarusheho kwakira neza abarwayi babagana.”

Niyodushima Joseline ukuriye uyu mushinga w’Abasuwisi mu Karere ka Karongi, Rutsiro na Ngororero, yavuze ko gutanga ibi bikoresho biri mu rwego rwo gufasha amavuriro kunoza Serivisi muri aka karere.

Ibikoresho byatanzwe byahawe amavuriro umunani mu 10 akorana n’ibitaro bikuru bya Karongi. Ibikoresho bahawe birimo ibitanda ababyeyi babyariraho, ibitanda ababyeyi baryamaho bamaze kubyara n’ibipimo bipima umwana akiri mu nda ya nyina.

Bahawe n’ibipimo byerekana ingano y’amaraso y’umubeyi, byose bifite agaciro ka miliyoni 180Frw.

Aba basaza bo mu Murenge wa Rubengera, Akarere ka Karongi basanga umuco wo gushyiraho umukuru w’umuryango wararindaga amakimbirane ndetse n’ubukene buyaturukaho

Basanga kuba uyu muco ugenda ucika ari kimwe mu bituma Inkiko zihura n’imanza nyinshi, kandi bigatera ubukene mu miryango, bagasaba ko wabungabungwa aho ukiri ari hake, nk’uko bivugwa n’uwitwa Nsanzababyeyi Innocent utuye mu Murenge wa Bwishyura.

Agira ati “Uriya muco wo hambere w’abakuru b’imiryango wafashaga abantu, ubu aragira ikibazo akirukira mu nkiko, agata uwo mwanya we wo gukora ari nako ahatakariza amafaranga, uwawugarura hose byadufasha.”

Gasamunyiga André we avuga ko ingaruka z’uko imiryango myinshi idafite abayikuriye zirigaragaza kuri iki gihe.

Gasamunyiga w’imyaka 69 asanga umuco w’abakuru b’umuryango wakagombye kubungabungwa

Ati “Reba nawe amakimbirane yirirwaho, kera nta kibazo cyapfaga kunanirana mu muryango, kandi buriya mu miryango niho baba bazi ukuri kw’ibibazo biwurimo.”

Akimana Laurence, umuyobozi w‘Urwego rugira inama abaturage ku bijyanye n‘amategeko (MAJ) mu karere, yemeza uyu muco wari ufite akamaro, ariko na none hakaba aho washoboraga kugira ingaruka zitari nziza.

Ati “ Uriya muco wari mwiza kuko wakemuraga ibibazo bitagombye kugera mu nkiko, ariko na none kuba umutware w’umuryango ari we wari ufite ijambo rikuru kandi nta bundi bumenyi mu mategeko cyangwa kubera amarangamutima yashoboraga kurenganya umuntu. ”

Abavuga ibyiza by’uyu muco kandi bashingira ku kuba kugeza ubu ibibazo bigera kuri 90% by’ibigezwa mu nkiko bishingiye ku mitungo cyane cyane ubutaka, mu gihe ababa babifiteho amakuru ari abo mu muryango.

Habimana wamaze no kugirwa umufashamyumvire mu buhinzi, avuga ko uru rwego agezeho arukesha amahugurwa yahawe no gukurikiza inama agirwa n’abashinzwe ubuhinzi.

Iyo upimye imyumbati yeza ku giti kimwe, havamo nibura ibiro 60.

Agira ati Kweza ibiro 60 ku giti kimwe ntibyapfuye kwizana, nagiye mpugurwa kandi no mu gihe ndi gukora ubuhinzi bwanjye nkegera abashinzwe ubuhinzi nkabasobanuza icyo mfiteho ikibazo.

Avuga ko bimwe mu by’ingenzi mu kubasha kubona umusaruro ari ugutegura ubutaka neza, gukoresha imbuto nziza no gukoresha ifumbire uko byagenwe. Avuga kandi ko bitamugora kugurisha ibyo yejeje, kuko isoko rigizwe n’abaturanyi be.

Avuga ko ubu buhinzi bwamufashije mu kwikura mu bibazo by’ubukene yarimo, kuko no kwiyishyurira ubwisungane mu kwivuza bitamworoheraga ariko ubu akaba yarabikemuye kimwe n’amafaranga y’ishuri y’abana.

Habimana Felix, umuhinzi weza ibiro 60 ku giti kimwe cy’umwumbati.

Kuzabaganwa Vedaste, umunyamabanga Nshingwabikorwa w’umurenge wa Murundi, avuga ko uretse kuba bifasha mu kuzamura umurenge muri rusange, ibikorwa nk’ibi bifasha no mu kwigisha abandi baturage bagihinga ku buryo bwa gakondo.

Ati Abaturage bageze ku bikorwa nk’ibi baradufasha cyane mu kwigisha bagenzi babo bagikora ubuhinzi bwa gakondo, turabifashisha mu mamurikabikorwa.

Icyo dukora ni ugukomeza kubashakira amahugurwa kugira ngo ibikorwa nk’ibi bidasubira inyuma ariko tukanabafasha kubona isoko.

Habimana abasha kubona amafaranga agera ku bihumbi 8Frw ku myumbati yeze ku giti kimwe ahinga ku buso bugera kuri ari eshanu. Iyi myumbati ishobora gutonorwa igahita iribwa, cyangwa ikabanza kwinikwa ikazakorwamo ifu yu’ubugari.

Perezida Kagame ariko avuga ko umuriro w‘amashanyarazi utabikwa, ahubwo agasaba abaturage kuwubyaza umusaruro.

Igice cya mbere cy’uyu mushinga cyatanze megawati 26, biteganyijwe ko nyuma y’amezi 10 haziyongeraho zindi 10.

Yagize ati "Amashanyarazi ntuyabika, amazi ashobora kureka ukayabika ukajya uyakoresha uko ushatse. Tugomba kugira aho tuyashyira rero, ni ibikorwa, izo nganda, tugatera imbere.

Abanyarwanda ndetse n’abanyafurika muri rusange, ntago tugomba kumva ko tugomba kubana n’ubukene akaramata."

Yabitangaje ku mugoroba wo kuri uyu wa mbere tariki 16 Gicurasi 2016, mu biganiro yagiranye n’abavuga rikijyana bo mu Ntara y’Iburengerazuba. Ababwira ko yaganiriye na Conour Global ishyira mu bikorwa uyu mushinga ko bagiye gufatanya izi megawati zikaboneka.

Perezida Kagame yumvikanye na Contour Global ko mu mezi 10 Kivu Watt izongeraho Megawati 10.

Ubwo yafunguraga ku mugaragaro uru ruganda rutanga amashanyarazi rwa Kivu Watt, Perezida Kagame yibukije Abanyarwanda muri rusange ko ibikorwa biri gutahwa byaturutse mu muco mwiza wo kwihangana.

Yagaragaje ko imirimo yo gutangiza uru ruganda yagiye igira imbogamizi mu myaka 7 imaze ikorwa, ariko ku bw’uyu muco wo kwihangana, ubu hakaba hari kwishimirwa ko waje kugera ku ntego yawo.

Asaba ko kwihangana byaba imwe mu ngamba Abanyarwanda bagenderaho ngo babashe gutera imbere.

Kivu Watt yitezweho kuzarangira itanga umuriro w’amashanyarazi wa Megawati zigera ku 100, igomba gukemura bimwe mu bibazo birimo ibura ry’umuriro w’amashanyarazi rya hato na hato, gufasha mu kubungabunga ibidukikije hagabanywa ibicanwa no gufasha mu iterambere.

Abaturage b’Umudugudu wa Rurembo i Rwamagana basobanuriwe uburyo Abasesero babanje kwirwanaho.

Itsinda ry’abaturage 22 b’Umudugudu wa Rurembo, Akagari ka Cyanya mu Murenge wa Kigabiro, basuye urwibutso rwa Bisesero kuri iki Cyumweru, tariki 15 Gicurasi 2016, bakaba bazasangiza amasomo bahakuye abandi baturage bo mu mudugudu wabo.

Ni nyuma y’umwanzuro bafashe mu biganiro byo kwibuka ku nshuro ya 22 Jenoside yakorewe Abatutsi mu 1994, aho biyemeje gusura inzibutso za Jenoside zitandukanye kugira ngo bamenye birushijeho amateka yaranze u Rwanda.

Ku rwibutso rwa Bisesero, abaturage b’Umudugudu wa Rurembo basobanuriwe amateka yaranze Abasesero ndetse n’ubutwari bagize bwo kwirwanaho mu gihe cya Jenoside yakorewe Abatutsi.

Bashyize indabo ku mva banunamira imibiri y’Abatutsi barenga ibihumbi 50 bahashyinguye, bishwe muri Jenoside yakorewe Abatutsi.

Gakoko Aroni, umwe mu barokokeye mu Bisesero, yasobanuye uburyo Abatutsi bari batuye Bisesero babanje kwirwanaho bakoresheje amabuye n’amacumu, ariko bakaza kuneshwa ubwo abasirikare b’Abafaransa na bo babigiragamo uruhare.

Uyu musaza avuga ko we ubwe akoresheje inkoni n’amabuye, yabashije kwambura imbunda eshatu interahamwe zabarwanyaga, gusa akagira ikibazo cy’uko atari azi kurasa kimwe n’abo bari kumwe.

Umukuru w’Umudugudu wa Rurembo, Nzisabira Richard, avuga ko basanze kumenya amateka yiganjemo amabi yaranze igihugu kugeza kuri Jenoside yakorewe Abatutsi, ari kimwe mu byafasha abaturage kuyikumira.

Gakoko Aroni wabashije kwambura imbunda eshatu Interahamwe n’abo bari bafatanyije mu bitero bagabaga ku Basesero.

Ati «Twafashe umwanzuro wo gusobanukirwa birushijeho amateka y’Abanyarwanda, dusura inzibutso ariko by’umwihariko urwa Bisesero kuko twagiye twumva ubutwari budasanzwe bwaranze Abasesero.»

Nyiramatama Immaculée, umwe mu batuye Rurembo basuye Bisesero ati «N’abandi baragerageje, ariko icyo tubonye ni uko Abasesero bagize ubutwari budasanzwe nubwo bageze aho bananirwa kubera kurwana n’ingufu ziturutse impande zose.»

Mu buhamya bw’abatandukanye barokokeye mu Bisesero, hagarukamo ubutwari bw’umugabo Birara Aminadab wafashe iya mbere agashishikariza Abasesero kwirwanaho, gusa bikaza kurangira yishwe.

Abatuye Rurembo banashyize mu gaseke inkunga y’amafaranga ibihumbi 50 mu rwego rwo gutera inkunga urwibutso.

Ikimenyetso cy’amacumu 9 agaragaza amakomini 9 yari agize icyari Kibuye cyaturutsemo Abatutsi bahungiye mu Bisesero bakanahicirwa. Hari n’ibuye nk’ikimenyetso cy’intwaro bakoresheje birwanaho ku bitero.

Urwibutso rwa Jenoside rwa Bisesero ruri mu Murenge wa Rwankuba, Akarere ka Karongi mu Ntara y’Iburengerazuba, rukaba rushyinguwemo imibiri y’Abatutsi barenga ibihumbi 50 bahiciwe, barimo abari bahatuye ndetse n’abahahungiye baturutse mu yandi makomini y’iyari Perefegitura Kibuye.

Umuyobozi w’Akarere ka Karongi Wungirije ushinzwe Imibereho Myiza y’Abaturage, Mukashema Drocelle, yadutangarije ko izi nkangu zatewe n’imvura yaguye ari nyinshi.

Yavuze ko mu Murenge wa Twumba, Akagari ka Rutabi, umusozi wasadutse uhirika inzu y’uwitwa Ntakirutimana John, igwira umugore we Mukankundiye Marie n’abana be babiri ari bo Mushimiyimana Emmanuel w’imyaka 6 n’Uwimana Jean w’imwaka n’igice bahita bapfa.
Uretse abo bapfuye, muri urwo rugo ngo hapfuye kandi ihene 2, ingurube 1 n’inkoko 6.

Yakomeje avuga ko uwitwa Nzimurinda wari umukuru w’umudugdu mu Mureneg wa Mutuntu, ubwo yari ageze mu Kagari ka Nyakamira mu Murenge wa Rwankuba ari kumwe n’umuhungu we mu muhanda bavuye mu bukwe yagwiriwe n’igikuku agahita apfa.

Nzabarinda Donat, umuhungu wa nyakwigendera bari bavanye mu bukwe we yarakomeretse ahita ajyanwa ku Kigo Nderabuzima cya Musango.

Umuyobozi Wungirije w’Akarere ka Karongi ushinzwe Imibereho Myiza y’Abaturage, Mukashema Drocelle, yaboneyeho asaba abaturage kunoza imiturire bakirinda impanuka zikomoka ku biza.

Ati “Hari gihe umuntu yubaka inzu ariko ugasanga nta fondasiyo (umusingi) ikomeye y’amabuye abanje kubaka, amazi yaza agahita acamo. Twajyaga tugira ibisenge biguruka, ariko twabakanguriye kubizirika, none byahereye hasi.”

Iyi mpanuka yabereye mu Murenge wa Rubengera w’Akarere ka Karongi ubwo umunyegare, Muhire Jean w’imyaka 25 yari agiye gutwara ibirayi ahitwa mu Ryabisine, yageragezaga kwisunga ikamyo (ayifasheho) yo mu bwoko bwa Actros yari itwaye isima iyivanye ku ruganda rwa Cimerwa iyijyanye i Kigali.

Umunyegare wari wisunze ikamyo ngo imwongerere umuvuduko, yamugongesheje ipine ry’inyuma, ahita apfa.

Umuvugizi wa Polisi y’u Rwanda, Ishami ryo mu muhanda, Supt. Jean marie Vianney Ndushabandi, yemereye Kigali Today ko uwo munyegare koko yapfuye agerageza kwisunga ikamyo ngo imwongerere umuvuduko.

Abari ahabereye iyi mpanuka mu ihuriro ry’Akagari ka Gacaca n’aka Nyarugenge tugize Umurenge wa Rubengera, bavuga ko nyakwigendera yapfuye nyuma yo gukandagirwa n’ipine ry’inyuma y’iyi modoka kuko yari yayifashe ahereye ku ruhande, ipine ry’igare ryakora ku ry’imodoka, agahita agwa, ari bwo yamukandagiraga, ikamuca umutwe.

Dusabimana Jean Bosco wari kumwe na nyakwigendera bagiye kuzana ibirayi yagize ati “Twagendaga, iyo modoka itugezeho, uwo muhungu ati ‘reka nyifate inyihutishe’, afata mu rubavu. Niba imodoka yakubise mu mukuku? (Aribaza). Nagiye kubona, mbona yamugongesheje ipine ry’inyuma.”

Bernard Johannes, Umunya - Tanzaniya wari utwaye iyo kamyo, yahise atabwa muri yombi na Polisi, ubu akaba acumbikiwe kuri Sitasiyo ya Polisi ya Bwishyura, mu gihe umurambo wa nyakwigendera wo wahise ujyanwa ku Bitaro bya Kibuye.

Mu bushakashatsi yakoze, Inama nkuru y’itangazamakuru (MHC) yagaragaje ko ibinyamakuru bigera kuri 67% bikorera mu Rwanda bitagira igenamigambi rizima, bikaba intandaro yo kudatera imbere.

Umuyobozi wa MHC, Peacmaker Mbungiramihigo avuga ko igenamigambi ridahamye ari kimwe mu bibangamira iterambere ry’ibitangazamakuru byo mu Rwanda.

Ibi byagaragajwe kuri uyu gatatu tariki 26 Mata 2016 nyuma y’ibiganiro n’abanyamakuru b’ibitanagzamakuru bitandukanye mu Rwanda bagiranye na MHC ku cyateza imbere ibitanagzamakuru.

Hasuwe Radiyo y’abaturage ya ISANGANO ikorera mu Karere ka Karongi nk’urugero rw’ikinyamakuru gitera imbere.

Nk’uko byasobanuriwe abanyamakuru batandukanye, ngo iyi radio yatangiranye ibikoresho bifite agaciro ka miliyoni 25Frw, ubu igeze ku gaciro ka Miliyoni 170 mu myaka itanu.

Umuyobozi wa MHC, Peacemaker Mbungiramihigo yavuze ko mu bushakashatsi bakoze, igenamigambi ryagaragaraga nabi, ugasanga hari ufite ikinyamakuru, afite konti imwe, ariyo ijyaho amafaranga y’umusaruro yagize ku giti cye n’amafaranga ava mu kinyamakuru.

Hanasuwe Radio Isangano nka kimwe mu bitanagzamakuru byabashije kwiteza imbere.

Yagize ati “Ugasanga kandi umuntu ushinze ikinyamakuru, afite ubuyobozi bwa cyo, ariko ari nawe ushinzwe n’imicungire y’imari yacyo arabihuza byose, noneho bikakugora kugaragaza icyerekezo afite.”

Ku ruhande rw’abayobozi ba bimwe mu binyamakuru bo go si ko babibona. Gakire Fidele, umuyobozi akaba na nyiri ikinyamakuru Ishema, avuga ko nta kinyamakuru cyatangira kitagira igenamigambi, ahubwo biterwa n’uko amasoko ya Leta atagera mu bitangazamakuru byigenga.

Gatera Stanley, umuyobozi akaba na nyir’ikinyamakuru Umusingi we avuga ko biterwa n’imiterere y’itangazamkuru inyuranye n’imiyoborere y’ibindi bigo.

Ati “Iganamigambi ryacu usanga no mu bigo by’imari bataryumva, ntibaryumva kuko ritandukanye n’izindi ujyana ugiye gukora akabari, abo bakora ubwo bushakashatsi n’abandi ntago babyumva.”

Mu gihe hakomeje gushakishwa icyakemura ikibazo cy’ubukene mu bitangazamakuru bikorera mu Rwanda, bikomeje kugaragara ko ibyandikwa ku mpapuro ari byo byibasiwe cyane aho usanga bidasohokera igihe cyagenwe.

Ubu bukangurambaga bukorwa ku bufatanye n’Ikigo cy’Urubyiruko cya Karongi kandi buranakangurira urubyiruko rwanduye virusi itera Sida gufata imiti neza.

Murangira Aline, Umukozi w’Imbuto Foundation, asaba urubyiruko kwirinda rukubaka ahazaza heza.

Murangira Aline, Umukozi w’Imbuto Foundation, agira ati “Muri gahunda zacu twita ku rubyiruko kuko 70% by’abatuye u Rwanda bari munsi y’imyaka 30.

Ni ngombwa rero ko aba bantu benshi bamenya guha agaciro ubuzima bwabo bakabufata uko bikwiye kugira ngo igihugu kizaragwe abantu bafite ubuzima bwiza.”

Ubu bukangurambaga bwaranzwe n’indirimbo n’imbyino bikangurira urubyiruko kwirinda Sida.

Umuyobozi w’Akarere ka Karongi Wungirije ushinzwe Imibereho Myiza y’Abaturage, Mukashema Drocelle, yasabye urubyiruko gutinyuka ijambo “oya” ku bashaka kurushuka kandi rukabicengeza no mu batarabyumva.

Umuyobozi w’Akarere ka Karongi Wungirije ushinzwe Imibereho Myiza y’Abaturage, Drocelle Mukashema, asaba urubyiruko kumenya kuvuga "Oya" rugahakanira abarushuka.

Uwamariya Angelique, umwe mu rubyiruko rwari ruhari, avuga ko igikorwa nk’iki ari ngombwa kuko nubwo nta byinshi biba ari bishya kuri bo, bituma urubyiruko rwongera gutekereza no kuzirikana ingaruka ziri mu gukora imibonano mpuzabitsina mu gihe kitateganyijwe.

Banaboneyeho no gupima ku buntu agakoko gatera Sida ndetse no kugira inama abamaze kwandura.

Yabivuze kuri uyu wa 19 Mata 2016 mu muhango wo gushyira ibuye ry’ifatizo ahazubakwa Isoko Mpuzamipaka rya Karongi ku nkengero z’Ikivu mu Murenge wa Bwishyura.

Umuhango wo gutangiza ku mugaragaro iyubakwa ry’Isoko Mpuzamipaka rya Karongi.

Minisitiri Kanimba ati “Aha rero Karongi nubwo ubona ari ahantu h’icyaro, ariko iyo urebye ibicuruzwa byambuka bijya muri Congo buri mwaka bigeze kuri milyari eshatu z’amafaranga y’u Rwanda kandi iyo urebye umuvuduko, usanga byaravuye kuri miliyoni 900 mu mwaka wa 2012.

Aya rero ni amahirwe cyane ko imihanda iri gukorwa ibyo byose bizatuma n’ibicuruzwa biva mu tundi Turere bijya Congo biciye Karongi.”

Minisitiri Kanimba ashyiraho ibuye-fatizo.

Ibi kandi byashyigikiwe na Guverineri w’Intara y’Iburengerazuba Mukandasira Caritas wagaragaje ko Akarere ka Karongi konyine katabasha guhaza iri soko, ahubwo agahamagarira n’abaturanyi baba abo mu Rwanda ndetse no muri Congo kurigana kuko inzira ziri kuba nyabagendwa.

Ati “Kuko Karongi yonyine itabasha guhaza iri soko ndashishikariza n’abandi batuye Intara y’iburengerazuba ndetse n’igihugu cyose yemwe n’abaturanyi bo hakurya muri Congo kuko inzira zirahari, imihanda irakoze, zaba izo mu mazi ahasigaye ni ahacu ngo dukore.”

Guverineri Mukandasira ariko yakanguriye abaturiye iri soko gufata iya mbere bakaba ari bo bagiramo ibikorwa byinshi, bityo bakaribyaza inyungu nka ba nyira ryo.

Uhagarariye Urugaga rw’Abikorera mu Karere ka Karongi, Gahizi Alex, avuga ko ubu bagiye guhera ku gukora ingendo shuri mu gihugu cya Congo bahereye ku Kirwa cy’Ijwi mu rwego rwo kureba ibyo bakeneye kugira ngo bazabashe kuba ari byo baheraho bashyira muri iri soko.

Isoko ryambukiranya imipaka rya Karongi ryatangiye kubakwa kuva ku wa 24 Werurwe 2016, imirimo yo kuryubaka ikaba igomba kuzamara amezi 12, aho rizuzura ritwaye miliyari imwe n’igice z’amafaranga y’u Rwanda.

Nyakwigendera Mukagatare Velene, w’imyaka 54 yabonywe n’abanyeshuri ngo bari bagiye gutoragura amavoka aba yahanutse, ariko na n’ubu icyamwishe ntikitaramenyekana nk’uko Ushinzwe irangamimerere muri uwo murenge, Rugagaza Espoir, yabitangarije Kigali Today.

Yagize ati “Abana batoraguraga amavoka ni bo bamubonye bahita bajya kubwira abarimu, nta cyamwishe kiramenyekana cyangwa gikekwa kuko n’ejo ku mugoroba abaturanyi be bemeza ko bari bamubonye ari muzima kandi no ku mubiri we nta kimenyetso na kimwe twabonyeho.”

Rugagaza yakomeje avuga ko uyu nyakwigendera yibanaga kuko abana be babiri umwe yabaga muri Rubavu undi akaba kwa nyirakuru ariko ho muri ako kagari.

Mu gushaka kumenya ibirambuye kuri iyi nkuru, twagerageje kuvugana n’Umuvugizi wa Polisi mu Ntara y’Iburengerazuba, atari yakamenyeshejwe ayo makuru. Umurambo we, wo wahise ujyanwa ku Bitaro bya Kibuye gukorerwa isuzuma.

Umuyobozi w’Akarere ka Karongi Wungirije ushinzwe Imibereho Myiza, Mukashema Drocelle, yavuze ko kugwirwa n’iyo nzu byaturutse ku mukingo wari haruguru yayo, watengutse bitewe n’imvura yagwaga nijoro ugahita ugusha inzu ba nyakwigendera bari bacumbitsemo.

Abaturanyi ba nyakwigendera mu gitondo bakimara kumenya ibyabaye.

Yagize ati “Ni umudamu witwa Nyirandimukaga Christine w’imyaka 25 n’umwana we Ishimwe Dina w’imyaka 4. Nyuma yo kugwirwa n’umukingo watengutse nijoro ubwo hagwaga imvura, igikuta cy’inzu na cyo cyahise kibagwaho barapfa.”

Iyi nzu yaguye yari iy’inyongera (Annexe) kuko iy’ibanze yabagamo ba nyir’urugo. Ibi byago byaje kumenyekana mu masaha ya saa kumi n’imwe z’igitondo ubwo nyir’inzu yabyukaga agiye kwiherera agasanga urukuta rw’ahari hacumbitse ba nyakwigendera rwaguye, bityo nubwo nta saha nyakuri byabereyeho izwi, hakaba hakekwa amasaha ya nijoro.

Umuyobozi w’Akarere Wungirije yagaragaje ko gutura mu manegeka bikomeje gutuma abantu babura ubuzima kandi badasiba gukangurirwa kuhimuka.

Ati “Ubutumwa dukomeza gutanga ni bumwe: abari mu manegeka na bo barasabwa gutura ahantu bumva habahaye umutekano kuko bikomeje gutuma tubura bamwe. Sinavuga ko uyu na we atari mu manegeka kandi yari munsi y’umukingo abona, kandi hari uburyo tuzi umuntu yagerageza no kuwutunganya akawugarika ngo udatenguka.”

Nyirandimukaga wari uhacumbitse, yakomokaga mu Murenge wa Rwankuba, aha akaba yahabaga atunzwe no gupagasa.

Ubwo twakoraga iyi nkuru, imirambo yombi yari imaze kugezwa ku bitaro bya Kibuye ngo ikorerwe isuzuma.

Ni mu ruzinduko yagiriye muri ako karere kuri uyu wa 18 Mata 2016 hagamijwe kurebera hamwe aho gahunda z’ubuhinzi n’ubworozi zigeze zishyirwa mu bikorwa goro ako karere ngo gakomeje kugaragara inyuma.

Minisitiri Tony Nsanganira agaya kuba abafite ubunzi mu nshingano badahanahana amakuru ngo bafashe abaturage kongera umusaruro.

Nyuma y’inama yamuhuje na Guverineri w’Intara, uhagarariye RAB mu Ntara y’Iburengerazuba, uhagarariye ingabo, abagize komite nyobozi y’Akarere ka Karongi, umukozi ushinzwe ubuhinzi n’ushinzwe ubworozi yabaye mu muhezo, Minisitiri Nsanganira yagaragaje ko imwe mu mbogamizi ku buhinzi babonye ari ukudahana amakuru no gukorera hamwe.

Yagize ati “Twaganiriye kuri byinshi buri gihingwa n’amatungo, ariko simvuga buri gihingwa, ahubwo nagira ngo ngaragaze muri rusange ko tugomba gushyira imbaraga mu gukorera hamwe no guhanahana amakuru mu nzego zitandukanye.”

Yakomeje agira ati “Icyo twabonye ni uko ubumenyi ntabwo ari bwo tubuze, guhera hejuru mu nzego zitandukanye si uko mubuze ubumenyi, ahubwo kugira ngo bubashe kugera hasi, kandi namwe mubashe kuzuzanya mu nzego zanyu.”

Bamwe mu bashinzwe ubuhinzi mu Karere ka Karongi bari bitabiriye iyo nama.

Azaria Bazambanza, Umukozi ushinzwe Ubuhinzi mu Murenge wa Mutuntu, avuga ko ibyagaragajwe na Minisitiri ari byo kandi biri mu bikomeje kugira ingaruka ku buhinzi muri rusange.

Ati “Usanga amakuru ahera hagati y’akarere n’umurenge, ariko hasi ntagereyo, nyamara bigira ingaruka ku musaruro kuko umuhinzi niba amenye amakuru atinze agatinda guhinga cyangwa agahinga nabi bitera ibihombo.”

Safari Fabien, Umukozi w’Akarere ka Karongi ushinzwe Ubuhinzi, avuga ko koko kudahana amakuru byagaragaraga ariko hakaba hafashwe ingamba.

Ati “Mu ngamba hari ukuvugurura imikoranire n’urwego rwa RAB aho amakuru y’aho imbuto tuyibona n’ubwoko bwayo! Tugomba kujya tubitangira kare, hari ubwo amakuru amenyekana nyuma bakizera ko imbuto ihari kandi ihari idahagije abahinzi.”

Ubugenzuzi ku mihigo y’Akarere ka Karongi bwakozwe n’itsinda ry’Intara y’Iburengerazuba muri Werurwe 2016, bwagaragaje ko imihigo ijyanye n’ubuhinzi ikiri inyuma hasabwa ko hashyirwamo imbaraga.

Ni mu ruzinduko yagiriye ku cyicaro cya COOPEK Inkunga kiri mu Karere ka Karongi kuri uyu wa 15 Mata 2016, mu rwego rwo gusura ibikorwa biterwa inkunga na bimwe mu bigo by’Ubuholandi, maze avuga ko nubwo intambwe aho kigo cy’imari kigeze hashimishije hakiri intambwe yo gutera.

Ambasaderi w’Ubuholandi mu RRwanda, Frederique de Man asura Koperative KAPAKAMAKA y’abahinzi ba kawa nk’umwe mu bakiriya b’imena ba COOPEK Inkunga.

Yagize ati “Mbonye ko hari ibikorwa byinshi by’iterambere n’imishinga myiza iri gukorwa na Coopek Inkunga cyangwa abakiriya bayo, ariko haracyari byinshi byo kongerwamo imbaraga kugira ngo imibereho y’abaturage bo mu cyaro irusheho kuba myiza.”

Umuyobozi wa Coopec Inkunga, Nsengimana Claudien, avuga ko inkunga bahabwa n’ibigo byo mu Buholandi ibafasha muri byinshi.

Ati “Ibigo by’Abaholandi birimo Icco- Terrafina ndetse na Rabobank batangaiye baduha inkunga yo kongerera abakozi ubushobozi hakorwa amahugurwa, nyuma y’uko COOEK Inkunga igiye itera imbere batangira kuduha inkunga idufasha kubona inguzanyo duha abakiriya.”

Umuyobozi w’Akarere ka Karongi Wungirije ushinzwe Imibereho Myiza y’Abatirage, Mukashema Drocelle, yagaragaje ko mu gihe cyose umuntu afite intego yo kugera ku cyo ashaka byoroha, akaba asanga Coopek Inkunga ari urugero rwo kureberaho.

Drocelle Mukeshimana, Umuyobozi w’Akarere ka Karongi Wungirije ushinzwe Imibereho Myiza y’Abturage, ahamya ko mu gihe umuntu afite intego gutera imbere byoroha.

Munyampeta Charles, umwe mu bakorana na Coopek Inkunga, avuga ko gukorana na yo byamufashije kwiyubakira inzu akoreramo ndetse no mu gihe yabaga yabuze amafaranga yo kwishyurira abana amashuri.

Coopek Inkunga yashinzwe mu 1995, ifite abanyamuryango ibihumbi 13 ikaba ifite umutungo bwite ugera kuri miliyoni 500, mu turere tubiri ikoreramo ari two Karongi na Rutsiro. Kugeza ubu ikaba ifite amashami atatu ahorahon’andi abiri yimukanwa (mobiles).

Uretse icyicaro cya Coopeke Inkunga, hakaba hanasuwe Koperative y’Abahinzi ba Kawa, KOPAKAMA (Koperative y’Abahinzi ba Kawa ba Mabanza) ikorera mu Karere ka Rutsiro nk’umwe mu bakiriya b’imena b’iki kigo cy’imari.

Guverineri Mukandasira avuga ko hari uduce dutandukanye tw’Intara y’Iburengerazuba yagiye anyuramo akabwirwa n’abarokotse Jenoside yakorewe Abatutsi ko babuze abaza kubasaba imbabazi mu gihe bo biteguye kuzitanga.

Guverineri Mukandasira Caritas anenga abantu badasiba mu masengesho ariko ntibitabire gusaba imbabazi abo biciye.

Agira ati “Ubu uko turi aha twese umuntu ashyizeho akamashini, yasanga buri wese ku cyumweru, ku wa gatandatu cyangwa ku wa gatanu afite aho yerekeza ajya gushaka Imana, ariko ugasanga ntawe utera intambwe ajya gusaba imbabazi mugenzi we yiciye! Kandi ngo turashaka Imana, turashaka ijuru.”

Akomeza avuga ko imyaka igera kuri 22 ishize mu Rwanda habaye Jenoside, nta wakagombye kuba agitsimbaraye ku bitekerezo nk’ibyo. Agasaba ko buri wese kwicara akitekerezaho akareba uburemere bw’ibyabaye.

Abarokotse Jenoside yakorewe Aabatutsibavuga ko nta wakwima imbabazi uzimusabye, nk’uko byemezwa n’umwe muri bo witwa Kalisa Julien.

Ati “Ntibyapfa gushoboka ko umuntu aza kukwaka imbabazi ngo uzimwime kandi rwose abarokotse turiteguye kuziha uzazisaba wese.”

Kampeta Liberée nawe warokotse, avuga ko umuntu abashije kubona abamuhemukiye bose bamusaba imbabazi, nyuma yo kuzibaha byamufasha kuruhuka.

Ati “Uzarebe nawe umuntu aguhemukiye akicecekera, bikugumamo, ariko umuntu aje akakwegera akaubwira ati ndasaba imbabazi z’ibyo nagukoreye, wumva.”

Aba baturage bavuga ko gusaba imbabazi abiciwe gusa, kuko n’abishe byatuma bumva hari umutwaro batuye.

Umuvugizi wa Polisi y’u Rwanda mu Ntara y’Iburengerazuba, IP Jean Damascene Hodali Ngemanyi, yemereye Kigali Today ko uyu munyamabanga nshingwabikorwa ari mu maboko ya Polisi, akaba afungiye kuri Sitasiyo ya Bwishyura kuva tariki 10 Mata i saa saba.

Uwayezu Theodosie, Umunyamabanga Nshingwabikorwa w’Umurenge wa Gitesi mu Karere ka Karongi.

Yagize ati “Ni byo koko arafunzwe. Arakekwaho ingengabitekerezo ya Jenoside yagaragaje mu magambo yavuze.”

Gusa, uyu muvugizi wa Polisi yirinze kudutangariza ayo magambo uwo Munyamabanga Nshingwabikorwa w’Umurenge wa Gitesi yaba yaravuze.

Amakuru agera kuri Kigali Today avuga ko ifungwa ry’uyu Munyamabanga Nshingwabikorwa ryaba rishingiye ku magambo yavuze ku wa 5 Mata 2016 mu Nama Njyanama y’Umurenge, aho bivugwa ko yavuze ko kwibuka mu murenge ayobora bizatangira ku itariki ya 6 Mata kuko ngo abantu bibuka bitewe n’amateka y’ahantu.

Ibi bikaba byarazaga bisanga andi magambo yigeze kuvugira mu nama y’umutekano yaguye y’Intara y’Iburengerazuba yo ku wa 9 Ugushyingo 2015, avuga ko uwari Perezida Habyarimana atari mubi ahubwo abo yayoboraga ari bo bari babi.

Iki cyaha kimuhamye, Uwayezu yahanwa n’ingingo ya 135 mu gitabo cy’amategeko ahana y’u Rwanda, ivuga ko umuntu wese ukoze icyaha cy’ingengabitekerezo ya Jenoside n’ibindi byaha bifitanye isano na yo ahanishwa igifungo kirenze imyaka itanu (5) kugeza ku myaka icyenda (9).

Iyi ngingo kandi iteganya ihazabu y’amafaranga y’u Rwanda kuva bihumbi ijana (100.000) kugeza kuri miliyoni imwe (1.000.000) ku wahamwe n’iki cyaha.

Iyi mvura yaguye kuri uyu wa kane tariki 7 Mata 2016 mu Murenge wa Ruganda uherereyemo aka kagali, yasanze nyakwigendera Bapfakurera Charles aho yari yugamye mu nzu y’umuturanyi hamwe n’abandi batatu, ahagana mu masa kumi n’ebyiri.

Mukashema Drocelle umuyobozi w’Akarere ka Karongi wungirije ushinzwe imibereho myiza y’abaturage, yavuze ko abakomerekejwe n’iyo nkuba bahise bajyanwa mu bitaro bya Kirinda.

Yagize ati “Icyo twamenye ni uko bari bugamye bamwe mu nzu abandi hanze, ariko turacyashakisha icyabiteye wenda ngo tumenye niba bavugiraga kuri telefone. Gusa ikimara gukubita, umukuru w’umudugudu we yahise apfa ako kanya.”

Mukasehama yakomeje yibutsa abaturage ko kari mu Turere dukunze kwibasirwa n’inkuba, bityo abasaba kwirinda ibintu byose babwiwe bikurura inkuba mu gihe imvura iri kugwa birimo amaradiyo, amatelefone kigama munsi y’ibiti n’ibindi.

Hafi y’aho iyo nkuba yakubitiye hari n’abandi benshi biganjemo abana bugamye imvura ariko ku bw’amahirwe ntibagira icyo baba.

Muri Nzeri 2015 nabwo mu ishuri ribanza rya Nyamugwagwa mu Kagari ka Nyamugwagwa nako ko muri uyu Murenge wa Ruganda inkuba yakubise abana 40, batandatu muri bo bahita bapfa abandi 35 bagakomereka.

Byagaragarijwe mu muhango wo gutangiza icyumweru cyo kwibuka ku nshuro ya 22 Jenoside yakorewe Abatutsi ku rwego rw’Akarere ka Karongi.

Guverineri Mukandasira Caritasi ashyira indabo ku rwibutso rwa Mubuga.

Uyu muhango wabereye ku rwibutso rwa Mubuga, Umurenge wa Mubuga ahashyinguye imibiri irenga 3.500 y’inzirakarengane ziciwe muri kiriziya gatorika ya paruwasi ya Mubuga no mu nkengero zayo.

Ayabagabo Faustin, visi perezida wa Ibuka mu Karere ka Karongi, yagaragaje ko nubwo intambwe imaze guterwa mu bumwe n’ubwiyunge ari ndende, hakiri imbogamizi ku badashaka kwishyura ibyo basahuye cyangwa bangije muri Jenoside.

Yagize ati “Imanza za Gacaca zaraciwe kandi zagenze neza, ariko ikibabaje ni ukuba amamiliyoni n’amamiliyoni y’abacitse ku icumu, aracyari mu bantu, nta ntambwe iterwa ngo ubone abantu bishyura ku neza, ahubwo ni ugutegereza ko ubuyobozi ari bwo bujya kurangiza imanza.”

Guverineri w’Intara y’Iburengerazuba Mukandasira Caritas yasabye abatarishyura ibyo bangije cyangwa basahuye muri jenoside kwishyira mu kigwi cya ba nyira byo.

Guverineri w’Intara y’Iburengerazuba, Mukandasira Caritas, yanenze abantu nk’abo abibutsa ko ntawegereye uwo yangirije imitungo cyangwa yasahuriye bakananirwa kumvikana ku buryo yamworohereza kuyishyura.

Ati “Muntu uzi ko urukiko rwa Gacaca rwakubwiye ibyo ugomba kwishyura, sintekerereza abacitse ku icumu rya jenoside, ariko ni uko n’ahandi byakozwe.

Uteye intambwe ukamwegera uti njyewe banciye ibihumbi 50, ariko nta byo mfite, ugaragaza ubushake atari ukwishushyanya, uwo muntu koko ntabwo mwagira aho muhurira?”

Kiriziya ya paruwasi ya Mubuga yaguyemo abenshi mu nizrakarengane zishyiguye mu rwibutso rwa Mubuga.

Mubuga iri mu cyahoze ari komini Gishyita, yaguyemo Abatutsi bari basanzwe bayituyemo n’umubare muto w’abayihungiyemo bavuye mu makomini bihana imbibi.

Uretse abakomokaga muri iyi kominini ya Gishyita bayiciwemo, hari umubare munini waguye mu Bisesero nyuma yo guhungirayo.

Iyi nyubako ifite agaciro ka miliyoni 16 FRW, izakoreshwa nk’ibiro byo gukorerwamo, naho aho ubuyobozi busanzwe bukorera hakoreshwe mu zindi serivisi zirimo ibyumba byo kurwariramo kuko nta byo bagiraga cyane cyane ibyihariye bizwi nka « Chambre Privé ».

Inyubako yatashywe ifite agaciro ka miliyoni 16FRW.

Dusabimana Innocent, umuyobozi w’iki kigo nderabuzima, avuga ko aho bakoreraga habangamaga mu kazi kabo ka buri munsi.

Ati « Nakoreraga mu ka biro gato kandi gasa n’akari hanze y’ikigo ku buryo no kuhagera byari urugendo ku baje bangana nkabura aho ndambika amadosiye, rimwe na rimwe ngahitamo kujya kwakirira abantu mu cyumba dukoreramo inama.»

Akomeza avuga ko umurwaza wifite wabaga ashaka « Chambre Privée » atashoboraga kuyibona kandi bamwe mu barwayi babagana baba bavuye kure, dore ko hariho n’abahivuriza bo mu Karere ka Ruhango..

Niyihaba Thomas, Umunyamabanga Nshingwabikorwa w’Umurenge wa Murambi iki kigo nderabuzima giherereyemo, we avuga ko iyo nyubako ivuye mu bushake kurusha ubushobozi, akaba ari urugero rwiza abandi bakarebeyeho.

Ati «Bazana iki gitekerezo twumvaga bitazapfa kugerwaho, ariko biragaragara ko ubushobozi buba mu mutwe kurusha mu mufuka, amafaranga bagenda bayegeranya none babigezeho, n’abandi rero bagomba gutinyuka.»

Mukantaganda Parfaite, umwe mu bagana iki kigo nderabuzima, avuga ko bashimishijwe no kubona iyi nyubako. Ati «Umuntu yajyaga kwa muganga ariko ugasanga ntaho kwikinga hahari, ushatse kujya mu cyumba cye wenyine ntakibone.»

Ubuyobozi bw’iki kigo nderabuzima buvuga ko izi miliyoni 16 zavuye mu micungire myiza y’umutungo, aho buri mwaka bagendaga bagerageza gusagura amwe mu mafaranga bagennye gukoresha.

Munyaneza Mathias, Umukozi ushinzwe Iterambere ry’Imibereho Myiza mu Karere ka Karongi, ari na we ufite gahunda ya VUP mu nshingano, avuga ko ayo mafaranga agizwe n’ayahawe abantu ntibishyure, ndetse n’ayahawe abayobozi bagiye bihisha mu matsinda.

Akarere ka Karongi kihaye ukwezi kumwe ngo kabe kagaruje amafaranga yanyerejwe muri VUP.

Ati “Hari ayahawe abaturage ariko bamara kuyafata bakajya kuyifatamo neza, cyangwa nk’itsinda ugasanga bahise bayagabana ndetse na bamwe mu bayobozi cyangwa abakozi bakihisha mu matsinda.”

Munyaneza akomeza avuga ko muri abo bayobozi bagiye batwara ayo mafaranga kandi batabikwiye harimo abayobozi b’imidugudu, ab’utugari ndetse n’abajyanama b’ubuzima.

Abaturage, basaba ko abayobozi bagiye bigabiza iby’abakene bagatwara n’amafaranga ya VUP bakanirwa urubakwiye.

Gasamagera Laurent, umwe mu ari abo baturage bo mu Karere ka Karongi, ati “Abo bayobozi bagomba gukurikiranwa bakishyura kuko bo baranahembwa.

Kumva ngo umukozi wa Leta yambuye amafaranga ya VUP, mbere yakagombye gusobanura uburyo yayabonye. Ese uwo mukozi niba atanishyura, utishoboye we azayakura he?”

Nubwo uyu muyobozi avuga ko bihaye ukwezi kwa Mata ngo gikemuke, ikibazo cy’igaruzwa ry’amafaranga ya VUP kiri mu byafashweho umwanzuro inshuro zirenze imwe mu nama z’ Inama Njyanama y’Akarere ka Karongi yacyuye igihe, aho wasangaga nyobozi ihabwa igihe runaka cyo gukurikirana abambuye n’abanyereje ayo mafaranga, ariko ntihagire igikorwa.

Yatawe muri yombi ku wa 31 Werurwe nyuma ya Mpfizi Theogene ushinzwe irondo mu Mudugudu wa Ruvumvu wo muri ako kagari na we wari waraye atawe muri yombi, bose bakaba baregwa ubufatanyacyaha kuri icyo cyaha.

Ibiro by’Akagari k’umunyamabanga nshingwabikorwa ufunzwe ashinjwa gukubita no gukomeretsa umuturage.

Umuvugizi wa Polisi mu Ntara y’Iburengerazuba, IP Jean Damascene Hodali Ndemanyi, yadutangarije ko uyu munyambanga nshingwabikorwa akurikiranyweho icyaha cyo gukubita no gukomeretsa ku buryo bubabaje.

Yakomeje agira ati “Mu ijoro ryo ku wa 27 mu ma saa saba z’ijoro aba bagabo bagiye ku witwa Nzayisenga Jean Claude baramubyutsa, bamujyana aho acururiza baramukubita baranamukomeretsa.”

Avuga kandi ko kugeza ubu aba bagabo bavuga ko uwo bakubise bamuzizaga gucumbikira uwitwa Tuyisabe Fils, bakunze kwita Nyatura, ngo akaba asanzwe akekwaho ubujura.

Nzayisenga, wakubiswe akanakomeretswa cyane ku maguru no ku maboko yahise ajyanwa kuvurirwa ku Kigo Nderabuzima cya Rubengera, avuga ko uyu Munyamabanga Nshingwabikorwa yari yitwaje n’umuhoro.

Ati “Yaraje angejeje aho ncururiza, arambwira ngo ndyame, ankubita ibibatiri bibiri by’umuhoro, yongeye ubujyi bumfata mu kiganza, umuhoro barawumwaka afata igiti akajya akinkubita ari na ko ankandagira.”

Amakuru agera kuri Kigali Today, avuga ko atari Nzayisenga wakubiswe wenyine muri iri joro kuko ngo hari n’abandi bakorera ubucuruzi muri iyi santere babyukijwe bagakubitwa, ariko na n’ubu bakaba batiyumvisha icyo bazize.

IP Hodari avuga ko mu gihe uyu munyamabanga nshingwabikorwa yahamwa n’iki cyaha, yahanishwa ingingo y’ 148 mu gitabo cy’amategeko y’u Rwanda ahana, iteganya igifungo kuva ku mezi 6 kugeza mu yaka ibiri.

Kabagema w’imyaka 88, muri iyi nzu y’ibyumba bibiri n’uruganiriro idasakaye, yabanagamo n’umukobwa we ndetse n’abuzukuru 5, cyakora yayikuwemo kuri uyu wa wa 29/03/2016 nyuma yo gutabarizwa n’itangazamakuru.

Iyi nzu ngo yari ayimazemo imyaka igera kuri 3, akaba yarayubakiwe n’umugiraneza utarabashije kuyirangiza ngo ayisakare nyuma y’uko iyo yari asanzwe abamo isenyutse.

Avuga ko ababazwa no kubona gahunda zose ziza zireba abatishoboye zimucaho kandi ubuyobozi buzi ibibazo bye.

Ubwo twamusuraga muri iyi nzu kuwa 28 Werurwe 2016 yagize ati “Ndababaye kandi ikibazo cyanjye nakimenyesheje Mudugudu, arahazi hano ndetse na Gitifu w’Akagari yangezeho, iyo imvura iguye njya gushaka aho kugama, yagwa nijoro nkanyagirwa.”

Umuyobozi w’Umudugudu wa Ruhanda uyu mukecuru abarizwamo, yatubwiye ko uko bagiye basabwa gukora urutonde rw’abatishoboye, bamaze kumutanga inshuro zigera kuri 3 ariko bikarangira ntacyo amariwe.

Ati “Koko natwe uyu mukecuru araduhangayikishije, ariko iyo badusabye kureba abatishoboye turamutanga nubwo ataza ku rutonde.”

Mu gushaka kumenya icyo ubuyobozi bubitekerezaho, Mutuyimana Emmanuel, Umunyamabanga Nshingwabikorwa w’Umurenge wa Bwishyura nyuma yo kubanza gusaba umwanya wo gusobanuza ikibazo cy’uyu mukecuru kuko ngo ntawe asanzwe azi, bigatwara umunsi ntacyo arabitangazaho, yaje kugaragaza ko habayeho amakosa ku bayobozi bo hasi batigeze batanga amakuru, gusa bakaba bahise bamukura muri iyo nzu.

Ati “Ikibazo cy’uwo mukecuru hari uwakimpayeho amakuru, wenda kuvuga ko amaze imyaka 3 aba muri iyo nzu sinabihamya kuko sinyimaze inaha ariko byo ahamaze iminsi si ikibazo cy’umunsi umwe cyangwa ibiri.”

Nkikimenya nahise nsaba ko akurwa muri iyo nzu agakodesherezwa na we agashyirwa mu batishoboye bazubakirwa bitarenze ukwa gatandatu n’ubwo atari ari kuri urwo rutonde.”

Ubwo twasubiragayo uyu munsi, twasanze koko amakuru ari impamo, uyu mukecuru yamaze kwimurwa aho yabaga.

Ni nyuma y’uruzinduko rw’umunsi umwe itsinda ry’abadepite 3 riyobowe na Depite Bazatoha Adolphe, Visi Perezida wa Komisiyo y’Ingengo y’Imari n’Umutungo w’Igihugu mu Nteko Ishinga Amategeko, ryagiriye mu Karere ka Karongi kuri uyu wa 28 Werurwe 2016.

Depite Bazatoha Adolphe (utunze urutoki) avuga ko hasabwa imbaraga zidasanzwe ngo hazibwe icyuho mu ngengo y’imari.

Mu gihe habura amezi atatu gusa ngo umwaka w’ingengo y’imari wa 2015-2016 urangire, iri tsinda rivuga ko ryasanze aka karere kari hasi cyane mu gukoresha ingengo y’imari.

Depite Bazatoha ati “Byonyine imishinga y’amajyambere iri kuri 18, 20%, urumva biri hasi cyane. Budget y’Akarere ihagaze nabi pe, bageze kuri 51% mureba igihe gisigaye.

Amafaranga yinjiye mu mezi umunani abanza ni make ugereranyije no mu yindi myaka yashize, ni make ugereranyije n’intego bihaye."

Munezero Eric, Umuyobozi w’Ubutegetsi n’Abakozi mu Karere ka Kaongi, ari na we wasigaye akora inshingano z’Umuyobozi w’Akarere uri mu Itorero i Gabiro, avuga ko nyirabayazana w’iri kererwa ari ibibazo bagiye bagira mu itangwa ry’amasoko.

Ati "Ikibazo twakigize mu mikoreshereze y’amafaranga ajyanye n’ibikorwa by’iterambere mu mitangire y’amasoko. Hari aho wasangaga site zateguwe gukorerwaho ibikorwa zihinduka, cyangwa amasoko twatangaga akabura abayatsindira."

Akomeza avuga ko hari icyizere kuko amafaranga atarakoreshwa ari agomba kwishyurwa ba rwiyemezamirimo, kandi amasoko bafite yose azarangira mu kwa gatandatu ari na bwo umwaka w’ingengo y’imari urangira.

Iri tsinda ryagiriye Akarere ka Karongi inama yo gushyira imbaraga mu gukurikirana imishinga iri gukorwa ikihutishwa.

Byagaragajwe mu nama isoza umuganda rusange wo kuri uyu wa 26 Werurwe 2016, aho abayobozi cyane cyane abakuru b’imidugudu basabwe gufata ibyemezo bameranyijweho n’abo bahagarariye.

I Karongi haravugwa uburiganya mu kubakira abatishoboye.

Mu ijambo rye, Mukase Valentine, ushinzwe igenamigambi ry’Akarere ka Karongi, yagaragaje ko bibabaje gusanga hari abatoranywa bishoboye kandi abatishoboye basigaye.

Ati “Muri iyi gahunda aho yamaze gutangira, hari aho twagiye dusanga abatoranyijwe ari abishoboye kandi atari uko abatishoboye badahari, ahubwo ari uburiganya, birababaje rero.”

Bamwe mu baturage bagiye bagaragaza ko iyi gahunda batayizi kuko akenshi abayobozi babyikorera batabibamenyesheje mu rwego rwo kugira ngo babashe guhitamo abo bishakira.

Mugabo Jean de Dieu, utuye mu Kagari ka Kibirizi mu Murenge wa Rubengera, ati “Iyo gahunda nta yo tuzi, kandi wumva bayiteganya barashakaga ko abaturage ari twe duhitamo abo bantu kuko ari twe tubana na bo, urabyumva na we haba harimo akantu.”

Mu gukemura iki kibazo, hasabwe ko abanyamabanga nshingwabikorwa b’utugari bategura inama n’abaturage muri buri Mmudugudu hakajya hasomwa urutonde mu ruhame kugira ngo barebe ko koko abatiranyijwe ari ababikwiye.

Isantere ya Manje ni imwe mu zikomeye zigize uyu Murenge, igaragaramo ibikorwa birimo iby’ubucuruzi, ibigo by’amashuri n’ivuriro.

Abatuye isantere ya Manje bakoresha agera ku bihumbi 20Frw kugira ngo babashe kugera ku biro by’Akarere.

Ariko abayituye n’abayikoreramo bavuga ko iyo bashatse kugira aho berekeza kubera akazi kabo bitaborohera kuko nta modoka ihagera bagasaba ubuvugizi ngo babone imodoka ihagera.

Aba baturage bavuga ko imodoka ziturutse i Kigali zigarukira mu Murenge wa Nkomane wo mu Karere ka Nyamagabe uhana imbibe n’uyu wa Mutuntu. Naho izivuye mu Mujyi wa Karongi zikagarukira ahitwa mu Gisovu mu Murenge wa Twumba.

Mudaheranwa Paulin ucururiza muri iyi santere, avuga ko bituma ukeneye gukora urugendo arara agenda kugira ngo abashe kugera aho ategera, cyangwa kugira ngo ahave asubira aho yaturutse.

Agira ati “Wenda umuhanda wacu si mwiza cyane, ariko yaba imodoka ya Coaster cyangwa bisi ya Onatracom yacamo.

Kuva hano ngo ugire aho ugera ni ikibazo, ibi bikatubangamira mu kazi kacu ka buri munsi ndetse gutera imbere ntibyoroshye. Kugera ku biro by’Akarere uhakeneye serivisi baguca ibihumbi 20 kuri moto.”

Ruzigana Emmanuel, Umunyamabanga Nshingwabikorwa w’Umurenge wa Mutuntu ahamya ko kuba nta modoka itwara abagenzi igera muri iyi santere bikomje kubangamira iterambere ry’Umurenge.

Ati “Tukomeje gusaba Akarere ubuvugizi nibura ngo tubone imodoka ya Onatracom igera hano, kuko urabona ni ahantu hari umutekano, ibikorwa bitandukanye ariko bikabangamirwa no kuba ntawe tutagira linye (Ligne), ibi bikabangamira iterambere ry’abaturage bacu.”

Umuyobozi w’Akarere wungirije ushinzwe ubukungu, Bagwire Esperance, avuga ko bagiye gukora ubuvugizi bakaganira n’ikigo cy’ubwikorezi cya ONATRACOM, kugira ngo kbe cyagena imodoka izajya igera muri kariya gace abagatuye bave mu bwigunge.

Gahunda ya Twigire Muhinzi yatangiye mu 2014, ishingiye ku iyamamazabuhinzi rikorwa n’abahinzi ubwabo no gushyiraho ingamba zigena imikorere yabo, bikabafasha kunoza ubuhinzi bwabo.

Hari abahinzi benshi usanga batazi gahunda ya Twigire Muhinzi kandi ibereyeho kubafasha.

Ngirabanzi Martin utuye Murenge wa Mubuga, akaba abeshejweho n’ubuhinzi, avuga ko iyo gahunda ayumva mu matwi ye yihitira ariko akaba atazi abo ireba ndetse n’uburyo ikora.

Agira ati “Ibyo bintu bya Twigire narabyumvise, ariko sinakubeshya ngo ni ibya bande, ese bikora bite, bikorera he?”

Munyakayanza Loepold wo mu Murenge wa Rubengera we ngo n’ubwo adasanzwe azi iyi gahunda, ariko ngo yumva izina ryayo ryaba rivuga ko yagirira akamaro abayirimo. Ati “Iyo gahunda sinyizi, ariko numvise iryo zina ryayo numva yadufasha mu kwigira nyine.”

Nizeyimana Jean de Dieu, Umukozi w’Ikigo cy’igihugu gishinzwe ubuhinzi n’ubworozi (RAB), ushinzwe ibikorwa bya Twigire muhinzi mu Ntara y’Iburengerazuba, avuga ko bisaba kongera imbaraga mu bukangurambaga kugira ngo iyi gahunda imenywe na bose.

Ati “Ni byo koko hari abatazi iyi gahunda nyamara imaze igihe ndetse inakorera iruhande rwabo, birasaba imbaraga mu bukangurambaga, cyane cyane uruhare rw’abafashamyumvire ni ngombwa, ubyumvise ntiyihitire ngo agende, ahubwo agashaka kuyijyamo.”

N’ubwo hari abagaragaza ko batazi iyi gahunda, abayigannye kare bemeza ko hari aho ibagejeje kuko uretse ubumenyi mu buhinzi bayikuramo, inabafasha mu kubona bimwe mu byifashishwa mu buhinzi nk’ifumbire n’imbuto, aho Leta igira igice kimwe isonera umuhinzi.

Mutuyimana Emmanuel, Umunyamabanga Nshingwabikorwa w’Umurenge wa Bwishyura, yavuze ko amakuru y’urupfu rwa Nyakwigendera yamenyekanye ku mugoroba wo ku wa 12 Werurwe 2016, ubwo mugenzi we bakoranaga akazi k’ubukarani yagiye kumureba agasanga yapfuye.

Akomeza avuga ko uyu mugenzi we ahamya ko yari amaze iminsi arwaye, ndetse ngo n’aho basanze umurambo we bakaba bahasanze imiti yanywaga, akavuga ko mu gukeka ko yaba ari yo yazize, bayijyanye kwa muganga bagasanga ari imiti isanzwe ubundi itatera ikibazo.

Uyu muyobozi avuga ko amakuru y’uko uyu muntu yabaga muri ubu bwanikiro yayamenye ejo ayabwiwe n’ubuyobozi bw’umudugudu. Harerimana (bitaga Rasita) ngo yari ahamaze imyaka igera kuri itatu, akaba ngo yari yarahaje asaba icumbi nk’utishoboye.

Ati “Bambwiye ko yaje nta cumbi afite kandi ubu bwanikiro nta musaruro wari ukiboneka wo gushyiramo, barahamucumbikira.”

Kuba nyakwigendera yari amaze iminsi arwaye bikaba ari na byo bikekwa ko yaba yazize cyane biturutse ku kubura umwitaho.

Umuturage utashatse ko amazina ye atangazwa yagize ati “Rasita yari amaze igihe arwaye, urumva rero kuba muri kiriya kizu wenyine nta we umwitaho, bishobora gutuma agera aho agapfa.”

Harerimana Deny w’imyaka 41 yari ingaragu, umurambo we ukaba wajyanwe ku Bitaro bya Kibuye ngo hakorwe isuzumwa ku cyaba cyamuhitanye.

Iyi mvura yaguye ku mugoroba wo kuwa 11 Werurwe 2016 mu ma saa kumi n’imwe yibasiye cyane Umurenge wa Gishyita n’uwa Twumba yo muri ako karere.

Igisenge cy’Akagari ka Ngoma Umurenge wa Gishyita mu Karere ka karongi cyatwawe n’umuyaga n’urukuta rugwa hasi

Mukashema Drocelle, Umuyobozi w’Akarere ka Karongi Wungirije ushinzwe Imibereho myiza y’abaturage, yadutangaje ko byaturutse ku kuba iyiomvura yari irimo umuyaga ukabije.

Yagize ati ”Imvura yaguye yari irimo umuyaga udasanzwe, aho umuyaga watwaye ibiro by’Akagari ka Ngoma muri Gishyita ndetse n’igipande kimwe kigwa hasi."

Avuga ko yasenye kandi amazu y’abaturage 10 mu tugari twa Kigarama, Ngoma na Cyanya ikanasenya urusengero rwa ADEPR rwa Cyanya.

Mukashema avuga ko ubu abaturage basenyewe n’iyi mvura babaye bashakiwe bagenzi babo babacumbikira, ubu bakaba bamaze kuvugana na Minisitiri wa Minisiteri ishinzwe gucyura Impunzi no gukumira Ibiza (MIDIMAR) aho bagiye kurebera hamwe ubufasha babaha.

Uretse aya mazu 10 yasenywe n’umuyaga, hari n’indi yo mu Murenge wa Bwishyura urukuta rwayo rwaguye nyuma yo guhirikwa n’igice cy’umusozi cyatengutse kubera imvura.

Yari imvura ivanzemo umuyaga mwinshi

Mu Murenge wa Twumba, Akagari ka Gitabura, ho ubwo iyi mvura yagwaga, inkuba yakubise umugabo witwa Hategekimana Casmir ahita apfa.

Abasenyewe babaye bacumbikishirijwe mu baturanyi

Mu butumwa yatanze, Umuyobozi w’Akarere ka Karongi Wungirije ushinzwe Imibereho Myiza y’Abaturage, yasabye abaturage kwirinda ibintu byose bazi kandi babwiwe bizirana n’inkuba mu gihe imvura irimo kugwa.

Yanasabye abubaka kunoza uburyo bw’imyubakire aho yagaragaje ko ahenshi umuyaga ugenda utwara ibisenge, ari uko biba bitaziritse neza. Kugeza ubu agaciro k’ibyangijwe ntikaramenyekana

Miss Jolly yashyikirije sheki ya miliyoni 3Frw Perezida w’inama njyanama y’Akarere ka Karongi, Mutangana Frederic, ari nako ya yahataniye iri Kamba aturutsemo.

Miss Jolly yavuze ko uuzima bwiza aribwo bwa mbere kugira ngo abantu bagere ku iterambere.

Miss Jolly yavuze ko yatekereje ku gutangira abatishoboye ubwisungane mu kwivuza, kuko ari ryo shingiro ry’ubuzima, kandi akaba yaratekereje Karongi nk’uwatowe ahagarariye Intara y’Iurengerazuba.

Ati “Nk’uko tubizi twese, turabizi ko ubuzima ubwo ari bwo bwose, butangirana n’imibereho myiza iyo utayifite ntacyo wageraho,ni muri urwo rwego nahisemo Mituweli kugira ngo abaturage babe bagera ku iterambere.”

Miss Jolly ahereza Perezida wa Njyanama y’Akarere ka Karongi Sheke y’amafaranga miliyoni eshatu.

Rwagasana Ernest, Umuyobozi w’inama y’ubutegetsi ya Banki ya COGEBANK yateye inkunga iki gikorwa, avuga ko nta cyababuza gushyigikira Umunyarwandakazi n’urubyiruko, nyuma yo kubisabwa na Miss Rwanda 2016.

Mutangana Frederic, Perezida w’Inama Njyanama y’Akarere ka Karongi yavuze ko kugeza ubu Akarere kari kuri 80% mu gutanga mituweli, abaturage 1000 biyongeyeho ari bantu benshi mu Karere.

Ni umuhango waranzwe n’imbyno ndetse n’indirimbo kimwe n’ibyishimo ku bawitabiriye.

Uretse igikorwa cyo kwishyurira abatishoboye ubwisungane mu kwivuza, mu Ntara y’Iburengerazuba, Miss Jolly akaba afite gahunda zitandukanye zirimo guteza imbere amagare, n’ubukerarugendo.

Ishami ryafunguwe mu Karere ka Karongi ni irya kane mu Ntara y’iburegerazuba nyuma y’irya Rubavu, Kamembe naTyazo mu Karere ka Nyamasheke.

Hari na gahunda yo kugera mu tundi turere dusigaye, nk’uko Rachid Muremangingo, umuyobozi w’agateganyo wa COGEBANK, yabitangaje ubwo barifunguraga kuri uyu wa gatanu tariki 11 Werurwe 2016.

Ishami ryafunguwe ni irya kane mu Ntara y’Iburengerazuba.

Yagize ati “Twatekereje gukorera muri Karongi kuko tubona hagaragara iterambere, ikindi kandi ibarura riheruka ryagaragaje ko mu gihugu hari umubare n’ubwo ari muto utarakorana n’ibigo by’imari n’amabanki, abo nabo bari mu batumye dukomeza kwagura amashami kugira ngo tubagereho.”

Muremangingo avuga ko kubera imiterere ya Karongi, hari serivisi bizeye ko zizafasha abakiriya kubona ibyo bakeneye ku buryo bworoshye zirimo gukora ibikorwa bitandukanye ukoresheje telefone (Mobile Banking), abahagarariye banki mu duce dutandukanye (Bank Agents) no gukoresha interineti aho uri, ugakora ibikorwa bitandukanye kuri konti yawe (Internet Banking).

Jabo Paul, Umunyamabanga Nshingwabikorwa w’Intara y’Iburengerazuba ari nawe wafungiye ku mugaragaro iri shami yavuze ko aya ari amahirwe y’amafaranga abatuye iyi Ntara babonye.

Jabo Paul, Umunyamabanga Nshingwabikorwa w’Intara y’Iburengerazuba yagaragaje ko iki gikorwa ari bumwe mu buryo bw’amahirwe y’amafaranga ku baturage.

Ati “Imiterere y’intara yacu ntiyemreraga amabanki kugana abaturage, ariko uyu munsi kuba COGEBANK yahisemo kuza muri Karongi kandi ikaba ifite umugambi munini wo gukomeza mu tundi Turere, biratwongerera amahirwe yo kugira ngo abaturage bacu bagere ku mafaranga.”

Ayingeneye Francoise, umugore ukorera ubucuruzi mu isoko rya Bwishyura, Ati “Nafungiye konti hano mu ba mbere, ndetse agatabo ka sheke (Cheque) ka mbere hano ninjye kakorewe. Twishimiye imikorere yayo irimo uburyo bwo kwakira abakiriya bushimisha buri wese uyigannye.”

Iyi banki itegerejweho kuzamura ikigero cyo gukorana n’ibigo by’imari n’amabanki kiri hasi mu Karere ka Karongi, by’umwihariko Intara y’Iburengerazuba ikaba ariyo iza ku mwanya wa nyuma mu gihugu.

Mukasine Denyse, umwe mu bo twasanze ku rugerero mu Kagari ka Kibirizi, Umurenge wa Rubengera mu gikorwa cyo kubarura abaturage bakorana n’ibigo by’imari ndetse no kubakangurira kubyitabira, avuga ko abenshi batabyitaho.

Bamwe mu bo twasanze mu gikorwa cyo kubarura abaturage bakorana n’ibigo by’imari mu Kagari ka Kibirizi Umurenge wa Rubengera bagaya bagenzi babo batitabira urugerero nta yindi mpamvu bafite

Mukasine yagize ati ”Nubwo hari abafite ibibazo nk’abatsinzwe bagasubira gusibira n’ibindi, hari benshi bataza kubera ubushake buke, bagakwiye kumva ko ibyo twiyemeje twahigiye tugomba kubirangiza.”

Mukasine Denyse umwe mu bari ku rugerero asanga abenshi batitabira babiterwa n’ubushake buke

Nasim Christian, intore yo ku ruhembe rw’iburyo (uyoboye iryo tsinda cyangwa Isibo) mu Nkomezabigwi zo mu Kagari ka Kibirizi, avuga ko kuva batangira urugerero bamaze gukora ibikorwa bitandukanye birimo gutunganya umuhanda, gukangurira abaturage kwirinda indwara zitandukanye n’ibindi.

Ushinzwe gukurikirana ibikorwa by’intore mu Karere ka Karongi, Ndagijimana Jean Damascene, avuga ko nubwo abantu benshi usanga batabizi nta wakagaragaje ubushake buke mu kwitabira urugerero areba aho u Rwanda rugeze kandi rubikesha ahanini ubwitange bw’Abanyarwanda.

Ndagijimana J. Damascene ushinzwe gukurikirana ibikorwa by’itorero mu Karere ka Karongi yibutsa ko urugerero ari itegeko

Ndagijimana avuga ko nubwo nta mibare ihamye afite, kugeza ubu urubyiruko rwitabira ibikorwa by’urugerero rubarirwa hagati ya 65 na 70% by’abakagombye kwitabira, mu Mirenge 13 igize Karongi. Iya Gishyita na Twumba ngo ikaba ari yo ifite ubwitabire bwinshi, mu gihe uwa Rubengera ari wo uza inyuma.

Uru rubyiruko rwatangiye urugerero ku wa 27 Mutarama 2016, aho rukora ibikorwa bitandukanye bigamije kubungabunga imibereho myiza y’abaturage n’iterambere, bikaba biteganyijwe ko ibi bikorwa bizamara amezi atandatu.

Uru rubyiruko rugizwe n’abasore n’inkumi 1884 bo mu Karere ka Karongi barangije amashuri yisumbuye, bahereye mu itorero ry’inkomezabigwi ryabateguriraga gutumwa ku rugerero.

Ni mu nama yamuhuje n’Ubuyobozi bw’Intara y’Iburengerazuba kuri uyu wa 5 Werurwe 2016 baganira ku ruhare rwe mu kuzamura iyo Ntara yari ahagarariye ajya mu irushanwa rya Miss Rwanda 2016.

Guverineri w’Intara y’Iburengerazuba, Caritas Mukandasira, aha impano Miss Rwanda 2016, Mutesi Jolly.

Miss Jolly, abizeza inkunga mu guteza imbere ubukerarugendo, yagize ati “Ntewe ishema n’uko mpagarariye Intara y’Iburengerazuba. Nahisemo ubukerarugendo kuko u Rwanda rwacu iyo turebye, atari igihugu gifite amabuye y’agaciro menshi, ariko usanga iyo ibiruhuko bigeze abantu bashaka kujya hanze ariko twibagiwe umutungo dufite mu gihugu cyacu. Numva ari wo tugomba kwibandaho.”

Yakomeje avuga ko usanga cyane cyane urubyiruko ruri mu batazi ibyiza bitaste u Rwanda, bityo iki akaba ari gice agomba kwitaho mu kuzamura ubukerarugendo.

Mu ijambo rye, Guverineri w’Intara y’Iburengerazuba, Mukandasira Caritas, yijeje inkunga ishoboka kugira ngo ibyifuzo bya Miss Mutesi Jolly bizabashe gushyirwa mu bikorwa.

Ati “Iyi ntara yacu wabonye ko nta yindi bisa ku isi. Na we uri umukobwa waho, ntabwo wowe wenyine wabyishoboza udafite abagufasha gushyira mu bikorwa imishinga yawe, uzakenera ubufasha bw’abari hano.”

Miss Umutesi Jolly muri studio za Radio Isangano.

Uretse inkunga mu gushyigikira ubukerarugendo, Miss Jolly yijeje ubufasha mu kurihirira abaturage bakennye ubwisungane mu kwivuza ndetse no kubakira abatishoboye.

Miss Rwanda 2016, Mutesi Jolly yambitswe ikamba mu ijoro ryo kuwa 27 Gashyantare 2016 asimbuye Kundwa Doriane wari urifite kuva mu mwaka wa 2015.

Uwimana Berancille, ushinzwe ubuhinzi mu Murenge wa Murambi, avuga ko amaso y’umuntu adashobora guhuza n’ukuri mu gupima ubuso runaka mu gihe nyamara ari bwo buryo bakoresha muri gahunda zitandukanye.

Bavuga ko habonetse uburyo bwizewe bwo gupima ubuso mu mirima y’abaturage byafasha mu igenamigambi

Ati"Ikibazo ni uko uburyo dupima ubuso mu mirima y’abaturage ni igereranya (Estimation) nta kindi gikoresho dukoresha, ubundi iyo bamaze guhinga dushobora kugena ubuso dukurikije imbuto yahawe abaturage bahinze".

Mugenzi we Azarie Bazambanza, ushinzwe ubuhinzi mu Murenge wa Mutuntu, ati "Keretse habonetse ubushobozi bwo kubona ibyuma byafasha gupima (GPS) kuko byajya biduha imibare nyayo, byafasha mu igenamigambi (Planning)".

Safari Fabien, Umukozi w’Akarere ka Karongi ushinzwe Ubuhinzi, avuga ko mu gihe hataraboneka ubushobozi ku bundi buryo, abantu bagerageza gushyiramo ubushishozi kandi bakanifashisha ingero z’ahagiye habasha gupimwa n’ibyuma byabugenewe.

Abashinzwe ubuhinzi mu mirenge basaba ko hashakishwa ubundi buryo bwizewe bw’imipimire kugira ngo imibare itangwa ibe ari nyayo

Ati "Bisaba ubushake n’ubushishozi mbere na mbere, kandi hari ubuso bw’ahantu hatandukanye bwagiye bupimwa hifashishijwe ikoranabuhanga, aho na ho bahagenderaho bakabasha kumenya ubuso bw’ahandi nyuma yo kuhagereranya.”

Kuba nta buryo bufatika bwo kubanza kumenya ubuso ku mirima y’abaturage bukenerwa muri gahunda zitandukanye zijyanye n’ubuhinzi, nko gutegura imbuto n’ifumbire, guteganya umusaruro uzaboneka mu gihembwe n’ibindi, ngo ukaba usanga ari imbogamizi ikomeye ku kunoza izo gahunda.

Uru rubyiruko rugizwe n’abasore n’inkumi 55, rwari rwiyandikishije mu ishuri ryitwa Rwanda True Hope Organisation buri wese atanga amafaranga ibihumbi bitanu rubwirwa ko rugiye kwigishwa imyuga itandukanye irimo ubudozi, kogosha no gutwara imodoka.

Aba ni bamwe muri urwo rubyiruko bazindukiye kuri Polisi ngo basubizwe amafaranga yabo.

Kuri uyu wa kabiri tariki 16 Gashyantare 2016, ubwo abiyandikishije bagombaga gutangira amasomo, bageze aho bagombaga kwigira babwirwa ko nyir’ishuri yatawe muri yombi ndetse bahabwa gahunda yo gusubizwa amafaranga yabo kuri uyu wa gatatu.

Marc Nzabananimana, umwe mu bari biyandikishije twasanze kuri Sitasiyo ya Polisi ya Rubengera ahafungiwe nyir’ishuri ari naho abiyandikishije basubirijwe amafaranga yabo, yagize ati “Baje batubwira ngo dutange ibihumbi 5 ubundi hari umushinga uzatwigisha ku buntu.”

Muganza Espoir, wari ugiye gutangiza iri shuri, avuga ko Akarere ka Karongi kari kamwemereye, agatungurwa no kumubwira ko yakoze ibyo batumvikanyeho, gusa akavuga ko icyangombwa cye cyari cyararangije igihe.

Ati “Naraje njya kwa Gitifu ndamusobanurira, na bo bati ‘turumva ari byiza, genda utangire tuzaza kugusura turebe’, ariko ejo mbabwiye ko natangiye ndi kuzana imashini abana bazakoresha, Gitifu ambwira ko nakoze amakosa yo gutangira nta rwandiko bampaye.”

Mu kiganiro na Muhire Emmanuel, Umuyobozi w’Akarere ka Karongi w’Agateganyo, yagize ati “Bageze ku karere badusaba gutangiza ishuri ariko badafite icyangombwa, mbereka inzira bagomba gucamo bakakibona cyane ko akarere kadatanga urwo ruhushya, nongeye kubabona bamaze kwakira amafaranga y’abaturage, ni yo mpamvu batawe muri yombi.”

SP Hitayezu Emmanuel, Umuvugizi wa Polisi mu Ntara y’Iburengerazuba, aganira na Kigali Today, yasabye urubyiruko kwitondera abarushukisha serivisi zitandukanye mu gihe cyose zitacishijwe mu nzego z’ibanze.

Muganza Espoir aracyekwaho icyaha cyo kwiyitirira umurimo adakora gihanishwa ingingo ya 616 n’icy’ubwambuzi bushukana gihanwa n’ingingo ya 318 mu gitabo cy’amategeko ahana y’u Rwanda.

Yabitangaje kuri uyu wa Mbere, tariki 15 Gashyantare 2016, ubwo yarahizaga abatowe mu cyumweru gishize mu myanya itandukanye mu nzego z’ibanze muri aka karere.

Abarahiye mu Murenge wa Rubengera biyemeje kugira byinshi bahindura mu mikorere.

Muhire yasabye abarahiye kuzirikana iyo ndahiro, ababwira ko nta rindi banga ryo gukora neza, ahubwo basabwa gukurikiza ibikubiye mu nteruro bavuze barahira.

Yagize ati “Iyi ndahiro ikubiyemo byose, nta handi mujya gushakisha amahame yabafasha mu kazi kanyu, muharanire inyungu rusange z’Abanyarwanda kurusha izanyu bwite, mubahe serivise uko bikwiye, kandi mubahe umwanya mu kugira uruhare mu bibakorerwa.”

Murwanashyaka Appolinaire, warahiriye kuba umujyanama, mu Murenge wa Rubengera ati “Niyemeje guteza imbere Umurenge wacu mpereye mu Kagari ka Mataba mpagarariye, haracyari imihanda itameze neza, ndetse n’ibibazo muri mituweli, tugiye kubishakira ibisubizo.”

Mukansanga Marie uhagarariye Akagari ka Gitwa muri Nyanama y’Umurenge wa Rubengera, na we ati “Mu Kagari kacu hari ikibazo cy’amazi n’umuriro, tuzafatanya n’abaturage turebe ko byaboneka ntidusigare inyuma.”

Abari basanzwe kuri iyi myanya batabashije kuyisubiraho bibukijwe ko uyu ari wo mwanya babonye wo kuba abatoza, aho basabwe kuba hafi abatowe bakabafasha bashingiye ku kuba hari byinshi mu bibazo bihari basanzwe bazi hari n’ibyo bari baratangiye gukemura.

Abarahiye ni abatorewe kujya mu nama njyana z’imirenge bagizwe n’abahagarariye utugari, abahagarariye urubyiruko, abahagarariye abafite ubumuga, abahagarariye abagore, abahagarariye abikorera, abahagarariye imiryango itegamiye kuri Leta ndetse n’ibigo by’amashuri.

Ibi byagaragarijwe mu gusoza amahugurwa y’iminsi 2 yahuje abagize Komite z’ubuzima (Comite de Sante, COSA), aho hari bamwe mu bakozi b’ibigo nderabuzima bagiye birukanwa n’izi komite ndetse bamwe bakaba baragannye inkiko, zikaba zagaragarijwe ko ubuyobozi bw’Akarere bwonyine ari bwo bufite uburenganzira bwo gufata uyu mwanzuro.

Nizeyimana Abdou (uhagaze) umukozi w’Akarere ka Karongi ushinzwe ubuzima yasabye abayobozi ba za COSA gushyira mu bikorwa ubumenyi bungutse

Nizeyimana Abdou, umukozi ushinzwe ubuzima mu Karere ka Karongi avuga ko hari Komite z’ubuzima zagiye zikora amakosa mu gufata ibyemezo zikarenga ku mategeko, aya mahugurwa akaba ari imwe mu ngamba zo kuyakumira.

Nizeyimana ati:” Twateguye aya mahugurwa kugira ngo dukumire ko habaho andi makosa kandi n’ayakozwe abe yakosorwa. Ntabwo bafite uburenganzira bwo kwirukana umukozi, ahubwo bo barasesengura basanga agomba kwirukanwa, bagakora raporo bakayishyikiriza ubuyobozi bw’Akarere bugafata ibyemezo.”

Nsengumuremyi Francois, umuyobozi wa Komite z’ubuzima ku kigo nderabuzima cya Gatare mu Murenge wa Twumba umwe mu bitabiriye aya mahugurwa avuga ko ayakuyemo ubumenyi bwinshi cyane ku bijyanye n’amategeko agenga abakozi ndetse n’uburenganzira bwabo.

Ati:”Twabonye ko mu buryo bwo gushyira abakozi mu myanya tugomba kwitonda tukabikora dukurikije amategeko tutagize uwo duhohotera ku burenganzira.”

Mugenzi we Mukantaganda Seraphine, umunyamuryango wa Komite z’ubuzima ku kigo nderabuzima cya Kirinda avuga ko n’ubwo bigaragara ko bagiye bakora amakosa batabizi, kubikosora naho hazabamo ingaruka.

Ati:” Ibi bintyu ntitwari tubizi cyane, ariko gukosora bizazamo ingaruka, ubwo nk’uwo mwanya niba warafashwe n’undi muntu we tuzamwirukana tuzabigenza dute?”

Abayobozi ba za Cosa babwiwe ko uburenganzira bwo kwirukana umukozi bufitwe n’Akarere konyine

Abayobozi ba za Cosa bari muri aya mahugurwa basabwe kugenda bakereba mu myanzuro bagiye bafata, ababa baragiye birukana abantu ku buryo bunyuranyije n’amategeko bakabagarura bitaragera mu nkiko.

Abenshi muri aba bakozi bagiye birukanwa nyuma y’uko hari hatanzwe ibwirizwa ry’uko abakozi bari mu myanya bose bagomba kuba bujuje ibyangombwa.

Kugeza ubu buri Murenge nibura muri 13 igize Akarere ka Karongi ufite SACCO, abaturage bakoresha mu kubitsa, kubikuza no kwaka inguzanyo, ariko zose usanga zirindwa n’abarinzi bitwaje inkoni biganjemo inkeragutabara.

Sacco Rubengera imwe muri Sacco zirindishwa inkoni, abaturage bavuga ko bafite impungenge z’umutekano w’amafaranga yabo.

Abaturage batandukanye baganiriye na Kigali Today, bagiye bagaragaza ko batizeye umutekano w’amafaranga yabo abitse muri izi SACCO bitewe n’uko basanga uburyo zirinzwe butagezweho bakanashingira no kuba hari izagiye zisahurwa.

Uwizeyimana Gabriel, umuturage mu Murenge wa Rubengera, ati “Iyo turebye uburyo amafaranga yacu arinzwe bidutera amakenga, kandi namwe murabizi muri iyi minsi hari aho zagiye ziterwa zigasahurwa bitewe n’uko nta burinzi bujyanye n’igihe buhari.”

Undi witwa Sabasaza Louis, we ati “Ubundi uzarebe ahandi ku mabanki uhasanga abasekiriti bafite imbunda, ku buryo n’uhabonye atekereza ko kuba yabasha kwinjiramo agiye kwiba ashobora kuhasiga ubuzima, naho inkoni nta burunzi bwayo.”

Muhire Emmanuel, Umuyobozi w’Akarere ka Karongi w’agateganyo, avuga ko uruhare mu burinzi atari urwa SACCO gusa kuko n’abahafite amafaranga bibareba.

Ati “Bafite impungenge z’amafaranga yabo, ariko tubanze turebe ikibazo SACCO zaje gukemura n’abantu bose bemera ko cyari gihari, turebe icyiza SACCO ziri gukora mu byaro hariya, tubyemeranyiweho dufatanye dukaze ingamba twese hamwe.”

Polisi y’u Rwanda iherutse gutangariza Kigali Today, nyuma y’iyicwa ry’umurinzi n’isahurwa rya SACCO Gitesi mu cyumweru gishize, ko isaba ubuyobozi bwa SACCO gukoresha abarinzi babifitiye ubushobozi kubera amafaranga menshi y’abaturage zibitse.

Umuvugizi wa Polisi mu Ntara y’Iburengerazuba, SP Hitayezu Emmanuel, ati “Burya umuntu ajya kwiba ahantu yabanje kumenya imbaraga zaho, ari yo mpamvu dusaba abahagarariye biriya bigo gukoresha abarinzi bafite ibikoresho byabugenewe aho gufata umuntu ngo agiye kurindisha ikibando, ntabwo bijyanye n’igihe turimo mu gihe harimo umutungo w’abaturage.”

Iyo SACCO yatewe n’abantu bataramenyekana bayisahura asaga miliyoni imwe n’ibihumbi 800Frw nyuma yo kwica umuzamu na we warindaga yitwaje inkoni.

Aba bamotari basabwa n’ubuyobozi bwabo guhagarara ahagenwe mu gihe bategereje abagenzi kimwe n’ahandi hose mu mu gihugu; mu rwego rwo guca akajagari.

Bamwe muri bo ariko bagaragaza ko iyo baparitse hamwe, bituma batabona abagenzi ntibagire amafaranga bacyura.

Bamwe mu bamotari b’i Rubengera ngo ntibakozwa ibyo guhagarara ahabugenewe.

Umwe muri bo (utashatse ko amazina ye atangazwa) yagize ati “Guparika ku mirongo twese tukajya hamwe ushobora no gukora iminsi 3 nta n’ijana urabona pe! Icyo gihe abajyanye abagenzi bari mu zindi nzira, ni bo bakomeza kubatwara mwe muri hamwe ngo murategereje. Hatabayeho gucangacanga, ntacyo umuntu yaba akora, ahubwo yataha akajya guhinga.”

Aba bamotari kandi bavuga ko hari n’igihe bagenzi babo bakorera mu Karere ka Rutsiro bajyana abagenzi muri Rubengera, ugasanga ni bo bakomeje kwitwarira abagenzi bahari mu gihe bo bahugiye guparika ahabugenewe.

Irankunda Vincent ni umwe mu bashinzwe umutekano w’aba bamotari, akaba avuga ko mu gihe bose bakwemera gukurikiza amabwiriza byabaha inyungu ingana aho gukomeza kwitana bamwana.

Abamotari baba barimo kuzenguruka mu rusisiro bashaka abagenzi.

Umuyobozi wa COTAMOTEKA, Uwabakurikiza Emmanuel, avuga ko amategeko agomba kubahirizwa kuko n’ahandi mu gihugu bikorwa kandi abatwara abantu kuri moto bakunguka.

Asaba abashinzwe imyitwarire gukora akazi kabo uko bikwiye; bahana abatabyubahiriza kuko biri mu byo bahemberwa.

Uretse guparika ahabugenwe, iyi koperative inavugwamo bamwe mu bakunze kugorana gutanga umusanzu cyangwa amande baciwe kubera kutubahiriza gahunda za koperative.

Ni nyuma y’uko babiri mu bagize iyi koperative bavuye mu mahugurwa y’ibyumweru bibiri agamije kubafasha kunoza umutekano n’imyitwarire ya koperative, bakaba bagomba kujya bahembwa mu mafaranga yavuye mu misanzu y’abanyamuryango.

Hari mu nama nyunguranabitekerezo yahuje abahagariye Ikigo cy’Igihugu gishinzwe Imisoro n’Amahoro (RRA) n’abahagarariye inzego z’ibanze kuva ku murenge kugera ku Ntara y’Iburengerazuba kuri uyu wa 2 Gashyantare 2016.

Brig. Gen. Murokore Eric yasabye ko habaho kongera kureba imitere y’imirenge n’abasoreshwa bahari kugira ngo hagenwe umubare w’abakozi.

Ubusanzwe amahoro ku rwego rw’akarere yajyaga yakirwa na ba rwiyemezamirimo batsindiye amasoko, ariko byaje kwegurirwa iyi sosiyeti nyuma yo gusinyana amasezerano y’imikoranire na RRA.

Uretse abakozi bo ku biro bikuru, umukozi ku ntara n’uwo ku Karere, ikaba igiye ifite abakozi babiri muri buri murenge, umubare abenshi bagaragaje ko udahagije.

Mushimiyimana Euphreum, Umuyobozi w’Akarere ka Rusizi w’Agateganyo, yagize ati “Iyi mirimo Ngali ikora yari isanzwe ikorwa na ba rwiyemezamirimo, ariko muri buri murenge yabaga afite abantu hagati ya batanu n’icumi ariko uwo mubare w’abantu 2 ni muke pe.”

Imikoranire y’inzego ni ngombwa ngo imisoro n’amahoro bibashe gusarurwa.

Brig. Gen Murokore Eric, ukuriye inkeragutabara mu Ntara y’Iburengerazuba, wari muri iyi nama, yagaragaje ko hari imirenge ifite ahakorerwa ibikorwa rusange byinjiza amahoro henshi ku buryo abantu babiri batabasha kubakurikirana.

Kuri iki kibazo, Guverineri w’Intara y’Iburengerazuba, Mukandasira Caritas, yagize ati “Tugomba kubona imisoro ishoboka, ubufatanye hagati y’inzego zose ni ngombwa, abayobozi b’ibanze bereke abasoresha ahari ibyuho na bo bashyiremo izindi mbaraga, dukorane.”

Ntare Karitanyi, Umuyobozi w’Ibikorwa muri Ngali, na we yasabye ubufasha ku nzego z’ibanze kuko ari zo zisanganywe amakuru ku basoreshwa zisanganywe.

Iyi nama yarangiye hafashwe umwanzuro w’uko mu gihe cy’iminsi itanu abakozi ba Ngali bifashishije inzego z’ibanze, bazaba bamaze kugaragaza umubare nyakuri w’abasoresha ukenewe buri Murenge hagendewe ku mubare w’abasoreshwa bahari kandi bigahita bitangira gushyirwa mu bikorwa.

Amahoro akusanywa na Ngali ni ashingiye ku mutungo rusange, amahoro kuri serivisi zihabwa abaturage ndetse n’andi mafaranga yakwa abaturage ku bikorwa bitandukanye.

Babigaragaje ku cyumweru tariki 31 Mutarama 2016, mu muhango wo guha impamyabumenyi abana 20 barangije muri iryo shuri bakaba bagiye gutangira amashuri yisumbuye.

Abana barangije muri Etoile banahawe impamyabumenyi

Abo bana bose bagize amanota ari hagati ya 7 na 22, akaba ari ryo ryabaye irya mbere mu Karere ka Karongi. Abagera kuri 90% muri bo batangiranye na ryo mu cyiciro cy’incuke.

Twambajemariya Jeanne d’Arc, Umuyobozi waEtoile, agira ati “Ibanga ryo gutsindisha ni ubufatanye n’ababyeyi. Iyo buhari umwana akabona ku ishuri baramukurikirana, yagera mu rugo naho agasanga ni uko yemwe bakajya baza no kutureba bakurikirana uko yitwaye, umwana akora icyo asabwa uko bikwiye. ”

Twambajemariya kandi yibutsa ababyeyi ko ushyize umwana mu ishuri aba ashoye imari, bityo akaba asabwa kuyikurikirana ngo idahomba.

Ababyeyi bibukijwe ko ushyize umwana mu ishuri aba ashoye imari

Tuyisenge Leon Fidele, umubyeyi urerera muri iryo shuri ati “Twishimira kurerera natwe mu ishuri riri ku mwanya wa mbere, kuko iyo umwana azanye amanota meza birashimisha cyane. ”

Ngendambizi Gedeon, Umunyamabanga Nshingwabikorwa w’Umurenge wa Rubengera iri shuri ribarizwamo, we yasabye abayobozi baryo gusangira n’abayobozi b’ayandi mashuri ibanga bakoresha mu gutanga ubumenyi.

Twambajemariye (ku ruhande iburyo) avuga ko ibanga ryo gutsindisha ari ubufatanye n’ababyeyi

Igitekerezo cyo gushinga Ishuri "Etoile" cyazanywe n’ababyeyi 20 bagize ihuriro Impuhwe mu mwaka wa 1987 bari abakozi mu bigo bitandukanye ariko kiza gushyirwa mu bikorwa mu 1990 nyuma yo kubona ko iyo bagiye ku kazi abana babo bakenera ababitaho ndetse rimwe na rimwe bakanahohoterwa.

Ibi yabigaragarije mu biganiro byakurikiye igikorwa cy’umuganda rusange usoza ukwezi kwa Mutarama ku rwego rw’Akarere ka Karongi wabereye mu Murenge wa Mubuga ahashijwe ibibanza bizubakwamo inzu 10 zizatuzwamo abatishoboye.

Meya wa Karongi waraye arangije manda Ndayisaba Francois yagaragaye mu bwikorezi bw’amabuye

Senateri Gakuba ati:” Abari hano n’abo mwaje muhagarariye batari hano twese tugomba kumva ko igihugu ari twe tuzacyubaka, twanabiririmbye hano, ntago amahanga azaza arwubake kandi twabigaragaje hano mu bikorwa kandi dushobora no gukora n’ibindi by’ikirenga.

Abari bitabiriye umuganda rusange

Yabibukije kandi ko n’ubwo hari aho usanga hatangizwa ibikorwa bigamije iterambere mu muganda ariko bigahagararira aho, icyatangijwe na sena ikomeza kugikurikirana. Ati:” Ahubwo tuzagaruke izi nzu zituwemo, abazirimo batuzimanira.”

Ingabo nazo zitabiriye

Minisitiri wo gucyura impunzi no gukumira Ibiza, Mukantabana Seraphine we yibukije abaturage ba Mubuga ko ibyo byose batabigeraho mu gihe baba badafite ubuzima bwiza, abibutsa ko bagomba gushyira imbaraga m,u kurwanya malariya yongeye gukaza umurego mu gihe muri aka gace havugwa benshi abakoresha inzitiramubu icyo zitajyenewe.

Ndoriyobijya Medard umuturage mu Murenge wa Mubuga we ngo kuba abayobozi baba bamautse bakajya kwifatanya nabo bibereka ko bagomba gushyira umutima ku bikorwa nk’ibi. Ati:” Kuba aba bose bamanutse bakaza, natwe bigire icyo bitubwira turebe agaciro k’ibikorwa nk’ibi.”

Minisitiri wo gucyura impunzi no gukumira ibiza Seraphine Mukantabana yibukije abanya Mubuga ko mbere ya byose bagomba kubanza kugira ubuzima bwiza

Uretse gusiza ibibanza ahazubakwa aya mazu, iri tsinda ry’abasenateri 12 riyobowe na visi perezidante wa sena, bafatanyije n’abaturage bakaba bakuyeho ibigunda bihakikije mu rwego rwo gukumira indwara ya Malariya. Ibikorwa by’uyu muganda bikaba byabariwe agaciro k’amafaranga ibihumbi 950.

N’ubwo nta saha nyakuri izwi iki gikorwa cyabereyeho, polisi ivuga ko aba bantu bageze kuri iyi Sacco mu ijoro ryo kuwa gatanu rishyira kuri uyu wa gatandatu, aho babanje kwica inkeragutabara Mbarushimana Anathole wari usanzwe aharinda, maze babona kwiba umwe mu mitamenwa yarimo amafaranga.

Ibiro by’Akarere ka Karongi

Umutamenwa wibwe wajyanwe mu gishanga ari ho wamenewe kugira ngo habashe gutwarwa amafaranga yarimo.

Mu kiganiro na Rugagaza Espoir, ushinzwe irangamimerere, avuga ko byagaragaraga ko uyu murinzi yishwe anizwe.

Ati:”Abaturage baturiye aho iyi Sacco yubatse mu Kagari ka Munanira nibo babimenye mu gitondo, bahita bahamagara undi mukozi wayo nawe amenyesha inzego z’umutekano.”

Umuvugizi wa polisi akaba n’umugenzacyaha ku rwego rw’intara y’Iburegerazuba, Spt Emmanuel Hitayezu yatangarije kigalitoday ko n’ubwo nta we uratabwa muri yombi, iperereza rigikomeje amafaranga yibwe akaba akabakaba miliyoni imwe n’ibihumbi 800.

Ati:”Amakuru twayamenye mu gitondo, abantu bataramenyekana bagiye babanza bica uwarindaga Sacco, bica idirishya banyuramo binjiramo imbere.

Spt Emmanuel Hitayezu avuga ko bidakwiye ko ahantu habitse amafaranga harindishwa inkoni.

Ati:”Burya umuntu ajya kwiba ahantu yabanje kumenya imbaraga zaho, ari yo mpamvu dusaba abahagarariye biriya bigo gukoresha abarinzi bafite ibikoresho byabugenewe aho gufata umuntu ngo agiye kurindisha ikibando, ntago bijyanye n’igihe turimo mu gihe harimo umutungo w’abaturage.

Ubusanzwe iyi Sacco yarindwaga n’abarinzi babiri, ari muri iryo joro umwe akaba atari yakoze. Amafaranga yibwe ni ayari mu mutamenwa muto mu gihe undi munini warimo bikekwa ko wabananiye kuwutwara.

Ibi yabitangarije mu kiganiro abagize komite nyobozi y’aka Karere bagiranye n’abanyamakuru kuri uyu wa 28/01/2016, cyaranzwe n’ibibazo byinshi ku byo iyi komite yagejeje ku baturage. Ibisubizo byinshi bikaba byagendaga bitangwa bica ku ruhande y’ibyabajijwe.

Umuyobozi w’Akarere Ndayisaba Francois (hagati) yasabye komite nyobozi izajyaho gukorera hamwe.

Kimwe muri ibi bibazo cyari ukumenya niba ubwumvikane buke bwigeze kuvugwa muri komite nyobozi y’Akarere kugeza aho uwari umuyobozi wako, Bernard Kayumba, yegura ndetse bamwe bakabibona nk’intandaro yo kuza ku mwanya wa 29 mu kwesa imihigo, bwaba bukiharangwa. Buri wese mu bagize iyi komite yasabwaga kugira icyo akivugaho.

Mu gusubiza iki kibazo, Umuyobozi w’Akarere Wungirije ushinzwe Iterambere ry’Ubukungu, Hakizimana Sebastien, yagize ati ”Iyo abantu bavuze ngo abantu ntibumvikana, njye simbibonamo ikibazo, icya ngombwa ni uko bakora inshingano zabazanye, misiyo bahawe n’igihugu naho ibijyanye n’imibanire yo hanze buri wese ashobora kugira icyo akunda.”

Ku ruhande rwe, Umuyobozi w’Akarere, Ndayisaba Francois, yasabye komite nshya izajyaho gukorera hamwe. Ati ” Icyo nayisaba ni ukwirinda kwikunda, bagaharanira inyungu rusange kandi bagakorera hamwe.”

Abanyamakuru bitabiriye ikiganiro bagaragaje kutanyurwa n’ibisubizo.

Bimwe mu bibazo byabajijwe n’itangazamakuru bitabashije gusubizwa birimo ikijyanye n’ikibazo cy’isuku nke ikigaragara muri aka karere, cyane cyane ku bijyanye n’ubwiherero, ndetse n’ikibazo cy’umushinga w’iyubakwa ry’Umudugudu wa Bunyankungu wagombaga gufatwa nk’uw’icyitegererezo ku rwego rw’Intara y’Iburengerazuba.

Uyu mudugudu wavuzwemo inyereza ry’akayabo k’amamiliyoni wagombaga kuba ugizwe n’inzu 384 zubatswe ku buryo bugezweho, ariko hakaba hamaze kubakwa izibarirwa mu 100 kandi na zo zagiye zubakwa habanje gutangwa uruhare rw’abagiye kuzibamo ndetse zidafite aho zihuriye n’igishushanyo cyari cyateguwe.

Itsinda rigizwe na ba Hon Depite Tengera Fransisca na Musabyimana Samuel ryari mu Karere ka Karongi kuva ku wa 18-26 Mutarama 2016, kureba ishyirwa mu bikorwa rya gahunda zo kwita ku isuku no kurwanya imirire mibi ndetse n’izirebana n’inyongeramusaruro n’imishinga itandukanye.

Ahenshi ubwiherero nta suku ndetse ntibunasakaye

Abo badepite bagaragaje ko nubwo hari ibyakozwe byo gushima mu kurwanya umwanda, hari n’intambwe igikenewe guterwa cyane ku bijyanye n’isuku.

Depite Musabyimana wari ukuriye iri tsinda yavuze ko muri rusange basanze bimeze neza, haba ku isuku, mu kurwanya imirire mibi, no kugeza ku baturage inyongeramusaruro n’imbuto z’indobanure.

Ariko ko hari n’ibyo basanze bitanoze nko kuba ugera mu ngo ugasanga hari isuku ariko ugasanga ubwiherero budasukuye. Hari aho bagiye basanga ubwiherero budasakaye ahandi bagasanga ubw’ahantu hahurira abantu muri rusange na bwo butameze neza.

Ndayisaba Francois, Umuyobozi w’Akarere ka Karongi avuga ko bakwiye kwishimira ko hari byinshi byakozwe agereranyije n’ibyo abadepite mu mwaka ushize bari babasabye gukosora.

Agira ati "Uretse udukosa duke tujyanye n’isuku, ikibazo cy’ubwiherero, abana batoga mu gihe bari mu biruhuko, ibyo byose tugiye kongera ubukangurambaga kugira ngo bibashe kujya ku rwego rwiza.”

Ikindi abadepite basabye ubuyobozi gushyiramo ingufu ni ukuzamura imyumvire y’abaturage ku bijyanye no gutegura indyo yuzuye. Muri iyi minsi 8, abo badepite bageze mu Mirenge 8 kuri 13 igize Akarere ka Karongi.

Aba batoza babisabwe ku wa 26 Mutarama 2016 mu muhango wo kuvuga amacumu, aho abatoza bamurikira umutahira w’intore ku rwego rw’akarere ibyo bakoze, na we nyuma yo kubyumva akabatereka inzoga izwi nk’intango y’imihigo mu rwego rwo kubashimira.

Ubuyobozi bw’Akarere ka Karongi n’abatoza mu ifoto y’urwibutso nyuma yo kuvuga amacumu.

Umuyobozi w’Akarere ka Karongi Wungirije ushinzwe Imibereho Myiza, Mukabarisa Simbi Dative, yibukije aba batoza ko akazi kabo katarangiriye aha, ahubwo ko bagomba gukomeza gufasha abo batoje kwesa imihigo bahize.

Ati “Murasabwa gukomeza gufasha abo mwatoje kuzuza imihigo biyemeje.”

Ibi byanagarutsweho n’Umutahira w’intore z’Inkingi z’Impinduramatwara za Karongi, Ndagijimana Jean Damascene, wasabye aba batoza guhora bagaragaza ibikorwa by’intangarugero aho bari hose.

Ku ruhande rwabo, abatoza biyemeje gushyira mu bikorwa ibya basabwe, ndetse babigira umuhigo bagomba kwesa.

Sindikubwabo Jonas watoreje kuri site ya Mugonero yavuze ko muri iki gikorwa, bafata intore batoje bakazinjiza mu zindi, noneho bagakomeza gukurikirana uko zishyira mu bikorwa ibyo ziyemeje.”

Abatoza basabwe gufasha Intore batoje kwesa imihigo.

Abagize uruhare mu gikorwa cyo gutoza intore z’Inkomezabigwi mu Karere ka Karongi bose hamwe ni 235 bakaba baratoje intore 1884 ziturutse mu Mirenge 13 igize aka karere.

Izi ntore zatangiye urugerero kuri uyu wa 27, aho zikora ibikorwa bitandukanye bigamije imibereho myiza y’abaturage n’iterambere.

Koperative COTAMOTEKA (Cooperative Taxi Moto Terimbere Karongi), igizwe n’abanyamuryango 150. Bamwe muri bo moto batwara ni izabo abandi ni akazi bakorera abandi.

Abamotari barishimira kuba muri koperative kuko bigiye gutuma abatwaraga iz’abandi bagiye kubona izabo.

Niyirora Vincent umwe mu bagiye guhabwa izi moto ati “Kuba twaratangiye dukorera abakire, ubu tukaba tugiye guhabwa moto natwe tukikorera, ntawe bitashimisha kandi byose tubikesha kuba muri koperative.”

Mugenzi we Hakizimana Alexandre nawe ati “Ubu koperative igiye kudufasha kubona moto, kandi ibi bizadufasha kuba twava kuri moto tukagera no ku bindi binyabiziga nk’imoodoka.”

Kanyabukunzi Jean Bosco, umukozi ushinzwe inguzanyo muri COOPEK Inkunga mu Karere ka Karongi, avuga ko kuba aba bamotari bibumbiye muri kopeative biri mu bituma baborohereza mu kubona iyi nguzanyo.

Ati “Ni ukuvuga ngo inguzanyo tuyitanga mu rwego rwa koperative kandi niyo iba yatse inguzanyo ni nayo tureba, tukayiha izo moto nayo ikaziha abanyamuryango bayo.

Gusa umunyamuryango ku giti cye tumwumvisha uruhare rwe kuri ya nguzanyo, kandi iyo ya nguzanyo itishyuwe neza ya moto isubizwa muri koperative bakiyiha undi uzishyura neza.”

Uwabakurikiza Emmanuel umuyobozi wa COTAMOTEKA ati “Inguzanyo nk’iyi ni inyungu kuri koperative kuko iyo abanyamuryango babonye moto bagira icyo bayisorera.”

Kugira ngo koperative ihabwe iyi nguzanyo isabwa ibaruwa isobanura uyu mushinga wa moto, kugaragaza ko abasabirwa moto bafite impushya zo kuzitwara, kwerekana ko bafite ubuzima gatozi no kwerekana ko nta mwenda w’imisoro babereyemo ikigo cy’imisoro n’amahoro (RRA).

Abanyamuryango umunani ba COTAMOTEKA nibo bagiye guhabwa izi moto bwa mbere aho imwe izaba ifite agaciro ka miliyoni 1Frw n’ibihumbi 360Frw.

Perezida w’Inama Njyanama y’ako karere, Emile Nsanzabaganwa, agira ati " Byonyine na Meya w’Akarere arivugira ko mbere yakiraga ibibazo bitabarika ariko ubu akaba yakira abatarenze batatu. Ibyo rero umusaruro wabyo ni wo ugenda ukagera mu mpinduka turi kubona mu bukungu."

Perezida wa Njyanama y’Akarere ka Karongi, Nsanzabaganwa Emile, asanga ibyo bakoze ari ibyo gushimirwa.

Abaturage b’Akarere ka Karongi ariko, bo ibyagenzweho babibona mu buryo butandukanye.Mukamasabo Mariyana utuye mu Murenge wa Rwankuba ati "Tubona ibyo njyanama yakoze ugereranyije ari byiza n’ubwo atari 100%."

Mugabarigira Jean Damascene we asanga nta mpavu yo kwivuga ibigwi kuri iyi njyanama. Ati "Njyanama iramutse ihinduye imikorere hari byinshi byakemuka, igakora nta bwoba. Isoje manda yagiye igira ubwoba bwo kugira ibyo igaragaza."

Uretse aba kandi, hari n’abaturage usanga batazi ko n’iyo njyanama ibaho kuko iyo ubabajije bakakubwira ko abo bazi ari abayobozi basanzwe.

Kimwe mu bibazo iyi njyanama igaragaza ko isize bitarakemuka, n’ikibazo cy’abagize uruhare mu inyerezwa ry’amafaranga asaga miliyoni 300 muri gahunda ya VUP bakaba batarabiryozwa mu gihe yakunze gusaba nyobozi kugira icyo ibikoraho.

Biteganyijwe ko ku wa 29 Mutarama 2015 ari bwo manda y’abagize inama njyama ndetse na komite nyobozi z’uturere bagomba kurangiza imirimo yabo, mu gihe hazaba hategerejwe ko hatorwa izindi nzego, ubyobozi bw’uturere bukazashyirwa mu maboko y’Abanyamabanga Nshingwabikorwa.

Iyi koperative COTAMOTEKA (Cooperative Taxi Moto Terimbere Karongi) igizwe n’abanyamuryango 150, aho ubusanzwe batangaga umusanzu w’amafaranga y’u Rwanda 500 ku cyumweru.

Nyuma yo gusanga hari byinshi bigenda byiyongera mu bikenerwa mu rwego rwo kurushaho kwiyubaka, mu nama yabahuje kuri uyu wa Kane tariki ya 21/01/2016, hemejwe ko umusanzu uva kuri 500 ukagera ku 1000 ku cyumweru.

Umuyobozi wa COTAMOTEKA, Uwabakurikiza Emmanuel, yasabye abanyamuryango kumva ko inyungu za koperative ari izabo.

Hakizimana Alexandre ukorera mu Murenge wa Rubengera avuga ko uyu mwanzuro uri mu nyungu z’abanyamuryango kandi ntacyo ubangamyeho.

Ati "Amafaranga 1000 bashyizeho, igitekerezo nacyakiriye neza kuko ariya 500 twatangaga mbere, bararebye basanga koperative yacu itazatera imbere, bashyiraho 1000 kandi nta mbogamizi zirimo mu kuyabona."

Mugenzi we Bizirurema Pascal ati "Kuko ari ibintu byacu tuba twikorera kandi nubundi inyungu ari izacu n’ibikorwa ni twe bizagirira akamaro, amafaranga 1000 azatuma koperative yacu irushaho kwiyubaka."

Abamotari biyemeje gushyira hamwe bakizamurira koperative.

Uwabakurikiza Emmanuel, Umuyobozi wa COTAMOTEKA avuga ko kongera umusanzu byaturutse ku kuba inshingano za koperative na zo zariyongereye.

Ati "Mu rwego rwo kuzuza inzego nk’uko tubisabwa n’Ikigo cy’Igihugu gishinzwe guteza imbere Amakoperative, bituma hari inshingano zigenda ziyongera, ari na yo mpamvu twongereye umusanzu."

Kubera uburemere bw’inama, byatumye moto zirirwa ziparitse.

Mu gihe hakomeje gushyirwaho gahunda zigamije kuzamura koperative, hari imbogamizi y’uko bamwe mu banyamuryango ba COTAMOTEKA usanga batitabira inama zifatirwamo ibyemezo, ahubwo bakajya mu kazi kabo uko bisanzwe.

Abanyamuryango basabye inzego zishinzwe imyitwarire kurwanya icyo kibazo zikaza ibihano. Kugeza ubu, usibye inama acibwa amafaranga y’u Rwanda 3000.

Izi nka zifite agaciro ka miliyoni 22Frw zatanzwe n’umuryango World Vision muri gahunda ya Gira inka, kuwa kabiri tariki 19 Mutarama 2016.

Umuyobozi w’Akarere ka Karongi, Ndayisaba Francois, yasabye abahawe inka kuzifata neza.

Ndeze Andre, ushinzwe iterambere ry’abaturage muri World Vision, yavuze ko ubusanzwe uyu muryango wita ku mwana, ariko ubuzima bwe bukaba bufatiye kuri benshi. Kuba izi nka zahawe ababyeyi, ngo bigamije kuzatuma abo barera babasha kubaho neza.

Yagize ati “Ubusanzwe, umwana aba mu muryango, agira ababyeyi, agira abamurera kandi iyo umuryango utameze neza ufite ubukene, biragora kwita ku mwana cyane ko abana baba bakiri bato baba bagomba kwitabwaho kandi iyo umwana akuze nabi igihugu kiba gihomba.”

Abaremewe nabo biyemeje gufata neza inka bahawe.

Ndayisaba Fancois, Umuyobozi w’Akerere ka Karongi, ati “Icyo nsaba abahawe izi nka, bazifate neza zibafashe kwivana mu bukene kandi tunezeze umufatanyabikorwa, bityo aho guhina ukuboko gutanga, arusheho kukurambura.”

Mukarutakwa Appolinarie, umwe mu bahawe inka, yavuze ko igiye kumukura mu bukene kuko ubuzima bwe butari buhagaze neza.

Ati “Nahingaga sineze kuko mfite ubutaka busharira, ngiye kubona ifumbire mbone umusaruro uhagije, nzabona amata abana banjye babeho neza. Ndashimira Nyakubahwa Parezida wa Repubulika Paul Kagame kuko yatugiriye neza yaduhaye itungo."

Muri uyu mwaka w’ingengo y’imari, World Vision yiyemeje kuzatanga inka 350 mu karere hose.

Gusa imwe mu mbogamzi zagaragajwe iyi gahunda ikunze guhura na zo muri aka gace, ni uko bamwe mu hahawe inka bakunze kuzigurisha bakabeshya ko zibwe, akenshi bagamije kutazaziturira abandi, nk’uko bigenwa mu masezerano baba basinye.

Niyibizi w’imyaka 53 yari ingaragu, akaba yibanaga wenyine mu nzu, aho mu masaha ya saa moya zo ku mugoroba w’ejo ku cyumweru yasanzwe yapfuye.

Umuvugizi wa polisi mu Ntara y’Iburengerazuba, Spt Hitayezu Emmanuel yatangarije kigalitoday ko icyahitanye uyu nyakwigendera kitaramenyekana, gusa hakaba hakekwa indwara.

Yagize ati:”Ni umuntu wabaga wenyine, bagiye kureba basanga yapfuye, polisi icyo ikora ni kimwe, ni ukumujyana kwa muganga bakareba icyamwishe. Gusa nk’uko yabaga wenyine hakekwa ko yaba yanarwaye agapfa.”

Mu kiganiro na Nkundunkundiye Daniel, Umunyamabanga Nshingwabikorwa w’Akagari ka Musasa nyakwigendera akomokamo, yadutangarije ko uyu Niyibizi yari umuntu wasaga n’ufite ibibazo byo mu mutwe akaba yari atunzwe no gusabiriza ariko ngo ngo akaba yarigeze kuba ari we muntu ukize muri aka gace mbere y’uko agira ubu burwayi ndetse bikavugwa ko yarozwe n’abamugiriye ishyari.

Nkundunkundiye yakomeje avuga ko nyakwigendera nyuma yo gutereranwa n’umuryango we yabonye umuntu umucumbikira iruhande rw’aho yororeraga amatungo, akaba ari na we wamenye mbere iby’uru rupfu ubwo yajyaga kureba aya matungo ye, yahamgara Niyibizi akumva ntakoma, yakwinjira agasanga yapfuye.

Gusa ngo uyu nyakwigndera mu gitondo cy’ejo ku cyumweru umuturanyi we yari yahanyuze ari muzima kuko yamuvugishije ari hanze akamusubiza.

Nkundunkundiye avuga ko abaturanyi bakeka ko Niyibizi yaba yazize inzara.
Mu gihe icyahitanye Niyibizi kitaramenyekana, umurambo we ukaba wajyanywe gukorerwa isuzuma mu bitaro bya Kirinda.

Ngo umwuga wo kubumba bavutse babona ababyeyi babo bawukora kandi na bo barawusigiwe n’abasokuruza.

Ngo nubwo batabayeho neza babonye ikindi bakora bakibangikanya n’ububumbyi.

Nubwo bugarijwe n’ubukene, basaba ubuyobozi bw’akarere kubafasha ariko ubufasha bahabwa bukaba ubutabatandukanya n’umwuga wabo wo kubumba.

Aminadabu Banyumvire, umwe muri bo, ati “Kubumba ni gakondo yacu, uwatubwira ngo tubireke byo ntibyakunda, kuko twavutse dusanga abayeyi bacu ari byo bibatunze.”

Nyirajyambere Therese, mugenzi we, we agira ati “Twifuza ko Leta yadushakira icyo dukora kidufasha kubaho, ariko ntibivuga ko kubumba twabireka, ahubwo twabibangikanya byose.”

Umuyobizi w’Akarere ka Karongi, Ndayisaba Francois, avuga ko igikenewe ari umurimo ugira icyo umarira uwukora, bityo hakaba nta mpamvu yatuma hagira uwizirika ku murimo utagira icyo winjiza kuko ngo yasanze ababyeyi be bawukora.

Ati “Ibyo byose bisaba guhozaho tugerageza kuzamura imyumvire ngo abantu bahe akamaro ibibabyarira inyungu kurusha gushingira ku bindi.”

Ndayisaba akomeza avuga ko nubwo ubufasha bahabwa budahagije, na bo ubwabo bagira uruhare mu bukene bwabo kuko ngo n’iyo bubakiwe n’amazu bayasenya.

Avuga ko imbaraga za mbere bagomba kuzishyira mu bukangurambaga bafatanyije n’inzego zibahagarariye.

Abo basigajwe inyuma n’amateka usanga ibyo babumba byiganjemo inkono zo gutekamo, n’imitako, bakavuga ko inkono imwe bayigurisha amafaranga 200 aho ngo imbogamizi bahura na yo ari ukubona ibumba kuko ritakiboneka.

Izi ntore zigizwe n’abanyeshuri barangije amashuri yisumbuye mu Karere ka Karongi, zasabwe kuzirikana izina zahawe zikirinda gukora ibinyuranye na ryo. Byabaye nyuma yo kwemererwa kwinjira mu ruhando rw’intore, guhabwa izina ry”Inkomezabigwi” no guhabwa icyivugo.

Abatozwa bavunyisha basaba kwinjizwa mu ntore.

Umuyobobozi w’Akarere ka Karongi wungirije ushinzwe imibereho myiza y’abaturage, Mukabarisa Simbi Dativa, wari uyoboye iri torero niwe wabibasabye.

Yagize ati ”Ndagira ngo mwumve kandi muhe agaciro izina ry’ubutore ryanyu ndetse munumve agaciro gakomeye k’icyivugo cyanyu maze mukore mubizirikana.”
Yabisabye abanyeshuro bari bateraniye mu kigo cya TTC Rubengera kiri gutorezwamo intore 462 zaturutse mu Mirenge ya Rugabano, Bwishyura na Rubengera.

Bikorimana Jean Baptiste, uyoboye itorero kuri site ya Rubengera, yavuze ko hari byinshi byitezwe kuri izi ntore mu rwgeo rwo kuzuza ibyo izina zahawe rizisaba.

Mukabarisa umuyobozi w’akarere wungirije ushinzwe imibereho myiza yasabye intore kuzirikana ibiri mu izina n’icyivugo byazo.

Ati ”Izi ntore mu minsi mike zirajya ku rugerero, kuba zibonye izina ry’inkomezabigwi ni uko zigiye gutanga umusanzu ufatika mu muryango nyarwanda, hari ibigwi biba bihari, hari ingamba ziba zafashwe, izi ntore rero zigomba gufasha mu gushyira mu bikorwa gahunda za Leta zitanudukanye, niyo mpamvu tvuga ngo ni Inkomezabigwi.”

Mukunde Marie Louise urangije mu ishuri ryisumbuye rya Rugabano, yavuze ko nyuma yo guhabwa izina n’icyivugo biyemeje kutazatatira igihango.

Ati “Izina twahawe ribumbiyemo ibintu byinshi, ariko nitugera aho dukomoka turahera ku gutoza urubyiruko rwataye amashuri gusubirayo kuko igihugu cyacu cyiyemeje ko buri mwana agomba kwiga.”

Intore zafashe n’umwanya wo gukora siporo.

Izi ntore zabanje gukora isuzuma ry’ingufu z’umubiri (Fitness Test), muri iri suzuma mu gice cyo kwiruka ku rwego rw’Akarere ka Karongi uwabaye uwa mbere yabaye Gakuru David utorezwa muri TTC Rubengera, aho yakoresheje iminota 10 n’amasegonda atanu mu kwiruka ibirometero 3,2.

Uyu mugezi abaturage bavuga ko urangwa no kugenda usatira amazu yabo ndetse n’umuhanda uhuza Umurenge wa Rugabano n’uwa Gashari yo mu Karere ka Karongi, bakaba bafite ubwoba ko uzabasenyera cyangwa ukabatwara kuko hari n’uwo wigeze gukura mu bye.

Umugezi wa Makambazi ukomeje gusatira amazu y’abaturage ndetse n’umuhanda

Umusaza Buragire Vincent wo mu Murenge wa Gashari ati:”Uyu mugezi wacaga iburyo, twarawimuye tuwunyuza ibumoso, hari kera, ariko ubu murabona ko ukomeje gusatira umuhanda ndetse n’ingo z’abaturage, nimudutabare niba mutadutabaye umuhanda Nyabisindu uraba ufunze mu minsi mike.”

Uwamariya Dancille utuye mu Murenge wa Rugabano nawe ati:”Hafi aha hari hatuyemo umuntu w’umusore yimuwe n’uyu mugezi kuko amazi yari yamaze kugera ku nzu ye. Tubona abayobozi baza bagafotora ariko nta kintu bagaruka ngo batubwire.”

Ku ruhande rw’ubuyobozi, Ndayisaba Francois, umuyobozi w’Akarere ka Karongi avuga ikibazo cy’uyu muhand akizwi ndetse ukaba uri ku rutonde rw’imihanda iri kwangizwa n’ibiza.

Ati:” Ibyo twabihaye MIDMAR, REMA irabizi, ariko ikindi kiyongeraho byaterwaga n’abantu bacukuramo zahabu kandi twabavanyemo kuko nicyo kintu cyatumaga umuhanda wangirika cyane.”

Aho usanga uyu mugezi waramaze kwegera ingo z’abaturage cyane ni mu Mudugudu wa Kabuye, Akagari ka Rwungo, Umurenge wa Rugabano, amazu amwe bikaba bigaragara ko yenda kugwa kuko ubutaka yari afasheho bwatwawe n’amazi.

Abawuturiye bavuga aho ikibazo kigeze kirenze ubushobozi bwabo kuko bari bagerageje gutera ibyatsi ndets n’ibiti ku nkengero z’uyu mugezi ariko bikanga bikaba iby’ubusa kuko nabyo wabitwaye.

Ikigo cy’igihugu gishinzwe kohereza mu mahanga ibikomoka ku buhinzi, NAEB kigaragaza ko ubutaka buhinzeho Kawa y’abaturage aribwo bunini kurusha ubuhinzeho kawa y’abanyenganda, nyamara ugasanga umusaruro uva muri iyi kawa ihingwa n’abaturage ari wo muke, ikibazo igaragaza ko giterwa n’uburyo abahinzi ba kawa batayitaho.

Umuyobozi wa NAEB Ambasaderi Kayonga William avuga ko kawa igihugu gifite yitaweho yatanga umusaruro wateza imbere abayihinga ndetse n’igihugu ubwacyo ku kigero gishimishije

Umuyobozi wa NAEB, Ambasaderi Kayonga William avuga ko kawa igihugu gifite kugeza ubu yitaweho yatanga umusaruro wateza imbere abayihinga ndetse n’igihugu ubwacyo ku kigero gishimishije, gusa ngo akenshi ukaba usanga abahinzi bashaka kongera ubunini bw’ahahinze kandi n’aho bafite batahitayeho uko bikwiye.

Avuga kandi ko mu gihe bigaragara ko hari ibihugu biturusha kugira kawa nyinshi cyane, twagashakiye ingufu mbere na mbere mu kugira Kawa nziza ku isoko.

Ati:” Biragoye ngo tube twagera ku ngano ya kawa nk’iyo ibihugu nka Bresil byeza, ariko ingufu tugomba kuzishyira mbere na mbere ku bwiza bw’iyo tujyana ku isoko.”

Abahinga Kawa nabo bemeza ko ibigaragazwa na NAEB ari ukuri. Mujyambere Theodore umuhinzi wa Kawa mu Karere ka Karongi ati:” Ibyo NAEB itubwira tubyemeranywaho, umuhinzi wa kawa aretse kuyivanaga n’imyaka, akayisasira n’ibindi byose bisabwa ntiyabura kweza uko bikwiye.”

Kabandana Cleophace we avuga ko imbogamizi ikomeye abahinzi ba kawa bahura nayo mu kuyitaho ari ukubona isasiro kandi ari ngombwa.

NAEB igaragaza ko ubushakashatsi bwagaragaje ko mu gihe ahenshi mu gihugu igiti cya kawa kiri kweraho ibiro bitarenze 3, hari uburyo bwo kwitabwaho igiti kimwe kikaba cyakweraho ibiro bigera kuri 27.

Kugeza ubu Intara y’iburengerazuba iza ku mwanya wa mbere mu kohereza ibikomoka ku buhinzi byinshi mu mahanga birimo na kawa, aho yihariye ibisaga kimwe cya kabiri cy’ibyoherezwa byose. Akarere ka Karongi kaza ku mwanya wa 4 muri iyi Ntara mu guhinga kawa.

Izi sentere ni iya Rubengera ndetse n’iya Kibirizi aho hagiye gushira ibyumweru 2 nta suku ihakorwa, ugasanga imyanda irunze imbere y’isoko ndetse n’amaduka yarahaboreye kubera ubwumvikane buke hagati ya rwiyemezamirimo usanzwe ahakora isuku n’Akarere kamuhaye isoko.

Imbere y’isoko ndetse n’imbere y’amaduka uhasanga ibirundo by’imyanda yahaboreye

Iyo uganiriye n’abaturage basanzwe bakora iyi suku bakubwira ko rwiyemezamirimo yabaye abahagaritse kuko Akarere kamwambuye akaba nta mafaranga yo kubahemba afite, aho batarahembwa umushahara w’ukwezi kwa 11 n’ukwa 12.

Ku ruhande rw’abakorera ubucuruzi muri izi santere ngo ntibumva impamvu y’ibi hejuru y’uko amafaranga basabwa bayatangira ku gihe.

Rugamba Philbert umwe muri aba bacuruzi ati:” Nk’ubu njye ntanga ibihumbi 6 bya buri kwezi, ariko reba umwanda ni wose. Abakoraga iyi suku ntibakigaragara twumva ngo barambuwe.”

Kabandana Pascal umuyobozi wa Karongi Unit Cooperative ikora iyi suku we avuga ko ikibazo gishingiye ku kuba amasezerano bari bafitanye n’Akarere yararangiye.

Abacuruzi ntibumva impamvu bari mu myanda kandi bishyuzwa buri kwezi amafaranga y’isuku

Ati:”Amasezerano twari dufitanye yo gukora isuku yararangiye, njye mbasaba ko kugira ngo mbe nakomeza bakongera amafaranga kuko nabonaga imirimo yiyongera kandi amafaranga ntayo, nibampamagara hari ikintu bongeyeho nzaza mbikore niba ntacyo buriya bazashaka n’undi nawe aze ashyireho ake “

Muhire Emmanuel, Umunyamabanga Nshingwabikorwa w’Akarere ka Karongi avuga ko yumvaga ko ikibazo ari amafaranga y’uyu rwiyemezamirimo atarahabwa kandi nayo agiye kuboneka.

Ati:” Urumva ko bitandukanye, mbere bavugaga ko twabambuye, niba kandi barabonye amafaranga ari make nabwo ntibari guhagarika isuku, ayo mafaranga kandi nayo twarabyohereje amafaranga ageze muri BNR.”

Muhire avuga ko nyuma yo kwishyura aya mafaranga y’umwenda babereyemo rwyemezamirimo, mu gihe bigaragara ko abakoraga isuku batabyumva neza bareba uburyo amafaranga yagenerwaga iki gikorwa yashyirwa ku Murenge, ubuyobozi bwawo bukishakira indi koperative yabikora kandi akaba aribwo bukurikirana imikorere yayo.

Yamuragiye Alphonsine umwe mu banyamuryango bayo batangiranye na yo kimwe na bagenzi be, avuga ko igihombo koperative yabo yagize cyatewe n’abayobozi bayo barangwaga no kunyereza icyo yinjije.

Uretse kwiba ibitoki ndetse n’umutungo wa Koperative Indashyikirwa-Gashari, urutoki rwaje kurwara Kirabiranya rwose rurarandurwa.

Mugenzi we Nyirangiruwonsanga Donatha akaba umucungamutungo agira ati “Twahombejwe n’abayobozi bagiye basahura bishyirira mu nda yabo. Warazaga ugasanga ibitoki birimo perezida yabigurishije, urebye twahombye ari muri miliyoni 15.”

Iyi koperative imaze imyaka igera kuri 5 ishinzwe, yatangiye ifite abanyamuryango bagera kuri 33 aho bakoraga ubuhinzi bw’urutoki ku buso bugera kuri hegitari imwe, ariko nyuma iza guhomba ndetse isa n’ihagaze, kuri ubu ikaba igizwe n’abanyamuryango 13.

Uretse kuba uru rutoki rwaragiye rwibwa kimwe n’amafaranga yaruvagamo, rwaje kurwara indwara ya kirabiranya ku buryo rwose rwaranduwe.

Nubwo nta gahunda yo gukurikirana abo bashinja kubahombya usanga bafite, abayisigayemo bari kwisuganya ngo bongere guhuza imbaraga.

Charles Habimana, umukozi w’umuryango ADRA-Rwanda, wakunze gutera inkunga iyi koperative, avuga ko ubufasha bwa mbere mu guhangana n’iki kibazo ari amahugurwa babaha, akabasaba gushyira mu bikorwa ibyo bahuguwemo bagakora baharanira inyungu rusange.

Ati “Nyobozi twarayihuguye, abacungamutungo twarabuhuguye, ariko bigaragara ko ibyo bahuguwemo batabishyize mu bikorwa, babishyize mu bikorwa amategeko abagenga bayakurikiza.”

Habimana kandi avuga ko abanyamuryango ubwabo bagize uruhare mu ihomba rya koperative. Ati “Bakabaye abo bavuga babateye ibihombo babashyikiriza mu mategeko, ariko nubwo bavuga gutya na bo ubwabo si shyashya. Uje iyo ari umwe aca inyuma icyo abonye akagitwara n’undi gutyo, ugasanga baribana.”

Karasanyi Nicolas, Umunyamabanga Nshingwabikorwa w’Umurenge wa Gashari, agira inama ababashije gusigara muri iyi koperative kubanza kumva ko inshingano zabo ari ugukorera hamwe bagamije kungukira hamwe, kandi bakamenya ko uburenganzira bwabo muri koperative bungana.

Karasanyi akomeza avuga ko ubutaka bahinzeho urutoki bari bararuhawe n’umurenge naho imbuto bakayibwa na ADRA ndetse ikanabahugura.

Nubwo bigoye kumenya umubare nyawo w’igihombo iyi koperative yagize, abanyamuryango bagaragaza ko kiri hagati ya miliyoni 15 na 20 dore ko Akarere ka Karongi ngasanzwe kazwiho kuba kamwe mu turere tweza ibitoki binini mu Rwanda ku buryo hari ibyo usanga kimwe kirenza ibiro 200.

Abagenzuzi b’imari mu turere nibo bafite inshingano zo kugenzura uko umutungo wa Leta mu bigo biri mu Karere ukoreshwa, ariko bamwe bavuga ko imwe mu mbogamizi bahura nayo ari uburyo usanga bashyirwa ku rwego rwo hasi mu Karere ngo bikaba bitakoroha kugenzura umuntu ugufataho imyanzuro.

Abagenzuzi b’imari mu Ntara y’Iburengerazuba basanga babarwa ku rwego rwo hasi rutajyanye n’akazi bakora ndetse bitanoroshye kugenzura umuntu ugufataho ibyemezo.

Jean Damascene Bizimungu, umugenzuzi w’imari ya Leta mu Karere ka Rutsiro ati “Uribaza uti ese umugenzuzi azagenzura umuntu agaragaze ibyo abonye kandi wenda niwe umuha misiyo niwe umupangira ibyo agomba kwitwaza.

Ugasanga bibaye ngombwa ko agira ukuntu agenda gake, ugasanga hari ibyo atagaragaza kugeza igihe bigaragajwe n’umugenzuzi mukuru w’imari ya Leta.”

Bizimungu asanga umuti w’iki kibazo waba ugushakisha uburyo abagenzuzi b’imari bakora bigenga ku buryo ubacunga udasanga ariwe bagenzura.

Francine Umurungi ushinzwe iterambere n’ubuvugizi mu muryango ushinzwe kurwanya ruswa n’akarengane, muri Transparency International-Rwanda we asanga impamvu itangwa na bamwe mu bagenzuzi idakwiye.

Umurungi ushinzwe iterambere n’ubuvugizi muri TI- Rwanda asanga urwego abagenzuzi b’imari babarwaho atari rwo rwo kwitwaza, ahubwo buri wese akoze ibyo ashinzwe ibintu byagenda neza.

Ati “Ntago nibaza ko aricyo kibazo nyamukuru gituma ibibazo bihari bihaba, ahubwo wenda iyo batubwira bati umugenzuzi afite akazi kenshi atabasha kurangiza kose.”

Transparency iherutse gushyira uherutse gushyira hanze ubusesenguzi kuri raporo y’umugenzuzi mukuru w’imari ya Leta ya 2013-2014, buguragaza ko imwe mu mbogamizi zikomeje gutuma mu bugenzuzi bw’Uturere hagaragara amakosa ari ukuba byinshi mu bigo biri mu Karere byiganjemo ibitaro n’amashuri usanga batabifititeho uburenganzira busesuye, nyamara ugasanga karabarwaho amakosa yabyo.

Akarere ka Karongi kaza ku mwanya wa mbere mu Ntara y’Iburengerazuba mu kubahiriza inama kagiye kagirwa n’umugenzuzi mukuru w’imari ya leta, ku rwego rw’igihugu kakaza ku mwanya wa karindwi aho kiyongereyeho amanota 28.

Bamwe mu batujwe muri uyu mudugudu urimo imiryango igera kuri 12, bavuga ko gutuzwa hamwe nk’abasigajwe nyuma n’amateka bituma badatera imbere, kuko usanga ntawe ubasha kugira undi inama cyangwa ngo abe yamubera urugera rwiza rwo kureberaho.

Ngo kubatuza hamwe bituma ntacyo bigezaho kuko ntawe ugira undi inama.

Uwimana Claude umwe muri aba basigajwe inyuma n’amateka nawe watujwe mu mudugudu wa Kabuga, Akagari ka Bubazi, avuga ko ahubwo usanga bituma bamwe bishyira hamwe mu gukora urugomo.

Agira ati “Iyo badutuje hamw egutya ubukene buriyongera, iyo turi hamwe barigomeka bamwe hakavamo nk’abajura bangiza imyaka y’abaturage, aho tugez etwese bakatwamagana.”

Banyumvire Aminadabu nawe ati “Numva ko umwe bamutuza hakuno undi hakurya wenda tukajya tujya gusurana, ingaruka biteza ni uko umwana abyiruka nabi yabona uko natwe tumeze ntazagire umuco nk’uw’abandi, ariko agiye mu bandi yabona uko bahinga, uko bakora nawe akabyigana.”

Uwimana Claude asanga bagatujwe bavanze n’abandi batari abasigajwe inyuma n’amateka.

Umuyobozi w’Akarere ka Karongi, Ndayisaba Francois, avuga ko nabo amaze kubona ko iyo aba baturage batujwe batandukanijwe bigira ingaruka nziza, bityo bakaba bari kureba uko icyo kibazo cyakemurwa.

Ati “Twarabibonye, cyane cyane mu Murenge wa Mubuga yemwe na Rwankuba aho twabikoze usanga baragiye bahinduka.”

Aba basigajwe inyuma n’amateka kugeza ubu usanga amazu bacumbitsemo yarasambuwe amwe n’ibikuta byarasenywe.

Abaturanyi babo bemeza ko ari ba nyiri gucumbikirwamo ubwabo bayisenyeye, aho bacumbikiwe hose bakaba bahasenya imwe mu mpamvu zo gusaba kubatuza batatanye.

Binyuze mu mishinga REMA yateyemo uturere mu mushinga Vicoria Environment Management Project (LVEMP), hazarebwa imbogamizi zituma kubungabunga iki cyogogo bidashirwa mu bikorwa.

Abashginzwe ubuhinzi mu Mirenge ndetse n’abafatanyabikorwa biyemeje kubahiriza inshingano zabo muri iki gikorwa.

Umunyamabanga Nshingwabikorwa w’Akarere ka Karongi, Muhire Emmanuel avuga ko kugira ngo uyu mushinga ubashe kugenda neza buri wese asabwa kumva ko umureba.

Agira ati “Harimo abantu imirimo batayigira iyabo, ariko twafashe ingamba y’uko buri wese cyane cyane abagoronome bagiye gufata ibintu nka ba nyirabyo.”

N’ubwo ariko muri rusange byinshi mu bikorwa bigamije gushyira uyu mushinga mu bikorwa bigenda neza hari n’imbogamizi zigaragara, nk’uko bivugwa n’ushinzwe ubuhinzi mu Murenge wa Murundi Nshimiyimana Jean Bernard umwe mu Mirenge ikorerwamo n’uyu mushinga.

Muhire Emmanuel, Gitifu w’Akarere ka Karongi arasaba ababifite mu nshingano bose gukora ibishoboka iyi migezi ikabungabungwa.

Ati “Dukomeje guhura n’imbogamizi zirimo imyumvire y’abaturage ikiri hasi, akenshi ugasanga bajya kwangiza bya bikorwa bigamije kubungabunga ibidukikije, akaduca mu rihumye akajya gutema urubingo rutari rwanazamuka, imirwanyasuri akaba yayangiza, ndetse n’abajya gucukura amabuye mu migezi.”

Muri iyinama abayitabiriye biyemeje kujya bahana amakuru buri cyumweru kugira ngo ibitagenda neza bikosoke.

Kugeza ubu uyu mushinga mu Karere ka Karongi ukorera mu Mirenge itanu ariyo, Murambi, Murundi, Ruganda, Gashari na Mutuntu.

Ibi bikubiye mu itegeko ngenga No 04-2005 ryo kuwa 4 Kanama 2005 rigena uburyo bwo kurengera, kubungabunga no guteza imbere ibidukikije mu Rwanda, mu rwego kandi rwo kubungabunga icyogogo cy’uruzi rwa Nyabarongo n’imisozi irukikije mu Karere ka Karongi.

Ubuyobozi bw’ ikigo cy’igihugu gishinzwe guteza imbere amakoperative (RCA), bugaragaza ko n’ubwo hari intambwe imaze guterwa mu mikorere y’amakoperative, hakiri ibigomba gukorwa mu bijyanye no guhugura no kongerera ubushobozi abagize aya makoperative.

Abahagarariye amakoperative bavuga ko icyuho ku bayobozi bakora nabi gifashwa n’ubumenyi buke ku banyamuryango.

Jackson Kwikiriza, ushinzwe inyigisho n’amahugurwa ku makoperative muri RCA, avuga ko ariyo mpamvu bateguye amahugurwa ku makoperative bigaragara ko akiri kwiyubaka mu turere dutandukanye turimo n’aka Karongi.

Kwikiriza kandi avuga ko ubumenyi buke bw’abanyamuryango mu mategeko biri mu bishobora gutuma bamwe mu bayobozi b’amakoperative bagerageza kwiharira ubuyobozi.

Avuga ko hari aho usanga bayobora imyaka ya manda irenze igenwa n’itegeko, cyangwa bagashakisha izindi mpamvu zituma amatora atinda bagahama mu nzibacyuho.

Agira ati “Inama naha abanyamuryango bose muri rusange ni uko umunyamuryango angana n’undi muri koperative, afite uburenganzira bwo gutora, gutorwa kandi akayobora, abayobozi bakamenya ko niba igihe kigeze batanga umwanya ku bandi nta kindi kibazo kivutsemo.”

Igirabose Collete umuyobozi w’inama njyenzuzi muri koperative Abakundumurimo ikora umutobe wa Marakuja avuga ko uretse ubumenyi butandukanye yungutse, aya mahugurwa yatumye abasha kumemnya n’uko mu yandi makoperative byifashe.

Ati “Nungutse byinshi cyane mu bijyanye n’amategeko, kandi buriya nanamenye uko ahandi byifashe kuko hano twumvisemo abayobozi bakiri mu nzibacyuho kandi manda zabo zararangiye.”

Ntihemuka Thomas uyobora koperative Rimba Rubengera ikora ubudozi bw’imyenda we ati “Iyo abanyamuryango bose bamenye amategeko koko, buri wese akumva ko afite uburenganzira bungana n’ubwa mugenzi we, byose bigenda neza kandi nta handi byava ni mu mahugurwa nk’aya.”

Itegeko rigenga amakoperative rigena manda y’imyaka itatu ku buyobozi bwa koperative, ikaba ishobora kongererwa umuntu inshuro imwe gusa.

Aya mahugurwa yatangiye kuri uyu wa Kabiri mu Karere ka Karongi agomba gusozwa ku munsi w’ejo kuwa gatatu, akaba yitabiriwe n’abahagarariye amakoperative basaga 80.

Uyu mukecuru uvuga ko afite imyaka 80, abana n’umwuzukuru we n’abuzukuruza babiri mu nzu ishaje yasataguritse ndetse yahengamye ubona ishaka kugwa, akavuga ko iyo imvura iguye bamwe bitwikira amashashi, abandi bakitwikira ihema (Shiting), abandi nabo amakoma.

Kambonwa abana n’umuzukuru we n’abazukuruza 2 muri iyi nzu yamaze guhengama iranasatagurika

Kambonwa ati:” Inzu yanguyeho kandi ndashonje, nsa n’aho mba muri nyakatsi, kubona icyo kurya nkibona mu gihe umukobwa bwanjye wabonye ikiraka. Nifuza ko bampa icyo kurya n’aho kuba kandi ikibazo cyanjye nta muyobozi utakizi.”

Uwineza, umwuzukuru we babana muri iyi nzu wanahabyariye ati:”Ikibazo cy’inzu nta muyobozi utakizi, barabizi ko nta nzu tugira, uwari Meya yatwemereye inzu, ababikira bakibyumva muri 2013 batubumbira amatafari ariko abura uyubaka apfa ubusa.”

Uzabakiriho Melanie umuturanyi wa Kambonwa avuga ko yaba uyu Kambonwa, umwuzukuru we n’abuzukuruza be babayeho nabi bakaba batunzwe no gusabiriza, gusa akagaya uwitwa Uwineza ukomeje kubyara kandi nta bushobozi afite.

Ati:” Kambonwa abayeho nabi, uretse ko ubona n’uriya mwuzukuru we akomeje kubyara kandi nta kuntu ameze.”

Babumbiwe amatafari muri 2013 bagiye kubakirwa ariko n’ubu yamaze kwangirika

Karasanyi Nicolas, Umunyamabanga Nshingwabikorwa w’Umurenge wa Gashari avuga ko inzu y’uyu muturage yakagombye kuba yaruzuye uretse ikibazo cy’ibiti cyari cyajemo.

Ati:”Inzu ye yakagombye kuba yaruzuye kuko amabati arahari, amatafari nayo arahari, ikibazo cyari ibiti by’igisenge nta gihe gishira bidakozwe.”

Kambonwa avuga ko ikibazo cye kimaze imyaka igera kuri 4 kizwi n’ubuyobozi, ndetse abayobozi batandukanye bakaba baragiye bagera iwe bakirebera uko abayeho ndetse bagasiga bamwijeje ubufasha, ariko na n’ubu ntawe uragira icyo amumarira.

Iyo ugeze mu Mudugudu wa Kabuga, Akagari ka Bubazi, Umurenge wa Rubengera, ugera ku nzu zegeranye bigaragara ko zari zikomeye, ariko kugeza ubu hafi ya zose zitagifite amabati, ibice bikiriho amabati na byo byarashwanyutse kubera umwotsi kuko bazitekamo, izindi na zo ibikuta bimwe byaraguye, zituyemo imiryango igera kuri 12 y’abasigajwe inyuma n’amateka.

Inyinshi mu mazu bacumbikiwemo nta mabati akizarangwaho.

Izi nzu bazicumbikiwemo nyuma y’uko izo bari barubakiwe n’ubuyobozi na zo zisenyutse aho bavuga ko zasenywe n’umuyaga, ariko abaturanyi babo bakavuga ko ari bo bazisenyeye.

Ku ruhande rwabo, aba basigajwe inyuma n’amateka bakubwira ko bacumbikiwe mu nzu zisanzwe zisenyutse bakaba bakeneye kubakirwa aho bari basanzwe batuye mbere.

Nyiraruzinduko Donathile, umwe mu basigajwe inyuma n’amateka utuye muri Kabuga, ati “Inzu yanjye ya mbere yaraguye abayobozi batuzana hano, ariko naho dufite ibibazo, urabona ko byatangiye kugwa, iyo imvura iguye tubura aho tujya tukanyagirwa.”

Banyumvire Aminadabu, uhagarariye imiryango y’abasigajwe inyuma n’amateka muri ako Kagari, ati “N’iri cumbi ntirimeze neza, kandi ntidushimishijwe no kubaho ducumbkiwe, ahubwo bongere batwubakire aho twari dutuye.”

Habinshuti Edouard, umwe mu baturanyi, ati “Abasigajwe inyuma n’amateka ni bo ubwabo bagiye bisenyera, iza mbere bubakiwe barazisenye na ziriya bari bacumbikiwemo barazisenya.”

Kuba abo basagajwe inyuma n’amateka baba bagira uruhare mu kwisenyera binemezwa n’Ubuyobozi bw’Akarere ka Karongi aho bwemeza ko ubu ingufu zigomba gushyirwa mu guhindura imyumvire yabo.

Ndayisaba Francois, Umuyobozi w’Akarere ka Karongi, ati “Birasaba gushyira ingufu mu kuzamura imyumvire, kuko hari abagiye bisenyera, hari abo duha inka, amata yose bakayagurisha, abarwara ntibajye kwivuza, kandi hari abamaze guhinduka.”

Kwangiza ibikorwa bigamije guhindura ubuzima bwabo ku basigajwe inyuma n’amateka batuye muri ako karere si ku mazu gusa bigaragarira, kuko usanga bamwe n’inzitiramibu bahawe aho kuziryamamo bazisasira, abahawe amatungo cyangwa se n’ibindi bikoresho bakabigurisha.

Aba bacuruzi bavuga ko ubusanzwe mu minsi ibanziriza iminsi mikuru isoza umwaka ya noheli n’ubunani wasangaga bafite abakiriya benshi bakabasha kwinjiza amafaranga menshi, bigaca amarenga ku bushyuhe bw’iyi minsi mikuru nyir’izina.

Nshimiyayinkamiye, umucuruzi wa butike mu isantere ya Kabuga mu Murenge wa Rubengera avuga ko nta bushyuhe mu bakiriya bahahira iwe ari kubona.

Nshimiyayinkamiye Michelinne, umucuruzi wa butike y’ubuconsho mu isantere ya Kabuga mu Murenge wa Rubengera avuga ko kugeza ubu nta bushyuhe mu bakiriya bahahira iwe ari kubona.

Agira ati “Ubundi noheli itwibutsa ivuka rya Yezu, ariko mu buzima busanzwe ibijyanye no gucuruza byarahindutse, niba ari ubukungu bumeze nabi simbizi ariko ntago amafaranga akiboneka. Umuntu yatgereza akazareba ko kuri iriya minsi wenda ibintu bizahinduka.”

Nyirahabukwiha Dancille, umucuruzi w’ ikigage yunga mu rya mugenzi we akavuga ko uyu mwaka bigaragara ko iminsi ibanziriza imikuru idashyushye nk’uko byari bisanzwe.

Ku ruhande rw’ubuyobozi bw’Akarere ka Karongi, Hakizimana Sebastien, umuyobozi w’Akarere wungirije ushinzwe ubukungu we avuga kobidakwiye ko abantu bahugira mu kwishimira kwizihiza iminsi mikuru, bikbavamo intandaro yo gusesagura.

Ati “Mu karere kacu iminsi mikuru barayitabira, ariko ababona ko bitanashyushye bagomba kwibuka ko ntago umunsi muukuru ari ugutanga amafaranga no kuyapfusha ubusa, ahubwo tugomba no kuzirikana ku buryo bwo kuyazigama, bagateganya ko ejobundi abana bazasubira ku ishuri n’ibindi.”

Umuco wo kudasesagura bikunze kuboneka mu minsi mikuru, na Leta igasaba Abanyarwanda kuwukangukira kuko usanga biteza ubukene mu banyagihugu mu minsi ikurikiyeho, bityo buri wese akaba asabwa kwirinda guhugira mu kwishimisha muri iriya minsi akiyibagiza ko n’ejo azakenera kubaho no gutera imbere.

Aba baturage barimo abubatse ibyumba by’amashuri, abubatse amacumbi y’abarimu ndetse n’abubatse ubwiherero ku mashuri bakaba bamaze imyaka igera kuri ine bishyuza Umurenge ariko na n’ubu ntacyo barabona.

Amwe mu macumbi y’abarimu yubatswe ariko abayakozeho bakaba batarishyurwa

Munyampundu J.M.V umuturage wo mu murenge wa Gashari akaba umwe mu bubatse ubwiherero ku mashuri ya Muramba avuga ko amaze imyaka ine yishyuza amafaranga yakoreye.

Ati:” Twubakaga ubwiherero bw’abanyeshuri, ariko mu myaka ine yose nishyuza ntacyo ndabona. Amafaranga umuntu aba yakoreye ayabarira iyo atayabonye bihungabanya ibintu byinshi muri gahunda ze, ku buryo byaduteje ubukene.”

Ibi abihurizaho n’abandi barimo Musabyimana Emmanuel uvuga ko hamwe na bagenzi be bakoze imirimo yo kubaka amashuri kugeza yuzuye, bakizezwa kuzahembwa ariko na n’ubu bakaba ntacyo barabona.

Karasanyi Nicolas, Umunyamabanga Nshingwabikorwa w’Umurenge wa Gashari avuga ko ibi bibazo byo kubura ubushobozi bwishyura abakoze imirimo byagiye biterwa no gutangiza imirimo abantu batabanje kubyigaho neza.

Ati:” Mu myaka yashize hagiye habaho icyo nakwita nko kwigerezaho, abantu bagakoresha abaturage barebye cyane ku kwihutisha igikorwa ariko izindi ngaruka ntibazirebeho.”

Nyuma yo kubaka bakahuzuza bamaze imyaka igera kuri ine bishyuza

Karasanyi avuga ko bitewe n’uko ikibazo kirenze ubushobozi bw’Umurenge, ubu bari gukora ubuvugizi ku karere kugira ngo iki kibazo kibe cyakemuka.

Iki kibazo cy’abaturage bakoze imirimo mu kubaka ibyumba by’amashuri mu Mirenge itandukanye y’Akarere ka Karongi ariko ntibishyurwe kiri mu byo inama Njyanama yasabye ubuyobozi bw’Akarere gukemura byihuse, ariko na n’ubu kikaba kitarabasha kubonerwa igisubizo.

Uretse kandi muri aka karere ka Karongi, iki kibazo kikaba gikunze kumvikana no mu tundi turere dutandukanye tw’igihugu, aho abantu bakoreshwa bizezwa guhembwa ariko mu by’ukuri nta mafaranga ahari yo kuzabahemba.

Umushinga USAID-EJOHEZA, ni umushinga ukomatanyije, aho wibanda ku bice bine by’ingenzi ari byo; guteza imbere ubuhinzi n’ubworozi, gukangurira abantu kubitsa no kuzigama biciye mu matsinda, kwigisha abantu bakuze kwandika no kubara no guteza imbere imirire n’isuku.

Abagenerwabikorwa ba USAID-EJOHEZA bamaze gutera imbere aho boroye ndetse bakanoroza

Mu rwego rwo kugaragaza ibyo uyu mushinga umaze kugeraho mu gihe cy’imyaka itatu umaze ukorera mu karere ka Karongi, bagaragaje ko kuva batangira gukorana n’uyu mushinga ubuzima bwabo bwahindutseho byinshi.

Mugabo Jean wo mu murenge wa Mubuga avuga ko yatangiranye n’uyu mushinga ageze ku rwego rubi aho umwana we yari mu muhondo.

Ati: "Natangiye gukorana na EJOHEZA mfite ubuzima bubi, nari mfite umwana ufite ikibazo cy’imirire mibi aho yari mu ibara ry’umuhondo, ariko ntibyatinze kuko nyuma yo kutwigisha gutegura indyo yuzuye no gukora akarima k’igikoni, wa mwana uko bamushyira ku biro ngasanga ariyongera umunsi ku wundi".

Ndayiragije Ismael uri mu itsinda Abadahemuka we ati: Ubu nize ibintu byinshi by’imyuga mbikesha EJOHEZA, ntangira gukorana na SACCO none ubu mfite Atelier irimo ibintu bifite agaciro ka Miliyoni zirenga enye.”

Jyambere Laurien ukuriye ishami rya Tekiniki mu mushinga USAID-EJOHEZA avuga ko nabo ubwabo batiyumvishaga ko uyu mushinga uzagera ku bikorwa nk’ibyo bari kubona.

Jyambere Laurien ukuriye ishami rya Tekiniki mu mushinga USAID-EJOHEZA asanga harabayeho impinduka nyinshi kubera uyu mushinga

Ati:” Impinduka zabayeho ni nyinshi, urebye nko kwizigamira aho bigeze mu matsinda y’abagenerwabikorwa bacu, nanjye baravuga imibare bikantangaza, kandi bagiye bizigamira bafite intego bashaka kugeraho, niba bagamije kubanza kwishyura Mituweli, guhindura imirire cyangwa se ibindi bakabikora. “

Umushinga USAID-EJOHEZA ukorera mu turere umunani mu Rwanda kuva muri 2012, turimo 3 two mu ntara y’Iburengerazuba aritwo Karongi, Rutsiro na Ngororero, mu kuduhitamo ukaba wararebaga udukennye kurusha utundi aho aka Karongi kari ku mwanya wa 25.

Ni nyuma y’uko hashize umwaka inama y’umushyikirano iheruka ibaye, aho yari yafatiwemo imyanzuro 20, aba baturage bakaba bavuga ko muri rusange hari iyashyizwe mu bikorwa uko byagombaga, ariko hakaba hari n’indi babona itaratunganye ndetse hakaba hari n’ibyo babona byagashyizwe mu myanzuro y’inama y’umushyikirano watangiye kuri uyu wa mbere.

Barifuza ko umushyikirano wakwiga ku kibazo cy’imyishyurire ya ba rwiyemezamirimo

Imwe mu myanzuro abaturage bagaragaza ko yagezweho hakaba harimo ujyanye no kurinda no gusigasira ibyagezweho, ndetse kwitabira kubitsa ku mabanki n’ibigo by’imari.

Maniraguha Simeon ni umwe mu baganiriye na Kigalitoday, ati:”Buriya ikintu njya nemera ko kiyemejwe kandi kikagerwaho ni ikijyanye n’umutekano, kurinda ibyagezweho mbiha amanita 100%.”

Mugenzi we Mukamana Liberee ati:” Njye ikijyanye no kubitsa mu mabanki ndakemera cyane, iyo ubona n’umuturage utagiraga konti iyo akoze ikiraka bamusaba kubanza kuyifungura kugira ngo ayihemberweho! Nemeza ko hafi buri munyarwanda asigaye abitsa muri banki.”

Aba baturage kandi bavugga ko imyanzuro ijyanye no kugaburira abana biga ku manwa mu burezi bw’ibanze bw’imyaka 9 na 12 ndetse n’uwo kurwanya amakimbirane mu miryango igisaba ingufu nyinshi ngo ibashe kugerwaho.

Rurangwa Mathias ati:”Ikibazo cyo kugaburira abana nta kigeze gikorwaho rwose kuko ahenshi byarananiranye, hongere harebwe ingamba nyazo zakwifashishwa.”

Kubwa bamwe barimo Karangwa Philbert ngo ikibazo cy’imyishyurire ya ba Rwiyemezamirimo cyagafashwe nk’umwanzuro ukwawo mu mushyikirano utangira uyu munsi.

Ati:”Mu bintu byose bigaho muri uyu mushyikirano, hanarebwe uburyo ikibazo cya ba rwiyemezamirimo bambura abantu cyakwigwaho hagafatwa ingamba zihamye kuko gikomeje kukenesha abaturage, kandi tubona gituma iterambere rigenda gake.”

Ikibazo cya ba Rwiyemezamirimo bakunze gutinda kwishyura cyangwa bakambura abaturage baba bakoresheje kiri mu bikunze kumvikana mu Turere dutandukanye tw’igihugu. Inama y’umushyikirano ku nshuro ya 13 iratangira kuri uyu wa 21 ikazarangira kuwa 23 Ukuboza.

Agakingirizo ka kigore ni kamwe mu dukingirizo dukoreshwa mu Rwanda, aho kambarwa n’umugore ugiye gukora imibonano mpuzabitsina ikingiye, ariko hari abakigaragaza ko bamenyereye ko agakingirizo kambarwa n’umugabo gusa.

N’ubwo hasanzwe habaho ibikorwa bitandukanye byo gukangurira abaturage gukoresha udukingirizo, abaturage ntibarabyumva neza (Foto internet)

Abandi bavuga ko bitewe n’imiterere yako n’imiterere y’igitsina gore imikoreshereze yako itapfa kwizerwa, hakaba n’abavuga ko uretse kukumva, batarakabona.

Munyarugerero Aimable ni umuturage utuye mu Murenge wa Gitesi, avuga ko uretse no kuba agakingirizo ka kigore asanga atakizera neza, binasaba ko umugore kuba yakwemera kukambara aba ari umuntu ujijutse.

Agira ati “Urebye imiterere yako, nawe wagira amakenga kuko ntikaba gafashe cyane nk’utwo abagabo bambara, kandi erega buriya n’imiterere y’abagore ibasaba kugira isoni, ubwo rero kuba umugore yakwiyemeza kukwereka ko yemeye kukambara byamusaba ubundi bucakura, urebye ni ak’abagore bize.”

Mvukiyehe Dominique, umuyobozi w’ikigo nderabuzima cya Mugonero nawe asanga agakingirizo ka kigore katakwizerwa nk’ak’abagabo.

Agakingirizo k’abagore ni uku kaba kameze.

Ati “Ni ikibazo cy’imyumvire, ariko icyagaragaye ni uko agakingirizo kizewe ni ak’abagabo, no kuba nta bagore bagakoresha ngo usange batanga ubuhamya mu bandi, n’uko abadamu ubwabo bateye, abantu bizera ak’abagabo.”

Mugenzi we Sifa Kabano, uyobora ikigo nderabuzima cya Karora, we asanga kuba udukingirizo twa kigore tutabirwa gukoreshwa ari ikibazo cy’imyumvire y’abaturage ikiri hasi.

Mukabarisa Simbi Dative, umuyobozi w’Akarere ka Karongi wungirije ushinzwe imibereho myiza y’abaturage avuga ko uretse kuba ari uburenganzira bw’umuntu guhitamo uburyo yumva bumubereye, ukutitabira gukoresha aka gakingirizo byanaterwa n’imyumvire kuri ko ikiri hasi.

Minisiteri y’ubuzima mu Rwanda (MINISANTE) igaragaza ko udukingirizo twambarwa n’abagore dutinda cyane mu bubiko kuko usanga amavuriro atitabira kudutwara aho yitwarira gusa udukoreshwa n’abagabo.

Iki giti ubusanzwe gifatwa nk’ikimenyetso gikomeye cy’amateka ku batuye Umurenge wa Rubengera, aho izina “Imana y’abagore” cyahawe, bavuga ko ryaturutse ku kuba umugore wese wabaga kubyarira mu rugo byananiranye yarakigeraga munsi agahita abyara.

Iki giti nicyo gihatse amateka yo kubyara kw’abagore muri aka gace.

Abahaturiye bavuga ko batunguwe no kumva ko mu rwego rwo gukora umuhanda Karongi-Rutsiro-Rubavu, iki giti kiri mu bigomba kuvanwa mu nzira kugira ngo umuhanda uhasanzwe wongerwe.

Nzaramba Jean, umuturage mu Murenge wa Rubengera, we ngo asanga kugitema bishobora no kugira ingaruka ku bahatuye.

Agira ati “Bakakiretse kuko kibumbatiye amateka ku banyakarongi, urabona ko kiri ku nzira igana ku kigo nderabuzima, ariko n’iyo umugore kubyarira mu rugo byangaga, bagafata gahunda yo kumujyana kwa muganga ntiyarengaga hano atabyaye.”

Mugabo Martin we avuga ko bidakwiye ko basibanganya amateka yaranze igihugu, kikaba n’umurage w’ababyeyi.

Ati “Umubyeyi iyo yafatwaga n’inda, yarazaga akakigeraho hari umwobo uri mu mizi yacyo, yakwinjiramo, agahita abyara. Kandi hari n’abantu erega bajyaga baza kugisura hano.”

Ndayisaba Francois, umuyobozi w’Akarere ka Karongi, avuga ko umwanzuro wo gutema icyo giti wafashwe nyuma yo kureba akamaro umuhanda ufitiye abahatuye.

Ati “Ntitugomba gusibanganya amateka, ariko twarebye inyungu zizaturuka kuri uriya muhanda ufite dusanga ariwo ufite akamaro kurusha amateka ya kiriya giti.”

abaturage bakomeje gusaba ko habaho kwisubiraho kuri uyu mwanzuro, aho gutemwa kikaba cyagirwa kimwe mu bitandukanya ibice by’umuhanda, aho ibinyabiziga byajya bigica iburyo n’ibumoso mu kubisikana.

Icyemezo cyo gukuraho 50% by’urutoki rusanzwe ruhinze mu Karere ka Karongi rugasimbuzwa ubwoko bushya buzwi nka Fiya cyafashwe n’Inama Njyanama y’Akarere ka Karongi hagamijwe kongera umusaruro ukomoka ku rutoki.

Baguze insina bazi ko ari Fiya zikuze basanga ari Poyo.

Gusa hari abahinzi batandukanye bagaragaje ko bagiye bahangikwa na bamwe muri ba rwiyemezamirimo babahaga imbuto y’insina bababeshya ko ari Fiya, ariko nyuma bakazasanga ari ubundi bwoko kandi insina imwe bagendaga bayigura 300FRW.

Munyampundu Charles, umuturage wo mu Murenge wa Murambi ni umwe mu bemeza ko yahangitswe imbuto.

Ati « Nafashe imbuto z’insina nizeye ko ngiye kuzasarura ibitoki bya Fiya ariko insina zitangiye kuzana amakoma byonyine nahise ntangira kubona zitandukanye na Fiah itunzwe n’abandi, nyuma nsanga ni Poyo. »

Kuba hamwe imbuto yatanzwe itari Fiya, binemezwa n’Uwimana Berancille, umukozi w’Umurenge wa Murambi ushinzwe Ubuhinzi. Aho yemeza ko ibi byabaye ku bahinzi bagera kuri 50% by’abari bahawe imbuto mu Murenge we.

Ati «Insina zazanwaga na ba rwiyemezamirimo bazikuye mu Ntara y’Iburasirazuba, ariko kubera ko bazitangaga ari inguri, ntitwari kumenya ubwoko ako kanya uretse kwemera ibyo abazizanye bavuga, bigaragara iyo zamaze gukura. »

Umuyobozi bw’Akarere ka Karongi, Ndayisaba Francois, avuga ko bagiye gutangira gukurikirana ngo barebe aho amakosa yaturutse ababigizemo uruhare babibazwe.

Kugeza ubu ubwoko bw’insina za Fiya aho bwagiye buhingwa bwagaragaje ko butanga umusaruro utandukanye n’uturuka ku bundi bwoko busanzwe mu gihugu.

Akarere ka Karongi kakaba gafite ubuso buhinzeho urutoki bungana na hegitari 7400, aho uruhinze kuri hegitali 3700 rugomba gusimbuzwa imbuto ya Fiya.

Aka karere byagiye bigaragara ko kibasirwa n’ikiza cy’inkuba cyane, akaba ari muri urwo rwego kari mu two umuryango w’ubutabazi Croix Rouge-Rwanda wateguyemo gahunda y’ubukangurambaga mu rubyiruko hagamijwe gusobanura uburyo butandukanye bwakwifashishwa mu gukumira bimwe mu biza bikunze kuboneka muri utu turere.

Urubyiruko rurasabwa kuba aba mbere mu gukumira ibiza

Bizimana Paul ushinzwe urubyiruko n’abakorerabushake muri Croix Rouge Rwanda avuga ko bahereye ku rubyiruko kuko ari rwo mizero y’ejo hazaza.

Ati:”Urubyiruko nirwo Rwanda rw’ejo, kandi urebye usanga ari narwo akenshi rushobora gukora bimwe mu bikorwa byakurura ibiza, kandi ibi bintu nibabisobanukirwa bizabasha gukirwa mu bandi.”

Hagenimana Jean Claude umwe mu rubyiruko ukora akazi ko kunyonga igare mu Murenge wa Bwishyura avuga iyi gahunda ije yari ikenewe kuko hari byinshi bari kungukiramo batari bazi.

Ati:” Birashimishije cyane kuba urubyiruko twaratekerejweho ngo dusobanurirwe uburyo twakumira ibiza kuko aho tugenda hose biba bishobora kutugwirira.

Nsengiyumva Jean Baptiste, umuyobozi ushinzwe gukumira ibiza muri Minisiteri ishinzwe gucyura no gukumira ibiza mu Rwanda (MIDMAR) avuga ko ntaho inkuba ihuriye n’amarozi nk’uko bamwe bajya babivuga.

Nsengiyumva Jean Baptiste umuyobozi ushinzwe gukumira ibiza muri Minisiteri ishinzwe gucyura no gukumira ibiza muri MIDMAR yasabye abanyakarongi kutitiranya inkuba n’amarozi

Ati:”Inkuba si amarozi, dukunda kubyumva abantu babipfa cyangwa se banashwana, inkuba ni ikiza giterwa n’ubwoko bw’amashanyarazi aturuka mu bicu.”

Avuga kandi ko ntawabuza inkuba gukubita, ariko abantu bashobora kwirinda ko ikubita ry’inkuba riba ikiza birinda ibintu byose byayikurura.

Karongi ni kamwe mu turere twa mbere dukunze kwibasirwa n’inkuba, gusa kugeza ubu ikiza kiri ku mwanya wa mbere mu kwigaragaza cyane kikaba ari umuyaga n’ubwo wo udakunze gutwara ubuzima bw’abantu. Uretse Karongi, ubu bukangurambaga ku rubyiruko bukaba buri gukorerwa no mu turere twa Ngororero, Gakenke, Nyabihu na Rutsiro.

Muri gahunda yo gukomeza kwegereza abaturage ibikorwa by’ubuvuzi, Leta y’u Rwanda yiyemeje ko buri kagari kadafite Ikigo Nderabuzima kagomba kugira ivuriro riciriritse (poste de Santé), kugira ngo abaturage bakomeze kubona ubufasha mu by’ubuvuzi hafi y’aho batuye.

Umuyobozi Wungirije w’Akarere ka Karongi ushinzwe Imibereho Myiza y’Abaturage, Mukabarisa Simbi Dative, ashyikiriza umwe muri ba rwiyemezamirimo igitabo gikubiyemo amasezerano.

Mu Karere ka Karongi amavuriro aciriritse atanu akaba amaze kuzura no kubona ibikoresho by’ibanze.

Kuri uyu wa 14 Ukuboza 2015, ba rwiyemezamirimo batsindiye kuyacunga bakaba bagiranye amaserano n’ubuyobozi bw’akarere, sshyirwa mu maboko yabo kugira ngo abe ari bo bazajya bayabyaza umusaruro bakihembera abakozi ndetse bakanigurira ibindi bikenewe byose.

Ayo masezerano avuga ko akarere kagomba gutanga uruhare rugizwe n’inyubako , ibikoresho by’ibanze ndetse n’imiti y’ibanze ifite agaciro ka miliyoni imwe, uweguriwe ivuriro akishakira abakozi akeneye akanabihembera ndetse akaba yanagura ibindi bikoresho yumva byakenerwa.

Muri ayo masezerano y’umwaka umwe, akarere gasaba rwiyemezamirimo gutanga serivisi z’ubuvuzi ku bagana poste de sante bityo akaba ari we ufata amafaranga azinjira, gusa akarere kakagumya gukurikirana uko atanga serivisi.

Ifoto ya ba rwiyemezamirimo n’ubuyobozi nyuma yo guhabwa amasezerano yo gucunga postes de sante.

Hatangimana Jean Damascene, umwe mu bahawe gucunga aya mavuriro, avuga ko bazakora uko bashoboye bakabasha kubahriza ibiri mu masezerano basinyanye n’Akarere.

Ati "Natsindiye gucunga Poste de Santeé ya Nzaratsi mu Murenge wa Murundi, ubu icyo tugiye gukora na bagenzi banjye ni ugukoresha ingufu zose kugira ngo dutungunye ibyo dusabwa tumaze kwiyemeza tukanabisinyira."

Tuyisenge Marie Beatrice, na we watsindiye gucunga Ivuriro rya Mubuga ngo asanga iki gikorwa kizahindura byinshi ku buzima bw’abatuye Karongi.

Madame Mukabarisa Simbi Dative, Umuyobozi w’Akarere ka Karongi Wungirije ushinzwe Imibereho Myiza y’Abaturage, yasabye abatsindiye aya mavuriro guhita batangira guha serivisi abazikenye kuko babategereje igihe kinini.

Ati "Nubwo ikibazo cy’ingendo abajya kwivuza bakoraga kidakemutse ku buryo bwa burundu, twahereye aho gikomeye cyane kandi tuzakomeza no kugenda twubaka andi mavuriro, tukaba dusaba abasinye amasezerano ko guhera ejo bazaba bafunguye imiryango abaturage bagatangira kubagana."

Uresete aya mavuriro aciriritse atanu yamaze kwegurirwa abazayacunga ari yo Nzaratsi, Kabugita, Manje, Musasa n’irya Mubuga, hari andi na yo akiri kubakwa agomba kuzatangira gukorerwamo mu minsi iri imbere.

Munyemana Mathias wo mu murenge wa Nyange avuga ko hari ubwo abayobozi babatinza cyane mu bikorwa baba babatumiyemo, bigatuma hari abinubira uko gutakaza igihe bategereje abayobozi.

Bamwe ngo biyemeje kujya nabo batinda.

Agira ati “Twe twumvira gahunda z’ubuyobozi. Ariko hari ubwo bakabya kudutindira natwe bikatubabaza.”

Kuwa kane tariki 3 Ukuboza 2015, ubwo bizihizaga umunsi mpuzamahanga w’abafite ubumuga, bamwe mu baturage bitabiriye uwo munsi binubiye gutegereza umuyobozi ku rwego rw’akarere wari umushyitsi mukuru kuri uwo munsi.

Barigora Berenarudo, avuga ko yahageze saa mbili nk’uko bari babisabwe n’abayobozi, ariko bagatangazwa no kubona umushyitsi mukuru aje saa sita n’iminota 45.

Ati “Ndebera nawe twahageze saa mbili. Ntawahinze twaje kwitabira gahunda za leta. Ariko gutegereza igihe kingana gutya ni agasuzuguro rwose.”

Bategereje amasaha 4 n’iminota 30 batangira kwijujuta.

Ubwo bijujutaga, bavugaga ko hari abayobozi bafite ingeso yo gukererwa. Bavuga ko badatinyuka kubagaragariza uko kutishima kubera umuco batojwe wo kubaha abayobozi.

Gusa bavuga ko uku gutinda byatangiye kugira ingaruka, kuko hari abaturage batangiye kujya bongera byibura isaha ku gihe bahawe bitwaje ko abayobozi nabo bakererwa, nk’uko undi muturage yabitangaje.

Ati “Ubu natwe twafashe icyemezo ko igihe umuntu yifitiye akazi yaba agakora, akaza byibura nyuma y’isaha ku gihe bamubwiye. Jye niko mbigenza.”

Umuyobozi wungirije ushinzwe imibereho myiza y’abaturage mu karere, Nyiraneza Clotilde, avuga ko ubundi kubahiriza igihe ari indangagaciro z’abayobozi ariko hariho igihe haba impamvu.

Ati “Nko muri iyi minsi hari imirimo myinshi dukurikirana mu mirenge ituma rimwe na rimwe umuntu akererwa. Ariko ubwo hagaragaye amakosa tugomba kuyakosora tugakorana neza n’abaturage.”

Mu gihe mu Rwanda hari kwizihizwa icyumweru cyahariwe kurwanya ruswa, ubuyobozi bw’Intara y’Iburengerazuba buragaragaza ko hari ibimenyetso bikomeje kugaragara bya ruswa mu nzego z’ibanze cyane muri serivisi zihabwa abatishoboye.

Abayobozi mu Ntara y’Iburengerazuba barasabwa gushyira hamwe bakarwanya ruswa

Umunyamabanga Nshingwabikorwa w’iyi Ntara, Jabo Paul avuga ko bumwe mu bwoko bw’iyi ruswa ari itangwa muri gahunda ya Girinka.

Ati: “Murabizi ibibazo biri muri gahunda ya Girinka, ejo twari kumwe n’abavuzi b’amatungo, batubwira, ikintu cyantangaje, kugira ngo ubone inka ngo ugomba kuba witwaje ikiziriko, nti utazi kuboha ikiziriko wabigenza ute? Bati ashwi ni ukuba witwaje amafaranga, hamwe ni ibihumbi 20 ahandi ni 30.”

Bagaragarijwe ko ruswa yiganje muri serivisi ndetse n’izihabwa abatishoboye

Ku ruhande rwarwo, urwego rw’umuvunyi rwo ruvuga ko kugeza ubu aho u Rwanda ruhagaze mu kurwanya ruswa hashimishije, aho ruza ku mwanya wa 5 muri Afurika, ndetse rukaza ku isonga muri Afurika y’Iburasirazuba mu bihugu birimo ruswa nke, gusa rukavuga ko kugeza ubu aho yiganje ari muri serivisi.

Inzego z’umutekano zirasabwa gukaza ingamba ngo ruswa icike

Musangabatware Clement, Umuvunyi mukuru wungirije ushinzwe kurwanya ruswa n’ibindi byaha bisa nayo ati:” Urebye aho turi, turahishimiye, ariko dushaka gukomeza gutera imbere kurushaho, ahantu hakunze kugaragara ruswa cyane ni muri serivisi, abashaka ibyangombwa byo kubaka, abashaka inguzanyo mu mabanki, byagaragaye ko 51% batanga ruswa bagira ngo bihutishe serivisi.”

Umuvunyi mukuru wungirije ushinzwe kurwanya ruswa n’ibindi byaha bisa nayo Musangabatware Clement yibukije ko kurwanya ruswa ari uruhare rwa buri wese

Ikibazo cya Ruswa muri gahunda ya Girinka muri iyi Ntara by’umwihariko mu Karere ka Karongi kiri mu byagiye bigaragazwa n’abaturage mu cyumweru cy’imiyoborere myiza aho ubuyobozi bwabaga bwegereye abaturage hagamijwe kumva ibibazo bafite.

Icyumweru ngarukamwaka cyahariwe kurwanya ruswa cyatangiye kuwa 29 Ugushyingo, kikazasozwa ku munsi mpuzamahanga wahariwe kurwanya ruswa tariki ya 09 Ukuboza 2015.

Action Aid ikomeje gutegura ibikorwa bitandukanye bigamije gutangiza amashuri y’incuke mu mirenge itandukanye y’aka karere ukoreramo birimo guhugura abarezi n’ibijyanye n’inyubako zizarererwamo, hagamijwe kubungabunga muri rusange ubuzima bw’umwana kuva agicuka.

Kakibbi uhagarariye Action Aid muri Karongi, asanga amashuri y’inshuke azfasha abagore kubohoka bagakora.

Kakibibi Annet uhagarariye Action Aid muri Karongi, avuga ko gutekereza ku bana b’incuke atari ibintu byapfuye kuza gusa, ahubwo ari uko ari yo nkingi y’uburezi bw’igihugu muri rusange.

Agira ati “Gufasha umwana w’incuke ni ugufasha u Rwanda, ni ugufasha abayobozi b’ejo hazaza, kandi igiti kigororwa kikiri gitoya.

Twibanda ku burezi bw’abana b’incuke kugira ngo tubatoze bakiri bato, kandi mu burezi bw’incuke twigisha n’ababyeyi babo gutegura indyo yuzuye, kugira ngo umwana akure neza, ni uko akura mu gihagararo no mu mitekerereze, kandi bifasha ababyeyi, kuko asiga umwana akajya mu mirimo ye.”

Ukubohoka ku bagore mu gihe abana bajyanywe ku mashuri y’incuke binemezwa na Uyiringiye Jean Damascene, Umukozi ushinzwe uburezi mu Murenge wa Murundi ho mu Karere ka Karongi.

Ati “Byamaze kugaragara ko abagore hari imirimo bakora ku buryo kuyibangikanya no kurera abana bibabangamira.

Turizera ko mu gihe abadamu bazaba bacengeye iyi gahunda y’uburezi bw’incuke, bizababohora bagakora imirimo yabo neza, ariko ba bana nabo bagakura neza haba mu bwenge ndetse n’umubiri, bakazabasha kwiteza imbere muri rusange.”

Uburezi mu mashuri y’incuke ni gahunda yashyizweho na Leta hagamijwe kuzamura ireme ry’uburezi, aho buri mwana agomba gutangira amashuri abanza arangije imyaka itatu mu ishuri ry’incuke.

Gusa ikomeje guhura n’imbogamizi cyane izituruka ku myumvire y’ababyeyi hamwe na hamwe cyane cyane mu duce tw’ibyaro.