Abana bashinja ababyeyi kubabwira nabi aho kubasobanurira ibijyanye n’ihohoterwa ribakorerwa

Abana bahagarariye abandi mu Mujyi wa Kigali basaba ababyeyi kubaganiriza ku myitwarire yabo, mu buryo bw’inshuri no kumva amakuru bafite bahabwa n’abandi ku buzima bw’imyororokere.

Iribagiza Umulisa Clarisse, umwe mu bahagarariye abana mu nama y’igihugu y’abana mu Mujyi wa Kigali, avuga ko nubwo ababyeyi bakangurirwa kuganiriza abana babo hakwiye no kongerwamo ubutumwa bubasaba kubaganiriza mu buryo bw’inshuti kuko ibidakoze bityo nta musaruro bitanga.

Agira ati “Ababyeyi barabikangurirwa kutuganiriza ku buzima bw’imyororokere ariko hakaba ababikora bacyaha abana, babaha amabwiriza y’imyitwarire cyangwa babakankamira. Icyo kiganiro ntago gihindura umwana.”

Avuga ko ikiganiro gikenewe ari icyo umubyeyi aganira n’umwana nk’inshuti, akamuha umwanya akamwumva.

Ati “Ni byo bizatuma anamenya ya makuru atari yo ahabwa n’abandi bashaka kumushuka maze abashe kumuha ay’ukuri umwana ayemere kuko aba amwiyumvamo yiyumva no mu kiganiro.”

Bamwe mu babyeyi bo ntibumva kimwe ubu butumwa bw’abana babo, kuko bavuga ko mu kuganiriza abana w’umukobwa ku buzima bw’imyororokere n’uburyo yakwitwara, bisaba igitsure kuko aribyo bimwereka ko ibyo ugiye kumubwira bikomeye.

Gusa nabo bemera ko umwana agukundiye akumva utarageza aho ushyiraho igitsure ari byo byatanga umusaruro.

Uwitwa Mukandekezi utuye mu Karere ka Nyarugenge, ntakozwa ibyo gukanga umwana kugira ngo amugorore.

Ati “Nonese akunaniye ntiwashyiraho itegeko? Umuganiriza neza yakwanga ugashyiraho itegeko. Aramutse abyemeye umubwira neza nibyo byaba byiza cyane. Ariko igitsure kirakenewe.”

Murwanashyaka Evariste umuyobozi ushinzwe ishami ryo kurengera umwana no kurwanya ihohoterwa rimukorerwa mu muryango uharanira uburenganzira bwa muntu (CRADO), avuga ko kutaganiriza abana bibakururira ibibazo bikomeye.

Ati “Impamvu nyamukuru twabonye itera gutwara inda ku bana harimo irari ry’abana batanyurwa n’ibyo ababyeyi babo bafite kubera ko ababyeyi batabaganiriza ngo bamenye ingaruka zo kutanyurwa nizo kutitwara neza.”

Ubushakashatsi bwakozwe na CRADO bwagaragaje ko Akarere ka Kicukiro kazaga ku wanya wa kabiri mu kugira abana benshi batwaye inda, habarurwa abagera ku 115 mu 2017.

Feu Rouge zigiye gushyirwa mu mujyi wa Kigali zizagabanya "embouteillage"

Ubuyobozi bw’Umujyi wa Kigali butangaza ko ayo matara ayobora imodoka abantu bakunze kwita “Feu Rouge”, akoresha ikoranabuhanga, azabasha kuyobora neza imodoka kuko ahari kuri ubu adafite iryo koranabuhanga.

Umubyigano w’imodoka mu mihanda ya Kigali ukunze kugaragara mu masaha ya mu gitondo na nimugoroba ubwo abantu batandukanye baba bajya cyangwa bava mu kazi.

“Feu Rouge” ziriho ubu nta bushobozi zifite bwo kuyobora imodoka uko byifuzwa. Hari igihe biba ngombwa ko zizinywa hakifashishwa Abapolisi.

Rangira Bruno, umuvugizi w’umugi wa Kigali avuga ko izo “Feu Rouge” zikoresha ikoranabuhanga bagiye kuzana zifite ubushobozi bwo kumenya icyerekezo kirimo imodoka nyinshi akaba ariho ziha burenganzira.

Agira ati “Kimwe mubyo dutegura gukora ni ugukoresha ikoranabuhanga mu kugenzura ibinyabiziga mu muhanda (Intelligent traffic management) aho ‘Feu Rouge’ zizajya zibasha kureba icyerekezo gifite imodoka nyinshi abe arizo zihabwa uburenganzira bwo gukomeza.”

Akomeza uvuga ko zimwe muri “Feu Rouge” zitagikora zigiye kuvugururwa ndetse ngo hari byinshi biri gukorwa kugira ngo ikibazo cy’umubyigano w’imodoka gikemuke birimo kwagura imihanda no guhanga indi mishya.

Hifashishwa Abapolisi kugira ngo bagabanye umubyigano w’imodoka mu muhanda

Ntagerura Jean Paul, umwe mu bashoferi bo mu mujyi wa Kigali avuga ko hari ubwo “Feu Rouge” zifunga ibinyabiziga, zigatanga uburenganzira ku muhanda utarimo ikinyabiziga.

Agira ati “Wasangaga hari ubwo zifunze ibinyabiziga mu muhanda zigatanga uburenganzira ku muhanda utarimo ikinyabiziga bigatinza abagenzi ariko kuba izizashyirwamo zizaba zifite ubushobozi bwo kumenya ahari imodoka nyinshi bizafasha cyane.”

Uyu muhanda Cyagasenyi-Gasarabwayi-Nganda w’igitaka ureshya na kilometero 35 wangirikaga mu gihe cy’imvura ugiye gukorwa

Aya mafaranga azatangwa ku bufatanye n’umushinga Nelsap mu gukemura ikibazo cy’uyu muhanda wahagarikaga ubuhahirane hagati y’imirenge unyuramo ya KIgarama na Musaza.

Abatuye imirenge ya Kigarama na Musaza inyuramo uyu muhanda bavuga ko igihe cy’imvura uyu muhanda utaba nyabagendwa nta modoka, moto amagare n’ibindi byongera kuwugendamo kubera isayo nyinshi izamo maze bikabangamira ubuhahirane no kugurisha umusaruro wabo.

Kayitare Alexis agira ati “Uyu muhanda wacu migihe cy’imvura hacika icyondo cyane kuburyo yaba igari, moto cyangwa imodoka ntibibasha kugenda. Urabona ko natwe ubu twambaye ibirenge kubera icyondo. Iyo umurwayi arembye ahera mu rugo. Umusaruro wacu ukaduhombera.”

Uretse kuba mu gihe cy’imvura uyu muhanda utaba nyabagendwa maze bigateza igihombo abahatuye, kuko batabasha kugurisha imyaka yabo cyangwa ngo bahahirane na bagenzi babo, ubuzima bw’abahatuye buba buri mu bibazo cyane cyane iyo hagize urwara kuko kumugeza kwa muganga bigorana.

Karinganire agira ati “Mu gihe cy’imvura abarwayi barembera imuhira kuko ntibiba byoroshye kubageza kwa muganga.Turasaba ubuyobozi gukemura iki kibazo cy’uyu muhanda kuko urabangamye cyane.”

Ubuyobozi bw’Umurenge wa Kigarama ahavugwa iki kibazo nabwo bwemeza ko ikibazo cy’uyu muhanda cyagiye kidindiza iterambere ry’abahatuye,gusa ubuyobozi bw’uyu murenge butanga ikizere ko noneho uyu muhanda ugiye gukorwa.

Rwabuhihi Pascal umunyamabanga nshingwabikorwa w’uyu murenge agira ati ”Hari ubwo wasangaga umusaruro w’aba baturage ugura make kubera ikibazo cy’umuhanda imodoka ziza kuwupakira ziganyira izindi zikabyanga n’iyigiyeyo igahenda abaturage igaragaza ko umuhanda ari mubi.Ubu tuvugana batangiye gupima aho uzanyura mu minsi mike uraba ukozwe.”

Ubuyobozi bw’akarere ka Kirehe buvuga ko uyu muhanda uteganijwe gukorwa muri uyu mwaka w’ingengo y’imari,kubufatanye n’umushinga wa Nelsap. Kubaka uyu muhanda bikazatwara miliyari 1,7Frw.

Utwuma twa ’Yego Moto’ turacyateza ibibazo mu gihe cyo kwishyura

Bemeza ko ukurikije amafaranga bishyuraga abamotari ku ngendo iyo ukoresheje imashini usanga ikwishyuza menshi, ku buryo nta wukibarisha iyo mashini ahubwo bumvikana na motari.

Ibibazo biri muri izi mashini abagenzi bavuga ko iyo ajya kure yishyuza menshi aruta ayo asanzwe ahagendera bumvikanye n’umumotari.

Umugenzi wicaye kuri moto igatsimbura mashine itangira kubara 300Frw kugera ku birometero bibiri bibanza, byarenga amafaranga akagenda yiyongera uko ibirometero byiyongera.

Sibomana Jackson utuye mu mujya wa Kigali, avuga ko imikorere yiyi mashini inogejwe ikishyuza neza byafasha cyane kuko abagenzi bajya barengana bishyuzwa menshi cyane nijoro.

Agira ati “Abagenzi twari twarabirenganiyemo. Ujya gutega nijoro abamotari bagakuba kabiri ibiciro nk’aho urugendo rwiyongereye.

“Iyi mashini yadufasha cyane. Gusa turasaba ko ibiciro by’aka kamashini byanozwa, ku buryo binogera buri wese, umugenzi n’umumotari, hakurikijwe uko ahantu hari hasanzwe hagenderwa.”

Si abagenzi bavuga ko izi mashini ibiciro byazo bibahenda kuko n’abamotari ubwabo bavuga ko iyi mashini uyikoresheje imuhenda.

Nyandwi Evaliste umwe mu bamotari bakorera muri Kigali, avuga ko izi mashini iyo bazikoresheje ku mugenzi ujya hafi bahomba, kandi ko ubona izi mashini zitagikoreshwa nubwo ziba ziri ku mamoto.

Ati “Iyo umugenzi ajya hafi tubihomberamo ugasanga aho twagenderaga nka 600Frw imashini igaragaza 400Frw. Abagenzi bajya kure nabo ntago bakunda ko dukoresha izi mashini mu kwishyura,bavuga ko zihenda tukumvikana bisanzwe.”

Gatete Prudence ushinzwe tekiniki muri Yego Innovetion Ltd, amara impungenge abagenzi n’abamotari, avuga ko ibiri gukorwa ubu ari igerageza ko nyuma y’amezi atandatu ikigo cy’igihugu gishinzwe Imirmo ifitiye igihugu akamaro (RURA) kizashyiraho ibiciro bitagira uwo bibangamira hakanakosorwa ibitaragenze neza.

Ati “Iri ni igerageza abagenzi ntibagire ikibazo cy’izi mashini,uwashaka yayikoresha utabishaka nawe ni uburenganzira bwe.twe dusaba abamotari guhora bacanye iyo mashini.Nyuma yigerageza RURA izahera kubyavuye mu igerageza ishyireho ibiciro byiza.”

Ubuyobozi bwa Yego innovation ltd, buvuga ko bwahoye agera kuri miliyari 14Frw muri iri koranabuhanga. Buvuga ko buteganya kuzana ikoranabuhanga ryo kwishyura na Mobile money.

Iyi karita ituma umugenzi yishyura itike mu buryo bw’ikoranabuhanga atarinze gutanga amafaranga mu ntoki

AC Group, ikigo cyo mu Rwanda gifite ikoranabuhanga ryifashishwa mu kwishyura amafaranga y’urugendo hakoreshejwe ikarita izwi nka "Tap&Go" gitangaza ko ubwo buryo bugiye kujyaho nyuma y’ubusabe bwa benshi mu bakora ingendo mu ntara.

Umunyana Shalon, ushinzwe kumenyekanisha ibikorwa n’ubucuruzi muri AC group agira ati "Ni icyifuzo cyatanzwe n’abagenzi kubera ko iyo bazaga i Kigali babonaga uburyo ikoranabuhanga ryihutisha kwishyura. Babidusabye kenshi."

Bamwe mu bagenzi bagana mu ntara usanga binubira umwanya batakaza bajya kugura amatike ku buryo hari n’aho usanga imodoka zihagarara mu nzira kugira ngo bagenzure umubare w’abantu itwaye.

Umunyana avuga ko ubwo buryo bwo gukoresha ikarita ya "Tap&Go" nibutangira gukoreshwa mu ntara buzihutisha abagenzi kuko ntamwanya bazongera guta bagura cyangwa bakata amatike.

Ubu buryo bwo kwishyura urugendo hakoreshejwe iyo karita bwari busanzwe bumenyerewe mu ngendo zikorerwa mu mujyi wa Kigali.

AC Group ivuga ariko mbere yo kuzikoresha mu ntara bagiye gutangiza ubukangurambaga ku bagenzi bo mu ntara ku ikoreshwa ry’ikarita ya "Tap&Go".

Kuri ubu ngo gukoresha iyo karita mu mujyi wa Kigali bigeze kuri 99%. Mu Rwanda harabarurwa abafite izo karita kandi bazikoresha basaga miliyoni imwe.

Uburyo bwo kwishyura hifashishijwe ikarita ya "Tap&Go" bwatangiye mu Rwanda kuva muri 2015.

Ikirango cya Kaminuza ya Kibungo

Ubwo buyobozi bwatangaje ibyo ubwo mu mpera z’icyumweru gishize bwagiranaga inama n’abize muri iyo kaminuza kuva yashingwa muri 2003.

Ubuyobozi bwa UNIK buvuga ko abanyeshuri bahiga bagenda bagabanuka cyane ku buryo bavuye ku 5000 muri Campus ya Kibungo bakaba bageze ku 1000 gusa.

Dr Emmanuel Nsengimana, umukozi muri UNIK avuga ko igituma bakomeje kugabanuka ari uko iyo kaminuza nta macumbi y’abanyeshuri igira.

Ibyo ngo bituma hari abaza kuhiga basanga nta macumbi ahari bakajya kwiga ahandi.

Ahamya ko nk’Ikigega cya Leta gishinzwe gufasha abacitse ku icumu rya Jenoside batishoboye (FARG) cyagabanije umubare w’banyeshuri bajya kuhiga kubera kutagira amacumbi.

Hari ngo n’indi miryango itera inkunga abanyeshuri bahigaga yafashe icyemezo cyo kuhabakura, ibajyana mu zindi kaminuza kubera ikibazo cy’amacumbi.

Agira ati “Impunzi z’Abarundi mu Nkambi ya Mahama itwegereye zarimo benshi cyane bakeneye kwiga kaminuza. Ababakuriye baje kutureba turabemerera kuko twumvaga ibijyanye no kwigisha tubishoboye, batubajije amacumbi turatsindwa bigira ahandi baduha bake.”

Iryo gabanuka ry’abanyeshuri ryatumye ubuyobozi bwa UNIK bwiyambaza abahize kugira ngo bashore imari mu bwubatsi bw’amacumbi ashobora gucumbikira abanyeshuri 1000.

Dr Emmanuel Nsengimana avuga ko igihe ayo macumbi azaba yabonetse abanyeshuri bazongera bakaba benshi ku buryo uwashora imari ye mu kuyubaka atahomba.

Abari bitabiriye iyo nama bahise biyemeza kugura iyo migabane ndetse bakanabwira bagenzi babo bataje na bo ntibacikanwe; nk’uko umwe mu barangije muri UNIK witwa Nisunzemungu Jean Baptiste abihamya.

Agira ati “Uyu mushinga turiteguye kuba twawujyamo kuko uretse kuba byatuma twunguka amafaranga,ni na ngombwa kuko byafasha barumuna bacu.”

Akomeza agira ati “Twize nabi bitugora kubera kutagira amacumbi n’abayafite bikabagora kuyishyura. Igihe amacumbi azaba ari muri UNIK baziga batekanye kuko bazajya boroherezwa kwishyura icumbi .”

Abize muri UNIK biyemeje kubaka amacumbi y’abanyeshuri

Kuva UNIK yashingwa muri 2003, abamaze kuharangiza bagera ku 8000. Buri muntu wahize ubyemera, azatanga umugabane shingiro w’ibihumbi 700RWf ariko abe yagura imigabane ashaka.

Abakozi bakora muri UNIK na bo ngo bemerewe gushora imari muri uwo mushinga mu gihe abo hanze bo batemerewe kugura imigabane.

Kugira ngo icyo gikorwa cyo kubaka amacumbi kihute hafashwe umwanzuro ko bagiye kwegera banki maze ikabaha inguzanyo bagatangira kubaka mu ntangiriro z’umwaka wa 2018.

Abanyeshuri basanzwe biga muri UNIK bacumbika mu macumbi yubatswe n’abaturiye iyo kaminuza na yo adahagije.

Inyubako y’iyi Kiliziya nshya ibereye ijisho

Yatashywe kuri uyu wa Gatandatu tariki 02 Ukuboza 2017, mu umuhango witabiriwe na Minisitiri w’Intebe Dr Ngirente Edouard, washimye ko yubatswe hazirikanwa gahunda yo guteza imbere ibikorerwa mu Rwanda nk’amakaro n’ibindi bikoresho biyubatse.

Ati “Twishimiye kubaka iyi katederari ya Kibungo hazirikanwe gahunda ya made in Rwanda birimo amakaro akorerwa mu karere ka Nyagatare muri iyi ntara y’Iburasirazuba. Uru ni urugero rwiza rwo kwishakamo ibisubizo duteza imbere ibikorerwa iwacu.”

Yashimye kandi ko diyosezi gatolika ya Kibungo ihuza kwigisha ivanjiri no guteza imbere imibereho myiza y’abaturage, nko guteza imbere gahunda z’ubuhinzi no kurwanya ihohoterwa rikorerwa abana b’abakobwa.

Hafunguwe ku mugaragaro inyubako ya Kiliziya ya Kibungo

Katedarari yuzuye ishobora kwakira abakirisitu ibihumbi bibiri bicaye neza, ni nini ku kigereranyo cya 85% ugereranije n’iyari isanzwe ari nayo yavuguruwe.

Yubatswe mu myaka itatu kuko ibuye fatizo ryo kuyubaka ryashyizweho na Nyiricyubahiro Antoine Kambanda mu mwaka wa 2014 umwaka umwe nyuma yo guhabwa inkoni y’ubushumba yo kuyobora diyosizi ya Kibungo.

Kagimbura Diogene wavuze mu izina ry’abakirisitu yavuze ko igitekerezo cyo kuyivugurura cyatangiye mu 2006 ariko kigahura n’imbogamizi.

Iyi Kiliziya ifite aho abantu bicara inyuma hari hejuru

Yagize ati “Uyu mushinga watangiye gutekerezwa mu mwaka wa 2006 na nyiricyubahiro Frederic Rubwejanga ariko nyuma uza kudindira kubera ibibazo by’igihombo diyosezi yacu yahuye nacyo ndetse n’igihe kinini yamaze itagira umushumba bwite.”

Yakomeje agira ati”Ubwo twabonaga umushumba Musenyeri Antoine Kambanda yihutiye gushyiraho igenamigambi ry’imyaka itanu ririmo n’iki gikorwa cyo kubaka Katedarari dutashye none.”

Musenyeri Antoine Kambanda umushumba wa diyosezi gatolika ya Kibungo yavuze ko kubaka iyi katedarari byari urugamba rutoroshye, kubera ikibazo cy’igihombo diyosezi yarimo n’amadeni diyosezi yari ifitiye banki bigoye cyane.

Ati “Hari bamwe twageragaho twabagezaho igitekerezo cyo kubaka katedarali bagashidikanya bumva ataricyo kihutirwa kubera igihombo n’amadeni diyosezi yari ifite.Ndashima umuhate w’abakirisitu bagaragaje bitanga kugeza iyi ngoro yuzuye.”

Uyu muhango witabiriwe kandi n’abayobozi mu madini atandukanye arimo abasenyeri mu bangirikani

Diyosezi ya Kibungo yaguye mu gihombo kibarirwa muri miliyari y’amafaranga y’u Rwanda. Iki gihombo ntikivugwa cyane nka mbere mu myaka ya 2012 aho hari ingwate zari zigiye gutezwa cyamunara n’amabanki.

Muri miliyoni 436Frw iyi katedarali yatwaye, harimo miliyoni 186Frw abakiristu ba kibungo batanze mu mafararanga. Hakabamo miliyoni 116Frw zihwanye n’umuganda bakoze kuri iyi nyubako na miliyoni 253Frw zavuye mu bafatanyabikorwa n’abakunzi ba diyosezi ya Kibungo baba i Kigali, Canada no mu Bubirigi.

Byinshi muri ibyo bikoresho biteza umwanda ahakorera abatekinisiye babisana

Mu gihe ubundi ibisigazwa bya za mudasobwa,ibya za televiziyo zashaje,amatelefone yapfuye byabatezaga umwanda bakabura aho babishyira, hari kompanyi yo mu Bwongereza ibibagurira ku 8.000Frw ku kiro kimwe.

Blancomet recycling UK Ltd ni yo igura ibyo bikoresho by’ikoranabuhanga bishaje. Ikorera mu Rwanda kuva mu mwaka wa 2010, aho ibigura ikajya kubikoramo ibindi bikoresho bitandukanye.

Karibuze Sayidi Vienney ukorera mu Mujyi wa Kigali avuga ko ubundi ibyo bikoresho bishaje byababangamiraga cyane bakabura aho babishyira bigateza umwanda aho bakorera.

Agira ati “Waburaga aho ushyira ibintu byawe, ibyo ugurisha n’ibyo wakoze. Ariko ubu biriya bitagifite akamaro tubishyira ku ruhande bakaza bakabitugurira bakaduha amafaranga.

“Ubu ni imari ntibikiri imyanda, ziriya mudasobwa na telefone na biriya bishaje bisigara byose baduha amafaranga.”

Hari abasigaye barabonye imari mu bikoresho bishaje bakabigurisha aho gukomeza kubibika

Twagirayezu Alexis ukorera ku mu Murenge wa Gitega mu Karere ka Nyarugenge, avuga ko abo bantu bagura ibyo bikoresho atabazi kuko ntawe uramugeraho kandi byamubanye byinshi.

Ati “Abo bandi bafite ababibagurira nanjye mbabonye nabibaha kuko nanjye njya mbigira.Njya mbyumva ngo barabigura ariko ntabo ndabona.”

Abahanga mu by’ubuzima bahamya ko ibikoresho by’ikoranabuhanga bishaje bitagomba kujugunywa ahabonetse hose kuko hari ibiba bifite imirasire(rayons) yangiza umubiri.Batanga inama zo kujya bongera bakabikoramo ibindi bintu aho kugugunzwa.

Umunyamabanga wa Leta muri Minisiteri y’ibikorwa remezo, Kamayirese Germaine, aherutse kubwira Inteko shinga amategeko y’u Rwanda ko icyo kibazo cy’iyo myanda cyashakiwe umuti,hubakwa uruganda mu Bugesera ruzajya rwongera kubikoramo ibindi bikoresho (recycling).

Urwo ruganda biteganijwe ko ruzatangira gukora mu mwaka wa 2018, kandi rukazajya rugira site rukoreraho zizwi ngo ku buryo abantu bose bazajya babimenya,bakazana ibyo bikoresho bishaje bafite ababibagurira.

Imibare yo muri 2016 igaragaza ko abantu ku giti cyabo ari bo babitse igice kinini cy’ibikoresho by’ikoranabuhanga biba byarashaje, kuko bafite ibirenga 81% mu gihe ibisigaye biri mu bigo bitandukanye bya leta n’ibyigenga.

Perezida Kenyatta ubwo yarahiriraga kuyobora Kenya

Kuri uyu wa kabiri tariki ya 28 Ugushyingo 2017 nibwo Perezida wa Kenya, Uhuru Kenyatta yarahiriye kuyobora Kenya muri manda ya kabiri y’imyaka itanu, nyuma y’urugendo rw’amezi abiri n’igice rw’amatora yaranzwemo imvururu.

Perezida Kenyatta yatsinze Raila Odinga mu matora nyuma y’uko amatora asubiwemo kuko urukiko rw’ikirenga rwa Kenya rwari rwatesheje agaciro ibyavuye mu matora ya mbere maze rutegeka ko asubirwamo.

Abanyakenya baba mu Rwanda bavuga ko kuba babonye Perezida w’igihugu cyabo ari ikintu bishimiye kuko bizeye ko agiye kongera kunga abanyagihugu; nk’uko umwe muri bo witwa Henry Kamondia Gitau abisobanura.

Agira ati “Navuga ko aya matora yazanye amacakubiri ashingiye kuri politike n’amakoko mu banyagihugu.”

Akomeza agira ati “Ubu twizeye ko Perezida mushya Kenyatta agiye kugarura ubumwe mu banyagihugu, uwatsinzwe akemera maze dushyize hamwe duteze imbere igihugu cyacu cya Kenya.”

Umuhango w’irahira rya Perezida Kenyata witabiriwe n’abaturage babarirwa mu bihumbi 60

Abanyakenya batandukanye baganiriye na Kigali Today bagaragaje ko icyihutirwa babona Perezida Kenyatta akwiye gukora ari ukongera guhuza Abanyakenya bagasenyera umugozi umwe, agahagarika amacakubiri n’imyivumbagatanyo.

Undi munyakenya wavuze ko yitwa Simon avuga ko ashima Imana kuba Kenya ibonye umuyobozi.

Agira ati “Byabaye inzira ndende kuva mu kwezi kwa Munani turi mu matora, araseswa, imvururu n’ibindi byinshi byabayemo ariko ubu turashima Imana ko twabonye perezida wanarahiriye kuyobora Kenya.”

Abanyakenya baba mu Rwanda basaba Perezida Kenyatta kuzuza ibyo yemereye Abanyakenya kuzabagezaho kuko aribyo bamwitezeho kandi bakaba aribyo byatumye bamutora.

Abanyakenya baba mu Rwanda ngo bizeye ko Perezida Kenyatta azagarura ituze mu gihugu

Perezida Uhuru Kenyatta mu ijambo yagejeje ku Banyakenya n’abandi bari bitabiriye irahira rye yavuze ko azaba Perezida wa bose abamutoye n’abatamutoye, kandi ko azaharanira ubumwe n’iterambere ry’Abanyakenya bose.

Yavuze ko nubwo urugendo rw’amatora rutari rworoshye uyu munsi amatora muri Kenya arangiye.

Irahira rya Perezida Uhuru Kenyatta ryitabiriwe n’abayobozi b’ibihugu batandukanye barimo na Perezida Paul Kagame.

Abanyakenya bagera mu bihumbi 60 nibo bitabiriye iri rahira ryabereye kuri Stade ya Kasarani ahari hitezwe abaperezida 13 kwitabira uyu muhango.

Umupaka wa Rusumo wari usanzwe ukora amasaha 16 gusa

Iyo gahunda yo gukora amasaha yose agize umunsi yatangijwe ku mugaragaro na ba Komiseri bashinzwe za gasutamo mu bihugu by’u Rwanda na Tanzania, ku wa mbere tariki ya 02 Ukwakira 2017.

Umupaka wa Rusumo uri mu Karere ka Kirehe wakoraga amasaha 16 ku munsi, kuva saa mbiri za mugitondo kugera saa yine z’ijoro.

Ibyo ngo byateraga ubucucike bukabije bw’amakamyo yageraga ku mupaka wafunze bigatuma ahaparika ategereje umunsi ukurikiyeho.

Iyo ntambwe yo gukora amasaha yose igezweho nyuma y’uko abakuru b’ibihugu by’u Rwanda na Tanzania ubwo bafunguye ku mugaragaro ibikorwa bya “One Stop Border Post” muri Werurwe muri 2016.

Abakoresha umupaka wa Rusumo bavuga ko kuba watangiye gukora amasaha yose ari igisubizo kuri bo; nk’uko uwitwa Haruna Cyiza umwe mu batwara amakamyo ava Tanzaniya aza mu Rwanda abivuga.

Agira ati “Iyo wahageraga saa yine z’ijoro byagusabaga guparika ugategereza umunsi ukurikiyeho bikagutinza mu nzira.”

Akomeza agira ati “Gukora amasaha make byatezaga ubucucike bw’amakamyo tukabura aho duparika bikaba ikibazo ariko ubu uzajya uza bagukorera uhita ugenda nta kuhatinda.”

Ku mupaka wa Rusumo hari hasanzwe hanyura amakamyo 155 ku munsi

Tugirumuremyi Raphael, Komiseri mu kigo cy’igihugu cy’imisoro n’amahoro ushinzwe za gasutamo avuga ko iyo gahunda igamije koroshya ubucuruzi n’urujya n’uruza rw’abantu n’ibintu ku mupaka.

Agira ati “Koroshya ubucuruzi bwambukiranya imipaka kuri uyu mupaka wa Rusumo bizateza imbere ubucuruzi ku mpande zombi ku gihugu cy’u Rwanda na Tanzaniya ndetse no mu karere muri rusange.”

Akomeza agira ati “Kuko hari ibicuruzwa bica hano bijya Congo (DRC), mu Burundi n’ahandi. Muzabibona namwe ku buryo mutazongera kubona amakamyo menshi arara kuri uyu mupaka nk’uko byajyaga bigenda.”

George Israel Mnyitafu, Komiseri ushinzwe za gasutamo muri Tanzania avuga ko intego y’iyo gahunda ari uko ubucuruzi bwihutishwa, abantu ntibatindane imizigo ku mipaka.

Agira ati “Intego y’iyi gahunda ni uko twakihutisha ubucuruzi, ntihagire uwicarana ibicuruzwa ku mupaka, abantu n’ibintu ku mupaka byoroherezwe serivisi bazibone vuba igihe cyose.”

Ku mupaka wa Rusumo hari hasanzwe hanyura amakamyo 155 ku munsi. Uwo mubare ushobora kwiyongera nyuma yo gutangiza iyo gahunda yo gukora amasaha 24/24.

yasabye ko imirimo yo kubaka ibyumba by’amashuri 28 yitabwaho

Yabisabye ku wa Gatandatu tariki 30 Nzeli 2017 mu gikorwa cy’umuganda cyabereye mu Murenge wa Zaza, ahashyizwe umusingi,hazubakwa ibyumba by’amashuri bizakemura ikibazo cy’abana bakoraga ibirometero 14 ku munsi bajya kwiga.

Ibyumba 28 ni byo biteganijwe kubakwa mu karere kose mu gihe cy’amezi atatu, kandi bigomba kwigirwamo umwaka w’amashuri utaha, uzatangira muri Mutarama 2018.

Uwihanganye ushinzwe by’umwihariko Akarere ka Ngoma, yasabye abaturage n’abayobozi kurangwa n’ubufatanye, kugira ngo ibyumba by’amashuri bizabe byuzuye bitarenze ukwezi k’Ukuboza 2017.

Yagize ati “Dukore vuba vuba ibijyanye no kubaka. Iriya ni fondasiyo, ariko ntizamereho ibyatsi, imvura ntizagwe ngo ibisenye, oya! dufatanye tubyihutishe ku buryo nibura mu kwezi kwa cumi n’ abiri abana bacu bazabe babasha kujya mu ishuri, kuko abana bakwiye kwiga neza, kandi heza.”

Mu byumba bizubakwa harimo ibyumba bizasimbura ibyari bishaje cyane, ibindi byubakwe mu rwego rwo gukemura ikibazo cy’abana bakoraga ingendo ndende bajya kwiga kure.

Abatuye uyu murenge bizeza ubufatanye n’ubuyobozi mu kubaka ibyo byumba by’amashuri ngo kuko abana bize heza, ari byagirira ababyeyi akamaro, nk’uko byemezwa n’uwitwa Habineza Jean Claude.

Ati “Inaha uretse kujya tuza hano mu muganda, buri rugo ruzatanga umusanzu w’amafaranga 500, kandi turabishima, kuko kwiga neza kw’abana bacu nitwe bifitiye akamaro kanini.”

Umuyobozi w’Akarere Nambaje Aphrodise yizeza ko imirimo yo kubaka ibyo byumba igomba kuba yarangiye mu kwezi k’Ukuboza 2017 kuko ari abaturage n’ubuyobozi bose bafite ubushake.

Ati “Hari n’imisanzu izajya igenwa na njyanama hashingiwe ku bushobozi bw’abaturage, ku buryo hari icyizere ko mu mpera z’ukwezi k’Ugushyingo n’Ukuboza bizaba birangiye,abana bacu bakazabyigiramo bitunganye mu mwaka utaha w’amashuri.”

Akarere ka Ngoma buvuga ko hagikenewe ibindi byumba 100 byo gusimbuzwa, kuko bishaje byubatswe kera kubw’abakoroni.

Umunyamabanga Nshingwabikorwa w’Akarere ka Ngoma Kanayoge Alex

Ubwo bushakashatsi bwagaragaje ko Akarere ka Ngoma kaza ku mwanya wa cyenda, mu turere 10 dukennye mu Rwanda.

Imibare yavuye muri ubwo bushakashatsi, yagaragaje ko ku baturage bagera ku bihumbi 340 batuye ako karere, 19,5% bari mu bukene bukabije,naho 46.8% bakennye muri rusange.

Ni muri urwo rwego Umuryango witwa “Give Directly Inc” ufasha abatishoboye kwikura mu bukene, wageneye, imiryango igera ku 2500 itishoboye yo muri ako karere, aho utanga Amadorari 1000 kuri buri muryango azabafasha kwikenura.

Ayo mafaranga asaga ibihumbi 850 y’Amanyarwanda, ngo azahabwa abaturage bo mu cyiciro cya mbere ndetse n’icya kabiri cy’ubudehe, nk’uko ubuyobozi bw’uwo mushinga bwabitangaje.

Ubwo buyobozi kandi buvuga ko ayo mafaranga azatangwa mu byiciro bibiri, icya mbere abaturage bagahabwa 40%. Nyuma ngo hazakorwa igenzura ry’uburyo yakoreshejwe, nibasanga yarakoreshejwe neza, hatangwe 60% azaba asigaye.

Umunyamabanga Nshingwabikorwa w’Akarere ka Ngoma Alexis Kanayoge, atangaza ko Akarere kamaze kwemeranya n’uwo mushinga uburyo bw’imikoranire, ngo bitarenze ukwezi k’ Ukuboza 2017 uwo mushinga uraba watangiye ibikorwa byawo.

Uwo muyobozi asaba abaturage bazatoranywa kuzakoresha neza iyo nkunga, ntizabapfire ubusa.

Agira ati” Abaturage bazatoranywa, turabasaba gukoresha neza ayo mafaranga, ntayajyane mu nzoga, mu ndaya cyangwa mu kuyaguriza cyangwa kuyakopa undi.

Umuturage akwiye kuyakoresha mu bimuteza imbere yaba kuyagura itungo, yayakoresha mu buhinzi, yashinga butike agacuruza, n’ibindi.”

Akarere ka Ngoma kahize ko uwo mushinga, uzatangirira mu Murenge wa Zaza, uzasiga nibura 99% by’abaturage bikuye mu bukene.

Imvura yaguye yajemo inkubi y’umuyaga usambura inzu ibisenge biraguruka

Iyo mvura idasanzwe yaguye ku gicamunsi cyo ku wa kabiri tariki 12 Nzeli 2017. Yasenye izo nzu 206 ariko ntawahasize ubuzima. Muri izo nzu zasenyutse hari umudugudu umwe wasenyutsemo inzu 164.

Abatuye mu Kagari ka Ndekwe bavuga ko mu ma saa kumi n’igice ari bwo haguye imvura nke maze izamo inkubi y’umuyaga usambura inzu unagusha insina.

Uwamariya Clemantine, umunyamabanga nshingwabikorwa w’Akagari ka Ndekwe avuga ko hari izindi nzu ziri kugenda ziboneka zangiritse ku buryo bukomeye n’ubwo ibisenge bitagurutse.

Agira ati “Muri iki gitondo dukomeje kureba ariko hari andi turi kubona yangiritse bikomeye n’ubwo ibisenge bitagurutse.

Hari urusengero dusanze rwiyashije ku buryo hagize umuyaga uza rwagwa. Hari n’andi mazu turi gusanga mu by’ukuri atakomeza guturwamo kuko yangiritse akeneye gusanwa.”

Inzu zitandukanye zo mu kagari kamwe zasenyutse

Akomeza avuga ko imiryango yari ituye mu nzu zasenyutse icumbikiwe n’abaturanyi.

Ati “Wari umuyaga mwinshi. Abasenyewe ntawaraye hanze keretse nk’abagabo babaga barinze ibyari mu nzu kugira ngo hatagira ubyiba.

Ubu tugiye gutangira imiganda idasanzwe yo gusana izo nzu, izishoboka tuzisane izidashoboka ubu twatanze raporo mu nzego zisumbuye kugera no kuri Minisiteri ishinzwe gukumira ibiza.”

Iyo nkubi y’umuyaga yanagushije insinga z’amashanyarazi

Kuri uyu wa gatatu tariki ya 13 Nzeli 2017 abatuye ako Kagari ka Ndekwe bazindukiye mu nama n’ubuyobozi kugira ngo bubahumurize.

Si ubwa mbere mu Karere ka Ngoma umuyaga usenya inzu. Muri Kanama 2017 na bwo imvura ivanze n’umuyaga yasenye inzu 35 yangiza na hegitari 100 z’urutoki.

Akarere ka Ngoma kari gasanzwe gatera inkunga ya miliyoni zirindwi z’amafaranga y’u Rwanda ikipe ya Etoile de l’Est kugera ubu imaze mu cyiciro cya kabiri imyaka 13 guhera mu mwaka wa 2004.

Kalisa Celestin Perezida w’ikipe ya Etoile de l’Est yikoma abafana bayo usanga bavuga ko bayikunda gusa ariko ntihagire nutanga igiceri cyo kuyishyigikira.

Kalisa Célestin Perezida w’ikipe y’umupira w’amaguru ya Etoile de l’Est ( Ifoto Manishimwe N)

Agira ati ”Abafana ni benshi ariko nta mufana n’umwe wari bwavuge ati ndabaha n’amazi y’abakinnyi ubu nicyo kibazo dufite, twigeze gushyiraho agaeseke twahuye n’ikpe ya Kiyovu ariko mu bantu 100 bari bicaye mu ihema ry’icyubahiro habonetse ibihu bine gusa, ni ikibazo kuko amafaranga y’abafana yakunganiye ayo duhabwa n’akarere ka Ngoma kuko ntahagije, akarere kaduha miliyoni zirindwi ntago ari amafaranga yafasha ikipe kuzamuka”

Umuyobozi w’akarere ka Ngoma Nambaje Aphrodice avuga ko abafana b’ikipe ya Etoile de l’Est ari abo ku izina kuko ntacyo bayifasha ndetse akanenga urukundo nkurwo rudashora cg ngo rutange.

Agira ati”Abafana usanga bavuga ngo bakunda ikipe nyamara iyo ubahamagaye ugashyira agaseke hariya ngo tuyishyigikire amafaranga menshi ajyamo ni 200Frs, urukundo rero rudashora..”

Umuyobozi w’akarere ka Ngoma yakomeje avuga ko hari icyizere cy’uko noneho iyi kipe igiye kuzanzamuka ikagera mu cyiciro cya mbere kuko igiye kongererwa inkunga ndetse Stade igiye kubakwa ikazafasha iyi kipe mu bushobozi ikagera mu cyiciro cya mbere.

Ikipe ya Etoile de l’Est ibarizwa mu cyiciro cya kabiri, igiye kubakirwa ikibuga

Ntamufana n’umwe twabashije kubona wemera ko afana iyi kipe,dore ko nta fan clup iyi kipe igira, nta n’umuyobozi w’abafana ba Etoile de l’Est uriho.
Amafaranga ubuyobozi bw’ikipe ya Etoile de l’Est buvuga ko akarere kongeyeho ni miliyoni eshatu,yose hamwe akaba miliyoni 10.

Stade igiye kubakwa i Ngoma izatwara miliyari imwe na miliyoni 200, biteganijwe ko imirimo yo kuyubka izamara amezi atandatu nk’uko bitangazwa n’iyi kipe.

Imvura ivanze n’umuyaga yasambuye amazu

Iyo mvura yaguye ku gicamunsi cyo ku itariki ya 17 Kanama 2017, yanangije hegitari 100 z’urutoki.

Inzu 35 nizo zabaruwe, zasenywe n’iyo mvura. Izo nzu zasambutse kuburyo hari bamwe bagiye gucumbika.

Mu murenge wa Mutenderi ahangiritse hegitari zigera kuri 20 z’urutoki niho hera ibitoki byo mu bwoko bwa FIA, bipima ibiro 180.

Abahinzi batuye uyu murenge baravuga ko ari ikibazo kitoroshye bahuye nacyo kuko ibi bitoki byari bibafatiye runini mu kubaha amafaranga.

Iyo mvura idasanzwe yangije insina

Mu murenge wa Gashanda ho bavuga ko utugari tubiri twibasiwe cyane twa Cyerwa na Munege twari ikigega cy’ibitoki muri uwo murenge.

Ubuyobozi buvuga ko bwamaze gutanga raporo muri Minisiteri ishinzwe gukumira ibiza no gucyura impunzi kugira ngo abahuye n’ibiza batabarwe.

Umukobwa ugiye gushyingirwa muri Ngoma ntahe umusambi nyirasenge ntamutahira ubukwe

Uwo musambi kandi ngo anawuha ba nyirabukwe, ba nyinawabo na sewabo. Bivuze ko umukobwa ufite banyirasenge nka batatu naba nyinawabo batatu, atanga imisambi itandatu hiyongereyeho n’uwa nyirabukwe.

Abasobanukiwe n’uwo muco bahamya ko umukobwa utanze umusambi aba agaragaje ko afite umuco kandi ko azi gukora.

Utawutanze ngo aba agaragaje agasuzuguro; nkuko umukecuru witwa Mukamazimpaka Fortuné abosobanura.

Agira ati “Gutanga umusambi ku mukobwa ugiye kurushinga bivuga ikintu kinini. Bivuga ko ari umukobwa watojwe umurimo, uzi kuboha mbese ari umwari ushoboye kurushinga.

Ni umco ukomeye iyo umukobwa adatanze uyu musambi ba nyirasenge n’abandi yagombaga kuwuha babibona nabi.”

Mugenzi we witwa Nyiranzirorera ahamyaka ko umukobwa atamuhaye umusambi atirirwa ataha ubukwe bwe.

Agira ati “Njye rwose sinabutaha aramutse atampaye umusambi ndi nyirasenge.Uwo yaba ari ikirumbo kandi aba ansuzuguye yishe umuco.Ubuse umukobwa utazi kuboha yabasha imirimo y’urugo? Sinabutaha.”

Hari abandi babyeyi bavuga ko iyo batabahaye umusamabi bataha ubukwe ariko batishimye kuko baba babyakiriye nabi. Ibyo kandi ngo bishobora guteranya imiryango.

Imisambi abakobwa bo muri Ngoma bagiye gushyingirwa batanga bayigura ku isoko aho kuyiboha

Nubwo bavuga ko gutanga umusambi bigaragaza ko umukobwa azi kuboha kandi azi gukora, usanga abakobwa batanga imisambi baguze ku isoko aho gutanga iyo biboheye ubwabo.

Ibyo nibyo bituma abakobwa bavuga ko uwo muco ubagora kuko utuma batanga amafaranga menshi bajya kugura iyo misambi; nkuko Uwambajimana Anita abivuga.

Agira ati “Biratuvuna kuko dushora amafaranga menshi.Uwuha ba nyokowanyu,ba sowanyu, umubyeyi wa batisimu hari naho bawuha ba nyirabukwe.

Imisambi irahenda kuko ubu umwe mwuguze 1800RWf urumva iyo ufite umuryango munini bigusaba menshi cyane.”

Bamwe mu bakobwa usanga batanasobanukiwe impamvu yo gutanga umusambi bakavuga ko babikora kubera ko ari umuco.

Kubera ko abakobwa bajya gushyingirwa mu Karere ka Ngomba bakenera imisambi, ibyo byatumye hari benshi bayiboha bakayicuruza kuko ngo ibinjiriza atari make.

Ngoma bagiye kuvugurura urutoki kuri hectare ibihumbi 5

Mu Karere kose ka Ngoma ahahinze urutoki ruvuguruye n’urutavuguruye hangana na hegitari zirenga ibihumbi 23, urutavuguruye rwiganje mu bahinzi batibumbiye mu makoperative.

Bamwe mu bahinzi bitabiriye gahunda yo kuvugurura urutoki rwabo bavuga ko umusaruro wiyongereye cyane.

Dufitumukiza Anastase umwe mu bagize koperative y’abahinzi b’urutoki mu Murenge wa Kazo,Akagari ka Kinyonzo yitangaho urugro.

Yagize ati”Ntaravugurura urutoki rwanjye nezaga igitoki cy’ibiro 15Kg.
Ubu nyuma yo kuvugurura nkazisasira,nkazifumbira ,nkareka kuruhingamo ibishyimbo amateke n’ibindi,ubu mperutse gukuramo igitoki cy’ibiro 170 cya FIA.”

Uwo muhinzi avuga ko amaze kwiteza imbere mu myaka itatu amaze yinjiye mu buhinzi bw’urutoki bw’umwuga, kuko agemura ibitoki ku ruganda bityo akabasha kwizigamira ibihumbi 900RWf ku mwaka.

N’ubwo abatangiye kuvugurura urutoki rwabo bavuga ko byabateje imbere,abenshi mu bafite urutoki baracyaruhinga mu buryo bwa gakondo bigatuma umusaruro uba muke.

Muri ako karere hari abemeza ko bagihinga mu buryo bwa gakondo bavangamo indi myaka kuko bafite amasambu mato kandi bakaba babona na byo bibaha umusaruro.

Mu guhindura iyo myumvire Akarere ka Ngoma kateguye ingendoshuri mu mirima aho aba bahinzi bazagenda basura bagenzi babo biteje imbere babikesha guhinga kijyambere,bakabasobanurira uko babigenza.

Umuyobozi w’Akarere ka Ngoma, Nambaje Aphrodise avuga ko byibuze hegitari ibihumbi bitanu zigomba kuvugururwa muri uyu mwaka wa 2017-2018 kugira ngo haboneka urutoki rwiza rutanga umusaruro rutari indabo.

Ati”Mu myaka itatu ishize tumaze kuvugurura hegitari ibihumbi 13, kuri hegitari ibihumbi 23 zihinzeho urutoki mu karere kose .Uyu mwaka twahize hegitari ibihumbi bitanu.”

Ako karere kemeza ko hegitari eshanu zizaba zisigaye na zo zizatunganywa mu mwaka uzakurikiraho, maze Kibungo ikongera kumenyekanishwa cyane n’urutoki rwayo rwinshi kandi rwiza.

Uruganda rwaruzuye n’imashini zirimo ariko ntiruratangira gukora "Briquette"

Ubuyobozi bw’Akarere ka Ngoma bwubatse urwo ruganda kugira ngo rukemure ikibazo cy’ibicanwa abaturage bo muri ako karere bakunze guhura nacyo.

Rugomba gutunganya imyanda iva mu bimoteri bimenwamo imyanda byo mu Mujyi wa Kibungo, rukayikuramo amakara ya kijyambere yitwa “Briquette”, azwiho kugira umuriro mwinshi no kuramba ku mbabura.

Rwatangiye kubakwa mu mwaka w’ingengo y’imari ya 2011-2012 ariko rwuzura mu mwaka w’ingengo y’imari ya 2016-2017, rutwaye miliyoni 700RWf.

Rwatinze kuzura kuko batangira kurwubaka mu gace rwubatsemo hari hataragera amazi n’amashanyarazi. Kubihageza ngo byatwaye igihe kirekire kirenga umwaka.

Mu nta ngiriro z’umwaka wa 2017 nibwo rwatangiye gukora ariko kuva icyo gihe kugeza ubu nta “Briquette” ruratangira gukora kuko habuze imyanda ihagije yo kuzikoramo. Nyamara ubwo batangiraga kurwubaka bavugaga ko nirwuzura ruzahita rutangira gukora.

Imyanda yo gukoramo "Briquette" yarabuze none imashini ziteretse aho gusa

Baziririza Emmanuel, ushinzwe gukurikirana ibikorwa bya kompanyi yitwa SERCO ikorera muri urwo ruganda, avuga ko hakenewe toni 10 z’imyanda kugira ngo urwo ruganda rutangire gukora.

Akomeza avuga ko guhera muri Gashyantare 2017 bashakishije imyanda ariko ubu ngo bafite toni ebyiri n’igice gusa.

Agira ati “Imyanda iracyari mike cyane! Uruganda rufite ubushobozi bwo gutunganya ku munsi ibiro 500. Dukeneye byibuze toni 10 ngo dutangire gukora. Ntituratangira gukora dutegereje gutangira imyanda yabonetse.”

Akomeza avuga ko nyuma yo kubona ko imyanda itaboneka neza hafashwe ingamba zo kuyigura kubayifite, bazajya bishyurwa amafaranga 7RWf ku kilo.

Abatuye Akarere ka Ngoma by’umwihariko Umurenge wa Kibungo bavuga ko bari bategereje igisubizo cy’ibibazo by’ibura ry’ibicanwa kuri uruganda.

Ntabana Onesphor, utuye mu Kagari ka Ruhinga ahubatse uru ruganda avuga ko aho batuye hari ikibazo cy’inkwi.

Agira ati “Uru ruganda ruzaba ari igisubizo kuko tuzabona ibicanwa hafi kandi bihendutse kuko batubwira ko ikiro kigura amafaranga 200RWf kandi akaba yahisha ibishyimbo akanateka ibirayi. Wasangaga tugura umufuka w’amakara w’ibihumbi icyenda kandi ntumare ukwezi.”

Kuva batangira gukora ngo bafite toni 2,5 z’imyanda gusa kandi bagomba kubona nibura toni 10

Umuyobozi w’Akarere ka Ngoma, Nambaje Aphrodice yemera ko uyu mushinga wizwe nabi kuko wahuye n’ibibazo kuva watangira gushyirwa mu bikorwa.

Avuga ko ariko mu rwego rwo kubona imyanda ihagije yo gukoramo “Briquette” bazitabaza iyo mu turere twa Kirehe na Kayonza.

Uwo mugabo yahawe amashanyarazi nk’aya akoresha imirasire y’izuba arayanga avuga ko atajyanye n’imyemerere ye

Uwo mugabo witwa Maniriho Jean Bosco, wubatse ufite abana n’umugore, urugo rwe rwari ruri mu ngo 100 zo muri Ngoma zagombaga guhabwa amashanyarazi akomoka ku mirasire y’izuba, yatanzwe na Polisi y’igihugu muri gahunda yayo ya “Police Week”.

Ariko ubwo ku itariki ya 15 Gicurasi 2017, bagezaga ayo mashanyarazi kuri izo ngo, bageze ku rw’uwo mugabo arabatsembera avuga ko adakeneye amashanyarazi kuko imyemerere ye itamwemerera kuba mu nzu icanyemo amatara.

Uwo mugabo nta kindi avuga cyamuteye kwanga ayo mashanyarazi uretse gusa ngo imyemerere ye itabimuhera uburenganzira.

Abaturanyi be bavuga ko n’ubwo yanze amashanyarazi ngo iyo umugore we atetse nijoro, usanga ngo yiyegereza ahari urumuri ruva ku mashanyarazi y’abaturanyi.

Abatuye Umurenge wa Jarama bavuga ko nta Munyarwanda wari ukwiye kuba agifite imyumvire yo kwanga iterambere yishingikirije ku idini cyangwa imyemerere ye.

Umwe muri abo baturage agira ati “Arabona agize amahirwe abonye iterambere na we akaryanga. Twagakwiye gushyigikira iterambere kuko ni ryo rituma tuba abantu bazima. Iyo myumvire ntikwiye.”

Ubuyobozi bw’Umurenge wa Jarama buvuga ko hari n’abandi baturage bamwe batajya bafata Mitiweri hari n’abadakozwa ibyo gusezerana imbere y’amategeko bavuga ko imyemerere yabo itemera gahunda za Leta.

Umuyobozi w’Akarere ka Ngoma, Nambaje Aphrodise avuga ko imyumvire n’imyerere imeze ityo itajyanye n’igihe ndetse ko bagiye kubegera bakabigisha bakava mu bujiji.

Agira ati “Kubera imyumvire ngo n’imyemerere ntekereza ko itajyanye n’igihe tugezemo. Hari bamwe bahaye amatara barayanga. Na bo ni abacu tugomba gukomeza tukabegera tukabigisha ku buryo na bo bazagera ku byiza igihugu kigenda cyunguka.”

Si ubwa mbere mu turere dutandukanye tw’igihugu hagaragaye abaturage basengera mu idini ry’Abakusi, banga gukora gahunda zitandukanye za Leta.

Mu mpera za 2016, abantu icyenda bo mu Karere ka Karongi batawe muri yombi bazira kwanga gukora gahunda za Leta bakanashishikariza abandi kutazikora.

Aba ngo bashishikarizaga abaturage kudakora umuganda, kudatora, kudasora no kudafata indangamuntu n’ibindi bya ngombwa bitangwa na Leta.

Abo mu idini ry’Abakusi kandi ngo iyo barwaye ntibajya kwa muganga kwivuza ahubwo ngo bahitamo kwivurisha ibimera.

Abo basore babiri bahagaze imbere y’inzu yabo bubakiwe na Croix -Rouge. Mbere yari igihe kubagwaho kuko yari ishaje

Abo baturage babitangaje ubwo bamurikirwaga izo nzu ku wa gatanu tariki ya 05 Gicurasi 2017.

Kuri uwo munsi nibwo hizihijwe umunsi mpuzamahanga wa Croix-Rouge ku isi. Hatashwe ibindi bikorwa birimo ubwiherero 80 bwubatswe n’uwo muryango n’abatishoboye bahabwa amatungo magufi.

Abubakiwe inzu ni imiryango irindwi y’abapfakazi batishoboye n’umuryango umwe w’abana bimfubyi birera.

Mukandorimana Debula wibana mu nzu wenyine avuga ko Croix-Rouge yamutabaye kuko inzu yabagamo yari itangiye kumugwaho kugera nubwo iguye iyo yubakirwaga itaruzura. Avuga ko nyuma yo kwitabwaho na Croix-Rouge ubu amaze kwigarurira icyizere.

Agira ati “Bankuye ahantu habi cyane nari nashaje kubera ibibazo none ubu nabaye inkumi. Nari ntuye mu nzu iteye isoni n’agahinda, igiye kugwa ninjiragamo nunamye yari nk’icyari.

Iyo imvura yagwaga nijoro narasengaga Imana nyisaba kweza ubugingo bwanjye kuko nabonaga ingwa inzu iribungwira nkapfa.Ubungubu baranyubakiye isima mu nzu, ingurube baranyoroza ubu ntakibazo gikomeye nkifite.”

Abubakiwe inzu na Croix-Rouge bavuga ko bagaruye icyizere cyo kubaho

Abaturanyi ba Mukandorimana n’abandi bubakiwe na Croix-Rouge bavuga ko bari babayeho mu buzima bubabaje cyane bwo kwiheba kuburyo hari nubwo bajyaga bikingirana mu nzu badashaka uwabasura.

Samona Florence agira ati “Rwose aba bantu bari babayeho nabi mu bwihebe, abagore wasangaga abagabo babo barabataye kuko babonaga bikomeye bakigendera bakabasiga muri ayo mazu agiye kubagwaho.

Harimo n’imfubyi zasizwe n’ababyeyi babo zikiri nto cyane zibaho nabi bikomeye ariko ubu ubona ubuzima bwarahindutse.

Bwito Paul Perezida wa Croix-Rouge Rwanda avuga ko bahisemo gukorera mu midugudu bise udusozi indatwa bagamije gukemura ibibazo bihari birimo kutagira amacumbi, ibiza , imirire mibi n’ubukene.

Bwito avuga ko kugera ubu Croix-Rouge iri gukorera ibikorwa byayo mu Rwanda mu midugudu 540 bafasha abafite ibibazo bikomeye by’ubuzima kwiteza imbere.

Agira ati “Nkumufasha wa Leta dushishikajwe n’ibikorwa bigamije gukura abaturage mu bukene bukabije, kutagira isuku guhindura imyumvire ibaganisha ku bukene n’ibindi.

Tubafasha kubona amacumbi abatayafite, tukabaha amatungo magufi kugirango ejo ejo bundi biteza imbere bigire.”

Abaturage bo muri Ngoma biyujurije ivuriro

Iryo vuriro riciriritse (Poste de santé) ryatashwe ku mugaragaro tariki ya 02 Gicurasi 2017 ryuzuye ritwaye miliyoni 25RWf yavuye mu misanzu n’umuganda w’abaturage ku bufatanye bw’Akarere ka Ngoma na Minisiteri y’ubuzima.

Imiganda n’imisanzu y’abaturage bifite agaciro ka miliyoni 5RWf andi asigaye yatanzwe n’Akarere ka Ngoma na Minisiteri y’ubuzima.

Abatuye aka gace bavuga ko bari bakomerewe cyane no gukora urugendo rw’amasaha atatu bamanuka imisozi bazamuka indi bajya kwivuriza ku kigo nderabuzima cya Kibungo n’icya Rukira bigatuma bamwe barembera mu ngo kubera gutinya urwo rugendo rurerure.

Mukarangira Hadja agira ati “Iyo urembye birakugora kuko aha hepfo mu ibanga ry’agasozi hari ibibuye twagendaga dukuruza amaguru tugenza ikibuno tujya kwivuza.

Byadusabaga amasaha byibuze atatu ngo tugere kuri Centre de Sante ya Kibungo cyangwa iya Rukira zitwegereye. None ubu ni ugufata akagare mu kanya gato tukaba tugeze ku ivuriro!”

Umuyobozi w’Akarere ka Ngoma, Nambaje Aphrodise avuga ko akarere kishimira gufatanya n’abaturage mu kwiyubakira ibikorwa remezo kuko iyo babigizemo uruhare bituma bagira uruhare rukomeye mu kubibungabunga.

Agira ati “Mu mbaraga zabo bagiye batanga imisanzu ngo twubake iyi nyubako. Ibi turabikunda cyane kuko iyo babigizemo uruhare usanga banitabira kubibungabunga cyane.

Nta kuntu yaba yararushye yikorera ibuye ngo hagire usenya iyo nzu areba cyangwa ngo umuhe serivisi mbi abyihanganire kandi azi ko iryo vuriro ari irye.”

Iryo vuriro ryatangiye gukora abaturage baruhuka urugendo rurerure bakoraga bajya kwivuza

Kugeza ubu, iyi poste de santé yahawe rwiyemezamirimo uyicunga nyuma yo kugirana amasezerano n’Akarere ka Ngoma.

Ibendera ry’igihugu ryo ku kagari kamwe ko muri Ngoma ryari ryabuze barisanze mu musarane

Iryo bendera na banderore iriho insanganyamatsiko yo kwibuka ku nshuro ya 23 Jenoside yakorewe Abatutsi byabuze mu ijoro ryo ku itariki ya 17 Mata 2017. Byabonetse kuri uyu wa gatatu tariki ya 19 Mata 2017.

Abataye ibi birango mu musarane ntibaramenyekana kuko amakuru yaho byajugunywe yatanzwe n’abaturage. Haracyakorwa iperereza ngo hamenyekane uwaba yarabikoze.

Rwiririza Jean Marie Vienney, umuyobozi wungirije w’Akarere ka Ngoma ushinzwe iterambere ry’ubukungu yemeje iby’aya makuru.

Agira ati “Ku makuru twahawe n’abaturage twaje kubisanga mu bwiherero bw’umurenge SACCO wa Rukumberi ariko ababikoze ntibaramenyekana ariko iperereza rirakomeje. Ubu hari babiri bakekwa bafashwe, bakaba batangiye kubazwa na Polisi.”

Hari amakuru ko uwabikoze ari uwahoze ayobora umwe mu midugudu y’ako Kagari ka Rubona wakuweho n’abaturage.

Uwo mugabo nyuma yo gukurwaho n’abaturage ngo yahise avuga ko azihorera kandi abaturage bamukuyeho bakarebeshwa mu zuba umunsi wose.

Abo baturage bavuga ko muri uko kwihorera byaba ari byo byatumye yiba ibendera kugira ngo abaturage bahure n’ikibazo.

Si ubwa mbere mu Karere ka Ngoma hagaragaye ikibazo cyo kwiba ibendera ry’igihugu kuko no mu Murenge wa Rurenge ibendera riherutse kuburirwa irengero mu gihe kitarenze umwaka.

Ruzindana Charles umwe mu barangije amahugurwa yo gufotora kinyamwuga muri Kigali Today Ltd

Babitangaje ubwo barangizaga ayo mahugurwa yo gufotora y’icyiciro cya karindwi, atangwa n’ikigo cy’itangazamakuru Kigali Today Ltd kubufatanye n’ikigo cy’igihugu giteza imbere imyuga n’ubumenyingiro (WDA).

Abahuguwe uko ari 14, barimo abasanzwe bakora uwo mwuga wo gufotora ubatunze, abanyamakuru basanzwe bafotora amafoto bakoresha mu nkuru n’abashaka gukora umwuga wo gufotora.

Ruzindana Charles, umwe mu barangije ayo mahugurwa avuga ko nyuma yo guhugurwa, yasanze mu myaka icyenda yari amaze akora ibijyanye no gufotora yakoraga ibyo atari azi.

Agira ati “Uku kwezi tumaze twungutse byinshi. Nihereyeho maze imyaka icyenda nkora itangazamakuru rikoresha amafoto ariko nyuma yo guhugurwa nasanze mu myaka ikenda namaze mfotora narabeshyaga abantu ntakintu narinzi mu gufotora. Nubwo nabyize mu ishuri twabiciye hejuru.”

Muziranenge Josiane, umaze imyaka umunani akora umwuga wo gufotora mu mujyi wa Kigali avuga ko iyo myaka yose yamaze atunzwe no gufotora yabikoraga ari ukwirwanaho.

Ariko ngo nyuma yo guhugurwa muri Kigali Today Ltd avuga ko yungutse byinshi cyane bizatuma abasha kwagura akazi ke, agakora kinyamwuga.

Agira ati “Maze kugera muri aya mahugurwa nasanze mu by’ukuri nubwo abantu bashimaga amafoto nafotoraga ibyo nakoraga ntabyo narinzi.

Ubumenyi nkuye aha bugiye kumfasha kwaguka kandi ngiye gukora ibyo nzi niyizeye, bimpe amahirwe yo kurushaho kwiteza imbere.”

Umuyobozi wa Kigali Today Ltd, Jean Charles Kanamugire

Umuyobozi wa Kigali Today Ltd, Kanamugire Jean Charles ashimira cyane WDA nk’abafatanyabikorwa muri aya mahugurwa n’Inama Nkuru y’Itangazamakuru (MHC) ndetse anishimira ko ibimaze kugerwaho birenze ibyari byitezwe kugerwaho iyi gahunda itangira.

Agira ati “Dutangira iyi gahunda yo guhugura abafotozi b’umwuga hamwe na WDA twumvaga habaho ibyiciro bitatu gusa.

Ariko nyuma yo kubona umusaruro ibyo byiciro byatanze, twaricaye na WDA dusanga bigomba gukomeza none bigeze mu cyiciro cya karindwi.”

Akomeza ahamagarira abarangije amahugurwa gukomeza gukunda umwuga wo gufotora kugira ngo ubumenyi bakuye mu mahugurwa babashe gukomeza kubukoresha no kububyaza umusaruro bihangira umurimo.

Akomeza avuga ko Kigali Today Ltd izafasha abazishyira hamwe bagatangira umushinga mu gufotora, bahabwa mudasobwa itagendanwa (Desk Top) “Printers” nk’ibikoresho byibanze byo kubashyigikira.

Mukakarara Priscilla, wari uhagarariye WDA yibukije ko amahugurwa bahawe ari muri gahunda y’igihugu yo guteza imbere umurimo (NEP).

Mukakarara Priscilla (wo hagati wambaye umutuku) umukozi muri WDA yashishikarije abarangije amahugurwa kwihangira umurimo

Yabwiye abarangije ayo mahugurwa kwishyira hamwe bakabyaza umusaruro ibyo bize kuko hari ubufasha bugenerwa abishyize hamwe bakihangira umurimo muri gahunda ya NEP.

Abagera ku 104 nibo bamaze guhugurwa na Kigali Today Ltd muri ibyo byiciro birindwi.

417 babonye akazi ko gukora umuhanda

Umuhanda Tunduti–Birenga ufite ibirometro 6, watangiye gusanwa, ibikorwa byo kuwusana bikaba bifite agaciro ka Miliyoni 52, bikozwe n’abaturage muri gahunda ya VUP hibanzwe ku bakene bari mu cyiciro cya mbere cy’ubudehe.

Umukozi umwe ku munsi ahembwa amafaranga 1200 RWf mu gihe ubusanzwe umuhinzi ahembwa 700 Frs ku munsi yahingiye umuntu.

Ndimurukundo Emmanuel avuga ko akazi yahawe ko gukora uyu muhanda kazamufasha kwiteza imbere akabasha kuva mu cyiciro cy’abakene bafashwa.

Yagize ati”Ubu maze gukora ibyumweru bibiri bagiye kuduhemba, amafranga bazampemba ndifuza kuguramo amatungo magufi nkorora akajya nayo anyungukira akanteza imbere.

Ndifuza kandi kuguramo amabati nkubaka kuko ubu aho mba si iwanjye.”

417 bakora muri uyu muhanda ni abo mu Murenge wa kazo bari mu cyiciro cya mbere cy’ubudehe,bahawemo akazi kugirango bahindure ubuzima bwabo bave muri iki cyiciro biteze imbere.

Ubuyobozi bw’Umurenge wa Kazo buvuga ko iyubaka ry’uyu muhanda rizamara amezi atatu,ku buryo bizera ko aba bahawemo akazi bizabafasha.

Umuhanda bari gukorerwa uzatuma babasha kugeza imyaka yabo ku isoko

Umunyamabanga nshingwabikorwa w’Umurenge wa Kazo, Bushayija Francis, avuga ko uretse gutanga akazi ,uyu muhanda uzatuma abahinzi babona amasoko y’umusaruro wabo waburaga uko ugera ku isoko kubera umuhanda mubi.

Ati” Turibaza ko amafaranga bazakuramo muri aya mezi atatu azabafasha kwikura mu bukene barimo kandi twabasabye gufunguza konti no kwizigamira.Tuzakomeza kubaba hafi.”

Abahinzi batuye mu gace ka Tunduti bari bamaze iminsi bavuga ko bahendwa ku musaruro wabo, cyane uw’umuceri,ibitoki,ibigori n’ibishyimbo.

Uretse imirimo izakorwa n’amaboko hateganijwe ko hazanashyirwamo imashini zitsindagira itaka.

Mu Karere ka Ngoma uzajya ufatwa agura n’abazunguzagi azajya acibwa 5000RWf. Kuri iyi foto abo bazunguzagi ni abo mu mujyi wa Kigali

Iri tegeko ryatowe ngo rigamije guca akajagari mu bucuruzi mu Karere ka Ngoma.

Ni nyuma yaho mu mujyi wa Kibungo hatangiye kugaragara abantu bagenda bafite imyenda, imikandara, inkweto n’ibindi babigurisha.

Uretse abo ngo hari haradutse n’ingeso yo gucururiza ibiribwa mu muhanda aho bamwe bagenda bikoreye imboga, imbuto ziribwa, inyanya n’ibindi bakagenda babigurisha mu ngo z’abantu.

Icyo cyemezo cyatangiye gukurikizwa kuva aho Njyanama y’Akarere ka Ngoma icyemereje tariki ya 03 Gashyantare 2017 ariko ntawe urumvikana wafashwe, agacibwa amande.

Abazunguzagi bari bagaragaje ikibazo cyuko babuze aho bacururiza kubera isoko rya Kibungo ari rito ariko nyuma ryaraguwe.

Umwe mu bazunguzagi ucuruza imyenda itandukanye irimo n’amashuka, utifuje gutangaza izina rye, avuga ko icyo cyemezo cyo guhana abazunguzagi kidakwiye.

Agira ati “Iki cyemezo akarere kafashe kiratubangamiye ndetse n’abo twagurishaga kuko ibyo tugurisha usanga mu mujyi wa Ngoma biba bidahari bityo rero ntawe tuba tubangamiye mu bacuruza.”

Karinganire utuye mu mugi wa Kibungo avuga ko kubwe abazunguzagi ntacyo bari bamutwaye, akongeraho ko bamufashaga kubona ibintu ubundi yashoboraga kubona yagiye muyindi mijyi nka Kigali.

Agira ati “Aba bantu ku bwanjye ntacyo bantwaye kuko baradufasha ibyo bacuruza akenshi usanga ari ibintu biba byavuye i Kigali n’inaha bidakunda kuhaboneka. Urumva ko ku rundi ruhande natwe abaturage byadufashaga.

Gusa hari ibyo usanga bacuruza bisanzwe bicuruzwa mu maduka ugasanga byabangamira abacuruzi.”

Umunyamabanga nshingwabikorwa w’Akarere ka Ngoma, Kanayoge Alexis avuga ko iri tegeko rizakemura ikibazo cy’umuco w’abazunguzagi wiyongeraga mu mujyi wa Kibungo.

Ibyumba by’amashuri bishya batashye bizagabanya ubucucike bw’abanyeshuri mu ishuri

Ubu buyobozi buvuga ko usanga hari amashuri yigamo abanyeshuri bagera kuri 45 kandi ubusanzwe ishuri ritagomba kurenza abanyeshuri 25.

Gusa ariko ngo hari gahunda yo gukomea kubaka ibyumba by’amashuri bishya mu rwego rwo guca burundu ubwo bucucike.

Niyo mpamvu tariki ya 23 Mutarama 2017, ubuyobozi bw’Akarere ka Ngoma bwatashye ibyumba bishya 12, bizagabanya ubwo bucucike.

Mukeragabiro Pierre Damien, umuyobozi w’ikigo cy’amashuri abanza ya Fukwe hamwe mu hubatswe ibyumba by’amashuri bibiri, avuga ko ibi byumba by’amashuri bije ari igisubizo.

Ahamya ko kuri icyo kigo ubucucike bwari bwaratewe nuko hari amashuri yari ahari yubakikishe ibyondo, yasenywe n’umuyaga mu mwaka wa 2015.

Agira ati “Ubucucike buragabanuka kuko ibi byumba by’amashuri bibiri bigiye kuziba icyuho cyari cyaratejwe n’amashuri aherutse gutwarwa n’umuyaga agatuma abahigiraga bigana n’abandi bigateza ubucucike.”

Ibyumba by’amashuri bishya byubatswe mu karere byitezweho kugabanya ikibazo cy’ubucucike mu mashuri

Nshimiyimana Vénutse, wiga mu mwaka wa gatanu muri icyo kigo, avuga ko kwiga babyigana byari bibabangamiye, ntibakurikire amasomo neza. Kuba babonye ibyumba bibiri bishya bigiye gutuma biga bisanzuye.

Kirenga Providence, umuyobozi wungirije w’Akarere ka Ngoma ushinzwe imibereho myiza y’abaturage, ahamagarira ababyeyi kwirinda icyatuma abana bata ishuri kuko amashuri ari amahirwe bahawe na leta.

Agira ati “Nta mwana ukwiye kuva mu ishuri, ababyeyi dufatanye. Burya umubyeyi ureka umwana akava mu ishuri, afatwa nk’umunyacyaha. Aya mahirwe yo kubona aho kwigira heza tuyabyaze umusaruroro, abana bacu bose bige.”

Umuyobozi w’Intara y’Iburasirazuba ari mu bitabiriye iyi sporo maze ayishishikariza abantu bose

Guverineri w’Intara y’Iburasirazuba, Kazaire Judith yayitangije ubwo yifatanyaga n’abatuye umujyi wa Rwamgana bazenguruka uwo mujyi biruka muri mucaka mucaka, ku cyumweru tariki ya 15 Ukuboza 2017.

Guverineri Kazaire avuga ko siporo ifitiye umubiri akamaro gakomeye maze ahamagarira abantu bose kuyigira umuco.

Agira ati “Igikorwa nk’iki cyabaye hose mu turere tw’iyi ntara. Twese kiratureba kuko ni ubuzima. Ndifuza ko iki gikorwa cya siporo kuri bose kitaba umuhango gusa ahubwo kibe umuco.”

Akomeza avuga ko mu rwego rwo gushimangira iyo gahunda ya siporo kuri bose, abaturage bagomba kuyitabira buri wese akora iyo ashoboye.

Abasaza nabo ntibatanzwe kuko nabo bagoroye ingingo bikorera siporo kuri bose

Hirya no hino mu turere turindwi tugize Intara y’Iburasirazuba iyo siporo yaritabiriwe ndetse bishimira ko izajya iba buri kwezi.

Nambaje Aphrodise, umuyobozi w’Akarere ka Ngoma yabwiye abitabiriye iyo siporo ko ari ikintu cy’agaciro kuko kubihuza n’icyumweru bizajya bifasha n’abemera kujya mu nsengero bamaze gukora siporo.

Iyo siporo yitabiriwe n’abatari bake

Umwe mu bitabiriye iyi siporo agira ati “Turishimye cyane kandi kuba abayobozi bafata iyambere mu kuyikora batanga urugero rwiza. Ndahamya ko ntawuzongera gucikanwa.”

Abahanga bagaragaza ko siporo ari ingenzi mu buzima ndetse bakavuga ko ari urukingo n’umuti ku ndwara zimwe na zimwe. Siporo kandi ngo ifasha kuvura umunaniro ikanongera imibanire y’abantu.

Nyuma yo kwirukanka bakoze n’imyitozo ngororamubiri binanura

Bazengurutse ahantu hatandukanye biruka kuri mucaka mucaka

Kantengwa arasaba ubufasha ngo abashe kujya kwivuza impyiko mu Buhinde

Kantengwa utuye mu Murenge wa Mutendeli avuga ko kujya kwivuza mu Buhinde bimusaba gutanga miliyoni 25RWf. Amaze imyaka itatu yivuza iyo ndwara y’impyiko.

Ahamya ko we n’umuryango we batashobora kubona ayo mafaranga yose kuko batunzwe n’ubuhinzi gusa.

Kantengwa avuga ko yari asanzwe yivuriza mu Rwanda. Ariko ngo ubu nabyo byarahagaze kuko Mitiweli itakibasha kumwishyirira.

Ubwo burwayi bw’impyiko bumusaba guca mu mashini iyungurura amarayo inshuro ebyiri mu cyumweru. Guca mu cyuma inshuro imwe gusa byishyurwa ibihumbi 100RWf.

Kuri ubu ariko amaze ukwezi yarabuze ubushobozi bwo guca muri iyo mashini kuburyo ngo ubuzima bwe bumerewe nabi.

Muganga yamubwiye ko uburyo bwe bwo gukira ari uko yahindurirwa impyiko bitaba ibyo akaba agumye kuri iyo mashini iyungurura amaraso.

Umugabo wa Kantengwa avuga ko ibibazo byamurenze yabuze icyo akora n’icyo areka.

Kiviri William, umugabo wa Kantengwa avuga ko kubera kuvuza umugore we ubutunzi bwe bwamushizeho.

Agira ati “Amatungo n’amasambu byanshizeho icyo nsigaranye gusa ni inzu ntuyemo n’abana. Nta bushobozi ngifite bwo gukomeza kumuvuza ngo anyure muri kiriya cyuma.

Sinshoboye no kumujyana kwivuza mu Buhinde,ibibazo byarandenze rwose nabuze icyo nakora. Mutugirire impuhwe rwose mudufashe tumuvuze kwa muganga.”

Kamazi Jean Bosco umuturanyi wabo nawe ahamya ko uwo muryango uri mu bukene kuko nta handi bakura amafaranga uretse mu buhinzi.

Muziganyi Florence, umukozi wa RSSB ushinzwe ibikorwa by’ubuvuzi mu bwishingizi bwo kwivuza Miriweli avuga ko amabwirizwa ya Minisiteri y’Ubuzima (MINISANTE) avuga ko umurwayi w’impyiko wishingirwa, yishyurirwa imashini iyungurura amaraso ari utarenza ibyumweru bitandatu gusa.

Umuryango w’uyu mubyeyi Kantengwa uvuga ko wagurishije byose ngo uvuze uyu mubyeyi none ngo basigaranye inzu yonyine

Akomeza avuga ko abangiritse impyiko kuburyo bagomba guhora bakoresha ubu buryo, ubuzima bwose cyangwa bagasimburizwa izindi, ibyo Mitiweli itabikora.

Uwaba afite ubufasha yabugeza kuri uwo muryango yifashishije nimero za telefone 0788773961 na 0728773961 zombi ni iza Kiviri William.

Baretse guhinga mu kajagari none basigaye beza umuceri bakikenura

Aba bahinzi bavuga ko mbere bahingaga mu bishaka ibijumba maze igihe byeze bakabura isoko bikabapfira ubusa ariko ubu ngo guhinga umuceri babona isoko bakagurisha bakikenura.

Kazura Jean yagize ati”Ubundi ibijumba byaduheragaho bikabora twabuze abaguzi,indobo tukayigurisha 400 RWf ntibitugirire akamaro.

Ariko ubungubu iyo mfite umufuka wa kilo 100 w’umuceri bangurira ku bihumbi 28 RWf.”

Akomeza avuga ko umuceri ugenda ubateza imbere kuko umuhinzi ashobora kugurisha akabona ibihumbi 300 RWf ku ihinga rimwe gusa cyangwa akanarenza.

Kazura we ngo yabashije gukuramo amatungo, yubaka inzu, kandi ngo kibazo cy’amafaranga y’ishuri abana be bajya bagira. Nyamara ngo bagihinga mu kajagari bahoraga bataka inzara.

Abahinga umuceri bemeza ko ubu babona isoko bakikenura

Kimwe mu bishanga bihingwamo umuceri ni icya Tunduti gikora ku mirenge ya Mutendeli,Kazo, Gashanda na Rurenge kiri kubuso bwa hegitari 80.

Abagihinga bavuga ko mbere bavangagamo imyaka hakabamo ibijumba,amateke,inyanya,intoryi m’ibindi ariko ahanini bagahingamo ibijumba.

Kuri ubu hahinzemo umuceri, hegitari imwe basarura ungana na toni 5.2.

Umukozi ushinzwe ubuhinzi mu murenge wa Kazo Bitegetsimana Mwema,avuga ko guca ubuhinzi bw’akajagari mu bishanga byagiriye akamaro, ku buryo ubu buhinzi buri kwagurwa n’aho butaragera.

Ati”Bagihinga mu kajagari bahingaga ibijumba byakera ari byinshi bakabura isoko ariko ubu umuceri uko wakwera kose uba ufite isoko rinini.

Ahakiri ibishanga bitaratunganywa usanga bagihingamo mu kajagari ariko MINAGRI iri kudufasha kubitunganya.”

Kubera gahunda yo guhinga umuceri mu bishanga, umuceri w’u Rwanda ubu ugaragara henshi ku masoko mu gihe habaga higanje uturuka hanze y’igihugu.

Iyi centre yatangiranye abana barenga 100 bari hagati y’imyaka 5 na 20 bazajya batorezwa ku kibuga gisanzwe gikiniraho ikipe ya Etoile de l’Est iri mu cyiciro cya kabiri.

Aba bana bitoreza ku kibuga cya Etoile de l’Est bagaragaza ko babyishimiye

Ababyeyi batangije iyi centre batangaza ko biyemeje kuzatanga ibikenerwa byose kugirango abana babo bafashwe mu mpano bafite yo gukima umupira w’amaguru.

Mukamana Shemsa ni umubyeyi w’umwana muri iyi centre agira ati “Abana bacu turabashyigikiye, kandi turabikunze, twiteguye gutanga ikizakenerwa cyose ngo aba bana babashe gushyigikirwa. Umwana wanjye numva akunda umupira w’amaguru kandi abifitiye impano.”

Ababyeyi biyemeje gushyigikira abana babo bafite impano yo gukina Football, babagurira imyenda n’imipira

Munezero Olivier w’imyaka 14 utorezwa muri Santere Amizero yagize ati “Mfite impano mu gukina football kuko nk’ubu namaze gutsinda amajojonjora (selection) yo ku rwego rw’intara y’ mu bana bashobora gukina Football. Aha hantu hari kumfasha kurushaho guteza imbere impano yanjye kandi mfite inzozi zo kuzakinira igihugu.”

Bamwe mu bana batorerwa muri Centre Amizero batangiye gutsinda amajojora , abandi bakina mu makipe amwe yo mu Rwanda

Umutoza w’aba bana Nzuru Theoneste (umutoza wabihuguriwe kandi wanakinnye umupira w’amaguru igihe kinini) avuga ko atangazwa n’ishyaka aba bana baba bafite ryo kwiga,rigaragarira mu kuzinduka baza kare cyane kandi bakabikora bishimye cyane.

Uyu mutoza avuga ko aba bana bose abatoza mu byiciro bitatu bikurikije imyaka yabo. Hari icyiciro cy’abafite imyaka hagati ya 20-15, icya kabiri 15-10 icya gatatu hagati y’imyaka 10-5.

Abana batorerezwa muri Centre Amizero bafite inzozi zo kuzaba abanyabigwi mu mupira w’amaguru mu Rwanda no mu mahanga

Maniraguha Jean Pièrre umuyobozi wa Centre Amizero mugikorwa cyo kumurika iyi centre kuri uyu wa 02 Mutarama 2017 yagize ati”Intego yacu ni uguteza siporo imbere muri rusange, tuzamure abana bacu bafite impano bazigaragaze, ku buryo bakinira amakipe cyacu, bakinira iguhugu, bakiteza imbere muri rusange.”

Nsengiyumva François umujyanama wa Tekiniki wa Federasiyo y’umupira w’amaguru mu Rwanda FERWAFA na Minisiteri y’umuco na Siporo, mu ntara y’Ubusirazuba avuga ko iyi santeri yitezweho kuzamura umupira w’amaguru kandi ko bigiye gufasha mu gutoranya abana bafite impano bazamurwa ku rwego rw’igihugu.

Kugera ubu iyi centre iracyashaka ibyangombwa byuzuye ngo ibe yakomeza gukora. Abana bitoreza muri iyi sentire ni abo mu murenge wa Kibungo bitoza bataha iwabo mu ngo.

Aha hari hatuye abantu ariko nyuma yo gutuzwa mu midugudu ubu harera neza kandi hatanga umusaruro utubutse

Aba baturage basanzwe batunzwe n’ubuhinzi, bavuga ko ubutaka bari batuyemo batatanye bwahujwe nyuma yo gutuzwa mu midugudu.

Ubu ngo bahingamo ibigori n’ibishyimbo kandi umusaruro wabaye mwinshi, kuko bahinga ku butaka bwera kandi bunini.

Kazura Jean utuye mu Mudugudu wa Amabumba mu kagali ka Kinyonzo Umurenge wa Kazo, avuga ko ubu bari gutera imbere kuko n’ibikorwa remezo biri kubageraho ku buryo bworoshye kuko begeranye.

Yagize ati” Njye mpinga ku gice cya hegitari ariko nasaruyemo ibigori bigera kuri toni mu gihembwe cy’ihinga giheruka, binyinjiriza asaga 200,000Frw.

Nkihatuye nahahingaga ibishyimbo gusa, nkabasha kubona umusaruro ufite agaciro ka 5000Frw mu ihinga rimwe.”

Akomeza avuga ko kuva mu 1997 batuzwa ku midugudu ubuzima bwabo bumaze guhinduka kuburyo bugaragara, kuko amafaranga bakura mu buhinzi, yabafashije mu kwiteza imbere.

Ati” Ubu abenshi bamaze kwigurira inka, baracana amashanayarazi ava ku mirasire y’izuba, abana bariga, twambara neza, mbega tubona bitandukanye na mbere, kuko iyo uba mu mudugudu n’imyumvire irahinduka kubera guturana n’abandi.”

Umusaruro wariyongereye ubu barasarura mu matoni kuko babonye ubutaka bwagutse bwo gukoreraho ubuhinzi nyuma yo kujya ku midugudu kuhatura

Ibi bishimangirwa na Uwitonze Jean de Dieu nawe utuye muri uyu mudugudu, uvuga ko iterambere rikomeje kubasatira kandi bazarushaho gutera imbere kuko basenyera umugozi umwe nk’abaturanyi

Umuyobozi wungirije w’Akarere ka Ngoma ushinzwe iterambere ry’ubukungu Rwiririza JMV,avuga ko aka karere kaza ku isonga mu gutura ku midugudu aho kageze kuri 98% batuye ku midugudu.

GUtura mu midugudu byatumye bagezwaho iterambere ku buryo bworoshye

Abana bize imyuga itandukanye mugihe cy’ukwezi bamaze bavuze ko byabafashije kumenya icyo bazahitamo kwiga igihe bazaba bakuze.

Abo bana 86 bo mu Karere ka Ngoma bari hagati y’imyaka ine na 16 bamaze ukwezi bigishwa imyuga yo kubaka, gukanika imodoka, amashanyarazi na mudasobwa muri gahunda ngaruka mwaka ishuri rya IPRC East riha abana mu biruhuko kuva mu 2014.

Mu cyumweru gishize niho bashyikirijwe impamyabushobozi, nabo bemeza ko imyuga bigishijwe yatumye babasha kumenya icyo bazahitamo kwiga igihe bazaba bari kwiga mu mashuri.

Nubwo ari bato biyumvamo ubushobozi mu gukora imyuga ndetse bakazarushaho igihe bazaba bakuze.

Mbabazi Kizito w’imyaka umunani yavuze ko yamaze guhitamo ibyo azashyiramo umwete yiga, bikamubyarira amafaranga ubwo azaba akuze.

Yagize ati “Hano nize kubaza, gusudira, ICT no gukanika n’indagagaciro z’umuco nyarwanda. Impamvu niga imyuga ni ukugira ngo mpitemo umwuga kare. Nk’ubu numva nkunda ikoranabuhanga, ku buryo ninkura nzajya nkora amaporogaramu ya kompiyuta nkayagurisha.”

Abize gukanika imodoka nabo bagaragaje ko ubumenyingiro bafite, biteguye kububyaza umusaruro.

Iyi gahunda yo gukundisha abana umwuga ikubiye muri gahunda ebyiri, igenewe abana biga mu mashuri abanza “Space for children” na gahunda igenewe abiga mu mashuri yisumbuye ibatoza kuzaba ba rwiyemezamirimo beza “Make them job creators.”

Umuyobozi w’ishuri rya IPRC East Ing. Musonera Euphrem, avuga ko iyi gahunda yo gukundisha abana umwuga yatangijwe n’iri shuri hagamijwe gukundisha abana umwuga no kuzayiga, kuko hari hakiri imyumvire ivuga ko umwuga wigwa nuwananiwe ayandi masomo.

Guverineri Kazayire Judith yatunguwe no kubona abana bato bafite ubumenyi mu gusoga irange no kubaka.

Goverineri w’intara y’Iburasirazuba Judith Kazayire, yasabye ko iyi gahunda yakwaguka ikagera kubana benshi kuko ari nziza kandi ifasha abana.

Ati “Iyi gahunda ni nziza cyane turasaba ubuyobozi bw’ishuri kureba uburyo ki yajya igera kuri benshi.Abayitabira baracyari bake kubera ubushobozi busabwa.

Twareba niba ariya mafaranga atanatangwa n’ababyeyi mu buryo bwo bw’ubwisungana kugirango igere no kuri babandi bakennye.”

Imwe mu mbogamizi yagaragajwe muri iyi gahunda ni ubushobozi buke usanga butuma abana benshi batitabira iyi gahunda, kuko bisaba byibuze ibihumbi 20Frw ku mwana yo kuguramo isarubeti n’ifunguro bahabwa saa yine.

Inzu imwe izajya iturwamo n’imiryango ine. Buri muryango uzaba ufite igice cyawo kigizwe n’ibyumba bitatu n’uruganiriro

Abo baturage bazimurirwa mu murenge wa Mutenderi, Akagari ka Mutenderi ahagiye kubakwa uwo dugudu w’icyitegererezo (IDP Model Village), biteganyijwe ko uzuzura bitarenze Nyakanga 2017.

Eng Mutabazi Célestin, umukozi ushinzwe ubutaka n’imyubakire mu Karere ka Ngoma avuga ko hagiye kubakwa inzu 10, zubatse kuburyo inzu imwe iturwamo n’imiryango ine cyangwa “Four in one”.

Agira ati “Ni uburyo bushya bwo gutura kubuso buto kandi neza. Aya mazu yose azubakwa kubuso bwa hegitari ebyiri. Buri nzu izaba igizwe n’ibyumba bitatu binini, ifite uruganiriro, ububiko, igikoni, ubwogero n’ubwiherero bwo mu nzu.”

Uretse ayo mazu azubakwa, muri uyu mudugudu w’icyitegererezo hazanubakwa agakiriro k’abanyabukorikori n’imyuga n’ikiraro rusange cyo korororeramo.

Abatuye umurenge wa Mutenderi ahazubakwa uyu mudugudu bavuga ko ari amahirwe yo kwiteza imbere bagize kuko bagiye kubona akazi; Twiringiyimana Fraterinus umwe muri bo abisobanura.

Agira ati “Hari iterambere ryinshi tugiye kubona. Mu Gakiriro tuzigiramo imyuga, kubaza, gukora inzugi kandi ibijyanye n’ubucuruzi bizaguka.Tuzabonamo imirimo mu kubaka n’ibindi byinshi.”

Mu gice cya mbere hazubakwa inzu 10 hiyongereyeho agakiriro n’ikiraro rusange

Nambaje Aphrodise, umuyobozi w’Akarere ka Ngoma avuga ko ibikorwa byo kubaka bigiye kwihutishwa, asaba abaturage kwitegura gukorera amafaranga.

Agira ati “Twashyizeho ibuye ry’ifatizo, kandi si umuhango, mu mezi atatu tugomba kuba dufite umudugugu w’icyiterererezo aha ngaha kandi usobanutse. Kandi namwe muzahabwa imirimo, iki gikorwa tukibyaze umusaruro.”

Abazatuzwa muri uyu mudugudu bari batuye mu manegeka bazaturuka hirya no hino mu Karere ka Ngoma.

Gahunda yo gutuza abaturage mu mudugudu w’icyitegererezo bikorwa hirya no hino mu turere hagamijwe gutuza neza abaturage.

Inzu zahawe abatishoboye Iburasirazuba

Izi nzu eshanu zarubatswe zinashyirwamo ibikoresho by’ibanze nk’intebe, ibitanda, ibiryamirwa ndetse n’ibyo kwiyorosa.

Amafaranga yubatse izi nzu yavuye mu banyamuryango ba RPF inkotanyi,mu ntara y’Iburasirazuba bahuje ubushobozi kugirango hubakirwe abatishobye barimo n’abarokotse Jenoside babaga mu mazu ashaje.

Mukankusi Mariyana w’imyaka 65 wo mu karere ka Ngoma, nyuma yo gushyikirizwa iyi nzu yavuze ko birenze ubwenge bwe ko agiye kwizihiza Noheri mu byishimo byinshi ataherukaga.

Yagize ati”Iyo ndebye iyi nzu birandenga cyane. FPR ndayishimira cyane ko ikomeje kuduteza imbere.

Inzu nabagamo yari yaraguye uruhande rumwe igiye kungwaho,ariko RPR inkotanyi inyubakiye inzu nziza cyane nkiyi.”

Mukankusi avuga ko iyi Noheli ari ibyishimo bihebuje

Abashyikirijwe inzu ni babiri mu karere ka Ngoma na batatu mu karere ka Rwamagana.

Bose bashimye cyane umuryango RPF Inkotanyi, bavuga ko batazibagirwa iyi Noheli y’uyu mwaka wa 2016.

Uhagarariye umuryango RPF Inkotanyi ku rwego rw’intara y’Iburasirazuba akaba n’umuyobozi w’iyi ntara Kazayire Judith,yashimye cyane aba banyamuryango ubwitange bagize.

Yabasabye kandi kudaherukira aha, ahubwo bagakomeza ibikorwa byiza nk’ib.

Ati”Turashima uwo mutima wa kimuntu wabaranze.

Ibikorwa nk’ibi bihindura ubuzima bw’abaturage bigomba gukomeza.twubake umuco wo gufasha no kuremerana,kuko abatishoboye bagihari benshi.”

Inzu zatanzwe zirimo ibikoresho by’ibanze

Umuyobozi w’intara y’Iburasirazuba yavuze ko umuryango RPF Inkotanyi utahwemye gushaka icyateza imbere umunyarwanda.

Yibukije abaturage ko urugero rwiza baruhabwa n’umuyobozi wawo Perezida Paul Kagame buri gihe ufata iyambere.

Inzu eshanu zahawe abatishoboye zifite agaciro ka miliyoni 47.391.600 RWf. Zashyikirijwe abo zubakiwe kuri uyu wa 24 Ukuboza 2016.

Abahawe inzu barashimira cyane umuryango FPR-Inkotanyi

Ikorwa ry’uyu muhanda Kazo-Mutendeli ryitezweho kongera gusubukura ubuhahirane n’akarere ka Kirehe bwari bwaradindiye

Uyu muhanda uri mu Karere ka Ngoma, ukaba uhuza umurenge wa Mutendeli wo muri ako karere n’wa Gahara uri mu Karere ka Kirehe.

Abaturage bo muri uwo murenge bahamya ko utarangirika wanyuragamo imodoka zitwara abagenzi zizwi nka “Twegerane”. Bawukoresha bagiye mu isoko rya Gahara iri muri Kirehe.

Kuri ubu iyo ugeze muri uwo muhanda ubona harimo ibimashini byabugenewe biri kuwukora, bikuramo ibitaka ngo biwusize neza wongere kuba nyabagendwa.

Abatuye umurenge wa Mutendeli bavuga ko kuba uyu muhanda watangiye gukorwa bigiye kubafasha kongera guhahirana nabo mu karere ka Kirehe bityo biteze imbere kuko imodoka zizajya zijyayo uko byari bisanzwe.

Sindizera Isloni, utuye mu murenge wa Mutendeli avuga ko kuva uwo muhanda wakwangirika, batorohewe no guhahirana n’abo mu karere ka Kirehe kubera umuhanda amubi.

Agira ati “Ubuhahirane burasa naho bwari bwarahagaze kuko nta modoka yari ikijyayo keretse Bisi (Bus) nayo ijyayo inshuro nke.

Ubundi mu isoko rya Gahara duhahirayo ibiribwa, habayo n’amatungo ahendutse ni isoko rishyuha twaremaga. Ubu kujyayo bidusaba kugenda n’amaguru ugaca mu byambu.”

Ruzindana Laurent umushoferi wa “Twegerane” avuga ko bamaze umwaka barahagaritse kujya i Gahara kubera umuhanda mubi wangiritse.
Uyu mushoferi avuga ko yahagaritse kujyayo nyuma yuko agiyeyo maze ububi bw’uyu muhanda bugatuma imodoka ye yangirika rasoro, akayikorehsa ku bihumbi 100RWf.

Agira ati “Uriya muhanda wari warangiritse cyane kuburyo twahisemo kureka kujyayo. Ubundi twajyagayo kenshi rwose imodoka wasangaga ari urujya n’uruza ariko ubu zarahagaze keretse Bisi gusa.”

Umuyobozi bw’umurenge wa Mutendeli, Muragijemungu Archades avuga ko ikibazo cy’uyu muhanda kiri munzira zo gukemurwa kuko watangiye gukorwa.

Agira ati “Uyu muhanda wari ikibazo gikomeye kubuhahirane hagati yacu ndetse nabo mu karere ka Kirehe mu murenge wa Gahara.

Abaturage bacu bashoragayo ibitoki n’imyaka mu gihe baguragayo inanasi n’amatungo byose bikabafasha kwiteza imbere. Ubu watangiye gukorwa kandi turizera ko ingendo ziza kongera gusubukurwa mu minsi mike.”

Umuhanda uri gukorwa ufite ibilometero 17, Ibikorwa byo kuwusana bizamara amezi atandatu, aho uzuzura utwaye 798,990,000 Frw.

Ubumenyi bahawe buzabazamura

Bigishijwe kubufatanye n’igihugu cy’Ubudage mugihe cy’amezi icumi imyuga y’ubwubatsi nko gusiga amarangi,gusasa amakaro no kubaka inzu ukayihagarika.

Bigishijwe mu buryo bwigishwa mu budage buzwi nka “Dual system”aho igihe umunyeshuri amara yigishwa mu ishuri kingana n’igihe amara abyigishwa mu ngiro.

Umuyobozi mukuru wungurije mu kigo cy’igihugu gishinzwe guteza imbere ubumenyi ngiro WDA,Nsengiyumva Irené avuga ko ubu buryo bwo kwigisha imyuga butanga icyizere cy’uko abajya ku isoko ry’umurimo baba bashoboye.

Ibi kandi ngo bizatuma bagabanya umubare w’abanyamahanga batumizwa kubaka mu Rwanda.

Yagize ati”Bize amezi 5 mu ishuri andi 5 bayigira ahakorerwa imirimo itandukanye y’ubwubatsi.

Nsengiyumva Irené umuyobozi wungirije muri WDA

Ni ingamba za politike y’uburezi zo kugira ngo dushobore koko kubona abantu barangiza kwiga umwuga, bashoboye.”

Ndagijimana Patrick wize kubaka amakaro,avuga ko amasomo bize yatumye aho bagiye kwimenyereza mu bigo by’ubwubatsi, ubundi bakoreshaga abanyamahanga,babwira ko nabo bashoboye nkabo.

Ati “Nize kubaka amakaro no kuyakorera amasuku, ubu ndabizi neza.
Nta bwoba mfite, niteguye guhangana n’abandi yaba abanyakenya, abagande n’abandi banyamahanga, kukoabo nabonye twakoranye ntacyo bandusha.”

Stefan Schell ushinzwe Ubutwererane muri Ambassade y’Ubudage mu Rwanda avuga ko ubu buryo bwo kwigisha imyuga bwatanze umusaruro mu gihugu cy’Ubudage.

Avuga ko no mu Rwanda buzafasha ari nayo mpamvu bateganya gukomeza guhugura benshi.

Eng. Musonera Célestin Umuyobozi mukuru wa IPRC East ahatangirijwe iyi gahunda mu Rwanda,avuga ko igifasha abanyeshuri ari uguhabwa umwanya uhagije wo kwimenyereza.

Barashima Perezida Kagame gahunda ya Girinka yabagejejeho

Iyi modoka yo mu bwoko bwa fuso bagabiwe na perezida wa Repubulika Paul Kagame,yashyikirijwe abanyamuryango Gicurasi 2015 ngo ijye ibafasha mu gukusanya no kugeza umusaruro wabo ku isoko.

Muri uyu mwaka iyi modoka yungutse miliyoni 85, arinazo zavuyemo izi nka, andi miliyoni 40 agabanywa abanyamuryango nk’ubwasisi.

Abahawe izi nka bashima perezida wa repubulika Paul Kagame kuri gahunda ya Girinka yatangije, ikaba imaze kuba umuco mu banyarwanda, nk’uko Mukarusagara Marigarita abivuga.

Yagize ati”Ndashimira Paul Kagame umpaye inka, ubu ngiye kunywa amata mbonye ifumbire. Nanjye ngiye kwiteza imbere nongera umusaruro w’ubuhinzi ndetse mbe nagurisha amata.”

Nyirabahoro Theopiste umwe mu banyamuryango b’iyi koperative avuga ko gushyigikira gahunda ya Girinka, aribwo buryo bumva bashimiramo Perezida Kagame imodoka yabahaye.

Ati”Ntacyo adukeneyeho,ntakeneye inka ngo tumufashe ariko iyo abonye gahunda nziza yatekerereje abanyarwanda zagezweho tuba twumva twamwituye kandi tunezerewe kubw’ibyo.”

Umuyobozi w’ikigo cy’igihugu gishinzwe guteza imbere amakoperative RCA, Apolo Munanura yashimye iyi koperative uburyo yatejeje imbere abanyamuryango.

Imodoka bahawe na Perezida Kagame

Avuga ko igiye kuba ishuri andi makoperative aza kwigiraho kubera iterambere ryivugira iyi koperative imaze kwigezaho, kubera ubuyobozi bwayo bwiza.

Umuyobozi w’akarere ka Kirehe Muzungu Gerard, yasabye aba banyamuryango gukomeza kwaguka bareba kure kurushaho,kugirango nyuma y’ikawa banorore inka.

Akomeza avuga ko korora byabafasha kubona ifumbire bakarushaho kongera umusaruronkandi kandi zikanabaha umukamo ubukungu bugakomeza kwiyongera.

Koperative COCAMU ubu ifite abanyamuryango 585, muri uyu mwaka wa 2016 ikaba yarasaruye toni 1099 za kawa batunganirije ku ruganda rwabo, bakayigurisha

Ahubatswe ikiyaga ndetse n’ibigega banyirubutaka bishyuza ingurane.

Aba baturage bavuga ko bari babariwe amafaranga yo kwishyurwa kubera amasambu yabo yakoreshejwe bubakaho icyuzi n’ibigega bizajya byifashishwa mu kuhira hegitari 300 i musozi mu Murenge wa Rurenge Akarere ka Ngoma.

Uyu mushinga watashywe kumugaragaro tariki 28 Ugushyingo 2016 n’umunyamabanga wa leta ushinzwe ubuhinzi muri Minisiteri y’Ubuhinzi n’Ubworozi.

Karangwa Theobard utuye mu Kagali ka Rujambara ahubatswe uyu mushinga, avuga ko bari bamubariye ko agomba kwishyura ibihumbi 400Frw ariko ari ku ifishi ntiyahura nari mu mashine.

Nubwo bashima ko uyu mushinga uje kubafasha basaba ko n’ikijyanye no guhabwa ingurane cyarangira.

Yagize ati “Natunguwe no kumva bambwiye ko ayo babona mu mashini bidahura, ngiye kubihinduza bambwira ngo ni ibihumbi 300Frw. Indi sambu mfite bagombaga kumpa ibihumbi 7500Frw ngiye barambwira ngo handitse ibihumbi birindwi na 500.”

Munyagitarama Donat utuye mu kagali ka Rujambara Umurenge wa Rurenge, avuga ko yabariwe ibyangirijwe bikagera ku bihumbi 200Frw, yatanze ibyangombwa bisaba kuva mu kwezi kwa Ukwakira 2015 umwaka urashize atishyurwa kandi abandi bishyurwa.

Ati “Badutumyeho batubwira ko tugomba kuzana icyangombwa kigaragaza ibyangirijwe,none twagiye ku murenge ushinzwe ubutaka atubwira ko icyo cyangombwa batakiduha, batubwiye ko bigiye gukemuka ubu turategereje.”

Nyamutera Emmanuel umunyamabanga nshingwabikorwa w’Umurenge wa Rurenge ahakorerwa uyu mushinga wo kuhira imyaka leta y’u Rwanda ifashwamo n’igihugu cy’u Buyapani, avuga ko hari amafishe yajemo ibibazo no kwibeshya ko icyo kibazo cyatangiwe raporo bigakosorwa kuburyo hagiye gutangwa amafaranga miliyoni esheshatu azahabwa abatarayabona bayakwiye.

Umunyamabanga wa leta muri Minisiteri y’Ubuhinzi n’UUbworozi ushinzwe ubuhinzi, Nsengiyumva Flugence, yavuze ko abaturage bagomba guhabwa ingurane zabo ko n’abatarayabona babariwe bigikurikiranwa.

Abantu 31 niba bagaragazwa ko batangiwe raporo ko amafaranga babariwe ku mafishi atandukanye nayoherejwe.

Umushinga wo kuhira imyaka kuri hegitari 300 mu Murenge wa Rurenge Akarere ka Ngoma wuzuye utwaye miliyoni zirenga 13 z’amadolari zatanzwe n’igihugu cy’u Buyapani binyuze mu kigega JICA.

State Minister Nsengiyumva Flugence arasaba abaturage kudapfusha ubusa amahirwe babonye

Uyu mushinga watewe inkunga n’igihugu cy’Ubuyapani binyuze mu mushimga JICA uje ngo ufashe abahinzi bari bafite ikibazo cy’izuba ryinshi ryangiza imyaka i musozi, ntibabashe kweza.

Karangwa Theobard umwe mu bafite isambu izuhirwa, avuga ko nk’abaturage babyishimiye cyane kuko bagiye kujya bahinga badafite impungenge z’izuba.

Yagize ati”Badusobanuriye ko tuzajya twuhira maze tugahinga igihe cyose izuba ntiryongere kwangiriza imyaka yacu ngo yume kuko tuzaba tuyuhira.Turashima ubuyobozi bwiza.”

Umunyamabanga nshingwabikorwa w’intara y’Iburasirazuba Makombe JMV yasabye aba baturage kubyaza umusaruro amahirwe bahawe.

Yabasabye kwita kuri ibyo bikorwa remezo, kandi baharanira guhinga neza kinyamwuga kugira ngo umusaruro witezwe kuri uyu mushinga uzaboneke neza.

Muri uyu mushinga hazajya hifashishwa amashanyarazi atangwa n’izuba

Nakaaki Shintaro waje uhagarariye ambasaderi w’ubuyapani mu Rwanda,yavuze ko bishimira ko igihe bari barihaye ngo umushinga ushyirwe mu bikorwa, bacyubahirije.

Avuga kandi ko witezweho guteza imbere abahinzi mu karere ka Ngoma.

Umunyamabanga wa leta ushinzwe ubuhinzi muri minisiteri y’ubuhinzi n’ubworozi Nsengiyumva Flugence,yavuze ko uyu mushinga uje usubiza ibibazo by’abahinzi b’iyi mirenge.

Avuga ko wakiriwe byagateganyo, kandi ko hari ibikorwa bigikomeza, ukazakirwa ku buryo bwa burundu nyuma y’umwaka hamaze kurebwa ko ukoze neza.

Ati”Uyu mushinga uje ari igisubizo cyo guhangan n’ibibazo by’ihindagurika ry’ikirere,tuwitezeho umusaruro utubutse.Ni amahirwe tutagomba kwitesha ngo tuyapfushe ubusa rero.
Ni umushinga ugikomeza kugirango ube umushinga urambye kandi ufitiye abaturage akamaro.”

Ikiyaga cyahanzwe ngo kijye gifasha mu kuvomamo amazi yuhira imyaka

Uyu mushinga wahaye akazi abaturage ibihumbi bine na 700. Wuzuye utwaye miliyoni 13,215,596 z’amadolari.

Umushinga JICA watanze iyi nkunga, ufasha mu bikorwa bitandukanye by’ubuhinzi, kwegereza amazi meza abaturage n’ibindi.

Ikipe Etoile de l’Est itegereje ko ikibuga yemerewe cyubakwa iracyakinira ku kidatunganyije

Iyi kipe ubusanzwe yahabwaga miliyoni 10 yo gukoresha muri shampiyona,none igiye kujya ihabwa miliyoni 25 muri shampiyona imwe.

Ni nyuma y’uko ikipe y’intara y’Iburasirazuba yajyaga ihabwa aya mafaranga, igizwe ikipe y’akarere ka Nyagatare gusa, aya mafaranga ikaba itazongera kuyahabwa.

Umunyamabanga mukuru wa Etoile de l’Est Jean Bosco Rutagengwa,avuga ko bigeye kubafasha kuko ubushobozi buke bwari imbogamizi yo kujya mu kiciro cya kabiri.

Yagize ati”Ikipe kugirango ikomere ni amafaranga,turumva tugiye gukora ibishoboka byose iyi kipe ikajya mu cyiciro cya mbere.”

Rutagengwa avuga ko bafite amafaranga babasha kugura abakinnyi bakomeye,kandi abakinnyi bakabaho mu buzima bwiza, bakabasha gutanga umusaruro.

Avuga ko zimwe mu mbogamizi bagifite ari ugutinda kw’aya mafaranga bemererwa n’akarere aho shampiyona ubu yatangiye nta faranga na rimwe bahawe.

Kugera ubu ngo batunzwe n’ubushobozi bw’abafana b’iyi kipe.

Perezida w’inama njyanama y’akarere ka Ngoma,Banamwana Bernard,we avuga ko hakwiye amavugurura muri komite y’iyi kipe kugirango ayo mafaranga azarusheho gutanga umusaruro.

Nambaje Aphrodise,umuyobozi w’akarere ka Ngoma avuga ko icyuko iyobowe atabitindaho kuko ababonamo ubwitange bukomeye kugera aho hari n’abagurishaga amatungo ngo ibashe gukomeza.

Ati”Ntabwo nyishinja kuyoborwa nabi kuko iyo iza kuba iyobowe nabi iba itakiriho,hari n’abayiyoboye batanga inka zabo.
Turanatekereza no kurenzaho kugirango twubake ikipe ikomeye.”

Ikipe ya Etoile de l’Est mu mwaka wa shampiyona ushize,kuri tike yo kujya mu cyiciro cya mbere yaviriyemo mukino wa nyuma.

Yakuwemo n’ikipe ya Kirehe FC ubu iri mu kiciro cya mbere.

Abaturage bo muri Ngoma bifuza ko itorero ry’igihugu ryajya rihera ku bana b’incuke (Photo Archives)

Batangaje ibi ubwo muri ako karere bakusanyaga ibitekerezo kubyashyirwa mu igenamigambi ry’akarere mu mwaka wa 2017-2018.

Muri iryo kusanya bitekerezo abaturage batanze ibyifuzo bitandukanye gusezerera ubuhinzi bushingiye ku mvura ahubwo bakoroherezwa kubona imashini zuhira.

Hanyuma ibishanga n’ibibaya bidatunganijwe byose bigakorwa kugira ngo hongerwe umusaruro udashingiye ku kirere.

Uretse ubuhinzi no kubaka inganda zitunganya umusaruro w’ubuhinzi wabwo, abaturage basabye ko mu igenamigambi rya 2017-2018 hatekerezwa buryo abana kuva ku ncuke bajyanwa mu itorero ry’igihugu mu gihe cy’ibiruhuko.

Abaturage bo mu Karere ka Ngoma bahamya ko bigenze gutyo abana bakurana umuco wo gukunda iguhugu.

Ubusanzwe Itorero rijyagamo abantu b’ingeri zitandukanye, guhera ku banyeshuri baba barangije amashuri yisumbuye.

Guverineri Kazayire asaba abaturage kuzafasha ubuyobozi gushyira mu bikorwa ibyo bihitiyemo

Perezida wa Njyanama y’akarere ka Ngoma, Banamwana Bernard avuga ko ibitekerezo babonye byavuye mu baturage byaberetse ko abaturage bamaze kugera ku myumvire yo hejuru.

Agira ati “Twaratunguwe! Kandi ibitekerezo byabo byaradukanguye. Ni ibitekerezo byiza cyane, cyane rwose byavuye mu baturage.

Ibi biratwereka ko gahunda za leta zigisha abaturage, abaturage bazisobanukiwe ko kandi kuba byarabaturutsemo baniteguye gufasha ubuyobozi kubishyira mu bikorwa bityo iterambere rikihuta.”

Umuyobozi w’akarere ka Ngoma, Nambaje Aphrodise avuga ko bazashyira imbaraga mu ishyirwa mu bikorwa ry’igenamigambi ryishyiriweho n’abaturage bashingiye kubyo bakeneye byabafasha gutera imbere.

Agira ati “Harimo byinshi tubona bizihutisha iterambere ry’abaturage. Iyo ubona ibikorwa nk’amashanayarazi, kwebegerezwa amazi meza, kuhira imyaka n’ibindi ubona ko bizagabanya imibare y’ikigero cy’ubukene ku baturage bacu.”

Abaturage baributswa ko bagomba kugira uruhare mu gushyira mu bikorwa igenamigambi n’imihigo bagizemo uruhare kugira ngo bafatanye n’ubuyobozi; Guverineri w’Intara y’Iburasirazuba, Judith Kazayire abisobanura.

Agira ati “Nkabafatanyabikorwa bacu bakomeye, abaturage turabasaba gushyiramo ingufu mu gushyira mu bikorwa ibyo bihitiyemo,ntibigarukire mu gutanga ibitekerezo gusa.

Niba ari umusaruro mu buhinzi buri wese aharanire ko yagira umusaruro mwiza, uzagera ku isoko mpuzamahanga.”

Uyu mukecuru avuga ko nta bushobozi afite bwo kubuza imvura kugwa

Uyu mukecuru w’imyaka 71 w’amavuko avuga ko ku itariki ya 05 Ugushyingo 2016, yakubiswe n’abaturage, bamubwira ko ariwe watumye imvura itagwa mu kagari kabo kandi ahandi ihagwa.

Tariki ya 07 Ugushyingo 2016, Nyirangaruye yagiye ku Karere ka Ngoma gusaba ko yarenganurwa kuko ngo ntabubasha afite bwo kubuza imvura kugwa kandi ngo naho yabugira atayihagarika nawe akeneye guhinga akeza.

Agira ati “Ndabona tuzajya dukubitwa buri mwaka.Ubu ibikanu barabikebanuye bandaramisha ku ngufu, ngo nindeba hejuru imvura iragwa. Buri mwaka bibaho. Ubuse koko tuzajya dukubitwa buri mwaka tuzira ubusa?”

Nyirangaruye avuga ko atari ubwa mbere ahohoterwa kuko no muri 2015 byarabaye; nkuko bigaragara mu rupapuro afite rwasinyweho na komite y’ubuyobozi bw’umudugudu atuyemo wa Nyamuhinda

Mu kagari k’Akagarama atuyemo ngo hashize amezi nta mvura ihagwa kandi mu tundi tugari baturanye ihagwa bisanzwe.

Gusa ariko ubuyobozi bw’ako kagari buhakana ibyo uwo mukecuru avuga ko yakubiswe n’abaturage. Ariko bukemeza ko muri aka kagari hari abagifite imyumvire yo kumva ko abavubyi babaho.

Ubu buyobozi buvuga ko bwigishije abaturage guhindura iyo myumvire, babasaba kutagira uwo bazakubita bamwita ko ari umuvubyi.

Nyamutera Emmanuel, uyobora Umurenge wa Rurenge nawe avuga ko ayo makuru y’ihohoterwa rya Nyirangaruye atayazi.

Yemeza ko agiye gukurikirana ko kandi uwo byagaragara ko ahohotera mugenzi we yitwaje ubuvubyi yashyikirizwa ubutabera.

Agira ati “Icyo kibazo ntacyo nzi uretse ko n’imvura hano hose yaguye. Baba bamukubita se ngo avushe izuba?

Gusa ngiye gukurikirana hagize uwo bigaragaraho yabihanirwa kuko byaba ari umubeshyera nta muntu wategeka imvura kugwa.”

Si muri uyu murenge wonyine havugwa ikibazo cy’abakubitwa bitwa abavubyi kuko no mu Murenge wa Kazo n’ahandi mu karere humvikana amakuru agaragaza imyumvire yuko hari abantu babuza imvura kugwa.

Muri uyu mugezi w’Akagera niho habamo imvubu zonera abaturage

Abaturage bafite ikibazo ni abo mu Kagari ka Karenge. Nkuko Turikumwenimana Leopord uhatuye avuga ko imvubu yamwoneye umurima uhinzemo ibigori, kuburyo ngo ntacyo azasarura.

Agira ati “Imvubu hano ziratwonera cyane pe! Nkanjye umurima w’ibigori nari nashoyemo ibihumbi 40Rwf zarawonnye urashira ubu ntacyo nzasarura. Nubu tuyisize hariya ruguru mu gishanga ubu yakamejeje.”

Akomeza avuga ko batazi aho babariza ikibazo cyabo ariko ngo abonewe bari kwishyira hamwe ngo bajyane ikibazo cyabo mu byobozi.

Agira ati “Ubuse imvubu ikoneye wajya kubariza he? Inyamaswa se wayirega he? Turi kwikusanya abo yoneye ngo tujye kubivuga mu buyobozi bayidukize.”

Mugenzi we witwa Ntamitondero Eugenie avuga ko zamwoneye imirima ye ibiri ageza ikibazo cye kuri agoronome w’umurenge wabo.

Aba baturage bavuga ko niba ntagikozwe iyo mvubu izabateza inzara kuko aho inyuze ntacyo basarura.

Agira ati”Dufite impungenge nuko zishobora kurya n’abantu. Isambu yanjye nari maze kugura ibihumbi 500 yaraje irona burundu kandi sinjye gusa hari n’abandi zoneye.”

Imvubu ziri kubonera ngo ziri gutuma umusaruro ukomeza kuba muke

Umuyobozi w’Umurenge wa Jarama, Mulisa Japhet avuga ko icyo kibazo bacyumvaga ariko ntawuraza avuga ko yonewe.

Mulisa yizeza ko ubuyobozi bw’umurenge bugiye gukurikirana iki kibazo abonewe bagakorerwa ubuvugizi mu kigo cy’igihugu cy’iterambere (RDB) kugira ngo kizabishyure.

Agira ati “Njye mu myaka ibiri ishize nta mvubu nari numva ko yambutse ikanagera mu baturage,dusanze hari abangiririjwe birumvikana hazabaho gutanga raporo muri RDB tugaragaza ibyangijwe n’izo nyamaswa hanyuma bakishyurwa.”

RDB yishyura abaturage bangirijwe n’inyamaswa habanje gukorwa raporo igaragaza ibyangirijwe n’agaciro kabyo.

Abayobozi b’imidugudu basinya imihigo na buri rugo ruhatuye.

Kugenzura ishyirwa mu bikorwa ry’aho ingo zigeze zesa imihigo zahize no kujya inama ahari imbogamizi, bitangiye uyu mwaka wa 2016. Bikorwa n’ubuyobozi bw’akagari bugera muri buri rugo buri mezi atatu muri aka kagari ka Gatonde Umurenge wa Kibungo,Akarere ka Ngoma.

Umwaka ushize w’ubwisungane mu kwivuza wa 2015-2016 warangiye aka kagari kari kuri 82%. Ariko kubera iyi gahuda yatangijwe ngo bizeye ko uyu mwaka uzarangira bageze kuri 99%, kuko ubu bageze kuri 97,8%.

Ubundi abaturage bahigaga imihigo y’ingo,ariko akenshi ngo bigahera mu ikayi bahigiyemo kuko ntawakurikiranaga ngo ababe hafi aho bahuye n’ingorane abafashe.

Rutayisire Philippe utuye mu Mudugudu wa Nyakabungo Akagari ka Gatonde, avuga ko bataratangira kugira imihigo y’urugo wasangaga ubonye amafaranga ayanywera ntiyibuke kuzigama.

Agira ati “Iyi kayi y’imihigo ni nziza cyane yatumye twiteza imbere kuko ubu ntawangiza amafaranga kuko aba agomba kuzigama, kugira ngo ashobore kuzesa umuhigo yiyemeje mu rugo rwe.

Nkanjye ubu nahize gutanga ubwisungane ku muryango wose narabikoze,nahize kubaka inzu none nyigeze kure.Guhiga ni byiza cyane iyi kayi y’imihigo irafasha cyane.”

Ubuyobozi bw’aka kagali buvuga ko mu mihigo abaturage bahiga mu ngo bahera ku gutanga ubwisungane mu kwivuza,ari nayo mpamvu byazamuye ubwitabire bukagera kuri 97,8% muri uku kwezi k’Ukwakira 2016.

Nkerabera Cyprien,Umunyamabanga nshingwabikorwa w’Akagari ka Gatonde, ati “Turagenda tukagera mu rugo tukamubaza ikayi y’imihigo akatwereka ibyo amaze kugeraho muri iyo mihigo yihigiye, ibyo atarageraho tukamugira inama y’uburyo yabigeraho.

Bitanga umusaruro cyane,kuko imihigo y’urugo igize igice kinini cy’imihigo duhiga nk’akarere.Urumva ko biramutse bigenze neza mu ngo bituma twesa neza imihigo ku rwego rw’akarere.”

Ubuyobozi bw’Akagari ka Gatonde buvuga ko umuhigo w’ubwisungane mu kwivuza ari umwe mu mihigo yabagoraga kuwesa neza ariko ubu babona bizajya byoroha.

Abana bagomba guhabwa indyo yuzuye mu rwego rwo kubarinda imirire mibi

Muri Ngoma abana bari munsi y’imyaka itanu bafite ikibazo cy’imirire mibi bari ku kigero cya 41%. Mu gihe ku rwego rw’igihugu bari ku kigero cya 38%.

Iyo gahunda ya “Gukuriro” ngo izagera mu mirenge yose igize Ngoma hagamijwe guhindura imyumvire y’abaturage bakamenya uko bategura indyo yuzuye, kubaka ubushobozi no gufasha imiryango ikennye.

Uzamukunda Pudencienne, umunyamabanga mukuru w’umushinga “Young women Christian Association (YWCA), uzashyira mu bikorwa gahunda ya “Gikuriro”, avuga yizeye ko iyo gahunda izagabanya imirire mibi mu bana.

Agira ati “Uburyo tugiye gukora ni uburyo bugera k’umuturage akagiramo uruhare, tukegera umuturage tunyuze ku bajyanama b’ubuzima, abafashamyumvire, n’abandi.

Tuzajya dufasha imryango yagaragawemo ikibazo cy’imirire mibi, abagore batwite n’abana bari munsi y’imyaka itanu batishoboye, babumbirwa mu batsinda yo kwizigamira, bafashwa mu bworozi n’ibindi.”

Akomeza avuga ko iyo gahunda yashowemo ibihumbi 242.112 by’Amadolari y’Amerika, arenga miliyoni 190 RWf, azifashishwa mu mwaka wa 2016-2017. Iyo gahunda izamara imyaka itanu.

Abahanga mu by’ubuzima bahamya ko imirire mibi ku mwana ituma adakura neza bikamuviramo kugwingira. Kandi ngo iyo umwana agwingiye ku mubiri, agwingira no mu bwenge.

Kuba ariko ngo hakiri imiryango igaragaramo abana bafite ikibazo cy’imirire mibi kandi bafite ibyo kurya, bituruka ku kutamenya gutegura indyo yuzuye igenwwe umwana, irimo ibitunga, umubiri, ibitera imbere n’ibirinda umubiri.

Niyo mpamvu ubuyobozi bw’Akarere ka Ngoma busaba umuryango YWCA kuzakora neza ugashyira mu bikorwa ibyo wiyemeje, ukarandukara imirire mibi muri ako karere; Nambaje Aphrodise, umuyobozi w’ako karere abivuga.

Agira ati “Ntacyo byaba bimaze umuntu atekereje kugikorwa cyiza cy’ubumuntu bikazarangira abagikora aribo babyibushye naho umugenerwabikorwa ariwe muturage akiri hahandi mu bukene.”

Gahunda ya “Gikuriro” cyangwa “Gikundiro Program” izakorwa ku nkunga y’umushinga USAID ifatanyine n’imishinga nka CRS, SNV na YWCA izashyira mu bikorwa iyi gahunda.

Kuba serivise z’ibihugu bibiri zitangirwa kuri buri ruhande byoroheje serivise bituma urujya n’uruza rwiyongera ku bantu no ku bicurizwa ku mupaka wa Rusumo

One stop Border post ni umupaka wubatswe uhuza ibihugu byombi, aho serivise zo kwinjira no gusohoka mu gihugu zitangirwa hamwe.

Ibi bigabanya umwanya abantu bakoreshaga basinyisha mu gihugu kimwe, bagakomeza bajya gusinyisha mu kindi.

One stop Border Post itarubakwa Rusumo, umupaka wakiraga ku munsi abantu 800.
Nyuma yo kuyubaka serivise zikegeranywa, hakirwa ku munsi abagera ku 1300 hakanambuka amakamyo asaga 156.

Urujya n’uruza rw’ubucuruzi n’abantu byariyongereye ku mupaka wa Rusumo

Musoni William komiseri wungirije wa Gasutamo, avuga ko kubaka iyi gasutamo byazanye impinduka nyinshi nziza.

Yagize ati” Mbere ikamyo yamaraga iminsi icumi mu nzira iva ku cyambu cya Dar es lam kubera gutinda kuri gasutamo.

Ubu aho byoroherejwe ikamyo imara iminsi ine gusa, kuburyo inshuro bazana ibicuruzwa mu kwezi kumwe ziyongereye.”

Salum Reword umushoferi utwara ibicuruzwa mu ikamyo iva Dar Es lam kuva mu mwaka wa 2007, yemeza ko kubaka uyu mupaka byoroheje serivise cyane kuko batagitinda ku mupaka.

Ati”Mbere washoboraga kumara amasaha ane arenga usinyisha ibyangombwa, ariko ubu ni iminota 30 gusa bikaba birarangiye ugakomeza urugendo.”

Kalisa Moses uyobora Gasutamo ya Rusumo, yemeza ko guhuza imipaka hubakwa One Stop Border post, byakuyeho imbogaminzi mu ngendo zambukiranyaga uyu mupaka.

Ati” Ikiraro cyubatswe cyatumye imodoka ebyiri zibisikana, mu gihe mbere imwe yategerezaga indi ko yambuka bigatinza urujya n’uruza”.

Ubu umuntu amara umunota umwe gusa akaba ahawe serivise ku bihugu byombi, kandi n’amasaha yo gukora yarongerewe ubu akazi karangire saa yine z’ijoro”.

One Stop Border Post ya Rusumo yubatswe ku nkunga ya miliyoni 48 z’amadolari y’Amerika yatanzwe n’igihugu cy’Ubuyapani.

Ambasaderi w’ubuyapani mu Rwanda avuga ko igihugu ke cyisimira ko inkunga cyatanze mu mushinga wo kubaka One Stop Boerder Post y’ubakwe hanubakwe ikiraro kigezweho

Kuri uyu wa 12 Ukwakira 2016 Ambasadeli w’ubuyapani mu Rwanda TAKYUKI Miyashita ajya gusura uyu mupaka, yatangaje ko yishimira ko inkunga igihugu cye cyatanze, iri kuzana impinduka mu iterambere kuri uyu mupaka.

One stop Border Post yatangiye kubakwa mu Ukuboza 2014, itahwa tariki 06 Mata 2016 na Perezida w’u Rwanda Paul Kagame arikumwe na mugenzi we wa Tanzaniya Dr Pombe Magufuli.

Iri vuriro rimaze imyaka ine ryuzuye ariko ridatangira guha serivisi abaturage

Ruhumuriza Celestin, utuye mu mudugudu wa Rwanyamuhinda muri ako kagari, mu murenge wa Rurenge yibaza icyo ubuyobozi buteganya nyamara ubwo bayubakaga barizezwaga ko izahita itangira gukora. Kuva aho ryuzuriye muri 2012 ntiryigize rikora n’umunsi n’umwe.

Agira ati “Abaturage twubatse ‘Poste de Santé’ (ivuriro riciriritse) ariko imaze imyaka ine yuzuye, idatangira gukora. Njye nasabaga ko ba nyakubahwa babyeyi bacu ko yatangira gukora tukaruhuka kwivuza kure.”

Abaturage bavuga ko akagari kabo nta rindi vuriro kagira. Ibyo bituma bakora urugendo rw’amasaha abiri bajya kwivuriza ku kigo nderabuzima cya Kirwa cyangwa ku bitaro bya Kibungo.

Ibyo ngo birabagora bigatuma bamwe barembera mu rugo. Ababyeyi bagiye kubyara bo ngo nibo bahura n’ibibazo kuko babyarira mu nziza cyangwa mu rugo kuburyo bashobora kuhasiga ubuzima.

Aba baturage bahamya ko iryo vuriro begerejwe ritangiye gukora bakwivuza hafi ubuzima bwabo bukarusho kumera neza.

Nambaje Aphrodise, umuyobozi w’Akarere ka Ngoma avuga ko impamvu iryo vuriro ryatinze gutangira gukora bari bagishaka uburyo bunoze ryatangira gukoreramo.

Agira ati “Kimwe n’izindi ‘Poste de Santé’ esheshatu, twazikoreye ubuvugizi muri Minisiteri y’Ubuzima (MINISANTE) ngo iduhe ibikoresho zitangire ariko batubwira ko akarere ariko kagomba kubishaka.

Badusabye ko ariya mavuriro aciriritse ahabwa abikorera bakaba aribo bayacunga. Bihembere abakozi ariko bafitane amasezerano n’akarere.

Agira ati “Ubu dosiye z’amasezerano zo gusinya, zamaze gutegurwa, mu minsi mike turatanga amatangazo ahamagara gupiganwa.”

Poste de santé zimaze igihe zuzuye zidatangira zigiye guhabwa abikorera ni iya Nyaruvumu,Sakara,Ihanika ,Akagarama,Akabungo,Ntovi,Gitaraga.

Minisitiri w’Uburinganire n’iterambere ry’umuryango Dr. Diane Gashumba aha amata umubyeyi ufite umwana ugaragaraho imirire mibi

Ubuyobozi bw’Akarere ka Ngoma butangaza ko gahunda yiswe Igikoni cy’umudugudu, yagabanyije cyane imibare y’abana bibasirwaga n’imirire mibi.

Iyi gahunda yatangijwe mu kwezi kwa Kamena 2013 abana bibasiwe n’imirire mibi bagera kuri kuri 208.

Nyuma y’imyaka itatu iyi gahunda ishyirwa mu bikorwa, imibare igaragaza ko mu kwezi kwa Kanama 2016, hari hasigaye abana 81 basigaranye iki kibazo.

Imwe mu ntwaro yifashishijwe mu kugabanya uyu mubare ngo ni ukwigisha abaturage uburyo bategura indyo yuzuye binyuze, muri gahunda ya Igikoni cy’umudugudu.

Ababyeyi batuye mu kagari ka Rukoma mu Murenge wa Sake, bahamya ko kurwaza bwaki n’izindi ndwara z’imirire mibi babiterwaga n’ubujiji.

Uwamurera Claudine yagize ati” Imboga turazihinga, imbuto turazeza, ariko ntitwabihaga abana uko bikwiye kuko ntabumenyi twari dufite ku kamaro kanini bibafitiye.”

Mukarushema umwe mu babyeyi barwaje indwara z’imirire mibi nyuma yo gufata inyigisho muri gahunda ya Igikoni cy’umudugudu umwana we akaza gukira, nawe yemeza ko yabiterwaga n’ubujiji.

Agira ati” Ubundi umwana wasangaga muhata ibyo bitoki n’agasosi nziko ari byo byiza. Sinamenyaga ko ibishyimbo, imboga n’imbuto abikeneye cyane ngo mbimuhe kenshi”

Uyu mubyeyi akomeza avuga ko gahunda y’igikoni cy’umudugudu yamujijuye kuburyo atakongera kurwaza indwara nkizi.

Agira ati”Abajyanama b’ubuzima baranyigishije, banyigisha inombe igizwe n’ibinyamafufu, ibitera imbaraga, ibyubaka umubiri n’imbuto zirinda indwara.

Ibyo byose narabyezaga ntacyari bunsabe kujya ku isoko ariko kubera ubumenyi buke simbyiteho”.

Kirenga Providence umuyobozi wungirije w’Akarere ka Ngoma ushinzwe imibereho myiza y’abaturage, avuga ko ubukangurambaga bukomeje kugirango ikibazo cy’Imirire mibi kiranduke burundu.

Ati “ Iki kibazo kizaranduka burundu kuko tumaze kubona ko impamvu nyamukuru yacyo atari ibiribwa bibura, ahubwo ari ubumenyi buke mu kubitegura”.

Guhinga ku materasi byahinduye ubuzima bwa Kayitare

Kayitare avuga ko ubu amaze imyaka itatu ahinga ku materasi, ariko ko yamaze kubona inyungu yabyo, aho mbere atabonaga umusaruro kubera guhinga ahantu hahanamye.

Yagize ati” Ubundi narahingaga kuko isambu yanjye iri ahantu hahanamye,natera imbuto isuri ikayijyana nkeza duke.
Ariko ku materasi nibwo bwambere mu buzima nejeje imifuka icyenda y’ibigori.

Nongeyemo ibishyimbo nkuramo imifuka itatu ahantu ha metero nka 80 kuri 40.”

Kayitare avuga ko uyu musaruro yawugurishije abasha kwiteza imbere ubuzima bwe burahinduka.

Avuga ko yagurishije ibigori agakuramo amafaranga ibihumbi 280frw, yagurisha n’ibishyimbo akabasha kwiyubakira inzu.

Ati”Ubu mu myaka itatu mpinga amaterasi,nikuye munzu y’ubukode niyubakira inzu y’amabati 30,ngura inka,televiziyo n’amashanyarazi ava ku mirasire ya mobisol.”

Mu bibazo abaturage b’akarere ka Ngoma badahinga ku materasi bigeze kugaragariza ubuyobozi bwabo, harimo kuba baterwa ubwoba no guhinga muri ubu buryo.

Aba baturage bakeka ko amaterasi yangiza ubutaka.

Umuyobozi w’akarere ka Ngoma Nambaje Aphrodise avuga ko badakwiye gutinya.

Avuga ko amaterasi y’indinganire aho yakozwe habonetse umusaruro mwinshi kandi mwiza w’ibigori n’ibishyimbo,kuko ubundi isuri yajyaga itembana ubutaka bwiza n’imbuto, ntibeze.

Ati”Icyakugeza ahahinze ibigori ku materasi mugihe bigiye kwera,wahatinda urangariye ibyo byiza nyaburanga.

Ubu Remera ni ahantu babasha kwezi toni ibihumbi 62 z’ibigori na toni zisaga ibihumbi bibiri z’ibishyimbo ku mwaka.”

Gahunda yo gukora amaterasi ikorwa na minisiteri y’ubuhinzi ifatanije n’umushinga RSSP,abaturage bagakorerwa amaterasi ku buntu.

Mu murenge wa Remera,ubutaka bwahujwe ngo buhingwe igihingwa kimwe burenga hegitari ibihumbi 2000.

Aba banyamuryango bagizwe n’abafite ubumuga, bavuga ko bagiraga isoko ry’umunyamerika rikaba ryararangiye.Ubu ibihangano byabo ngo ntibikigurwa nka mbere.

Uduseke baboha ngo ntitukibona isoko kuko iryo bari bafite ryo muri Amerika ryarangiye

Barasaba ubuvugizi ahashoboka hose kugirango babashe kubona isoko bagurishe babone ikibatunga, ngo kuko bagiye mu mwuga wo kuboha uduseke banga gusabiriza.

Semasaka JMV ukorera muri iyi koperative avuga ko bagifite isoko bari bamaze gutera imbere, ubu bakaba bamaze gusubira inyuma.

Yagize ati” Umunyamerika yaduhaga 5000Frw ku gaseke kandi agatwara uduseke twinshi.
Akigenda twaramanuye dushyira ku bihumbi bitatu ariko byaranze abakiriya barabura, ubu uduseke turi gusazira aho ducururizwa.”

Musabyimana Valentine nawe ukorera muri iyi koperative, yemeza ibyo bakora bitakigurwa, agasaba ko habonetse isoko byarushaho kubateza imbere.

Ati”Tugifite isoko ryiza ntacyo naburaga. Nabashaga kurihira abanyeshuri minerivari, ariko ubu njya birangora cyane pe”.

Mujawimana Valentine, uyobora iyi koperative, nawe avuga ko kubura isoko ari imbogamizi ku iterambere ryabayigize.

Avuga ko Akarere ka Ngoma bakoreramo kumvise ikibazo cyabo kakabatera inkunga ingana na miliyoni y’amafaranga y’u Rwanda.

Ati “Akarere kaduteye inkunga, kanatwizeza kutuvuganira tukabona isoko, ariko n’undi wese Wabasha kutubonera isoko yadufasha.”

Abahinzi badafite ubushobozi bavuga ko badahabwa imbuto y’ibigori ijyanye n’ubushobozi bigatuma batera ibisanzwe bihunikiye

Abo bahinzi bavuga ko baba bashaka kugura ibigori gusa, bakabifumbiza imborera yonyine. Ariko ubuyobozi bwo bukavuga ko abahinzi bakoze ibyo umusaruro wagabuka. Ni ngombwa ko ngo bafumbiza imvaruganda kugira ngo umusaruro wiyongere.

Uwamurera Donathile, umwe mu bahinzi, avuga ko yangiwe kugura imbuto y’indobanure kuko atari aguze ifumbire mvaruganda.

Yagize ati “Njyewe ubu ndimo guhinga ibigori bisanzwe nejeje nabitseho imbuto kuko biriya byiza bagurisha byarananije ndabireka. Ndi umukene nagiye kugura ibigori bantegeka ngo ngure umufuka w’ifumbire mvaruganda kandi ntayo (amafaranga) mfite!

Njye nashakaga imbuto y’ibigori yenda bakampa n’ibiro bibiri by’iyo mvaruganda gusa. Ubundi nkazakoresha imborera ariko baranze.”

Ifumbire mvaruganda abahinzi basabwa kugura ni iyitwa DAP na UREA. Mu rwego rwo korohereza abahinzi kugura iyo fumbire, Leta ibishyurira ½ cy’amafaranga ayiguze.

Umuyobozi w’umurenge wa Sake avuga ko abashaka kugura ifumbire nke ari abashaka kudindiza gahunda Leta

Ubuyobozi bw’umurenge wa Sake ntibwemerera abahinzi kugura imvaruganda ku bilo. Bemerewe kugura umufuka wose w’iyo fumbire, ungana n’ibilo 50.

Ifumbire mvaruganda ya DAP igura 410FRw ku kilo naho iya UREA igura 355 FRw ku kilo. Imbuto y’ibigori abahinzi basabwa kugura, yo igura 310FRw ku kilo.

Abo bahinzi bahera aho bavuga ko batabona amafaranga yo kugura imifuka y’ayo mafumbire n’imbuto y’ibigori.

Bavuga ko bahinga mu mirima baba bakodesheje. Bagahamya ko baramutse bafashe n’ideni muri banki ryo kugura iyo fumbire, batabasha kuryishyura.

Umuyobozi w’umurenge wa Sake, Mukayiranga Gloriose, avuga ko imbuto n’ifumbire bitangwa ku bahinzi hakurikijwe ubuso bagaragaje bashaka guhingaho.

Agira ati “Ntibikwiye ko hagira ugabanya ifumbire kuko uba ugabanije umusaruro. Ukoresheje ifumbire nke yeza bike akadindiza gahunda yo guhuza ubutaka ngo basarure byinshi ku buso buto.”

Akomeza avuga ko abahinzi bubahirije ayo mabwiriza beza toni esheshatu z’ibigori kuri hegitari. Abatayubahirije bo ngo beza toni eshatu gusa.

Abahugukiwe iby’ubuhinzi bavuga ko ushaka guhinga kimwe ½ cya hegitari, agura ibilo 50 bya DAP n’ibiro 24 bya UREA. Byose hamwe byatwara arenga ibihumbi 29FRw, amafaranga abahinzi bamwe bo muri Sake bavuga ko batabona.

Avuga ko yanze kwicara ngo asabirize, agahitamo kwiga kuboha ibiseke.

Semasaka avuga ko kuboha uduseke byamuteje imbere

Nyuma y’imyaka 11 abikora, avuga ko amaze kwiteza imbere kandi yanabera urugero benshi mu bafite ubumuga, bacyumva ko babeshwaho no gutega amaboko.

Agira ati” Ubu ntunze umuryango w’abantu barindwi, kandi dutuye mu nzu nziza yacu yubakishije isima, ifite ibirahure ndetse n’inzugi z’ibyuma. Byose mbikesha kuboha”.

Semasaka avuga ko atihereranye ubuhanga afite mu kuboha uduseke. Amaze kubyigisha abagore 60 n’abagabo bane nabo bafite ubumuga, kugirango nabo bikure mu bukene.

Bamwe mu bagore yatoje kuboha uduseke

Musabyimana Valentine umwe mu bagore yigishije, avuga ko byamutangaje kubona umugabo uzi kuboha uduseke, kugera naho abyigisha abagore bakagombye kuba babizi.

Yagize ati”Kubona uyu mugabo aboha ibiseke bitwereka ko ntawukwiye gusuzugura akazi.

Ubu nta mwana wanjye ukirukanwa ku ishuri ngo yabuze minerval. Ubu naguze ihene, mpahira urugo mbese uyu mwuga waramfashije cyane”.

Semasaka n’abo yatoje umwuga ubu bamaze kwibumbira muri Koperative bise “ Nawe urashoboye” bakomeje kwiteza imbere babikesha umwuga wo kuboha uduseke.

Itegeko ryo kwandikisha umwana ukivuka ryaravuguruwe

Ubusanzwe itegeko ryo kwandikisha umwana wavutse mu gitabo cy’irangamimerere, ryavugaga ko umwana wavutse agomba kwandikwa bitarenze iminsi 15 avutse. Bitagenda gutyo uwandikisha umwana akanyura imbere y’urukiko, bakabona kumwandika.

Ariko mu itegeko rivuguruye, umwana ukivuka yandikishwa bitarenze iminsi 30, kimwe no kwandukuza uwapfuye. Uwacikanwe nawe ntagomba kujya mu rukiko ahubwo ajya ku murenge agakemurirwa ikibazo, bakandika umwana we.

Abaturage bo mu Karere ka Ngoma bavuga ko iryo tegeko ryavuguruwe ribaruheye kuko iryari risanzweho ryatumaga hari benshi bacikanwa batindikishije abana babo; nk’uko Mukasekuru Alice abisobanura.

Agira ati “Nkanjye mfite umwana wujuje imyaka umunani kandi ntiyanditse. Hari n’abandi benshi mu baturanyi batanditse kuko bacikanwe n’iriya minsi 15. Kujya mu rukiko ntawirirwa ujyayo kuko bisaba amafaranga y’amagarama bikanagora rwose gutanga ikirego n’ibindi. Twishimiye iri tegeko.”

Mugenzi we witwa Uwizeyimana Violette yungamo ati “Kuba iminsi yongerewe biratunejeje cyane rwose ubu nta mwana uzongera gucikanwa, iminsi 30 ni myinshi umubyeyi aba yakize ashobora kujya kwandikisha umwana, naho iminsi 15 yari mike cyane hari besnhi bacikanwaga.”

Muhoza Alphonse, umukozi ushinzwe irangamimerere mu Murenge wa Kibungo, avuga ko bahawe amabwiriza ko itegeko ryo kwandikisha umwana ryavuguruwe kandi ko ryatangiye gushyirwa mu bikorwa.

Kwandikisha umwana wavutse bikorwa na se w’umwana cyangwa na nyina w’umwana, bombi bataboneka bigakorwa n’uwo bahaye uburenganzira cyangwa n’uwo bafitanye isano ya hafi, umufiteho ububasha bwa kibyeyi.

Iyo abo batabonetse bikorwa n’undi muntu wese wari uhari umwana avuka cyangwa uwamutoraguye, hakagaragazwa icyemezo cy’amavuko cy’umuganga cyangwa cy’ubuyobozi bubifitiye ububasha. Kwandikisha umwana kandi bikorwa hari abatangabuhamya babiri bafite nibura imyaka cumi n’umunani y’amavuko.

Umuyobozi w’akarere ka Ngoma yizeza abubatse ako Kagali ko bazishyurwa vuba

Nteziryayo ariyishyuza ibihumbi 270FRw, ibyo biro by’Akagari yabyubatse mu mwaka wa 2013. Ahamya ko abifitiye inyandiko yasinyiwe n’ubuyobozi ariko ngo aho kumwishyura bukamusiragiza.

Agira ati “Iyo nerekanye (impapuro) aho kunyishyura baransiragiza ngo genda uze ejo gutyo gutyo imyaka ibaye itatu. Ndasaba kurenganurwa kuko narakoze nkwiye igihembo.”

Iyi nyubako y’Akagari ka Gahima yaruzuye ndetse inakorerwamo. Uretse Nteziryayo ngo hari n’abandi bahakoze, tutamenye umubare wabo, na bo bamaze imyaka itatu bahakoze batarishyurwa.

Umuyobozi w’Akarere ka Ngoma, Nambaje Aphrodise avuga ko hari amafaranga atarishyuwe y’abafundi bubatse amashuri n’ibiro by’utugari.

Avuga ko amafaranga yabubatse ibiro by’utugari yagombaga guturuka mu misanzu y’abaturage ariko haza kuba ikibazo cy’uko abaturage batitabiriye uko bikwiye gutanga uwo musanzu, bituma amafaranga yo kubishyura abura.

Agira ati “Habayeho gahunda yo kubaka ibiro by’utugari muri ya gahunda yo kwishakamo ibisubizo,abaturage biyemeza gutanga imisanzu ariko haje kuba ibihe bibi ntibeza, ibyo bari biyemeje ntibyakunda birangira bafite imyenda.”

Akomeza yizeza uwo muturage n’abandi batarishyurwa ko bazabishyura bidatinze kuko amafaranga ahari,ariko ntavuga igihe nyacyo bazishyurirwa.

Yungamo avuga ko ubwo mbere Akarere ka Ngoma kageragezaga gutangira kwishyuraho make, hagaragayemo amanyanga ya bamwe bakishyuza ayo batakoreye.

Ibyo byatumye ubuyobozi bw’ako karere bubanza kwitonda, bugenzura neza amadeni abo bafundi bafitiwe. Ibyo ngo nibyo byatumye batinda kubishyura.

Birirwa ku mavomo bategereje ko amazi aza

Bavuga ko amavomo yabo yumye kuko bahabwa amazi rimwe cyangwa kabiri mu cyumweru. Yoherezwa nijoro, mu ma saa munani za mu gitondo. Ibyo ngo bitum bamwe barara bavoma. Abasinziriye, bakabyuma mu gitondo yagiye; nkuko Kagire abisobanura.

Agira ati “Ikibazo cy’amazi hano Musamvu rwose kimaze igihe kinini. Hari ubwo tuyabona rimwe mu cyumweru nabwo akaza nijoro ntidusinzire,ubundi tukamara igihe tutayabona.”

Abatuye i Karenge bo bavuga ko n’iyo amazi aje abura, n’abatonze umurongo baje kuvoma batayabonye bose; nkuko Nirere Clarisse abivuga.

Agira ati “Amazi aza kabiri mu cyumweru akenshi akaza nijoro. Hari nubwo uza ugatonda waba utaragerwaho akaba aragiye. Umuntu amesa amazi yaje kuko aho tuvoma Rwasaburo ntiwavomayo kenshi kuko ari igisozi kinini, hagoye.”

Abagurisha amazi ku mavomero nabo bahamya ko akazi kabo ntacyo kabungura kuko amazi ataboneka.

Umwe muri bo agira ati “Nta nyungu ikiba mu kuvomesha kuko amazi ntaza ngo tuvomeshe. Nkubu aherutse kuza saa tanu z’ijoro. Barambyukije ndavomesha kugera mu gitondo ntasinziriye.”

Ubuyobozi bw’Ikigo cy’Igihugu gikwirakwiza amazi (WASAC), mu Karere ka Ngoma, bwemera ko hari ikibazo cy’ibura ry’amazi. Abura kubera igabanuka ry’amazi ku masoko aho bayakura. Ubundi bagasaranganya abonetse.

Ubu buyobozi buvuga ko mu gihe hakenewe byibuze ibipimo bya m347 ku isaha, ubu babona m3 27 gusa.

Ubuyobozi bwa WASAC bwizeza abaturage ko icyo kibazo kigiye gukemuka. Buhamya hari isoko ya Nyamuhinda igiye gutangira gukora bitarenze Ukwakira 2016.

Ni muri urwo rwego iki kigo cyatangije gahunda yo gushinga amatsinda yitwa “ Inshuti z’imisoro” muri ayo mashuri.

Drocelle Mukashyaka umuyobozi wungirije ushinzwe abasora muri RRA

Aya matsinda agamije kunyuzwamo uburere bw’ingenzi bugamije gutoza abanyeshuri umuco mwiza wo gusora, nk’uko Mukashyaka Drocelle komiseri wungirije ushinzwe abasora abitangaza.

Agira ati” Abana bakeneye kumva ubuzima bw’igihugu, ndetse no gukurira mu muco wo kumva impamvu z’imisoro’’.

Avuga kandi ko aya matsinda azafasha mu kongera umubare w’abasora neza mu bihe biri imbere. Anafasha kandi mu kurera abana bakunda igihugu biyemeza gukora ibyagiteza imbere.

Kwigisha abanyeshuri akamaro k’imisoro bizafasha kugira abasoreshwa beza mu gihe kizaza

Mazimpaka Andre umuyobozi wa “Inshuti z’imisoro” mu ishuri ryisumbuye rya Rwamagana, avuga ko bamaze kumva ko gusora atari umutwaro, ahubwo ari ukwikorera.

Ati” Tuzi neza ko umusoro ugarukira uwawutanze mu bikorwa akorerwa na leta.
Iyo tugeze iwacu tubikangurira ababyeyi n’abacuruzi, tubereka ibyiza byo gusora n’ingaruka zo kudasora.”

Ntirushwamaboko Emmanuel uyobora itsinda nk’iri mu ishuri ryisumbuye rya Kabare, avuga ko atarazi akamaro k’imisoro.

Ati ” Sinari nziko imisoro, ariyo ituma tubasha kwiga neza, hakaboneka ibitabo, abarimu bagahembwa, n’ibindi ”.

Tuzigisha uko dushoboye, kuko numvise ko imisoro ifite akamaro kanini.”

Abagize Itsinda " Inshuti z’imisoro" ryo mu ishuri ryisumbuye rya Kabare

Kugeza ubu, mu mashuri yisumbuye na za kaminuza mu gihugu hose, hamaze gushingwa amatsinda " inshuti z’ imisoro” agera kuri 14.

RRA irateganya kongera umubare w’aya matsinda, kugirango mu bihe biri imbere,abanyarwanda bazacike burundu ku ingeso yo gukwepa no kunyereza imisoro.

Abanyeshuri bizeye ko ubushakashatsi bugiye kwiyongera kubera impano bahawe ya mudasobwa

Iri shuri ryigisha ikoranabuhanga rya mudasobwa (computer science), ryari rifite ikibazo cya mudasobwa nke, ugereranyije n’umubare w’abanyeshuri.

Abanyeshuri barenga 100 basangiraga mudasobwa 24 iki kigo cyagiraga gusa, bigatuma biga nabi.

Nshuti pacifique Emmanuel wiga mu mwaka wa Gatandatu, yavuze ko ubu bagiye kujya biga bisanzuye.

Yagize ati” Ibyo twakoraga twiga, wabaga udatuje kuko umwe yabaga akubwira ati gira vuba nanjye nkore .

Ubu tugiye kwiga neza cyane dukore ubushakashatsi buhagije.”

Mwambutsa Benjamin uyobora iri shuri, yavuze ko aba banyeshuri bigaga ku buryo bugoranye, ariko ubu MTN ibikemuye.

Ati” Ubwo izi mashini ziyongereye zikagera kuri 48, bagiye kwiga ku buryo bwiza.”

Gahamanyi Isidore umwe mu bagize MTN foundation yatanze izi mudasobwa, yasabye abanyeshuri kubyaza umusaruro ibyo bikoresho.

Ati” Izi mudasobwa ni igikoresho kandi kikaba n’isomero. Wifashishije interineti, buri kintu cyose ushaka wakibona . Nimuzikoreshe rero”.

Abana bagiriwe inama yo gufata neza impano bahawe

Yanasabasabye ko bafata neza izi mpano, kugira ngo zizabagirire akamaro, zinakagirire abazaza kwiga muri iri shuri.

Gahamanyi avuga ko gukora igikorwa nk’iki, bigamije gutuma abakiriya ba mtn barushaho kuyibonamo.

Mudasobwa zatanzwe muri iri shuri ziri mu bwoko bwa HP, zifite agaciro ka miliyoni zirindwi z’amafaranga y’u Rwanda.

Imihanda banyujije mu masambu y’abaturage yanyuze mu myaka irimo n’imyumbati

Iyi mihanda yanyujijwe mugace ko mu midugudu y’Agatonde n’Icyanyunga akagali ka Mutendeli, ahagiye kubakwa umudugudu w’icyitegererezo(model village).

Twiringiyimana Jean De Dieu ufite isambu yanyuzemo imihanda avuga ko babwiwe ko ntangurane bazahabwa ku myaka yangirijwe, uretse abazagurirwa amasambu.

Avuga ko imyaka yangirijwe ari imyumbati n’indi myaka bifite agaciro k’ibihumbi 300 000frw.

Yagize ati ”Twumvise ari byiza rwose ibyo bikorwa,ariko turasaba natwe twangiririjwe bagire icyo baduha.Hari imyumbati yaranduwe ,insina n’ibindi.Hari rwose abafite amasambu yabo yose yanyuzemo imihanda bakeneye ingurane.”

Kangawo Theodore nawe afite amasambu yanyuzemo imihanda. N’ubwo atavuga agaciro k’ibyangijwe, avuga ko baje bakamubarira, ayo bamugenera yose yayafata.

Ati ”Aha nari mpafite amasambu menshi niho nahingaga nkaheza ibintunga.Insina bararanduye,imyumbati n’ibishyimbo. Jye sinavuga ngo bampe angahe kuko sinanze iterambere ariko nibarebe bagire icyo batugenera.”

Ubuyobozi bw’akarere ka Ngoma buvuga ko aba baturage bagiranye inama kenshi n’abayobozi b’umurenge wabo bakemera gutanga ubutaka bw’ahazanyuzwa imihanda.

Rwiririza Jean Marie Vianney umuyobozi w’akarere wungirije ushinzwe ubukungu,avuga ko bakoranye inama n’aba baturage, bemeranywa ingurane kubafite ahazagurwa ibibanza byo kubaka umudugudu w’icyitegererezo.

Ikibanza cyaguraga ibihumbi 300 000frw, akarere kazakibagurira ku bihumbi 500 000Frw, habe harimo n’ingurane.

Ati”Tuzabaha ingurane kuko ntago wakubaka mu butaka bw’umuntu utamuhaye ingurane.Hagiye gutegurwa amasezerano y’uburyo bazishyurwa.Ibiganiro byagenze neza twemera ibiciro by’ikibanza, ntakibazo gihari.”

Ku bijyanye n’imyaka yangijwe mu kubaka iyi mihanda, Rwiririza avuga ko ntabyo yarazi ndetse ko no munama bagiranye n’abaturage, ntawagaragaje ikibazo cy’imyaka yangirijwe.

Imihanda yanyujijwe mu midugudu y’akagari ka Mutendeli, yatangiye gucibwa mu kwezi kwa Kamena 2016. Abaturage bamaze amezi abiri bishyuza ingurane.

Nshumbusho avuga ko yambuwe na rwiyemezamirimo n’akarere bikamutera ubukene bukabije ndetse n’umugore we bagatandukana

Abo bafundi 250 barishyuza miliyoni 4FRw, bakoreye guhera mu mwaka wa 2012 kugeza muri 2013, ubwo rwiyemezamirimo wabakoreshaga yamburwaga ububasha bwo gukomeza kubaka iryo soko.

Nshumbusho Issa, wayoboraga abo bafundi, arishyuza ibihumbi 800FRw. Avuga ko kwamburwa ayo mafaranga byamuteje ubukene bukabije. Byanatumye atandukana n’umugore we.

Agira ati “Nari mfite umugore wacuruzaga. Kuko nari kapita, hari ubwo batindaga guhemba. Umukozi wagiraga ikibazo gikomeye nkamuguriza, kugera ubwo nihaga no mubyo madamu yacuruzaga. Umugore byarangiye ahombye kubera kwamburwa. Ntiyabyihanganiye yahisemo kwigendera.”

Aba bafundi bavuga ko ubwo iri soko ryatahwaga kumugaragaro, mu mwaka wa 2015, umuyobozi w’akarere ka Ngoma, Nambaje Aphrodise, yabijeje ko bagiye kwishyurwa ariko ngo kugera n’ubu amaso yaheze mu kirere.

Amwe mu mazu agize isoko rya Kibungo

Umuyobozi wungirije w’akarere ka Ngoma ushinzwe iterambere ry’ubukungu, Rwiririza Jean Marie Vianney, atangaza ko atari azi icyo kibazo cy’abo bafundi. Avuga ko acyumvise bwa mbere kuko aje vuba.Yijeje abo bafundi kugikurikirana.

Agira ati “Mbasabye kuzaza vuba tukakiganiraho tukagiha umurongo kuko nubwo rwiyemezamirimo yagenda aba yasize ingwate niyo bagakwiye kwishyurwamo.”

Hari amakuru avuga ko uyu rwiyemezamirimo yaba yarakoze amanyanga ku ngwate yatanze kuburyo ngo ntamafaranga basanzeho. Rwiririza ahakana aya makuru avuga ko ntacyo ayazihiho kuko ari mushya.

Urunyuzuwera Francine yabonye icumbi akira ihungabana

Urunyuzuwera avuga ko inzu ye yasenywe n’imvura, amaze igihe gito apfakaye mu 2012.

Yagize ati “Nahuye n’ibibazo bikomeye imvura iransenyera nkajya mba mu mbeho n’abana bato,umugabo yari amaze gupfa,ndahangayika ku buryo numvaga ntabona imbere yanjye.”

Avuga ko kuba nta wundi muryango agira wari kumufasha, ibibazo byabaye byinshi bimuviramo guhungabana. Kubera iki kibazo aho yajyaga gusaba ubufasha bamubonagamo uburwayi bwo mu mutwe.

Amaze umwaka umwe atagira icumbi, nibwo ishuri rya IPRC East ryamwubakiye, ku mudugudu ava mu manegeka.

Nyuma yo kubona icumbi, Urunyuzuwera avuga ko yavuye mu bwigunge, ndetse abasha no kongera kwita ku muryango we ibitekerezo biri hamwe.

Mapendo Gilbert umuyobozi w’umurenge wa Kibungo avuga ko uyu mugore yari yarihebye, bikamuviramo guhungabana bikomeye.

Ati”Uyu mubyeyi yari yarihebye bikomeye kubera ibibazo byo kutagira aho aba, bigatuma agira ihungabana rikomeye,bamwe bari batangiye kumwita umurwayi wo mu mutwe.”

Mapendo avuga ko ihungabana Urunyuzuwera yari afite, ryaterwaga gusa n’ibibazo byo kutagira aho aba, kuko ubu bamubona ari umuntu muzima udafite ikibazo.

IP Emmanuel Kayigi yemeza ko byanze bikunze abagize uruhare muri ubwo bwicanyi bagomba gufatwa bagahanwa n’amategeko

Maniriho wakoreraga ku kigo nderabuzima cya Mugesera mu karere ka Ngoma, yarashwe n’abantu bataramenyekana mu ijoro ryo ku itariki ya 04 Nzeli 2016, ahita apfa. Yari avuye ku kazi yakoraga ko gupima ibizamini by’abarwayi.

Umuvugizi wa Polisi akaba n’umugenza cyaha mu Ntara y’Iburasirazuba, IP Emmanuel Kayigi agira ati “Byanze bikunze uwagize uruhare wese muri buriya bwicanyi azamenyekana.

Urupfu rwo rwabayeho ariko uwabikoze ntiyaturutse mu kirere. Hari abo turi kubaza bakekwa harimo na muramu we, gusa ntawe urahamwa n’icyaha.”

Mu bo Polisi yafashe bakekwa, harimo kandi umugore wa nyakwigendera n’abandi barimo abo bakoranaga. Polisi ntivuga umubare w’abafashwe kuko igikora iperereza.

Mu nama yahuje inzego z’umutekano n’abaturage, tariki 05 Nzeri 2016, abaturage bahumurijwe. Babwiwe ko icyabaye ari ubugizi bwa nabi atari iterabwoba cyangwa intambara nkuko hari bamwe bari batangiye kubihuza.

Hari abavuze ko nyakwigendera yari yaratanze icyifuzo mu itorero ry’Abadivantiste b’umunsi wa karindwi, aho yasengeraga, asaba kumusengera kuko afitanye ikibazo n’abakozi bakorana.

Mayeri Phanuel, umwe mu bayobozi b’iryo torero yagize ati “Yavugaga ibintu bya ‘microscope’ yibwe, ndetse ikibazo cyuko yanzwe yakibwiraga abantu bose.”

Abakozi muri iki kigo bo bahakana ibyavuzwe na nyakwigendera. Bakavuga ko nyuma ya “microscope” yabuze bamwe bagafungwa, byakuruye umwuka mubi mu bakozi.
Inzego z’umutekano n’ubuyobozi banenze abakozi bakoranaga na nyakwigendera kuba batamutabaye kugeza ubwo bagiye mu nzu bakiryamira kandi bazi ko mugenzi wabo yarashwe.

Abaturage ngo ni bo batabaye bageza nyakwigendera kwa muganga.

Nyakwigendera asize umugore utwite bari bamaranye igihe gito bashyingiranwe.

Ubuyobozi bw’akarere ka Ngoma buri gukoresha inama abaturage bubahumuriza

Yarashwe mu ma saa tatu z’ijoro tariki ya 04 Nzeli 2016, hafi y’ikigo nderabuzima ubwo yari avuye ku kazi, ahita apfa. Yakoraga aho basuzumira ibizamini by’abarwayi. Nyuma yo kumurasa isasu, bahise banatera grenade. Ababikoze ntibaramenyekana.

Byabereye mu mudugudu wa Rusave, Akagali ka Nyange umurenge wa Mugesera. Ubuyobozi n’inzego z’umutekano, bagiranye inama n’abaturage bo mu midugudu 10 yo mu Kagali ka Nyange n’imidugudu itatu yo mu mudugudu w’Akagali k’Agatare.

Basabye abaturage kudakuka umutima kuko umutekano wabo urinzwe neza. Uwarashe nyakwigendera aracyashakishwa. Abaturage barasabwa gukomeza gutanga amakuru ku kintu babona cyahungabanya umutekano.

Maniraho yari amaze iminsi asaba abo basengana mu Itorero ry’Abadivantisiti b’umunsi wa karindwi kumusabira cyane kuko ngo abakozi bakoranaga batamufataga neza; nkuko Mayeri Samuel, umwe mu bayobozi b’iri torero, yabitangaje.

Turacyakurikirana iyi nkuru

Uyu mugabo yihekuye ahita yiyahura ajyanwa kwa muganga ntiyapfa

Munyamana w’imyaka 70 y’amavuko, utuye mu Kagali ka Ntovi, umurenge wa Rukumbeli yakoze ibyo ku itariki ya 02 Nzeli 2016, mu ma saa tatu za mu gitondo ubwo umugore we yari yagiye guhinga.

Uyu mugabo yashutse umwana we mukuru w’imyaka 12 amujyana mu nzu, maze abwira n’uwo muto nawe yinjira mu nzu. Bagezemo yinjirana isuka atangira kubahonda mu mutwe umukuru aramucika, asigarana umuto.

Ubwo abantu batabaraga basanze uwo mwana muto atarapfa, ariko kuko hari n’ibyuma yari yamuteye munsi y’ugutwi, yahise ajyanwa kwa muganga aza kwitaba Imana mu ijoro ryo ku wa 02 Nzeri 2016 aguye ku bitaro bikuru bya Kibungo aho yari yoherejwe avuye ku kigo nderabuzima cya Rukumbeli.

Munyemana amaze gukora ayo marorerwa yahise anywa imiti yica, ahita ajyanwa kwa muganga. Ubu arwariye ku bitaro bikuru bya Kibungo. Ararinzwe kugira ngo nakira azakurikiranwe n’ubutabera kubera icyo cyaha ashinjwa cyo kwica.

Uyu mugabo ntasobanura neza icyatumye ashaka kwica abana yibyariye. Gusa ariko ahamya ko yari afitanye amakimbirane n’umugore we ndetse ko ariwe yateganyaga kuzica.
Ashinja aba bana be kuba baramumeneraga ibitaka mu nkono atetse kuko yitekeraga n’umugore akitekera, bakabana ukubiri mu nzu.

Umugore we, Kanzayire Slyvanie, avuga ko atari azi ko umugabo we yashakaga kuzamwivugana. Akavuga ko ikibazo akeka bari baherutse kugirana ari icy’uko yamureze ko yibye, umugabo we bikamubabaza.

Umukozi ushinzwe iterambere n’imibereho myiza y’abaturage muri ako Kagali, Nshimiyimana Protais, avuga ko uyu muryango wimukiye muri ako Kagali vuba bavuye mu Ruhengeri bityo ko batari bazi ko bafitanye amakimbirane.

Abaturage ba Birenga barashimira ko baruhuwe ingendo z’amasaha ane bajya gushaka amazi meza.

Abo baturage bemeza ko umwanya bataga bajya kuvoma kure ubu bawukoresha bakora ibibateza imbere kuko mbere uwajyaga kuvoma atabaga akibashije kujya guhinga.

Bashimira Perezida Paul Kagame bahamya ko ayo mazi meza bayakesha imiyoborere myiza ye, kuko ngo ubuyobozi bwose bwabayeho mbereye butigeze bubatekerezaho.

Murereyimana Xaverine, w’imyaka 65, ati “Twaragendaga mugitondo tukaza saa yine. Byasabaga kurara amajoro tugenda kuko ntabwo twahingaga iyo twabaga twaramutse tujya kuvoma.”

Ayo mazi meza bayahawe muri uyu mwaka wa 2016 muri gahunda Akarere ka Ngoma gafite yo kwegereza amazi meza abaturage.

Kugeza ubu, Akarere ka Ngoma gatangaza ko abaturage begerejwe amazi meza muri metro zitarenze 500 bageze ku kigereranyo cya 88%.

Bushayija Francis, Umunyamabanga Nshigwabikorwa w’Umurenge wa Kazo, na we yemeza ko kwegereza abaturage amazi byabaruhuye ingendo ndende bibongerera umwanya wo kwiteza imbere.

Agira ati “Amasaha yo gukora yariyongereye kuko batakimara amasaha menshi bari mumayira bajya kuvoma.”

Bushayije akomeza avuga ko aya mazi kandi yongereye isuku mu baturage, cyane cyane ku bana bato ku buryo hagaraga impinduka.

Uyu Muyobozi w’Umurenge wa Kazo agaragaza ko mu mwaka w’ingengo y’imari ushize wa 2015-2016 mu murenge we amazi meza yegerejwe abaturage bagera ku 8 na 500 batuye mu imidugudu icumi igize utugari twa Kinyonzo na Birenga.

Hegitsro eshanu za kawa ya ndengabaganizi zahiye.

Igihombo yagize arakibarira muri miliyoni 37,500 kuko ibiti ibihumbi 12 na 500 bya kawa byangiritse buri giti yari amaze kugitakazaho ibihumbi bitatu,mu gutera kuzikorera gusasira n’ifumbire.

Uwateje iyo nkongi kugeza ubu ntaramenyekana,kuko abaturage mu Murenge wa Murama ahitwa i Sakara (aho uwo murima uri) bavuga ko ku wa 27 Kanama 2016 babonye umuriro uzamuka mu musozi, ariko bagerageza kuwuzimya urabananira kugeza ugeze mu ikawa z’uyu muturage.

Uyu muhinzi, wari umaze iminsi yegukana ibihembo by’umuhinzi ntangarugero wa kawa mu Karere ka Ngoma, avuga ko ari igihombo gikomeye aguyemo kuko nta bwishingizi yari afite ndetse akaba nta bushobozi yahita abona bwo kongera guhita azihinga.

Yagize ati “Ni igihombo gikomeye ngize ubwanjye kuko nta bwishingizi bw’izi kawa nari mfite. Ni igihombo kuri njye no ku gihugu kuko ikawa yinjiza amadovize, ntabwo zagakwiye kononwa bene aka kageni.”

Uyu muhinzi ahamya ko yashatse kugura ubwishingizi bwa kawa ye ariko bakamunaniza akabireka.

Yagize ati “Nagerageje kenshi njya mu masosiyeti atandukanye ariko bakananiza. Bamwe bakambwira ngo njye mu shyirahamwe. Hari n’aho bambwiye ko ngo natanga ibihumbi 500 hanyuma yagira ikibazo bakanyishyura ibihumbi 800 cyangwa miliyoni, ugasanga na none aragusubiza ayo wamuhaye.”

Uretse uyu muhinzi uvuga ko yahombye bikomeye, bamwe mu bakozi bakoraga mu mirima ye na bo bararirira mu myotsi kuko bagiye kubura akazi kandi bakoragamo ku buryo buhoraho.

Gatarayiha Celestin, Umuyobozi w’Ishami rishinzwe Kawa muri NAEB, avuga ko abahinzi ba kawa ari abafatanyabikorwa bakomeye ba NAEB, bityo ko hazarebwa uburyo uyu muhinzi yafashwa.

Gatarayiha agira inama abahinzi ba kawa kujya bakora imihanda izengurutse imirima yabo,ngo bifashe mu gukumira imiriro.

Ubuyobozi buvuga ko umurima wa kawa wa Ndengabaganizi wahiye ungana na hegitari ebyiri n’igice mu gihe Ndengabaganizi avuga ko ari hegitari eshanu.

Umurima wa hegitari zirenga 800 z’inanasi ni kimwe mubyashmwe n’itsinda ryari ryaturutse mu karere ka Gasabo.

Akarere ka Gasabo nk’akarere k’umujyi ariko gafite imirenge umunani y’icyaro muri 15 ikagize, kizeye ko ibikorwa bijyanye n’ubuhinzi no kuhira imyaka bikorerwa muri Ngoma bazabyigiraho bateza imbere iyo mirenge.

Ubuyobozi bw’akarere ka Ngoma bwatembereje itsinda rya Gasabo ahahingwa inanasi zihinze zahujwe ku ubtaka bwa hegitari zirenga 800 n’umushinga wo kuhira imyaka mu Murenge wa Rurenge uzakorwa kuri hegitari zisaga 300.

Nyamurinda Pascal, vice perezida w’inama njyanama y’akarere ka Gasabo, avuga ko imishinga nk’iyo basanze yafasha abaturage ba Gasabo bagituye mu cyaro.

Ibikorwabyo kuhira imyaka imusozi kuri hegitari 300 nabyo byabereye akarere ka gasabo ishuri.

Yagze ati “Bidufasha guhana ubunararibonye,imishinga nk’iyi natwe yadufasha kuko dufite igice cy’icyaro. Mu byukuri twize byinshi kandi by’ingirakamaro, rwose navuga ko aka karere ka Ngoma ari ishuri ryiza kandi rigiye kudufasha mu guteza imbere uduce tw’icyaro dufite.”

Umuyobozi w’Akarere ka Ngomba, Nambaje Aphrodise yatangaje ko akarere ka Gasabo nk’Akarere k’Umujyi wa Kigali, Ngoma yakigiraho byinshi nk’akarere k’icyaro kari mu nzira yo kubaka umujyi.

Ati “Uyu mubano kuva tuwutangiye twizeye ko tuzungukiramo byinshi ndetse bikagera no kubo tuyobora. Akarere kamwe kabera ishuri akandi, dufite igishushanyo cy’umujyi wa Ngoma, ubwo murumva ko akarere ka Gasabo hari ibyinshi twabigiraho.”

Akarere ka Gasabo ni aka kabiri kagiranye umubano wihariye n’akarere ka Ngoma, nyuma y’Akarere ka Nyamasheke.

Tariki 26 Kanama 2016, nibwo uyu mubano wihariye watangijwe ku mugaragaro, mu ruzinduko itsinda rihagarariye Akarere ka Gasabo ryagiriye muri Ngoma.

Uru rubyiruko ruvuga ko ruzasana Biogaz zose zigera kuri 300 zitakoraga.

Imibare y’agateganyo yakozwe n’iyi koperative, igaragaza ko kuri biogaz zirenga 600 zakozwe muri aka karere, izagize ibibazo zitagikora zitari munsi ya 300, nubwo hakinozwa neza imibare.

Murekezi Djuma, utuye mu Kagari ka Nyabikokora mu Murenge wa Kirehe, avuga ko yari amaranye biogaz umwaka ariko idakora, ntacyo imumariye. Ngo yari yarabuze n’aho yayikoresha kuko abazubatse bigendeye.

Uyu mugabo ashima iri tsinda ko ryakosoye amakosa yari yakozwe none ubu akaba acana biogaz ye neza nta kibazo.

Yagize ati “Ndishimye kuko ntabwo twari twigeze tuyitekaho, habe n’icyayi cyangwa ibitoki. Umwaka wari ushize tuyifite ariko ntacyo yari itumariye. Ndashima uru rubyiruko kuko rwo rwahageze rurabikora neza, ubu biraka ndacana nkateka, singihenzwe n’amakara.”

Niyitegeka Gerard ukuriye “Koperative Ireme ryo kurengera ibidukikije” atanga icyizere ko gahunda bafite ari iyo gusana biogaz zose zidakora mu Karere ka Kirehe.

Agira ati “Nyuma yo kubona iki kibazo nk’urubyiruko, twishyize hamwe dushinga koperative maze dutangira gucuruza ibikoresho (pieces) byo gusana biogaz kuko inaha ntaho yabonekaga.

Twahuguye umuntu umwe muri buri murenge ku buyro utuguriye igikoresho tumuha ujya kumukorera. Iyo ukeneye ko tugusanira uratugana. twiteguye gufasha bariya bantu bafite biogaz zidakora.”

Kuba izi biogaz zitakoraga ngo hari aho byaterwaga n’uburyo zikoze kuko ubu iziri kwifashishwa zorohereza abazikoresha kuko hariho icyuma kivanga amase akagera ahabugenewe ameze neza.

Nsengimana Janvier, umuyobozi w’ishami ry’Ubuhinzi, Ubworozi n’Umutungo Kamere mu Karere ka Kirehe, avuga ko ubuyobozi bwiteguye gukorana bya hafi n’iyi koperative kuko izazamura umuhigo wa biogaz mu karere.

Yagize ati “Tugize amahirwe kuko iyi koperative ifite intego yo gusana biogaz zitagikora no kubaka inshya. Twabashishikarije no kugira ibikoresho ku buryo n’ahandi yagira ikibazo bajya bahita babafasha.”

Inanasi zakaswemo imihanda zihinze kuri hegitari 800.

Aba bahinzi bavuga ko uruganda bashaka gushinga, inyigo yarwo yagaragaje ko ruzatwara miliyoni 350Frw, rukazatunganya divayi n’umutobe biva mu nanasi.

Nubwo basarura toni ibihumbi bibiri ku mwaka, isoko bafite rihoraho ngo ribagurira toni 100, izindi 1,900 bakazigurisha mu buryo bavuga ko bahendwa, nk’uko bitangazwa na Hategekimana Ignace uyobora iyi koperative.

Yagize ati” Ubundi dufite isoko ryo kugurisha uruganda “Inyange industries” ariko nubwo batugurira neza ku kilo, bagura nke kuko ntibarenza toni 100 ku mwaka kandi twe tweza toni ibihumbi bibiri.

Izisigaye usanga tuzigurisha i Kigali aho batugurira mu kirere ntagupima bikaduhombya.”

Avuga ko mu gucyemura iki kibazo bafashe miliyoni 30Frw bafite, none bari mu biganiro na Banki y’Igihugu y’Iterambere (BRD) ngo ibahe inguzanyo z’ayasigaye batangire kurwubaka.

Harerimana Alexis umwe mu banyamuryango ba KOABANAMU, avuga ko inyungu yaba nyinshi mu gihe baba bafite uru ruganda, kugira ngo izisaguka ku zo bagurirwa n’uruganda bazitunganye bunguke aho kugurisha abacuruzi b’ikigali bahendwa.

Ati “Dufite urwo ruganda twajya twunguka ndetse nabo batugurira neza tugakomeza kubaha, kuko nk’ubu uruganda “inyange industries” itugurira ku kilo kimwe 100Frs. Ariko inanasi ifite ibiro munani abatagura ku biro ntibaturengereza 400Frs.”

Aba bahinzi bavuga ko kwibumbira hamwe byatumye banoza ubuhinzi bwabo, ku buryo umuhinzi abasha kubona ibihumbi 300Fw buri kwezi asaruye mu nanasi ze.

Kugera ubu iyi koperative ifite abanyamuryango 120 bahinga inanasi zihurijwe kuri hegitari 800 mu Murenge wa Mugesera, ariko ubu buso bushobora kwaguka kugera kuri hegitari ibihumbi bibiri.

Imibiri yashyinguwe ku wa 21 Kanama 2016 ni iyimuwe mu nzibutso zitameze neza mu mirenge ya Kibungo,Kazo,Rurenge na Remera.

Abarokotse Jenoside ngo kubona ababo bashyinguwe heza batakinyagirwa ngo byatumye baruhuka ku mitima yabo.

Urwibutso rushya rwa Ngoma ruri mu murenge wa Kibungo,igice cyambere cyigizwe n’imva cyuzuye gitwaye miliyoni 115 harimo gusukura imibiri no kuyishyingura.

Uru rwibutso ngo rusigaje kubakwa ibice bindi bibiri birimo inzu y’amateka ndetse n’ubusitani(hangari)kugirango rube rwuzuje ibisabwa.

Bimwe mu bimenyetso bigaragaza uko jenoside yakozwe harimo intwaro zakoreshejwe n’ibindi.

Urwibutso rwa Jenoside rwubatswe ruzafasha kubungabunga ibimenyetso bya Jenoside neza,ndetse rube n’isomo kubagifite ingengabitekerezo ya Jenoside bahakana ko itabaye.

Dr Bizimana J D wa CNLG avuga ko abarokotse Jenoside babazwa nuko urukiko rwa Arusha Rwagize abere Mugiraneza na Mugenzi kandi bari abicanyi Ruharwa muri jenoside.

Ruhima Paul warokokeye Jenoside mu Murenge wa Kibungo,yagaragaje uburyo amacakubiri ashingiye ku moko yahemberwaga mu mashuri,abatutsi bahagurutswa bityo bigatuma ingengabitekerezo yo kubatsemba ishimangirwa.

Yagize ati”Baduhagurutsaga mu ishuri Abatutsi bagahaguruka bakatubara.Uku kudutandukanya n’abandi byatumye nkanjye hari umunyeshuri twiganaga yambwiye ko abatutsi nibabica azamperaho n’iwacu.”

Nkuranga Egide Vice Perezida w’umuryango”Ibuka”ku rwego rw’igihugu yashimiye ubuyobozi ,uburyo budahwema gushyigikira ibikorwa byo gushyingura mu cyubahiro abazize jenoside yakorewe abatusti mu 1994.

Imibiri igera ku bihumbi 18 852 y’abazize Jenoside yari ishyinguwe mu nzibutso zitameze neza niyo yashyinguwe mu cyubahiro.

Dr Jean Damascene Bizimana Umunyamabanga Nshingwabikorwa wa komisiyo yo kurwanya Jenoside “CNLG”yanenze zimwe mu manza zaciwe I Arusha aho ba ruharwa bagizwe abere barimo Mugiraneza na Mugenzi bayoboraga muri perefectura Kibungo.

Yagize ati”Aba bantu tugiye gushyingura ahangaha bamwe mubo bzize ku isonga ni Mugenzi na Mugiraneza bayoboye ubwicanyi mu cyahoze ari perefectura ya Kibungo.

N’ubwo bagizwe abere n’urukiko rwa Arusha twebwe byumwihariko abarokotse,twemeza ko abo bantu atari abere ndetse n’umutimanama wabo nibwira ko utabagira abere aho bari hose.”

Uru rwibutso rushya ruzafasha mu kubangabunga ibimenyetso bya Jenoside birimo n’imibiri y’abayizize.

Umuyobozi w’Intara y’Iburasirazuba,Uwamariya Odette,yavuze ko nk’ubuyobozi agaya abayobozi babi baranzwe n’ivangura kugera ubwo bagejeje kuri jenoside gusa ango icyo yishimira nuko ubu hariho ubuyobozi bwiza burwanya amacakubiri ayariyo yose.

Ibikorwa byo kubaka urwibutso rwa Jenoside rushya rwa Ngoma I Kibungo byatangiye m’ Ukwakira 2015 igice cya mbere cyo kubaka imva kirangira muri Mata 2016.

Ibikoresho abahinzi bazafashwa kugura harimo imashini zikurura amazi mu biyaga,imipira bacomeka kugira ngo amazi agere kure, byose bikazakorwa muri gahunda ya Nkunganire, aho umuhinzi yishyura icyakabiri cy’igiciro cyabyo andi Leta ikayamutangira.

Bumwe mu butaka bwuhirwa abahinzi bavuga ko bubaha amafaranga mu gihe cy’izuba.

Intara y’Iburasirazuba n’ubwo yihariye ibiyaga 18 kuri 25 biri mu gihugu, ni yo ikunda kwibasirwa n’izuba ryinshi ryumisha imyaka imvura ikabura bigateza hamwe amapfa.

Kugera ubu ubuso bukorerwaho ubuhinzi bwo kuhira buracyari buke cyane ugereranije n’ibi biyaga biri muri iyi natara.

Habimana Justin uturiye ikiyaga cya Mugesera avuga ko umwaka ushize ibigori byabo byumishijwe n’izuba,gusa ngo uburyo bwo kuhira bumva bugiye kubafasha kongera umusaruro.

Yagize ati”Ntawe uzi agaciro ngo bigura gute. Ubutaka bugerageza guhingwa ni buke cyane yewe na 2% ni kenshi kubera kutagira ibikoresho.Ibyo bikoresho nitubibona bizatuma tweza neza kuko nko kuri sezo ishize twararumbije kubera izuba.

Gukoresha Arozwari( Arrosoir) byatumaga duhinga akarima gato cyane,imoteri izatuma duhinga ahantu hanini,kandi duhinge igihe cyose.”

Bamwe mu bahinzi mu Murenge wa Rukumberi baturiye ikiyaga cya Sake, bishyize hamwe bahinga imbuto bigurira moteri baruhira, kugera ubu bavuga ko babasha kubona amafaranga menshi babikesha kuhira bagahinga ibihe cyose.

Ubutaka bwegereye ibiyaga bugenewe guhingwa ahenshi usanga butabyazwa umusaruro wo kuhirwa ngo buhingwe ibihe byose hatarambirijwe ku mvura.

Umuyobozi wungirije w’Akarere ka Ngoma ushinzwe imari n’ubukungu,Rwirirza JMV,avuga ko Akarere ka Ngoma uyu mwaka kateganije miliyoni 60,zizafasha abahinzi kubona ibikoresho byo kuhira mu buryo bwa nkunganire.

Yagize ati”Umuco wo kuhira ntago urafata ariko ni inshingano z’ubuyobozi ngo tubikangurire abaturage,kuko ntibyumvikana uburyo abahinzi baturiye ibiyaga barumbya imyaka kubera izuba ryabaye ryinshi.

Twaratangiye ubukangurambara imyumvire iri kuzamuka kuko nkiyo uretbye ahanzi ba Rukumberi bishyize hamwe bahinga imboga ariko uhageze ntiwamenya ko izuba ryatse.”

Akarere ka Ngoma uretse imigezi nk’Akagera kanyuramo, hari ibiyaga nka Sake, Mugesera Birira ndetse n’ibindi biyaga bito bishobora gufasha mu kongera ubuso buhingwaho hifashishijwe uburyo bwo kuhira.

Abanyamuryango ba Koperative Ambukaneza bo bavuga ko binjiza miliyoni zirindwi buri mwaka ariko uko bagiye kubagaragariza asigaye kuri konti bakababwira atanagera ku bihumbi 500.

Bamwe mu banyamuryango bavuga ko koperative babamo zinjiza amamiliyoni ku mwaka ariko bajya mu nama bakabwirwa ko mu isanduku hasigaye ibihumbi 500 andi yakoreshejwe.

Musabyeyezu Deogratias, wo muri Koperative Ambukaneza ikorera ku Kiyaga cya Mugesera, avuga ko bacibwa intege n’uburyo babwirwa ko amafaranga yose yasohotse hasigaye ibihumbi kuri miliyoni zigera kuri indwi ziba zinjiye.

Yagize ati “Hari ubwo batubwira ngo hinjiye miliyoni indwi, ariko basoma ibyasohotse ugasanga hasigayemo nk’ibihumbi 400 gusa. Ukumva ngo baguze ibyuma bya moteri, intebe n’ibindi tukibaza niba intebe bazigura buri munsi,cyangwa iyo moteri ipfa buri munsi. Biduca integer!”

Iyo uganiriye n’abaturage muri uyu Murenge wa Mugesera ndetse n’ahandi usanga nta cyizere bagirira amakoperative, kuko abenshi bahuriza ku kuvuga ko koperative ziribwa n’abayobozi bazo kubera gutekinika ibyasohotse maze amafaranga bakayirira.

Nsabimana Jean Damascene, utuye mu Kagari ka Nyange mu Murenge wa Mugesera, Akarere ka Ngoma, avuga ko yazinutswe amakoperative kubera ayo yagiyemo ndetse n’andi abona usanga umutungo wayo uribwa n’abayobozi bayo gusa.

Agira ati “Amakoperative yahombeje benshi, usanga abantu batakiyakunda cyane ahubwo bakumva bakwikorera kugiti cyabo kuko usanga umutungo wa koperative uribwa n’abayobozi ba koperative. Bagatekinika babereka uburyo yakoreshejwe babeshya.”

Umuyobozi Wungirije w’Akarere ka Ngoma ushinzwe Ubukungu, Rwiririza JMV,avuga ko hagiye gushyirwaho abakozi bashinzwe amakoperative mu mirenge; bazajya bacungira hafi imikorere ya koperative kandi ngo abariye umutungo wa koperative bakajya bakurikiranwa.

Yagize ati “Iyo abantu bakoreye hamwe bagira umusaruro mwinshi, ariko hari aho byagaragaye ko abayobozi ba koperative bagacunga nabi umutungo. Ikibazo ahanini kiri ku banyamuryango bataramenya uburenganzira bwabo.Tugiye gushyiraho abakozi mu mirenge bazajya babana na bo umunsi ku munsi.”

Kugeza ubu mu Karere ka Ngoma harabarurwa amakoperative 183. Rwiririza akaba asaba abanyamuryango bayo kudacika integer kuko akarere kagiye kubegera kakajya kabafasha mu kugenzura imikoreshereze y’umutungo wa koperative.

Murorunkwere na we yemera ko hari abagore bumvise nabi ihame ry’uburinganire n’ubwuzuzanye bigatuma bibaviramo ingaruka mbi.

Gusezerana kw’abashakanye bifatwa nk’ikimenyetso cyo kubana neza nta wikanga undi kuko buri wese aba arengerwa n’itegeko.

Nta mibare y’imiryango itasezerana ibana mu buryo butemewe n’amategeko yigeze igaragazwa, ariko hemezwa ko umubare w’abasaba gusezerana ugenda wiyongera.

Abaganiriye na Kigali Today bavuga ko abihutira gusezerana n’abagore babo basanganwe, biterwa n’uko baba basanzwe babanye neza, bityo ntibagire icyikango ko nyuma yo gusezerana yamwihinduka akamusuzugura yitwaje ko na we yabonye uburenganzira mu rugo.

Umugabo utifuje ko izina rye ritangazwa utuye mu Murenge wa Kibungo, yagize ati “Njye maranye n’umugore wanjye imyaka 18, ntiturasezerana mu mategeko. Ntinya ko twasezerana agatangira kunsuzugura kuko mbona atoroshye. Hari benshi byabayeho ndetse bamara gusezerana, abagore babo bakabagarambana.”

Uyu mugabo avuga ko iyo umugore we amusabye ko bajya gusezerana, amubwira ko abana bane bafitanye, “nta sezerano rirenze iryo”.

Hari kandi n’abagabo bajya bibura mu bitabo by’irangamimerere byandikwamo abasezeranye (abenshi ni abasezeranye mu kivunge mu myaka ya 2004 kubera ko hari habayemo amakosa yo kutabandika mu bitabo), maze bakiruhutsa bavuga ko batakongera gusezerana bitewe n’uko igihe basezeranaga, abagore bahise babihinduka.

Mugabo (izina ryahinduwe), wo mu Murenge wa Remera, yagize ati “Njyewe amasezerano yacu yarabuze ku murenge. Njye navuga ko ari nk’Imana nagize kuko umugore yamereye nabi maze gusezerana na we ku buryo ubu ntakongera kwemera gusezerana kubera uburyo yahise ahinduka.”

Umuhuzabikorwa w’Inama y’Igihugu y’Abagore mu Murenge wa Remera, Murorunkwere Beatrice, yavuze ko uwo muco wo gushaka gusuzugura abagabo ku bagore aho ugaragaye, begerwa bakanengwa ndetse bakagirwa inama ngo bikosore.

Yagize ati “Urwo ni urwitwazo bamwe mu bagabo bagira ariko mu by’ukuri, abasezeranye bose si ko basuzugurwa. Aho bigaragaye, uwo mugore turamwicaza tukamuhanira mu nama yacu nk’abagore. Ntabwo umugore yasuzugura umugabo ngo ni uko basezeranye ahubwo yamwubaha.”

Abanyeshuri ba Gr. Sc. Bare basanze gusura parike bishimangira ibyo bize mu ishuri.

Byatangajwe n’abanyeshuri biga mu Rwunge rw’Amashuri rwa Bare ruri mu Murenge wa Mutenderi w’Akarere ka Ngoma, ubwo kuri uyu wa 15 Kanama 2016 bari bamaze gusura Parike y’Akagera.

Aba banyeshuri bavuga ko nubwo ubushobozi bukunda kuba imbogamizi ku bigo byinshi mu kujyana abanyeshuri gusura ibyiza nyaburanga, ngo mu bizamini bya leta bitegurwa, “hari ibisaba kuba warasuye parike kugira ngo usubize neza”.

Mpuhwezimana Safina yiga ishami ry’imibare, ubukungu n’ubumenyi bw’isi (MEG) mu mwaka wa gatandatu. Avuga ko uru rugendo ari isomo bize kandi ryari rikenewe cyane.

Yagize ati “Nko mu bumeyi bw’isi, hari ibizamini (bya Leta) bazana ku buryo utarasuye parike, byakugora gusubiza. Bazana amafoto y’inyamaswa bakubaza amazina. Ubu icyo ntikizantsinda kuko kuba nziboneye n’amaso bishimangiye ibyo nari narize mu bitabo.”

Gusura parike bituma babasha gutsinda neza amasomo y’ubumenyi bw’isi mu bizamini.

Dusingizimana Innocent, umwarimu w’ubumenyi bw’isi muri iri shuri, avuga ko urugendo ari ngombwa kugira ngo abanyeshuri basobanukirwe n’ibyo biga mu bitabo.

Kugira ngo uru rugendo rugerweho, ubuyobozi bw’iri shuri ry’uburezi bw’ibanze bw’imyaka 12, buvuga ko hitabajwe umusanzu w’ababyeyi ndetse n’abafatanyabikorwa b’ikigo.

Muhirwa Deo uhagarariye ababyeyi kuri GS Bare, avuga ko nk’ababyeyi basaba ko ingendo nk’izi zajya zibaho, by’umwihariko ku bana barangiza bitegura ibizamini cya Leta kugira ngo ntihagire ibyo barangiza kwiga babizi mu bitabo gusa batarabibona.

Iyamaswa nk’izi ngo bazumvaga mu bitabo gusa.

Yagize ati “Nk’ababyeyi batugejejeho icyo cyifuzo tucyumva vuba, dutaga amafaranga 1000Frw, rwose turishimye kuba abana bacu bungutse ubundi bwenge bwo gushimangira ibyo biga.”

Umuyobozi wa GS Bare, Karuhije Leandre, avuga ko iki gikorwa cyagezweho ku bufatanye bw’ababyeyi, ikigo ndetse n’umufatanyabikorwa.

Yagize ati “Twararebye dusanga hari abana benshi barangiza kwiga batazi ku maso ibyo biga, dutegura urugendo ku bana 82 barangiza amashuri yisumbuye. Hari byinshi bigaga bazi mu bitabo ariko ubu babibonye imbonankubone.”

Aba bayeshuri bari bishimiye gusura parike.

Urugendo rwo kujyana aba banyeshuri 82 muri parike rwatwaye amafaranga agera kuri miliyoni imwe n’ibihumbi 200 yatanzwe n’ikigo, ababyeyi b’abana ndetse n’Umuryango w’Abanyamerica “Peace Corps Rwanda” ufasha mu burezi.

Guveriner Uwamariya asanga ubufatanye bwa leta n’amadini n’amatorero mu iterambere bukwiye kuko roho nzima itura mu mubiri muzima.

Yabivuze kuri iki cyumweru tariki wa 14 Kanama 2016 ubwo EAR diyosezi Kibungo yatangizaga umuryango”Boys and Girls Brigade” w’urubyiruko rugamije ivugabutumwa n’iterambere mu rubyiruko.

Guverineri Uwamariya yavuze ko amadini n’amatorero afatanya n’iyi ntara mu bikorwa byo kubaka ibikorwa remezo nk’amazi,amashuri n’ibindi.

Yashimye kandi uruhare rw’amadimi mu gufasha abatishoboye kubona ubwisungane mu kwivuza (MUSA),guteza imbere urubyiruko nkuko byari byakozwe na EAR diyosezi ya Kibungo.

Mgr Ntazinda Emmanuel wa EAR Kibungo, yasabye uru rubyiruko kuzarangwa n’ibikorwa bihindura urubyiruko ku mutima no ku mubiri.

Yagize ati “Kudafatanya namwe byaba ari igihombo gikomeye.Nagirango nshimire amadini n’amatorero ku nkunga yanyu. Tunabasaba gukomereza aho.Ni ngombwa ko dukomeza gukorana kugirango intumbero dufite mu iterambere tubashe kuyigeraho.”

Guverineri Uwamariya kandi yavuze ko gutangiza uyu muryango w’urubyiruko ari igikorwa kiza bashyigikiye nk’ubuyobozi kuko guhuza urubyiruko ngo rwiteze imbere, ruhindura imyitwarire yarwo ndetse naho ruri aribyo u Rwanda rukeneye.

Ati “Iyi brigade itangijwe hano Kibungo,turizera ko bizagera n’ahandi. Njye iyi brigade ndayigereranya nk’ibikorwa by’itorero ry’igihugu mu rwego rw’idini.

Uyu muryango ukundwa n’urubyiruko kubera ibikorwa by’umuziki n’uburyo biyereka.

Urubyiruko rwihurije hamwe biroroshye kuba bafata inguzanyo bakiteza imbere,kuba bashyirahamwe mu kuvana urundi rubyiruko mu myitwarire idakwiye n’ibindi bikorwa by’iterambere babasha kubigeraho.”

Niyodusenga Legis, umwe mu bagize umuryango “Boys and girls brigade”, avuga ko akihagera yize kubana n’abandi, kwiteza imbere bibumbira hamwe bahuza ubushobozi naho bagiye gucuranga babaha amafaranga abafasha.

Ati “Nkiyo twagiye gucuranga ahantu yenda bakaduha ibihumbi 800Frw, adufasha kubona amafaranga. Ikindi batwigisha ijambo ry’Imana ritubuza imico mibi. Turifuza kwigisha n’urundi rubyiruko kugirango rwiteze imbere kandi rumve mu myitwarire mibi.”

Umushumba wa Diyosezi Anglican Kibungo, Mgr Ntazinda Emmanuel avuga ko uru rubyiruko rugera kuri 60, barwitezeho byinshi bishingiye ku ivugabutumwa mu rubyiruko n’iterambere ryarwo.

Ati “Boyis and Girls brigade” Tubitezeho umusaruro cyane nko guteza imbere urubyiruko binyuze mu matsinda yo kubitsa no kugurizanya, ivugabutumwa mu rubyiruko ndetse no kuba urubyiruko ruhindura aho ruri.”

Ni kunshuro ya mbere mu Rwanda hatangizwa uyu muryango mpuzamahanga ukorera mu itorero ry’Anglican”Boys and Girls Brigade.”

Ngoga Chritine uhagarariye urubyiruko mu Murenge wa Remera, yemera ko hari urubyiruko rudakora mu murenge we ariko ko ubukangurambaga buri gukorwa ngo nabo bitabre umurimo.

Bimwe mubikorwa bikorwa na bamwe mu bagore bitwaje uburinganire harimo, kujya mu tubari bagasinda bagataha nijoro no kugurisha imitungo y’urugo batabwiye abagabo.

Uku kumva nabi ihame ry’uburinganire n’ubwuzuzanye ngo bituma hari ingo zisenyuka, kuko uretse ubusinzi ngo hari naho usanga hajemo ubusambanyi no kunywa ibiyobyabwenge nka Kanyanga ku bagore.

Mugabusha Cyprien, umwe mu batuye aka gace, avuga ko hari kugaragara abagore bitwaza uburinganire bagakora ibidakorwa bituma batangukana n’abagabo cyangwa bigakurura amakimbirane mungo zabo.

agira ati “Hari abagore bumvise uburinganire nabi, bumva ko aribo babaye ba kiyongozi.

Umugore agafata nk’ihene ugasanga yayigurishije umugabo utabizi.Ugasanga umugore yasinze utwana turi mu rugo n’umugabo. Wavuga ibintu bigacika. Turasaba ko ubuyobozi guhagurukira iki kintu.”

Hakizimana Evariste nawe avuga ko amaze umwaka urenga yaratandukanye n’umugore we bitewe n’ubusinzi burimo no kunywa kanyanga byakururaga amakimbirane mu rugo rwe.

Ati “Nitanzeho urugero icyo kibazo cyambayeho ubu ndangije umwaka mba njyenyine umugore twaratandukanye, kubera ingaruka nkizo zituruka ku gurisha umutungo ntabizi,n’ibyo biyobyabwenge. Ugasanga umutungo yagurishije ukaba utavuga.”

Murorunkwere Beatrice, umuhuzabikorwa w’inama y’igihugu y’abagore mu Murenge wa Remera, nawe yemera ko hari bamwe mu bagore bumvishe nabi ihame ry’uburinganire n’ubwuzuzanye kuburyo bagera aho bakora ibikorwa bihohotera abagabo.

Avuga ko hari aho bigaragara muri uyu murenge gusa ngo nk’abayobozi b’abagore bajyayo bakaganiriza abo bagore bakikosora.

Ati “Sinavuga ko ari 100% ariko nko mu kagali ntihabura nkaho dusanga umugabo ahohoterwa n’umugore rwose kuburyo bugaragara.

Icyo gihe iyo tubimenye bidufata umwanya tukamanuka tukajya kubigisha, iyo tumaze kubigisha hari hamwe na hamwe bahita bumva. Ubona hari impinduka nziza igaragara.”

Nubwo hari aho ihame ry’uburinganire n’ubwuzuzanye ritumvikanye neza, byaviramo amakimbirane, iri hame ryagize umumaro mu kugabanya ihohoterwa rikorerwa abana n’abagore ahenshi riba intandaro y’ubwumvikane mu ngo no gushyira hamwe.

Inkweto zikorwa muri kazi ni kazi zikunzwe n’abantu kubera ubwiza bwazo.

Ahishakiye Emmanuel umwe mu bakorera izi nkweto zikoze mu ruhu mu mujyi wa Kibungo, muri “kazi ni Kazi”, avuga ko nyuma y’uko ibyo guca caguwa bitangiriye abamugana babaye benshi.

Agira ati “Nkora inkweto nziza zo mu ruhu, ariko caguwa itaracika nashoboraga kuba nagurisha nk’inkweto imwe mu cyumweru.Ubu sinjya munsi y’inkweto 6 mu cyumweru ngurisha.”

Ahishakiye avuga ko umuguru umwe awugurisha ibihumbi 15Frw. Igiciro avuga ko ari gito ugereranije nizo bagura muri caguwa ibihumbi za 20Frw kandi zarambawe.

Nkundabagenzi Anastase nawe ukorera muri uyu mujyi inkweto mu ruhu zirimo na sandari, yemeza ko nyuma y’icyemezo cyafashwe na leta cyo guteza imbere ibikorerwa mu Rwanda, ibizwi nka caguwa bigacika byabahaye isoko.

Avuga ko nyuma yo guca caguwa abamugana ngo biyongereye.

Ati “Ubu ku isoko nanjye ndimo gupiganwa, nta kibazo mfite kuko nacaguwa yaracitse , ubu bari kutugana cyane. Kuba caguwa yaracitse ni nk’umugisha kuri njye, abakiliya basigaye baza ku bwinshi kuko nibwo bahise babona ko inkweto dukora zikomeye.”

Abakora inkweto muri aka gace no mu Rwanda muri rusange bagaragaza ikibazo cyo kubona impu ku buryo bworoshye, kuko bibasaba kuzitumiza mu mahanga kandi ngo n’imashini bifashisha mu gukora inkweto. Yongeraho ko uretse kuba zikiri nkeya ziri no ku rwego rwo hasi.

Izi ngorane zose ngo zituma bigorana kuba umuntu ukora inkweto yakora nyinshi mu gihe gito, bigatuma igihe bahawe komande y’inkweto nyinshi bibagora guhaza isoko rigari.
Mu Rwanda kuva tariki 2 Nyakanga 2016 imisoro ku myambaro n’inkweto bya caguwa yarazamuwe bigera kuri 25%, nk’uko byemejwe na Leta y’u Rwanda mu rwego rwo guca intege caguwa zinjira mu gihugu.

Abaturage bagiye kujya bavoma amazi meza ku ivomero bahawe.

Ivomero ryatashywe kuri uyu wa 9 Kanama 2016, ryubatswe n’umushinga wa kiyisilamu, E.H.E, ryuzuye ritwaye miliyoni umunani z’amafaranga y’u Rwanda.

Amazi y’igishanga bavomaga ngo bayatekeshaga ibiryo bikaba umukara,,imyenda bayamesesheje ntiyere, kandi ngo bayanywaga akabatera indwara z’umwanda.

Ntirivamunda Sylvestre utuye mu Mudugudu wa Gahondo, avuga ko ku myaka 70 afite, atari yarigeze abona amazi meza hafi iwabo, ngo akaba yakoraga urugendo rw’isaha ajya kuvoma amazi meza.

Yagize ati “Kuva navuka, twari tutaragira amazi meza, twivomeraga aya y’igishanga mabi ku buryo nta wagiraga agashati k’umweru kuko kukamesa kateraga.

Aya mazi bavomaga ni na yo usanga abavuye guhinga umuceri bakaramo.

Avuga ko no kuyatekesha ibiryo byahindukaga umukara. Ati “Ubu inzoka zari zaratwishe kubera kunywa aya mazi. Turashima Perezida wa Repubulika kuko ibi byiza byose tubikesha imiyoborere myiza ye.”

Iri vomo rizajya rivomwaho n’abagera ku 1500 batuye Umidugudu ya Gahondo n’indi midugudu ihakikije yo mu murenge w’abaturanyi wa Gashanda.

Sheih Muhoza Issa, Umunyamabanga Nshingwabikorwa w’umushinga E.H.E watanze aya mazi, avuga ko uyu muryango uzakomeza gufasha mu kugeza amazi meza ku baturage batarayabona.

Yagize ati “Tumaze gucukura amavomo agera kuri ane, turizeza ko tuzakomeza kuko twabyiyemeje, tuzakomeza kuyatanga ahandi kuko twifuza ko abantu bagira ubuzima bwiza.”

Uyu musaza avuga ko amazi bakoreshaga atari meza.

Umuyobozi w’Akarere ka Ngoma Wungirije ushinzwe Imibereho Myiza, Kirenga Providence, yasabye aba baturage ko amazi meza bahawe bayafata neza bakarushaho kwita ku isuku.

Yijeje kandi abandi bataragerwaho n’amazi meza muri aka karere ko azabageraho bidatinze kuko biri mu byo akarere gashyizemo ingufu.

Yagize ati “Inzira iracyari ndende, aho ataragera turagerageza kugira ngo byibura buri kagari kagerwemo n’umuyoboro w’amazi meza. Tubishyizemo imbaraga kuko buri mwaka akarere gateganya amafaranga menshi yo kugeza amazi meza ku baturage.”

Kugeza muri izi ntangiriro za Kanama 2016, Akarere ka Ngoma kavuga ko kageze ku kigereranyo cya 88% ku baturage bagerwaho n’amazi meza badakoze metero zirenze 500 bajya kuyashaka.

Abahawe ibikoresho biyemeje ko bagiye gukora bakiteza imbere babikesha imyuga bigishijwe.

Ibyo bikoresho byatanzwe n’umushinga wa kiyisilamu wita ku burezi, ubuzima n’ubukungu (E.H.E), birimo imashini zidoda, ibikoresho bikanika amagare ndetse n’imashini zisudira ibyuma, bikaba bifite agaciro ka miliyoni eshanu z’amafaranga y’u Rwanda.

Abaturage bahawe ibyo bikoresho tariki 9 Kanama 2016, barimo 169 bo mu Karere ka Ngoma, ari na ho habereye iki gikorwa, n’abandi 41 bo mu turere twa Rwamagana na Kayonza, bakaba bavuze ko bizababera intangiriro nziza yo kwihangira imirimo.

Mushimiyimana Aisha, wo mu Karere ka Ngoma, yagize ati “Nk’ubu njye ndi umupfakazi, ubu nabagaho ncumbika, mbeshejweho no guhingira abandi ngo mbone ibyo ndya. Ndizera ko iyi mashini idoda mpahwe ngiye kuyikoresha ngatera imbere maze mbe nanjye nakwigeza ku icumbi.”

Ibikoresho byatanzwe bifite agaciro ka miliyoni eshanu z’amafaranga y’u Rwanda yatanzwe n’umushinga EHE.

Bizimana Hamza wo mu Karere ka Kayonza, avuga ko umwuga yize uzamuha amafaranga yo kumufasha mu masomo ya kaminuza arimo kwiga i Gahini.

Yagize ati “Nahuguwe ibijyanye na sudire. Ubu uyu mwuga n’iki gikoresho mbonye bizamfasha kubona amafaranga yo gufotoza note (inyandiko z’amasomo), igihe ntagiye kwiga nkasudira inzugi n’ibisenge, nkabona amafaranga amfasha.”

Umunyamabanga Nshingwabikorwa w’umushinga EHE, Sheikh Muhoza Issa, avuga ko abahawe ibikoresho ari icyiciro cya kane bigishije imyuga imara gihe kiri hagati y’amezi atandatu n’icumi.

Abayobozi bakuru mu idini ya Islam ikoreramo n’uyu mushinga, bari bahari.

Sheikh Muhoza avuga ko uyu mushinga ufite gahunda yo kugenzura abo watangiranye na bo, wasanga hari ingorane bahuye na zo, ukabafasha kuzamuka.

Yagize “Ubu gahunda yo kwigisha imyuga uyu mwaka tugiye gusa n’ababihagarika gake, maze tugende turebe mu bo twigishije mbere mu myaka ibiri ishize twahaye n’ibikoresho, turebe aho bageze batera imbere. Abo tuzasangana ingorane, tubafashe kuzivamo.”

Umuyobozi w’Akarere ka Ngoma Wungirije ushinzwe Imibereho Myiza, Kirenga Providence, yasabye abahawe ibikoresho kwishyira hamwe bagahuza imbaraga kandi bagakomeza gutyaza ubwenge bakora ingendoshuri kugira ngo bigire ku bandi bateye imbere mu myuga.

Mushimiyimana Aisha ngo agiye gukoresha iyi mashini yiteze imbere.

Rujara avuga ko nubwo ageze mu gihe cyo kujya mu kiruhuko cy’izabukuru bitamuca intege zo kwiga.

Bujara yarangije ayisumbuye kuri GS Gahima ho mu Murenge wa Kibungo mu Karere ka Ngoma mu mwaka w’amashuri wa 2015 abona amanota 37/70 mu ishami ry’indimi.

Avuga ko kuba abonye buruse yo kwiga kaminuza kandi akuze ageze mu myaka y’ikiruhuko cy’izabukuru bitamuca intege zo gukomeza kwiga kuko icyo ashaka ari ubumenyi bwamufasha.

Yagize ati “Nize banca intege ngo ndakuze none ndayarangije, rero ntabwo nabura gukomeza kuko nubwo ntabona akazi muri Leta ubumenyi nzakura muri kaminuza buzambeshaho bumfashe kuba nakwagura ibyo nkora (Ubudozi) no kwihangira umurimo. Iyo ufite ubumenyi n’ibindi biraza.”

Icyemezo Rujara yafashe cyo kwiga akuze cyagize ingaruka kuri benshi kuko byafashije abana biga ku kigo yigagaho gukunda ishuri, bamufatiraho urugero.

Kugeza ubu, mu Mujyi wa Kibungo harabarurwa abagabo batatu barimo n’abacuruzi bafite amaduka akomeye bafashe icyemezo cyo gusubira mu ishuri bakuze ngo bashake ubumenyi.

Bangumuvunyi wasubiye ku ishuri ku myaka 38 afatiye urugero kuri Rujari, we avuga ko kugira ubumenyi n’amafaranga ari byo bifasha umuntu kugera kure.

Uwitwa Bangumuvunyi Godfroid, ku myaka 38, avuga ko abonye umurava Rujara yari afite wo kwiga na we yafashe umwanzuro wo kwambara iniforume ajya gusubukura amashuri yari yahagaritse mu 1991.

Agira ati “Nabonye uyu mugabo Rujara yiga ashaje kandi afite umurava mwinshi, nanjye bimpa umurava wo kwiga. Ntibyari byoroshye kuko nakoraga ubucuruzi,ndabuta mbusigira umugore njya kwiga ku Gisenyi. Numvise kugira amafaranga n’ubumenyi byamafasha kurushaho gukora neza.”

Bangumuvunyi yari yarahagarikiye amashuri ye mu mwaka wa 2 w’ayisumbuye, asubirayo mu 2012 none uyu mwaka azakora ibizamini bisoza amashuri yisumbuye.

Rujara avuga ko kwiga ayisumbuye byamufashije kwiteza imbere mu bijyanye n’akazi akora k’ubudozi (afite atelier de couture), binamufasha guhuriza bagenzi be b’abadozi muri koperative ifite intumbero yo kugira ubumenyi bwo kudoda imyenda nk’iva mu Burayi n’ahandi.

Yatangiye kwiga muri 2012 abifatanya no gutunga urugo rwe rw’abana umunani n’umugore, agakora buri munsi urugendo rwa kilometero 10 n’amaguru ajya kwiga.

Rujara Pierre ashima cyane Perezida Paul Kagame wahaye amahirwe abantu bose yo kwiga binyuze muri politiki y’uburezi kuri bose, politike ashimangira ko yabaye igisubizo ku nzozi ze.

Ifu ikorerwa mu ruganda rwa Bizimana.

Ubwo yasozaga amashuri ye mu buhinzi (Agriculture Engineering) mu Ishuri Rikuru rya Kibungo INATEK muri 2011 kuri ubu ryahindutse kamiunuza ya UNIK, Bizimana yakoze ubushakashatsi ku buryo bwo gukora ifu y’igikoma yarandura imirire mibi mu bana.

Ashingiye ku bumenyi yari amaze imyaka itanu ahabwa muri kaminuza yakemanze ubuziranenge bw’igikoma ababyeyi bagaburira abana babo, maze akora ubushakatsi bugamije kureba uburyo yakora ifu yujuje ubuziranenge n’intungamubiri kandi ku buryo byakorohera umubiri gukoresaha intungamubiri ziri mu gikoma.

Bizimana agira ati “Ababyeyi twaraganiriye nsanga baha abana igikoma, ariko nsanga igikoma babaha bo bibwira ko ari igikoma ariko atari cyo.”

Avuga ko nk’iyo batetse igikoma cya kawunga, iyo bamaze gushyira ifu mu mazi,igikoma kigafata cyane (kubera amido ibamo), urimo kugiteka ngo ashyiramo amazi meshi kugeza igihe ya amido itagishobora gukurura amazi ngo gifate, bityo ngo ugasanga yagifunguye bikabije na za ntungamubiri zikagenderamo.

Ibi ngo ni byo byateye Bizimana gukora ubushakashatsi ku ifu y’igikoma cy’bigori na soya byabanje kumezwa (“Germinstion”), nyuma bikanikwa bikabona gukorwamo ifu ifite intungamibiri, itagora umubiri kwakira.

Bizimana wakoze ubushakashatsi ku ifu y’igikoma bikamugeza ku kwikorera uruganda.

Ni ubushakashatsi buri mugitabo yise “Téchnique de gérmination pour amaliorer la qualité de la bouie pour les enfants’; Tugenekereje twakwita “Uburyo bwo kumeza (ibigori cyangwa soya) hagamajwe kongera ubwiza bw’igikoma”.

Ireme ry’ubu bushakashatsi ryatumye abasha gushinga uruganda yise”PANOVITA” rutunganya ifu y’igikoma cy’abana na kawunga y’ibigori,rukorera ahitwa i Musamvu mu Murenge wa Kibungo.

Bizimana agira inama abanyeshuri barangiza kaminuza gukora ubushakashatsi batagamije impamyabushobozi gusa, bagakora ububabera ikiraro kibinjiza mu kwihangira imirimo izababeshaho mu gihe bazaba bavuye ku ntebe y’ishuri.

Bizimana Jean Bosco yafashijwe na Kaminuza ya Kibungo yigagamo, USAID na Minisiteri y’Ubucuruzi n’Inganda mu Rwanda, atangiza uruganda mu 2012 ahereye kuri miliyoni zigera kuri 20, ariko ubu ibyo akora birabarirwa agaciro ka miliyoni zisaga 100 z’amanyarwanda.

Yahaye akazi bakozi cumi na batanu bahoraho, kandi afite imashini zishobora gutunganya toni 10 z’ifu y’igikoma na kawunga ku munsi ndetse n’imodoka ebyiri zishyira ifu be.

Hasubizima ashushanya umuntu akaza wagira ngo ni ifoto.

Binyuze muri iyo mpano ibyo Hasubizimana akora harimo gusiga amarangi, gukora ibyapa, gushushanya, gukora za kasha no kwandika ku myenda.

Uyu mwuga awukorera mu Murenge wa Kibungo ahitwa i Musamvu mu Karere ka Ngoma aho afite inzu yise “Empire of Artists” abamushaka bakaba ari ho bamusanga.

Uyu musore wize icungamutungo mu mashuri yisumbuye, avuga ko impano yo gushushanya atigeze ayiga ahubwo yayivukanye akayikurana ,aho no mu mashuri abanza yashushanyaga imfashanyigisho zifashishwaga n’abarimu.

Hasubizimana agenda yagura ibikorwa kuko kuri ubu ngo akorera no mu turere twa Nyagatare, Kirehe na Kayonza.

Agira ati “Nkurikije aho iyi mpano yanjye yankuye n’ibyo ngenda ngeraho, mbona nshyizemo imbaraga kurushaho byangeza ku bindi birenze uko mbitekereza; kuko ubu amasoko yabonetse, nibura nshobora gukorera amafaranga ari hagati y’ibihumbi 200 na 400 ku kwezi.”

Uyu munyabugeni, ngo amaze kwigisha gushushanya bagenzi bagera kuri 11 bo mu mirenge itandukanye, ku buryo iyo afite ibiraka byinshi ari bo yoherezayo.

Ubwo yigaga amashuri yisumbuye ngo iyi mpano ye yamufashaga kubona amafaranga y’ishuri agera ku bihumbi 55 bishyuraga, kubera ibiraka yakoraga mu biruhuko no ku minsi ya konji.

Ni umukino wari witezwe kuza kugaragaramo gushwana nk’uko byari byagenze mu mukino ubanza wari wabereye i Kirehe, aho abafana bari benshi cyane, ndetse na Police ifatanyije na DASSO bakaba bari bageze ku kibuga kare kugira ngo baze gukumira amakimbirane yavuka muri uyu mukino, cyane ko bamwe mu bafana ba Etoile de l"est bavuka ko bazakwihorera kuko ngo hari abakubiswe mu mukino ubanza.

Mu ikibuga cy’i Ngoma cyiganjemo IVUMBI niho uyu mukino wabereye

Ku munota wa 30 w’umukino, ikipe ya Etoile de l’Est yabonye igitego cyayo cya mbere, igitego cyatsinzwe n’uwitwa Muhoza Tresor, maze abafana b’ikipe ya Etoile de lEst bahita biroha mu kibuga mu rwego rwo kwishimira igitego cyabo.

Abafana ba Etoile de l’Est bishimira igitego cyatsinzwe na Muhoza Tresor

Mu gice cya kabiri cy’umukino amakipe yombi yakomeje kugaragaza ishyaka ryinshi, gusa Kirehe ikagaragaza gutinza umukino aho bamwe mu bakinnyi babiherewe amakarita y’umuhondo, naho ku ruhande rwa Etoile de l’Est bagakomeza gusatira cyane, ndetse biza no kuviramo Etolie de l’Est kubona ikarita y’umutuku kubera imbaraga nyinshi yakoreshaga ishyaka kwishyura.

Abafana bari benshi cyane

Ikipe ya Etoile de l’Est yakomeje kwiharira umukino ku buryo bugaragara, ndetse Muhoza Tresor wari watsinze icya mbere, habura iminota itageze ku icumi yaje kongera guhusha igitego cyari cyabazwe n’abantu benshi, ariko umukino uza kurangira ari igitego 1-0 maze Kirehe Fc ihita izamuka mu cyiciro cya mbere.

Umukino ukirangira bahise bajya mu kibuga

Pepiniere nayo yazamutse mu cyiciro cya mbere

Mu wundi mukino wa 1/2 wahuje ikipe ya Pepiniere na Interforce ku kibuga cya Ferwafa, waje kurangira Pepiniere itsinze Interforce ibitego 2-0, bituma Pepiniere izamuka kuko mu mukino ubanza zari zanganyije 0-0.

Ubwatsi bw’amatungo mu gihe cy’izuba bukunda kuba imbogamizi ikomeye ku borozi bo mu Ntara y’Iburasirazuba.

Aborozi bangana na 80% mu Ntara y’Iburasirazuba bororera inka mu biraro, bakaba bahura n’ikibazo gikomeye cyo kubona ubwatsi bwo kuziha mu gihe cy’Impeshyi kuko ibyatsi biba byarumye.

Amahugurwa azahabwa aba borozi ni abafasha kumenya uburyo bajya babika ubwatsi bw’amatungo igihe kirekire no kumenya gufata neza ubwatsi bwayo.

Bamwe mu borozi bavuga ko bumva ko hari uburyo ubwatsi bushobora gutunganywa, bugahunikwa ku buryo bwakwifashishwa mu gihe cy’izuba ryinshi, ariko kugeza ubu bakaba nta bumenyi bafite bw’uburyo bikorwa.

Mudomo George, umworozi utuye mu Karere ka Ngoma, agira ati “Ibyo gutunganya ubwatsi bugahunikwa hano ntabwo birahagera rwose. Baramutse babitwigishije byadufasha cyane kuko nk’ubu muri iki gihe cy’izuba, inka zirasonza kuko ibyatsi biba byarumye.”

Undi mworozi na we yagize ati “Dufite ikibazo gikomeye cy’ubwatsi, biratugoye ku buryo twifuza uburyo mu gihe cy’izuba natwe twajya tubona ubwatsi bwo guha amatungo.”

Niyireba Remy, Umushakashatsi ushinzwe gahunda y’ubwatsi bw’amatungo muri RAB, avuga ko muri uyu mwaka w’ingengo y’imari wa 2016-2017, mu Ntara y’Iburasirazuba hateganyijwe miliyoni 65 z’amafaranga y’u Rwanda azashorwa mu bikorwa byo kwigisha abaturage uburyo bwo gufata neza ubwatsi no kubutunganya babuhunika.

Niyireba avuga ko aborozi bazigishwa uburyo bushya bwo guhinga urubingo kandi bagahinga ku bwinshi ibiti byongera umukamo byunganira ubwatsi bw’urubingo.

Mu Ntara y’Iburasirazuba, iRAB iteganya ko hazakomeza guhugurwa abagoronome, abafashamyumvire mu bworozi n’aborozi ubwabo kugira ngo havanweho imbogamizi aborozi bakunze kugaragaza zo kubura ubwatsi mu gihe cy’Impeshyi.

Bavuga ko bakimara gutorerwa kuyobora umudugudu ntawari uzi inshingano,ariko uko bagenda bahugurwa ngo bibungura byinshi bibafasha kuba abayobozi beza.

Amahugurwa ku miyoborere ngo afasha benshi no mu buzima busanzwe.

Mukansanga Gaudence,uyobora Umudugudu wa Kiruhura mu Kagali ka Cyasemakamba mu mahugurwa yatumye ahindura imyumvire no kumenya kugira igenamigambi ry’abaturage ayobora mu mudugudu.

Yagize ati”Amahugurwa yatumye tumenya ko natwe tugomba kugira igenamigambi ry’abaturage tuyobora mu mudugudu,tudategereje gusa ibiva kunzego zidukuriye. Amahugurwa ku miyoborere ni ngombwa aradufasha.”

Rugazura Medard umuyobozi w’Umudugudu wa Kabeza mu Murenge wa kibungo,avuga ko amahugurwa kuribo ari ngombwa cyane kuko abenshi bajyaho batazi inshingano zabo neza kuburyo igihe batarahugurwa baba bahuzagurika.

Yagize ati”Nkanjye nkimara gutorwa,sinari nzi inshingano z’umuyobozi w’umudgudu mbese narahuzagurikaga.Gusa nubu numva bidahagije,dukeneye amahugurwa menshi kuko turamutse dukoze neza uko bikwiye byakihutisha iterambere,bipfiye hasi nabyo byagira ingaruka.”

Umuyobozi ku rwego rw’igihugu w’umuryango YIM(Youth Impact Mission)utanga amahugurwa kubijyanye n’imiyoborere, avuga ko urwanda rukeneye abayobozi bafite vision n’imikorere myiza ariyo mpamvu bahugurwa abayobozi munzego z’ibanze n’urubyiruko.

Umuyobozi ku rwego rw’igihugu w’umushinga YIM

Yagize ati”Iyo tubahugura tubabwira kugira cyerekezo 2020 twabigezeho ubu turashaka 2050. Tugomba kugira viziyo nibyo tubakangurira.Tubabwira ko ibirenge bidashoboya gukandagira ahantu ibitekerezo bitabanje.”

Akarere ka Ngoma gatangaza ko abayobozi b’imidugudu kuva batorwa muri Werurwe 2016,bamaze guhugurwa rimwe gahunda yabaye kubo mu gihugu bose.Gusa ubuyobozi bw’aka karere buvuga ko ubundi hajya habaho andi mahugurwa y’abayobozi b’imidugudu kubufatanye n’umushinga IRC,gusa ngo uyu mwaka ntayateganijwe.

Ibi biro byamaze gutangira kubakwa binyuze mu muganda w’abaturage ndetse n’imisanzu batanga ngo iyi nyubako bitezeho ko niyuzura bakegerezwa inzego z’umutekano bazafatanya nazo mu guhashya ibyaba birimo urugomo n’ubujura bw’amatungo bihagaragara.

Abayobozi barimo na ministere w’urubyiruko n’ikoranabuhanga ndetse n’inzego z’umutekano bifatanije n’aba baturage mu muganda wo kubaka ibiro bya police muri uyu murenge wa Mugesera

Abatuye Umurenge wa Mugesera ubu bifashisha police ivuye mu murenge baturanye wa Zaza kuko muri uyu murenge ntahantu Polisi ifite ibiro.

Nsabimana Ibrahim utuye muri uyu murenge avuga ko bafite umuhate n’ibyishimo byo kwiyubakira ibi biro bya Polisi kuko bazi neza ko igihe police izaba ibegereye izabafasha mu gucunga umutekano kurushaho bahashya ibyaha by’ubujura bw’amatungo n’urugombo bihaba.

Yagize ati”Igihe Polisi izaba iri hano tuzafatanya kurushaho kwirindira umutekano cyane cyane duhashya abajura b’amatungo batumereye nabi ndetse n’ibindi byaha nk’urugomo n’ibindi.Ubundi Polisi yari kure.”

Ku nruhande rw’abagore Mukabuto Costasie avuga ko igihe Polisi izaba ikorera hafi mu murenge wabo bizahashya ihohoterwa rikorerwa abagore mu ngo,ndetse n’irindi hohoterwa ritaracika burundu muri uyu murenge.

Umunyamabanga Nshingwabikorwa w’Umurenge wa Mugesera,Bizumuremyi Jean Damascene,yabwiye itangazamakuru ko kugira ibiro bya Polisi mu murenge bizarushaho kunoza service abaturage bakura kuri police kuko izaba ibari hafi badakora ingedo ndende nk’ubu.

Inyubako ya Polisi abaturage biyemeje kwiyubakira ifite agaciro ka miliyoni zirenga 30

Mu muganda wo kubaka iyi nyubako yagize ati”Twarindaga kwitabaza Polisi mu wundi murenge kuko hano ntayo dufite,iyo batari hafi hari service zishobora kuzarira ariko igihe bazaba bari hafi bizarushaho kugenda neza.Dufite ubushake kandi iyi nzu izuzura mu mbaraga zacu abaturage.”

Minisitiri w’urubyiruko n’ikoranabuhanga Jean Philbert Nsengimana,ubwo yifatanyaga n’abaturage b’uyu murenge mu muganda usoza ukwezi kwa Nyakanga 2016,yavuze ko umutekano abaturage bagizemo uruhare bafatanyije n’inzego zibishinzwe ugerwaho neza.

Akomeza avuga ko aba baturage bahisemo igikorwa cyiza kuko umutekano ari ikintu kibanze mu buzima ko ibikorwa byabo bigaragaraza ko bashyigikiye kubumbatira umutekano bafite.

Uko bugenda bwira ni ko ibiciro by’ibiribwa bigenda bigabanuka.

Imvugo “Tumuhombye” yazanwe n’abakiriya bahahira muri iri soko mu masaha ya nimugoroba, aho ibiciro by’ibiribwa biba byagabanutse.

Kubera iyi mvugo, ubu abantu benshi bashidukira guhaha ku masaha ya nimugoroba ku giciro gito, maze bigatuma abacuruzi bakomeza gucuruza kugera saa yine z’ijoro.

Nubwo iri soko ryahawe izina rya “Tumuhombye”, abacururizamo bavuga ko nta gihombo bagira nubwo abakiriya babagana baba bibwira ko bagura kuri make bikaba byatuma bahomba.

Uwiragiye, umwe mu bacururiza muri iri soko, agira ati “Nta gihombo tugira cyo gucuruza kuri make kuko inyungu tuba twazibonye.Tuba tugira ngo imari twaranguye ituveho ariko tuba turi mu nyungu nta kibazo.Tubitangira make kuko isoko riba rizongera kuba kera, tutabitanze byakwangirika.”

Abagurira muri iri soko bakunda kujyayo ku mugoroba bavuye mu kazi cyangwa bakirindiriza ngo bagure imboga n’imbuto bya make.

Umusore utashatse ko izina rye rivugwa ubwo yari muri iri soko, mu ma saa tatatu z’ijoro ahaha, kuri uyu wa 29 Kamena 2016 yatangaje ko akunda iri soko kuko agura ibyo ashaka kuri make kandi ko biba ari byiza nta kibazo biba bifite.

Yagize ati “Nk’ubu hari ubwo intoryi ziba zaguze akadobo 250Frs ku manywa, ariko waza amasaha ya nimugoroba ukakagura 100Frs.

Iri soko riradufasha kuko kuko usangamo ibiribwa byose kandi bihendutse. Ikindi abakorera kure bagera mu rugo nijoro ribafasha kubona aho bahaha.”

Abagana iri soko bashima urugwiro bakiranwa n’abacuruza mu masaha ya nijoro,kuko umukiriya aba ari umwami kubera ko aba yingingwa.

Ukurikije ibyo abacururiza muri iri soko bavuga ko “babitangira make ngo bitzangirika kuko riba rizongera kurema kera”, bigaragaza ko kuba isoko ritarema buri munsi bikiri imbogamizi dore ko rirema ku wa gatatu no ku wa gatandatu gusa.

Ibihangano bakura mu masaro bahinga ngo usanga mu mijyi ari ho bigurwa cyane kandi bakorera mu cyaro.

Aba bakobwa batatu bahise bishyira hamwe, bavuga ko bafite imbogamizi yo gukorera mu cyaro kandi isoko rigari riri mu mijyi.

Nyiransabima Sarah, umwe muri aba bakobwa bakorera mu Murenge wa Karembo, avuga ko bashinze sosiyete yitwa”NIYANYI company Ltd” ngo bibafashe gukoresha imitako ayo masaro ariko ngo isoko rikomeje kubura.

Aba bakobwa basanga igituma batabona isoko ari ugukorera mu cyaro bakifuza ko bagera mu mujyi w’akarere cyangwa i Kigali kuko ari ho hari isoko, nk’uko Nyiransabimana abivuga.

Amasaro bakoramo imitako ngo barayafite ariko isoko rikomeje kubura kubera gukorera mu byaro.

Ati “Isoko ntaryo ariko si ukuvuga ko bidakunzwe ahubwo ni ikibazo cy’aho dukorera. Ntitwabasha gukodesha amazu yo mu mijyi arahenze kandi turakiyubaka. Inguzanyo na zo kuzifata bidutera impungenge tutarabasha kugerayo byibuze ngo turebe uko batugurira.”

Ibikorwa by’aba bakobwa byamenyekanye ubwo bazanaga iki gihingwa mu imurikagurisha ry’Intara y’Iburasirazuba, bakegukana n’igikombe cyo kuba barahanze agashya bakuramo amarido, amaherena n’inigi bambara mu ijosi.

Aba bakobwa bavumbuye iki gihingwa barimo abagoronome babiri n’umwarimu. Bavuga ko bamenye ko iki cyatsi gitanga amasaro ahagana mu 2014.

Uru rwibutso rushya rw’Akarere ka Ngoma ruzashyingurwamo ibiri yari ishyinguye mu buryo butaboneye hirya no hino mu nzibutso ntoya.

Urubyiruko rwavutse nyuma ya Jenoside rw’i Ngoma, rwemeza ko urwibutso rwiza rubungabunga ibimenyetso by’amateka mabi yaranze u Rwanda,ari uburyo bwo gukumira ingengabitekerezo ya Jenoside n’ipfobya rya Jenoside yakorewe Abatutsi.

Benimana Frank, umwe muri urwo rubyiruko uba mu Mujyi wa Kibungo, yagize ati “Kubaka urwibutso nk’uru rubasha kubungabunga ibimenyetso by’amateka mabi yaranze u Rwanda, bizafasha urubyiruko ruzavuka mu myaka iri imbere kwigira ku mateka maze bikumire ko yakongera kuba.”

Uwase Rosine, wiga mu mwaka wa mbere w’amashuri yisumbiye, we avuga ko kuba abyiga kenshi ariko akaba ataragera ku rwibutso rushyinguwemo imibiri y’abazize Jenoside bidahagije kuko iyo umuntu yirebeye n’amaso ye ibimenyetso bituma arushaho gufata ingamba.

Yagize ati “Barabitwigisha kenshi, bakadusobanurira ariko si ko umuntu wese ahita abyiyumvisha, kuba hakubakwa urwibutso rubasha kubika ibimenyetso by’amateka ya Jenoside ni amahirwe akomeye mu kubaka u Rwanda ruzira Jenoside .”

Uwihoreye Egide, uhagarariye IBUKA mu Murenge wa Kibungo, avuga ko uru rwibutso ruzigisha urubyiruko amateka u Rwanda rwanyuzemo bitume bakura neza bazira ingengabitekerezo ya Jenoside.

Yagize ati “Ni umwanya mwiza abantu bazaba babonye wo kujya basura urwibutso bakanabasha gusobanukirwa amateka mabi yaranze igihugu cyacu, cyane nk’urubyiruko rwo ruba rudasobanukiwe n’amateka, dore ko bamwe Jenoside iba batari bahari.

N’abazavuka nyuma na bo bazabasha kumenya aya mateka kuko uru rwibutso rwubatswe kugira ngo ibimenyetso bya Jenoside ndetse n’imibiri y’abahashyinguye bibashe kubungabungwa mu gihe kirekire.”

Ubusanzwe, imibiri y’abazize Jenoside yari isanzwe ishyunguye mu buryo butameze neza kuko iyo imvura yagwaga, amazi yinjiraga mu mva kuko hatari hasakaye. Kubaka uru rwibutso rushya rw’Akarere ka Ngoma byatwaye miliyoni 400FRW.

CSP Rose Muhisoni yasabye urubyiruko kugira uruhare mu kurwanya ihohoterwa.

Ibi abanyeshuri basaga 1000 babisabwe tariki 18 Kamena 2016, mu bukangurambaga bwo kurwanya ihohoterwa rikorerwa umugore n’umwana, bwateguwe ku bufatanye bwa Polisi y’Igihugu na “Club Urumuri Women” y’abagore bakorera mu Ishuri Rikuru ry’Imyuga n’Ubumenyingiro ry’Iburasirazuba (IPRC - East).

Abitabiriye ubu bukangurambaga bavuga ko muri iryo hohoterwa harimo ikibazo cy’abana bakurwa mu mashuri bakajyanwa mu mirimo, icuruzwa ry’abana b’abakobwa ndetse n’irituruka ku makimbirane yo mu miryango.

Chief Spt. Rose Muhisoni, Umuyobozi Wungirije ushinzwe gukurikirana ibikorwa bya Polisi n’abafatanyabikorwa, avuga ko ihohoterwa ridashobora gucika abantu bose batabigizemo uruhare, ari na yo mpamvu urubyiruko rusabwa kurwanya ihohoterwa.

Ati “Twese niduhaguruka, tukumva ko tugomba kuba abafatanyabikorwa b’inzego z’umutekano n’iz’ibanze, ihohoterwa rizashira. Guhugura uru rubyiruko ku ihohoterwa, turizera ko aho bazabibona, bazahita bamenya ko ari ihohoterwa maze babivuge muri Polisi n’ahandi.”

Aha bari mu rugendo rwo kwamagana ihohoterwa ryibasira abagore n’abana.

Umutoni Ernestine, uyobora “Urumuri Women’s Club”, avuga ko gutegura ubukangurambaga babitewe n’ihohoterwa bagenda babona rikorerwa abana n’abagore mu muryango, bikagira ingaruka n’igihe bari ku mashuri.

Agira ati “Nk’aho dukorera muri IPRC – East, ingaruka z’ihohoterwa ku banyeshuri ziraboneka. Hari abagira ibibazo bikomeye kandi bitakagombye, bamwe bagahagarika amashuri, ariko ubu bari kugaruka. Ibi byose ni byo byaduhaye igitekerezo cyo kumva ko twashyira imbaraga mu kurirwanya.”

Niwubaruta Nunu Winny, umunyeshuri muri IPRC - East, avuga ko nyuma y’ubu bukangurambaga, urubyiruko ruzagira uruhare rufatika mu gukumira ihohoterwa mu buryo butandukanye.

Yagize ati “Dutanze amakuru hakiri kare tukagaragaza ababyeyi bahohotera abana,kuko tuba tubazi, n’abakura abana mu mashuri babajyana mu mirimo, byacika kuko bahanwa n’abandi batekerezaga kubikora bagatinya.”

Abanyeshuri bari bitwaje ibyapa biriho ubutumwa bwo kwamagana ihohoterwa mu byiciro bitandukanye.

Yakomeje agira ati “Mbona icyakorwa ngo ihohoterwa ricike ari ugukomeza gushyiraho ubukangurambaga buhagije kuko hari n’abarikorerwa batazi ko ari ryo, bigatuma ritamenyekana.”

Polisi y’u Rwanda ivuga ko mu mwaka wa 2016, abana 255 bahohotewe. Ku bufatanye n’inzego z’umutekano, hamaze kugarurwa abana bagera ku 160 bavanywe bu bihugu byo hanze bari bagiye gucuruzwa.

Inzu IPRC East yashyikirije umukecuru warokotse Jenoside utishoboye.

Iyi nzu yashyikirijwe Mutegwantebe Consolee utuye mu Karere ka Ngoma mu Murenge wa Kibungo, Akagari ka Karenge ku wa 17 Gicurasi 2016 ,yuzuye itwaye miliyoni 15 z’amafaranga y’u Rwanda.

Ni inzu ya kane iri shuri ryubakiye abarokotse Jenoside badafite amacumbi, kandi ngo bizakomeza kuko abo bubakiye bihindurira ubuzima bakigarurira icyizere.

Mutegwantebe Consolee wubakiwe iyi nzu, ni umukecuru utishoboye, abana n’umwana umwe muto.
Yagize ati “Numvaga nta byishimo nzigera nongera kubona mu buzima, ariko ibi ni ibibanje ibyiza biri imbere.

Mbanje kubashimira igitekerezo bagize cyo kumenya aho mba ahangaha. Baransuye banyereka urukundo none bampaye inzu.”

Ubuyobozi bwa IPRC East butangaza ko amafaranga yubatse iyi nzu yavuye mu bushobozi bw’abakozi bahakora ndetse n’imbaraga z’abanyeshuri biga imyuga ifite aho ihuriye n’ubwubatsi(kubaka, kubaza gusudire, amashanyarazi n’ibindi).

Igr Musonera Euphreum, Umuyobozi w’iri shuri rikuru, avuga ko abarokotse batatu bubakiye amazu mu myaka ishize byatumye bahinduka babasha kwigarurira icyizere.

Yagize ati “Iki ni igikorwa ngaruka mwaka kigamije gusubiza imbaraga abacitse ku icumu ngo bigarurire icyizere. Uyu twubakiye ntituzamutererana tuzakomeza kumuba hafi.”

Umukecuru washyikirijwe inzu ahabwa n’izindi mpano zirimo radio n’ibindi bikoresho.

Umunyamabanga Nshingwabikorwa w’Umurenge wa Kibungo, Mapendo Girbert, na we yemeza ko abamaze kubakirwa na IPRC East byabagaruriye icyizere none ubu ngo bariteza imbere babikesha urukundo bagaragarijwe.

Yagize ati “Hari umubyeyi bubakiye i Musamvu. Mu by’ukuri kubera guhungabana bitewe n’ingaruka za Jenoside zamugezeho, wasangaga afatwa nk’uwarwaye mu mutwe ariko nyuma yo kubakirwa n’iri shuri akabona aho aba,bakamwitaho ubu ni umuntu wigaruriye icyizere witeza imbere.”

Akomeza avuga ko hari n’umusore bubakiye yarasaritswe n’ibiyobyabwenge kubera ibibazo by’ingaruka za Jenoside, none na we ubu ngo yarakize arakataje mu kwiteza imbere. Ati “Byose bituruka kurukundo bagaragarizwa.”

Gushyikiriza inzu uyu mukecuru byahujwe no kwibuka aabanyeshuri n’abahoze bakoraga muri ETO Kibungo yahindutse IPRC East, bazize Jenoside yakorewe Abatusti mu 1994.

Imiryango yorojwe inka yatangaje ko izo nka zizayifasha kugira ubuzima bwiza.

Izi nka zatanzwe n’umuryango wa gikirisito “Compassion International” kuri uyu wa 16 Gicurasi 2016 kuri Sitade Cyasemakamba.

Umuyobozi wa “Compassion International” mu karere ka Ngoma, Kayitare Edouard, avuga ko babihuje n’Umunsi w’Umwana w’Umunyafurika kugira ngo umwana yizihize uyu munsi afashwa kwigobotora ingoyi y’ubukene binyuze mu kumuha inka.

Yagize ati “Bwari uburyo bwo kwerekana ko umwana afite agaciro kandi agomba kwitabwaho. Kugira ngo umwana agire ubuzima bwiza ni uko aba yariye, yanyoye amata."

Izo nka kandi ngo bazitanze mu rwego rwo gushyigikira gahunda ya Girinka Munyarwanda yatangijwe na Perezida wa Repubulika, Paul Kagame.

Abana bakomoka mu miryango yorojwe inka, batangaje ko bibashimishije cyane kuko na bo bagiye kujya banywa amata ndetse bakaba bumva ubuzima bwabo bugiye kurushaho kuba bwiza.

Mwiseneza Eric, umwe muri abo bana, yagize ati “Ubungubu tugiye kunywa amata, iyi nka igiye gutuma tubaho neza.”

Abana batanze ubutumwa butandukanye busaba ko uburenganzira bwabo bwubahirizwa.

Nyakurama Belancile, umubyeyi utuye mu Karere ka Ngoma worojwe inka akaba afite abana batatu, avuga ko yari asanzwe afashwa n’uyu mushinga.

Ashima abakoze iki gikorwa cyo gutanga inka, akavuga ko iyo nka igiye gufasha abana be kunywa amata ndetse ikanafasha umuryango kwiteza imbere bongera n’umusaruro mu mirima babikesha ifumbire izayikomokaho.

Yagize ati “Iyi nka ndayishimiye cyane rwose! Nubwo uyu mushinga hari byinshi udufasha, ariko by’umwihariko, iyi nka igiye gufasha abana banjye kunywa amata bamererwe neza."

Izadufasha kandi kwiteza imbere kuko izaduha ifumbire, umusaruro w’ubuhinzi wiyongere, bityo tubashe kwiteganyiriza ejo hazaza.”

Akarere ka Ngoma kavuga ko umuhigo kari kihaye wo koroza imiryango 550 inka muri uyu mwaka w’imihigo wa 2015-2016, kawugeze kure kuko izi nka 40 zatanzwe zaje zuzuza umubare w’inka 527 zimaze gutangwa muri uyu mwaka.

Abaguze ibibanza ku biyaga ntibabyubake bashobora kubyamburwa bigahabwa abashoramari bashoboye.

Nubwo inkengero z’ ibi biyaga zigenewe kubakwaho amahoteli n’ibindi bikorwa bikurura ba mukerarugendo,kugeza ubu abashoramari bahaguze bahatiza abahinzi bakihingaromo.

Ubuyobozi bw’Akarere ka Ngoma busaba abahaguze ibibanza guhita babyubaka vuba bitaba ibyo bigahabwa uwaza afite gahunda yo guhita yubaka.

Nambaje Aphrodice, Umuyobozi w’Akarere ka Ngoma, agira ati “Dufie ikibazo cy’uko abashoramari usanga bagura ariko ntibihutire gushyiramo ibikorwa by’iterambere bihagenewe. Usanga bahagura ubundi bakahatiza abahinzi bakahihingira nyamara ibikorwa by’iterambere hano tubikeneye vuba.”

Abaturiye ibi biyaga, na bo bavuga ko abashoramari baramutse bubatse vuba byakihutisha iterambere ryabo kuko babonamo akazi.

Ndibwirende Theogene, wo mu Murenge wa Sake, ati “Bariya bantu baguze ibibanza batabyubaka biratudindiza. Babyubatse twabona imirimo natwe tukiteza imbere ndetse na yo mahoteli akaduha akazi.”

Guverineri w’Intara y’Iburasirazuba, Uwamariya Odette, avuga kuri iki kibazo ubwo aherutse gusura aka karere, yasabye ubuyobozi bwako ko umushoramari w’inkwakuzi waza afite gahunda ya vuba akarere kamworohereza.

Yagize ati “Turifuza ko umushoramari uguze hariya ubutaha atabugura kugira ngo abubike buhingwemo amasaka.”

Visi Perezida w’Intego Ishinga Amategeko, Umutwe wa Sena, Harelimana Fatou, na we ubwo aheruka mu Karere ka Ngoma, yasabye ubuyobozi bwako gukangurira abo bahaguze ibibanza kuhubaka vuba, abatabishoboye bigahabwa abandi.

Yagize ati “Ndasaba ubuyobozi bw’aka karere kuvugana n’abo baguze ibyo bibanza bagatangira kubaka vuba, kandi abatabishoboye babihe abandi. Dufite amahirwe abashoramari barahari benshi yaba Abanyarwanda ndetse n’abanyamahanga.”

Mu gihe bamaze biga guteka ngo bungutse byinshi nubwo hari abibwira ko abagore bazi guteka.

Ku ikubitiro abagore 23 n’umugabo umwe barangije amasomo, tariki 3 Kamena 2016, bafashijwe kuzabasha kwiteza imbere bihangira umurimo kandi babashe gufata neza abagabo babo n’abana mu ngo babatekera neza.

Ubuyobozi bwa IPRC East buvuga ko aya mahirwe bwayatanze nyuma yo kubisabwa n’inama y’igihugu y’abagore mu karere ka Ngoma(CNF), mu rwego rwo kongerera abagore ubushobozi mu myuga ngo babashe kwihangira imirimo.

Uwizeye Francoise utuye mu murenge wa Kibungo, nyuma yo kurangiza amasomo mu guteka atangaza ko amasomo yahigiye yamufashije gufunguka no kureba amahirwe ahari mu kwigangira umurimo.

Abagore barangije kwiga guteka basanga ari amahirwe babonye abafasha kwihangira umurimo.

Yagize ati “Mu byukuri twese tuvuye hano dufite intego yo kugira icyo takora yaba ibijyanye no gukora ibiraka byo gutekera abantu mu makwe,mu minsi mikuru, yaba gushinga za restora n’ibindi.”

Kanyonga Maritha, urangije aya masomo akaba asanzwe ari umukozi w’Akarere ka Ngoma ushinzwe umurimo n’iterambere, avuga ko nyuma yo kurangiza ayo masomo ubu bagiye gushyiraho koperative ibahuza.

Nyuma yo kurangiza amasomo yabo bahawe na certificats.

Ati “Aha hantu muri iri shuri tuhakuye byinshi biduha amahirwe yo kumenya kihangira umurirmo.Tugiye kwishyira hamwe nk’abagore barangije kwiga guteka kuri iyi nshuro ya mbere,maze dukore koperative dutangire dukore.”

Ing Ritha Clemence Mutabazi, umuyobozi wungirije ushinzwe amasomo muri IPRC East, avuga ko iri shuri ryiteguye guhugura n’abandi benshi babishaka kuko ribereyeho guha amahirwe abashka kwiga umwuga.

Yanasabye abarangije kuba intumwa nziza bagakangurira bagenzi babo kuza kiga umuga kuko ari ingirakamaro.

Ati “Rwose hari imyanya myinshi,mu tubere intuma nziza mubwire n’abandi babishaka.Tugiye gutangira ikindi kiciro kandi si mu butetsi gusa no mu yandi masomo y’imyuga atangirwa hano.Mubwire abashomeri n’ababandi babishaka ntiduheza.”

Umuyobozi w’akarere ka Ngoma wungirije ushinzwe ubukungu, Rwiririza JMV, yashimye igitekerezo inama y’igihugu y’abagore bagize asaba abagabo nabo kwitabira iyi gahunda yo kwiga guteka.

Uru rubyiruko rusanga igihe cy’izuba ari andi mahirwe baba bafite ngo binjize amafaranga bakura mu kuvoma amazi.

Igice kinini cy’umurenge wa Rurenge ntamazi gifite, bigasaba abahatuye gukora urugendo rurerure bajya mu misozi kuvoma amazi ahaba hateraniye abantu benshi hari n’umubyigano.

Mizero Jean D’Amour w’imyaka 28, utuye mu kagari ka Rwikubo kamwe mu tugize uyu murenge, avuga ko akazi ko kuvoma amazi akayagurisha kamutungiye umugore n’abana babiri, kuko kamuha agera ku bihumbi 90Fre mu kwezi.

Agira ati “Ku munsi ubu tuvoma amajerekani 36, ariko hari n’igihe tuyarenza kandi imwe tuyigurisha ku mafaranga 150. Mu menshyi iyo imvura itangiye gucogora, ku munsi nkora aka kazi ko kuvoma amazi. Aya amafaranga amfasha gutunga urugo no kwiteza imbere.”

Mugenzi we avuga ko amaze imyaka itanu arangije amashuri yisumbuye, agasanga muri iki gihe nta gusuzugura akazi ahubwo umuntu agomba gukora uko ashoboye kose kugira ngo agere ku iterambere akoresheje ubwenge n’imbaraga ze.

Ati “Imirimo yabaye ikibazo,aka kazi nkavanga n’ubuhinzi kuko iyo imvura iguye nsubira mu buhinzi bwanjye.

Ubu maze kwiteza imbere kuko ntasuzuguye umurimo. Nagiye ninjiza ibihumbi 3.500Frw ku munsi urumva ko ari amafaranga menshi, iyo igihe cy’impeshyi kirangiye dusubira mu buhinzi.”

Niyitugize David Umuyobozi w’Umuryango uharanira ko urubyriko rwigira kandi rukagira ubuzima bwiza Youth volunteers, avuga ko imyumvire y’urubyiruko ku kudasuzugura akazi igenda ihinduka kubera ubukangurambaga uyu muryango ukora hirya no hino.

Poliliti ya Leta y’u Rwanda ishishikariza abantu bose gukora bakiteza imbere, Urubyiruko by’umwihariko rugashishikarizwa gukura amaboko mu mifuka, kwihangira imirimo no kudasuzugura akazi.

Kwegerezwa umurenge SACCO hafi byatumye n’abakecuru babasha kubitsa bakanizigamira

Abatuye mu tugari twa Rwikubo, Rugese na Rujambara muri uyu murenge, bavuga ko kuba banki zari zibari kure byatumaga batekereza ko banki zigibwamo n’abafite za miliyoni gusa, uretse no kuba bafatamo inguzanyo bakanatinya kuzijyamo.

Nzeyimana Innocent avuga ko nta kigo cy’imari kigeze kibegera aho batuye, ku buryo byabasabaga gutanga ibihumbi bitanu ngo bagere kuri banki.

Kutabona ibigo by’imari n’amabanki hafi ngo byatumaga abahatuye bagira imyumvire yo gutinya kuzigana no kuguriza banki bakibikaho amafaranga mu ngo.

Agira ati “SACCO imaze kutwegera byaradufashije kuko twayiyumvisemo, baratwegera baratwigisha, dutangira gufata n’inguzanyo twiteza imbere. Nkanjye nkora ubucuruzi na restaurant ariko ubu ngeze ku kiciro cyo guhabwa miliyoni na SACCO.

Niteje imbere ndubaka, ngura imyaka, nkora ubucuruzi nanjye n’ubu ngiye kwaka indi miliyoni ku nshuro ya gatanu.”

Izi mpinduka mu iterambere kandi zigaragazwa n’udusantire tugenda tuvuka, aho abantu bagenda bitabira ubucuruzi n’ubuhinzi bifashishije inguzanyo za SACCO Rurenge ubu ituye rwagati hafi y’abaturage.

Tabaro Jean de Dieu, umucungamari wa RP SACCO Rurenge, avuga ko bamaze gutanga inguzanyo zigera kuri miliyoni 400Frw ku baturage .Izi nguzanyo ngo zahinduye byinshi kuko iterambere rigenda ryihuta ugereranije na mbere hataregera ikigo cy’imari.

Ati “Ikigaragara cyo iyi SACCO yaje ikenewe kandi ijya hagati na hagati kuburyo buri wese imwegereye.Yaritabiriwe tumaze gutanga inguzanyo zikabakaba miliyoni 400.Murumva ko ahantu hamaze kugera miliyoni 400 hagomba kugaragara impinduka.”

Aba baturage bavuga ko ibigo by’imari nka SACCO bitabagora mu kubona inguzanyo bityo bigatuma barushaho kubyiyumvamo ngo kubigana bisanzuye.

SACCO Rurenge ubu ifite abanyamuryango bagera ku bihumbi bitanu, bari mu byiciro byose, urubyiruko, abakecuru, abasaza n’abagore.

Bamwe mu bagore bari bitabiriye ibiganiro n’abasenateri nyuma y’umuganda.

Ikibazo cy’ubwiyongere bukabije bw’abavuka cyahagurukije abasenateri bayobowe na Vice Perezida wa Sena, biyemeza kuzaganiriza aba baturage by’umwihariko ku kuboneza urubyaro.

Bamwe mu bagabo batuye muri iyi mirenge bavuga ko uku gukunda inzoga bituma hari n’abagore bahabwa amafaranga n’abagabo babo ngo bajye kuboneza urubyaro ntibajyeyo ahubwo bakayajyana mu kabari, nk’uko nitangazwa n’uwitwa Bikorimana.

Agira ati “Umugore umuha amafaranga ngo ajye kuboneza urubyaro, akayajyana mu kabari ukagira ngo yabikoze, wazajya kubona ukabona aratwite. Nubwo hari abagabo benshi batabikozwa ariko abagore na bo bikosore, bareke inzoga.”

Visi Perezida wa Sena, Harerimana Fatou yasabye ababyeyi kugana serivisi zo kuboneza urubyaro aho kuzagorwa no kurera abo badashoboye.

Niyonagira Grace utuye mu Murenge wa Rukumberi, ni umwe mu bagore banenga bagenzi babo ku ngeso yo kwirirwa mu tubari bagasinda, bamwe zikabatera kwiyandarika bakahakura inda zidateganijwe.

Ati “Birababaje, hari abagore birirwa mu tubari bamara guhaga inzoga, bakabegeka aho bakabatera n’inda. Ubusinzi butuma batifata, turabibona rwose birahari. Ubusinzi ni bwo butuma babyara batatekereje uko bazabarera.”

Ingo nyinshi zo muri iyi mirenge cyane cyane Rukumberi, usanga zirimo abana bagera ku munani. Bamwe bakisobanura ko ari ugutinya ko hagira upfa bagasigara ari incike.

Ku muganda ngarukakwezi wabaye ku wa Gatandatu, tariki 28 Gicurasi 2016, Abasinateri bari bifatanyije n’abaturage muri iki gikorwa, biyemeje kugihagurukira bakazagaruka kuganiriza aba baturage kuri iki kibazo.

Harerimana Fatou, Visi Perezida wa Sena y’u Rwanda, ushinzwe amategeko no kugenzura ibikorwa bya Guverinoma, yavuze ko bibabaje kubona abantu bashaka kubyara abo badashoboye kurera.

Ati “Ababyeyi hano buri wese arahetse afite n’undi muto. Muri Sake ngo nta mubyeyi ugira abana bari munsi ya batanu! Abo twakoranye umuganda bo batubwiye ngo hano mubyara umunani ufunze.”

Kwegerezwa umurenge SACCO hafi byatumye n’abakecuru babasha kuvitsa bakizigama.

Mukandori Felecite w’imyaka 65 utuye mu Kagali ka Rugese, avuga ko atigeze yagira konti kubera nta banki yari imwegereye kuko byamusabaga itike y’ibihumbi bitatu ngo agere aho banki yari imwegereye.

Yagize ati “Ubundi kuko hari kure, wasangaga tuyibikira mu nzu. Hari umunsi se batibaga abantu aho bayabitse mu mazu! Ubu ngubu iyo mbikije bimfasha kizigamira, kuko iyo ubitse mu rugo uyakoresha nabi ugasesagura. Ibi bintu ni byiza cyane kuba baratwegereje banki.”

Baravuga Emmanuel utuye akagali ka Rwikubo avuga ko yarinze ageza imyaka 50 atazi banki, ariko nyuma y’uko SACCO ibegereye mu 2013, yitabiriye kubitsa no kuguza akabasha kwiteza imbere.

Mukandori avuga ko yagejeje imyaka 60 ataragira konti nimwe muri banki,kubera ko zabaga kure ye.

Ati “Twari twarahombye byinshi! Ubu ndabitsa nkaguriza. Maze kugira inka nakuye munguzanyo ya SACCO. Ni ingirakamaro. Ubu n’umukecuru n’umusaza n’umwana barabitsa kuko habegereye. Ubundi mbere ntawajyagayo hari kure.”

Umucungamutungo wa SACCO ya Rurenge Mugabo Michel, avuga ko babanje gukorera ahubatse ibiro by’umurenge wa Rurenge ariko baza gufata icyemezo cyo kubaka ibiro byabo mu cyaro hagati aho abaturage babageraho byoroshye.

Avuga ko byatumye umubare w’abanyamuryango wabo wikuba hafi gatatu, kuko bavuye ku 2076 bagtangira kuhakorera mu 2013m, ubu bakaba bageze ku 5.783.

Umurenge SACCO kubegera hafi mu cyaro ngo byatumye bajijukirwa no kubitsa.

Ati “Biragaragara ko icyemezo twafashe cyo kuza hano mu cyaro hagati ugereranije n’imiterere y’umurenge wacu cyatugiriye akamaro.

Ubu turabona abanyamuryango b’ingeri zose, Abakecuru ubu nabo baraza kandi mbere ntabahageraga, abagore nabo n’uko. Ubundi twari dufite abagabo gusa kuko nibo babashaga gukora urwo rugendo rurerure.”

Utugali twa Rwikubo, Rugese n’Akagarama, mu Murenge wa Rurenge dusa n’uturi ku ruhande ahantu mu cyaro, nta kigo cy’imari cyangwa banki byigeze biba hafi yabo kubera imiterere yaho.

Umunyamakuru wa Kigali Today wagerageje gufata aya makuru ariko agakumirwa n’ubuyobozi bw’ikigo, yamenye ko uwo mwana yaguye muri icyo kigega cya metero umunani ubwo yageragezaga gukurura amazi n’umugozi akanyerera akituramo mu gitondo cyo kuri uyu wa gatanu tariki 20 Gicurasi 2016.

Imiryango y’irishuri yari ifunze itangazamakuru ryabujijwe kwinjira.

Aba banyeshuri batashatse ko amazina yabo amenyekana bavuze ko byatewe n’uburangare bw’ikigo kuko nta robine zihagije zihari, bigatuma abanyeshuri bahitamo kuvomera muri iki kigega. Ubuyobozi b’ishuri bwo ntibwashatse kugira icyo buvuga kuri uru rupfu.

Bavuze ko uwo yaguye muri icyo kigega ahagana mu ma sa mbiri.

Ikigega cya metero umunani bavomagamo ari na cyo Myakwigendera yaguyemo.

Umuryango w’uyu mwana utuye mu Kagali ka Nyamagana mu Murenge wa Remera hafi y’iri shuri ukimebya iyi nkuru byawutunguye nyina abanza kugira ihungabana.

Ubuyobozi bwa polisi yavuze ko nta mategeko bahaye iki kigo gisanzwe ari icya Kiliziya Gatolika yo kubuza abanyamakuru kwinjira, kuko kigenga bikaba ari uburenganzira bwabo gutanga amakuru.

Ikigega bavomagamo gifite metero umunani.

Abatuye umujyi wa Kibungo bemeza ko igihe amatara ku mihanda yakaga byari byaciye ubajura mu muhanda igihe cya nijoro bwatizwaga umurindi n’umwijima.

Amatara nubwo yashyizwe ku mihanda amaze igihe kinini ataka, ateza ubujura.

Ndagijimana Musa utuye ahitwa”Rond point”, avuga ko nyuma y’uko amatara yamurikaga ku mihanda apfiriye ntakorwe, hamaze kwamburirwa abantu benshi amaterefone igihe cya nijoro cyane cyane abakobwa.

Yagize ati “Ubundi amatara bakiyashyiraho yaka ubujura bwari bwacitse pe! Ntawe bamburaga telefone ye kuko habaga hagaragara bagatinya.

Nyuma yaho aya matara apfiriye ntasanwe abantu barataka buri gihe ko babashikuje zatelefone bakiruka. Abakobwa nibo bibasirwa cyane.”

Abaturage batewe impungenge kandi n’uko bashobora no kugirirwa nabi ku bundi buryo, kuko haba umijima mwinshi kandi imihanda ikikijwe n’amashyamba.

Ubu bujura bwa za telefone ahanini bwibasira abanyeshuri baba bavuye kwiga muri kaminuza ya Kibungo (UNK), kuko haba hatagaragara bacana telefone abantu bakazibashikuza bakirukira mu mashyamba ari impande z’umuhanda bakababura.

Rwiririza JMV umuyobozi wungirije w’akarere ushinzwe ubukungu n’iterambere, avuga ko imirimo y’isoko ryo gusana aya matara iri mu ipiganwa ku buryo mu gihe kitarenze ukwezi azatangira gusanwa.

Ati “Ni ikibazo twari twaratangiye gukemura kuko ubu tuvugana isoko ryaratanzwe ngo aya matara asanwe. Habayeho ikibazo cy’ampule zahiye ubu rero zigiye gusimbuzwa kuburyo twifuza ko umugi wacu uba ugaragara nijoro. Ntibizarenza ukwezi kume.”

Uyu muyobozi avuga ko aya matara bitewe nuko ahora apfa, nibikomeza kwanga azakurwaho agasimbuza andi mashya ajyanye n’igihe bari gukoresha mu kwagura ibice bicanirwa by’umujyi.

Gahunda yo gucanira Umujyi wa Kibungo hifashishijwe amatara ku mihanda yatangiye aha abaturage icyezere ariko gupfa kwayo kwa buri kanya bituma bigaragra nk’aho ikibazo cyananiranye.

Akarere kizera ko bi biti bihinzwe ku nkengero z’ibi biyaga byiyongeraho ikiyaga cya Birira, byafasha mu kukinjiriza amafaranga aturutse mu mamesa, kuko kugeza ubu amamesa yinjira mu Rwanda ava mu bihugu nk’u Burundi na Repubulika iharanira Demokarasi ya Congo.

Inkengero z’ibiyaga mu butaka bwa leta, ubundi bubuzwa guhingwaho, nibwo bazahingamo ibi biti bahamya ko bibungabunga ibidukikije.

Rwiririza Jean Marie Vianney, umuyobozi wungirije w’akarere ka Ngoma ushinzwe ubukungu, avuga ko ibi biti bisanzwe bihingwa muri aka karere byateje imbere abahinzi babyo, bituma nabo bafata gahunda yo kwagura ubuso gihinzweho.

Agira ati “Ni igihingwa twaje kubona ko cyateza imbere abaturage kandi tubona kugihinga muri za metero zegereye ibiyaga ntacyo byakangiriza ahubwo byakirinda. Hagiye kurebwa uburyo byaganirwaho hakagurwa ubuso gihinzweho hifashishijwe ubutaka bwereye ikiyaga.”

Akomeza avuga ko ubundi iki gihingwa cyari gisanzwe gingwaga ku buso butarenze hegitari 2,5 n’umusaruro ugatunganwa mu buryo gakondo.

Imbuto zera ku biti by’ Ingazi zikorwamo amavuta y’amamesa akundwa n’abatari bake.

Ariko akarere kagiye kureba uburyo hashyirwaho imitunganyirizwe igezweho yaya mavuta hifashishijwe uruganda, nk’uko akomeza abisobanura.

Rutsobe Michel ukora mu buhinzi bw’ibigazi mu Murenge wa Rukumberi, avuga muri uyu murenge hafi ya buri rugo ruba rwifitiye amavuta y’amamesa rwitunganyirije andi bakayagurisha mu masoko.

Ati “Ubundi dufite imbogamizi z’uruganda ruciriritse rwadutunganyiriza uyu musaruro mu buryo bugezweho. Ubu buhinzi buradufasha cyane kuko amavuta dutunganya arakuzwe ku isoko hari nayo tugemura i Kigali.”

Aba bahinzi bavuga ko ibigazi byatangiye guhingwa muri iyi mirenge mu 1997 ubwo hazaga umushinga watangaga ingemwe, buri rugo ruhabwa ingemwe ebyiri.

Imiti ikoreshwa mu gusinziriza umuntu kugera ubwo bamutwaye moto ntikiramenyekana, ariko abenshi bemeza ko bashukisha umumotari icyo kunywa bakayishyiramo.

Abamotari bakorera Ngoma ngo bafashe ingamba zo kwirinda kugira icyo barya cyangwa banywa bagihawe n’umukiriya batwaye ngo batabiba.

Ntakirutimana Ramazani, umwe mu bamotari bakorera muri koperative COTAMON ikorera muri aka karere, avuga ko nawe azi abo byagiye bibaho bakabiba moto basinziriye nyuma yo kubaha fanta ziroze.

Agira ati “Uwo nzi umugenzi yaramuteze bageze ahitwa i Nasho asaba umumotari ko bajyana restaurant, agurira umumotari fanta, bamaze kuyipfundura amutuma ikarita ya telefone hanze, ubundi agarutse anyoye kuri fanta arasinzira yikangura bayijyanye moto.”

Hitayezu Jean Bosco umuyobozi wa koperative itwara abantu kuri za moto COTAMON ikorera mu Karere ka Ngoma avuga ko ubujura nk’ubwo bumaze kuba ku bantu babiri azi moto zabo zikiba.

Hitayezu Jean Bosco umuyobozi wa COTAMON asanga ubu bujura bwakwirindwa..

Avuga ko bataramenya ibintu bakoresha bagashyira mu byo kunywa ariko ngo ibyo bakoresha bituma umuntu asinzira akazubara agata ubwenge maze moto bakayitwara bakamwaka n’ibyangombwa byayo.

Ati “Baba bafite amayeri menshi murabanza mugasangira ubundi bagashyiramo ibyo bintu utabizi. Nk’uwo nzi bamutumye umukoba I Kabarondo amuzanye bamubwira ko aza kumusubizayo amutegereza.Muri uko gutegereza nibwo bamuguriye icyo kunywa bashyiramo.”
Ubuyobozi bwa police mu karere ka Ngoma aherutse kugirana inama n’abakora umwuga wo gutwara abagenzi kuri moto, kwirinda kugira ikintu na kimwe banywa cyangwa barya bakiguriwe n’umugenzi igihe bari mu kazi.

Ati “Abamotari namwe mugomba kwicungira umutekano n’uwa moto zanyu.Ugasanga utwaye umugenzi umugejeje aho ajya atangiye kuguha amafanta. Kuki bazibashukisha mukazinwa kandi mwarumvise ko hari abazifashisha mu bujura bwa moto? Guhera ubu mubyirinde.”

Uretse ubujura nk’ubu bwa za moto, muri aka karere havuga n’ubujura bwa za moto bazisanze mu mazu nijoro, cyangwa aho baparitse nubwo zimwe zikurikiranwa zigafatwa.

Byabaye saa moja z’umugoroba wo ku wa 04 Gicurasi 2016 ubwo nyakwigendera yari kumwe n’umukobwa we w’imyaka 21 witwa Uwimana Florence, bavuye kuzitura ihene maze uwo mukobwa akumva nyita atatse rimwe bamukubise ikintu.

I Ngoma umubyeyi yishwe avuye gucyura amatungo.

Uwimana avuga ko yari yagiye amuherekeje kuko bwari nijoro maze mu nzira yumva nyina, wari inyuma, aratatse arebye abona yituye hasi.

Yagize ati”Nari ndi imbere numva mama aratatse ngo ‘ndapfuye!’ ndebye mbona yituye hasi ngiye kumufata uwari umukubise ikintu aza ansanga ambwira ngo nanjye yahita anyica.

Nahise nsubira inyuma ndiruka njya gutabaza baraza basanga uwo wamwishe yigendeye. Sinamumenye.”

Ngenda Mathias, Umunyamabanga Nshingwabikorwa w’umurenge wa Rukira, avuga ko hari abantu babiri bakekwa bahise bahise batangira gukorwaho iperereza kubera urworupfu.

Avuga ko abakurikiranwe yari nyakwigendera yari ababereye mukase kandi bakaba bari bafitanye amakimbirane ashingiye ku marozi, gusa ngo iperereza rirakomeje ngo hamenyekane uwabigizemo uruhare.

Yagize ati “Ku ikubitiro hari abagabo babiri bafashwe bari bafitanye ibibazo ni bo bari gukurikiranwa n’iperereza ariko ntibarahamwa n’icyaha.Twahise tuhagera ubuyobozi n’inzego z’umutekano nyuma yo kubimenya ubu ejo twakoresheje inama abaturage tubahumuriza.”

Mu Karere ka Ngoma hari haherutse kumvikana inkuru y’ubwicanyi mu Murenge wa Karembo aho umugore yishe umugabo we bikamenyekana hashize imyaka itanu.

Ni nayo mpamu abo bamotari bahungaga polisi mu gihe ibahagaritse, bavuga ko inyinshi zahigwaga na polisi, nk’uko babitangarije mu nama bagiranye n’ubuyobozi bwa Polisi kuri uyu wa kane tariki 5 Gicurasi 2016.

Polisi isanga kuba abamotari babakwepa byatuma amakuru adatangwa neza mu gihe hari umumotari ufite amakuru akumira icyaha.

Mupenzi Moise umumotari ukorera muri aka karere, avuga ko abenshi nta byangombwa bibemerera gutwara abantu bagiraga kubera uburangare bwo gutinda kubishaka, bagatinya ko polisi yabahana.

Yagize ati” Kwiruka byo rwose turiruka ntawuhagarara abonye polisi kuko moto zacu twese zishakishwa. Muramutse mu tubabariye ntawakongera kujya yanga guhagarara kuko Ikibazo cy’ibyangombwa cyakemutse hasigaye icyuko moto zishakishwa gusa.”

Ndayishimiye Donat ye yavuze ko bishimiye guhabwa imbabazi, kuko nta kizababuza kongera guhagarara mu gihe umupolisi abahagaritse.

Ati “Dufite permit n’ibyangombwa byo gutwara abantu, nta kindi cyatuma dukwepana na police.Ubu rwose ntawuzongera kubatinya ngo yiruke ahubwo tugiye gukorana neza na polisi mu kwirindira mutekano dutanga amakuru ku gihe nkuko babidusabye.”

SSP Jenvier Rutaganda, umuyobozi bwa polisi mu Karere ka Ngoma avuga ko imikoranire myiza hagati y’uru rwego n’abatwara za moto itanga umusaruro mu gukumira ibyaha bitaraba no mu kurwanya abakwirakwiza ibiyobyabwenge.

Ati “Hari ababikora nk’uko byagaragaye hari abatanga amakuru igihe bahetse umuntu bakeka, hari n’abagira amakenga bagera kuri polisi bagahita babatuzanira tukareba niba ntakibi bafite.”

Muri iyi nama abamotari bakanguriwe kudahishira umunyacyaha, ahuwo bakaba abafatanyabikorwa mu guhashya ikibi.

Uwo mugore utuye mu Mudugudu w’Urutare, Akagari ka Karaba, Umurenge wa Karembo, ngo akimara kwica umugabo we mu mwaka wa 2011, yakomeje kubeshya ko yagiye gupagasa muri Uganda, ariko nyuma y’iperereza ryari rimaze hafi imyaka itanu, uwo mugore aza kwiyemerera ko yishe umugabo we akamuta mu musarane.

Umugore akurikiranyweho kwica umugabo we akamuta mu musarane. Byamenyekanye hashize imyaka itanu.

Umuvugizi wa Polisi y’u Rwanda mu Ntara y’Iburasirazuba, IP Emmanuel Kayigi, yabwiye Kigali Today ko icyaha uyu mugore akurikiranyweho cyo kwica uwo bashakanye kiramutse kimuhamye, yahanwa n’ingingo ya 142 yo mu gitabo cy’amategeko ahana mu Rwanda, iteganya igifungo cya burundu.

Abaturanyi b’uyu mugore baganiriye na Kigali Today, bavuga ko yababwiraga ko umugabo we yagiye gushaka imibereho muri Uganda ariko hakaza kumenyekana amakuru ko yamwishe akamushyira mu musarani, agahita awusibira, maze agacukura undi ku ruhande wo gukoresha.

Nyuma y’uko umuryango ya nyakwigendera umushakiye kugera no muri Uganda ukamubura, watanze ikirego maze iperereza riratangira kugera ubwo bimenyekanye ko yishwe n’umugore we, akajugunywa mu musarani.

Ku wa 30 Mata 2016, ni bwo umurambo wa nyakwigendera wakuwe muri uwo musarane wari warasibwe utagikoreshwa, maze umugore abona kwiyemerera icyaha, avuga ko yamuzijije amakimbirane bari bafitanye.

Icyobo cy’umusarane umugore yari yarajugunyemo umurambo w’umugabo we.

Uyu muryango wahoragamo intonganya, nk’uko byemezwa n’ubuyobozi bw’akagari, ngo mu kwezi kwa Kamena 2011, umunsi uwo mugore yica umugabo we, bari baraye batongana banarwana, bukeye byirirwa uko maze bigeze nijoro, umugore yihimura ku mugabo we amukubita ishoka mu mutwe no mu gatuza, nk’uko abivuga.

Uyu mugore ufungiye kuri Sitasiyo ya Polisi ya Zaza avuga ko kwica umugabo we yabitewe n’amakimbirane bari bafitanye arimo kuba yaramucaga inyuma ndetse agasahurira umutungo w’urugo mu bushoreke.

Umuvugizi wa Polisi y’u Rwanda mu Ntara y’Iburasirazuba asaba abaturage kutihererana ibibazo bigeza aho kuvutsanya ubuzima kandi agasaba ubuyobozi kudasuzugura ibibazo by’amakimbirane mu miryango kugira ngo bidateza imfu.

Yongera gusaba abashakanye kwirinda ibyaha bikurura amakimbirane mu ngo birimo ubusambanyi n’ubusinzi.

Uyu muryango wari ufitanye abana batanu bakaba bahise batwarwa n’umuvandimwe wa nyakwigendera kugira ngo abarere mu gihe umugore we akurikiranwa n’ubutabera.

Yabitangarije abatuye Akarere ka Ngoma mu ruzinduko yahakoreye rugamije kureba aho bageze mu rugendo rw’iterambere, kuri uyu wa kane tariki 28 Mata 2016.

Perezida Kagame yasabye abagabo gushyigikira iterambere ry’umugore.

Yagize ati “Ndashaka ko Umunyarwandakazi adasigara inyuma tukajyana twese umugabo n’umugore mu iterambere, rikaba iterambere ry’Umunyarwanda.

No mu rugamba rwo kurwanya ubukene tuvuga turashaka ko umugabo n’umugore bahagurukira hamwe bakaburwanya.”

Mu gushyigikira abagore mu iterambere, Perezida Kagame yavuze ko yasinye mu ba mbere, asaba abandi bagabo bose kubigira vuba, kuburyo iki cyumweru kirangira byibuze habonetse abagabo bagera ku bihumbi 500 basinyiye ko biyemeje gushyigikira iterambere ry’umugore.

Ibikorwa by’iterambere byafasha abatuye akarere ka Ngoma mu kurwanya ubukene harimo ubuhinzi, aho Perezida Kagame yasabye ko hashyirwa ingufu mu buhinzi bwa kijyambere hakoreshwa imbuto z’indobanure n’amafumbire kugirango bajye beza banasagurire amasoko.

Abaturage bari baje gukurikira ubutumwa Perezida Kagame yabageneye.

Hashize amezi agera kuri atandatu mu Rwanda hatangiye kampanye yiswe HeforShe, igamije gukangurira abagabo gushyigikira iterambere ry’umugore.

Iyi gahunda ya Minisiteri y’Uburinganire n’Iterambere ry’Umuryango (MIGEPROF), igamije gukusanya ubuhamya bw’abagabo bemeza ko bashyigikiye uburinganire. Ukeneye gushyigikira iyi gahunda wakanda aha.

Kureba andi mafoto menshi y’uruzinduko yakoreye mu Karere ka Ngoma kanda AHA

Ntamahoro wavutse mu 1963 avukiye mu Karere ka Ngoma, mu Murenge wa Rurenge mu cyahoze kitwa Segiteri Kaberangwe.

Igihe yakoraga muri Etat-Major ngo yabashaga kumenya amabanga menshi.

Avuga ko yinjiye igisirikare mu 1982, aza gushingwa umurimo w’itumanaho muri Etat Majoro y’igisirikare cyo kubwa Perezida Habyarimana mu 1992.

Mu buhamya bwe agaragaza ko umwanya yari afite yashoboraga kumenya amwe mu mabanga yo mu gisirikare n’uburyo leta yateguraga Jenoside yakorewe Abatutsi yifashishije igisirikare.

Avuga ko Jenoside yateguranwe ibanga rikomeye ku buryo ibyakorwaga byose abaturage batashoboraga kumenya ko hategurwa Jenoside, kuko ngo iyo babimenya itari gukunda.

Agira ati “Jenoside yateguranwe ibanga rikomeye kuko iyo abantu bamenya ko yari Jenoside yategurwaga ntiyari kubaho. Abaturage baramutse bamenye ko ari Jenoside itegurwa ntago yaba ikibaye.”

Ntantoro wari ufite ipeti rya Sergent, avuga ko umuzi wo gutegura Jenoside byari ukubiba urwango n’ivangura, Abatutsi bahezwa muri myanya yose yatumaga bamenya umugambi wategurwaga wo kubarimbura.

Mu gisirikare ngo hakorwaga ibishoboka byose kugira ngo hatagira Umututsi ubacika akinjira igisirikare, kuko bari bazi ko igisirikare ari cyo cyari gufasha mu ishyira mu bikorwa rya Jenoside.

Ati “Igisirkare nkuko mubizi kiri mu byakoreshejwe cyane muri Jenoside. Nizo mbaraga zashyize mu bikorwa Jenoside kandi iyo zitaza gukoreshwa, abaturage ubwabo nta mbaraga bari kubona. Niyo mpamvu mu kujya mu gisirikare bageragezaga kwirinda ko Umututsi yakijyamo.”

Akomeza asobanura ko mu mwanya w’itumanaho mu byagisirikare yari ashinzwe yabashije kubona ubutumwa butandukanye, bujyanye no gutoza interahamwe mu gutegura umugambi wa kwica Abatutsi byashinzwe igisirikare gishinzwe kurinda Perezida (GP).

Iyi myitozo yo gutoza interahamwe zagombaga kumara Abatutsi yari ishinzwe uwari commandant w’abajepe (GP).

Avuga ko Iyo myitozo yahabwaga abasore bose bari baturutse mu mpande zose z’igihugu bakajya kubaha imyitozo mu Mutara mu Burasirazuba bw’gihugu i Gabiro.

Bahabwaga imyitozo mu bubyo bitaga DAMI (Detachemnet d’Assistance Militaire), bavuga ngo bagiye gukora DAMI, aho izi nterahamwe zigishwaga ubwo bwo kwica byihuse bakoresheje intwaro cyangwa ntazo bafite (combat sans armes).

Ati “Nubwo abantu benshi batari babizi njye kubera ko “message” zaturukaga muri Etat Majoro zijya aho byakorerwaga, njye narazirebaga n’uburyo byakorwaga narabibonaga.”

Ikindi ni uko aho i Gabiro aba basore b’interahamwe bahigiraga icyo bita “Ideologie miltaire”, babigisha amacakubili n’inzangano zishingiye ku moko bababwira ko Umututsi ari umwanzi bagomba kumwica.

Ku bwe ngo nubwo u Bufaransa buhakana uruhare bwarwo muri Jenoside yakorewe Abatutsi, avuga ko ari bwo bwatoje izo nterahamwe i Gabiro bufatanije n’umutewe wa abajepe.

DAMI ngo kari agace k’Abafaransa bari bazanwe mu Rwanda ngo gafashe mu guha imyitozo abasirikare bagombaga kujya ku rugamba, baza gukomereza ku guha imyitozo interahamwe.

Ubuhamya bwa Ntantoro Apaulinaire bukomeza avuga ko kwinjira mu gisirikare hazanwaga umuganga w’inzobere uvuye kwa Perezida Habyarimana nawe akabanza agapima ko utari Umututsi ukabona kwemererwa.

Ati “Bari bazi ko abatutsi bagira imbavu nto, bataba banini. Ibyo ni ibyo muganga yarebaga.”

Aya macakubili no guheza abatutsi ngo byarakomeje kugera ubwo nta musirikare wari wemerewe kurongora Umututsi, kuko kugira ngo urongore ngo byasaba icyangombwa kivuye mu gisirikare cyatangwa hamaze kurebwa niba uwo ugiye kurongora atari Umututsikazi.

Ntantoro akomeza avuga ko uku guhembera inzangano no kubiba amacakubili mu Banyarwanda ari Jenoside yategurwaga.

Avuga ko Abatutsi bambuwe ubumuntu babita inyamaswa, bitwa abanzi n’ibyitso, kugira ngo abantu bibajye mu mitwe igihe cyo kubica bizakoranwe ubukana kandi ngo ni nako byagenze.

Nubwo umugambi wagezeho Abatutsi bagapfa bitarakemuye ikibazo

Mu buhamya atanga avuga ko nyuma y’uko Jenoside yakorewe abatusti mu 1994 ishyiriwe mu bikorwa Abatutsi bakicwa, byagize ingaruka kuko nk’aho yabaga i Kigali ngo nyuma y’Umututsi interahamwe zari zatangiye kototera abakire.

Avuga ko ibyo byatumye hatangira kubaho ugusubiranamo kandi byari kugeza ku kwicana bakamarana iyo inkotanyi zitabohora igihugu.
Ati “Imana ishimwe. Shitani yateguye umugambi mubi wa Jenoside Imana itegura igisubizo. Imana yakoresheje inkotanyi ziraza zihagarika Jenoside yakorwaga zibohora igihugu.

Nkurikije aho igihugu twagisize kimeze duhunga, bituma ntiyumvisha neza uburyo tubanye neza, ariko nkibuka ko Imana ishobora byose. Politike y’amacakubili n’ingengabitekerezo ni mbi irasenya.”

Yakomereje igisirikare muri FDLR akwirakwiza ingengabitekerezo ya Jenoside

Nyuma yo guhungira mu nkambi zo muri RDC bakomeje ibikorwa bya gisirikare ahitwa za Mugunga, Tingitingi, Centre Africa, Gwadorite, Rubumbashi na Katanga, aza no kwimurirwa muri muri biro bikuru bya FDLR i Kinshasha.

Avuga ko aho hantu hose bazengurukaga babaga bakwirakwiza ingengabitekerezo ya Jenoside banahakana ko Jenoside yabaye mu Rwanda bagira ngo babone ababashyigikira. Gusa ngo we na bagenzi be umunani ntibyabahiriye kuko mu 2002 baje kurizwa indege bazanwa mu Rwanda.

Yiyemeje gutanga umusanzu mu kurandura ingengabitekerezo ya Jenoside

Ntantoro avuga ko yatunguwe no kubona bageze mu Rwanda bakakirwa neza akaza no kwerekwa bamwe mu bo bari bafatanije muri FDLR barabaye abasirikare mu ngabo za RDF.

Yatunguwe n’aho u Rwanda rugeze rwiyubaka n’uburyo Abanyarwanda bari babanye, asanga bitandukanye n’uko yabibwirwaga akiri mu mashyamba ya Congo.

Bahise bajyanwa mu ngando bigishwa byinshi ku burere mboneragihugu n’amateka yaranze u Rwanda arimo na Jenoside yakorewe Abatutsi mu 1994, banigishwa ubumwe n’ubwiyunge.

Nyuma y’ingando niho Ntantoro yafatiye icyemezo cyo gutanga nawe umusanzu we mu kurwanya ingabitekerezo ya Jenoside yirirwaga yigisha mu mashyamba ya RDC, ahubwo agatangira kwigisha ubumwe n’ubwiyunge kuko yabonye aribyo byubaka igihugu.

Kugera ubu Ntantoro Apaulinaire ari iwe mu rugo mu karere ka Ngoma, aho akora umurimo wo kwigisha ijambo ry’Imana.

Ni mu muhango wo gusoza icyumweru cyo kwibuka ku nshuro ya 22 Jenoside yakorewe Abatutsi wabereye ahitwa Kirwa mu Kagari ka Rugese ku wa 13 Mata 2016.

Abahawe ibiryamirwa bashimiye abitanze kugira ngo biboneke bavuga ko urukundo nk’urwo rubahumuriza mu bihe nk’ibi bikomeye.

Mu byo bahawe harimo matore 27, imisego yazo ndetse n’amashuka mu rwego rwo kwifatanya na bo muri ibi bihe hibukwa abazize Jenoside.

Ubuyobozi bw’Umurenge wa Rurenge buvuga ko ibyo biryamirwa byavuye mu bwitange bw’abaturage bitabiraga ibiganiro byo kwibuka ku nshuro ya 22 Jenoside yakorewe Abatutsi, wese ubishaka yagiye atanga uko yifite.

Bamwe mu bahawe ibi bikoresho bavuga ko bibashimisha iyo babona hari ababa hafi mu bihe nk’ibi bakabahumuriza.

Uwitwa Nyiramugwera yagize ati “Ibintu nk’ibi bitugaragariza urukundo abantu badufitiye, ndetse bikanatwereka ko urukundo ruhari kandi ineza yaganje ikibi. Urukundo nk’uru ruraduhumuriza mu bihe n’kibi biba bitoroshye.”

Umuyobozi w’Akarere ka Ngoma, Nambaje Aphrodise, yashimye ubwitange abaturage bagize bakunya inkunga yabo mu midugudu.

Yagize ati”Ibi birajyana n’ijambo ry’Imana muri bibiliya, rivuga ko idini y’ukuri ari ifasha imfubyi, abakene, ihoza abapfakazi n’abandi banyantege nke.Na we mu gihe nk’iki jya utekereza icyo wakora mu byo Imana yaguhaye urebe icyo wakorera igihugu.”

Inkunga iva mu gaseke gashyirwa mu biganiro bimaze kugaragara ko igira akamaro kanini mu gufata mu mugongo abacitse ku icumu batishoboye.

Hari aho usanga hanavamo inka ziremerwa abarokotse Jenoside batishoboye maze bikafasha kwiyubaka mu rugendo rwo kwigira.

Byabaye ku wa 13 Mata 2016 ubwo hasozwaga icyumweru cy’icyunamo mu Murenge wa Rurenge.

Gasana amaze kwakira itungo ry’ishimwe.

Uwitije Xavera na Gasana Charles bari abaturanyi mu cyahoze kitwa Segiteri Kaberangwe mu gihe cya Jenoside yakorewe Abatutsi mu 1994.

Mu magambo make yuzuye imbamutima,Uwitije Xavera yavuze ko atabona icyo aha uwamuhishe kubera ineza yamugiriye ndetse akanamutangira amafaranga amugura ku bicanyi bari bagiye kumwica.

Yagize ati “Ntabwo navuga byinshi, nagiraga ngo nshimire uyu mugabo Gasana kuko yangiriye neza akampisha muri Jenoside akanantangira amafaranga ngo sinicwe. Namugeneye iri tungo nk’ishimwe ngira ngo na we rizamugirire akamaro.”

Gasana Charles, nyuma yo kwakira iyi mpano yashimiye Uwitije wazirikanye iyo neza akaba ayimwituye.

Yakomeje avuga ko bitanga isomo ko kugira neza ari byiza, anashima nyina wahoraga amusaba kwirinda kwivanga muri Jenoside no gusahura iby’abandi.

Yagize ati “Naramuhishe abicanyi baraza baramunyaka mu nzu aho nari namuhishe bamujyana kumwica ndabatakambira nabaha amafaranga ibihumbi bitatu(3000Frs) baramureka nuko abasha kubaho ararokoka.”

Ubuhamya bw’abarokokeye muri uyu murenge bwagaragaza ko kwica abatutsi bo muri ako gace byatangijwe n’interahamwe zaturutse ahitwa “Gasetsa”(umurenge wa Remera ubu), aho zari zaratojwe na Col Rwagafirita wahavukaga, maze bafatanya n’interahamwe z’i Kaberangwe n’izari ziyobowe n’uwitwa Cyasa zari zaturutse ahitwa Kabirizi.

Urwibutso rwa Jenoside rwa Rugese mu Murenge wa Rurenge ahasorejwe icyumweru cy’icyunamo, hashyinguwe imibiri isaga 1400 y’abatutsi bahaguye muri Jenoside.

Kubera ko uru rwibutso rutameze neza hateganijwe ko iyi mibiri izimurirwa mu Rwibutso rwa Jenoside rwa Kibungo,u bu rwamaze kuzura.

Atuye mu Mudugudu w’Ubumwe n’Ubwiyunge mu Rurenge wa Remera mu Karere ka Ngoma, utuwemo n’abarokotse Jenoside yakorewe Abatutsi n’abakoze Jenoside.

Pariti Emmanuel yemeza ko hari abafunguwe bemeye icyaha bagifite imyumvire mibi yajyana ku ngengabitekerezo ya Jenoside.

Avuga ko gukomeza kuvuga ukuri kose ku byabaye muri Jenoside, bituma bagenzi be bayikoze bakemera icyaha bagafungurwa, bamureba nabi yagera aho bari bakamwishisha.

Yagize ati “Ndakubwira ukuri hari na bamwe banyikuyeho, nagera aho baganira bagahigima, bagahita baceceka kuko bazi ko ibitekerezo byanjye bitakiri nk’ibyabo.”

Uyu mugabo abarokotse batangira ubuhamya bavuga ko yagororotse kandi ko babanye neza aho batuye, avuga ko abo bakoranye Jenoside hari abagifite imyumvire irimo ingengabitekerezo ya Jenoside.

Abarokotse Jenoside bavuga ko Pariti yahindutse kandi yabaye umuntu muzima ku buryo babanye neza mu Mudugudu w’Ubumwe n’Ubwiyunge.

Ati “Harimo abo usanga bambwira ngo nkomeze nturane na bariya barokotse nzabona ubugome bwabo, n’ibindi byinshi bibi. Ariko icyo njye nkora ndabasobanurira nkabagarura mu nzira ku buryo hari bamwe bagenda bava ku izima bagahinduka.”

Pariti avuga ko yirinda icyakomeretsa abo yakoreye Jenoside, akirinda icyamusubiza mu ngengabitekerezo ya Jenoside, kuko ngo iyo atekereje ibyo yakoze yumva ibintu bimugurumanamo akabona amashusho y’inzirakarengane uko zicwaga muri Jenoside.

Abarokotse Jenoside batuye muri uyu mudugudu, bavuga ko byabafashije kubabarira kandi ko babanye neza n’ababahekuye babicira ababo muri Jenoside.

Gutuzwa hawe n’abo bahemukiye babicira ababo muri Jenoside yakorewe abatutsi,bemeza ko byabafashije kubasaba imbabazi neza no kubana neza.

Bemeza ko hari abakoze Jenoside bahindutse ku buryo imibanire yabo muri uyu mudugudu ari ntamakemwa, barangwa no gufatanya, gushyira hamwe no gutabarana ku buryo babababariye.

Gitembe Vestine umwe mu barokotse Jenoside utuye muri uyu mudugudu, avuga ko mu gihe cyo kwibuka abazize Jenoside yakorewe Abatutsi, ababahemukiye batabatererana kandi ko babona baragororotse kuko baba babahumuriza ari na ko bakomeza kugaragaza ibikorwa byo kwicuza.

Ni muri gahunda biyemeje yo guca ibiyobyabwenge na magendu bihanyuzwa bikuwe mu Burundi, nyuma yo gufata imodoka ipakiye imifuka y’urumogi umwaka ushize wa 2015.

Irondo rikozwe neza rikomeje gutanga umusaruro rita muri yombi abashaka gukora ibitemewe.

Irondo mu ijoro ryo kuri uyu wa 08 Mata 2016 mu kagali ka Muzingira ryafashe moto yari ipakiye ibiro 120 by’amashashi. Ni nyuma kandi yo gufata imodoka ipakiye imifuka y’urumogi mu mwaka wa 2015.

Abafatanwe aya masashe ni Twizeyimana Theoneste na Hakizimana Tharicise, bakomoka mu Karere k’abaturanyi ka Kayonza, mu murenge wa Murama, batawe muri yombi mu ijoro ryo kuri uyu wa gatanu tariki 8 Mata 2016.

Umwe mu banyerondo ryagafashe iyi moto ryo mu mudugudu wa Rwakandari Akagali ka Muzingira umurenge wa Mutendeli, avuga ko iyo moto yaje ubwo bari ku irondo mu masaha ya saa Cyenda z’igitondo bayihagarika ikanga guhagarara.

Yagize ati “Twari dufite amakuru ko iyo moto yagiye kuzana ibitemewe, ubwo yazaga twayihagaritse iranga ,tubwira bagenzi bacu imbere baragota abonye ko ntaho anyura ajya kwihisha tumusangayo.”

Uyu mugabo yavuye mu kaere ka Kayonza za Ngoma gutwara amasashe yifashishije moto.

Singirankabo Jean Claude uyobora Akagali ka Muzingira, avuga ko abaturage bahagurukiye guca ibiyobyabwenge na magendu binyuzwa muri aka kagali bivuye mu Burundi.

Ati “Aka kagali kari karabaye n’inzira ibyo biyobyabwenge ndetse na magendu zicamo zikuwe mu Burundi. Ariko abaturage bafatanije n’ubuybozi twafashe ingamba zo guca ibyo bintu hifashishijwe amarondo.Amarondo yacu arakora neza kandi twabaciye intege byaragabanutse.”

Si ubwambere abaturage bifatiye abatwara ibiyobyabwenge kuko mu ntangiriro z’ukwezi kwa Mata 2016, mu murenge wa Sake, abaturage bifatiye abantu bari biziritseho urumogi barenzaho imyenda bajijisha.

Abahatuye bavuga ko izo magendu n’ibiyobyabwenge bikurwa mu Burundi bikaza mu bwato binyuze inzira y’akagera, byagera mu kuzi bita Nyabugongo bagakomeza kugera ku kiraro cya Rwagitugusa ari naho ibyo bintu biviramo bakabijyana mu muhanda nijoro.

Muri aka karere no hirya no hino mu gihugu hagiye havuwa uburiganya na ruswa muri gahunda za Girinka, VUP n’Ubudehe, zari zigenewe abatishoboye ngo bikure mu bukene.

Komite nshya ya FPR Inkotanyi mu Karere ka Ngoma yiyemeje guca uburiganya, gahunda zo gufasha abatishoboye zikajya zibageraho nta kiguzi.

Umukuru w’Umuryango RPF Inkotanyi mu Karere ka Ngoma, Rwiririza Jean Marie Vianney akaba n’Umuyobozi w’Akarere Wungirije ushinzwe Iterambere ry’Ubukungu, akimara gutorwa tariki 3 Mata 2016, yiyemeje gukora ibishoboka byose kugira ngo amakosa yagaragaye muri izi gahunda zigenewe kuzamura abakene akosorwe.

Yagize ati “Gahunda nka Girinka,VUP n’Ubudehe; ni gahunda zigenewe kuzamura umukene ngo agire urwego ageraho rwisumbuye.

Iyo rero hagize umuyobozi ubyikubira ntibigere ku bo bigenewe, aba adindiza iterambere. Ababikoze barafunze ariko tugiye gukumira uwakongera.”

Rwiririza yasabye abanyamuryango ba FPR Inkotanyi kumva ko ari inshingano gukumira no gufata iya mbere mu gutanga amakuru ahari ubwo buriganya nta kureberera kugira ngo babashe kubuca burundu.

Abanyamuryango ba FPR Inkotanyi b’i Ngoma na bo biyemeje gufatanya bakarwanya iki kibazo.

Bamwe mu bayobozi bagaragaweho n’uburiganya muri izi gahunda zagenewe kuzamura abatishoboye, barafashwe bajyanwa mu butabera aho barimo gukurikiranwa kuri ibyo byaha.

Bamwe mu banyamuryango ba RPF Inkotanyi mu Karere ka Ngoma, bemeza ko muri gahunda z’Ubudehe, Girinka na VUP hagaragayemo uburiganya bigahabwa abatabigenewe kubera ko bamwe mu bazishinzwe baryaga ruswa.

Hagenimana Esther, umunyamuryango wa FPR Inkotanyi mu Murenge wa Jarama, avuga ko biyemeje kujya batangira amakuru ku gihe ndetse no gukumira umuyobozi washaka gukoresha nabi izi nkunga kubera inyungu ze bwite.

Yagize ati “Hari abayobozi bajya mu buyobozi bagamije inyungu zabo bwite aho guharanira iz’abo baba bashinzwe. Dufashe ingamba ko aho byagaragara twatangira amakuru ku gihe, kuko amakosa nk’aya yakwangisha abaturage ubuyobozi kandi akadusigaza inyuma mu iterambere.”

Mupenzi George wahoze ayobora FPR i Ngoma yahawe ishimwe kuko yakoze neza, Akarere ka Ngoma kakesa imihigo.

Ikibazo cya bamwe mu bayobozi bariye amafaranga yari agenewe gufasha abatishoboye cyanagarutsweho na Perezida wa Repubulika Paul Kagame mu mwiherero n’abayobozi bakuru b’Igihugu wabaye muri Werurwe 2016, anenga bene abo bayobozi ndetse asaba ko babiryozwa.

Aba bagororwa bemererwa kwiga imyuga, kugira amatorero y’umuco Nyarwanda abigisha kirazira z’umuco binyuze mu bihangano n’ibindi.

Nyuma yo kwemererwa uburenganzira bwo gutunga umusatsi, byatumye bashira ipfunwe bagiraga nabo batangira gutega ingori.

Mukamuhizi Marie Grace, usigaje umwaka umwe ngo arangize ibihano bye, avuga ko nta mpungenge agifite zo kubaho nyuma yo gufungurwa, kuko muri gereza yigiyemo imyuga itandukanye irimo ubudozi, gufuma, ubwubatsi ituma igihe azafungurwa azitunga.

Agira ati “Igihe cyo kugororwa ni kirangira iyi myuga izamfasha kwitunga,ngende nihangire umurimo maze nanjye mbe ingirakamaro nubake igihugu cyanjye ntagiye gusabiriza.”

Uyu mubyeyi ashima ko amatorero y’umuco abafasha kumenya za kirazira z’umuco, bigatuma barushaho kugororoka no kumva ububi bw’ibibi bakoze bagafata ingamba zo kutazabisubira.

Nyirahabimana asanga kugira uburenganzira byaratumye babasha kugororoka neza.

Kuwa gatatu tariki 30 Werurwe 2016, ubwo bizihirizaga umunsi w’umugore, bamwe mu bakobwa bahafungiye bagaragaje igisa no kumurika imideri bakora defire bidagadura mu bihangano bitanga ubutumwa.

Abahafungiye bahamya ko ibikorwa byo kwidagadura byatanze bifasha abaza barihebye, batabasha kwiyakira ariko ngo kugira ibikorwa nk’ibyo bibashimisha bigatuma biyakira bakabasha no kujya mu matorero y’umuco abigiha za kirazira z’umuco.

Umusaruro uturuka k’uburenganzira aba bagororwa n’imfungwa bahabwa bigaragarira no kubaza kubasura igihe habaye ibirori bitandukanye.

Ingabire Marie Immaculee, uhagarariye Transparency International Rwanda, watumiwe mu birori byo kwizihiza umunsi w’umugore byabereye muri iyi gereza, yatangaje ko ashimishijwe n’uburyo yasanze abahafungiye bameze.

Ati “Barakeye, barishimye kandi barabyina ukabona ko rwose ni byiza. Ndashima cyane politike y’u Rwanda mu bijyanye no gufata neza abagororwa n’imfungwa.”

ACP Bosco Kabanda, ushinzwe kugorora, uburenganzira bw’abagororwa n’imibereho myiza yabo mu rwego rw’igihugu rushinzwe imfungwa n’abagororwa (RCS), avuga ko gufungwa bitavuze ko bibangiranye ahubwo nabo batekerezwaho nk’ abanyarwanda bari kugororwa.

Aba bagore bafunzwe kandi barishimira ko bemerewe gutunga imisatsi byatumye batakigendana ipfunwe aho bagiye ahubwo biyumva ko ari Abanyarwanda bagifite uburenganzira bwo gusa neza.

Kuri uyu wa 30 Werurwe 2016 ubwo imfungwa n’abagororwa muri Gereza ya Ngoma bizihizaga umunsi w’umugore, hagaragajwe ko abagororwa 11% by’abahafungiye ari bo gusa basurwa.

Abari bitabiriye ibi birori bashimiye Urwego rw’Imfungwa n’Abagororwa uburyo rufata neza abo rushinzwe.

Urwego rw’Igihugu rushinzwe Imfungwa n’Abagororwa (RCS) rusaba imiryango ifite abantu bafunzwe kutabatererana no kubaba hafi babasura muri gereza kuko bibafasha kugororoka.

Nyirahabimana Seraphine, utuye mu Karere ka Kayonza, avuga ko kutabasura bibatera impungenge ko byaba biterwa no kuba bakibabona mu byaha bakoze nyamara bo baragororotse.

Yagize ati”Kuko twagaragaweho n’icyaha birashoboka ko baba baduciraho iteka. Ese niba batadusura kandi turimo kugororwa natwe twarigaruriye icyizere, nidufungurwa aho mu miryango yacu bazatwakira neza!

Nabwira imiryango yacu ko iyo umuntu akoze icyaha atari ukuba igicibwa burundu kuko ashobora kugororwa akagororoka.”

Ingabire Marie Immaculee, Umuyobozi wa Transparency International Rwanda, umuryango urwanya akarengane na ruswa, avuga ko ibyo yumvise byamuteye ubwoba kuko bikabije ndetse ko bidakwiye gutererana umuntu ngo ni uko afunzwe ahubwo bakwiye kumuba hafi.

Bamwe bagororwa baboneyeho kubwira abayobozi ko imiryango yabo yabatereranye.

Yagize ati”Byanteye ubwoba, 11% basurwa gusa birakabije. Ntabwo rero imiryango yabo yemerewe kubatererana.

Nagira ngo mbabwire ko ari inshingano gusura uwawe ufunzwe kuko binamufasha kugoroka neza bigatuma atiheba kandi bigatuma agira icyizere ko nataha azakirwa neza mu miryango.”

ACP Bosco Kabanda ushinzwe kugorora,uburenganzira n’imibereho myiza y’abagororwa muri RCS avuga ko urwego akorera ruhora rukangurira abantu gusura abantu babo bafunze kuko bibafasha kugororoka neza.

Yagize ati “Dukangurira imiryango ko yasura abantu babo bafunze, biremewe. Ntabwo ari byiza ko umuntu atereranwa kubera ko yagonganye n’itegeko.”

Gereza y’Abagore ya Ngoma ifungiyemo imfungwa n’abagororwa 699 baturuka hirya no hino mu gihugu. Iyi gereza yubatswe mu 1934 kuva muri Werurwe 2014 yagize gereza y’abagore gusa.

Sana K. Jatta, uhagarariye iki kigega muri Afurika, abivuga ashingiye ko abahinzi bo mu Rwanda bagaragaje impinduka mu buhinzi kuva bahabwa inkunga.

Umusaruro wanitswe neza biwuha amahirwe yo kugurwa ku giciro kiza kuko uba wujuje ubuziranenge.

Abahinzi bibumbiye mu makoperative mu Murenge wa Murama mu Karere ka Ngoma, bagaragaza ko batangiye beza toni 50 mu 2011, ariko nyuma yo guhugurwa no gukorana n’umushinga PASP (Post-Havest and Agribusiness support project), uterwa inkunga na IFAD, babashije kuzamura umusaruro wabo kugera kuri toni ibihumbi bibiri.

Baziruwunguka Jean Pierre uhagarariye koperative y’abahinzi b’ibigori KOREMU, agira ati “Twabashije kwiteza imbere kubera gukorana n’iki kigega IFAD, umusaruro wikuba kenshi, kugera aho ubu twiguriye imodoka ya miliyoni 30Frw yo gupakira umusaruro wacu tuwujyanye ku masoko.”

Sana K. Jatta asanga abahinzi bato bo mu Rwanda bakorana na IFAD, baragaragaje ukuzamuka kdasanzwe mu mwuga wabo.

Baziruwunguka avuga ko binyuze mu mushinga PASP, babashije kubaka ubwanikiro bwanikwamo toni 100 z’ibigori bwatwaye miliyoni 40.

Sana K. Jatta ubwo yasuraga imwe mu mishinga y’aba bahinzi batera inkunga mu Karere ka Ngoma, yatangaje ko mu Rwanda hari impinduka zikomeye mu bahinzi bakorana n’iki kigega.

Yatangariye impinduka mu iterambere abahinzi barimo kugaragaza binyuze mu buhinzi maze atangaza ko u Rwanda rukoresha neza inkunga iki kigega kirutera.

Ati “Muri rusange u Rwanda ruri ku isonga mu gukoresha neza inkunga dutera abahinzi barwo. Ibyo mbonye hano biragaragaza ko icyo twari twiteze ku bahinzi bo mu Rwanda turimo kukigeraho.

Nshimishijwe cyane n’impinduka mu iterambere mbonye aba bahinzi bafite binyuze mu buhinzi.”

Ubu bwanikiro bwaje busanga ubundi bubakiwe na Minisiteri y’Ubuhinzi n’Ubworozi (MINAGRI), ariko ngo hari abahinzi bake bari batarabona ubwanikiro.

Kubona ubwanikiro byagabanyije igihombo cy’umusaruro wangirikaga mu kuwanika; kikaba cyaravuye kuri 13% kigera kuri 3% nyuma yo kububona.

Guverinoma y’u Rwanda na IFAD muri 2014 basinye amasezerano y’inkunga ya miliyoni 33,9 z’Amadolari ya Amerika agenewe gutera inkunga umushinga wo gutunganya umusaruro w’ubuhinzi, no guteza imbere ubuhinzi bw’umwuga mu Rwanda binyuze muri PASP.

Zishwe mu ijoro ryo ku wa 22 Werurwe 2016 zikuwemo amara. Izo nka batatu n’ iz’abantu batandukanye zarimo ibimasa bibiri n’imbyeyi imwe yahakaga amezi makuru zikaba ziciwe mu kiraro byazo.

Nyuma yo kwica inka, amara bayamanikaga ku biraro.

Ubuyobozi bw’Umurenge wa Gashanda ahabereye ubu bugizi bwa nabi, bwemeje aya makuru butangaza ko izo nka abazishe bazikururaga amara munda bakayata hasi.

Murekatete Judith, uyobora uyu Murenge wa Gashanda ku murongo wa terefone, yagize ati “Nk’uko bigaragra ni ikintu bagiye banyuza mu nda y’amase, bakajya bakurura bagakuramo amara bakayata hasi iruhande rw’ikiraro, ibindi bice by’amara bagiye babinaga hejuru y’ikiraro.”

Ibiraro byarimo izi nka biherereye nko mu birometro bitatu uvuye ahubatse umudugudu n’aba borozi.ba nyir’inka batuyemo

Ba nyir’izo nka babimenye mu gitondo cyo kuri uyu wa 23 Werurwe 2016 ubwo bajyaga ku biraro byabo bagasanga inka zabo zishwe maze bagahuruza abantu n’ubuyobozi.

Abaturage byabayobeye kuko ngo nta makimbirane azwi yari hagati y’aba borozi n’abaturanyi babo.

Kubera iki kibazo, ubuyobozi bwasabye abafite amatungo bororeye kure yabo (ku matongo hadatuwe) kuyakurayo bakayiyegereza aho babasha kuyarindira umutekano.

Inka bazicaga bakazisiga mu biraro byazo.

Aborozi bafite ibiraro by’inka kure yabo bavuga ko bari babishyizeyo bagira ngo bajye babona ifumbire bitabagoye kuko bagiye bubaka ibi biraro ku matongo aho bimutse bajya gutura ku midugudu.

Nyuma yo kumenya aya makuru inzego zishinzwe umutekano mu Karere ka Ngoma n’ubuyobozi bw’umurenge bwahise bukoresha inama abaturage bubasaba kuba ijosho ry’abaturanyi babo no gutanga amakuru ku bakekwaho kwihisha inyuma y’ubu buguzi bwa nabi kugira ngo bafatwe.

Uyu Mudugudu wa Murambi utuwe n’ingo 187 wahise wiyemeza kuremera aba borozi biciwe inka. Buri rugo rwiyemeje gutanga ibihumbi bitatu kandi yohe hamwe ngo akaboneka bitarenze ku wa 26 Werurwe 2016.

Icyo giti cy’ibisubizo kivugwa ni igiti kinini kiri mu busitani bw’akarere, aho abaturage bafite ibibazo baza bakahicarana n’umuyobozi buri wa Kane akabafaha gukemura ibibazo.

Igiti cy’ibisubizo cyitiriwe umunyinya munini abafite ibibazo bahiriramo na mayor akabakemurira ibyo bibazo.

Mwambutsa Celestin, umwe mu bakemuriwe ibibazo kuri iki giti, avuga ko gishimangira ihame ry’imiyoborere myiza mu Rwanda.

Agira ati “Munsi y’igiti ni byo byiza kuko mu biro hari ubwo utamubona uko uhagera ngo mubonane, bakagutangira ntugeremo cyangwa ukajuragira ntumenye naho ibiro biri. Ariko hano munsi y’igiti cy’ibisubizo ubasha kwisanzura uri n’abandi ukavuga ikibazo cyawe kigakemuka.”

“Igiti cy’ibisubizo” ni gahunda yatangiye mu 2013, aho umuyobozi w’akarere n’abamufasha bava mu biro, bagasanga abaturage munsi y’igiti kinini kiri mu busitani bw’akarere bagakemura ibibazo by’abaturage.

Umuyobozi w’akarereka Ngoma, Nambaje Aphrodise watangije iyi gahunda, avuga ko ari uburyo bufasha umuturage kuvuga ikibazo cye ntagihugunga yisanzuye kandi akabasha kubonana n’umuyobozi bimworoheye atabanje kunyura kubandi benshi.

Benshi mu bagana igiti cy’ibisubizo bavuga ko bahasubirizwa.

Avuga ko iyi gahunda yaciye abazaga kwihererana umuyobozi mu biro bamubeshya, kuko muri gahunda y’igiti cy’ibisubizo umuntu avugira ikibazo cye abandi babyumva yabeshya bakamunyomoza nuwatinya kubeshyera mu ruhame.

Ati “Tuve muri ibi bintu bimenyerewe byo kuvuga ngo umuntu agomba kujya gukomanga kwa meya abanje kubaza umunyamabanga. Habeho uburyo umuturage atugeraho bitiriwe bimugora. Tumaze kubona umusaruro wabyo tugiye kubyagura bijye no mu mirenge.”

Ubuyobozi bw’akarere ka Ngoma buvuga ko iyi gahunda y’igiti cy’ibisubizo imaze gukemura ibibazo by’ingutu birenga 500 kuva yatangira.

Ubuyobozi bw’akarere buvuga ko kumanura iyi gahunda mu mirenge bazagabanyiriza abaturag ingendo bakoraga baza ku karere.

Ubu bujura bwongeye kubura, aho abatuye uyu mudugudu bavuga ko kurarana n’amatungo bibagiraho ingaruka nyinshi zirimo izishingiye ku isuku, bikabatera impungenge z’uko haba n’ingaruka ku buzima bwabo.

Bamwe mu baturage bararana n’amatungo ubera gutinya abajura babibira amatungo

Mpariba Tenda Faustin, umwe mu batuye muri uyu mudugudu, avuga ko nta yandi mahitamo bafite, kuko aho kugira ngo bibwe basigare amara masa bahitamo kuyinjiza mu mazu iyo ijoro riguye.

Agira ati “Turabangamiwe cyane kurarana n’amatungo mu nzu kugera no ku ngurube; na zo tuzishyira mu nzu kuko uramutse uyirajije hanze bayiba."

Akomeza agira ati "Nta handi dukura amafaranga. Ni yo mpamvu amatungo yacu tuyakomeyeho kugera ubwo tuyaraza mu nzu ngo batayiba.”

Mukankuranga Petronile, umwe mubahuye n’ubu bujura, avuga ko ingaruka zo kurarana n’amatungo ari nyinshi ariko cyane cyane ku isuku.

Ati “Ayo matungo azana imbaragasa mu nzu, umunuko mu nzu ndetse hari n’ubwo umuntu azarwara indwara zituruka ku kuba asangira ubuzima (umwuka) n’ayo matungo nijoro aryamye; kuko hari n’abayazirika ku gitanda.”

Abaturage batunga agatoki amarondo, bavuga ko adakorwa neza. Cyakora hakaba abandi bavuga ko irondo rikorwa neza nubwo hari ababaca inyuma bakiba.

Umuyobozi w’Umurenge wa Kazo, Bushayija Francis, avuga ko ikibazo cy’ubujura bw’amatungo kitagikabije nka mbere kuko bwigeze kubaho ariko bagahangana na bwo bakabuhagarika.

Ati “Dufatanije n’amarondo, twaragihagurukiye kandi benshi mu babikoraga barafashwe barafunzwe. Dukomeje gukaza amarondo kandi turemeza ko izi ngamba zatangiye gutanga umusaruro. Turahumuriza abaturage ko ikibazo kirimo gukemuka.”

Bamwe mu bagizweho ingaruka z’ubu bujura bavuga ko abafatirwa muri ibi bikorwa bafungwa ariko ntibarihe ibyo bangije nk’ihene baba babaze cyangwa amazu baba bamennye.

Nyirabuyange Xavera kuri uyu wa 07 Werurwe 2016 amaze guhabwa insimburangingo y’ukuguru yavuze ko ubundi kuva aho amugariye ukuguru mu myaka itatu ishize ntacyo yabashaga kwikorera kuko yari abeshejweho no guhinga.

Abafite ubumuga bwo kutabona na bo bavuga ko bagiye kuva mu bwigunge bajya aho abandi bari bakoresheje inkoni zibayobora bahawe.

Amwenyura, yavuze ko yumva umutima we ukeye kuko agiye kongera agakora imirimo irimo n’ubuhinzi kuko abonye insimburangingo.

Yagize ati ”Ndishimye cyane kandi ndashimira akarere kadutekerejeho.Twe ntitwari kuyabona kuko ngo bisaba ibihumbi nka 400Frs.Ubundi sinabashaga guhinga ariko ubu ngiye nanjye guhinga neza byinshi ngurishe niteze imbere kuko ngiye kujya nkora nka mbere ntaramugara”.

Abahawe insimburangingo kuko izo bari bafite zari zarashaje,na bo bemeza ko kuva aho baziboneye byahinduye byinshi mu buzima bwabo kuko bavuye hasi bagakora.

Nyuma yo guhabwa insimburangingo avuga ko yabashije kongera gukora imirimo myinshi mu yo yakoraga ataramugara irimo no kunyonga igare no gutwara moto.

Nshimiyima Jean Bosco utuye mu Murenge wa Mugesera amaze imyaka irenga 20 abonye insimburangingo y’ukuguru kwari kwacitse.

Avuga ko yabashije kongera gutwara igare na moto, maze akomeza akazi ke yakoraga ko kujya mu masoko mu bucuruzi.

Yagize ati ”Iyo ntayibona mba narakennye kuko ntacyo nari kubasha kwikorera. Byabaye nk’ibitangaza ubu mbasha gutwara moto bikamfasha kujya mu kazi kanjye ko gucuruza no kudoda nkorera mu masoko.”

Umuyobozi w’Akarere ka Ngoma Wungirije ushinzwe Imibereho Myiza y’Abaturage, Kirenga Providence, avuga ko amafaranga yaguze ibi bikoresho yavuye mu ngengo y’imari y’uyu mwaka wa 2015-2016 nk’uko byari bayteganijwe.

Abafite ubumuga nyuma yo guhabwa insimburangingo bavuze ko bagiye gukora bakiteza imbere kuko imbogamizi ikomeye bari bafite ivuyeho.

Uyu muyobozi yizeza ko bizakomeza gukorwa buri mwaka ngo kuko bifasha abafite ubumuga mu iterambere ryabo ndetse no kuva mu bwigunge bakabasha kugenda bakava aho bari.

Yagize ati” Ni igikorwa twizeza ko akarere kazakomeza gukora, kuko gifite akamaro kanini. Ufite ubumuga iyo abonye insimburangingo cyangwa inyunganirangingo bituma abasha kuva aho ari akaba yagera mu bandi ndetse akabasha no kugira imirimo yakikorera imwinjiriza amafaranga.”

Akarere ka Ngoma gatangaza ko nubwo umubare w’abafite ubumuga bakeneye ubufasha nk’ubu ukinozwa, hakiri benshi bakeneye ubufasha.

Aba baturage bavuga ko babona amazi meza ari uko bakoze urugendo rw’isaha, na bwo bakayavoma bayadaha hasi.

Nubwo biyubakiye ibiro by’akagali ariko baracyahura n’ikibazo cyo kutagira amazi meza. Bakifuza ko babona ubatera inkunga bakikururira amazi meza.

Twagirayezu Emmanuel utuye muri aka gace, avuga ko muri aka kagari kose ntaho umuntu yakura amazi meza.

Agira ati “Akagari ka Muzingira nta mazi meza kagira kose. Ni ukuvoma ibizi bibi na bwo kure mu misozi aho tubidaha hasi, ahitwa Nyamateke na Rwankombe. Abandi bavoma ayo mu mugezi ushamikiye ku Kagera witwa Rwagitugusa. Nta mazi tugira.”

Abatuye aka kagari katarageramo amazi n’umuriro, bavuga ko nubwo babashije kwiyubakira ibiro by’akagari bifite agaciro ka miliyoni 15Frw, bemeza ko habonetse umuterankunga na bo bashyiraho uruhare rwabo mu kuhageza amazi n’umuriro.

Umuyoboro w’amazi meza ujyana aya mazi mu Mujyi wa Mutendeli uri muri bilometro bigera kuri bitanu uvuye muri aka kagari. Kandi na bwo uwo muyoboro uri ku wundi musozi ku buryo urebesheje amaso bitorohera abatuye aka kagari kuhavomera.

Umunyamabanga Nshingwabikorwa w’Akagari ka Muzingira, Singirankabo Jean Claude, yemeza ko iki kibazo gihari kandi kibakomereye ariko bakaba baranagerageje kugikorera ubuvugizi ku nzego zibakuriye.

Ati “Iki kibazo kirazwi hose no mu karere ka Ngoma, duhora dukora ubuvugizi ngo turebe ko natwe twabona amazi meza iwacu kuko nta mazi meza tugira, nta na robine z’amazi meza.”

Aka kagari gatuwe n’abaturage 3.663 bifuza kwegerezwa amazi meza mu buryo ubwo ari bwo bwose bwashoboka; kabone nubwo basabwa kubigiramo uruhare.

Babusabye abakandida bane biyamamariza muri uyu murenge, kuri uyu wa gatanu tariki 16 Gashyantare 2016.

Abiyamamaza basabwe n’abaturage kujya bazirikana ibyo babasezeranije babaka amajwi maze igihe batowe bakabikora

Bavugirije Abudu utuye mu mudugudu wa Gatoro, Akagali ka Cyasemakamba, yavuze ko umuhanda ari kimwe mu bibazo byihutirwa bifuza gukemurirwa.

Yagize ati “Dufite ikibazo gikomeye cyo kutagira imihanda ku buryo hari n’ubwo igare umuntu abura aho arinyuza, tuba dufite ubushobozi bwo kugura za moto nyamara kubera kutagira imihanda tukabireka, ibyo byose ni iterambere ridindira.”

Mukantwari Esperance utuye mu mudugudu w’Amarembo, we yagaragaje ko kuba bafite umuhanda umwe gusa kandi ukaba ucamo imodoka nyinshi nk’ababyeyi bagira impungenge z’impanuka ziba zigahitana abana babo bawunyuramo bajya cyangwa bava ku mashuri.

Ati “Nk’abana bacu bagenda mu muhanda uyu munini, ntaho bahungira impanuka kandi ni bato.

Kuba rero ari umuhanda umwe gusa nta wundi nibura uca inyuma bidutera impungenge habonetse undi muhanda byadushimisha nk’uko namwe mwabivuze ko mubiteganya.”

Abandi mu bagaragaje ibyifuzo byabo, bavuze ko bafite ibibazo byo kutagira amazi meza n’amashanyarazi bikenewe na benshi muri aka karere ka Ngoma.

Kwiyamamaza byari byitabiriwe n’abaturage benshi ngo bumve ibyo abazatorwa bazabagezaho

Urwego rwa Njyanama y’Akarere rugira uruhare runini mu iterambere ryako, kuko ari rwo rwemeza ingengo y’imari y’Akarere rumaze kuyisesengura no kureba niba ibikorwa izakoreshwamo bijyanye n’ibikenewe mu baturage bahagarariye.

Umujyanama aba ahagarariye abaturage bamutoye mu buyobozi, akabavuganira ku byo bakeneye ngo bagere ku iterambere.

Biteganjiywe ko amatora y’abagize Njyanama z’Uturere na 30% by’ abagore azaba tariki 22 Gashyantare 2016.

Babigaragarije umuyobozi muri RCS ushinzwe kugorora, uburenganzira bwa muntu n’imibereho myiza mu magereza yo mu Rwanda, SP Mugisha Vianney, kuri uyu wa 17 Gashyantare 2016 ubwo yari yasuye Gereza ya Ngoma.

Ibikorwa nk’ibi by’udukino no kwibumbira mu matorero y’umuco ngo bibafasha kwirinda kwigunga no kubohoka bakavuga ibibabaje bakavurana ibikomre

Binyuze mu buhanzi bw’imbyino n’imivugo, amatorero gakondo abafasha mu isanamitima no kwidagadura bakava mu bwigunge maze bakiga umuco Nyarwanda na kirazira bibafasha kugororoka.

Murekatete, umwe mu bafungiye muri iyo Gereza, yagize ati "Nari ndi mu bwihebe bukomeye, ariko ngeze muri iri torero ’Indangamirwa’ byaramfashije cyane menya indangagaciro na kirazira, menya kwiyakira n’icyaha cyanjye.Ubu nafashe ingamba yo kugororoka no kuzibukira ikibi.”

Uyu mukobwa ubu urangije igihano cye cy’imyaka itanu yakatiwe nyuma yo gukuramo inda aho yari mu mashuri y’isumbuye, avuga ko hatabayeho kugorora umuntu akigumira mu bwigunge ntiyigishijwe ngo amenye icyaha yakoze afate ingamba, nta kabuza igihe yaba afunguwe yakongera.

Aba bagororwa mu mukino wo kwigaragaza mu myambaro bakorera muri gereza mu ngendo y’injyana(defile de mode)

SP Mugisha Vianney, umuyobozi mu rwego rw’igihugu rushinzwe imfungwa n’abagororwa(RCS) ushinzwe kugorora,uburenganzira bwa muntu n’imibereho myiza mu magereza, avuga ko icyo RCS ishyize imbere ari ukugorora kugira ngo abantu bakoze ibyaha bagororoke.

Yagize ati "Nkurikije ibyo mbonye hano mutweretse ndabona intego ya RCS yo kugorora igenda igerwaho neza. Ibyo mugaragaje ni umusaruro w’ibyo muvanye hano. Leta y’ubumwe yaratekereje cyane maze ihitamo kugorora uwakoze icyaha aho kumufunga.”

Sup of Prison Mugisha Vienny avuga kuba wafunga ukagerekaho no kwiheba warwara igifu n’ibindi birwa. ariyo mpamvu babafasha mu kudaherwa no kwigunga

Amatorero gakondo abiri ubu ni yo abarizwa muri Gereza ya Ngoma ifungiyemo abagore gusa.

Uretse kuba bahabwa inyigisho mu kubagorora ndetse na bo ubwabo bakaba bagororana bigishanya ngo bazinukwe icyaha, aba bagororwa bigishwa imyuga itandukanye ngo bazabashe kwibeshaho igihe bazaba barangije ibihano byabo.

Mu byo biga harimo ubudozi, kuboha ibiseke, ubugeni, kudoda ibitambaro, gukora imitako n’indi myuga.

Vestine urangije igihano cye yagenewe impano y’igiseke n’abo bahugurwanye.

Murekatete Vestine urangije igifungo cye cy’imyaka itanu yari yarakatiwe kubera gukuramo inda, avuga ko uretse kuba yaragororotse atasubira icyaha, muri gereza ahakuye ubumenyi ku buzamufasha kwirwanaho nagera hanze.

Agira ati “Nyuma yo kumenya ingaruka z’icyaha no kugororoka, mvuye hano nzi icyo gukora kubera imyuga nize yo kudoda, gukora imitako, ubuhanzi n’ibindi numva bizamfasha kwibeshaho aho ngiye hanze ya Gereza.

Mu kumurika ibyo bahigira bijyanye n’imyuga, abagoorwa bavuze ko kwiga imyuga byabafashije kugororwa neza.

Kuba wava hano nta kintu ujyanye cyakugoboka ugeze hanze ni hahandi wasanga umuntu bimucanze agatangira akaba yakwishora mu ngeso mbi akaba yasubira icyaha.”

Babitangaje kuri uyu wa gatatu tariki 17 Gashyantare 2016, ubwo umuyobozi ushinzwe kugorora n’uburenganzira bwa muntu mu rwego rw’igihugu rushinzwe imfungwa n’abagororwa (RCS), SP Mugisha Vienny, yasuraga iyi gereza mu rwego rwo kureba uko bihugura.

Sup of Prison Mugisha Vienny avuga ko kwigisha imyuga bifasha abagororwa kugororoka neza no kutazasubira icyaha.

SP Mugisha yavuze ko mu kugorora babafasha kumenya umwuga n’ubundi bumenyi kuko hari abakora ibyaha kubera ubujiji n’ubukene.

Ati “Impamvu akenshi zitera abantu gukora ibyaba bituma banafungwa ni nyinshi uburere, ubukene, ubujiji.

Ni na yo mpamvu muri RCS mu ntego zacu mu kugorora dushyiramo n’ubumenyi kugira ngo tujijure abantu, tubigishe umwuga wababeshaho, bibesheho batazasubira.”

Kubera impano zitandukanye zigaragara mu magereza yose mu gihugu bimwe binacuruzwa, ubuyobozi bubafasha kubinoza kugira ngo bibanarangiza ibihano byabo binababesheho

Kugira ngo iyi nyubako yuzure buri muturage yatanze amatafari 50 ahiye anagira uruhare ku mafaranga yo guhemba abafundi no kugura ibikorsho by’ubwubatsi.

Imbaraga z’abaturage nizo zavuyemo iyi nyubako ifite agaciro kamiliyoni 15Frw.

Iyi nyubako ifite agaciro ka miliyoni 15Frw, yatumye ibiro by’akagari biva mu bukode barimo, abaturage bavuga ko butari bubereye ibiro by’umuyobozi biyemeza kwiyubakira ibiro by’akagari.

Twagirayezu Emmanuel, utuye mu Mudugudu w’Umuyange muri ako kagari, avuga ko bishimira ko basigaye bahabwa serivisi zinoze bakazihererwa ahantu heza mu nyubako biyubakiye.

Agira ati “Iyo ngeze ku biro by’akagari biranshimisha kuko ni ahantu heza hasobanutse hatubereye abaturage ba Muzingira.”

Aba baturage ariko basaba Leta kubafasha ikahageza amashanyarazi, kuko ari ku biromtero birindwi uvuye aho akagari kubatse.

Aba baturage bavuga ko igihe baba bafite umuriro ku biro by’akagari byatuma n’ishuri rikuru rihegereye riwubona abana babo bakabasha kwiga neza n’abarimu bakabona uko bakora ubushakashatsi kuri interineti bikazamura uburezi muri ako gace.

Umuyobozi w’Akagari ka Muzingira, Singirankabo Jean Claude, ashima abaturage umurava bagaragaje n’ubwitange ngo biyubakire ibiro by’akagari.

Ati “Leta yaduhaye amabati gusa,naho ibindi bikorwa ni iby’abaturage. Batangaga amatafari ahiye, ndetse bakanatanga umusanzu twaguragamo sima, imicanga ndetse n’ibindi bikoresho.”

Uyu muyobozi avuga ko mu gihe umuriro utari wagera muri ako kagari nk’uko bitegenijwe mu igenamigambi ry’akarere, ashishikariza abaturage gukoresha umuriro uturuka ku mirasire y’izuba.

Abaturage kandi biyemeje gutanga umusanzu usigaye wa miliyoni 3Frw zibura kugira ngo imirimo ya nyuma yo kubaka ako kagari irangizwe.

Byasabwe n’abo mu Kagari ka Cyasemakamba mu mu Murenge wa Kibungo ho mu Karere ka Ngoma nyuma yo kwitorera abayobozi b’imidugudu kuri uyu wa 08 Gashyantare 2016.

Abayobozi b’imidugudu bashya basabwe kwirinda ruswa.

Ni mu gihe abayobozi b’inzego z’ibanze barimo n’ab’imidugudu gutungwa agatoki n’abaturage ko barya ruswa mu gutanga inka zo muri gahunda ya “Girinka” ndetse bamwe baza gufatwa barafungwa.

Uwizeyimana Emmanuel wo mu Mudugudu wa Rubimba mu Kagari ka Cyasemakamba, avuga ko ikibazo cya ruswa cyagaragaraga ariko agasaba ko abo batoye gukora icyo batorewe bakagendera kure ruswa.

Yagize ati “Ikibazo cya ruswa kirimo ntawabura kubivuga rwose.Turibwira ko bigiye guhinduka kuko hari abashya bagiye muri komite y’umudugudu.”

Nubwo aba baturage bashima akazi keza kakozwe n’abayobozi b’imidugudu, bavuga ko ikijyanye na ruswa gikwiye gukosorwa.

Fidélité Pacifique, avuga ko kuba hatowe abayobozi bashya hari ibigiye guhinduka kuko n’abaturage bamaze gusobanukirwa bazabirwanya batanga amakuru kuwagara imyitwarire mibi ari umuyobozi.

Yagize ati”Dushyizeho inzego zihindura iyo myitwarire mibi yose turizera ko bitazongra kuba. Abadashoboye twabakuyeho dushyizemo abashya.”

Mukansanga Gaudence, watorewe kuyobora Umudugudu wa Kiruhura mu Kagari ka Cyasemakamba, avuga ko umuyobozi w’umudugudu aba akwiye kwitwararika agakora neza kuko aba ahagarariye Perezida mu mudugudu.

Yagize ati “Umuyobozi w’umudugudu aba ahagarariye Perezida wa Repubulika, aho agomba kwitwararika kugira ngo adasiga isura mbi uwo ahagarariye. Ababikoraga bakwiye kwisubiraho bakabireka, njye ntaruswa nariye mu myaka ine maze nyobora.”

Abatowe ku rwego rw’umudugudu bagizwe na komite nyobozi y’umudugudu igizw n’abantu batanu, umujyanama umwe uhagarariye umudugudu, abagore babiri bahagarariye abagore mu mudugudu, abahagarariye urubyiruko 8 cyangwa 9 ku hari amashuri.

Kubera ububi bw’uyu muhanda imodoka ziza gutwara umusaruro muri uyu murenge uherereye mu Karere ka Rwamagana, ziherayo zikavayo bigoranye bigatuma abakabaguriye umusaruro w’ibitoki,ibishyimbo n’umuceli bihera cyane bahinuba.

Imihanda mibi ituma umusaruro w’abahinzi utagera ku isoko maze abaje kubagurira bakabaha ku giciro gito.

Mu kwishakira ibisubizo ngo kuburyo bugoranye aba baturage bahitamo gutwara uyu musaruro ku magari,aho bazamuka imisozi banyuze mu bunyerere butoroshye mugihe cy’imvura, nk’uko Habukubaho Jean Claude umwe umuhinzi uhaturiye abitangaza.

Agira ati “Umuceri ejo imodoka zaje kuwupakira zaraje ziratabama zimara iminsi ibiri zarahezemo,bitinza abahinzi kubona amafaranga yabo kuko umusaruro wabo utahise ugera ku isoko.”

Uyu muhinzi akomeza avuga ko kubera imihanda mibi bituma abaza kubagurira umusaruro babahenda kuko ngo nabo imodoka zabo zangirika zije kuwupakira.

Ati “Nk’ubu turi kugurisha ikilo cy’ibishyimbo 200Frw,nyamara iyo kumasoko hari aho usanga ari 300Frw.Ni ikibazo gikomeye kandi aka gace karera cyane.”

Abandi baturage muri aka gace baganira na Kigalitoday,bemeje ko ikibazo k’imihanda gikomeje kubabera imbogamizi ku iterambere ryabo.

Ndayishimiye avuga ko nyuma yo kwegerezwa amashuri n’amazi babona hakwiye ubuvugizi bakabona umuhanda n’amashanyarazi.

Kurundi ruhande ariko abatuye aka gace bavuga ko abaturiye imihanda bayangiriza bayihingamo bigatuma ifungana bagasaba ko hakorwa ubukangurambaga muri abo baturage.

Umuyobozi w’umurenge wa Kazo, Bushayija Francis, yemera ko aka gace gakwiye imihanda, kuko bidindiza iterambere ryako.

Gusa akavuga ko bitewe n’ubushobozi bari bateganije ko iyo mihanda ya Tunduti,Rugarama n’Amabumba izakorwa mu mwaka utaha w’ingengo y’imari wa 2016-2017.

Ati “Mu gihe iyi mihanda itari yakorwa twari twumvikanye n’abaturage ko buri nyuma y’ibyumweru bibili tuzajya dukora imiganda kugirango za modoka ziza gutwara umusaruro zibone uko zigerayo,hanyuma ibirenze ubushbozi bwacu tugategereza kiriya gihe uzakorerwa.”

Umuhanda ugera mu midugudu ya Tunduti,Rugarama n’Amabumba mu kagali ka Kinyonzo, umurenge wa Kazo akarere ka Ngoma igira ikibazo cy’ubunyerere bwinshi igihe cy’imvura ndetse n’amabuye menshi ashinyitse ku ruhande rwegera akagali baturanye ka Birenga.

Ikilo cy’ibigori kiragura 150Frw ku isarura mu gihe isarura rishize bahabwaga 100Frw ku kilo.

Kugurirwa ku masorori nabyo ngo biri mubihombya abahinzi kuko bababeshya ko isorori ingana n’ikilo kandi kirenga.

Nahayo Zubert umwe mu bahinzi babyo, yizera kuzinjiza amafaranga menshi bitwe n’uko mu kagali atuyemo umusaruro wari wanazamutse bigakubitiraho n’izamuka ry’ibiciro ku isoko.

Agira ati “Ibimenyetso bitwereka ko ibiciro bizaba byiza cyane kuko niba ku isarura bari kuduha amafaranga 150 Frs ku kilo,ubushize baraduhaga amafaranga 100Frs, murumva ko bizagera no kuri 200 Frs ku kilo.”

Abahinzi bavuga ko ariko iki giciro kikiri hasi ugereranije n’igishoro umuhinzi aba yatanze n’imbaraga aba yatakaje abihinga. Bagasaba ko byibuze ikilo kigeze kuri 200Frs babasha kubona inyungu bifuza kandi bakiteza imbere.

Abatuye umurenge wa Sake bishimira ko bari babonye umusaruro mwinshi w’bigori.

Nyabutsinsi Jean Pierre nawe utuye aka gace avuga ko n’ubwo abaturage bavuga ko bagurirwa ku kilo amafaranga 150 Frs ari ukwibeshya, kuko bagurisha abakoresha ingemeri (amasorori) babeshya ko angana n’ikilo kandi baba barayagaruye akarenza ikilo.

Ati “Iyaba byibuze ayo 150 Frs yari ku kilo dusanzwe tuzi cy’umunzani. Ariko hano bakoresha udusorori bita ingemeri ugasanga hari nizo bagaruye zapima n’ibiro bibili.Umuhinzi araharenganira cyane rwose bigatuma twe abahinzi tudatera imbere.”

Umunyamabanga nshingwabikorwa w’umurenge wa Sake, Mukayiranga Glorise, avuga ko kugurisha abamamyi bakoresha ayo masorori bitemewe ko bahora babiyama n’ufashwe akamburwa iyo sorori kuko yiba abahinzi.

Avuga ko bagira inama abahinzi yo guhunika bagategereza ko ibiciro biziyongera bakabona kugurisha, aho guhita bagurisha ugasanga bagiye kuzabigura menshi ku masoko, nk’uko bikunze kubabaho aho bicura bakongera bakajya kubihaha.

Ntirenganya Olivier ukora akazi ko gutwara moto, yavuze ko bimwe mu bikorwa uru rubyiruko ruvuga ko bigaragazamo ubutwari harimo ukudahishira ibikorwa bibi nka ruswa, ibiyobyabwenge n’amacakubiri, ahubwo bakagaragaza uwashaka kubishoramo urubyiruko.

Abahawe ibiganirok’ubutwari hari abavuze ko bari baziko kuba intwari bigombera kuba uri umusirikari cyangwa urugamba rwo kurwanira igihugu gusa.

Yagize ati “Nkanjye w’umumotari hari abo dutwara bafite ibyo biyobyabwenge,hari kandi nabatanga izo za ruswa. Nkanjye umaze kumva ikiganiro k’ubutwari ndumva ngiye kubuharanira ndwanya akarengane na ruswa nagaragaza abashaka kubidushoramo.”

Yabitangaje nyuma yo kwitabira ikiganiro ku butwari cyatanzwe ku Munsi w’Intwari z’igihugu kuri sItade Cyasemakamba ku wa 1 Gashyantare 2016.
Muri ibyo birori byari byahuriyemo abatuye mu Mudugudu wa Kiruhura mu Murenge wa Kibungo, bamwe mu rubyiruko bagaragaje ko bari baziko kuba intwari bisaba kuba uri umusirikare wagiye ku rugamba.

Ibirori byo kwizihiza intwari z’u Rwanda urubyiruko rwaridagaduye mu mbyino z’amatorero.

Asubiza kubibazo by’urubyiruko rwabazaga niba bishoboka kuba intwari utabari umusirikare cyangwa umupolice, Harerimana Augustin wari watanze ikiganiro ku butwari yabisubije yifashishije ijambo rya Paul Kagame.

Ati “Ubutwari bugaragazwa n’ibikorwa byiza biha agaciro abanyarwanda kandi biharanira ubuzima bwiza bwabo bunabasubizamo ikizere uko bikwiye.”

Zimwe mu ngero zifashishijwe basobanurira uru rubyiruko harimo intwari z’abanyeshuri b’inyange banze kwitandukanya igihe abacengezi babasabaga kwivangura bashingiye ku moko maze bakabyanga bakabica.

Ministri w’umuco na sport Uwacu Julienne, yasobanuye ko intwari mu gihe cya none ari uguharanira gukora bifitiye Abanyarwanda n’abantu muri rusange byagira umuntu intwari.

Ntirenganya Olivier ukora akazi ko gutwara moto, yavuze ko bimwe mu bikorwa uru rubyiruko ruvuga ko bagaragazamo ubutwari ruvugamo ukudahishira ibikorwa bibi nka ruswa, ibiyobyabwenge n’amacakubili, ahubwo bakagaragaza uwashaka kubishoramo urubyiruko.

Yagize ati “Nkanjye w’umumotari hari abo dutwara bafite ibyo biyobyabwenge,hari kandi nabatanga izo za ruswa. Nkanjye umaze kumva ikiganiro k’ubutwari ndumva ngiye kubuharanira ndwanya akarengane na ruswa nagaragaza abashaka kubidushoramo.”

Yabitangaje nyuma yo kwitabira ikiganiro ku butwari cyatanzwe ku munsi w’intwari z’igihugu kuri stade Cyasemakamba kuwa mbere tariki 1 Gashyantare 2016.

Ibi birori byari byahuriyemo abatuye umudugudu wa Kiruhura mu murenge wa Kibungo, bamwe mu rubyiruko bagaragaje ko bari baziko kuba intwari bisaba kuba uri umusirikare waiye ku rugamba.

Asubiza ku bibazo by’urubyiruko rwabazaga niba bishoboka kuba intwari utabayeho umusirikare cyangwa umupolise, Harerimana Augustin wari watanze ikiganiro ku butwari yabisubije yifashishije ijambo rya Paul Kagame.

Ati “Ubutwari bugaragazwa n’ibikorwa byiza biha agaciro Abanyarwanda kandi biharanira ubuzima bwiza bwabo bunabasubizamo icyizere uko bikwiye.”

Zimwe mu ngero zifashishijwe basobanurira uru rubyiruko harimo intwari z’abanyeshuri b’i Nyange banze kwitandukanya igihe abacengezi babasabaga kwivangura bashingiye ku moko maze bakabyanga bakabica.

Ministri w’Umuco na Sport, Uwacu Julienne, yasobanuye ko intwari mu gihe cya none ari uguharanira gukora ibifitiye akamaro Abanyarwanda n’abantu muri rusange.

Umwe mu bayisilamu bo mu Rwanda aherutse gufatwa akekwaho ibikorwa byo kujyana urubyiruko rw’Abayisilamu mu mutwe w’iterabwoba uharanira Leta ya Kiyisilamu ukorera muri Syria (ISIS).

Uru rubyiruko ngo rwafashe ingamba zo kwirinda uwariwe wese wabashuka abashora mu bikorwa byangiriza amahoro kuko ngo bihabanye na Islam

Aya mahugurwa bayahawe n’umuryango Education Health and Economy (E.H.E) ku bufatanye n’umuryango wa Islam mu Rwanda.

Nyuma y’aya mahugurwa uru rubyiruko rwatangaje ko nta muntu warushora mu bikorwa bibi bihungabanya amahoro, kuko ruzi neza ko indangagaciro za Isilamu zitemera umuntu uhungabanya umutekano yica umuntu.

Uwingeneye Afisa yasobanuye ati ”Intumwa y’Imana Muhamed yatubwiye ko umuntu ari inzu Imana yiyubakiye igashyira ku isi. Abakora ibikorwa by’iterabwoba bitwaje ko ari Abayisilamu ni ubujiji, kuko ntabwo umuntu w’Umuyisilamu w’ukuri yafata umuntu ngo amwice.”

Uwingeneye Afisa asanga gukora iterabwoba ari ubujiji bwo kutamenya Islam icyo ari cyo

Uru rubyiruko rukomeza ruvuga ko igitabo gitagatifu cya korowani gisaba umuyisiramu kubanira mugenzi we neza no gutanga amahoro.

Nsabimana Juma, witabiriye aya mahugurwa avuga ko arushijeho kumenya ukuri, gutanga amahoro no kuyaharanira birinda uwabashora mu bikorwa byo kuyahungabanya.

Ati "Twebwe nk’urubyiruko mu myanzuro twafashe ni uko nta wakwishora mu bikorwa by’iterabwoba kuko bihabanye n’icyo Islam itwigisha gukora. Bariya bakora iterabwoba ni ubujiji kuko ntabwo ari byo Imana idushakaho.”

Sheikh Muhoza Issa, Umunyamabanga Nshingwabikorwa w’umuryango E.H.E wateye inkunga aya mahugurwa, avuga ko nyuma yo kubona hari bamwe mu bayisilamu mu Rwanda batangiye kwishora mu bikorwa bibi bibasebya bikakanasebya idini ya Isilamu, bahisemo guhugura urubyiruko kugira ngo rumenye ukuri birinde uwabashuka abashora mu bikorwa bibi bihungabanya amahoro.

Sheikh Muhoza Issa asanga iyo ibikorwa nkabiriya by’iterabwoba ari ibya Islam nta wagakwiye guturikiriza igisasu mu musigiti yica bagenzi be

Ati "Iterabwoba ntabwo rishingiye kuri Korowani (Coran) twemera. Kuko niba koko aharanira inyungu za Islam, kuki agenda mu musigiti akiturikirizaho igisasu akica bagenzi be b’Abayisilamu? Ibyo babikora ari ubujiji cyangwa izindi nyungu abifitemo.”

Uretse amahugurwa ku ndangagaciro z’umuco w’amahoro, uru rubyiruko rwanigishijwe kwirinda ibiyobyabwenge n’icyorezo cya SIDA.

Umwana ku munsi ashobora gukorera amafaranga 300 Frw, bavuga ko bayifashisha mu kugura ibikoresho by’ishuri andi bakayaguramo amatungo magufi, bakiteza imbere.

Umwana umwe ashobora guhungura umufuka agacyura amafaranga agera kuri 300

Kayigire, umwana w’imyaka 13, ubwo yari ku muturanyi we ahugura ibigori ku wa 27/01/2016 yatangaje ko ibigori byeze cyane byatumye babasha gukorera amafaranga ku buryo we ngo ageze mu mafaranga 100Frw kuva yatangira.

Yagize ati” Duhungura ibigori tukabona amafaranga. Isorori imwe ihunguye batwishyura amafaranga 10Frw. Nzayaguramo amakayi ngiye kwiga andi nyaguremo urukwavu norore nanjye ruzabyare nunguke nkire.”

Aba bana bakora akazi katoroshye kuko usanga baba bashishikaye guhera mu gitondo kugera ku gicamunsi.

Gusa ku rundi ruhande, ababyeyi babo bavuga ko nta kibazo babibonamo kuko ngo byabafashije mu burere bw’abana babo bibarinda kwirirwa bazerera mu midugudu aho babaga batazi iyo bagiye.

Uwimbabazi Hyacinthe, umwe mu babyeyi batuye uyu murenge, yagize ati "Abana bacu iyo bagiye guhungura ibigori nka gutyo nta kibazo tubibonamo, kuko bituma batirirwa bazerera mu midugudu. Kandi ayo mafaranga bahembwa azabafasha kugura udukoresho tw’ishuri.”

Aba bana iyo bahungura ibigori baba bashishikaye

Hari abandi babona amafaranga 10Frw ku isorori bahunguye ari ukubafatirana babaha make, ko bakwiye kongera kugira ngo abo bana na bo babashe kujya babona amafaranga yagira icyo abamarira. Cyakora ababakoresha bavuga ko barengeje ku mafaranga 10 ku isorori byaba igihombo.

Abahinzi muri uyu murenge barishimira ko babonye umusaruro mwinshi ndetse n’igiciro babaguriraho ku mwero w’ibigori kikaba ari cyiza ugereranije n’uko umwaka ushize byari bimeze.

Ikilo cy’ibigori kiragurwa amafaranga 140Frw mu gihe ku mwero w’umwaka ushize wa 2015, ibigori byaguze amafaranga 100Frw ku kilo.

Kuri uyu wa 27 Mutarama 2016, ni bwo inka eshatu zageze mu kiraro cye kiri mu Mudugudu wa Gituku, Akagari ka Gituku ho mu Murenge wa Rukira mu Karere ka Ngoma.

Nyuma yo gushumbushwa, ibyishimo byari byose kuri Ndayisaba kuko yumvaga avuye mu bwigunge.

Izo nka zirimo ebyiri zatanzwe n’Ikigo cy’u Rwanda giteza imbere Ubuhinzi n’Ubworozi (RAB). Iya gatatu yamaze kuhagera ni iyo yari yahise yemerwa na Alexis Zibukira, Umuyobozi ushinzwe Iterambere ry’Inganda muri Minisiteri y’Ubucuruzi n’Inganda (MINICOM).

Zibukira yahaye inka Ndayisaba nyuma yo gusoma iyi nkuru yatangajwe na Kigali Today, yavugaga ko Ndayisaba Godfroid yapfushije inka 6 zikubiswe n’inkuba.

Inka yashumbushijwe ni inka nziza bigaragarira amaso ko ziri ku rwego rw’izo yari afite.

Inka zitegereje kumugeraho zirimo inka yatanzwe n’Umuyobozi w’Akarere ka Nyagatare Wungirije ushinzwe Iterambere ry’Ubukungu, Muganwa Stanley, inka ebyiri zatanzwe n’abaturanyi ba Ndayisaba Godfroid, ndetse n’indi nka yatanzwe mu izina ry’Akarere ka Ngoma; zose zikuzura inka zirindwi.

Mu ijoro ryo ku wa 10 Mutarama 2016 ni bwo hamenyekanye inkuru y’ikiza cy’inkuba yakubise inka esheshatu mu kiraro cya Ndayisaba maze zirapfa zose harimo n’izonsaga.

Nyuma y’ibi byago, uyu mugabo yatangaje ko ahombye cyane kuko nta bwishingizi bwazo yagiraga, kandi izo nka zamufashaga kwiteza imbere kuko yabashaga gukama litiro 40 ku munsi zikamufasha n’umuryango we.

Mu ruhame nyuma yo gushumbushwa, Ndayisaba yashimiye abamubaye hafi bakamugabira, ashimira n’abamukoreye ubuvugizi.

Minisiteri y’Ubuhinzi n’Ubworozi (MINAGRI) ni yo yabanje kwemera gutanga inka ebyiri binyuze mu kigo RAB.

Nyuma yo kwakira izi nka eshatu kuri uyu wa 27/01/2016, Ndayisaba mu byishimo byinshi, yavuze ko ashima abantu bose bamubaye hafi, agashima ubuyobozi bwiza buyobowe na Perezida Paul Kagame bwita ku baturage.

Yagize ati “Ndashima mbikuye ku mutima abantu bose bambaye hafi, cyane ubuyobozi n’abaturanyi. Numvaga ko birangiye ntazongera korora none banshumbushije inka nziza. Ndumva ngaruye agatima naho ubundi numvaga narigunze, agahinda kari kenshi.”

Umunyamabanga Nshingwabikorwa w’Umurenge wa Rukira, Ngenda Mathias, avuga ko ubuyobozi burimo gukora uko bushoboye kugira ngo izo nka zitaramugeraho na zo zihagere mu bihe bya vuba.

Inka esheshatu za Ndayisaba zirimo n’izonsaga zari zakubiswe n’inkuba, zose zirapfa.

Ubuyobozi bw’Umurenge wa Rukira bushimira ubuvugizi bwakozwe n’inzego z’ubuyobozi kugeza kuri Guverineri w’Intara y’Iburasirazuba ndetse n’itangazamakuru; kuko bwatanze umusanzu ukomeye none uyu muturage akaba agiye kongera gutunga nyuma y’ibyago yari yagize.

Byabaye muri 2014, ubwo uyu mugabo yari yagiye kwinura imyumbati mu Kiyaga cya Sake.

Bareberaho yemeza ko yakijijwe n’Imana, agakora mu kwaha kw’ingona ikamurekura.

Bareberaho avuga ko ibyo yakoze ngo ingona imurekure ari Imana yabyikoreye kuko we yari yarangije kubona urupfu. Uyu mugabo yemeza ko kuyikora mu kwaha asa n’uyikirigita, byatumye imurekura.

Yagize ati “Ni Imana yabyikoreye kuko nari mu mazi hafi ninura imyumbati, numva ikintu gikutse, iba ifashe ukuguru, dore inkovu z’aho yafashe (aherekana). Ubwo nanjye narunamye manuye akaboko mba nyikoze mu kwaha, njunguje numva irarekuye.”

Uyu mugabo avuga ko iyo amenyo y’ingona agera ku igufwa bitari kumworohera.

Iyi ngona yafashe Bareberaho mu myaka ibiri ishize ariko nubwo akomeje umwuga w’uburobyi muri iki kiyaga cya Sake ngo yumva atewe impungenge n’ingona ibamo ikomeza kwica abantu.

Nyuma yo kumurekura agasubira imusozi bigoraye, bagenzi be bari hafi aho bari bamaze kubona ko byarangiye ingona imuriye, bahise bahurura bihutira kumujyana kwa muganga aravurwa kugera akize.

Nshimiyimana Etienne, umwe muri bagenzi be, yagize ati “Yaramufashe tuzi ko yamujyanye yapfuye, igihe twahungabanye tubona avuyemo avirirana, twihutira kumujyana kwa muganga. Yatubwiye ko yayikoze mu kwaha ikamurekura.”

Habanabakize Thomas, Umuyobozi wa Koperative y’Abarobyi, barobera mu Kiyaga cya Sake yitwa KOPEDUSA, na we yemeza aya makuru.

Ngo ingona yamufashe ku murundi no ku gitsi iramukomeretsa cyane ariko ku bw’amahirwe ntiyapfa.

Yagize ati “Iyo ngona yari imaze iminsi yaridumbukanije ifata abantu ikabica n’abajyaga kuvomamo. Na we yagiye mu mazi na bagenzi be, aba ateye induru ko ingona imufashe agira atya arayikwatura avamo yakomeretse ajyanwa kwa muganga.”

Bagenzi be b’abarobyi na bo bemeza aya makuru ariko na bo bakemeza ko ari Imana yamufashije nta buhanga yakoresheje ahubwo uko kuyikora mu kwaha ari inzira Imana yashatse kumukirizamo.

Bareberaho ubwo twamusangaga ku Kiyaga cya Sake amaze kuroba, yavuze ko kuba ayo mazi abamo ingona bitamubuza gukomeza kuyaroberamo kuko ari bwo buzima bwe.

Nyuma y’uko uyu mugabo yikuye mu nzara z’ingona, harabarurwa abarenga bane imaze kwivugana barimo na ba rushimusi b’amafi ifata nijoro.

Bareberaho afite inkovu ku murundi ndetse no ku gitsi, aho iyo ngona yari yashinze amenyo.

Mu gihe cy’umwaka umwe urenga iki cyemezo gitangiye kubahirizwa, muri iyi koperative abarobyi bagera kuri batandatu bamaze kwirukanwa muri iyi koperative ikorera mu murenge wa Sake Akarere ka Ngoma.

Nta murobyi ukigurisha amafi yarobye yose ngo atahane ubusa

Amafi ni kimwe mu biribwa bikungahaye ku ntungamubiri, afasha mu guhangana n’ikibazo cy’imirire mibi. Abenshi muri abo barobyi ngo bararobaga bakagurisha yose bakayanywera.

Nshimiyimana Etienne, umwe mu banyamuryango ba COPEDUSA, avuga ko nyuma yo gushyiraho iri tegeko ibintu bimeze neza kuko ntawe ukirwaza Bwaki iwe.

Agira ati "Mbere hari abarwazaga Bwaki kubera ubusinzi no kutagira icyo bajyana iwabo mu byo barobye. Ubu ntawazigurisha zose kuko uramutse udashyiriye abana mu rugo ejo bakarwara Bwaki bahita bakwirukana.”

Bamwe mu birukanwe kubera iki kibazo ngo hari abasabye imbabazi barazihabwa none ngo barikosoye.

Habanabakize Thomas, Umuyobozi wa KOPEDUSA, avuga ko iki cyemezo cyagize akamaro kanini muri koperative ndetse no mu ngo zabo kuko wasangaga abarobyi ari bo bazaga imbere mu kurwaza indwara z’imirire mibi kandi ari bo baroba amafi akungahaye ku ntungamubiri.

Yagize ati ’Iki cyemezo cyaziye igihe kuko nyuma yo kugifata ubu n’uwaba yagurisha akibagirwa umuryango we atinya guhanwa. Dusaba ko byibuze buri muntu agurisha agasigarana ikilo cyo kujyana iwe. Byahinduye imyumvire ya bamwe ubu ingo zacu zihagaze neza.”

Mukayiranga Gloriose,Umunyamabanga Nshingwabikorwa w’Umurenge wa Sake, avuga ko umurenge ayobora ufite amahirwe yo kuba wera cyane ndetse ukanagira ibiyaga, bityo akaba nta mpamvu abona yatuma hagaragara abarwaza imirire mibi uretse imyumvire mike.

Agira ati "Turi kuganira n’abo barobyi ngo bajye baroba bagurishe ariko ntibacure urugo, kuko byaba bibabaje cyane usanze umuntu arobye amafi yose akayagurisha yarangiza akarwaza Bwaki.Turi kugerageza kwigisha kugira ngo abantu bahindure imyumvire duhora tubibibutsa.”

KOPEDUSA ifite abanyamuryango 74. Irimo indi koperative y’abakomoka mu murenge baturanye wa Jarama batarabona ubuzima gatozi.

Ibi byumba byabatswe mu mpera za 2015 byuzuye bitwaye amafaranga y’u Rwanda asaga miliyoni 289 n’ibihumbi 192 yatanzwe n’Akarere ka Ngoma, hakiyongeraho imisanzu y’abaturage n’imiganda batanze muri iki gikorwa.

Amashuri yubatswe azagabanya ikibazo cy’ubucucike cyagaragaraga mu mashuri, bityo abana babashe kwiga neza bisanzuye.

Mu gutaha ibi byumba ku wa 19/01/2016, ubuyobozi bw’akarere bwavuze ko ibyumba 20 byubatswe mu gukemura ikibazo cy’ubucucike bw’abanyeshuri mu ishuri ndetse no gusimbuza ibyumba byari bishaje.

Mu byumba 14 bisigaye byubatswe, harimo 9 bizigirwamo n’incuke ndetse n’ibyumba bitanu by’amasomero.

Bamwe mu bayobozi b’ibigo by’amashuri bavuga ko ikibazo cy’ubucucike mu mashuri kigaragara kuko hari amashuri usanga abanyeshuri bagera kuri 55 mu ishuri rimwe, bakaba babona iki gikorwa kizakemura ikibazo kinini.

Ibyumba by’amashuri byuzuye bizagira uruhare mu kongera ireme ry’uburezi.

Mukamuhizi Hyacente, Umuyobozi w’Urwunge rw’Amashuri rwa Rubona mu Murenge wa Kibungo, ahabereye igikorwa cyo gutaha ibi byumba ku rwego rw’akarere, avuga ko amashuri yari make ku kigo ayobora, bityo ko ikibazo gikemutse umwaka utaha abanyeshuri baziga neza.

Yagize ati “Biziye igihe kuko amashuri twari dufite yari make ku buryo umwaka utaha byari kuzaba ikibazo ariko ndashima ubuyobozi n’abaturage uruhare rwabo mu gushaka ibisubizo mu burezi bw’abana babo.”

Abanyeshuri bo bishimira ko bagiye kujya biga neza kandi hafi, bagashima ko gahunda yo kubaka ibyumba by’amashuri abaturage babigizemo uruhare yatumye hubakwa ashuri mesnhi akabegera. Iyi gahunda ngo yatumye baruhuka ingendo ndende bakoraga bajya kwiga kure.

Umwe muri bo witwa Mukaniyonkuru Divine yagize ati “Ubundi twajyaga kwiga kure ahitwa Gahima bigatuma bamwe badakomeza kwiga ‘secondaire’ (ayisumbuye) kubera gutinya urugendo rurerure. Aya mashuri agiye gutuma twiga neza tutabyigana.”

Umuyobozi wungirije w’Akarere ka Ngoma ushinzwe imibereho myiza y’abaturage, Kirenga Providence, avuga ko ibi byumba byubatswe muri gahunda bari bihaye muri uyu mwaka w’imihigo wa 2015-2016.

Umuyobozi Wungirije w’Akarere ka Ngoma, Kirenga Providence (iburyo) mu gikorwa cyo gutaha ku mugaragaro aya mashuri.

Kirenga asaba ababyeyi kurwanya ikibazo cy’abana bata amashuri kugira ngo intego y’uburezi bwiza mu Rwanda igerweho.

Yagize ati “Niba habonetse amashuri meza nk’aya, icyo dusaba ababyeyi ni ukuzana abana babo bakayigiramo, bakarinda abana guta ishuri. Twubatse amashuri ariko abanyeshuri bagakomeza guta amashuri, intego yacu ntiyaba igezweho.”

Kuri biogaz 152 akarere kahize kubaka muri uyu mwaka w’imihigo wa 2015-2016, nyuma y’amezi atandatu ashize, basanze hamaze kubakwa 24 gusa. Kuri uyu muhigo, njyanama yasabyeho ibisobanuro.

Umuhigo wa Biogaz utazamuwe, wasubiza inyuma Akarere ka Ngoma mu mihigo.

Umuturage ushaka kubakirwa biogaz yishyura amafaranga ibihumbi 100, Leta ikamutangira ibihumbi 300.

Umuturage ashobora gutanga aya mafaranga ako kanya cyangwa ubuyobozi bukamufasha mu kubona inguzanyo mu “Umurenge SACCO”.

Ubuyobozi buvuga ko hakiri icyizere ko uyu muhigo uzeswa kuko ngo imyumvire mu baturage igenda izamuka.

Aba bayobozi bagiriwe inama yo kongera ubukangurambaga mu baturage kugira ngo uyu muhigo utazatuma akarere gatakaza amanota mu mihigo.

Ngenda Mathias uyobora umurenge wa Rukira, umwe mu mirenge iri imbere mu kugira biogaz yagize ati “Twebwe ibanga dukoresha ni uko buri muyobozi ugiye kubonana n’abaturage (kuri terrain) ababwira kuri biogaz. Umuturage tukamurambagiza kare tukamubwira ubwiza bwayo.”

Visi Perezida w’Inama Njyanama y’Akarere ka Ngoma, Dr Kanobana Mathusalem, asanga hamwe n’ubujyanama basanzwe bagira aba bayobozi mu kwesa imihigo neza, bizeye ko uyu muhigo uzagenda neza, akarere kakongera kuza imbere.

Yagize ati “Dufite icyizere ko inama twagiriye abayobozi mu mirenge yo gukaza ubukangurambaga mu baturage, izatanga umusaruro; cyane ko abaturage batangiye gusobanukirwa akamaro ka biogaz. Buri gihe, dufasha abatekinisiye kunonza gahunda zabo.”

Indi mihigo yagarutsweho ko itarimo gutungana uko byifuzwa harimo umuhigo w’ibikorwa by’umuganda, aho ubwitabire bwagaragajwe ko buri hejuru kuri 91% ariko umusaruro uvamo ukaba ukiri hasi kandi umusaruro ari wo wahizwe mu mihigo.
Muri iyi ngengo y’imari, ibikorwa by’iterambere biteganijwe ko bizatwara 41%.

Kayitare Innocent, umwe muri bo, avuga ko kubera ibihumbi bibiri by’amafaranga y’u Rwanda bahembwa ku munsi, mu mezi ane amaze akorana n’uyu mushinga, amaze kwigurira inka.

Barishimira ko imirimo y’ibikorwa bizafasha kuhira imyaka yabaye akazi.

Yagize ati “Baduhemba neza kandi ku gihe tugahemberwa ku matelefone. Ubu maze kwiteza imbere cyane.”

Uretse iyo nka, Kayitare avuga ko yanaguzemo ihene ebyiri kandi akaba nta n’ikibazo agira ku musanzu w’ubwisungane mu kwivuza.

Ubuyobozi bw’Umurenge wa Rurenge na bwo bwemeza ko uwo mushinga wo kuhira imyaka umaze kugira impinduka zigaragara ku baturage bawukoramo.

Nyamutera Emmuel, Umunyamabanga Nshingwabikorwa w’uyu murenge, avuga ko ubu abaturage baguze amatungo, bakaba boroye kandi bakanitabira gukorana na SACCO.

Abo baturage bakora mu mirimo yo kubaka ibyobo bizajya biturukamo amazi yo kuhira (Dams), abandi barimo mu mirimo yo kubaka ibigega.

Biteganyijwe ko imirimo y’ibanze kugira ngo batangire kuhira imyaka izarangira muri 2017 mu gihe yatangiye muri 2015; ikazarangira itwaye miliyoni 13$ zatanzwe n’Ubuyapani binyuze muri JICA.

Uwo mushinga ukorerwa mu mirenge ya Rurenge na Remera mu Karere ka Ngoma biteganyijwe ko uzarangira utwaye miliyoni 13 z’amadorali y’Amerika yatanzwe n’Ubuyapani binyuze mu mushinga JICA.

Ambasade y’Ubuyapani yishimiye aho imirimo y’umushinga icyo gihugu kigiramo uruhare, wo kuhira imyaka mu Karere ka Ngoma ugeze.

Kayitare Inncent, umwe mu bahinzi b’aharimo gutunganywa ngo hazuhirwe avuga ko bizabazanira iterambere rirambye.

Agira ati “Nkanjye umwaka ushize nahinze hegitari y’ibigori nsarura ibiro 400 kubera ko izuba ryatse cyane kandi ubundi narasaruraga toni ebyiri. Kuhira bizatuma duhinga igihe cyose maze umusaruro wiyongere.”

Nirere Consolee, umuhinzi utuye muri ako gace, na we ashimangira ko uwo mushinga uzabateza imbere kuko uretse kuba bazuhira imyaka, ngo batangiye guhurizwa mu makoperative, bigishwa uburyo bwo guhinga kijyambere ngo bongere umusaruro.

Batangiye kubaka ibidamu n’ibigega mu mirimo yo gutunganya aho umushinga wo kuhira imyaka.

Tomio SAKAMOTO, Umujyanama Mukuru muri Ambasade y’Ubuyapani mu Rwanda, kuri uyu wa 19 Mutarama 2017, ubwo basuraga ibikorwa by’uyu mushinga ari kumwe n’ubuyobozi bwa Ministeri y’Ubuhinzi n’Ubworozi mu Rwanda, yishimiye aho ibikorwa by’uwo mushinga bigeze avuga ko bizarangirira ku gihe.

Umunyamabanga wa Leta muri Ministeri y’Ubuhinzi n’Ubworozi, Tony Nsanganira, avuga ko Leta yiteze ko ibikorwa byo kuhira imirima muri iyo mirenge bizazamura umusaruro w’imboga n’imbuto kandi ko bizajya byoherezwa hanze.

Yagize ati “Ibikorwa biri gukorerwa hano bizafasha hegitari zirenga 30 zo mu gishanga kuhirwa ndetse n’imusozi, aho twifuza guhinga imboga n’imbuto dushobora no kohereza mu mahanga. Bizaba biri ku buso bugera kuri ha300.”

Abayobozi basobanurirwa iby’uyu mushinga n’aho ugeze mbere yo kujya aho ukorererwa.

Nsanganira akomeza avuga ko ari igikorwa cyiza cyiyongera ku bindi bikorwa by’imishinga yo kuhira birimo gukorwa hirya no hino mu gihugu bigamije kongera umusaruro ukomoka ku buhinzi.

Ibikorwa by’uyu mushinga ubu bigeze kuri 30% mu gihe biteganyijwe ko iyi mirimo yose izarangira muri Kanama 2016.

Uretse kubaka ibikorwa byo kuhira mu mirima, uyu mushinga biteganijwe ko uzanafasha abahinzi mu kubaha ubumenyi mu buhinzi bwo kuhira.

Amafaranga bishyuza bayakoreye bubaka ibyumba by’amashuri 8, ubwiherero 16 ndetse n’inzu ya mwarimu,byose byubatswe ahitwa Tunduti na Murinja mu murenge wa Kazo Akarere ka Ngoma.

Aya mashuri n’ubwo yafashije abana babo kwiga hafi basaba ko bakishyurwa bakabasha kwiteza imbere

Aba bafundi bavuga ko bahora basiragizwa bizezwa kwishyurwa ndetse banakwa konti za banki zabo ngo bishyurwe none imyaka ibaye itatu batarayabona,none ingaruka zikomeje kubageraho.

Uwizampa Joseph wubatse Tunduti avuga ko yishyuza ibihumbi 77,yakoreye mu mezi arenga atatu atagira icyo yikorera iwe none ngo kutishyurwa byamugizeho ingaruka ikomeye y’ubukene abayemo bumwugarije.

Yagize ati” Ubukene bwaratwishe,nawe ibaze gukora emezi atatu ntacyo ukora iwawe warangiza ntuhembwe!Bahora badusiragiza batwizeza kuyabona none imyaka ibaye itatu nta yo baduha.Abana banjye uniforme zarashaje ntibazabona izindi ejo budi bagiye kwiga.”

Umwe mu bahakoze ngo yamaze gupfa atarishyurwa none ngo umuryango we ubayeho mu buzima bubi inzu yasambuwe n’umuyaga baranyagirwa bagasaba ko bakishyurwa wenda bagasana iyonzu.

Aba bafundi bahuriza kukuvuga ko bagerageje kwishyura yaba k’umurenge ndetse no ku karere ka Ngoma ariko ibyo bijejwe byose bimaze imyaka itatu ntagishyirwa mu bikorwa.

Imyaka itatu ngo ishize bizezwa kwishyurwa ariko amaso yaheze mu kirere

Umunyamabanga Nshingwabikorwa w’Umurenge wa Kazo,Bushayija Francis,yizeza ko bashobora kwishyurwa vuba kuko ngo ikigo cy’igihugu cy’uburezi (REB) kigomba kubishyura ngo cyamaze no gukora igenzura rya nyuma mu kwezi gushize k’Ukuboza 2015.

Yabisobaniye agira ati”Igihe icyo ari cyo cyose bakwishyurwa kuko itsinda rya REB ryo kugenzura ryamaze kurangiza kubikora ubwo rero twabizeza ko amafaranga yabo ari munzira.”

Mu karere hose ka Ngoma harabarurwa ibirarane by’imyenda ya miliyoni zigera ku 120 ku bafundi bubatse ibyumba by’amashuri bakomeje kuvuga ko basiragizwa kandi ntibishyurwe.

Ibi byabereye mu Mudugudu wa Gituku, Akagari ka Kibatsi, Umurenge wa Rukira, Akarere ka Ngoma mu ijoro ryo ku wa 10/01/2016.

Nyuma y’iki kiza asaba uwaba afite umutima ko yamwibuka kuko ngo byamurenze

Izi nka zose nta bwishingizi zari zifite. Bivuze ko uretse kuba hagira abamushumbusha ku bw’umutima wabo, nta yindi ndishyi yabona kubera iki kiza cy’inkuba.

Ndayisaba avuga ko yari amaze kwiteza imbere n’umuryango we w’abana batanu, abikesha ubu bworozi bwamuhaga litiro 40 ku munsi akabasha gusagurira isoko akabona amafaranga.

Yagize ati "Nk’uko byagenze, ibyago ntibiteguza. Nari nzi ko ngiye kwiteza imbere nteganyiriza abana banjye n’umuryango ariko ni uko bigenze. Ndasaba ko hari nk’uwaba afite umutima akaba yanshumbusha, yabikora kuko byarandenze. Sinari nabona ibintu nk’ibi kuva natangira korora.”

Inkuba yakubise mu kiraro cyarimo izi nka zirapfa ariko inyana z’izi mbyeyi zo ntacyo zabaye nk’uko bitangazwa na nyir’izi nka.

Nyuma y’iki kiza cy’inkuba, ubuyobozi bw’Umurenge bwasuye uyu mugabo buramuhumuriza bumwizeza ubuvugizi kugira ngo nibishoboka abe yashumbushwa.

Umunyamabanga Nshingwabikorwa w’Umurenge wa Rukira, Ngenda Mathias, mu kiganiro na Kigali Today, yatangaje ko nyuma y’icyo kiza, umurenge wakoze ubuvugizi mu Karere ka Ngoma ngo kabe kavugana n’Ikigo cy’Igihugu gishinzwe guteza imbere Ubuhinzi n’Ubworozi (RAB) niba uyu mworozi hari icyo yafashwa.

Yagize ati ”Twihutiye gusura uyu mugabo turamuhumuriza ariko nk’ubuyobozi bw’umurenge, twakoze ubuvugizi ku karere ka ngo kabe kavugana n’inzego zo muri RAB, harebwe niba uyu mworozi hari icyo yafashwa, haba kumushumbusha cyangwa ikindi.”

Gupfusha inka bihagaritse imishinga myinshi uyu mugabo yari afite irimo Biogaz yari amaze kugeza iwe, kuko ngo atazongera kubona amase yo kuyishyiramo ngo abashe kuyikoresha mu guteka no gucana.

Ikibazo cy’ibiza by’inkuba gikunda kuboneka muri aka Karere ka Ngoma kuko uretse kuba izi nka zarakubiswe n’inkuba, haherutse kumvikana inkuru y’inkuba yakubise abanyeshuri ku Ishuri Ryisumbuye rya Nyamugari, bakajyanwa mu bitaro ariko ntahagire upfa.

Ibi ubuyobozi bubivuze mu gihe hari bamwe mu baturage b’uyu murenge bakoresha inzitiramubu mu mirimo y’ubwubatsi, aho bayikoresha bayihambiriza ibikoresho.

Hari abaturage bemeza ko izi nzitiramibu zikorehswa ibyo zitagenewe ziba zikiri nzima. Aha ni ku ishuri rimwe ryo mu Murenge wa Kazo.

Abaturage batuye muri uyu murenge bavuga ko mu gihe hari abatarabonye inzitiramubu, bababazwa no kubona hari abazikoresha bazitira ibigo n’abazizirikisha amazu bubaka; kandi bo barazibuze.

Abaturage b’Umudugudu wa Rugarama mu Kagari ka Kiyonzo, bavuga ko mu mudugudu wabo, hari abatarabonye inzitiramibu ziherutse gutangwa kandi bakemeza ko hari abatwaye nyinshi z’umurengera.

Uwitwa Ndunderi yagize ati “Inzitiramubu zirakenerwa cyane ku buryo banazigurisha. Nk’ubu, zikoreshwa mu bwubatsi ku mbariro baparata. Iyo yabonye nyinshi nk’uko agasagura, ntiyabura kuzikoresha mu kuzubakisha kandi ari nshya.Twebwe ntazo twabonye rwose kandi hari abafashe nyinshi.”

Gukoresha inzitiramubu ibyo zitagenewe kandi bigaragara aho usanga hubakwa amazu y’ibiti bakazikoresha mu mbariro ndetse hari n’aho usanga bazikoresheje bafunga irembo mu bigo by’amashuri.

Bamwe mu batuye uyu murenge bemeza ko hari aho basanga inzitiramubu nshya zarakoreshejwe mu bwubatsi kuko bazitandukanyiriza n’izambere ku myenge yazo bakabasha kuzimenya.

Umurenge wa Kazo ukora ku gishanga cy’Akagera, ahantu hakunda kugaragara indwara ya malariya iterwa n’umubu wororokera muri ibi bishanga.

Abaturiye ibi bishanga babuze inzitiramibu bavuga ko babaho bafite ubwoba ko barwara igihe icyo ari cyo cyose.

Umunyamabanga Nshingwabikorwa w’Umurenge wa Kazo, Bushayija Francis, aganira na Kigali Today kuri uyu wa 12 Mutarama 2016, yavuze ko haramutse hari abakoresha inzitiramubu mu byo bataziherewe; uwafatwa yahabwa ibihano bikomeye kuko byaba ari umuco mubi.

Yagize ati “Dukora ubukangurambaga kugira ngo baziryamemo bazikoreshe icyo baziherewe ariko ntihabura abateshuka kuri izo nshingano. Dufatanije n’abajyanama b’ubuzima, uwo tuzamenya, tugomba kumufatira ibyemezo bikarishye kuko inzitiramubu ziradufasha cyane.”

Bamwe mu baturage b’Akarere ka Ngoma basaba ko mu nzu zabo haterwa imiti yica imibu nk’uko byakozwe mu turere twa Bugesera na Kirehe, kugira ngo birinde malariya igaragara cyane muri iyi minsi.

Abaturage bavuga ko kuba Akarere ka Ngoma ari ko kasigaye hagati kadaterewe uyu muti ngo na byo byatuma imibu irushaho kwiyongera.

Amazu n’ibihingwa byangijwe n’imvura ku wa 09 Mutarama 2016 n’ibyo mu tugari twa Ntovi mu Murenge wa Rukumbeli na Nyange mu Murenge wa Mugesera.

Imvura yangije imyaka inasakambura amazu.

Mu Murenge wa Rukumberi amazu 10 yasambuwe n’umuyaga mu gihe hegitari 50 z’urutoki zangirijwe n’iki kiza.

Muri Mugesera ho hangiritse hegitari 100 z’imyaka irimo ibishyimbo n’ibigori byari bihinze ku butaka bwahujwe inasakambura amazu icyenda harimo n’ayangiritse cyane.

Ubuyobozi bw’iyi buvuga ko bwamaze gukora ubuvugizi kugira ngo abaturage batishoboye bashobore gufashwa.

Bizumuremyi Jean Damascene, Umunyamabanga Nshingwabikorwa w’Umurenge wa Mugesera, avuga ko abaturage bari gukora imiganda bafasha abangirijwe amazu kuyasana.

Yagize ati “Ku bufatanye n’abaturage, abasamburiwe amazu turi kububakira mu miganda, ariko ibirenze ubushobozi bw’umurenge twabikoreye ubuvugizi mu karere ngo harebwe uko bafashwa. Hari amazu yasambutse amabati arononekara cyane, na hegitari 100 zirangirika.”

Mu Murenge wa Rukumbeli ho iyi mvura yangirije ibintu, mu gihe hari hari ikibazo cy’imvura nke cyabaye muri iri hinga ku buryo umusaruro wari usanzwe ari muke cyane kubera izuba ryinshi ryavuye rikumisha imyaka.

Izi Postes de Santé zubatswe mu tugari twa Ntovi mu Murenge wa Rukumbeli ndetse no mu Kagari k’Akabungo mu Murenge wa Mugesera zuzuye zitwaye miliyoni zirenga 20 zatanzwe na RDF.

Abaturage bashimira Ingabo z’u Rwanda kubera ko zabegereje amavuriro.

Kuri uyu wa 08 Mutarama 2016 ubwo izi Postes de Santé zatahwaga ku mugaragaro, abaturage bagaragaje ko ubundi bivurizaga kure.

Nyiransabimana Theresie, utuye mu Kagari k’Akabungo, avuga ko ubudi bivurizaga ku Kigo Nderabuzima cya Nyange barinze kwambuka Ikiyaga cya Sake mu bwato kandi bakoze urugendo rurerure.

Yagize ati” Ubundi byadusabaga kwambuka ikiyaga,bikadusaba nk’amasaha atatu bigatuma tujya kwivuza twarembye. Kugera kuri iri vuriro byansabye iminota itanu gusa.”

Abo mu Kagari ka Ntovi mu Murenge wa Rukumbeli, bo bavuga ko bakoraga urugendo rugera rw’ibirometero birindwi bajya kwivuza ndetse ngo hakaba nubwo bibasaba kujya kwivuriza mu karere k’abaturanyi ka Bugesera bikabagora kuko ari kure.

Bafungura ku mugaragara rimwe muri ayo mavuriro.

Umuyobozi w’Ingabo mu turere twa Ngoma, Kirehe na Bugesera Col.Bertin Mukasa Cyubahiro wari uhagarariye RDF muri iki gikorwa yavuze ko mu gihugu hose ingabo zimaze kubaka amavuriro nk’ayo menshi ndetse ko bateganya kuhubaka arenga 10 mu Karere ka Ngoma.

Umuyobozi w’Akarere ka Ngoma Wungirije ushinzwe Imibereho Myiza y’Abaturage, Kirenga Providence, yasabye abaturiye aya mavuriro kwitabira kugura mutuweri bose kugira ngo ivuriro begerejwe rizarusheho kubafasha bivuza hafi kandi bivuriza make.

Muri aya mavuriro yose ayatshywe, hagaragajwe imbogamizi z’amazi n’umuriro bikiyari kure kandi bikenerwa mu kunoza service z’ubuvuzi.

Amavuriro ane muri aka karere ari mu mirenge ya Murama, Rukira, Rurenge na Jarama, niyo abaturage bavuga ko amaze umwaka urenga zuzuye, ariko kugera ubu ntarakora kuko ataratahwa ariko bakavuga ko bahora bizezwa ko azatahwa “vuba”.

Abaturage bavuga ko icyizere cyo kuzabona amavuriro akora kigenda gishira.

Nikobamporeye Jean d’Amour, utuye mu kagali k’Akagarama, ahuzuye ivuriro mu murenge wa Rurenge, avuga ko bagenda batakaza ikizere ko ibyo babwiwe ku ivuriro bizaba impamo.

Agira ati “Oya! Iyi nzu ntago ari ivuriro bitewe n’uko basa n’aho batubeshye ariko abayobozi baratubwira ngo ikizere kirahari.”

Iyo uganiriye n’abaturage baturiyeaya mavuriro bemeza ko zirengeje umwaka umwe zihari ariko zidatangira gukora.

Abaturiye ivuriro ry’Akagarama Murenge wa Rurenge, bavuga ko kuva aho batuye bajya ahari ivuriro ribegereye bibasaba gutega moto kugenda gusa bishyura hagati y’i 1.500Frw.

Bavuga ko utabashije kubona ayo mafaranga akora urugendo rw’amasaha abiri, bigatuma hari abarembywa n’urugendo rurerure mu gihe hari abarembera mu ngo batinye gukora ingendo ndende bajya kwivuza.

Umuyobozi wungirije w’akarere ka Ngoma ushinzwe imibereho myiza, Kirenga Providence, avuga ko aya mavuriro ashobora gutangira gukora vuba, kuko ibibazo byari bihari byari amafaranga yo gukora imirimo yanyuma no gushyiramo ibikoresho.

Ati “Hari ahabaye ikibazo cy’ibikoresho bitaraboneka ngo batangire,ahandi habayemo ibibazo by’amafaranga yari ataraboneka ngo inyubako zikorerwe imirimo ya nyuma.Turishimira ko minisiteri y’ubuzima yamaze gutanga amafaranga azafasha muri ibi bikorwa.”

Ministeri y’Ubuzima iherutse gutanga miliyoni 43Frw, zirimo azakoresha mu bikorwa byo kurangiza imirimo ya nyuma kuri aya mavuriro kugira ngo atangire gukora.

Ingamba zafashwe ni uguhanga abafatiwe mu cyuho benga umutobe uvamo urwaga ibirenge bakazajya bahanwa n’ibyo benze bigahabwa akato, nk’uko umuyobozi w’umurenge wa Murama ukunze kugaragaramo iki kibazo abitangaza.

Kwengesha ibirenge ibitoki byakomeje kuvugwaho ko ari umwanda ariko usanga hirya no hino mu byaro bakibikora (foto internet)

Asaba abayobozi b’imidugudu, n’abandi bafatanyabikorwa nk’abanyamadini n’abayobozi b’amakoperative kujya kwibutsa abo bayobora ko kwengesha ibirenge bitemewe kandi ko bihanirwa n’itegeko k’ubifatiwemo.

Mu kwezi k’Ukwakira umwaka ushize abantu 33 bajyanwe mu bitaro, harimo 23 bajyanwe mu bitaro bikuru bya Kibungo, nyuma yo kunywa umutobe ku wawucuruzaga mu kagali ka Gitaraga, murenge wa Murama.

Nyuma y’ibizamini byakozwe n’ibi bitaro bikuru bya Kibungo, muganga mukuru w’ibi bitaro Dr. Namanya Wiliam, yatangaje ko umutobe banyoye warimo umwanda ari nayo mpamvu yabateye gucibwamo no kuruka bikabije.

Nzayisenga Félecien, umuyobozi w’umudugudu wa Kavumu uherereye mu kagali ka Sakara muri uyu murenge, avuga ko n’ubwo ubukanguramabga bukorwa babuza abantu kwengesha ibirenge hari abakibikora. Gusa akavuga ko ingamba n’ibihano byafashwe kandi bigiye gukurikizwa.

Muri ibi bihano harimo kuba uzajya afatwa azajya ashyirwa mu ruhame maze ibinyobwa bye yengesha ibirenge bakabiha akato.

Yagize ati “Abaturage ubwabo nibo bazajya babanza kumuha igihano,icyambere bamubwira ko urwagwa yenze azajya arwinywera wenyine,ntawuzongera kuza kururangura ngo arujyane ku isoko.Ubwo rero iyo yumvise ibihano bingana gutyo ntawakongera kwengesha ibirenge.”

Bamwe mu batuye akarere ka Ngoma nabo bavuga ko kwengesha ibirenge bitajyanye n’igihe kandi ko bitera umwanda n’indwara, biyemeza ko uwafatwa yengesha ibirenge ntawazongera kumunywera inzoga, nk’uko uwitwa Kayitare yabitangaje.

Ati “Njyewe ndamutse menye uwengesha ibirenge sinakongera kunywa ku rwagwa rwavuye iwe.Impamvu kwengesha ibirenge ari bibi,ni umwanda Kuko hari nuwo wasanga arwaye amavunja kuko ntaracika burundu.Ubuyobozi budufashe bubice.”

Amabwiriza ya njyana y’akarere ka Ngoma arebana n’isuku, ateganya ibihano birimo n’amande ya 5000Frw n’inzoga kuwa fatiwe mu bikorwa byo kwengesha ibirenge.

Abantu 16 bafite ubumuga bwihariye bwo kutavuga, kutumva n’ubumuga bw’ingingo bazanwe mu “Urugo rw’Amahoro” kuva mu 2005 batoraguwe hirya no hino mu giturage aho bari baratereranwe n’imiryango.

Abafite ubumuga batawe n’imiryango yabo basangizwa ubunani.

”Urugo rw’Amahoro” rugengwa na Kiliziya Gatolika ku bufatanye n’abafatanyabikorwa b’Abataliyani.

Abikorera bo mu Murenge wa Mutendeli bavuga ko mu minsi mikuru ya Noheri n’ubunani bifuje kubifuriza umwaka mushya babasura banabasangiza amafunguro y’ibiribwa n’ibinyobwa kanabaha n’izindi mpano z’umunsi mukuru.

Muragijemungu Achades, Umunyamabanga Nshingwabikorwa w’Umurenge wa Mutendeli waje abayoboye, avuga ko icyo gikorwa bagiteguye bagamije kubereka ko nubwo bafite ubumuga ndetse n’uburwayi butandukanye bukomeye batari bonyine.

Yagize ati “Iki gikorwa twiyemeje ko cyaba ngaruka mwaka kugira ngo twishimane n’aba bantu na bo bumve ko bitaweho.”

Yakomeje avuga ko Paruwasi Gatolika ya Bare n’abaterankunga batakwishoboza bonyine kwita kuri abo bantu bafite ubumuga bwihariye, ko abubwo hakenewe n’inkunga ya buri wese uturiye icyo kigo.

Nuwo abenshi mu baba mu Rugo rw’Amahoro batabasha kuvuga kubera imiterere y’ubumuga bafite, bamwe muri bo bateye urusaku rugaragaza ko bishimye cyane.

Uwimana Egidie, umukorerabushake ushinzwe uru rugo,yavuze ko nubwo batabasha kuvuga, byibuze mu bwenge bwabo babasha kumenya ubitayeho.

Padiri Bizimana Viateur, uhagarariye ingo z’amahoro eshatu ziri mu Ntara y’Iburasirazuba, yashimye icyo gikorwa maze avuga ko ari igikorwa gikirisitu kandi asaba Imana kubakomezamo uwo mutima w’urukundo.

Yagize ati”Uwari we wese iyo ageze mu rugo rw’amahoro rugira icyo rumubwira, k’ufite umutima muzima. Imana ibakomezemo uwo mutima w’urukundo kandi muvuze neza ko bizaba ngarukamwaka.”

Uwabashije kuvuga ahagarariye abandi baba muri uru rugo yashimye cyane abaje kubasura avuga ko bari mu maboko yabo kandi ko bashima uburyo babitaho. Iki gikorwa cyo gusangira ndetse guha impano abafaite ubumuga cyatwaye ibihumbi 400FRW.

Ni nyuma y’igihe aba bacuruzi binubira ko basora amafaranga amwe n’abakorera ahubakiye nyamara bo bagakorera hanze yahubakiye,hasi izuba ribari hejuru n’imvura ikabanyagira.

Aba bacuruzi bashima ko noneho aho bakorera n’ubwo imvura yagwa bitabatera ikibazo nka mbere

Mukayuhi,wahoze ucururiza hanze y’isoko,nyuma y’uko Akarere kujuje inyubako yindi akajya gucururizamo na bagenzi be,atangaza ko bashima akarere ko kumvise ikibazo bari bafite

Yagize ati”Turashima Akarere ko katwubakiye na twe tugacururiza ahantu heza.Iri soko rishya twagiyemo riratunejeje rizadufasha byinshi.Iyo ukorera heza n’abakiriya baraza.”

Nyuma yo kuzuza aya mazu, gahunda yo kuvugurura ku babafite amazu y’ubucuruzi yongeye kugaruka,aho basabwe ko amazu y’ubucuruzi muri uyu mujyi bayavugurura bubaka amazu y’amagorofa,abakoreragamo bakimukira muri ayo y’isoko ryuzuye.

N’ubwo Akarere kavuga gatya,bamwe mu bacuruzi bavuga ko izi nyubako nshya ziri ahantu inyuma y’andi mazu ku buryo batizeye ko abakiriya bakomeza kuboneka.

Ubuhamya bwatanzwe n’umucuruzi ukorera muri amwe mu mazu y’iri soko,wahimukiye nyuma yuko aho yakoreraga iduka ryahiye rigakongoka n’inzu ikangirika,avuga ko amazu mashya y’iri soko yaziye igihe kandi azafasha benshi kuko aho ari abakiriya bahagera ntakibazo gihari.

Amwe mu mazu mashya y’iri soko

Kazubwenge yagize ati”Mbona nta hantu wakora ubucuruzi mu Rwanda ngo wunguke nka hano I Ngoma.Ndacuruza nkunguka abakiriya ndababona ngereranije n’ahandi nakoreye.Aya mazu yaramfashije cyane nyuma y’ikibazo nagize muzi.”

Umuyobozi w’Akarere ka Ngoma,Nambaje Aphrodise,ubwo yafunguraga ku mugaragararo izi nyubako nshya,yavuze ko kwagura ibikorwa remezo nk’amasoko Akarere kabikora kagamije gufasha abantu gutinyuka gukora ubucuruzi ngo biteze imbere.

Yagize ati”Akarere ntago gakora ubucuruzi ahubwo amazu nkaya yubakwa hagamije gufasha abantu ngo bakore ubucuruzi biteze imbere bityo akarere n’ibihugu bitere imbere muri rusange.”

Hangari ebyiri ni zo ndetse n’amazu y’ubucuruzi ni byo byongerewe ku isoko rikuru risanzwe rya Kibungo muri gahunda yo kuryagura yatwaye akarere miliyoni zigera kuri 250.

Iyi koperative ikorera mu turere twa Ngoma na Kirehe, ihinga umuceri kuri hegitari 513 igasarura byibuze toni 2000,zifite agaciro ka miliyoni 500Frw ku ihinga rimwe.

Abahinzi b’umuceri ngo nubwo bakorera ahantu bakandurira maraliya cyane,hari abadatanga ubwisungane mu kwivuza.

Maniraguha Patric, umuybozi w’iyi koperative, asobanura ko aho bakorera ubuhinzi bw’umuceri ari ahantu hagaragara marariya nyinshi, akavuga ko kugira ngo umusaruro wiyongere bisaba ko buri munyamuryango agira uburyo bworoshye bwo kwivuza.

Avuga ko hari abanyamuryango n’ubundi bahabwaga amafaranga ngo biyishyurire ariko bakayakoresha ibindi, ariko ngo kuba bibaye itegeko koperative izajya ibishyurira mbere hanyuma amafaranga bayakatwe ku musaruro w’umuceri bizaca abatagiraga mutuweri.

Agira ati “Iyo abanyamuryango bacu bafite ubuzima umusaruro uriyongera.Ibyo dukora byose tubanza gushaka ubuzima bwiza bw’umunyamuryango abasha kwivuza byoroshye.Twakuyeho kuyabaha ngo biyishyurire,kuko byagaragaye ko hari abayabona bakayikoreshereza ibindi.”

Mu nama ya tariki 31 Ukuboza 2015, yahuje iyi koperative n’abayobozi b’umurenge wa Murama mu karere ka Ngoma, abayobozi mu midugudu n’utugari n’abandi bafatanyabikorwa b’uyu murenge, iyi koperative yashimwe icyemezo yafashe.

Buhiga Josue, umuyobozi w’umurenge wa Murama avuga ko COOPRIKI ifite abanyamuryago benshi muri uyu murenge ko bizabafasha kujya besa neza umuhigo wa Mutuweli ubu bageze kuri 87% bagomba kugera ku 100%.

Ati “Twifuza ko muri Murama mu makoperative yose byaba umuco ko umunyamuryango mbere yo gushakisha ibindi byose agomba kubanza kwita ku buzima bwe n’umuryango we.”

Abanyamuryango b’iyi koperative bavuga ko bishimira itegeko ryafashwe ryo kujya abanyamuryango bose n’imiryango yabo bishyurirwa ubwisungane mu kwivuza na koperative nk’inguzanyo,ngo kuko bizabafasha kutayakoresha ibindi nkuko byagendaga.

Bendantunguka Jean Piere ati “Nitwe twabyisabiye nk’abanyamuryango kuko kiriya gishanga kibamo maraliya nyinshi.Kubigira itegeko bizadufasha kuko bazajya bayatwishyurira mbere twishyure ku musaruro.”

Mukabalisa yishimira ko uretse abagore bamugana ari benshi,n’abagabo bakunda kwigishwa na we kubera ubushobozi bamubonamo kuko atsindisha cyane abo yigishije.

Abagabo nabo ngo bakunda uburyo abigisha

Uyu mukobwa w’imyaka hafi 40, afite uruhusa rwo gutwara ruriho ibyiciro bitatu,B,C,D. Amaze imyaka irindwi yigisha gutwara ubu ari gukorera muri “United Driving school” ishami rya Ngoma ari naho akomoka.

Abagana uyu mukobwa bemeza ko abigisha neza kandi bagatsinda ndetse bakanavuga ko ataraza abagore n’abakobwa basaga n’abari baracitse ku kibuga, ariko nyuma yo kuza ngo bigiriye icyizere na bo biyumvamo ubushobozi.

Umwe mu bigishwa n’uyu mukobwa utifuje ko amazina ye avugwa yagize ati”Abasha kwigisha neza ugafata kuko nk’ubu maze ibyumweru bibiri ubu mazekumenya byinshi numva ahubwo n’ikizamini najyamo nkatsinda. Na mama niwe wamwigishije aratsinda, mbese uyu mukobwa amaze kubaka izina hano.”

Mukabalisa avuga ko nyuma yo gutangira kwigisha abamugana baje ari benshi cyane cyane abagore, ariko n’abagabo ngo bakunda kwigishwa nawe.

Yagize ati” Nasanze abagore biga ari bake ariko ubu baje ku bwinshi,ubu benshi bamaze kuzibona nta mugore ukitinya babonye ko nabo bashoboye.Ubu kuba uri umugore mutunze imodoka utayizi ino aha ni ipfunwe mu gihe mbere wasangaga bose ntawe uyizi.”

Abo yigishije bose ngo baratsnda neza kubera ubuhanga n’impano afite yo kwigisha-1

Abigishwa n’uyu mukobwa bavuga ko batsinda igihe bageze mu bizamini, mu bizamini biheruka, Mukabalisa avuga ko mu bantu 11 yigishije bagiye mu kizamini hatsinzwe umwe gusa abandi bose baratsinda babona impushya za burundu.

Nyuma yo kubona uruhusa rwo gutwara ibinyabiziga, Mukabalisa yatangiye kwigisha abandi n’ubwo nta shuri ryigisha gutwara ibinyabiziga yakoreragamo. Yatangiye kwigishiriza mu ishuri ryemewe mu mwaka wa 2013 muri United Driving School.

Uyu mukobwa avuga ko nta wakagombye kwisuzugura kuko umugore ashoboye kandi ko akazi kose kinjiza amafaranga nta wakazaririye mu kugakora.

Ubu bwicanyi bwabaye saa tanu z’ijoro ryo ku wa 27 Ukuboza 2015, nyuma y’aho Nyakwigendera Nshogoza Callixte w’imyaka 55 se wa Hakizimana,atashye yasinze bigakurura amakimbirane yatumye barwana.

Abaturanyi ndetse na nyina wa Hakizimana, bavuga ko nta makimbirane adasanzwe uyu muhungu ubusanzwe yagiranaga na se.

Nyuma yo gukubita ise agapfa, Hakizimana yahise atoroka ariko ku bufatanye bw’abaturage n’inzego z’umutekano,aza gufatirwa i Kabuga mu Karere ka Gasabo kuri uyu wa 28 Ukuboza 2015 ubwo yatorokaga ajya Kigali, kuri ubu akaba afungiye kuri Sitasiyo ya Police ya Kabuga.

Abaturanyi babo kandi, bavuga ko bumvise intonganya ndetse n’imirwano bahagera bagasanga Nshogoza amaze gupfa.

Umunyamabanga Nshingwabikorwa w’Umurenge wa Rukumbeli, Ndayambaje Emmanuel, asaba abaturage kwirinda ubusinzi no kurenza urugero muri iyi minsi mikuru kuko bishobora gukurura umutekano muke ndetse n’impfu zitunguranye.

Police y’igihugu ivuga ibi kuko usanga mu gihe cy’iminsi mikuru ibyaha nk’ibi byiyongera, aho usanga abantu baba bashaka amafaranga y’iminsi mikuru ku kibi n’ikiza.

Umuvugizi wa police y’igihugu mu ntara y’Iburasirazuba, IP Emmanuel Kayigi, asaba abo bumva ko bazashakira amafaranga mu buryo butemewe kubireka kuko police y’igihugu iri maso ko uwabigerageza bitamuhira yafatwa agahanwa.

Bamwe bahitamo gukoreshwa imodoka ubucuruzi bw’ibiyobyabwenge, gusa ngo iyo bafashwe ibihano biba byinshi.

Agira ati “Ubu muri iyi minsi mikuru abantu baba bahagurutse bashaka amafaranga ku kibi n’ikiza,bayashakira mu biyobyabwenge nahandi.Turaburira ushaka kubijyamo ko police turi maso kandi n’abaturage bari maso ko nidufatanya tuzabafata bagahanwa.”

Ubucuruzi bw’ibiyobyabwenge busa n’ubufata intera kuko basigaye banakodesha imodoka bakabitwaramo nijoro, nk’uko byagaragaye mu karere ka Ngoma tariki 2 Ukuboza 2015, aho imodoka y’ivatiri yafatanwe urumogi imifuka itanu abari bayirimo bakiruka.

Umuvugizi wa police yemeje ko atari mu karere ka Ngoma byabaye gusa, ahubwo ko no mu karere ka Kayonza byari biherutse kuhaba bafatwa bakava mu modoka bakiruka.

Abari gufatirwa mu byaha nk’ibi by’ubucuruzi bw’ibiyobyabwenge bavuga ko n’ubwo babigiyemo bibwira ko bagiye kubona amafaranga menshi bazarya mu minsi mikuru, byarangiye bibonye iyo minsi mikuru bayiririye muri gereza ndetse banahomba ibyo bashoye.

Nshimyumuremyi Claude wafashwe tariki 23 Ukuboza 2015 mu karere ka Ngoma afite ibiro 30 by’urumogi avuga ko yari yarurangye ibihumbi 75, nyuma yo gufatwa yabwiye itangazamakuru ko yicuza.

Ati “Numvaga ko ngiye kubona amafaranga menshi kuko bambwiraga ko byari kwikuba hafi kabili ku kiranguzo naruguriyeho, none birangiye mfashwe mfunzwe ya yandi ndayahombye, abana banjye n’umugore basigaye bonyine, sinzanabona uko mbahingira, mbese ni ibihombo gusa.”

Abafatanwa ibiyobyabwenge nk’urumogi, bose bemeza ko rudahingwa mu Rwanda ahubwo barurangura mu bihugu by’abaturanyi ba Tanzania n’u Burundi.

Ibiyobyabwenge bikunda gufatirwa mu ntara y’Iburasirazuba ni urumogi, kanyanga n’inzoga z’inkorano.

Uyu mugabo yafashwe n’irondo saa kumi z’gitondo cyo kuwa 24/12/2015 mu murenge wa Kibungo, hamwe n’umumotari bahita bamushyikiriza Polisi ya station ya Kibungo.

Nshimyuremyi (uri iBumoso) yemera icyaha akicuza icyatumye abijyamo.Umumotari we arabihakana avuga ko ntanaho azi uwo mugabo.

Nshimiyimana avuga ko yaruguze muri Tanzania ku kagera ari ibiro 30,akavugana n’umuntu (avuga ko atamuzi bavuganaga kuri telefoni gusa)yagombaga kuruzanira bari guhurira ahitwa Rond point i Kibungo, ari nabwo yafatwaga agiye kuhagera.

Akomeza avuga ko yicuza bikomeye icyatumye yishora mu biyobyabwenge,agasobanura ko nta kiza kibamo uretse igihombo akuyemo ndetse no gufungwa.Asaba abakibikora n’abafite gahunda yo kubijyamo kubireka hakiri kare kuko ntanyungu irirmo.

Yagize ati”Ngize amahirwe bakanyumva,abo babyishoramo nababwira ko ari igihombo bashaka babivamo.Umuryango wanjye ndawutaye ndafunzwe,mpambye amafaranga nari nashoye agera ku bihumbi 75. Ni byinshi nta nyungu nimwe irimo.”

Irondo ryafashe uyu mugabo rivuga ko yaje na moto maze ikamusiga ahitwa ku Karutaneshwa maze akamanuka yikoreye uwo mufuka ku mutwe,ari nabwo bamukurikiye bakamufata arwikoreye.

Uyu Nshimyumuremyi aho afunganwe n’umumotari witwa Munyampundu Onesphore ukekwa kuba ariwe wari utwaye Nshimyumuremyi kuri moto,ahakana ubutanyacyaha akavuga ko atanazi uwafatanwe urumogi.Gusa uyu mumotari yemera ko akorera umurimo we muri Kirehe.

Umuvugizi wa police y’igihugu mu ntara y’Iburasirazuba,I.P Emanuel Gahigi,asaba abaturage kwirinda kwishora mu bucuruzi bw’ibiyobyabwenge kuko abaturage n’inzego z’umutekano bari maso.

Asaba kandi ko hatagira uwibeshya ko agiye gushaka amafranga y’iminsi mikuru ngo ayashakire mu nzira mbi zirimo n’ibiyobyabwenge kuko ngo yahomba byose akanafungwa.

Yagize ati”N’undi wese uri kubitekereza akibwira ko inzego z’umutekano ziri mu minsi mikuru zitamubona aribeshya.Uko bashakisha ubwo buryo bwose natwe turabizi.Umuntu wese wagerageza kubangamira umutekano akora ibyaha inzego z’umutekano turi maso.”

Mu ntara y’Iburasirazuba ibyaha by’icururzwa ry’Ibiyobyabwenge birahagaragara cyane,aho bivugwa ko urumogo barukura mu bihugu by’abaturanyi bakabyinjiza mu Rwanda.

Kalisa wafashwe ku wa 22/12/2015 ahagarariye komite y’ubudehe mu mudugudu wa Kiyanja Akagali ka Rugese Umurenge wa Rurenge Akarere ka Ngoma, yemera icyaha akavuga ko aribwo bwa mbere abikoze.

Uyu muri komite ya Girinka mu mudugudu yemera icyaha akavuga ko ari ubwa mbere abikoze ubundi inka zatangwaga neza.

Uwatanze ruswa ngo bamushyire kuri liste y’abazahabwa inka muri gahunda ya gira inka yitwa Kanyandekwe Jean de Dieu,avuga ko yayatswe.

Kugeza ubu Kalisa Gaston niwe ukurikiranweho icyo cyaha aho yahise atabwa muri yombi akaba afungiye kuri station ya police Kibungo.

Kalisa avuga ko ari bwo bwa mbere yari ariye ruswa akavuga ko yabitewe n’umuyobozi w’umudugudu wari wamubwiye ko hari umuturage ushaka kugura fanta ngo bamurekere ku rutonde rw’abazahabwa inka,ngo kuko bashakaga kurumukuraho kuko ari umwimukira.

Yagize ati” Ubundi umukuru w’Umudugudu yari amaze iminsi abimbwiyeho ariko njye nkumva nshidikanya,ariko we akabimpata ambwira ko nta kibazo ngo kuko n’ubundi ayikwiye ari fanta azaba aduhaye.Ubwo yaraje anzanira ibihumbi 20. Mpita mbona abayobozi baramfashe.”

Abaturage bakomeje kuvuga kenshi ko muri gahunda ya Gira inka ,yatangijwe na perezida Kagame yo guha abaturage inka haherewe ku bannye kurusha abandi, hari abayobozi mu nzego zibanze baka ruswa abaturage.

Umuvugizi wa police y’igihugu munta y’Iburasirazuba,IP Emmanuel Kayigi,asaba ko abantu bajya bagaragaza abarya ruswa kuruta uko babivuga ngo ziraribwa ntawe bagaragaza wayibatse ngo ahanwe.

Yagize ati” Ni ubwambere iki kibazo kgaragaye hano mu burasirazuba,ariko birashoboka ko hari abandi babikora nkuko abaturage usanga babivuga,ariko icyo tubasaba ni uko bajya badufasha bagatanga amakuru ku bayobozi nkabo barya ruswa bagafatwa nkuko uyu byagenze.”

Uyu muvugizi avuga ko Kalisa aramutse ahamwe n’iki cyaha yahanwa n’ingingo ya 642 mu gitabo cy’amategeko ahana cy’u Rwanda,iteganya igihano kiri hagati y’imyaka itanu kugera kuri irindwi, n’ihazabu y’inshuri kuva kuri ebyili kugera kunshuro icyumi y’icyatswe,kuwuhamye n’icyo cyaha cy kwaka no kwakira ruswa.

Abo bana 54 biga mu mashuri abanza bari bamaze ukwezi bigishwa imyuga itandukanye muri IPRC East hagamijwe kuyibakundisha muri gahunda yiswe”Space For Children” Urubuga rw’abana.

Abantu bari batangajwe no kubona ukuntu umwana wiga mu mashuri abanza asenya mudasobwa akongera akayiteranya.

Basoza amasomo y’imyuga bahabwaga kuri uyu wa 23 Ukuboza 2015, abo bana bagaragarije ababyiyi babo ubumenyi bahakuye.

Bamwe muri bo berekanye ko bashoboye kwihamburira mudasobwa bakongera bakayiteranya, kubaka amazu, gukora amashanyarazi n’indi myuga.

Nikuze Valentine w’imyaka 12, wavuze mu izina ry’abandi bana, yemeje ko ubumenyi bakuye muri iryo shuri bubahaye icyerekezo cy’ubuzima bwabo ngo kuko ubuzima butegurwa atari impano.

Yagize ati “Kubaho neza ntibigwirira umuntu cyangwa ngo bibe impano ugabirwa, ahubwo biraharanirwa. Gutozwa umwuga tungana dutya bidusigiye icyerekezo cy’ubuzima bwacu cyo guhitamo umwuga kuko ari yo nzira yihuse yo kwiteza imbere.”

Umwe mu babyeyi bari bitabiriye kureba ubumenyi abana babo bakuye muri iri shuri, yashimye ubuyobozi bwa IPRC East kubera gahunda nziza bashyizeho yo gufasha abana biga mu mashuri abanza, n’ayisumbuye babigisha imyuga.

Yagize ati “Duhereye ku byo tubonye abana bacu bamenye mu kwezi kumwe gusa, bitwereka ko ubumenyingiro butojwe abana bakiri bato bwaba isoko y’iterambere ry’igihugu cyacu n’imiryango yacu.”

Ubwubatsi ni kimwe mu byo abana bishimiye kwiga mu biruhuko.

Umuyobozi Wungirije wa IPRC East ushinzwe imari n’ubutegetsi, Habimana Kizito, avuga ko yaba gahunda ya “Space for children” igenewe abana biga mu mashuri abanza, ndetse na gahunda ya “Make Them Job Creators” yagenewe abiga mu mashuri yisumbuye bazitangije bagamije kurema mu bana n’urubyiruko icyerekezo.

Yagize ati “Mu by’ukuri umwana utari kwiga ahangaha arimo arahomba.Twiyemeje kubafasha tubatoza kugira icyerekezo kuko tuzi neza ko ujya kubaka igihugu atangirira ku rubyiruko.”

Habimana Kizito yakomeje avuga ko izi gahunda zizajya zibaho buri mwaka mu gihe cy’ibiruhuko birebire.

Kwiga aya masomo ni ubuntu, gusa umubyeyi agasabwa amafaranga ibihumbi 29 afasha mu kugura isarubeti, ubwishingizi n’ibindi nkenerwa.

Yabivugiye imbere y’imbaga y’abaturage ba Mutendeli bari baje mu biganiro, kuri uyu wa 16 Ukuboza 2015, n’abadepite ku Itegeko Nshinga ryavuguruwe.

Umukecuru Nyirabikari yifuza ko kugera ku buvivi bwe base bahora bashima Perezida Kagame wamukuye muri nyakatsi akamutuza aheza.

Yagize ati “Ndashima Paul Kagame kuko yanyubakiye nanyagirwaga. Imvura yaragwaga nkajya guca ibirere nkabyitwikira, hari n’ubwo nitwikiriye ibyatsi imvura irara inyagira.”

Abaturanyi ba Nyirabikari bemeza ko yubakiwe muri gahunda yo guca nyakatsi, mu gihe yabaga mu kazu k’ibirere imvura yagwa akanyagirwa.

Nyirabikari yahawe amabati ndetse ku bufatanye n’umuganda babasha kumwubakira inzu y’amabati 20.

Akomeza avuga ko ineza Perezida Kagame yamugiriye azayizirikana ko azanamutora niyongera kwiyamamaza mu matora ya 2017, kandi ko no kugera k’ubuvivi bwe bazahora bibuka iyo neza.

Umuyobozi w’Akarere ka Ngoma, Nambaje Aphrodise, yasabye ubuyobozi bw’umurenge wa Mutendeli gusura uyu mukecuru maze akagenerwa itungo rimufasha mu kwiteza imbere mu zabukuru.

Uretse uyu mukecuru wagaragaje ibyiza akesha Perezida Kagame, hari abandi baturage benshi batanze ubuhamya muri iyi nama bavuga ko ibyiza Perezida Kagame yabagejejeho n’ubuyobozi bweiza bwe ari byo byatumye basaba ko Itegeko Nshinga rivugururwa.

Amasomo ya”Make Them Job Creators”, atangwa na IPRC East, bayahabwa mu biruhuko. Mutambuka Ignes, yiga umwaka wa 6/Ishami ry’Imibare, Ubutabire n’ibinyabuzima(MCB) i Gahini, avuga ko amasomo ku kwihangira umurimo arimo kumuremamo icyizere cyo kutabura akazi igihe azaba arangije kwiga kuko ngo azihangira umurimo.

Aba banyeshuri ngo bumva baraciye ukubiri n’ubushomeri kubera iyi gahunda yo kubigisha kwihangira umurimo.

Yagize ati “Sinzabura akazi kuko iyi program yadufashije kwitinyuka no kumenya guhanga udushya.Ibi byose bizatuma nihangira umurimo byoroshye.”

Rwamukwaya Moses, wiga umwaka wa 6 Imibare, Ubukungu n’Ubumenyi bw’isi (MEG), avuga ko yizeye ko nta kazi azabura kuko aya masomo yatumye afunguka amaso akabona ahari amahirwe yo gushoramo imari yihangira umurimo.

Yagize ati “Njye numva ubumenyi mfite buzamfasha guhanga agashya mu mirimo nzakora nihangira umurimo,yaba ubucuruzi, ubworozi bw’inkoko n’ibindi. Sinzigera mba umushomeri.”

Aba banyeshuri uretse guhabwa amasomo ku kwihangira umurimo banahabwa umumenyi mu myuga itandukanye iri muri iri shuri harimo ubutetsi, ubwubatsi, amashanyarazi n’ibindi.

Habimana Kizito, Umuyobozi wa IPRC East Wungirije ushinzwe Imari n’Ubutegetsi, avuga ko aya masomo agamije kubakundisha umwuga no kubategurira kuzihangira imirimo igihe bazaba barangije kwiga aho kwirirwa bajya kugasaba.

Yagize ati “Tubahuza n’abayobozi b’ibigo bikomeye byo mu Rwanda no hanze y’u Rwanda tukanabigisha gukorana n’ibigo by’imari nka BDF n’ibindi.”

Gahunda ya “Make Them Job Creators” ubuyobozi bwa IPRC East buvuga ko ari ngaruka mwaka izajya iba mu biruhuko. Kugeza ubu, abanyeshuri biga mu mashuri yisumbuye bari gukurikirana iyi gahunda ni 23.

Aya masomo yo kwigangira umurimo no kwiga umwuga atangirwa ubuntu muri iri shuri ariko ababyeyi b’abana bagasabwa amafaranga ibihumbi 29 agurwamo isarubeti, ubwishingizi n’ibindi bikoreshwa mu masomo.

Imbere y’imbaga y’abaturage bo mu murenge wa Rurenge Akarere ka Ngoma, kuri uyu wa 14/12/2015, Perezida wa Sena y’u Rwanda yababwiye ko yazanwe no kubaha raporo.

Abaturage bishimye uburyo itegeko nshinga ryavuguruwe ndetse bizeza Hon Makuza ko bazabigaragaza muri referedum batora yego

Yagize ati”Ni inshingano y’umuyobozi iyo watumwe, agomba gutumika kandi ukagaruka ugatanga raporo,kugirango ubwire abagutumye uko bimeze bagire n’icyo babikubwiraho.”

Hon Makuza yakomeje avuga ko kuvugurura itegeko nshinga ari urugendo rwatangijwe n’ubusabe bw’abaturage, inteko ishinga amategeko imitwe yombi iryiga ingingo ku yindi noneho bashyiramo ibitekerezo by’abaturage bahereye ku ngingo ya 101 abaturage bifuje cyane.

Abaturage bagiye bafata ijambo bemezaga ko inteko yakoze akazi neza ikurikiza ibyifuza by’abaturage

Abaturage basabaga ko ingingo ya 101 yazitiraga perezida Kagame kongera kwiyamamaza,basaba ko ivugururwa akongera kwiyamamaza.

Nyuma yo kugezwaho ibikubiye mu itegeko nshinga rivugururye rigomba gutorerwa muri referendum n’abaturage kuri uyu wa 18/12/2015, aba baturage bavuze ko bishimiye akazi inteko ishinga amategeko yakoze ndetse bizeza perezida wa Sena n’abaseteri bari kumwe ko bazabigaragaza batora “yego” mu matora ya referendum.

Hari abaje bitwaje ibyapa bishimira inteko ishinga amategeko akazi yakoze

Maniriho David yagize ati”Njye nishimye cyane kuko numvise ibyo twifuje n’ubundi ari byo badukoreye.

Ndetse twishimiye ko babikoreye igihe none tukaba tugiye kurya iminsi mikuru umutima utuje.

Ubundi twahoraga duhangayitse twibaza tuti none bazaduhakanira.Ubu turishimye cyane.”

Hon Makuza asanga ari inshingano kunteko ishinga amategeko kugaruka mu baturage babaha raporo y’ibyo babasabye

Uretse kugaragaza ko bishimiye ibyavuye mu ivururwa ku itegeko nshinga byakozwe ku busabe bwabo, aba baturage bavuze ko batindiwe n’umunsi w’amatora bakabigaragaza muri referendum.

Muri iyi nama hari abaturage bagaragaje ko batindiwe n’umwaka wa 2017 ngo bitorere Perezida Kagame ngo kuko bazaruhuka bamaze kumutora agakomeza kubageza ku byiza n’iterambere.

Nyuma yo gusobanurirwa ibyavuguruwe mu itegeko nshinga basabanye n’abashyitsi babyina

Aba baturage basobanuriwe ko ingingo ya 101, yavuguruwe igaha uburenganzira Perezida Kagame kongera kwiyamamaza mu mwaka wa 2017.

Ubuyobozi bw’iri shuri riherereye mu Karere ka Ngoma mu Murenge wa Kibungo, butangaza ko aya masomo agamije gukundisha abana umwuga bakiri bato kugira ngo abazahitamo kwiga imyuga bazabyige babikunze babikore neza.

Iyo bubaka ku mazu nk’aya ngo bituma bagira inyota yo kwiga umwuga.

Bamwe mu bana bari guhabwa aya masomo bavuga ko bamaze kugira ubumenyi bwinshi ku byo bigishwa kandi ko bumva na bo bazavamo abanyamwuga beza badasondeka.

Nikuze Vallentine, w’imyaka 12, avuga ko yakunze cyane gukanika imodoka kandi ko ubu amaze kumenya gukuramo ipine akamenya ikibazo yagize.

Yagize ati "Agashya numva nzazana ni ugukora neza ntasondeka ku buryo mu Karere ka Ngoma nzaba uwa mbere ku buryo buri wese azajya yifuza gukorerwa imodoka ye na Valentine.”

Aba bana bemeza ko ntawagakwiye gusuzugura umwuga kuko babona uwize umwuga atabura akazi ahubwo abasha kwibeshaho atarindiriye kujya kwaka akazi mu biro.

Aba bana banatozwa ikoranabuhanga.

Umuyobozi wa IPRC East Wungirije ushinzwe Imari n’Ubutegetsi, Habimana Kizito, avuga ko abana bazarangiza bumva neza akamaro k’imyuga n’ubumenyingiro mu iterambere ry’igihugu,bayikunda ku buryo igihe bahisemo kuyiga bizatuma babikora neza kurusha ababijyamo ari ugushaka amaramuko.

Yagize ati "Ni ugutangira kubategura hakiri kare gukunda umwuga ngo,bamenye ibyigishirizwa muri iki kigo bazakore umwuga bahisemo bakuze, bitandukanye no kuwukora bigutunguye kuko ushaka amaramuko ugasanga ntubikoze ubyiyumvamo bityo ntubashe no gutanga umusaruro.”

Ni kunshuro ya Kabiri abana bagiye guhabwa ubumenyi nk’ubu mu mwuga,aho bigishwa umyuga itandukanye itangirwa muri iki kigo,irimo ubwubatsi,gukanika imodoka,ikoranabuhanga n’ibindi.

Uretse ubumenyi mu mwuga aba bana biga mu mashuri abanza bahabwa,banahabwa kandi uburere mboneragihugu bigishwa indangagaciro na kirazira by’umuco nyarwanda. Kuri iyi nshuro abana bari gukurikirana aya masomo mu biruhuko ni 27.

Hakizimana Gervais, umwe mu babyeyi, avuga ko ishuri ribegereye riri muri mu birometro bitatu ugereranyije ari kurigeraho na bwo bigasaba kuzamuka imisozi idatuwe, irimo ibibuye ku buryo ngo igihe cy’imvura abana banyagirwa.

Abaturage baremera uruhare rwabo ariko hakubakwa amashuri kugira ngo abana babo baruhuke kurira imisozi bajya ku ishuri.

Yagize ati “Duhorana impungenge cyane nk’igihe cy’imvura ugasanga banyagirirwa muri uwo musozi kuko ntutuwe. Ikindi nk’abana biga mu myaka yo hasi usanga amaguru yabo aba atarakomera, hari ubwo bibagora kuhamanuka abandi bakagwa bakavunika.”

Abaturage ngo bandikiye Njyanama y’Umurenge wa Murama bayisaba kubakorera ubuvugizi ku Karere ka Ngoma ngo begerezwe ishuri byibuze amashuri atatu abanza nibukira kugira ngoabana bajye babanza gukomera amaguru.

Abatuye uyu mudugudu bavuga ko baramutse bemerewe ishuri byinshi babyikorera,ngo kuko nyuma yo kwiyubakira ishuri ry’irerero ry’abana,ubu bamaze kubona ikibanza cy’ahazubakwa ayo mashuri basaba kandi ko ngo basaba ubufasha bw’isakaro gusa ndetse n’abarimu.

Ubuyobozi bw’Umurenge wa Murama buvuga ko buri gukora ubuvugizi ngo muri uyu mudugudu hagezwe ishuri kuko ngo babona rikenewe kandi n’abaturage bakaba bafite ubushake bwo kubyikorera k’ubufatanye n’ubuyobozi.

Buhiga Josue, Umunyamabanaga Nshingwabikorwa w’Umurenge wa Murama, avuga ko na njyanama y’umurenge iherutse kwiga kuri icyo kibazo.

Agira ati “Twabishyize muri vision y’umurenge ko byibuze hazubakwa amashuri atatu abanza. Njyanama yashyizeho komisiyo yo kubyiga kandi natwe dukomeje ubuvugizi mu karere.”

Abaturage bo bamaze gutangira igikorwa cyo gushomba amabuye binyuze mu bikorwa by’umuganda, ikibanza na cyo kikaba cyarabonetse ku buryo abaturage bavuga ko bategereje kwemererwa ngo batangire kubaka.

Umudugudu wa Kabahushi ushimwa n’ubuyobozi ko bashyira hamwe ndetse bukemeza budashidikanya ko n’ayo mashuri bazabasha kuyiyubakira bafatanije n’ubuyobozi.

Iyi gahunda yatangirijwe mu Murenge wa Zaza, aho bamwe mu babyeyi bahatuye baherutse kugaragaza ko amakimbirane yo mu ngo n’ubusinzi aribyo muzi w’ikibazo cy’imirire mu bana, kuko aho biri abana batereranwa ntibitabweho n’ababyeyi.

Abana bahawe ifunguro ryuzuye nk’ikimenyetso n’urugero ruhawe abaturagengo babigire batyo bace izi ndwara.

Iyi ntara iza imbere mu buhinzi mu gihugu ariko ikibazo cy’imirire mibi cyababereye ihurizo ariko bakemeza ko bagomba kukibonera igisubizo, nk’uko Guverineri w’iyi ntara Uwamariya Odette, yabitangaje ubwo yatangizaga uku kwezi tariki 5 Ukuboza 2015.

Yavuze ko ko bizeye umusaruro muri ubu bukanguramabga kuko bizera ko iki kibazo kidaterwa n’inzara ahubwo ari ikibazo cy’imyumvire n’ubumenyi buke mu gutegura ifunguro.

Abashyitsi bakuru bagaburiye abana indyo yuzuye yatangiweho inyigisho.

Yagize ati”Ikibazo si ukubura icyo barya,ni ikibazo gikubiye mu myumvire n’ubumenyi buke, ari nabyo tugomba kurandura muri uku kwezi.Ni ihurizo ridukomereye kuba tugifite abana bafite ikibazo cy’imirire mibi.”

Umunyamabanaga wa leta muri ministeri y’ubuzima, Dr Patrick Ndimubanzi, yavuze ko n’ubwo ikibazo cy’imirire mibi kigenda kigabanuka, bigisaba uruhare rwa buri wese ngo indwara z’imirire mibi zicike kuko imibare y’ubushakashatsi igaragaza ko ziri ikibazo.

Indyo yuzuye ngo ntigombera ibigurwa ku isoko ahubwo ni ibyo abaturage beza iwabo.

Bamwe mu babyeyi batuye mu karere ka Ngoma bemera ko n’ubwo hari abarwaza izi ndwara kubera ubukene,hari n’abandi babiterwa n’ubujiji bwo kutamenya gutegura indyo yuzuye, nk’uko bitangazwa n’umwe muri bo witwa Umugwaneza Marceline.

Ati “Ubu ngubu ndabibonye menye uko batunganya indyo yuzuye. Ubundi nafataga ibijumba nkabiteka byonyine nkamuha.Ubu ngiye kwikosora.”

Muri ubu bukangurambaga hazibandwa no ku isuku ngo kuko uriye neza ntugire isuku ubuzima bukomeza guhura n’ikibazo cy’imirire.Umuryango SFH Rwanda ukora mu bikorwa by’ubuzima wasobanuriye abari aho uko basukura amazi bakoresheje umuti wa P&G ndetse na Sur-eau.

Kurya neza ariko nta suku ngo ntacyo byamarira umubili ahubwo ngo bikomeza guteza ikibazo cy’imireire mibi.

Muri uku kwezi hateganijwe,gupima abana bose abagaragaweho ikibazo cy’imirire mibi bakitabwaho byumwihariko mu minsi 12 bondorwa, kuremera imiryango irwaje izi ndwara ndetse ubukangurambaga bwimbitse mu baturage ku gutegura indyo yuzuye.

Mu Rwanda iki kibazo cy’imirire kiri kuri 38%.

Ubwo batoraga kuri wa 03 Ukuboza 2015, abana 84 bagiye biyamamaza ku myanya itandukanye mu guhagararira abana mu Karere ka Ngoma, bose bagiye bagaragaza ko ikibazo cy’ihohoterwa mu bana bafite ubumuga kigihari.

Kabanyana watorewe guhagararira abandi bana mu Karere ka Ngoma avuga ko azakora ubuvugizi imbogamizi mu umwana agihura na zo mu iterambere rye zikavaho.

Uwimana Esther w’imyaka 12, watorewe nk’uhagarariye Abafite Ubumuga mu Murenge wa Kazo, avuga ko aho yiga mu mashuri abanza bagenzi be bamuha akato batinya kwicarana na we, bavuga ngo yabanduza ubumuga.

Uyu mwana asaba ko hakorwa ubukanguramabaga abana bagasobanurirwa kuko bagifite imyumvire itariyo ku bana bafite ubumuga.

Yagize ati “Ubona baba badutinya ukabona bahora batwitaza bavuga ngo utabanduza ntibabona aho bajya kwivuza ubwo bumuga.”

Ngo hari kandi abana bafite ubumuga bagihohoterwa bavutswa amahirwe yo kwiga, abandi bakabafungirana mu mazu ngo batabasebya.

Kabanyana Melissa, watorewe kuyobora iri huriro mu Karere ka Ngoma, avuga ko ashyize imbere gukorera ubuvugizi abo bana bafite ubumuga ndetse n’uko abana bigishwa indanga gaciro na kirazira kugira ngo abana bakure neza birinda icyabatandukanya kandi bakunda igihugu banagikorera.

Ygize ati “Haracyari ikibazo ku bana bafite ubumuga bavutswa uburenganzira bwo kwiga ndetse n’imvugo zigaragaza ko badafatwa nk’abantu aho usanga umubyeyi avuze ngo afite abana runaka akongeraho ngo na wawundi w’ikimuga.”

Uyu mwana watowe yakomeje avuga ko ibiyobyabwenge bikiri ikibazo mu bana, akavuga ko hamwe n’ibindi bibabazo bihari azagerageza kubigeza ku nzego zisumbuye kugira ngo bikemuke.

Mukamizero Belancilla, ushinzwe Uburinganire n’Iterambere ry’Umurango mu Karere ka Ngoma, yavuze ko mu kwiyamamaza kw’ abo bana bahakuye ishusho ya byinshi mu bibazo bibangamiye abana, asaba ko abatowe wabyitaho bakazabikorera ubuvugizi bigashakirwa umuti.

Komite yatowe igizwe n’abana batandatu barimo n’umwe uhagarariye abafite ubumuga.

Iyo modoka y’ivatiri yari ipakiye imifuka itanu y’urumogi ifite pulake RAB 029R, mu ijoro ryo kuri wa 02 Ukuboza 2015 ubwo Polisi yayihagarikaga igeze mu Kagari ka Muzingira mu Murenge wa Mutenderi, bari bayirumo basohoyse biruka.

Yafatanywe urumogi abari bayirimo bayabangira ingata.

Police ikorera mu Karere ka Ngoma itangaza ko yafatiriye iyo modoka mu gihe abari bayirimo bagishakishwa ngo bashyikirizwe ubutabera.

Abaturage bagize uruhare batanga amakuru mu nzego z’umutekano ngo iyo modoka ifatwe bemeza ko atari ubwa mbere yari ije gutwara ibiyobyabwenge. Cyakora, ubundi ngo bazaga mu modoka ya taxi baza guhindura babonye barabavumbuye.

Umuturage wemeza ko yatanze amakuru bwambere kuri iyi modoka, avuga ko yaje mu ma saa tanu z’ijoro ihagarara ku Mugezi wa Rwagitugusa, aho isanzwe ihurira n’abantu baza n’ubwato banyuze mu Kagera bapakiye urumogi maze baruha iyo modoka.

Yagize ati” Si ubwa mbere babikora basanzwe baza tugatanga amakuru bakabacika. Njye ntuye ahirengeye mba ndeba muri uwo mugezi, iyo numvise ije mpita nsohoka byose mba mbireba kuko baba bacanye amatoroshi. Ubwato buza bacanye mbareba bagasubirayo mbabona.”

Uyu muturage avuga ko iki kibazo bakomeje kukivuga mu nama bahoraga bagirana n’ubuyobozi bw’umurenge, ariko ko bishimira ko noneho yabashije gufatwa.

Umuvugizi wa Police mu Ntara y’Iburasirazuba, IP.Emmanuel Kayigi, yemeje ayo makuru avuga ko ibyabaye biheruka no kuba mu Karere ka Kayonza naho imodoka bayihagaritse abari bayirimo bakavamo bakiruka.

Agira inama abantu bakora ubucuruzi bw’ibiyobyabwenge kubireka kuko Police ndetse n’abaturage bari maso kandi ko uzagerageza kubikora azafatwa agahomba ndetse akanafungwa.

Yagize ati “Abakomeza kubyishoramo bazajya babihomberamo, bahombe kabiri, bafungwe bahombe n’amafaranga. Bariya na bo byanze bikunze bagomba gukurikiranwa bakamenyekana.”

Ufatanwe ibiyobyabwenge birimo n’urumogi ahanishwa igifungo cy’imyaka hagati y’itatu n’itanu hakurikijwe ibiteganywa n’igitabo cy’amategeko ahana y’u Rwanda.

Ayo magari 42 bayahawe n’umushinga International Rescue committee (IRC) usanzwe ubafasha mu kubahugura mu by’amategeko ku bufatanya na Minisiteri y’Ubutabera.

Abunzi b’i Ngoma bahawe amagare yo kubafasha mu ngendo bajya kunga abaturage.

Bamwe mu bunzi nyuma yo guhabwa aya magari batangaje ko mu mwuga wabo wo kunga bakorera ubushake, nta gihembo, bahuriragamo n’imbogamizi z’uko byabasabaga no kwikora ku mufuka kugira ngo bagere ahabereye ibibazo.

Gashabuka Focus, umwunzi mu Murenge wa Kibungo, yagize ati “Ubundi iyo twajyaga kuri terrain twishakiraga amafaranga y’urugendo ugasanga umuntu atanze nk’ibihumbi 2000Frs umunsi umwe.Ubu aya magari agiye kudufasha ntituzongera kwikora ku mufuka.”

Nzeyimana Pierre, Umuyobozi wa IRC mu Rwanda, umuryango utegamiye kuri Leta watanze aya magari avuga ko abunzi byabavunaga kugera ahabereye ikibazo bikanatuma batabasha gusura ahantu henshi bityo gufata imyanzuro bitinda.

Yagize ati “Kutagira uburyo byatumaga bibagora ntibabashe gusura ahantu henshi mu gukusanya amakuru ku kibazo. Byatumaga gufata imyanzuro bitinda cyangwa hakaba hazamo udukosa muri iyi myanzuro kubera kutagira amakuru ahagije.”

Amagare bahawe ngo azatuma bazajya bashobora kugera kure bakusanya amakuru ku makimbirane bibafashe kunga abaturage vuba.

Urugeni Martime, ushinzwe Ishami ry’Ubutabera bwa rubanda muri Ministeri y’Ubutabera, avuga ko abunzi batanga umusaruro ugaragara kuko ibibazo 90% babikemura mbere bitarinze kujya mu nkiko, bunga abagiranye amakimbirane.

Urugeni agaruka ku mbogamizi aba bunzi bagaragaza zirimo itumanaho ndetse n’ingendo, yavuze ko bimwe bitangiye gukemuka kandi n’ibindi bigiye gukemuka.

Yabisobanuye agira ati “Ikibazo cy’itumanaho igihugu kirakizi kandi hari gushakishwa uburyo kugira ngo bajye babasha gutumanaho hagati yabo ndetse no gutumanaho n’urwego rwa ministeri ruri ku karere (MAJ) rubabagira inama.”

Yakomeje avuga ko uko ubushobozi buzagenda buboneka aya amagari azakomeza gutangwa ku bunzi.

Mu murenge wa Kibungo wonyine mu myaka itanu ishize abanzi bakemuye ibibazo 146, muri byo ibyakomeje mu nkiko ni 19 gusa.

Ibikoresho biguriye ni matera 43 n’amashyiga ya rondereza, binyuze mu musanzu batangaga wa 500Frw mu kimina cya buri cyumweru.

Hatanzwe matera n’imbuza zigeweho za Cana umwe.

Mukankusi Perusi, umwe muri aba baturage avuga ko babonye ko ibicanwa bigenda bibura kandi bibatwara umwanya munini bajya kubishaka, bahitamo kwigurira Imbabura zitamara inkwi, kugira ngo umwanya batakazaga bahora bajya gushaka inkwi bawukoreshe mu bindi.

Agira ati “Mu kimina cyacu dukusanya amafaranga dutanga buri cyumweru yamara kugwira tukagena icyo twayakoresha dukurikije igikenewe cyane.Twahisemo izi cana rumwe na matera ngo dukemure ikibazo cy’inkwi ndetse naho kuryama.”

Kugira ngo babigereho vuba bidatwaye igihe kirekire, aba baturage begereye SACCO ya Murama, ibaguriza amafaranga bazishyura mu mezi umunani.

Izi mbabura hamwe n’ikibika ubushyuhe cyazo bita runonko ngo bibasha kuzigama 80% by’ibicanwa.

Umuyobozi w’Umudugudu wa Kabahushi Majyambere Viateur, avuga ko ashima cyane abatuye umudugudu we kubera ko bashyira hamwe mu iterambere ryabo, bahuza ibitekerezo bahuriye mu mugoroba w’ababyeyi.

Ati “Ibi byose tubitekerereza mu mugoroba w’ababyeyi.Twahisemo kugura aya mashyiga kuko twabonaga ibicanwa bigenda bibura,tukabona hari igihe abaturage bakototera n’amashyamba ya leta bakayonona.

Muri wa mugoroba w’ababyeyi twemeje ko twagura Imbabura ndetse tukanasasira abasigaye batarabona matera.”

Buhiga Josue umuyobozi w’uyu murenge, avuga ko uyu mudugudu ari intangarugero kuko bufite ubuyobozi bwiza n’abaturage bumva, kuko bamaze kwigeza kuri byinshi babikesha gushyira hamwe.

Izi mbabura hamwe n’ikibika ubushyuhe cyazo bita runonko ngo bibasha kuzigama 80% by’ibicanwa.

Ati “Ibi byose ni ubuyobozi bwiza bw’uyu mudugudu.Kugura aya mashyiga bigiye gufasha mu kubungabunga ibidukikije batangiriza amashyamba.”

Imbabura bahawe imwe ifite agaciro k’ibihumbi18, ibasha kuzigama 80% by’inkwi umuntu yakoresha mu mashyiga asanzwe.

Izo mateka nazo nizo bahawe ku mafaranga bikusanyirije

Gahunda yo kwibumbira mu bimina byo guca nyakatsi mu buriri yagiye ifasha ingo nyinshi mu kubasha kuryama heza, aho hari aho wasangaga bazigama igiceri cy’ijana mu cyumweru bikageza aho bigurira matera.

Abakozi babonye akazi muri iyi kawa ya Ndengabaganizi ihinze ku buso bugera kuri hegitare 20, ni abakora mu kuzisasira, kuzisarura n’ibindi bikorwa byo kuzitaho. Amafaranga bakuramo akabafasha gukemura ibibazo by’amikoro.

Ndengabaganizi yishimira intambwe agezeho ku bwo guhinga kawa.

Umukozi umwe ku munsi amuhemba amafaranga 700. Akoresha abakozi 30 buri munsi ariko igihe cy’isarura ngo ajya ageza ku bakozi 100 ku munsi. Uyu muhinzi abasha gusaruro toni y’ibitumbwe ku munsi umwe gusa.

Ndengabaganizi avuga ko ubuhinzi bwa kawa bumwinjiriza miliyoni 30 ku mwaka ndetse n’aba bakozi akoresha akabahembaho amafaranga, bagakemura ibibazo byabo babikesha kawa.

Yagize ati “Kawa imaze kungeza kuri byinshi cyane birimo kuba abana banjye biga mu mashuri meza i Kigali. Ubu nagenze imigabane myinshi kubera iyi kawa yanjye; ndifuza no kuba nagira uruganda ruto rutunganya kawa (station de lavage).”

Uyu mugabo avuga ko ubu buhinzi bwagiriye akamaro cyane abaturanyi be kuko babasha kubona akazi mu kuzitaho.

Bamwe mu bakozi bakora muri kawa ya Ndengabaganizi bavuga ko bamaze kwigeza kuri byinshi babikesha amafaranga bahembwa.

Iyo kawa yeze, abakozi bariyongera.

Uwitwa Musabyimana akorera muri izi kawa yagize ati “Gukora muri iyi mirima biduha amafaranga tukabasha gukora, ntitwirohe mu bidafite umumaro birimo n’ibiyobyabwenge. Ubu mbasha kwiyishyurira mituweri nkabasha gukemura ibibazo, nta nzara ikiba iwanjye.”

Ndengabaganizi yishimira ko iyi kawa ye yamushoboje gutemberera ahantu henshi ndetse akabona n’ingendoshuri yahabwaga nk’umuhinzi w’indashyikirwa.

Umubare w’abahabwa akazi biturutse kuri iki gihingwa cya kawa muri aka gace kazwi nka Sakara, ushobora kwiyongera kuko umushoramari agiye kuhashyira uruganda rutunganya iyi kawa na rwo rwizeza kuzakoresha abakozi bagera kuri 200 buri munsi.

Kugera mu mpera z’ukwezi kw’Ugushingo 2015 abagera kuri 20% nibo bataratanga ubu bwisungane mu gihe hasigaye ukwezi kumwe gusa ku gihe Akarere kari kihaye.

Bamwe mu badatanga ubwisungane mu kwivuza bafite ubushobozi ngo bahura n’ingaruka nyinshi zirimo kurembera mu rugo

Bamwe mubatuye akarere ka Ngoma bemeza ko ubukangurambaga mu baturage bwakozwe kuburyo bwose,ko abadatanga uyu musanzu akenshi babiterwa n’uburangazi bwo kutabiha umwanya w’ibanze ngo bahite bishyura.

Mukantagara Alivera wo mu murenge wa Zaza Akarere ka Ngoma,aganira n’itangazamakuru yagaye cyane abafite ubushobozi badatanga ubwisungane mu kwivuza.

ati”Kudatanga ubwisungane mu kwivuza wishoboye njye mbifata nk’ububwa.Barahari benshi inaha baba badafite mutuweri kandi bayafite ugasanga bayakoresheje ibindi arashize. Ntacyakagombye kuza mbere y’ubuzima njye nyafite nayatanga mbere ya byose.”

Ku rundi ruhande ariko uyu mubyeyi Mukantagara,avuga ko hari abantu batishoboye badafite ubushobozi bwo kuzigurira babayeho bahangayitse batinya ko bahura n’uburwayi bakabura uko bivuza.

Ubuyobozi muri aka karere buvuga ko abatishoboye badafite ubushobozi babazi kandi ko bazazihabwa vuba.

Kudatanga ubwisungane mu kwivuza bigiraingaruka zikomeye zirimo,kurembera mu rugo batinya kujya kwa muganga kukoutatanze umusanzu yishyura 100%, mugihe ufite ubwisungane mu kwivuza atanga 200 gusa akavurwa.

Muri aka karere hari umugore uherutse gupfa n’umwana yabyaraga bagwa mu rugo batinye kujya kwiyishyurira 100% kwa muganga kuko batari baratanze umusanzu mu kwivuza.

Umukozi w’Akarere ka Ngoma ushinzwe ubukangurambaga muri MUSA,Niyonsaba Theogene,munama yabaye nyuma y’umuganda usoza ukwezi kw’Ugushyingo 2015 yibukije ko hasigaye ukwezi kumwe gusa ko kuba abataratanga ubwisungane bamaze kwishyura uyu musanzu.

Yagize ati”Abo batarishyura bagire vuba.Ntihazagire uwibeshya ko hari uzayihabwa atayikwiye.Urutonde rw’abatishoboye batazifite turarufite,dufite kandi n’urutonde rw’abishoboye bataranga ubwisungane.”

Akarere ka Ngoma kugera ubu kageze kuri 80.3% by’abamaze gutanga umusanzu mu bwisungane mu kwivuza, ukwezi kumwe gusa kugira ngo igihe bihaye cyo kuba bagee 100% kugere.