RwandAir yafunguye icyicaro gishya muri Benin. Aha abayobozi batandukanye bafataga ifoto y’urwibutso

Icyo cyicaro cyafunguwe ku mugoroba wo kuri uyu wa kabiri tariki ya 01 Kanama 2017.

Gifunguwe nyuma yaho mu mpera z’umwaka wa 2016, RwandAir yari yahatangije ingendo. Ibyo byabaye nyuma y’uruzinduko Perezida wa Benin Patrice Talon yagiriye mu Rwanda.

Uhereye muri icyo gihugu aho iyo Kompanyi ifunguye icyicaro, igiye kujya ikora ingendo mu mijyi irindwi ari yo; Abidjan, Brazzaville, Douala, Libreville, Conakry, Dakar na Bamako, itururutse muri Cotonou, umurwa mukuru wa Benin.

Ubuyobozi bwa Rwandair buvuga ko mu gace igihugu cya Benin giherereyemo hakorwa ubucuruzi cyane kandi inzira yo mu kirere ikaba ari yo ikoreshwa cyane. Benin ikora ubucuruzi bw’ibiribwa, byiganjemo imyumbati n’ibigori, mu bihugu biyegereye.

Uretse ubucuruzi, abatuye imijyi y’ibyo bihugu bakunze gukora ingendo basurana,abandi batembera kuko ahenshi hari ibiyaga batembereraho.

Minisitiri Mushikiwabo na Minisitiri w’ububanyi n’amahanga wa Benin, Aurelien Agbenonchi mu gikorwa cyo gufungura icyicaro gishya cya RwandAir muri Benin

Minisitiri w’ububanyi n’amahanga wa Benin, Aurelien Agbenonchi yavuze ko nyuma y’amasezerano y’ubufatanye yasinywe hagati y’ibihugu byombi, yizeye ko imikoranire na yo izagenda neza kandi igatanga inyungu zifuzwa ku bihugu byombi.

Agira ati “Ubwo Perezida wacu yasuraga u Rwanda agasinya amasezerano y’ubufatanye, hashimangiwe umubano n’ubucuti hagati yacu, bizatuma n’ubuhahirane bugenda neza.”

Amasezerano y’imikoranire yasinywe hagati y’u Rwanda na Benin avuga ko mu mafaranga azajya yinjizwa na RwandAir mu ngendo ziva kuri icyo cyicaro gishya, u Rwanda ruzajya rutwara 49% Benin igasigarana 51%.

Indege ya RwandAir, B737-800NG ku kibuga cy’indege cya Benin

Louise Mushikiwabo, Minisitiri w’ububanyi n’amahanga w’u Rwanda, yabanje kwifuriza icyo gihugu umunsi mwiza w’Ubwigenge wahuriranye n’itangizwa ry’icyo cyicaro gishya cya RwandAir, yavuze ko bahisemo uyu munsi ufite agaciro muri icyo gihugu kugira ngo ube n’intangiriro y’igikorwa kigamije iterambere hagati y’ibihugu byombi.

Agira ati “Ni umunsi wo gushimangira amasezerano y’ubufatanye ariko n’intangiriro y’igikorwa kizatugirira akamaro ku bihugu byombi.”

Cotonou ni umujyi wa 19 muri Africa RwandAir ikoreramo ingendo. Hiyongereyeho imijyi yo hanze ya Africa, igera kuri 23.

Ibi biro byubatswe n’abaturage baterwa inkunga n’akarere.

Aba baturage bavuga ko kwishyira hamwe bagashaka uburyo bwo kwiyubakira babitewe no kuba igihe bari mu nama ku kagari cyangwa muri gahunda zinyuranye warasangaga banyagirwa igihe cy’imvura kubera inyubako yari ishaje ikava.

Kuba hari hato hanava ngo byanagiraga ingaruka kuri gahunda zitandukanye kuko igihe babaga bafite nk’inama ihuza abaturage benshi bamwe baburaga aho bicara bakigira mu tubari twegereye akagari, gahunda yabajyanye ntibayijyemo.

Anonciata Nyiramisago, umwe mu batuye ako kagari, ati “Aho batwakiriraga mbere hari hato ndetse haranavaga ku buryo igihe imvura yagwaga twajyaga kugama mu tubari turi hafi yaho. Kugira ibiro byiza rero bizadufasha cyane.”

Marie Gorette Mushimiyimana, Umunyamabanga Nshingwabikorwa w’Akagari ka Munazi, avuga ko nyuma yo gusanga aho bakoreraga hatameze neza bagiye inama n’abaturage bakishakamo ibisubizo.

Mushimiyimana avuga ko bakoresheje uburyo bw’umuganda, abafundi bakubaka naho abandi bakaba abayede (abegereza abafundi ibikoresho).

Agira ati “Ndashimira cyane abaturage b’Akagari ka Munazi ubwitange n’ubufatanye bagize, bakoze nk’abikorera kuko ni bo batangiye gusiza ikibanza barubaka kugeza huzuye”.

Uyu muyobozi asobanura ko kandi nyuma y’ubufatanye bw’abaturage hiyongereyeho n’ubufasha bw’akarere kuko kabahaye imifuka ya sima 203, inzugi, amadirishya, amabati n’imireko, ndetse babaha n’amafaranga yo guhemba abafundi bazaga kubafasha kubaka”.

Umunyamabanga Nshingwabikorwa w’Umurenge wa Save, Innocent Kimonyo, avuga ko mu tugari dutanu tugize uyu murenge, tune twamaze kwibonera inyubako zisobanutse, kamwe gasigaye na ko kakaba kagiye kuvugururwa mu bihe biri imbere.

Kimonyo ati “Akagari tuzavugurura gasigwa amarangi ndetse kanahindurirwe amabati, ni aka Shyanda kuko ko nta kindi kibazo gafite kandi akarere katwemereye ko uyu mwaka kazadufasha kugasana”.

Akagari ka Munazi gatuwe n’abaturage ibihumbi 5 na 345 bakaba ari bo bahuje imbara ku bufatanye n’akarere biyubakira ibiro bifite agaciro ka 19 n’ibihumbi 645FRW, uruhare rw’abaturage gusa rukaba rubarirwa agaciro ka miliyoni 6FRW.

Uyu mugabo wari mu kigero cy’imyaka 35, ubusanzwe yari afite uburwayi bwo mu mutwe, nk’uko abo mu muryango we babisobanura, ngo yari asanzwe agenda akirirwa ku gasozi ariko ntibwire adatashye.

Ku munsi wo ku cyumweru ariko, ngo yaragiye ntiyongera kugaru, umuryango we uhangayitse utangira kubaririza aho yaba ari.

Nadine Uwimana, Nteziryayo yari abereye se wabo, avuga ko bagerageje kubaririza no ku bitaro byakira abafite indwara zo mu mutwe biri mu mujyi wa Huye, ariko bababwira ko nta wahageze.

Ati “Twabonye ku cyumweru adatashye kandi atajyaga arara ku gasozi, no ku wa mbere tubona ntaje, mama atangira kubaririza ariko bakatubwira ko ntawe babonye.”

Nyuma mu rukerera rwo kuri uyu wa kabiri ngo ni bwo bumvise ko umurambo we abaturage bawubonye mu murima, bihutira kujya kureba, basanga ni umuntu wabo.

Uwimana avuga ko bamusanze yapfuye, nta myenda yamabaye kandi ngo byagaragara ko yakubiswe.

Ati “Baje kutubwira ko bamubonye mu murima tugenda twiruka dusanga ni we ariko yashizemo umwuka, abahamushyize bari bamwambuye imyenda iri ku ruhande, anasa nk’uwakubiswe.”

CIP André Hakizimana, Umuvugizi wa Polisi mu Ntara y’Amajyepfo, avuga ko hataramenyekana intandaro y’urupfu rwa Nteziryayo, ariko iperereza rikaba rikomeje.

Ati “Umurambo wajyanywe kwa muganga ngo hamenyekane icyamwishe, nta muntu urafatwa akekwa kubigiramo urughare ariko iperereza riri gukorwa.”

Ubuyobozi bwa Polisi mu Karere ka Gisagara, mu kiganiro n’abatuye Umurenge wa Save, bwavuze ko akenshi ahantu iyo hagaragara impfu nk’izi ari uko amarondo aba adakorwa neza.

Burashishikariza abatuye Umurenge wa Save kwitabira gukora amarondo, kuko ngo abantu babaye bayakora uko bikwiye n’ibyaha bikorwa mu ijoro cyangwa izindi mpanuka zose zishobora kubaho byakumirwa.

Ibi ni ibyagarutsweho na depite Speciose Mukandutiye komiseri w’umuryango FPR Inkotanyi ku rwego rw’igihugu, mu nteko rusange y’uyu muryango mu Karere ka Gisagara yateranye kuri uyu wa gatandatu tariki ya 20 Kanama

Nyuma yo kujya inama abanyamuryango biyemeje kunoza imikorere mu byo bashinzwe.

.

Muri iyi nteko rusange abayobozi bagira uruhare mu kudindiza gahunda z’iterambere ry’abaturage,bagiriwe inama zo guhindura imyifatire bakanoza imikorere.

Depite Mukandutiye ati “Dukwiye kwisuzuma nk’abanyamuryango ariko na none cyane cyane abayobozi tukareba ibitagenda tukabikosora kuko nititwara nabi tuzaba urugero rubi ku batureberaho”

Zimwe muri gahunda zagarutsweho mu kuba zikigenda gahoro ni nk’imikorere y’ikigega BDF, ngo iyi ikababa imwe mu zituma urubyiruko rw’aka karere rudatera imbere uko byakagomye.

Uretse bamwe mu bahagarariye urubyiruko bagaragaza ko hari imishinga itandukanye bagejeje muri iki kigega cyaraniyemeje kuyitera inkunga hakaba hashize umwaka ntacyo yakozweho, hari bamwe mu rubyiruko bavuga ko batanazi ibigendanye n’iki kigega.

Ngendahayo Jean Claude umwe mu rubyiruko rw’aka karere kuri ubu udafite umurimo ati “Numva bavuga BDF ngo ifasha urubyiruko ariko sinzi n’icyo ikora n’uburyo ifasha abantu, bajye batwegera rwose badusobanurire”.

Umuyobozi w’Akarere ka Gisagara aravuga ko kujya inama bituma bakosora ahagenze nabi

Rutaburingoga Jerome, umuyobozi w’Akarere ka Gisagara akanaba perezida w’umuryango FPR Inkotanyi muri aka karere, nawe avuga ko gufata umwanya bakaganira kubitagenda, ari uburyo bwiza bwo kubishakira umuti.

Ati “Icyiza cy’umuryango urabanza ukatwigisha, ukadukosora ukanatuburira, uyu rero ni n’umwanya mwiza twafashe wo kwisubiraho kandi ibyagenze nabi tugiye kubikosora”

Bamwe mu batuye aka karere ka Gisagara usanga bagaragaza ko hari gahunda zitandukanye zigamije ku bateza imbere batarosobanukirwa, ndetse bakavuga ko ubukangurambaga muri gahunda zirebana n’imibereho myiza ndetse n’iterambere bukwiye guhoraho.

Aka Kagari ka Dahwe ni kamwe mu tugize uyu murenge wa Ndora wubatsemo ibiro by’Akarere ka Gisagara ndetse ukaba umwe mu mirenge izagurirwamo umujyi w’aka karere.

Barasaba amazi kuko bakivoma mu mibande kure.

Abahatuye barinubira kutagira amazi hafi bavuga ko bavunika cyane bajya mu mibande kandi nyamara ngo bari bamaze gushyikira iterambere kuko amashanyarazi yo bayashyikiriye.

Nikuze Angelique umwe muri aba baturage ati « Kujya kuvoma ni imvune ikabije ino kuko tujya mu mibande kandi ugasanga hari abantu benhsi kuhava bigatwara amasaha».

Nk’uko imibare ibigaragaza muri aka karere ubu harabarirwa imiyoboro y’amazi igera kuri 24, ifite uburebure bwa km 349.55 yagiye yubakwa mu bihe binyuranye.

Mu mwaka wa 2010 abaturage bagera kuri 65% ni bo bari bamaze kwegerezwa amazi meza naho mu mwaka wa 2015 bakaba bari bageze kuri 76.4%.

Icyo basaba ubuyobozi ni ukubafasha kubona amazi hafi yabo kuko ngo uku gukura amazi kure bidindiza imirimo yabo nk’ubuhinzi kuko bakererwa kugera mu mirima babanje kuvoma, kandi bashaka no kuvomesha bikabahenda kuko bayashyikira ijerekani ibatwaye amafaranga 200.

Ahishakiye Valens ati “Dukeneye amazi rwose, aho tuvoma iyo uri umunyeshuri ubwo urasiba kuko ni kure kandi haza amazi make hari abantu igitero, andi badaha ni mabi aba arimo n’udukoko”

Ubuyobozi bw’aka karere ariko bugaragaza ko butari buzi ko aka kagari katagira amazi.

Rutaburingoga Jerôme, umuyobozi w’aka karere ka Gisagara ariko, arizeza abaturage ko hagiye kohererezwa impuguke mu by’amazi mu rwego rwo gushaka uko yahagezwa vuba.

Ati “Aho nari nzi ni muri Mukindo, ariko aha Dahwe na ho tugiye guhita twoherezayo abagenzura banapime ibyo hagomba maze bishyirwe mu ngengo y’imari”

Ubuyobozi bw’Akarere ka Gisagara buvuga ko n’ubwo ariko amazi meza ataragezwa hose, bukomeje kongera imbaraga kugirango abaturage bayashyikire.

Jerome Rutaburingoga umuyobozi w’akarere arabasaba kwicungira umutekano.

Ubujura bwiganjemo kwiba amatungo, imyaka mu mirima no gutobora amazu y’abaturage, bumaze igihe kirenga imyaka ibiri buvugwa muri aka gace.

Ngo byabaye nk’akamenyero ko umuntu ataha yiyumvamo ko ntacyo asanga mu rugo iwe, ahubwo yasanga atibwe kikaba ari cyo gitangaza kuri we, nk’uko uwitwa Mbarushimana Pascal uhatuye abivuga.

Agira ati “Ugira ngo se hari icyo basiga inyuma! Amatungo baratwara, imyaka, waba unari mu mirimo hanze bagaca inyuma inzu bagatobora ku manywa.”

Uwotwa Ngamije we avuga ko ikibahangayikishije kurushaho ari uko abafashwe bakekwaho ibi byaha by’ubujura nyuma y’igihe gito bahita barekurwa. Bagasanga ko ariyo mpamvu ubu bujura budashira.

Ati “None se umuntu baramufatana ingurube yibye agafungwa mu minsi mike akagaruka, ni gute se atakongera? Bagiye babimazamo nk’amezi atandatu cyangwa umwaka twahumeka.”

Umuyobozi w’akarere Jerome Rutaburingoga, avuga ko hari ubwo aba bantu bafatwa bakajyanwa mu butabera ariko hakaza kubura ibimenyetso bibahamya ibi byaha bakarekurwa. Ariko akongeraho ko abaturage ari bo kireba cyane bakaza amarondo.

Ati “Twizera ko ubu bujura buzashira kuko noneho ubu mu Rwanza hashyizwe polisi mu myaka yashize itarahabaga, ariko kandi abaturage bakwiye kongera imbaraga mu kwicungira umutekano umuntu akaba ijisho ry’undi kuko bibwa n’abo babana”

Akagari ka Rwanza gahuza aka karere n’aka Huye, tugahuzwa n’iteme riri ahitwa Cyezuburo, hakaba hamwe mu hakunze kubera ubujura bwambura abantu no kumanywa, ari naho hakekwa ko bibwa n’inzererezi zituruka mu Mujyi wa Huye.

Muri gahunda zo gukemura ibibazo muri Gisagara abantu bashaje usanga kenshi basaba kujya bahabwa inkunga y’ingoboka, bakabihera ku kuba bakuze kandi batakibashije.

Bimwe mu bibazo bikunze kubazwa n’abasaza ni ibirebana n’uko bahabwa inkunga y’ingoboka.

Joseph Ndikumana w’imyaka 74 wo mu Murenge wa Kansi ati “Sinkibashije rwose kandi n’umukecuru wanjye arashaje, Mituweri kuyibona ntibitworohera none se abasaza ntitugomba gufashwa?”

Mukangarambe w’imyaka 81 avuga ko aya mafaranga ayahabwa kandi azi ko ari inkunga Perezida wa Repuburika yageneye abasheshe akanguhe bose.

Nk’uko Macumi Jean De Dieu umuyobozi w’agateganyo ushinzwe ibikorwa bya VUP ku rwego rw’igihugu, ari naho iyi nkunga inyuzwa abisobanura, ngo ntabwo aya mafaranga ari umushahara ugenewe umuntu wese ushaje.

Asobanura kandi ko amafaranga y’ingoboka adahabwa umuntu ku giti cye ahubwo ahabwa umuryango nawo uri mu cyiciro cya mbere cy’ubudehe, kandi ukaba nta muntu uwurimo ufite hagati y’imyaka 18 na 64 ushoboye gukora.

Icyo asaba abaturage ni ukumva amabwiriza agenga iyi gahunda ntibayifate uko itari.

Ati “Abantu bakwiye kumva ko uyu atari umushahara ugenewe umuntu wese ushaje, niba mu rugo hari umuntu ufite hagati y’imyaka 18 na 64 ushoboye gukora abo ntibayihabwa”

Jerome Rutaburingoga umuyobozi w’Akarere ka Gisagara we icyo asaba aba bageze mu zabukuru ni ukureka umuco wo gusaba, ntibumve ko igihe cyose bagomba kubona iby’ubuntu, ahubwo niba umuntu agifite imbaraga zatuma akora n’umurimo muto, agasaba kuwugeraho

Ati “Gusaba si umuco mwiza dukwiye gushyira imbere, ahubwo niba umuntu hari icyo abashije gukora nicyo yagakwiye gusabira ubufasha”

Kugera ubu ngo nta mibare ifatika igaragaza abahabwa inkunga y’ingoboka mu gihugu hose iraboneka kuko urutonde rukinozwa, gusa mu karere ka Gisagara ingo zahabwaga iyi nkunga mu mwaka wa 2015-2016 zari 2518.

Amafaranga bahabwa ari hagati y’ibihumbi 7500 na 21000 y’u Rwanda atangwa hakurikijwe umubare w’abagize umuryango.

Inkambi ya Mugombwa icumbikiye Abanyekongo, ngo amazi ayivamo yangiriza abaturage.

Iyi nkambi ituyemo Abanyekongo yubatswe nyuma yo kwimura abari baturiye umusozi yubatsweho, babaruriwe imitungo barimurwa. Ariko hari bamwe mu bagituriye iyi nkambi bavuga ko nabo bari barabaruriwe imitungo biteganyijwe ko bazimurwa, ntibimurwa.

Kuri ubu bavuga ko amazi ayiturukamo amanukana amabuye n’imisenyi by’imusozi bikamanukira mu myaka ihinze mu kabande, nk’uko bisobanurwa n’uwitwa Nicodem Sekamana.

Agira ati “Twarabaruriwe ntitwimurwa, amazi ava mu nkambi amanukana n’amabuye n’imicanga bikarengera ku myaka, ntacyo tugisarura, ntakikihava twibereyeho dutyo.”

Imwe mu mikoki yaciwe n’amazi aturuka muri iyi nkambi, ihangayikishije abaturage.

Mukamana Therese avuga ko we na bagenzi be bifuza ko hari icyakorwa, kuko bamaze imyaka itatu bategereje kwishyurwa.

Ati “Sinkibasha no gutanga ubwisungane mu kwivuza kubera ubukene byanteje, umuntu ashaka n’aho akura igitoki ngo atekere abana ntahabone, nibaduhe ingurane twimke tujye kwishakira ahandi duhinga.”

Ubuyobozi bw’Umurenge wa Mugombwa buvuga ko kuba aba bantu barabaruriwe imitungo ntibimurwe ari uko bubaka basanze inkambi itazagera aho batuye. Naho ikibazo cy’amazi abasenyera cyo ngo cyamaze kugezwa muri MIDIMAR bategereje icyo izakora.

Frederic Ntawukuriryayo ushinzwe itangazamakuru muri Minisiteri ishinzwe kurwanya Ibiza no gucyura impunzi (MIDIMAR), avuga ko ibi bibazo biterwa n’iyi nkambi, kandi bari gushakisha uburyo bwo kubikemura nubwo atagaragaza igihe n’uburyo bizakemurwa.

Ati “Ibibazo by’iyangirika ry’ibidukikije ahari inkambi ntibibura kubera ubwinshi bw’abantu, Mugombwa naho turi gushaka uko byakemuka vuba tugenda dukora hamwe hamwe kuko biba binakeneye amafaranga menshi.”

Avuga ko ikibazo nk’iki kigaragara ahantu henshi mu Rwanda hubatse inkambi hose, ariko akavuga ko bagenda bahera ku hari ibibazo bikomeye.

Uretse kandi aya mazi amanukana imisenyi n’amabuye akangiza imyaka y’abaturage, bavuga ko n’imikoki isigara yaciwe n’ayamazi ishobora kujya iteza impanuka igihe yakomeza kwiyongera.

Mu minsi mike ngo barasarura n inyanya.

Muri Werurwe 2016, nibwo abavandimwe batatu Nkundabagenzi Emmanuel, Ndabakuranye Patrick na Jean Paul Ntibaziyandemye batekereje guhinga imboga i musozi, banatekereza uburyo bwo kujya bazihinga umwaka wose badahagaze bifashishije imashini yuhira.

Mu mboga bahinga harimo Inyanya, ibitunguru, intoryi, poivron ndetse n’imboga rwatsi.

Ubuhinzi bwabo babukorera ku buso bugera kuri hectare 2.5, ziri hejuru y’akagezi kitwa mbuga ari nako bakuramo amazi yuhira.

Mu mezi ane yonyine bamaze batangiye ubu buhinzi, ngo batangiye kugurisha ku musaruro w’imboga rwatsi n’ibitunguru bahinga bakaba bamaze kubisarura inshuro ebyiri.

batangiye gusarura ibitunguru no kugurisha nyuma y’amezi ane bahinga.

Ibi ngo byatangiye kubaha icyizere cyo gutera imbere, nk’uko Nkundabagenzi abivuga.

Agita ati “Mu kazi k’ubumotari ushobora kumara umwaka utanabitse ibihumbi 500Frw, ariko ubu buhinzi dukurikije isoko n’umusaruro tuzajya tubona dusanga kubona miliyoni mu mezi atandatu bishoboka, dufite icyizere rero cyo kuzamuka.”

Aba hahinzi bavuga ko impamvu yo gushyira imbaraga zabo mu buhinzi bw’imboga ari uko bamaze kwibonera ko zitanga umusaruro ufatika iyo zuhiwe.

Aba bahinzi kandi babereye n’urugero abandi, kuko hafi y’aho bahinga hari abagore bishyize hamwe bahinga imboga ndetse banashaka imashini yuhira.

Mukarukundo Annonciata ati “Twabigiyeho tubasha guhinga igihe cyose tudahagaze kandi ubundi mu mpeshyi twarabaga twicaye ubusa.”

Uwimana Jean Bosco umunyamabanga nshingwabikorwa w’Umurenge wa Nyanza, avuga kugeza ubu mu murenge wa Nyanza ubuso bwuhirwa ari hegitari zitagera ku icumi.

Ashishikariza abahinzi kubyaza umusaruro amahirwe bahabwa yo koroherezwa kubona imashini zuhira binyuze muri nkunganire.

Ati “Abantu bashobora kugurizwa kuburyo bworoshye bakabasha kwigurira imashini zuhira, tubahamagarira iyi gahunda kuko ibafasha guhinga umwaka wose badahagaze.”

Aba bahinzi bo mu murenge wa Nyanza bizeye kuzazamurwa n’ubuhinzi bakora, ibi bigatuma bagira umurava wo kwagura aho bakorera ubu bakaba bateganya kongera ubutaka bahinga bakazageza kuri hegitari byibuze 10.

Imihanda yagiye inyuzwa mu mirima no mu myaka y’abaturage.

Hagamijwe imiturire myiza, mu duce dutandukaye tw’Akarere ka Gisagara hagiye hatunganywa ahantu hatandukanye hagacibwa imihanda bagatuza abaturage mu midugudu binyuze muri gahunda zikura abaturage mu bukene nka VUP.

Mu Kagari ka Rwanza mu Murenge wa Save ni hamwe mu ho VUP yaciye imihanda mu midugudu.

Uku guca imihanda ngo byagiye byangiza bimwe mu bikorwa by’abaturage kuko hari aho yanyuze mu mirima, ahandi imyaka ikarandurwa. Ibi byangijwe byarabaruwe kugira ngo byishyurwe, ariko banyirabyo ngo barategereje none imyaka ibaye ine batarishyurwa.

Bizimana, umwe muri bo, ati “Twagerageje kutishyuza ibintu byoroheje nk’ibiti by’imbuto twishyuza ibintu bifatika gusa, ariko twabyirutseho none imyaka ibaye 4 ntacyo turageraho.”

Bimwe mu byangijwe nk’uko aba baturage babivuga ngo harimo imyaka nk’ikawa n’ibishyimbo, hari kandi ngo n’abo imihanda yaciriye mu bibanza no mu mashyamba ubutaka bwabo bukahagendera.

Mugenzi we ati “Byaraduhombeje kuko ubutaka uko bungana kose ntibubuze ikibuvamo kandi no guhora dusiragira byaradukenesheje, turifuza kwishyurwa rwose.”

Ubuyobozi bw’Umurenge wa Save bwo buvuga ko igihe bagezaga urutonde rw’abagomba kwishyurwa ku karere, basanze harimo amakosa, hari ibiburamo, basabwa kurusubiramo, ubu rukba rwarakozwe rwoherezwa ku karere muri Nyakanga 2016.

Kimonyo Innocent, Umunyamabanga Nshingwabikorwa w’Umurenge wa Save arizeza aba baturage ko bagiye kubikurikiranira hafi ubwo byakosowe, amafaranga yabo bakayahabwa vuba.

Ati “Urutonde rukosoye neza twarushyikirije akarere kandi turabikurikiranira hafi ku buryo mu minsi mike itarenze icyumweru baba babonye amafaranga yabo.”

Muri ako gace ka Save hakaswe imihanda, biteganyijwe ko hazagurirwa Umujyi w’Akarere ka Gisagara, ariko abaturage bangirijwe bifuza ko babanza kwishyurwa ibikorwa byabo.

Amafaranga aba baturage bagomba guhabwa agiye atandukanye, buri muntu hakurikijwe ibyangijwe, cyakora ntitwashoboye kubona ingano yayo mu buryo bufatika.

Bamwe mu basoje amasomo yo gusoma, kubara no kwandika mu Murenge wa Ndora mu kwezi kwa Nyakanga 2016.

Kugeza mu mpera z’umwaka w’ingengo y’imari ushize (2015-2016), Akarere ka Gisagara kabaruraga abaturage bakuru batazi gusoma no kwandika bagera ku bihumbi 50, kiyemeza kubigisha binyuze mu masomero.

Ku ikubitiro, aka karere kiyemeje ko umwaka w’ingengo y’imari utangiye, bazigisha abaturage ibihumbi 15, iyo gahunda ikazakomeza no mu yindi myaka.

Umuyobozi w’Akarere ka Gisagara, Jerome Rutaburingoga, avuga ko gushyira imbere iyi gahunda biri mu rwego rwo kurwanya ubujiji mu baturage, nk’imwe mu nzitizi zikomeye z’iterambere kandi akemeza ko abamaze guhabwa ubu bumenyi bahinduye imyumvire n’imibereho yabo igatera imbere.

Rutaburingoga ashima abaturage bagira umwete wo kujya kwiga ari bakuru, akavuga ko batanga icyizere ko n’iterambere barigeraho nta kabuza.

Ati “Kudatera imbere n’ubujiji birajyana. Ni yo mpamvu dushishikariza abantu kwiga gusoma no kwandika kuko umuntu ubasha kwiga ari mukuru biba bigaragaza ko n’ibindi abishoboye, ko no kwizamura atabinanirwa. Gahunda rero ni ukujijura benshi bashoboka.”

Bamwe mu baturage b’aka karere bagiye biga gusoma, kubara no kwandika ari bakuru, bavuga ko ubujiji bwari bwarabadindije.

Nteziryayo Innocent umwe mu basoje inyigisho bahabwaga mu Murenge wa Ndora, avuga ko nta muntu wagakwiye guhera mu bujiji bwo kutamenya gusoma no kwandika kuko hari amahirwe menshi bibuza.

Kuri we ngo byagiye bimugiraho ingaruka zitandukanye, kuko yakoze ubucuruzi akajya ahomba bitewe no kutamenya kubara amafaranga.

Agira ati “Mu myaka 3 ishize, nakoraga ubucuruzi ariko narahombye kubera ko ntari nzi kubara. Hari uwazaga kugura ikintu nkamusubiza menshi. Byatumye njya kwiga, ubu nzi gusoma no kwandika, sinakongera guhura n’icyo kibazo.”

Nyirandimubanzi Victoire w’imyaka 50, na we avuga ko kumenya gusoma no kwandika byamujijuye agahindura imitekerereze, akegera abandi mu ishyirahamwe, none akaba arimo kugenda yiteza imbere mu buhinzi bw’imboga.

Ati “Mbere natinyaga aho abandi bari, muri koperative nta washoboraga kuntora ngo mpagararire abandi kuko ntari nzi gusoma, ariko ubu ndi umujyanama.”

Mu Karere ka Gisagara, habarurwa amasomero y’abakuze 53, ariko ngo kugira ngo iyi gahunda igerweho, akarere karateganya kongera ubukangurambaga mu bafatanyabikorwa bako barimo amadini kugira ngo bongere umubare w’abaturage bigisha.

Gahunda rusange yo kwigisha abantu bakuru bo mu Karere ka Gisagara gusoma, kwandika no kubara, yatangiye mu mwaka wa 2012.

Mu mwaka w’ingengo y’imari urangiye, aka karere kigishije abaturage 3570 batari bazi gusoma no kwandika.

Abatuye muri uyu mudugudu barasaba kwegerezwa amazi meza kuko bakiyasanga mu manegeka bimuwemo.

Akarere ka Gisagara kavuga ko kashyize imbaraga mu gutuza abantu neza kuko ngo abarenga 80% ubu batujwe ku midugudu.

Gusa, bamwe mu baturage bagiye bavanwa mu bikombe no muri “ntuye nabi” bavuga ko hari aho batujwe ku midugudu bakaba nta bikorwa remezo, birimo n’amazi meza, Bihari.

Abo ahanini ni abo mu tugari twa Bwiza n’Akaboti bavuga ko bavanywe muri “ntuye nabi’ bajyanwa ku midugudu bizeye kwegerezwa ibikorwa remezo.

Ngendahayo Elias, umwe muri bo, ati “Aho twavanywe hari haragejejwe amazi ariko baza kuvuga ko ari muri ‘ntuye nabi’ turimurwa turayasiga none aho dutuye ntayo.”

Uretse n’aba bari bafite amazi meza, hari nabavanywe mu bikombe bavuga ko nubwo bari batuye nabi, byaboroheraga gushyikira amazi mu mibande.

Uwamwezi Francine ati “Aho mu gikombe se ko twabaga twegereye kano, none ubu turongera tugasubira iyo twavuye tujya kuvoma kandi habamo ingendo n’imvune. Nibatwegereze nyine ibikorwa remezo twaje dusanga.”

Ubuyobozi bw’Akarere ka Gisagara buvuga ko koko hari ahantu hahoze ibikorwa remezo byarahashyizwe mbere ariko nyuma bagasanga ari muri “ntuye nabi” bikaba ngombwa ko abantu bimurwa bakajya ku midugudu babisize.

Jerome Rutaburingoga, Umuyobozi w’Akarere ka Gisagara, ariko avuga ko ahari ibyo bibazo bahazi kandi atari henshi, bakaba barimo babibegereza nk’uko ari yo yari gahunda kuva mbere.

Ati “Ahari ibi bibazo hose turahazi ariko turi kugerageza kubyihutisha, twagiye tuhashyira mu ngengo y’imari y’uyu mwaka bizakemuka vuba.”

Ubuyobozi bw’Akarere ka Gisagara bwemeza ko ibikorwa remezo muri aka karere bikiri bike kuko hari aho bishyirwa ari ugutangirira ku busa, ariko bukemeza ko biri mu byo bwashyize imbere, cyane cyane mu mihigo y’uyu mwaka wa 2016-2017.

Rutaburingoga Jerome, Umuyobozi w’Akarere ka Gisagara, asezeranya kurangiza imanza za Gacaca mu mwaka umwe.

Aba baturage bagomba kwishyurwa imitungo bavuga ko kugeza ubu bamwe mu bagomba kubishyura bitwaza ubukene ntibabishyure nyamara ngo hari n’ubwo biba ari ukwanga kwishyura gusa kandi bafite ubushobozi.

Rukeratabaro Marc, wo mu Murenge wa Kansi, ati “Imyaka 22 ni myinshi pe kandi hari abo uba ubona banga kwishyura kubera agasuzuguro gusa, ubuyobozi nibudufashe birakabije.”

Umubyeyi Chantal, umwe muri aba bagomba kwishyurwa, na we avuga ko hari abo abona ari ukudashyira umwete mu kumwishyura, bagahora ahubwo bahindagura amasezerano bagiranye, agasaba ko ubuyobozi bwabafatira ibihano.

Ubuyobozi bw’Akarere ka Gisagara, kuri iki kibazo, buvuga ko mu manza za Gacaca zinagendana n’ibirebana n’imitungo, mu zigera mu bihumbi 30 bari bafite hakemuwe izirenga ibihumbi 27.

Izisigaye zibarirwa mu bihumbi bitatu ngo ni zo zirimo ibi bibazo by’abatarishyurwa, ndetse ubuyobozi bukanavuga ko uko zigana ku musozo ariko hagenda hagaragaramo izikomeye.

Aha ngo ni nk’izo usanga abagomba kwishyura ari abakene badafite ubushobozi bikabafata igihe, bigatuma bakora amasezerano yo kugenda bishyura buke buke bigatinda. Ibi ngo bitabujijeko ariko hari n’ababishyiramo imbaraga nke nkana.

Jerome Rutaburingoga, Umuyobozi w’Akarere ka Gisagara, araburira aba baturage batarishyura, abasaba kwishyura kare batarinze kugurishirizwa imitungo kuko iyo bigurishirije aribwo bitabahombya.

Avuga kandi ko izi manza bari gikora uko bashoboye ngo zirangirane n’umwaka w’imihigo wa 2016-2017.

Ati “Imanza zisigaye ubona ko ari izigenda zikomeye, umuntu usanga akennye adafite uko yishyura byihuse, ariko hari n’ababikorankana, turabagira inama rero yo kwishyura bataraterezwa cyamunara, kandi twarabihagurukiye turashaka ko bitafata undi mwaka.”

Nk’uko imibare itangwa n’Ubuyobozi bw’Akarere ka Gisagara ibigaragaza, mu manza za Gacaca ibihumbi 31 na 557 bari bafite, izisigaye gukemurwa ni ibihumbi 2 na 986, akarere kakavuga ko bagiye gushyiramo imbaraga na zo zikarangira mu mwaka umwe.

Nyiramana Francine umwe mu bafite iki kibazo ati “Imyumbati yarwaye udukoko twitwa isazi duhora tudumaho ku buryo uwureba ukagira ngo ni muzima wakura ugasanga waraboze, ntacyo twasaruye rwose twarahombye uyu mwaka”.

Jerome Rutaburingoga umuyobozi w’Akarere ka Gisagara

Ngendahayo Vincent nawe utuye muri uyu murenge we avuga ko usibye kubateza igihombo byanabateje inzara kuko nayo iri mu bibatunga cyane muri uyu murenge

Ubuyobozi bwa RAB ikigo cy’igihugu gishinzwe ubuhinzi, muri zone y’amajyefo buvuga ko atari ikibazo cy’imbuto kuko ahandi yatanzwe nta kibazo yagize.

Ni nabyo kandi bishimangirwa na Kanyamasovu Samuel ushinzwe ubuhinzi mu murenge wa Muganza, uvuga ko yasuye aba baturage ariko hakagaragara ko ikibazo cyabayeho ari icy’udukoko twateye iyi myumbati, igisubizo kikaba ari ugutera umiti basanzwe bakoresha ubundi bakajya bakurikiranira hafi ubuhinzi bakora.

Ubusanzwe muri uyu murenge hahingwa ibishyimbo, imyumbati, ibigori ndetse hakaba n’ibishanga bihingwamo umuceri.

N’ubwo aba baturage bavuga ko uku kwangirika kw’imyumbati yabo byaba byarabateye inzara, ubuyobozi bw’aka karere buvuga ko ataribyo kuko atariyoyonyine bahinga, kuko ngo nta n’umuturage uyihinga yonyine nk’umwuga.

Umuyobozi w’Akarere ka Gisagara Jerome Rutaburingoga yemeza ko ubuhinzi bukorerwa muri Gisagara bukubiyemo ibihingwa bitandukanye bityo kuba umusaruro wa kimwe muri byo wamanuka bitateza inzara abaturage.

Ati “Ni byo koko imyumbati yararwaye muri uyu mwaka ariko ntibivuga ko abaturage bashonje kuko muri Gisagara duhinga ibitoki, ibishyimbo, dufite ibishanga byinshi birimo umuceri nta nzara ihari”

Kugira ngo abaturage bo mu karere ka Gisagara bateze imbere ubuhinzi bwabo nabo biteze imbere, ubuyobozi bw’akarere burabasaba gukurikirana ubuhinzi bwabo umunsi ku munsi, ahagaragaye ikibazo bakabigaragariza abashinzwe ubuhinzi hakiri kare.

Guverineri Munyantwali asaba abayobozi kunoza imihigo.

Bubitangaza mu gihe bamwe mu baturage bo muri aka karere bagaragaza ko bakiri hasi mu bikorwa remezo, bigatuma akarere gakomeza kugirwa n’igice kinini cy’icyaro.

Abaturage mu duce tutaragezwamo amazi meza n’amashanyarazi usanga bavuga ko babangamiwe.

Abacururiza mu masoko atarimo umuriro w’amashanyarazi nabo bavuga ko bibateza igihombo, nk’uko Ignace Kamana umwe mu rubyiruko rwo mu Murenge wa Mukindo hataragezwa amashanyarazi abivuga.

Agira ati “Natwe dushyikiriye amashanyarazi twahanga imirimo, nonese ko n’uwize imyuga nko kubaza aza akicara?”

Tariki ya 28 na 29 Nyakanga 2016, abayobozi n’abakozi b’akarere ka Gisagara bagize umwiherero ugamije gusuzimira hamwe ahagomba gushyirwa ingufu mmu mihigo y’akarere.

Rutaburingoga Jerome, umuyobozi w’aka karere, avuga ko guhura n’abayobozi b’inzego z’ibanze bigiye kubafasha kwitegura neza imihigo y’umwaka wa 2016-2017, kugira ngo ibyo abaturage bavuga ko bitagezweho babashe kubinoza neza.

Ati “Ni umwanya twafashe ngo twisuzume aho twavuye n’aho tugeze, aho twagize imbaraga nke naho tugashakisha ibisubizo kandi hari byinshi bizakorwa twizeye gushyiramo imbaraga bikgirira akamaro abaturage.”

Guverineri w’Intara y’Amajyepfo Munyentwari Alphonse , asaba abayobozi kujya bashyira mu bikorwa ibyo biyemeje mu mihigo kuko bigirira akamaro abaturage.

Ati “Icyo tubasaba ni ugutegura ibikorwa byabo ndetse bakanabisuzuma neza, ubundi bakibuka buri gihe gushyira umuturage imbere.”

Uku kutagira ibikorwa remezo bihagije mu Karere ka Gisagara, abaturage bakunze kuvuga ko biri mu bidindiza iterambere ryabo.

Mu byo bateganya gukora muri uyu mwaka, harimo kubaka amwe mu masoko y’aka karere, kugeza amazi meza n’amashanyarazi ku baturage no gukomeza kubakangurira kwitabira gahunda nka mituweli n’izindi zigamije iterambere ryabo.

Mu rwego rwo kugirango iyi gahunda ya leta igamije gukura Abanyarwanda mu bukene idahagaragara mu Murenge wa Gishubi korora muri buri mudugudu babishyize mu mishinga yabo, amafaranga ibihumbi 600 000 bahabwa nk’inkunga ya leta bayagenera ubworozi.

Gishubi girinka ngo irabateza imbere

Jean Baptiste Kayinamura ushinzwe irangamimerere muri uyu murenge avuga ko basanze uyu mushinga ariwo waza imbere mu gufasha abaturage kwivana mu bukene dore ko uyu murenge mu myaka ya mbere y’uwa 2005 wazaga mu yambere ikennye mu gihugu.

Ati “Kuko hano hakorwa cyane cyane ubuhinzi twasanze korora byazamura abaturage kurushaho kuko byanatuma babona ifumbire maze bagahinga bakeza bakanorora”

Kayinamura avuga ko amafaranga bahabwa bayagura inka bakazoroza abaturage hanyuma buri wese uyihawe akamenya ko nibyara azoroza undi muturage ariko agatanga iyabyaye kuko ari yo iba ishobora kuzongera kubyara vuba.

Mu zindi ngamba zafashwe harimo gushishikariza kenshi abaturage gahunda za leta zirimo n’iyi ya Girinka, berekwa akamaro ko korora cyane cyane ku buhinzi bwabo ndetse no kubona amata mu rugo.

Mu gushimangira iyi gahunda, mu gikorwa cy’umuganda usoza ukwezi kwa Nyakanga, bamwe mu batuye uyu murenge wa Gishubi bituranye inka imbere ya Minisitiri w’ubucuruzi n’inganda François Kanimba.

Misago Donati ubwo yituraga inka Niringiyimana Jean Baptiste yavuze ko iyi gahunda yamuvanye mu bukene bityo nawe akaba ashyigikiye ko na mugenzi we yazamuka. Niringiyimana nawe ngo yiteze kuzabona inyungu muri iyi nka yahawe.

Minisitiri François Kanimba arashishikariza abaturage ba Gisagara guha koko agaciro gahunda za Leta kuko zose icyo zigamije ari ukubateza imbere.

Ati “Gahunda za Leta zigamije kubazimura, muzitabire kandi mushyire imbaraga mu gutanga mituweri kuko umuntu akora ari muzima”

Umurennge wa Gishubi umaze gutanga inka zigera kuri 662 mu mwaka w’imihigo 2016-2017 bakaba bazatanga izindi 104.

Abahinga umuceri bibumbiye muri KOAIRWA baratabaza kubera kurengwa n’uruhuri rw’ibibazo.

Mu bibazo bagaragaza, harimo kuba koperative yabo yarashinzwe muri 2001, ikaba ubu nta mutungo ufatika igaragariza abanyamuryango kandi batanga imisanzu.

Ikindi ngo babona guhinga umuceri nta nyungu babikuramo nk’abahinzi. Jacqueline Uwamariya ati “Inyungu zifite abo mu biro. Umuturage ahingana inzara, umuceri ahinze ntawurye, akambara ubusa: uzana ibiro 100 ngo bagutonorere bakaguha 60 ngo ni byo byavuyemo.”

Abivuga mu gine mugenzi we avuga ko “ibiro ijana by’umuceri udatonoye bivamo 74 iyo wahombye.”

Baninubira ko ikiro cy’umuceri udatonoye bakibagurira ku mafaranga 230, ariko bo imbuto bakayibagurisha 620.

Ngo nta n’inama rusange ihuza abanyamuryango bose bagira ngo bagaragarizemo ibyifuzo byabo, kuko iyitwa rusange igirwa n’ababahagarariye.

Uwitwa Emmanuel Sebaganwa ati “Inama ihuza abayobozi yivugira ku kuntu bakandamiza wa muhinzi wo hasi. Ntabwo yiga kukimuzamura.”

Komite nyobozi iriho imaze umwaka. Yagiyeho abari bayigize bafunze, bazira kunyereza umutungo. Ariko

Abanyamuryango, ariko ntibumva impamvu iyo komite yafunzwe, umucungamutungo (manager) bahawe na RSSP agasigara kandi ari we wakurikiranaga imikorere ya koperative.

Umwe mu bibaza aho koperative yabo igana ati “Komite nshya ntacyo yahinduye kuko yaje isanga abakozi bahoraho, na yo ikorera mu kwaha kwabo.”

Ku bijyanye no kuba abanyamuryango bavuga ko ntacyo bakura mu buhinzi bw’umuceri, Perezida w’iyi koperative, Joseph Munyaneza, agira ati “Hari abatabasha kubyaza umusaruro imirima yabo uko bikwiye, bigatuma bahomba.”

Naho ku kuba batekereza ko bibwa igihe batonoza umuceri, Peter Uwamahoro, uyobora Uruganda “Gafunzo Rice Mill”, avuga ko utubuka cyangwa ugatuba bitewe n’ubwoko, aho wahinzwe n’uko witaweho mu murima na mbere yo gutonorwa.

Ati “Ugereranyije [moyenne] ku biro ijana bya Kigori bidatonoye havamo ibiro 66.”

Ku cyifuzo cyo gufashwa gukemura ibi bibazo, Umuyobozi w’Akarere ka Huye, Eugène Kayiranga Muzuka, avuga ko hamwe n’Ikigo cy’Igihugu gishinzwe Amakoperative, RCA na RSSP bazagenderera aba bahinzi bakabagira inama.

Abacuririza ahadasakaye baratabaza.

Muri iki gice hagaragara abacuruza imyenda n’ibiribwa, ariko abavuga ko bafite ikibazo cyane cyane ni abacuruza imboga n’imbuto.

Mukamana Angelique, umwe muri aba bacuruzi, avuga ko na bo ubwabo izuba ribica ugasanga basize hunze ibicuruzwa bashakisha aho baryugama.

Ati « Yooo turahomba rwose ! Mperutse guhomba inyanya igice cy’ibase kubera kunamba, kandi ubwo nk’inoti ya 2000FRW ikaba igendeyemo. Natwe riratwica tukabita tukajya gushaka aho turyugama kandi ntiwakwirukankana ibitebo.»

Uretse kuba ibi bicuruzwa byangirika ku bw’izuba, aba bacuruzi bavuga ko gucururiza hasi bituma ibicuruzwa byabo bijyamo umwanda.

Ngendahayo Callixte ati «Erega natwe ntitwanze gukorera aheza, icyo dukeneye ni ukubakirwa kuko ubona ko iri soko ritajyanye n’igihe.»

Isoko rya Musha si ryo rifite iki kibazo gusa mu Karere ka Gisagara kuko hari n’andi nk’irya Rwanza mu Murenge wa Save ndetse n’iryo mu Murenge wa Muganza.

Ubuyobozi bw’akarere buvuga ko mu mpera z’uyu mwaka wa 2016 aribwo hazamenyekana igihe aya masoko yazubakirwa kuko ngo bakiri mu biganiro n’abafatanyabikorwa ndetse n’abikorera.

Jerome Rutaburingoga, Umuyobozi w’Akarere ka Gisagara, arasaba abacururiza muri aya masoko uruhare rwabo kuko ari n’uburyo bwiza bwo gushora imari kuri bo.

Ati «Icyo dusaba abacuruzi ni uko bafata iya mbere mu kugira ibi ibikorwa ibyabo kuko baramutse baniyubakiye baba bakoze umushinga mwiza udasaza bazanaraga abana babo kandi bikabaha umutekano mu kazi kabo.»

Iri soko rya Musha rirema kabiri mu cyumweru : ku wa kabiri no ku wa gatanu, rikitabirwa n’abantu benshi kuko haza n’abaturutse mu mirenge yegereye Musha nka Gikonko na Gishubi.

Ikigo nderabuzima cya kirarambogo giherereye mu murenge wa Muganza mu karere ka Gisagara, ni ikigo nk’uko bigaragarazwa n’ubuyobozi bwacyo cyakira abarwayi barenga ibihumbi 30.000 kuko hari n’abahivuriza baturutse mu yindi mirenge ihaturiye nka Mugombwa na Gishubi.

Kirarambogo barasaba amashanyarazi

Kimwe n’ahandi mu mirenge y’akarere ka Gisagara Muganza nayo yagejejwemo umuriro w’amashanyarazi, ariko kugera ubu aho uri hagiye ari hakeya cyane ndetse udusantere twinshi ntiturawushyikira. Ibi ngo ni imbogamizi ku bahivuza ndetse no kuri serivisi zihatangirwa.

Ikigo nderabuzima cya Kirarambogo gisa n’ikiri kure muri uyu murenge ahagana ku mupaka n’igihugu cy’u Burundi, nacyo ntikirawushyikira, kugera ubu gikoresha uturuka ku zuba, hakaba igihe uba muke cyangwa ntawo.

Nsabiyeze Vincent ukora akazi k’izamu kuri iki kigo nderabuzima yagaragaje ko umuriro ujya uba ikibazo agira ati “Ariko uzi kubona umubyeyi afatwa n’inda umuganga akajya ku mubyaza yitwaje agatoroshi ka telefoni? Nimutekereze namwe impanuka ziba zabera aho”

Mutima Christophe umuyobozi wungirije muri iki kigo, nawe agaragaza ko kutagira amashanyarazi ari ikibazo akavuga ko ahagejejwe byatuma barushaho kunoza Serivise baha ababagana.

Ati “Amashanyarazi ni ikibazo kuko nko guteka ibikoresho dukoresha bidusaba gucana moteri, hari ibikoresho byinshi bidashobora gukora ku muriro utangwa n’izuba, biraduhenda cyane. Tubonye amashanyarazi twanoza”
Jerome Rutaburingoga umuyobozi w’akarere ka Gisagara, asobanura ko uyu muriro uzabageraho binyuze mu ngengo y’imari y’uyu mwaka.

Ati “Amashanyarazi koko ni ikibazo ariko nagirango mbamare impungenge mbabwira ko mu ngengo y’imari y’uyu mwaka aha uzahagera”

Akarere ka gisagara muri rusange k’umuriro w’amashanyarazi,kajyeze ku mpuzandengo ya 15,5%.

Usibye ivuriro n’ibigo by’amashuri bikeneye umuriro w’amashanyarazi muri Muganza, n’abaturage bavuga ko aho wagejejwe ari hato cyane, mu baturage ho hagasa nk’aho ntaho, ibi ngo bikabadindiza mu iterambere kuko hari imirimo myinshi bahanga bawushyikirijwe.

Ishuri ry’incuke ryuzuye mu murenge wa Muganza ku bufatanye bw’akarere na Action Aid kuri ubu ni ryo rya mbere ryubatswe muri aka karere ka Gisagara.

Ishuri begerejwe rizarinda abana babo ubuzererezi

Ubusanzwe abana bajyaga mu ishuri bafite imyaka 7 ariko iri shuri rikazajya ryakira abana bafite kuva ku myaka 3.

Mukakimenyi Epiphanie avuga ko kubera imirimo umubyeyi aba agomba gukora irimo no guhinga, bituma abana batiga akenshi baba inzererezi, bakanakuza ingeso mbi zitandukanye kuko ntawe ubakurikirana.

Ati “Abana bo mu cyaro batangira kuzerera bakiri bato kuko ababyeyi baba bagomba guhinga ntibahorane nabo amasaha yose, ariko iri shuri rizadufasha mu burere bwabo”

Abatuye Muganza banahamya ko abana bazatangira gutozwa isuku bakiri bato bityo indwara ziterwa n’umwanda nk’amavunja nazo zikazagenda zicika.

Ababyeyi nabo kandi ngo bazaba babonye umwanya uhagije wo kwita ku mirimo yabo yadindiraga kubera kuba bari kuwe n’abana bato mu rugo.
Mbonimpa Alphonse umubyeyi wo muri uyu murenge yagize ati “Ababyeyi b’abagore bajyaga badindira mu mirimo yabo y’ubuhinzi n’isarura akenshi kubera kuba bari kumwe n’abana none ubu bazajya babasiga ku irerero bajye mu mirimo”

Ubuyobozi bw’Akarere ka Gisagara nabwo bwemeza ko iri shuri ry’incuke rije nk’igisubizo ku bana batangiraga ubuzererezi ari bato, ariko kandi bakazaba banafite umutekano igihe bari ku ishuri.

Jerome Rutaburingoga umuyobozi w’Akarere ka Gisagara arasaba ababyeyi kwitabira kujyana abana mu ishuri, ndetse akanabasaba ubufatanye mu gukurikirana uburere bwabo igihe cyose.

Ati “Abana bazaba bafite umutekano, kandi nta buzererezi buzongera kubaho nk’uko wajyaga usanga abana ku mihanda ababyeyi bari mu mirimo”

Ishuri ry’incuke rya Muganza rizakira abana bari hagati ya 200 na m300. Buri mwana akajya atangirwa amafaranga ibihumbi 3000 ku gihembwe. Rifite agaciro ka miliyoni 90 568 810 y’u Rwanda.

Urugaga rw’Urubyiruko rushamikiye ku muryango FPR Inkotanyi mu Karere ka Gisagara.

Ibi byagarutsweho mu nteko rusange y’uru rubyiruko yateranye ku wa Gatandatu, tariki 9 Nyakanga 2016.

Bamwe muri uru rubyiruko bavuga ko hakigaragara imyumvire iri hasi kuri bamwe mu rubyiruko nka bo, ntibashake guhaguruka ngo bakore biteze imbere, kandi ntibanyurwe n’ubuzima babayemo, aho gukora bakaba bakwishora mu ngeso mbi z’ubusambanyi ngo babone ibyo bakeneye.

Bavivugiye ko mu muri 2015, aka karere kazaga ku isonga mu kugira umubare munini w’abakobwa bari barangije amashuri yisumbuye batwaye inda zititeguwe.

Tuyishimire Claudine, umwe mu bahagarariye abandi muri uru rubyiruko, agira ati “Ikibazo tugihura na cyo ni urubyiruko rufite imyumvire iri hasi rudashaka gukora kandi rukifuza ibigezweho.”

Tuyishimire avuga ko hari abana b’abakobwa bagwa mu bishuko byo kwishora mu ngeso mbi biturutse ku kwifuza ibintu bigezweho birimo amaterefone, bikaba byabaviramo gutwara inda batateganyije.

Rutaburingoga Jerome, Umukuru wa FPR Inkotanyi mu Karere ka Gisagara.

Uru rubyiruko ruvuga kandi ko rugiye gushyira imbaraga mu bukangurambaga ku kwitabira umurimo ndetse rukazanashinga amahuriro yigisha kwirinda inda zitateguwe mu rubyiruko.

Uwitwa Ngabonziza Jean ati “Tugenda dushinga za Clubs tugahuza ibitekerezo, hakabaho kwizigamira ngo dushake uko twatera imbere, ubu twatangiye no kujya tuganira ku kwirinda inda zitateguwe.”

Umukuru wa FPR Inkotanyi mu Karere ka Gisagara akaba n’umuyobozi wako, Rutaburingoga Jerôme, avuga ko imbaraga nke urubyiruko rukunze kugira ziterwa no kutanyurwa n’imibereho yarwo.

Uyu muyobozi akavuga ko kujya mu mirimo ibyara inyungu no kwibumbira mu makoperative biri mu byarufasha bikanarurinda gutwara inda zitateguwe.

Agira ati “Kwishyira hamwe bakagira umurimo, biri mu byabafasha kurwanya ibi byose: ibiyobyabwenge, ababashuka, kuko usanga ababijyamo ari uko nta murimo baba bafite.”

Abagize icyiciro cy’urubyiruko bagize 66% by’abaturage bose b’Akarere ka Gisagara, nk’uko ubuyobozi bwako bubyemeza.

Izi ndabo ubusanzwe zizwi nk’amaroma mu Rwanda, izihasanzwe zagiraga amabara yera gusa.

Mukamuganga wahoze atuye i Kigali ari na ho yakoreraga Umuryango Mpuzamahanga, yaje gukora impanuka muri 2011 maze avunika amaguru yombi, abaganga bamugira inama yo kuzajya akora urugendo rurerure n’amaguru kugira ngo azakire.

Muri 2012, uyu mugore yiyemeje kujya mu cyaro ku ivuko mu Murenge wa Kibirizi mu Karere ka Gusagara, kugira ngo uwo mwitozo wo kugenda ajye awukora ari mu mirimo inyuranye, ari na bwo yatangiye ubuhinzi n’ubworozi.

Mu Ukwakira 2015, Mukamuganga, abifashijwemo n’Ikigo cy’Igihugu gishinzwe guteza imbere umusaruro w’Ubuhinzi bw’Ibyoherezwa mu Mahanga, NAEB, yatangiye guhinga indabo zitwa “Callas flowers” zavuye mu gihugu cya Nouvelle Zellande.

Mukamuganga avuga ko nubwo mu Rwanda hasanzwe indabo, ngo izo ahinga zifite akarusho kuko zigira amabara menshi atandukanye mu gihe izimenyerewe zigira ibara ry’umweru gusa.

Ati “Ni indabo zidasanzwe ino kuko zo zigira amabara menshi atandukanye, na byo biri mu byatumye nkora ubu buhinzi kuko nabonaga ko zizabona isoko kuko zidasanzwe.”

Nta kibazo cy’isoko aragira

Akomeza agira ati “NAEB yadufashije gukora ubu buhinzi turi batanu mu Rwanda kandi idufasha no kubona isoko kuko dufite abaguzi baza kuzitwara ku mirima aho duhinga, gusa umusaruro wacu uracyari muke nturagera ku wakoherezwa hanze.”

Mu masezerano bafitanye na NAEB, ngo bagenda bishyura bitewe n’uko bacuruje, aho bishyura 40% y’ayo bacuruje bagasigarana 60%.

Avuga ko agereranyije n’ubundi buhinzi butandukanye, asanga amafaranga ashobora kuva mu ndabo aba ari menshi kurushaho, bigatuma avuga ko azagenda ashishikariza abagore bo muri aka karere kwitabira ubu buhinzi.

Ati “Kugira ngo umuntu abone kawa ivuyemo amafaranga ibihumbi 200 ni imvune nyinshi ariko jye indabo nsaruye ku ibase mba nzibonyemo amafaranga arenga ibihumbi 200.”

Indabo Mukamuganga ahinga ubu ziri ku gice cya hegitari, ariko ateganya kuzongera akagera kuri hagitari 2,5.

Ku mwero uherutse ari na wo wa mbere yari asaruye, yakuyemo agera kuri miliyoni 3 n’ibihumbi 500FRW, agahamya ko abaze asanga harimo inyungu nyinshi, nubwo atavuga uko ingana.

Uyu mugore avuga ko ari muri gahunda yo gushaka imashini zivomerera kugira ngo ajye abasha guhinga izi ndabo no mu gihe cy’izuba.

Kuva muri 2012 ubwo Mukamuganga yatangiraga ubuhinzi butandukanye, abasha gukoresha abakozi 25 ba nyakabyizi mu gihe cy’ihinga, naho mu bihunzi bw’indabo nyir’izina hagakoramo bane babifitiye ubumenyi.

Abaturage b’i Musha babonye amazi meza bituma barwanya umwanda.

Aba baturage bavuga ko mbere ya Jenoside yakorewe Abatutsi mu 1994 nta hantu na hamwe mu Karere ka Gisagara hageraga amazi meza cyangwa amshanyarazi uretse mu bigo by’abihayimana, kandi na bwo bakoreshaga imashini zabo zavanaga amazi mu gishanga, naho ku mashanyarazi ngo abenshi bakoreshaga aturuka ku zuba.

Ikindi ngo byari bigoye kubona umuhanda ukoze neza kandi amashuri, amavuriro n’amasoko, na byo ngo byari mbarwa, ariko ubu muri aka karere ngo hatangiye kugaragara impinduka, batangira kubona ibikorwa remezo bituma n’imibereho yabo itera imbere.

Imibereho myiza bagezeho bayibonera no mu iterambere ry’ubuhinzi bwa kijyambere.

Muri iki gihe u Rwanda rwizihiza isabukuru yo kwibohora ku nshuro ya 22, Akarere ka Gisagara kagenda kageza ibikorwa remezo ku baturage, nubwo bikiri bike ariko abaturage bavuga ko hatewe intambwe ikomeye kuko hari byinshi bagenda babona batari barigeze.

Manirakiza Vestine wo mu murenge wa Ndora, avuga ko imyaka irenga 35 amaze muri aka karere, ngo mbere ya Jenoside yakorewe Abatutsi mu 1994, atari yarigeze abona amashanyarazi cyangwa umuhanda ukoze neza nk’iyo bafite ubu, ubuhinzi bwa kijyambere bubaha umusaruro utubutse n’ibindi bagenda bageraho.

Munganyinka Saverina utuye mu Murenge wa Musha, ahashyikirijwe amazi meza muri uyu mwaka, we agira ati “Ubu natwe tumaze kubohoka ku mwanda, twashyikirijwe amazi, byabaye nk’inzozi kuko twabyirutse tuvoma imibande, imvune ari zose.”

Abaturage bavuga ko ukwibihora banakubonera mu burezi kuri bose bagejejweho.

Muri Musha ho, ivuriro ryari risanzwe rifite inyubako nto ryaraguwe, bakemeza ko ubu imbogamizi zo kubura aho bicara baje kwivuza n’abarembaga bakabura aho baryamishwa, zavuyeho.

Nyirajyambere Françoise ati “Kwibohora kurenze uku se ni ukuhe, mbere warakoraga urugendo rw’amasaha n’amasaha ugana ivuriro na ryo ritameze neza?”

Umuyobozi w’Akarere ka Gisagara, Jerome Rutaburingoga, avuga ko ibikorwa remezo mu karere bikiri bike, ariko akavuga ko aka karere ari uko kiyubakaga kava kure kuko ibyinshi bitari byarahigeze.

Rutaburingoga asaba abaturage gusigasira ibyo bagezeho akanabibutsa ko urugamba rwo kwibohora rugikomeje abantu baharanira kwibohora ubukene.

Jerome Rutaburingoga, Umuyobozi w’Akarere ka Gisagara.

Agira ati “Twavaga kure ariko turakomeza kongera imbaraga, abaturage na bo bamenye ko batakirwana urw’amasasu ariko urwo kwibohora ubukene rukomeje.”

Ubuyobozi bw’aka karere burasaba abayobozi mu nzego zose gukangurira abaturage kwitabira ibikorwa bibateza imbere, kuko abenshi muri aka karere ngo bagifite imyumvire ikiri hasi ari na yo ibabuza kwibohora ubukene.

Bimwe mu bikorerwa muri "Yego Center" ya Gisagara.

“Yego Center” ni ikigo cyashyiriweho urubyiruko, mu kurufasha kwihangira imirimo no kwiteza imbere bahereye mu guhugurirwa imyuga itandukanye.

Benshi mu rubyiruko rw’Akarere ka Gisagara bagana icyo kigo bavuga ko ari igisubizo ku mibereho yabo itari myiza kuri bamwe.

Uwitwa Habimana Egide ati “Narangije icyiciro cya mbere cya kaminuza mbura akazi none ubu niga kwandika ku byapa na banderoles muri ‘Yego Center’ kandi natangiye kubona inyungu.”

Ndacyayisenga Jean de Dieu, Umuyobozi wa “Yego Center” ya Gisagara, avuga ko ikibazo bahuye na cyo mbere bajya gutangira gukorana n’uru rubyiruko, ari icy’imyumvire.

Avuga ko kuba ari mu duce tw’icyaro wasangaga urubyiruko rufite imyumvire ko ntacyo rushoboye ndetse ugasanga bamwe bakujije umuco wo kwirirwa bicaye cyangwa bazerera kuko batekereza ko ntaho bagera.

Ati “Kwisuzugura bakumva ko ntacyo bageraho ni byo twabanje kubakura mu mitwe, none ubona hari icyizere ko nta rubyiruko ruzerera ruzongera kuba muri aka karere kuko abiga hano bararika abandi.”

Muri “Yego Center” y’Akarere ka Gisagara kandi ntibigisha gusa ibijyanye n’imyuga, ahubwo bagira n’amasaha y’imyidagaduro, no kuganiriza urubyiruko ku buzima bw’imyororokere.

Izi gahunda hamwe no gwihangira imirimo bagahamya ko bizaca ubuzererezi, uburaya, ibiyobyabwenge n’izindi ngeso zikunze kugaragara mu rubyiruko rutagira umurimo.

Ubwo hamurikwaga ibikorerwa muri “Yego Center” kuri uyu wakane, Umunyamabanga Nshingwabikorwa w’Intara y’Amajyepfo, Izabiriza Jeanne, yashimye ibi bikorwa anasaba ubuyobozi bw’akarere korohereza urubyiruko kumenyekanisha ibyo rukora.

Ati “Koko hari icyizere ko gahunda bafite zizaca burundu ubuzererezi, ubuyobozi na bwo nibubabe hafi babashe kuzamuka.”

Muri Karere ka Gisagara harabarurwa zone zirindwi za “Yego Center”, zashyizwe mu bice bitandukanye ngo zifashe urubyiruko rwo mu mirenge, zikaba zimaze kwitabirwa n’urubyiruko rugera kuri 640.

Imyuga biga irimo ubudozi, gukora amasabune, gutunganya imisatsi, gusiga no gukora amarangi n’indi.

Abayobozi n’abatanyabukorwa b’uruganda Mountain Coffee mu gushyikiriza abanyeshuri impanyabumenyi.

Mu mahugurwa bahawe n’uruganda Huye Mountain Coffee rutunganya umusaruro ukomokaku kuri kawa, abanyeshuri 15 bafite ubumuga bwo kutumva no kutavuga bongeye kugaragaza ko na bo bashoboye kandi ko kugira ubumuga runaka bitavuga ko umuntu atagira umurimo akora akanawukora neza.

Emanuel Ndayisaba, Umunyamabanga Nshingwabikorwa w’Inama y’Igihu y’Abafite Ubumuga, avuga ko bashoboye nk’abandi bose mu kugaragaza ko hakiri bamwe bagiheza abafite ubumuga, asaba ko byacika aho bisigaye.

Ati “Ntibikwiye ko abafite ubumuga hari aho bahezwa bahorwa kugira ubumuga, kuko bigenda bigaragara ko bashoboye kandi ko imirimo bakora bayitunganya kimwe n’abandi.”

Mukankusi Jacqueline na Niragijimana Emanuel, bamwe mu barimu bahuguraga aba banyeshuri bafite ubumuga bwo kutumva no kutavuga, na bo bavuga ko ubushobozi kuva batangira kwiga bababonyeho bugaragaza ko koko bashoboye.

Aba banyeshuri bahugurwaga basanzwe biga mu ishuri riherereye i Ngoma mu Karere ka Huye, ngo baba bagiye no kugira amahirwe yo guhabwa akazi muri uru ruganda mu gihe bazaba barangije kwiga.

David Rubanzangabo, Umuyobozi wa Huye Mauntain Coffee, ngo asanga abafite ubumuga na bo bashoboye gukora bagatanga n’umusaruro ukenewe, ari yo mpamvu asanga guha aba banyeshuri amahirwe mu kazi bahuguriwe ari uburenganzira bwabo.

Ati “Barashoboye ndetse hari benshi badafite ubumuga barusha gukora neza, ntibarangara mu kazi batanga umusaruro ukenewe ntibakwiye guhezwa.”

Rubanzangabo avuga ko bazabanza bakareba aho buri munyeshuri atuye, abatuye Huye bo bashobora gukora muri uru ruganda, abatuye mu tundi turere hakazarebwa niba hari inganda zitunganya kawa zihari bakabafasha kubonamo imyanya.

Abanyeshuri 15 ni bo bahuguwe igihe cy’ukwezi, tariki 24 Kamena 2016 bahabwa impamyabushobozi yerekana ko bashoboye gutunganya igihingwa cya kawa mu buryo bujyezweho mu nganda.

Abatuye kibirizi baravuga ko kwa muganga badahabwa imiti bakeneye bakoherezwa kuyigurira muri za farumasi.

Uwamariya Clementine, umwe mu bemeza ko akenshi kwa muganga badahabwa imiti bakeneye, avuga ko niba abarwayi bagomba no kugira imiti bajya kwigurira hanze y’ikigo nderabuzima gutanga amafaranga y’ubwisungane mu kwivuza nta kamaro byaba bifite.

Agira ati “Ikibirizi njya mpajyana umwana arwaye nk’inkorora ayimaranye iminsi, bakambwira ngo umuti wamuvura ntawo bafite ngo ninjye kuwigurira muri farumasi.”

Uwambajimana Jeanne nawe ni undi wemeza ko uku koherezwa kwigurira imiti hanze yagiye kwivuza, bimaze kumubaho kandi afite mituweri.

Aba baturage icyifuzo cyabo ngo ni uko mituweri zabo zajya zibafasha guhabwa imiti bakeneye kwa muganga batoherejwe hanze kwigurira cyane ko ngo baba ntabushobozi bafite.

Rugamba Innocent umukozi ushinzwe gukurikirana ibikorwa by’abajyanama b’ubuzima ku kigo nderabuzima cya Kibirizi.

Rugamba Innocent umukozi ushinzwe gukurikirana ibikorwa by’abajyanama b’ubuzima ku kigo nderabuzima cya Kibirizi, avuga ko ibi abaturage bavuga bidashoboka kuko nta muforomo ushobora kwandikira umuturage urupapuro amwohereza muri farumasi hanze.

Avuga ko ahubwo hari uburwayi usanga butari ku rwego rw’ikigo nderabuzima bukwiye ibitaro bikuru, ari bwo umurwayi aba akwiye kuzahabwa iyo miti idatangwa n’ikigo nderabuzima, kuko ikwiye kwandikwa n’umuganga mukuru.

Ati “Ibi ntibishoboka, ahubwo hari igihe abaturage badasobanukirwa neza n’ibyo babwiwe n’umuganga ubasuzuma, ugasanga bagiye batanyuzwe batanazi neza ibijyanye n’uburwayi bafite, ntabwo ikigo nderabuzima cyohereza abaturage muri farumasi zo hanze ntibyashoboka.”

Asaba abaturage gutega amatwi ibisobanuro bahabwa, umuturage akava imbere ya muganga asobanukiwe ibijyanye n’uburwayi bwe, kandi bakanakurikirana ibisobanuro bahabwa kuri serivisi bahabwa n’ikigo nderabuzima.

Ubwisungane mu kwivuza mu murenge wa Kibirizi muri uyu mwaka 2015-2016, bukaba bwaritabiriwe ku kigereranyo cya 84,4%.

Komisiyo y’Igihugu y’Ubumwe n’Ubwiyunge yibutse abazize Jenoside yakorewe Abatutsi bo mu Murenge wa Gikonko.

Ibi yabivugiye mu muhango wo kwibuka ku nshuro ya 22 Jenoside yakorewe Abatutsi ahitwa mu Rwandabo mu Murenge wa Gikonko mu Karere ka Gisagara, aho abakozi b’iyi komisiyo bifatanyije n’abatuye uyu murenge kongera kunamira inzirakarengane zazize Jenoside muri uyu Murenge.

Muri uyu muhango hanakozwe igikorwa cyo gushimira, hatangwa inka ku mukecuru wahishe abana 6 b’Abatutsi bakarokoka, hashimira umusirikare wamugariye ku rugamba rwo kubohora u Rwanda, hanorozwa umukecuru w’incike ya Jenoside.

Havugimana Jean Bosco watanze ubuhamya yagarutse ku buryo abantu bicwaga urupfu rubi, bigaragara ko abicaga nta bumuntu bari bakifitemo.

Ati “Ino (hano), kwica byatangiye nyuma bituma abantu bicwa umusubizo kandi nk’inyamaswa.”

Perezida wa Komisiyo y’Ubumwe n’Ubwiyunge, Bishop John Rucyahana ashimira umukecuru wahishe Abatutsi muri Jenoside, bakarokoka.

Ku rundi ruhande ariko hari n’ababaye intwari bigaragara ko bafite ubumuntu, nk’umukecuru Kampala Marthe wahishe abana 6, akabahungana aho yajyaga hose kugera Jenoside irangiye, bagasubizwa imiryango yabo.

Uyu mukecuru avuga ko bitari byoroshye ariko umuntu ufite umutima atagakwiye kureberera aho abantu bicwa, “noneho banazira ubusa”.

Perezida wa Komisiyo y’Ubumwe n’Ubwiyunge, Bishop Rucyahana, yavuze ko ubumuntu Abanyarwanda bambuwe ari bo bagomba no kongera kububyutsa.

Umukecuru Kampala Marthe wahishe abana 6 muri Jenoside bakarokoka, yashimiwe agabirwa inka.

Ati “Ntitwapfushije Abatutsi gusa, twapfushije n’ubumuntu, ariko kuba hari abo dushimira babugaragaje, ni ikigaragaza ko bwakongera bugashibuka. Banyarwanda ni inshingano yacu rero.”

Urwibutso rwa Gikonko, ahunamiwe abazize Jenoside yakorewe Abatutsi muri uyu murenge, rushyinguyemo imibiri igera ku 27500.

Urwibutso rwa Gikonko mu Karere ka Gisagara rushyinguyemo imibiri y’abazize Jenoside yakorewe Abatutsi bagera ku 27500.

Rwabidadi washinjwaga kunyereza umutungo wa leta yagizwe umwere.

Rwabidadi, umukozi wa Minisiteri y’Umuco na Siporo (MINISPOC), niwe wari ushinzwe gutanga mazutu yakoreshwaga muri moteri yacaniraga sitade ya Huye igihe cya CHAN.

Ubwo yitabaga urukiko kuri uyu wa gatatu tariki 8 Kamena 2016 yagaragaraye mu mwenda wa roza wabarwa n’imfungwa, asomerwa ku cyaha ashinjwa cyo kunyereza umutungo wa leta agura mazutu nke kandi afite ubushobozi bwo kugura ihagije.

Mazutu nke niyo yatumye moteri izima bituma umukino wahuzaga ikipe ya Cameroun n’iya Ethiopia uhagarara iminota 12, hari tariki 21 Mutarama 2016.

Byashingirwaga ku mpapuro zihesha mazutu yasanganywe zifite agaciro ka miliyoni 1.3Frw zagiye zisaguka ku yindi mikino. Ngo ntiyari yaragiye azerekana ku kazi ke ngo zibe zaherwaho igihe hakenewe indi mazutu.

Ibyo Rwabidadi aregwa ari we n’abamwunganiraga barabihakanye bakanerekana ko ikibazo cyabayeho cyari ikibazo kidafite aho gihuriye na mazutu. Byongeye hakaba hari mazutu iteretse itegerejwe gushyirwa muri moteri, bityo akaba nta mutungo yanyereje nta n’isano afitanye n’izima rya moteri.

Ku bijyanye n’izo mpapuro zihesha mazutu yasanganywe, yireguye avuga ko kuba nta biro yari afite akoreramo mu gihe cya CHAN, impapuro nyinshi z’akazi yazibikaga mu modoka y’akazi ateganya ko igihe imikino izaba irangiye azakora raporo igaragaza ibyo yakoresheje.

Hashingiwe ku buhamya butandukanye bwagiye butangwa, hagaragazwa ko mazutu ijya muri moteri itigeze ibura ngo byitweko amafaranga yari agenewe kuyigura yanyerejwe.

Urukiko rwagaragagaje ko ibyo ubushinjacyaha bushinja Rwabidadi nta bimenyetso bifatika bufite.

Urukiko rwahise rwanzura ko iki cyaha cyo kunyereza umutungo wa leta kitamuhama, busaba ko yahita afungurwa.

Ingo 20 z’abapfakazi ba Jenoside yakorewe Abatutsi, zahawe amashanyarazi ava ku zuba, radiyo na televiziyo.

Aba bapfakazi ba Jenoside yakorewe Abatutsi bo Mudugudu wa Kinyana mu Kagari ka Cyiri, baravuga ko ibi bikoresho bahawe bizabavana mu bwigunge kandi bikabafasha kwiteza imbere binyuze mu kumva no kureba ibyo ab’ahandi bakora.

Mukandekwe Florida, umwe muri bo, ati “Mbere nabaga mu mwijima, nkamurika n’ikibiriti nkareba aho ndyama none ubu ndacanye, nanjye ndanareba televiziyo. Ni ibyishimo bisa kandi bizamfasha gutera imbere.”

Mukagatare Beatrice, na we twamusanze areba televiziyo yahawe, atubwira ko ari ubwa mbere atunze iki gikoresho, bityo ko ibyishimo byamusabye.

Uyu mubyeyi arimo gucana televiziyo abonye bwa mbere. Ngo nta rungu bazongera kugira.

Umuyobozi wa IPRC-South, Dr. Twabagira Barnabé, avuga ko kuba abakozi b’iri shuri batanze iyo nkunga, ari uburyo nyabwo bwo kubageza ku iterambere rirambye aho bazajijuka binyuze mu kureba ibibera ahandi.

Ati “Icyo twifuza ni uko aba baturage batera imbere. Ibi bikoresho bahawe bizabafasha, bazabafasha kwirebera ibibera ahandi kuri televiziyo, na bo baharanire kubigeraho.”

Umuyobozi w’Akarere ka Gisagara Wungirije ushinzwe Imibereho Myiza, Gasengayire Clemence, avuga ko igikorwa nk’iki kiba kiborohereje muri gahunda bafite yo kugeza amashanyarazi ku baturage.

Dr Twabagira Barnabé, Umuyobozi wa IPRC - South.

Ati “Iki gikorwa kiradufashije kuko ubu tuzaha ubandi amashanyarazi aba tuzongere byibura kubareba nka nyuma y’imyaka 5 kuko amashanyarazi bahawe afite ‘garanti’.”

Iki gikorwa cyo kugeza amashanyarazi akomoka ku zuba mu ngo 20 ndetse n’ibikoresho byagendanye birimo tereviziyo na Radiyo, byose hamwe bifite agaciro ka miliyoni 12 z’amafaranga y’u Rwanda.

Ahazubakwa uruganda ruzajya rukura amashanyarazi muri nyiramugengeri.

Ibikorwa byo gutangiza umushinga wo gucukura iyi nyiramugengeri byatangijwe mu 2013, byagenze neza none hagiye gutangira kubakwa uruganda ruzayitunganya, ruzaba ruherereye mu Murenge wa Mamba mu Karere ka Gisagara.

Asura ahazubakwa uru ruganda tariki 27 Gicurasi 2016, Minisitiri w’Ubucuruzi n’Inganda Francois Kanimba, yavuze ko ingufu zizaturuka muri iki gishanga ziziyongera ku zisanzwe mu gukemura ikibazo cy’amashanyarazi.

Minisitiri Kanimba aravuga ko aya mashanyarazi azava muri Nyiramugengeri ari inkunga ikomeye ku Rwanda.

Yagize ati “Umushinga uzatwara amafaranga arenga miliyoni 400 z’amadorari y’amerika wagombaga kwitonderwa, bigaragara ko nurangira uzagirira igihugu akamaro ku kibazo cy’amashanyarazi dusanganwe.”

Inyigo zakozwe n’impuguke mu gucukura nyiramugengeri zo mu gihugu cya Suede zemeje ko nyiramugengeri iboneka muri iki gishanga ihagije kuko izacukurwa ku buso busaga hegitari 4300.

Ingenieur Gaspard Nkurikiyumukiza ukora mu itegurwa ry’uyu mushinga, asobanura ko iyi nyiramugengeri izahaza uruganda mu myaka 26 kandi rukajya rukenera byibuze toni miliyoni 70 za nyiramugengeri ku mwaka umwe.

Ingenieur Gaspard Nkurikiyimukiza arasobanurira Minisitiri uko uruganda ruzakora.

Ati “Nyiramugengeri irimo aha izahaza uruganda igihe cy’imyaka 26 kandi amazi tuzajya dukoresha mu kubyaza iyi nyiramugengeri ingufu z’amashanyarazi azava mu gishanga cy’Akanyaru nayo twarapimye dusanga nta kibazo tuzahura nacyo mu kuyakoresha.”

Umuriro w’amashanyarazi uzajya utangwa n’uru ruganda ngo azajya yerekeza mu Karere ka Bugesera kubera umushinga w’Ikibuga cy’indege mpuzamahanga uriyo, naho ikindi gice cyerekezwe kuri sitasiyo ya Kigoma kugira ngo gikoreshwe n’Amajyepfo.

Izi megawati ziramutse zibonekeye igihe, zahita ziyongera ku zindi 26 zatanzwe n’umushinga wa gaz methan icukurwa mu Kivu.

Abakora amagare mu Rwanza bavuga ko bibatunze ntibasabirize.

Iyo ugeze mu rusisiro (centre) rwa Rwanza mu Murenge wa Save, cyane cyane iyo isoko ryaremye, usanga urujya n’uruza rw’abantu bakora imyuga itandukanye irimo gukora amagare no kudoda inkweto.

Abakora iyo mirimo bavuga ko mu gihe kirekire babimazemo, kabafashije kwibeshaho no gutunga imiryango yabo, bayibonera ibyo ikeneye.

Hategekimana Jean Baptiste w’imyaka 70 akora umwuga w’ubukanishi bw’amagare. Avuga ko yabashije kwigurira igare, akaba yoroye ingurube ndetse akanishyurira amafaranga y’ishuri abana be babiri biga mu mashuri yisumbuye, abikesheje uyu mwuga.

Ati «Maze imyaka irenga 15 muri aka kazi kandi sindagira ikibazo na kimwe kuko icyo gihe cyose natunze umuryango wanjye ntiwagira icyo umburana.»

Uwitwa Bizimungu na we ukanika amagare mu Rwanza, avuga ko umwuga w’ubukanishi bw’amagare wamugiriye akamaro kuko atunze umugore n’abana bane, akaba yarashoboye no kubaka inzu batuyemo ifite agaciro k’ibihumbi 700Frw.

Abadoda inkweto barasaba kujya bahugurwa bakegendana n’igihe.

Abadoda inkweto na bo bavuga ko uwo mwuga wabagiriye akamaro kuko bitunze babikesha ako kazi. Hari bamwe muri bo bavuga ko bubatse amazu babikesheje uwo mwuga, kandi ngo bose nta kibazo bagira cyo kwishyurira imiryango yabo ubwisungane mu kwivuza.

Sibomana Michel ati «Maze imyaka irenga 10 nkora inkweto za Rugabire nkanadoda izacitse ariko birantunze rwose. Umuryango wanjye ntubura mituweli kandi niyubakiye inzu ifite agaciro ka miliyoni 1 y’amafaranga y’u Rwanda.”

Abakora imyuga iciriritse muri Rwanza, bavuga ko imbogamizi bafite kugera ubu ari iyo kuba iterambere ryihuta ariko bo bakaba badatera imbere mu bumenyi, bakaba bifuza ko na bo bajya bagenerwa amahugurwa kugira ban go babashe kugendana n’igihe.

Umuyobozi w’Akarere ka Gisagara Wungirije ushinzwe Ubukungu, Jean Paul Hanganimana, avuga ko hari gahunda y’amahugurwa iteganyirijwe abanyabukorikori bo muri ako karere, ikazatangira muri Nyakanga 2016.

Abakorera imyuga iciriritse ku isoko rya Rwanza bishimira ko ituma bibonera ibyo bakeneye.

Ati “Gahunda irahari rwose, tuzatangira kubahugura muri Nyakanga. Ingengo y’imari y’umwaka utaha (2016) itangiye, tuzatangirana n’izi gahunda kugira ngo na bo babashe kuzamuka mu iterambere.”

Nyiraneza yorora inka akanahinga urutoki.

Nyiraneza w’imyaka 58 utuye mu Murenge wa Musha mu Karere ka Gisagara, ugeze mu rugo rwe ahabona ibiraro birimo inka ndetse n’andi matungo magufi. Avuga ko kugera ku iterambere bisaba ko umuntu agira icyo yigomwa no gutumbere icyo yifuza kugeraho.

Avuga ko Jenoside yakorewe Abatutsi mu Rwanda, yamutwaye umugabo n’abana batanu, aho irangiriye akabaho nta gahunda agira kuko yari yihebye asigaye wenyine

Ati “Uburyo nari meze numvaga ntacyo nakora ahubwo nahora ngenda, nkumva mu mutwe nta kirimo kuko sinabonaga icyo naba nkorera.”

Avuga ko yongeye kuba umuntu amaze guhugurwa na AVEGA, ari nabwo yatangiye gutekereza ku mibereho ye.

Amaze kubona aho atura, yanatekereje kwagura isambu kugira ngo ajye abona aho ahinga naho yororera kuko yari amaze guhabwa inka muri gahunda ya gira inka zimaze kuba eshatu.

Avuga ko abikesha kugira intego no guharanira kwigira, yashoboye kubyaza iyo nka izindi, atera n’urutoke rugari rwa kijyambere.

Ati “Nari naraguze ikibanza cy’ibihumbi 50Frw nyuma gato ya Jenoside, muri 2008 ndacyubaka buke buke mbona aho ntura noneho ntangira guhinga no korora.”

Kuri ubu Nyiraneza avuga ko yateye insina zirenga 600 za kijyambere kandi atazahagararira aho, kuko ahinga n’indi myaka bityo akazakomeza kwiteza imbere.

Avuga ko afite gahunda yo gufasha abaturanyi be by’umwihariko abapfakazi abaha imibyarare y’insina kugira ngo nabo batere imbere. Asaba abagore kutitinya kuko ngo nabo bashoboye cyane cyane agakomeza abapfakazi ba Jenoside.

Icyo abasaba ni ukudaheranwa n’agahinda ahubwo bagahaguruka bagakora, bagafashanya kuzamuka ntihagire usigara inyuma. Ati “Abapfakazi nabasaba gukomera, ntibihebe ubuyobozi buradushyigikiye ntibadutaye twenyine natwe nidukore kandi turabishoboye pe.”

Nyiraneza avuga ko azakomeza guharanira iterambere kuko yasanze byose biva mu gukora no mu bushake bwo kugira aho umuntu agera.

Guverineri Munyantwali Alphonse aravuga ko Abarundi batarimo kwirukanwa, ahubwo boherezwa gushaka ibyangombwa byo kuba mu Rwanda.

Ibi byatangajwe na Guverineri w’Intara y’Amajyepfo, Alphonse Munyantwari, mu kiganiro yagiranye n’abanyamakuru ku wa Kabiri, tariki 17 Gicurasi 2016, cyabereye ku cyicaro cy’Akarere ka Gisagara.

Guverineri Munyantwari yavuze ko igikenewe ari uko abo Barundi bagira ibyangombwa bahabwa n’igihugu cyabo, bibemerera kuza kuba mu Rwanda n’icyo bifuza kuhakorera.

Ibi bibaye nyuma y’uko Abarundi basaga 1200 babaga mu Karere ka Gisagara mu Ntara y’Amajyepfo, batangiye koherezwa mu gihugu cyabo kuva ku wa Gatandatu tariki 14 Gicurasi 2016, abantu bamwe bagatangira kuvuga ko Abarundi barimo kwirukanwa mu gihugu.

Guverineri Munyantwali asobanura ko ubusanzwe umuntu ugiye mu kindi gihugu kuhakorera cyangwa kuhatura, agomba kugira ibyangombwa, hakabamo ibyo asabwa guhabwa n’igihugu akomokamo maze aho agiye bakamuha ibimwemerera gutura.

Ibi rero ngo ni na byo birimo gukorwa mu Rwanda kandi ngo ntibireba Abarundi gusa.

Kuba Akarere ka Gisagara kegereye igihugu cy’u Burundi, hari Abarundi bambukira ku byambu bitazwi, bigatuma hari abari bahatuye batagira ibyangombwa, ari na bo boherejwe kubishaka.

Ati “Imipaka irakinguye ku bashaka kuza. Icyo dusaba gusa ni uko umuntu aza yubahirije itegeko n’ushaka gutura agatura hubahirijwe ibisabwa.”

Guverineri Munyantwali avuga ko ibyakozwe nta gitangaje kirimo kandi ko ntawe uzigera ahutazwa, baba abahafite imiryango cyangwa abafite imirimo ariko abakoresha bakaba bakibafitiye amafaranga. Abo ngo baba bitonze, inzitizi bafite zavaho bakazajya gushaka ibyangombwa.

Nyiracumi ni Umurundikazi ufite umugabo w’Umunyarwanda n’abana batandatu, ariko batasezeranye. Avuga ko nta wamwirukanye, asabwa kuzajya gushaka ibyangombwa gusa.

Ibi kandi byemezwa n’Abarundi batuye mu Karere ka Gisagara ngo kuko basobanuriwe ko aboherezwa mu Burundi ari abatari bafite ibyangombwa byo kuba mu Rwanda.

Nyiracumi Gaudiose, ni Umurundikazi utuye mu Murenge wa Kibirizi, akaba ahafite umugabo w’Umunyarwanda banafitanye abana 6 ariko bakaba batarasezeranye.

Avuga ko Umuyobozi w’Umudugudu yamusobanuriye ko ubwo nta cyangombwa kimwemerera kuba mu Rwanda afite, agomba kuzana impapuro mu gihugu cye zimwemerera gusezerana akagaruka mu Rwanda, bakamuha uburenganzira bwo gusezerana mu buryo bwemewe n’amategeko.

Uwitwa Nshimiyimana Jean, na we avuga ko ari mu Rwanda kubera amashuri kandi afite urupapuro rw’inzira. Ubwo ubuyobozi bwamugeragaho tariki 16 Gicurasi 2016, ngo yagaragaje ibyangombwa bye, bamubwira ko nta kibazo.

Mu Karere ka Gisagara, habarurwaga Abarundi basaga 1700.

Iki kibazo kibasira cyane cyane abatuye umudugudu w’Akamerwe, mu Kagari ka Nyaruteja, aho bavuga ko bakunze kubura umuriro w’amashayanyarazi igihe cyose imvura iguye kandi akenshi bakawubura abandi bawufite, nk’uko bitangazwa n’uwitwa Bimenyimana.

Isantere ya Nyaruteja ngo uko imvura iguye babura umuriro w amashanyarazi.

Agira ati “Uko imvura iguye ujya kubona ukabona birazimye kandi abandi hakurya bawufite, haba ari kumanywa nko kogosha bikaba birahagaze.”

Usibye igihe cy’akazi kandi ngo no mu masaha y’ijoro biba bibangamye kubura umuriro, kuko baba bakeneye gucana mu mazu yabo, ikindi kandi ngo amashanyarazi babonye abafasha kurinda umutekano wabo mu isantere, iyo wazimye rero bagira impungenge zo kwibwa.

Mukamasabo Agathe, umukecuru utuye muri uyu mudugudu, ati “Reka haba hasa nabi, none se ko twari tumaze kumenyera kumurikirwa, bazashake uko bawubuza kujya ubura buri gihe.”

Kuri aba baturage kubura umuriro w’amashamyarazi kenshi bemeza ko bituruka kuri transformateur kuko ngo iriho ari iyasimbuwe bitewe n uko izashyizweho mbere zari zagize ibibazo.

Jean Pierre Maniraguha, umuyobozi w’ikigo gishinzwe gukwirakwiza amashanyarazi mu turere twa Huye na Gisagara, avuga ko ikibazo atakwemeza ko ari imashini ibagezaho uyu muriro (Transformateur) ahubwo bishobora kuba impamvu zinyuranye.

Asaba abaturage mu gihe baba bagize iki kibazo bajya bihutira kubibamenyesha ku nimero babahaye itishyurwa kuko igihe batari gutanga iyi serivisi y amashanyarazi nabo bahomba.

Ati “Birashoboka ko ari abafatabuguzi bacu batamenya ikibazo cyabaye cyangwa ntibanihutire kutumenyesha ku murongo wa telefone twabahaye bigatuma tutabageraho byihuse ariko ntitwavuga ko ari ikibazo cyihariye.”

Ubuyobozi bw ikigo gishinzwe gukwirakwiza amashanyarazi ishami rya Huye na Gisagara, avuga ko uburyo burambye bwo gukemura ibibazo birebana n’amashanyarazi muri Gisagara bizakemurwa no kubegereza ishami ryihariye mu karere kabo, ngo bikaba biri gutekerezwaho.

Yabigaruseho ubwo yatangizaga icyumweru ngaruka mwaka cyahariwe gutanga ubufasha mu by’amategeko, cyatangirijwe mu murenge wa Ndora Akarere ka Gisagara kuri uyu wa mbere tariki 9 Gicurasi 2016.

Minisitiri w’Ubutabera arasaba abatarishyura imitungo bangije bakwegera abo bangirije bagasaba imbabazi bakanishyura.

Kimwe n’ahandi henshi mu gihugu mu mirenge itandukanye y’Akarere ka Gisagara haracyari abatarishyura imitungo basahuye, cyangwa bangije mu gihe cya Jenoside yakorewe Abatutsi mu 1994.

Hari abemera guhura n’abo bahemukiye, bagasaba imbabazi bakanakora amasezerano y’uburyo bazajya bishyura iyo mitungo bakagenda bishyura.

Bamwe mu barokotse Jenoside ariko banavuga ko hari abanga ku bishyura ntibanabasabe imbabazi byibura.

Bamwe bemera kwishyura ndetse bakanakora amasezerano bakagenda bishyura.

Ruhingubugi Joseph umwe muri aba avuga ko abamwangirije bitwaza ko nta bushobozi ariko we akavuga ko akenshi biba ari agasuzuguro atari ikibazo cy amikoro.

Agira ati “Jye imbabazi nazibaha, ariko se nzajye no kuzibingingira? jye mbona atari ikibazo cy’amikoro kutatwishyura ahaba harimo n’agasuzuguro.”

Minisitiri Busingye yavuze ko abangije imitungo badakwiye kwitwaza amikoro kuko ngo bibaye uko byaba urwitwazo ahantu hose umuntu ntakagire icyo yishyura.
Avuga ko uwangije imitungo akwiye gutera intambwe yo kwegera uwo yahemukiye akamusaba imbabazi, kwisyura na byo ubushobozi bugashakwa kuko uwishyura ashobora no gukoresha amaboko ye igihe nta kindi afite cyamufasha kwishyura afite.

Abagiye begera abo bahemukiye muri Jenoside bagasaba imbabazi barashima ko bazihawe.

Ati “Abangije imitungo yabandi bumve ko ubushobozi bushakwa, bashobora no gukora imirimo y’amaboko bishyura kandi bakabegera bakanabasaba imbabazi kuko ubushake nibwo ngombwa mbere na mbere.”

Minisitiri Busingye kandi yashimye Akarere ka Gisagara ko kagerageje kwihutisha kurangiza imanza z’abaturage kuko mu manza 148.000 bari bafite hasigaye 2.986, mu zarangijwe izigera ku 31.557 zikaba zararangijwe n’inkiko gacaca.

Minisiteri y’Ubutabera kandi yihaye intego ko uyu mwaka wa 2016 ugomba kurangira ibibazo by’imitungo itarishyuwe byarakemutse 100%.

Abahinzi bahinga mu gishanga cy’Akanyaru kiri hagati y’u Rwanda n’u Burundi, kikanakora ku mirenge itandukanye igize Akarere ka Gisagara.

Mu gishanga ahegereye imusozi amazi ntagera mu mirima bigatuma umuceri wuma uteze.

Abagihinga bo mu Murenge wa Mukindo bahamya ko kibafitiye akamaro bitewe n’umusaruro w’umuceri bahavanaga. Gusa kuri ubu ngo nta musaruro bakibona, bitewe n’indwara imaze igihe yibasiye imirima yo mu gice cyegera i musozi ituma umuceri wuma uteze.

Byabateje igihombo ku buryo bamwe basigaye batekereza ko guhinga uyu muceri nta kamaro bikibafitiye, nk’uko uwitwa Ngendahimana Pascal abivuga.

Agira ati “Umuceri utangira kuzamo amata, aho kwera ngo urangize ugatangira kuma, abafite imirima ahagana imusozi rwose nta musaruro tukibona.”

Kamanzi Ildephonse nawe uhinga muri iki gishanga, avuga ko bifuza ko bahindurirwa imbuto kuko ngo bakeka ko byaba biterwa n’imbuto yamaze kurambirwa ubutaka bityo bakaba bagomba indi.

Ati “Iyi mbuto tumaze imyaka ine tuyihinga birashoboka ko yarambiwe ubu butaka, ahubwo ababishinzwe baturebera bakazayihindura.”

Niyitegeka Noella ushinzwe ubuhinzi muri uyu murenge, avuga uku kuma kw’umuceri biterwa n’uko iki gishanga kidatunganyijwe ku buryo buri murima ugeramo amazi, ikindi kandi ngo hanagiye habaho imihindagurikire y’ikirere.

Ati “Igishanga cyacu ntigitunganyije, bityo kuko kitaringanije imvura iragwa ntigere hose, kandi nayo yagiye igwa nabi, ibyo byose bigatuma umuceri utagerwaho n’amazi neza wuma.”

Gutunganya iki gishanga ngo birenze ubushobozi bw’umurenge nk’uko umuyobozi ushinzwe ubuhinzi mu murenge abisobanura, bityo nabo bakaba bahanze amaso Minisiteri ifite ubuhinzi mu nshingano zayo.

Imitungo y’abaturage yangijwe ubwo hanyuzwaga umuyoboro w’amashanyarazi.

Nyuma y’imyaka hafi itatu ahari imitungo yabo hanyujijwe umuyoboro w’amashanyarazi, aba baturage bo mu tugari dutandukanye two mu Murenge wa Nyanza baravuga ko n’ubu batarahabwa ingurane z’iyo mitungo kandi bo barakoze ibyasabwaga byose kugira ngo bishyurwe.

Mukantabana, umwe muri aba baturage wari uhafite ikawa, avuga ko iyo zeraga yabonagamo amafaranga amufasha kwikenura ariko ubu ngo zararimbuwe kandi ntiyanahabwa ingurane yazo.

Ati “Izo kawa zarantungaga rwose, ariko ubu birangora nkabura uko mbigenza kuko ntanahawe ikizisimbura byibura.”

Si uyu wenyine ufite iki kibazo kuko abaturage bavuga ko bari bahafite ibikorwa bitandukanye birimo urutoki n’ibindi bihingwa ariko ubu bose bakaba bamaze imyaka hafi itatu bategereje kwishyurwa ibyabo byangijwe.

Mu babariwe ingurane, harimo ababerewemo imyenda iri hagati y’amafaranga y’u Rwanda ibihumbi ijana kugeza kuri miliyoni.

Abaturage bamaze imyaka ibiri bategereje ingurane, ntibarazibona.

Umunyamabanga Nshingwabikorwa w’Umurenge wa Nyanza, Uwimana Jean Bosco, avuga ko gutinda kwishyura aba baturage byatewe n’amakosa yagiye agaragara mu byangombwa basabwaga kugira ngo babashe guhabwa ayo mafaranga.

Cyakora Uwimana avuga ko aya makosa yamaze gukosorwa ku buryo nibamara kubishyikiriza Akarere ka Gisagara bazahita bishyurwa.

Ati “Ibibazo byagiye bibaho bikanadukerereza ni abo wasangaga baratanze imyirondoro itandukanye na za konti zabo, nk’umugabo agatanga amazina ugasanga kuri konti handitseho umugore, ariko lisite zimaze gukosorwa zoherejwe ku karere, mu gihe gito barishyurwa.”

Ubuyobozi bw’Umurenge wa Nyanza buvuga ko akarere kabusezeranyije ko ubwo amalisite akosoye yabagezeho, mu cyumweru kimwe aba bantu bazaba bamaze kwishyurwa.

Abarezi biyemeje gusakaza umuco w’amahoro bahereye mu banyeshuri babo.

Babitangaje tariki 6 Gicurasi 2016, nyuma y’amahugurwa y’ibyumweru bibiri ku kubaka amahoro, bahawe n’Umuryango Rwanda Peace Education Program.

Bigira Alexis ushinzwe uburezi mu Karere ka Gisagara avuga ko nk’uko ababibye amacakubiri mu Banyarwanda yanagejeje u Rwanda kuri Jenoside yakorewe Abatutsi mu 1994 bafashe umwanya wo kubyigisha, ngo ni ngombwa ko mu kubaka amahoro arambye habaho inyigisho kandi zigatangwa mu byiciro byose haherewe ku bakiri bato.

Bamwe mu barezi bakurikiye aya mahugurwa, bavuga ko na bo bamenye agaciro k’amahoro, bakaba bagiye kwigisha abana bakanabafasha guhindura imyumvire mibi ya bamwe mu babyeyi.

Dusenge Patrick, umurezi mu Murenge wa Ndora ati “Kwigishwa ibijyanye n’amahoro byari bikenewe kuko u Rwanda rwahuye n’inyigisho mbi zitanya abantu. Ni umurimo wacu rero guha ubutumwa bw’amahoro abo turera ndetse n’ababyeyi babo.”

Abarezi kandi bemeza ko hari icyizere ko abagifite ibitekerezo bishobora guhungabanya amahoro y’Abanyarwanda bazahinduka biturutse ku nyigisho nk’izo bahawe, ari na yo mpamvu biyemeje kuba intumwa z’iyi gahunda.

Kayirangwa Anitha, umuyobozi wa gahunda muri Aegis Trust, umwe mu miryango 4 igize Rwanda Peace Education Program, yemeza ko mu turere bagiye batangamo aya mahugurwa, bagiye babona ubuhamya bwiza ku bwiyunge.

Habineza Jean Michel, Umuyobozi wa Rwanda Peace Education Program.

Habineza Jean Michel, Umuyobozi wa Rwanda Peace Education Program, yasabye abarezi kugeza izi nyigisho ku banyeshuri, na bo bakazigeza ku babyeyi.

Yagize ati “Kubaka amahoro arambye birashoboka buri Munyarwanda nashyiraho uruhare rwe bizashoboka.”

Gahunda ya Rwanda Peace Education Program igamije kwereka Abanyarwanda ko amahoro ashoboka nyuma ya Jenoside yakorewe Abatutsi mu Rwanda.

Ibi binyuzwa mu buhamya bw’abagiye bagera kuri aya mahoro, ndetse no mu nyigisho zigaragaza amateka y’Abanyarwanda, abereka ko ari bamwe ntacyo bakwiye gupfa.

yabigarutseho ubwo yifatanyaga n’abaturage bo mu kagari ka Duwani umurenge wa Kibirizi mu Karere ka Gisagara, mu gikorwa cy’umuganda usoza uku ukwezi, kuwa gatandatu tariki 30 Mata 2016.

Umunyamabanga wa leta uhoraho muri MINALOC n’uhagarariye ingabo muri Gisagara batangije inyubako y’Akagari ka Duwani.

Yagize ati “Umurimo niwo soko y’iterambere ryacu, icyo dusaba abaturage ni ukwitabira ndetse no gukunda umurimo, kuko biri no mundangagaciro zacu, nibiturange rero kuko nibwo buryo tuzazamuka.”

Uyu muganda wakozwe wabaye uwo gusiza no gushyira ibuye ry’ifatizo ahazubakwa ibiro by’aka kagari ka Duwani ubusanzwe kakoreraga mu nzu z’intizanyo.

Umuganda mu Karere ka Gisagara kozwe ahazubakwa ibiro by’akagari ka Duwani.

Abaturage b’aka kagari bavuga ko kwiyubakira akagari ari inshingano yabo kandi bagahamya ko bitazabananira kuko gukora ngo babisanganywe, nk’uko uwitwa Nyirimana Innocent yabitangaje.

Ati “Umurimo dusanzwe tuwitabira kandi dufite amaboko, kwiyubakira ibiro by’akagari rero nabyo tugomba kubigiramo uruhare kuko dushoboye.”

Umunyamabanga uhoraho muri MINALOC arasaba abatuye Gisagara kwitabira umurimo.

Ariko hari bamwe mu babyeyi bo muri uyu Murenge wa Kibirizi bavuga ko urubyiruko atari rwose rwitabira gukora, kuko hari abo usanga bakirirwa bazerera mu mihanda rimwe na rimwe ugasanga bafatwa bibye.

Munyeshyaka yahamagariye abatuye aka karere gushishikarira gukora, avuga ko umunsi w’umurimo wizihizwa tariki 1Gicurasi ukwiye kuba uwo kwikebuka buri muntu akareba niba yitabira gukora no kwera umusaruro.

Ubuyobozi bw’akarere ka Gisagara na bwo burashishikariza abaturage kwitabira gukora, kwita ku guhingira igihe cyane ko muri aka karere ari wo murimo w’ibanze uhakorwa, urubyiruko narwo rukitabira kwihangira imirimo no kwiga imyuga.

Uyu musozi wa Kabuye, byemezwa ko wiciweho Abatutsi benshi cyane mu Karere ka Gisagara, kuko mu gihe cya Jenoside yakorewe Abatutsi mu 1994, benshi bahakoranyirijwe babeshywa kurindwa, bakaba ari ho abarenga 10.000 bicirwa.

Abarokotse Jenoside barasaba ko uru rwibutso rwubakwa neza, ababo bagashyingurwa mu cyubahiro.

Mu mwaka wa 1995, bashyinguye iyo mibiri muri za shitingi bitewe n’amikoro make y’igihugu muri icyo gihe. Kugeza ubu, ikaba itarimurwa.

Abafite ababo bashyinguye aho hantu, basaba ko abantu babo na bo bashyingurwa mu cyubahiro.

Karamage Alexandre ati “Ubushobozi bwariho icyo gihe ntitubugaya pe kuko ni bwo twari tugisohoka muri ayo mateka mabi, ariko ubu aho tugeze twabonye ubushobozi. Aba bantu bakwiye guhabwa icyubahiro bakwiye bagashyingurwa neza.”

Ikindi Abanyagisagara barokotse Jenoside yakorewe Abatutsi basaba ni uko uru rwibutso rwagirwa rumwe mu zo ku rwego rw’igihugu, bitewe n’amateka hafite.

Aya mateka arimo ko uwari Perezida wa Leta yiyitaga iy’Abatabazi, Theodore Sindikubwabo, unafite inkomoko muri aka karere, tariki 19 Mata 1994, yaje ahubatse ibiro by’aka karere ubu, ahavugira ijambo rikangurira Abahutu kwica Abatutsi, ibyo bituma benshi babyitabira, hicwa Abatutsi benshi cyane mu gihe gito.

Umuyobozi w’Akarere ka Gisagara, Jerome Rutaburingoga, avuga ko ikibazo cy’uru rwibutso cyizweho cyane mu minsi ishize, ubu bakaba biteguye gutangira kubaka mu kwezi kwa Nyakanga k’uyu mwaka 2016.

Ati “Mu byumweru bibiri, turaba twabonye ibisabwa byose tubishyire mu ngengo y’imari itaha ku buryo mu kwezi kwa Nyakanga, tuzatangira kubaka kandi n’abantu bacu batarashyingurwa mu cyubahiro, tukazabashyingura neza.”

Kugeza ubu, Urwibutso rwa Jenoside yakorewe Abatutsi rwa Kabuye mu Karere ka Gisagara rushyinguyemo imibiri igera ku bihumbi 45.

Habanabashaka Jean Damascène na Mukeshimana Florence batuye mu Murenge wa Kansi mu Karere ka Gisagara, bamaze amezi ane babyaye impanga z’abahungu batatu.

Inka bahawe izabafasha kubonera abana amata.

Uyu muryango ukibona aba bana warishimye uvuga ko ari umugisha, gusa bakagaragaza ko bahangayikishijwe n’uko ubushobozi bwabo bwo kubarera ari buke dore ko bavugaga ko nta tungo bagira bityo ntibabashe kweza n’ibyo bahinga kuko nta fumbire.

Kuri ubu, uwo muryango uvuga ko nta kibazo wigeze uhura na cyo kuko umurenge wakomeje kubafasha, abana bagahabwa amata ndetse mu rwego rwo kubafasha kwiteza imbere mu mibereho yabo bakaba baranahawe inka.

Mukeshimana ati “Umurenge wakomeje kudufasha turakamishirizwa, abana babona litiro eshatu z’amata buri munsi, umugabo nawe agaca inshuro tugashaka uko tubaho.”

Habanabashaka, se w’aba bana, na we yemeza ko nta bwoba bw’ejo habo bagifite kuko bijejwe ubufasha bakabuhabwa, nubwo ngo bitoroshye ariko bishimira ko babona ko batari bonyine.

Ati “Twarafashijwe, tubona amata, abana banahawe mituweri ubu nta kibazo, inyana twahawe na yo nubwo bitoroshye turizera ko nko mu myaka ibiri izaba iduha umusaruro ufatika.”

Mukeshimana Florence akikiye umwe mu mpanga ze.

Jérôme Rutaburingoga, Umuyobozi w’Akarere ka Gisagara, avuga ko uyu muryango batazawutererana mu burezi bw’aba bana bityo ukaba udakwiye kugira impungenge kuko igihe cyose ubufasha buzaboneka ngo buzajya bubashyikirizwa.

Ati “Ikibazo cy’uriya muryango twakigize icyacu kuko nta bushobozi bari bafite kandi tuzakomeza kubafasha uko ubushobozi buzagenda buboneka. Nta mpungenge bakwiye kugira, inka bahawe na yo kandi izabafasha mu buryo burambye.”

Ababyeyi babyarira abana barenze umwe icyarimwe ngo ntibiba byoroshye kubitaho cyane cyane nko k’ubabyaye nta bushobozi buhagije afite, akaba ari yo mpamvu ubuyobozi buba bugomba kubaba hafi cyane cyane igihe abana bakiri bato.

Mu gihe cya Jenoside yakorewe Abatutsi mu Rwanda mu 1994, amwe mu makomini y’ikigize Akarere ka Gisagara nka Muganza, Kigembe, Kibayi n’ahandi yari acumbikiye impunzi z’Abarundi.

i Mugombwa ni hamwe mu ho abatutsi bishwe baviriweho inda imwe n’interahamwe n’abahutu bo mu Burundi.

Bunyenzi Isaïe, warokokeye mu cyahoze ari Komine Kigembe ubu ni murenge wa Nyanza, avuga ko iwabo Abarundi ari bo batije umurindi interahamwe mu kwica.

Ati “Abarundi bari bacumbitse ino ni bo batije umurindi interahamwe, aho twari twahungiye muri komine bakajya badutera amabuye ngo dusohoke badutere amacumu.”

Uretse bamwe muri izi mpunzi, abenshi mu baturage b’Akarere ka Gisagara bavuga ko hari Abarundi bambukaga bagafatanya n’interahamwe kwica abatutsi mu Rwanda.

Uhagarariye Ibuka mu Karere ka Gisagara, Emmanuel Uwiringiyimana, we avuga ko bitari bikwiye, ko ndetse ari agasuzuguro gakabije, aho umuntu yahigwaga na bene wabo b’Abanyarwanda akanahigwa n’abanyamahanga.

Ati “Ni agahomamunwa aho umuntu yicwa n’ab’iwabo akarenga akicwa n’abanyamahanga! Aha muri Gisagara twese tuzi uburyo Abarundi bagiye bafata iya mbere bakanabimburira interahamwe kwica abatutsi.”

Emmanuel Uwiringiyimana, uhagarariye Ibuka mu Karere ka Gisagara, avuga ko ari agasuzuguro gakomeye kubona n’Abarundi bambuka bakaza gukora Jenoside mu Rwanda.

Ubuyobozi bw’Akarere ka Gisagara bwo, buvuga ko bwakoze inshingano yabwo yo gushyikiriza CNLG amakuru ku Barundi bakekwaho iki cyaha.

Jerome Rutaburingoga, Umuyobozi w’Akarere ka Gisagara, ariko avuga ko nta mpungenge icyaha cya Jenoside kidasaza, bityo akaba nta mpungenge ko bazakiryozwa.

Ati “Nubwo byatinda twizera ko aba bantu bazagezwa mu butabera kuko icyaha cya Jenoside ntigisaza.”

Inzibutso za Jenoside yakorewe Abatutsi mu Karere ka Gisagara ziri ahakozwe ubwicanyi burimo Abanyarwanda bafatanyaga n’Abarundi zigaragaza ko uduce zirimo twiciwemo abatutsi benshi.

Urugero ni nko mu Rwibutso rwa Mugombwa rushyinguyemo abarenga ibihumbi 46 n’urwa Kigembe ahitwa mu Gahabwa hashyinguye abarenga ibihumbi 26.

Mu mirenge itandukanye y’Akarere ka Gisagara ubu bari mu gikorwa cyo gutera umuti wica imibu itera Malariya mu mazu y’abaturage.

Abaturage barasabwa korohereza abatera umuti wica umubu utera Malariya.

Raporo za Minisanté zigaragaza ko Gisagara iri mu turere 3 mu Rwanda tukigaragaramo Malariya nyinshi, ngo gahunda yo gutera umuti mu mazu ikaba izakomeza kugeza igabanutse.

Bamwe mubakanguramabaga b’ubuzima batuye muri aka karere ariko, bavuga ko bagihura n’imbogamizi zo kuba abaturage bataramenya akamaro ko gutererwa imiti, hamwe igihe cyose ugasanga ari ukubanza kubigisha, bikagora abatera umuti kuko ubundi baba bagomba gusanga ahaterwa hateguye.

Mukamana Alphonsine umwe mu bajyanama b’ubuzima ati “Ubundi utera umuti agomba gusanga basohoye ibintu mu nzu cyangwa babyegeranyije, ariko ahenshi usanga ntabyo bakoze ari nko kubinginga.”

Gasengayire Clemance umuyobozi w’ akarere ka Gisagara wungirije ushinzwe imibereho myiza y’abaturage, arasaba imikoranire hagati y’abaturage n’abajyanama b’ubuzima kugirango igikorwa cyo gutera imiti irwanya malariya gikorwe neza.

Avuga ko umuturage akwiye kuba umujyanama we ku giti cye, akamenya ikimufitiye akamaro kandi akita ku buzima bwe, akamenya kurwanya ibihuru hafi y’urugo rwe, akirinda ibidendezi by’amazi bireka mu rugo no hafi yahoo.

Ati « Abaturage barasabwa korohereza ababaterera imiti, kandi bakamenya cyane cyane kwirinda ibishobora gukurura iyi ndwara ya malaria.»

Imirenge iterwamo umuti muri aka karere ni ikikije igishanga cy’akanyaru kuko ariho hakunze kwibasirwa na malariya cyane ko muri iki gihe yongeye no kuba nyinshi nk’uko bigaragazwa n’ibitaro by’akarere ka Gisagara aho abaturage basaga ibihumbi 56.000 bagaragayeho malaria kuva uyu mwaka watangira.

Aba ariko ni abagannye amavuriro kuko habarurwa abandi ibihumbi 10.000 barembeye mu ngo zabo aho abajyanama b’ubuzima n’abaganga babasanze mu ngo.

Ku makuru yatanzwe n’umuturage wafunguwe mu Murenge wa Kansi habonetse imibiri mirongo itanu n’itanu. Mirongo ine n’umunani muri yo yari mu cyobo cy’itongo rya bamwe mu bazize Jenoside yakorewe Abatutsi muri uyu murenge mu Kagari k’Akaboti, indi 7 iboneka mu Kagari k’Umunini.

Nyuma y’imyaka 22 muri Gisagara bavumbuye imirambo 70 y’abazize Jenoside yakorewe Abatutsi.

Mu Murenge wa Muganza mu Kagari ka Muganza mu Mudugudu w’Urusaro, mu isambu y’ uwitwa Utabazi Casien ufungiye muri Gereza ya Manga ariko ikaba ituwemo n’uwitwa Shyirambere Pascal na Mukashyaka Josee no mu isambu ya Nzabarinda J Baptiste, na ho habonetse imibiri 25 ku makuru yatanzwe n umuturanyi wabo. Hose bigaragara ko harimo n abana bato.

Bamwe mu barokotse Jenoside yakorewe Abatutsi, bo mu Murenge wa Kansi batashatse ko amazina yabo atangazwa, bavuga ko kuba bose batarabasha gushyingura abantu babo nyuma y’ imayaka 22 biterwa n’abaturage badatanga amakuru.

Bamaze kuyitaburura mu butaka.

Umwe muri bo ati « Birababaje kuba tugishyingura kugera uyu munsi, icyo dusaba ni uko batubwira aho abantu bacu bari tukabashyingura mu cyubahiro.»

Uhagarariye Ibuka mu Karere ka Gisagara, Emmanuel Uwiringiyimana, avuga ko gusanga abantu bahinga hejuru y’imibiri y’abazize Jeoside byagakwiye kujya bihanirwa n’amategeko n’abandi bakaboneraho, kuko ngo na byo ntaho bitandukaniye no gupfobya Jenoside yakorewe Abatutsi mu Rwanda.

Aha niho iyi mibiri yabonetse.

Ati « Birakabije gusanga nyuma y imyaka 22 hari abantu bakibitse imibiri y’abantu bayihinga hejuru! Ibi amategeko akwiye kujya abihanira.»

Muri uyu Murenge wa Muganza, abantu bahakuwe ubuyobozi bwa Ibuka mu Karere bwemeza ko bari hafi cyane ku buryo abahahinga nta kigaragaza ko batari bazi ko bahari.

Ku wa gatanu w’icyumweru gishize ni bwo imibiri yabonetse mu Murenge wa Kansi yataburuwe mu gihe i Muganza ho byabaye kuri uyu wa 4 Mata 2016.

Amakuru Ibuka mu Karere ka Gisagara itanga, avuga ko abantu biciwe mu mirenge ya Muganza na Kansi yo muri ako karere ahanini bishwe n’Abarundi bari baje gufasha interahamwe dore ko iyo mirenge ituranye n’u Burundi.

Imibiri imaze gushyingurwa muri kansi igera ku bihumbi 10 n’102 naho muri Muganza ifatanyije urwibutso na Mugombwa hashyinguwe ababarirwa mu bihumbi 47.

Habura iminsi ibiri ngo hatangizwe icyunamo cyo Kwibuka 22, mu Karere ka Gisagara hakomeje kugaragara imibiri y’abazize Jenoside itarashyingurwa mu cyubahiro.

Mu rwego rwo kwitegura kwibuka Jenoside yakorewe Abatutsi ku nshuro ya 22, hirya no hino abaturage bakora umuganda, cyane cyane basukura inzibutso kandi bakanegera abo iyi Jenoside yasize iheruheru ku buryo butandukanye.

Barasabwa kwita no kwegera birushijeho incike za Jenoside muri iki gihe cyo kwibuka.

Abagore bo mu Murege wa Mbazi mu Karere ka Huye na bo bitabiriye gusukura urwibutso ruri mu murenge wabo kuri uyu wa Gatandatu tariki 2 Mata 2016.

Igikorwa bavuga ko ari ugukomeza guha icyubahiro abahashyinguye kandi ukaba n’umwanya wo gutekereza ku mateka mabi batifuza gusubiramo yaranze igihugu, nk’uko uwitwa Uwimana Alphonsine yabitangaje.

Hakozwe umuganda hitegurwa icyunamo.

Yagize ati “Abacu bashyinguye muri uru rwibutso bazahora bibukwa kandi bazahora ari abacu. Ni yo mpamvu tutatuma aho baruhukiye hagera umwanda.”

Iki gikorwa cyanaherekejwe no kuremera bamwe mu ncike zasizwe iheruheru n’iyi Jenoside.

Salme Ayinkamiye, umwe mu baremewe, yavuze ko iki ari igikorwa cyiza kinaziye igihe akurikije igihe gikomeye Abanyarwanda bagiye kwinjiramo cy’icyunamo, aho asanga babafasha kubona ko batari bonyine.

Ati “Ndashima cyane ko igihe nk’iki batwegera bakadufata mu mugongo biduha kubona ko tutari twenyine cyane cyane mu gihe nk’iki twegereje kwibuka.”

Ibikorwa byo gusukura urwibutso rwa Mbazi.

Christine Niwemugeni, Umuyobozi w’Akarere ka Huye Wungirije ushinzwe Imibereho Myiza, yasabye abagore bo mu Murenge wa Mbazi ko bahorana umutima wo gufashanya, bakajya bita cyane kuri aba babyeyi bagizwe incike na Jenoside yakorewe Abatutsi mu Rwanda.

Ati “Twese nk’ababyeyi ntawe utazi uburyo kuba incike bibabaza, aba babyeyi rero tubabe hafi, twumve agahinda kabo kandi tubafashe gukomera.”

Abakecuru b’incike bagera kuri 15 bo muri uyu Murenge wa Mbazi baremewe, bahawe ibyo kurya n’ibikoresho by’isuku.

Abagore bo muri uyu murenge kandi biyemeje kuzakomeza ibikorwa byo kuremera incike za Jenoside yakorewe Abatutsi, aho bazajya barebera hamwe icyo babafashisha binyuze mu midugudu batuyemo.

Mukarwego Olive na Rumanyika Jean Baptiste ni bamwe mu baturage bahawe inka ku ikubitiro ubwo hatangizwaga iIcyumweru cya Gira Inka Munyarwanda mu Karere ka Gisagara kuri uyu wa 29 Werurwe 2016.

Abagabiwe inka barahamya ko zigiye kubafasha kwikenura.

Aba baturage bavuga ko bari bababyeho mu buzima butoroshye ndetse ko bari bakennye cyane, ariko ngo kuba bagabiwe inka bigiye kubafasha kwikenura mu miryango yabo.

Mukarwego ati “Yewe, ndakennye rwose! Mfite abana bane kandi ngatungwa no guca inshuro, ariko iyi nka mpawe ije ari igisubizo kuko izankenura pe.”

Mukarwego hamwe na mugenzi we Rumanyika, bavuga ko bagiye kujya babona ifumbire bakeza imyaka itubutse kandi inka bahawe zabyara bakitura abandi ariko kandi na bo bagakomeza kwikenura.

Mu bice bitandukanye, abaturage bajya bagaragaza ikibazo cy’uko gahunda ya Gira inka ibonekamo uburiganya, rimwe na rimwe bagasabwa ruswa cyangwa hagahabwa inka ku batari bakwiye kuzihabwa.

Nteziryayo Vedaste, Umukozi w’Akarere ka Gisagara ushizwe Ubworozi, we ariko avuga ko iki kibazo batakigira kuko iyi gahunda igira amabwiriza igenderaho aho abaturage ari bo bihitiramo abagomba guhambwa inka.
Ati “Iyi ni gahunda yubatse ku buryo ifite amabwiriza, aho uhabwa inka aba ari wa wundi utishoboye, ari inyangamugayo kandi ni abaturage mu mudugudu bicara bakamuhitamo.”

Gahunda ya Gira inka yashyizweho na Leta y’u Rwanda ngo ifasha abaturage cyane imiryango itishoboye mu kuzamura imibereho yabo.

Kuva muri 2006 itangiye, Akarere ka Gisagara kamaze koroza imiryango igera ku bihumbi 7848. Muri iki Cyumweru cya Gira inka hakaba hateganyijwe gutangwa izindi nka 100.

Ikigo cy’Igihugu gishinzwe Ubuhinzi n’Ubworozi, RAB, kivuga ko gahunda ya Gira inka mu gihugu hose iteganyijwe gusozwa muri 2017. Icyo ngo hakazaba hamaze gutangwa inka ku miryango ibihumbi 350 mu gihe kuri ubu imaze korozwa ari ibihumbi 228 na 935.

Mbere 2014 abahnzi ba kawa muri uyu murenge, bavuga ko batitabiraga gukoresha ifumbire cyane ku gihingwa cya kawa. Byatumaga hataboneka umusaruro mwinshi nk’uko bikwiye.

Gukoresha ifumbire kuri kawa byazamuye umusaruro wabo.

Twagirayezu Jean Marie Vianney, umwe mu bahinga kawa yemeza ko kuri ubu yamaze kubona itandukaniro ryo gukoresha ifumbire kuri kawa no kutayikoresha.

Agira ati “Igiti kitariho ifumbire kiba kigaragara nta musaruro ubonaho, ariko ikawa yafumbiwe irashisha kandi ikera neza bigaragara.”

Nzamurambaho Innocent, nawe uhinga kawa muri uyu murenge avuga ko mbere ataratangira gukoresha ifumbire kuri kawa ye yabonaga umusaruro muke, ariko ubu ukaba wariyongereye aho yatangiriye kuyikoresha.

Ati “Mbere igiti cya kawa cyashoboraga kwera nk’ibiro bine gusa, ariko ubu iyo nkoresheje ifumbire y’imborera ivanze n’imva ruganda mbona nk’ibiro 20 ku giti.”

Umunyamabanga nshingwabikorwa w’uyu murenge, Bigirimana Augustin, uvuga ko koko impinduka mu buhinzi bwa kawa igaragara kuva aho abaturage bashishikarijwe gukoresha ifumbire bakanabyumva.

Nyamara nk’uko abashinzwe ubuhinzi babivuga, ngo mbere hari abahinzi bafataga iyi fumbire bakayikoresha mu bundi buhinzi.

Bigirimana ariko avuga iki kibazo batagihura nacyo kuko ifumbire ikoreshwa ku buryo bw’umuganda. Yongeraho ko kandi hanakozwe ubukangurambaga buhagije ku buryo abaturage basigaye bumva akamaro k’iyi fumbire kuri kawa.

Ati “Umusaruro wariyongereye kuko n’inganda ebyiri dufite zitajya zibura umusaruro, ibi tugahamya ko biva ku kwitabira gukoresha ifumbire kuri kawa.”

Muri uyu Murenge wa Kigembe ubu harabarirwa ibiti bya kawa bigera ku bihumbi 650 biri ku buso bwa ha zisaga 200.

Muri uyu murenge kandi ubu habarirwa inganda zitunganya kawa zigera muri ebyiri, rumwe rukaba ari urwumuturage ku giti cye urundi rukaba urwa koperative Kigembe Coffee.

Abahagarariye iyi miryango ku rwego rw igihugu, babitangaje kuri uyu wa Gatandatu, tariki 19 Werurwe 2016, ubwo bari mu muganda wo kubakira no kuremera bamwe mu bapfakazi ba Jenoside yakorewe Abatutsi batishoboye bo mu Karere ka Gisagara.

Abagize AERG na GAERG bubakiye abarokotse Jenoside yakorewe Abatutsi mu Rwanda, bo mu Karere ka Gisagara.

Umuhuzabikorwa wa AERG ku rwego rw’igihugu, Mirindi Jean De Dieu, avuga ko nk’urubyiruko, gufasha aba babyeyi batakibashije kandi basigaye ari incike, ari bwo buryo babona bwo gushimira ababyeyi babareze bakabakuza nyuma ya Jenoside.

Ati “Ntitwabona ishimwe rikwiye aba babyeyi batureze nyuma ya Jenoside yakorewe Abatutsi mu Rwanda tukaba tugeze aha, ariko ibi dukora byibura bibe uburyo bwo kubashimira.”

Guverineri w’Intara y’Amajyepfo, Alphonse Munyantwari, yasabye Abanyarwanda kudata indangagaciro.

Guverineri w’Intara y’Amajyepfo, Alphonse Munyantwari, avuga ko iki gikorwa cyakozwe na AERG na GEARG cyerekana ko Abanyarwanda bagifite indangagaciro z’umuco nyarwanda.

Guverineri Munyantwari asaba Abanyarwanda kudata indangagaciro z’umuco kuko ari zo zatumye Abanyarwanda bongera kwiyubaka bakiteza imbere nyuma ya Jenoside yakorewe Abatutsi.

Ati “Akaga twagize katugejeje kuri Jenoside ntikatwambuye umutima, ntikatwambuye indangagaciro ziranga Abanyarwanda, kandi tunazirikana ko nta handi tuvoma imbaraga hatari muri izo ndangagaciro.”

Umukecuru Mukagakwaya Dorcas wubakiwe inzu, yashimiye uru rubyiruko rugiye kumuha aho kuba.

Umwe mu bubakiwe inzu, Mukagakwaya Dorcas, aravuga ko yishimiye igikorwa yakorewe kuko inzu ye yari yaraguye, akaba yari amaze iminsi acumbitse kubera kutagira aho aba.

Ati “Nishimye cyane kuko ubu nari nsigaye ntafite aho kuba nyuma y’uko inzu yanjye iguye.”

Muri uyu muganda kandi hagabiwe inka umukecuru Mukarusine Annonciata wo mu karere ka Huye, ashimirwa kuba yarahishe abana babiri b’abakobwa barokoka Jenoside yakorewe Abatutsi mu 1994, ubu bakaba bariho barubatse ingo zabo.

Urubyiruko rwa AERG na GAERG rwitabiriye uyu muganda ku bwinshi.

Ibikorwa byose byakorewe mu Ntara y’Amajyepfo muri iki cyumweru n’imiryango ya AERG na GAERG bifite agaciro ka miliyoni zisaga 35 z’amafaranga y’u Rwanda.

Mu Karere ka Gisagara hari kubakwa inzu 2. Hakozwe kandi uturima tw’ikoni hanatangwa inka imwe.

Kuri uyu wa 17 Werurwe 2016, abanyeshuri 610 ba Kaminuza Gatorika y’u Rwanda bahawe impamyabumenyi z’icyiciro cya mbere cya kaminuza mu mashami atandatu atandukanye.

Abanyeshuri 610 basoje amasomo mu mashami atandukanye.

Ubuyobozi bw’iyi Kaminuza bwashimye ko abanyeshuri bakoze uko bashoboye uyu munsi bakaba bageze aho bifuzaga kugera.

Musenyeri Rukamba Philip, Umushumba wa Diyosezi Gatorika ya Butare ari na we washinze iyi kaminuza, avuga ko ari ibyishimo bikomeye kubona baha abana ubumenyi, na bo bakabwakira kandi bakerekana ko ababareze batataye igihe.

Musenyiri Rukamba asaba aba banyeshuri kutazapfusha ubusa ubumenyi bahawe, ahubwo bakazabukoresha aho bazahabwa imirimo ndetse ahubwo ibyiza bakazanayihangira.

Basabwe kuzakoresha ubumenyi bahawe biteza imbere.

Yagize ati “Ubumenyi bahawe ntibazabwihererane, ahubwo nibahange imirimo babukoreshe kandi n’aho bazagirirwa icyizere bazagaragaza ko koko hari icyo bamenye bakore neza ibyo bazaba bashinzwe.”

Rukemwa Patrin, umwe mu banyeshuri barangije mu Ishami ry’Ubuzima Rusange (Public health), avuga ko ubumenyi bahawe ry’umurimo bazabasha guhangana ku isoko, banabona uburyo bakizihangira iyabo.

Ati “Ubumenyi twahawe twizeye ko buzaduha kubasha guhangana ku isoko ry’umurimo kandi tugatsinda, tutaretse no kwihangira imirimo.”

Uyu muhango wari witabiriwe n’abayobozi batandukanye.

Alphonse Munyantwari, Umuyobozi w’Intara y’Amajyepfo, na we yasabye aba banyeshuri guharanira guhanga umurimo. Yasabye kandi ababyeyi kwita ku burere bw’abana kuko ari bo barezi b’ibanze.

Ati “Ubumenyi no gukunda kwiga ntibitangwa n’abarimu gusa, ababyeyi bakwiye kwita ku burere bw’abana bakabakundisha nkwiga.”

Mu byo abanyeshuri basabye, harimo kuba bashyirirwaho icyiciro cya kabiri bakazabasha gukomeza amashuri.

Mu banyeshuri 610 bahawe impamyabumenyi abagera kuri 60% ni abakobwa, naho 40% ni abahungu.

Abanyeshuri batandatu batsindiye ku manota menshi bahawe mudasobwa nk’ibihembo. Umwe wagize amanota menshi mu bijyanye n’icungamari ahembwa guhita ahabwa akazi na ECOBANK.

Ibi bijyana no kutitabira n’izindi gahunda z’ubuzima zabagirira akamaro nko kwipimishiriza igihe, bigasaba ko umujyanama w’ubuzima abahozaho ijisho, nk’uko Habumugisha Jean Paul umujyanama w’ubuzima mu Kagari ka Matyazo abivuga.

Ababyeyi ngo bose ntibarumva akamaro ko kwipimisha hakiri kare igihe batwite.

Agira ati “Nubwo dukangurira abagore kwipimisha igihe bakeka ko basamye, hari abakibihishira bakazajya kwipimisha bitinze inda ari nkuru nabwo ari ku ngufu.”

Theoneste Maniragaba, umuyobozi w’agateganyo mu bitaro bya Kabutare, avuga ko uku gutinda kwipimisha bishobora kugira ingaruka ku buzima bw’umubyeyi n’umwana, cyane ko aba agomba gukorerwa ibizami bitandukanye harimo no gupimwa agakoko gatera Sida igihe yanduye agafashwa kubyara umwana muzima.

Ati “Ni ngombwa ko umubyeyi apimwa byibura inshuro enye kandi atangira kwipimisha kare agikeka ko yasamye.”

Babitangarije mu biganiro aba bajyanama b’ubuzima bagiranye n’abasenateri n’abadepite mu nteko ishinga amategeko bagize ihuriro ryita ku buzima n’imibereho myiza, babasuye tariki 11 Werurwe 2016.

Abasenateri n’abadepite basura ibitaro bya Kabutare.

Senateri Sebuhoro Celestin wari uyoboye itsinda, avuga ko nk’intumwa za rubanda baba bagamije ku manuka bakareba gahunda nk’izi za leta uko zishyirwa mu bikorwa, banibutsa abaturage ko izi gahunda ari izabo kandi zibafitiye akamaro.

Ati “Nubwo habaho amategeko ngenderwaho ntitwakwirengagiza ko hari abatayakurikiza n’abatayazi, niyo mpamvu twegera abaturage tubashishikariza kwita kuri gahunda nk’izi zita ku buzima bwabo.”

Abasenateri n’abadepite kandi bibutsa ababyeyi ko kwisuzumisha batwite, ubuzima bw’umwana bugakurikiranwa kuva akiri mu nda na nyuma y’uko avutse agakomeza kwitabwaho uko bikwiye, ari inshingano yabo ikomeye kuko uyu mwana aba atagomba kuvutswa uburengenzira bwe.

Mu Mudugudu wa Gitisi Akagari ka Muganza Umurenge wa Muganza, abenshi mu bahinga mu materasi bavuga ko mbere bari baranze guhinga muri ubu buryo bavuga ko babona ari ukwangiza ubutaka ariko baza kwigishwa bumva ko ari uburyo bwiza bwo kurwanya isuri bemera guhinga none ubu babona umusaruro mwiza.

Amaterasi arabafasha kongera umusaruro

Ngendahayo Camille ati “Reka twabonaga ari ukuducagagurira ubutaka babwangiza tubanza kubyanga, ariko ubu twarabyumvise twatangiye no kubona inyungu.”

Ngendahayo avuga ko bakundaga mbere guhura n’ikibazo cy’ibiza, aho imvura yatwaraga ubutaka n’imyaka yabo igatwarwa bagahomba.

Avuga ko ariko uyu munsi bagenda babona ibyiza byo guhinga ku materasi, aho umusaruro wabo wikubye inshuro ebyiri ku wo babonaga mbere bataratangira guhinga ku materasi.

Nyiramakuba Pascasie nawe uhatuye, avuga ko aho yatangiriye guhinga ku materasi mu mwaka wa 2013, ubu igihe cy’isarura abasha kubona byibura ibiro 100 by’ibigori ahantu mbere yasaruraga ibiro bitarenze 40.

Ati “Kuko twahinze uburyo bw’amaterasi ubu n’ifumbire duhinze igumamo ubutaka ntibutwarwe umusaruro ukiyongera.”

Umunyamabanga Nshingwabikorwa w’Umurenge wa Muganza, Jean Claude Kabalisa, avuga ko ubukangurambaga bwagiye bukorwa bakanabona inyungu zabyo biri mu bahinduye imyumvire imyumvire.

Ati “Mbere abaturage ntibabyumvaga bavugaga ko ari ukwangiza ubutaka, ariko ubu nyuma yo kubona umusaruro waho, n’uburyo birinda ubutaka basigaye babyitabira.”

Muri uyu murenge hari ubutaka bwa hegitari zirenga 150 zihinzeho ku buryo bw’amaterasi. Abahatuye basanga ari uburyo bwiza bwatumye batana no guhomba imyaka kubera ubutaka bwatwarwaga mu gihe cy’imvura.

Imihigo y’urugo ni uburyo abagize umuryango biha gahunda y’ibikorwa bagamije kuzageraho mu gihe runaka. Iyi mihigo ngo usanga ifasha abagize umuryango gushyira umuhati mu bikorwa wahigiye gukora, bityo iterambere rikihuta.

Abaturage b’i kibilizi bageze ku bworozi babikesheje imihigo y’ingo.

Mbarushimana na Mukamabano Agnès bubatse urugo ruri mu Kagari ka Muyira. Bavuga ko mu mwaka wa 2014 bahigiye korora amatungo magufi ariko bakaba barabonaga bibagoye kuko bombi bari batunzwe no guca inshuro.

Bitewe n’uko bari babyiyemeje nk’umuhigo, uyu muryango waje gushakisha amafaranga, ugura ingurube, batangira kuyorora.

Ingurube yaje kororoka ndetse bakajya bagurisha ibyana bakikenura kugera ubwo babashije no kwigurira inka.

Mbarushimana ati “Birashoboka ko iyo tutabishyira mu mihigo y’urugo rwacu tutari kubigeraho ariko ubu twabigezeho. Uyu mwaka utangiye twaguze n’inka ya kabiri.”

Abaturage burya na bo barahiga bakanasinyira imihigo yabo ku rwego rw’Umudugudu.

Nzeyimana Alphonse na we wo muri uyu murenge, avuga ko mu mwaka w’imihigo 2014-2015, yahize kugira ubwisungane mu kwivuza, kujyana abana mu ishuri no korora. Avuga ko yawusoje, byose abigezeho. Muri uyu mwaka wa 2015-2016, yiyemeje kwagura ubworozi bwe.

Ati “Uyu mwaka, nahize korora inka none nabigezeho kuko maze kugura inyana, kandi sinzahagararira aha.”

Aba baturage bemeza ko iyo hatabaho imihigo ituma biyemeza korora, nta mbaraga bari gushyira muri iyi gahunda.

Umunyamabanga Nshingwabikorwa w’Umurenge wa Kibirizi, Kabogora Jacques, avuga ko iyi gahunda ituma umuturage agira intego ndetse ngo akanakorera kuri gahunda. Ibyo ngo bituma iyo umuhigo yihaye awesheje, agira imbaraga zo kugera ku bindi byisumbuyeho.

Ati “Iyi gahunda (imihigo y’ingo) ni nziza, ituma umuturage ahaguruka agakora kugira ngo abashe kugera ku byo yiyemeje ndetse ubutaha akanatera indi ntambwe.”

Gahunda y’imihigo y’ingo muri buri mudugudu ishyirirwaho itsinda rishinzwe gukurikirana uko igenda ishyirwa mu bikorwa, bigatuma hatabaho kwirara no kwirengagiza ibyo umuturage yahize.

Irembo ni urubuga ruzajya rufasha abaturage gusaba ibyangombwa mu buyobozi bakoresheje gusa telefoni igendanwa, binyuze mu butumwa bugufi, umuntu akishyura akoresheje MTN Mobile Money, Tigo Cash na Airtel Money.

Hahuguwe abakozi bazajya bafasha abaturage badasobanukiwe n’ikoranabuhanga.

Abakozi ba Rwanda Online Platform Limited banashinzwe guhugura abakozi mu turere kuri izi serivisi, bavuga ko ubutumwa bugaragaza ko umuturage yishyuye buzajya bugera ku muntu ushinzwe gutanga serivisi maze agende amuhe icyangombwa yasabye nta kundi gusiragira.

Muhoza Marius ushinzwe ibikorwa by’ubucuruzi muri Rwanda Online Platform Limited, avuga ko basanze ari uburyo bwiza buzafasha abanyarwanda gushyikira serivisi bifuza byihuse.

Muhoza Marius ushinzwe ibikorwa by’ubucuruzi muri Rwanda Online Platform Limited.

Agira ati “Ikigambiriwe ni ugufasha umuturage akabona serivisi byihuse, abakozi babihuguriwe bazajya bafasha ubikeneye wese kandi umuntu yishyure amafaranga asanzwe yishyurwa gusa ku cyangombwa akeneye.”

Muhoza avuga ko hakiriho imbogamizi nko kuba ahantu hose ahatagera imiyoboro ya internet, n’abaturage bamwe batazi gusoma no kwandika ku buryo batabasha kwikorera ubu busabe.

Mu korohereza abaturage hahuguwe abakozi b’iki kigo bazajya bakorera mu mirenge, bakajya bafasha abaturage gusaba serivisi bakeneye nta kindi kiguzi.

Renzaho Jean Damacène, umunyamabanga nshingwabikorwa w’Umurenge wa Ndora avuga koko ubu buryo buzahindura byinhi mu kazi.

Ati “Nta muturage uzongera gusiragira, kuko bamaraga umwanya ku mirongo muri banki cyangwa ku bio by’abayobozi ariko ubu buryo buzabyoroshya.”

Renzaho Jean damacene umunyamabanga nshingwabikorwa w’Umurenge wa Ndora.

Umyamabanga nshingwabikorwa w’akarere Mvukiyehe Innocent, yemeza ko bizafasha abaturage kandi nabo nk’akarere bakazagerageza gushaka ibisubizo ku mbogamizi zikigaragara zabangamira iyi gahunda.

Ati “Imbogamizi ntizabura, nko kuba hari abatazi gusoma no kwandika, ariko kwigisha ni ughozaho tuzakomeza guhugura abantu babyumve.”

Iyi gahunda imaze kugezwa mu turere dutatu Gasabo, Kicukiro na Gisagara ariko bitegenyijwe ko izagezwa mu gihugu hose.

Kuri uru rubuga hasabirwaho serivisi zitandukanye, zirimo kwaka icyangombwa cy’ubutaka, icy’ivuka, icy’uko utafunzwe, icy’uko uri ingaragu cyangwa washatse n’izindi nyinshi zirimo kwandikisha ubutaka n’uruhushya rwo gutwara ikinyabiziga cyangwa kurukorera.

Bamwe mu batanze ayo mafaranga bavuga ko uwo muntu yaje yiyitiriye ikigo cy’igihugu gishinzwe gukwirakwiza amashanyarazi REG, bakamuha amafaranga miliyoni 3,3Frw ngo abazanire amashanyarazi.

Umutekamutwe yabasezeranyije amashanyarazi bamuha miliyoni 3Frw.

Uwitwa Minani avuga ko uwo muntu yatangiye kubazanira aya mashanyarazi, ku buryo mu miryango 33 yari yatanze aya mafaranga igera kuri irindwi yari yatangiye gucana. Biza guhagarara ubwo abakozi b’iki kigo babimenyaga bakaza kubihagarika.

Agira ati “Twari dukennye umuriro twifuza natwe iterambere, umuntu rero atwijeje kuwutuzanira ntitwazuyaje none batubwiye ko yari umutekamutwe.”

Bifuza ko nubwo icyo kibazo cyabayeho kitagombaga gutuma babuzwa gucana, ahubwo REG ikwiye gukomerezaho kugira ngo na ho terambere ntirihagarare.

Bahagarikiwe gucana kuko umuriro batawuhawe na REG.

Jean Pierre Maniraguha, ukuriye REG mu Turere twa Huye na Gisagara, avuga ko basanze bimwe mu bikoresho uyu yakoresheje nk’insinga, zitari zujuje ubuziranenge ku buryo zashoboraga no guteza impanuka, akaba ari mpamvu zakuweho abaturage ntibongere gucana.

Ati “Twiteguye guha aba baturage amashanyarazini kuko ni na cyo cyari kitujyanye ubwo twabonaga iki kibazo."

Avuga ko bagitegereje ko ubutabera burangiza akazi kabwo ko gukurikirana uwo "mutekamutwe", bagashaka uko bageza amashanyarazi ku baturage.

Biteganyijwe ko uwo muntu ukurikiranyweho kurya amafaranga y’abaturage, azishyura amafaranga yabariganyije, akongeraho n’indishyi z’akababaro kuko yamaze gutabwa muri yombi.

Insinga zari zimaze gukoreshwa hatangwa umuriro zari zimaze kugera ku burebure bwa kilometero 1,2 ariko abahawa amashanyarazi bagitegereje za cash-powers.

Ubuyobozi bwa REG burasaba abaturage kwirinda abatekamutwe, mu gihe bakeneye serivisi zijyanye n’amashanyarazi bakagana ikigo kibishinzwe.

Kuva muri 2014, abatuye Umurenge wa Kigembe bagaragazaga ikibazo cyo kutagira uruganda rutunganya ibigori mu murenge wabo kandi babyeza cyane kuko bavuga ko ku mwero wabyo beza toni zirenga 2000.

Uru ruganda ngo rwabaruhuye ingendo zo kujya gushesha ibigori i Huye.

Muri uyu mwaka wa 2016 ariko babonye uruganda rukorerwamo na koperative KOZAKI (Koperative Zamuka Kigembe).

Kutagira uruganda rutunganya umusaruro w’ibigori ngo byatumaga babirya nabi, kuko imashini zahabonekaga zasyaga nabi, bakenera ifu iseye neza bagakora ibirometero birenga 30 bajya mu Mujyi wa Huye gushesha.

Uwimpaye Madelene, umwe muri bo, ati “Reka mbere twangizaga ibigori byacu tukabirya biseye nabi, none ubu tubona ifu ya kawunga nziza.”

Aba baturage ariko bavuga ko nubwo baboye uruganda hafi ifu ya kawunga bakiyigura ibahenze kuri iri ku mafaranga 450 y’u Rwanda ku kiro.

Nzeyimana ati “Ni byiza rwose twishimiye kujya turya neza ariko ifu irahenda pe, ku muturage 450 ni menshi kandi natwe tunahinga ibigori.”

Ubuyobozi bwa KOZAKI ariko buvuga ko iki giciro kitazahoraho, kandi bugasobanura ko cyashyizweho bitewe n’uko uruganda rwatangiye gukora atari ku mwero w’ibigori bikaba ngombwa ko bakoresha ibyo barangura muri Uganda ku mafaranga 220 y’u Rwanda ikiro.

Ngo nyuma yo kubona uruganda rwa kawunga ntibakirya ibigori biseye nabi.

Iki giciro ariko, ngo kiri hafi guhinduka kuko ku mwero w’ibigori by’abaturage batuye muri uyu murenge hazajya hifashishwa ibyabo, bakabona isoko n’ifu ikagabanya igiciro kuko bazaba barangura hafi.

Christophe Ngendahimana, Umucungamutungo wa KOZAKI, ati “Mu gihe gito tuzaba tugura ibigori by’ino iwacu, turi kuvugana na koperative zibihinga tuzumvikana igiciro, maze natwe tujye tubaha ifu ku giciro kiri hasi kizagenwa nyuma y’ibiganiro.”

KOZAKI ivuga ko ifite kawunga nziza icishwa mu mashini inshuro eshatu, ku munsi hakaba hagurishwa ibiro biri hagati ya 300 na 500, bakemeza ko biziyongera uko bazagenda bamenyekana.

Abo baturage bagenda bagaragaza uburyo bavuye mu cyiciro cy’abatishoboye bakazamuka babikesheje gahunda yo guhuza ubutaka aho basigaye boroye ndetse bakanabasha kwita ku ngo zabo.

Biteze umusaruro mwinshi w’ibigori kubera guhuza ubutaka.

Nsanzamahoro Alphonsine, umwe muri bo, avuga ko mbere y’umwaka wa 2014 yabaga mu cyiciro cy’abakene bakabije, ahora mu buyobozi asaba inkunga kuko atabashaga kwita ku muryango we.

Ibi ariko ngo byagiye bihinduka nyuma yo gushyirwa mu baturage batizwa ubutaka bakajya bahinga bahuje ubutaka, buke buke agenda ava mu bukene bukabije yarimo.

ati “Natangiye guhinga mpuje ubutaka muri 2014, mpinga ibigori ndagurisha ngura inyana ndorora, nsana inzu yanjye ubu nta kibazo mfite.”

Nsengiyumva Mathieu, na we avuga ko muri 2015 yabashije kwizigama amafaranga agera ku 100.000 y’u Rwanda ayakuye mu bigori yahinze, akaba anavuga ko bizeye kubona umusaruro wisumbuyeho bakurikije uko babona ibiri mu murima.

Ati “Mbere sinabashaga no kwizigama igihumbi, nahoranaga ubukene kuko ntacyo nezaga, mbarirwa mu batishoboye, none ubu nditunze kandi nkanizigama.”

Valens Ndatimana ushinzwe Ubuhinzi mu Murenge wa Kansi, we avuga ahamya ko hakozwe ubukangurambaga abaturage bakitabira guhinga ibigori batabivanze indi myaka mu gihembwe cy’umuwaka A 2016, n’ikirere kikaba cyiza, bityo bakaba bizeye umusaruro mwiza.

Ati “Twiteguye umusaruro mwiza cyane w’ibigori kuko abaturage bitabiriye kubihinga nk’igihingwa cyatoranyijwe kandi bigaragara ko imvura yaguye neza.”

Mu \murenge wa Kansi, mu gihembwe cy’ihinga A 2016 hahinzwe hegitari 517 z’ibigori, ku busanzwe zeraho toni 1950 ariko bakavuga ko ubu zishobora kuzarenga kuko ibigori bafite mu mirima bigaragaza ko byarumbutse.

Abo baturage bakora umuhanda mu Mudugudu w’Agatare, Akagari k’Akaboti, bavuga ko kubona akazi muri ibi bikorwa byababereye nk’amahirwe kuko bari babonye aho bakura amaramuko ariko kudahemberwa igihe bigatuma imibereho yabo igorana.

Guhabwa akazi muri VUP byarabagobotse ariko kudahembwa ngo birabazahaje.

Bavuga ko mu masezerano yabo harimo ko bazajya bahemberwa iminsi 15 bita “ikenzene”, ariko ngo mu minsi igera kuri 75 y’amezi abiri n’igice bamaze bakora (amakenzene 5), bahembwe kabiri gusa.

Ngo byatumye batabasha gukemura ibibazo byabo uko bigomba, kandi ntibanabona ahandi bakura amafaranga kuko aho baba bayiteze ari muri ako kazi.

Jean Baptiste Rugambage, umwe muri abo baturage, avuga ko mu minsi ya mbere ahemberwa iminsi 15 ye inshuro ebyiri yari amaze gukora, byamufashije cyane kuko yabashije kugurira umuryango we wose ubwisungane mu kwivuza, ubu ariko ngo akaba akeneshejwe n’uko amaze igihe adahembwa.

Ati “Aka kazi karangobotse mbasha gukemura ibibazo by’umuryango ariko ubu noneho nasubiye inyuma rwose kubera kudahembwa, nibatugeragereze ntibyoroshye.”

Hakizimana François, Umukozi wa VUP mu Karere ka Gisagara, avuga ko iki kibazo kizakemuka mu minsi ya vuba ariko ntavuge umunsi nyawo.

Hakizimana avuga ko byatinzeho gato kubera ko bari kunoza urutonde rw’abakora no kugira ngo bose bafunguze amakonti yo guhemberwaho muri SACCO. Ibi byose ariko ngo bikaba byaramaze gukorwa n’amafaranga akaba yarateguwe.

Ati “Twaratinze kuko twarimo tunoza urutonde rushya, hanafunguzwa za konti ariko ubu byarakemutse mu minsi mike cyane barabona amafaranga kuko na yo yamaze gutegurwa.”

Muri uyu Murenge wa Kansi, imirimo y’amaboko (public works) yagiye igabanuka, n’umubare w’abayikoragamo uramanuka. Mu mwaka wa 2014 abakoraga muri VUP (public works) bari 308 none ubu hasigayemo abagera kuri 94.

Imirimo iri gukorwa ni amateme, imiyoboro y’amazi n’imihanda ihuza utugari ireshya na km 20. Imaze gukorwa ireshya na km15.

Abahinga mu gishanga cya Rusuri mu murenge wa Rubona mu karere ka Huye, bemeza ko mu myaka itatu bamaze bakoresha uburyo bushya bwo guhinga umuceri bigishwa n’abashinwa, umusaruro wabo waravuye kuri toni 2 kuri hectare ukagera kuri toni 7 kuri hectare.

Bigishwa uburyo bushya bwo guhinga umuceri

Aba bahinzi bavuga ko uburyo bushya bakoresha atari ikoranabuhanga rihambaye kuko ngo n’amafumbire bakoresha ari ayo bari basanzwe bakoresha, gusa bakaba barigishijwe ubundi buryo akoreshwa kandi hakifashishwa imashini.

Muhimpundu na Munyaneza bamwe mu bahinga iki gishanga bati «Twigishijwe uburyo bushya bwo guhinga no gusarura, ntibugoye kandi buduha umusaruro mwinshi rwose »

Aha bavuga ko iryo koranabuhanga ari ugusarura no guhura umuceri bakoresheje imashini,ugushyira ifumbire mu butaka mbere y’uko barima kugira ngo izivange neza n’ubutaka, gutunganya imirima hacibwamo imirongo ikamura amazi mu muceri ndetse no kubagara buri minsi 15.

Abaturage bahabwa imbuto nyuma bakanagurirwa umusaruro n’abashinwa

Hu Ying Ping, umushinwa uyobora China Rwanda Agriculture Technology Demonstration Center, avuga ko uburyo bushya bwo guhinga umuceri bigisha abahinzi bwaje bukosora bimwe mu bikorwa nabi muri ubu buhinzi

Bimwe mu byo ubu buryo bwakosoye ngo harimo nko kutita ku gihe cyiza cyo guhinga umuceri bitewe n’ubwoko bwawo, gupfusha ubusa ifumbire bayishyiramo nyuma yo guhinga igatwarwa n’imvura ndetse no kutita ku ngano y’amazi umuceri uba ukeneye.

Umuhuzabikorwa w’ikigo cy’ubushakashatsi n’iyamamazabuhinzi ku ikoranabuhanga mu buhinzi muri RAB Niyimbabazi Obedi, avuga ko hari gahunda kugeza iri koranabuhanga mu gihugu hose kugira ngo abahinzi barusheho gutera imbere.

Umusaruro wavuye kuri Toni 2 ugera kuri 7

Ati “Abahinzi bahuguwe muri ubu buryo bushya bwo guhinga umuceri bagenda bahindurwa kugira ngo bigere kuri benshi”

Abahinzi bo mu gishanga cya Rusuri ikindi bungukira muri iyi gahunda ni uko China Rwanda Agriculture Technology Demonstration Center ibaha imbuto, ikabatiza ubutaka bwo kugeragerezaho iri koranabuhanga, ikanabagurira umusaruro beza.

Uyu wagaragayemo ubuharike bukabije muri Gisagara mu 2015, ariko biturutse ku nyigisho n’inama abaturage bawo baherwa mu nteko z’abaturage no mu mugoroba w’ababyeyi, ubuharike bukabije bwahavugwaga buragenda bugabanuka.

Inteko z’abaturage n’umugoroba w’ababyeyi birimo guca ubuharike mu Karere ka Gisagara.

Ubuyozozi buvuga ko mu umwaka ushize, bari bafite ingo 120 zigaragaramo ubushoreke, aho abagabo babaga bafite abagore ku ruhande.

Umwaka ujya gushira baragabanutse hasigara ingo 80; none bigeze muri iyi Gashyantare 2016, hasigaye ingo 41.

Mu kugaragaza uburyo iki kibazo cyari kimaze gufata intera, ubuyobozi bw’umurenge bwatanze urugero rw’umugabo w’imyaka 24 ugize abagore batatu n’abana icyenda.

Bamwe mu baharitswe na bo bagenda batanga ubuhamya bw’ububi bwabyo, bavuga ko bikurura umwiryane mu miryango, ubukene n’inzangano, nk’uko Rose Mukamunanira, umwe mu bari baharitswe abitangaza.

Agira ati “Ariko ubundi mwabonye he abagore babiri mu rugo rumwe? Njye nabonaga inshoreke y’umugabo wanjye izanyivugana. Twahoraga dupfa umugabo, abana na bo bikabatera umunabi.”

Jean Baptiste Kayinamura ushinzwe irangamimerere mu Murenge wa Gishubi, avuga ko bagiye bategeka abagabo baharika kuguma mu ngo zabo zifite isezerano, abagore bagiye bacumbikira ku mpande bakabasubiza mu miryango babaga baravuyemo.

Ati “Twagiye twumvisha abagabo ko kugira ingo nyinshi ari ukwiteza ibibazo, cyane ko usanga nta n’ubushobozi.”

Icyakurikiyeho ngo ni uko abakobwa babaga baracumbikiwe n’abagabo barabagize abagore bo ku mpande, basubijwe mu miryango yabo.

Basanze kandi bagomba gushyira imbaraga mu mugoroba w’ababyeyi kugira ngo barandure ubuharike, ku buryo abagabo basigaye bawitabira bakaganirizwa, bakanagirwa inama kandi ngo biratanga umusaruro mwiza.

Byagarutsweho na bamwe mu barezi n’abayobozi bitabiriye ibirori byo guha impamyabumenyi abarimu 6 barangije amahugurwa y’imyaka 2 ku kwigisha abana bafite ubumuga bwo mu mutwe, bahererwaga muri mu Kigo Amizero y’Ubuzima kiri mu Murenge wa Kibirizi mu Karere ka Gisagara.

Ambasaderi w’Ubudage mu Rwanda ashyikiriza umwe muri abo barezi impamyabumenyi.

Niyonzima Jean Nepo, umwe muri abo barezi, ati « Ni abana nk’abandi, ababyeyi ntibakwiye guhishira abana bafite ubumuga bwo mu mutwe kuko biri no mu bibabuza amahirwe y’ejo hazaza kandi bigaragara ko uko bitaweho bahindura imibereho.»

Mukarwego Esperence, urerera mu Ishuri Amizero y’Ubuzima, avuga ko umwana we yari umwana uhora acira inkonda, nta ngufu agira mu ngingo, bigatuma abaturanyi ndetse n’abo mu muryango bamunena bakanamuheza mu bandi bana, bikamutera guhorana na nyina mu gikari aho abandi batabona.

Ngo yaje kugirwa inama yo kumujyana muri iryo shuri none mu gihe cy’imyaka 2 ahamaze ubu azi kwisukura, ntagicira inkonda, aramesa, akanahirira ubwatsi amatungo nk’uko umubyeyi we abyemeza.

Ati « Iki kigo cyankuye mu gahinda k’umwana nagiraga ari we mfura, ubu ni umuhungu mwiza ni umwana nk’abandi ndamutuma akantumikira.»

Abarezi bahawe impamyabumenyi nyuma y’imyaka 2 bahugurwa.

Depite Speciose Mukandutiye, wari witabiriye iki gikorwa, avuga ko nta mubyeyi wagakwiye kuba agiterwa ipfunwe n’ubumuga bw’umwana we, kuko ubu abafite ubumuga bahawe ijambo kandi byanagaragaye ko iyo bitaweho hari byinshi bihinduka mu mibereho yabo.

Ati « Aba ni abana kimwe n’abandi, ababyeyi ntibakagire uwo babuza amahirwe kuko ntawe umenya icyo umwana azaba ejo. Nibabaganishe mu bigo nk’iki byabugenewe bitabweho kuko na bo barashoboye.»

Abana bafite ubumuga bwo mu mutwe ngo iyo bitaweho imibereho yabo ishobora guhinduka.

Ikigo Amizero y’Ubuzima cyashinzwe muri 2011 ku nkunga y’Ubudage, kimaze kurera abana barenga 400 bafite ubumuga.

Kuri ubu, abahiga ni 178 ariko kiritegura kwakiraabandi 24. Abamaze gukura bagiye kujya bigishwa imyuga itandukanye izajya ibafasha kwizamura mu gihe kizaza.

Umwaka ushize gahunda ya Leta yo guteza imbere imirenge ikennye izwi nka VUP, yatanze akazi kuri benshi mu batuye muri uyu murenge, binyuze mu mushinga w’ikigega cya Leta kirengera ibidukikije (FONERWA).

Imirimo babonye ibafasha kwizigama ngo bazakore imishinga ibyara inyungu.

Muri uyu mushinga haba hacibwa imirwanyasuri hanakorwa amaterasi y’indinganire mu rwego rwo kubungabunga ikibaya cy’Uruzi rw’Akanyaru.

Munyakazi Silvain w’imyaka 23, wahawe akazi n’uyu mushinga, avuga ko kuba yari yaracikirije amashuri, byamucaga intege akibaza ko atazava mu bukene. Ariko mu mezi umunani amaze akora mu materasi amaze kwigurira amatungo 10 magufi kandi aracyanayongera.

Agira ati “Maze guhembwa kabiri naragiye ngura ihene eshatu, ngenda nzongera ubu ngize 10 kandi ndateganya kuzamuka nkagera ku nka nkaba umworozi ugaragara.”

Mukantwari Venancie, na we ukora muri ayo materasi, avuga ko kubona akazi byatumye ahindura imibereho ubu akaba abasha kwiha icyo akeneye mbere atarabashaga no kwigurira isabune.

Nubwo iyi mirimo ifite gahunda yo kurangira mu myaka itatu, abakoramo bavuga ko biyemeje kuyibyaza umusaruro bizigamira amafaranga bakorera akababyarira ibindi bikorwa.

Nzeyimana Jean avuga ko uretse gukora ibikorwa bijyanye n’ubworozi, bizigamira kugira ngo amafaranga nagwira bazayabyaze indi mishanga. Ati “Maze kwizigama ibihumbi 100 nagwira nzagura isambu yo guhingamo.”

Umunyamabanga Nshingwabikorwa w’Umurenge wa Mukindo, Moïse Ndungutse, ahamagarira abifuza imirimo kwitabira kuko ihari.

Mu bikorwa bya VUP muri uyu murenge, harateganywa gutangira ikindi cyiciro cy’imirimo y’amaboko izatanga akazi ku baturage bagera kuri 600, bazaba bakora umuhanda uhuza Umurenge wa Mugombwa na Mukindo ufite ibirometero 11.

Biteganijwe kandi ko ibikorwa byo kugeza amazi meza muri uyu murenge, na byo bizaha abandi baturege bagera kuri 200 akazi.

Muri uyu murenge abagera ku 2.000 bamaze kubona akazi bahawe n’uyu mushinga wa FONERWA. Bitatu bya kane byabo ni urubyiruko, bituma iyi gahunda ifatwa mu zagabanyije ubushomeri muri uwo murenge.

Uwitwa Mukamabano Claudine w’imyaka 21 wamaze gutandukana n’uwo babanaga, asobanura ko mu myaka ibiri ishize, muri aka karere hakunze kugaragara ikibazo cy’urubyiruko rwishyingiraga bakiri bato, bakavuga ko byaterwaga n’ubukene no kutagira icyo bakora, cyane cyane ku bakobwa.

Benshi mu rubyiruko bagiye babona imirimo none ntibakishyingira batagejeje igihe.

Agira ati “Kutagira akazi n’ibibazo byo mu muryango byari byaratumye nsanga umusore turabana, ariko nyuma biranga no kubana nta sezerano, byose bituma dutandukana.”

Mutunzi Jean Paul, umwe mu rubyiruko rukomoka muri aka gace, avuga ko imirimo yagiye iboneka kubera gahunda za Leta zitandukanye nka VUP, yafashije benshi kureka kugwa muri ibyo bishuko byo kwishyingira.

Ati “Ubu twagiye tubona imirimo muri VUP, abandi bajya mu matsinda y’urubyiruko ku buryo ubona duhugiye mu gushaka imibereho.”

Ubuyobozi buvuga ko ariko iki kibazo kitararangira burundu, ikaba ari na yo mpamvu ubukangurambaga ku rubyiruko bukomeza gukorwa hifashishijwe urundi rubyiruko rw’intore n’abaruhagarariye mu nzego zitandukanye.

David Ntiyamira, Umunyamabansha Nshingwabikorwa w’uyu murenge, avuga ko bivuye kuri VUP n’indi mishinga mito yagiye iza igaha akazi bamwe mu rubyiruko, abasaga 60% mu rubyiruko rutiga, babonye imirimo.

Ati “Ubu ntitugihura n’iki kibazo cyane kuko ubu tubashishikariza gukora bakigira, kandi bakaba baranabonye imyanya mu bikorwa nko gutunganya imihanda, amaterasi n’ibindi.”

Ubuyobozi bw’Umurenge wa Musha buvuga ko 40% basigaye badakora mu mishinga, usanga abenshi ari abakihambiriye ku babyeyi no mu mirimo yo mu rugo ariko ntibazerere.

Uru rubyiruko ruvuga ko n’amakimbirane yo mu miryango yabigiragamo uruhare, abana bayahunga bigatuma bashinga izabo bakiri bato ariko na zo ntizirambe.

Abatowe mu Mudugudu wa Gahondo mu Kagari ka Dahwe mu Murenge wa Ndora ho mu Karere ka Gisagara, bose icyo bagiye bahurizaho ni iterambere bazaharanira kugeza ku baturage bashinzwe, binyuze mu bikorwa bitandukanye cyane cyane kwibumbira mu makoperative.

Bijeje ababatoye kuzabafasha gutera imbere binyuze mu makoperative.

Ruyenzi Emmanuel, wahoze ari Umukuru w’Umudugudu wa Gahondo yongeye kugirirwa icyizere n’abaturage yiyemeza gukomeza ubuvugizi buganisha ku iterambere, gushishikariza abaturage bo mu mudugudu we kwigira ndetse no guharanira kwiyubakira igihugu binyuze muri gahunda zitandukanye nk’uko ngo yari asanzwe abikora.

Atanga urugero avuga ko yashishikarije abatuye Gahondo kwikorera imihanda none bakaba baratunganyije utuyira twose two mu mudugudu, avuga kandi ko bitabira gutanga ubwisungane mu kwivuza neza, ibyo batarageraho na byo nk’amashanayarazi akaba ateganya gukomeza ubuvugizi bakayegerezwa.

Ruyenzi wanagize uruhare runini mu gushinga koperative y’abahinzi b’umuceri ikorera muri uyu mudugudu akaba anayibereye umunyamabanga.

Avuga ko icyo azashishikarira ari ukumvisha abaturage batarajya mu makoperative kwitabira kuyajyamo kuko avuga ko we yabonye ubwiza bwabyo.

Ati “Nagiye ntera imbere mva muri ntuye nabi ndiyubakira, sinjya mbura mituweri, ibi ndashaka ko buri mu turage wa Gahondo abigeraho, abivanye kuri koperative.”

Abaturage barasaba ubuvugizi bakabona ibikorwa remezo cyane cyane amashanyarazi.

Abatuye uyu mudugudu, na bo bavuga ko bongeye kugirira icyizere Ruyenzi kuko basanga abafasha mu nama nziza abaha, ubuvugizi abakorera ndetse akanita ku kibazo cya buri wese.

Nyiramanywa Venerande ati “Asanzwe atuyobora neza, ni akomeze wenda azatuzanira n’amashanyarazi yageze ahandi, jye ni na cyo musaba ngo akorere ubuvugizi.”

Ruyenzi yiyemeje kuzakoresha imbaraga afite akitangira iterambere ry’Umudugudu wa Gahondo na we kandi agasaba abaturage kuzemera gufatanya na we mu rugamba rwo kwiteza imbere.

Mu isomwa ry’urubanza ryabaye kuri uyu wa Gatanu, tariki 5 Gashyantare, urukiko rwasanze icyaha Rwabidadi akurikiranyweho kiremereye, butegeka ko afungwa by’agateganyo mu gihe cy’iminsi 30 nk’uko byari byasabwe n’ubushinjacyaha.

Urukiko Rwisumbuye rwa Huye rwategetse ko Rwabidadi Aimable afungwa by’agateganyo igihe kingana n’iminsi 30.

Rwabidadi Aimable, umukozi wa Minisiteri ya Siporo n’Umuco (MINISPOC) wari ushinzwe gutanga mazutu yakoreshwaga muri moteri yacaniraga Stade ya Huye igihe cya CHAN na Mbabarempore Deleon wari ushinzwe kugenzura imikorere y’iyi moteri, bari bamaze ibyumweru 2 mu maboko y’ubutabera.

Rwabidabi arashinjwa kunyereza umutungo wa Leta bitewe no kuba yaraguraga mazutu nke kandi afite ubushobozi bwo kugura ihagije, kugera ubwo moteri yaje kuzima, umukino wahuzaga ikipe ya Cameroun n’iya Ethiopia ugahagarara iminota 12.

Ibi kandi biranashingirwa ku mpapuro zihesha mazutu yasanganywe zifite agaciro ka
miliyoni 1 n’ibihumbi 300 by’amafaranga y’u Rwanda zagiye zisaguka ku yindi mikino, akaba atari yaragiye azerekana ku kazi ke ngo zibe zaherwaho igihe hakenewe indi mazutu. Ubushinjacyaha bukavuga ko bwari uburyo bwo gushaka kunyereza aya mafaranga.

Ibyo Rwabidadi aregwa, ari we n’abamwunganira barabihakana ndetse bakavuga ko ikibazo cyabayeho cyari ikibazo kidafite aho gihuriye na mazutu, byongeye hakaba hari mazutu iteretse itegerejwe gushyirwa muri moteri; bityo akavuga ko nta mutungo yanyereje nta n’isano afitanye n’izima rya moteri.

Mbabarempore Deleon we wagenzuraga iyi moteri arashinjwa ubufatanyacyaha, nubwo ntaho yahuriraga n’amafaranga agura iyi mazutu.

We ariko yagiye yiregura avuga ko yagaragarije Rwabidadi ingano ya mazutu ikenewe ntagire icyo abikoraho, akavuga ko hari hagiye hagurwa mazutu nke nyamara yagaragaje ikenewe, akirinda kwinjira mu kazi ka mugenzi we kuko yari yamubwiye ko afite uburambe buhagije mu byo akora.

Avuga kandi ko nta kindi kibazo cyabayeho uretse icya mazutu kuko imaze kongerwa muri moteri yahise yaka.

Aba baregwa bombi basabaga gukomeza gukurikiranwa bari hanze, ariko urukiko rumaze kumva ubushinjacyaha, bwasanze kuri Rwabidadi, hakurikijwe ibyo aregwa n’uburemere bw’icyaha akekwaho, yaba afunze by’agateganyo igihe kingana n’ukwezi hakorwa iperereza.

Kuri Mbabarempore, ngo kuko nta bimenyetso bifatika bigaragaza ibyaha akekwaho, urukiko rwamufunguye by’agateganyo.

Ubwo habaga umukino wahuje Cameroun na Ethiopia ku wa 21 Mutarama 2016 mu mikino ya CHAN, kuri Stade Huye, umukino wahagaze iminota 12 kubera umwijima, bitewe na moteri yari izimye.

Rwabidadi na Mbabarempore bitabye Urukiko Rwisumbuye rwa Huye ngo bisobanure ku byaha bashinjwa byo kurigisa mazutu kuri Stade ya Huye.

Umukozi wari ushinzwe kugenzura ikora ry’iyi moteri, Mbabarempore Deleon, ndetse n’umukozi wa MINISPOC, Aimable Rwabidadi, wari ushinzwe kugura mazutu bakekwaho gutera iki kibazo, bahise bashyikirizwa inzego za Polisi, none kuri uyu wa 04 Gashyantare 2016 bitabye urukiko.

Rwabidadi araregwa kuba yaranyereje amafaranga yagombaga kuyigura, akagura idahagije kugera ubwo ibashiriyeho moteri ikazima.

Ubushinjacyaha kandi bushingiye ku mpapuro zagenewe guhesha mazutu kuri za sitasiyo (Bon) zitarakoreshwa zifite agaciro k’amafaranga 1.300.000 y’u Rwanda bamusanganye, buvuga ko yari afite umugambi wo kunyereza ayo mafaranga kuko ngo zabaga ari izasagutse bagura mazutu ku mikino yarangiye.

Rwabidadi n’abamwunganira bahakana ibyaha aregwa, bavuga ko nta mazutu yabuze cyane ko hari amajerekani 13 atarakoreshwa, ari na yo yahise ikoreshwa. Amafaranga yasigaye yo ngo yagombaga kuzayagaragaza muri raporo CHAN irangiye.

Ati “Nta mutungo nanyereje kuko n’izo bons bazisanze mu modoka y’akazi kandi ndi no mu masaha y’akazi.”

Aha ni ho hari moteri yakoreshwaga. Iyi tank ni yo yashyirwagamo.

Mbabarempore Deleon, umukozi w’ikigo “Smart Energy Solution” wari ushinzwe kumenya ibigendanye n’iyi moteri yakoreshwaga, we aregwa guhishira no gufatanya icyaha na Rwabidadi.

We ariko yiregura avuga ko ntaho yahuriraga n’amafaranga ndetse n’igurwa rya mazutu, kuko yabwiraga Rwabidadi ikenewe akaba ari we uyigura.

Avuga kandi ko atari ikibazo kindi cyabayeho ahubwo ari mazutu yashizemo ndetse akanemeza ko uko hagendaga hagurwa mazutu nke we yabaga yababwiye ikenewe.

Ati “Aimable dutangira gukorana yambwiraga ko akazi akamazemo imyaka 10 nirinda kwivanga mu bye kuko numvaga akora ibyo azi.”

Mbabarempore na Rwabidadi bombi basabye urukiko gukomeza urubanza rwabo badafunze. Imyanzuro ikaba izasomwa kuri uyu wa gatanu tariki 05 Mutarama 2016.

Mu gihe cya manda ebyiri ubuyobozi bw’akarere ka Gisagara budahindutse, abatuye aka karere bavuga ko ntacyo ubuyobozi butakoze mu rwego rwo guteza imbere umuturage muri iyo myaka, binyuze muri gahunda za Leta, ndetse n’ibikorwa remezo.

Leandre Karekezi ababajwe no kuba asize Gisagara itaragira kaburimbo.

Nyiraneza Christine utuye mu Murenge wa Ndora ati “Karekezi ntacyo twamushinja, yatugejeje ku iterambere, atuvana muri nyakatsi tujya ku mudugudu, aduha amazi n’amashanyarazi tutari twarigeze tubigeraho.”

Cyakora, kuba aka karere ari ko konyine mu Ntara y’Amajyepfo kadafite umuhanda wa kaburimbo, benshi mu baturage bifuza ko ubuyobozi buzatorwa muri manda itaha, bwazihutira kuhageza icyo gikorwa remezo mu rwego rwo guteza imbere kurushaho ubuhahirane n’utundi duce.

Maniragaba André ati “Umuhanda wa kaburimbo ni wo tubura gusa maze umujyi ukaba umujyi, abazatorwa bawutugejejeho byadufasha guhahirana n’utundi turere bitworoheye.”

Karekezi yashimiwe ibyo yagejeje ku baturage b’Akarere ka Gisagara.

Ibi ni na byo Léandre Karekezi yagarutseho ubwo yaherezaga ububasha Umunyamabanga Nshingwabikorwa w’akarere wasigaye ayobora muri iki gihe cy’inzibacyuho.

Karekezi yagaragaje ko hari ibyinshi batagezeho uko babyifuzaga bitewe n’uko aka karere kavaga kure, kuko kari gakennye cyane ku bikorwa remezo.

Karekezi yavuze ko mu byo yifuje kuba yaragezeho akaba agiye bitagezweho harimo umuhanda wa kaburimbo, kandi kuri we agasanga ikenewe cyane.

Ati “Birababaje kuba aka karere katagira kaburimbo. Gusa, twari dufite byinshi byo gukora kuko urebye mu bikorwa remezo aka karere kari gakennye cyane. Numva abagiye kuyobora bazita cyane kuri iki gikorwa.”

Leandre Karekezi wari Umuyobozi w’Akarere ka Gisagara mu myaka 10 ishize, yemeza ko kugira kaburimbo muri aka karere byagira akamaro mu buhahirane dore ko ari n’akarere kegereye umujyi wa Huye.

Abatuye mu mirenge ya Gikonko na Musha, baratangaza ko indwara ya Malariya yiyongereye cyane ahagana mu mpera z’umwaka wa 2015, ndetse ngo bakagerageza kuyirinda ariko ntibigire icyo bifasha.

Bavuga ko bagerageza kwirinda Malariya ariko bakanga bakayirwara

Nyirandayisaba Venancie ati « N’ubu nagiye kwivuza ejo bundi bayinsangamo, birakabije hariho imibu myinshi kandi inzitiramibu twari dufite wabonaga ntacyo zimaze imibu idusangamo, tukanafunga butarira ariko umubu ukanga ukaza».

Abajyanama b’ubuzima mu murenge wa Gikonko, nabo bemeza ko Malariya yiyongereye bakurikije abarwayi bakira babagana.

Dusabe Anne Marie ati « Malariya yo muri iyi minsi irakabije n’abatugana benshi niyo baba bafite »

Ikigo nderabuzima cya Gikonko, kigaragaza ko imibare y’abarwayi ba Malariya yazamutse cyane mu mezi ya nyuma y’umwaka wa 2015 aho bavuye ku barwayi 91 mu kwezi kwa Kanama, umwaka ukajya kurangira bageze ku barwayi barenga 460.

Musabyimana Innocent ushinzwe ibikorwa by’ubuzima mu karere ka Gisagara avuga ko iki kibazo cya Malariya kizwi kandi ko atari muri aka karere gusa yiyongereye ahubwo ari mu gihugu cyose nk’uko byagarutsweho mu nama y’umushyikirano iherutse, ariko nk’Akarere ka Gisagara bakaba barafashe ingamba zo kuyirwanya.

Abarwayi benshi babasangamo Malariya muri iyi minsi

Ati « Ni byo koko Malariya yariyongereye ariko si muri Gisagara gusa ni mugihugu hose kubera impamvu zinyuranye, ariko twafashe ingamba, turashishikariza abaturage gutema ibihuru, kutagira ibizenga by’amazi kandi bakajya bivuza bagifatwa»

Mu inama ya 13 y’umushyikirano yo mu mwaka wa 2015, hagaragajwe ko malaria yiyongereye henshi mu gihugu bitewe n’inzitiramibu zitari zifite ubushobozi buhagije bwo kurinda imibu, no kuba umuti waterwaga mu mazu na wo utari wujuje ibisabwa.

Mu myanzuro yafashwe muri iyi nama uwa 9 ukaba usaba kwihutisha ishyirwa mu bikorwa ry’ingamba zigamije gukumira no kurwanya mu buryo bwose bushoboka indwara ya Malariya yiyongereye muri tumwe mu turere tw’igihugu.

Mu gihe Umurenge wa Mukindo ari wo wonyine ku mirenge 13 y’Akarere ka Gisagara utarageramo amashanyarazi, abahatuye bavuga ko badindiye mu bikorwa by’iterambere ugereranyije n’uko abo mu yindi mirenge bamaze kuwushyikira batangiye kwihangira imirimo.

Abanyamukindo bakeneye amashanyarazi kugira ngo bave mu bwigunge.

Rukundo Jean Pierre, umucuruzi muri uyu murenge, avuga ko haramutse habonetse umuriro w’amashanyarazi, barushaho kunoza servisi baha abakiriya ndetse bakaba banahanga indi mirimo mishya.

Rukundo ati “Nk’ubu igihe cy’izuba usanga abantu bakeneye kunywa ibikonje, ariko ntitwabona uko tubikonjesha, ahandi urubyiruko ruhanga imirimo; natwe tuwubonye, imirimo yavuka.”

Si abacuruzi gusa bavuga ko kutagira umuriro w’amashanyarazi muri aka gace bibangamye.

Usanase Mutanguha Fidele, umuyobozi w’Ikigo Nderabuzima cya Mukindo, avuga ko kutagira umuriro bitaborohera kuko mu kazi kabo bawukenera igihe cyose, cyane nko mu nzu y’ababyeyi hagomba guhora umuriro, inkingo zikenera kubikwa muri firigo n’izindi serivise zitandukanye.

Umuyobozi w’Akarere ka Gisagara, Karekezi Leandre, avuga ko kuba uyu murenge utagira amashanyarazi ari ikibazo koko ariko akizeza ko bidatinze, amashanyarazi azagera muri uwo murenge.

Karekezi avuga ko hari umushinga munini utaratangira uzakura umuriro mu Murenge wa Mamba ugaca mu yindi mirenge ibiri ukagera Mukindo, ukazatuma mu bice byinshi by’uyu murenge hagera umuriro.

Mu gihe uyu mushinga wa mbere ushobora gufata igihe, avuga ko bazakora ibishoboka byose mu wundi mushinga w’akarere, nibura uyu mwaka w’ingengo y’imari ukazarangira amashanyarazi agejejwe mu bice bimwe na bimwe by’Umurenge wa Mukindo.

Karekezi ati “Dufite imishinga ibiri, umwe ni munini dufite n’abaterankunga. Dutegereje ko batangira ibikorwa ariko uyu kuko ushobora gufata igihe, twiyemeje ko nk’akarere tuzakora ibishoboka muri uyu mwaka w’ingengo y’imari, tukawugeza hamwe na hamwe muri uyu murenge.”

Mu Rwanda, abaturage 24%, ni bo bonyine bafite umuriro w’amashanyarazi. Ibi bingana n’ingo ibihumbi 520 zifite uyu muriro ku ngo miliyoni ebyiri n’ibihumbi 400.

Mu rwego rwo kuzamura ubuhinzi, mu nama yabaye kuwa 08/01/2015 ihuje bamwe mu bahagarariye amakoperative y’ubuhinzi n’ubworozi ndetse n’abashoramari mu by’imari, baganiriye ku kongera umusaruro n’ireme ry’ibiribwa biva ku myumbati, ibirayi n’ibishyimbo.

Mu kuhira hifashishwa amamashini yabugenewe

Aha Ministeri y’ubuhinzi n’ubworozi(MINAGRI) yamenyesheje ko ngo yakuyeho inzitizi zose zatumaga abahinzi batagera ku musaruro biyemeje gutanga.

Ivuga ko ibinyujije mu mushinga wayo witwa PSP ukorana n’abahinzi na za banki, yashyizeho amafaranga angana na miliyoni 36 z’amadolari y’Amerika y’impano ku bahinzi, ndetse yiyemeza guharanira ko abahinzi baba ab’umwuga, bagatanga umusaruro mwinshi ushoboka kandi ufite ireme.

Gasasira Janvier uyobora PSP yagize ati “Turifuza ko abahinzi bakora bunguka cyane bishoboka, hashyizweho ibikorwaremezo byose bakeneye, buri mushinga w’ubuhinzi wose uzajya ujya muri banki mbere y’igihe, hazajyaho ubwanikiro n’uburyo bwo kumisha kugira ngo isizeni(season) y’ubuhinzi ijye itangira indi myaka yaravuye mu murima.”

Si ubufasha bw’amafaranga gusa ariko MINAGRI yagiye itanga ku bahinzi muri uyu mwaka, kuko bagiye banahabwa inama zitandukanye zabafasha kuzamura umusaruro mu byo bahinga, aho bagiye banerekwa akamaro ko gukoresha inyongeramusaruro.

MINAGRI ivuga ko kuri ubu umusaruro w’ibirayi muri rusange mu Rwanda hose ari toni 23 kuri hegitari imwe. Ni ukuvuga umusaruro wose uturuka ahera ibirayi bike ndetse n’uturuka ahera ibirayi byinshi mu Turere twa Burera, Musanze, Nyabihu na Rubavu.

Minisitiri wa leta muri minagri Tony Nsanganira n’umunyamabanga uhoraho Innocent Musabyimana mu’kiganiro n’abanyamakuru

Gatari Egide, umukozi wa MINAGRI muri gahunda y’amafumbire, avuga ko bishoboka ko umusaruro w’ibirayi kuri hegitari imwe wakwiyongera ukagera kuri toni 40 mu Rwanda.

Gatari avuga ko icya mbere gisabwa ari uko abahinzi bose bajya bafumbira imirima yabo bakoresha ifumbire mvaruganda ndetse n’imborera kandi bakajya bahingira igihe

Akomeza asaba abahinzi muri rusange kongera umusaruro kuri hegitari kuko hari isoko ryawo. Ibi abivuga agendeye ku kuba bamwe mu bahinzi bavuga ko hari igihe babona umusaruro mwinshi ariko bakabura aho bawugurisha bagahendwa, bityo bakagwa mu gihombo.

Minisiteri y’ubuhinzi n’ubworozi yamaze impungenge abahinzi ku ikoreshwa ry’ifumbire mva ruganda

MINAGRI kandi muri uyu mwaka ishishikariza abahinzi gukoresha ifumbire mva ruganda, yongeye kumara impungenge benshi mu bahinzi bangaga kuyikoresha bavuga ko yangiza ibihingwa ikica na tumwe mu dukoko, ariko ngo ibi sibyo.

MINAGRI ivuga ko bishoboka kongera umusaruro w’ibirayi kuri hegitari

Mu kiganiro MINAGRI yagiranye n’abanyamakuru ku wa gatatu tariki 11/02/2015 harebwa uko igihembwe cyari gisoje cyitabiriwe n’uko icya 2015 B kitegurwaga, abanyamakuru batangaje ko bamwe mu baturage bemeza ko amafumbire mva ruganda yangiza ubutaka n’ibimera ndetse udukoko nk’inzuki natwo tukahagendera.

Innocent Musabyimana, umunyamabanga uhoraho muri MINAGRI ariko yavuze ko ibi ataribyo ko ari ibihuha bica abahinzi intege gusa, ahubwo ashishikariza abahinzi kujya bayikoresha bayivanze n’imborera kandi igakoreshwa buri gihe kuko ari bwo buryo bubafasha kubona umusaruro mwiza.

Ati “Dutangira iyi gahunda muri 2008 twari ku biro bine by’imvaruganda kubikoresha kuri hegitari mu gihe ahandi bari ku biro hagati ya 200 na 250 kuri hegitari imwe. Ariko aho dukomeje gukangurira abahinzi gukoresha ifumbire mva ruganda ubu tugeze hafi ku bilo 31”.

Akomeza agira ati “Iyo dutangiye kuvuga ngo turakoresha ifumbire nyinshi, ntaho turanagera biratangaje, gusa dukangurira abahinzi kuyihuza n’imborera kugira ngo bibashe gufatanya”

Bamwe mu bahinzi mu duce dutandukanye bahuguwe ku gukoresha imashini mu buhinzi

Mu kwezi kw’ Ugushyingo 2015, muri IPRC-South hatangiwe inyigisho ku guhingisha imashini no kuhira imyaka, mu buryo bw’igihe gitoya cy’amezi atatu.

Mu banyeshuri bahahuguriwe harimo abaturutse mu makoperative y’ubuhinzi yo mu turere tumwe na tumwe two mu Ntara y’Iburasirazuba bigishirizwa kuri Gishari Integrated Polytechnic, ndetse n’abo mu turere two mu Ntara y’Amajyepfo bigira muri IPRC-South.

Imyaka yarangiritse kubera ibiza

Benoni Sebukeye, wo muri Koperative Coproriz ihinga umuceri mu Karere ka Gisagara, yavuze ko bari basanganywe imashini zo kwifashisha mu buhinzi bahawe na RSSP, ariko ngo zari zibitse kubera kutamenya kuzikoresha.

Ati “Ariko noneho ubwo twahuguwe turi benshi tukazanahugura abandi, tuzajya tuzifashisha. N’ubwo izo dufite ari nkeya ugereranyije n’ingano y’aho duhinga, twizeye ko tuzabona n’izindi.”

Iyi gahunda yo kwifashisha imashini mu buhinzi kandi yagiye ishimangirwa na MINAGRI igaragariza abaturage uburyo birimo inyungu igaragara kuri bo, aho ibikorwa byihuta kandi bikabafasha kuzigama amafaranga yabo.

Sangwa Olivier, Umukozi wa MINAGRI ushinzwe kwamamaza amamashini akoreshwa mu mirimo itandukanye y’ubuhinzi, yavuze ko guhingisha imashini byoroha cyane kurenza guhingisha amasuka.

Ngo aho abantu bane bagombaga guhingisha amasuka imashini ibasha kuhahinga mu gihe gito cyane cyingana n’isaha imwe.

Bamwe mu bahagarariye amakoperative y’ubuhinzi n’ubworozi ndetse n’abashoramari mu by’imari baganiriye ku kongera umusaruro

Ku bijyanye n’amafaranga yo guhingisha umurima ungana na hegitari 1 ngo umuhinzi akoresha ibihumbi 100 naho uwahingishije imashini agakoresha ibihumbi 35 gusa.

Sangwa akomeza avuga ko ku ruhande rw’umuhinzi, ngo aramutse akoresheje imashini ashobora kuzigama amafaranga yahaga abahinzi bo kumuhingira.
Abahinzi bongeye gushishikarizwa guhinga batavanga imyaka mu murima.

Nk’uko Minisiteri y’ubuhinzi n’ubworozi yagiye igaragaza kenshi ko guhinga ibihingwa bitadukanye mu murima umwe bigabanya umusaruro kuko nta nakimwe cyera uko byakagombye, muri uyu mwaka naho yagiye ibigarukaho kenshi kuko hari ahakigaragara abaturage batarumva akamaro ko guhinga igihingwa kimwe.

Abaturage bavuga ko bahombejwe cyane n’imvura

Mu turere dutandukanye bamwe mu bitabiriye gahunda yo guhinga igihingwa kimwe hakurikijwe ubutaka bw’ahantu, batanga ubuhamya ko babonye umusaruro mwiza batari barigeze, ibi bigatanga icyizere ko iyi gahunda yafasha mu kuzamura umusaruro w’ubuhinzi ku buryo bugaragara.

Umunyamabanga wa Leta muri Minisiteri y’ubuhinzi n’ubworozi Tony Nsanganira ati “ Dushishikariza abaturage kutavanga ibihingwa mu mirima kuko byagaragaye ko iyo ivanze nta musaruro uboneka koko, nyamara igihingwa kimwe mu murima kirera kigatanga umusaruro uhagije”

Mu turere dutandukanye imvura nyinshi yangije imyaka y’abaturage

Mu mpera z’uyu mwaka ubwo hari kugwa imvura nyinshi uduce dutandukanye, mu minsi mike ishize ahenshi mu turere abaturage bagiye bahura n’ikibazo cy’imvura yabangirije imyaka ndetse bamwe bakavuga ko bahombye cyane.

Uretse gutwara ubutaka imusozi imyaka ihahinze nayo igatwarwa, mu binshanga naho hagiye huzura maze imyaka cyane cyane umuceri ikarengerwa.

Urugero n’inkimvura idasanzwe yaguye mu ntangiriro z’uku kwezi kw’ukuboza, abatuye mu karere ka Huye bakahatakariza imyaka myinshi aho ibyangiritse byari bihinze bibarirwa mu gaciro ka miliyoni zirenga 200 z’amafaranga y’u Rwanda.

Abahinzi bigishijwe gukoresha imashini mu buhinzi

Uku kwangirika kw’imyaka kubera imvura kandi kwagaragaye mu karere ka Gisagara, aho insina z’abaturage zangiritse, imyaka myinshi imusozi iratwarwa ndetse n’umuceri urarengerwa mu bishanga nk’ikizwi kwizina rya Duwani.

Mu rwego rwo kurwanya ibiza cyane cyane iyangirika ry’imyaka ariko, ubuyobozi bw’akarere ka Gisagara bwongeye gusaba abaturage kwita ku guca imirwanyasuri, gutera ibiti birinda ubutaka ndetse no kubaka imiyoboro y’amazi ahenshi mu bishanga bikomeza gukorwa, ahahanamye naho hagakomeza gucibwa amaterasi y’indinganire.

Lèandre Karekezi umuyobozi w’aka karere yavuze ko n’ubwo ntawe umenya icyo ikirere gihatse, bazajya bagerageza kurwanya isuri uko bashoboye, uko igihe cy’imvura cyegereje bagashishikariza abaturage kurinda ubutaka bwabo uko bashoboye mu rwego rwo kubungabunga ibyo bahinga.

Abaturage bo mu Karere ka Gisagara bigaragara ko bazindukiye gutora, ahenshi site ubu zisigayeho abahagarariye amatora, abaturage bo barasa n’abarangije kuko ubu haza umwe umwe.

Abaturage bari babukereye batora referandumu ariko noneho barasha ko na Perezida Kagame abasubiza.

Site zitandukanye ziragaragaraho imitako itandukanye, amaradiyo afasha abaturage kumva uko ahandi amatora yifashe, ndetse ahandi ho hari ababyinnyi basusurutsa abitabiriye amatora.

Abaturage bo mu Murenge wa Kibirizi baganiriye na Kigalitoday, baravuga ko bari batindiwe gusa n’uyu munsi aho bavuga ko nyuma yo kuza kumenya ibyavuye mu matora, byaba byiza banamenye icyo umukuru w’igihugu Paul Kagame abivugaho.

Site z’amatora zari zitatse neza cyane.

Maniraho Jean Pierre ati “Rwose dutegerezanyije amatsiko igisubizo cya Perezida, turaye tukibonye byadufasha kutagira igishyika.”

Uyu muturage Maniraho Kigalit Today yamubajije igituma ashaka igisubizo cya Perezida kandi ibiri buve mu matora ya referendum bitaramenyekana, avuga ko amatora y’uyu munsi yo atayafiteho impungenge kuko kuri we ngo bitari ugutora ahubwo byari ugushimangira ubusabe bwabo.

Mu ma masaha ya mugitondo mu Murenge wa Kibirizi abaturage bari bakiri benshi.

Mukamana, umwe mu bakecuru bitabiriye amatora mu Murenge wa Save, Akagari ka Rwanza, na we avuga ko kuri we amatora yamugendekeye neza kandi ko yatoye mu bwisanzure gusa akaba yifuza ko Perezida Kagame yabagezaho umwanzuro we kare.

Ati “Ibyacu turabirangije ahubwo nyakubahwa Kagame na we iyaba yari guhita atumara amatsiko, none se ko n’ibya mbere ari twe twabyisabiye.”

Mu ma masaha ya mugitondo mu Murenge wa Kibirizi abaturage bari bakiri benshi.

Si aba gusa kandi kuko abaturage batandukanye ku masite y’aka karere mu byo bagiye bagarukaho bagaragaje icyifuzo cyo kumenya igisubizo cya Perezida vuba.

Mu Karere ka Gisagara, abaturage benshi bazindutse ku buryo mu masaha ya saa kumi z’igitondo bari mu mihanda batangiye kujya ahatorerwa.

Kuri site zimwe na zimwe bari banafite abasusurutsa mu mbyino abaje gutora.

Mukaremera Francine uhagarariye amatora mu Karere ka Gisagara, aravuga ko mu kanya gato saa saba baraba barangije kuko ahanshi nta banti bakiri kuza, ikindi kandi akavuga ko nta kibazo na kimwe bigeza bagira kuko amatora bari barayiteguye.

Nyuma yo gusobanurirwa ibyahinduwe mu itegeko nshinga, abaturage bo mu mirenge itandukanye yo mu karere ka Gisagara bashimiye abadepite kuba barabatumikiye, akazi gasigaye kakaba ari akabo.

Abatuye Mamba bashimiye abadepite ko babatumikiye

Benshi muri aba baturage baravuga ko ikibatindiye ari ukubafungurira ibiro by’itora maze bagashimangira ubusabe bwabo.

Murindahabi Jean Pierre wo mu murenge wa mamba ati “Imbogamizi yari ihari yavuyeho kuko ingingo ya 101 yahinduwe, ahasigaye rero ni ahanjye n’abandi babona ko perezida Kagame akwiye gukomeza kuyobora aho tuzitorera yego imbogamizi ikavaho burundu tukazamwitorera n’ubutaha, amatora ni agere gusa”

Muri gahunda yo gusobanurira abatuye Gisagara ibyahindute mu itegeko nshinga, benshi bongeye kugaragaza byinshi mu byo bagejejweho n’ubuyobozi bwiza birimo iterambere mu buhinzi, mu burezi, ubuvuzi n’ibindi.

Bakundukize Elysee aravuga ko gutore yego ari ugutora iterambere

Ibi byose rero nibyo bashingiyeho banasaba ko ingingo ya 101 y’itegeko nshinga yahindurwa kugirango bazagire amahirwe yo kuzongera kwitorera perezida Paul Kagame n’izindi manda, aho bavuga ko ku mutora ari ukwiteganyiriza iterambere.

Bakundukize Elysé umwe mu bafite ubumuga mu murenge wa Kibirizi ati “Twasubijwe agaciro mu gihe abafite ubumuga twari twaratakaye, twabonye byinshi, gutora yego kuri jye ni uguhitamo kubona kaburimbo gisagara, ni uguhitamo iterambere muri rusange”

Depite Gatabazi Jean Marie Vianney umwe mu badepite bari muri Gisagara, avuga ko iyi gahunda yo gusobanura ivugururwa ry’itegekonshinga abaturage bayakiriye neza, akaba adashidikanya ko biteguye kugaragaza icyo bifuza binyuze muri Referendumu.

Gisagara ngo gutora yego ni ukwiha amahirwe yo kuzongera kuyoborwa na Perezida Kagame

Ati “Aho twagiye hose abaturage bari benshi kandi bagaragaje ibyishimo ku bisobanuro twabahaye bashima ko twabatumikiye, bigaragara ko biteguye kugaragaza icyifuzo cyabo muri aya matora”

Ubwo abaturage bandikaga amabaruwa asaba ko ingingo ya 101 y’itegeko nshinga ihindurwa mu karere ka Gisagara niho hagaragaye abaturage benshi mu ntara y’amajyepfo banditse babisaba.

Uyu mukobwa utuye akanakorera mu isantere ya Kibirizi, afite ubumuga yatewe n’indwara yamufashe akuze. Muri kantine ye amazemo imyaka 2,5, acururizamo icyayi, igikoma, amata n’amandazi.

Mukamwezi Epiphanie yahawe igihembo cy’abihumbi 100Frw, kuko yaharaniye kwiteza imbere.

Muri aka kazi afite abakozi bamufasha ariko ntibimubuza abamugana, ku buryo bamwe batemera ko afite ubumuga bwo kutabona.

Avuga ko ibyo abikesha kuba yarakiriye ubumuga bwe ndetse akiga no kubana nabwo atabufata nk’inzitizi.

Agira ati “Burya iyo umutwe n’umutima bikora neza n’ibindi urabishobora, iyo mpereza abakiriya, mfata igikombe nkamusukira igihe byuzuye akambwira nkarekeraho maze kubimenyera bamwe bagirango ndababeshya ndabona.”

Mukamwezi avuga ko yasanze atahora yicaye ngo atege amaboko ngo ni uko atabona, niko gushaka icyo yakora kikamwinjiriza na make byibura amufasha kwikenura ku by’ibanze umuntu akenera. Avuga ko kugera ubu abona bigenda n’ubwo atarabasha kugera aho yifuza.

Ati “Mbona ntacyo mbura n’ubwo umuntu atabona byose, ariko ubu niguriye inka ndetse na basaza banjye batatu naraboroje, kandi n’ibindi bibazo by’umuryango iyo bije turabikemura.”

Mu byifuzo bye harimo kwagura ibikorwa bye, akazamuka akiteza imbere byisumbuyeho, ariko akavuga ko ubushobozi bwe butarabimwemerera, ariko kandi ngo ntacika intege.

Ubwo hizihizwaga umunsi mpuzamahanga w’abafite ubumuga, Mukamwezi yahawe igihembo hamwe n’abandi babiri bagaragaje ibikorwa by’indashyikirwa mu bafite ubumuga, buri wese ahabwa amafaranga ibihumbi 100Frw.

Avuga ko ayo mafaranga azunganira ibikorwa bye, akongeraho ko yishimira kuba imbaraga ze zibonwa ndetse zigashimwa. Ahamagarira abafite ubumuga kwitabira umurimo buri wese mu bushobozi bwe ntihagire uwisuzugura.