RSB niyo izajya yemeza ubuziranenge bw’ibyoherezwa mu mahanga bivuye mu Rwanda

Ubu burenganzira bwo gupima, kurwanya ibyakwangiza ibiribwa no no kubungabunga umutekano w’Ibiribwa, iki kigo cyabuhawe n’ikigo gishinzwe guteza imbere ubucuruzi muri Afrika y’Iburasirazuba (Trade Mark East Africa).

Nta kigo cyari kiri mu Rwanda cyari cyemerewe gutanga ikirango mpuzamahanga kigaragaragaza ko ibiribwa byoherezwa hanze y’Igihugu byakurikiraniwe ubuziranenge. Inganda n’abashoramari bagikeneraga biyambazaga ibigo byo mu bindi bihugu.

Tariki 21 Ukuboza 2017, nyuma yo guhugurwa n’Ikigo gishinzwe iterambere ry’Ubucuruzi muri Afrika y’Iburasirazuba, RSB nayo yahawe uburenganzira bwo gusuzuma no gutanga ikirango ku biribwa byo mu Rwanda byoherezwa mu mahanga.

Murenzi Raymond umuyobozi wa RSB, yavuze ko iki kirango kizatuma ibiribwa byo mu Rwanda bigirirwa icyizere mu ruhando Mpuzamahanga.

Yagize ati “Byatumye ibicuruzwa bitumizwa mu Rwanda bihabwa icyizere. Twagiye tugira ikibazo cy’ibicuruzwa byacu byagiye bijya ku masoko yo mu Burayi no muri Amerika ariko byagerayo bigahura n’ikibazo cy’Ubuziranenge bipimwe n’ibigo byaho.”

Eric Kabayiza, Umukozi w’Ikigo cy’igihugu gishinzwe kohereza ibikomoka ku musaruro w’Ubuhinzi mu mahanga (NAEB), ahamya ko kuba u Rwanda rwemerewe gutanga iki kirango, bizorohereza inganda n’abashoramari bohereza ibintu mu mahanga kuko ubusanzwe babikorerwaga n’ibigo byo mu bindi bihugu bikabahenda.

Ati “Igihombo cyajyaga kigaragaramo cyaheraaga ku gihe bifata kugira ngo uzajye gushakisha Isosiyeti iturutse hanze ngo ize igupimire. Byasabaga ko icyo kigo cyohereza abantu baza gusuzuma niba inzira zose bisaba wazinyuzemo.”

Ikigo gishinzwe iterambere ry’Ubucuruzi muri Afrika y’Iburasirazuba cyafashije RSB kubaka ubushobozi bw’abakozi ba yo mu rwego rwo guteza imbere urwego rw’abikorera.

Anathalie Uwamariya Kalimba, umuyobozi ushinzwe ibikorwa muri TMEA, ati “Twabafashije kubona ibikoresho bibafasha gupima ubuziranenge, duhugura abakozi bazajya bapima ndetse duhugura n’ibigo by’abikorera kugira ngo bumve neza akamaro ko kugira ubuziranenge mpuzamahanga.”

Ibihingwa nk’icyayi, ikawa, imboga n’imbuto, nibyo Abanyarwanda bakunze kohereza mu mahanga.

Umunyamabanga Nshingwabikorwa wa RRP+ Semafara Sage

Imibare itangwa n’ikigo cy’igihugu gishizwe ubuzima RBC, igaragaza ko 3% by’Abanyarwanda babana na Virus itera Sida, muri bo abagore banduye ni 3,8% naho abagabo ni 2,2%. Mu bakora umwuga w’uburaya, abanduye ni 45,8%. Ubwandu bushya buri kuri 0,27% buri mwaka.

Umunyamabanga Nshingwabikorwa wa RRP+, Semafara Sage, avuga ko ihohoterwa rishingiye ku gitsina rigira uruhare mu kwiyongera k’ubwandu bushya kuko hari abanduye batajya bemera gukoresha agakingirizo.

Aragira, ati “bikunze kuba cyane mu gihe ari umugabo wanduye ariko umugore we ari muzima. Hari gihe amuhohotera akamukorera imibonano idakingiye. Umugore rero kubera ko ari umunyantege nke, akabyamera bitewe n’uko akenshi umugabo ari we uba atunze urugo”.

Kuba abagabo badakunda gukoresha agakingirizo bikurura ubwandu,kandi byemezwa n’umwe mu bakora umwuga w’uburaya witabiriye inama nyungurana bitekerezo ku isano iri hagati ya VIH na GBV.

Uwo mugore ufite imyaka 25 ukora umwuga w’uburaya ari nawo watumye yandura Virusi itera Sida, ahamya ko n’ubwo abaganga bamusaba kudakora imibonano idakingiye, hari abagabo bamugenderera bakanga gukoresha agakingirizo.

Yagize, ati “ndabizi rwose ko gukorera aho binyongerera ubwandu, ariko hari igihe mba maze iminsi itatu nabuze ikintunga, nkemera kugira ngo ndengere ubuzima bwanjye n’ubw’umwana nabyaye”.

Kamali Innocent,ushinzwe kurwanya Sida mu rubyiruko muri RBC, avuga ko kuba abagore ari bo benshi babana na virusi itera Sida ugereranije n’abagabo bihuzwa n’uko ari bo bakorerwa ihohoterwa rishingiye ku gitsina ndetse hakabamo n’abakora uburaya bahura n’abagabo benshi.

Ku bw’iyo mpamvu ngo hakwiye ubukangurambaga bwo kubirwanya byombi.

Ati “turi mu minsi 16 yo kurwanya ihohoterwa rishingiye ku gitsina, ariko na none twatangije gahunda yo gukumira ubwandu bushya bwa VIH. Ihohoterwa nirikumirwa n’ubwandu bushya buzagabanuka”.

N’ubwo nta mubare uzwi w’abanduye VIH kubera guhohoterwa, RRP+, ikangurira abanyamuryango bayo kwirinda guhohotera abandi babakwirakwizamo ubwandu bwa Sida.

Umuyobozi wa Porogaramu muri SOS, Murangira Gakuba Flanclin

Ibyo bihano ngo byiganjemo kwima umwana ibyo kurya, kumubuza kujya ku ishuri, kumuraza hanze, kumukorera ibikorwa bibabaza umubiri n’ibindi.

Ni muri urwo rwego mu mwaka wa 2014, SOS Rwanda yatangije umushinga wo gutoza abana 6000, kugira uruhare mu guharanira uburenganzira bwabo,umushinga watangijwe mu turere tune, turimo Gasabo, Nyamagabe, Gicumbi na Kayonza,

Uwo mushinga ukorera mu bigo by’amashuri 130 yo muri utwo turere, ugakorana n’abana bibumbiye mu mahuriro aharanira umurenganzira bw’umwana (Children Rights Clubs), bakora ubuvugizi n’ubukangurambaga bwo kurengera uburenganzira bw’umwana.

Kabera Rogers, umunyeshuri muri GS Gihogwe mu Karere ka Gasabo, ahamya ko amahugurwa bahawe yahinduye imyitwarire y’ababyeyi n’abarezi ku bijyanye n’ibihano bahaga abana.

Ati “Wasangaga umunyeshuri akererwa kugera ku ishuri, ikigo kikamuhanisha kwirirwa akora imirimo abandi bari kwiga. Icyo gihe yabaga abujijwe uburenganzira bwo kwiga.

Hari n’ababyeyi bahanisha abana kubatwika intoki,kubajundikisha ikirayi gishyushye ngo n’uko bakoze mu nkono,hakaba n’ababima umwanya wo gukina”.

Umwe mu bana bahuguwe na na SOS Rwanda ku burenganzira bw’umwana

Tariki 30 Ugushyingo 2017, mu kumurika ibyo uwo mushinga umaze kugeraho mu myaka itatu (3), Rose Iyadede umuhuzabikorwa wawo, yatangaje ko kwifashisha abana bari mu mahuriro n’Imboni z’uburenganzira bw’umwana zatoranijwe mu babyeyi, byagabanije ibibazo by’abana bamburwaga uburenganzira bwabo.

Yagize ati “Nko muri uyu mwaka mu bigo biri mu Murenge wa Miyove, mu Karere ka Gicumbi, babaruye abana basaga 300 bataye ishuri, bajya kubakorera ubukangurambaga baragaruka. Hari n’aho wasangaga umwarimu yahanishaga abana ibihano bivunanye ariko abana bagiye babigaragaza mu dukino ukabona mwarimu na we bimuteye ikibazo, agahita abivaho”.

Rose Iyadede Umuhuzabikorwa wa porogaramu ikangurira abana kumenya uburenganzira bwabo

Nubwo mu bigo by’amashuri byagezweho n’umushinga hagaragaye impinduka mu myumvire y’ababyeyi n’abarezi, ngo haracyari urugendo kuko hakiri ababyeyi bakigaragaraho gutanga ibihano bibabaza umubiri.

Murangira Gakuba Franklin, ukuriye imishinga muri SOS Rwanda, ati “Inkoni ivuna igufwa ntivura ingeso. Birakwiye rero ko ababyeyi begera abana bakabaganiriza, niba ari ibijyanye n’ingeso umwana agomba guhindura, icya ngombwa si inkoni kuko ishobora guhungabanya umwana akakubera ikirumbo”.

SOS Rwanda ni ikigo cyita ku bana b’imfubyi, ndetse kikanafasha ababyeyi batishoboye kurera abana babo, bahabwa ibikenerwa byose kugira ngo bakure neza , bazigirire akamaro ndetse banakagirire igihugu.

Rukundo Yasiri ahembwe 1000000Frw anahabwa igare ryo kugendaho

Uyu mwana w’imyaka umunani y’amavuko, umuhango wo kumushimira ubereye i Nyamirambo Ku ishuri ribanza rya Rugarama yigamo, riri mu kagari ka Gasharu, mu gitondo cyo kuri uyu wa 10 Ugushyingo 2017.

Muri uyu muhango witabiriwe n’abayobozi bakuru ba WASAC, abarimu ndetse n’ababyeyi b’uyu mwana, Rukundo ashyikirijwe sheki ya 1000,000 frw, anahabwa igare ry’abana azajya agendaho.

Umubyeyi we Rukundo Mukusini avuga ko uyu mwana wiga mu mwaka wa kabiri w’amashuri abanza, yanyuze ku itiyo yatobokeye ahitwa Kimisange, agahita ashaka amashashi akarwana no kuyisana kuko yabonaga amazi ari gupfa ubusa.

Umubyeyi we yari yaje kumushyigikira ahabwa igihembo

Uzabumugabo Virgile,wafotoye uyu mwana ifoto akayisangiza abantu ku mbuga nkoranyambaga asaba buru muntu gufatira urugero kuri uyu mwana, nawe yari yitabiriye uyu muhango.

Agize ati" Nanyuze kuri uyu mwana afite ishashi ari gusana itiyo yatobotse, nshimishwa n’uburyo umwana ungana atya azi akamaro k’ibikorwa remezo. Nayisangije abandi ku mbuga nkoranyambaga iza kugera kuri WASAC ari naho yahereye insaba kumushakisha ngo imuhembe."

Rukundo Yasiri yafotowe asana iryo tiyo ryari ryatobotse

Umuyobozi wa WASAC ir. Aimé Muzola, avuze ko 35% by’amazi batanga apfa ubusa kubera itoboka ry’amatiyo, kubaka ibikorwa remezo no mu gusimbuza amatiyo ashaje.

Igikorwa cyo guhemba Yasiri ngo gitangije ubukangurambaga Ku baturage basabwa kujya bahamagara 3535 mu gihe babonye amazi ameneka cg aho biba amazi.

ir. Aimé Muzola arasaba abaturage kujya bihutira kumenyesha WASAC aho amatiyo yangiritse kugira ngo asanwe byihuse

Abanyehuri bigana na Yasiri bishimiye uruzinduko rwa WASAC kuri iri shuri

Aha kuri Maman Sportif ababumbyi bafite impungenge ko bazahirukanwa kuko haberanye n’ubusitani

Byinshi mu bihangano by’aba babumbyi biri ku muhanda uva ku Kinamba werekeza i Kibagabaga, ku muhanda uva mu Gacuriro werekeza ku Kacyiru ahitwa kuri “Maman Sportif”.

Bakora ibihangano byiganjemo amavasi, imitako n’imbabura. Baje gukorera muri ako gace nyuma yo kubuzwa n’ubuyobozi bw’Umujyi wa Kigali gucururiza ibihangano byabo mu mujyi rwagati, aho bacururizaga mu Kiyovu no kuri “Ecole Belge”.

Aho bimukiye ngo barahashima kuko ari ku muhanda babona abaguzi ku buryo bworoshye kandi begereye igishanga bakuramo ibumba.

Bakora bihangano byiganjemo amavaze n’imitako

Mpongano Hamada, uri muri Koperative yitwa abakomezamwuga yo mu Gacuriro, mu murenge wa Kinyinya, avuga ko bahangayikishijwe no guhora basiragizwa.

Agira ati “Aha bahatwohereje ari mu nkengero z’umujyi ariko ntacyo hadutwaye kuko niho tubona abaguzi bahita ku muhanda.”

Aha bashyizwe naho ntibazahamara kabiri kuko ari mu gishanga giherereye mu Mudugudu w’Urukundo, Akagari ka Kamatamu, mu Murenge wa Kacyiru.

Umukuru w’umudugudu w’Urukundo, Butare Emmanuel, avuga ko yari yabatije ahari hateganyijwe kubakwa ibiro by’umudugudu ngo babe bahakorera kuko kubaka ibiro mu gishanga bari babyangiwe.

Ati “Twari twahahawe na Maman Sportif ngo tuhubake ibiro by’umudugudu ariko kubera ko ari mu gishanga, abashinzwe imyubakire batubwira ko bidashoboka. Nabaye mpabatije rero ariko muri gahunda yo kubuza abantu gukorera mu bishanga, umurenge uraza urahabakura.

Hamada avuga ko mu Gacuriro aho babumbira hatabagora hatabagora kubona abaguzi kandi ari hafi y’aho bakura ibumba

Munyarukundo Shabani, ukuriye imiryango yashigajwe inyuma n’amateka mu Karere ka Gasabo, akanayobora Koperative y’ababumbyi “Modern potery” ihakorera, avuga ko mu bubumbyi harimo inyungu ariko kutagira aho gukorera hatuje bituma hari abadatera imbere.

Ati “Muri koperative umubumbyi ashobora kubona inyungu y’amafaranga asaga ibihumbi 100Frw, ku buryo yamufasha kubona ibyo umuryango we ukeneye. Ikibazo dufite ni aha dukorera kuko aha ducururiza, ejo ubuyobozi buvuze ngo bugiye kuhashyira ubusitani, bwahatwirukana.”

Remy Norbert Duhuze, Umuyobozi w’ishami rishinzwe amabwiriza agenga ibidukikije no kurwanya ibihumanya ibidukikije mu Kigo cy’igihugu gishinzwe kurengera ibidukikije (REMA), avuga ko kuhakorera ari byo bitemewe ariko kuhacukura ibumba babifitiye uburenganzira byo ntacyo bitwaye

Ati “Ikibazo cya bariya rero bafite ibindi bikorwa bahakorera nko kuhabumbira no kuhatwikira. Ibyo nibyo bitemewe mu gishanga. Naho ubundi batwaye ibumba bakajya gukorera ahandi nta kibazo bashobora kugira.”

Abirukanywe mu gishanga bagiye kubumbira mu ngo

Nyirabahire Languida, Umuyobozi w’Akarere ka Gasabo wungirije ushinzwe imibereho myiza y’abaturage, atangaza ko ibyo bibazo ababumbyi bahuye na byo ubuyobozi bwigeze bumenya ariko akabizeza ko nibabishaka bakaganira bazabashakira ahandi.

Ingingo ya 83 y’Itegeko rigena uburyo bwo kurengera, kubungabunga no guteza imbere ibidukikije mu Rwanda, ivuga ko nta nyubako cyangwa ibikorwa by’ubucuruzi bigomba gushyirwa mu bishanga byaba ibyo mu mijyi cyangwa mu Byaro.

Iyi ngingo ivuga ko igikorwa cyose cyangwa inyubako byemerewe gushyirwa muri metero 20 uvuye ku nkombe z’igishanga.

Impano yo kubumba ituma binjiza asaga ibihumbi 100Frw

Umwuzure watewe n’imvura watwaye imyaka y’abaturage ihinze mu gishanga

Icyo gishanga cyo mu Karere ka Kamonyi gihinzemo imbuto n’inyongeramusaruro bifite agaciro ka miliyoni 3,6Frw, cyangijwe n’umwuzure wabaye ku mugoroba wo kuri uyu wa Kabiri tariki 17 Ukwakira 2017.

Ibi bishanga byose byari bihinzemo ibigori byatewemo mu gihembwe cy’ihinga cya 2018A.

Karani Sylivestre, uhinga muri Bishenyi ku buso bwa are eshatu, avuga ko yari yarateyemo ibiro icyenda by’ibigori ashyiramo n’ifumbire mvaruganda ibiro 16.

Abaturage bavuga ko imyaka yangiritse ifite agaciro karenga miliyoni 3,6Frw

Agira ati “Ubu birasaba ko turindira ko humuka tukabona kongera gutera bundi bushya, ibyo twahinze byagiye. Ni ukuvuga ko Leta ari yo iri butugenere.”

Imbuto y’ibigori abahinzi bayiguze kuri Nkunganire bayitangaho 330Frw ku kilo, naho ifumbire Mvaruganda ya DAP bayiguze ku 430Frw hariho Nkunganire.

Mukiza Justin, Umuyobozi w’ishami ry’Ubuhinzi mu Karere ka Kamonyi, atangaza ko ubuso bwose bwangiritse ari hegitari 71.

Kuri izi hegitari hari hahinzeho imbuto y’ibigori ingana na 1,775kg yatejwe ifumbire ya DAP ingana 7,100Kg. Byose byatanzweho asaga miliyoni 3,6Frw.

Abaturage basezeranyijwe ko bazafashwa kubona izindi mbuto z’ibigori

Umwuzure watwaye n’amafi yororwaga n’uwitwa Bakinahe Jean Baptiste mu gishanga cya Kamiranzovu. Umwuzure utwara ibyuzi bibiri muri bitandatu yari afite.

Ati “Urebye hagiye ifi nyinshi cyane. Hari nk’icyuzi cyarimo ifi 700. Urebye zari zifite agaciro k’amafaranga aatari munsi y’ibihumbi 400Frw. Ikindi nacyo zagiye rwose nagize igihombo gikabije.”

Mukiza atangaza ko bagiye gukora ubuvugizi abahinzi bagafashwa kubona indi mbuto n’ifumbire, bakongera bagatera ibigori kuko igihe cy’ihinga kitararenga.

Umwuzure wageze no mu ngo zituriye iki gishanga

Ati “Ubu twarangije kubara ibyagiye, ariko birashoboka ko habonetse indi mbuto n’ifumbire abahinzi bakongera bagatera. Bitarenze ku wa Kabiri w’icyumweru gitaha. Muri ubu butaka ibigori byakweramo nta kibazo."

Umwuzure watewe n’imvura yaguye mu mirenge ya Nyamiyaga, Rugarika, Runda na Gacurabweng yanahasenye amazu 32.

Iyo modoka ni iyari yaje gutwara umurambo w’uwo munyeshuri

Uwo munyeshuri witwa Ntakirutimana Elias wigaga mu mwaka wa kane mu bijyanye n’ubwubatsi, bamusanze mu buriri bwe adahumeka mu gitondo cyo kuri uyu wa gatatu tariki ya 04 Ukwakira 2017.

Ababyeshuri bavuga ko uwo munyeshuri ukomoka i Ndora muri Gisagara, yaryamye mu ma saa munani z’ijoro ari muzima. Yaryamye muri ayo masa ngo amaze kureba filime.

Gusa ariko ntiharamenyekana imvano y’urupfu rwe kuko nta kibazo cy’uburwayi yagaragazaga.

Mu gitondo ngo uwamubonye bwa mbere ni animateri ubwo yari agiye kubyutsa abanyeshuri ngo bajye gukora isuku.

Umuyobozi w’icyo kigo, Nkikabahizi Calipaphore ahamya ko uwo munyeshuri nta kibazo cy’uburwayi bari bamuziho.

Agira ati “(Animateri) Yasanze umwana aryamye agira ngo ni ukuryamira kw’abana, aragenda arongera aragaruka, bamukozeho ngo bamukangure, basanga yapfuye. Nanjye kugira ngo nkubwire ngo umuntu yaryamye arapfa, nta bisobanuro nabona ku rupfu rutunguranye nk’uru.”

Akomeza agira ati “Tugiye kubikurikirana kugira ngo umwana avuge ko yareba filime kugera ayo masaha, cyaba ari ikibazo byo. Ariko sinzi ko ari yo (filime) yamwishe kuko na bo bari kumwe bareba iyo filime ubwo baba bapfiriye rimwe.”

Urupfu rw’uwo munyeshuri ruje nyuma y’ibibazo by’imyitwarire mibi irimo gusimbuka ikigo yari imaze iminsi ivugwa muri icyo kigo.

Abanyeshuri bahise bakoreshwa inama

Umunyamabanga Nshingwabikorwa w’Umurenge wa Runda, Nyirandayisabye Christine avuga ko ubuyobozi bw’umurenge bwafashe gahunda yo gusura icyo kigo kenshi no kuganiriza abanyeshuri ngo barebe ko byacika.

Agira ati “Guhera mu cyumweru gishize twagiyeyo n’inzego z’umutekano tubaganiriza ku myitwarire y’abanyeshuri no ku bibazo by’isuku kuko twabonaga na yo ari nke. Ubwo nyine ubukangurambaga burakomeje.”

Umurambo w’uwo munyeshuri wajyanywe ku bitaro bya Kacyiru ngo ukorerwe isuzuma.

Ikigo cya ISETAR cyigamo abanyeshuri 268 harimo abakobwa 36.

Muri Ruyenzi ni hamwe mu hari urusisiro rwubatswe mu matora

Abakozi batandatu bakoreraga mu mirenge itatu ni bo basezeye ku mirimo, mu mirenge yose uko ari 12 igize Akarere ka Kamonyi, ahagaragaye abaturage bubatse nta byangombwa.

Muri bo harimo uwari ushinzwe imyubakire, umunyamabanga nshingwabikorwa n’abakozi bashinzwe imibereho myiza n’iterambere mu tugari.

Harimo kandi abari bashinzwe ubutaka, imyubakire n’ibikorwaremezo mu mirenge ya Rugarika na Musambira.

Umunyamabanga Nshingwabikorwa w’Akagari ka Kabagesera mu Murenge wa Runda n’abashinzwe imibereho myiza n’iterambere mu tugari twa Muganza, Gihara na Kabagesera na bo bari mu basezeye kuri uyu wa mbere tariki 2 Ukwakira 2017.

Umuyobozi wungirije w’Akarere ka Kamonyi ushinzwe imibereho myiza y’abaturage, Uwamahoro Prisca, yavuze ko abo bakozi bari basabwe kwisobanura ku makosa yakozwe mu myubakire y’inzu zisaga 500 zubatswe mu kajagari.

Yagize ati “Birashoboka ko na bo ubwabo babonye bigaye ku bw’uburangare cyangwa se ku bw’andi makosa bakoze na bo bazi neza, bakaba rero bahisemo gusezera.”

Guverineri Mureshyankwano yarakajwe n’icyo gikorwa avuga ko amatora atari urwitwazo rwo gukora amakosa

Abo bayobozi basezeye nyuma y’igikorwa cyo gusenya zimwe mu nzu zubatswe mu gihe cy’amatora. Gusa bamwe mu baturage ntibabyakiriye neza bavugaga ko bubatse babiziranyeho n’abayobozi babegereye.

Ubwo basenyeraga abo mu Kagari ka Muganza mu Murenge wa Runda, bamwe muri bo bavugaga ko n’abayobozi bakwiye guhanwa.

Umwe ati “Ab’akagari baba barariye amafaranga hafi nk’ibihumbi 300. Nibasezere cyangwa badusubize amafaranga yacu twabahaye.”

Ubuyobozi bw’Akarere ka Kamonyi butangaza ko hari n’abandi bazabakurikira, kuko mu bandikiwe basabwa ibisobanuro harimo abatarasezera bakitaba komite ishinzwe imyitwarire mu karere.

barasaba Nkunganire ku kiguzi cy’imiti irwanya ibyonnyi

Ibi barabivuga bahereye ku cyorezo cya Nkongwa cyabibasiye mu ihinga riherutse ry’umwaka 2017 B, guhangana na cyo bikaba hari abo byananiye, kubw’iyo mpamvu bagasaba ko imiti bajya bayigura kuri nkunganire nk’uko bagura imbuto n’ifumbire.

Nsengiyaremye Narcisse, uhinga muri Mpombori, avuga ko kurwanya Nkongwa byamusabye gutera umuti inshuro eshanu ariko ko hari n’abo byananiye bakabura umusaruro.

Ati “iriya miti yari ihenze. Nk’uwitwa Rocket wajyaga kugura agacupa ka 1500 Frw kagatera ubuso bwa are eshatu, nyuma y’icyumweru ukongera ukagura akandi. Hari n’abo byananiye ibigori byabo babitemera inka”.

Aba bahinzi bibumbiye muri Koperative KOPABU bahinga ku buso bwa hagitari 59 ngo bateye litiro 20 z’umuti zaguzwe amafaranga asaga ibihumbi 100Frw ariko n’ubuyobozi hari umuti bwabahaye.

Ndahimana Celestin, Perezida wa KOPABU asobanura ko umuhinzi aharanira kutarumbya ngo ahombye n’ibindi byose aba yarakoze mu murima.

Ati “abahinzi bakodesheje igishanga, bagahinga, bagatunda ifumbire bakaguriramo na Mvaruganda n’imbuto. Ubwo rero haje ibyonnyi twagombaga gukora ibishoboka tukabirwanya”.

Umuyobozi w’ikigo cy’ubuhinzi ishami ry’intara y’Amajyepfo Gasana Aimé Parfait avuga ko koko abahinzi bashoye amafaranga menshi barwanya nkongwa.

Uwo muyobozi yavuze ko abo bahinzi azabakorera ubuvugizi muri Minisiteri y’ubuhinzi n’ubworozi, nayo ikageza icyifuzo cyabo mu nama y’Abaminisitiri kuko ari yo ibyemeza.

Ubusanzwe abahinzi bo mu Karere ka Kamonyi bahabwa nkunganire ku mbuto y’ibigori n’iya Soya ndetse no ku ifumbire mvaruganda yo gushyira mu myaka.

ishuri ribanza rya Kiboga bakeneye kwigerezwa amashuri yisumbuye

Kiboga ni umusozi wo mu Karere ka Kamonyi ukora k’umugezi wa Nyabarongo, hafi y’amasangano ya Nyabarongo n’akanyaru.

Hari ishuri ribanza ryashinzwe mu mwaka wa 1970, ryavuguruwe mu mwaka wa 2007, ku buryo uhageze akeka ko ari ikigo gishya.

Abarangije ku ishuri ribanza rya Kiboga bakomereza mu Rwunge rw’amashuri rwa Mataba ruri mu Kagari ka Ngoma mu Murenge wa Nyamiyaga, cyangwa mu Rwunge rw’amashuri rwa Rutovu mu Kagari ka Bihembe mu Murenge wa Rugarika.

Ayo mashuri ariko aherereye kure ku buryo abanyeshuri bakora urugendo ruri hagati y’ibirometero 7 na 10, bigatuma hari abananirwa bakabireka. Ababyeyi basanga ari ikibazo gikomeye.

Nyirabuntu Annonciata, umubyeyi urerera kuri icyo kigo, ati “primaire barayirangiza, ariko bakora urugendo rw’amasaha agera kuri abiri kugira ngo bagere ku kigo kiriho amashuli yisumbuye. Ruriya rugendo rubaca intege, ugasanga bamwe barayacikirije”.

Niyodusenga Ildephonse, umuyobozi w’ishuri ribanza rya Kiboga, avuga ko icyo kibazo cyaganiriweho n’abo bafatanije kuyobora ikigo, bagasanga bishoboka ko ku bufatanye n’ababyeyi, amashuri bayiyubakira, noneho Leta ikabaha inkunga y’ibyo batabasha kwikorera.

Ati “twaganiriye ku kibazo cyo kutagira "9YBE", dusanga ababyeyi ubwacu hari uruhare twabigiramo. Dushobora gukora umuganda tugakura ibumba tukabumba amatafari, dufite ishyamba ryavamo inkwi zo kuyatwika,noneho Leta na yo ikadutera inkunga mu bisigaye. Abana bakoroherezwa”.

Umuyobozi w’agateganyo w’Akarere ka Kamonyi, Tuyizere Thadee, avuga ko gahunda yo kwegereza uburezi itararangira, ariko ngo yahereye ku bigo bishobora guhuriraho amashuri menshi, abo atarageraho bakaba bakwiye kwihangana bakavunwa n’urugendo mu gihe bataragerwaho.

Ati “uko biriya bigo byagiye bijyaho, ntabwo buri kigo gifite amashuri abanza cyahise gishyirwaho "9YBE" cyangwa "12YBE"(Imyaka 9cyangwa 12 y’uburezi bw’ibanze). Ubwo rero bitewe n’ibyo umunyeshuri ashaka kwiga, yareba ikindi kigo kiri hafi mu gihe tugitegereje ko na bo bibageraho”.

Abatwara abagenzi barabarwa mu batiza umurindi ihohotera (Photo:Internet)

Muri gahunda y’ubukangurambaga mu turere twose bwo gukumira ihohoterwa rishingiye ku gitsina rikorerwa abana, Komisiyo yaganirije abamotari bo mu Karere ka Kamonyi ibasaba kwirinda guhohotera no kuba ibyitso by’abahohotera abana ahubwo bagatanga amakuru aho bigaragaye.

Abamotari na bo kandi bemera ko ibyo koko bijya bibaho ko bamwe muri bo bagira uruhare mu ihohoterwa ry’abana.

Uwihanganye Francois ukorera ku iseta ya Bishenyi, ahamya ko bijya bibaho ko umumotari yifashishwa mu kugeza umwana ku bashaka kumusambanya.

Aragira, ati “twebwe tugera ahantu henshi cyane. Ushobora kuba uri hariya duparika hari amaloji (Lodge), ukabona umumotari araje aparitse akana akazaniye umusaza wahageze kare, ugahita umenya ko bagiye muri icyo gikorwa”.

Niwerukundo Claude, ushinzwe kwigisha, ubushakashatsi n’igenamigambi muri Komisiyo y’uburenganzira bwa Muntu, atangaza ko uruhare rw’abamotari n’abatwara tagisi mu ihohoterwa rishingiye ku gitsina rikorerwa abana ruri ku kigereranyo cya 24%.

Avuga ko atari bo bonyine bakwiye gukorerwa ubukangurambaga, ahubwo ngo n’abandi bantu bakora ku buzima bw’umwana bazagerwaho.

Ati "Imbaraga tugomba kuzishyira ku burere bahabwa n’ababyeyi kuko abamotari bahitana umwana agiye ku ishuri, ariko abaye yarabonye uburere buhagije mu muryango, na we yashobora kwirinda”.

Komisiyo yasanze abana bibasirwa n’ihohoterwa cyane ari abafite hagati y’imyaka 11 na 18, aho abafite hagati y’imyaka 15-18, basambanywa bari ku kigereranyo cya 44.5%, hagati y’imyaka 11-14 bakaba 35%, hagati y’imyaka 6-10 ni 15.5% naho munsi y’imyaka 5 ni 5%.

Inzu y’umunyamabanga nshingwabikorwa w’Akagari ka Muganza yasenywe

Izo nzu zose zubatswe mu gihe cy’amatora kubera ko ubuyobozi bwari buhuze, none zahise zisenywa ku itegeko rya Guverineri w’Intara y’Amajyepfo kugira ngo bibere urugero abandi.

Inzu z’abayobozi b’Akagari ka Muganza, mu Murenge wa Runda niho habereye igikorwa cyo gusenyera abubatse nta byangombwa. Muri ako kagari hubatswe inzu zisaga 50 mu gihe cy’amatora.

Emmanuel Bahizi, umunyamabanga nshingwabikorwa w’Akarere ka Kamonyi, yavuze ko bahisemo guhera ku gusenya inzu z’abayobozi kuko bagaragara nk’abakomeye imbere y’abaturage.

Inzu ya SEDO wa Muganza nayo yasenywe

Avuga ko byashoboraga kubangamira ikurwaho ry’izindi nzu zubatswe mu buryo butemewe n’amategeko iyo izo nzu z’abayobozi zidasenywa.

Yagize ati “ Abaturage bavugaga ko ziriya nzu nizidakurwaho na bo izabo batazikuraho. Twabanje gukurikirana inzu zetemewe n’amategeko twandikira ba nyira zo tubasaba kuzisenyera ariko ntibabikora.”

Igikorwa cyo gusenya kirakorwa n’abakozi bahawe akazi bahagarikiwe n’abakozi b’urwego rwa DASSO mu tugari no mu murenge na bamwe mu bakozi b’umurenge. Abaturage ntibabyakira neza, kuko bavuga ko izo nzu zubatswe abayobozi babegereye barebera.

Abasenye ni abakozi bahawe akazi

Ubwo basenyaga inzu y’umwe mu bayobozi iri mu Mudugudu wa Rwubushegeshe, abaturage bahamyaga ko bahaye ruswa abayobozi babegereye.

Umwe muri bo ati “Gitifu mukuru n’umuto b’akagari nibo barya amafaranga y’abaturage. Agahita akubwira ngo genda wubake ndayihagararaho mpaka yuzuye.”

Umunyamabanga Nshingwabikorwa w’akarere atangaza ko ibihano bitazagarukira ku gusenya inzu zubatswe nta byangombwa gusa, ahubwo ngo hari n’abayobozi bazahanirwa uruhare bagize muri uko kubaka mu kajagari.

Ati “Ibyo nabyo turabikurikirana ndetse n’abo bayobozi tuzabahanira ko bakoze amakosa yo kurebera abubaka ahatabugenewe. Ikindi navuga ni uko dushishikariza abaturage kudatanga amafaranga. Ayo mafaranga batanze, ntago yari akenewe kuko nta wagiye gusaba icyangombwa ngo akimwe.”

Ubuyobozi bw’akarere bwari bwatangarije inama Njyanama y’akarere ko inzu 92 zubatswe mu mirenge itatu y’Umujyi wa Kamonyi. Ariko uyu mubare warahindutse kuko mu Murenge wa Runda habaruwe inzu zisaga 98, na ho mu karere kose bivugwa ko hubatswe inzu zisaga 350.

Abenshi ni abafite ibyangombwa by’imiturire.

Bamwe mu barebwa n’icyo kibazo ni abafite ibibanza biherereye mu nkengero z’Umujyi wa Muhanga ariko ntibabisorere bavuga ko nta mikoro bafite.

Ibyo bituma uko umwaka ushize bashyirwaho amande, bikabatera ubwoba ko byazababyarira ibihano umunsi ubuyobozi bwabahagurukiye.

Umusaza Nizeyimana Laurent wo mu Mudugudu wa Rugarama, Akagari ka Gifumba mu Murenge wa Nyamabuye, avuga ko ubutaka atuyeho buriho inzu abamo n’igice cyo guhinga kirimo insina, asabwa gusorera amafaranga ibihumbi 100Frw buri mwaka.

Avuga ko kuva muri 2013 ubwo yahabwaga icyangombwa cy’ubutaka, atigeze atanga umusoro na rimwe kuko ngo ko ntaho yawukura.

Agira ati “Biriya bintu sinzi ukuntu ubuyobozi bwabipanze. Ibihumbi 100Frw mu mwaka nayakura he ko ntaranayatunga! Nibadohore rwose bayagabanye wenda umuntu azagurishaho gato abishyure kuko ubu amaze kuba menshi.”

Muri aka gace abaturage babarirwa umusoro w’ubutaka wa 25Frw kuri hegitari. Amande y’ubukerererwe abarwa buri kwezi. Abatubahiriza igihe cyo kuwutanga, bafite impungenge z’uko umusoro uzageraho ukarenga agaciro k’isambu leta ikayifatira.

Twagiramungu Alexis na we wo mu Kagari ka Gifumba, avuga ko umwenda w’umusoro w’ubutaka bw’ababyeyi be ugeze ku bihumbi 800Frw.

Ati “iyo bakwandikiye umusoro umwaka ugashira ntuwutange, uko ukwezi gushize amande agenda yiyongera ku buryo tuzisanga ubu butaka tuburimo atari ubwacu bitewe n’umwenda wa Leta.”

Uwamariya Beatrice, Umuyobozi w’Akarere ka Muhanga, aragira inama abatabyaza umusaruro ubutaka bwabo kubugurisha cyangwa kubukodesha n’ababishoboye kugira ngo ayo mafaranga y’umusoro aboneke.

Ati “Itegeko ryo gusorera ubutaka ryashyizweho kugira ngo bubyazwe umusaruro. Byari ngombwa ko habaho guhwitura abaturage ariko ikigaragara ni uko hari ababupfusha ubusa.”

Gusa yongeraho ko abatishoboye 2,149 bo mu cyiciro cya mbere cy’ubudehe ari bo akarere kemeye gusonera. Avuga ko uretse abo bashyizwe mu bazasonerwa abandi nta rwitwazo bafte rwo kudasora.

Mu Karere ka Muhanga ubwitabire bwo gusorera ubutaka buri kuri 74%.

Muri Kamonyi hagiye kubwaka uruganda rwenga ikigage.

Biteganijwe ko urwo ruganda ruzatangira kubakwa mu Ukwakira 2017, rukazubakwa muri Bishenyi mu Murenge wa Runda.

Sosiyete y’ishoramari y’Intara y’Amajyepfo igizwe n’abikorera bo muri iyo ntara n’ubuyobozi bw’uturere tw’iyo ntara yitwa SPIC niyo izubaka urwo ruganda ruzuzura rutwaye amafaranga arenga miliyari 1RWf.

Kuri ubu,imashini zizakoreshwa n’ibindi bikoresho bizakenerwa mu gukora no gupfundikira ikigage byageze mu karere.

Umuyobozi w’agateganyo w’Akarere ka Kamonyi, Tuyizere Thadee atangaza ko Akarere ka Kamonyi katanze miliyoni 110RWf n’ikibanza ruzubakwamo.

Akomeza avuga bahisemo kubaka uruganda rwenga ikigage mu rwego rwo gushyira ku isoko ikigage gifite isuku, kitameze nk’icyo abaturage bari basanzwe benga.

Agira ati “(Uruganda) Ruzaba rukora ikigage gipfundikiye kimeze neza. Kizaba kirimo ibice bibiri, igisembuye n’ikidasembuye ku buryo abaturage bashobora kwihitiramo.”

Akomeza avuga ko kwenga icyo kigage bizasaba amasaka angana na 70% n’ibigori bingana na 30%. Ibyo byose bihingwa n’abaturage b’Intara y’Amajyepfo.

Amakuru y’uruganda rwenga ikigage atuma abaturage bagarura icyizere ko bagiye gukomorerwa guhinga amasaka ku bwinshi; nk’uko Tuyishime Gallican abivuga.

Agira ati “Twizere ko iryo shoramari ryo kwenga ikigage rizazana no gukomorerwa tugahinga amasaka muri iki gishanga. N’ubwo yera atinze ariko ashoboye guhangana n’ikirere kuko adatinya izuba cyane.”

Bimwe mu bikoresho bizifashishwa mu kwenga ikigage

Tuyizere avuga ko hazabaho guteza imbere igihingwa cy’amasaka ku buryo abifuza kuyahinga batagomba kugira impungenge.

Ati “Uruganda iyo ruje, rukenera kubona isoko ry’ibyo rukoresha ku buryo bworoshye. Tuzaganira n’ubuyobozi bw’uruganda uburyo bwo guteza imbere icyo gihingwa kandi tuzi ko ari igihingwa cya gakondo n’ubundi hari abasanzwe bayahinga.”

Muri Ruyenzi hari urusisiro rwubatswe mu matora.

Inzu 92 nizo zabaruwe ko zubatswe mu Karere ka Kamonyi mu gihe cy’amatora, abayobozi bakitwaza ko bari bahugiye mu gutegura amatora mu gihe hari abaturage bemeza ko hagiye habaho ubwumvikane hagati y’abubakaga na bamwe mu bayobozi.

Nyuma yo gusura aho amwe muri aya mazu yubatse mu murenge wa Runda, tariki 06 Nzeri 2017, Guverineri Mureshyankwano yasobanuye ko bidashoboka ko inzu igera aho isakarwa nta muyobozi ubizi.

Yagize ati “Ntabwo mu gihe cy’amatora ari igihe cyo gukora amakosa, cyangwa igihe cyo kurangara uri umuyobozi ahubwo aba ari igihe cyo kuba hafi y’abaturage.

Aho twasanze hubatswe mu kajagari, abayobozi bakavuga ko bari bahugiye mu matora ariko ruriya ni urwitwazo bakabaye barafashe ingamba kugira ngo ziriya nzu ntizijyeho.”

Guverineri Mureshyankwano avuga ko amatora atari urwitwazo rwo gukora amakosa.

Guverineri Mureshyankwano ntiyemeza ko mu kubaka ayo mazu hatanzwe ruswa kuko nta bimenyetso.

Ariko yasabye ko Amabwiriza agenga imyubakire yubahirizwa, ayubatswe nta byangombwa agakurwaho kandi n’abayobozi bigaragara ko babigizemo uburangare bagahanwa.

Ati “Na wa muyobozi warebereye akarangara, wirengagije hari izindi mpamvu, nawe agomba guhanwa hakurikije imihanire y’abakozi ba Leta.”

Iki kibazo cyari cyagejejwe ku nama njyanama yateranye tariki 30 Kanama 2017, kuko hari abubatse bari bayandikiye basaba imbabazi, ariko abajyanama bibutsa Komite Nyobozi ko ari inshingano za yo kugenzura iyubahirizwa ry’igishushanyo mbonera.

Guverineri avuga ko atiyumvisha ukuntu inzu yakubakwa ikagera aho isakarwa ubuyobozi butayizi.

Karuranga Emmanuel, Perezida w’Inama Njyanama, yavuze ko muntu wubatse inzu mu buryo butemewe, bidasaba ko ikibazo cye gishyirwa muri Njyanama kuko uwo muntu asenyerwe.

Ati “Ariko ikibazo si abaturage gusa, ahubwo harimo n’abayobozi bagira uburangare, hari n’abavugwa ko hari abaryamo ruswa.

Ubwo rero ni inshingano za komite nyobozi gufatira icyemezo haba ku baturage ndetse n’abayobozi bizagaragara ko babifitemo uruhare.”

Umuturage w’Akagari ka Muganza mu murenge wa Runda, ahamya ko ubuyobozi bwumvikana n’umuturage bugahishira ko ari kubaka nta byangombwa.

Ati “Nta wahamya ruswa ariko iyo mufite uko mwavuganye, yica ijisho akirengagiza kureba.”

Abanyamabanga Nshingwabikorwa b’utugari tugize Umurenge wa Runda bemera uburangare bagize kandi ngo biteguye gusenyera abubatse ibitemewe.

Begerejwe uruganda rutonora umuceri, rubazanira imbuto nziza zirimo iyitwa "Buryohe"

Urwo ruganda, rwitwa MRPIC rwubatse mu Murenge wa Mugina,ngo ntirurahaza abahinzi b’umuceri bari batarabona inyungu z’umuceri kuko kuwutobona byabagoraga.

Abahinzi bibumbiye muri Koperative “COPRORIZ Abahuzabikorwa”, ihinga igishanga cya Mukunguri, bajyanaga umuceri wabo kuwutonoza ku ruganda rwa Kabuye ruri mu Mujyi wa Kigali,uwo kurya bakawusekura mu isekuru.

Umwe muri abo bahinzi witwa Sezibera Eliezer avuga ko kuba uruganda rwarabegereye byatumye babona isoko rihoraho.

Agira ati “Umuntu yatangaga nk’ibiro 50 by’umuceri udatonoye bakajya kuwugurisha k’uruganda, ubundi usigaye tukawusekura undi ukagurishwa udatonoye ku gasorori.”

Akomeza avuga ko ubwo buryo ngo bwatumaga batabona amafaranga uko babyifuza kuko yazaga ari make kandi akaza rimwe na rimwe.

Sezibera avuga ko icyo gihe mu ruganda yahakuraga nk’ibihumbi 10FWf, usigaye akawugurisha ku gasorori, kamwe akagurisha 150RWf.

Avuga ko urwo ruganda begerejwe rutwara umusaruro wose, amafaranga agatangirwa rimwe, n’umuhinzi agahabwa umuceri wo kurya ungana 20% by’umusaruro we.

Bataregerezwa uruganda bacuruzaga umuceri udatonoye bagahendwa

Uyu mugabo ahamya ko ku gihembwe kimwe abona ibihumbi 120RWf, amufasha kugekemura ibibazo byo mu rugo. Ahabwa kandi n’ibiro 25 by’umuceri wo kurya. Kuri urwo ruganda ikiro kimwe cy’umuceri udatonoye kigura 290RWf.

Sezibera avuga ko urwo ruganda runabafasha gushaka imbuto nziza n’inyongeramusaruro.

Mbere ngo bahingaga imbuto z’umuceri utukura udatanga umusaruro ariko kuri ubu ngo bahinga umuceri uryoshye witwa “Buryohe” na “Kigori” utanga umusaruro mwinshi. Kuri hegitari imwe bezaho umuceri ungana na toni esheshatu.

Tegeri Dieudonné, perezida w’inama y’ubutegetsi ya MRPIC avuga ko baha agaciro abahinzi kuko ari bo soko ya mbere y’umusaruro.

Agira ati “Twaje gushora imari mu cyaro ariko ntitwagombaga kwirengagiza iterambere ry’abaturage kuko ni bo baduha ibyo duheraho dukora.”

Kuri urwo ruganda rutunganya umuceri hari urundi rutunganya ibishishwa by’umuceri bikavamo amakara ya kijyambere

Buri mwaka uruganda rufasha abahinzi batishoboye kugera ku bikenerwa by’ibanze. Rumaze guha inka abantu bagera 46, rwahaye amashanyarazi y’izuba abantu 12, hari n’abo rutangira umusanzu wa Mituweri.

Uru ruganda rwatangiye mu mwaka wa 2012, rufite intego yo kwita ku musaruro w’abahinzi, rwabyaye urundi ruganda rutunganya ibishishwa cy’umuceri rukabikoramo ibicanwa bimeze nk’amakara byitwa “Briquettes”. Rufite abakozi 46 bahoraho n’abandi ba nyakabyizi.

Rwatangiranye amafaranga y’ u Rwanda angana na Miliyoni 150RWf. Kuri ubu rufite agaciro ka Miliyoni zisaga 900RWf.

Ayo macupa asa n’umweru niyo arimo amavuta bakora mu bishashara by’inzuki

Abo bavumvu ni abibumbiye muri Koperative yitwa “KODA” ikorera mu murenge wa Kayumbu.

Twagirimana Alexandre, umwe mu bagize iyo Koperative avuga ko Koperative yabo yatangiye mu mwaka wa 2010. Batangiye batunganya ubuki bakabushyira mu bikoresho byabugenewe bakabugurisha.

Muri uko gutunganya ubuki ngo hasigaraga ibishashara byavuyemo ubuki bakabita. Nyuma ngo nibwo batekereje icyo bajya bibakoramo maze muri 2013 batangira kujya babisongesha, bakabikoramo amavuta yo kwisiga na bouji zo gucana.

Twagirimana avuga ko kugira ngo amavuta aboneke babanza gushongesha ibyo bishashara bakavangamo amavuta y’ubuto ya soya cyangwa ay’ibihwagari, ubundi bagashyiramo umubavu w’indabyo z’igiti cyitwa Geranium, hakavamo amavuta y’igikotoro yo kwisiga.

Akomeza avuga ariko kubera kubura ibikoresho bihagije birimo ibishashara n’imashini zibishongesha, bakora amavuta make agashira abantu bakiyakeneye.

Ayo mavuta bakora hari ayo bagurisha 2000RWf nayo bagurisha 1000RWf.

Twagirimana ati “Dufashwa n’umushinga ARDI, ariko ubufasha dufite ni buke ku buryo tubona ibi dukora bidatera imbere ngo bikwire mu masoko menshi. No kutagira icyemezo cy’ubuziranenge ni indi mbogamizi itubuza gukwirakwiza ibikorwa byacu.”

Ayo mavuta yo kwisiga afite mu ntoki niyo bakora mu bishashara by’inzuki

Akomeza avuga ko ibishashara by’inzuki bakuramo amavuta ari ibyo bakura mu mizinga yabo ya Kinyarwanda bafite kuko ngo iya kizungu yo nta bishashara bakuramo kugira ngo inzuki zikomeze gutanga umusaruro.

Tariki ya 16 Kamena 2017, ubwo hasozwaga imurikabikorwa ryari rimaze iminsi itatu ribera muri Kamonyi, abo bavumvu n’abandi bakora ibikorwa bitandukanye bigaragaraza udushya bemerewe ubufasha.

Ibishashara by’inzuki n’ibyo nibyo bashongesha bakabikuramo amavuta yo kwisiga

Minisitiri w’Imari n’igenamigambi, Claver Gatete wasoza iryo murikabikorwa yijeje ubufasha abakora udushya kuko ngo inzego za Leta zishinzwe guteza imbere ibikorerwa mu Rwanda zishobora kubafasha kubona ibikenewe.

Aragira ati “Nta handi ubukungu bw’igihugu buva. Ibi rero birashoboka, ari uko twese dufatanyije, kugira ngo twongereho agaciro, twongereho ubuziranenge, kugira ngo turebe ko twagera ku masoko mpuzamahanga.”

Akomeza kandi arasaba uturere kujya dutumira ikigo cy’igihugu cy’iterambere RDB n’Ikigo gishinzwe Ubuziranenge RSB mu mamurikabikorwa kuko ari byo bifasha mu kumenekanisha ibikorerwa mu Rwanda.

Aha ni muri Kamonyi ubwo bacukuraga bashaka umwana wagwiriwe n’ikirombe yagiyemo gucukura amabuye y’agaciro

Ibyo bitarangazwa mu gihe abana bane bo muri ako karere bagiye mu kirombe muri Gicurasi 2017, babiri bakahasiga ubuzima.

Umuyobozi w’ishuri ribaza rya Murehe, Kagoyire Verena avuga ko mu mwaka wa 2016, abana 43 bataye ishuri, naho ngo kuva uyu mwaka watangira hamaze kugenda abanyeshuri 13.

Agira ati “Hari n’abandi biga basiba, ugasanga basibye nk’inshuro eshatu mu cyumweru. Hari abajya gucencura umucanga, abajya mu birombe, ifaranga ryamuryohera, akagenda agiye.”

Nkurunziza Jean de Dieu, Umunyamabanga Nshingwabikorwa w’Umurenge wa Rukoma, iryo shuri riherereyemo agaya ababyeyi gushyigikira abana bata ishuri bakajya mu mirimo itabakwiye.

Agira ati “Babiba amatungo cyangwa imyaka mukaregera ubuyobozi, ariko ntawe urabura umwana ngo aze abitumenyeshe. Usanga ibibazo byo guta ishuri bibazwa mwarimu n’abayobozi kandi uwa mbere wagomye kubibazwa ari umubyeyi.”

Ababyeyi bavuga ko impamvu itera bamwe muri bo kureka abana bakajya mu birombe ari uko baba bakeneye ko babafasha gutunga umuryango ; nk’uko uwitwa Musangire Martin abisobanura.

Agira ati « Abo bana na bo iyo babonye nka 1000RWf, baragenda bakaryamo amandazi, andi bakayashyira ba nyina bakayagura ‘Shirumuteto’ (ifu y’imyumbati) urugo rwose rukarya ».

Umuyobozi w’umurimo mu Karere ka Kamonyi, Tumwine Venant asobanurira ababyeyi ko umwana utaragera ku myaka 18 y’amavuko ashobora gukora imirimo yoroheje ijyanye n’ikigero cye.

Ariko umwana nk’uwo ntiyemerewe gukora imirimo mibi ivunanye irimo ubucukuzi bw’amabuye y’agaciro, gukora mu nganda, gukora mu buhinzi bw’icyayi cyangwa ikawa, kubaka n’ibindi.

Minisiteri y’abakozi ba Leta n’umurimo (MIFOTRA) yo ivuga ko ufatiwe mu cyuho akoresha abana imirimo mibi ahanishwa ibihano birimo gucibwa amande hagati y’ibihumbi 50RWf na 100RWf no gufungwa.

Bateye amabuye ku nzu ye amabati aratoboka

Uwo mukecuru ufite imyaka 55 y’amavuko, aba mu nzu isakaje amabati. Ayibanamo n’abana babiri umwe uri mu kigero cy’imyaka 10 n’undi w’imyaka ibiri.

Avuga ko abantu ataramenya bahengera nijoro yaryamye bagatera amabuye ku nzu ye, ntabashe kuryama atekanye.

Mu ijoro ryo ku itariki 29 Gicurasi 2017 ngo byarushijeho gukaza umurego ku buryo ngo bateye amabuye, amabati asakaye inzu ye agatoboka.

Ahamya ko abamutera amabuye ari abaturanyi be babuze uko bamufungisha bakaba bashaka kumumenesha.

Uwo mukecuru yemeza ko guterwa amabuye hejuru y’inzu byatangiye mu ntangiriro z’umwaka wa 2017, ubwo umwe mu baturanyi be yamushinjaga kumurogera inkoko zapfuye n’umwana warwaye ariko akaza gukira.

Icyo gihe ngo uwo muturanyi we yagiye kumurega mu buyobozi, bujyana uwo mukecuru bumufunga ijoro rimwe agaruka mu rugo.

Uyu mukecuru avuga ko abuzwa amahwemo n’abantu barara batera amabuye ku nzu ye

Uwo mukecuru uvuga ko yarekuwe kuko Polisi y’igihugu ikorera muri ako gace yasanze ibyo aregwa bidafite ishingiro,

Agira ati "Ni inshuro ya gatanu bantera amabuye. Njya mu buyobozi kurega, abaturanyi bakankurikira bagahita bavuga ko ndoga."

Abaturanyi b’uwo mukecuru bavuga ko ari umupfumu. Ntibahakana ko urugo rwe rurara ruterwaho amabuye ariko bavuga ko atari bo bayatera,nk’uko uwitwa Ndagijimana Jean Claude abivuga.

Agira ati "Aduhutera ibintu hejuru y’inzu bugacya umuntu yarabiranye. Ubanza ibyo ari byo byamuteye ubwoba, akitera amabuye".

Umuyobozi w’Akagari ka Ruyenzi, Rwandenzi Epimaque yemeza ko uwo mukecuru afite umutekano muke kandi awutezwa n’abaturanyi be batabanye neza.

Agira ati "Ubundi uburozi ntawabuhamya ubundi bwemezwa na muganga kandi ntawe araroga ngo apfe."

Uwo mukecuru yagejeje ikibazo cye ku muyobozi w’Akarere ka Kamonyi, Aimable Udahemuka maze amushinganisha mu baturage no ku buyobozi ababwira ko ntawe ugomba kumubuza umutekano.

Iyo niyo nzu uwo mukecuru utuye muri Kamonyi atuyemo

Aba baturage bo muri Kamonyi barimo bacukura bashakisha uwo ikirombe cyagwiriye

Byavugiwe mu nama yabahuje n’ubuyobozi bw’ako karere, yabaye ku wa kabiri tariki ya 22 Gicurasi 2017.

Muri iyo nama baganiriye ku kibazo cy’umutekano muke ugaragara mu birombe, aho mu gihe cy’ukwezi kumwe bimaze guhitana ubuzima bw’abantu bane barimo abana babiri. Abo baguyemo ngo bari baje kwiba amabuye y’agaciro.

Abafite amasosiyeti acukura amabuye y’agaciro bagaragaje ko ubwo bujura bw’amabuye butizwa umurindi n’abaforoderi bagura amabuye y’agaciro n’ababa bavuye kuyiba, nk’uko bitangazwa na Ndaberetse Thadee.

Agira ati “Amenshi mu ma butiki yo muri kamonyi acuruza amabuye rwihishwa. Abo rero nibo batuma abajura kubashakira amabuye mu birombe byacu.

Ikibazo rero usanga nk’abayobozi b’imidugudu baba bazi abo bantu ntibatange amakuru, ab’utugari bo baba ari inshuti z’abo bagura amabuye.”

Ubwo bucuti hagati y’inzego z’ibanze n’abaforoderi b’amabuye y’agaciro ngo butuma hagaragara intege nke ku ruhande rw’ubuyobozi mu gukumira ubucukuzi bwo mu kajagari.

Gucukura mu kajagari ngo biteza igihombo abacukuzi babifitiye ibyangombwa, bukaba n’intandaro y’impanuka kuko abiba bajya mu kirombe batazi uburyo giteze.

Mbanda Gervais, uyobora isosiyeti yitwa Rukoma Mining Company” wigeze kwibwa amabuye y’agaciro mu kwezi kw’Ukuboza 2016, abayibye bakaba barabafunzwe ariko akaba atarasubizwa amabuye ye, arasaba ubuyobozi na Polisi guhana abohereza abajura.

Agira ati “Cyane cyane dusaba inzego z’ibanze na Polisi, ko bajya badufasha, twafata umujura yavuga aho ibyo yiba abijyana; uwo muforoderi agahanirwa ubufatanyacyaha.”

Abakora ubucukuzi bw’amabuye y’agaciro bahamagariwe gukaza umutekano aho bakorera

Umuyobozi w’Akarere ka Kamonyi, Aimable Udahemuka yabijeje ubufatanye mu gukumira ubucukuzi bukorwa n’abatabifitiye ibyangombwa ariko nabo abasaba gukaza uburinzi ku birombe.

Agira ati “Tuzaganira n’abaturage tubabuze kujya mu birombe by’abandi kuko aribo babisorera. Ibyo byose bizajyana no kuganira n’abayobozi, tubibutse ko indangagaciro y’umuyobozi, zitamwemerera kwinjira mu tuntu nk’utwo.”

Amasosiyeti acukura amabuye y’agaciro mu Karere ka Kamonyi yibukijwe gukoresha abakozi bafite ubwishingizi bw’ubuzima, amasezerano y’akazi, ubwiteganyirize no kugira urutonde rw’abakozi bazwi.

Ubucukuzi bw’amabuye y’agaciro bukorerwa cyane mu Mirenge ya Rukoma, Ngamba na Kayenzi. Amabuye ahaboneka ni Koruta na Gasegereti.

Mukecuru Elisabeth inkunga agenerwa nk’incike ituma abona icyo ahemba umufasha imirimo

Abo babyeyi ubusanzwe bahabwaga iyo nkunga buri gihembwe. Buri kwezi baba bagenewe ibihumbi 30RWf. Bayagenerwa n’Ikigega cya Leta gitera inkunga abarokotse Jenoside batishoboye (FARG).

Ariko bavuga ko baheruka amafaranga bahawe ku itariki 04 Kanama 2016. Nyuma yaho bategereje ko bahabwa ay’ibindi bihembwe baraheba.

Aba babyeyi bahamya ko kutabonera iyo nkunga ku gihe byabateye kubaho nabi ku buryo ngo kubona ibyo kurya bisigaye bibagora, nk’uko Mukandoli Vestine umwe muri bo abisobanura.

Agira ati “Nkiyabona nari mbayeho neza kuko sinari nkijya gutashya cyangwa kuvoma nari narazanye umukozi wo gutuma. Kugeza ubu abakozi twarabirukanye kuko ntacyo kubahemba , mbese ubu turi mu buzima bubi ».

Uwantege Renatha, Perezidante w’Umuryango w’Abapfakazi ba Jenoside (AVEGA Agahozo) muri Kamonyi, ahamya ko iyi nkunga yari yarahinduye imibereho y’incike za Jenoside, kutayibonera igihe bikaba bibasubiza mu buzima bubi.

Aragira, ati « Reba nawe abantu ntibabyiruka nyine barashaje, bageze muri cya kigero bavuga ngo ni ‘ndinda mwana’ kandi bo nta bana bafite. Ni ibintu rero bikomeye, iyo inkunga itinze imibereho iba yahindutse ».

Umukozi ushinzwe imibereho y’abaturage mu Karere ka kamonyi, Umuhoza Alexia atangaza ko amafaranga yo gufasha abo babyeyi yari ahari ariko yatinze koherezwa kuri konti zabo kuko urutonde rw’abayagenewe rwabanje kuvugururwa muri Gashyantare 2017.

Muri 2016 abahabwaga iyo nkunga y’ingoboka bari 77 ariko ngo nyuma y’ivugururwa babaye 109 kuko hongewemo n’abarokotse Jenoside bageze mu zabukuru batishoboye n’ababaye incike mbere na nyuma ya Jenoside yakorewe Abatutsi.

Uwo mukozi avuga ko mu ntangiro z’ukwezi kwa Gicurasi 2017, amafaranga y’incike yoherejwe ku makonti ya bo, ariko kugeza ku tariki ya 17 Gicurasi 2017 iyo nkunga bari batarayibona.

Gakara yagwiriwe n’ikirombe bamukuramo nyuma y’amasaha 30 akiri muzima

Amasuka, ibitiyo n’amapiki by’abaturage byananiwe kumukuramo, biyampaza imashini icukura ku Cyumweru tariki ya 14, nyuma y’amasaha atatu imugeraho saa kumi z’umugoroba ari muzima.

Abari batabaye baje bitwaje n’ibyangombwa byo gutwara umurambo kuko bakekaga ko yarangije gupfa, ariko babisubije imuhira bataha bashima Imana ku by’icyo gitangaza yabakoreye.

Gakara akimara gukurwa mu kirombe yahise ajyanwa ku bitaro bya Remera Rukoma gusuzumwa ko nta ikibazo cy’ubuzima afite, basanga ntacyo uretse ko ngo bategereje kumucisha mu cyuma (Radio), kugira ngo barebe niba nta kibazo yagize imbere mu mubiri.

Akimara gukurwa mu kirombe yajyanywe kwa Muganga kugira ngo bamenye uko ubuzima bwe bumeze

Uyu mugabo ufite imyaka 36 y’amavuko amaze imyaka umunani mu bucukuzi bw’amabuye y’agaciro, akorera kompanyi y’ubucukuzi yitwa "Hatari company". Arubatse afite umugore n’abana babiri.

Nyuma y’uko aheze mu kirombe ku wa gatandatu, mu kindi kirombe cyo mu Kagari ka Taba mu Murenge wa RUKOMA , haguyemo uwitwa Niyotwiringira Jean Paul w’imyaka 25 wakoreraga Kompanyi ya Etablissement Thadee Ndaberetse.

Hifashishijwe imashini icukura nyuma yo kunanirwa kw’abaturage

Mwiseneza Jean Claude n’abavandimwe be batatu Jenoside yararangiye ntibabimenya

Aba bana bo mu Murenge wa Karama ho mu Karere ka Kamonyi batandukanye n’ababyeyi babo tariki 21 Mata 1994, nyuma yo kubona se atemaguwe n’Interahamwe.

Babanje guhungira mu nshuti zitandukanye z’umuryango wa bo ariko zikabirukana zitinya gusenyerwa, bahitamo gukurikira impunzi zaturukaga i Kigali, baruhukira mu cyahoze ari Perefegitura ya Gikongoro, ahitwa mu Gasarenda.

Mwiseneza wari ufite imyaka 10, ati “hari aho twageze ibirenge byarabyimbye tukajya dufata ibyatsi bita imitagara tukabikandisha ibirenge bya barumuna bacu.

Twakambitse mu Gasarenda abasirikari bo kwa Habyarimana bagahunga tureba ariko twanga gukomeza”.

Banze gukurikira ingabo zatsinzwe, ariko n’Inkotanyi zimaze kubohora igihugu banga kugaruka iwabo.

Mwiseneza, ati “Inkotanyi zaraje zitubwira ko zidashaka impunzi, zisaba abashaka gukomeza muri Congo kugenda, n’abashaka gutaha babazanira imodoka ariko twe twanga kugira aho tujya.

Tukavuga tuti ‘dusubira i Kayenzi n’umuhoro twasizeyo’! ubundi twari tuzi ko Jenoside itararangira”.

Mukuru wa Mwiseneza yahise ashaka akazi muri Resitora aho mu Gasarenda, akajya akorera amafaranga yo gutunga barumuna be.

Mu kwezi kwa Kanama 1995, nibwo uwo muvandimwe mukuru yasubiye iwabo kureba uko byifashe, abona kugaruka kubatinyura barataha.

Bavuga ko basanze hari amahoro n’umutekano n’abandi bana basubiye mu ishuri na bo bajya kwiga.

Nsabimana Fabien, Perezida w’umuryango Ibuka mu Murenge wa Karama, avuga ko bishimira kuba abana barokotse Jenoside barabashije gusubira mu ishuri.

Ati” dushima leta yadushyiriyeho ikigega FARG gifasha abana kwiga none ubu abenshi barayarangije amashuli, bafite ubumenyi bwo kwitunga no kubeshaho imiryango ya bo”.

Ikindi bashima ni uko bafite umutekano bakaba nta muturage wikanga ngo baramwica cyangwa baramusenyera.

Guverineri Mureshyankwano yafashwe n’ikiniga ararira ubwo yari ari mu muhango wo Kwibuka abazize Jenoside yakorewe Abatutsi

Icyo kiniga, uyu muyobozi yagitewe n’ubuhamya bw’umusore witwa Uwarurema Theoneste warokokeye kuri Paruwasi Gatulika ya Mugina.

Uwamurera yahungiye kuri Paruwasi ya Mugina n’abavandimwe be batanu na se na nyina. Bahasanze abandi Batutsi bari bahahungiye baturutse mu makomini yari aturanye na Komini Mugina.

Interahamwe zahise zibafungira amayira yo kujya kuzana ibyo kurya cyangwa kuvoma amazi.

Babanje kwirwanaho kuko bari bashyigikiwe na Burugumestiri wayoboraga Mugina witwa Callixte Ndagijimana ariko bageze aho baramwica, Interahamwe zibona kwirara mu Batutsi zirabica.

Agira ati “Ibitero byarazaga bakarwana, bakava nka saa munani bikagera nka saa kumi n’ebyeri z’umugoroba.

Bageze aho batumiza Abarundi bari barahungiye i Nyagahama (Ntongwe) barabafasha batema Abatutsi, iyi mbuga yose yari yuzuye imirambo.”

Akomeza avuga we n’abavandimwe bose babonye urupfu rwa nyina wishwe na gerenade yatewe n’Interahamwe.

Ku munsi wakurikiyeho Interahamwe zaraje zica se n’abavandimwe, Theoneste arokoka wenyine nawe ari inkomere.

Ubu buhamya bwakurikiwe n’indirimbo y’umuhanzi Bonhomme zirimo ubutumwa bwateye abantu batandukanye guhungabana.

Guverineri Mureshyankwano yarize ubwo yari agiye kuvuga ijambo

Guverineri Mureshyankwano yafashwe n’icyo kiniga ubwo yari agiye kuvuga ijambo, amara igihe cy’umunota umwe ataravuga arira.

Nyuma y’aho yagize ati “Mu by’ukuri ntabwo byoroshye kwibuka imbaga y’Abatutsi basaga ibihumbi 50 biciwe ahangaha.”

Kuri Paruwasi ya Mugina hari urwibutso rushyinguwemo imibiri y’Abatutsi bazize Jenoside ibihumbi 40. Kuri uyu wa gatatu tariki ya 26 Werurwe 2017 hashyinguwemo indi mibiri ibihumbi 11 yahimuriwe.

Iyi nzu yuzuye itwaye miliyoni 300RWf yarangiritse ku buryo ishobora no gusenyuka

Iyo nyubako y’igorofa rimwe, iri iruhande rw’urwibutso rwa Jenoside rwa Kamonyi ruherereye mu Kibuza, mu Kagari ka Nkingo, mu Murenge wa Gacurabwenge.

Ishashemo amakaro mu byumba byose, irimo amashanyarazi, ndetse isize amarangi y’umweru n’ay’iroza. Yatangiye gusenyuka ku bikuta bitewe n’ubukonje ndetse no mu gisenge hari aho bigaragara ko yasenywe n’amazi y’imvura.

Iyi nzu yubatswe mu mwaka wa 2006, kwangirika kwayo bimaze imyaka isaga itanu bigaragaye, ariko ubuyobozi bw’Akarere ka Kamonyi bukavuga ko ntacyo bwayikoraho kuko iri mu maboko ya Minisiteri y’umuco na Siporo.

Imbere muri iyo nzu hatangiye kwangirika bihereye ku nkuta

Abaturage b’Akarere ka Kamonyi bababazwa no kubona iyi nyubako ipfa ubusa kandi yakwifashishwa mu gusobanurira urubyiruko n’abandi bantu baza gusura urwibutso, uburyo Jenoside yakorewe Abatutsi muri 1994 yagenze; nk’uko umwe muri bo witwa Gafaranga Francois abisobanura.

Agira ati “Biragaragara ko iyi nyubako yatwaye amafaranga menshi. Ibyiza bazayivugurure ireke gukomeza kwangirika ubundi bayishyiremo ubuhamya n’ibimenyetso bigaragaza uko Jenoside yakozwe mu kwezi kwa kane 1994. Urubyiruko n’abandi batayibonye babimenye.”

Iyo nzu uyirebeye inyuma ubona koko yaratangiye kwangirika

Umuyobozi w’Akarere ka Kamonyi, Udahemuka Aimable yatangarije Kigali Today ko iyo nzu noneho yeguriwe akarere ayoboye ku buryo ngo kagiye kuyitaho mu ngengo y’imari y’umwaka wa 2017/2018.

Agira ati “Ubu bayidushyize mu maboko, igisigaye ni ukuyivugurura, ikabika amateka ya Jenoside yakorewe Abatutsi hano ku Kamonyi.”

Iyi nzu yubatswe n’umushinga wita ku bacitse ku icumu ku isi (SURF). Yuzuye itwaye asaga Miliyoni 300Frw.

Iyo nzu uyirebeye kure ni uko imeze

Ku Bitare bya Mpushi muri Kamonyi hari amateka kuburyo hatabungabunzwe ayo mateka yasibangana

Abazi amateka yo “Ku bitare bya Mpushi” bahamya ko ubwo umwami Ruganzu II Ndoli yahanyuraga yahasize ibimenyetso birimo igisoro, ikibumbiro, amajanja y’imbwa ze, intebe yicaragaho, ikinono cy’inka, n’aho bashyiraga ingobyi y’umwami.

Ariko kuri ubu iyo uhageze usanga ibyo bimenyetso byaratangiye kwangirika ku buryo hatitaweho byasibangana burundu.

Mukezangango Aaron, umusaza ufite imyaka 85 avuga ko yavutse bavuga ko ibyo bimenyetso byangizwa n’abahakoze umuhanda bajya gucukura amabuye kuri ibyo bitare.

Agira ati “Tukiri abana, hari ikibumbiro, natwe iyo twajyaga kuragira, nicyo twashoragamo inka zacu, ariko ubu abahakoze umuhanda barabisibye.”

Ku bitare bya Mpushi hari igisoro cyahasizwe n’umwami Ruganzu II Ndoli ubwo yahanyuraga ariko cyatangiye gusibangana

Ibitare bya Mpushi biherereye mu Kagari ka Mpushi mu Murenge wa Musambira, mu bilometero 10, uvuye aho imodoka zihagarara ku Kivumu ku muhanda wa kaburimbo Kigali-Huye.

Ni ahantu hejuru y’umusozi hari ibibuye binini (ibitare) bifite ubutumburuke burebure. Ngo hari abazungu bahakorera siporo yo kuzamuka ku migozi.

Ku bitare bya Mpushi hari ikibumbiro cyahasizwe n’umwami Ruganzu II Ndoli ubwo yahanyuraga

Abahatuye bifuza ko aho hantu hatunganywa, hakubakwa kuburyo haba ahantu ndangamateka abantu batandukanye bakajya baza kuhasura; nkuko Rudasingwa Francois abivuga.

Agira ati “Abazungu bahaje kuva mbere. Kubera amateka yaho, twumvaga ubuyobozi cyangwa abashoramari bahatunganya hakitabwaho ku buryo hajya hakorerwa ubukerarugendo.”

Umunyamabanga Nshingwabikorwa w’Akarere ka Kamonyi, Bahizi Emmanuel atangaza ko ku “Bitare bya Mpushi” ari hamwe mu hantu nyaburanga akarere keretse ikigo cy’igihugu cy’iterambere (RDB) kugira ngo bazafatanye kuhitaho no kubungabunga amateka yaho.

Agira ati “Muri gahunda ya RDB yo guteza imbere ubukerarugendo mu gace k’amajyepfo bise “South corridor”, na biriya Bitare twarabiberetse.

Ubu harimo gukorwa inyigo y’icyahakorerwa. Ubwo nyuma y’inyigo nibwo tuzamenya umushinga twahakorera.”

Ku Bitare bya Mpushi ni ahantu hirengeye kuburyo ngo hari n’abajya kuhasengera

Kuri ubu ubuyobozi bwahagaritse abahacukuraga amabuye yo kubaka, ndetse bukangurira n’abaturage kuhabungabunga bakirinda gukora ibikorwa byahangiza.

Ku “Bitare bya Mpushi” uretse abazungu bajya kubikoreraho siporo, hari n’abakristo bajya kuhasengera.

Ibitare bya Mpushi nabyo bifite ubutumburuke

Madolene yambuwe na Gitifu w’Akagari bituma Banki iteza utwe

Nyirangendahimana avuga ko Gitifu w’Akagari ka Mwirute, mu Murenge wa Rukoma witwa Mukanyabyenda Justine, amurimo ideni ringana n’ibihumbi 134.920RWf yamuhaye ayakuye mu nguzanyo yatse muri Banki yitwa “Urwego Opportunity Bank”.

Uyu mugore wakoraga akazi k’ubucuruzi buciriritse, ngo yari yasabye inguzanyo y’ibihumbi 200RWf muri iyo Banki.

Uwo Gitifu ngo yahise amuguzamo ibihumbi 100RWf, amubwira ko azamufasha kuyishyura. Nyuma y’aho ngo yanafashe ibicuruzwa by’ibihumbi 34920RWf.

Nyirangendahimana akomeza avuga ko kutishyurwa n’uwo Gitifu byamuviriyemo guhomba no kubura uko yishyura banki, maze iteza umurima we yari yatanzeho ingwate.

Ahamya ko icyo cyibazo cyabaye mu mwaka wa 2015, akaba yarakigejeje ku buyobozi bw’Umurenge wa Rukoma.

Ubuyobozi bw’uwo murenge ngo bwamuhaye itariki ntarengwa ya 15 UKuboza 2016 ko azaba yarangije kwishyura, ariko ngo ntiyigize abikora.

Agira ati “Avuga ko agiye kuyashyira ku murenge nkazayahasanga, ariko ngezeyo inshuro enye zose nsanga atarayahashyira.”

Aganira n’umunyamakuru wa Kigali Today ku murongo wa telefone, uwo Gitifu w’Akagari yavuze ko nta muturage afitiye umwenda.

Tariki ya 08 Gashyantare 2017, Nyirangendahimana yagejeje icyo kibazo ku muyobozi w’Akarere ka Kamonyi, Udahemuka Aimable ubwo yari ari mu nteko y’abaturage yabereye mu Kagari ka Gishyeshye, mu Murenge wa Rukoma.

Umuyobozi w’Akarere ka Kamonyi yijeje uwambuwe na gitifu kumwishyuriza

Udahemuka atangaza ko imyitwarire yaranze uwo munyamabanga nshingwabikorwa idakwiye kwihanganirwa.

Agira ati “Ku kibazo cy’uriya muturage wambuwe na gitifu, tugiye kwicara nk’ubuyobozi bw’akarere, tukigeho , ku buryo uriya muturage azishyurwa ndetse n’ibyo yahombye akabisubizwa.”

Umuyobozi w’akarere yagaye ingeso yo guhishirana yagaragaye kuri iki kibazo, kuko avuga ko yakimenyeye mu nama kandi hari abandi bayobozi bari bakizi ntibakimubwire.

Abagenzi bageze kuri ibi biro by’umurenge babura umuyobozi ubasezeranya bari bamaze igihe bitegura ibirori by’ubukwe

Abo bageni bagombaga gusezerana kuri uwo murenge imbere y’amategeko, tariki ya 26 Mutarama 2017.

Kuri uwo munsi bari babyutse babukereye, abageni b’abakobwa bakenyeye abasore nabo bambaye amakoti na karuvati, banateguye ibyo kunywa n’ibyo kurya bari bwakirize ababashyigikiye.

Mu masaha ya mu gitondo ariko batunguwe no kugera ku biro by’Umurenge wa Karama bagasanga nta muyobozi uhari ugomba kubasezeranya.

Bagombaga gusezeranywa n’Umuyobozi w’Akarere ka Kamonyi, Udahemuka Aimable kuko uwo murenge udafite Umunyamabanga Nshingwabikorwa ufite ububasha bwo kubasezeranya.

Abo bageni ngo bari bariyandikishije mu kwezi kw’Ugushyingo 2016, bahabwa itariki yo gusezerana ya 26 Mutarama 2017, bituma bahita batumira abazabaherekza.

Batunguwe ngo nuko bahakaniwe ko batagisezeranyijwe hasigaye umunsi umwe ngo itariki bahawe igere,nk’uko umubyeyi wari gushyingira umukobwa we abisobanura.

Agira ati “Ku wa kabiri tariki ya 24 Mutarama b2017, bagiye kwandikisha inkwano, bababwirwa ko ubukwe butakibaye kandi twariteguye inzoga twarazenze, ibyo kurya twahashye ndetse n’imyenda yarakodeshejwe.”

Akomeza avuga ko inzoga yari yenze yazikopye abafite akabari ngo bazazimwishyure ubukwe nibusubukurwa.

Ariko ngo hari ibyo yahombye birimo inzoga zipfundikiye, n’imyenda umukobwa yari yakodesheje kuko yari kuyimarana umunsi umwe gusa.

Undi mugore usanzwe abana n’umugabo ariko wari gusezerana avuga ko byabaye ngombwa ko amazimano yari yateganirije uwo munsi ayatanga, kuko hari abaturutse mu Karere ka Rusizi baje gutaha ubukwe atari gusubiza inyuma.

Gusa ariko bamwe muri abo bagombaga gusezwerana imbere y’amategeko, byabaye ngombwa ko basanga umuyobozi w’Akarere ka Kamonyi ku biro kuko bagombaga gusezerana imbere y’Imana tariki ya 28 Mutarama 2017.

Ibyo byarabahombeje kuko ngo bakoresheje amafaranga batari bateguye batega imodoka zibajyana ku biro by’Akarere ka Kamonyi.

Dusabimana Samson, umunyamabanga nshingwabikorwa w’agateganyo w’Umurenge wa Karama, avuga ko ikibazo cyabaye, ari uko umuyobozi w’akarere yabahakaniye mbere y’icyumweru ko atazaboneka ariko ubutumwa bugatinda kugera ku baturage.

Agira ati “Kubera ko nta buryo bwari kutwihutira kubibabwira bose, twagiye tubatumaho. Icyumweru kiba ari gito kugira ngo umenyeshe abantu ko gahunda ihindutse, hari ababimenye batinze.”

Umuyobozi w’Akarere ka Kamonyi Udahemuka Aimable, atangaza ko uwo munsi tariki 26 Mutarama 2017 yari afite gahunda yo kwakira Ambasaderi wa Koreya wari wasuye akarere no gutangiza kubaka umudugudu w’Icyitegererezo.

Akomeza avuga ko yari yatangaje ko atazaboneka ngo asezeranye abageni. Ikosa ngo riri ku bakozi batabimenyesheje abaturage.

Uyu muyobozi avuga ko abo bageni azabasezeranya ku wa gatanu tariki ya 03 Gashyantare 2017.

Bateye imbuto y’ibishyimbo mu murima shuri w’umurenge.

Dusabe Nusula, umukozi w’Ikigo cy’igihugu gishinzwe ubuhinzi n’ubworozi (RAB), ukurikirana gahunda ya “Twigire Muhinzi” muri aka karere, avuga ko ku ntangiro y’igihembwe cy’ihinga abahinzi bahugurwa ku mihingirwe y’igihingwa cyatoranyijwe binyujijwe mu bajyanama b’ubuhinzi.

Agira ati “Umujyanama w’ubuhinzi tumufata nk’umugoronome ku rwego rw’umudugudu. Aba yarashyizeho amatsinda y’abahinzi hagati ya 15 na 20 afatanyije n’abayobozi. Ibyo twigisha abajyanama b’ubuhinzi na bo babyigisha abayobozi b’amatsinda bikagera mu bandi bahinzi.”

Mu mahugura abahinzi hifashishwa imfashanyigisho zateguwe na RAB.

Tariki 27 Mutarama 2017, abajyanama b’ubuhinzi bo mu Murenge wa Runda beretswe, uburyo bwo gutera ibishyimbo by’imishingiriro ku murongo. Iyi nyigisho yakorewe mu murima-shuri wo ku murenge hifashishijwe imfashanyigisho yateguwe na RAB.

Dusabe yatangaje ko guhinga mu buryo bwa Kijyambere bitaramenyerwa n’abahinga imirima y’ musozi, abajyanama 23 bahuguwe bahamagarirwa kubyitabira no kubikundisha abandi bahinzi babereka akamaro ka byo.

Ati “Gutera ku murongo bituma ibihingwa bitabyigana bityo buri cyose kikabona intungagihingwa zikigenewe, bigatuma gitega umusaruro wari witezwe. Iyi gahunda rero abajyanama dufashe kuyigeza ku bahinzi bareke guteresha agasuka gato bita ‘incyamuro.”

Abajyanama b’ubuhinzi bashima amahugurwa bahabwa ku mihingire kuko abafasha gutegura imirima-shuri mu midugudu ifasha mu kwerekera abahinzi bakorerwa ubukangurambaga.

Bakinahe Wellars, umujyanama w’ubuhinzi mu mudugudu wa Bwirabo, ati “Iyo tubyize natwe tukabyubahiriza, umusaruro uvuyemo utuma n’abandi babyitabira. Nk’ubu umurima uteyemo ibishyimbo byuzuye indobo y’ibiro bitanu ukoresha incyamuro, uteye ku murongo uteramo ibiro bibiri n’igice.”

Biteganyijwe ko igihembwe cya kabiri cy’ihinga cy’umwaka wa 2017 kizatangira mu kwezi gutaha kwa gashyantare, imbuto y’ibishyimbo akaba ariyo izibandwaho.

Amazu 58 yo mu murenge wa Runda mu Karere ka Kamonyi yagurutse ibisenge kubera imvura ivanze n’umuyaga

Iyi mvura yaguye ku mugoroba wo ku wa gatandatu tariki ya 21 Mutarama 2017.

Akagari ka Kabagesera muri Runda ni ko kasenyutsemo inzu nyinshi kuko mu midugudu ibiri, Bwirabo na Muhambara, hasenyutse inzu 40.

Umubyeyi umwe wo mu Mudugudu wa Muhambara avuga ko imvura yasanze abana ari bo bari mu nzu bonyine babura uko bakuramo ibikoresho byose birangirika.

Agira ati “Nta kintu na kimwe cyarokotse mu nzu yanjye kuko bampamagaye nagiye gushakisha, nsanga abana banyagiwe, ndwana no kubahungisha, ibishyimbo byari biri mu nzu byabaye ibyondo, ibyo ndyamaho byatose, ubu mbereye aho nta n’isafuriya.”

Ibikoresho byo mu nzu birimo n’ibiryamirwa byanyagiwe kubera amazu yasenywe n’imvura mu Karere ka Kamonyi

Bamwe mu basenyewe n’imvura bafashijwe n’abaturanyi barasana, ariko hari n’abo amazu yangiritse cyane ku buryo bacumbitse mu baturanyi.

Ndutiye Bernard, wo mu Mudugudu wa Bwirabo, nawe yatabawe n’abaturanyi bahungisha ibintu kuko we akorera mu Mujyi wa Kigali.

Agira ati “Nasanze inzu yanjye y’amabati 65 yasakambutse, n’igisenge sinamenye aho cyagiye. Nta kintu na kimwe kigeze kirokoka. Ubu umuryango wose uri mu icumbi.”

Amwe mu mazu yasenyutse mu mudugudu wa Muhambara mu murenge wa Runda muri Kamonyi

Imvura yangije n’imyaka irimo urutoki n’ibigori ku buryo abaturage bahangayikishijwe no kubona ibibatunga.

Habimana Bonaventure, umuhinzi w’urutoki mu Mudugudu wa Muhambara, avuga ko insina ze ziri ku buso bwa hegitari imwe n’igice zangiritse.

Muri uyu mudugudu insina zaguye zose ngo ziri ku buso bugera kuri hegitari esheshatu, no mu bishanga ahahinze ibigori byarengewe.

Munyankindi Pierre Celestin, umukozi ushinzwe imari n’ubutegetsi mu Murenge wa Runda atangaza ko imvura yasenye amazu mu tugari tune muri dutanu tugize Umurenge wa Runda.

Akagari ka Kagina ngo niko katagize ikibazo. Mu gishanga cya Mugera gihuriweho n’Utugari twa Ruyenzi na Gihara, ibigori bihinzemo byangiritse kuri hegitari 20.

Amazu yasenyutse n’insina zirangirika

Uyu muyobozi ahamya ko abaturage bahuye n’ibiza bafite ibibazo ariko abasaba ko bashyiraho akabo bakisanira mu gihe bategereje ubufasha ubuyobozi bugiye kubasabira.

Agira ati “Abaturage bafite ikibazo gikomeye ariko nk’ubuyobozi tugiye gukora ubuvugizi ku bo bireba, ubundi turimo gusaba abaturage gufashanya bagasana ibishoboka. Turabasaba kwishakamo ibisubizo kuko ak’i Muhana kaza imvura ihise.”

Izi Briquettes cyangwa amakara ya kijyambere akorwa mu bishishwa by’umuceri bisigara nyuma yo kuwutonora

Ubusanzwe iyo umuceri ugisarurwa, intete zawo ziba ziri mu gishishwa kijya gusa na "Kaki".

Niyo mpamvu bisaba ko bawunyuza mu ruganda ukanyura mu mashini yabugenewe iwukuraho icyo gishishwa, hagasigara umuceri wererana, ibishishwa bakabijugunya.

Niyongira Usiel, umuyobozi wa MRPC avuga ko bafashe umwanzuro wo gushyiraho urundi ruganda rukora amakara ya kijyambere cyangwa Briquettes mu rwego rwo kubyaza umusaruro ibishishwa by’umuceri byabaga biharunze no kurengera ibidukikije.

Agira ati “Ibishishwa byari bimaze kutubana byinshi, mu nama zitandukanye tugatekereza icyakorwa, tuza gusanga ‘Briquettes’ arizo twakoramo aho gukomeza kugura ubutaka bwo gushyiraho ibi bishishwa kuko nta kindi byamara.”

Urwo ruganda ruherereye mu Murenge wa Mugina. Rwatangiye gukora muri Nyakanga 2016, rufite ingengo y’imari ya Miliyoni 160RWf avuye muri MRPC.

Rukora ibiro 500 bya “Briquettes” ku isaha, ikilo kimwe kikagura 55RWf. Isoko ryazo ni amagereza ya Huye, Muhanga na Rwamagana.

Ibyo birundo ni ibishishwa by’umuceri biva mu ruganda rutonora umuceri rwa Mukunguri. Nibyo bikorwamo amakara ya kijyambere

Urwo ruganda rwa "Briquettes" rukoresha abakozi 19 bahoraho bahembwa buri kwezi. Uhembwa make muri bo ahembwa ibihumbi 45RWf.

Gusa ariko abaturiye urwo ruganda bavuga ko batarabasha gucana ayo makara ya kijyambere akorwa nurwo ruganda kuko badafite imbabura zifite ubushobozi bwo kuyacana; nkuko Niyongira abivuga.

Agira ati “Ikibazo kirimo si uko zitaka, imbabura zicanwaho ‘Briquettes’ ziba zirimo agatanda gatuma ivu rimanuka. Naho iyo uzishyize mu mbabura zisanzwe, ivu ryivanga na ‘Briquettes’ bikanga kwaka.”

Mugenzi we witwa Nahimana Bertin avuga ko ayo makara ya kijyambere azabakemurira ikibazo cy’ibura ry’inkwi bagira mu gace batuyemo. Ahamya ko habonetse imbabura zigenewe ayo makara bakwitabira kuyagura.

Agira ati “None se ko n’ubundi kubona inkwi bitugora, tubonye imbabura zishobokanye na “Briquettes” twaba dushubijwe.”

Umukozi ari mu ruganda akoresha imashini yabugenewe ikora Briquettes

Umuyobozi w’uruganda avuga ko bagiye gushaka umufatanyabikorwa uzakora imbabura zishobora gucana ayo makara ya kijyambere kugira ngo n’abaturiye uruganda bayakoreshe kuko ahendutse kurusha amakara asanzwe n’inkwi.

Abacanisha ayo makara ya kijyambere bahamya ko ahendutse ndetse anatinda bagereranyije n’inkwi.

Bavuga ko aho bacanishije inkwi zingana n’amasiteri 100 aguze miliyoni 1RWf, bahacanisha toni 12 z’ayo makara ya kijyambere aguze ibihumbi 550RWf gusa.

Mu ruzindiko abadepite Pierre Claver Rwaka na Mukakarangwa Coltilde barimo gukorera mu karere ka Kamonyi kuva Tariki 12 kugeza 21 Mutarama 2017, bashimye ko habonetse ubundi buryo bwo kubona ibicanwa kuko bizatuma abacanisha amashyamba bagabanuka.

Niyongira Usiel umuyobozi w’uruganda rwa MRPC yereka abadepite bamusuye uko bakora ayo makara ya kijyambere

Imibare igaragaza ko kuri ubu Abanyarwanda babarirwa muri 90% bacana inkwi n’amakara. Ariko Leta y’u Rwanda yihaye gahunda yo kugabanya uwo mubare ukagera kuri 50%.

Yayoboye amazi y’isoko mu bigega biri mu mirima ye ubu ntakibazo cyo kuhira agira

Uyu mushoramari yifashishije ikoranabuhanga mu kuhira imyaka (Irrigation), akurura amazi ari ku masoko abiri yegeranye n’iyi mirima ye, ayifashisha mu kuhira imyaka mu gihe indi yo muri aka gace, yari yarumye kubera izuba.

Nyiramisago Odette ukurikirana ubuhinzi bwe, avuga ko gukoresha ikoranabuhanga mu kuhira, babitewe n’uko babonaga ihindagurika ry’ikirere rishobora kudindiza umushinga wa bo.

Agira ati” Hano hari hasanzwe isoko irimo iriba rivomwaho n’abaturage. Iyo soko twarayitunganyije dusiga aho abaturage bazajya bavoma, ahandi twubaka ibigega by’amazi, dushyiramo amatiyo azajya muri ibyo bigega.

Iyo twuhira amazi tuyayobora mu mirima twifashishije amatiyo na robine, kuburyo imyaka yacu ihora itoshye haba mu gihe cy’imvura no mu gihe cy’izuba.”

Abahinzi baturiye uyu mushoramari, bavuga ko iki ari igikorwa cy’iterambere yazanye muri ako gace, bakavuga ko bakeneye ubufasha kugira ngo nabo babashe guhangana n’ihindagurika ry’ibihe, kuko Dr Niyibizi yaberetse ko bishoboka.

Imbuto mu mirima ye ziratohagiye

Bandorayingwe Philemon yagize ati” Twamwigiyeho guhinga imbuto z’indobanure no gutera ku murongo, ariko kuvomerera i musozi byaratunaniye kuko nta bushobozi dufite”.

Nzigiye Siliro Agoronome ufasha mu gushyira mu bikorwa ubu buhinzi mu mirima ya Dr Niyibizi, avuga ko abaturage baramutse bishyize hamwe, bakoresha uburyo budahenze bwo gukurura amazi y’amasoko kandi bakabigeraho.

Ati “Hari amasoko menshi muri aka gace. Abaturage bazigamye amafaranga make yo kuyatunganya, Leta yabashyigikira bakabasha kubona ibikoresho bibafasha kuyobora amazi mu mirima yabo buhira imyaka”.

Umunyamabanga Nshingwabikirwa w’Umurenge wa Nyarubaka, Epimaque Munyakazi, avuga ko ari byiza kuba abaturage barabonye hafi ya bo umurima w’icyitegererezo wo kureberaho ubuhinzi bw’umwuga, bamwe bakaba barahawemo akazi.

Ati" Leta yashyizeho gahunda ya Nkunganire Ku bagura ibikoresho byo kuhira, ariko abari kubyitabira ni abahinga mu bishanga gusa.”

Mu yindi mirima usanga mu gihe cy’izuba imyaka yaramye

Abandi bahinzi turabakangurira kwitabira iyi gahunda, kuko bizabafasha gukora ubuhinzi budashingiye ku gihe cy’imvura , kuko babonye urugero rw’uko ibura bakarumbya bakicwa n’amapfa.

Uyu mushinga wa Dr Niyibizi watwaye Miliyoni 230 Frw, ukaba warabereye icyitegererezo abahinzi bo mu Karere ka Kamonyi, aho bifuza gutera ikirenge mu cye bagakora ubuhinzi budashingiye ku ihindagurika ry’ikirere.

Bacibwa amahoro iyo bashoye amatungo mu isoko kandi batakagombye kuyatanga

Iteka rya Perezida wa Repubulika no 25/01 ryo kuwa 09 Nyakanga 2012, riteganya ko umusaruro ukomoka ku buhinzi n’ubworozi utishyura amahoro iyo ari umuhinzi ubyijyaniye ku isoko.

Mu masoko atandukanye yo mu Karere ka Kamonyi, usanga abahinzi binubira amahoro bakwa iyo bajyanye itungo cyangwa umusaruro w’imyaka yabo mu isoko.

Bamwe mu barema isoko rya Gacurabwenge riterana buri wa gatandatu, bavuga ko ayo mahoro atuma bagurisha ku giciro gito kuko akenshi nta mafaranga yo gusora mbere baba bafite.

Nirere Aaron ati “Nawe se, ugiye kugurisha kubera ubukene ufite mu rugo, waba ukigera mu isoko bakaba bakwatse 500frw.
Ubwo se baba babona wayakura he? kandi n’iyo ibuze abaguzi, urongera ukayisorera ngo ubone kuyisohora mu isoko”.

Mukasekuru Pascasie, we avuga ko yatanze amahoro maze agurisha inkoko yari ajyanye ku isoko amafaranga atayikwiye.

Ati “Narahageze bati tanga 300RWf y’iyo nkoko, mbabwiye ko ntayafite, bambwira ko nibagaruka ntarayabona bayijyana, nahisemo kuyitangira 1500RWf kandi yari isake yari kuvamo 3000RWf.

Ubuyobozi bw’akarere ntibuhakana ko hari aho abasoresha baka amahoro n’abahinzi ngo bikaba ari amakosa nk’uko Umunyamabanga Nshingwabikorwa w’akarere Bahizi Emmanuel abivuga.

Ati “icyo kibazo twaracyumvise, tuganira n’abakira imisoro tubabuza gusoresha abaturage, ariko niba hari aho bigikorwa ubwo babimenyesha ubuyobozi tukagikemura kuko hasoreshwa abacuruzi”.

Ikibazo cy’amahoro yakwa abahinzi n’aborozi ku musaruro, cyatangiye kuvugwa mu myaka ishize imisoro y’akarere yakwa na Rwiyemezamirimo, ariko na nyuma ya 2015, ubwo kwakira imisoro byeguriwe isosiyeti yitwa Ngali iki kibazo kiracyakomeje.

Uburezi bwo mu Rwanda ntiburagera ku rwego rwifuzwa na benshi.

Abarezi 1726 bitabiriye Itorero ry’”Indemyabigwi” ryashojwe tariki 12 Mutarama 2017, bahize gutangiza gahunda z’Itorero mu bigo by’amashuri, kuko gutoza abana indangagaciro na Kirazira, bizatuma ku bagira umuhate mu kwiga, bagacika ku ngeso zo kurangara no kuva mu ishuri.

Ngenzabuhoro Clarisse, wigisha ku ishuri ribanza rya Murambi mu murenge wa Rukoma, yagize ati “Nitugera ku mashuri tuzahita dutangiza Itorero, dushyire abanyeshuri mu masabo bitoremo abayobozi bazadufasha kumenya ibibazo bya buri munyeshuri, dufatanyirize hamwe no kubikemura.”

Aba barezi biyemeje kuzaharanira ko ireme ry’uburezi rizamuka bagamije kubaka abayobozi beza b’ejo hazaza.

Niyibizi Oscar, wigisha mu Rwunge rw’amashuri rwa Remera ryo muri Rukoma, avuga ko bamwe mu bana bava mu ishuri kubera kurarikira kujya gukorera amafaranga.

Ati “Ni ngombwa ko dukundisha abana kwiga kugira ngo bazagire icyo bimarira aho gushidukira kujya gukorera amafaranga ava mu mabuye y’agaciro acukurwa inaha.”

Umuyobozi wungirije w’akarere Tuyizere Thadee, ahamya ko Itorero ry’abanyeshuri rizazana impinduka mu mibereho yabo.

Ati “Umwana apfa mu iterura. Iyo umutoje indangagaciro, ukamutoza kirazira, ukamutoza gukunda ubuzima, ukamutoza kubana neza n’abandi, bituma azamuka yifitiye icyizere. Kumuha ubumenyi ni kimwe, ariko hari n’umuco ugomba kumuranga.”

Uyu muyobozi aributsa abarezi kubaha inshingano zo kurera kuko hari abatangiye kudohoka, bagatuma ireme ry’uburezi risubira inyuma.

Ati “Buriya mu kuzamura ireme ry’uburezi ni no kwita ku nshingano za bo. Hari abavuga ngo bahembwa make, ni cyo iri torero ryari rigamije. Ubundi uburezi ni umwuga ariko uzamo n’umuhamagaro. Twabasabye kubikora babikunze kugira ngo bigire akamaro.”

Uretse kuva mu ishuri, Intore z’abarezi zijeje ubuyobozi ko zigiye gukorera hamwe mu kurwanya icyari cyo cyose cyasubiza inyuma ireme ry’uburezi baha umwana w’u Rwanda.

Imashini zitajyanye n’igihe ntizituma bakora ibikoresho byiza

Mu myaka ibiri aka gakiriro kamaze gakora, abahakorera bavuga ko bamwe mu bahatangiriye bigendeye kuko babonaga bakorera mu gihombo, kandi bagomba kwishyura ibihumbi 50RWf y’ikibanza buri kwezi.

Simbarikure David ukoreramo ububaji, avuga ko bajya bakora ibintu bigatinda kugurwa kandi bo badashobora kumara ukwezi batishyuye ikibanza.

Yagize ati “Ingaruka ni uko amafaranga watangije yose agenda ashira wishyura ikibanza kandi utabona umuntu ukugurira. Niba umuntu azanye nk’ibyo bihumbi 200RWf yose agashira ayishyura ikibanza, urumva adatahira aho!”

Ibi byose ariko ngo biterwa no kuba muri aka gakiriro batabona ibikoresho bihagije, zaba imbaho cyangwa imashini zibafasha, bigatuma n abaguzi baba bake nk uko Karekezi Haruna abivuga.

Ati “Nkanjye nkora meubles (intebe, ameza n’utubati), mba nkeneye kuzirangiza neza (finissage), ariko imashini ziri hano zibikora nabi. Ikora tournage yo ntayihari, ni ukugomba kujya kubikoresha i Kigali”.

Muri Bishenyi ngo hari imbaho zitahaba nka Libuyu na Muvula, kandi nk’uko aba banyamyuga babivuga, ubwiza bw’ibikoresho mbere na mbere ni imbaho bikorwamo.

Umuyobozi w’akarere ka Kamonyi wungirije ushinzwe ubukungu n’iterambere Tuyizere Thadee, atangaza ko igisubizo ku bibazo by’ibikoresho abakorera mu gakiriro bakwiye kugishakira mu gukorana n’amabanki.

Imbaho z’ubwoko bwiza nka libuyu ntaziboneka mu gakiriro kabo

Avuga ko kugirango biboneke bisaba amafaranga, kandi banki zikaba arizo zifasha abashoramari kubona ibikenewe ngo ubucuruzi bwa bo butere imbere.

Ati “Buriya igisubizo cya byo kiroroshye kubera ko hariho amabanki afasha abashoramari.

Twumva kugira ngo babone ibikoressho byiza, na bo bagomba kubigira ibyabo. Kuki batishyirahamwe ngo batumize imbaho nziza muri Kongo, ndetse n’izo mashini bakifashisha amabanki bakazigurira”.

Agakiriro ka Bishenyi kubatswe mu mihigo y’umwaka wa 2014/2015. Uretse ububaji, hakorerwamo n’abasudira.

Imirimo yo kubaka ibitaro by’amaso yaratangiye

Ibi bitaro biteganyijwe gutangira gukora mu kwezi kwa mbere k’umwaka wa 2018.

Bizaba bije kunganira andi mavuriro akora ubuvuzi bw’amaso kuko abanyarwanda baturutse hirya no hino mu gihugu ndetse n’abanyamahanga, bajya kwivuziza i Kabgayi.

Ibitaro birimo kubakwa byitwa Rwanda Charity Eye Hospital, ni umushinga w’umubiligi witwa Dr. Piet Noë, umaze imyaka umunani akora muri Servisi y’ubuvuzi bw’amaso mu bitaro bya Kabgayi.

Ndahayo Pierre Claver, ukurikirana uyu mushinga, wanayoboye serivisi y’ubuvuzi bw’amaso mu bitaro bya Kabgayi, atangaza ko i Kabgayi bakira abarwayi benshi bitewe n’uko bafite umwihariko mu kuvura amaso.

Yagize ati “Ku bitaro bya Kabgayi bakira hagati y’abarwayi 120 na 150 ku munsi kandi muri bo 25 cyangwa 35 bagahabwa serivisi yo kubagwa”.

Dr Piet ku bitaro bya Kabgayi

Nk’uko umuryango mpuzamahanga wita ku iterambere ry’ubuzima bw’abaturage bo mu bihugu biri mu nzira y’amajyambere CBM wabigaragaje, ngo mu Rwanda hari abaganga 10 b’inzobere mu buvuzi bw’amaso.

Umwe muri bo ni uyu Dr. Piet uzarangiza Kontaro yo gukora mu bitaro bya Kabgayi muri uyu mwaka.

Dr. Piet ariko yifuje kuzakomeza gukorera mu rwanda kuko ashima imiyoborere yaho n’umutekano igihugu gifite, nk’uko Ndahayo akomeza abivuga.

Ati “yakunze u Rwanda, imiyoborere myiza, uburyo u Rwanda rutera imbere; yifuje kuhagira ibikorwa birambye, ahitamo kubaka ibitaro hano mu karere ka Kamonyi. Aragira ngo atere inkunga ubuvuzi”.

Igishushanyo cy’inyubako y’ibitaro by’amaso biri kubakwa muri Kamonyi

Ibitaro bya Rwanda Charty Eye Hospital bizubakwa mu byiciro bibiri.

Biteganyijwe ko icyiciro cya mbere kigizwe n’inzu y’igorofa ifite ibyumba 37 kizarangirana n’uyu mwaka wa 2017, kigatangira gukorerwamo mu wa 2018.

Inyubako y’icyiciro cya mbere izatwara amafaranga angana na miliyari imwe na Miliyoni 300 RWf. Ikorerwemo serivisi z’ubuyobozi, gusuzuma, kubaga no gucumbikira abarwayi.

Igice kimwe cy’isambu ye cyubatswemo ibiro by’akagari

Isambu ya Sembwa iherereye mu mudugudu wa Mugereke, akagari ka Gitare mu murenge wa Nyarubaka, ni nayo yubatsemo ibiro by’akagari n’isoko rya Musumba.

Ngo yayinyazwe n’uwari Konseye wa Segiteri Musumba, maze uretse ibikorwa bya Leta, aza kuyigurishaho n’abaturage 13 nyuma ya Jenoside yakorewe abatutsi kuko ariwe wakomeje kuhayobora.

Sembwa avuga ko uyu wari konseye yaje gufungwa, abona kongera gutangira kuburana ibye, ariko nabwo hakagenda hazamo amananiza, ariko muri uyu mwaka wa 2016 isambu arayitsindira.

Icyemezo cyafashwe n’ubuyobozi ni icyo gusaba abatuye muri iyo sambu ko bumvikana na nyirayo bakamwishyura ingurane, ariko Sembwa avuga ko hari abamugora banga ibyo bemeranyijwe.

Yagize ati “Bamfasha bakambwira igiciro nagarukiraho kuko harimo abavuga ngo ndabagondoza”.

Mu batuye mu isambu ya Sembwa, hari n’abavuga ko badafite ubushobozi bwo kongera kwishyura kubera ko ari abakene, cyane ko nabo baje muri iyi sambu baguze nk’uko Mukeshimana Dativa abivuga.

Ati « Twe twahaguze n’uwari waraguze na Konseye tumuha ibihumbi 85 RWf. Ko nari maze kugurisha aho nari ntuye, ubu nakongera kwishyura iki?”

Umunyamabanga Nshingwabikorwa, w’umurenge wa Nyarubaka, Munyakazi Epimaque, avuga ko abo kumvikana bitazashoboka buzabashakira abagenagaciro babigize umwuga bakababarira, abatishoboye bakazafashwa n’ubuyobozi.

Ati “Twashakaga ko bumvikana nk’abantu b’abaturanyi, ariko nabonye harajemo ikintu cyo kutumvikana.

Turatekereza kubazanira abatekinisiye bakabafasha kubamenyera igiciro, n’abatishoboye tukareba uko tubafasha.”

Sembwa yakemuriwe ikibazo n’ubuyobozi, bwemera no kwishyura ahubatse ibiro by’akagari n’isoko. Mu bantu 13 bagomba kumwishyura, abamaze kwishyura ni batatu gusa.

N’ubwo nta barura ryakozwe ngo iyi sambu ihabwe agaciro mu mafaranga, Sembwa avuga ko agereranyije agaciro k’ubutaka uyu munsi, itaba iri munsi ya miliyoni 25 RWf.

Guha abatishoboye amatungo magufi byabafasha kwiyishyurira Mituweli aho kubarihira iyo Mitiweli gusa

Byatangajwe n’Umunyamabanga wa Leta muri Minisiteri y’Ubutegetsi bw’Igihugu (MINALOC) ushinzwe Imibereho myiza y’Abaturage, Dr. Alvera Mukabaramba ubwo yitabiraga umuhango wo kugabira ihene 12 abatishoboye bo mu murenge wa Nyamiyaga, muri Kamonyi, tariki ya 28 Ukuboza 2016.

Izo hene zatanzwe n’umuryango w’abanyamakuru n’abahanzi baharanira imibereho myiza y’abaturage (AMC) ufatanyije n’ihuriro ry’ibigo byigisha amategeko y’umuhanda.

Dr. Mukabaramba yasobanuriye abaturage ko gutangirwa umusanzu w’ubwisungane mu kwivuza bitabafasha kuva mu bukene.

Icyabagirira akamaro ngo ni uguhabwa itungo ari nabyo yasabye umuryango AMC, kuvunja amafaranga wateganyaga kwishyurira abatishoboye ubwisungane mu kwivuza, akagurwamo amatungo magufi.

Agira ati “Barambwiye ngo bagiye muri Kamonyi kugurira abaturage Mitiweli. Ndababwira nti ‘amafaranga mugiye kugura Mitiweli muyashyire mu matungo.

Umuntu mwari kugurira Mitiweli uyu munsi mumuhe ihene. Wenda uyu mwaka kwirihira ntiyabishobora, ariko umwaka utaha ntibizamunanira.”

Akomeza asaba abahawe ihene kuzifata neza kuko ari itungo rigenewe kwishyura umusanzu wa Mitiweli. Ihene ishobora kubyara buri mwaka ku buryo izo zibyaye zajya zigurishwa zikavamo uwo musanzu wa Mitiweli.

Dr Mukabaramba ahamya ko guha Mitiweli yonyine utishoboye bitamukura mu bukene

Abahawe ayo matungo ni abari mu cyiciro cya mbere cy’ubudehe basanzwe bahabwa na Leta ubufasha bwa Mitiweli.

Bahamya ko ihene bahawe izazana impinduka mu mibereho ya bo; nkuko Nyiramatama Apolinarie w’imyaka 73 abisobanura.

Agira ati “N’ubundi Leta ni yo intunze, wenda aka gatungo kazatuma ngira icyo ngeraho.”

Umukecuru Nyiramatama Apolinarie ahamya ko ihene yahawe izazana impinduka mu buzima bwe

Ikibazo cy’ihindagurika ry’ikirere n’uburwayi bw’imyumbati cyatumye abaturage b’umurenge wa Nyamiyaga bagira umusaruro muke.

Byatumye batitabira gutanga umusanzu wa Mitiweli; nk’uko umwe muri bo uwitwa Rurahumba Gregoire, abitangaza.

Agira ati “Izuba ryaracanye imyaka iruma, imyumbati nayo izamo uburwayi. Ubundi aho dupfishirije imyumbati niho ibibazo byagiye bikomera. Turakora icyo dukoreye tukagihahisha aho kwishyura Mitiweli.”

Umwaka wa 2015-2016, abaturage ba Kamonyi barihirwaga na Leta ubwisungane mu kwivuza bari 29%, ubu abo Leta yemereye kurihira ni 6,7%.

Kamonyi yajyaga iza mu turere dufite abaturage bitabira kwishyura kare uyu musanzu, none kageze kuri 80% gusa.

Inzu yubakiwe Surwumwe imaze kugendaho ibihumbi 800RWf yatanzwe n’ubuyobozi hakiyongeraho inkunga z’abaturage

Uyu mugabo utuye mu murenge wa Rukoma, yashyikirijwe iyo nzu yubakiwe mu gihe cy’ibyumweru bibiri gusa, tariki ya 23 Ukuboza 2016.

Iyo nzu igizwe n’ibyumba bitatu n’uruganiriro kandi isakaje amabati. Iracyakorerwa isuku kugira ngo yuzure neza.

Aho igeze imaze gutwara ibihumbi 800RWf yatanzwe n’ubuyobozi. Abaturage nabo ariko ngo batanze ubufasha butandukanye burimo inzugi n’amadirishya.

Surwumwe yari asanzwe aba mu kazu gato, gasakaje amabati ashaje. Iruhande rwako hari hateye igiti cy’isombe, amashami yacyo n’amababi yacyo nayo yatwikiraga ako kazu yabagamo.

Amakuru y’uko yabaga ahantu hameze gutyo yamenyekanye ubwo itangazamakuru ryamusuraga, rikamukoraho inkuru, rigaragaza aho atuye.

Surwume yamaze imyaka isaga 10 muri gereza, agarutse asanga umugore n’abana barigendeye, inzu babagamo nayo yarashaje ariyo n’ubundi yabagamo mbere yo kubakirwa.

Ahamya ko nta bushobozi bwo kwiyubakira yari afite kuko abana n’ubumuga bw’amaguru ndetse n’uburwayi bwo mu nda.

Akomeza avuga ko yari abayeho nabi kuko iyo nzu yabagamo yavaga akabura aho yikinga, imbeho nayo ikamubuza umutekano.

Agira ati “Ejo bundi rero haje televiziyo, bambaza niba aho mba ubuyobozi buhazi; nti ‘barabizi nyine. Bantwara gutyo amafoto rero, bikwira hose.”

Surwumwe ashyikirizwa inzu yubakiwe n’ubuyobozi bw’Akarere ka Kamonyi

Umuyobozi wungirije w’Akarere ka Kamonyi, ushinzwe imibereho y’abaturage Uwamahoro Prisca, avuga ko ikibazo cya Surwumwe yakimenyeye mu bitangazamakuru.

Agaya abayobozi n’abaturanyi b’uyu mugabo batagaragaje iki kibazo kare ngo byagaragaye nko guha akato uyu mugabo wari umaze imyaka isaga 10 muri gereza.

Agira ati “Abenshi twabimenye biciye mu itangazamakuru. Hari aho nageze ndamubaza nti ‘ese ntiwaje usanga abaturanyi n’umuryango’? biragaragara ko yaje akajya mu bwigunge kandi ntibyari ngombwa.

Mu gihe yari arangije igihano cye rero, twagombaga kumwegera tukamufasha kwisanga.”

Surwumwe yabaga mu nzu isakaje amabati n’amashami y’igiti cy’isombe

Umunyamabanga nshingwabikorwa w’umurenge wa Rukoma, Nkurunziza Jean De Dieu, umaze ukwezi uwimuriwemo, atangaza ko atifuzaga ko uyu mugabo yizihiza Noheli n’ubunani aba mu nzu izakajwe n’igiti cy’isombe.

Abanyamadini n’amatorero bifuje gusangira iminsi mikuru n’abarokotse Jenoside yakorewe abatutsi babaha ibiribwa bitandukanye birimo umuceri, amavuta isukari n’ibindi

Abo banyamadini n’amatorero bakusanyije ibyo kurya bifite agaciro k’ibihumbi 430RWf, babishyikiriza iyo miryango tariki 23 Ukuboza 2016.

Iyo miryango ituye mu mudugudu wa Kanyinya, banayihaye Bibiliya kugira ngo abayigize bajye basoma n’ijambo ry’Imana.

Ibyo biribwa babahaye ngo ni ibyo gutuma abagize iyo miryango binjira mu minsi mikuru ya Noheli n’ubunani badafite ikibazo cyo kubona ibyo kurya.

Bashimye ubufasha bahawe kuko abenshi muri bo batunzwe n’inkunga y’ingoboka bahabwa na Leta. Harimo abafite amasambu yo guhinga kure y’aho batuye n’abafite ubumuga bakomora kuri Jenoside yakorewe abatutsi.

Mukecuru Daphrose n’abamutwaje imfashanyo y’ibirirwa yahawe

Umukecuru Ntirubabarira Daphrose agira ati “Turishimye rwose, mbonye umuceri, mbonye amavuta, mbonye isukari yo kunywa, mbonye umunyu n’isabuni yo kumesa.

Ubu nari nziko kuri Noheli nzarya ibigori twahawe n’umurenge, kuko ingoboka yo tumaze igihe tutayibona.”

Reverand Pasiteri Mudenge Jean Damascene, ukuriye ihuriro ry’amadini n’amatorero mu murenge wa Rukoma, avuga ko batekereje ku mibereho y’iyo miryango batekerea ko ishobora kuba yigunze kuri Noheli.

Agira ati “Twaje ngo tubereke ko muri ku mitima yacu. Ntacyo twarya ngo tubacure. Itorero murabizi ko ryita ku mitima, ariko ntiryirengegiza n’imibiri.

Dusanzwe tubafasha muri byinshi birimo no kububakira amacumbi, ubu rero turashaka ko mwizihiza Noheli n’Ubunani mwishimye.”

Abatuye Umudugudu wa Kanyinya bishimiye ubufasha bahawe n’abanyamadini

Umuyobozi wungirije w’akarere ka Kamonyi ushinzwe imibereho myiza y’abaturage, Uwamahoro Prisca ashimira abanyamadini n’amatorero bunganira ubuyobozi mu kwita ku batishoboye.

Abanyamadini n’amatorero kandi bafashije ubuyobozi, batanga amafaranga y’umusanzu w’ubwisungane mu kwivuza w’umwaka wa 2017, ku batishoboye 1000 bo mu mirenge ya Rukoma na Ngamba.

Abanyamadini banahaye Bibiliya iyo miryango

Abamotari ntibavuga rumwe n’ubuyobozi ku mahoro ya Parkingi.

Amahoro ya Parikingi asabwa abamotari bakorera mu Karere ka Kamonyi ni 300Rwf buri munsi cyangwa 6.000Rwf ku mumotari wayatangiye rimwe mu kwezi. Umubare w’aya mahoro wagenwe n’Inama Njyanama y’akarere mu 2013.

Kuva icyo gihe abenshi mu bamotari ntibitabira kuyatanga, kuko bavuga ko batagishijwe inama kandi ko bafite n’indi misoro batanga ibasaba amafaranga menshi.

Bamwe mu bakorera ku iseta ya Kamonyi, bati Ushingiye ku bintu byinshi dusabwa amafaranga 300 ni menshi. Twifuza ko bajya batwegera bakatugisha inama aho kwicara mu biro bakaduturaho ibyo dukwiye gukora.

Bahizi Emmanuel, umunyamabanga Nshingwabikorwa w’akarere, ntiyemeranywa n’abamotari bavuga ko ayo mafaranga yagenwe batagishijwe inama, ahubwo ngo mu kuyagena byaganiriweho n’abayobozi b’amakoperative y’abamotari abiri akorera mu karere ka Kamonyi.

Ati "Mu minsi ishize twaganiriye n’abaperezida b’amakoperative, batwemerera ko bagiye kudufasha kuyishyuza. Harimo kugumya kuganira na bo ariko no kwifashisha izindi nzego mu gihe batabyubahirije."

Cyakoze abayobozi b’amakoperative ntibemera ko ubuyobozi bwabagishije inama mu kugena umubare amafaranga, ahubwo ngo nabo bandikiye inzego zzitandukanye z’ubuyobozi basaba ko yagabanywa ariko ntacyo biratanga.

Nsengimana Emmanuel, Perezida wa koperative COCTAMOKA, ati "Twakoranye inama n’abashinzwe imisoro, turavuga ngo twe ntitwanze gusora ariko nibatugabanyirize amafatanga. Baratubwira ngo iby’amabaruwa twanditse ntacyo bimaze. Twaakoze ubuvugizi muri njyanama biranga."

Iteka rya Perezida wa Repubulika no 25/01 ryo kuwa 09/07/2012, ryemerera uturere kwaka amahoro kuri parikingi za moto n’amavatiri amafaranga atarenze 10.000frw ku kwezi.

Umunyamabanga nshingwabikorwa w’akarere avuga ko nta kibazo cyakagombye kuvuka kuko amahoro yakwa n’akarere ka Kamonyi atarenga ateganywa n’iri teka.

Ababyeyi bamaz gusobanukirwa no gutegura indyo nziza

ADRA Rwanda itangiza uyu mushinga mu mwaka wa 2014, 45% y’abana bafite munsi y’imyaka itanu muri aka Karere, bagaragaragaho ibibazo byo kugwingira baterwa n’imirire mibi.

Uyu mushinga wasoje kuri uyu wa mbere tariki ya 19 Ukuboza 2016, wasize uyu mubare ugabanutseho 8% aho abana basigaranye iki kibazo bangana na 36.6%.

Ntaganda Robert, wayoboraga uyu mushinga yatangaje ko intego bari bihaye yo kugabanya iki kibazo bayirengeje, bikaba bitanga icyizere ko n’abasigaranye imirire mibi muri aka Karere bazayivamo.

Yagize ati «Icyo twishimira ni uko izi gahunda bazishyize mu mihigo y’akarere. Ibi bigaragaza ko ari ikintu kizaramba. Ubuyobozi buzakomeza bubikurikirane burebe umusaruro wa byo ».

Bamwe mu baturage bavuga ko uyu mushinga wahinduye imyumvire ku bagize umuryango mu kwita ku mirire y’abana babo, ku buryo abagabo basigaye bitabira igikoni cy’umudugudu, kandi no mu rugo bagafatanya mu gutegura amafunguro.

Nyirabatware Gloriose wo mu murenge wa Gacurabwenge aagira ati « Guteka indyo yuzuye irimo imboga n’ibindi biribwa bifite intungamubiri, ubu twabigize intego ».

Bamenye agaciro k’Imboga n’imbuto batabyitagaho mbere

Bushayija Fred umuhuzabikorwa mu Karere ka Kamonyi, avuga ko uyu muryango watanze umusanzu ukomeye mu mibereho y’aba baturage, anavuga ko uyu muco wo kwita ku mirire y’abana bazawukwiza mu Karere kose.

Ati “Uyu mushinga usoje abaturage bamaze gusobanukirwa. Niba umushinga wari ufite abakozi batanu bakorera mu karere kose, basize bahuguye abaturage barenga ijana.

Urumva ko niba abakozi batanu baragabanyije igipimo kigera ku 8% urumva ko abaturage ijana bazahugura abarenzeho”.

Uyu mushinga wo kwita ku bana bazahajwe n’imirire mibi muri aka Karere, ADRA Rwanda yawuterwagamo inkunga n’Umuryango w’abibumbye wita ku bana UNICEF.

Minisitiri w’Ubutegetsi bwigihugu Francis Kaboneka (Photo internet)

Hirya no hino mu gihugu, haravugwa abakozi biganjemo abanyamabanga nshingwabikorwa b’imirenge n’utugari basezera ku kazi, abenshi muri bo bakavuga ko babikoze ku mpamvu za bo bwite.

Ubwo yasozaga Itorero ry’abayobozi b’imidugudu igize akarere ka Kamonyi, Minisitiri Kaboneka yasobanuye impamvu zishobora gutuma umukozi asezera ku Kazi.

Yaragize, ati “Ashobora kuba yabonye akandi kazi wenda keza, ashobora kuba yahisemo kujya kwikorera, ibyo byose birashoboka.

Ariko ashobora no kubona kubera amakosa yagiye akora mu byo barimo bamukurikirana, akabona atabishoboye, agasezera.”

Minisitiri akomeza avuga ko gusezera bidakuraho ko mu gihe hari ibyaha umukozi ashobora kuba yarakoreye mu kazi, akurikiranwa n’ubutabera.

Ati « kuba asezeye cyangwa ahagaritse akazi, ntago bimukuraho icyaha. Niba yarakoze icyaha arakurikiranwa.

Kwirukana ni igihano ku rwego rw’ubuyobozi, ariko ubutabera na bwo buramukurikirana”.

Mu byaha byagaragaye kuri bamwe mu bakozi basezeye, harimo gukubita abaturage, kubatwarira imitungo no kubaka ruswa.

Umwe mu baturage wakubiswe n’umunyamabanga nshingwabikorwa w’akagari wasezeye, atangaza ko kuva ku kazi bidahagije ahubwo akwiye no guhanirwa ko yamusigiye ubumuga.

Ati “Ahubwo n’iyo ategura, njye nifuzaga ko akurikiranwa kuko n’abandi banyarwanda iyo bakoze ikosa barahanwa.”

Umunyabanga Nshingwabikorwa w’akarere ka Kamonyi, Emmanuel Bahizi, atangaza ko haheruka gusezera abakozi 10 harimo abo ku rwego rw’umurenge babiri n’abo mu tugari 8.

Abo bose bakaba bariyandikiye ko babikoze ku mpamvu za bo bwite.

Intore z’abayobozi b’imidugudu igize Akarere ka Kamonyi zibukijwe ko zitagomba gutatira icyizere zagiriwe n’abaturage

Ibi yabivugiye mu muhango wo gusoza Itorero ry’abagize komite nyobozi z’imidugudu igize Akarere ka Kamonyi, tariki 14 Ukuboza 2016.

Minisitiri Kaboneka yabahamagariye gukorera hamwe mu gushyira mu bikorwa inshingano zabo, bashyira imbere inyungu z’abaturage, aho kubashakamo indonke kuko baba bariyamamaje bazi ko imirimo bagiye gukora ari ubukorerabushake.

Iyi ngo akaba ariyo ntego nyamukuru y’itorero bateguriwe kuko byagaragaraga ko mu mikorere yabo harimo abahuzagurika.

Agira ati "Ubundi iyo ajya kwiyamamaza aba aziko atagiye guhembwa, yiyamamaza yiyemeza ko agiye kwitangira abaturage akabafasha kugira ngo bave ku rwego rumwe bajye ku rundi.

N’ikimenyimenyi iyo badatowe barababara kuko baba baziko bagawe n’abaturage bababuriye icyizere. Icyo cyizere rero ubundi bagihaye agaciro nta n’ikiguzi cyabona."

Basabwe gushyira hamwe mu kurangiza inshingano nkuko babigaragaje mu mukoro ngiro wo gusigasira igisenge

Bamwe mu bayobozi b’umudugudu, bahakana ibyo bavugwaho byo kugurisha serivise bataha abaturage ; nkuko Nzaramba Joseph, umukuru w’umudugudu wa Kigabiro, akagari ka Nyamirembe, umurenge wa Karama abisobanura.

Agira ati "Biravugwa ariko ni ukutubeshyera. Ariko se umuntu yaguha ruswa, umuha iyihe serivisi ko nta gikorwa gisinyirwa n’umukuru w’umudugudu."

Gusa ariko abaturage bamwe banenga imikorere y’urwego ruyobora umudugudu, barugaya ko rubaka ruswa muri serivisi bagiramo uruhare nko gukora urutonde rw’abagenerwa inkunga no gushyira mu byiciro by’ubudehe.

Umwe mu baturage batuye mu umurenge wa Gacurabwenge, utifuje ko amazina ye atangazwa yifuza ko ibyo byakosorwa.

Agira ati "Iyo abona (umukuru w’umudugudu) ari ibibazo birimo amafaranga, abijyamo yihuse. Yabona havuyemo agafaranga utagira icyo umuha, akaguteza n’abandi bayobozi, ababwira ko ntacyo utanga ngo ntibakagukemurire ikibazo."

Minisitiri Kaboneka mu muhango wo gusoza itorero ry’abayobozi b’imidugudu yo mu Karere ka Kamonyi

Minisitiri Kaboneka akangurira izi ntore z’abayobora imidugudu, zitwa Inkomezamihigo, gufatanya n’izindi nzego babana mu mudugudu, mu guhangana n’ibibazo by’abana b’inzererezi, ibiyobyabwenge, gukora imihanga y’imigenderano, kwita ku isuku no kubungabunga umutekano.

Bemeye kongera guhinga imirima ya bo nyuma yo guhabwa ubwunganizi bw’ifumbire n’ishwagara.

Ubuso bunini bw’ayo materasi ya hegitari 90, buherereye mu murenge wa Rugarika, mu kagari ka Sheri, mu mudugudu wa Karehe, agaragara urenze muri santeri ya Nkoto, uva i Kigali werekeza mu Majyepfo.

Yakozwe kuva mu 2008 kugeza muri 2011, atwara miliyoni 50Frw. Bene imirima banze kuyihinga kuko imyaka bahinzemo akimara gukorwa yabarumbiye.

Nyuma y’imyaka itanu aya materasi yarahindutse igisambu, ubuyobozi bw’akarere bwemeye kuguriramo ifumbire y’imborera n’ishwagara, bushishikariza abaturage kuyahinga abatabishoboye bagakodesha imirima ya bo na ba Rwiyemezamirimo.

Aya materasi yari yarabaye ibihuru.

Mu gihimbwe cya mbere cy’ihinga ry’umwaka wa 2017, aya materasi ari guhingwamo imyumbati n’urubuto rwitwa “Water melon”, kandi kandi bayizeyemo umusaruro.

Umuhinzi witwa Ndamage Theoneste yagize ati “Ikibazo cyari gihari pe! Kubona hegitari 90 zidahingwa kandi abaturage bataka inzara. Ni byiza kuba ubuyobozi bwaremeye gutanga ifumbire n’ishwagara. Ubu noneho ikirere nikiba kiza twizeye kuzakuramo umusaruro ushimishije.”

Umuyobozi wungirije w’akarere ushinzwe ubukungu n’iterambere, Tuyizere Thadee, atangaza kubona ubutaka butabyazwa umusaruro kandi ubuso bwo guhinga bukenewe byagaragaraga nk’ikibazo. Avuga ko shwagara n’ifumbira bizashyirwamo bifite agaciro ka miliyoni 26 z’amafaranga y’u Rwanda.

Ati “Kubera ko ariya materasi yari amaze igihe kinini adahingwa, akarere kagombaga kubafasha kubona amafumbire kugira ngo n’abahinga batishije batazagwa mu gihombo.”

Andi materasi adahinze ari mu mirenge ya Karama na Gacurabwenge. Umukozi ushinzwe ubuhinzi mu karere Mwizerwa Rafiki, atangaza ko naho ubufasha bw’inyongeramusaruro buzahagezwa.

Muri Rukoma kubona amazi ni ugukora ibilometero n’ibilometero

Icyo kibazo cyatangiye kugaragara mu kwezi k’Ugushyingo 2016, bituma abaturage bo muri iyo mirenge bajya kuvoma amazi y’ibishanga kuko kuva ubwo nta mazi yari akiza mu mavomo yabegerejwe.

Amazi yatangiye kubura nyuma yuko isosiyeti yitwa SOCOTRIM yacungaga umuyoboro w’amazi wa Mbizi, ukwirakwiza amazi muri ako gace, yahagarikaga imirimo kubera imikorere mibi ishinjwa.

Amazi y’uwo muyoboro aboneka hifashishijwe umuriro w’amashanyarazi, uha imbaraga moteri iyakurura.

Hashize igihe kirenga ukwezi ku mavomero rusange nta mazi ahari

Kubura kw’ayo mazi byanatumye ibigo by’amashuri n’amavuriro nabyo bibura amazi ariko ibifite ibigega bifata amazi, batangira kwifashisha ayo mu bigega.

Nko ku bitaro bya Remera Rukoma bageze aho n’amazi yo mu bigega arashira, kuburyo ngo abantu bagemuriraga abarwayi amazi.

Ariko ubuyobozi bw’ibyo bitaro bwafashe gahunda yo kugura umuriro wo gushyira muri “Cash Power” y’imashini ikurura amazi y’umuyoboro wa Mbizi. Kuri ubu muri ako gace ibyo bitaro n’ibyo bibona amazi gusa.

Kubera icyo kibazo cyo kubura amazi kandi kuri ubu abakozi bakora isuku ku biro by’Akarere ka Kamonyi, bajya kuvoma mu gishanga kugira ngo babone amazi yo gukoresha isuku.

Ikibazo cyo kubura amazi cyatumye abashinzwe isuku ku biro by’Akarere ka Kamonyi bajya kuvoma mu gishanga

Umunyamabanga nshingabikorwa w’Akarere ka Kamonyi, Bahizi Emmanuel avuga ko mu bibazo Rwiyemezamirimo wacungaga uwo muyobozi w’amazi asize harimo kutishyura amashanyarazi akoresha moteri ikurura amazi.

Akomeza avuga mu cyumweru cyatangiye tariki ya 12 Ukuboza 2016, ikibazo cy’amazi kizatangira gukemuka kuko hagiye gushakwa undi muntu ucunga uwo muyoboro.

Agira ati “Ku wa mbere (tariki 12 Ukuboza 2016) turara tubonye undi muntu waba acunga umuyoboro mu buryo bw’agateganyo. Ndumva nahandi bazaba babonye amazi bitarenze ku wa kabiri (tariki ya 13 Ukuboza 2016).

Iyi nzu yagenewe kuba ikusanyirizo ry’imboga imaze imyaka itanu yuzuye idakoreshwa

Iyo nzu yubatswe n’Akarere ka Kamonyi mu mwaka wa w’imihigo wa 2011-2012, ku nkunga y’ikigo cy’igihugu gishinzwe kohereza umusaruro w’ubuhinzi mu mhanga (NAEB). Yuzuye itwaye miliyoni 50RWf.

Iyo nzu isize irangi ry’umweru inyuma, iyo ugeze aho yubatse ku Mugonero mu murenge wa Rugarika, usanga ikinze yaranatangiye kwangirika ku mpande ahagana hasi, irangi n’isima byaratangiye komoka.

Uwitije Patrice, umwe mu bahinzi batuye mu murenge wa Runda, avuga ko akibona iyo nzu bayubaka yanezerewe kuko yumvaga ko agiye gukira imvune zo kujya kugirisha imboga ahinga i Nyabugogo muri Kigali.

Akomeza avuga ko we na bagenzi be batungurwa n’uko ritangiye gusaza nta kintu kirakorerwamo.

Agira ati “Twebwe ntiducuruza ahubwo turaranguza. Tugenda nka saa kumi za mu gitondo kugira ngo tugaruke vuba dusubire mu mirimo. Bubaka ikusanyirizo twari twishimye ariko twayobewe impamvu batarikoresha ngo baturuhure.”

Abo bahinzi b’i Kamonyi bahinga ubwoko bw’imboga butandukanye burimo dodo, inyanya, intoryi, amashu na biringanya.

Inzu yagenewe kuba ikusanyirizo ry’imboga yatangiye gusenyuka kubera kudakoreshwa

Tuyizere Thadée, umuyobozi wungirije w’Akarere ka Kamonyi ushinzwe iterambere ry’ubukungu atangaza ko kudakoreshwa kw’iryo kusanyirizo byatewe n’uko NAEB itatanze ibikoresho byose byari bikenewe ngo rikoreshwe.

Akomeza avuga ko ariko kuri ubu bari gukorana bya hafi na NAEB kuburyo ibyaburaga muri iryo kusanyirizo byose bizashyirwamo rigatangira gukora. Ariko ntatangaza igihe nyacyo iryo kusanyirizo rizatangiriraho gukora.

Agira ati “Icyiciro cyo kubibara (ibibura) cyararangiye. NAEB yihaye inshingano zo gushyiraho ibibura byose, noneho akarere nako kiha inshingano zo kuhageza amazi no gushaka abazahakorera. »

Uretse imirimo yo gusana ahatangiye gusenyuka, ibindi bikoresho bikenewe n’ibizajya bifasha mu kubika imboga ku buryo zitangirika.

Ubwo tariki 10 ugushyingo 2016, Mureshyankwano Marie Rose, Gouverineri w’Intara y’amajyepfo, yasuraga Akarere ka Kamonyi yabwiye abayobozi ko bakora ibishoboka byose iryo kusanyirizo ry’imboga rigatangira gukora bidatinze.

Guverineri Mureshyankwano yabwiye abanyakamonyi ko inkunga y’ingoboka ihabwa abakuze itagenewe bose

Guverineri Mureshyankwano Marie Rose yabitangarije abaturage b’umurenge wa Runda, mu karere ka Kamonyi, mu ruzinduko yahagiriye tariki 10/11/2016.

Yabivuze nyuma yuko bamwe mu baturage bamugaragarije ikibazo cy’uko bakuwe ku rutonde rw’abahabwaga inkunga y’ingoboka ya VUP (Vision 2020 Umurenge Program) kandi mu mwaka wa 2015 barayihabwaga.

Uwitwa Rugwabiza Fidele, ufite ubumuga bwo kutabona, avuga ko yakuwe mu bahabwaga inkunga kandi nta bushobozi afite kuko yibana mu rugo.

Agira ati “Bahamagaje abandi bantu, ngiye kuyareba nsanga ngo bankuye kuri lisiti. Ndibaza nti ‘ubu mu bandi bose njye utabona, babonye ndusha abandi ubushobozi!”

Guverineri Mureshyankwano yahise ahamiriza abaturage ko abakeneye inkunga ari benshi kuburyo bose batayibona. Bityo amafaranga y’ingoboka agenewe abakuze, ahabwa abadafite ubushobozi na buke.

Agira ati “Iriya nkunga ntabwo ari amafaranga y’abasaza, nta n’ubwo ari amafaranga y’abakuze. Ariya mafaranga yagenewe ba bantu badafite ubushobozi na mba, ba bantu batakibasha gukora.

Mbese ni amafaranga agenerwa wa muntu utishoboye ku buryo atayabonye ashobora gupfa.”

Akomeza avuga ko umusaza ashobora kuba afite imyaka myinshi ariko afite imitungo n’abana bo kumwitaho.

Ariko ntiyirengagiza ko hari igihe guhitamo abakuze bagenewe guhabwa iyo ngoboka bishobora gukorwa nabi. Ibyo ngo bikwiye gukosorwa.

Abaturage bo muri Kamonyi bo bifuza ko abakuze bahabwa ingoboka bakongerwa

Mu karere ka Kamonyi abahabwa inkunga y’ingoboka ni imiryango 896.

Umusaza Karasanyi Seth we yifuza ko uwo mubare wakongerwa kuko ngo nko mu kagari kamwe hafashwa imiryango umunani kandi ababaye ari benshi.

Umuhoza Alexie, umuyobozi w’ishami ry’imibereho myiza mu karere ka Kamonyi, nawe ahamya ko abatishoboye bari guhabwa inkunga ari bake.

Avuga ko bari batanze urutonde rw’imiryango 2502 ariko ikigo cy’igihugu cyita ku mishanga y’iterambere (RHODA) cyemerera 896. Abandi nabo bategereje ko bakorerwa ubugenzuzi ubundi bakabona guhabwa inkunga.

Muri Kamonyi urubura rwangije imyaka y’abaturage ihinze kuri Hegitari zirenga 100

Kubwimana Jean de Dieu, umunyamabanga nshingwabikorwa w’agateganyo w’umurenge wa Kayumbu, atangaza ko iyo mvura yatangiye kugwa ahagana mu ma saa saba z’amanywa.

Yageze aho ibijojoba by’imvura birakama hasigara hagwa urubura gusa rwibasiye imidugudu ya Murambi na Kaje n’igice cy’umudugudu wa Kangezi mu kagari ka Mayange.

Urubura rwangije imyaka mu buryo bugaragara

Uretse imyaka yangiritse cyane, nta kindi kintu cyangijwe n’imvura.

Abaturage ba Kamonyi bavuga ko imihigo ikwiye gushingira ku byifuzo byabo

Aba baturage babivuga bashingiye ku buryo Akarere kabo kagenda gasubira inyuma mu kwesa imihigo.

Mu mihigo ya 2013-2014 kari kabaye aka kabiri, muri 2015-2016 kaba aka 13 mu kwesa imihigo.

Niyonsenga utuye mu kagari ka Ruyenzi mu Murenge wa Runda, ahamya ko kugirango umuturage yibone cyane mu mihigo, bikwiye ko abayihiga bahera ku byifuzo bye.

Agira ati “Ibiterezo by’abaturage bikwiye gukusanywa uhereye hasi bigashyirwa hamwe, bagatoranyamo iby’ingenzi bikazamuka bikagera ku karere, akaba aribyo bishyirwa mu mihigo isinyirwa imbere y’umukuru w’igihugu”.

Niyonsenga ahamya ko iyo abaturage bagize uruhare mu kugena ibibakorerwa, bashyiramo imbaraga kugirango byanze bikunze bigerweho.

Abaturage b’aka karere bakomeza bahamya ko nubwo akarere kagenda gasubira inyuma mu kwesa imihigo, hari ibikorwa bigaragara biba byarakozwe kubera imihigo.

Ambasaderi Gatete ureberera aka Karere yasabye abanyakamonyi gusenyera umugozi umwe mu gushyira mu bikorwa mihigo

Minisitiri w’Imari n’igenamigambi Ambasaderi Claver Gatete ureberera aka Karere, asaba abaturage gusenyera umugozi umwe mu kwesa imihigo, kugirango akarere kazaze ku mwanya wa mbere.

Aragira ati “Tugomba gushaka uburyo tujya inama twese ntitugire uwo duharira kwesa imihigo, kuko twese dufite inshingano zo guteza imbere akarere kacu”.

Ambasaderi Gatete avuga ko Akarere ka Kamonyi n’ubwo kasubiye inyuma katari ku mwanya mubi, akavuga ko gusenyera umugozi umwe bizatuma kajya ku mwanya wa mbere.

Ambasaderi Gatete ari kumwe n’Umuyobozi w’Akarere ka Kamonyi Udahemuka Aimable

Abaturage bo muri Kamonyi bitabiriye gutura ibibazo byabo urwego rw’umuvunyi

Ibyo byagaragaye ubwo urwego rw’Umuvunyi rwasuraga imirenge igize Akarere ka Kamonyi tariki ya 26 kugeza tariki ya 27 Ukwakira 2016.

Icyo gihe abaturage bafite ibibazo babarirwa mu magana babigaragarije urwo rwego kuburyo hari harimo n’abagaruraga ibibazo byakemuwe n’inzego z’ubuyobozi zibegereye.

Abatanze ibibazo bavuga impamvu ibatera gutura ibibazo byabo ubundi buyobozi bwaturutse hanze y’akarere kabo ari uko hari inzego z’ibanze zanga kubikemura cyangwa zikaba zabogama.

Uwitwa Mukanyirigira utuye mu murenge wa Gacurabwenge avuga ko yarenganiye mu bunzi bo muri uwo murenge, akiyambaza urwego rw’Umuvunyi mu mwaka wa 2013.

Uru rwego ngo rwasabye ubuyobozi bw’akarere gukora raporo y’uko ikibazo giteye, ariko umukozi woherejwe muri icyo kibazo yanze kumva ubuhamya bw’abaturage.

Agira ati « Iyo ugiye kureba usanga abayobozi bagonganisha abaturage. Nkubwire nk’ukuri iki kibazo cyanjye, akarere kohereje gitifu w’umurenge. Abaturage bajyaga kugira icyo bavuga akamucecekesha, ngo yaje afite amakuru ahagije. »

Kubaka icyizere hagati y’umuturage n’abamuyobora, ngo nicyo Urwego rw’umuvunyi iyo rusuye akarere ruba rugamije ; nk’uko Rumaziminsi Ntagwabira Seraphin, umuyobozi w’Ishami rishinzwe gukumira no kurwanya akarengane mu Rwego rw’umuvunyi, abisobanura.

Aragira ati « Tubagira inama y’uko umuyobozi adakemurira ibibazo mu biro, umuyobozi ntakemura ibibazo ashingiye ku mabwire, ahubwo ashingira ku bimenyetso bifatika byatanzwe n’abatuye aho ikibazo kiri. »

Akomeza avuga ko iyo bamaze kuganira n’abaturage Nyuma baganira n’abakozi n’abayobozi b’akarere, bakabaha umurongo w’uburyo ibibazo bigomba gukemukamo.

Umuyobozi w’akarere ka Kamonyi Udahemuka Aimable, atangaza ko gusurwa n’Urwego rw’umuvunyi bikebura bamwe mu bayobozi.

Ubwo urwego rw’Umuvunyi rwasuraga Akarere ka Kamonyi rwakiriye ibibazo 244, ibyahise bibonerwa ibisubizo ni 108 naho ibibazo 100 Umuvunyi yategetse akarere n’imirenge kubikemura.

Ibindi bibazo bisigaye, 32 muri byo bizakemurwa n’urwego rw’Umuvunyi naho ibibazo bine urwego rw’Umuvunyi ruzafatanya kubikemura n’izindi nzego.

Kamonyi batoza abana kuzigama

Muri Gahunda bise “Igiceri saving program”, ibigo by’imari by’Umurenge Sacco bihamagarira abanyeshuri kwizigamira mu mafaranga make baba bafite.

Hifashishwa udusanduku dushyirwa ku kigo cy’ishuri abana bagashyiramo amafranga yagera ku 2000frw bagafungurirwa Konti.

Umuhoza Sandrine, w’imyaka 12, wiga ku Rwunge rw’amashuri rwa Gatizo avuga ko amaze kwizigamiraho 1000frw kandi azakomeza, ku buryo azamufasha kwiga Kaminuza.

Yagize ati “Masenge ashobora kuza akansigira nk’ijana cyangwa Magana atanu cyangwa se umubyeyi wo muri batisimu akaguha amafaranga, aho kuyarya ukayabika”.

Sacco ya Gacurabwenge imaze kugira abana 83

Nzakamwita Jean, umukozi ushinzwe amahugurwa mu ihuriro ry’ibigo by’imari iciriritse (AMIR) avuga ko gutoza abana kuzigama bakiri bato, bizabafasha kubona igishoro cyo kwihangira umurimo barangije amashuri.

Ati « Tugomba gukora ubukangurambaga rero kugira ngo abana bacu bazarangize amashuri baramenye gukorana n’ibigo by’imari babitsa, bakanakamo inguzanyo”.

Uyu mukozi yongeraho ko hatazigama ufite amafaranga y’umurengera cyangwa adafite icyo akoresha; ahubwo ko ari ukwigomwa kugira ngo umuntu agire ikimufasha kugera ku ntego yihaye.

Benedata Zacharie, Perezida w’Inama y’ubutegetsi ya Sacco ya Gacurabwenge, atangaza ko mu banyamuryango 5872 babitsa muri iki kigo cy’imari, bafitemo abana 83.

Avuga kandi ko ubukangurambaga bukomeje mu bigo by’amashuri, kugira ngo n’abandi babyitabire.

Ikamyo yagonze Coaster irayiryamira hitabazwa imashini ziterura imodoka n’izikata ibyuma

Umuvugizi wa Polisi y’igihugu mu urwego rushinzwe umutekano wo mu muhanda, CIP Emmanuel Kabanda yabitangarije Kigali Today mu gitondo cyo kuri uyu wa kane tariki 20 Ukwakira 2016.

Akomeza avuga ko abakomeretse baraye bajyanywe kuvurirwa mu bitaro bya Kabgayi.

Ni impanuka yaraye ibaye mu ma saa mbiri n’igice z’ijoro ku wa gatatu tariki 19 Ukwakira2016.

Yabaye ubwo imodoka yo mu bwoko bwa Coster RAB 183 U, y’ikompanyi itwara abagenzi yitwa Horizon, yavaga i Nyanza yerekeza i Kigali, yagonganaga n’ikamyo ifite puraki T957 BBT yo muri Tanzania yerekezaga mu Ntara y’Amajyepfo.

Iyo kamyo yaryamiye Coaster ku buryo gukuramo abantu byabanje kunanirana. Hitabajwe iimashini zagenewe guterura imodoka (breakdown) n’imashini zikata ibyuma.

Abatuye hafi y’aho impanuka yabereye batangaza ko yatewe n’iyo kamyo yari yacitse feri. Polisi y’igihugu yo itangaza ko ikomeje gukora iperereza ku cyateye iyo mpanuka.

Impanuka ibereye i Musambira mu Karere ka Kamonyi

Iyo Coaster y’ikompanyi itwara abagenzi yitwa Horizon, yavaga i Nyanza yerekeza i Kigali, igeze i Musambira muri Kamonyi ahazwi nko mu Rwabasomari, igongwa n’iyo kamyo yajyaga mu Ntara y’Amajyepfo.

Ababonye iyo mpanuka bavuga ko ikamyo yaryamiye Coaster ku buryo gukuramo abantu byabanje kugorana.

Kuri ubu ariko hageze imashini yabugenewe yo guterura iyo kamyo. Imibare y’abahasize ubuzima n’abakomeretse ntiramenyekana.

Turacyakurikirana iyi nkuru

Mugisha Emmanuel Umunyamabanga Nshingwabikorwa wa RMC atangaza ko kubona amakuru atari ukugirirwa impuhwe ahubwo ari uburenganzira

Babyibukijwe mu biganiro bagiranye n’Urwego rw’abanyamakuru bigenzura (RMC) n’umuryango w’abanyamakuru baharanira amahoro (Pax Press), byabaye tariki ya 17 Ukwakira 2016.

Mugisha Emmanuel, umunyamabanga nshingwabikorwa wa RMC, yabasobanuriye ko gutanga amakuru y’ibikorerwa abaturage bitagarukira ku muvugizi ahubwo ko buri mukozi asabwa gusobanura ibyo akora.

Agira ati “Umuntu wese ufite amakuru y’ukuri kandi ari mu nyungu rusange, kuyatanga ntagomba kubihanirwa.

Hagize ushaka kubimurenganyiriza yakwitabaza Urwego rw’Umuvunyi kuko nirwo rufite inshingano zo gukurikirana iyubahirizwa ry’iri tegeko.”

Yavuze ibi kubera ko hari bamwe mu bayobozi badatanga amakuru kandi umunyamakuru ayakeneye. Umunyamakuru yayaka undi mukozi, ugasanga umuyobozi we amurebye nabi kuburyo binamuviramo guhanwa.

Bamwe mu bakozi n’ababyobozi muri Kamonyi basobanuriwe itegeko ryo kubona amakuru

Bamwe mu bakozi b’akarere ka Kamonyi batangaza ko bagiraga ubwoba bwo gutanga amakuru bumva ko ari akazi k’umuvugizi w’akarere; nkuko Umugirasoni Chantal abisobanura.

Agira ati “Hari ubwo umunyamakuru yashoboraga kukubaza amakuru y’ibyo ukora ariko ukayamwima kuko urwego rufite umuvugizi. Twamenye ko kuvuga ibyo ukora nta kibazo kirimo.”

Murenzi Janvier, umunyamakuru n’umuyobozi wa Pax Press, ahamya ko Itegeko ryo kubona amakuru ryorohereza abanyamakuru kubona amakuru mu nzego z’ubuyobozi. Ritarajyaho hagaragaraga imbogamizi mu mikoranire y’abanyamakuru n’abayobozi.

Agira ati “Mbere iryo tegeko ritarajyaho, wasangaga kugira ngo uzavugane n’umuntu bikaba ikibazo. Ugasanga umunyamakuru n’umuyobozi ntibumvikana bameze nk’inkoko n’agaca.

Itegeko rigamije kwereka abayobozi ko gutanga amakuru ari inshingano kandi ko kuyamenya ari uburenganzira bw’umuturage.”

Umuyobozi wungirije w’Akarere ka Kamonyi ushinzwe iterambere ry’ubukungu, Tuyizere Thadee abwira abakozi gutinyuka bagatanga amakuru kubyo bakora. Kuko Umunyamabanga nshingwabikorwa w’akarere, ari nawe muvugizi, aba afite izindi nshingano z’akazi.

Itegeko ryo kubona amakuru ryasinywe ku wa 05 Gashyantare 2013 rishyirwa mu igazeti ya Leta ku wa 11 Werurwe 2013. Iryo tegeko rikurikiranwa mu kurishyira mu bikorwa n’urwego rw’Umuvunyi.

Ingingo ya munani y’umutwe wa gatatu w’iryo tegeko, iteganya ko buri rwego rwa Leta rushyiraho cyangwa rukagena umukozi ushinzwe gutanga amakuru.

Padiri Innocent Consolateur komiseri muri Komisiyo y’Igihugu y’Ubumwe n’Ubwiyunge

Avuga ko mu biganiro bagirana n’urubyiruko ruri mu itorero hari abavuga ko ababyeyi bababuza kubana neza n’abaturanyi, bakabahisha ukuri ku mateka ya Janoside yakorewe abatutsi.

Yagize, ati « Iyo twigisha urubyiruko baratubwira bati ‘dushimye ko twebwe gahunda ya ndi umunyarwanda tuyumvise, ariko dufite ikibazo cy’ababyeyi bacu batubuza kuvugana n’abaturanyi’.

Hakaba n’utubwira ko ari nyina ubabwira ko se yafunzwe arengana, ahubwo ari abamufungishije kuko babanga ».

Umugirasoni asaba ko hashyirwa imbaraga mu kwigisha urubyiruko kuko hari n’ababuzwa n’ababyeyi gushyingiranwa kuko badahuje ubwoko.

Padiri Innocent Consolateur, Komiseri muri Komisiyo y’ubumwe n’ubwiyunge, atangaza ko gahunda ya Leta y’ubumwe ari ukongera kubaka igihugu cy’abaturage bunze ubumwe.

Urubyiruko rugomba kwitabwaho hashyirwa ingufu mu kurwigisha kugira ngo hatagira uruyobya.

Ati « Tugomba no guhagurukira ababyeyi, bakumva ko batagomba kongera kuroga abana ngo babeho nabi nk’uko natwe twabayeho.»

Padiri Innocent avuga ko unaniwe kureka amacakubiri, akwiye kujya ayagumana muri we aho kugirango aroge urubyiruko.

Kugira ngo ubumwe n’ubwiyunge bigerweho, Komisiyo ifite mu nshingano ubumwe n’ubwiyunge, ivuga ko bisaba ko abakoze Jenoside basaba imbabazi abo bayikoreye.

Gusa haracyari imbogamizi z’abangije imitungo batishyura abarokotse Jenoside.

Ibi nabyo ngo bikaba bibangamira ubumwe n’ubwiyunge nk’uko Ngenzi Primien, umujyanama mu murenge wa Rugarika abivuga.

Indi mbogamizi abarokotse Jenoside yakorewe abatutsi babona ni ukuba hari abantu ba bo bishwe, hakabura utanga amakuru y’aho bashyizwe kandi barishwe hari abantu bareba.

Umuyobozi wungirije w’Akarere ka Kamonyi ashyikiriza urubyiruko ibikoresho bagurijwe ku nkunga ya BDF

Iyi mbogamizi yari ishingiye ku kubura amafaranga yo kugura ibikoresho bya kinyamwuga, akenshi usanga bihenze ku buryo uru rubyiruko rutabashaga kubigura rutabonye inguzanyo.

Ikigega cy’ingwate cya BDF cyahagurukiye kurwanya izi mbogamizi.

Gitangira urubyiruko ingwate mu bigo by’imari bikabagurira ibi bikoresho, maze urubyiruko rukabihabwa nk’inguzanyo.

Uhawe iyi nguzanyo yishyura icya kabiri cy’inguzanyo yatse n’inyungu yacyo, andi akishyurwa na BDF kandi ikanamutangira ingwate ingana na 75% .

Umuntu agurizwa ibikoresho BDF ikamutangira ingwate ya 75%

Kakwezi Sylvie umukozi ushinzwe imishinga muri BDF ishami rya Kamonyi, atangaza ko iyi ari gahunda leta yashyizeho yo kurwanya ubushomeri mu rubyiruko.

Yagize ati “ BDF itanga ingwate ya 75% ku ijana y’inguzanyo, igice gisigaye cya 25% kikabarirwa muri ibyo bikoresha urubyiruko ruhabwa”.

Ku itariki ya 7 Ukwakira 2016 umurenge SACCO wa Runda mu Karere ka kamonyi, wahaye inguzanyo y’ibikoresho abagera kuri 32 muri aka Karere.

Ababihawe bashimye ubuyobozi bwahagurukiye gukura urubyiruko mu bushomeri.
Habineza Emmanuel avuga ko yakoreraga abandi bigatuma adatera imbere, akavuga ko kubona ibikoresho bye bigiye kumuteza imbere.

Yagize ati “ Natse imashini zidoda n’izigorora impu, amaforomo, impu, kole n’ibindi bikoresho bikora mu nkweto, byose bifite agaciro k’amafaranga ibihumbi 500. Nzishyura 50%, BDF yishyure asigaye”.

Urubyiruko rwize imyuga rwo muri aka Karere rwasabwe kugaragaza impinduka mu mibereho yarwo, kuko ikibazo cyo kubura igishoro cyajyaga kibangamira iterambere ryabo cyakemutse.

Urubyiruko ruhabwa izi nguzanyo y’ibikoresho ni urwize rugahabwa impamyabushobozi yemewe n’ikigo cy’igihugu gishinzwe guteza imbere imyuga n’ubumenyi ngiro WDA.

Imanishimwe Naome wiga mu mwaka wa gatatu w’amashuri abanza yishimiye ibikoresho yahawe

Ayo marushanwa yateguwe mu kwezi kwahariwe guteza imbere umuco wo gusoma, kwashorejwe ku wa kane tariki 29 Nzeli 2016 mu karere ka Kamonyi. Abatsinze bahembwe ibindi birimo ibikoresho by’ishuri nk’amakaye, amakaramu n’ibitabo.

Abo 12 batsinze nibo basanze bafite imyandi myiza irimo amasomo, ashobora kwifashishwa mu mashuri. Mu batsinze harimo abiga mu mashuri abanza bane.

Ayo marushanwa yo kwandika yari yitabiriwe n’abantu babarirwa mu 3750 baturuka mu Rwanda hose.

Abatinze bishimira intambwe bagejejweho n’impano y’ubuhanzi bafite, bagahamya ko bagiye kugira umuhate mu gusoma no kwandika; nkuko Imanishimwe Naome wo mu Karere ka Kamonyi, wiga mu mwaka wa gatatu w’amashuri abanza, abisobanura.

Agira ati “Nishimiye ibihembo nahawe, ngiye kongera ubumenyi ku buryo n’ubutaha, nzongera nkandika”

Mugenzi we witwa Tuyishime Philemon wiga ku rwunge rw’amashuru rwa Murama, mu karere ka Nyabihu, atsinze aya marushanwa ku nshuro ya kabiri. Avuga ko mu bigo by’amashuri haba ibitabo byo gusoma ariko abanyeshuri babyitabira ari bake ariko ngo agiye guharanira kubishishikariza abandi.

Aragira ati “ku bigo byinshi abanyeshuri ntibitabira guhimba kubera kutabyitaho. Nko mu kigo nigaho, nta muntu uhejwe mu isomero ariko abanyeshuri ntibabikora.”

Abatsinze uko ari 12 bahigitse abandi barenga 3000 bari bitabiriye irushanwa ryo kwandika

Uko ari 12 batsinze bari bamaze iminsi ibiri banoza inyandiko zabo babifashijwemo n’inzu y’ubwanditsi “Mudacumura Publishing House”.

Umuyobozi wa w’Ikigo cy’u Rwanda cy’uburezi (REB), Gasana Janvier atangaza ko aya marushanwa agamije guhwitura abanyeshuri n’abarezi kwandika ibitekerezo bya bo kugira ngo byifashishwe mu myandiko yigishwa mu mashuri.

Agira ati “Niba uyu munsi dushobora gukoresha Abanyarwanda biga n’abatiga, muri rusange tukabona ibitabo byiza byanditse mu buryo bwa gihanga, ni ukuvuga ko bishoboka hari abantu bafite ubushobozi. Natwe nk’abantu bashinzwe uburezi twabikuyemo isomo.”

Matthew P. ROTH, wari uhagarariye Ambassade ya Amerika mu Rwanda yatangaje ko igihugu cyabo kizakomeza gushyigikira imishinga yo gusoma no kwandika kuko ihesha agaciro ururimi gakondo nk’umuco w’igihugu.

Ni ku nshuro ya gatatu “Andika Rwanda” ikoresheje amarushanwa. Imaze gusohora ibitabo 500 byo gusoma birimo inkuru n’imivugo y’Abanyarwanda. Ayo marushanwa aterwa inkunga na REB na USAID.

Umuyobozi w’akarere ka Kamonyi asomera mu ruhame amabaruwa yandikiwe n’abaturage bamugezaho ibibazo byabo

Ibyo byabaye tariki 29 Nzeli 2016 ubwo umuyobozi w’Akarere ka Kamonyi, Aimable Udahemuka yasuraga abaturage bo mu kagari ka Mataba, mu murenge wa Kayenzi.

Ubusanzwe mu nteko nk’iyo y’abaturage, buri mutura ufite ikibazo, ajya ku murongo agahabwa ijambo, akabaza ikibazo cye, ubuyobozi bukagishakira igisubizo.

Ariko abagabo babiri, Ntanama Laurent na Habarurema Salomon bo mu Murenge wa Kayenzi, bashyikirije Udahemuka amabaruwa arimo ibibazo byabo, bavuga ko barenganyijwe n’inzego z’ibanze.

Abo bagabo batinyaga ko bashobora kwimwa ijambo, ubuyobozi bw’inzego z’ibanze ntibubemerere kujya ku murongo w’ababaza, bigatuma batageza ku muyobozi w’akarere kabo ibibazo bamaranye igihe.

Udahemuka yakiriye ayo mabaruwa ayasomera mu ruhame. Ntanama yaregaga umunyamabanga nshingwabikorwa w’umurenge atuyemo, kwanga kumurangiriza urubanza. Ngo yamubwiraga ko rwarangijwe kera n’uwari konseye.

Habarurema we yandikiye umuyobozi w’Akarere ka Kamonyi, arega ubuyobozi bw’umurenge n’ubw’umudugudu atuyemo, abushinja kumutwarira amakara .

Muri iyo baruwa avuga ko abo bayobozi bamutwariye umutungo bitwaje impanuka yo gutwika ishyamba yahuye nayo kuburyo ngo banamwatse ruswa.

Agira ati «Umukuru w’umudugudu yarampamagaye, arambwira ati ‘ahantu turangije kuhazimya nyoherereza ibihumbi 30Frw yo guhemba abantu bahajimije’, mpita nyamwoherereza kuri Mobile Money. »

Udahemuka yahise atangira gukemura ibyo bibazo. Uwasabaga kurangirizwa urubanza basanze koko rwararangijwe. Icy’uwatwariwe amakara cyabyaye ibindi bibazo birimo na ruswa yahawe umukuru w’umudugudu.

Yahise asaba umunyamabanga nshingwabikorwa w’umurenge kumukorera raporo bityo uwo muyobozi w’umudugudu akazashakirwa ibihano.

Udahemuka uvuga ko yatunguwe no kuba abaturage bamwandikiye kandi bari bazi ko ari buze. Atangaza ko bishoboka ko abo baturage bari bafitiye ubwoba ubuyobozi bw’umurenge.

Agira ati «Uko nabitekereje, aba baturage bashobora kuba babwiraga ko ubuyobozi butari butume bajya ku murongo cyangwa se ko umurongo uri bube munini, baratanguranwa bampa ibibazo mu nyandiko kugira ngo abe aribyo mperaho nsubiza. »

Ibyo ngo abaturage bahura nabyo kenshi; nkuko Kabera Pierre Claver, umuyobozi w’ishami ry’amategeko muri Transparency International Rwanda yabitangaje mu kumurika ibyavuye mu bushakashatsi wakoze ureka uko abaturage babona servisi bahabwa n’abayobozi, ku itariki ya 26 Nzeli 2016.

Agira ati “Ugasanga umuyobozi ntayatse uje umugana, amusaba serivise, ahubwo agatuma undi muntu ngo amumuhere amafaranga amuzanire”.

Abo batumwa n’abayobozi nibo bitwa abakomisiyoneri, abayobozi bihishamo bakaka ruswa abo bayobora kubera serivisi babahaye.

Yatanze urugero rw’abajya kwaka serivise yo guhindura ibyangombwa by’ubutaka. Ubusanzwe uwaka iyo serivisi asabwa kwishyura ibihumbi 27FRw. Ariko ngo hari abaturage batanga ibihumbi 40Frw harimo n’ayo abakomisiyoneri bababwiye ko bashyiriye abayobozi.

Kabera Pierre Claver (wambaye ikoti ry’umukara) avuga ko urwego rw’umudugudu arirwo rurangwamo ruswa cyane

Transparency International Rwanda ivuga ko mu bushakashatsi yakoze, 12,5% by’ababajijwe bahamije ko batswe ruswa kugira ngo babone servisi mu buyobozi.

Urwego rw’umudugudu rwagaragajwe n’abaturage ko ari urwa mbere mu kwaka ruswa abarukeyeho serivise.

Ikindi ngo ruswa y’amafaranga niyo yakwa cyane ku kigereranyo cya 65%. Hakaba hari n’abayobozi basaba amakarita ya telefoni cyangwa ruswa y’igitsina.

Ubu bushakashatsi bwamurikiwe abayobozi b’akarere ka Kamonyi kugira ngo bafate ingamba mu gukosora iyo mikorere idahwitse, ishobora gutuma abaturage binubira ubuyobozi.

Umuyobozi w’Akarere ka Kamonyi, Aimable Udahemuka atangaza ko ubuyobozi bugiye guhagurukira abo bakomisiyoneri bivugwa ko bakorana n’abayobozi.

Agira ati “Kiriya rero twagaragarijwe twasanze ari ikibazo cyo guhagurukira. N’abaturage bagasobanurirwa iby’abo bantu biyitirira ko baziranye n’abayobozi bashaka kubarira utwabo”.

Ubushakashatsi Transparency International Rwanda yabukoze yifashishije udusanduku tw’ibitekerezo yashyize ku biro by’imirenge yo muri Kamonyi ariyo Mugina, Runda, Gacurabwenge, Kayenzi, Musambira na Rukoma.

Ubuyobozi bw’akarere buvuga ko nta tegeko ririho rituza abantu aho bavuka

Bamwe muri bakavukire bo mu kagari ka Sheri mu murenge wa Rugarika, bavuga ko amazu agenewe kubakwa mu kagari ka bo ahenze ku buryo nta n’umwe wabasha kuyubaka.

Sindayigaya Moise, avuga ko yagurirshije ku butaka yahawe n’ababyeyi be kugira ngo abone amafaranga yo kubaka ariko inzu yubatse yarasenywe kuko itari yujuje ibyangombwa.

Yagize ati “Icyo cyibanza barakimpaye nkigurisha miliyoni, iyo miliyoni nyubakishije inzu barayisenya”.

Perezida w’inama njyanama y’umurenge wa Rugarika Bayiro Laurent, avuga ko ari ikibazo kuko abubaka baba bashaka kubaka ku ivuko muri gakondo y’iwabo, bakabura ubushobozi.

Ati “Ntibafite ubushobozi bwo kubaka inzu zemewe mushaka hano.Usanga ari ikibazo gikomeye kuko nibakomeza guserera bazasigara biba”.

Tuyizere Thadee, umuyobozi w’akarere wungirije ushinzwe iterambere ry’ubukungu, avuga ko nta tegeko rivua ko umuntu atura mu isambu y’iwabo.

Avuga ko igishushanyo mbonera kitabuza ko habaho ahagenewe inzu zijyanye n’ubushobozi bwa buri wese.

Ati « Nabo urebye mu gishushanyo mbonera ntabwo birengagijwe. Mu myubakire hari ahagenewe inzu ziri mu rwego rwo hejuru n’iziciriritse zo ku rwego rw’umudugudu za metero eshashatu ku munani kandi zubakishijwe amatafari ya rukarakara”.

Si mu kagari ka sheri honyine havugwa ibibazo by’imyubakire mu mujyi wa Kamonyi.

Mu bice bitandukanye by’uyu mujyi abaturage bavuga ko bubaka, basenyerwa kubera kutubahiriza ibiteganywa mu gishushanyo mbonera cyemejwe n’Inama Njyanama y’akarere.

Paruwasi Ruyenzi yari isanzwe ari santarali

Paruwasi Ruyenzi yatangijwe ku mugaragaro ku cyumweru tariki 18 Nzeli 2016. Yari isanzwe ari imwe muri Santarali za Paruwasi Gihara.

Musenyeri Mbonyintege avuga ko yagize Ruyenzi Paruwasi kubera ubwiyongere bw’abaturage biganjemo abakristu Gatolika, batuye imidugudu igize akarere ka Kamonyi.

Agira ati “Dushingiye ku bwiyongere bw’abakristu ba Duwayene (akarere) ya Kamonyi. Tumaze kumva inama za Paruwasi Gihara na Kamonyi, no kubiganira n’abakristu b’izi paruwasi zombi, dushinze mu karere ka Kamonyi Paruwasi nshya yitwa Ruyenzi”.

Paruwasi nshya ya Ruyenzi ifite abakristu babatijwe 7093. Bari mu miryango remezo 61 mu murenge wa Ruyenzi, Runda no muri Rugarika.

Musenyeri Mbonyintege n’abandi bapadiri mu muhango wo gutangiza Paruwasi Gatolika ya Ruyenzi

Iyo Paruwasi yaragijwe abapadiri bo mu muryango w’Abamariyani bageze mu Rwanda mu 1994. Babanje gutura muri Paruwasi ya Nyakinama muri Diyosezi ya Ruhengeri. Bari no muri Paruwasi ya Kibeho, muri Diyosezi ya Gikongoro.

Umuyobozi w’akarere ka Kamonyi, Udahemuka Aimable, witabiriye yahaye ikaze abapadiri baragijwe Paruwasi ya Ruyenzi kandi abizeza ubufatanye.

Agira ati “Tuzafatanya mu rwego rwo kugira ngo duteze imbere paruwasi ya Ruyenzi mu bufatanye bwiza Leta isanzwe igirana na Kiliziya Gatulika. Kandi n’abakristu ba Ruyenzi, nizeye ko bazereka aba bapadiri bashya urukundo n’urugwiro biranga Abesamihigo ba Kamonyi”.

Ruyenzi yabaye santarale mu mwaka wa 1989. Yashinzwe n’uwari Padiri Mukuru wa Paruwasi Gihara, Pere Leonard. Yashakaga gufasha Abakristu bo ku Ruyenzi kubona aho basengere.

Mu mwaka wa 2015, abakristu b’iyi Paruwasi batangiye igikorwa cyo kubaka Kiliziya. Izatwara agera ku miliyoni 500FRw.

Udahemuka avuga ko abo bakozi barwanye bagiye guhanwa

Udahemuka Aimable, umuyobozi w’Akarere ka Kamonyi, avuga ko abo bakozi bateganyirijwe ibihano bigenwa na komite ngenga myitwarire igizwe na bamwe mu bakozi b’akarere. Ariko ntihagaragazwa ibihano bazahabwa.

Agira ati “Tugiye kureba mu mategeko ikosa ryabaye. Barafatirwa ibihano bikurikije amategeko mu rwego rw’akazi.”

Imyitwarire mibi y’abakozi ishobora guhanishwa guhagarikwa ku kazi mu gihe runaka cyangwa kwirukanwa burundu. Ibyo bikorwa hagendewe ku mategeko y’ikigo runaka agenga abakozi.

Abakozi babiri b’akarere ka kamonyi barwaniye mu biro, umwe arakomereka, tariki ya 16 Nzeli 2016. Umwe ashinzwe ibikoresho by’akarere undi ashinzwe ubujyanama mu mategeko n’iyemezwa ry’impapurompamo (notaire).

“Notaire” niwe washinjaga ushinzwe ibikoresho gutinda kugera ku kazi. Ibyo ngo byabangamiraga abandi kuko abakeneye ibikoresho babura uwo babyaka.

Bamwe mu bakozi batangaza ko “Notaire” yabanje kwijujutira ku muryango w’ibiro by’ushinzwe ibikoresho. Yavugaga ko atinda kugera ku kazi kandi yanahagera akigira kunywa icyayi.

Iyo niyo yabaye intandaro yo kurwana kuko ngo yamuvugaga yumva ari mu biro imbere. Ushizwe ibikoresho yarakinguye, “Notaire” yinjira amutonganya, bananirwa kumvikana, amukubita urushyi; nkuko Udahemuka abivuga.

Ati “Notaire niwe wakomeretse ariko ntago yakomeretse cyane. Ni akuma gahuza impapuro (agrafeuse), niko yamuteye ariko ubu yavuye kwa muganga. Mugenzi we nawe arahari turacyamuganiriza tumubaza icyabimuteye, ariko nawe akimara kubikora yicujije”.

Nyuma yuko ibyo bibaye, umuyobozi w’Akarere ka Kamonyi aratangaza ko hafashwe ingamba nshya mu micungire y’abakozi.

Ati “Ubusanzwe mu kugenzura abakerererwa, dukoresha ikaye abakozi baza bakiyandikamo. Ariko ubu twafashe icyemezo cy’uko tugiye kujya dukoresha uburyo bw’ikoranabuhanga bwo gutera igikumwe bita “fingerprint” mu kumenya igihe baziye”.

Akomeza avuga ko ubugenzacyaha buri gukora iperereza ku mvano y’ayo makimbirane.

Bigaragambije batega amabuye imodoka basaba kwishyurwa

Mu gitondo cyo ku itariki 13 Nzeli 2016, abo bakozi babarirwa muri 400, bafatiriye imodoka ebyiri z’isosiyeti “EMA Entreprise” ya Rwiyemezamirimo Mugarura Alex. Baziteze amabuye, barahaguma kugira ngo hatagira uzihakura batarishyurwa.

Umwe mu bigaragambije, ufite imyaka 55 y’amavuko, utifuje ko amazina ye atangazwa, uvuga ko yishyuza yishyuza ibihumbi 100FRw. Akomeza avuga ko yakoze kuva mu kwezi kwa Kamena 2016 ariko bamuhembera imibyizi ibiri gusa ihwanye na 4000FRw.

Agira ati “Bari batubwiye ko andi tuzayabona tariki 5 Nzeli 2016 none dore! Ubu mu rugo n’ibibazo abana barashonje na mituweri sindayishyura.”

Abo baturage bigaragambirije mu gasantere ko ku Gateko mu kagari ka Nteko. Bose hamwe barishyuza miliyoni 30FRw.

Aba bigaragambije barishyuza amafaranga y’amezi atatu

Bahurira ku kuba bafite ibibazo birimo inzara, kutishyura umusanzu wa Mituweri no kutishyurira abana amafaranga y’ishuri.

Icyatumye ngo ahanini bigaragambya ni urupfu rw’umwana w’umwe mu bo bakorana. Uwo mwana yararwaye ariko abura mituweri ngo amuvuze.

Mugarura Alex, rwiyemezamirimo wakoresheje abo bakozi, yemera ko yakererewe kubahemba. Avuga ko kutabishyura yabitewe nuko uruganda rwa Kabuye Sugar Works akorera rutaramwishyura.

Agira ati “Tuba tubakoresha natwe hari abadukoresha. Urumva abo dukorera baduhaye akazi nabo bari batarishyura. Bahisemo kujya kwigaragambywa ngo bagaragaze ko bababaye kandi natwe turabizi”.

Ahakana kuba yareme guhemba abo bakozi ku itariki 05 Nzeli 2016. Avuga ko yari yababwiye tariki 15 Nzeli 2016. Yemeye kubishyura amafaranga make mu yo bishyuza. Andi azayatanga bitarenze tariki 30 Nzeli 2016.

Aha niho abigaragambije bakoze

Abo baturage bigaragambije ni abaturuka mu mirenge ya Mugina na Rugarika y’akarere ka Kamonyi. Abandi baturuka mu karere ka Bugesera n’abo mu murenge wa Mageragere wo mu karere ka Nyarugenge. Basabwe gutaha bagategereza kwishyurwa ku itariki bahawe.

Abanyamuryangp ba RPF i Musambira biyemeje gutanga ubufasha ngo ubwitabire bwa mituweri yiyongere.

Babitangaje mu nteko rusange yabaye ku cyumweru tariki 11 Nzeri 2016, nyuma yo gusanga akarere kose kageze kigereranyo cya 72% mu kwitabira kwishyura ubwisungane mu kwivuza, muri bo Umurenge wa Musambira uri kuri 60%.

Umuyobozi wa RPF Inkotanyi ku rwego rw’akarere, Tuyizere Thadee yabwiye abanyamuryango ko bakwiye kuba intangarugero no gukora ubukangurambaga ngo uwo mubare wiyongere, kuko ari bo bagomba kuba moteri y’iterambere ry’aho batuye.

Yagize ati “Ni twe dukwiye kuba intangarugero muri byose. Niba ukangurira abaturage kujya muri mituweri kandi nawe utarayijyamo, byaba ari ikibazo. Aba bari aha bahagarariye abandi mu nzego zitandukanye, nimugende mubabwire ko mutuweri tugomba kuyigeraho 100%.”

Abanyamuryango ba RPF muri Musambira bagaragarijwe ko ubwitabire bwa mituweri buri hasi.

Biyemeje guhera ku bafite ubushobozi babashishikariza kwishyura. Ariko abo bigaragaragara ko batishoboye, bakazigomwa imisanzu bakabafasha kwishyura, nk’uko Ndangijimana Alphonse, ukuriye umuryango muri Musambira yabivuze.

Ati “Bamwe batangiye kuyatanga. Hari umujyanama watanze ibihumbi 100Frw, ubwo yishyuriye abantu 33. Ubwo rero uko turi hano buri wese narihira umwe cyangwa babiri mituweri tuzayigeraho.”

Shyaka Hassan, umunyamuryango muri aka karere, yavuze ko abanyamuryango bashimiye inzego z’ubuyobozi zakosoye ibibazo bayaragaraga mu mitangire ya serivise za Mituweri itarihutaga, kuko aribyo byacaga intege bamwe mu baturage.

Ati “N’ubuyobozi bwaradufashije buzana serivise ku tugari kuko mitiweri zigitangirwa ku ivuriro habaga hari abakozi bake, ku buryo twarahararaga bigatuma n’abatarishyura babireka. Nk’abantu bari barishyuye mu kwa gatandatu, babonye amakarita mu kwa munani.”

Umurenge wa Musambira, ufite abaturage basaga ibihumbi 22, muri bo 94% ni abanyamuryango ba RPF Inkotanyi.

Igishanga cya Rwabashyashya kimwe mu bishanga byo mu Karere ka Kamonyi

Abahinga mu bishanga bitandukanye byo mu Karere ka Kamonyi, bavuga ko imbuto y’ibigori bahabwa itinda kwera, bigatuma batubahiriza igihembwe cy’ihinga.

Iyi mbuto imara igihembwe cy’ihinga itarera igatangira ikindi, bigatuma mu gihembwe gikurikira batinda gutera, kuko imyaka yo mu gihembwe kibanza iba itarera.

Imwe mu ngaruka aba bahinzi bagaragaza, ni uko basabwa kurandura imyaka itarera kugirango bitegure igihe cy’ihinga gitaha.

Nsabimana Jean Bosco, uhagarariye amatsinda 11 ahinga muri zone ya Murehe mu murenge wa Rukoma muri aka Karere, avuga ko imbuto yera vuba yabafasha kubahiriza igihe.

Agira ati “Abashinzwe ubuhinzi badusabiye imbuto y’ibigori yera vuba, byadufasha kubahiriza igihe”.

Mwizerwa Rafiki, umukozi ushinzwe ubuhinzi mu karere ka Kamonyi, avuga ko akarere kamaze kubonera aba bahinzi imbuto yera vuba, akabasaba gutangira kwitegura igihembwe cya mbere cy’ihinga cya 2017.
Ati” Imbuto yera vuba yamaze kuboneka, abagifite imyaka mu mirima twabasabye kuyisarura bagatunganya imirima, kugira ngo imvura nigwa bazahite batera”.

Avuga kandi ko tariki ya 15 nzeri buri muhinzi agomba kuba yaramaze gutunganya umurima we kugirango ahabwe iyi mbuto atere hakiri kare, kuko iteganyagihe ryagaragaje ko iki gihembwe cy’ihinga imvura izaba nke.

Umwaka w’ihinga ugizwe n’ibihembwe bitatu birimo Umuhindo, uhera mu kwezi kwa Nzeri kugera muri Mutarama.

Igihembwe cya Kabiri cy’ihinga ni Urugaryi cyangwa Injagasha gihera muri Mutarama kugeza muri Gicurasi. Icya gatatu ni Impeshyi ihera mu kwezi kwa Kamena igasoza Kanama.

Ibi byemezo bishingiye ku mande bacibwa, ndetse no ku cyemezo komite nyobozi yafashe cyo kugura inzu, y’amafaranga miliyoni esheshatu ikaka umwenda muri SACCO, itabanje kubabaza.

Umwe mu Banyamuryango ba koperative CORIMU ikorera mu Karere ka Kamonyi

Umwe mu banyamuryango b’iyi Koperative witwa Kanani, avuga ko ubuhinzi bw’umuceri bumunaniye, kubera gukora yishyura amande acibwa atategujwe.

Avuga ko kugeza ubu amaze kwishyura amande asaga ibihumbi 45000frw bamuhora gusiba guhinga, kandi uwo mwanzura warafashwe batabimenyeshejwe.

Aragira ati “Ubu nta n’icyizere dufite ku mafaranga azava mu musaruro tuzeza, kuko bazahita bayatwara bavuga ko bagiye kwishyura uwo mwenda w’inzu”.

Niyonshuti Yozefu Perezida w’iyi Koperative, yemeranya n’abanyamuryango ko Komite akuriye, yatse umwenda ikagura inzu mu izina rya Koperative, itabamenyesheje.

kutabanza kubamenyesha, babitewe n’uko iyo nzu yari igiye kugurwa n’abandi, hakabaho kuyitanguranwa.

Niyoncuti, ahakana ko abavuga ko bacibwa amande yo gusiba guhinga babeshya, ahubwo ngo bahana uwasibye inamanta mpamvu, n’utubahirije itariki ntarengwa yo gutera.

Habimana Innocent, umuyobozi w’ishami ry’amakoperative n’ishoramari mu karere ka Kamonyi, avuga ko bitemewe ko Komite nyobozi ifata icyemezo, hatabajijwe abanyamuryango.

Ati” Ntabwo umuntu ushobora kujya kumubaza icyo atigeze agiramo uruhare “.

Ibibazo by’imicungire mibi y’umutungo wa Koperative, byagize uruhare mu isenyuka ry’amwe mu makoperative yari akomeye mu karere ka Kamonyi.

Ibi bigatuma hamwe na hamwe muri aka karere, abaturage badatinya kuvuga ko Koperative ziteza imbere abaziyobora gusa.

Abahinzi babaye indashyikira muri kamonyi bahawe ibikoresho bibafasha mu buhinzi

Mushyitsi Modeste wo mu murenge wa Mugina, ahinga urutoki na kawa mu isambu ya hegitari ebyiri. Niwe muhinzi wabonye igihembo cya mbere ubwo bahembwaga mu mpera z’ukwezi kwa Kanama, ahabwa ikigega cy’amazi, arozuwari na bote.

Avuga ko yishimiye cyane ibihembo yahawe kuko harimo ibyo atabashaga kwigurira kandi abikeneye.

Yagize ati «Ngo agahimbaza musyi kava munsi y’ingasire.Iyo umwana umuhembye arishima n’umukuru arishima. Iriya siterine nayirebaga nkifuza kuyigura ariko nkabura ubushobozi.»

Mushyitsi Modeste (wambaye imyenda y’ikigina)yahembwe ikigega

Mu gutoranya abahinzi bahembwa, hibandwa ku bahinze imbuto z’indobanure kandi bakubahiriza igihingwa cyatoranyijwe. Harebwa abakoresha inyongeramusaruro, abakoresha ikoranabuhanga n’abitabira gahunda za Leta.

Umuyobozi w’akarere ka Kamonyi wungirije ushinzwe ubukungu, Tuyizere Thadee, avuga ko kubahemba bigamije kubashimira no guteza imbere ubuhinzi n’ubworozi.

Ati «Twabahembye bigamije kubashimira ndetse no gutera ishyaka abandi kugira ngo babarebereho.»

Tuyizere arasaba abahembwe gufasha abajyanama b’ubuhinzi, babakangurira gahunda y’imbaturabukungu.

Abahinzi 146 nibo bahembwe mu karere ka Kamonyi. Bahawe ibigega by’amazi, bote, ingorofani na shitingi zo kwanikaho imyaka, byose bifite agaciro ka Miliyoni 4.

Bahangayikishijwe n’amapoto y’amashanyarazi ashaje akaba yaratangiye kugwa.

Senteri ya Nyarutovu yo mu Mududgudu wa Nyarutovu, mu Kagari ka Karengera yagezemo amashanyarazi bitewe n’umusanzu w’abaturage bishyize hamwe bagasaba inguzanyo ya miliyoni 2FRW bakagura urutsinga, maze umurenge ugatanga inkunga y’amapoto.

Ayo mapoto yatemwe mu ishyamba rya Leta bivugwa ko atari yujuje ubuziranenge, ari na yo mpamvu yatangiye kugwa nyuma y’imyaka ibiri abatanze umusanzu bose n’abandi bifuzaga umuriro batarawuhabwa.

Mu bantu 85 bari batanze umusanzu, umuriro ufitwe na 30 bonyine. Amwe mu mapoto yatangiriwe n’insina cyangwa ibiti byo mu ishyamba ngo atagwa ndetse hari n’ayo bateze inzego z’ibiti ngo atagwa.

Uwitwa Ndagijimana Emmanuel, uvuga ko ayo amapoto yashaje bakayakata bakongera bakayashinga; agahamya ko nta muntu watinyuka kuyurira ngo agiye gutanga umuriro.

Ati “Badufashije baduhindurira amapoto natwe tugashira impungenge, bitaba bikunze bagafunga umuriro kuko ushobora kuzica abantu batuye hano; dore ko n’imvura y’umuhindo igiye kugwa”.

Aba baturage kandi bifuza ko guhindurirwa amapoto byajyana no kongera ingufu z’umuriro ugera mu isanteri yabo kuko n’abawufite ari muke nta kindi bawukoresha keretse kumurika gusa.

Uwitwa Mukashyaka Gerardine agira ati “Abaturage bifuza ko buri wese yawutunga. Badufashije tukabona umuriro uhagije twakwiteza imbere tukazana icyuma gisya amasaka n’abana bacu tukajya tubogoshera hafi”.

Ibibazo by’amapoto n’umuriro udafite ingufu, bigaragara henshi mu Karere ka Kamonyi. Umuyobozi wako Udahemuka Aimable , avuga ko hari gukorwa ubuvugizi ku kigo cy’igihugu gishinzwe ingufu (REG) ngo kibikosore.

Aragira ati “Hari ahantu ubona hari amapoto atameze neza, ariko byose ni ubuvugizi kuko dukorana na REG. Tuzakomeza gukora ubuvugizi. Nk’ubuyobozi bw’akarere, ubushobozi tuba dufite ni ubwo kuvugana“.

Batangana Regis, Umuyobozi wa REG/Ishami rya Muhanga, ari na ryo ricunga amashanyarazi y’i Musambira, avuga ko ibibazo by’amapoto atujuje ubuziranenge byatewe n’abaturage bakoresheje ibiti byabo mu gufata umuriro ariko ngo kuri ubu ntawe bakibyemerera.

Ahamya ko icyo kibazo kiri henshi, REG ariko ngo ikaba cyaratangiye kubikosora. Ati "Ntabwo ari aho honyine bene ibyo bibazo by’amapoto biri henshi, hari amasite turimo gusana, ubwo narangira n’aho tuzahagera".

Ikibazo cy’umuriro muke na cyo ngo giterwa n’ubwiyongere bw’abafatira umuriro ku muyoboro kandi uwazanye umuriro bwa mbere yarakoresheje urutsinga rudafite ubushobozi bwo guha umuriro abantu benshi.

Amashanyarazi yageze bwa mbere mu Karere ka Kamonyi mu mwaka wa 2010. Kuri ubu amaze kugezwa mu mirenge yose uko ari 12 ariko mu ngo 13,3 % gusa.

Mayor Udamemuka Aimable yifatanya n’abaturage kubakira mugenzi wabo utishoboye mu muganda.

Mu muganda rusange usoza Kanama 2016, abaturage bo mu Mudugudu wa Kigwene mu Kagari ka Kambyeyi, mu Murenge wa Nyarubaka bafashije umubyeyi Nyirantwari Caritas kumwubakira inzu yo kubamo kuko yari amaze imyaka 22 aba mu bukode.

Umuyobozi w’Akarere, Udahemuka Aimable, wifatanyije n’abaturage muri uyu muganda, yabasabye gukomeza kunga ubumwe bakita ku biteza buri wese imbere kuko ari byo bizatuma bagera ku byo bifuza kandi babigizemo uruhare.

Yagize ati “Kugira ngo ibi byose birimo no kwita ku batishoboye bigerweho; ni uko mushyira hamwe, buri wese akumva ko iterambere rya mugenzi we rimureba. Ibyo mujye mubikorera ubuyobozi bwiza mufite bushishikajwe n’icyateza imbere abaturage.”

Nyirantwari w’imyaka 56 wapfakaye mu 1993, umugabo akamusigira abana bane yubbakirwa n’umuganda, yavuze ko mu bushobozi bwe atari gushobora kwiyubakira.

Ati “Byari bingoye kubona icumbi ryanjye bwite ariko ndashimira Imana n’ubuyobozi ndetse n’abaturage bamfashije iyi nzu ikaba iri kubakwa kandi mfite icyizere ko mu minsi mike iba yuzuye nkayitahamo ngatandukana n’ubukode”.

Mu Murenge wa Nyarubaka hariho gahunda yo kubakira abatishoboye binyuze mu muganda; ubuyobozi bugafasha mu kubona isakaro n’inzugi.

Munyakazi Epimaque, Umunyamabanga Nshingwabikorwa w’uwo murenge, yijeje ko bazakomeza gukurikirana iyi nyubako kugeza yuzuye kandi bakazafasha uyu muturage ku bikenewe byose.

Ahamya ko kuba abaturage bihitiramo abatishoboye bakeneye gufashwa bakanafata icyemezo cyo kububakira, bitanga icyezere cy’imibanire myiza hagati yabo.

Nyuma y’umuganda hatanzwe ubutumwa ku gukangurira abaturage kwihutira kwishyura ubwisungane mu kwivuza, kugarura abana bataye ishuri, kugira isuku, kubungabunga umutekano; hemejwe n’urutonde rw’abatishoboye bazahabwa inkunga y’ingoboka ya VUP.

Tegejo Silas yagaragaje akarengane ko kwamburwa inka ariko umuyobozi w’akarere amwemerera kumushumbusha.

Umwaka ushize Tegejo yahawe inka ya “Girinka” nk’utifashije ariko iza kuba ingumba. Yagejeje ikibazo cye ku mukuru w’umudugudu aho atuye mu Kagali ka Nyarubuye mu Murenge wa Rugarika ngo bayigurishe aguremo indi ariko bimuviramo kuyamburwa ihabwa abandi.

Kuri uyu wa gatatu tariki 24 Kanama 2016, nibwo yagejeje ikibazo cye ku muyobozi w’akarere nyuma yo kukimarana umwaka yaratinye kukigeza ku munyamabanga nshingwabikorwa w’akagari, avuga ko nawe yari ashyigikiye icyemezo cy’umukuru w’umudugudu.

Yagize, ati “Maze umwaka barayinyatse ariko nari naracecetse. Nkavuga nti ‘ntabwo nabaza gitifu w’akagari kandi akorana n’uw’umudugudu. Nkavuga nti nzabaza icyo kibazo umuyobozi w’akarere yaje. Ubwo aheruka rero yaje ndwaye.”

Umukuru w’umudugudu yashatse guhakana ibyavuzwe n’uyu mugabo ahubwo agahamya ko yari agiye kuyirigisa atabibwiye komite ya Girinka , ariko abaturage bavuganira umugabo bemeza ko yarenganye akwiye gusubizwa inka ye.

Umwe muri bo yagize ati “Njyewe uko mbibona, uyu mugabo yagurishije inka ku buryo buzwi, na bariya bayimwatse bari babiziranyeho ahubwo ni uko babonye Meya bagashaka kumwitakana.”

Umuyobozi w’Akarere ka Kamonyi Aimable Udahemuka yagaye inzego z’ibanze zagize uruhare mu irengana ry’uyu muturage, amwemerera gushumbushwa indi nka mu zizatangwa mu minsi ya vuba.

Ati “Hari usanga bashyira ijwi hejuru ku kibazo uba ubajije ubuyobozi, ibyo biba bigaragaza ko bitishimiye imyanzuro yafashwe. Aho rero niho dufatanya n’abaturage.”

Mu nteko y’abaturage yitabirwa n’ubuyobozi bw’akarere, abaturage babugaragariza icyizere kiruta icyo bagirira inzego z’ubuyobozi zibegereye. Bamwe muri bo bahamya ko banyurwa cyane n’igisubizo kivuye ku muyobozi w’akarere.

Abakozi b’utugari bashyize ingufu mu kwandika amakarita ya mituweri.

Nyuma y’aho Minisiteri y’Ubutegetsi bw’Igihugu ishyiriye ahagaragara itangazo ryo gufatira umusanzu w’ubwisungane mu kwivuza ku biro by’utugari, abakozi b’utugari n’abakorerabushake ni bo bandika amakarita ndetse akaba ari na ho bagaruka kuyareba.

Byatumye umubare w’abitabira kwishyura umusanzu w’ubwisungane mu kwivuza mu Karere ka Kamonyi uva kuri 49% ugera kuri 54% mu gihe cy’ibyumweru bibiri gusa.

Cyakora, umubare w’ubwitabire uracyari muto ugereranyije n’imyaka yatambutse. Bamwe mu baturage bagaragaza indi mbogamizi ijyanye n’ibyiciro by’ubudehe bashyizwemo bidahuye n’ubushobozi bwabo.

Ngo bategereje igisubizo ku bujurire bakoze ngo babone gufata icyemezo ku bijyanye na mituweri.

Ndahimana wo mu Kagari ka Kigese, Umurenge wa Rugarika, afite umuryango w’abantu barindwi.

Aragira ati “Nka njye banshyize mu cyiciro cya kabiri kandi nta sambu mfite, nta nka; kubaho ni ugukora ibiraka gusa. ..ntabwo ndishyura koko. None se ari nkawe wakwishyura kandi utaramenya ikiciro urimo”?

Hari n’abandi batigeze bagaragara ku rutonde rw’ibyiciro byasohotse, abo na bo baracyategereje kuko batanze umwirondoro w’imibereho yabo ngo bakorerwe ibyiciro.

Uwamahoro Prisca, Umuyobozi Wungirije w’Akarere ka Kamonyi ushinzwe Imibereho Myiza y’Abaturage, atangaza ko ibisubizo ku byiciro bitarenga iki cyumweru kizarangira tariki 28 Kanama bitagaragajwe.

Ariko asanga hari abari bishyuriwe na Leta umwaka ushize kubera bari mu cyiciro cya kabiri, banze kwirihira kandi uyu mwaka hazishyurirwa abari mu cyiciro cya mbere gusa.

Ati “Abaturage rwose bakwiye gucika ku muco wa “dependence”, wo kumva ko igihe cyose bafashwa; bagacuka hanyuma hakishyurirwa abo bigaragara ko batishoboye koko.”

Kugeza ubu, Umurenge wa Mugina ni wo uri imbere mu kwishyuraa umusanzu w’ubwisungane mu kwivuza n’ubwitabire bwa 63, 1% , umuyobozi wungirije w’akarere akaba atanga icyizere cy’uko uku kwezi kwa Kanama gusiga akarere kose kageze byibura kuri 80%.

Umuyobozi wa FPR mu Karere ka Kamonyi, Tuyizere Thadee, na we yari yitabiriye Inteko Rusange ya FPR Inkotanyi mu Murenge wa Mugina.

Mu Nteko rusange ya FPR Inkotanyi yateranye ku cyumweru tariki 21 Kanama 2016, mu Murenge wa Mugina w’Akarere ka Kamonyi, hagaragajwe ikibazo cy’inzara iterwa n’uko abaturage bagurisha umusaruro ku giciro gito, nyuma y’igihe gito bakajya guhaha ibiciro byazamutse.

Batanze urugero ku bishyimbo, bavuga ko byagize umusaruro mwiza. Ngo ku isarura mu kwezi kwa Gicurasi na Kamena 2016, ikiro cyaguraga 300FRW none nyuma y’amezi abiri kigeze kuri 600FRW.

Uwitwa Tuyizere Fides ati «Iyo habayeho inzara bihera inahangaha ; kuko umuturage wese wejeje imyaka yose ayijyana ku isoko. Kuba nta kigega cyo guhunika tugira, hari igihe abaturage basarura bakeneye amafranga kandi birumvikana nta handi bakura».

Cyakora, abanyamuryango ba FPR Inkotanyi biyemeje gukora ubukangurambaga kugira ngo umusaruro w’ubuhinzi wiyongere haboneke uwo kugurisha no uwo guhunika.

Ibyo ngo bikazaturuka mu kubahirizwa guhingira igihe, gukoresha inyongeramusaruro no kwitabira gahunda yo kuhira imyaka.

Hasabwe ko abajyanama b’ubuhinzi begera abaturage bakabakangurira kwitabira gahunda ya « Twigire Muhinzi» yo gukoresha ifumbire ku buso bwose bahinze, bityo umusaruro ukaba mwinshi.

Komiseri w’Imiyoborere Myiza muri FPR mu Murenge wa Mugina, Nkurunziza Jean de Dieu, ahamya ko Umurenge wa Mugina ufite amahirwe yo kuba ufite ubutaka bwera, ukagira n’ibishanga bitatu bishobora guhingwamo ibihembwe bitatu mu mwaka mu gihe abahinzi bitabiriye gahunda yo kuhira.

Yagize ati «Dufite ibishanga bitatu bitunganyije, icya Ruvubu, icya Mbati, n’icya Mukunguri ariko usanga abaturage badafite umuco wo kuhira. Leta yashyizeho gahunda yo gufasha abaturage kugura imashini zivomerera, ubu rero turi kubakangurira kubyitabira kugira ngo n’iyo nzara bavuga igabanuke».

Umurenge wa Mugina ufite abaturage ibihumbi 38, muri bo abayoboke ba FPR Inkotanyi babarirwa mu bihumbi 27. Ubuyobozi bw’umuryango buhamya ko abanyamuryango bitabiriye gushyira mu bikorwa gahunda za Leta n’abandi babareberaho maze bikihutisha iterambere.

Abagore bari muri koperative ’Twegukire Umurimo’ bahamya ko Agaseke kabateje imbere.

Nyuma y’imyaka 10 bize kuboha Agaseke, abagore bibumbiye muri Koperative “Twegukire umurimo -Agaseke” yo mu Murenge wa Gatsata, Akarere ka Gasabo, bahamya ko imibereho yabo yahindutse, kuko kuva batangiye kuboha, babonye amafaranga abafasha gukemura ibibazo by’ubukungu.

Mukagatete Drocella w’imyaka 59, yinjiye mu ishuri ryo kuboha agaseke abitewe n’ubukangurambaga yakorewe n’umurenge mu mwaka wa 2007. Hakaba hari muri gahunda yatangijwe na Madamu Jeannette Kagame yo gufasha abagore kugira ubushobozi baheraho biteza imbere.

Uyu mugore wiberaga mu rugo, avuga ko nyuma yo kumenya kuboha agaseke, asigaye afasha umugabo gutunga urugo.

Ati “Ikintu uyu mwuga wangejejeho, ni uko ubungubu ntakibaza umugabo igitenge. Umwana wanjye yatsindiye kujya mu mashuri, mbasha kumurihira none ubu ari mu mwaka wa gatandatu w’amashuri yisumbuye.”

Mukamurigo Alexie n umwe mu bagore bari muri koperative bahoze bacuruza ku gataro mu Mujyi wa Kigaliariko bakaza kubireka bakiga kuboha. Ahamya ko inyungu akura mu Gaseke iruta iyo yakuraga mu bucuruzi bwo mu muhanda, aho yahoraga yihishahisha inzego z’umutekano.

Mukamurigo ati “Mbere nakoraga ubucuruzi butemewe, rimwe na rimwe simbone n’icyo ngaburira abana banjye batanu, inzego z’umutekano zabitwaye. Ariko ububoshyi bw’agaseke bwangiriye akamaro.”

Abagore bari muri koperative ni 30, bahuza ibikorwa byabo bigashakirwa isoko hamwe. Guhurira hamwe byabarinze kwigunga kuko bungurana ibitekerezo ku mishinga y’iterambere. Banakoze amatsinda yo kuzigama no kuguza akabafasha iyo bakeneye amafaranga.

Inama y’Igihugu y’Abagore ishyigikira abagore bakora ubukorikori, ibafasha kunoza ibikorwa byabo kuko abenshi baba babizi babikomora mu muco.

Uwumukiza Francoise, Perezidante w’Inama y’Igihugu y’Abagore ku rwego rw’igihugu, avuga ko igishimishije ari uko ubukorikori bwitabirwa n’abagore bakuze.

Aragira ati “Ikintu kinejeje ni uko abagore bakuze bitabiriye ubukorikori. Ibyo bituma birinda gusaba abana babo. Akenshi wasangaga abagore batekereza ubuzima buri imbere bakagira ubwoba.”

iriba rya Micanga ntirigira amazi.

Iriba ryitwa “Micanga” riherereye mu Kagari ka Ruyenzi, Mu murenge wa Runda, ryarasenyutse n’ibitembo biribwa, nyuma gato y’aho ikigo cya WASAC cyari kimaze kugeza amazi meza muri aka gace bigatuma abariganaga bagabanuka.

Umubyeyi umaze imyaka 22 atuye ku Ruyenzi, ati “Kuva natura inaha muri 1994 twavomaga aha. Baraje bararyubakira bakaduca amafaranga 10 frw, barongera 20frw. Ariko noneho tubabajwe n’uko dusigaye nta riba dufite. Abana ni ukuza bakadubika muri kiriya kigaga.”

Kuri ubu abaturage bavuga batunguwe no kubona iriba bavomagaho kuva kera risenyutse rikabura urisana, bakabwirwa ko n’uwari ushinzwe kwishyuza abahavomeraga amafaranga yo kuribungabunga ari we ushinjwa kwiba ibitembo byayayoboraga.

Bamennye ikigega kugira ngo bajye babona uko bavoma.

Baziki ushinjwa kwiba ibihombo by’iri riba, avuga ko amaze amezi ane aretse kuhavomesha kuko abaturage banze kumwishyura, bavuga ko hari hasigaye haza amazi arimo umugese nawe ahitamo kubyihorera.

Yongeraho ko amafaranga we yishyuzaga yari ayo kwikenuza no gukora isuku ku iriba, ahubwo ko abamubanjirije ari bo batangaga ayo bavomesheje ku buyobozi nabwo bukabahemba.

Umunyamabanga nshingwabikorwa w’Akagari ka Ruyenzi, Rwandenze Epimaque, atangaza ko iri riba ryatunganyijwe kandi rigacungwa n’isosiyeti yitwa SOCOTRIM yatangaga amazi mu karere ka Kamonyi.

Avuga ko SOCOTRIM ari nayo yakiraga amafaranga yavomerwaga ariko nyuma iryo riba riza kwegurirwa WASAC.

Ati “Aho WASAC iziye, amazi yose yacungwaga na SOCOTRIM yarayeguriwe ariko amasoko asubizwa abaturage.”

Si iriba rya Micanga ryonyine ryononekaye nyuma y’uko WASAC igejeje amazi ku Ruyenzi, ahubwo hari n’andi atatu aturuka mu isoko nayo adatunganyije.

Rwandenze atangaza ko azasaba abaturage agatunganywa mu mafaranga y’ubudehe azahabwa imidugudu mu 2016/2017, kuko iyo amazi yabuze n’abafite amazi mu ngo bakenera kuvomera kuri aya mariba.

Ifoto y’urwibutso bafatiye imbere y’Umudugudu wa Mushimba wubatswe ku bufatanye n’Abanyakoreya.

Abakorerabushake basezeye tariki 16 Kanama 2016, baje gutura mu Mudugudu wa Mushimba, mu Kagari ka Kigembe, mu Murenge wa Gacurabwenge muri 2011 bagamije gufatanya n’abawutuye kugera ku iterambere bagizemo uruhare, muri gahunda yitwa “Saemaul undong”.

Basezeye ku baturage nyuma yo kubafasha mu bikorwa bitandukanye by’iterambere birimo ubuhinzi bw’umuceri n’ubw’ inanasi, ubworozi bw’ingurube n’ubw’inzuki, uburezi bw’inshuke n’ubw’abakuze, ndetse no kubaka ibikorwa remezo birimo ibiro by’umudugudu n’ishuri ry’inshuke n’amazi meza.

Icy’ingenzi abaturage bishimira, ni uko aba Banyakoreya basize babahinduye imyumvire ku bijyanye n’ umurimo.

Umuyobozi w’Akarere ka Kamonyi, Aimable Udahemuka, aha impano umwe mu bakorerabushake b’Abanyakorey babanaga n’abaturage b’i Mushimba.

Nyetera Paul, Umukuru w’Umudugudu w’uwo mudugudu, ati “Byari bimenyerewe ko gukora ari uguhatwa, ariko uyu munsi wa none imyumvire yo kuba umuntu abasha kwibwiriza agakora, icyo ni cyo kintu twabigiyeho gikuru twe dushima”.

Lee Bae Jong, umukorerabushake wafashe izina ry’Ikinyarwanda rya Muvunyi, ahamya ko abaturage bishimiye gahunda y’ubufatanye , akaba afite icyizere cy’uko intambwe basizeho abaturage b’i Mushimba, inzego z’ubuyobozi zizakomeza kuyishyigikira.

Yagize ati ”Mfite amatsiko yo kumenya, aho nzaba ndi muri Koreya, uko ibikorwa muri Mushimba bizaba bimeze. Cyakora mfite icyizere ko nubwo tuzaba turi muri Koreya Guverinoma y’u Rwanda ndetse n’inzego z’ibanze bazaha agaciro ibyo twakoreye hano mu nyungu z’Umudugudu wa Mushimba”.

Bacinya akadiho mu birori byo gusezera.

Umuyobozi w’Akarere ka Kamonyi udahemuka Aimable yashimye umusingi abo bakorerabushake basigiye Umudugudu wa Mushimba, maze yemera ko ubuyobozi buzakomeza gusigasira ibikorwa basize.

Ati “Tuzakomeza kubikora nk’akarere ; intangiriro Abakoreya barayitanze, ubwo ahasigaye ni ah’ubuyobozi”.

Uretse Umudugudu wa Mushimba, Gahunda ya Saemaul Undong yakorerwaga no mu midugudu ya Kigarama mu Murenge wa Rugarika n’uwa Kigembe mu Murenge wa Musambira.

Ambasaderi wa Koreya mu Rwanda, Park Yon Min, yavuze ko gusezera kw’abakorerabushake bitavuze ko ubufatanye buhagaze, ahubwo ko ari intangiriro yo kugira ngo buri muturage agire uruhare mu iterambere ry’umudugudu we, bitewe n’ibyo yungukiye muri Saemaul Undong.

Ni bake cyane bitabira guhinga mu gishanga cya Kayumbu mu Mpeshyi.

Iyo witegereje mu bindi bishanga by’Akarere ka Kamonyi mu gihe cy’Impeshyi usanga bihinzemo imboga ariko igishanga cya Kayumbu gihuriweho n’imirenge ya Musambira na Nyarubaka cyo gifite umwihariko wo kudahingwa imirima yose, kuko abahinzi bavuga ko nta mazi ahagije gifite.

Uwimana Marie Teresa, yagihinzemo inyanya mu gihembwe cya gatatu cy’ihinga ry’umwaka wa 2016, ahamya ko imboga zihinzwe mu Mpeshyi zifite agaciro kanini ariko na none akavuga ko guhinga muri Kayumbu mu Mpeshyi harimo imvune.

Ati “Abantu bahinze inyanya ari benshi mu gishanga ntibajya babona amazi. Ni ukujya kuyakura epfo ku mugende. Nkanjye w’umukecuru iyo mvanyeyo arrosoir kabiri, ni ukurara amaboko andya. Twacukuye utwobo ngo amazi ajye yikenekamo ariko na yo ni ukuyatanguranwa”.

Abahinzi ariko na none batangaza ko kugira intege nke zo guhinga mu Mpeshyi bitizwa umurindi n’uko abashinzwe ubuhinzi batabasobanurira akamaro ka byo. Bakaba bifuza ko ubuyobozi bwashyira ingufu mu bukangurambaga.

Uwitwa Rwagasana Vincent, aragira ati “Ibi byo guhinga mu Mpeshyi bisaba imbaraga n’umwanya. Hari ababa bafite imirimo myinshi cyangwa imyumvire iri hasi. Inkunga duteze kuri Leta ni uko yakwegera abaturage noneho bakabereka ibyiza byo guhinga gatatu mu mwaka”.

Mukiza Justin, impuguke mu buhinzi (agronome) ushinzwe gahunda yo kuhira mu Karere ka Kamonyi, avuga ko mu karere hari ibishanga bidafite amazi kubera kudatunganywa harimo n’iki cya Kayumbu, ngo akarere kakaba karimo gukora ubuvugizi kuri Minisiteri y’Ubuhinzi ngo ibitunganye.

Ati «Turakomeza kubafasha kubakorera ubuvugizi kugira ngo turebe ko kiriya gishanga MINAGRI izakibatunganyiriza, kugira ngo babone amazi yo kuhira ».

Igishanga cya Kayumbu gifite ubuso busaga hegitari 35, gihingwamo n’abahinzi 800 bibumbiye muri Koperative KOPABAKAM, bakaba basimburanyamo Soya n’ibigori mu bihembwe bibiri by’ihinga.

Ikigo cy’urubyiruko cya Kamonyi ngo kibangamiwe no kutagira internet.

Kuva mu mwaka wa 2015, muri icyo kigo cy’urubyiruko hatangirwa amahugurwa mu myuga yo gusudira, kudoda no gutunganya imisatsi, bitangwa n’umuryango utegamiye kuri Leta witwa Strive Foundation Rwanda.

Nzayisenga Jacques, umuyobozi w’umushinga, atangaza ko kutagira ikoranabuhanga rya internet ari imbogamizi ku rubyiruko rwiga imyuga kuko babura uko bakora ubushakashatsi ku bikorerwa ahandi ngo na bo bibafashe kunoza ibyo bakora.

Aragira ati “Urubyiruko rudafite internet ntacyo rushobora kugeraho. Nka ziriya ntebe dukora tujya kuzishaka kuri internet ahandi kuko hano nta ‘Computer Lab’ tugira . Iyi rero mbona ari na yo mpamvu ituma iki kigo kititabirwa».

Abiga imyuga kuri iki kigo na bo bahamya ko kutagira Internet bituma batamenya ibibera ahandi. Uwamungu Jean Patrick, ukuriye abanyeshuri, ati «Ibintu by’imyuga bisaba ikoranabuhanga. Byibuze twakagombye kujya kure internet tukabona ibintu bigezweho natwe tukabyigiraho».

Uru rubyiruko ruhamya ko kutagira internet bidindiza iterambere. Ngo muri rusange urubyiruko rw’Akarere ka Kamonyi ntaho rukura internet ngo rumenye amakuru y’ibikorerwa ahandi, bigatuma babaho mu bwigunge.

Mukunziwimana Ignace ati «Kamonyi iracyafite ibice byinshi by’icyaro. Bakeneye internet bakeneye amahugurwa. Internet ifite akamaro kanini kuko yatuma bamenya amakuru bakamenya uko ahandi bakora».

Ikibazo cya internet cyagarutsweho mu birori byo kwizihiza Umunsi Mpuzamahanga w’Urubyiruko wabaye tariki 12 Kanama 2016, maze Umugirasoni Chantal, umuyobozi w’ishami ry’imiyoborere myiza mu karere , yizeza ko akarere gafite umushinga wo kugeza umuyoboro wa internet ku kigo cy’urubyiruko.

Uretse amahugurwa, ikigo cy’urubyiruko kirimo ikibuga cy’imikino y’intoki ; kikaba kinatanga inama ku buzima bw’imyororokere, bikajyana no gufasha urubyiruko kumenya uko ruhagaze, gipima agakoko gatera sida.

Kwiga imyuga no kuyoboka ibigo by’imari ngo byatuma urubyiruko rwinshi rwihangira imirimo.

Urubyiruko rushinjwa uburangare bwo kutamenya amahirwe yo kwisunga ikigega cy’ingwate ’BDF’ ngo bahabwe inguzanyo n’ibigo by’imari, bityo bakore imishinga y’iterambere ibavana mu bukene n’ubushomeri benshi barimo.

Mu kwizihiza umunsi mpuzamahanga w’urubyiruko, tariki 12 Kanama 2016, urubyiruko rwo mu Karere ka Kamonyi rwasobanuriwe amahirwe rufite mu kwihangira umurimo nk’inzira irukura mu bukene, ariko rwo rukagaragaza ko hakiri imbogamizi y’imyumvire ikiri hasi kuri bamwe.

Urubyiruko rwatse inguzanyo mu bigo by’imari, BDF ibishingira kugera kuri 75% by’ingwate y’inguzanyo batse.

Kakwezi Sylvie, umukozi ushinzwe imishinga muri BDF, atangaza ko hari n’amahirwe yo kugurirwa ibikoresho ku rubyiruko rurangije kwiga imyuga.

Ati “Hari gahunda nziza ku rubyiruko yo kugurira ibikoresho abize imyuga. Tubagurira ibikoresho binyuze muri SACCO. Ayo mafaranga BDF yishyuraho ½ andi ukayiyishyurira ushyizeho n’inyungu ya 15%.”

Twagirimana Maurice, ukuriye urubyiruko mu Murenge wa Mugina, avuga ko nk’umurenge uherereye mu gice cy’icyaro, urubyiruko rwaho rugerageza kwiteza imbere rwifashishije imirimo ihaboneka, cyane nk’ubuhinzi n’ubucuruzi. Cyakora ngo bafite amakuru make ku mikorere ya BDF, kandi nta shuri ry’imyuga rirangwa mu murenge wabo.

Mukunziwimana Ignace wiga imyuga nyuma y’uko arangije amashuri yisumbuye, avuga ko urubyiruko rwinshi rufite ikibazo cy’imyumvire yo kutamenya akamaro ko kwiga imyuga kandi ari yo nzira yo kwihangira imirimo byoroshye.

Aragira ati “Naho waba urangije kaminuza, waza ugashaka n’umwuga wiga ukabona icyo ukora. Kuko umurimo ntujya uba mubi utunze nyirawo.”

Rebero David, Umuhuzabikorwa Wungirije w’Inama y’Igihugu y’Urubyiruko mu Karere ka Kamonyi, yibukije urubyiruko ko ari bo mbaraga z’igihugu kandi ko ari bo bafite igihe kirekire cyo kubaho, bityo bakaba bagomba kubyaza umusaruro amahirwe bafite.

Mu Karere ka Kamonyi, usanga abanyamabanga nshingabikorwa b’utugali batarara aho bakorera.

Icyaha cyo gukubita no gukomeretsa kiza ku isonga mu byagaragaye cyane muri aka karere kuva muri Gicurasi 2016, nk’uko byagaragajwe na polisi mu nama yaguye y’umutekano i yateranye kuri uyu wa kane tariki 11 Kanam 2016.

Umuyobozi w’akarere ka Kamonyi Aimable Udahemuka, yavuze ko bitizwa umurindi n’uko amarondo ya ninjoro adakorwa neza bitewe n’uko abanyamabanga nshingwabikorwa batarara mu tugari ngo bayakurikirane.

Yagize ati, “Mu igenzura twakoze ku mikorerwe y’amarondo, twasanze ari aho adakorwa neza. Ugasanga irondo rikorerwa ku biro by’akagari ngo ririnde idarapo kuko ariryo ba gitifu babura bagahangayika.”

Yatangaje mu ruhame abanyamabanga nshingwabikorwa b’utugari batarara aho bakorera, avuga ko bagiye gufatirwa ingamba. Ati “Ni gute umuyobozi utaha i Muhanga akorera i Nyarubaka yamenya ko irondo ryakozwe.”

Inzego z’umutekano zinenga abayobozi bataba mu tugari kuko bibatera gutangira akazi batinze no gutaha kare.

Bikiyongeraho no kudakurikirana ibikorerwa mu kagari bishobora kubyara ibyaha nk’ubusinzi bukurura urugomo no gufata abana ku ngufu n’amakimbirane abera mu ngo.

Mu byaha byagejejwe mu bugenzacyaha bw’Akarere ka Kamonyi mu mezi atatu ashize, gukubita no gukomeretsa byagaragaye inshuro 16.

Ibindi byaha byagaragaye ni ugukoresha ibiyobyabwenge inshuro byafashwe 12, abana bafashwe ku ngufu ni 9, abagaragaweho ingengabitekerezo ya jenoside ni 8, ubujura 6 nibwo bwagaragaye n’ibyaha by’ubwicanyi bine.

Ibi byaha byose umuyobozi w’akarere avuga ko akenshi bikorwa n’abakoresha ibiyobyabwenge, agasaba inzego z’ibanze gushyira ingufu mu kubirwanya.

Kuva muri 2013, igishanga cya Mushimba gihuriweho n’imirenge ya Gacurabwenge na Musambira mu Karere ka Kamonyi cyahingwagamo imyaka inyuranye, cyaratunganyijwe; abagihinga batangira guhingamo umuceri.

Abahinga igishanga cya Mushimba bishimira kurya umuceri biyejereje

Kuvugurura ubuhinzi muri iki gishanga byabanje kugora abagihingagamo kuko ku ikubitiro umuceri utatanze umusaruro mwiza. Cyakora nyuma y’imyaka 3 bawuhinga batangaza ko bamenye uburyo bwo kuwitaho, kuri ubu bakaba bishimira umusaruro bakuramo.

By’umwihariko, barashima ko bafite isoko kandi bagahabwa umuceri wo kurya, abana babo bakaba batakiwurarikira.

Mukazuzi Marceline, wo mu Kagari ka Buhoro mu Murenge wa Musambira, agira ati “Nubwo ntarabasha gukorera umurima wanjye neza ngo mbone umusaruro mwinshi, ariko iyo ncyuye ibiro 20 byo kurya nkuye mu musaruro, abana barishima”.

Umusaruro w’umuceri ntiwabaye igisubizo ku mafunguro gusa, ahubwo abahinzi bishimira ko koperative ibafasha gukemura ibibazo byo mu ngo zabo bikenera amafaranga nko kwishyura umusanzu w’ubwisungane mu kwivuza no kurihira abana amashuri.

Agereranyije n’ibindi bihingwa yahingaga mu gishanga, umusaza Ntamuhanga Francois, ahamya ko guhinga umuceri byahinduye imibereho y’umuryango we.

Ati “Nk’ubu nejeje ibilo bisaga 700, bazampa umuceri wo kurya ungana na kilo 100, bangurije aya mituweri, kandi nta kibazo cy’amafaranga nagira”.

Ntamuhanga Francois asarura ibiro bisaga 700 by’umuceri agahabwaho uwo kurya ibilo 100

Umuceri uhingwa kabiri mu mwaka. Nyetera Paul, Umukuru w’Umudugudu wa Mushimba iki gishanga giherereyemo ahamya ko ubuhinzi bw’umuceri bwafashije abaturage kuva mu bukene.

Aragira ati “ Muri iki gishanga hahingamo abaturage banjye 467. Abo bose nta kibazo cy’imibereho mibi tukibabonaho kubera gutunga amafaranga. N’abahoze mu cyiciro cya mbere bakivuyemo kubera amafaranga bakura mu muceri”.

Umusaruro ugurwa n’uruganda rwa Mukunguri Rice Promotion. Nyuma yo kuwutonora umuhinzi ahabwa uwo kurya ungana na 20% by’umusaruro yejeje, 10% rikagenerwa ibikorwa bya Koperative, naho usigaye ukagurwa n’uruganda kuri 240 frw ku kilo cy’umuceri udatonoye.

Mu kwizihiza Umuganura w’umwaka wa 2016, wabaye kuri uyu wa gatanu tariki 5 kanama, abaturage b’imidugudu ya Rugazi na Rubumba mu kagari ka Ruyenzi ho mu murenge wa Runda, bagaburiye abana ibiryo n’amata biteguwe mu buryo bwa gakondo, mu rwego rwo kubereka ubusabane n’imibereho byarangaga abanyarwanda ba kera.

Abana beretswe urusyo n’ingasire bifashishaga ngo babone ifu yo kwarikamo umutsima

Beretswe ibikoresho byifashishwaga mu gucunda amata no kuyabuganiza, urusyo n’ingasire bakoreshaga bategura ifu yo kwarikamo umutsima w’amasaka bita Rukacarara, inkono batekagamo, ibibindi bavomeshaga bakanaterekamo inzoga, n’igisoro babugurizagaho bataramye.

Umusaza Karambizi Alexandre, ushinzwe imikino gakondo mu Rwanda, atangaza ko umunsi w’umuganura ari umwanya wo kwibutsa abanyarwanda ibikoresho by’umuco nyarwanda mu rwego rwo kuwushyigikira no gutoza urubyiruko kuwiyumvamo.

Yagize, ati “byabaye ngombwa ko twereka urubyiruko n’abana bato ibikoresho gakondo biranga umuco nyarwanda, kugira ngo mu gihe tuzaba tutakiriho urubyiruko narwo ruzakomere ku muco kuko igihugu kitagira umuco kiba kitari igihugu”.

Abana bishimiye ubusabane no gusangira, bakaba bahamya ko mu muganura hari ubumenyi bwinshi bawungukiyemoo. Munyana Albertine ufite imyaka 13, ati “Ibyiza nabonye ni uko twasangiye ibigori ndetse n’umutsima w’amasaka ntabwo nari nziko uribwa”.

Uyu mwana kimwe na bagenzi be, basobanuriwe inyito z’ikinyarwanda kiboneye ku mata n’imirimo yakorwaga mu gihe cyo hambere; maze basaba ko abashinzwe uburezi n’ababyeyi bajya babibigisha.

Mu mateka y’umuganura, wizihizwaga hishimirwa umusaruro wagezweho mu mirimo y’ubuhinzi n’ubworozi buri mwaka, ariko impinduka zagiye zigaragara mu mibereho y’Abanyarwanda zatumye harimo abatagitunzwe n’iyo mirimo.

Umusaza Karambizi avuga ko n’abakorera umushahara bagomba kwishimira ibyo bakoze. Ati “nk’ubu mfite abana bakuru bakorera amafaranga. Ku muganura, baransura bakangurira inzoga bakazana n’ibiryo tugasangira. Uwo ni umuganura bakura mu musaruro w’imirimo ya bo”.

Barasaba ibikorwa remezo ku "Gasozi Ndatwa" ka Mbayaya.

Muri 2011, mu Mudugudu wa Nyaruhengeri, mu Kagari ka Mukinga, ho mu Murenge wa Nyamiyaga, hatunganyijwe Agasozi Ndatwa ka Mbayaya “Mbayaya Model Village”.

Abahatuye bari bishimiye ko bagiye kugezwaho ibikorwa remezo nk’amashanyarazi, amazi, amashuri ndetse n’ivuriro; ariko batunguwe n’uko imirimo yo kuhatunganya yarangiranye n’uwo mwaka kandi hari ibyo babwirwaga bitarahagera.

Bavuga ko baje kuhatura habahenze kubera ibyo bari bijejwe. Umwe mu bahatuye avuga ikibanza bakiguze ibihumbi 200FRW mu gihe iby’agasozi ndatwa bitaravugwa cyaguraga ibihumbi 70FRW cyangwa 100FRW.

Agira ati “Uwo muriro ntawo, amazi ntayo; umwana kujya kuvoma ni ugukora urugendo. Baraje bakata imihanda barakora none ibyo batwijeje byose, imyaka 5 irashize nta na kimwe badukoreye”.

Bakeka ko kudindira ku iterambere ry’ako gasozi ndatwa ryatewe n’uko komite nyobozi yarangije manda muri Gashyantare 2016 itabyitayeho, Bagasaba ko abayisimbuye batekereza ku iterambere ry’Agasozi ndatwa ka Mbayaya.

Undi muturage agira ati “Batwijeje amashuri hafi ariko abana bacu bajya kwiga i Jenda. Naho kwivuza tujya ku Kigo Nderabuzima cya Mugina cyangwa icya Nyamiyaga kandi hose ni kure”.

Mu Kiganiro n’abanyamakuru cyabaye tariki 4 Nyakanga 2016, ubuyobozi bwagaragaje ko uretse amashanyarazi nta bindi bikorwa remezo bibura mu Gasozi Ndatwa ka Mbayaya ko ahubwo ari abaturage banze kuhatura.

Emmanuel Bahizi, Umunyamabanga Nshingwabikorwa w’Akarere ka Kamonyi, yagize ati “Bijyanye n’imiterere yaho ntabwo abantu bitabiriye kujya kuhatura cyane. Ahantu rero hadatuwe, umuhanda utanyuramo imodoka, kwangirika biroroshye”.

Ahamya ko gutura ku mudugudu ari gahunda ya Leta, Mbayaya ikaba ifite igishushanyo mbonera ku buryo abashaka kuhatura bahasanga ibikorwa by’ibanze nk’amazi n’Ivuriro (Poste de santé).

Nyuma y’ikiganiro, Kigali Today yongeye kubaza abatuye uwo mudugudu, ariko batangaza ko koka hari imiyoboro y’amazi, ariko mu matiyo akaba ntayarimo, ndetse n’iryo vuriro ngo riracyari kubakwa.

Batatu bamaze gutabwa muri yombi ariko ntibagaragaza amadolari yose bakurikiranweho ngo kuko andi yatwawe n’ushinzwe icyokezo.

Abo bakobwa batatu barimo babiri bakira abakiliya n’undi umwe ukora isuku mu byumba by’icumbi "La Belle Source" riri ku Ruyenzi mu Karere ka Kamonyi, bafungiye kuri Sitasiyo ya Polisi ya Runda, bakurikiranweho gutwara amadolari ya Amerika 4450 y’Umunyekongo (RDC) waraye mu icumbi bakoramo tariki 3 Nyakanga 2016.

Amakuru atangwa n’umwe mu bakozi bakora muri iryo cumbi, aravuga ko uwabonye ayo madolari mbere ari umukobwa ukora isuku mu byumba, wayabonye akayayoberwa akajya kubwira umukozi ushinzwe umutekano (bita umusekirite) ko abonye amafaranga atazi.

Ngo umusekirite yamutumye kuyamuzanira akareba ariko undi agiye ntiyagaruka kuko yahuye n’abakira abakiriya babiri ndetse na mucoma (ushinzwe kotsa) bagahita bayagabana.

Nyir’amadolari wari wasezeye muri Lodge mu gitondo cyo ku wa Mbere tariki 4 Nyakanga 2016, yahise aguruka yibutse ko yibagiwe amadolari ye, maze abo bakobwa batatu bahita batabwa muri yombi , bafatanwa amadolari 2300 n’amanyarwanda ibihumbi 51Frw, bavuga ko andi yatwawe na Mucoma.

Amakuru dufite kugeza mu ma saa cyenda n’igice zo kuri uyu wa Kabiri tariki 5 Nyakanga, ubwo twandikaga iyi nkuru, ni uko igice cy’amafaranga yabuze bivugwa ko yatwawe na mucoma yari ataraboneka ndetse na mucoma ataratabwa muri yombi.

Turacyagerageza kuvugana n’Umuvugizi wa Polisi mu Ntara y’Amajyepfo ariko ntibiradukundira.

Abaturage bishimanye n’abayobozi mu kwizihiza umunsi wo kwibohora.

Mu birori byo kwizihiza umunsi wo kwibohora, wabereye ku rwego rw’akarere mu kagari ka Muganza, Umurenge wa Runda, hatanzwe inka 17 zaguzwe mu mafaranga yagarujwe, nyuma yo gukora isuzuma ku irengero rya zimwe mu nka zari zaratanzwe muri gahunda ya Girinka.

Umuyobozi w’akarere ka Kamonyi, Udahemuka Aimable, yatangaje ko ku bufatanye n’Ingabo z’igihugu mu karere hagarujwe asaga miliyoni 10Frw avuye ku makosa yakozwe muri gira inka, hagakurwamo inka zizorozwa imiryango hafi 60.

Yagize, ati “Ziriya nka zagarujwe ku bantu bagize amakosa muri gira inka, abantu bagurishije inka. Ariko kugira ngo tubashe kugaruza ibyari byaraburiwe irengero, ingabo zarabidufashije.”

Gahunda yo gufasha abaturage kuva mu bukene bahabwa inka, ni kimwe mu byo abaturage bashima ubuyobozi bwa Leta y’Ubumwe, ariko basaba ko hakumirwa abayibangamira.

Ngamije Vincent, umutarage wo mu kagari ka Muganza, yasabye ko ubuyobozi bukwiye kutihanganira abayobozi baka ruswa abaturage kugira ngo babahe ibiri mu burenganzira bwabo.

Ati “Baturinde abayobozi baka ikiziriko (amafaranga), umuturage kugira ngo babone kumuha inka, kandi n’abariya bahanwe mpamya ko ibyo bakoze bari babiziranyeho n’abayobozi kuko bari bashinzwe kuzikurikirana umunsi ku wundi.”

Amarangamutima mu gutanga inka yongera kuvugwa n’uwitwa Mukakimenyi, ugaya abayobozi babangamira gahunda yo kugabira inka abatishoboye yatangijwe na Perezida Kagame ashaka ko batera imbere ariko bo bakazigurisha.

Ati “Niba umuyobozi w’igihugu yaratanze inka ngo rubanda rugufi rubone agafumbire n’amata yo guha abana, noneho ya nka igafatwa n’umuntu w’umukire kuko yatanze amafaranga. Ubwo abayobozi bayigurisha kandi Perezida kagame atarayigurishe, numva bareba uko bahanwa.”

Mu kugaruza Gira inka, hakusanyijwe amafaranga y’inka zari zaragurishijwe, ayavuye mu nyama z’inka zapfuye zikagurishwa n’abari baranze kwitura.

Uretse abaturage bashubije ibyo bari baranyereje, Umuyobozi w’akarere atangaza ko hari abakozi b’akarere babigizemo uruhare, umwe akaba afunze, undi ari gushakishwa n’ubugenzacyaha.

Bireba ku malisiti y’ibyiciro by’ubudehe.

Umwaka w’ ubwisugane mu kwivuza urangirana n’itariki ya 30 Kamena. Impinduka zagaragaye mu byiciro by’ubudehe zatumye bamwe umwaka wa 2016/2017 utangira batarishyura umusanzu bitewe n’uko babuze ibyiciro baherereyemo kuko batibonye ku rutonde ruri ku mirenge.

Kaligirwa Francine, wo mu Kagari ka Rukambura, mu Murenge wa Musambira, yibuze ku rutonde rw’ibyiciro by’ubudehe. Avuga ko ahangayikishijwe n’uko azajya avuza umuryango we w’abantu 11.

Aragira ati “Mu bantu 30 bavuze ko bazarihirwa mu kagari kacu, sindimo kandi umwaka ushize nararihirwaga kuko mfite abana icyenda, bose ni bato ku buryo ntabona ubushobozi bwo kubishyurira”.

Abadepite basuye Akarere ka Kamonyi mu mpera z’ukwezi gushize bagize impungenge ku mubare wa 7,1% uzarihirwa mituwei na Leta, mu gihe mu mwaka ushize harihirwaga 29%. Bibaza niba icyo kinyuranyo cya 22% baravuye mu bukene koko. Depite Hindura ati “Ese aba baturage bagize ubushobozi”?

Abaturage bageza ku badepite ibibazo biri mu byiciro by’ubudehe.

Uwamahoro Prisca, Umuyobozi w’Akarere ka Kamonyi Wungirije ushinzwe Imibereho Myiza y’Abaturage, na we yemera ko hari abibuze mu byiciro by’ubudehe.

Ngo hatanzwe impapuro bazatangiraho amakuru ngo bashyirwe mu byiciro. Ndetse n’abashyizwe mu byiciro badakwiye, yasabye abadepite kubafasha mu gukora ubuvugizi bagahindurirwa.

Cyakora, abadepite bagaragaza ko basanze abenshi mu baturage bifuza kujya mu cyiciro gifashwa, ibyo bavuga ko bidatanga isura nziza.

Depite Kantengwa Julienne ati “Iyo turi aho tuvuga ngo twiheshe agaciro, twumvaga y’uko abaturage bifuza kujya mu cyiciro cya kane, ariko ntabwo ari ko bimeze. Ubwo abaturage bifuza kujya mu cyiciro cya mbere ntabwo ari tendance (intumbero) nziza kubona abaturage bifuza kujya mu bukene, aho kujya mu bukire”.

Leta irihira Mituweri abari mu cyiciro cya mbere, abo mu cyakabiri n’icya gatatu bagatanga 3,000FRW kuri buri muntu; naho abo mu cya kane bishyura 7,000FRW.

Muri Kamonyi bibutse abari abakozi b’abakomini bazize Jenoside.

Abo mu miryango y’abibukagwa bagaye ababishe nyamara bo batarahwemaga gukorera igihugu nubwo batotezwaga.

Mukaminega Epiphanie ati «Aba babyeyi bacu, abavandimwe n’abafasha kuri bamwe , babayeho mu buzima bugoye cyane , aho bateshwaga agaciro bagasuzugurwa mu kazi, bakitwa ibyitso, bagafungwa , aho bishwe n’abo bayoboraga bagambaniwe n’abo bakoranaga birababaje».

Mukaminega wibuka umubyeyi we wakoreraga Komini Taba, amushimira ko yari yarajyanye abana mu ishuri. None ku bw’ubuyobozi bwiza burangajwe imbere na Perezida Paul Kagame, abasigaye bakomeje kwiga bakaba baraminuje.

Umuyobozi Wungirije ushinzwe Ubukungu, Tuyizere Thadee, agaya akagambane bamwe mu bakozi bagiriye bagenzi babo. Yaboneyeho kwibutsa abakozi b’akarere ko mu kazi abakorana baba bameze nk’abavandimwe.

Ati «Iyo urebye abantu twibuka none uko ari 18, usanga abo bakoranaga ari bo bagize uruhare mu kubambura ubuzima. Buriya mu buzima bw’akazi, akenshi abakozi ni nk’abavandimwe bafatanya muri byose, ariko si ko byagenze, bagize uruhare mu kugambanira abo twibuka.»

Abafite ababo bakoreraga amakomini bishwe muri Jenoside babibuka.

Jenoside yakorewe Abatutsi yabaye umusaruro wavuye ku mbuto y’imiyoborere mibi. Perezida wa Ibuka, Murenzi Pacifique, arasaba abayobozi n’abakozi batanga serivisi kwirinda amacakubiri mu kwakira ababagana.

Yagize ati «Ni byiza kugira ngo tubyibuke , dufatanye twumve ko umuntu uri gutanga serivisi atazitanga mu izina rye, ahubwo agomba kuzitanga mu izina rya bose».

Mu kwibuka Jenoside yakorewe Abatutsi mu Karere ka Kamonyi, hashimwa ubutwari bw’uwari Burugumesitiri wa Komini Mugina, Callixte Ndagijimana, wanze ko abatutsi bo ku Mugina n’abari bahahungiye bicwa kugeza babanje kumwica.

Ku rundi ruhande ariko, hagawa ubugwari bwa Jean Paul Akayesu wari Burugumesitiri wa Komini Taba, wagize uruhare mu kwica abatutsi.

Bamwe mu bashakanye bagaraje ko bafitanye ibibazo.

Bamwe mu bashakanye bagarije itsinda ry’abadepite basuye akarere ka Kamonyi kuva tariki 24 kugeza 29 Kamena 2016, ibibazo by’uko abo babana babahohotera bakababuza uburenganzira. Nyamara mu gusesengura abaturage bakagaragaza ko uwatanze ikibazo ariwe uhohotera.

Urugero ni umugore wo mu kagari ka Karengera mu Murenge wa Musambira, wagaragarije abadepite ko umugabo we yamubujije uburenganzira, amukubita akaba yaramwirukanye mu rugo.

Yagize ati “Umugabo yaranyirukanye kandi ambuza uburenganzira ku mutungo, nkana nasabaga ko mwampesha uburenganzira ku mutungo nkabona icyo ntungisha abana.”

Cyakoze abaturage bazi iby’uyu muryango ntibatumye abadepite bemera ibyo uwo mugore avuze, ahubwo bagaragaje ko umugore ari we uhohotera umugabo amukangisha ko imitungo babamo ari iyaturutse iwabo.

Shyaka Hassan, Imboni y’umuryango w’abagabo barwanya ihohoterwa rishingiye ku gitsina RWAMREC, yatangaje ko ikibazo kiri muri urwo rugo giterwa n’umugore utubaha umugabo.

Ati “Twasabye umugore ko asaba imbabazi umugabo kuko ariwe ufite amafuti. Aho ikibazo kiri ni uko iyo umugabo ashatse kugira ijambo mu rugo, umugore amwibutsa ko ibintu ari ibyo umuryango we.”

Hari n’abandi muri uyu murenge wa Musambira bagaragaje ko bafitanye amakimbirane.

Depite Kankera Marie Josee na Depite Karenzi Theoneste bongeye kwibutsa abaturage ko kubahana aribyo bihesha agaciro umuryango.

Depite Kankera ati “Na Bibiliya iravuga ngo umugore afite inshingano zo kubaha umugabo, n’umugabo agakunda umugore. Ariko se wakunda umuntu ukamuraza ku nkeke?

Ayo makimbirane yo mu ngo rero mureke tuyareke kuko amahoro aricyo kintu cya mbere umuntu akenera.”

No mu yindi mirenge, abadapite bahasuye bagaragaje ko ibibazo by’amakimbirane mu bashakanye biteye inkeke, Depite Mukayuhi Rwaka Costance asaba ubuyobozi bw’akarere gushyira ingufu mu “mugoroba w’ababyeyi”, aho abaturanyi bagirana inama ku bibazo bafite, kuko hari aho babwiwe ko udakorwa.

Abadepite basobanurira Akarere ka Kamonyi ibibazo basanze mu baturage.

Ubwo abadepite basuraga Umurenge wa Ngamba, abaturage babagaragarije ko hari abayobozi babarenganya.

Depite Mporanyi Theobald, abisobanura agira ati “Hari aho twageze ku kagari dusanga umuturage wahawe icyangombwa cyo kubaka, ariko gitifu wa’akagari na DASSO bamubujije amahwemo ku buryo yatubwiye ati ‘barangendaho’, hari n’abasaza batubwiye ngo barakubita”.

Ikibazo cyo guhohotera abaturage bikozwe n’abayobozi cyabonywe kandi n’abadeepite basuye umurenge wa Rugarika, aho basanze umuturage wakubiswe na Komite nyobozi y’umudugudu, no mu gukemura ikibazo ntahabwe ubutabera bukwiye kuko Polisi yamwohereje mu bunzi.

Depite Umulisa Henriette ati « umuturage yageze kuri Polisi, Polisi na we ntabwo yamubereye imfura kandi yari afite ‘expertise ‘yemeza ko yavunitse imbavu. Baramubwira ngo najye kwiyunga. Ubwo kugira ngo iki kibazo tukimenye, ni uko umunsi twajyagayo bari bakubise undi muturage ».

Umuyobozi w’Akarere ka Kamonyi, Aimable Udahemuka, na we yagaye iyo myitwarire mibi iranga bamwe mu bayobozi, ahita asaba abanyamabanga nshingwabikorwa b’imirenge kumukorera urutonde rw’abayobozi bagira urugomo mu baturage.

Yagize ati «Ikibazo cy’urugomo rukorwa n’abayobozi, banyakubahwa ba gitifu, ndabasaba ko mwankorera raporo rw’abakuru b’imidugudu, abakuru b’utugari n’abarimu bagaragarwaho ibyo bibazo kugira ngo tubikemure »

Bamwe mu bakozi b’akarere bari bari muri icyo kiganiro.

Ibindi bibazo by’imiyoborere abadepite babonye, n’iby’abaturage batubaha abayobozi n’ abashaka guhora bahabwa inkunga .

Depite Mukayuhi Rwaka Costance waje akuriye itsinda, yasabye ubuyobozi gukora ubukangurambaga mu baturage bakabigisha umuco.

Ati « Iki kintu mugomba kugihagurukira kuko hari n’aho batinyukaga bagatunga urutoki abayobozi. Noneho byagera ku gitsina gore bikaba agahuma munwa. Hari aho bigera ukavuga uti ‘tutabihagurukiye byaba ‘crise’y’ubuyobozi butumvikana mu baturage’. Batabuha agaciro ».

Uru ruzinduko abadepite barutangiye tariki 24 bageza 29 Kamena 2016, baganira n’abaturage kuri gahunda y’isuku , ibibazo by’imirire n’iby’abana bata ishuri.

Urugendo rwo kwibuka abanyeshuri n’abarezi bo mu Murenge wa Karama muri Kamonyi bazize Jenoside.

Ni umuhango wabereye ku Musozi wa Gashinge, mu Kagari ka Nyamirembe. Nzeyimana Jean Claude, Umukozi w’Akarere ka Kamonyi, ushinzwe Uburezi mu Mashuri y’Inshuke n’Abanza, yasobanuriye abana amateka ya Jenoside, ababwira ko kubatoza kwibuka bigamije kububakamo Abanyarwanda bashya bazaba mu gihugu kizira amacakubiri.

Yagize ati “Umwana wahinduriwe ku ishuri adufasha no guhindura ababyeyi be. Tubona rero iyi gahunda yo kwibuka ari nziza kuko idufasha kugira ngo Jenoside ntizongere kuba ukundi, ndetse no kurwanya ingengabitekerezo yayo.”

Kwitabira ibikorwa byo kwibuka n’ibiganiro bahabwa n’abarezi babafasha mu matorero (clubs), ni ho abanyeshuri bamenyera amateka y’u Rwanda, ariko Ibuka isanga bikwiye ko hashyirwaho amasomo yigisha amateka ya Jenoside hagakorwa n’ingendo shuri abana bagasura inzibutso.

Nsabimana Fabien, Prezida wa Ibuka mu Murenge wa Karama, ati “Icyishe iki gihugu cyacu ni amateka yigishijwe mu mashuri mbere ya Jenoside. Twibaza rero ko habayeho imfashanyigisho zifatika mu mashuri, hakiyongeraho n’ingendo shuri byazatanga umusaruro ukomeye mu guhangana na Jenoside.”

Abana basobanuriwe amateka ya Jenoside yakorewe Abatutsi.

Iradukunda Francoise, Umunyeshuri muri GS Nyamirembe, ahamya ko kwibuka bituma abana bamenya amateka ya Jenoside, bikabafasha kuyirinda.

Yagize ati “Twagiye twumva ko abana ba kera bagiye batozwa amagambo asebanya bakita bagenzi babo amazina y’udusimba, ndetse hari n’abana bagiye baranga ahari abatutsi ngo bicwe, ibyo bituma mu biganiro tugirana twirinda icyadusubiza muri Jenoside.”

Muri uyu muhango witabiriwe n’abaturage benshi, abacitse ku icumu bo mu Murenge wa Karama bashimiye ibigo by’amashuri byahisemo kwibukira ku Musozi wa Gashinge wiciweho abatutsi benshi bari bahahungiye.

Baboneyeho basaba Ubuyobozi kuhashyira ikimenyetso cy’urwibutso, kugira ngo amateka yaho atazibagirana.

Abaturage barasaba abayobozi gukurikirana amafaranga bashoye muri KIG.

Nzamwita Tharcisse wo mu Murenge wa Runda, avuga ko KIG (Kamonyi Investment Group) yashinzwe tariki 30 Nzeri 2012, umugabane ukaba waraguraga ibihumbi 100 frw. Ngo ishyirahamwe ry’abantu bafite ubumuga yari ahagarariye ryahise riwugura kuko bumvaga hateganywa imishinga yabafasha gutera imbere.

Ngo ku ikubitiro bari barabwiwe ko iyo sosiyeti igiye gukora umushinga wo kubaka hoteri ku musozi w’Ijuru rya Kamonyi ; nyuma babihinduramo kubaka amacumbi mu mudugudu wa Rugazi mu Kagari ka Ruyenzi, ariko nta na kimwe cyakozwe.

Nzamwita ati «Hashize imyaka isaga 10 dutegereje ko ayo mafaranga yakoreshwa. Ntabwo twiyumvisha gutegereza ikintu nk’utegereje umukiza. Itsinda mpagarariye ry’abafite ubumuga turasaba gusubizwa umugabane wacu n’inyungu yabyaye muri iyo myaka yose ».

Mu nama ubuyobozi bukunze kugirana n’abaturage, bagaruka kuri icyo kibazo cy’imigabane yatanzwe muri KIG . Ndetse Umuyobozi w’Akarere, Udahemuka Aimable, atangaza ko hari n’abamuterefona bakimubaza, akaba abizeza kuzatumiza Ihuriro ry’Abanyakamonyi bakagikemura.

Ati «Ariko mbere yaho tuzakora Inama Njyanama kugira ngo twige ku cyo ayo mafaranga yakoreshwa, kugira ngo turebe ko abanyamigabane hari icyo ibungura».

Biragoye kumenya umubare w’abanyamigabane ba KIG kuko uretse abaturage baciriritse bagaragaza ko ababaje, ariko hari na bamwe mu bakozi b’akarere n’abayobozi bashoyemo ariko bo iyo uganiriye na bo hari abakubwira ko barangije kuyaheba.

Mu nama y’Ihuriro ry’Abanyakamonyi iheruka kuba muri Kamena 2012, bari bagaragaje ko KIG yashowemo miliyoni 70 z’amafaranga y’u Rwanda, bakaba bari bategereje ko agera kuri miliyari ngo babone kugira igikorwa bayashoramo.

Iki gihu gitwikiriye umuhanda ni ivumbi ritumuka iyo hari ikinyabiziga kihanyuze. Awukoresha n’abawuturiye baravuga ko rikabije.

Uyu muhanda ukorwa hifashishijwe ibikorwa rusange bya gahunda y’iterambere ry’umurenge “VUP”. Abakozi ba VUP basiba imikuku yacitse mu muhanda bakanasibura imiferege yo ku ruhande.

Abakoresha uyu muhanda bafite ikibazo ku bitaka imodoka zimenamo zibikuye ahasizwa ibibanza byo kubaka, bakaba bavuga ko bitandukanye n’itaka rivanze n’amabuye (laterite), risanzwe rikoreshwa mu gutsindagira imihanda.

Umwe mu banyonzi bakorera i Gihara, ahamya ko imikuku yagabanutse, ariko bashyizemo ibitaka byongera ivumbi. Ati “Dufite ikibazo cy’ivumbi muri uyu muhanda kubera itaka bamennyemo. Ni itaka ridakomeye, ntabwo ari ‘laterite’. Ahubwo imvura nigwa, rizanyerera.”

Abacururiza ku mabutiki yegereye umuhanda, bavuga ko ivumbi ribangiriza ibicuruzwa, cyane cyane amafu n’ibinyobwa.

Iyo ikinyabiziga gitambutse, ivumbi riratumuka.

Umwe muri bo agira ati “Iyo ibikamyo bihise, ivumbi riratumuka cyane rigahita ryivanga n’ifu ku buryo twaretse kuyicuruza ngo bitaduteranya n’abakiriya.”

Abaturage bashima igitekerezo cyiza abayobozi bagize cyo kubakorera umuhanda, ariko bagasaba ko bajya bakurikirana abo bahaye akazi kugira ngo bagenzure niba badasondeka.

Umwe muri bo ati “Wabigira ute se ko ubona babimennye (ibitaka)? Keretse buriya nk’umuyobozi uba wabahaye akazi, ni we wababwira ngo nibabisubizeyo. Umuturage we nta kintu yavuga.”

Umuyobozi w’Akarere ka Kamonyi Wungirije ushinzwe Iterambere ry’Ubukungu, Tuyizere Thadee, avuga ko abaturage bakwiye kwishimira ko umuhanda ugendeka utakirimo imikuku. Hakaba hagiye gutekerezwa uburyo wajya umenwamo amazi.

Umuhanda wa Ruyenzi - Gihara - Nkoto urimo gukorwa na gahunda ya VUP.

Ku kibazo cy’itaka rishyirwa mu muhanda, Tuyizeye ahamya ko ari laterite. Ati “Ibijyanye no kuba hashyirwamo itaka ritari laterite, icyo numva atari cyo. Wenda barimo kubona ivumbi bakibwira ko ridaturuka muri laterite, ariko ni laterite dusanzwe dukoresha imihanda.”

Hashize igihe, bivugwa ko uyu muhanda uzashyirwamo kaburimbo; ariko Tuyizere atangaza ko akarere katabona ubushobozi bwo kuwikorera kuko watwara agera kuri miliyari 10 z’amafaranga y’u Rwanda.

Cyakora ngo batse inkunga ku rwego rw’igihugu, mu gihe bagitegereje, ukaba ukorwa bijyanye n’ubushobozi bw’akarere.

Umuhango wo kwibuka abana bazize Jenoside biciwe i Nyarubaka muri Kamonyi.

Tariki 17 Kamena 2016, Inama y’Igihugu y’Abagore yibukiye abagore n’abana bazize Jenoside yakorewe Abatutsi mu Murenge wa Nyarubaka, ahiciwe abana b’abahungu basaga 75 bakajugunywa mu cyobo kiri ahitwa mu Gitega, mu Kagari ka Ruyanza.

Aba bana bishwe bambuwe ababyeyi babo bari kumwe berekeza i Kabgayi, baturutse ku Kigo Nderabuzima cya Musambira, ahari hamaze kwicirwa abagabo.

Bakayirere Odette, umwe mu babyeyi banyuze iyo nzira, avuga ko icyari giteye agahinda kurusha ari umugore w’Interahamwe wagize uruhare mu kwambura ubusa abana ngo arebe ko ari abahungu kandi na we afite ibibondo.

Yagize ati “Kubona umugore ufite abana b’ibitambambuga bashimishije bamuteye imbabazi, akaba ari we wagize uruhare mu kutwicira abana! Ubwo rero babwiye ababyeyi ngo nibihambire abana kuko bari bagiye babajugunya mu cyobo bataranoga, umubyeyi ufashe isuka ngo ashyireho igitaka bikamunanira”.

Abana bitabiriye kwibuka bagenzi babo ari benshi.

Umuhuzabikorwa w’Inama y’Igihugu y’abagore, Mukanyandwi Rose, asaba ko buri wese yibona nk’Umunyarwanda aho kwibona mu moko kandi ababyeyi bagaharanira guha abana babo amasomo meza abafasha kugira uruhare mu kubaka ubumwe bw’Abanyarwanda.

Ati “Haracyari bamwe imitima itari yaba uko igihugu cyacu kibishaka. Aho abantu bakigaragaza ingengabitekerezo ya Jenoside mu bikorwa no mu magambo, ibyo bikaba bigaragaza ko inzira ikiri ndende”.

Kurinda amacakubiri mu bana kandi byagarutsweho n’Umuyobozi w’Akarere ka Kamonyi Wungirije ushinzwe Ubukungu, Tuyizere Thadee, wasabye ababyeyi n’abarezi gutanga urugero rwiza ku bana.

Ati “’Uwiba ahetse abab abwiriza uwo mu mugongo’. Uru rubyiruko ni twe tugomba kururinda, tugomba rero kwirinda uwabazanaho ingengabitekerezo ya Jenoside”.

Perezida wa Ibuka mu Karere ka Kamonyi, Murenzi Pacifique, yashimiye Inama y’Igihugu y’Abagore n’Ihuriro ry’Abana bahuje igitekerezo cyo kwibuka abazize Jenoside , kandi anahamagarira buri wese kurwana urugamba rwo guhangana n’ingengabitekerezo ya Jenoside.

Minisitiri Biruta ashyikiriza umuturage icyangombwa cye cy’ubutaka.

Yabitangaje tariki 15 Kamena 2016, ku munsi wa gatatu w’icyumweru cyahariwe ubutaka ; ubwo yasuraga serivisi ziri gutangwa n’Ibiro by’Ubutaka mu Ntara y’Amajyepfo, biri gukorera mu Murenge wa Runda ho mu Karere ka Kamonyi.

Mu minsi ibiri Ibiro by’Ubutaka mu Ntara y’Amajyepfo bimaze gukora ibyangombwa by’ubutaka 346, mu gihe ubusanzwe umwanditsi w’impapuro mpamo ku rwego rw’umurenge yakoreraga abagera kuri 30 buri wa gatatu w’icyumweru kandi na bo ibyangombwa bakazabihabwa nyuma y’ibyumweru bitatu cyangwa ukwezi.

Minisitiri Biruta avuga ko u Rwanda ari igihugu cy’intangarugero muri Afrika y’iburasirazuba mu birebana no kwandika ubutaka, ariko imbaga y’abantu bitabira ibikorwa by’ubutaka mu cyumweru kimwe, ngo yerekana ko hakiri inzira ndende.

Yagize ati “Ubundi serivisi z’ubutaka zegerejwe abaturage kuri buri murenge hari ababishinzwe ndetse n’ibikoresho byaratanzwe. Bikaba bivuga ngo ibingibi byazinduye abaturage benshi bagana hano uyu munsi, kandi si hano honyine (….) bivuga ko izi serivisi batazibona ku buryo bwa buri munsi ku rwego rw’umurenge ”.

Abaturage bafite ibibazo by’ubutaka bari benshi.

Akomeza avuga ko kugira ngo serivisi zigende neza, Minisiteri ahagarariye igiye gukorana na Minisiteri y’Ubutegetsi bw’Igihugu n’uturere, hakazabaho umwanya wo gusanga abaturage mu tugari bagahabwa servisi.

Serivisi ziri guhabwa abandikishije ubutaka ntibahabwe ibyangombwa n’abakora ihererekanya. Nkurikiyinka Jean Damascene, wo mu Kagari ka Bitare, Umurenge wa Karama, avuga ko yabaruje ubutaka muri 2011, ariko ntahabwe icyangombwa kubera ko yari yarataye indangamuntu, aho aboneye indi akabazwa icyemezo cy’uko yasezeranye, asiragira mu buyobozi agishaka arakibura.

Ati “Nari narasiragiye naniwe ndabyihorera. Hano naje mbereka agapapuro bampaye babarura bahita bakinkorera none ndagicyuye”.

Uretse kwandika no guhindura ibyangombwa by’ubutaka, umwanditsi w’Impapuro Mpamo z’Ubutaka ku rwego rw’umurenge, afite n’inshingano zo gupima ubutaka no kububarura, ndetse akaba ari na we ukurikirana ibikorwa remezo n’imiturire mu murenge.

Umumotari udatwara moto ye, imwanditseho, ntiyemerewe gusabirwa ibyangombwa na koperative.

Nyuma y’uko Koperative isabwe n’ikigo ngenzuramikorere cy’imirimo ifitiye igihugu akamaro, RURA, gusabira uburenganzira bwo gukora abanyamuryango batwara moto zibanditseho gusa; byateje umwirane mu banyamuryango ba COCTAMOKA kuko muri 240 ababarirwa muri 98 ari bo bonyine ko bujuje ibisabwa.

Bamwe mu bamotari batangiranye na koperative batabashije kubahiriza iryo tegeko rishya, bafite ikibazo cy’uko bahise basa n’abirukanwe kandi baratanze imigabane koperative yahereyeho yiyubaka.

Uwitwa Musonera Valens avuga ko yatanze umugabane w’ibihumbi 50 Frw bakiri ishyirahamwe mu mwaka wa 2007, atanga ibindi bihumbi 30frw babaye koperative ; none ubu ngo nta burenganzira afite kuri koperative.

Mu nama rusange yahuje abanyamuryango bose kuri uyu wa kabiri tariki 14 Kamena 2016, Musonera abaza ubuyobozi bwa koperative icyo bumuteganyiriza mu gihe atakirimo kwitwa umunyamuryango wayo kandi yaratanze imigabane.

Ati “Kugeza uno munsi murimo kumbwira ngo si ndi umunyamuryango kandi naratanze imigabane, ngo ni uko nta moto mfite. Ese muranteganyiriza iki?”

Mu banyamuryango ba COCTAMOKA 240 abagera kuri 98 ni bo bujuje ibisabwa abandi bakaba bibaza uko bizagenda.

Iki kibazo agihuriyeho n’abandi banyamuryango basaga 70 [imibare itangwa na Perezida wa Koperative], bose bibaza niba ubukene bwabo bugomba kubabuza uburengenzira muri koperative bagize uruhare mu gushinga.

Uwitwa Hakizimana Theoneste, ati “koperative yajemo abashoraamari batazi no gutwara moto ariko baziguze. Twe turagira ngo izatumenyeshe ko umuntu udafite amafaranga menshi yo kugura moto, atemerewe kuba umunyamuryango wa koperative!”

Prezida wa COCTAMOKA, Bizimana Jean Baptiste, nubwo adahakana ko abo banyamuryango hari icyo koperative ibagomba, ariko ntanemera ko bakiri abanyamuryango ba koperative kuko batujuje ibyo basabwa.

Ati “Ntabwo ari abanyamuryango ba koperative , cyakoze turateganya gukora ihererekanya kugira ngo badakomeza kwiyita abanyamuryango bafite uruhare mu bikorwa byose bya koperative kandi batujuje ibisabwa”.

Bazumutima Pierre Claver , Umukozi ushinzwe Amakoperative mu Murenge wa Gacurabwenge iyi koperative iherereyemo, ahamya ko kuba abo banyamuryango batarasezerewe cyangwa ngo koperative ya mbere iseswe, bagifite uburenganzira muri koperative.

Inama y’Igihugu y’abagore irasaba abagore bahagarariye abandi kubazamura.

Kamanzi yabisabye abagore bahagarariye abandi mu Karere ka Kamonyi mu ihuriro rusange ryabaye tariki 10 Kamena 2016. yabasabye kwegera abagore mu midugudu bagafatanya gukemura ibibazo bikibangamira iterambere ryabo.

Yavuze ko muri manda zatambutse, Inama y’Igihugu y’Abagore yagiye inengwa kutagaragaza ibikorwa bihindura imibereho y’Umunyarwandakazi, bikagera n’aho umugore ahohoterwa hakagaragara izindi nzego ariko CNF ntihagaragare.

Yagize ati “Hari n’inama CNF yagiranye n’abanyamakuru mbere y’uko haba amatora, ariko batunenze bikomeye ko mu bibazo bijya biba ku mugore, babona abandi bose, keretse inama y’igihugu y’abagore.”

Abagore bahagarariye abandi muri Kamonyi bavuga ko bazabegera mu midugudu.

Nubwo ibyo byanenzwe komite za CNF zacyuye igihe, Kamanzi arasaba ko abatowe muri Gashyantare 2016, bahindura imikorere, bakareka guhagararira abagore ku izina gusa.

Abagore bari mu nama njyanama y’akarere basabwe kugira uruhare mu kugena ikoreshwa ry’ingengo y’imari y’akarere.

Kamanzi ati “Abagore barengeje ½ cy’abaturage b’akarere, kuki muri miliyari 9 ziteganyijwe mu ngengo y’imari y’akarere, abagore badafitemo byibuze umushinga wa miliyoni 50?”

Abagore bahagarariwe na bo banenga abo batoye kutabegera. Uwitwa Kanakuze Josee, wo mu Murenge wa Gacurabwenge, ati “Byaba byiza bagiye basura ingo zacu bakamenya ibiberamo kuko hari abahohoterwa. Dukeneye no gufashwa kugera ku iterambere nk’abandi.”

Mukanyandwi Rose, Umuhuzabikorwa wa CNF mu Karere ka Kamonyi, avuga ko komite nshya zatowe ziteguye kwegera abagore mu mudugudu, bakabafasha kugera ku mahirwe y’iterambere.

Ati “Icyo dushaka ni ukugaragaza bamwe mu bagore biteje imbere, abandi bakabigiraho kandi twiteguye ko ijwi ry’Inama y’Igihugu y’Abagore ryumvikana aho umugore ari hose.”

Ifu y’ubugari yiswe "Shira umuteto."

Bamwe muri aba baturage bavuga ko iyo fu ituruka mu mahanga nka Uganda na Tanzania, itameze nk’iy’imyumbati ihingirwa mu Rwanda. Igura 350frw ku kilo, mu gihe ifu y’imyumbati yo mu Rwanda igura 450frw na 500frw.

Icyo kinyuranyo ntikiri mu biciro gusa, ahubwo ngo n’ubugari bwarikwa muri ayo mafu buratandukany, nk’uko uwitwa Mukamana umwe mu bayitetseho abivuga.

Agira ati “Ubugari bw’iyo fu usanga burimo umucanga, ibiti ndetse n’iyo ubwaritse buratema.”

Mukamana avuga ko nta muturage n’umwe ugura iyo fu ayikunze, ariko kuba ihendutse iragurwa cyane.

Ubusanzwe ahacururizwa ifu mu masoko agize amasantere naho hashobora gutera umwanda.

Ati “Abaturage babona igura macye akaba ariyo birukiraho kuko hari umugani bajya baca ‘ngo aho gupfa none wapfa ejo.’ Ibyo rero nibyo bituma batayireka bagashira imiteto.”

Biragoye kumenya imvano y’isuku nke, ivugwa muri iyo fu kuko abakura imyumbati mu mahanga bayishesha bakagurisha ifu.

Mukashema Annonciata, umukozi ushinzwe isuku n’isukura mu Karere ka Kamonyi, atangaza ko ikibazo cy’iyo fu atigeze akimenya. Avuga ko kumenya ubuziranenge bw’ifu bigorana ahubwo babanza kureba imyumbati.

Ati “Nk’iyo tubonye imyumbati yatoye uruhumbu, iyo iba yatera ingaruka ku bantu bayiriye. ariko iyo yarangije kuba ifu yo ntago washobora kubona ikibazo keretse yapimiwe mu ruganda.”

Mukashema avuga ko ku rwego rw’akarere hari komite y’isuku igenzura byibuze rimwe mu cyumweru isuku mu masanteri no mu masoko.

Gusa iyo ugeze mu masoko uhasanga amafu acururizwa hasi cyangwa akavangwa n’ibindi bicuruzwa, ku buryo ashobora kwandura.

Perezida w’Inama y’Ubutegetsi y’iyi koperative yo kubitsa no kuguriza, Nsengiyumva Pierre Claver, atangaza ko ubugenzuzi buheruka gukorwa bwasanze umwe mu bakozi bakira amafaranga (Cashier) witwa Mushimiyimana Beatrice, yaranyereje amafaranga y’u Rwanda asaga ibihumbi 600.

Umukozi wa Sacco y’Umurenge wa Ngamba yatahuweho kunyereza asaga ibihumbi 600FRW.

Ubwo bujura ngo abagenzuzi babugaragarijwe n’umucungamutungo w’iyi SACCO, Nsengiyumva akaba ahamya ko nta gikuba cyacitse kuko ibyabaye byamenyekanye hakiri kare kandi uwo mukozi akaba yahise abyemera agasaba imbabazi.

Ati “Uwo mukozi arabyemera kandi arasaba imbabazi akavuga ko azishyura. Ibyo ari byo byose tugomba kumufatira icyemezo nka Komite ya Koperative, tukazamenyesha abanyamuryango.”

Bamwe mu banyamuryango ba SACCO ya Ngamba bumvise iby’uwo mukozi, bashima abagenzuzi kuko bakoze neza umurimo wabo bakagaruza amafaranga yari yibwe atarazimira, ariko ntibifuza ko uwo mukozi yakomeza kubakorera kuko hari impungenge z’uko yazongera gukora mu mafaranga.

Umwe muri bo aragira ati “ Ni byiza ko abayobozi bacu bamutahuye atarayatorokana, ariko byaba byiza uwo mukozi bamusimbuje undi, hato atazongera kwitiza amafaranga yacu.”

Perezida w’inama y’ubutegetsi arizeza abanyamuryango ko Koperative yabo ihagaze neza, kandi ko ubugenzuzi bugikomeje kugira ngo harebwe ko nta handi haba harakozwe ubujura.

Ibi babiganirijwe mu nama rusange yabaye kuri uyu wa 7 Kamena 2016, basabwa gukora imishinga bakegera ibigo by’imari bikabaha inguzanyo badahangayikishijwe n’aho bakura ingwate kuko ikigega cya BDF kizajya kibishingira.

Abahagarariye abafite ubumuga mu mirenge basabwa gukangurira bagenzi babo kwihangira imirimo.

Hari abafite ubumuga bafite ingeso yo gusabiriza bitwaje ko ntacyo bashoboye gukora. Inama y’Igihugu y’Abafite Ubumuga ntishyigikiye iyo myumvire, ahubwo ibahugura mu myuga itandukanye ngo bagire ubumenyi bw’ibyo bashobora guhangamo umurimo.

Tuyizere Oswald, Umuyobozi mu Nama y’Igihugu y‘Abafite Ubumuga ushinzwe Kubaka Ubushobozi, avuga ko nyuma yo kubaha amahugurwa mu myuga, kuri ubu bari gukangurirwa kwihangira imirimo kdi n’abagisabiriza hariho gahunda yo kubakura mu muhanda.

Ati “Abafite ubumuga barashoboye nk’abandi bantu mu gihe bakuriweho inzitizi. Ubwo rero nitumara kubakuriraho inzitizi zijyanye no kubura igishoro, kubura ingwate cyangwa kubura aho bakorera, tuzabubakamo icyizere ku buryo bazatera imbere nk’abandi bantu bose.”

Tuyizere asaba abantu bafasha abafite ubumuga basabiriza kureka kubaha ibiceri, ahubwo akabahamagarira gushyigikira gahunda zo kubakura mu muri uwo mwuga ugayitse.

Tuyizere Oswald, Umuyobozi mu Nama y’Igihugu y’Abafite Ubumuga ushinzwe Kubaka Ubushobozi, avuga ko hari gahunda yo gukura ku mihanda abafite ubumuga basabiriza.

Abahagarariye abafite ubumuga mu mirenge y’akarere ka Kamonyi batangaza ko abageze ku rwego rwo kwihangira imirimo ari abagize amahirwe yo kwiga imyuga n’abandi bafite impano, hakaba hakenewe umusanzu wo kwegera abo bakiri mu muhanda basabiriza.

Uwimana Alphonse, Umuhuzabikorwa w’Inama yIigihugu y’Abafite Ubumuga mu Murenge wa Ngamba, ati «Bariya birasaba kwegerwa tukabanza tukabumvisha yuko gusabiriza si umwuga. Buriya wize umwuga gusabiriza biba bicitse kandi gusabiriza ni ugusebya abafite ubumuga.»

Muri 2015, mu Karere ka Kamonyi Inama y’Igihugu y’Abafite Ubumuga yari yahuguye mu myuga abafite ubumuga bagera ku 185, ibafasha no gushinga amakoperative hakurikijwe ibyo bize, ariko gukorera hamwe byarananiranye kuko aya makoperative yagombaga guhuriza hamwe abantu baturuka mu mirenge itatanye.

Bimwe mu bihangano by’Abanyarwanda.

Abacuruza n’abakora ibikorwa by’ubukorikori bibumbiye mu ishyirahamwe “RAPESH” rikorera ku Kimihurura mu Karere ka Nyarugenge, bavuga ko Abanyarwanda badaha agaciro ibihangano bikorerwa iwabo, bigatuma abazi kubikora batabigira umwuga.

Gasake Isaac, Perezida w’iri shyirahamwe, ahamya ko abaguzi b’Abanyarwanda babona ari bake. Ati “Ubona batabigura nk’uko bagura ibikorerwa hanze, tukibaza impamvu kandi ibihangano byacu ari byiza, bifite uburambe kandi bikomeye.”

Kutizera isoko ku Banyarwanda, ngo bituma abanyabukorikori bakora ibihangano bike kuko babivanga n’indi mirimo ibafasha kubona ibibatunga.

Ibihangano bimwe biba bigaragaza umuco n’amateka by’u Rwanda.

Gasake, ati “Ibyo bituma abahanzi bacu bakora ibintu bahita bagurisha ako kanya. Ntago bashobora gukora ‘sitoke’ (stock).”

Ku bufatanye n’urugaga rw’abikorera PSF, ibihangano nyarwanda bijya ku masoko yo hanze. Gasake avuga ko kuri ayo masoko ibihangano by’Abanyarwanda bikunzwe ariko ngo ni bike. Ati “Mu bwiza ibihangano byacu birakundwa, ariko ni bikeya.”

Imwe mu mbogamizi ituma Abanyarwanda batagura ibihangano by’iwabo n’uko bihenda ugereranyije n’ibiva mu mahanga. Gasake avuga ko impamvu bidahuza ibiciro, ari ibikoreresho ibyo mu Rwanda bikorwamo kandi n’umwanya bitwara mu kubikora ukaba ari munini.

Gasake Isaac, Perezida wa RAPESH.

Rugangura Alphonsine, ukora inigi mu masaro agacuruza n’ibindi bihangano by’Abanyarwanda, avuga ko Abanyarwanda bagifite imyumvire iri hasi muri uru rwego.

Ati “Abakiriya bacu b’Abanyarwanda ntibatekereza ku gihe umuntu aba yamaze akora icyo gihangano. Abanyamahanga usanga ari bo bishimira ibintu byacu.”

Abanyabukorikori bishimira gukorera hamwe kuko byabafashije kumenyakanisha ibikorwa byabo. Umuhoza Solange utera amabara mu myenda, avuga ko byamufashije gucururiza ku masoko yo hanze.

Ati “Nkanjye ubwanjye sinari kuzabona uburyo bwo kujyana ibintu hanze ariko ishyirahamwe ridufasha kwitabira amamurikagurisha mpuzamahanga.”

Ishyirahamwe RAPESH ryatangiye gukora muri Gicurasi 2015, abaririmo biganjemo Abanyakigali, ariko ngo riritegura kugaba amashami mu tundi turere.

Ku masoko yomu mahanga bashima ubwiza bw’ibihangano Nyarwanda.

Bavuga ko bafite icyizere cy’isoko ry’ibihangano kubera gahunda ya Leta yo gushishikariza abantu gukoresha ibikorerwa iwabo “Made in Rwanda”.

Ubucukuzi bw’amabuye bwanduje amazi y’umugezi wisuka muri Nyabarongo.

Abaturiye imigezi yisuka muri Nyabarongo ituruka mu mirenge ya Rukoma na Kayenzi mu Karere ka Kamonyi icukurwamo amabuye y’agaciro, bahamya ko amazi y’iyo migezi yahinduye isura agaa n’ibiziba kandi yari urubogobogo.

Bavuga ko umugezi wa Nyamagana wandujwe n’amazi n’imicanga bituruka mu bucukuzi bwo mu Murenge wa Rukoma kandi bakaba bavoma amazi y’uwo mugezi.

Abaturage bafite impungenge z’uko umaze kuzura ibitaka n’imicanga ku buryo iyo imvura yabaye nyinshi urengera mu mirima y’abaturage.

Kabiligi wo mu Murenge wa Ngamba, aho Nyamagana inyura ijya kwisuka muri Nyabarongo, ati “Mbere y’uko hakorwa ubucukuzi, amazi yari nko muri metero eshatu z’ubujyakuzimu, none ubu aringaniye n’imirima. Abacukuzi nibadafatirwa ingamba, azarengera.”

Amazi ya Nyamagana ni ibiziba kubera ubucukuzi bw’amabuye.

Umunyamabanga wa Leta muri Minisiteri y’Umutungo Kamere, ushinzwe ubucukuzi bwa mine na kariyeri, Imena Evode, ubwo yasuraga abacukuzi bo mu Murenge wa Kayenzi muri Mata 2016, yabibukije ko hari ibihano biteganyirijwe abacukura bangiza ibidukikije.

Ati “Ntago abacukuzi bose cyane cyane bano baturiye Nyabarongo, barashyira umutima ku kurengera ibidukikije. Twababwiye icyo amabwiriza ateganya kandi hari n’ingamba zifatwa, abatubahirije amategeko bagahanwa. Mu bihano harimo no gufungwa.”

Yabagiriye inama y’uburyo bashobora gucunga amazi bayungururisha imicanga aho kuyayobora mu migezi, bakayacukurira ibyobo yisukanuriramo, maze bakayakoresha inshuro nyinshi, kandi ahamya ko bidahenze. Ati “Bashyizemo ubushake bakora ibyobo byo gupenyereramo (kuyungurura) kandi ntago bihenze.”

Mu byangombwa bihabwa umucukuzi w’amabuye y’agaciro, asinya amasezerano ko azabungabunga ibidukikije by’aho akorera ubucukuzi.

Bigiramumaro Alphonse ukorera ubucukuzi mu murenge wa Kayenzi, atangaza ko yemera agatunda imicanga akajya “kuyipenyera” kure y’aho acukurira ngo hatagira amazi amucika akajya muri Nyabarongo.

Ishuri ry’inshuke rya Mushimba ryahawe inkunga n’abakorerabushake b’Abanyakoreya.

Mu karere kose habarurwa amashuri y’inshuke agera ku 108. Amenshi yubatswe ku nkunga y’ubudehe leta yahaye abaturage muri 2006. Akoresha ingengo y’imari y’umusanzu w’ababyeyi uri hagati ya 1.500frw na 2.000frw ku kwezi bitewe n’aho ishuri riherereye.

Ayo mafaranga niyo avamo umushahara w’abarimu n’abakora isuku ku ishuri n’ibikoresho birimo ingwa, impapuro n’amakaramu.

Uretse amashuri afite inkunga z’abafatanyabikorwa, ahandi bavuga ko uwo musanzu udahagije ngo ishuri ribone ibikenewe byose.

Kayirangwa Marie Rose, umwarimu mu ishuri ry’inshuke rya Bukimba riherereye mu Kagali ka Gihara, Umurenge wa Runda, ryigamo abana 38 biga mu wa mbere no mu wa kabiri, bafite abarezi batatu, risaba umusanzu wa 5.000frw ku gihembwe.

Abafashwa n’abafatanyabikorwa bafite ibikoresho.

Agira ati “Nk’ibikoresho abana bakinisha, ibikoresho by’imyuga, akabati ko kubikamo ibikoresho, byose ntabyo dufite”.

Ishuri riri mu mudugudu wa Nyamugari, akagari ka Nkingo, umurenge wa Gacurabwenge, rifite abana bagera kuri 50, abiga mu mwaka wa mbere, abo mu wa kabiri n’abo mu wa gatatu bose bahurira mu shuri rimwe, bakigishwa n’umwarimu umwe.

Umusanzu w’ababyeyi ni 3.750frw. Ababyeyi bishimira ishuri rifasha abana kugira ubumenyi mbere yo gutangira amashuri abanza ariko basaba leta kububakira irindi shuri kugira ngo buri cyiciro cyigire ukwacyo.

Ishuri rya Bukimba ryo umusanzu w’ababyeyi ntuhagije ngo ibikenewe biboneke.

Abarimu bo muri aya mashuri kandi batangaza ko bafite ubumenyi buke ku nteganyanyigisho igenewe uburezi bw’inshuke kuko nta mahugurwa bahabwa.

Uyizeye Francoise, wigisha ku ishuri ry’inshuke ry’umudugudu wa Mushimba mu Murenge wa Gacurabwenge, akagari ka Kigembe, ati “Byaba byiza mu gihe habaye amahugurwa y’abarimu bo mu mashuri abanza, bagiye batwibuka kuko ari twe dutegura abayajyamo.”

Nzeyimana Jean Claude, ushinzwe uburezi bw’amashuri y‘inshuke, avuga ko amashuri y’inshuke ari mu maboko y’ababyeyi, ariko leta iyafasha mu nteganyanyigisho no guhugura abarimu.

Ati “Habaye hari ishuri rifite umwarimu utarahugurwa twafatanya agahugurwa.”

Depite Umukobwa Justine yabisabye urubyiruko ubwo bibukaga ku nshuro ya 22 Jenoside yakorewe Abatutsi mu 1994 igikorawa cyabereye mu Murenge wa Mugina, kuri uyu wa gatanu tariki 20 Gicurasi 2016.

Urubyiruko mu rugendo rwo kwibuka.

Yagize ati “Kuva kera ubutegetsi bwabanje bwagiye bwigisha Abanyarwanda amacakubiri ashingiye ku moko, Abatutsi babuzwa uburenganzira mu gihugu cyababyaye.

Izo nyigisho zuzuyemo ingengabitekerezo ya Jenoside, nizo zatumye abatutsi barenga miliyoni bicwa muri 1994.”

Yababye urubyiruko kwirinda uwo ari we wese warushuka akarugarura mu mwiryane, kwirinda ibitekerezo bya bamwe mu babyeyi babiba imbuto y’urwango mu bana.

Hon. Justine ashyira indabo ku mva.

Umuyobozi w’Akarere ka Kamonyi, Udahemuka Aimable yavuze ko imbaraga z’urubyiruko zishobora kwangiza no kwica iyo zikoreshejwe nabi cyangwa zigakiza iyo zikoreshejwe neza.

Ati “Muri imbaraga z’igihugu ni mwe rero dutezeho byinshi kugira ngo dukomeze dutere imbere kandi nimwe mugomba gutanga umurongo tugomba kugenderaho.”

Umuhango witabiriwe n’abayobozi batandukanye.

Mukantembe Judith, umwe mu barokotse jenoside yakorewe Abatutsi, yavuze ko muri Jenoside yabuze abavandimwe, inshuti n’imiryango; ariko afite icyizere cy’ubuzima bw’ejo hazaza kubera ubuyobozi bushyira imbere inyungu z’abaturage.

Uyu muhango kwibuka urubyiruko rwazize Jenoside ku rwego rw’Akarere ka Kamonyi waranzwe n’urugendo rwo kwibuka, gushyira indabo ku mva ku rwibutso rw’abazize Jenoside yakorewe abatutsi rwa Mugina mu rwego rwo kunamira inzirakarengane zihashyinyuye.

Iyo uwabisinze ageze mu rugo ngo bimutera imyitwarire idahwitse, nk’uko bamwe mu batuye mu mu Murenge wa Nyarubaka mu karere ka Kamonyi babitangarije mu nama bagiranye na polisi y’igihugu, kuri uyu wa gatatu tariki 18 Gicurasi 2016.

ACP Nkwaya Francis aganira n’imwe mu miryango yo muri Nyarubaka.

Abitabiriye ibiganiro bagera kuri 90, bagaya imyitwarire y’ubusinzi, kunywa ibiyobyabwenge n’ubuharike kuko ituma habaho ihohoterwa.

Batanze urugero rw’umugabo wirirwa aho benga Kanyanga, umugore agakorera urugo wenyine umugabo yataha akiyenza ku mugore akamukubita, nk’uko umwe mu bagoreyabitangaje.

Ati “Ndabona ikibazo cy’ihohoterwa gihari, gishingiye ku bagabo bibera mu biyobyabwenge ukabona iby’urugo ntacyo bitayeho. Ukabona ibibazo byose by’urugo bisigaye bireba umudamu.”

Abagabo nibo batunzwe agatoki kuba intandaro y’ihohoterwa. Rwabigwi Jean Marie Vianney, wo mu Kagari ka Ruyanza, nawe ahamya ko akenshi abagabo ari bo bakurura amakimbirane kuko aribo bajya mu kabari cyane.

Ati “Yego n’abagore bajya mu tubari bahakura ingeso mbi, ariko bo ni bake. Abagabo rero usanga ari bo bajya mbere kuko dukunze kwishyira hejuru, tukavuga y’uko ari twe tugomba gufata ibyemezo n’iyo twaba dufite amafuti nk’ubusinzi no gucana inyuma, aho kugira ngo duce bugufi tuganire.”

Umurerwa Marie ushinzwe uburinganire n’iterambere ry’umuryango mu karere, ntahamya ko intandaro y’ihohoterwa ituruka ku mugabo bonyine kuko ngo ishobora no kuva ku bagore.

Ati “Duha umwanya abagore bakatubwira aho abagabo bababanira nabi, n’abagabo tukabaha ubwisanzure bwo kwicyebuka no kwerekana intandaro, tugamije kugera ku mwanzuro wadufasha ko uwabikoraga yikosore.”

Umurerwa avuga ko mu karere hose hari imiryango isaga 500 ibana mu makimbirane yagaragarijwe. Akavuga ko bifite ingaruka zirimo gutandukana kw’abashakanye, abana b’inzererezi no kudindira mu iterambere.

Umuyobozi wa Polisi mu Ntara y’Amajyepfo, ACP.Francis Nkwaya yabasabye kugira ubushishozi bakirinda amabwire kuko nayo agira uruhare mu kubasenyera.

Mu gusoza icyumweru cyahariwe ubufasha mu by’amategeko, abaturage benshi bagaragaje ko bafite ikibazo cyo kutarangirizwa imanza.

Babitangaje ubwo icyumweru cyahariwe ubufasha mu by’amategeko ku rwego rw’Akarere ka Kamonyi cyasorezwaga mu Murenge wa Rukoma, kuri uyu wa Gatanu tariki 13 Gicurasi 2016.

Abenshi mu bitabiriye ibiganiro ku mategeko byatanzwe n’Umuhuzabikorwa w’Inzu y’Ubufasha mu by’Amategeko (MAJ) n’umukozi w’Umuryango Nyarwanda uharanira Iterambere ry’Abaturage (RISD), bagaragaje ko basiragizwa n’abanyamabanga nshingwabikorwa b’utugari n’imirenge.

Aba babanyamabanga nibo bakora nk’abahesha b’inkiko batari ab’umwuga, bafite inshingano zo kubarangiriza imanza.

Ndayisaba Faustin yavuze ko afite urubanza yatsinze mu 2001, akomeza gusiragira asaba ko rurangizwa, ntibyakorwa.

Mu 2015 hafashwe icyemezo cy’ifatira ry’imitungo y’abo baburanye akabatsinda, ariko ngo yageze mu kagari baramuringana, none n’iyo ageze imbere y’Umunyamabanga Nshingwabikorwa w’Umurenge wa Rukoma, aramusiragiza.

Ati "Namaze kubatsinda muri 2001, nteza kashe mpuruza, bampa ubutaka, ariko indishyi z’amafaranga asaga ibihumbi 200 ntago bayampaye.

Ubu nazanywe ahangaha n’icyemezo cy’ifatira mu masaha 24, cyatanzwe mu kwezi k’Ugushyingo 2015, ariko iyo ngeze imbere y’umuyobozi w’umurenge, arambwira ngo nzagaruke."

Umuhuzabikorwa wa MAJ asobanurira abaturage amategeko.

Umuhuzabikorwa w’Inzu y’Ubufasha mu mategeko (MAJ) mu Karere ka Kamonyi, Umwari Pauline, atangaza ko abanyamabanga nshingwabikorwa b’utugari n’ab’imurenge bagira inshingano nyinshi, ikaba ari yo mpamvu ishobora gutuma batihutisha kurangiza imanza z’abaturage.

Yagize ati “Urumva umuturage agejeje urubanza kwa gitifu ufite isuzuma ry’imihigo, ntago yabyuka ajya kurumurangiza kandi na we afite icyo gikorwa kimureba.”

Yasabye abaturage kujya barangiza imanza ku neza, ariko ngo aho babonye barangaranywe n’inzego z’ibanze, bakiyambaza MAJ kuko na yo ifite ububasha bwo kurangiza imanza z’abakene bari mu cyiciro cya mbere n’icya kabiri, abandi ikabarangira abahesha b’inkiko b’umwuga.

Kutarangiza imanza nk’ikibazo abaturage banenga inzego z’ibanze, byari byagaragajwe n’ubushakashatsi bw’Ikigo cy’u Rwanda gishinzwe Imiyoborere (RGB) mu mwaka 2014.

Iki kigo cyari cyifuje ko inzego zibishinzwe zirimo ubuyobozi bw’uturere na Minisiteri y’ubutabera zabishyiramo ingufu kuko iyo umuturage itsinze ntarangirizwe urubanza, ngo nta butabera ahawe.

Nta modoka ishobora kurenga ku Ruyenzi yerekeza i Kigali. Zose zahagaze.

Mu rukerera rwo kuri uyu wa Mbere, tariki 9 Gicurasi 2016, Umuhanda Kigali - Muhanga ku gice cyegereye ikiraro cya Nyabarongo wuzuyemo amazi, bituma abashaka kwambuka bahagarika ingendo.

Tuyishime Dieudonné wiga muri Kaminuza y’u Rwanda i Kigali, ngo yari azindutse kuko ku ishuri bari bafite ikizamini cy’imibare, ageze ku Ruyenzi imodoka barayihagarika, arahatiriza agenda n’amaguru, ariko ageze kuri Nyabarongo asanga kwambuka bitemewe.

Ati “Nari nzi ko mpagera nkambuka n’amaguru, none ikizamini singikoze. Ibi by’ibiza byahoraga bivugwa ariko nta muntu wari uzi igihe bizazira. Iyo mbimenya mba naraye i Kigali.”

Nubwo abagenzi bari kubwirwa gusubirayo, abenshi banze kuhava bategereje ko hari ikindi gisubizo bahabwa.

Amazi yuzuye arenga umuhanda.

Nsengimana Theophile, umwarimu muri Kaminuza y’u Rwanda mu Ishuri ry’Uburezi, Ishami rya Rukara, avuga ko yazindutse saa kumi za mu gitondo ngo ajye gukurikirana abanyeshuri bari kwimenyereza umwuga mu Karere ka Kayonza. Na we ari mu bategereje.

Aragira ati “Abantu bari aha baracyafite akazi ku mutima. Ni yo mpamvu banze gutaha kuko nta kindi ubabwira ngo batahe bajye gukora.”

Kalisa Alphonse, Umuforomo mu Mujyi wa Kigali, na we arategereje kuko atinya ko yasubirayo abandi bakambuka. Ati “Burya iyo utunzwe n’akazi ugomba kukubaha. Biramutse bigaragaye ko wasubiyeyo abandi bakabambutsa, byaza kuba ikibazo. Ni yo mpamvu ntegereje.”

Umuyobozi w’Akarere ka Kamonyi, Udahemuka Aimable, arimo gusaba abaturage gusubirayo kuko ikibazo gihari ntacyo ubuyobozi bwagikoraho kandi amazi arimo kwiyongera, hakaba nta cyizere cy’uko ashobora gukama.

Aragira ati “Ntabwo umuntu yavuga igihe birangirira. Hari abafite gahunda zihutirwa ariko duhari nk’inzego z’ubuyobozi n’iz’umutekano tubareberera, tukabasaba ko basubira iwabo bagategereza ko amazi akama.”

Nubwo umuhanda ufunzwe, kuva ku Ruyenzi kugera ku isanteri ya Kamonyi hari umurongo w’imodoka zabuze ubugenda cyangwa ubusubirayo.

Imbwa muri Kamonyi zirara mu matungo y’abaturage zikayica.

Mu midugudu ya Bwirabo na Muhambara yo mu kagari ka Kabagesera mu Murenge wa Runda, abaturage barataka ikibazo cy’imbwa z’ibihomora zirirwa zizerera, maze zagera aho bahuye amatungo zikayivugana.

Sibomana Alphonse, wo mu Mudugudu wa Bwirabo, imbwa zamuririye ihene ebyiri ku cyumweru tariki 1 Gicurasi 2016, zizisanze aho yari yaziziritse hafi y’urugo.

Imwe yarazicitse irataha, indi zirayica. Ati “Nabonye iya mbere yirutse ije mu rugo, njya kureba indi mpageze nsanga yapfuye na za mbwa ziyiri iruhande.”

Umuturanyi we, Niragire Marie Claire, na we imbwa zamuririye ihene ebyiri harimo n’ihaka. Ngo yagiye kuzireba aho yari yaziziritse mu kibanza cyegereye urugo, asanga zapfuye.

Avuga ko izo mbwa ziteye impungenge abaturage kuko ziramutse zibuze amatungo zishobora kurya n’abantu.

Aragira ati “Izo mbwa zidakumiriwe tubona ari ikibazo gikomeye cyane kuko zishobora no kurya abana bagiye kuvoma cyangwa bagiye kwiga kuko banyura mu ishyamba zibamo.”

Izo mbwa zica ihene ntizizirye ngo zizimare, ahubwo zikazisiga aho zikigendera. Umunyamabanga Nshingwawikorwa w’Akagari ka Kabagesera, Mutuyimana Madelene, atangaza ko mu gihe cy’icyumweru kimwe akagari kamenyeshejwe ihene 20 n’intama enye zimaze kuribwa n’imbwa.

Ngo ubuyobozi bw’akagari bwabimenyesheje inzego zibukuriye kugira ngo harebe icyakorerwa izo mbwa ziri guhungabanya umutekano mu kagari.

Ati “Twabimenyesheje abadukuriye n’inzego z’umutekano, kugira ngo bashake uburyo bakemura icyo kibazo, wenda bakazitega zigapfa.”

Cyakora, nubwo abaturage n’ubuyobozi bw’ibanze bifuza ko izo mbwa zakwicwa, Umuyobozi wa Polisi mu Karere ka Kamonyi, CIP Kalisa Marcel, avuga ko nta cyemezo kirafatirwa icyo kibazo kuko Polisi itigeze ikimenyeshwa.

Umurenge wa Gacurabwenge umaze kugarura abana 138 mu ishuri mu kwezi kwa Mata 2016. babigezeho nyuma gushyiraho amatsinda yo kurinda umwana (child protection), ahuriwemo n’ababyeyi, abarezi n’abayobozi kuva ku rwego rw’umudugudu.

Bamwe mu banyeshuri bo mu mashuri abanza bari kwiga

Imbogamizi zikura abana mu ishuri, ni ubukene n’amakimbirane mu muryango; bituma babura ibikoresho cyangwa se ibyo kurya; nk’uko bamwe mu banyeshuri biga ku ishuri ryitiriwe Saint Jean Bosco babitangaza.

Gakwanzire Gaudelive, ukuriye itsinda ry’umudugudu wa Nyamiryango, mu kagari ka Nkingo, avuga ko babanje kureba ibibazo abana bafite, bagakangurira ababyeyi babo kubasubiza mu ishuri ariko ngo ikibazo cy’ubukene kiracyahangayikishije.

Agira ati “Nk’umubyeyi araza, akambwira ati wanjyaniye umwana ku ishuri none nta mwenda afite nta nkweto kandi mwarimu arimo aramubaza impamvu atazana umwambaro w’ishuri, no mu matsinda nta bushobozi dufite.”

Uwihoreye Chaste, umuyobozi w’umuryango Uyisenga ni imanzi wafashije mu ishyirwaho ry’amatsinda, atangaza ko kutiga ku mwana ari ikibazo gikomeye kuko gituma igihugu kigira abakene benshi.

Ati “Twemera ko umuntu mukuru w’umukene, arema umwana w’umukene, niyo mpamvu tugomba kurwanya ubukene mu bana dufite kugira ngo mu myaka 10 iri imbere, buzabe bwaracitse.”

Ahamya ko ubufatanye no korohera abana batishoboye, bituma abana bose biga ariko ikibazo ngo kikaba ku myumvire.

Ati “Mu matsinda yo mu midugudu buri wese ashyiramo 100frw yo kuzigamira umwana, natwe tugashyiramo nk’ibihumbi 100 yo kubunganira kuko twisumbuye mu bushobozi.”

Kayijuka Diogene, umuyobozi w’uburezi mu Karere ka Kamonyi, atangaza ko igihembwe cya kabiri cyatangiye tariki 17 Mata 2016, mu karere habururwa abataye ishuri ibihumbi bitandatu mu mashuri abanza bangana na 8,4% na 1200 mu yisumbuye bangana na 12,5%.

Avuga ko hakurikiyeho urugamba rwo kugarura abo bana, kuko agaragaza ko 50% mu mashuri abanza baragarutse, ariko mu yisumbuye umubare w’abagaruka uracyari muto kuko hari abo basanga batakiba iwabo.

Ku nshuro ya mbere bifatanya n’abaturage b’Umurenge wa Runda mu muganda, Umuyobozi w’Akarere ka Kamonyi n’abamwungirije; bafatanyije n’abanyaruyenzi gukora umuhanda uva Kamuhanda werekeza mu Murenge wa Ngamba, na bo bibonera uburyo uwo muhanda wangiritse.

Abayobozi b’Akarere ka Kamonyi bifatanya n’abaturage mu muganda usoza Mata 2016.

Umunyamabanga Nshingwabikorwa w’Umurenge wa Runda, Nyirandayisabye Christine, yatangaje ko nubwo Umurenge wa Runda umaze gutera imbere, ikabazo gihangayikishije ari icyo gutunganya imihanda kugira ngo ibe nyabagendwa.

Ngo hari aho abaturage batangiye gukusanya imisanzu yo gukora imihanda ihuza uduce batuye ariko bakeneye n’inkunga y’ubuyobozi.

Yagize ati “Ubuyobozi bw’akarere butubaye hafi, imihanda abaturage bayitunganya kuko hari abamaze gukusanya amafaranga asaga miliyoni.”

Ahereye ku muhanda wakorewemo umuganda kuko na we wamwangirije imodoka; Umuyobozi w’Akarere ka Kamonyi, Udahemuka Aimable, yijeje abaturage ko ku bufatanye n’uruganda rukora isukari rwa “Kabuye Sugar works” rukoresha uyu muhanda rutwara ibisheke bihinze mu Kibaya cya Nyabarongo, uzakorwa.

Abaturage babaza ibibazo by’imihanda yangiritse.

Udahemuka yagaragaje ko ikibazo cy’uyu muhanda uva Kamuhanda ujya i Ngamba kizwi kuko cyavuzwe mu bitangazamakuru.

Ati “Murabizi ko uyu muhanda uvugwa cyane. Uyu wo, ku bufatanye n’abafatanyabikorwa ba Kabuye Sugar works, bawukoresha cyane; tuzareba uburyo twawukora.”

Udahemuka yijeje abaturage ubuvugizi mu Kigo cy’Igihugu gishinzwe Amateme n’Imihanda, RTDA, ku muhanda wa Ruyenzi- Gihara- Nkoto, ugashyirwamo kaburimbo. Mu gihe utarakorwa ariko urimo gutunganywa n’abaturage muri Gahunda ya VUP.

Abaturage bagaragaje n’ikibazo cy’umuhanda uva Kamuhanda werekeza Bishenyi unyuze ku ibagiro rya kijyambere no ku kimoteri rusange; maze Umuyobozi Wungirije w’Akarere ka Kamonyi ushinzwe Iterambere ry’Ubukungu, Tuyizere Thadee, abasaba gukoramo umuganda mu gihe uri gukorerwa inyigo kuko mu kuwukora ukeneye gushyirwamo ibiraro bituma utarengerwa n’amazi.

Mu midugudu ya Bukimba na Kibaya, ahakorewe umuganda, abaturage baho bataka ikibazo cyo kutagira amazi meza n’amashanyarazi. Ubuyobozi bw’akarere bwabijeje ko buzagishyira mu byihutirwa mu gutegura ingengo y’imari y’umwaka wa 2016-2017.

Mu gusoza amarushanwa yitiriwe Umurenge Kagame Cup ku rwego rw’akarere, tariki 29/4/2016, ikipe y’abagore y’umurenge wa Ngamba yatsinze iya Gacurabwenge ibitego 3-0, ibona itiki yo guhagararika akarere ku rwego rw’ Intara.

Abagore bitabiriye Kagame cup

Abagore barashimira Perezida Kagame kuko amarushanwa yashyizeho atumye bamenyekana. Abanyagasani Pacifique, ati “ikintu mbona Kagame Cup yadufashije nk’abakobwa, ni uko akenshi imikino nk’iyi yari isanzwe imenyerewe ko ari iy’abahungu, ariko iyo avugiye ko umwana ari nk’undi natwe twaratinyutse tuyijyamo kandi turashima Kagame kuko yadushyigikiye ».

Ikipe y’abakobwa y’umurenge wa Ngamba

Kapiteni wa Ngamba yakira igikombe

Umurenge wa Ngamba ni umurenge w’icyaro uherereye ahantu hitaruye ku buryo abakinnyi bavuga ko iyo batagira aya marushanwa batari kubona uko bagaragaza impano bafite muri Ruhago.

Murekatete Josiane Kapiteni w’ikipe y’abagore y’umurenge, avuga ko yarangije amashuri yisumbuye akabura aho akomeza gukinira . Ati “dutuye ahantu mu cyaro, abantu baho ntibabasha kumenyekana ngo bazamuke ngo bamenyakane bajye gukinira amakipe akomeye”.

Uwapfisoni Olive, uhagarariye Inama y’Igihugu y’abagore mu murenge wa Ngamba, atangaza ko abakobwa batangiye bitoza umupira w’amaguru n’umupira wa karere. Nawe ashima Kagame Cup kuko yateje imbere siporo ku bakobwa. Ati “abakobwa bacu barisanzuye bahura n’abandi baramenyana”.

Si abagore bonyine bishimira Kagame Cup, ahubwo n’abagabo bishimira aya marushanwa kuko hari abana b’abahungu bo mu cyaro bapfukiranaga impano zabo. Ikipe y’abagabo y’umurenge wa Kayenzi, nayo yegukanye itike yo guhagararira akarere mu Ntara, nyuma yo gutsindira kuri penaliti iya Mugina.

Abagabo nabo bishimira Kagame cup

Nyuma yo gushyikiriza ibihembo amakipe atatu ya mbere, Umuyobozi w’akarere ka Kamonyi, Udahemuka Aimable yabasobanuriye ko Siporo ni umuco mwiza uhuza abantu. By’umwihariko amakipe yatsinze acyuye amafaranga n’igikombe.
Amakipe ya mbere yahembwe igikombe n’amafaranga y’u Rwanda ibihumbi 200, ayabaye aya kabiri ahabwa ibihumbi 150 naho aya gatatu ahabwa ibihumbi 100.

Nyirakarire Bikeri Françoise, umubyeyi w’imyaka 58 n’abana batandatu, ni umuhinzi w’indabo mu Murenge wa Muhoza, mu Karere ka Musanze, Intara y’Amajyaruguru.

Nyenyeri Evangeline mu kazi ke ko kogosha.

Avuga ko yagize igitekerezo cyo gukora uwo murimo nyuma y’uko agize ikibazo cy’uburwayi bw’ukuboko bukamubuza gukomeza gukora umwuga w’uburezi yize.

Yabaye umwarimukazi igihe kirekire mu ishuri ribanza rya Musanze, ariko mu 2005 aza guhura n’ikibazo cy’uburwayi bw’ukuboko kw’iburyo, agirwa inama na muganga yo guhagarika kwigisha kuko kwandika byamwongereraga ububabare.

Agira ati “Umwaka wararangiye nivuza ukuboko kwaranze gukira, baransaakiye umusimbura. Kuko nari naramenyereye gukora, kwicara mu rugo byari bitangiye kunanira, mpitamo gutera uturabo hafi y’urugo.”

chantal mu kazi ke ko gufotora.

Uko gutera indabo byakubitanye nuko umujyi wa Musanze wasabaga abatuye hafi y’imihanda kuhatera indabo mu 2007. ahari hahinze urutoki n’ibishyimbo ahitamo kubisimbuza indabo.

Yatangiye agurirwa n’abashaka ingemwe zo gutera, umugabo we abonye amafaranga avamo amwemerera kubigira umwuga. Ati “yabanje (umugabo) kumbwira ngo ntere imboga ariko abonye umukiriya ampaye bitanu (5000frw), ahita anyemerera guzitera umurima wose.”

Indabo azihinga ku buso bungana na kimwe cya kabiri cya hegitari. Akoresha abakozi batatu bahoraho ahemba 1000 frw ku munsi. Mu myaka umunani ishize, ubu byamuviriyemo ubucuruzi butuma yunguka hagati y’ibihumbi ijana 100Frw na 200Frw ku kwezi.

Afite abaguzi baturuka mu duce dutandukanye, turimo Umujyi wa Kigali, Rubavu, Musanze; n’abaturuka mu bihugu bituranye n’u Rwanda nko muri Uganda (Kisoro) cyangwa Repubulika iharanira Demokarasi ya Congo (Goma).

Ubuhinzi bw’indabo bumwinjiriza hagati y’ibihumbi 100Frw na 200Frw mu kwezi.

Abagore batinyutse imyuga yitirirwaga abagabo

Mu mu murenge wa Nyamiyaga, Akarere ka Kamonyi, Intara y’amajyepfo, umubyeyi w’abana batatu Uwanyirigira Chantal, akora akazi ko gufotora amazemo imyaka 10.

Ahamya ko kamaze guteza imbere umuryango we kuko amafaranga akura muri uwo mwuga yagize uruhare mu by’urugo rumaze kugeraho.

Akazi ko gufotora yagatangiye muri 2005, abitewe nuko yabonaga aho atuye kubona abafotora bigora kandi abaturage bakenera amafoto yo gushyira ku makarita ya Mituweri, ay’ubukwe, n’ay’abanyeshuri, n’ibndi.

Yatangije igishoro cy’amafaranga y’u Rwanda ibihumbi 10Frw aguramo apareye ikoresha filimi yitwa “Yashika”.

Avuga ko ariko yabonye abandi bakoresha apareye zigezweho, yumvikana n’umugabo basaba inguzanyo mu kigo cy’imari cya DUTERIMBERE, agura apareye igura ibihumbi 30Frw.

Agira ati “Nabonaga kadakorwa n’abantu benshi, ngatekereza ko gashobora kuba gatanga amafaranga. Nabiganiriyeho n’umugabo anyemerera kubikora, anyizeza ko nimbona bifite inyungu nzakomeza nkabikora.”

Hari igihe abaturanyi bashaka guca intege abagore biyemeje kujya mu myuga imenyerewe n’abagabo. Uwanyirigira avuga ko atangira akazi ko gufotora abandi bagore batahaga agaciro akazi yinjiyemo ahubwo bakamuharabika.

Ati “Ubwo njye nta pfunwe nigeze nterwa n’akazi kanjye, ahubwo hari ubwo numvaga amagambo y’abantu babwiraga umugabo ngo mba nagiye kwitemberera, nirira umungara ariko ntabyiteho kuko twe twabyumvikanyeho icyo tugamije ari ugushaka ikidutungira abana.”

Ifoto imwe ayifotorera hagati ya 250frw na 300frw. Abona abakiriya cyane kuko abantu benshi bamaze kumumenya.

Amafaranga akura mu gufotora yunganira umusaruro umugabo ukura mu buhinzi no mu bucuruzi bwa Butiki ku buryo bamaze kuzuza inzu y’ubucuruzi ifite agaciro ka Miliyoni 3Frw.

Undi watinyutse akazi kamenyerewe n’abagabo ni Nyenyeri Evangeline, umubyeyi w’abana babiri, wo mu Murenge wa Busasamana, Akarere ka Nyanza warangije amashuri yisumbuyemu ishami ry’Ikoranabuhanga ariko yabuze akazi kajyanye n’ibyo yize, ahitamo kwiga kogosha.

Nawe avuga ko hari abatunguwe no kumubona yogosha ariko nta kibazo umugabo yabigizeho.

Ati “Umutware wanjye rero ntago yigeze abifata nabi kuko yarabyakiriye bitewe n’akamaro bifitiye urugo rwacu. Naho abandi bagore byarabatunguye bakabona ari ibintu bidasanzwe ariko kugeza ubu baramenyere.”

Akazi ko Kogosha Nyenyeri akamazemo imyaka ibiri. Ahamya ko yakagizemo inyungu kuko urugo rwe rutigeze rubura ikirutunga. Ati “Numva bimfashije; sinabura amafaranga y’ishuri y’umwana, sinabura igitenge, niyo umugabo yabura akazi urugo narutunga.”

Guhanga umurimo ntibisaba igishoro gihambaye

Nyinshi mu mpamvu abagore bashingiraho batinya guhanga imirimo harimo igishoro. Ariko ngo birashoboka ko wahera kuri duke tukagenda twiyongera uko inyungu zibonetse.

Nyirakarire, ahamya ko mu mushinga w’ubuhinzi bw’indabo, igishoro cya 5000frw umuntu yagiheraho.

Ati “Ufite umurima uziteramo, ushobora gutangirira ku gishoro cya bitanu, ikizima ni ugutinyukano kumenya kuzitaho. Ubundi wabona abaakiriya bashaka indabo nyinshi ukajya kuzirangura ku bandi bazihinga, ugafataho inyungu.”

Gukorana n’ibigo by’imari nabyo bifasha mu kongera igishoro. Uwanyirigira yakeneye kugura apareye yo gufotora ihenze, agurisha iyo yari afite maze yaka inguzanyo ya 300 000frw muri DUTERIMBERE.

Ati “Mu mwuga wo gufotora nabashije kwiga no kubona uruhushya rwo gutwara imodoka; kandi nayo nituyikenera dushobora kwaka inguzanyo muri DUTERIMBERE.”

Cyakoze ngo hakenewe cyane inkunga y’amahugurwa ku bagore kuko gutinyuka bshoborwa na bake. Nyenyeri avuga ko hari abagabo bamusaba ko yakwigisha akazi ko kogosha abagore ba bo ariko akaba nta bushobozi n’umwanya uhagije yabikoreramo.

Aragira, ati “Nkeneye inkunga ngo nagure ibikorwa; abansaba kubigisha ni benshi, ariko imashini mfite ni nke n’aha nkorera ni hato.”

Asanga bikwiye ko ibigega bifasha bagore byegera abatangiye kwihangira imirimo, bikabatera inkunga y’ubufasha n’ibitekerezo kugira ngo badacika intege.
Abagore bafite imishinga y’iterambere bafite amahirwe yihariye mu kubona inguzanyo mu bigo by’imari, kuko ikigega cy’ingwate cya BDF kibunganira.

Uwizeyimana Christine, umucungamutungo wa SACCO y’Umurenge wa Gaacurabwenge, avuga ko imishinga y’ubuhinzi n’iy’ubucuruzi ihabwa inkunga.

Ati “Umushinga w’ubuhinzi uhabwa inkunga ya 25% naho iy’ubucuruzi BDF ikayunganiraho 15% kandi n’iyo umugore waka inguzanyo afite ikibazo cyo kubona ingwate; BDF imwishingira ingwate ingana na 75%.”

Gusa yongeraho ko ubwitabire bw’abagore mu gukorana na SACCO bukiri hasi. Mu banyamuryango ba SACCO ya Gacurabwenge abagore bari ku kigereranyo cya 40%, kandi n’abitabira kwaka inguzanyo ni bake ariko bishyura neza kurusha abagabo.

Mu rwego rwo gukangurira abagore gutinyuka gukorana n’ibigo by’imari no guhanga imirimo, Inama y’igihugu y’abagore yifashisha abagore babigezeho batanga ubuhamya mu mugoroba w’ababyeyi no mu nama rusange.

Mukanyandwi Rose, Umuhuzabikorwa w’Inama y’igihugu y’abagore mu Karere ka Kamonyi, ati “Dukangurira abagore kujya mu bimina no mu matsinda, ndetse no kwegera abajyanama b’ubucuruzi BDA (Business Development Advisor) kugira ngo babafashe gukora imishinga.”

Mukanyandwi akomeza avuga ko hakiri imbogamizi zishingiye ku muco, kuko imirimo yamenyerewe n’abagabo nk’ubushoferi n’ubwubatsi, abagore bake aribo batinyuka kuyikora, hakaba hagikenewe amahugurwa n’ubukangurambaga n’abagabo bagizemo uruhare.

Mu gukosora amakosa yagaragaye muri gahunda ya Gira inka, hari abamburwa inka bazira ko batituye. Bavuga ko babyaje bakanitura ariko kuko rimwe na rimwe byakorwaga hari komite ya Gira inka n’abayobozi gusa, abagaragaye ku rutonde rw’abatarituye none barimo kubiryozwa.

Iyi nka yambuwe uwayihawe kuko ashinjwa kuba yarayiragije.

Kuva tariki 20 Mata 2016, muri aka karere hatangiye gahunda yo kugenzura inka zatanzwe muri gahunda ya Gira inka hagamijwe kureba irengero ry’inka 217 zabuze mu karere kose.

Hagenzurwa uwahawe inka n’uwo yituye, cyangwa se inka yarapfuye n’iyanze kubyara ikagurishwa, hakarebwa icyo ayo mafaranga yakoreshejwe.

Mucyurabuhoro Fideli wo mu Kagari ka Kabuga mu Murenge wa Ngamba, yahawe inka, ibyara ikimasa. Umuyobozi w’umudugudu na Veterineri baragitwara bamubwira ko bagiye kukigurisha kikazavamo inyana yo kwitura nubwo iyo nka yaje kurwara akayigurisha akagura indi.

Ubwo abakozi b’akarere bongeraga gukora ubugenzuzi, tariki 20 Mata 2016, iyo nka ya Mucyurabuhoro yarayatswe ndetse abwirwa ko azakurikiranwa n’icyo kimasa yabyaje kikagaruzwa nawe akazakurikirana abakimwatse.

Mucyurabuhoro ahamya ko yarenganye kuko ikimasa cyarengeye ku bakozi b’akarere. Ati “Icyo kimasa cyarengeye kuri Munyanziza (umukuru w’umudugudu) na Didier (wari Veterineri w’umurenge), kuko bahoraga bambwira ko nituye.”

Ubwiru mu gutanga inka no kwitura, buvugwa no kuri Hagumugutuma Syliro, nawe wo mu kagari ka Kabuga, uvuga ko abemejwe n’inama rusange y’abaturage atari bo bahabwa inka. Ati “Wajyaga kumva ukumva ngo uwo bayigeneye ntiyayibonye, ahubwo yahawe undi.”

Umuyobozi w’akarere ka Kamonyi Udahemuka Aimable, atangaza ko mu bugenzuzi buri gukorwa bamaze kugaruza asaga miliyoni 7Frw, avuye mu nka zagurishijwe kandi igikorwa kikaba gikomeje ku buryo bazagaruza agera kuri miliyoni 15Frw.

Ahamya ko nta muturage wakwa inka ngo ihabwe undi, ahubwo bareba izagurishijwe. Ati “ikibazo cyagaragaye ni inka zagiye zibagwa, ibyapfa (inyama z’inka yapfuye) byayo bakabirigisa”.

Yabitangaje ku wa 23 Mata 2016, mu muhango wo kwakira inka 21 Banki ya Kigali, BK, na Sosiyeti icuruza ibikomoka kuri Peteroli, Kobil, bageneye bamwe mu bacitse ku icumu rya Jenoside batishoboye, bo mu mirenge ya Gacurabwenge na Rugarika.

Umuyobozi wa BK n’Umuyobozi w’Akarere ka Kamonyi bishyikiriza inka umwe mu barokotse Jenoside.

Yagaragaje ko zimwe mu nka zatanzwe muri Gahunda ya “Gira inka” zitatanze umusaruro wari witezwe ngo zikure abazihawe mu bukene, kuko bazifashe nabi zigapfa, izindi bakazigurisha bakazisimbuza into ku buryo batagera igihe ngo biture.

Ashimira abakozi ba BK n’aba Kobil baje kuremera abarokotse Jenoside, yabasabye gufatanya n’ubuyobozi gusura inka zatanzwe no gukurikirana imibereho ya zo.

Yagize ati “Nubwo ari amasosiyeti aba yatanze inka ariko aba agomba gufatanya n’ubuyobozi gukurikirana imibereho y’izi nka.”

Amasosiyeti yatanze inka yijeje ko azakomeza kuzikurikirana no kuzisura. Abahawe inka bubakiwe n’ikiraro, bahabwa n’imiti yo kuzivura mu gihe cy’amezi atandatu.

Zimwe mu nka zatanzwe na BK na Kobil.

Dr Diane Karusisi, Umuyobozi wa BK , avuga ko ikigo ayobora kimaze gutanga inka zisaga 50 ku miryango y’abarokotse Jenoside, hakaba hari aho itsinda ry’abakozi rikurikirana abazihawe ku buryo hari eshatu zapfuye, bene zo bagashumbushwa.

Hari ingero zagiye zigaragara kuri bamwe mu barokotse Jenoside yakorewe Abatutsi mu 1994, bahawe amatungo ariko ntamare kabiri.

Mukantwari Elina, wo mu Murenge wa Gacurabwenge, ati “Njye mbona abayatanga baba bagomba kuyakurikirana, bigatuma abayahawe na bo babona ko inyuma hari abandi bantu bayacunga”.

Abarokotse Jenoside bashima uburyo bitabwaho n’ubufasha bahabwa mu gihe cy’icyunamo, ariko bagasaba ko bitagarukira mu cyunamo gusa kuko no mu bindi bihe baba bakeneye abababa hafi.

Hashize imyaka ibiri ikibazo cy’amazi kigaragaye muri ako kagari. Mbere bavomaga ku mariba bubakiwe n’Ikigo cy’Iterambere rya Kabuga PDK, ariko ubu bavoma Nyabarongo n’imigezi y’Icyogo na Nyamagana.

Amwe mu mariba yubatswe na PDK ubu yarasenyutse.

Ikibazo cyatangiye muri 2014, ubwo ubuyobozi bwavugaga ko bugiye guha abaturage amazi bwifashishije amafaranga atangwa muri gahunda y’iterambere ry’umurenge VUP. Icyo gikorwa kigashorwamo miliyoni 24 z’amafaranga y’u Rwanda.

Mu gihe abaturage bibwiraga ko amazi ya VUP agiye kunganira aya PDK, batunguwe n’uko uretse ikigega cyubatswe n’amariba make; ubuyobozi bwambuye PDK ububasha bwo gucunga amazi, maze na yo amazi iyagarukiriza mu bigo byayo gusa, ubundi mu baturage ikayoherezayo rimwe na rimwe.

Mu Mudugudu wa Nyamugari n’uwa Fukwe, bavoma ku Mugezi wa Nyamagana uzana amazi y’ibiziba kubera ubucukuzi bw’amabuye y’agaciro. Kugira ngo babone amazi asa neza, bacukura utwobo mu micanga , amazi yamara kwikeneka bakabona kuyadaha.

Kambiri gi Vestine, utuye mu Mudugudu wa Nyamugari, agira ati “Baduhaye kano ya VUP, ariko byatangiye amazi aza umunsi umwe mu cyumweru, ageraho arabura.”

Nyiranuma, mu nama n’abaturage yasobanuye ko nta mafaranga VUP yahaye PDK.

Cyakora ngo iyo abayobozi ku rwego rw’akarere bari bugenderere akagari, amazi araboneka. “Uyu munsi (tariki 21/4/2016) kuko bazi ko umuyobozi w’akarere ari budusure. N’umunsi batashyeho amazi ya VUP, yaraje. Ariko abayobozi bakije imodoka bagiye ahita abura”uko ni ko Kambirigi akomeza avuga.

Uwanyirigira Belina, utuye mu Mudugudu wa Fukwe, umwe mu bakoze muri VUP yazanye amazi, akeka ko habaye ikibazo hagati ya PDK n’ubuyobozi kuko VUP ishobora kuba yaratwaye amazi ya PDK ishaka gusohora amafaranga make. Ati “Ntabwo tuzi amasezerano PDK yagiranye n’ubuyobozi .”
Iki kibazo abaturage bakigaragarije Umuyobozi w’Akarere ka Kamonyi, Udahemuka Aimable, mu nama bagiranye tariki 21 Mata 2016, ariko yirinda kuvuga ku kibazo cy’ayo mazi ya PDK aturuka ku isoko ya Mukumba, ahubwo abizeza ko ubuyobozi buzashaka andi masoko azageza amazi mu murenge wa Ngamba.

Aragira ati “Ibi byose birajyana n’ubuvugizi kugira ngo hakorwe inyigo kugira ngo mu Murenge wa Ngamba hagezwe amazi. Kandi turabazirikana ni na yo mpamvu twabasuye.”

Umuyobozi wa PDK, Milagros bakunze kwita Nyiranuma, witabiriye iyi nama, yatangarije abaturage ko miliyoni zisaga 20 VUP yakoresheje mu mazi, itigeze iziha PDK.

Na we yanenze uburyo amazi acungwa kuri ubu. Agaragaza ko mbere agicungwa na PDK , umuturage yatangaga umusanzu w’amafaranga 100frw ya buri kwezi yo gufasha mu gusana ibyangiritse.

Ku wa Gatanu, tariki 15 Mata 2016, ni bwo aba bakozi bazindukiye ku nzu y’umukecuru Mukarubega Virginia, utuye mu Mudugudu wa Gihogwe, Akagari ka Buhoro mu Murenge wa Musambira, bakora igikorwa cyo kuyisiga irangi no gushyiramo umuriro w’amashanyarazi ya Mobisol akoresha imirasire y’izuba.

Abayobozi n’abakozi ba I&M Bank mu gikorwa cyo gusiga irangi inzu y’umukecuru w’incike.

Ibyo kandi babikoze nyuma y’uko iyi banki ifashije uyu mukecuru gusana inzu ye, ikamwubakira igikoni n’ikiraro cy’inka; ikamushyiriraho umureko n’ikigega cy’amazi.

Umukecuru Mukarubega waremewe n’ibikoresho byo mu nzu birimo igitanda n’umufariso, akabati, intebe zo kwicaraho n’ibyo kurya, yashimye umuco mwiza wa kimuntu yagaragarijwe n’aba bakozi ba I&M Bank, kandi ashimira Leta y’ubumwe kuko isanzwe imufasha kubona ibyo akeneye.

Yagize ati “Nari narahawe n’inka ya Girinka. Ntacyo Leta itampaye! None ibyo munkoreye ni agahebuzo. Kugira umutima mwiza wa kimuntu mukamenya imbabare, Nyagasani azabibafashemo.”

Umukecuru Mukarubega yishimiye ubufasha yahawe n’abakozi ba I&M Bank.

Perezida w’Umuryango IBUKA mu Karere ka Kamonyi, Murenzi Pacifique, yagarutse ku mateka ya mukecuru Virginia wari warashakanye n’uwari umutware mbere ya 1959.

Ngo umugabo we yitabye Imana ubwo yari mu buhungiro mu gihugu cya Uganda ndetse n’umuhungu we agwa ku rugamba rwo kubohora igihugu.

Murenzi arashimira abakozi ba Banki baje gumufata mu mugongo kuko umukecuru w’incike nk’uyu aba akeneye abamuba hafi.

Ati “Kuba hafi abakecuru nk’aba, bakabaganiriza bakabasura, bibaha icyizere.”

Umuyobozi wa I&M Bank, Robin Bairstow, atangaza ko nk’ikigo cy’imari, bahisemo gufasha uwarokotse Jenoside yakorewe Abatutsi mu rwego rwo kumufasha kubaka ubuzima no kumukomeza.

Umuyobozi wa I&M Bank, Robin Bairstow, imbere y’inzu y’umukecuru bamaze gusiga irangi.

Ibi ngo bakaba babikora bibuka amateka yaranze igihugu cy’u Rwanda; bagaharanira ko Jenoside itazongera kuba ukundi.

Ibikorwa bakoreye uyu mukecuru bifite agaciro kari hagati ya miliyoni n’igice na miliyoni ebyiri z’amafaranga y’u Rwanda.

Mu ma saa cyenda za mugitondo cyo kuri uyu wa 14 Mata 2016, ni bwo umunyeshuri wo muri GS ya Ruyenzi, ufite imyaka 23 akaba anacuruza amagi, yateye icyuma umukozi ucunga umutekano kuri sitasiyo ya lisansi ukorera isosiyeti ya “RGL Security”, ahita apfa.

Aho afungiye kuri Sitasiyo ya Polisi ya Ruyenzi, uwo munyeshuri avuga ko bapfuye amafaranga y’amagi yari amaze kurya akanga kumwishyura, yakomeza guhatiriza yishyuza akamukubita ndembo, ariko atazi ko icyuma yari yambaye ku mukandara cyatakaye; maze na we ngo ahita agitoragura arakimutera.

Ati “Yariye amagi atatu n’ubunyobwa bubiri bwa 100Frw ariko akaba yari andimo n’ayandi 500 Frw y’ibyo yariye mbere. Yarangije kuyarya arambaza ngo ntegereje iki, mubwira ko nshaka ko anyishyura, ayasabye umucuruzi wa Lisansi aramuringana ajya kwiryamira."

Yakomeje agira ati "Yahise atangira kunkubita ndembo andembeje mfata cya cyuma cyari cyamanutse ku mukandara, ndakimutera mpita niruka.”

Uyu munyeshuri wemera icyaha yakoze, avuga ko atari agambiriye kwica uwo mukozi ucunga umutekano, ahubwo ko yabikoze yitabara kuko na we yari arimo kumukubita.

Ngo umusore wari kumwe n’uyu munyeshuri yabonye batangiye kurwana afata indobo arigendera; ariko umukozi utanga Lisansi witwa Peter, we avuga ko yakangutse akumva barwana, yasohoka agasanga ucunga umutekano yaguye yikanda mu gatuza, avuga ngo “Nimumfate”, we ahita yiruka kuri uwo wari umaze kumutera icyuma.

Umuvugizi wa Polisi y’u Rwanda mu Ntara y’Amajyepfo, IP Hakizimana André, atangaza ko umurambo wagiye gukorerwa isuzuma ku Bitaro bya Polisi, hakaba harimo no gukorwa iperereza ngo uwo munyeshuri ufunzwe akorerwe dosiye.

Uwanyirigira Olive Agnes wo mu Mudugudu wa Buhoro, Akagari ka Kigembe mu Murenge wa Gacurabwenge mu Karere ka Kamonyi yahawe inka na Koperative y’abatwara abagenzi mu Mujyi wa Kigali, KODASE muri Mata 2015 mu rwego rwo gufata mu mugongo abarokotse Jenoside yakorewe Abatutsi.

Yambuwe inka ya "Gira inka" ashinjwa kuyigurisha nyamara we akavuga ko yari yarayiragije.

Inka yayiragije Nyirasenge utuye mu mudugudu baturanye wa Rugarama, kuko nta bushobozi bwo kuyorora yari afite, ariko akajya ayibaruza mu nka za “Gira inka” zo mu mudugudu we wa Buhoro.

Avuga ko yatunguwe no kubona ubuyobozi buyimwaka bumushinja ko yayigurishije kandi ari bwo bwamwemereye kuyiragiza .

Ati “Izo nka twazihawe turi batatu. Gitifu w’umurenge n’uw’akagari baduhaye uburenganzira bwo kuziragiza kuko ntaho twari dufite ho kuzishyira”.

Nyirasenge Bazubagira Therese, umaze umwaka aragiye iyo nka, avuga ko bagiranye n’amasezerano yanditse kugira ngo n’abana bamenye ko ari indagizo.

Ati “Namaze kuyigeza mu rugo ndamubwira ngo tugirane amasezerano, ejo abana banjye batabona hano hari inka, bakagira ngo ni iyabo. Nshobora gupfa, umwana akavuga ko nta nka wazanye aha”.

Nubwo ashinjwa kuragiza amasezerano agaragara n’ayo kuragiza gusa.

Nubwo nta masezerano y’ubugure agaragara, tariki 9 Mata 2016, Komite ya “Gira inka” mu mudugudu iherekejwe na DASSO yaje gutwara iyo nka mu rugo rwa Bazubagira.

Ubuyobozi butangaza ko hari abaturage barimo uhana imbibi na Uwanyirigira, batanze amakuru ko yagurishijwe.

Rwirima Niyigena Sabin, ushinzwe Ubworozi mu Murenge wa Gacurabwenge, agira ati “Batubwiye ko yayigurishije amafranga y’u Rwanda ibihumbi 60, bavugana y’uko abyita ko ayimuragije, yazabyara akitura, ubundi akayigira iye. Twamaze kubimenya komite ya Gira inka ijya kuyikurayo kuko hari amakuru avuga ko bashakaga kongera kuyigurisha”.

Ngo kwamburwa iyo nka, byakurikije amabwiriza mashya ya “Gira inka”, atemerera abahabwa inka kuziragiza.

Cyakora Rwirima atangaza ko bagiye kongera gushaka amakuru neza, bazasanga itaragurishijwe koko, ikazasubizwa Uwanyirigira mu gihe azemera kuyiragirira.

Ishyamba rya Bibare riherereye mu Mudugudu wa Nyenyeri, Akagari ka Bunyonga mu Murenge wa Karama, ahahoze ari muri Komini Kayenzi. Muri Mata 1994, muri iri shyamba hahungiye Abatutsi benshi baturutse no mu yandi makomini, ariko baje kuhicirwa.

Urwibutso rwa Jenoside yakorewe Abatutsi rwa Bunyonga rwubatse mu Bibare ruzatuma amateka yaho atibagirana.

Muri gahunda yo kwimurira imibiri y’abazize jenoside mu nzibutso, ubuyobozi bwashatse kwimura imibiri isaga ibihumbi 10 ishyinguye mu mva iri mu Ishyamba rya Bibare, ariko abahafite ababo basaba ko batakwimurwa kuko iryo shyamba rifite amateka.

Mu mwaka wa 2012, ubwo bibukaga ku nshuro ya 18, Muganga Karangwa Desiré, uhagarariye Abanyakarama barokotse jenoside baba i Kigali, yahamije ko Bibare Abatutsi bayibukiraho amateka menshi.

Ngo kuva Abatutsi batangira guhigwa mu 1959 no mu 1973, iyo baterwaga bahungiraga muri iryo shyamba. Ati “Mu 1994 ho rero Abatutsi bahahungiye, babanje kwirwanaho nubwo bageze aho bakananirwa. Gukura urwibutso hano twaba dusibye byinshi.”

Abanyakarama bitabiriye Kwibuka ku nshuro ya 22 Jenoside yakorewe Abatutsi.

Hakomeje gukorwa ubuvugizi, imibiri ntiyimurwa, ahubwo hubakwa Urwibutso ruzimurirwamo imibiri yari itangiye kwangirikira mu mva.

Mu gutangiza icyunamo cyo kwibuka ku nshuro ya 22 Jenoside yakorewe Abatutsi, Nsabimana Fabien, umwe mu barokotse, yashimiye ubuyobozi kuko bwumvise ugusaba kwabo.

Yagize ati “Iki kiri muri bimwe mu bikorwa Leta y’Ubumwe bw’Abanyarwanda imaze kudukorera cyadushimishije kuko twumva ko iki ari igicumbi cy’abacu, aho bamenewe amaraso, ndetse tukaza no kubasura tukabona ko bari hafi yacu.”

Abanyakarama ntibazibagirwa Abatutsi biciwe mu Ishyamba rya Bibare.

Murenzi Pacifique ukuriye Umuryango IBUKA mu Karere ka Kamonyi, yashimiye buri wese watanze umusanzu mu guharanira ko hubakwa urwibutso rw’amateka yaranze Bibare.

Tariki 5 Mata 2016, mu ishyingurwa rya Ndahimana Eric wari umucuruzi mu isanteri y’ahitwa ku Nkambi mu Kagari ka Ngoma mu Murenge wa Nyamiyaga, bamwe mu batabaye bashatse gukubita umubyeyi wa Nkurunziza Richard wamwishe, ngo bahorere uwapfuye.

Abaturage basabye ko Nkurunziza yazaburanishirizwa aho yakoreye icyaha.

Byateye ubwoba uwo mukecuru witwa Mukadata, maze ahitamo guhunga urugo rwe kugira ngo abo mu muryango wa Nyakwigendera batamugirira nabi.

Cyakora, ubuyobozi bwari bwahosheje imvururu zabereye ku itabaro ndetse bunamwizeza umutekano. Hategekimana Emmanuel, Umunyamabanga Nshingwabikorwa w’Akagari ka Kidahwe byabereyemo, yagize ati “Umukecuru yari yatabaye nk’abandi bose, ariko hazamo urwikekwe, umudamu umwe amugirira urugomo ariko twarabihosheje”.

Mu ijoro ry’uwo munsi, umukecuru n’abana be baragiye ndetse n’umugore wa Nkurunziza wari umaze kurekurwa na Polisi, abaturage bavuga ko yahise yerekeza muri Uganda.

Umwe muri bo aragira ati “Umugore ejo yahamagajwe na Polisi , noneho agezeyo bahita bamurekura ahita yigendera. Ubu namenye amakuru y’uko uwo mugore Nyiribambe yageze mu gihugu cya Uganda”.

Mu nama y’umutekano bagiranye na Polisi iri kumwe n’abayobozi, kuri uyu wa 6 Mata 2016, abaturage bibukijwe ko batagomba kwihorera , bagaha amahoro umukecuru kuko Nkurunziza wakoze icyaha ari mu maboko y’ubutabera kandi nta ruhare umukecuru yagize mu bwicanyi bw’umuhungu we.

Abaturage bagaragaje ko umujinya bawutewe n’akababaro ko kubura umuntu wabo. Vuguziga Pie, umwe mu bacuruzi bo ku Nkambi, ati “Bitewe n’ibiba byabaye n’agahinda k’umuntu utuvuyemo mu buryo budasobanutse, byarenze ubwenge”.

Abaturage batunguwe n’irekurwa ry’umugore wa Nkurunziza kandi ngo hari uruhare afite mu iyicwa rya Ndahimana kuko ari we wamuhamagaye kandi ntatabaze mu gihe batuye ku mudugudu.

Banasabye Polisi gukora ubuvugizi urubanza rwa Nkurunziza rukazaburanishirizwa ku Nkambi kuko ariho yakoreye icyaha.

Uwitwa Ndahimana Eric w’imyaka 33 yakubitiwe bikomeye mu rugo rwa Nkurunziza Richard w’imyaka 25, mu ijoro rishyira tariki 4 Mata 2016; ahavanwa ari intere ageze ku Bitaro bya Remera Rukoma arapfa.

Amakuru atangwa n’umugore wa Nkurunziza wamaze gukubita Ndahimana agatoroka, ni uko uyu nyakwigendera yamuhamagaye kuri terefoni mu ma saa munani z’ijoro amusaba kuza kumuraza, maze akabimwemerera, yahagera akurira urugo, akamanuka nyir’urugo yamwiteguye agahita amukubita.

Umunyamabanga Nshingwabikorwa w’Akagari ka Kidahwe, Hitimana Emmanuel, atangaza ko umugore yabahamirije ko ari umugabo we wamubwiye kubwira “yego”, uwo mugabo wari umusabye kumuraza.

Ati “Umugore wa Nkurunziza yemera ko Nyakwigendera yamuterefonnye, akamwemerera kuza abitegetswe n’umugabo we, ariko kandi twibaza impamvu yamuretse agakubitwa kugeza abaye intere.”

Ndahimana yaje mu rugo rwa Nkurunziza aturutse mu mudugudu baturanye wa Munyinya, mu Kagari ka Ngoma. Nyuma yo gukubitwa, umugore yatabaje, abaturanyi bamujyana kwa muganga. Umugabo we ahita atoroka yerekeza mu gihugu cya Uganda.

Bamwe mu bakurikiranye iki kibazo bahamya ko Nkurunziza yafatanywe na Mushiki we ku mupaka wa Cyanika ho mu Karere ka Burera ashaka kwambuka ajya muri Uganda; ariko umuvugizi wa Polisi mu Ntara y’Amajyaruguru, IP Gasarasi Innocent ; atangaza ko nta makuru abifiteho.

Abaturage bavuga ko ikibazo cy’ubushoreke muri uru rugo cyari kimaze igihe kivugwa, kuko Nkurunziza yamaze igihe aba muri Uganda, yagaruka abaturanyi bakamubwira ko hari abagabo bari baramwinjiriye urugo.

Ndahimana wapfuye, asize umugore n’abana batatu.

Mu gihe mu gihugu hose bashishikariza abantu gutura ku mudugudu, abatuye uyu murenge ntibashidikanya ku byiza byo gutura ku mudugudu, kubera iterambere bagezeho nyuma yo gutuzwa muri Peyizana.

Gutura Peyizana byabakundishije umudugudu.

Gahunda ya Peyizana yatangiye mu 1963, hacibwa imihanda ku misozi, abaturage bagatuzwa haruguru y’umuhanda, naho munsi yawo hagahingwa imyaka ihereye ku biti 300 bya Kawa.

Mukandori Venantie w’imyaka 72 utuye mu kagari ka Nteko, umudugudu wa Kona, avuga ko mbere ya Peyizana, abantu bari batuye intatane hagati y’inzu za bo hari amashyamba, bigatuma babura umutekano wa bo n’uw’amatungo.

Avuga ko kwegerana byatsuye umubano hagati y’abaturanyi, bituma buri wese amenya amakuru y’undi.

Havugimana yifuza ko ku mudugudu hakimurirwa abakiri bato gusa.

Ati “Igikomye utabaza umuntu akagutabara, waba ufite umurwayi urembye, ukiyambaza umuturanyi akagufasha kumujyana kwa muganga.”

Abaturage kandi bahamya ko peyizana yazanye ubukungu. Umusaza Havugimana, w’imyaka 65, ati “Ingo nyinshi zatunze amaradiyo kubera amafaranga ya Kawa. Ubundi ku isizeni (isarura rya kawa), abantu baguraga amagare yo kugendaho.”

Nkurunziza Jean De Dieu, Umunyamabanga nshingwabikorwa w’umurenge wa Mugina, ahamya ko gahunda ya peyizana yoroheje imiturire. Ngo izo mbogamizi abaturage bagaragaza zishingiye ku kuba amasite y’umudugudu ari 13, mu midugudu 23 igize umurenge.

Ati “Igisigaye gikomeye ni ukubwira umuturage kwimuka hahandi yari atuye kandi yishimiye. Bisaba kumusobanurira ko ahagenewe umudugudu hazagezwa ibikorwa remezo, ariko nyine ikindi kigora ni ukubona bwa bushobozi bwo kongera kubaka.”

Gahunda yo gutura ku mudugudu muri Mugina igeze kuri 75,2%. Ikibanza cyo ku mudugudu kigura ibihumbi 300Frw, ingurane yemewe n’iy’isambu iteyemo ishyamba.

Mu Murenge wa Musambira w’Akarere ka Kamonyi hacukurwa umucanga mu masambu y’abaturage no mu Mugezi wa Kayumbu wisuka mu wa Mukunguri.

Abaturage bazi ko kwinura umucanga mu mazi ari ukurwanya isuri.

Inzego z’ibanze n’iz’umutekano ntizihwema gukora umukwabo wo guhagarika abacukura umucanga n’abawinura muri Kayumbu kuko bubashinja kubikora mu kajagari bikangiza ibidukikije.

Umunyamabanga Nshingwabikorwa w’Agateganyo w’uyu murenge, Mwitiyeho Gratien, agira ati “Iyo urebye hirya no hino mu gishanga cya Kayumbu cyamaze kwangirika kuko kimaze gucikamo inkangu ku nkengero z’umugezi.

Ibirombe mu mirima y’abaturage na byo biteza isuri bikangiza ubutaka; ku buryo mu gihe kizaza ubutaka bwaba bwadushizeho”.

Cyakora abaturage bo bakavuga ko batazi amabwiriza agenga gucukura imicanga kuko na ba rwiyemezamirimo bawubagurira nta kibazo bagira mu kuwutwara.

Ngo abashoramari babagurira umucanga uri mu murima ku mafaranga make, ubundi uko bapakiye imodoka bagasorera Leta.

Umusaza utuye ahitwa ku Kivumu ati «Twari tuzi ko abo baza kuwucukura ari bo basora bakaka n’ibyangombwa. Iyo menya ko iryo tegeko ririho ntabwo mba naramwemereye ngo ancukurire mu isambu rwose”.

Abinura umucanga mu mazi bo, bavuga ko iyo imvura iguye umucanga uba mwinshi mu mazi, bakaba bibwiraga ko kuwinura ariko kurengera ibidukikije kuko bituma amazi agenda.

Ubuyobozi bw’Umurenge wa Musambira bwemeza ko umucanga ari kimwe mu bigize ubukungu bw’umurenge ndetse n’ubw’akarere muri rusange. Mwitiyeho asaba abawucukura kwibumbira mu makoperative kuko ariho ubucukuzi bwakorwa neza.

Ati «Baramutse banyuze mu nzira ziteganywa n’amategeko ibyangombwa babibona. Dore nk’ubu i Musambira nta koperative n’imwe ihari icukura umucanga.»

Ubucukuzi bw’imicanga, ubw’amabuye yo kubaka n’ubw’amabuye y’agaciro ni imwe mu mirimo itunze abenshi mu baturage b’Akarere ka Kamonyi, kuko usanga mu masambu ya bamwe no mu migezi itandukanye havamo umucanga n’amabuye kandi bigaha akazi abantu benshi.

Nyuma y’umuganda usoza ukwezi kwa Werurwe 2016, wabereye ku Rwibutso rwa Jenoside rw’Akarere ka Kamonyi, ruherereye mu Kagari ka Nkingo mu Murenge wa Gacurabwenge, uwari uhagarariye Umuyobozi w’akarere, Muhoza Alphonse, yasabye abadepite gukora ubuvugizi bagahabwa inzu y’amateka ya Jenoside iri ku rwibutso.

Abadepite bifatanyije n’abaturage ba Kamonyi mu muganda rusange usoza Werurwe 2016.

Iyi nzu y’amagorofa abiri, yubatswe n’Ikigega gifasha Abarokotse Jenoside (SURF) muri 2006 , kiyegurira Komisiyo y’Igihugu yo Kurwanya Jenoside (CNLG), ariko ntiyagira icyo ikorerwamo, ku buryo itangiye kwangirika.

Yari igenewe ubushakashatsi ku mateka ya Jenoside n’isanamitima ku bantu bagize ikibazo cy’ihungabana. Mu mwaka ushize, Minisitiri w’Umuco na Siporo, Uwacu Julienne, yari yemeye ko izegurirwa akarere kagafatanya na CNLG kuyikoresha.

Muhoza ati “Byaba byiza inzira zo kuyihabwa zirangiye n’inzu ikozwe, hanyuma akarere kakayegurirwa itunganyije neza kugira ngo ikoreshwe icyo yagenewe”.

Hon Mukama Abbas yashyigikiye icyifuzo cy’uko iyo nzu yegurirwa akarere, kuko yafasha mu rwego rwo kwigisha amateka kandi ikazaba ubushyinguro bw’amateka ya Jenoside yakorewe Abatutsi muri Kamonyi.

Yagize ati “Twebwe nk’abadepite tuzakorana na Minisiteri y’Umuco na Siporo kuko ari na yo ifite CNLG mu nshingano. Ubu iyi nzu iracyari mu mutungo rusange w’igihugu.

Inama y’abaminisitiri nibyemeza, izakurwa mu mutungo rusange, ishyirwe mu mutungo bwite w’akarere. Kandi kayihawe yuzuye byafasha kuko ingengo y’imari igenerwa akarere ni nto, ntikabasha kuyisanira”.

Bakora isuku ku Rwibutso rwa Jenoside rwa Kamonyi.

Depite Mukama yibukije abaturage kugenzura ibibakorerwa no kuvuga ibitagenda kuko ari byo byubaka igihugu.

Ati “Niba hari icyo nshinzwe njyewe Mukama, mukabona ntagikoze neza, mufite uburenganzira bwo kumbaza cyangwa mukabwira izindi nzego zikambaza kuko Leta yacu yahaye agaciro abaturage”.

Umuganda wo gukora isuku ku Rwibutso witabiriwe n’abadepite 15; bashimye abaturage ubwitabire bagaragaje; babasaba gufata mu mugongo abarokotse Jenoside mu gihe cy’icyunamo cyo kwibuka ku nshuro ya 22 Jenoside yakorewe Abatutsi.

Uyu muryango utuye mu Mudugudu wa Buhunga, Akagari ka Ruyanza mu Murenge wa Nyarubaka ho mu Karere ka Kamonyi ngo bapfaga gufuha k’umugabo wakekaga ko umugore agifitanye umubano n’undi musore wamurambagizaga mbere.

Bari bamaze imyaka 15 babana mu ntonganya ariko ubu urugo rwabo rumeze neze.

Urwo rwikekwe ngo rwatumaga mu rugo hahora induru kuko n’iyo umugore yasurwaga n’abavandimwe b’uwo musore, umugabo yabyakiraga nabi.

Munyanziza agira ati “Narebaga no muri terefoni ye, nkabonamo nimero za wa mugabo. Noneho nkamubwira ko ntamushaka mu rugo rw’iwabo kuko n’abantu baho bantera ibikomere”.

Bashinze urugo muri 2000, kuri ubu bafite abana batatu. Bahawe amahugurwa ku buringanire n’ubwuzuzanye n’umuryango uharanira amajyambere y’icyaro DUHAMIC ADRI muri gahunda wise “women & Gals”, kuva muri Mata 2015, none bahamya ko imibanire yahindutse n’iterambere rikaza.

Imwe mu miryango y’abahinzi n’aborozi DUHAMIC ADRI yafashije kwiyunga.

Umugore wa Munyanziza, Muragijimana Primutive, na we ati “Nta kiganiro twagiraga, buri wese yakoraga ibye. Aho tumariye kumvikana yambwiye ko nko mu cyumweru yishyuraga 10,000frw by’inzoga. Ubu yaragabanyije ahubwo amafaranga ayazana mu rugo”.

Ngo nyuma yo guhurwa basigaye baganira ku bikorwa bikenewe ngo urugo rutere imbere. Umugabo yagabanyije amacupa y’inzoga n’umugore agabanya amafaranga yaguraga amavuta yo kwisiga no gusukisha imisatsi arabireka; kandi yirinda kugenda muri rwa rugo umugabo yamubuzaga.

Bahamya ko igitera ingo kubana nabi ari ukutaganira, kutamenya icyo uwo mubana akunda n’icyo yanga no kudashyira hamwe.

Bamwe mu bagenerwabikorwa ba gahunda ya "Women &Gals"

DUHAMIC ADRI yahisemo guhugura ku buringanire n’ubwuzuzanye amakoperative y’abahinzi, igamije gufasha abanyamuryango kurushaho kongera umusaruro.

Ugeziwe Janvier, Umuhuzabikorwa wa DUHAMIC ADRI, agira ati “Ni muri urwo rwego twashyizeho gahunda yo gukangurira abagize umuryango bose kugira uruhare mu kongera umusaruro w’urugo. Ni byiza kugabanya ibimara amafaranga ariko ukongera ubukungu mu rugo”.

Mu gihe cy’umwaka, umuryango DUHAMIC ADRI, umaze guhugura abagabo n’abagore 670 mu turere twa Muhanga na Kamonyi. Bateganya guhugurwa abagera ku 4,800 kugeza muri 2017.

Bemeza ko guhabwa amatungo byabaciye ku muco n’imyumvire yo gutega amaboko ngo bahabwe iby’ubuntu, nk’uko uwitwa Nyirahabinshuti Chantal, wafashe inguzanyo y’ingurube abivuga.

Bahabwa inguzanyo z’ingurube bazagenda bishyura gahoro gahoro.

Agira ati "Kuba bayaduha ari inguzanyo ni ikintu cyiza cyane kuko iyo uyakoresheje akugirira akamaro. Ukora neza uvuga uti nishyure no kugawa, kandi no mu itsinda turagenzurana ngo hatagira, ukoresha ayo mafaranga nabi."

Bizimana Emmanuel we ahamya ko kwaka inguzanyo mu baterankunga biteza imbere umuco wo kwigira.

Ati "Ntago abanyamahanga tubabonamo ko batuzaniye ibintu by’ubuntu nka byabindi bya kera, ahubwo baduha inkunga kuko babona tubashije gukora."

Inguzanyo z’amatungo aba baturage bazihabwa n’umuryango w’Abanyakoreya y’Epfo, Global Civic Sharing, ukaziha amatsinda yaganjije andi mu kugira ubwizigame buri hejuru.

Inguzanyo ngo zituma bakora cyane kugira ngo babone ubwishyu.

Uwo muryango ukorana n’amatsinda yo kuzigama 28 ari mu tugari dutanu tugize Umurenge wa Nyarubaka, agizwe n’abanyamuryango 426. Izo nguzanyo zigamije kubafasha kwiteza imbere, amafaranga atangwa mu byiciro, nyuma yo kwishyurwa hakagurizwa ikindi kiciro.

Hitimana Muhirwa Eric, umuhuzabikorwa mu mushinga w’inguzanyo z’amatungo, avuga ko gukorana n’amatsinda bitanga icyizere cy’uko nta ushobora kwambura.

Ati "Ubundi inguzanyo bayihabwa nk’igihembo. Ni gahunda ifata impu ebyiri, harimo gutoza abaturage kwigira kuko tubaha inguzanyo ari uko babanje kwizigama. Gukorera mu matsinda baragenzurana ku buryo iyo umwe akosheje hahanwa itsinda ryose."

Uyu muryango unatanga amahugurwa ku banyamuryango b’amatsinda mu buhinzi n’ubworozi no gukora imishinga.

Uyu mushinga watangiye mu 2009, utanga inguzanyo zo kugura ihene, ingurube cyangwa inka. Umugenerwabikorwa asaba inguzanyo ashingiye ku bwizigame afite.

Ushaka ihene ahera ku bwizigame bw’ibihumbi bitanu agahabwa ibihumbi 50Rwf, ushaka ingurube asabwa ibihumbi bitandatu by’ubwizigame, akagurizwa 60 Rwf mu mezi umunani.

Naho ukeneye inguzanyo y’inka ahera ku bwizigame bw’ibihumbi 80Rwf akagurizwa 400Rwf azishyura mu myaka ibiri.

Mu kiganiro gito twagiranye n’umukozi wari utaye akazi yari amazemo ukwezi, yavuze ko ikimujyanye ari uko aho yakoraga bamubujije guteka saa sita kuko baba badahari ngo “arye ibyaraye”, ubundi bakaba bamuraza ahantu habi kandi mu byumba harimo uburiri bwiza.

Ati “Yego twavuye iwacu turara ku misambi, ariko se ni gute bakumeshesha amashuka ya buri munsi wowe bakuraza mu marido yacitse no kuri matora yaboze? Abakire na bo barakabya”!

Iyi ni ifoto yavuye mu mashusho yagaragazaga ubugome ndengakamere uyu mukozi wo mu rugo muri Uganda yakoreye uyu muziranenge. Impamvu umukozi yakora nk’ibi ntizivugwaho rumwe, gusa ikizwi ni uko hari n’abakoresha bafata abakozi bo mu rugo nk’ibisimba bikaba byabatera umutima mubi, abana bakabirenganiramo. Birashoboka ko hari uwababazwa no kongera kubona iyi foto ariko tubikoreye kubibutsa ko aho usize umwana uhahoza ijisho.

Gufata nabi umukozi wo mu rugo binengwa n’umubyeyi twasanze mu Kagari ka Gihinga, Umurenge wa Gacurabwenge mu Karere ka Kamonyi, Kamaliza Peruth, uvuga ko nubwo nta mukozi akoresha, abagore b’abasirimu bagira ubujiji mu kudaha agaciro abakozi bakoresha.

Aragira ati “Abagore b’abasirimu ni injiji zikomeye! Kubona bafata umukozi uko bishakiye barangiza mu gitondo bakamusigira umwana. Mbere yo kugira ngo ufate abandi bantu neza, wagombye kubanza kwita ku mukozi kuko ubuzima bw’urugo rwawe buba bugizwe na we.”

Uyu mubyeyi agaya abakoresha usanga bima abakozi babo ibyo baryaho kandi ari bo baba babiteguye. Avuga ko usanga bitera umukozi umururumba akaba yarya ibigenewe umwana cyangwa agahumanya amafunguro aba yateguriye abakoresha. Ngo hari n’abo usanga biba udukoresho babone hafi ngo bigurire ibyo babimye.

Ikibazo cy’abakozi bo mu rugo gikunze kuranga ibiganiro hagati y’abagore , bavuga ko badashobotse. Hari ababanenga ubunebwe, gusesagura, kutemera kuguma mu rugo no gusuzugura.

Mu kiganiro abahagarariye Inama y’Igihugu y’Abagore, CNF, mu mirenge no ku Karere ka Kamonyi, cyo ku wa 4 Werurwe 2016, bagarutse ku kibazo cy’uko abakozi bo mu rugo bafashwe, maze basabwa kwegera abagore nk’abakoresha babo bakabakangurira kubaha agaciro.

Mukanyandwi Rose, Umuhuzabikorwa wa CNF mu Karere ka Kamonyi, ati “Hari intero dufite nk’abagore ngo ‘wite ku mwana wese nk’uwawe’. Iyo ntero rero itwumvisha ko niba ntifuza ko umwana wanjye abaho nabi, ni na ko nakagombye guharanira ko umwana w’umuturanyi abaho neza”.

Imbuto nshya irimo gutangwa n’Ikigo cy’Igihugu gishinzwe Ubuhinzi, RAB, ngo ituburwe, indi igatangwa n’abahinzi bayihawe umwaka ushize ngo bayitubure, hakaba n’itangwa n’uruganda rutunganya ifu y’imyumbati rwa Kinazi rukorera mu Karere ka Ruhango.

Abahinzi b’imyumbati barimo guhabwa imbuto nshya yaturutse muri Uganda.

Umukozi ushinzwe Ubuhinzi mu Karere ka Kamonyi, Mwizerwa Rafiki, atangaza ko mu gihembwe cy’ihinga 2016 A, ubuhinzi bw’imyumbati bwari kuri 15% ariko muri iki gihembwe cya 2016 B buzagera kuri 60%, bitewe n’uko imbuto nziza yatangiye kuboneka ku bwinshi.

Aragira ati “Uyu mwaka wa 2016, twifuzaga guhinga imyumbati kuri hegitari 3,200. Kuri ubu tumaze guhinga hegitari 1,562 zingana na 48%. Kuko gutera bigikomeza twizeye kugeza kuri 60% kandi biraduha icyizere cy’uko umwaka utaha nta kibazo cy’imbuto kizaba kivugwa mu karere”.

Kuva muri 2014, igihingwa cy’imyumbati kigaragayemo uburwayi bwa kabore, abahinzi batatse inzara, cyane cyane abo mu mirenge y’amayaga ihingwamo imyumbati cyane.

Mutarindwa Jean Claude, wo mu Murenge wa Musambira, avuga ko uburwayi bw’imyumbati bwagize ingaruka ku bahinzi bari batunzwe na yo kuko ikilo cy’imyumbati cyavuye ku 150 frw kikagera kuri 400frw.

Nyuma yo guhabwa imbuto y’imyumbati n’Uruganda rwa Kinazi, yagize ati “Twebwe nk’abahinzi turumva twashubijwe kuko duteze amakiriro kuri iyi myumbati. Tuyiryamo ubugari, tuyirya igeretse ku bishyimbo, tuyirya rweru [itogosheje], kandi ni na yo dukuraho amafaranga iyo tugurishije”.

Twagirimana Narcisse, na we wo mu Murenge wa Musambira, uhamya ko kurwaza imyumbati byateje ubukene mu ngo; arifuza ko nyuma yo guhabwa imbuto nzima, abahinzi bafashwa kuyitaho bakoroherezwa kubona ifumbire.

Imbuto iri guhabwa abahinzi yaturutse muri Uganda. Abashakashatsi ba RAB bagiye kuyisuzuma mbere y’uko yinjizwa mu Rwanda, kandi n’abahinzi bahamya ko aho yabanje guterwa, yatanze umusaruro mwiza kandi nta burwayi bwagaragayemo. Abahinga imyumbati na bo kandi bemerewe kugura ifumbire kuri nkunganire.

Murekeyisoni Souzana wo mu Murenge wa Gacurabwenge, Akarere ka Kamonyi, ahamya ko yamaze imyaka 17 abana n’umugabo umuhohotera kuko yamukubitaga.

Avuga ko inkoni yakubiswe zatumye akuramo inda, amukura amenyo, agera aho ava mu rugo umugabo ashatse kumutema.

Bwenge Jean Marie Vianney Umunyamategeko wa Pro Femmes.

Uyu mubyeyi w’abana barindwi, avuga ko impamvu zamuteraga kudatanga amakuru ku ihohoterwa yakoraga, ari uko nta tegeko rimurengera yari azi, kandi agatinya kwahukana kubera ko yari afite abana benshi.

Agira ati “Nabayeho kubera umugabo mubi, akajya antera inda buri mwaka, nkareba kwahukana mfite inda, uruhinja n’undi mwana nshoreye bikanyobera nkihangana. Ariko ubu maze imyaka ibiri nibana naramuhunze.”

Murekeyisoni avuga ko icyatumye ibibazo biri mu rugo rwa bo bimenyekana, ari uko umugabo yashatse kumutema yamubura agatema matora, ubuyobozi n’inzego z’umutekano bagatabara.

Bwenge Jean Marie Vianney, Umunyamategeko w’Impuzamuryango Pro Femmes Twese Hamwe, ahamya ko umuco wo kudatanga amakuru ku ihohoterwa ari kimwe mu bidindiza urugamba rwo kurirwanya, agasaba abantu bose kutareberera ahari umuntu ahohoterwa.

Ati “Ikibazo kikiremereye ni uko abantu bakibigira ubwiru. Ibidakwiye gukemurirwa mu muryango abantu bakabiceceka bagashaka kubyunga, yewe hakaba harimo n’abantu baba mu ihohoterwa abandi babarebera.”

Uwamahoro Prisca, Umuyobozi w’Akarere ka Kamonyi wungirije ushinzwe imibereho y’abaturage, atangaza ko ubuyobozi bufite intego yo gukemura ikibazo cy’ihohoterwa rishingiye ku gitsina, hifashishijwe inama zitangwa mu mugoroba w’ababyeyi no mu nteko y’abaturage.

Ati “Uko dukomeza kurushaho gukangurira abaturage gufashanya, buri muturage akaba ijisho rya mugenzi we, ahari ihohoterwa abaturage bagafatanya kubigaragaza, mu nama bagirwa mu mugoroba w’ababyeyi bagafatanya kubikemura.”

Mu karere ka Kamonyi hamaze kugaragazwa ingo zigera kuri 500 zibana mu ihohoterwa.

Ku nshuro ya mbere, Abagize Inama Njyanama y’akarere ka Kamonyi batowe mu mpera za Gashyantare 2016 bakoze inama, bemeza ko bagomba kwegera abaturage, bagakosora ibyo bagenzi babo bari muri manda yacyuye igihe, bagawe.

Njyanama nshya y’Akarere ka Kamonyi yateranye ku nshuro yayo ya mbere.

Karuranga Emmanuel, Perezida w’Inama Njyanama y’Akarere ka Kamonyi, atangaza ko mu gihe cyo kwiyamamaza, abaturage bagaye abajyanama kutabegera, biviramo bamwe mu bari basanzwe kudatorwa.

Yagize ati ”Mu kwiyamamaza abaturage bagiye bakigarukaho, ku buryo hari abajyanama batigeze bagaruka bazize ko muri manda barangije, abaturage batababonye. Twemeje ko abajyanama bazasubira mu mirenge batorewemo bakabashimira ko babatoye, bakumva n’ibitekerezo byabo”.

Mu mirenge itandukanye abaturage bagaragaza ko bifuza kubona abajyanama hafi yabo bakungurana ibitekerezo.

Rupiyo Wellars wo mu Murenge wa Rugarika, agira ati “Erega ntidukunda kubabona. Duherukana tubatora. Turabasaba ko bazajya baza bakatwegera tukavugana, niba hari icyo tubasaba tukakibabwira, niba hari icyo tubunguraho inama, natwe erega natwe tuba dufite ibitekerezo twabungura”.

Karuranga Emmanuel, Perezida wa Njyanama y’Akarere ka Kamonyi, avuga ko bafashe ingamba zo gukora ibitaragenze neza kuri Njyanama icyuye igihe.

Mukamana Rose, wo mu Murenge wa Runda, we, avuga ko atazi inshingano z’abajyanama, akaba abasaba kwegera abaturage bakazibasobanurira. Ati “Bajye baza badusure baduhugure, tumenye n’icyo twabatoreye icyo ari cyo”.

Uretse kwegera abaturage, Inama Njyanama y’Akarere ka Kamonyi, yagaragarijwe aho imihigo y’umwaka wa 2015/2016 igeze ishyirwa mu bikorwa, maze abajyanama basabwa kugira uruhare mu gukora ubuhwituzi ngo 35% by’imihigo ikiri hasi cyane, yihutishwe.

Iyo mihigo irimo ibagiro rya kijyambere, uruganda rwa briquettes, amatara yo ku muhanda Gihinga-Kamonyi, gukora imihanda, gufasha abagore n’urubyiruko mu imishinga iciriritse, kugeza internet mu mirenge, Gira inka, inkunga ya VUP, ibyumba by’amashuri n’ikibazo cy’abana bata ishuri.

Radio Vatican, mu makuru yayo y’i saa munani zo mu Rwanda yatangaje ko kuri uyu wa gatanu, tariki ya 11 Werurwe 2016, Papa yatoye Padiri Anaclet Mwumvaneza, wari Umunyabanga Mukuru wa Caritas Rwanda, amugira Umwepiskopi wa Diyosezi ya Nyundo.

Diyosezi wa Nyundo yahaweUmushumba mushya.

Azasimbura Musenyeri Alexis Habiyambere wayoboraga iyi Diyosezi kuva mu 1997, ariko akaba ageze mu zabukuru dore ko kuri ubu afite imyaka 77.

Padiri Anaclet Mwumvaneza yavutse ku ya 4 Ukuboza 1956, avukira i Murambi, muri Paruwasi ya Rulindo, muri Arikidiyosezi ya Kigali.

Amashuri abanza yayize i Rulindo (1963-1969), ayarangije akomeza ajya mu Iseminari Ntoya ya Kabgayi (1969-1973).

Mu kigero cy’imyaka 25 yaje gusubira mu Iseminari Ntoya i Kabgayi mu cyiciro cy’abigaga bakuze (Séminaire des Aînés).

Nyuma y’imyaka 4 yatangiye iseminari nkuru i Rutongo (1984-1985), ahavuye akomeza mu cyiciro cya Filozofiya (1985-1987), akomereza muri Tewolojiya (1987-1991) muri Seminari Nkuru ya Nyakibanda, muri Diyosezi ya Butare, ahabwa Isakaramentu ry’Ubusaserdoti ku ya 25 Nyakanga 1991.

Ubutumwa bwe yabukoreye muri Paruwasi Kabuye (1991-1992) no muri Paruwasi y’Umuryango Mutagatifu (1992-2000), aho yavuye agiye gukomeza amasomo ye i Roma (2000-2004), akaba yarahavanye impamyabumenyi y’ikirenga mu by’amategeko ya Kiliziya.

Ahindukiye yakoze ubutumwa bwe muri Paruwasi Kicukiro (2004-2005), akaba yari n’umwarimu mu Iseminari Nkuru ya Nyakibanda. Yabaye kandi Umuyobozi wa Caritas ya Arikidiyosezi ya Kigali (2005-2013); ubu akaba yari Umunyabanga Mukuru wa Caritas Rwanda, kuva mu mwaka w’2013.

Tariki 10 Werurwe 2016, ku nshuro ya mbere yabasuye; abaturage b’Umurenge wa Musambira bakiranye amashyi n’impundu Umuyobozi w’Akarere ka Kamonyi, Udahemuka Aimable, uheruka gutorwa ku wa 22 Gashyantare 2016, bamuha n’impano zitandukanye.

Abanyamusambira bakira Umuyobozi mushya w’Akarere ka Kamonyi ari na ko kabo.

Udahemuka yatorewe mu Murenge wa Musambira aho yari yiyamamarije ashaka kuba umujyanama w’akarere; akaba yarijeje abaturage kubagezaho ibikorwa remezo birimo amazi n’amashanyarazi.

Nyuma y’ibirori byo kwakira umuyobozi w’akarere byahuriranye no gusezera ku wari Umunyamabanga Nshingwabikorwa w’Umurenge wa Musambira, Kayiranga Emmanuel, watorewe kuba Umuyobozi w’Akarere ka Rulindo, abaturage batangaje icyo bifuza ku buyobozi.

Ntamabyariro Felicien, wo mu Mudugudu wa Gacaca, Akagari ka Cyambwe, asaba umuyobozi mushya watorewe mu Murenge wa Musambira, kubaha amashanyarazi n’amazi.

Ati “icyo tumwifuzaho, nk’uko yabitwemereye, naze arebe abantu batishoboye, abahe uwo muriro, abahe amazi”.

Umuyobozi mushya w’Akarere ka Kamonyi ahabwa impano.

Bandora Florien, wo mu Mudugudu wa Mbari, Akagari ka Karengera, ahamya ko abayobozi bacyuye igihe babayoboye neza, akaba yifuza ko abayobozi bashya na bo bazegera abaturage bagafatanya gufata ibyemezo ku bibazo biri mu murenge.

Muri uru ruzinduko, Umuyobizi w’Akarere ka Kamonyi, Udahemuka Aimable, yabijejeje ko ibyo yababwiye akibizirikana kandi ko azabyubahiriza, ariko na bo abasaba gushyigikira gahunda za Leta zirimo isuku bakanabungabunga umutekano no kurwanya Malariya.

Yagize ati “Isezerano ryabaye isezerano, nanjye sinzabahemukira, kuko nitwa ‘Udahemuka’(…) turabasaba muri gahunda za Leta, kubahiriza gahunda y’isuku, kurwanya indwara ya Malariya no kwibungabungira umutekano.”

Ibi birori byabimburiwe n’Ihererekanya bubasha hagati y’uwari Umunyamabanga Nshingwabikorwa w’Umurenge wa Musambira n’ushinzwe Irangamimerere n’iyemezwa ry’impapuro mpamo, Mwitiyeho Gratien, wasigaranye inshingano z’ubuyobozi bw’umurenge wa Musambira.

Umuyobozi w’Akarere ka Rulindo n’uw’aka Rulindo wambaye karuvati y’umutuku basuye abaturage ba Musambira.

Kayiranga Emmanuel wari umaze imyaka icyenda ayobora Umurenge wa Musambira, ahamya ko ahasize iterambere kandi yifuza ko n’umusimbuye azarikomeza.

Mukanyandwi Rose, umuhuzabikorwa w’Inama y’igihugu y’abagore mu karere ka Kamonyi, yahamagariye bagenzi be batowe guhagararira abagore kubegera bakababa hafi bakajya babasobanurira gahunda za Leta kuko abenshi muri bo badindira mu iterambere babitewe no kutamenya.

Bahamagariwe kwegera abagore mu mudugudu.

Agira ati “Turashaka kubona umugore mu muganda, turashaka kubona umugore abasha kwihangira imirimo ibyara inyungu.

Mu rwego rw’imibereho myiza turashaka kubona umugore ari umusemburo w’isuku aho ari hose ndetse akagira uruhare mu kurwanya ihohoterwa rikorerwa mu miryango.”

Yabisabye bagenzi be bahagarariye abagore ku rwego rw’imirenge, mu nama yabahuje kuwa gatanu tariki 4 Werurwe 2016, abasobanurira ko mu mudugudu ari ho umugore bahagarariye atuye, bakaba bagomba kuhamusanga bakamukorera ubukangurambaga.

Bamwe mu bagore batari mu buyobozi bavuga ko batigeze bamenya imikorere y’Inama y’igihugu y’abagore kuko mu bibazo bahura na byo batigeze babona hari umugore batoye ubageraho.

Kanakuze Josee wo mu murenge wa Gacurabwenge ati “Abagore turabatora ariko ntibagaruka ngo bumve ibibazo byacu. Byaba byiza bagiye basura ingo zacu bakamenya ibiberamo kuko hari abahohoterwa. Dukeneye no gufashwa kugera ku iterambere nk’abandi.”

Mukanyandwi ntahakana ko muri manda zatambutse, hari abaturage batamenye ibikorwa by’Inama y’igihugu y’abagore, ariko ngo biteguye kwikosora.

Ati “muri iyi manda nshyashya dutangiye, turifuza y’uko ijwi ry’inama y’igihugu y’abagore ryumvikana ku rwego rw’umudugudu.”

Mu mihigo y’abatorewe guhagararira Inama y’igihugu y’abagore muri manda y’myaka itanu, biyemeje guharanira iterambere ry’umugore mu bukungu bamuhugura gukora imishinga y’iterambere, kuzigama no gukorera mu makoperative.

Mu mibereho myiza ngo bazatoza abagore kugira isuku no kwirinda imirire mibi, kwita ku buzima bwa bo bipimisha indwara zikunze kubibasira no guhagurukira uburere n’uburezi bw’abana.

Mu miyoborere myiza n’ubutabera, abakuriye abagore ngo bazashishikariza abagore kujya mu nzego zifata ibyemezo, kwitabira umugoroba w’ababyeyi no kurwanya ihohoterwa.

Abagore 120 bo mu Karere ka Kicukiro bakoraga ubucuruzi bwo mu kajagari bafashijwe n’umuryango wita ku bana n’abagore “MCDC” (Mother and Child Development Center) biga imyuga yatumye bahindura imibereho.

Abagore bajyaga bacuruza agataro, barakaretse biga imishinga yo kubateza imbere.

Nyinawumuntu Florence, wize umwuga wo gutunganya imisatsi no guca inzara, ahamya ko kumenya umwuga byamuhinduriye imibereho kuko iyo abonye akazi kamufasha gutunga umuryango we n’abana babiri.

Ati “Mu gihe twacuruzaga agataro, bwari ubuzima bukomeye kuko twahoraga ducungana n’abashinzwe umutekano. Ariko ubwo nzi umwuga, mbona ikiraka nkayarya ntuje. Ubuzima bw’agataro ntabwo ari kimwe n’ubwo gusuka [imisatsi].”

Abatarashoboye gusuka, bigishijwe uburyo bwo kwihangira imirimo muri gahunda ya “Nshore-nunguke”, batozwa kwizigama; babona aho baguza igishoro cyo gukora ubucuruzi butari mu kajagari.

Mukarukundo Fortunee, acururiza imboga mu isoko rya Ziniya riherereye mu Murenge wa Kicukiro. Yahereye ku giceri cya 100Frw yizigamiraga buri munsi, aguza amafaranga ibihumbi 100Frw, abona igishoro ajyana mu isoko.

Aba bagore bize imyuga ari na ko bakomeza gutungwa n’ubucuruzi bw’agataro kuko nta yindi mibereho. Muhimpundu Olive ati “Narabyukaga mu gitondo nkajya kurangura, nkaza mu rugo, agataro nkagatereka nkajya kwiga. Nataha nkajya kuzenguruka ncuruza.”

Hari n’ikibazo cy’abana bagendana na ba nyina bacuruza, bikaba bitera impungenge kuri ejo hazaza h’abo bana.

Mukagahima Venantie, ati “Iyo najyaga gucuruza agataro, umwe naramuhekaga, undi nkamushorera. Noneho nagera aho ntereka bakirirwa biruka mu muhanda bacanamo n’amagare n’imodoka.”

Ingabire Alice, umwe mu bashinze MCDC mu mwaka wa 2012, avuga ko bahisemo gufasha abana kuko babonaga bitaye kuri ba nyina gusa, umushinga utagera ku ntego.

Ati “Kuko twashakaga kubashyira mu myuga ariko bakabura aho basiga abana. Twahisemo kubashyiriraho irerero.”

Cyakora ngo uyu muryango ntiwabashije gufasha abanyagataro bose. Ingabire asaba abakeneye gufasha aba bagore, kubumva no kubagira inama ku buryo bifatira icyemezo cyo kureka agataro.

Mu myaka itanu ishize nta wari gutekereza ko uyu mudugudu wabarirwaga mu ikennye muri aka karere, ushobora kugera ku rugero rwo kuba buri muturage uwutuyemo ashobora wigurira ubwisingane mu kwivuza buzwi nka “mituweli.”

Abagize koperative CORIMU ihinga umuceri.

Ariko byarashobotse kubera amatsinda atandukanye ahabarizwa, harimo iry’abagore rikora ubworozi bw’ingurube rikita no ku turima tw’igikoni, iry’abakene n’iry’urubyiruko nayo yorora ingurube, hakaba koperative y’abahinzi b’inanasi, ab’umuceri n’iy’aborozi b’inzuki.

Mukeshimana Philomene, ni umwe mu bahatuye uhamya ko gukorera hamwe byatumye bahindura imibereho, kuko bafashanya kubona ibyo bakeneye by’ibanze.

Avuga ko abanyamuryango 550 bari muri Koperative ihinga umuceri (CORIMU) biyishyuriye mitiweli babikesha iyi koperative.

Agira ati “Koperative yishyuriye imiryango yacu mituweri, izayadukata nitugurisha. Urumva rero ko kuba muri koperative byaturinze guhangayika.”

Abagera ku cya kabiri muri Mushimba boroye ingurube.

Munyankaka Faustin nawe uhatuye avuga ko no mu yandi makoperative n’amatsinda, abayagize bahera ku mafaranga ari mu bubiko bakishyura Mituweri, bagurisha ku musaruro bakazayasubizamo.

Ati “kwishyira hamwe byaturinze guhangayika kuko kubonera amafaranga icyarimwe byaratugoraga.”

Nyetera Paul, uyobora uyu mudugudu ubarizwamo abaturage 1.366 baba mu miryango 134, avuga ko kuba abenshi baririhiye byorohereje na Leta guhita yishyura abari basigaye bakennye badafite ubushobozi bwo kwiyishyurira.

Ati “Umwaka wa 2015 warangiye umudugudu wacu warishyuye mituweri 100%. Dufite imiryango 33 itishoboye irihirirwa na Leta, abandi bose biyambaje amatsinda ya bo abafasha kwishyura.”

Iri terambere barikesha abakorerabushake b’Abanyakoreya babafashije guhindura imyumvire, bakabashyiramo imyumvire yo gushaka kwikorera. babafashije gukora imishinga bakorera hamwe mu matsinda no mu makoperative ku buryo buri wese afite aho abarizwa.

Buri wa mbere w’icyumweru, Komite nyobozi y’umudugudu n’Abanyakoreya bakora inama yo kurebera hamwe ibikenewe mu iterambere ry’umudugudu; naho buri wa gatanu wa nyuma w’ukwezi hakaba inama rusange y’abaturage.

Iyi gahunda yatangijwe kuwa gatandatu tariki 27 Gashyantare 2016, mu Murenge wa Mushimba mu Kagali ka Gihembe, aho abayobozi n’abaturage bafatanyije gusiza ikibanza cyo kubakiramo imiryango ibiri itishoboye.

Abayobozi bifatanyije n’abaturage gusiza ikibanza cyo kubakiramo abatishoboye.

Udahemuka Aimable, umuyobozi w’Akarere ka Kamonyi yavuze ko bashyizeho gahunda yo gutuza abaturage mu mudugu basangiye inzu imwe ifatanye ariko irimo inzu ebyiri mu rwego kurondereza ubutaka.

Yagize ati “Ni igikorwa twatangiye kandi tuzakomeza gukangurira abaturage gutura ahegereye ibikorwa remezo.

Ikibazo gihari ni uko ubukangurambaga burakorwa ariko bushobora kuba ari bucye. Ingamba tuzanye ni ugukomeza kwigisha, dukomereze aho abo dusimbuye bari bagejeje.”

Yavuze ko gutuza abaturage ku midugudu bigamije kubagezaho ibikorwa remezo no gutandukanya ubutaka bwo gutura n’ubwo guhinga.

Abaturage bo basanga kwegerana bituma umwe arebera ku kiza mugenzi we yakoze nawe akagerageza kumwigana, bikabafasha kujyana n’igihe.

Dushimimana Eugene, umaze imyaka ibiri yimutse mu manegeka akaza gutura ku mudugudu, ahamya ko aho yari atuye atamenyaga gahunda z’iterambere, ariko ngo yageze ku mudugudu amenya amakuru.

Ati “Iterambere ni uko ubasha kwegerana n’abantu ukajya mu nama, bakakuganiriza gahunda zigezweho hanyuma nawe ukazinjiramo. Dore nk’ubu nageze aha njya muri koperative y’abahinga umuceri none ndabasha kwirihira Mutuweri.”

Umuyobozi w’ishami rishinzwe ubutaka n’imyubakire mu karere ka Kamonyi, Rwizihirwa Innocent, atangaza ko ubwitabire bwo gutura ku mudugudu bugeze ku kigereranyo cya 79,8%.

Avuga ko nta baturage bagituye mu manegeka, uretse abagituye mu duce tutagenewe umudugudu.

Tariki 23 Gashyantare 2016, Umunyamabanga wa Leta muri Minisiteri y’Umutungo Kamere, Evode Imena, yasuye bimwe mu birombe bicukurwamo amabuye y’agaciro mu Murenge wa Rukoma, mu Karere ka Kamonyi.

Abacukuzi b’amabuye y’agaciro ngo babangamiwe no kudakorana n’amabanki.

Abacukuzi bagaragaragaje ko bafite ikibazo cyo kongera umusaruro kuko bahura n’imbogamizi yo kudakorana n’amabanki kuko atemera gutanga inguzanyo ku mishinga y’ubucukuzi.

Umuyobozi wa Koperative KODAMIKOTA icukura mu Kagari ka Murehe, yagize ati “Ibirombe bikenera ishoramari rirerire kandi nta banki ishobora gutanga inguzanyo ku bikorwa by’ubucukuzi. Batubwiye ko iyo nguzanyo idatangwa”.

Kudahabwa inguzanyo ngo biterwa n’uko amabanki atagira icyizere ku musaruro uva mu mabuye; nk’uko Rugiramumaro Wamukoni Alphonse, umucukuzi wo mu Murenge wa Kayenzi, abivuga.

Ati “Nta banki ishobora kugirira icyizere amabuye y’agaciro kubera ko umucukuzi ashobora kwizera kubona umusaruro akawubura. Ikindi nta bwigenge ku giciro Abanyarwanda tugira. Abanyamerika n’abashinwa ni bo bagishyiraho”.

Abacukuzi bakomeza bavuga ko igishoro gike gituma imikorere yabo itajyana n’igihe, kuko bagikora mu buryo bwa gakondo kandi kugira ngo imirimo yihute bakagombye gukoresha ikoranabuhanga ry’amamashini, amashanyarazi n’ibindi bikoresho byihutisha akazi.

Minisitiri Evode Imena asura ibirombe bya Rukomo mu Karere ka Kamonyi.

Evode Imena, Umunyamabanga wa Leta muri Minisiteri y’Umutungo Kamere, atangaza ko ibyo bibazo by’abacukuzi bizwi.

Ngo hariho gahunda yo kubafasha kwiga umushinga waka inguzanyo, hagaragazwa umusaruro ushobora kuva mu kirombe mbere y’uko gicukurwa, maze n’amabanki agaheraho atanga inguzanyo.

Aragira ati «Igituma nyine ubucukuzi budatera imbere nk’uko tubyifuza, twabiganiriyeho n’abayoboye amabanki, bo bifuza kumenya ubwinshi n’ubwiza buba buri mu ndiri y’amabuye y’agaciro.

Inyigo nk’iyo rero ntago abacukuzi bafite ubushobozi bwo kuyikora. Minisiteri igiye gushyiraho impuguke zizabafasha gukora inyigo”.

Umunyamabanga wa Leta yasuye ibirombe bitatu muri 11 bicukurwamo Koruta na Gasegereti mu murenge wa Rukoma. Abacukuzi bagarutse no ku kibazo cy’igiciro cy’amabuye y’agaciro cyagabanutseho 40%.

Abitabiriye amatora y’abajyanama b’uturere yabaye kuri uyu wa mbere tariki 22/2/2016, ntibashidikanya ku bubasha abajyanama bafite bwo gufata ibyemezo ku bibakorerwa, ariko hari abagaragaza impungenge z’uko babaheruka babatora.

Munyakayanza avuga ko aho ibikorwa bigeze ntamuyobozi wagatekereje gusubiza u Rwanda inyuma

Kamonyi, Muhanga na Ruhango: ibyagezweho birashimwa ariko hari ibigikenewe

Mu murenge wa Rugarika, ho mu karere ka Kamonyi, abaturage bitabiriye amatora bagamije gutora abo bumvise bahigira kubagezaho iterambere mu gihe biyamamazaga.

Aba baturage bifuza impinduka mu mikorere y’inama Njyanama kuko muri manda icyuye igihe hari aho bavuga ko yagiye ifata ibyemezo bibabangamiye batabimenyeshejwe.

Batanga urugero rw’isoko rya Nkoto ryimuwe hatumviswe ibitekerezo bya bo, bakaba barakiriye iyimurwa rya ryo nk’itegeko.

Mu murenge wa Nyanza ibiro by’amatora byari bitatse

Rupiya Wellars, wo mu Kagari ka Bihembe, ati “ abo twatoye turabazi kuko baje kwiyamamaza batubwira ibyo bazatumarira, ubwo natwe twizeye ko batazadutenguha nk’abadutwariye isoko batatubwiye.

Uyu musaza anenga abajyanama ko batigeze bababa hafi bakebegera bakajya inama kuko abacyuye igihe batigeze bababona mu tugari baje kubaganiriza kubyo bagiye kubakorera.

Mu karere ka Muhanga, Mukamana Esprence utuye mu Mudugudu wa Gitongatingati mu Murenge wa Muhanga avuga ko hari ibindi bikorwa abamaze gutorwa bagiye kuza basanga ku buryo bizababera umusingi wo gukomeza kubyagura.

Barasaba abo batoye kubegera

Agira ati, “Nifuza ko abo tumaze gutora bazarushaho kunoza uburezi kuko mu giturage hakiri abana bata amashuri”.

Nikuze Floride we avuga ko yifuza ko abatowe mu nama Njyanama y’Akarere ka Muhanga barushaho guteza imbere ibikorwa by’ubuhinzi bwa Kijyambere, cyakora ngo ntacyo anenga cyakozwe nabi n’abajyanama bacyuye igihe kuko ngo bagerageje gukora ubuvugizi.

Munyakayanza Elias wo mu Mudugudu wa Nyamitanga mu Kagari ka kanyinya avuga ko aho igihugu kigeze nta muyobozi wagombye gutekereza kugisubiza inyuma kuko abaturage bari bamaze kwiteza imbere. Mu Ruhango , abaturage barasaba abo batoye kugaruka kubiyereka kuko hari ababatora batabazi bakabareba ku mafoto gusa.

Abatora babanzaga kwitegereza amafoto y’abakandida kugira ngo batore uwo bazi uzabateza imbere

Abanyaruhango bavuga ko atari ubwa mbere bitabiriye amatora, ariko akenshi ngo baza gutora kuko babimenyeshejwe gusa ndetse bakanabuzwa imirimo yabo bakagombye gukora, ugasanga n’abo baje gutora batanabazi.

Nizeyimana Valens, atuye mu mudugudu wa Kaburanjwiri akagari ka Munini umurenge wa Ruhango, akarere ka Ruhango, ati “naje kwitorera abayobozi bazatugeza ku iterambere, ariko simbazi nabababonye ku ifoto. Nasaba ko bagaruka bakatwibwira, kuko biyamamazaga njye sinashoboye kuhagera’.

Kuri site y’itora ya autonome abitabiriye amatora ntibagera ku cya kabiri

Uyu muturage kimwe n’abandi bavuga ko hari igihe baza gutora gusa kubera umuhango bagahita bisubirira mu kazi kabo, gusa ngo uzakomeza azagaruke bamumenye.

Mu mujyi wa Huye ubwitabire babaye buke, I Nyanza baza ku bwinshi

Abantu batuye mu mujyi ntibitabiriye amatora ku buryo bushimishije. Nko kuri site y’itora ya Autonome iherereye ahitwa ku Itaba mu Kagari ka Butare, ikaba imwe mu masite abiri ari muri aka kagari, abitabiriye amatora ntibashyika 1/2 cy’abari ku ilisiti y’itora. Kuri iyi site, hari nk’icyuba cyagombaga gutoreramo abantu 421, ariko hatoye abantu 95. Hari n’ikindi cyagombaga gutorerwamo n’abantu 580, ariko hatoye 163.

Ku bijyanye n’impamvu ubwitabire bwabaye bukeya, umwe mu banyehuye wari kuri site y’itira utashatse ko izina rye ritangazwa yagize ati "Hari abantu bagiye baza bavuga ngo reka tujye kubashyira mu myanya birire."

Yongeyeho ati "Ni na yo mpamvu urebye ubwitabire bwabaye bukeya". Umugabo umwe yahamije ibi: yaje gutorera kuri site atabaruriyeho, abakorerabushaje bamurangiye aho agomba kujya gutorera ariyumvira ati "ubundi se si ukubaheruka mbatora".

Nyanza bo bafata amatora nk’uburenganzira bwabo batagomba kwivutsa

Bamwe mu bamaze gutora bagaragazaga ko basobanukiwe n’ibyo bavuyemo bakishimira kuba batoye.

Uwitwa Mukantamati w’imyaka 52 y’amavuko avuga ko mbere y’umunsi umwe mbere y’uko amatora atangira yari yamaze kubyitegura agategura umwambaro n’ibindi byangombwa birebana n’amatora birimo indangamuntu n’ikarita y’itora nk’uko byasabwaga buri wese ageze mu cyumba cy’itora.

Yagize ati “Nitabiriye amatora nk’uburenganzira bwanjye bwo kwishyiriraho abayobozi bazanyobora bakangeza ku iterambere bagakomereza aho abandi bacyuye igihe bagejeje batuyobora”.

Gisagara na Nyamagabe Biteze iterambere ku bajyanama batoye

Mu murenge wa Nyanza mu karere ka Gisagara, abaturage bazindutse ari benshi mu tugari twose bagana ku biro by’itora aho byagaragaye ko mu masaha ya saa sita basaga nabarangije.

Umusaza Ngamije Venuste w’imyaka 69, yabwiye kigalitoday ko yararanye umugambi kuko biri mu nshingano ze gushyira ubuyobozi mu maboko ababizeza iterambere.

Bitabiriye amatora ku bwinshi kuko ari uburenganzira bwabo bubahirizaga

Ati “Ni inshingao yanjye kwitorera abayobozi kuko ejo h’abana banjye hazava kuri bo,nabo bazakore ibyo badusezeranya”.

Muri uyu murenge abaturage bavuga ko bagitegereje byinshi ku bayobozi byiganjemo ibikorwa remezo. Nk’uko imibare yabigaragaje ubwitabire mu matora mu murenge wa Nyanza bwageze kuri 99,5%.

Abitabiriye amatora mu kagari ka Nyamugari, mu murenge wa Gasaka, akarere ka Nyamagabe, biteze ku bayobozi batoye kuzahindura imibereho y’umuturage akarushaho gutera imbere.

Uwitwa Mukandori Fancoise, ati “Twe tureba umuntu w’inyangamugayo ugira aho atuganisha, wumva ibitekerezo byabo ayobora, abayobozi biyamamaje hano turabazi, ni ukuvuga ngo umuntu uba umuzi, imibereho ye, imyitwarire, noneho wamuha ijwi ryawe ukaba wizeye ko hari icyo azakugezaho.”

Charles Nkurunziza, nawe ni umuturage wo muri uyu murenge atangaza ko abo yatoye abitezeho gukomeza guteza imbere abaturage bitewe n’ubushobozi basanganywe.

Uwavaga mu bwihugiko yahitiraga ku isanduku agashyiramo urupapuro amaze gutoreraho

Yagize ati “abayobozi tumaze kwitorera mbitezeho gukomeza gushyigikira ibikorwa by’iterambere twari tumaze kugeraho kandi nkurikije ubunyangamugayo nsanzwe mbaziho, numva bazakomeza gushyigikira gahunda za leta izo arizo zose.”

Umunyamabanga Nshingwabikorwa w’Umurenge wa Gasaka John Bayiringire, atangaza ko amatora yagenze neza nta kidasanzwe cyabaye uretse bamwe mu baturage batazindutse bitewe n’uko umurenge uherereye mu mugi.

Yagize ati “Uko ubibona abaturage baracyaza ariko umubare munini umaze gutora, ariko bitewe n’imiterere y’umurenge hari abaturage usanga babanje guca mu mirimo abakora mu ma resitora, farumasi, n’ahandi ariko mu rusange amatora ameze neza nta kidasanzwe.”

Mu murenge wa Gasaka, site z’itora zakoreweho zikaba zigera kuri 6, naho mu karere ka Nyamagabe muri rusange zikaba ari 92 mu mirenge 17 ikagize.

Nyuma y’aya matora biteganijwe ko taliki ya 27 Gashyantare abajyanama rusange batowe, bazitoramo abagize komite nyobozi y’akarere n’abagize buro ya njyanama.

Abanyamakuru ba Kigali today mu Ntara y’Amajyepfo:

Caissy Christine Nakure

Clarisse Umuhire

Eric Muvara

Jean Pierre Twizeyeyezu

Ephrem Murindabigwi

Marie Josee Uwiringira

Marie Claire Joyeuse

Ku nshuro ya 13 u Rwanda rurizihiza Umunsi Mpuzamahanga w’Ururimi Kavukire kuri iki Cyumweru, tariki 21/2/2016. Insanganyamatsiko y’uyu munsi igira ati « Ikinyarwanda kinoze, ishingiro ry’uburere n’ubumenyi».

Uwase Uhoraningoga Christine n’ababyeyi be bahungiye mu bihugu bitatu ariko bakomeza kuzirikana Ikinyarwanda.

Uwase Uhoraningoga Christine yavukiye mu Burundi, akurira muri Uganda ndetse baza no kwimukira muri Repubulika Iharanira Demokarasi ya Congo, aho yabanaga na sekuru wari warahunze mu 1959.

Amashuri abanza yayize mu gihugu cya Uganda bavuga Ikinyankore n’Icyongereza, ariko sekuru ngo yabategekaga kuvuga Ikinyarwanda.

Agira ati «Mwavaga ku ishuri muvuga Ikinyankore, ariko wagera mu rugo, muzehe Mfizi (Sekuru) akavuga ngo izo ndimi mujye muzisiga hanze.»

Uyu mubyeyi ahamya ko ishema ry’Umunyarwanda ari ukuvuga Ikinyarwanda kuko n’abanyamahanga babanaga, batozaga abana ba bo ururimi rw’aho baturuka. Ati «N’ababyeyi bareke guhuzagurika ngo baharanire ko abana bamenya indimi z’amahanga gusa, ururimi kavukire ni wo muco.»

Umulisa Joseph Desire wavukiye muri Repubulika Iharanira Demokarasi ya Kongo, avuga ko mu rugo rw’iwabo bakoreshaga Ikinyarwanda ku buryo yahoraga yiyumvamo ko ari Umunyarwanda.

Agira ati «Navutse ku mugabo wari umwarimu mu Rwanda. Data yatubwiraga ko turi Abanyarwanda tutari Abanyekongo. Ubwo rero byatumye mpa agaciro ururimi rw’Ikinyarwanda.”

Uyu mugabo w’imyaka 50, azi Ikinyarwanda cyane ku buryo avuga n’imisango y’ubukwe.

Arasaba Minisiteri y’Umuco n’iy’Uburezi guha agaciro Ikinyarwanda bakakigisha abana bakiri bato. Ati “Icyongereza n’Igifaransa ntitubyanze, ariko numva Ikinyarwanda ari cyo cyakagombye kuza mbere.”

Umusaza Sempabwa Patrice avuga ko muri Kongo ababyeyi b’Abanyarwanda batozaga abana kuvuga Ikinyarwanda.

Umusaza Sempabwa Patrice wahungiye muri Repubulika Iharanira Demokarasi ya Kongo mu mwaka wa 1961, kuri ubu akaba afite imyaka 87, avuga ko barwanye ishyaka ngo abana babo batibagirwa umuco w’aho bakomoka.

Cyakora ngo hari abo bitoroheye kukimenya kubera gutura mu duce twarimo Abanyarwanda bake. Abo bakaba bakunze kugaragaza imbogamizi mu kukivuga, bakakivanga n’izindi ndimi.

Mbere yo kwinjira mu kazi ko gukemura amakimbirane mu baturage, abunzi bahawe amahugurwa y’iminsi ibiri. Bamwe muri bo bavuga ko iyo minsi idahagije kuko bigishijwe byinshi badashobora gufata ingunga imwe.

Ndungutse Andre, umwe mu bunzi bo mu Kagari ka Gihara, mu Murenge wa Runda; ati “Dukora dushingiye kuri ayo mahugurwa twahawe. Ariko twahuguwe ibintu byinshi ku buryo nk’abashya batabisobanukiwe neza. Dukeneye ko twajya dusurwa kenshi tukongererwa ubumenyi”.

Kugira ubumenyi buke bituma hari aho barenganya abaturage. Uwitwa Rwiranga Pascal, wo mu Karere ka Ngororero, yiyambaje inzu y’ubufasha mu by’amategeko, MAJ. ngo imufashe mu kibazo afitanye n’abunzi b’umurenge wa Mugina banze kumuha imyanzuro y’urubanza yaburanye hakaba hashize amezi atatu.

Umwali Pauline, Umuhuzabikorwa wa MAJ mu Karere ka Kamonyi, avuga ko Itegeko riteganya ko imyanzuro itangwa mu minsi itanu. Ariko Perezida w’Abunzi mu Murenge wa Mugina witwa Thadee akavuga ko bafashe icyo cyemezo bibwira ko cyubahirije Itegeko.

Ati “Nari nzi ko tuzategereza kumukorera indi myanzuro nyuma yo kongera kumuburanisha n’umuntu watambamiye urwo rubanza”.

Undi winubira imikorere y’abunzi ni uwitwa Nyiransengiyaremye Devotha wo mu Kagari ka Giko, Umurenge wa Kayumbu, uvuga ko yahawe imyanzuro itatu itandukanye ku rubanza rumwe; kandi ntiyemera ubujurire yakorewe kuko bwakozwe nyuma y’imyaka itandatu urubanza rurangiye.

Uyu mubyeyi yiyambaje MAJ imwegereye ngo imufasha gutegura ikirego kijya mu rukiko, kirega abunzi ngo basobanure impamvu y’iyo myanzuro ivuguruzanya n’uburyo bemeye ubujurire bwarengeje igihe.

Umuhuzabikorwa wa MAJ yemera ko mu bunzi bashya harimo abahuzagurika kubera ubumenyi buke.

Ati “Twabahuguye rimwe. Iyo hari ahagaragaye ikibazo, turabahamagara tukabereka ahari ikosa ariko na wa muturage tukamufasha kurenganurwa”.

Ngo ku bufatanye bwa Minisiteri y’Ubutabera, abafatanyabikorwa ndetse n’ubuyobozi bw’Akarere, bazakomeza guhugura abunzi uko ubushobozi buzajya buboneka.

Abakandida bagarutse ku mbogamizi abaturage bagira mu gihe bakeneye kubaka kuko baba batazi uko igishushanyo mbonera kimeze, cyangwa se inzira banyuramo bashaka ibyangombwa.

Abakandinda bahatanira guhagararira Umurenge wa Runda muri Njyanama ya Kamonyi.

Hari uwavuze ko azakora ubuvugizi ibyangombwa byo kubaka bikazajya bitangirwa mu nteko y’abaturage, ndetse n’abaturage bagasabonurirwa ibiteganyijwe kubakwa muri buri gace, aho guhakanirwa barangije kwitegura.

Uwo yagize ati «Nzakora ubuvugizi kugira ngo ku rwego rw’akagari hajyeho komite ishinzwe imyubakire kugira ngo hatagira umuntu warengana kandi ibyangombwa bikajya bitangirwa mu nteko y’akagari ».

Ikibazo cy’abaturage ba « Kavukire » bimuka ku ivuko kubera kutagira ubushobozi bwo kubaka ibihagenewe na cyo cyagarutsweho.

Undi mukandida yagize ati «Nzakora ubuvugizi bwo guha uburenganzira buri wese bwo kubaka inzu ijyanye n’ubushobozi bwe ariko atabangamiye gahunda y’imyubakire ».

Abakandida bagarutse no ku kibazo cy’imihanda inyura mu Murenge wa Runda yasibamye, maze bizeza gukora ubuvugizi igakorwa.

Bavuzemo umuhanda uva ku Ruyenzi ukanyura i Gihara, ugahinguka mu Nkoto, uva Kamuhanda ukanyura Cyoganyoni ugahinguka Bishenyi, n’umuhanda uva Kamuhanda werekeza mu Kagari ka Kabuga k’umurenge wa Ngamba.

Abaturage bo bagaragaje ko babazwa n’imyubakire yimura ba "Kavukire".

Abaturage na bo bahamya ko imiturire ari ikibazo mu Murenge wa Runda nk’igice cy’Umujyi wa Kamonyi, kuko kutagena umwanya w’abafite ubushobozi buke, bituma hari abatibona mu gishushanyombonera.

Nizeyimana Edouald, utuye mu Kagari ka Ruyenzi, ati « Igishushanyombonera kirimo kwimura abantu. Ba Kavukire nta bushobozi bafite bwo kubaka ibijyanye na cyo. Turasaba abazaduhagararira mu nama njyanama kutuvuganira hakaba ahantu hemerewe kubakwa n’abakene ».

Uwitwa Bahati Richard na we wo mu Kagari ka Ruyenzi, ati «Imiturire myiza ntibisobanura kugira inzu ingana n’igihugu cyose. Muri Runda usanga umuntu wemerewe kuhubaka byibuze ari ufite kuva kuri miliyoni 20 kuzamura, kandi birashoboka ko n’abafite amafaranga make batura, bitabaye ngombwa ko bahunga umujyi ».

Iyi gahunda ihuza abagore batuye mu mudugudu umwe, bafite abana bari munsi y’imyaka itanu n’abatwite, bakigishwa gutegura indyo yuzuye.

Mu gikoni cy’umudugudu batekera hamwe bakanagaburirira abana hamwe.

Akenshi indyo bategura iba igizwe n’ibyubaka umubiri byiganjemo ibinyamisogwe n’ibikomoka ku nyamanswa, ibirinda indwara birimo imboga n’imbuto n’ibitera imbaraga birimo ibinyamafufu.

Mujawamariya Beatrice, utuye mu Mudugudu wa Nyagasozi, Akagari ka Gihinga mu Murenge wa Gacurabwenge, yari yararwaje Bwaki umwana we afite amezi umunani, ariko ubu afite ubuzima bwiza abikesha amahugurwa yakuye mu gikoni cy’umudugudu.

Abana ntibahagira irungu.

Avuga ko umwana we yafashwe abyimba ibirenge, amatama n’umusatsi waracuramye.

Yagiye kumuvuriza ku Kigo Nderabuzima cya Kamonyi bamushyira muri gahunda y’imbonezamirire akajya ajya kwiga guteka, kugeza iyi gahunda yimuriwe ku mudugudu akaba ari ho ayikomereza.

Mujawamariya wamaze imyaka itanu yitabira inyigisho mbonezamirire, yishimira ko umwana we ameze neza kandi inyigisho yahawe aracyazikurikiza.

Agira ati “N’ubu ntakijyayo, nzirikana kugaburira umwana wanjye ibiryo birimo imboga, indagara, n’ifu ya Soya kuko badusobanuriye ko umwana wabiriye atarwara bwaki.”

Mukankubana Victoire, utuye mu Mudugudu wa Ryabitana, yitabiriye igikoni umwana we wari ufite umwaka, afite ibiro bitandatu gusa.

Uyu mubyeyi nawe yishimira ko abana be bakuze kubera igikoni cy’umudugudu.

Avuga ko nyuma yo guhugurwa ku ifunguro rikwiye guhabwa umwana muto, amugaburira ibifite intungamubiri none nyuma y’amezi atandatu umwana we yiyongereyeho ibiro bitatu.

Ibiryo bateka mu gikoni cy’umudugudu bizanwa n’ababyeyi, buri wese akazana ibyo afite ariko bakabitekera hamwe n’abana bagasangirira hamwe bigatuma bamenyerana.

Uwimana Rosine, ukuriye igikoni cy’umudugudu wa Ryabitana, atangaza ko buri wese azana ku byo asanzwe arya mu rugo rwe bagateka bagafata n’igikoma bahabwa n’ikigo nderabuzima.

Uwimana avuga ko umubyeyi utabashije kubona ibyo guteka abimenyesha bagenzi be, maze bakazana byinshi kugira ngo umwana we adasubira inyuma mu mikurire.

Ati “Ntitwaheza umwana ngo ni uko nyina yabuze ibyo guteka, ariko muri iki gikoni tugirana inama ku buryo umuntu yakwiteza imbere.”

Kumanura serivisi mbonezamirire mu midugudu bituma n’abatarwaye bayitabira

Umukozi ushinzwe Imirire mu Kigo Nderabuzima cya Kamonyi, Mukamwezi Venantie, atangaza ko bahisemo gusanga aba babyeyi mu midugudu yabo, kugira ngo baborohereze urugendo rwo kujya ku kigo nderabuzima kwiga guteka.

Akomeza avuga ko indi mpamvu yatumwe begera abaturage, ari uko bashaka gukumira uburwayi buterwa n’imirire mibi.

Beatrice yamaze imyaka itanu yigira guteka mu gikoni cy’umudugudu none ameze neza.

Ati “Ku kigo nderabuzima twakiraga abana bagaragaje uburwayi gusa. Ariko mu mudugudu, buri mubyeyi wese ufite umwana n’utwite tumutumaho akamenya uko agomba kwita ku mwana.”

Iyi gahunda bayifashwamo n’abajyanama b’ubuzima bahuguwe bafatanya n’abakozi babiri bo muri serivisi mbonezamirire kuzenguruka mu bikoni by’umudugudu umunani biteranira mu tugari tune tugize Umurenge wa Gacurabwenge.

Rushirabwoba Alfred, Umukozi ushinzwe Imibereho Myiza y’Abaturage mu Murenge wa Gacurabwenge, ahamya ko kumanura serivisi mbonezamurire mu mudugudu byatumye abarwaza indwara ziterwa n’imirire mibi bagabanuka.

Ati “Dufite ikigo nderabuzima kimwe mu murenge wose. Iyo babikorera mu mudugudu bituma ababyeyi bose bitabira. Mu kigo nderabuzima hajyaga abarwayi gusa, ariko mu mudugudu n’umuzima aba agomba kuza kuko kwirinda biruta kwivuza.”

Avuga ko muri Nyakanga 2015 bari bafite abana 47 bari mu ibara ry’umuhondo. Ni ukuvuga abatangiye kugwingira ariko batagaragaza uburwayi, n’abana icyenda bari mu ibara ry’umutuku bagaragaraho indwara ziterwa n’imirire mibi.

Rushirabwoba akomeza avuga ko nyuma y’amezi arindwi bigaragara ko imibare y’abana bafite ibibazo by’imirire mibi yagabanutse. Abari mu muhondo basigaye ari 23 naho mu mutuku haracyarimo abana batatu.

Avuga ko mu mihigo y’Umurenge wa Gacurabwenge y’umwaka wa 2015/2016, bateganya gusura buri muryango w’umwana ufite ikibazo cy’imirire mibi, ubuyobozi n’abafatanyabikorwa bakawufasha kubona ibikenewe ngo hanozwe imirire y’abana,

Bateganya kugenera imiryango nk’iyo amatungo magufi yo kuwufasha kubona ifumbire n’imirama y’imboga zo guhinga mu turima tw’igikoni.

Bavuye kwita ku bana bagera no kwiteza imbere

Gahunda y’igikoni cy’umudugudu ikorwa buri wa kane w’icyumweru, bakazenguruka mu ngo z’abakitabira, kugira ngo babagire n’inama z’ibyo bagomba kwitaho bifasha mu mibereho myiza y’umuryango.

Urugo basuye basiga barukoreye akarima k’igikoni bagatanga ubujyanama ku isuku, ariko iyo hari n’indi mirimo nko kubagara imyaka iri hafi y’urugo, mu gihe bategereje ko ibiryo bishya ngo bagaburire abana, abadatetse bafasha abagize umuryango imirimo.

Nyiramatama Rose w’imyaka 56, arera umwuzukuru we w’imyaka itanu. Ahamya ko kuza mu gikoni cy’umudugudu byatumye asabana n’ababyeyi bakiri bato kuko baganira kuri gahunda z’iterambere nawe akunguka n’ibindi bitekerezo. Ati “Nk’ubu nagiye mu itsinda rimwe na bo bituma menya gahunda yo kuzigama.”

Ababyeyi bitabira igikoni cy’Umudugudu wa Ryabitana bakoze itsinda ryo kuzigama ribafasha kubona inguzanyo zo gukora imishinga mito. Buri wese atanga amafaranga igihumbi uko bahuye. Uyakeneye arayaguza, akazishyura ashyizeho inyungu ya 10% by’ayo yagujije.

Uwayezu Rachel, avuga ko nyuma y’umwaka bizigama mu amafaranga bazaba bamaze kugira bongeyeho n’inyungu, bateganya kugurira buri wese ihene yo korora.

Ati “Itsinda rifite akamaro cyane kuko nta wagira ikibazo ngo abure aho aguza, rituma twereka abagabo ko igikoni cy’umudugudu kidufasha kwiteza imbere.”

Gahunda y’igikoni cy’umudugudu ntirakwira mu midugudu yose igize Akarere ka Kamonyi. Mu midugudu 317 ikagize, ifite ibikoni byo gutekera abana ni 281, nk’uko bitangazwa na Gafurumba Felix, ushinzwe ubuzima mu karere.

Ati “Aho imirire mibi yiyongera ni ahadakorerwa igikoni cy’umudugudu. Aho biri ubona hari impinduka nziza bitanga.”

Umwaka wa 2015 washojwe mu Karere ka Kamonyi habarurwa abana basaga 1000 bafite ikibazo cy’imirire mibi, bangana na 1,5% by’abana bafite munsi y’imyaka itanu.

Amatora y’inzego z’ibanze yabaye mu gihugu hose kuri uyu wa 8 Gashyantare 2016. Igikorwa cyo kwiyamamaza cyaberega imbere y’abaturage mbere y’uko batora.

Kwitonda yari yanze kwiyamamaza ariko abaturage bamutsimbararaho.

Mu mudugudu wa Nyagacaca, Akagari ka Ruyenzi mu Murenge wa Runda, ku mwanya w’umuyobozi w’umudugudu hiyamamaje umukandida umwe nyamara abaturage bamamaza uwari usanzwe ubayobora ariko we arabahakanira.

Cyakora ntibyamuhiriye kuko abaturage banze gutora uwo wiyamamaje bavuga ko uwabayoboraga ari we bashaka.

Babwiraga abakuriye amatora bati “ntidutora umukandida rukumbi, ahubwo niba mumushaka nimumushyireho.”

Uku gutsimbarara kw’abaturage byatumye Kwitonda Youssuf, wari wanze kwiyamamaza, yemera maze bamuhundagazaho amajwi 221 mu gihe uwo bari bahatanye yagize 72.

Kwitonda atangaza ko impamvu yari umuteye kwanga kuyobora umudugudu ari uko yifuzaga kwiyamamaza ku mwanya w’umujyanama uhagarariye umudugudu mu kagari.

Ati “Mu by’ukuri icyifuzo cy’abaturage ni itegeko. Kuba bifuje ko mbana na bo ku mudugudu byanshimishije, nzakomeza nkorane na bo neza”.

Ikibazo cy’umuyobozi ushakwa n’abaturage ariko we adashaka kuyobora cyagaragaye no mu mudugudu wa Nzarwa, Akagari ka Nyarubuye, mu Murenge wa Rugarika, aho abaturage bagiye kwikurira mu rugo uwitwa Iyakaremye Francois Xaveri wari umaze imyaka 10 abayobora ariko yahagera akabahakanira ababwira ko agiye kwiga.

Mu Kagari ka Nyarubuye na ho abo mu Mudugudu wa Nzarwa bari banze gutora batabonye umukuru w’umudugudu wabayoboraga.

Maniraho Jean Marie Vianney, umuturage w’umudugudu wa Nzarwa, avuga ko impamvu bari bamutsimbarayeho ari uko yabayoboye neza, akabegera, agafatanya na bo gukemura ibibazo nta muturage abangamiye.

Ati “Nyine ubwo iyo umuntu avuze ko adashoboye gukomeza kutuyobora, twamuretse dutora undi tubona ko yaba afite ubushobozi ariko turifuza ko yajya amugisha inama”.

Kuri Site y’Itora ya Ruyenzi, hari abari abayobozi bagawe n’umunyamabanga nshingwabikorwa w’akagari ko bakoze amakosa muri manda icyuye igihe bakaba batemerewe gutorwa.

Bamwe mu baturage batangaje ko barenganyijwe kuko batabwiwe amakosa yabo mbere bagategereza ko umunsi w’amatora ugera bakiri mu nshingano.

Mu kiganiro abakozi ba Komisiyo bagiranye n’abemerewe guhatanira kuba abajyanama b’akarere ka Kamonyi, tariki 5/2/2016, babibukije ko itariki yo gutangira kwiyamamaza ari iya 6/2/2016 ariko basabwa no kwirinda guterana amagambo cyangwa gusebanya hagati yabo.

Abakandida biyamamariza kujya mu nama njyanama muri kamonyi ntibagomba guterana amagambo.

Ndagijimana Leonard, Komiseri muri Komisiyo y’Igihugu y’Amatora ushinzwe Intara y’Amajyepfo, ugereranya igihe cy’amatora nk’ubukwe, agira ati “Guhiganwa si uguterana amagambo ahubwo byanze bikunze habamo utsinda n’utsindwa; icya ngombwa ni uko buri wese anyurwa n’ibivuyemo.”

Akarere ka Kamonyi gafite abakandida 89, ariko imyanya ipiganirwa ni 26. Ndagijimana ahamya ko abakandida bose Komisiyo yemeje, yabonaga bashoboye kuyobora. Ariko ngo aba bakandida ni bo bagomba kugaragariza abaturage ko babishoboye maze bakabitorera mu bwisanzure bwa demokarasi.

Akomeza avuga ko mu matora nta wugomba kubonamo mugenzi we umwanzi kuko uwo abaturage bahisemo na we ugomba kumuyoboka.

Ati “Naba meya se waragiye umusebya, uzabigira ute? Naba se ari Perezida wa Njyanama ukaba uri meya waragiye umusebya kandi agutegeka, uzabigenza gute?”

Abaturage na bo batangiye gutekereza ku bayobozi bazatora bashingiye ku bo babona bazabageza ku iterambere rirambye.

Habimana Justin utuye mu Murenge wa Rugarika, Akagari ka Kigese, mu Mudugudu wa Kirega, atangaza ko mu murenge wabo bakeneye umuyobozi uzabagezaho amazi meza kuko bavoma amazi mabi ya Nyabarongo n’ayo mu migende.

Ati “N’abaheruka kwiyamamaza muri manda zicyuye igihe, bari batwijeje ko bazatuzanira amazi, ariko duheruka babivuga none turakivomera ibiziba.”

Kankundiye Therese wo mu Mudugudu wa Rubuye, Akagari ka Kabagesera mu Murenge wa Runda, we avuga ko abayobozi barangije manda babazaniye amashanyarazi n’amazi meza, ariko ngo ubwo batazongera kwiyamamaza, barifuza ko abazayobora akarere bazakomereza aho abandi bagejeje bagatunganya imihanda.

Amatora y’abagize Inama Njyanama ateganyijwe tariki 22/2/2016. Hakaba hazatorwa abajyanama rusange baturutse muri buri murenge n’abahagarariye 30% by’abagore.

Mu saa sita z’amanywa yo kuri uyu wa gatanu tariki, 5/2/2016, niho Habiyakare Joseph w’imyaka 63 yagwiriwe n’urukuta rw’ikiraro yasaniraga umuryango wa mukuru we Kaboyi Albert, nawe uheruka kwitaba Imana, maze agejejwe mu rugo iwe ahita apfa.

Ikiraro cyagwiriye Habiyakare

Nk’uko bivugwa na Tuyisabe Fulgence, wamuhereza, avuga ko uyu musaza yarimo asana urukuta rw’ikiraro cyubakishije amatafari ya rukarakara, yajya kumuhereza andi agasanga, ibyo yaramaze kubaka byamugwiriye.

Aragira ati “Yarimo gusenya uruhande rumwe kugira ngo ahasane naho hari hatangiye gusenyuka, biriya yari amaze kubaka nibyo byamuhanukiye”.

Ngo ibyamuhanukiye byamugwiriye ku gice cy’igihimba n’amaguru ariko ntibyagera ku mutwe. Nyakwigendera yahise abasaba kumujyana iwe mu rugo ababwira ko agiye gupfa, maze agezeyo ahita apfa. Umurambo wajyanywe gukorerwa isuzuma ku bitaro bya Remera Rukoma.

Iyi kamyo ifite pulaki RAC 974I, yavaga mu karere ka Ruhango yerekeza mu Mujyi wa Kigali, yaguye ku Ruyenzi, mu murenge wa Runda ho mu karere ka Kamonyi ahagana mu ma saa kumi z’umugoroba wo kuri uyu wa gatanu tariki 5/2/2016.

Ikamyo yaguye mu muhanda

Nshimyumuremyi Albert, Umushoferi wari utwaye avuga ko yaturutse muri santeri ya Ruyenzi akabona ikamyo yo mu bwoko bwa Ben yari iri gukata mu muhanda, yajya gufata feri akumva yacitse kandi imbere ye haturukaga Coaster iturutse I Kigali.

Ngo yahisemo kuyishora mu mukingo ariko naho ayihagejeje ivamo, ahita ayigusha mu muhanda. Ati”Ikamyo y’ibeni iri gukata nayiboneye kure, nshaka gufata feri ariko ndayibura. Mpita mfata vitesi ya kabiri biranga. Nyituye mu muferege naho ivamo, mpita ngira ubwoba ko ngiye kwica abantu”.

Umupolisi ukorera mu muhanda yagwiriwe n’amakaziye, mu gihe umushoferi yarimo arwana n’imodoka yari yanze gufata mu mukingo, naho umugenzi wari muri Coaster bari bagiye kugongana na we yagwiriwe n’amakaziye.

Yafunze umuhanda izindi modoka zihindura inzira

Bamwe mu baturage babonye iyo mpanuka iba, bavuga ko uwo mupolisi waguye, yashatse guhagarika iyo kamyo kuko atari yamenye ibibazo ifite, aho guhagarara ikamuhutaza amakaziye akamumanukiraho, akagwana n’imbunda yari afite.

Iyi mpanuka yafunze umuhanda igihe kigera ku masaha abiri, ku buryo imodoka ziva mu majyepfo zahinduye inzira zikanyura mu muhanda w’igitaka unyura ku biro by’Akagari ka Ruyenzi.

Mu kiganiro umupolisi ushinzwe guhuza ibikorwa bya Polisi n’izindi nzego, IP Niyonagira Athanase, yagiranye n’abanyeshuri bo ku Rwunge rw’Amashuri rwa Ruyumba mu Murenge wa Nyamiyaga ho mu Karere ka Kamonyi, bamugaragarije ko bamwe mu banyeshuri b’abakobwa bararurwa n’abashoferi b’amakamyo atwara umucanga babashukisha amafaranga.

Ngo hari abakobwa bakurikira amafaranga y’abashoferi b’ibikamyo

Bamwe mu banyeshuri b’abakobwa biga mu mashuri yisumbuye, bavugwaho gutwarwa n’abashoferi b’ibikamyo bakabajyana mu bikorwa bibi. Niyodufasha Madina, ukuriye abanyeshuri yemeza ko hari bagenzi be, bararurwa n’amafaranga.

Ati «Hano hanyura abanyabikamyo benshi bagiye mu micanga, abanyeshuri na bo bababona bakabashidukira kubera amafaranga baba (….) ntago turabafata, ariko hari igihe ushobora kunyura nko ku mukobwa ahagararanye n’umunyagikamyo ugahita ukeka ko arimo kumutereta ».

Mu ngamba zafatiwe iki kibazo, harimo gushyiraho itorerero ryo kurwanya ibyaha (Club anti-crimes) kugira ngo abanyeshuri bajye bahabwa impanuro kandi bajye bagira uruhare mu gutanga amakuru kuri Polisi .

Kiruhura Robert, umuyobozi w’ikigo, ashima ibiganiro Polisi yagiranye n’abanyeshuri kuko bitanga icyizere ko hari ubufatanye mu guhangana n’ikibazo cy’uburara bw’abana.

Ati «Akenshi n’abana bazitega, bazitegera hanze y’ikigo, icyiza twakuye muri iki kiganiro, ni uko Polisi igiye kudufasha kuko hanze aho tutari iba ihari ».

IP Athanase Niyonagira aganira n’abanyeshuri b’i Ruyumba

Uretse Club anti-crimes, urwunge rw’amashuri rwa Ruyumba rufite abana biga mu yisumbuye basaga 350.

Rufite andi ma clubs abafasha kugorora imyitwarire, ariko umuyobozi w’ikigo akomeza avuga ko ubukene bw’ababyeyi ari impamvu ikomeye ituma hari abana bitwara nabi.

Nyuma yo gusoza amahugurwa y’Itorero ku banyeshuri barangije amashuri yisumbuye mu mwaka w’amashuri 2015, abahuguwe bakomereje mu bikorwa mu rugerero bazamaramo amezi atandatu bafasha abaturage.

Intore z’akagari ka gihinga zivuye mu baturage kureba isuku.

Intore zo mu karere ka Kamonyi zahigiye gukangurira abaturage kugira isuku, akarima k’igikoni, gutera ibiti, kubakira inzu umuturage utishoboye muri buri kagari no kwigisha gusoma no kwandika.

Abo mu kagari ka Gihinga mu murenge wa Gacurabwenge, batangiye ubukangurambaga bw’isuku kuri uyu wa kabiri tariki 2 Ugushyingo 2016.

Munezero Ildephonse, Intore iri ku rugerero, ashima ko mu ngo zisaga 60 bagezemo basanze bazi kwita ku isuku y’amasahani, ariko mu bwiherero ho ngo hari ikibazo.

Ati “Hari aho twasanze badafite imisarani yubakiye. Twaganiriye nabo batubwira ko bahura n’imbogamizi z’uko kubaka umusarani bigomba kwakirwa ibyangombwa mu buyobozi. Twabemereye gukora ubuvugizi ku buyobozi kugira ngo boroherezwe kubaka imisarani.”

Si ikibazo cy’isuku cyonyine gihangayikishije urubyiruko ruri ku Rugerero, ahubwo biyemeje no gukora ubukangurambaga ku kurwanya ibiyobyabwenge na Malariya.

Niyitanga Enock ati “Twasanze abaturage badafite inzitiramubu ndetse n’abazifite ntibazikoresha neza. Ubanza aribyo byongereye malariya.”

Niyitegeka akomeza avuga ko bagiye guhagurukira siporo y’urubyiruko, bajye bahuriramo na bagenzi ba bo babaganirize ku bubi bw’ibiyobyabwenge.

Kuva gahunda y’Itorero ku barangije amashuri yisumbuye itangiye, ubuyobozi butangaza ko hari umusanzu intore zatanze mu bukangurambaga bukorerwa abaturage.

Nzayisenga Mathieu, umukozi ushinzwe imiberho y’abaturage mu kagari ka Gihinga, ati “Intore zadufashije byinshi mu bijyanye n’isuku. Izabanje zahereye ku isuku y’umubiri, none kuri ubu tubona hari icyahindutse.”

Mu ntore zisaga 1800 ziri mu bikorwa by’urugerero mu karere ka Kamonyi, akagari ka Gihinga gafitemo 36, ziyemeje kuzenguruka mu midugudu itanu ikagize bakora ubukangurambaga ku isuku.

Mu birori byo kwizihiza Umunsi w’Intwari, ku rwego rw’akarere wizihirijwe mu Mudugudu wa Gatwa, Akagari ka Kazirabonde, mu Murenge wa Ngamba, abaturage basobanuriwe ibyaranze intwari z’u Rwanda, maze bahamagarirwa guharanira kuba intwari bakora ibikorwa byiza.

Itorero ry’i Ngamba risusurutsa Umunsi w’Intwari.

Mu kiganiro Amuyobozi w’Agateganyo w’Akarere ka Kamonyi, Emmanuel Bahizi yatanze, yabwiye abaturage ko kuba intwari bisaba gukora ibikorwa byiza birimo kwitangira igihugu, kurwanya amacakubiri, no kuba umunyakuri.

Yagize ati “Ni na yo mpamvu, kuri uyu munsi insanganyamatsiko ivuga iti ‘Duharanire ubutwari, twubaka ejo hazaza’. Mu gihe turi bwange ikibi, tukitandukanya na cyo kandi tukiyemeza kukirwanya; (….)birashoboka ko buri wese mu bikorwa ukora, ejo na we ushobora kuba intwari.”

Ngo nubwo Umunsi w’Intwari umaze imyaka 22 gusa wizihizwa, Bahizi ahamya ko intwari zabayeho kuva kera, aho atanga urugero rw’abitwaga “abacengeri” bamenaga amaraso yabo ku rugamba kugira ngo u Rwanda ruzarutsinde.

Mu Murenge wa Ngamba hari abakoze ibikorwa by’indashyikirwa mu kurwanya Jenoside yakorewe Abatutsi, batanga icyizere cy’uko ubutwari bushoboka.

Abayobozi bitabiriye Umunsi w’Intwari i Ngamba.

Rwambaya Emmanuel na Gahirima Gabriel, batoranyijwe nk’indashyikirwa, batangaza ko babigezeho kubera uburere bakuye ku babyeyi no mu nyigisho z’amadini.

Gahirima ati “Mbere yo kujya mu idini, kugira neza ni umuco twatojwe n’ababyeyi. Twasanze ababyeyi bacu babana neza n’amoko yose. Mu gihe cya Jenoside ntabwo twari gushyigikira ko abatutsi bicwa ahubwo twakoze uko dushoboye turabahisha”.

Intwari zibukwa buri tariki 1 Gashyantare ni “Imanzi” ari zo Fred Gisa Rwigema watangije urugamba rwo kubohora igihugu akarugwaho n’umusirikare utwazwi uhagarariye ingabo z’igihugu zaguye ku rugamba.

Hibukwa kandi intwari z’”Imena” zirimo umwami Mutara III Rudahigwa , Michel Rwagasana, Uwiringiyimana Agathe, Umubikira Niyitegeka Felicite n’abanyeshuri bigaga i Nyange batashyigikiye umugambi w’abacengezi wo kubatandukanya bashingiye ku moko ndetse n’intwari z’”Ingenzi” zigizwe n’abantu bakiriho barangwa n’ibikorwa byiza.

Gafurumba Felix, Umuyobozi w’ubuzima mu karere, atangaza ko mu kwezi k’Ugushyingo 2015, abana bari bafite imirire mibi bari 542 bangana 0,8% ariko uwo mubare ukaba wariyongereye ku buryo mu Ukuboza 2015 bari bageze kuri 1,5%.

Mu gikoni cy’umudugudu niho ababyeyi bahurira bagategurai ndyo y’abana bakiri munsi y’imyaka itanu.

Avuga ko bwatewe n’uko bamwe mu babyeyi bafite ubumenyi buke mu gutegurira abana indyo yuzuye kandi bakaba batitabira ibikoni by’imidugudu. Avuga ko mu midugudu 317 y’akarere, ifite ibikoni byo gutekera abana ari 281 gusa.

Agira ati “Aho imirire mibi yiyongera ni ahadakorerwa igikoni cy’umudugudu. Aho biri ubona hari impinduka nziza bitanga.”

Mu ruzinduko rw’icyumweru abadepite bakoreye mu baturage b’akarere ka Kamonyi kuva tariki 18 Mutarama 2016, banenze inzego z’ubuyobozi kutagaragaza imibare nyayo y’ abafite ibibazo by’imirire mibi.

Mu gikoni cy’umudugudu kandi banahigishirizanya gutegura indyo yuzuye mu ngo zabo.

Bavuze ko hari aho ubuyobozi bwababwiraga ko nta bana bafite imirire mibi bahari, ariko amavuriro akabigaragaza.

Depite Pierre Claver Rwaka, umudepite mu nteko ishinga amategeko wari umwe mu bagendereye aka karere, yatanze urugero rw’imirenge ya Kayenzi na Kayumbu, ubuyoboze bwagaragaje ko nta bana bafite imirire mibi, ariko bagera ku kigo nderabuzima cya Kayenzi bakabereka urutonde ruriho abasaga 90.

Ati “Nka Kayenzi mwanditse ko abantu bari mu mirire mibi ari babiri, ariko imibare nakuye ku kigo nderabuzima , abari mu mutuku 62, abari mu muhondo ni 32. Kandi tugiye mu baturage duhura n’umugore ufite umwana urwaye.”

Umuyobozi w’ubuzima mu karere yisobanuye avuga ko imirenge yatangaga amakuru ishingiye kuri raporo z’ukwezi k’Ugushyingo 2015, kuko bari batarabona iy’ukundi kwezi. Mu gihe ibigonderabuzima bwerekanaga imibare y’ukwezi k’Ukuboza 2015.

Mu rwego rwo gukemura iki kibazo, ngo ubuyobozi bugiye gukaza ubukangurambaga mu baturage bitabire igikoni cy’umudugudu kandi babatoze kugira isuku no kwirinda indwara ya Malariya, kuko nabyo bigira uruhare mu kongera umubare w’abagaragaraho imirire mibi.

Ku mugoroba wo ku wa 28 Mutarama 2016, abagize Inama Njyanama na Komite Nyobozi y’Akarere ka Kamonyi bamurikiye Umunyamabanga Nshingwabikorwa w’ako karere na bamwe mu bakozi bako ibyagezweho mu gihe cy’imyaka itanu bamaze bayobora, maze babasaba kusa ikivi basize.

Rutsinga Jacques, wayoboraga Akarere ka Kamonyi, ahereza igitabo gikubiyemo ibikorwa Bahizi ugiye kuba asigaranye akarere mu nzibacyuho.

Uwari Visi Perezida w’Inama Njyanama, Biziyaremye Gonzague, yibukije abakozi b’akarere ko bagomba gukurikirana ibibera mu karere byose kuko hari abitwaza inzibacyuho bagakora ibinyuranye n’amategeko bitwaje ko nta buyobozi buhari.

Atanga urugero rw’abashobora gufatirana inzibacyuho bakuba nta byangombwa . Araburira abanyamabanga nshingwabikorwa b’imirenge kuba maso.

Ati “Tumenye ko icyo gihe tugomba gukoresha imbaraga zidasanzwe. Kugira ngo abantu batumva ko bari mu nzibacyuho bakikorera ibyo bishakiye”.

Nyuma yo guhabwa ubuyobozi, Bahizi Emmanuel, Umunyamabanga Nshingwabikorwa w’Akarere , yasabye abakozi kumufasha kurangiza inshingano zo kwita ku karere; abasaba kwirinda kugira agahinda k’abayobozi bagiye, ahubwo bagaharanira ko ibikorwa batangiye birangira neza.

Yagize ati “Njyewe icyo bampaye ni ukuba mbari imbere ariko ubuyobozi turabusangiye. Muzamfashe twirinde ko hagira igihungabanya umutekano, igisubiza imihigo inyuma cyangwa se ko hagira ikindi kibazo kivuka.”

Abakozi basabwe gushyira imbaraga zidasanzwe mu kazi mu gihe cy’inzibacyuho.

Uretse ibyagezweho, uwari Umuyobozi w’Akarere, Rutsinga Jacques, yamurikiye Umunyamabanga Nshingwabikorwa w’Akarere urutonde rw’imihigo y’akarere, imitungo y’akarere irimo iyimukanwa n’itimukanwa, abakozi n’ibibazo by’abaturage bitaracyemuka.

Kuri uyu wa 27 Mutarama 2016, ni bwo imiromo yo kubaka uyu muyoboro wa kilometero 71 yatangijwe ku mugaragaro mu Karere ka Kamonyi.

Abayobozi basobanurirwa igishushanyo cy’umuyoboro.

Uyu muyoboro uzakura amazi mu musozi wa Ntwari uyageze mu mirenge ya Kayenzi, Karama, Musambira na Gacurabwenge. Abaturage b’iyi mirenge bakaba bafite ikibazo cy’amazi kuko uretse amariba yo mu mibande, indi miyoboro yari yarapfuye.

Umuyobozi w’Akarere ka Kamonyi, Rutsinga Jacques, yavuze ko abaturage bahoraga bataka ikibazo cy’amazi, ariko ubuyobozi bw’igihugu bukaba bwaremeye kubaha umuyoboro wo kubagoboka.

Yagize ati “Twizeye y’uko muri aya mezi 18 tuzaba tugeze ku kigereranyo kiri hejuru cy’abantu bafite amazi, kuko WASAC nimara kudukorera uyu muyoboro, tuzabona uko tubungabunga imiyoboro mito itanga amazi nka Mbizi, Cyabasatsi, Murambi, Kibuza, Rugarika na Rutobwe.”

Guverineri w’Intara y’Amajyepfo, Alphonse Munyantwari, yavuze ko igikorwa cyo kugeza ku baturage amazi meza ari ikimenyetso cy’imiyoborere myiza kuko giha agaciro Abanyarwanda bafashwa kwigira no kwiyubaka. Ati “Iki gikorwa kirakomeye kuko amazi ni isoko y’ubuzima.”

Munyaneza Modeste, utuye mu Mudugudu wa Gikurubuye, Akagari ka Mataba, avuga ko nibamara kugezwaho amazi mezi, ikibazo cy’umwanda ugaragara mu ngo no mu maresitora, kizagabanuka kandi bakareka kuvunika bamanuka mu kabande kuvoma.

Umuyobozi ushinzwe gukwirakwiza amazi muri WASAC, Mukesha Amandine, yahamagariye abaturage kwitabira kwaka akazi mu mirimo yo gukora umuyoboro, kugira ngo babone amafaranga.

Abaturage bakoresha amazi meza mu Karere ka Kamonyi babarirwa ku kigereranyo cya 76%. Nyuma yo kubaka uyu muyoboro uzashyirwaho amavomero rusange 50, ukageza amazi no mu ngo z’abaturage, biteganyijwe ko ikigereranyo kizagera kuri 86%.

Imirimo yo kubaka uyu muyoboro izamara amezi 18, ikazatwara arenga miliyari 2Frw.

Aya mazi yari yatashye ku mugaragaro tariki 5/11/2015, yatanzwe n’uruganda rutonora umuceri rwa Mukunguri MRPIC, mu rwego rwo gukemura ikibazo cy’abaturage bakoresha amazi mabi n’abavoma kure.

Iriba ryo ku Mukunguri ryamaze ukwezi kumwe, rihita rikama.

Uruganda rwubatse iriba mu Mudugudu wa Kamahuru, Akagari ka Mukinga, Umurenge wa Nyamiyaga, rikavomwaho n’abaturage b’uyu mudugudu ndetse n’abaturanyi bo mu Mudugudu wa Mataba y’epfo mu kagari ka Kabugondo mu murenge wa Mugina.

Abaturage bari bishimiye kuvoma kuri iri riba riri bugufi kandi rizana amazi meza, ariko barivomyeho ukwezi kumwe gusa, bongera kuvoma amazi mabi badaha mu mugezi w’Umukunguri no mu migende iwisukamo.

Nubwo amazi bayagura amafaranga y’u Rwanda 20 ku ijerikani, ngo bari baracice ku gukoresha amazi mabi nk’uko Nzaramba Simoni abivuga.

Agira ati “Aya mazi tukimara kuyabona, twari twishimye ko tutazongera gukoresha amazi mabi none agiye tutayavomye n’ukwezi.”

Umuyobozi wa MRPIC, Niyongira Usiel, avuga ko ikibazo cyo kubura amazi cyatewe n’uko umuyoboro wa Shyogwe - Mayaga ubazanira amazi wagize ikibazo, kikaba gihangayikishije uruganda kuko na rwo rumaze ukwezi n’igice rutagira amazi.

Aragira ati “Mu by’ukuri, icyo ni ikibazo kitaduturukaho, kiva ku bayaduha. Gusa natwe biratubabaza. twebwe intego yo kugeza amazi meza ku baturage twayigezeho, ikibazo ni abashinzwe kuyaduha batabyubahiriza. Turimo gukora ubuvugizi ngo umuyoboro bawukore vuba.”

Niyonsenga Richard, umukozi ukurikirana umushinga wo gutanga amazi muri sosiyeti HFI PROCOM, ari na yo yatanze amazi yo ku Mukunguri, avuga ko ikibazo cy’uko ako gace kadafite amazi batakimenyeshejwe kuko ngo ubusanzwe abo baha amazi banabakemurira ibibazo bigaragara mu miyoboro nta kiguzi babatse.

Niyonsenga avuga ko bagiye gukurikirana bakamenya ikibazo gihari icyo ari cyo, bagashaka uko bagikemura.

Abadepite bane basuye ako karere, bigabanyijemo amatsinda abiri, maze bazenguruka mu mirenge bareba imibereho y’abaturage. Batangaza ko mu ngo basuye basanze ikibazo cy’isuku giteye inkeke.

Abadepite bagaragariza abayobozi uko basanze abaturage babayeho.

Bavuga ko ibyo biboneye bigaragaza ko ingamba zari zafashwe mu ruzinduko ruheruka mu ntangiriro z’umwaka ushize wa 2015, zitigeze zishyirwa mu bikorwa.

Depite Mukarugagema Alphonsine, uvuga ko itsinda bari kumwe ryasanze inyinshi mu ngo zitita ku isuku yazo, iy’abana n’iy’aho batuye.

Ati ”Nubwo ingamba zafashwe ubwo duheruka inaha zari nziza, ntizigeze zishyirwa mu bikorwa kuko ikibazo cy’isuku kiracyari ikibazo.”

Ngo abo basuye basanze batakubuye, bakitwaza ko batunguwe kandi isuku igomba kuba umuco. Hari n’aho basanze abantu bararana n’amatungo, bakinjira mu nzu bagasanganirwa n’amaganga. Ikindi abadepite bagaye n’uburiri bw’abana.

Abayobozi baje kumva ibyo abadepite babonye.

Mukarugema abivuga ababaye, yagaragaje ko uburyo ababyeyi batita ku bana babo ku isuku ari nk’ihohotera babakorera.

Ati “Nta mwana ugira icyo yiyorosa, ntawe ugira icyo araraho. Ni inzitiramubu zishaje, ni amashitingi yashaje. Ibyo abana bakabiraraho bakanabyiyorosa. Hari n’aho twasanze abana bakuru barara mu cyumba cy’ababyeyi.”

Isuku nke ntigaraga mu ngo z’abaturage gusa, ahubwo n’ahahurira abantu benshi, abadepite basanze hagaragara umwanda.

Depite Pierre Claver Rwaka, wari mu rindi tsinda asobanura ko basanze amaresitora no mu bwiherero hari umwanda ukabije.

Atanga urugero rwa resitora z’imbere y’ibitaro bya Remera Rukoma, aho bogereza amasahani mu mazi mabi, bakamena ibiryo by’ingurube aho batekera ku buryo binukira abaje kuharira.

Mu Murenge wa Kayenzi ho ngo bahasanze ingo zitagira imisarane n’abayifite ari migufi cyangwa idasakaye, bigakubitiraho n’ikibazo cy’imirire mibi.

Umuyobozi w’Akarere ka Kamonyi, Rutsinga Jacques, avuga ko abaturage bagiye batanga amakuru atari yo, ahamya ko ibyo abadepite babonye ari ukuri, akaba asaba abayobozi ndetse n’abakozi babishinzwe kubifatira ingamba.

Muri iki gishanga gihuza Umurenge wa Gacurabwenge n’uwa Musambira, hahingwaga mu kajagari; aho bamwe bashyiragamo ibijumba abandi ugasanga bahinze amateke, soya cyangwa ibigori.

Abahinzi b’umuceri bishimira inyungo bakuramo nubwo babanje kugira impungenge.

Abakorerabushake b’abanyakoreya baba ahitwa i Mushimba babagiriye inama yo guhingamo umuceri, none barishimira agaciro k’umusaruro bakuramo.

Munyankaka Faustin, umwe mu bahinzi, ahamya ko umuceri umaze kuruta ibindi bihingwa bahingaga. Ngo mu gihe ibyo basaruraga bitatangaga umusaruro ugaragara, umuceri wo bahabwa uwo barya, kandi n’uwo bagurishije bagahabwa amafaranga yo gukoresha indi mushinga.

Aragira ati “Umunyarwanda yari amenyereye kurya umuceri awuguze, ariko kuri ubu iyo wasaruye, uhabwaho uwo kurya, usigaye ukawugurirwa kandi amafaranga ufatiye hamwe burya agira icyo amara”.

Mu bahingaga igishanga , ngo hari abatinye ubuhinzi bw’umuceri bahitamo gutanga imirima, none ngo iyo babonye inyungu abandi bakuramo bagaruka guhinga mu gishanga.

Abahinzi bagize uruhare mu gutunganya igishanga bahingamo umuceri.

Nyiransengiyumva Philomene, avuga ko batangiye guhinga umuceri ari bake ariko bagenda biyongera. Ati “Bamwe babanje kubipinga ariko babonye inyungu zabyo bagenda baza”.

Igikorwa cyo gutunganya igishanga ku buryo buberanye n’ubuhinzi bw’umuceri cyakozwe n’abahinzi ubwabo. Mu basaga 100 bari basanzwe bagihingamo, 49 ni bo babyitabiriye ku ikubitiro.

Sekamana Janvier, umucungamari wa Koperative CORIMU ihuriwemo n’abahinzi, atangaza ko bamaze kugera kuri 550 kandi bitegura kwakira abandi 400 batangiye gutunganya ikindi gice cy’igishanga.

Ati “Mbere ntabwo abantu babyumvaga, bakumva bakomeza kwihingiramo amateke n’imboga. Hari n’abashakaga ko babahemba kandi ari imirima yabo bahinga. Umusaruro wa mbere ubonetse niho batangiye kubona ubwiza bw’umuceri noneho batangira gusaba imirima ku bwinshi”.

Ngo batangiye bahinga kuri hagitari enye ariko ubu bamaze gutunganya ahangana na hegitari 35. Umusaruro bawugurisha uruganda rutonora umuceri rwa Mukunguri MRPIC, umuhinzi agahabwa umuceri ungana na 20% by’umusaruro, undi akawugurirwa ku giciro gishyirwaho n’uruganda. Ku mwero uherutse baguriwe kuri 240FRW ku kilo cy’umuceri udatonoye.

Tariki 21/1/2016, uru ruganda ruherereye mu Mudugudu wa Mataba y’epfo mu Kagari ka Kabugondo mu Murenge wa Mugina, rwashyikirije Umukuru w’Umudugudu sheki y’amafaranga y’u Rwanda ibihumbi 879, agenewe imiryango 68 igizwe n’abantu 293 babuze ubushobozi bwo kwiyishyurira umusanzu w’ubwisungane mu kwivuza.

Umuyobozi w’Akarere ka Kamonyi ashyikiriza Umukuru w’Umudugudu wa Mataba sheki y’amafaranga y’u Rwanda ibihumbi 879.

Abashoramari b’uru ruganda ngo bahisemo kurihira abaturage b’aho rwubatse umusanzu kugira ngo bafatanye kwishimira iterambere umudugudu wabo umaze kugeraho.

Niyongira Usiel, Umuyobozi w’uruganda agira ati “Ikigambiriwe ni ukugira ngo uruganda ruturane n’abantu bishimira iterambere ryaho kandi iryo terambere turi kuhazana baryibonemo.”

Ntivuguruzwa Jean Marie Vianney, Umukuru w’Umudugudu wa Mataba y’epfo, utuwe n’abaturage basaga ibihumbi bibiri, ahamya ko iyo miryango yarihiwe mituweli itishoboye kuko yahuye n’ubukene bushingiye ku kurumbya imyaka bahinze bwatewe n’izuba.

Ntivuguruzwa agira ati “Abenshi mu barihiwe mituweli ni abari mu cyiciro cya mbere n’icya kabiri cy’ubudehe. Nubwo basanzwe ari abatishoboye, byahuhuwe n’izuba ryabiciye imyaka, nitugira amahirwe ihinga ritaha tukeza neza, bazaba bafite ubushobozi bwo kwirihira.”

Abaturiye uruganda rutonora umuceri rwa Mukunguri bahamya ko kuva mu mwaka wa 2013, rutangiye gukora, hagaragaye impinduka mu iterambere ry’abaturage kuko rwahaye bamwe muri bo akazi.

Imirimo yo kubaka uru ruganda ruzaba ruherereye mu Mudugudu wa Mataba y’epfo, Akagari ka Kabugondo mu Murenge wa Mugina, yatangijwe kuri uyu wa Kane tariki 21 Mutarama 2016.

Umuyobozi w’Akarere, Rutsinga Jacques, atangiza imirimo yo kubaka uruganda rwa Briquettes.

Uruganda rutonora umuceri rwa Mukunguri (MRPIC), rwagize igitekerezo cyo gukora umushinga wa "Burikete", bitewe n’uko ibishishwa biva mu muceri byatezaga umwanda inyuma y’inyubako y’uruganda kandi bishobora kubyazwamo undi musaruro.

Umuyobozi w’uruganda, Niyongira Usiel, atangaza ko abashoramari ba MRPIC, biyemeje gushora muri uyu mushinga miliyoni 400 z’amafaranga y’u Rwanda zo gukora Burikete, mu rwego rwo kwagura ishoramari no kubungabunga ibidukikije.

Umuyobozi wa MRPIC Niyongira Usiel asobanurira abayobozi uko umushinga wa briquettes uteye.

Yagize ati “Twabonye ibisigazwa by’umuceri bimaze kutubana byinshi, dutekereza ikindi twabikoramo. Twamenye byinshi twabikoramo, ariko icyo twabonye cyakemura n’ibindi bibazo, ni umushinga wa ’Briquettes’ kuko zagira uruhare mu gukemura ikibazo cy’ibicanwa.”

Niyongira akomeza avuga ko gukora burikete ari irindi shoramari rigamije iterambere ry’agace k’amayaga uruganda MRPIC ruherereyemo.

Imirimo yo kubaka uruganda rukora burikete iteganyijwe kurangira nyuma y’amezi abiri, kuko ruri mu mihigo y’akarere ya 2015/2016 yo kurengera ibidukikije.

Umuyobozi w’Akarere ka Kamonyi, Rutsinga Jacques, avuga ko umushinga wa burikete ushyigikiye gahunda ngari za Leta zo kongera inganda no kurengera ibidukikije.

Ati “Ibi bifite inyungu muri gahunda zitandukanye z’igihugu. Navuga ko uruganda nk’uru rufasha mu gutanga imirimo kandi aho ibi bicanwa bya burikete bizakoreshwa, hakoreshwaga inkwi nyinshi cyane.”

Ibicanwa bya burikete bizakorwa bifitiwe isoko kuri rwiyemezamirimo ugemura inkwi mu magereza, ariko bifuza ko n’abaturage baziga gukoresha burikete bakagabanya inkwi bakoreshaga, dore ko muri aka gace k’Amayaga habarizwa amashyamba make.

Icyiciro cya mbere cy’Itorero ry’abanyeshuri cyashojwe tariki 19/1/2016.

Guverineri w’Intara y’Amajyepfo, Alphonse Munyantwari, yakiriye imihigo y’Inkomezabigwi za Kamonyi.

Mu Karere ka Kamonyi, abanyeshuri 1803 ni bo baryitabiriye, bahurira ku masite atanu. Bigishijwe amateka y’u Rwanda, bahugurwa no ku ndangagaciro zibereye Abanyarwanda zirimo gukunda umurimo.

Nyinawabashambo Diane, atangaza ko atarajya mu Itorero, yibwiraga ko hakorerwamo ibintu bikomeye, ariko aho barigereyemo, ngo bahakuye ubumenyi buzabafasha guhangana n’ubuzima bwo hanze y’ishuri.

Ati “Twungutse ubumenyi bwinshi tuzasangiza bagenzi bacu bataraca mu Itorero. Ubumenyi twakuye mu ishuri ntago bwari buhagije ngo tubashe kubaho muri sosiyeti. Twahigiye gufatanya no gushyira hamwe. Twize ko akazi kose kadatesha agaciro umuco nyarwanda, gashobora guteza imbere ugakora.”

Inkomezabigwi za Kamonyi mu myiyereko.

Mugenzi we, Masengesho Theobald, avuga ko bagiye gushyira mu bikorwa ibitekerezo byubaka bakuye mu Itorero.

Masengesho avuga ko biteguye kutagira akazi basuzugura mu rwego rwo guhangana n’ikibazo cy’ubushomeri.

Agira ati “Tugiye guhindura imyumvire, twumve ko akazi kose ntacyo gatwaye mu gihe gatunze ugakora.”

Uru rubyiruko rwamuritse imihigo y’ibikorwa bazakora mu cyiciro cya kabiri cy’urugerero. Ibyo bikorwa birimo ubukangurambaga kuri gahunda za Leta n’ibikorwa by’amaboko.

Guverineri w’Intara y’amajyepfo, Alphonse Munyantwari, yashimiye izi ntore ko zije kunganira ubuyobozi mu guteza imbere imibereho myiza y’abaturage.

Yagize ati “Murabizi rero tugomba kubaka u Rwanda kuko ni yo ngobyi iduhetse, ntago ushobora gukomera uri umwe cyangwa ngo umererwe neza wenyine mu Rwanda bikunde. Muharanire guhesha ishema u Rwanda.”

Abayobozi batandukanye bo mu Karere ka Kamonyi bifatanyije n’Intore z’Inkomezabigwi mu gusoza Itorero.

Mu cyiciro cy’urugerero, izi “Ntore z’ Inkomezabigwi“ ziyemeje gufasha abatishoboye babubakira inzu muri buri kagari, gukangurira abaturage isuku n’umugoroba w’ababyeyi, kwigisha gusoma no kwandika, no kubungabunga ibidukikije batera amashyamba.

Mu rugendo abadepite bakoreye muri aka karere kuri uyu wa mbere tariki 18 Mutaama 2015, rwari rugamije kureba aho ishyirwa mu bikorwa rya gahunda Leta igenera abaturage rigeze, bagaragarijwe ko ubu bwiherero bugiteje ikibazo muri aka karere.

Ubu bwihererero bwa Ecosan bumaze imyaka itanu bwuzuye ariko budakoreshwa.

Ubu bwiherero bukenera ko imyanda ikurwamo igakoreshwa nk’ifumbire, bwubatswe kuri bimwe mu bigo by’amashuri no ku muhanda, ariko kuba abagomba kubukoresha badafite ubumenyi n’akamenyero ko gukoresha iyo myanda, ntibabyitabiriye.

Kayijuka Diogene, umuyobozi w’uburezi mu karere, atanga urugero rw’ubwiherero bwubatse ku ishuri ryisumbuye ryitiriwe Rosa Mystica cyo ku kamonyi, butangiye gusaza kandi butarigeze bukoreshwa.

Yagize ati “Impamvu yabyo rero n’uko biragoye, bitewe n’akamenyero k’abanyarwanda, uko bicara , bisaba kwituma bigengesereye ku buryo batavanga imyanda.”

Yasabye abadepite bakorera ubuvugizi, ntihashishikarizwe n’abandi kubyubaka kuko n’ibyubatse bidakoreshwa.

Depite Mukarugema Alphonsine uri muri iri tsinda rizamara icyumweru mu karere rikurikirana ishyirwa mu bikorwa ry’imyanzuro yafashwe mu ntangiro z’umwaka wa 2015, yavuze ko bagenzwa no kureba gahuna zitandukanye z’isuku, ikibazo cy’imirire n’imishinga y’iterambere.

Ati “Ikibazo cy’isuku nke cyagaragaraga icyo gihe n’ikibazo cy’imirire mibi, hari ingamba byari byafatiwe, ubu rero nibyo tuje kureba ko byashyizwe mu bikorwa. Tuzabireba dusura abaturage mu ngo.”

Hagaragajwe n’ikibazo abana bafite imirire mibi, umuyobozi w’akarere wungirije ushinzwe imibereho y’abaturage kigaragara mu miryango ifite abana benshi, abakobwa babyarira iwabo, abapagasi, ingo zifite amakimbirane n’ubujiji.

Ibi byose ngo byafatiwe ingamba zirimo gukangurira abaturage kwitabira gahunda yo kuboneza urubyaro; kwitabira igikoni cy’umudugudu, kuganiririza abakobwa babyariye iwabo, kwinjiza abapagasi muri gahunda nk’iz’abandi, no gushyira ingufu mu mugoroba w’ababyeyi.

Abenshi mu bagize iri torero ni abasigajwe inyuma n’amateka bafite impano zo kubyina, kuririmba ndetse no kuvuza ikondera, bakomora ku basekuruza babo.

Bafite impano ikomeye yo kuvuza ikondera.

Nubwo ububyinnyi ari uruhererekane mu miryango yabo, babura ibikoresho byo kubafasha gukora ibiraka byo gususurutsa ibitaramo. Ibyo ngo bigatuma impano zabo zitabateza imbere.

Bavuga ko iyo hari ababakeneye ngo babafashe mu bitaramo, babakodeshereza imyenda n’indangururamajwi, bakabafasha no mu rugendo, byose bakabikata ku gihembo bagombaga kubaha, bagasigarana ubusa.

Gasigwa Omar, acuranga Ikondera, ati “Iyo tubonye ibiraka hano mu cyaro usanga badukase ibyo badufashije byose tugasigarana nk’ amafaranga y’u Rwanda ibihumbi 50, twayagabana buri wese agasigarana bibiri”.

Indatwa n’abarerwa ba Kagina banatsinda amarushanwa ku rwego rw’akarere n’Intara y’Amajyepfo.

Ahamya ko bafite ubuhanga, ariko bakabura amikoro ngo babubyaze umusaruro bigatuma amatorero akomeye y’i Kigali akodesha bamwe muri bo ngo bababyinire.

Ati “Turi bane tujya gukora ibiraka mu yandi matorero, ariko tubonye ibikoresho mu itorero ryacu nta handi twajya”.

Itorero Indatwa n’abarerwa rirazwi cyane mu Karere ka Kamonyi, kuko ritsinda amarushanwa ajya akoreshwa n’akarere. Ndetse n’iyo hari abashyitsi baje gusura akarere karyifashisha mu kubasusurutsa. Abarigize bavuga ko impamvu badatera imbere ari uko ubuyobozi butabafasha.

Mukamutarambirwa Amina, umubyinnyi, ati “Duserukira umurenge cyangwa akarere inshuro nyinshi ariko ntacyo batumarira. Uzi ko twagiye i Nyanza tujyanywe n’akarere tukaba aba kabiri ariko ntacyo baduhaye. Ubuyobozi buvuze ngo bugiye kwita ku itorero ryacu, twatera imbere”.

Iyo bagiye gusurutsa ibirori batira ibikoresho n’imyambaro.

Itorero Indatwa n’abarerwa ryasusurukije ibirori byo kwizihiza Umunsi Mpuzamahanga w’Umugore ku wa 8 Werurwe 2013, maze Umunyamabanga wa Leta muri Minisiteri y’Ubutegetsi bw’Igihugu Mukabaramba Alvera, asaba ubuyobozi bw’akarere kurifasha kubona imyambaro, ariko hashize imyaka ibiri batarayibona.

Kayiganwa Albert, Umukozi ushinzwe Umuco na Siporo mu Karere ka Kamonyi, avuga ko ibyo kuba MINALOC yarasabye ko akarere gafasha iryo torero ntabyo azi kuko atigeze abimenyeshwa.

Cyakora, ngo mu ngengo y’imari ya 2015-2016, ryateganyirijwe amafaranga abararirwa mu bihumbi 500 yo kurifasha kugura ibikoresho kugira ngo rirusheho kunoza impano zaryo no kuzibyaza umusaruro.

Imiryango isaga 150 yo mu Mudugudu wa Kagina, mu kagari ka Kagina, mu Murenge wa Runda, itunzwe n’umwuga w’ububumbyi bakomora ku basekuruza babo.

Ababumba inkono barinubira ko zitarimo kubaha umusaruro.

Haba abakomeje kubumba inkono cyangwa ababumba ibindi bikoresho nk’ama-“vases” n’imitako, bose batangaza ko ububumbyi butabageza ku iterambere kuko nta buryo buhamye bwo gucuruza ibyo bakora.

Ababumba inkono bavuga ko zikenerwa n’abantu bake kandi bazigurisha amafaranga make adahuye n’ibiba byazitakayeho.

Mukamabano Melaniya, umukecuru w’imyaka 62, ati “Inkono uyigurisha amafaranga ijana cyangwa 200 kandi wiriwe uzengurukana igitaro uzikoreye utazi uri bukugurire.”

Mukamabano avuga ko ibibumbano bivamo amafaranga menshi ari amavazi akorwa n’abakiri bato agurishwa hagati y’amafaranga y’u Rwanda ibihumbi 3 na 5, kandi ibumba wakoresheje ari rike ugereranyije n’irikoreshwa inkono.

Abakiri bato babumba amavazi.

Ababumba amavazi bavuga ko birirwa birukankanwa n’abashinzwe umutekano mu Mujyi wa Kigali babashinja gucuruza mu kajagari.

Uwitwa Gasigwa Omar agira ati “Akazi kacu k’ibumba koko karadutunze, ariko kutagira aho tugurishiriza batatwirukankana, bituma tutagera ku iterambere kuko hari igihe babikwaka cyangwa bakakwirukankana bikameneka.”

Bamwe mu babumbyi b’i Kagina bishyize hamwe bakora ishyirahamwe rikora imbabura za “Cana rumwe” ariko na ryo ntirigikora kuko babuze ababagurira.

Umusaruro uva muri Cana rumwe ngo ukuba inshuro 3 uva mu mbabura zisanzwe.

Muhawenimana Issa ukuriye ishyirahamwe, ahamya ko nta soko rifatika ababumbyi bafite kuko no ku Mugomero, aho umurenge wa Runda wari wabahaye ngo bahacururize, ibibumbano byabo byabuze ababigura bigera aho bihamenekera. Bahitamo kureka kubijyana yo.

Nzaramba Jean Bosco, Umunyamabanga Nshingwabikorwa w’Akagari ka Kagina, atangaza ko nyuma y’uko gucururiza ku Mugomero binaniranye, ubuyobozi burimo kubashakira ahandi bacururiza bashobora kubona abakiriya.

Umushinga wa cana rumwe wabuze isoko, bamwe bahitamo kubireka.

Ngo ubuyobozi kandi bukomeje kubashakira isoko rya “Cana rumwe” mu yindi mirenge kuko buri mwaka hari ababa bafite imihigo yo kuzicanaho mu rwego rwo kugabanya ibicanwa.

Uyu musore yatawe muri yombi na Polisi y’igihugu ikorera mu Murenge wa Runda mu ma saa sita z’amanywa tariki 13 Mutarama 2016, afatirwa mu gishanga cya Bishenyi afite Amadorali bivugwa ko yari aje kugurisha ariko we akavuga ko ari umugore w’inshuti wahise atoroka yari ayafashije.

Mu mafaranga yose n’Amadolari habamo amahimbano abantu bagomba kwitondera

Avuga ko yari avuye gupakiza umucanga wo kubakisha, yamara kuwohereza agahamagarwa n’umugore zitwa Leah w’inshuti ye ngo bahurire Bishenyi, yahagera akamuha igikapu ngo aze kukimuhera basaza be, ngo yajya kubona akabona haje abasore bari kumwe n’abamotari bakamushinja ko amadorali yari mu gikapu ari ayo yari aje kubatuburira.

Iby’uyu musore avuga bitandukanye n’ibyo abamufashe batangaza kuko bavuga ko we n’uwo mugore witwa Leah barangishije umuntu wabagurira amadolari ku mukecuru Mukantego Mariam utuye Nyabugogo, akaba ari we wabarangiye abaza kuyagura.

Mukantego, ati“ Uwo mugore yaje nk’umuntu unzi, ambwira ko hari umuntu ufite Amadolari agurisha ku giciro gito, maze mubwira ko njye nta mafaranga yo kuyagura, ariko murangira umusore mugenzi wanjye w’Umusilamu. Anyemerera ko uyu munsi tuza kuyareba”.

N’ubwo uwafatanywe Amadolari avuga ko atuye mu kagari ka Nzove, Umurenge wa Kanyinya, mu karere ka Nyarugenge, uwo mugore witwa Leah ngo yababwiye atuye mu Rugarika ho mu karere ka Kamonyi, maze abazana Bishenyi; ahabagejeje abasigana n’uwo musore ababwira ko agiye kuzana amata mu rugo iwabo w’uwo musore.

Yemeraga kugurisha amadolari 100 ku mafaranga y’u Rwanda ibihumbi 40, ariko bayarebye basanga ari amahimbano maze umumotari Nizeyimana Leonce bari kumwe, ahita abimenyesha polisi.

Mu gihe Muhawe Boniface watawe muri yombi ahakana ko icyo gikapu kirimo amadolari kitari icye, umumotari ucunga umutekano mu gace ka Bishenyi Nshimiyimana Habibu, avuga ko yamubonye ahagaze umwanya munini aho abo bavuye i Kigali bamusanze, ahetse icyo gikapu.

Bamwe mu bakozi bakeka ko inkongi yatewe n’amashanyarazi; ariko umuyobozi w’ikigo Dr. Rekeraho Emmanuel akavuga hari umuntu washakaga kubateza igihombo wahatwitse.

Zimwe mu nkoko zapfuye.

Inkongi y’umuriro yatangiye mu masaa kumi z’igitondo cyo ku wa 11 Mutarama 2016, ku gice cyororerwamo inkoko n’ikigo Eden Business Center giherereye mu kagari ka Ruyenzi, mu murenge wa Runda.

Hahiye inkoko nyinshi, Umuyobozi w’Ikigo avuga ko zifite agaciro gasaga miliyoni enye z’amafaranga y’u Rwanda.

Abakozi barara hafi y’inkoko bavuga ko umuriro waturutse mu nzu yo hasi (cave) ahabikwa ibiryo by’inkoko n’ipamba.

Ikigo Eden Business Center cyorora inkware n’inkoko kibasiwe n’inkongi zimwe mu nkoko zirapfa.

Umwe muri bo wari uryamye hafi y’umuryango, ati “Nagiye kubona mbona mugenzi wanjye arambyukije kuko njye nari ndwaye, mbona imyotsi myinshi yaturukaga hasi muri kave, ariko mbere yaho umuriro wari wabanje kugenda”.

Mugenzi we umurara hafi, na we ahamya ko umwotsi waturutse hasi kuko nta wundi muriro wari ucanye muri iki kigo . Ngo n’urugi rw’umuryango rwari rukinze ni bo bakinguye batabaza abandi bakozi. Na we akeka ko ari amashanyarazi yahatwitse kuko yari yabanje kujya agenda akagaruka.

Nubwo aba bakozi bakeka ko inkongi yatewe n’amashanyarazi, Umuyobozi wa Eden Business Center, Dr. Rekeraho Emmanuel, abihakana avuga ko umuriro wazanywe n’umuntu waturutse hanze y’ikigo, washakaga kumuteza igihombo kugira ngo azabure uko yishyura aborozi b’inkware agomba gushumbusha inkoko.

Abakozi bavuga ko umuriro watewe n’amashanyarazi uturutse hasi muri kave ariko nyir’ikigo akavuga ko hatwitswe n’umuntu washakaga kumuhombya.

Ati “Ku ruhande rwanjye, ni nk’igikorwa umuntu yashatse gukora ngo atwike zino nkoko kuko yumvise ko dufite gahunda yo gusubiza inkoko bariya bantu barimo bagarura inkware”.

Ngo iyi nkongi yabaye nyuma y’uko bari bamaze gupakurura izindi nkoko bavanye mu gihugu cya Uganda. Nta mubare uhamye w’izahiye ariko ngo izo gushumbusha aborozi b’inkware zirahari, kandi ikigo gifite ubwishingizi.

Dr Rekeraho, nyir’Eden Business Center avuga ko hari inkoko zasigaye azashumbushamo abo inkware zabo zapfuye.

Iyi nkongi ibaye nyuma y’iminsi itatu, kuri iki kigo haramukiye aborozi b’inkware bashinja ikigo kubateza igihombo cyanga kubagurira amagi nk’uko byari biri mu masezerano (kanda hano wisomere). Mu myanzuro yari yafatiwe iki kibazo harimo kubashumbusha inkoko.

Mu Mudugudu wa Ruramba, Akagari ka Masaka; nta soko cyangwa iriba ry’amazi meza rihari. Abahatuye bavoma Nyabarongo, amazi yayo bakayakoresha imirimo yose y’isuku ndetse bakanayanwa.

Abavoma amazi ya Nyabarongo banayanywa adasukuye.

Mu ntangiro z’umwaka wa 2015, Umuyobozi w’Akarere ka Kamonyi, Rutsinga Jacques, yasuye aba baturage, bari bamaze igihe batangarije itangazamakuru ikibazo bafite, maze abasezeranya ko akarere gafite gahunda yo kubagezaho amazi meza, ariko mu gihe bakiyategereje, abasaba kujya bakoresha aya Nyabarongo babanje kuyasukura.

Umuti bagombaga kujya bakoresha basukura amazi ni uwitwa P&G, ukwirakwizwa mu mabutiki n’Umuryango uharanira Imibereho myiza y’Abaturage (Society for Family Health “SFH”). Abaturage bavuga ko bawuheruka mu kwezi kwa Mutarama 2015, ubundi bakaba barakomeje gukoresha amazi mabi, by’amaburakindi.

Uwitwa Munyaneza Francois, agira ati “Twari tuzi ko bagiye kudushakira amazi bakayamanura mu mudugudu wacu, tukajya tuyavoma tukishyura. Twavutse dusanga ababyeyi bacu bavoma Nyabarongo, none natwe tugiye gusaza ari yo idutunze.”

Munyaneza ahamya ko amazi ya Nyabarongo ari mabi kuko ajya abatera indwara, kandi ngo no kuvoma muri Nyabarongo nta mutekano bigira kuko hari abajyayo ntibagaruke; uruzi rwabatwaye cyangwa ingona zabariye.

Ngo bari bishimiye kuyashyiramo umuti mbere yo kuyakoresha, none babuze aho bawukura. Akomeza agira ati “Ikibazo cy’umuti nawuguze kabiri gusa, ubundi ngiye muri butike nsanga nta wuhari, ndagaruka nisubirira ku mazi mabi.”

Bamwe mu bacuruzi batangaza ko umuryango SFH wari wabasezeranyije kujya ubazanira umuti, na bo bakawucuruza mu baturage, ariko ngo babonye batakiwubazanira barabyihorera.

Ikibazo cyo kuba abaturage barongeye gukoresha amazi mabi gisa n’icyatunguye umunyamabanga Nshingwabikorwa w’akagari ka Masaka, Mafubo Marie Rose, uvuga ko yari azi ko mu mabutiki umuti ugicuruzwa. Yahise avuga ko agiye guhamagara kuri SFH bakongera bakawuzana.

Naho ku kibazo cyo kugezwaho amazi meza, Mafubo avuga ko bagikora ubuvugizi ku karere, bakaba bategereje igisubizo.

Abasaga 142 bitabiriye korora inkware nyuma yo guhugurwa n’ikigo Eden Business Center gikorera mu Kagari ka Ruyenzi, mu Murenge wa Runda ho mu Karere ka Kamonyi; bizezwa n’umuyobozi wacyo Dr. Rekeraho Emmanuel, ko mu myaka ibiri amagi zizatera ikigo kizajya kiyagura kuri 300frw rimwe.

Basabwe korora inkware bizezwa isoko no gushumbushwa none baguye mu gihombo.

Uyu mugabo kandi ngo yabemereye ko muri icyo gihe cy’imyaka ibiri, uzajya agira ikibazo cyo gupfusha inkware, azajya ashumbushwa izindi. Inkware imwe yatangiye gutera igura amafaranga y’u Rwanda ibihumbi birindwi, ariko ubu yari igeze ku bihumbi 10.

Cyakoze bamwe mu borozi bavuga ko ikigo kitubahirije ayo masezerano kuko hashize amezi atatu cyarahagaritse kubagurira amagi ndetse n’ abagize ikibazo cyo gupfusha inkware kikaba kitarabashumbushije.

Tariki 7 Mutarama 2016, bamwe mu borozi bazindukiye ku kigo gusobanuza impamvu batakigurirwa amagi kuko nta handi bafite bayagurisha. Nshimiyemungu Joseph, waturutse mu Murenge wa Jabana ho mu Karere ka Gasabo, avuga ko amaze amezi 6 ahaguze inkware 96, yazigeza mu rugo 40 zigapfa.

Bamwe mu borozi b’inkware bazindukiye kuri Eden gusaba ko yubahiriza ibyo yabasezeranyije.

Ngo nubwo izo zapfuye bazimuguraniyemo inkoko, ariko amagi yatewe n’inkware ikigo cyanze kuyagura. Ati “Nagize igihombo cy’amafaranga agera mu bihumbi 380 kuko mu magi nazanye aha yose nta na rimwe ryigeze ryakirwa”.

Dr. Rekeraho avuga ko ikigo cyahagaritse umushinga wo kugura amagi kubera ko cyayashyiraga mu cyuma kiyaturaga, akaba amahuri. Yaketse ko inkware z’amasake zapfuye aborozi bakabihisha. Bikaba byarateye igihombo ku kigo.

Aragira ati “Isosiyeti yagize igihombo kuko yakiraga amafaranga y’abantu bakeneye inkware, ariko kuko amagi bazanaga yabaye amahuri twabuze izo tubaha tubasubiza amafaranga”.

Ngo uretse guturagwa, amagi y’inkware ikigo ngo kiyakoremo imiti. Ariko na yo Dr. Rekeraho avuga ko ikorwa mu magi abanguriye.

Aborozi bari baremerewe gusubizwa amafaranga cyangwa gushumbushwa inkoko.

Ibyo na byo byabereye amayobera aborozi kuko ngo mu nama baherukaga kugirana n’uyu muyobozi yari yabijeje ko hari imashini yatumije zizajya zikora imiti mu magi, ahubwo ngo bibwiraga ko amagi bagemura azaba make, nk’uko bivugwa na Nsanzabaganwa Jerome, wo mu murenge wa Mwiri, mu karere ka Kayonza.

Ubuyobozi bwa Eden Business Center bwemera igihombo bwateje aborozi, bubasaba guhitamo mu myanzuro itatu ishoboka: kugarura inkware bahawe bagashumbushwa inkoko, kuzigarura bagasubizwa amafaranga bahawe cyangwa se kororera hamwe ikigo kikajya kizikurikirana.

Nubwo hari bamwe mu borozi badafitiye icyizere Dr. Rekeraho cyo gushyira mu bikorwa imyanzuro yabemereye kuko amasezerano bagiranye yo kubagurira amagi no kubashumbusha ku nkware zapfuye, Umwali Paulini, umunyamatekeko akaba n’Umuhuzabikorwa wa MAJ mu Karere ka Kamonyi, avuga ko kuba Dr. Rekeraho abyemera akanabinyuza mu itangazamakuru ari kimwe mu bimenyetso by’ayo masezerano.

Umwali akomeza avuga ko abatanyuzwe n’iyo myanzuro bafite uburenganzira bwo kumukurikirana mu nkiko.

Nyuma y’imyaka icyenda, Akarere ka Kamonyi gakorera mu biro by’icyahoze ari komini Taba mu Murenge wa Rukoma, katashye ku mugaragaro inyubako nshya yubatse i Gihinga mu Murenge wa Gacurabwenge. Iyi nyubako ngo yatwaye miliyoni 992 z’amafaranga y’u Rwanda.

Ibiro by’Akarere ka Kamonyi bishya.

Umuyobozi w’ako karere, Rutsinga Jacques, yatangaje ko nubwo Itegeko rishyiraho ibyicaro by’uturere n’umujyi ryateganyaga ko Kamonyi igira icyiro mu Murenge wa Gacurabwenge, atari ko byari bimeze kuko kuva mu mwaka wa 2006 bakoreraga mu cyahoze ari Komini Taba mu Murenge wa Rukoma.

Ngo byatumaga kugera kuri serivisi zitangirwa ku karere bigora abaturage kuko hari ibutamoso abenshi bakahatakariza byinshi mu ngendo. Ahamya ko kubaka iyi nyubako nshya y’akarere, ari igisubizo ku bakozi no kubagana akarere.

Aragira ati “Ubu abasaba serivisi borohewe no kugera ku karere kuko Umurenge wa Gacurabwenge uri hagati, buri wese ashobora gutega imodoka ikamugeza aha, kandi n’abakozi bagorwaga no kugera i Rukoma ubu bazajya bunguka amafaranga agera ku bihumbi 30 bakoreshaga mu rugendo”.

Aha Minisitiri Amb. Gatete Claver yabifunguraga ku mugaragaro.

Minisitiri w’Imari n’Igenamigambi, Amb. Claver Gatete, wari umushyitsi mukuru, yashimye ko iyo nyubako ijyanye n’icyerecyezo 2050 u Rwanda rwerekezamo.

Ati “Mu nama y’umushyikirano Perezida wa Repubulika yavuze ko tugiye gutangira indi viziyo ari yo ‘vision 2050’, iyi rero ni yo viziyo”.

Ku bwa Guverineri w’Intara y’Amajyepfo, Alphonse Munyantwari, ngo iyi ntara ifite uturere twinshi twakoreraga mu nyubako zidatunganye.

Avuga ko hari tune twakoreraga mu byahoze ari komini, tubiri mu byahoze ari superefegitura, n’utundi tubiri mu byahoze ari Perefegitura. Ati “Dukurikije aho imikorere n’icyerecyezo bigeze, byari bikwiye ko bihinduka”.

Nubwo hari abaturage bavuga ko bafite amatsiko yo kwinjira muri iyi nyubako, bahamya ko bishimiye ko ibiro by’akarere byegerejwe umuhanda wa Kaburimbo, kuko kujya gushaka serivisi i Rukoma byabagoraga.

Uyu mukecuru yari yasabye ko mu ijambo risoza umwaka Perezida Kagame azavuga "Yego" none yarasubijwe.

Uyu mukecuru wo mu Mudugudu wa Nyarusange, Akagari ka Karengera mu Murenge wa Musambira mu Karere ka Kamonyi yari yatumye abadepite baje gusobanura ibyavuguruwe mu Itegeko Nshinga ryatowe muri Referandumu tariki 18 Ukuboza 2015 kubwira Perezida Kagame kuzatanga igisubizo ku busabe bw’abaturage bifuza ko akomeza kuyobora, muri disikuru isoza umwaka.

Ati «Umunsi baba bavuga ngo ni ukurasa umwaka, akunda kuvuga ijambo. Azavuge ngo arabyemeye ; natabikora miliyoni enye tuzikora tujye kumusura. Ubwo se azabona intebe!»

Avuga ko yaraye atagereje mu ijoro ryo ku wa 31 Ukuboza 2015, yakumva Perezida Kagame yemeye kuzakomeza kuyobora u Rwanda, akiruhutsa. Ati «Narishimye, ndabyina, nkoma amashyi ».

Mu ijambo ryifuriza Abanyarwanda umwaka w’ibyiza n’Iterambere wa 2016, Perezida Kagame yaboneyeho kubabwira ko ubusabe bwabo yabwumvise kandi yiteguye kuzakomeza kubayobora nyuma ya 2017.

Yaragize, ati "mwansabye kuzakomeza kuyobora igihugu nyuma ya 2017. Nkurikije uburemere bwabyo n’imyumvikanire mwabihaye nta kuntu ntabyemera".

Umukecuru Munganyinka uhamya ko akurikira disikuru zose za Perezida azumviye kuri radiyo. Ashima intambwe Perezida Kagame amaze kugeza ku Rwanda; by’umwihariko we akaba yaramuhaye inka amaze gukuramo umusaruro wamukuye mu cyiciro cy’abatishoboye.

Aragira ati «Kera nari umukene utira umwenda, ariko aho mperewe ‘gira inka’, amata ndayagurisha nkagura igitenge ndetse no ku munsi mukuru nkabasha kugura uturyo twiza. Bankuye ku nkunga y’ingoboka kandi na Mituweri ndayirihira»

Uyu mukecuru wifuza kubona Perezida Kagame imbonankubone, yifuza ko muri manda y’indi myaka irindwi yemeye kongera kuyobora Abanyarwanda, yazarangiza umushinga wa gare ya moshi n’uw’ikibuga cy’indege yatangije.

Yongeraho ko hari Abanyarwanda bakeneye guhindura imyumvire ku bijyanye no kubyara abo bashoboye kurera ndetse n’urubyiruko rugakangurirwa kwiga imyuga no kwihangira imirimo, ku buryo abazasigara bateze amaboko Leta, azaba ari abasaza n’abakecuru badafite imbaraga zo gukora bonyine.

Impanuka yabaye mu ntangiriro za 2015 yatwaye ubuzima bw’abantu 25, urwo rukaba urugero rumwe mu mpanuka zaterwaga no gukoresha ubwato bw’ingashya, abenshi bagahamya ko ubwato bwahakoraga bwari bushaje.

Ubwato bushya bahawe bukoresha moteri bwasimbuye ubu bukoresha ingashyi.

Ubwo bwato bwakoze impanuka bwahise buhagarikwa, hazanwa ubundi bwato bufite moteri kandi bufite ubwishingizi, ku buryo uwagiriramo impanuka yashumbushwa. Nyuma y’umwaka impanuka ibaye, bamwe mu bagenzi bahamya ko hari impinduka mu migendere.

Ntibazubugingo Damascene, wambukiranya Nyabarongo buri munsi ava i Nyamirambo, ajya kurangura imyumbati muri Rugarika, avuga ko basigaye bumva itandukaniro hagati ya moteri n’ingashya.

Agira ati “Uko moteri igenda si nk’uko bagendesha igiti. Iyo wicayemo ubwato ntibuhengama kandi ubwato burihuta. Na none icyiza cy’aha baduha n’amajile kandi bufite ubwishingizi, uwagira ikibazo bamwishyura.”

Uyu mukecuru yasigaranye abuzukuru babiri b’imfubyi biturutse ku mpanuka y’ubwato yabaye umwaka ushize.

Hari imiryango yasigaraye ibibazo bikabije kubera kuburira ababo mu mpanuka.

Umunyamabanga Nshingwabikorwa w’akagari ka Masaka Mafubo Marie Rose, avuga ko imiryango yasigayemo imfubyi ubuyobozi buyiba hafi bukabagenera ubufasha bw’abatishoboye.

Avuga ko buri muryango akarere kawusurishije ibihumbi 50Frw, kandi ababaye cyane bagenerwa inkunga y’ingoboka ya VUP.

Nyirabagenzi Dative yasigaranye abuzukuru babiri, umwe wari ufite amezi abiri n’undi w’umwaka. Ashima abaturanyi n’ubuyobozi bamubaye hafi kuko wenyine atari gushobora kwita kuri aba bana bose bakeneye kwitabwaho.

Ati “Sinabona uko mbaheka bombi ngo mbajyane guhinga kuko imirima yanjye iherereye kure. Abagiraneza baramfasha n’ubuyobozi bumpa amata y’umwana na Mutuweri.”

Akarere ka Kamonyi gafite ibyambu bisaga 10 bigahuza uturere dukora kuri Nyabarongo, hose hakoreshwa ubwato mu buhahirane n’utwo turere.

Gusa gukoresha ubwato bwujuje ibyangombwa biracyari imbogamizi kuko byubahirizwa ku byambu bibiri gusa.

Bamwe mu baturage b’Umurenge wa Rugarika, mu tugari twa Kigese na Masaka; bahitamo kujya kwishyurira umusanzu w’ubwisungane mu kwivuza mu Karere ka Nyarugenge kuko ari hafi yabo kandi ngo bakaba bashima imitangirwe ya servisi zaho.

Abafatira mituweri ahandi bashinja ibigo nderabuzima kubaha serivisi mbi.

Uwitwa Nkundabega, utuye mu Kagari ka Kigese, avuga ko yishyuriye ubwisungane mu kwivuza ku Kigo Nderabuzima cya Mwendo kiri mu Murenge wa Kigali muri Kamena 2015.

Ngo muri Kanama umugore we yafashwe n’inda agiye kubyara bamujyana ku kigo Nderabuzima cya Kigese, agezeyo bamwishyuza amafaranga yose bamubwira ko bamujijije ko mituweri ye itatangiwe muri Kamonyi.

Nkundabega aragira ati “Banciye amafaranga y’u Rwanda ibihumbi 8 , na fagitire n’ubu ndacyazifite(…). Bambwiye ko banjijije ko nagiye gushaka mituweri y’ahandi. Mumbarize iki kibazo, ese mu gihugu hose ni ko kimeze?”

Sebahire Martini, wo mu Kagari ka Masaka, we ngo yishyuriye mituweri ku Kigo Nderabuzima cya Mageragere mu Murenge wa Mageragere abitewe n’uko mu mwaka wa 2014, yari afite mituweri y’i Kigese ariko ntiyishimire serivis bamuhaye umugore we agiye kuhabyarira. Muri uwo mwaka ngo umugore yaje kubyara ajya kwivuriza i Kigese baramwirukana, ataha atavuwe.

Umunyamabanga Nshingwabikorwa w’Umurenge wa Rugarika, Nsengiyumva Pierre Celestin, ahakana amakuru atangwa n’aba baturage, akavuga ko nubwo badashyigikira abaturage bafatira mituweri ahandi, ntawangirwa kuvurwa.

Ati “Ushobora gusanga ari umuntu wifitaniye ikibazo n’undi ku giti cyabo. Iyo atavuwe nta Munyarugarika n’umwe uyobewe aho ikibazo gikemurirwa. Iyo umuntu agize ikibazo araduhamagara tukagikemura. Ni ukuvuga ko iyo tutakibwiwe, tubibara nk’aho nta kibazo gihari”.

Gitifu na we ahamya ko hari abaturage be bafatira mituweri i Kigali kuko ari hafi y’aho batuye, ugereranyije no kujya kwivuriza i Kigese. Abenshi ngo batinya ko umurwayi yakoherezwa ku bitaro bya Remera Rukoma kuko bigoranye kuhagera.

Salvator Habarurema, Umuyobozi w’Ikigo Nderabuzima cya Kigese gishyirwa mu majwi na bamwe muri abo baturage, we yavuze ko iki kibazo cyagaragaye ku muturage umwe (Nkundabega) kuko ngo nimero zo ku ikarita ya mitiweri yari yarafatiye mu Mujyi wa Kigali zitagaragaraga neza.

Habarurema ariko avuga ko baje gukurikirana izo nimero bakazimenya bakaba ngo barafashe umwanzuro wo guhamagara uwo muturage bakamusubiza amafaranga ye. Cyakora, ahakana yivuye inyuma ko nta murwayi basubiza inyuma bamuhora ko yaguze mituweri ahandi.

Abitabira ibiganiro by’umugoroba w’ababyeyi uhuriramo ingo zituye umudugudu, bagaragaza imbogamizi zo kutamenya amategeko y’umuryango arimo arebana n’imicungire y’umutungo w’abashakanye n’itegeko rikumira rikanarwanya ihohoterwa rishingiye ku gitsina.

Umurerwa Marie, ushinzwe Uburinganire n’Iterambere ry’Umuryango mu Karere ka Kamonyi, aha yari yasuye umwe mu migoroba y’ababyeyi.

Tariki 30 Ukuboza 2015, mu mugoroba w’ababyeyi w’Umudugudu wa Bimba mu Kagari ka Gihara, mu Murenge wa Runda, abaturage bagaragaje ko bungukira byinshi mu biganiro bagirana kuko bungurana ibitekerezo byo guteza imbere ingo zabo no kwirinda amakimbirane.

Ariko Ntibuzandiza Rose, umuyobozi w’umugoroba w’ababyeyi, avuga ko bagifite imbogamizi zo kumenya amategeko kuko hari ibibazo bahura na byo bakabura inama zo kubagira.

Atanga urugero rw’umugabo winjiye umugore ntibasezerane, bakabyarana baba mu nzu bubatse mu isambu y’uwo mugore; kuri ubu bakaba barananiranywe umugore akaba ari we wahukanye naho umugabo agasigara mu bye.

Aragira ati “Abantu bo mu mugoroba w’ababyeyi ntabwo tuzi amategeko. Iyo turi muri ibi bibazo by’imiryango, hari ibyo tujyamo bikaba byatugiraho ingaruka kubera kutamenya amategeko arebana n’ikibazo”.

Iki kibazo yakigejeje ku itsinda ryaje kubasura riturutse ku karere, ngo bamugire inama , maze bamusaba ko ikibazo nk’icyo bakwiye kujya bakigeza ku buyobozi cyangwa bakagisha inama Abakozi b’Inzu y’Ubufasha mu Mategeko (MAJ) bakoresheje terefoni.

Abayobozi b’umugoroba w’ababyeyi bifuza kugira ubumenyi ku mategeko bubafasha kugira abaturage inama.

Umwali Pauline, umuhuzabikorwa wa MAJ mu Karere ka Kamonyi, aragira ati “Ni byo amategeko abantu barayakeneye, ariko nta bushobozi bwo kugera mu midugudu 317 dufite.

Ahubwo mujye mwegera abakuru b’imidugudu babatize terefoni itishyura munterefone tubivugane cyangwa mudusure kuko mbere yo kwakira abaturage buri gitondo tubaganiriza ku mategeko”.

Inyota yo kugira ubumenyi ku mategeko ngo ifitwe n’abitabira umugoroba w’ababyeyi mu midugudu itandukanye. Umurerwa Marie, ushinzwe Uburinganire n’Iterambere ry’Umuryango mu Karere ka Kamonyi, atangaza ko imidugudu basuye babagaragarije ko bakeneye ubumenyi buhagije ku mategeko.

Indi mbogamizi abitabira umugoroba w’ababyeyi bagaragaza, ni imiryango itajya yitabira ibiganiro kandi ari yo ikunze kugaragaramo amakimbirane.

Mukamana Dancilla avuga ko yajyanye isake mu isoko rya Gacurabwenge, bakamuca 300frw y’umusoro mbere y’uko ayinjirana mu isoko. Amaze kuyigurisha, uwayiguze nawe yasoze andi 300frw kugira ngo ayisohokanemo.

Abaturage binubira imisoro bakwa

Ngo n’andi matungo basoresha abayazanye n’abayaguze kandi bigaragara mu masoko yose. Ihene isoreshwa 500frw, urukwavu 200frw, imbeba ziribwa zizwi ku izina rya sumbirigi 100frw. Mukamana na bagenzi be bavuga ko gusoreshwa kandi atari ubucuruzi babirenganiramo kuko hari igihe baza badafite amafaranga yo gusora amatungo ya bo agafatirwa.

Baragira bati “Iyo bagufashe utayitwaje biba ngombwa ko ugurisha kuri make ngo ubone umusoro, wayabura itungo ryawe bakarifatira mpaka uyabonye”.

Abajyana umusaruro w’ubuhinzi nabo binubira ko basoreshwa. Abarema isoko rya Bishenyi bavuga ko umuhinzi uzanye inyanya cyangwa ibijumba abisorera, ubiranguye ngo abicuruze nawe agasora, ndetse n’abagura byinshi babisohokana bagasora.

Gusorera imyaka incuro nyinshi ngo bituma igiciro kiyongera kuko ujya kugurisha abariramo n’imisoro yatanzeho. Kankindi Daphrose atanga urugero rw’izamuka ry’igiciro cy’ibijumba, agira ati “Iyo uzanye ibijumba winjira usoze 500frw, ubikuranguriye nawe agasora 500frw. Bituma igitebo ubusanzwe gifite agaciro ka 2000 frw kigurwa ibihumbi 3000frw”.

Ndahimana Rongin, umuyobozi w’ishami ry’imari mu karere ka Kamonyi, atangaza ko bitemewe gusoresha abahinzi n’aborozi bazanye umusaruro w’ibikorwa bya bo nk’uko iteka rya Perezida wa Repubulika no 25/01 ryo ku wa 09/07/2012, ribiteganya.

Aragira ati “Ubundi iri teka riteganya ko umusaruro ukomoka ku buhinzi n’ubworozi utishyura amahoro. Ibyo twabisobanuriye abasora baba mu masoko na ba rwiyemezamirimo basoresha. Wenda birashoboka ko hari aho bigikorwa ariko ntago byemewe. Aho tubimenyeye turabikurikirana ku buryo bikemuka”.

Mu karere hari rwiyemezamirimo uba waratsindiye gusoresha mu masoko, agahabwa 10% ry’ayo yasoresheje. Abaturage bavuga ko iyo ubuyobozi budakurikiranye uburyo abikora, babirenganiramo kuko we aharanira gusarura menshi ngo nawe yunguke menshi.

Ikiruhuko cya Noheri cyatangiye ku wa gatanu tariki 25 Ukuboza 2015 kigeza ku wa mbere tariki 28 kuko hajemo n’ikiruhuko cy’impera z’icyumweru.

Mu minsi ine iyi nzu yari yuzuye.

Mu Mudugudu wa Kibaya, Akagari ka Ruyenzi mu Murenge wa Runda, ubuyobozi bw’umurenge bwahagarikiye abantu bahasenya amazu bivugwa ko yari yubatse mu manegeka kandi bene yo bataratse ibyangombwa.

Niyitanga Felicien, Umukozi ushinzwe Ubutaka, imiturire n’ibikorwa remezo mu Murenge wa Runda, atangaza ko abasenyewe bari batangiye kubaka mu manegeka, bakaba baracunze abakozi badahari bakubaka.

Aragira ati “Ni inzu ebyiri twasenye mu Mudugudu wa Kibaya. Abo bantu batangiye kubaka guhera ku wa gatanu kugira ngo bizagere ku wa kabiri inzu barazitashye”.

Nubwo uyu mukozi avuga ko gahunda y’imyubakire mu Murenge wa Runda iri ku murongo ku buryo buri wese akwiye kuyubahiriza, hari abaturage batakira neza igikorwa cyo gusenyerwa, bakikoma bamwe mu bayobozi babegereye mu mudugudu ko ari bo baboshya kubaka kandi nyuma bakagira igihombo.

Ubuyobozi buvuga ko amazu yubakwa ahatemewe yose azajya asenywa.

Umukeceru Ephrasie, utuye mu mudugudu wa Kibaya, ati “Kiriya ni igihombo baba bateza abaturage. None se umuntu ajya kubaka akagera ku isakaro bari he! Si uko baba bariye amafaranga!”

Niyitanga avuga ko abaturage bakunze kubagezaho ikibazo cya bamwe mu bayobozi babaka amafaranga mbere yo kubaka, ariko ko nta gihamya bababonera ngo bakurikiranwe. Ati “Abaturage baba bavuga ko batanze amafaranga, ariko tutabafatiye mu cyuho ntitwabakurikirana”.

Cyakora, akomeza na we ahamya ko bitumvikana ko inzu zubakwa iminsi irenze umwe hari inzego z’ibanze zibegereye. Ubuyobozi bw’umurenge ngo bukaba buzajya busaba ibisobanuro abayobozi b’inzego zegereye abaturage mu gihe hubatswe inzu itujuje ibyangombwa.

Imibare igaragazwa n’ikigo CEFAPEK gikorana n’abakobwa babyariye iwabo baturuka mu mirenge ya Runda, Rukoma, Nyamiyaga, Gacurabwenge na Rugarika, igaragaza ko mu bakobwa 393 bakorana n’iki kigo abagera kuri 231 bafite abana batanditse mu bitabo by’irangamimerere.

Abagore babyariye iwabo bahura n’imbogamizi mu kwandikisha abana.

Mu mpamvu aba babyeyi bavuga ko zababujije kwandikisha abana ba bo, harimo kuba ubuyobozi bw’umurenge bubatuma abo bababyaranye no kubaca amande yo gutinda kwandikisha, bagahitamo kubyihorera.

Mukantaga Immaculee, wo mu murenge wa Nyamiyaga, afite impanga zimaze kugira imyaka 13 ariko ntarazandikisha.

Avuga ko yazibyaranye n’umugabo wo mu cyahoze ari perefegitura ya Kibungo, none ngo yagiye ku murenge wa Nyamiyaga kwandikisha abana bamutuma se, bamuca n’amande ya 4000 frw.

Agira ati “Nageze ku murenge bantuma papa w’abana, ndamubura. Nibemera ko ntanga ayo mande y’ibihumbi bine gusa nzayajyana bamunyandikeho.”

Umuyobozi w’akarere wungirije ushinzwe imibereho myiza y’abaturage abizeza ubuvugizi bagakurirwaho amande.

Amabwire n’inzitizi mu buyobozi ni bimwe mu bituma aba babyeyi batitabira kwandikisha abana babo, nk’uko Mukaneza Florence nawe ufite umwana ugejeje imyaka ibiri atanditswe abitangaza.

Ati “Bambwiye ko ugerayo bakakubaza impamvu uje wenyine utazanye na se. Ubwo nahisemo kubyihorera.”

Umuyobozi wungirije w’akarere ka Kamonyi, ushinzwe imibereho myiza y’abaturage, Uwera Marie Alice, atangaza ko kutandikisha umwana ari ukumwima uburenganzira.

Avuga ko iki kibazo kigaragara cyane ku bakobwa babyariye iwaba batinya kwandikisha abana kubera ipfunwe, bigakubitiraho n’inzitizi basanga mu buyobozi bamwe muri bo kwandikisha bakabyihorera.

Ati “Ubu twatangiye kubakorera ubuvugizi mu mirenge kugira ngo babandikeho abo bana kandi babagire inama. Ndetse n’icyo kibazo cy’amande bagikurirweho kuko bagize ibibazo byihariye. ”

Abakobwa babyarira iwabo bakunze guhura n’ibibazo byo guhabwa akato n’imiryango yabo. Bamwe muri bo kubyara bituma bacikiriza amashuri n’indi mishinga baba baratangiye.

Ikigo CEFAPEK kibafasha kwiyakira no kubyutsa impano za bo kugira ngo bubake ejo hazaza heza.

Nsabimana Camile, umuyobozi w’iki kigo, atangaza ko mu gihe ikigo gifite ubushobozi bwo kwakira abarwayi ibihumbi bitatu na 416 ku kwezi, mu Ugushyingo 2015 bakiriye abarwayi ibihumbi bine na 960, bangana na 145% by’abo bagombaga kwakira.

Ikigo nderabuzima cya nyamiyaga

Iyo umubare wabaye mwinshi gutya, uyu muyobozi avuga ko bigira ingaruka ku babagana, kuko batabasha guhabwa serivisi zihuta. Nsabimana avuga ko ikigo gifite abaforomo 11, ariko kugira ngo serivisi zitangwe neza, bakeneye byibura abaforomo 19.

Uyu muyobozi asaba akarere kubakorera ubuvugizi muri Minisiteri y’ubuzima bakongererwa umubare w’abakozi, kuko bituma hashobora kugaragara abarwayi binubira serivisi bahabwa n’abakozi kandi ntako baba batagize.

Uretse gusuzuma abarwayi no kubaha imiti, avuga ko hari izindi serivisi zitangwa n’ikigo nderabuzima zikenerawamo abaforomo. Ati “muri abo baforomo 11, hari uba ari muri konji, hari uba yaraye izamu, hakaba n’uribuze kurirara; kandi hakaba n’izindi serivisi tugomba gutanga nko gukingira no gupima ababyeyi batwite n’ibindi”.

Umuyobozi w’akarere ka Kamonyi wungirije ushinzwe imibereho y’abaturage Uwera Marie Alice, ahamya ko ikibazo cy’abakozi bake mu mavuriro no mu bigo nderabuzima ari rusange, kubera ko hari abahembwaga n’abaterankunga bahagaritswe.

Aragira, ati “Ntago ari ku kigo nderabuzima cya Nyamiyaga honyine hari ikibazo cy’abakozi bake, ahubwo no ku bindi bigo ndetse no ku bitaro dufite ikibazo cy’abakozi”.

Ngo abakozi b’amavuriro bahembwa na Minisiteri y’ubuzima. Kuri ubu hariho n’ikibazo cy’uko abatarize icyiriro cya mbere cya Kaminuza, batemerewe guhabwa akazi. Uwera, ati “amabwiriza ya MINISANTE ntiyemerera aba A2 guhabwa akazi k’ubuforomo kandi no kuba A1 umushahara ntuhinduka”.

Ikibazo cy’abakozi bake mu mavuriro ngo Ubuyobozi bw’akarere ntibuhwema kugikorera ubuvugizi, ariko buranasaba n’abakozi kudatanga serivise mbi bitwaje ko ari bake.

Mu gihe mu minsi mikuru isoza umwaka yatambutse, abatuye Kagina bavuga ko bajyaga barya bidasanzwe , bakanagura imyenda mishya, uyu mwaka wo ngo byarahindutse kuko bahuye n’inzara bakaba bazanzamuwe n’ibishyimbo barimo gusarura.

Itorero rya Kagina.

Ku mugoroba wok u wa 24 Ukuboza 2015, mu Isanteri ya Kagina hari urujya n’uruza rw’abantu baza guhaha, abandi bavuga ko bategereje abagabo babo bagiye gucuruza amavazi mu Mujyi wa Kigali, ngo babahe amafaranga yo guhahira Noheri.

Mukaruzindaza Christine avuga ko kubera ibibazo by’inzara yatewe n’ihinduka ry’ikirere, imiryango yabo yacungiraga ku bubumbyi gusa. Ati “Ubu nta mwenda wa Noheri twiteguye kuko ayo umuntu yakoreraga yose yarwanaga no kubona igituma abana baramuka.”

Baba abakristu cyangwa abayisiramu batuye uyu mudugudu , bose bafata Noheri nk’umunsi udasanzwe ariko bakavuga ko mu kuwizihiza bakaba batagomba gusesagura.

Nyiraminani Aliette,ufite umugabo ukora ubuzamu ku kigo cy’ishuri, ati “Kuba bamuhembye, yaguze ibirayi, turabirya n’ejo nzatekere abana mbere yo kujya gusenga , nituvayo nongere mbagaburira ubundi dutembere”.

Abenshi mu Banyakagina batunzwe n’ububumbyi.

Abandi ariko, bo bavuga ko inzara yabasigiye isomo batakwishinga iminsi mikuru ngo bimareho amafaranga. Uwitwa Bayisenge Andre ati “Ntabwo umuntu yaba afite nk’amafaranga ibihumbi 10 ngo abiguremo ibiro bitanu by’inyama. Ahubwo agomba kubika nk’ibihumbi bibiri yo kwitabaza nahura n’ikibazo”.

Umukuru w’uyu mudugudu, Tereraho Andre , avuga ko inzara muri uyu mudugudu yari yaratewe n’izuba ryacanye rigatuma imyaka irumba. Iminsi mikuru ikaba isanze barongeye kwisuganya, ariko ngo nk’umuyobozi akaba ari gusura imiryango ayibutsa ko nyuma y’iminsi mikuru ubuzima bukomeza.

Nubwo hari abakora ubuhinzi n’ababyinnyi b’injyana gakondo, abenshi mu batuye umudugudu wa Kagina batunzwe n’amafaranga bakura mu byo babumba kuko ari wo mwuga gakondo wabo.

Aba babyeyi 393 baturutse mu mirenge itandukanye y’Akarere ka Kamonyi bafatanyije gukorera abana babo umunsi mukuru bishimira Noheri. Iki gikorwa cyateguwe mu rwego rwo kubatoza gukunda abana babo no kubategurira ejo hazaza.

Abana b’abakobwa babyariye iwabo bahawe noheri y’abana.

Ibirori byizihirijwe ku ishuri ryisumbuye ryitiriwe Rose Mystica, tariki 23 Ukuboza 2015. Abana n’ababyeyi basusurukije ibirori bakurikije amatsinda 11 bibumbiyemo, abana bahabwa impano za noheri zirimo amatungo, amafaranga, hari n’abafunguriwe konti mu bigo by’imari, maze basoza biyakira.

Abakobwa babyariye iwabo bavuga ko ari ubwa mbere bakoreye abana babo ibirori, bagashimira iki kigo cyabibutse kikabafasha gushimisha abana babo .

Mukaneza Florance, umwe mu bitabiriye ibi birori azanye n’umwana we w’imyaka ibiri n’igice, ahamya ko kwibumbira hamwe n’abandi byatumye yiyakira mu buzima bumugoye yabayeho.

Aragira ati «Namaze amezi icyenda yose ntitwe, inda narayihishe. Na nyuma yo kubyara hari utubazo two kumwitaho nagiye mpura natwo. Baduhurije hamwe bakadufasha kwakira abana bacu twishimye no kumva ko turi ababyeyi nk’abandi».

Umuyobozi Wungirije w’Akarere ka Kamonyi, Marie Alice Uwera, yashimiye abo babikira bafashije abakobwa babyariye iwabo kubona uko baha abana babo Noheri.

Umuyobozi w’Akarere ka Kamonyi Wungirije ushinzwe Imibereho Myiza y’Abaturage, Uwera Marie Alice, ashima ababikira b’ababernadine bibutse ko abakobwa babyariye iwabo aria bantu bagira ibibazo bakabura ababafasha kubikemura, byakubitira ku mateka y’ubuzima baba barahuye na bwo, bagahera mu bwigunge.

Ati «Uyu munsi wateguwe mu rwego rwo kugira ngo tubahanagure ya marira barize. Kuba umuntu yarabyaye si ukuvuga ko ubuzima burangiye. Turabakangurira gukora no gukomeza amashuri kuko hari abayacishirije. »

Umuyobozi wa CEFAPEK Sœur Donatille Mukarubayiza, atangaza ko ikigo cyagize igitekerezo cyo kwakira abakobwa babyeriye iwabo , mu rwego rwo kubafasha kwiyakira na kubahugura bafashwa kubaka ejo hazaza heza, ariko ngo bakeneye ko n’abandi bantu bafite umutima utabara bakita ku bibazo bya bo kuko akenshi baba baratereranywe.

Iri shuri riherereye mu mudugudu wa Nyagacaca, Akagari ka Ruyenzi, mu murenge wa Runda mu karere ka Kamonyi. Nta buryo bwo gufata amazi rifite kuko ava ku nyubako z’ibyumba by’amashuri, amanukira mu mubande ariko yangiza umuhanda, imyaka y’abaturage n’amazu.

umuhanda unyura munsi y’amashuri warasenyutse

Amazi ava ku mashuri amanukira mu rugo no mu mirima ya Nyirabyago Therese. Uyu mukecuru avuga ko afite ubwoba bw’uko azamusenyera inzu kuko aza ari menshi. Yibaza impamvu iri shuri ridafata amazi nk’uko abandi babikora.

Ati “ Abandi bafite ibigega cyangwa bagacukura ibyobo ariko Gadi (nyir’ishuri)we, naramwiyamye ambwira ko amazi ava ku mashuri atayafata ngo ayashobore. Nitabaje ubuyobozi kuva ku mudugudu kugera ku kagari no ku murenge ariko ntacyo barabikoraho”.

Uyu mukecuru afite ubwoba bw’uko azamusenyera inzu

Undi muturanyi w’iri shuri, nawe ahamya ko uretse kwangiriza abaturage, amazi ava ku mashuri yangije umuhanda. Ati” umuhanda wabaye imikuku nta modoka ishobora kuhanyura. Mu minsi iri imbere na moto ntizajya ibona aho inyura”.

Ntitwabashije kuvugana na nyir’ikigo, ariko umukuru w’Umudugudu wa Nyagacaca, Kwitonda Yussuf, atangaza ko ubuyobozi bwagiye kureba ikibazo cy’amazi asenyera abaturage, bugasanga atari aturuka ku ishuri gusa, ko ahubwo harimo n’aturuka mu miyoboro yo ku muhanda Ruyenzi-Gihara.

Amazi ava ku mashuri bayayobora mu baturage

Ibi ariko abaturage ntibabyemera, kuko bavuga ko mbere y’uko yubaka amashuri nta mazi yabangirizaga. Bati “ruhurura y’amazi ava i Gihara twarayiyobeje tuyacukurira icyobo. Nafate amazi ye, maze nawe atake ko ava ahandi amusenyera, abayamuteza bayafate!”

Rwandenzi Epimaque, Umunyamabanga Nshingwabikorwa w’Akagari ka Ruyenzi, atangaza ko kudafata amazi ava ku nzu ari amakosa ahanishwa amande y’amafaranga y’u Rwanda ibihumbi 50.

Amashuri afite imireko ariko nta buryo bwo gufata amazi

Ngo mu gihe hari umuturage ugejeje ku buyobozi ikibazo cy’uko amazi ava ku muturanyi amusenyera, ubuyobozi bumutegeka kuriha ibyo ayo mazi yononnye.

Habanabakize bakunze kwita Habana utuye mu Mudugudu wa Kirega, Akagari ka Kigese, mu Murenge wa Rugalika, yatemye umugore witwa Nyiramatama Beatrice ku wa 19 Ukuboza 2015 yitaba Imana.

Yamaze kumutema ahita yiruka agana kuri sitasiyo ya Polisi ya Runda, aho yahamirije ko yifuriza uwo mugore gupfa (ntiyari yakamenye ko yapfuye) kuko na we yishe nyina n’abandi bo mu muryango we abaroze.

Yagize ati “Buriya numvise yuko yapfuye, byaba ari byiza bitewe n’uko yamaze umuryango wacu n’agasozi kose. Umuryango wacu ni wo yibasiye cyane kubera ko isambu yabo papa yaguze. Ni yo arimo kuduhora, akaroga n’abandi batavuka muri iyo sambu”. Uyu musore akomeza atangaza ko yiteguye gukora ibihano byose azahabwa n’ubutabera .

Umunyamabanga Nshingwabikorwa w’Akagari ka Kigese, Karahamuheto Emmanuel, atangaza ko ibyabaye bishingiye ku rwango umuryango wa nyakwigendera ufitiwe n’uyu musore ndetse n’abandi baturanyi kuko na nyuma y’ibyabaye hari abaturage bagaragaje ko babyishimiye.

Yagize ati “Kumwanga ko bamwangaga, iyo ubonye abaturage uburyo babivuga, hari uwavuze ko baraye babyina bishimira ko yapfuye”.

Ngo hari hashize igihe, umubyeyi w’uyu musore yitabye Imana; akaba yaragiye ashyamirana na nyakwigendera, ariko ubuyobozi bw’umudugudu bukabihosha .

Ikibazo cyaherukaga n’icy’igetenge Habana yibye nyakwigendera, agategekwa kucyishyura. Ariko na none muri uyu mudugudu hapfuye umwana ku cyumweru tariki 20 Ukuboza 2015, abaturage bakaba bakeka ko na we ari nyakwigendera wasize amuroze.

Kuri iki cyumweru, inzego z’ubuyobozi n’iz’umutekano zakoranye inama n’abaturage b’uyu mudugudu; Karahamuheto avuga ko abaturage basabwe kwirinda kwihanira mu gihe havutse ikibazo ahubwo bagomba kugishyikiriza inzego zibishinzwe.

Ngo basobanuriwe ko amarozi uyashinja umuntu ari uko wayabonye kandi ko abantu bashobora kubeshyerana.

Yongeyeho ko abantu bakekwaho kuroga bagiye bagaragazwa bashobora kugirwa inama bagakosorwa. Ati “Abantu bagiye bamuvuga ashobora kwegerwa akagirwa inama. Niba banamuzi ko aroga barasabwa kumwirinda aho kwihutira kumwica kandi ibyo bavuga atari byo”.

Impinduka za mbere zatangiye mu ntangiriro z’umwaka aho tariki 23 Mata 2015, MINEDUC yashyize ahagaragara Integanyanyigisho nshya, izashoboza umunyeshuri guhangana ku isoko mpuzamahanga ry’umurimo (Competence-based Curriculum); izatangira gukurikizwa mu mwaka w’amashuri wa 2016.

Minisitri mushya w’uburezi, Dr. Musafiri arahira.

Iyi nteganyanyigisho igaragaza uburyo mwarimu mu mashuri y’incuke, abanza n’ayisumbuye, azajya aha urubuga abo yigisha bakaba ari bo bishakira ibisubizo by’ikibazo runaka azaba yabagejejeho.

Umunyamabanga wa Leta muri MINEDUC ushinzwe amashuri abanza n’ayisumbuye, Olivier Rwamukwaya yagize ati “Ibyo basubiza bizajya biba ari ibibazo bigaragara mu buzima busanzwe bwa buri munsi aho batuye.”

Uwari Minisitiri w’Amashuri abanza n’ayisumbuye, Prof. Silas Lwakabamba, nawe yijeje ko iyi nteganyagisho igomba kuzana impinduka, ariko hakitabwa ku kongerera ubushobozi mwarimu, abana bagatozwa gukemura ibibazo biri mu muryango Nyarwanda.

Ku masomo yari asanzwe yigishwa mu burezi butangwa mu mashuri abanza n’ayisumbuye, hiyongereyemo igifaransa (kuva mu mashuri abanza), igiswayire, uburyo bwo kuba rwiyemezamirimo ndetse n’ikoranabuhanga.

Tariki 24 Kamena 2015, Perezidansi yatangaje ko Dr. Papias Musafiri Malimba, yagizwe Minisitiri w’uburezi, agasimbura uwo mwanya Prof. Silas Lwakabamba wari uwumazeho umwaka. Hanahinduwe n’umunyamabanga Uhoraho, Ntivuguruzwa Celestin, asimbura Sharon Haba.

Mu bizamini bya Leta bisoza umwaka, abanyeshuri baribarutse

Umugore wakoreraga ibizami kuri iki kigo yabyaye habura iminota mike ngo ikizami gitangire.

Mu bizamini bya Leta bisoza amashuri yisumbuye cyangwa icyiciro rusange byatangiye tariki 11 Ugushyingo 2015, hari abagore bigaga batwite babyara ibizamini bitarangiye, bahabwa amahirwe yo gukomeza kubikora.

Umunyeshuri witwa Mukasekuru Charlotte ufite imyaka 30 yageze mu kigo cya College Amis des Enfants aho yagombaga gukorera ikizami cya Leta afatwa n’ibise ahita ajya kwa muganga arabyara, ariko akomeza gukora ibizamini.

Umuyobozi w’ishuri Amis Des Enfants riherereye i Kinyinya mu karere ka Gasabo yavuze ko uyu munyeshuri wigaga wigaga ku rwunge rw’amashuri rwo mu kagari ka Murama yafashwe n’ibise iminota 20 mbere yo kwinjira mu kizami cya Leta 2015, ajyanwa ku kigo nderabuzima kiri hafi aho ahita abyara.

Uyu Munyeshuri usanzwe ari umugore wubatse urugo ku buryo bwemewe n’amategeko, akimara kubyara umwana w’umuhungu bise Ryabonyende Florence ngo yitaweho neza, bimufasha gutora agatege, katumye ahita akomeza gukora ikizami ari ku kiriri.

Gukorera ibizami bya Leta kwa muganga kandi byanabaye mu karere ka Huye, aho umukobwa witwa Mukanyandwi Gerardine wiga mu rwunge rw’amashuri rwa Nyarunyinya mu murenge wa Kigoma, yakoreye ibizami bya Leta mu kigo nderabuzima cya Kigoma, nyuma yo kubyara umwana udashyitse w’amezi arindwi.

Naho mu karere Ka Kirehe, Tuyisenge Odette umukobwa w’imyaka 21, yibarutse mbere y’iminsi itatu ngo ibizamini bya Leta bitangire yemererwa gukora ibizamini ifite uruhinja.

Yashimye Leta y’u Rwanda uburyo yubahiriza uburenganzira bw’umugore, ati “Ndashima ubuyobozi bwampaye aya mahirwe yo gukora ikizamini, mbere numvaga ko nzabyara ndangije ikizamini ariko mbona bibaye mbere yacyo mpita numva ko amahirwe arangiye kuko narebaga uruhinja mfite nkumva ntamahirwe nabona bambwiye ngo nitegure nzakora ikizamini numva ndishimye.”

Tumwe mu turere twahagurukiye ibibazo by’abana bata ishuri

Mu karere ka Burera, mu mwaka wa 2015 habarurwa abanyeshuri 692 bataye ishuri.Bamwe mu bana bata ishuri bakirirwa bapagasa nk’abo bari gusunika igare.

Harimo abavuga ko ababyeyi babo bana babigiramo uruhare, bakabakura mu ishuri ku bushake kugira ngo bajye babafasha imirimo yo mu rugo irandukanye irimo guhinga ndetse no kwahirira amatungo.

Ubuyobozi bw’akarere ka Burera buvuga ko mu guhangana n’ikibazo cy’abana bata ishuri bigisha ababyeyi kwita ku burere bw’abana babo kandi ngo ababyeyi bakura abana babo mu ishuri bazajya bahanwa.

Umuyobozi bw’Intara y’Amajyaruguru, Bosenibamwe Aimé, yasabye abayobozi b’inzego z’ibanze gushyiraho amategeko akaze atuma abana badata ishuri.

Agira ati “Kirazira! Kirazira! Kirazira! Gukura umwana mu ishuri (…) mushyireho amategeko akaze agamije gutuma abana b’Abanyarwanda bose biga.”

Mu karere ka Rusizi naho havugwa abana bata amashuri bakajya gukora indi mirimo ibabuza kwiga bakurikiye inyungu z’amafaranga. Inama y’uburezi yakozwe tariki 9 Nzeri 2015, hagaragajwe ko abagera kuri 600 bigaga amashuri abanza bataye ishuri naho abagera ku 150 bo mu yisumbuye bayahagaritse.

Bamwe mu bayobozi b’amashuri bagaragaza impungenge z’uko bamwe mu bana bashyigikirwa n’abayeyi babo guta ishuri.

Nemeyenkiko Alexandre uyobora ikigo cy’amashuri cya Shara, ati “Abana bajya mu gishanga mu isarura ry’umuceri ndetse ugasanga n’ababyeyi babashyira imbere ngo bajye kubafasha gusarura muceri no kutumvikana mu ngo ni bimwe mu biteza icyo kibazo.”

Hafashwe ingamba zo kugarura abo bana mu mashuri hifashishijwe ubuyobozi bw’imidugudu, nk’uko Nsigaye Emmanuel,Umuyobozi wungirije ushinzwe imibereho myiza y’abaturage muri Rusizi, abitangaza.

Ati “Twiyemeje ko tugiye kumanuka tukegera abayobozi b’imidugudu aho dusanze abana bataye amashuri bose tukabagarura mu ishuri.”

Abanyeshuri bo mu Ruhango barakubiswe, ab’ i Muhanga barirukanwa

Umwarimu yiraye mu bana arabakubita barakomereka kugeza aho bajyanywe mu bitaro.

Abanyeshuri b’abakobwa 20 bo mu ishuri ryisumbuye rya Lycee de Ruhango, bagiye mu bitaro tariki 7 Ukwakira 2015, bazira gukubitwa n’umurezi ushinzwe imyitwarire Hakizimana Dieu Donnee, abaziza gukerererwa kujya mu ishuri.

Ababyeyi barerera kuri iri shuri bagaye imyitwarire y’uyu murezi urera abana ba bo kuko ngo yabakubise kinyamaswa. Uwamahoro Liberta umubyeyi w’umwe mu bana bakubiswe, ati “ese niba afite uburengenzira bwo kwinjira mu macumbi y’abakobwa, ni ngombwa kudukubitara abana gutya, ubuse antumaho nk’umubyeyi nkaza tugafatanya kumuhana!?”

Iki kibazo cyahagurukije umunyamabanga wa Leta ushinzwe ubumenyingiro muri Minisiteri y’Uburezi, Nsengiyumva Albert, tariki 9 Ukwakira 2015, aje guhumuriza abiga kuri iri shuri no gukurikirana ibyabaye.

Yagaye uyu murezi wahise wirukanwa wagaragaje imyitwarire idahwitse, yizeza abaanyeshuri ko Minisiteri igiye gufata ingamba.

Ati “Nka minisiteri ibi biduhaye isomo, twe twibandaga ku iterambere ry’imyigire y’abana, ariko ntitwibuke ku kintu cy’imyitwarire, gusa ubu tugiye gufatanya n’ubuyobozi bwa buri karere, kugira ngo ikibazo cy’imyitwarire nacyo kitabweho, ejo hatazagira n’ahandi byumvikana.”

Tariki 9 Ukwakira 2015, nabwo ku ishuri ryisumbuye Sainte Marie Reine ryo mu karere ka Muhanga, abanyeshuri 28 barirukanwe by’agateganyo bazira kwitwara nabi, bashaka gukora imyigaragambyo.

Padiri Evariste Nshimyumuremyi, umuyobozi w’iki kigo, avuga ko impamvu zo kwibirukana, zatewe no kugaragaza ibyifuzo bitashoboka birimo guhabwa amandazi atanu buri gitondo, kwemererwa kurara babyina kugeza mu gitondo no kudafunga aho barara kugirango ushatse kuryama atabangamirwa kabone n’ubwo haba mu gihe cy’amasomo.

N’ubwo iyirukanwa ry’aba bana ryababaje ababyeyi ba bo, Polisi ya Muhanga yo yashyigikiye icyo cyemezo kuko ngo bashoboraga no kwanduza abasigaye.

IP Ruzigana Vedaste, yagize, ati “Birashoboka ko iyo tudafatira ikibazo hafi, uburozi bwari kuva mu mwaka wa gatatu bukagera mu wa kabiri no mu wa mbere, ariko ntibyumvikana ukuntu bana bitegura gukora ibizamoni basaba kurara babyina ijoro ryose.”

Abayobozi b’amashuri bashakira indonke mu bitabagenewe barihanangirijwe

Inama njyanama y’akarere ka Nyaruguru yateranye tariki 17 Mata 2015, yafashe imyanzuro ko igiye gukora igenzura mu mashuri maze hakarebwa umubare w’abanyeshuri barimo, kuko ngo byagaragaye ko hari abayobozi b’amashuri basaba amafaranga azakoreshwa ishuri azwi nka “Capitation Grant”; ku banyeshuri badafite.

Igenzura ryakozwe na Komisiyo ishinzwe imibereho myiza mu Nama njyanama, hasurwa ibigo 23 gusa, birimo iby’amashuri abanza ndetse n’ayisumbuye.

Inama njyanama ivuga ko muri ibi bigo byasuwe, hafi ya byose byagaragayemo amakosa yo kugaragaza imibare y’abanyeshuri ba baringa, perezida w’inama Njyanama, Murenzi Jean Claaude, ati “Rwose mu by’ukuri twasanze ari ikibazo, kuko hari abayobozi basaba amafaranga y’abanyeshuri badafite bagamije kwiba.

Ubu rero twasabye ubuyobozi ko bwajya gukora isuzuma no mu bindi bigo bitagezwemo kandi uwo bizagaragara ko yakoze ayo makosa akazabihanirwa by’intangarugero.”

Muri aka karere kandi, Nizeyimana Sylvestre, umuyobozi w’urwunge rw’amashuri rwa Kibangu ruherereye mu murenge wa Ngoma, arakekwaho guha akazi umwarimu utagira amasomo yigisha ngo bakanafatanya kunyereza ibiryo bigenewe gutunga abanyeshuri.

Iki kibazo ubuyobozi bw’akarere buvuga ko bwakimenye bukibwiwe n’abaturage, bavuga ko uyu muyobozi w’ishuri yahaye akazi umwarimu witwa Eric Ntawuryimara, nyamara ntagire isomo na rimwe yigisha.

Uyu muyobozi uvugwaho gufatanya n’uwo mwarimu yashyizeho, kunyereza ibiryo by’abanyeshuri, abihakana avuga ko uwo mwarimu yigisha amasomo make, ubundi agacunga imyitwarire y’abanyeshuri kuko nta mukozi uyishinzwe ikigo gifite.

Umuyobozi w’akarere ka Nyaruguru Habitegeko Francois, atangaza hashyizweho itsinda ry’abakozi b’akarere bo gukurikirana ayo makuru kugira ngo bamenye niba ariyo koko.

Mu gihe mu Rwanda hose kuri uyu wa 18/12/2015 harimo kuba amatora ya Referandumu, bamwe mu baturage bo mu Karere ka Kamonyi bazindukiye ku masite y’itora ngo batorere ibyavuguruwe mu Itegeko Nshinga nk’uko bari babisabye Inteko ishinga amategeko.

Bamwe ntibemerewe gutora kuko batujujie ibisabwa.

Mu Kagari ka Ruyenzi ho mu Murenge wa Runda, guhera saa kumi n’ebyiri za mugitondo, ku Rwunge rw’Amashuri rwa Ruyenzi ahatorera abaturage b’Akagari ka Ruyenzi bari batangiye kuhagera bategereje amatora yatangiye saa moya za mugitondo.

Bamwe mu babukereye ariko, ntibabashije kugera kuri icyo gikorwa kuko babuze ibyangombwa bibemerera gutora maze bagataha babaye.

Sinarumwe Leonard yangiwe gutora kuko mu matora aheruka yari yarabaruruwe mu Murenge wa Musambira.

Ngo yabimenyesheje ubuyobozi bw’akagari bumwizeza ko nta kibazo azagira mu gutora, none yageze kuri Site y’Itora baramwangira. Ati “birambabaje cyane kuko nazindutse nza gutora none ntashye ntatoye”.

Nsabimana Jerome mu matora aheruka yari umunyeshuri mu Rwunge rw’Amashuri rwa Rukoma. Yakoresheje telefoni ye ariyimura, ariko ngo yagiye mu cyumba cy’itora yibura ku mugereka. Uyu we ntariheba ko adatora, ahubwo arasaba ababishinzwe kubemerera bagatora.

Aragira ati “Ndumva ntatuje kuko ngomba gutora nk’umunyarwanda. Niba bari bushyire bakatureka tugatora!”

Mukamutesi Bernadette, Umukorerabushake ukuriye iyi site, atangaza ko umuntu wemerewe gutora ari ufite ikarita y’itora n’indangamuntu kandi akaba kuri lisiti y’itora.
Ngo mu mabwiriza bahawe, ufite irangamuntu ari no kuri lisiti adafite ikarita yemererwa gutora, ndetse n’ufite ikarita afite n’irangamuntu ashyirwa ku mugereka ; ariko udafite ikarita ntabe no kuri lisite ntatora.

Nyamara uyu mukorerabushake avuga ko amatora yatangiye hakiri amakarita asaga 180 atarashyikirizwa bene yo.

Ahamya ko yiganjemo ay’abanyeshuri bigaga ku ishuri ryisumbuye rya ISTR batagituye mu kagari, n’ay’abaturage batihutiye kuyafata ariko bo bayahabwa iyo baje gutora.

Abanshi mu baturage bitabiriye amatora bazindutse, ku buryo mu masaha y’isaa yine uyu mukorerabushake yavugaga ko bamaze kugera ku bwitabire bwa 80% mu bihumbi 5422 bateganywa kuhatorera.

Uwo mudugudu utuwemo n’imfubyi n’abapfakazi ba Jenoside yakorewe Abatutsi mu 1994. Bavuga ko bibwa ibikoresho byo mu gikoni n’amatungo yinganjemo ihene.

I Nyamugari ngo bugarijwe n’abajura b’amatungo.

Uwitwa Gahigi yibwe inka mu ntangiro za Nyakanga, nyuma y’igihe gito yitaba Imana. Umugore we Nirere Therese, avuga ko na mbere bajyaga babiba imyaka n’ibikoresho, inka yibwe ikaba yararaga mu kiraro abajura bayitwara nijoro.

Muri rugo rwabo basigaye boroye ihene, ariko Nirere avuga ko adashobora kuziraza mu kiraro cyangwa mu gikoni, ahubwo aziraza mu nzu bararamo.

Ati “None se naziraza mu kiraro bikankundira! Bazitwara bakazijyana! Hari umukecuru baheruka gutwara ihene enye zose bazikuye mu kiraro none bose basigaye baziraza mu nzu”.

Abatuye Nyamugari bahawe ihene n’umuryango Catholic Relief Services muri 2013, muri 2014 ubuyobozi bw’inkeragutabara bububakira ikiraro rusange ngo badakomeza kurarana n’ayo matungo.

Banyingiriki Annonciata, uhagarariye abatuye Nyamugari, ahamya ko ikibazo cy’abajura kibahungabanya kuko abenshi ari abanyantege nke batabasha kwitabara.

Ati “Twageze aho twiyemeza kwirarira irondo kuko tudafite abagabo ngo bariturarire, ariko ubuyobozi budusaba kubireka butwizeza ko buzajya buducungira umutekano”.

Ikiraro rusange cy’amatungo bubakiwe n’inkeragutabara.

Umunyamabanga Nshingwabikorwa w’Akagari ka Nkingo ; Karake Francois Xavier, atangaza ko ubujura butari muri uyu mudugudu gusa, ahubwo n’ahandi hibwa, ku kibazo cy’amatungo yabo akaba avuga ko ari bo bayarangarana.

Arabagaya kuragira ihene mu ishyamba bakamara amasaha menshi batazireba kandi politiki ya Leta ari ukororera mu kiraro.

Agira ati “Amenshi bafite ni amatungo magufi kandi kuyashakira ubwatsi ntibirushya”. Ahamya ko umutekano wabo ucunzwe, abararana n’ihene bakaba ari abanze gutanga amafaranga y’umuzamu w’ikiraro rusange.

Imiryango 26 ikuriwe n’abapfakazi ituye muri uyu mudugudu itangaza ko mu buzima busanzwe yari imaze kwiyubaka, ariko ngo barimo guhungabanywa n’icyo kibazo cy’abajura basigaye barara mu mudugudu wabo.

Kuri uyu wa gatatu tariki 16 Ukuboza 2015, abadepite bagejeje ku baturage b’Imirenge ya Musambira, Nyarubaka na Kayumbu yo mu karere ka Kamonyi umushinga w’Itegekonshinga ryavuguruwe.

Munganyinka Dorothee arasaba kagame gutanga igisubizo ku bunani.

Hon. Murumunawabo Cecile na Hon Uwamariya Devotha nibo bari bagiranye ibiganiro n’aba baturage, babemerera kuzawutora.

Aba baturage biganjemo abandikiye Inteko ishingamategeko bayisaba kuvugurura iri tegeko, bongeye gutuma abadepite ku mukuru w’igihugu ngo bamubwire ko nyuma ya Referandumu bategereje kumenya niba aziyamamariza kongera kuyobora kuko ariwe bashaka.

Munganyinka Dorethee w’imyaka 63, asa n’utegeka Prezida Kagame kuzatanga igisubizo muri disikuru isoza umwaka wa 2015, yavuze ko natabikora bazamusanga i Kigali kumwibariza.

Abatanze ibitekerezo bashimye uko umushinga uteye.

yagize ati “Ikintu dusaba Paul Kagame ni ukugira ngo aduhumurize, atubwire ko azemera.

Yunzemo ati “Ndacyabasaba muzambwirire, nziko mwebwe mubana, murakorana ; muti ‘kuri bonne annee igihe baba barasa umwaka, azatwemerere. Natatwemerera tuzamusura aho aba,ubwo nabona intebe yicazaho abantu bagera kuri miliyoni enye, azabyange.”

Uwitwa Nyiringoga Jafari atangaza ko aramutse ahuye ma Perezida Kagame nta kindi yamusaba uretse kumusaba gukomeza kuyobora Abanyarwanda kuko yabagejeje kuri byinshi birimo umutekano, inka, no kubatoza kugira isuku n’ibindi.

Depite Murumunawabo yabijeje kubatumikira.

Ati “Afite byinshi yatanze, nibyo byiringiro dufite. Ariko ijambo rimwe ryo kuvuga ngo nzakomeza kubayobora niryo duhora dutegereje.”

Depite Murumunawabo yijeje abaturage ko ubu butumwa bundi bahawe bazabusohoza.

Mu mushinga w’Itegekonshinga uzatorerwa muri Referandumu kuwa gatanu tariki 18 2015, ingingo ya 101 yaravuguruwe manda y’umukuru w’igihugu igirwa imyaka itanu yongerwa inshuro imwe.

Hongerewemo kandi n’ingingo ya 172, iteganya inzibacyuho y’imyaka irindwi. Izi manda zose Kagame akaba yemerewe kwiyamamariza kuziyobora.

Mu gihe cy’icyumweru abaganga bo mu Bitaro bya Gisirikare bya Kanombe bamanuka mu turere kuvura abacitse ku icumu rya Jenoside. Iki gikorwa kigamije gufasha abacitse ku icumu bafite ibibazo by’ubuzima basigiwe na Jenoside bikaba bitarabashije kuvurwa neza kugeza uyu munsi.

Umuyobozi w’Ibitaro bya Kanombe, Brig Gen Emmanuel Ndahiro, atangiza icyo gikorwa.

Tariki 15 Ukuboza 2015, mu gutangiza ku mugaragaro iki gikorwa cy’ubuvuzi ku Bitaro bya Remera Rukoma, mu Karere ka Kamonyi, Brigadier General,Dr Emmanuel Ndahiro, Umuyobozi w’Ibitaro bya Kanombe, yagize ati “Iki gikorwa cy’ingabo zanyu kigamije kubagezaho ubuvuzi bwihariye. Zifuza ko mugira ubuzima buzira umuze kugira ngo mubashe kongera kwiteza imbere muharanira kwigira”.

Ingabo z’u Rwanda ku Bitaro bya Remera-Rukoma zivura abacitse ku icumu rya Jenoside.

Umunyamabanga wa Leta ushinzwe Imibereho Myiza y’Abaturage muri Minisiteri w’Ubutegetsi bw’Igihugu, Dr. Alvera Mukabaramba, arashima umusanzu Ingabo z’u Rwanda zitanga mu kuvura abacitse ku icumu indwara basigiwe na Jenoside.

Abaganga ba Kanombe bavura abasigiwe indwara na Jenoside yakorewe Abatutsi.

Ngo mbere yo gutangira iki gikorwa muri 2012, hari habaruwe abarwayi basaga ibihumbi 18 mu gihugu hose, ariko uko bagenda bagera mu turere basanga umubare wariyongereye. Mu turere 26 bamaze kugeramo bavuye abasaga ibihumbi 39 .

Dr. Mukabaramba asanga imbaraga n’ubwitange ingabo z’igihugu zikoresha ari ntagereranywa. Ati “Iyo urebye usanga bavura umubare mwinshi kandi indwara zikomeye; tugasigara duhangana n’indwara zidakira kandi na bwo zifite abaganga bazikurikirana. Mu by’ukuri iki gikorwa cyaradufashije cyane”.

Inzobere z’Ibitaro bya Kanombe zivura abacitse ku icumu rya Jenoside.

Inzobere z’abaganga b’indwara zitandukanye zirasuzumira mu bitaro no mu modoka igendana ubuvuzi “Mobile Clinic”.

Mu Karere ka Kamonyi abasaga 1, 900 biyandikishije kuvurwa, bamwe barahabwa imiti abandi bakoherezwa mu Bitaro bya Kanombe.

Bamwe mu baje kwivuza.

Abacitse kw’icumu rya Jenoside bashima ingabo z’igihugu zabarokoye, zikaba zikomeje no kubaha ubuzima.

Umusaza witwa Katabarwa Augustin, wo mu Murenge wa Gacurabwenge, avuga ko Jenoside yamuteye uburwayi bw’umugongo n’umutwe bidakira. Aragira ati “\kwitanga kw’Ingabo z’igihugu zikaza kutuvura ni umugisha”.

Baravura bifashishije iyo modoka bita Mobile Clinic.

Uru rukiko rwashyiriweho kuburanisha imanza zijyanye na Jenoside yakorewe Abatutsi mu 1994, rwamukatiye hamwe n’umuhungu we Arsene Shalom Ntahobari imyaka ingana, nyuma y’ubujurire bari bakoze ariko bagatsindwa.

Nyiramasubuko yari amaze igihe kinini aburanira muri uru rukiko.

Kuri uyu wa mbere tariki 14 Ukuboza 2015, nibwo umwanzuro w’urugereko rw’ubujurire bw’uru rubanza rwitiriwe Abanyabutare muri uru Rukiko Mpuzamahanga Mpanabyaha ku Rwanda (ICTR/TPIR) washyizwe ahagaragara.

Nyiramasuhuko, umugore rukumbi wakurikiranywe n’uru rukiko, yahamijwe icyaha cyo gutegura Jenoside yakorewe Abatutsi no kuyishyira mu bikorwa na bimwe mu byaha byibasiye inyoko muntu yaregwaga.

Urukiko rwamugabanyirije igihano kuko hari ibyo yaregwaga bitamuhamye, kiva ku gifungo cya burundu yari yakatiwe n’urugereko rw’ibanze, kigera ku myaka 47.

Uwari Burugumesitiri wa Komini Kibayi mu cyahoze ari perefectura ya Butare, nawe yakatiwe igifungo cy’imyaka 47, bavuye ku cyo gufungwa burundu bari bakatiwe n’urugereko rw’ibanze.

Abandi baregwanaga na bo, aribo Sylvain Nsabimana wari Perefe wa Butare, yakatiwe imyaka 18, mu gihe yari yarakatiwe 25 akayijuririra.

Hari kandi Joseph Kanyabashi wari Burugumesitiri wa Komini Ngoma wakatiwe imyaka 20 yari yarajuririye 35. Aba bo bahise basabirwa kurekurwa kuko imyaka bakatiwe barangije kuyifungwa.

Urubanza rw’Abanyabutare ni rwo ICTR/TPIR ishorejeho imirimo yayo.

Jeune Afrique, ivuga ko uru rukiko ruteganya gufunga imiryango tariki 31 Ukuboza 2015; nyuma yo kugenda rusubika igihe cyo gufunga kubera imanza zagiye zijuririrwa.

Kuva mu 1995, nyuma ya Jenoside yakorewe Abatutsi, ICTR/TPIR yakiriye imanza ziregwamo abantu 93, iburanisha 55 zaregwagamo abantu 75.

Hari imanza 10 zashyikirijwe u Rwanda; amadosiye atatu ya ba Ruharwa bagishakishwa, ibirego bibiri byakuwemo n’abaregwaga batatu bapfute batarasomerwa.

Guverineri w’Intara y’Amajyepfo, Alphonse Munyantwari yabisabye mu nama y’umutekano yaguye y’akarere ka Kamonyi, yahuje abayobozi bo mu nzego zikagize kuri uyu wa kane 10 Ukuboza 2015.

Guverineri Munyantwali yasabye abayobozi kwigisha abaturage.

Guverineri Munyantwari, witabiriye iyi nama, yagaye ingeso mbi zo kurwana zikigaragara mu baturage kuko bigaragaza ubunyamaswa buba bubarimo kabone n’ubwo bwabyutswa n’ubuzinzi.

Yagize ati “Ikintu cyo kumva ko ikibazo agiranye n’umuntu kiri bukemurwe n’uko amukubise cyangwa amutemye. Mu kabari, ukumva abantu ngo bararwanye, buriya si uko baba basinze ahubwo ni uko biba bibarimo.”

Polisi yagaragaje ko kuva mu kwezi kwa Mutarama uyu mwaka, mu byaha 249 ku isonga hakaba haza icyaha cyo gukubita no gukomeretsa, kigakurikirwa n’ibiyobyabwenge n’ubujura buciye icyuho.

Umukuru w’Intara y’Amajyepfo yasabye abayobozi guhagurukira iki kibazo, bakegera abaturage bakabagira inama, aho gutanga amakuru ku habaye ibyaha gusa. Ati “Mujyeyo muhamagaze abaturage mubaganirize kandi mufatanye n’abanyamadini mu kunga ababanye nabi.”

Ukuriye Ingabo mu Ntara y’Amajyepfo, Jenerali Majoro Alexis Kagame, yibukije abayobozi ko nubwo nta kibazo cy’umutekano muke kigaragara mu gihugu batagomba kwirara, ahubwo bagomba gukomeza kuwushaka no kuwubungabunga.

Ati “Umutekano turafute urahari, ariko kugira umutekano ni uguhozaho. Ni igisebo kuba tugifite abaturage barwana ugereranyije n’iterambere tujyamo.”

Uretse gushyira ingufu mu kubungabunga umutekano, aba bayobozi bibukije inzego z’ibanze kwita ku isuku no gutanga serivisi nziza, kuko ari imari u Rwanda rurusha andi mahanga.

Nyuma y’uko Perezida wa Repubulika, Paul Kagame, atangarije ko ku itariki ya 17 na 18/12/ 2015, ari bwo hazaba amatora ya Kamarampaka, abaturage babibonye nk’igisubizo bategereje kuva mu kwezi kwa Nyakanga 2015, ku byifuzo bashyikirije intumwa za Rubanda; byo kuvugurura Itegeko nshinga kugira ngo bongere amahirwe yo kuyoborwa na Paul Kagame.

Habimana Alphonse abaza aho igisubizo ku byifuzo byo kuvugurura Itegeko Nshinga kigeze.

Itangazo ry’itariki izaberaho amatora ya kamarampaka ryashyizwe ahagaragara ku wa kabiri tariki 8 Ukuboza 2015. Mu kwezi gushize, ubwo Umuyobozi w’Akarere ka Kamonyi, Rutsiga Jacques, yasuraga abaturage b’umurenge wa Nyarubaka, bamubajije iki kibazo abasubiza ko na we ategereje kimwe na bo.

Uwitwa Habimana Alphonse yamubajije ati "Tumaze iminsi dutanze ubutumwa twifuza ko Nyakubaha Perezida wa Repubulika yakongera akatuyobora (…..) hari ibyo twumva ku maradio, ariko kuba twakubonye muyobozi w’akarere tubwire. Bigeze he?”

Itariki ya Kamarampaka ikimara kumenyekana, abakorerabushake ba komisiyo y’amatora bafatanyije n’inzego z’ibanze batangiye gukangurira abaturage kwitabira amatora.

Bamwe mu batuye Akagari ka Ruyenzi mu Murenge wa Runda batangaza ko biteguye gutora kuko n’amakarita barangije kuyafata.

Uwita Nyirantagorama Pauline agira ati “Icyifuzo ni twe twagitanze none ubwo igisubizo kibonetse turashima Imana. Ahubwo kuri 18 ni kera; n’iyo batubwira ngo tuzinduke mu gitondo twahita tubikora.”

Nubwo hari n’izindi ngingo zavuguruwe mu Itegeko Nshinga ryari ryaratowe mu mwaka wa 2003, abaturage bo baha agaciro Ingingo irebana na manda z’umukuru w’igihugu, mu mushinga uzatorerwa muri Kamarampaka.

Umukozi wa Komisiyo y’Igihugu y’Amatora yibutsa abaturage kwitabira amatora ya referendum.

Muri uyu mushinga, biteganyijwe ko Perezida Paul Kagame azongera kwiyamamariza manda y’imyaka 7 mu mwaka wa 2017 ndetse na nyuma yaho akaba yakongera kwiyamamaza muri manda ebyiri z’imyaka itanu.

Isoko rya Nkoto riherereye mu Murenge wa Rugarika, ryaremaga ku wa gatatu wa buri cyumweru ariko guhera tariki 2 Ukuboza 2015 ryimuriwe muri Bishenyi mu Murenge wa Runda. Abacuruzi baricururizagamo bavuga ko ryimuwe batabimenyeshejwe, none ngo barakorera mu gihombo.

Abacuruzi bimukiye Bishenyi bakanzwe n’imisoro kandi isoko ntiriranamenyera.

Abacuruzi batangaza ko n’ubusanzwe babonaga abaguzi ku munsi w’isoko, ariko bagacuruza byinshi ku buryo ntacyo byari bibatwaye. Umwe muri bo ufite iduka, aragira ati “Amafaranga make nacuruzaga ku munsi w’isoko ni ibihumbi 100Frw ariko ubu sinshobora no gucuruza ibihumbi 15Frw. Ni ugufunga!”.

Abaturage bazana imyaka mu isoko nabo basanga gufungirwa Nkoto barabirenganiyemo, kuko imikorere y’isoko rya Bishenyi itandukanye n’irya Nkoto cyane cyane ku kibazo cy’imisoro yakwa abahinzi.

Isoko rya Nkoto ryimuriwe mu rya Bishenyi ryari rimaze amezi 4 ryarabuze abarirema.

Ngo umuhinzi ujyanye imyaka arayinjiza mu isoko ari uko abanje kuyisorera kandi n’umucuruzi uyiranguye agasora, mu gihe mu Nkoto hasoraga umucuruzi gusa.

Impamvu zateye kwimura isoko rya Nkoto ni uko ryaremeraga mu nkengero z’umuhanda kandi ridatwikiriye.

Dushimimana Emmanuel, perezida w’abikorera mu murenge wa Rugarika, atangaza ko habayeho inama nyinshi zibagezaho imishinga yo kuryimura , ariko ngo mu gihe bari bamaze kwemeranywa ko rizimurirwa hafi yabo, bahakaniwe ko hatabaho amasoko abiri yegeranye.

Ati “bari bavuze ko baryagurira hirya hahinze amaterasi. Nk’abacuruzi, twari twasabye akarere ko batwimuriye abantu, abacuruzi twakwiyubakira isoko ryiza nk’irya Musambira cyangwa irya Kayenzi.

Isoko bararyimuye none amazu y’ubucuruzi ashobora gufunga imiryango.

Nubwo abaturage n’abacuruzi bavuga ko ubuyobozi bwafashe icyemezo cyo kwimurira isoko rya Leta mu rya Rwiyemezamirimo batabamenyesheje, Umunyamabanga nshingwabikorwa w’umurenge wa Rugarika Nsengiyumva Celestin, atangaza ko kwimurwa kw’isoko byumvikanweho n’abahagarariye abacuruzi ndetse n’abavuga rikumvikana bo mu murenge.

Icyemezo cyo kwimura isoko rya Nkoto cyafashwe n’Inama Njyanama y’akarere. Ariko abacuruzi n’abaturage baracyasaba gukorerwa ubuvugizi ngo barigarurirwe. Ngo basanga irya Nkoto barihaye umunsi umwe mu cyumweru ntacyo ryaribangamiraho irya Bishenyi rirema buri munsi.

Yeguye tariki 4 Ukuboza 2015 ariko kuva icyo gihe amakuru atngira gucicikana ku mbuga nkoranyambaga ko yanyereje imisanzu abaturage batanze yo kubaka ibiro by’akagari. Abantu bakavuga ko yaba yaratinye ko Inama Njyanama y’akagari imukorera ubugenzuzi.

Ibaruwa y’ukwegura kwa Muvunyi.

Nyuma y’iminsi yamaze afunze telefoni ye nyuma yo kwegura, kuri uyu wa mbere tariki 8 Ukuboza 2015 yatangarije Kigali Today ko ko yeguye ku mpamvu ze bwite, kuko yashakaga kujya gukora akazi k’ubwubatsi yari yabonye kandi ari byo yize mu mashuri yisumbuye.

Yavuze ko yasize akusanyije inyemezabwishyu z’amafranga yose y’imisanzu yatanzwe, n’ayavuye mu bikoresho byavuye ku biro nk’uko Inama Njyanama yari yabimusabye. Avuga ko yagombaga kwihutira kujya mu kazi gashya yari abonye.

Habimana Ephrem, Perezida w’Inama Njyanama y’Akagari ka Kabagesera avuga ko kuri uyu wa mbere, ariho bakoze igenzura ry’amafaranga y’imisanzu yatanzwe, nk’uko bari babisabwe n’abaturage bahagarariye.

Habimana yavuze ko urwego ahagarariye narwo rwatunguwe n’ukwegura kwa Muvunyi, kuko mu nama baherukaga gukorana mu byumweru bibiri bishize bafata icyemezo cyo gukora ubugenzuzi yari ahari kandi abyemera.

Ati “Mu mafaranga asaga ibihumbi 500Frw yatanzwe n’abaturage ari ku mwirondoro wa Konti y’akagari. Naho andi agera ku bihumbi 80Frw atagaragara, hari abakuru b’imidugudu bemera ko batarayashyira kuri Konti.”

Bimwe mu bikoresho nk’amasima byemewe gutangwa n’abaturage; na byo Inama njyanama yabajije abari kubitanga, bavuga ko bitaratangwa.

Habimana atangaza ko ubugenzuzi buzakomeza hakarebwa niba imirimo yakozwe ku nyubako ihuye n’igihembo cyayitanzweho.

Ubuyobozi bw’akarere ka Kamonyi butangaza ko bwakiriye ubwegure bwe, kugira ngo umusimbura abone uko atangira akazi. Nabwo bukavuga ko buzakurikizaho kohereza itsinda rijya gukora ubugenzuzi ku bivugwa kuwari gitifu.

Mu kwizihiza Umunsi Mpuzamahanga w’Abafite Ubumuga, abo mu Karere ka Kamonyi wizihirijwe mu murenge wa Kayenzi, bamwe muri bo bagaragake ko bishimira ko bahuguwe gukora imyuga ibarinda gusabiriza, ariko hari n’abavuga ko bagifite imibereho mibi kuko babura ibikoresho byo kubyaza umusaruro imyuga bazi.

Ngarambe Jean Bosco azi gukora inkweto ariko ngo yabuze igishoro ngo agure ibikoresho.

Kanani Jean wo mu Mudugudu wa Kabasanza mu Kagari ka Gihara , Umurenge wa Runda, afite ubumuga bw’ingingo ku buryo agendera mu igare.

Avuga ko azi kudoda imyenda n’imashini ariko akaba abura ubushobozi bwo kubikora. Ati “Hari imashini Padiri w’i Gihara yari yarampaye ariko mu ntambara barayitwaye. Ubu nirirwa aho ntacyo nkora kubera kubura umuterankunga wamfashisha indi”.

Ngarambe Jean Bosco, wo mu Kagari ka Muganza, mu Murenge wa Runda, na we ufite ubumuga bw’ingigo, akora akazi ko kudoda inkweto. Ngo azi no kuzikorera ariko yabuze igishoro cyo kuguramo ibikoresho byo kuzikora.

Umunsi Mpuzamahanga w’Abafite Ubumuga, uyu mwaka ufite insanganyamatsiko igira iti « Twubake ubushobozi kuri bose, duteza imbere ibikorwa bidaheza”.

Nubwo bamwe muri bo bavuga ko babura ubushobozi, akarere ko kavuga ko iyo bibumbiye mu makoperative kabafasha.

Umuyobozi Wungirije ushinzwe Imibereho Myiza y’Abaturage mu Karere ka Kamonyi, Uwera Marie Alice, atangaza ko hari ubufasha bugenerwa abafite ubumuga, ariko akenshi bunyuzwa mu makoperative bahurizamo imbaraga.

Avuga ko hari amakoperative atandatu yahawe ibikoresho nyuma yo guhugurwa mu myuga y’ubwubatsi, gusudira no gutunganya imisatsi, hakaba n’indi ikora amasabuni n’amacaki (ingwa) mu Murenge wa Rugarika (…), ndetse ngo hakaba n’abandi bateganya guha ibikoresho.

Abageze ku ntambwe yo gukorera mu makoperative bahamya ko imibereho yabo yahindutse. Karenzi Jean Marie Vianney wo mu Murenge wa Musambira, avuga ko Koperative y’Abafite Ubumuga bo muri uwo murenge, ifite icyuma gisya ibinyampeke n’umushinga wo kudoda imyenda. Ngo ibyo bikorwa byombi bibafasha kwibonera ibyo bakeneye.

Nyuma y’isesengura ry’ibibazo by’abatarabashije kwishyura ubwisungane mu kwivuza, bagasanga nta mikoro bafite, tariki 1/12/2015, mu nama yahuje ubuyobozi n’abafatanyabikorwa, amakoperative, abacuruzi n’abandi baturage bafite ubushake, bemeye gushyira hamwe bagakusanya amafaranga yo kubishyurira.

Abafatanyabikorwa mu Murenge wa Gacurabwenge bemeye gutanga ubunani bw’ubwisungane mu kwivuza ku batari babufite.

Umunyamabanga Nshingwabikorwa w’Umurenge wa Gacurabwenge, Martha Umugiraneza, yabatangarije ko ubwitabire mu kwishyura ubwisungane mu kwivuza ku rwego rw’umurenge bugeze kuri 99,3%. Abasigaye bakaba bakeneye gutangirwa amafaraanga y’u Rwanda ibihumbi 783.

Ngo abasigaye ni abantu batanze igice cy’umusanzu bakabura ubushobozi bwo kuzuza n’abandi bafite imiryango y’abantu benshi batabasha kurihira.

Yagize ati “Mu makuru twahawe n’abakuru b’imidugudu, basanze nubwo abo bantu bari mu cyiciro cya gatatu cy’ubudehe bagaragara nk’abadafite ubushobozi.”

Abitabiriye inama biyemeje ko mu gihe cy’icyumweru kimwe bazaba barangije gutanga umusanzu wabo kugira ngo abo bantu bazagere mu mpera z’umwaka bararangije kwishyurirwa, ibyo bise “Kubaha ubunani”.

Musonera Jean Pierre , umukuru w’Umudugudu wa Ryabitana, Akagari ka Gihinga, ufite abantu 112 batarishyura, ahamya ko kutishyura batabitewe n’ubugande ahubwo ari ubukene.

Musonera yagize ati “Ntibaretse kwishyura kuko ari ibigande, ahubwo ni amikoro make”.

Ngo kwiyemeza kubishyurira byiswe ko uri ubunani kuko gusoza umwaka no gutangira undi ari igihe cyo kwishima, abadafite ikibazo cya Mituweri bakaba bifurije imiryango itarishyura kuzarya ubunani na noheri bumva ko bafite n’ubushobozi bwo kwivuza.

Ubusanzwe, abakene badashobora kwiyishyurira ubwisungane mu kwivuza bashyirwa mu byiciro by’abatishoboye barihirwa na Minisiteri y’Ubuzima.

Musonera ahamya ko aba bazishyurirwa habayeho gahunda yo kubashyira mu byiciro bishoboye, ariko uyu mwaka bakagira ibibazo bituma basubira inyuma mu bukungu.

Umugoroba w’ababyeyi uhuriramo ingo z’abaturanyi hagamijwe kuganira ku bibazo biri mu bagize umuryango. Isura y’ibiganirwa igenda ihinduka bitewe n’abawitabira kuko n’ahatari ibibazo, abaturanyi bungurana ibitekerezo ku byabateza imbere.

Umuyobozi w’Akarere ka Kamonyi, Rutsinga Jacques, aganira n’abaturage ba Nyarubaka mu mugoroba w’ababyeyi.

Mugabo Leonard wo mu mudugudu wa Gitega, akagari ka Ruyanza, avuga ko mu mugoroba w’umudugudu wabo, babanza kuganira kuri gahunda za Leta n’aho bageze bazishyira mu bikorwa, bakabona kuvuga ku ngo zifitanye ibibazo.

Agira ati “Niba turi ababyeyi bitabiriye turi 30, turabanza tukareba niba twese twarishyuye Mituweri n’impamvu zituma hari abatarajyamo tukajya inama. Hanyuma tukareba abafite ibibazo tugafatanya kubikemura. Byananirana tukabimenyesha umukuru w’umudugudu.”

Kujya inama byatumye n’ingo zidafite ibibazo zibona mu mugoroba w’ababyeyi.

Uwitwa Habimana Alphonse ahamya ko yatinze kumva impamvu y‘umugoroba w’ababyeyi kuko yari azi ko witabirwa n’ingo zananiranye cyangwa abagore bagiye kuganira ku bibazo byabo.

Ngo nyuma yo gukangurirwa na bagenzi be kwitabira ibiganiro by’umugoroba w’ababyeyi, yasanze yari yaracikanywe. Yagize ati “Natinze kumva iby’umugoroba w’ababyeyi. Nasanze ari umwanya wo gufashanya kuko tuba tuziranye. Hari igihe uba utaratanga mituweri kandi unywa agacupa buri mugoroba, icyo gihe baragucyaha.”

Abaturage kandi bahamya ko mu mugoroba w’ababyeyi bamenya amakuru y’imibereho y’abaturanyi babo. Ngo kubera kwirirwa muri gahunda zitandukanye, ntibamenya abarwaye n’abagize ibindi byago. Ngo iyo bahuye bamenya umuturanyi waba uri mu bitaro, bakamuha umubyizi bakanamugemurira.

Umuyobozi w’Akarere ka Kamonyi, Rutsinga Jacques, asaba abaturage kwitabira ibiganiro by’umugoroba w’ababyeyi, kugira ngo bafashanyirizemo.

Rutsinga agira ati “Usanga hari ingo abantu babanye neza n’izindi bafitanye ibibazo. Iyo duhuriye mu mugoroba w’ababyeyi, ba bandi babanye neza ni bo twifashisha ngo twunge ababanye nabi.”

Akomeza avuga ko kuganira kuri gahunda z’iterambere bifasha abaturage guhumuka kuko iyo babibonera ku ngero z’abaturanyi babo barushaho kubyumva neza.