Adeline Munganyinka

Si ho ababyeyi be bavukiye. Bahazanywe muri za 1960 n’ubutegetsi bwa Leta yatangiye ivangura, igamije kumarirayo Abatutsi, kuko hari amashyamba arimo amasazi y’ubumara bwica yitwa Tse Tse.

Kuwa 7 Mata 1994, ibitero by’Interahamwe byaratangiye, abantu bamwe barahunga, abandi baguma mu ngo, kuko hari abagabo bajyaga guhangana n’ibitero by’Interahamwe zashakaga kubarimbura.

Icyakora, ibintu byahindutse ubwo hageraga umugabo wari umupolisi witwaga Isaac, warashe abasaza bari bagerageje kwirwanaho, bikaba intandaro yo kubatandukanya bituma Interahamwe zitangira kubirukaho bose bahita bava mu ngo zabo.

Ati “Ni bwo Mama yadufashe akaboko njye na bakuru banjye, atujyana mu Kiliziya ya Ntarama. Twagezeyo dusanga abandi benshi bahahungiye, twibwira ko turi buhabonere ubuhungiro.”

Ibyo bari bizeye ntibyabaye kuko ibitero byaturutse impande zose, abari hanze baraswaho gerenade, abari imbere na bo basangwamo baratwikwa.

Kwibuka 32 i Ntarama

Ati “Nabonye umuntu atera ikintu ntari nzi, nyuma menya ko ari gerenade, iraturika abantu barapfa. Interahamwe zinjira mu Kiliziya zitangira gutema abantu.”

Icyo gihe yagerageje gutabaza nyina wari uri hafi ya Alitari, ariko kubera urusaku n’umubyigano ntiyamwumva. Nyuma, aho yari ari hahise haterwamo gerenade, urukuta rurasenyuka.

Kwibuka 32 i Ntarama

Yagize ati “Icyo gihe niho narebye mbona ko ibintu byakomeye noneho ngeze aho gutabaza, mpamagara Mama, abana nabo bari mu Kiliziya bagahamagara ba nyina ngeze aho ndavuga nti Ndahamagara Mama nkumva abana bose barahamagara Mama nigira inama yo kumuhamagara mu mazina.

Namubonaga imbere, we yari yageze kuri Alitari hari mu rusaku rwinshi abantu bari buzuye ntabwo yari kunyumva.

Namuhamagaraga mu mazina, yitwaga Madalina numva wapi, ahubwo igihande yari ariho bahise bahakubita Gerenade gihita gisenyuka.’’

Nubwo yanyuze mu bihe bikomeye, Munganyinka Adeline yavuze ko nyuma yo kurokoka, yagerageje kwiyubaka, ubu akaba afite umuryango kandi yarize.

Ati “Ubu turahari, nubwo ababyeyi bacu batakiriho. Dufite abuzukuru. Ntabwo twaheranwe n’agahinda, cyangwa ngo duheranwe n’ayo mateka, twarize, turakomeye.”

Yasabye abahakana cyangwa abapfobya Jenoside kubireka, abasaba gushaka ukuri binyuze mu gusura u Rwanda no kumva ubuhamya bw’abarokotse.

Ati “Twebwe turi ubuhamya bwigendera. Ntibakwiye kujya ku mbuga nkoranyambaga bahakana ibyo batabonye. Nibaze barebe, basome amateka, bumve ubuhamya.”

Mu Rwibutso rwa Jenoside rwa Ntarama hashyinguwe imibiri irenga ibihumbi 5 y’abazize Jenoside yakorewe Abatutsi mu 1994.

Umuyobozi w’Akarere ka Bugesera, Richard Mutabazi, yavuze ko kuba iyi myaka yose ishize bagishyingura bigaragaza ubukana Jenoside yakoranywe no gutinda gutanga amakuru.

Yagize ati “Gukomeza gushyingura nyuma y’imyaka 32 Jenoside ihagaritswe bigaragaza ubukana yakoranywe, igihombo igihugu cyagize, ndetse n’ingaruka zo kudatanga amakuru ku byabaye. Ibi ariko ntibiduce intege, ahubwo biduhe umukoro wo kwigisha cyane cyane urubyiruko.”

Yakomeje ashimangira ko gushyingura imibiri yabonetse biha imiryango icyizere n’amahoro, kuko bamenya aho ababo baruhukiye.

Ibi byashimangiwe kandi n’Intumwa ya Rubanda mu Nteko Ishinga Amategeko, Mukandanga Speciose, witabiriye iki gikorwa. Yagaragaje ko bishimiye guherekeza abari barambuwe uburenganzira bwo gushyingurwa mu cyubahiro.

Ati“Uyu mwaka, Kwibuka mu Karere ka Bugesera by’umwihariko muri Gashora, bijyanye no guherekeza imibiri 52 y’abacu bishwe muri Jenoside. Bari bamaze imyaka 32 bambuwe icyubahiro cyo gushyingurwa neza, ariko uyu munsi tukaba tukibasubije, twongera gushimangira agaciro ka buri buzima.”

Yongeyeho ko n’ubwo nta jambo rishobora gukuraho ibikomere by’abarokotse, gushyingura mu cyubahiro bigira uruhare mu kubazanira ituze no kumenya iherezo ry’ababo.
Bamwe mu barokotse Jenoside yakorewe Abatutsi mu cyahoze ari Komine Gashora bagaragaje ko iki gikorwa kibafasha gukira ibikomere.

Nkurunziza Pierre Damien, ukomoka mu Murenge wa Rilima, yagize ati “Twishimiye guherekeza abo tutigeze tubasha guherekeza. Ni ishimwe rikomeye ku gihugu cyagize uruhare mu gutuma imibiri y’abacu iboneka igashyingurwa mu cyubahiro.”

Na ho Niyonagira Laurence yavuze ko kubona amakuru y’aho ababo bari nyuma y’imyaka 32 ari iby’agaciro gakomeye.

Ati “Twamaze imyaka myinshi dushakisha abacu tutazi irengero ryabo. Kuba ubu twabonye imibiri yabo tukabashyingura mu cyubahiro bitanga ihumure rikomeye ku mitima yacu.”

Icyahoze ari Komine Gashora ubu kigizwe n’imirenge ya Gashora, Rweru, Rilima na Juru. Urwibutso rwa Jenoside rwa Gashora rushyinguyemo imibiri 5229 y’abazize Jenoside yakorewe Abatutsi mu 1994.

Imibiri 52 yashyinguwe kuri uyu munsi yatumye umubare w’abashyinguye muri uru rwibutso ugera ku 5,281.