Uru ruzinduko rugamije gufasha aba bashyitsi gusobanukirwa neza imiterere y’ibibazo biri mu Karere k’Ibiyaga Bigari, cyane cyane uruhare rw’imitwe yitwaje intwaro mu kudindiza amahoro n’umutekano, ndetse n’ingamba u Rwanda rwafashe mu kwakira abahoze muri iyo mitwe iyo batahutse.

Mu biganiro bahawe, bagaragarijwe uko abahoze muri FDLR bahabwa inyigisho zibafasha guhindura imyumvire, bagahugurwa gukora imyuga itandukanye ndetse bagahabwa ubufasha bubafasha kongera kwiyubaka no kubana neza n’abandi baturage.

Bamwe mu bahoze mu mutwe wa FDLR baganiriye n’aba bashyitsi, bababwira ubuzima babayemo mu mashyamba ya Congo, bavuga ko bwari ubuzima bwuzuyemo ubwicanyi, ubusahuzi n’ihohotera rikorerwa abaturage.

Demobe, Colonel Uwimana Alphonse yagize ati” Mu gihe twari mu bice bya Karehe twagiye dukora ibikorwa byo gutwika amashyamba kugira no kuyacana tugurisha amakara.

Twagiye dukora ibikorwa byo gucukura amabuye y’agaciro kugira ngo tugurishe tubone amafaranga yo kugura amasasu n’imbunda,ahongaho niho twaguraga ibikorwa tukagere za Nyamugali, tukagera za Mwenga aho abasirikare bajyaga guhiga inyamaswa zinyuranye kandi nabyo ntabwo byari byemewe kuko byabaga ari ukwangiriza ibidukikije bya Congo.

Hagiye haba ubucukuzi bw’amabuye y’agaciro naho muri ibyo bice bya Mwenga naho tugamije kugura ibyo bikoresho by’intambara twifashishaga mu guhungabanya umutekano w’Abanyekongo.

Abantu bagiye bahiga inyamaswa mu bice bya Kaserero, mu mashyamba ya Ewabora, ndabizi ko harimo bamwe mu rimwe muhazi aho ngaho, mu mashyamba ya Sungwe nahandi n’ahandi.

Ibyo bikorwa rero bibi byakorwaga natwe na bakuru bacu ndetse na barumuna bacu kandi byabaga byarateguwe n’abayobozi bacu ba FDRL, ibyo rero byaratubabazaga arinayo mpamvu twahisemo kubireka tugatahuka mu Gihugu cyacu. Bityo tukaba twaratahutse twakirwa neza nk’abana babanyarwanda.

Bityo rero tuboneyeho kubasaba imbabazi kuko bimwe twarabikoze ibindi bikorwa n’abana bacu.”

Ni ubuhamya asangiye na mugenzi we Gilbert wagize ati”Nkuko bagenzi bange bantangiriye babivuga rero, ibyo bikorwa ndengakamere yicarubozo byabereye no mu gace ka Mwenga,Walongo,Fizi na Uvila.

Byaje kubabaza cyane cyane nko muri Mwenga mu gace bita Kitamba,Mosco, Kalingi, kakorokero, Cyitutu, aho hose abaturage bari bameze nabi kubera twebwe.Twigiraga mu mirima yabo imyaka yose tukayirya, ubutunzi batunze byose tukabubanyaga ugasanga Umuturage w’Umukongomani arateseka.

Wagaruka mu bice bya Kitwabaruzi, Kigogo,kashindaba,Birala- Kakwembe ukamanuka ukagera Murambi ya Ruwinja ugasanga amatungo yose twarayariye, umuturage akabura icyo atangira umwana ku ishuri ugasanga ubuzima bumeze nabi.twashyiraga amabariyeri mu bice bitandukanye kubujyo imodoka zavanga Bukavu zigana Kamiduga zageraga ahitwa Mudubwe imodoka itarabahaga amadorari 200 ntizahanyuraga ugasanga nabyo ari ukwica umuturage rubozo.”

Yakomeje avuga ko batemberaga bagera mu gace kaba Nyamulenge bamwe bakazira isura yabo bahawe na Nyagasani, bagatwikirwa, Rusisiro bitaga Kitoga,Mibunda,Kwitara na Katubwe Abanyamulenge barameneshejwe n’ibyabo biranyarwa.

Abahungiye za Sizi Baraka nabo bahuye n’ingorane zikomeye cyane kuko bahuye nabagize umutwe wa FDRL naba Mayi Mayi ugasanga nabo ubuzima burabayobeye ugasanga ni ikibazo gikomeye cyane ku buzima bw’umuturage w’Umukongomani.Avuga ko ibyo byose babifashwaga na Leta ya Congo ngo kuko ayo mayira yose batabashaga kuyamenya batagira ababayobora.

Akomeza agira ati”Ni yo mpamvu ngwe n’umuryango wange rero kubera ibyo bikorwa bibi ndenga kamere byakorwaga mu maso y’ubuyobzi bwa FDRL na Leta ya Congo barebera nafashe icyemezo cyo gutaha mu Gihugu cyambyaye ariho mudusanze kugira ngo dutange ubu buhamya imbere yanyu, akaba ari nayo mpamvu abatuye muri utwo duce navuze haruguru tubasabiye imbabazi mu ruhame kubera ibikorwa bibi twabakoreye ndetse bibakomeretsa no kubaha ubutumwa mwadutangira mu nsengero kuko bamwe ndahamya ko baza gusengana namwe, mu kababwira ko ababa bafite umutima wa kimuntu bataha mu Gihugu cyabo bakareka guteza umutekano mucye muri Congo.”

Bamwe mu bashyitsi bagaragaje ko ibyo babonye i Mutobo byabafashije gusobanukirwa ukuri ku mitwe yitwaje intwaro.

Mutumayi Kiza Moise, umutware gakondo wo muri Chefferie Bukumu ahitwa Muja , yavuze ko uru ruzinduko rwabahaye amasomo menshi kandi y’ingirakamaro. Yamaganye ihohoterwa FDLR ikorera abaturage, anasaba Leta ya Congo kwitandukanya n’aya mahano no kugira uruhare mu gushakira akarere amahoro arambye.

Yagize ati: “Inshingano dufite imbere ni ugukuba kabiri imbaraga zacu, tugashishikariza FDLR n’imiryango yabo gutahuka mu Rwanda, kuko igihugu cyabo gifite amahoro.Mu gihe twasuraga Urwibutso rwa Jenoside rwa Gisozi, twagize agahinda gakomeye cyane. Iwacu muri Congo, Jenoside yakorewe Abatutsi bayivuga bayikerensa, ariko twe twaje hano twiboneye ukuri kose ku byabaye mu Rwanda, dusanga ari ibintu bibabaje cyane birenze uko twari tubizi.”

Yakomeje agira ati “Ibyo twabonye byaduhaye isomo rikomeye. Tugiye gusubira iwacu muri Congo dutangire ubukangurambaga, dushishikariza abakiri mu mutwe wa FDLR gutaha, kuko twibonye ko mu Rwanda hari amahoro n’ituze, kandi ko abatahutse bafashwa gusubira mu buzima busanzwe.”

Yongeyeho ko bazagenda babwira abantu bose ko amahoro ari yo akwiye kuranga imibereho y’abantu kandi ko nta terambere rishoboka hatari amahoro.
Ku kibazo cya FDLR, Mutumayi yagize ati “Ikibazo cya FDLR kiracyari ingorabahizi, kuko hari n’aho ubona ko hari inzego zimwe na zimwe zitabasha gukumira cyangwa zikaba zanatanga ubufasha butaziguye. Icyakora, nk’abayobozi b’imiryango n’ab’amadini, dufite
inshingano yo gukomeza gukangurira urubyiruko n’abaturage bose guhitamo inzira y’amahoro no kwamagana ibikorwa by’imitwe yitwaje intwaro dukangurira abakiyirimo gutaha.

Umuyobozi wIhuriro riharanira Amahoro n’Ubwiyunge mu karere k’Ibiyaga Bigari, Bishop Felix Gakunde, yavuze ko uru ruzinduko rwabafashije kubona ukuri ku buryo u Rwanda rwita ku bahoze mu mitwe yitwaje intwaro, ashimangira ko ibyo babonye bizabafasha gutanga ubutumwa bw’amahoro ku bandi bakiri mu mashyamba.

Yagize ati’ Ibyo tubonye ni agahomamunwa haba ubuhamya bw’aba bagabo bahoze muri FDRL, by’ibikorwa bibi ndengakamere ariko bahisemo gutaha kuko babonye ntacyo bizabagezaho.
Bidukoze ku mitima, ni bibi cyane ibyo bakoze ariko umwanzuro wo gutaha wo ni mwiza kuruta kuko bitumye abo turi kumwe imitima yabo isa naho iruhutse.

Bamwe muri bo ntabwo bemeraga ko umuntu ava muri Congo akongera gutaha mu Rwanda akongera kubaho, uko bavuze, uko bababonye basanze ari bazima, bameze neza, bambaye amasaha yabo ndetse bafite na terefone zabo.

Barumiwe basanze iki Gihugu ari Igihugu gifite ubumuntu. Butinze gutya kugira ngo bagere iwabo bajye gukangurira abandi gutaha kuko basanze mu Rwanda atari Igihugu ahubwo ari Paradizo.”
Akomeza agira ati” Umuntu yarakwiciye, umuntu arabyemera, akoze amabi aragarutse umuhaye byose akeneye ntawundi wabikora uretse Imana ahari.”

Umunyamabanga Mukuru wa Komisiyo yo Gusezerera no Gusubiza mu buzima busanzwe abahoze mu ngabo, Musoni Francis, yashimiye abagize iri huriro kuba bafashe umwanya wabo bakaza I Mutobo kureba ibyo komisiyo ifasha abavuye mu mashyamba.

Yagize ati” Mu izina ryanjye nabo dukorana twese dufashe uyu mwanya tubashimira kuba mwafashe umwanya wanyu mukaza kudusura nibyagaciro gakomeye kuko twebwe iyo tubonye abadusura bitugaragariza yuko munzira turimo y’amahoro no kwiyubaka bafatanyije natwe.

Ikindi twishimira kwakira abashyitsi nkamwe, abangaba kugira ngo nabo batange ubwo buhamya bwabo kugira ngo baganire kubera yuko iyo baganiriye n’abantu ibiri mu mitwe yabo, ibyo banyuzemo, ibibi byose banyuzemo bibasohokamo nabo bikabafasha kwisanzura kubera yuko buri muntu igihe cyose aba akeneye uwo baganira akamutega amatwi, akamwungura ibitekerezo. Kuba rero namwe mwafashe uyu mwanya mukaza kudusura aha ngaha nukuvuga ko namwe mutanze umusanzu kugira ngo aba bantu barahangaha ibikomere bashobora kuba bafite, ihungabana bashobora kuba baravanye iyo ngiyo mu mashyamba n’ipfunwe baba baravanyeyo kuganira n’abashyitsi nkamwe bibafasha kubigabanya bikabafasha kurushaho kwitegura gusubira mu buzima busanzwe bakarushaho kuba abantu beza bajya gutanga umusanzu mu kubaka amahoro arambye.”

Yakomeje asobanurira abashyitsi ko abantu bose bava muri FDRL n’indi mitwe iyishamikiyeho, iyo bageze I Mutobo bafashwa bagahabwa serivise zose umuntu akenera mu buzima harimo kubavura, kubigisha, kubaha imyambaro no kubahuza n’imiryango yabo.

Uru ruzinduko rw’aba bashyitsi 120 rugaragaza ko ubufatanye hagati y’ibihugu n’abayobozi batandukanye bushobora kugira uruhare rukomeye mu kugarura amahoro arambye mu Karere k’Ibiyaga Bigari.

Mbere yo gutaha bava i Mutobo, bahuriye mu mugoroba wo gusabana

Ni bimwe mu byagarutsweho mu kigo cya Mutobo giherereye mu Karere ka Musanze mu muhango wo gusoza amahugurwa no gusezerera ku mugaragaro abahoze mu mitwe yitwaje intwaro, barimo abari mu mutwe wa FDLR n’indi mitwe ikorera mu mashyamba ya Repubulika Iharanira Demokarasi ya Congo, mu cyiciro cya 76.

Uyu muhango waranzwe n’ibikorwa bitandukanye birimo kumurika ibyo abasezerewe mu myaka yatambutse bagezeho aho bagaragaje ubumenyi n’ubumenyingiro bungutse bubafasha kwinjira mu buzima busanzwe no kwiteza imbere.

Bamwe mu basezerewe bagaragaje ko biteguye gutangira ubuzima bushya, bavuga ko ubuzima babayemo mu mashyamba bwari bugoye cyane, ariko ko ubu bafite icyizere cy’ejo hazaza heza.

Twiringire Maburakindi ni umwe mu baseserewe agaruka ku buzima bubi babayemo n’umusanzu wabo bagiye gutanga mu kwiyubaka no gukomeza kubaka Igihugu bafatanyije n’abo basanze.

Ati “Twabayeho mu buzima bubi bwo kwirirwa twirukanka. Twabonye kwirukanka bitunaniye duhitamo gutaha.
Umugabo wanjye wa mbere yari umusirikare muri FDLR ubwo turaburana nkomeza kuba aho twari dutuye cyane ko nta na telefone twagiraga ngo tumenye amakuru yo mu gihugu cyacu.

Twakomeje kuba mu buzima bw’ikinyoma bwo gusenga batwizeza ko tuzatera Igihugu cy’u Rwanda kandi tukagitsinda. Sinzi uko twumvise amakuru kuri Radio ko mu Rwanda abatahuka babaho neza natwe duhitamo gutaha. Twageze hano i Mutobo baratwigisha, baratuvuza mbese badufashe neza cyane.”

Akomeza avuga ko yahombye byinshi cyane kuko bigeze kubaha umwanya wo gusura imiryango yabo basanga abo babyirukanye bariteje imbere, avuga ko hari ibyo yize bigiye kumufasha no kwinjira mu makoperative na bagenzi be mu rwego rwo kwiteza imbere.

Kazungu Kabahizi na we ni umwe mu bahoze mu mutwe witwa CNRD waje gusenywa. Avuga ko yageze i Mutobo tariki 29 Ukwakira 2025 akaba yishimiye ko asubiye mu muryango we.

Ati “Ivangura inyungu ryabyaye mu mwaka 1994 turazizi. Iyo ubayeho ku buyobozi bw’ubu burangwa n’ivangura bikugiraho ingaruka kuko akenshi abantu tuyoboka inzira mbi kubera abaduhagarariye ari yo mitekerereze baba badushyizemo.

Twishimiye ko tugiye kuba mu muryango uyobowe n’ubuyobozi buzima bushyira imbere inyungu z’abaturage. Njye icyo nifuza ni ukubana n’abantu neza kugira ngo nkomeze kujya imbere kandi n’uwashaka kunzanamo ingengabitekerezo nk’umuntu uzi aho byagejeje Igihugu namwereka ubuyobozi kuko ntidushaka gusubira inyuma ahubwo turashaka kujya imbere.”

Umuyobozi wa Komisiyo y’Igihugu yo Gusezerera no Gusubiza mu Buzima Busanzwe abahoze mu mitwe yitwaje intwaro, Nyirahabineza Valerie, yavuze ko ikigo cya Mutobo gifite uruhare rukomeye mu guhindura ubuzima bw’abavuye mu mashyamba, binyuze mu mahugurwa atandukanye bahabwa.

Nyirahabineza Valerie

Yagize ati “Mu kigo cya Mutobo duha aba Banyarwanda amahugurwa abategura gusubira mu buzima busanzwe. Tubigisha imyuga, indangagaciro z’ubunyarwanda, ndetse n’uburyo bwo kubana neza n’abandi mu muryango nyarwanda.

Hari byinshi bafashijwe hano mu Kigo cya Mutobo, kuko icy’ingenzi ni ukubahindura kubera ko baba barabibwemo ingengabitekerezo ya Jenoside, bakigishwa ibintu binyuranye n’ukuri, bakangishwa u Rwanda n’Abanyarwanda muri rusange ariko dushima ko bamaze kurangiza amasomo bahawe hano dufatanyije n’inzego nyinshi tumaze gukora isuzuma dusanga batanga icyizere cy’uko baramutse bagiye mu miryango yabo bazaba Abanyarwanda beza cyane cyane ko na hano bagiye bagaragaza imico myiza(Discipline).

Yakomeje avuga ko mu byo bahawe babanje kumarwa ubwoba, kuko bari barabwiwe ko iyo bageze mu Rwanda bicwa. Bahawe ubujyanama ndetse bahabwa n’ibyo kubafasha mu buzima bwabo bwa buri munsi kuko baje nta kintu na kimwe bafite.

Yaboneyeho kubasaba kuba ba Ambasaderi b’u Rwanda mu bijyanye n’amahoro, no gushishikariza abandi gutaha.

Guverineri Mugabowagahunde yasabye abasubijwe mu buzima busanzwe kurangwa n’imyitwarire myiza

Guverineri w’Intara y’Amajyaruguru, Mugabowagahunde Maurice, yasabye abasubijwe mu buzima busanzwe kwitwara neza no guteza imbere ingo zabo n’Igihugu babyaza umusaruro amahugurwa bavanye mu kigo cya Mutobo.

Yagize ati “Kuri uyu munsi duteraniye hano kugira ngo twifatanye muri iki gikorwa cyo gusezerera no gusubiza mu buzima busanzwe abahoze mu mitwe yitwaje intwaro barangije amahugurwa hano mu kigo cya Mutobo icyiciro cya 76 ndetse no gutangiza icyiciro cya 77.

Turashimira Leta yacu y’Ubumwe bw’Abanyarwanda iyobowe na Nyakubahwa Perezida Paul Kagame, udahwema gusaba buri wese ukiri hanze w’impunzi, gutaha akifatanya n’abandi kubaka Igihugu kabone n’ubwo yaba ari mu mitwe yitwaje intwaro.

Ndashimira kandi abarangije amahugurwa y’icyiciro cya 76. Mwagaragaje ubushake bwo guhindura ubuzima mwemera kwinjira mu rugendo rushya rwo kubaka Igihugu cyanyu aho kugwa mu mashyamba ya Congo.

Turabasezerera tubifuriza gusubira mu miryango yanyu no kuba intangarugero mu kwitwara neza, guteza imbere ingo zanyu ndetse n’Igihugu muri Rusange.”

Yakomeje abasaba kwirinda amacakubiri n’ingengabitekerezo ya Jenoside, kwitwara neza muri byose, guharanira isuku mu byo bakora byose no gukomera ku bumwe n’ubudaheranwa birinda ubusinzi, no gusesagura ahubwo bakabaho babaza amakuru y’aho Igihugu kigeze kugira ngo barusheho gusobanukirwa neza.”

Umuvugizi wa Guverinoma wungirije, Uwera Jean Maurice, yasabye abasezerewe gukoresha neza amahirwe bahawe, birinda gusubira mu bikorwa by’urugomo, ahubwo bagaharanira kubaka ubuzima bushya bufitiye akamaro imiryango yabo n’Igihugu muri rusange.

Yagize ati “Aya ni amahirwe mashya muhawe yo kongera kubaho nk’abaturage basanzwe. Mukwiye kuyabyaza umusaruro, mukoresha ubumenyi n’indangagaciro mwigishijwe hano i Mutobo, mukiteza imbere ndetse mugateza imbere n’Igihugu cyanyu.”

Yakomeje abasaba kurangwa n’imyitwarire myiza, gukunda Igihugu no kubana neza n’abandi Banyarwanda, ashimangira ko amahoro n’umutekano ari ishingiro ry’iterambere rirambye.

Yagize ati “Mwabonye ko ibyo mwabwirwaga mukiri hanze y’umupaka bitandukanye n’ibyo muri kubona ubu ngubu. Tubahaye ikaze dore mubonye n’ibyangombwa, ni ukuvuga ngo mwinjiye muri sosiyete ibakunze, ibakiranye ubwuzu. Mwitware neza, iterambere rirabategereje.

Ntimukwiye gusubira inyuma. Mwibuke aho mwavuye n’aho mugana. Ibyo mwize hano bizabafasha kuba abantu b’ingirakamaro mu muryango nyarwanda no mu gihugu muri rusange.”

Muri iki cyiciro cya 76, abagera kuri 214 ni bo basubijwe mu buzima busanzwe, barimo abahoze ari abarwanyi 178 ndetse n’abasivile 36. Muri bo harimo abagabo 203 n’abagore 11.

Aba bose barimo gusubizwa mu turere 24 two hirya no hino mu Gihugu, aho umubare munini ugera ku 162 bangana na 56% basubizwa mu mirenge 10 muri 12 igize Akarere ka Rubavu.

Ni mu gihe kuva mu mwaka wa 2001 abagera ku bihumbi cumi na bibiri magana atandatu mirongo inani na batandatu (126,86) bamaze gusubizwa mu buzima busanzwe.

Abahoze mu mitwe yitwaje intwaro basusurukijwe mu mbyino gakondo

Aba bashyitsi bari mu rugendo rugamije gusobanukirwa uruhare rw’u Rwanda mu kugarura amahoro arambye mu Karere k’Ibiyaga Bigari.

Basobanuriwe amateka y’iki kigo, uburyo cyatangiye ndetse n’intego yacyo yo kwakira abahoze mu mitwe yitwaje intwaro barimo n’abavuye mu mutwe wa FDLR, bakitabwaho bagafashwa gusubira mu buzima busanzwe.

Professor Phil Clark waje ayoboye aba bashyitsi yavuze ko bishimiye cyane ibyo babonye i Mutobo, kuko byabahaye ishusho nyayo y’uburyo igihugu gishobora guhangana n’ingaruka z’amakimbirane.

Yagize ati:"Ibyo twabonye hano biradutangaje kandi biduhaye amasomo akomeye. Twari tuzi ibibazo byo mu Karere k’Ibiyaga Bigari mu nyandiko, ariko hano tubibonye mu buzima busanzwe. Uburyo abantu bahoze mu mitwe yitwaje intwaro bafashwa kongera kuba abaturage basanzwe ni urugero rwiza ku isi."

Mu gikorwa cyo gusobanurirwa imikorere y’iki kigo, hanatanzwe ubuhamya bw’abahoze mu mutwe wa FDLR, bagarutse ku buzima bubi babayemo mu mashyamba ya Repubulika Iharanira Demokarasi ya Congo ndetse n’uko ubuzima bwabo bwahindutse nyuma yo gutaha mu Rwanda.

Makuza Anastase yagize ati:" Nabaye mu nkambi ya Zaire dutegura urugamba rwo kugaruka gutera u Rwanda. Mu mwaka wa 1996 inkambi zarasenyutse duhungira mu mashyamba ya Zaire. Mu mashyamba twabayeho mu buzima bugoye cyane. Twari mu bwoba buhoraho, tudafite ubwisanzure cyangwa ejo hazaza. Twabwirwaga ibintu bitari ukuri ku gihugu cyacu ko iyo utashye bakwica. Ariko aho tugarukiye mu Rwanda twakiriwe neza, turigishwa, turaganirizwa, ubu mfite icyizere cy’ubuzima bushya."

Uwamahoro Rehema nawe yatanze ubuhamya bwe agira ati: “Twabaga mu ishyamba ry’ikirunga cya Nyiragogo, intambara iteye umugabo wanjye we akomeza kurwana aracika aragenda aho yagiye simpazi. Ubwo nabonye mbuze aho kujya ndataha. Nashimye Igihugu cyanjye kuko twageze ino batwakira neza, baduha imyambaro, turya neza ntakibazo.”

Umuyobozi wungirije wa Komisiyo y’Igihugu yo gusezerera no gusubiza mu buzima busanzwe abari abasirikare Maj Gen (RTD) Jacques Nziza yashimangiye ko gahunda yo gusubiza mu buzima busanzwe abahoze mu mitwe yitwaje intwaro igamije kubaka ubumwe n’amahoro arambye.

28 students and three professors from SOAS-University of London, have arrived at Mutobo Demobilisation Centre. Their visit aims to understand regional dynamics and the role of demobilisation and reintegration in peacebuilding and stabilisation in the Great Lakes region. pic.twitter.com/1RpOmqBfkq

— Rwanda Demobilisation and Reintegration Commission (@demobrwanda) March 28, 2026

Yagize ati:"Turashimira cyane ubuyobozi bwiza bw’u Rwanda bukomeje gushyira imbere gahunda z’ubumwe n’ubwiyunge. Iyo hataba iyi politiki, ntibyari gushoboka ko abantu bahoze mu mitwe yitwaje intwaro bagaruka bagahinduka, bakabana n’abandi mu mahoro."

Abasuye bagaragaje ko ibyo babonye bizabafasha mu masomo yabo no mu bushakashatsi bakora, bemeza ko u Rwanda rutanga urugero rwiza mu bijyanye no kubaka amahoro no gusubiza mu buzima busanzwe abahoze mu mitwe yitwaje intwaro.

Abiga muri Ines Ruhengeri bibukijwe uruhare rwabo mu miyoborere y’ahazaza ha Afurika

Mu butumwa bwatanzwe n’Umuyobozi wa INES Ruhengeri, Fr. Dr Jean Bosco Baribeshya, yavuze ko ibi biganiro bigamije gufasha abanyeshuri guhura n’abari mu kazi, kugira ngo babashe guhuza ibyo bigishwa na mwarimu n’ibyo mu buzima busanzwe.

Yagize ati “Uyu munsi twawugeneye abanyeshuri biga ibjyanye n’imiyoborere, cyane ko twagize amahirwe tubona Ambasaderi wa Zimbabwe mu Rwanda, aho twamutumiye kugira ngo aze aganirize abanyeshuri nk’umuntu mukuru, ufite ubunararibonye mu byerekeranye n’Ububanyi n’amahanga, ibyerekeranye n’amategeko n’Imiyoborere cyane ko muri iyi minsi Zimbabwe irimo gukorana neza n’u Rwanda mu gutoza abarimu”.

Ati “Muri za kaminuza abanyeshuri bariga mu ishuri ariko bakagira n’umwanya wo kuganira n’abasanzwe ku isoko ry’umurimo, kugira ngo baganirizwe uko bazashobora gukoresha ibyo bize mu ishuri binjiye mu kazi. Ni yo mpamvu y’ibiganiro turimo uyu munsi cyane ko Afrika ari umugabane ugizwe n’urubyiruko rwinshi, kandi rufite imbaraga zo guteza imbere umugabane wabo binyuze mu guhanga udushya.”

Akomeza avuga ko ibi biganiro bizahoraho, hakurikijwe amashami y’uburezi abarizwa muri INES Ruhengeri, asaba abarimu kuva mu nyigisho za gakondo ahubwo bakigisha izigamije gusubiza ibibazo abaturage bafite, ibibazo u Rwanda rufite, Afurika n’Isi muri rusange.

Umuyobozi wa INES Ruhengeri, Fr. Dr Jean Bosco Baribeshya,

Abanyeshuri bitabiriye ibi biganiro bavuga ko bibahaye ishusho nyayo y’uruhare rwabo mu guhindura Afurika izira ruswa, itekanye kandi iteye imbere.

Mugisha Jules Verederine Irumva yagize ati “Ni ibintu byiza kwakira umuntu ukomeye nka Ambasaderi wa Zimbabwe mu Rwanda. Nk’umunyeshuri wiga ibijyanye n’Amategeko n’uko ibijyanye na ‘rule of low’ ari ibintu bituma ubuyobozi buba bwiza iyo bidahari inzego za Leta zitigenga, ntabwo ubuyobozi bushobora kuba bwiza ku baturage. Ni ukuvuga ngo Ubucamanza, Ubutegetsi nyubahiriza tegeko n’Ubutegetsi Nshinga Mategeko, ni ihame ko bigomba kwigenga kugira ngo ubuyobozi bubashe gukorera abaturage ibyo bugomba kuba bukora.” Akomeza avuga ko guhanga udushya bigomba kuba bijyana n’aho Isi yerekeza.

At “Nk’urubyiruko turimo kwinjira mu Isi y’Ikoranabuhanga, aho hari ubwenge buhangano (AI), aho nkatwe mu mategeko dushobora gukoresha iri koranabuhanga kugira ngo dufashe ubutabera, no kugira ngo ibyo twiga bishobore kugera kure, kuko ushobora gukora nka apurikasiyo ifasha abashaka kwihugura mu mategeko. Urumva ako ni agashya uba ukoze kandi ufashije benshi, ni ahacu rero nk’urubyiruko kugira ngo tubishyire mu bikorwa.”

Naho Mongboko Jestica, Umunyasantrafuka wiga ibijyanye n’Imiyoborere (Public Administration and Good Governance) muri INES Ruhengeri, avuga ko yize byinshi ku bijyanye n’intego z’iterambere ry’Umugabane wa Afurika ya 2063.

Ati “Nize byinshi muri ibi biganiro, by’umwihariko mu rugendo rwa Afurika twifuza mu mwaka wa 2063. Tugomba rero kubishyira mu bikorwa kugira ngo umugabane wacu urusheho gutera imbere, imiyoborere myiza si iya Guverinoma gusa natwe tugomba kuyigiramo uruhare.”

Uwimana Claude, umwrimu mu ishami ry’Imiyoborere muri Ines Ruhengeri, avuga ko nk’abarimu bafite inshingano zo kwigisha abanyeshuri babereka ukuri guhari.

Ati “Ni byo koko hano habaye ibiganiro byahuje abanyenshuri n’inzego z’ubuyobozi butandukanye hano muri INES Ruhengeri. Nk’abarimu bafite inshingano zo kwigisha abanyeshuri tubereka ukuri guhari, icyo basabwa nk’abanyeshuri mu kubaka ahazaza ha Afurika, kandi nibamara kumva inshingano zabo ko Afurika iri mu biganza byabo, ngira ngo nta gushidikanya ko ibyari inzozi bizaba impamo.”

Abanyeshuri bishimiye ibi biganiro

Ambasaderi wa Zimbabwe mu Rwanda, Prof Charity Manyaruke, yasabye urubyiruko rwitabiriye ibi biganiro kuba umusemburo mu miyoborere ya Afurika, bahanga udushya ndetse bashyira mu bikorwa ibyo biga.

Ati “Dukeneye urubyiruko rufite ubumenyi, indangagaciro n’ubushake bwo kuba umusingi w’amahoro, umutekano n’uw’ubukungu burambye. Ibi biganiro byibanze ku kwibukiranya kugira uruhare mu miyoborere myiza ku hazaza ha Afurika, kandi ntitwagira ubuyobozi bwiza tutita ku bo tuyobora, Ni yo mpamvu uruhare rw’urubyiruko rukenewe mu kubaka ubuyobozi bwiza na Afurika twifuza, hibandwa ku mutekano w’abayoborwa, ituze n’iterambere”.

Akomeza avuga ko mu bikorwa by’imiyoborere myiza urubyiruko rutagomba kwibona nk’abarebwa n’imyanzuro gusa, ahubwo rugomba kuba abafatanyabikorwa batanga ibitekerezo bishya n’ibisubizo bihamye.

Uretse abayobozi, ibi biganiro byitabiriwe n’abarimu n’abanyeshuri 300 biga ibijyanye n’Amategeko (Faculty of low) n’abiga Imiyoborere (Faculty of Public Administration and Good Governance).

Urubyiruko rwasabwe kwiga no kumenya amategeko n’inzego z’ubuyobozi, kwiga gukoresha ikoranabuhanga mu guhanga imirimo, kurwanya ruswa no gushyira imbere inyungu rusange, guteza imbere amahoro n’ubwiyunge nio kwitangira ibikorwa by’iterambere ry’Igihugu n’umugabane muri rusange.

Ambasaderi wa Zimbabwe mu Rwanda, Prof Charity Manyaruke

Uwimana Claude