Dr. Eugène Rwamucyo yakatiwe igifungo cy’imyaka 27

Urwo rukiko rwahamije Dr. Eugène Rwamucyo icyaha cya Jenoside, kuba mu mugambi wo gukora Jenoside hamwe n’ibyaha byibasiye inyokomuntu.

Ni icyemezo cyatangarijwe mu iburanisha ryo kuri uyu wa Gatatu tariki 30 Ukwakira 2024, aho abagize inteko iburanisha bari mu mwiherero ari wo wavuyemo igihano cyakatiwe Dr. Rwamucyo.

Dr Rwamucyo w’imyaka 65 y’amavuko akatiwe igifungo cy’imyaka 27 nyuma y’uko Ubushinjacyaha bwari bwagaragaje ibimenyetso ku byaha yaregwaga byo kuba mu gatsiko k’abateguraga Jenoside, icyaha cya Jenoside, ibyaha byibasiye inyokomuntu, ubufatanyacyaha mu byaha byibasiye inyokomuntu no kuba icyitso mu byaha byibasiye inyokomuntu. Ubushinjacyaha bwari bwasabye Urukiko kumuhamya ibyo byaha, agahanishwa gufungwa imyaka 30, mu rwego rwo gutanga Ubutabera ku bazize Jenoside yakorewe Abatutsi mu Rwanda mu 1994 ndetse n’abayirokotse.

Abatangabuhamya batandukanye babwiye urukiko ko Dr Rwamucyo yatangaga amabwiriza yo gushyira mu byobo imibiri y’Abatutsi n’abari bakiri bazima barimo ababaga bakomeretse, hifashishijwe ibikoresho birimo imashini ikora imihanda (caterpillar).

Umutangabuhamya yabwiye urukiko ko ubwo we n’abandi Batutsi benshi bari kuri bariyeri y’imbere y’urugo rwa Pauline Nyiramasuhuko wabaye Minisitiri w’Imibereho y’Imiryango, yumvise Dr. Rwamucyo asaba Interahamwe ko zigomba kwica.

Yagize ati: “Yabwiye umuyobozi wo kuri bariyeri ko batagomba kwitwara nk’abana, kandi ko nibiba ngombwa bagira Abatutsi uburiri bwabo”.

Si ubwa mbere Dr. Rwamucyo, yari akurikiranyweho ibyaha birimo ibya Jenoside, nubwo ubwa mbere urubanza rwabaye adahari, aho Urukiko Gacaca rw’i Ngoma, i Huye mu Ntara y’Amajyepfo, rwari rwaramuhamije ibyaha bya Jenoside, ibyibasiye inyokomuntu, gutegura umutwe w’abicanyi bagamije gukora Jenoside, gutanga ibikoresho byo kwica, gushimuta abagore n’abakobwa, guhagararira abagombaga gushyingura Abatutsi ari bazima, maze rumukatira igihano cyo gufungwa burundu.

Umwe mu banyamategeko bunganira abaregera indishyi ni Maître Rayman Remtola, ugaruka ku byaranze uyu munsi ndetse n’ibizakurikira iyi myanzuro y’ubushinjacyaha.

Ati “ Kuri iki gicamunsi tariki ya 28 Ukwakira2024 ubushinjacyaha bwatangiye kugeza ku rukiko ibyo rushinja Dr Eugene Rwamucyo aho bitegenyijwe ko urukiko rugomba kumva imbwirwaruhame uwari Minisitiri w’Intebe yavugiye aho Dr Eugene Rwamucyo yarari.

Maître Rayman Remtola avuga ko muri uru rubanza bafite ibimenyetso bifatika byerekana ko Dr Eugene Rwamucyo yagize uruhare muri Jenoside yakorewe Abatutsi nk’uko byagenze mu rubanza rwa Dr Munyemana Sosthène.

Ubushinjacyaha bwasobanuye ko bufite inshingano zo gukurikirana abakoze ibyaha bya Jenoside, iby’iterabwoba, iby,intambara, n’ibyibasira inyokomuntu.

Ubushinjacyaha bwagaragaje uburyo Dr Eugène Rwamucyo yari yarabaswe n’ingengabitekerezo ya Jenoside no kwiga mu cyahoze ari Leta zunze Ubumwe z’Abasoviyete byatumye amenya uburyo bw’icengezamatwara dore ko byemeza ko radio Rutwitsi ya RTLM we avuga ko yari yadio ivuga ibintu bisanzwe itibasiraga abatutsi nyamara akirengangiza ko inshuti ye Barayagwiza yabihamijwe nk’icyaha.

Ati “ Kubwanjye Dr Eugène Rwamucyo akwiye igihano cya Burundu ariko ibikurikizwa n’urukiko rujyendeye kubyatanzwe n’Ubushinjacyaha nibyo bizamugenera ibihano.
Urubanza rwa Rwamucyo wabaye umuyobozi w’ishami ry’iyahoze ari Kaminuza Nkuru y’u Rwanda yabaga i Butare (UNR) rishinzwe ubuvuzi, CUSP, rwatangiye tariki ya 1 Ukwakira 2024.

Ashinjwaga ibyaha birimo gukora jenoside, ubufatanyacyaha muri jenoside, kugira uruhare mu mugambi wa jenoside, ibyaha byibasiye inyokomuntu, ubufatanyacyaha n’ubwinjiracyaha mu gutegura jenoside.

Ibi byaha bifitanye isano n’ibimenyetso ndetse n’ubuhamya byakusanyijwe mu yahoze ari Perefegitura ya Butare, aho Dr Rwamucyo yakoreye mbere no mu gihe cya jenoside yakorewe Abatutsi mu 1994.

Abatangabuhamya batandukanye babwiye urukiko ko Dr Rwamucyo yatangaga amabwiriza yo gushyira mu byobo imibiri y’Abatutsi n’abari bakiri bazima barimo ababaga bakomeretse, hifashishijwe ibikoresho birimo imashini zikora imihanda (caterpillar).

Umutangabuhamya yabwiye urukiko ko ubwo we n’abandi Batutsi benshi bari kuri bariyeri y’imbere y’urugo rwa Pauline Nyiramasuhuko wabaye Minisitiri w’Imibereho y’Imiryango, yumvise Dr Rwamucyo asaba Interahamwe ko zigomba kwica.

Yagize ati “Yabwiye umuyobozi wo kuri bariyeri ko batagomba kwitwara nk’abana, kandi ko nibiba ngombwa bagira Abatutsi uburiri bwabo”.

Muri uru rubanza Dr Rwamucyo n’abamwunganira baburana bavuga ko ari umwere gusa yemeye ko yatanze amabwiriza yo gushyira mu byobo imibiri y’Abatutsi bishwe mu gihe cya jenoside, gusa ngo yabikoze mu rwego rwo gukumira ingaruka yari kugira ku bidukikije. Yahakanye gusaba ko abazima bashyirwa muri ibi byobo.

Biteganyijwe ko umwanzuro ku rubanza rwa Dr Rwamucyo uza kumenyekana kuri uyu wa 30 Ukwakira 2024.

Dr Rwamucyo Eugene ahakana ibyaha bya Jenoside aregwa

Muri uru rubanza, igihe cyose Dr. Rwamucyo yagiye ahabwa ijambo, ngo agire icyo asobanura ku byabaga byavuzwe n’abatangabuhamya ku ruhande rw’abamushinja, ntiyigeze yemera ibyo aregwa, urugero mu rubanza rwabaye tariki 15 Ukwakira 2024, yabwiye urukiko ko ubwo Jenoside yabaga, atari azwi i Butare ndetse ko atigeze ahisha imibiri y’Abatutsi bishwe.

Gusa nyuma yabaye nk’uwivuguruza, avuga ko yemera ko yatanze amabwiriza yo gushyingura imibiri yari inyanyagiye mu Mujyi wa Butare mu gihe cya Jenoside, kandi ngo nta muzima washyizwe muri ibi byobo maze asobanura ko iki gikorwa cyabaye mu rwego rwo gukumira impumuro mbi.

Mu gusubiza ibyo yari abajijwe, Dr. Rwamucyo yagize ati: “Ntabwo nigeze njya ku marondo, sinigeze njya kuri bariyeri n’imwe, sinari nzwi i Butare, nta muntu waho wari unzi, nta basirikare twari tuziranye. Gushaka kumpuza n’ubwicanyi bwahakorewe birambabaza".

Mu iburanisha ryakurikiyeho tariki 16 Ukwakira 2024, Umutangabuhamya wabaye umushoferi mu kigo cya Kaminuza Nkuru y’u Rwanda cyari gishinzwe ubuzima, CUSP (Centre Universitaire de Santé Publique de Butare), yagaragaje ko Dr Rwamucyo Eugène n’abandi bakekwaho uruhare rukomeye muri Jenoside yakorewe Abatutsi mu 1994 bakabaye baburanishirizwa mu Rwanda.

Ni Umutangabuhamya wafunzwe imyaka 20 kubera uruhare muri Jenoside yahamijwe n’urukiko. Yagaragaje ko Dr. Rwamucyo yari mu bantu bane bavugaga rikumvikana mu Mujyi wa Butare.

Yasobanuye ko Dr. Rwamucyo ari umwe mu bitabiriye inama yayobowe na Perezida wa Guverinoma y’Abatabazi, Sindikubwabo Théodore, yabaye tariki ya 19 Mata 1994. Iyi ni yo yabaye imbarutso y’ubwicanyi bwakorewe muri Butare.

Dr. Rwamucyo yahakanye ko atari mu bavugaga rikumvikaka kuko yari umuntu utari uzwi mu Mujyi wa Butare

Umutangabuhamya yasobanuye ko mu gihe ubwicanyi bwari bukomeje, Inama y’Umutekano ya Perefegitura ya Butare ari yo yahaye Dr. Rwamucyo, amabwiriza yo gukura mu Mujyi imibiri y’abiciwe kuri za bariyeri yari ihanyanyagiye, ‘Kugira ngo ibyogajuru bitayifotora’.

Uyu mutangabuhamya yasobanuye ko ari umwe mu bo Dr. Rwamucyo, yasabye kwica inkomere, kuko ngo nta hantu hahagije hari hahari ho kuzivurira, kandi ngo mu Mujyi wa Butare hoherejwe imodoka nyinshi zo gutwara imibiri.

Ubwo yabazwaga aho imibiri yajyanywe, yasubije atya ati: “Mubibaze uregwa aho yayijyanaga”. Asobanura kandi ko yabonye imashini ebyiri zikora imihanda (Caterpillars), zifashishijwe mu gucukura ibyobo binini byagombaga kujugunywamo abishwe.

Uyu mutangabuhamya yavuze ko ababajwe no kuba yarafunzwe imyaka 20, azira ibyaha yakoreshejwe n’abatangaga amabwiriza barimo Dr. Rwamucyo Eugène.

Yagize ati: “Namaze imyaka 20 muri gereza kandi ntarikoresheje icyaha. Kubona umuntu kuri televiziyo, yarakoze ibi byaha, n’umutimanama we umucira urubanza! Ubwo twakoraga Jenoside, baduhaga amabwiriza, bakadukomera amashyi. Bavuye mu gihugu, bahabwa ubwenegihugu n’ibindi bihugu. Bakwiye gusubizwa mu gihugu bakomokamo”.

Uru rubanza ruri mu cyumweru cyarwo cya kane, ndetse rukaba ruri kugana ku musozo, biteganyijwe ko Ubushinjacyaha buzamusabira ibihano kuwa Mbere w’icyumweru gitaha, mu gihe kuwa Kabiri tariki 29, abunganira Dr. Rwamucyo nabo bazagira icyo bavuga ndetse nawe yongere guhabwa umwanya wo kugira icyo avuga, nyuma y’ibyo yashinjwe n’abatangabuhamya batandukanye, icyo abunganira abaregera indishyi bavuze, ubushinjacyaha igihano bwamusabiye.

Nyuma Inteko iburanisha, urukiko muri rusange ruzajya mu mwiherero, uzavamo umwanzuro w’Urukiko, wemeza niba Dr Eugène Rwamucyo ahamwa n’ibyaha cyangwa ari umwere.

Me Gisagara wunganira aberegera indishyi mu rubanza rwa Dr Rwamucyo ukurikiranyweho ibyaha bya Jenoside

Muri uru rubanza rwatangiye tariki ya 1 Ukwakira, humviswe abatangabuhamya batandukanye, ariko by’umwihariko abamushinjaga bakaba bari biganjemo, abamuzi mbere no mu gihe cya Jenoside, abo bavuye muri gereza barangije ibihano byabo nyuma yo guhamwa n’ibyaha bya Jenoside, aho bagiye bagaragaza uruhare rwa Dr Rwamucyo wari umuyobozi, nk’uko bigarukwaho na Me Gisagara Richard, umwe mu bunganira abaregera indishyi.

Me Gisagara akomeza avuga ibyo byaha akurikiranweho, ati: “Icyumweru cya mbere twumvise abatangubuhamya ku mateka y’u Rwanda n’agace bivugwa ko Dr Rwamucyo yakoreye icyaha, icyumweru cya kabiri, hakurikiraho abatangabuhamya bazi ibyo yakoze barimo abenshi bafunzwe bazira ibyaha bya Jenoside, bazi ibyo yakoze ndetse n’ibyo bamwumviseho, nyuma yaho twumvise abarokokeye Jenoside aho yakoreye ibyaha”.

Me Gisagara akomeza avuga ko Dr. Rwamucyo akurikiranyweho icyaha cyo kuba mu gatsiko k’abateguraga Jenoside, icyaha cya Jenoside, ibyaha byibasiye inyokomuntu, ubufatanyacyaha mu byaha byibasiye inyokomuntu no kuba icyitso mu byaha byibasiye inyokomuntu.

Mu buhamya bwatanzwe muri uru rubanza kandi, hagaragajwe amashusho (Video) yerekana abantu bakoze ubushakashatsi kuri Jenoside, ndetse hakaba n’ibibazo azabazwa n’abunganira abaregera indishyi.

Me Gisagara yagize ati: “Tuzamubaza ibijyanye n’ijambo rikarishye yavuze rigaragaza urwango ku batutsi, igihe Minisitiri w’Intebe, Jean Kambanda yazaga gusura kaminuza, tariki 14 Gicurasi mu 1994 yavuze ijambo”.

Si ubwa mbere Dr. Rwamucyo, akurikiranyweho ibyaha birimo ibya Jenoside, nubwo ubwa mbere urubanza rwabaye adahari, aho Urukiko Gacaca rw’i Ngoma, i Butare mu Ntara y’Amajyepfo, rwari rwaramuhamije ibyaha bya Jenoside, iby’ibasiye inyokomuntu, Gutegura umutwe w’abicanyi bagamije gukora Jenoside, Gutanga ibikoresho byo kwica, Gushimuta abagore n’abakobwa, guhagararira abagombaga gushyingura Abatutsi ari bazima, maze rumukatira igihano cyo gufungwa burundu.

Dr Eugène Rwamucyo ubu arimo araburanishwa n’inkiko zo mu Bufaransa

Babibwiye abagize umuryango Haguruka babasuye tariki 4 Ukwakira 2024, bakabamenyesha ko guhera ku itariki ya 1 kugeza ku ya 31 Ukwakira 2024
Dr Rwamucyo ukurikiranyweho ibyaha bya Jenoside, wageze n’iwabo, ubu ari kuburana, kandi ko bazanagaruka kubabwira uko urubanza rwagenze.

Bavuze ko batemeranywa na we nyuma y’uko babwiwe ko mu ibazwa n’umugenzacyaha, Dr Rwamucyo atahakanye ibyo guhagararira abashyinguraga imirambo y’Abatutsi, ariko agasobanura ko nk’inzobere yangaga ko iyo mirambo yaborera ku gasozi igateza ibyorezo.

Impamvu yo kutemeranywa na we kandi ni ibyo biboneye n’amaso cyane cyane kuri Paruwasi ya Nyumba no ku Iseminari Nkuru ya Nyakibanda.

Hari uwari kuri Paruwasi ya Nyumba wagize ati "Yafashe ishuri twitaga sereburasiyo (ryigishirizwagamo abategurwa guhabwa amasakaramentu) araritibura (ararisenya), arirenza ku mubiri y’Abatutsi. Baba abari bapfuye n’abari bakiri bazima yarakusanyije. N’abari kubaho yabatabye bumva."

Undi na we wari ku Iseminari Nkuru ya Nyakibanda ati "Narabyiboneye rwose n’amaso yanjye. Bacukuraga ikinogo, bagakurura imirambo hariya, abatakaga na bo bakajyamo. Ubwo se nk’uwapfuye umwana agasigara ataka, ya modoka ikaza ikarenzaho ibitaka, yakuyemo wa mwana ajya kumwerekana?"

Ab’i Gishamvu banenga Dr Rwamucyo washyinguye Abatutsi bishwe agashyingura n’abakiri bazima

Hari undi wagize ati "Niba yari aje gutabara ngo akureho umwanda wenda wari guteza ingaruka, yari kubanza agatoramo abantu bakiri bazima, akabashyira uruhande rumwe akabatabara, abasigaye na bo akabashyingura neza, atari ukubatiburiraho amazu cyangwa gufata ibitaka aza ayora uko abonye."

Gerard Rutazigwa, Perezida wa IBUKA mu Murenge wa Gishamvu, yongeraho ko Dr Rwamucyo afatanyije n’umuganga wabaga iwabo i Gishamvu bigishije abantu guca Abatutsi umutsi w’akaguru kugira ngo bazatinde gupfa ariko batazanabaho.

Akomeza agira ati "Ni na ho hakomotse ya mirambo yaje gushyingurwa hakirimo abantu bazima. Kuko ntibabashaga kugenda bitewe no kuba baraciwe imitsi."

Gerard Rutazigwa, Perezida wa IBUKA mu Murenge wa Gishamvu, yasobanuye ubugome Dr Rwamucyo n’undi muganga mugenzi we bigishije abakoraga Jenoside

Undi muturage ukomoka i Gishamvu, akaba yari afite imyaka 16 mu gihe cya Jenoside, ariko we akaba yari yarahungiye mu mujyi wa Butare, avuga ko n’Abatutsi bari barahungiye ku biro bya Perefegitura ya Butare bakahicirwa ari na benshi na bo batabwe bihagarariwe na Dr Rwamucyo, kandi ko harimo n’abazima.

Agira ati "Ntabwo nari muzi ariko papa yigeze kujya kunkingiza mugiga aho yayoboraga kuri CUSP, ndamubona. Nabonaga isura ye nyizi. Yaraje (kuri Perefegitura) aravuga ngo izi nyandagazi zirakora hano iki? Nizijye kwandagara ahandi zikure umwanda hano."

Akomeza agira ati "Bazanye caterpillar, isiza hariya Radio Huye yakoreraga, n’ubu simpamya ko imibiri y’Abatutsi yahashize. Hari agace karimo abantu barwaye macinyamyambi, icyo gihe caterpillar iza na ba bandi bari barwaye macinyamyambi barakumunzuye barundamo, batarebye ngo uyu ni muzima, batarebye ngo uyu araneganega."

Yungamo ati "Ndibuka ko hari abantu bari bafite ibikomere batigeze bihangana nibura ngo babareke bazagere ku bitaro cyangwa bazire ibyo bikomere bafite. Barakusanyije bose barundamo. Caterpillar ni yo yacukuye, iratazura, hanyuma izana cya kinwa cyayo, ikajya igenda ihehurura, igenda isunika irohamo, itsindagiramo."

Kubera ko yabonaga aho bitangiye kugenda nabi agahungira ahandi, gushyingura Abatutsi bakiri bazima mu byobo rusange Mukagasana ngo yabibonye no mu irimbi ry’i Ngoma, hashyingurwa abakuwe ku kiliziya y’i Ngoma no ku ishuri ryo mu Matyazo.

Ati "Hari n’abo bari batwikiye ku mashuri mu Matyazo, babatwikishije essence. Babazanye ari bazima nta wahwanye urimo, batsindagira muri icyo kimpoteri bakiri bazima. Ari utaka ati nimunkuremo, ari utaka ati nimumpe amazi yo kunywa..."

Abarokotse Jenoside b’i Gishamvu bitabiriye biriya biganiro bashimye umuryango Haguruka kubegera ukababwira ku babahemukiye bari gukurikiranwa, kuko bibagaragariza ko ubutabera buriho bukora, cyane ko baba bakeka ko abahungiye mu mahanga ibyo kuryozwa ibyo bakoze byarangiye.

Dr Eugene Rwamucyo ahakana ibyaha ashinjwa

Dr. Eugène Rwamucyo yavukiye i Munanira muri Komine Gatonde, Perefegitura ya Ruhengeri, tariki 6 Kamena 1959.

Ni umuganga w’inzobere mu isuku n’isukura n’indwara zikomoka ku bumara bwo mu nganda. Yabyigiye mu Burusiya, aho yavuye mu 1989 agashingwa kuyobora ishami ry’ubuzima rusange ry’ibitaro bya Kaminuza (Centre Universitaire de Santé Publique).

Ni urubanza ruzagaragaramo Abacamanza Batatu (3), Abashinjacyaha (2), abazatanga ubuhamya bagera kuri 60, barimo abazaba baturutse mu Rwanda ndetse n’abavuga ubuhamya ku mateka y’u Rwanda mbere no mu gihe cya Jenoside ndetse na nyuma yayo.

Gusa nubwo bimeze bityo, ubwo rwari rutangiye kuri uyu wa 1 Ukwakira, uruhande rwa Dr Rwamucyo rwasabye ko urubanza rusubikwa bakabanza kurwitegura neza nyuma yo gusanga hari amakuru mashya yiyongereye muri Dosiye y’ukekwaho ibyaha bya Jenoside n’ibindi.

Dr Eugene Rwamucyo yatangiye kuburanira mu Bufaransa

Abunganira Dr. Eugène Rwamucyo, mu rukiko rwa rubanda rwa Paris mu Bufaransa, basabye ko urubanza rusubikwa, bavuga ko hari abantu benshi cyane baregera indishyi bari mu rubanza bityo ko bakeneye kubanza kumenya imyirondoro yabo.

Ikinyamakuru la Croix, cyanditse ko uyu munsi mu gitondo, babahaye hafi abantu 800 basabye kwinjira mu rubanza nk’abaregera indishyi, mu gihe mbere hari haje abantu bane gusa, kandi bose ari amashyirahamwe (associations).

Me Philippe Meilhac uri mu bunganira Dr Rwamucyo yanavuze ko abibonamo ikibazo kuko ngo urubanza rutaburanishwa mu ituze imbere y’abo bantu bose.

Me Phillipe yavuze ko Umukiliya we yamubwiye ko ashaka kumenya neza abo bantu mbere y’uko urubanza rutangira, n’aho bahuriye n’ibishinjwa umukiliya we.

Yakomeje avuga ko iyi ari yo mpamvu basabye ko rusubikwa bakabanza kumenya imyirondoro naho bahuriye n’urubanza aregwamo ibyaha bya Jenoside.

Bumwe mu buhamya butangwa n’abazi Eugene Rwamucyo, nuko bamwiboneye mu bikorwa bya Jenoside.

Uyu yagize ati: “Ndabyibuka tariki 6 Kamena navuye ku Bitaro aho bari baraye biciye mushiki wanjye, banjyana mu Mbangukiragutabara kuko nari meze nabi ariko barimo bacyura abakora ku Bitaro barimo Umurundi, tugeze ahitwaga kuri FOKO, twahasanze Rwamucyo kuri Bariyeri n’abandi afite ubuhiri”.

Me Andre Karongozi, uri mu bunganira abaregera indishyi muri uru rubanza, avuga ko Rwamucyo ari mu bantu bakomeye bari bafite inguhu bagize uruhare muri Jenoside aho yakoranga bya hafi n’abamwe mu bakurikiranweho kuyigiramo uruhare ndetse bagahabwa ibihano bitandukanye. Abo barimo Abarimu bo muri kaminuza bakoze Jenoside, abavuka i Butare nka Kambanda Jean, Nyiramasuhuko ndetse na Dr Sosthene Munyemana uherutse guhamwa n’ibyaha bya Jenoside.

Uyu Dr Rwamucyo wari umuyobozi w’ishami ry’ubuzima rusange (Sante Public), ku bitaro bya Kaminuza, ndetse Jenoside ikaba yarabaye ariho yakoraga, akurikiranyweho ibyaha bitandukanye birimo, icyaha cyo kuba mu gatsiko k’abateguraga Jenoside, icyaha cya Jenoside, ibyaha byibasiye inyokomuntu, ubufatanyacyaha mu byaha byibasiye inyokomuntu no kuba icyitso mu byaha byibasiye inyokomuntu.

Usibye kuba Dr Rwamucyo akurikiranweho ibi byaha, Urukiko Gacaca rw’i Ngoma, i Butare mu Ntara y’Amajyepfo, rwari rwaramuhamije ibyaha bya Jenoside, iby’ibasiye inyokomuntu, Gutegura umutwe w’abicanyi bagamije gukora Jenoside, Gutanga ibikoresho byo kwica, Gushimuta abagore n’abakobwa, guhagararira abagombaga gushyingura Abatutsi ari bazima, maze rumukatira igihano cyo gufungwa burundu.

Mu ibazwa n’Umugenzacyaha Dr Rwamucyo, ntiyigeze ahakana ibyo guhagararira abagombaga gushyingura imirambo y’Abatutsi, aho yavuze ko yabikoraga nk’Umuganga w’Inzobere wize ibijyanye n’isuku n’isukura aho yagaragazaga ko imirambo iboreye ku gasozi yateza ibyorezo.

Akavuga ko yabikoraga agamije kurinda ko iyo mirambo yatera ibindi byago byiyongera ku byari byabaye ariko akavuga ko ntabo yahambishije ari bazima ahubwo bose bari bapfuye.

Dr Rwamucyo wavutse tariki 6 Kamena 1959 I Gatonde, kuri ubu ufite imyaka 65, bivugwa ko ibi byaha yabikoreye muri kabakobwa ubu ni mu Murenge wa Mukura, Ndora muri Gisagara, Kabutare mu Murenge wa Ngoma no mu Murenge wa Gishamvu hose akaba ari mu Ntara y’Amajyepfo.

Mu kiganiro Kigali Today yagiranye n’ Umunyamategeko RCN yagaragaje byimbitse icyo Abanyarwanda bakwiye kwitega muri uru rubanza agendeye ku bunararibonye bwe muri uyu muryango akoreramo.

Me Juvens Ntampuhwe, ahagarariye Umuryango utegamiye kuri Leta RCN Justice&Democratie ukomoka mu gihugu cy’u Bubiligi usanzwe ukorera n’u Rwanda mu gufatanya n’inzego z’ubutabera kuva mu 1994, akaba n’umuyobozi w’umushinga wa Justice et Memoire (Ubutabera no kubungabunga amateka), yagaragaje ko uyu mushinga wa Justice et Memoire, ukurikirana imanza z’abakekwaho Jenoside yakorewe Abatutsi bakurikiranirwa mu mahanga, ibizivuyemo bikamenyeshwa Abanyarwanda.

Me Ntampuhwe, avuga ko abanyarwanda bakwiye kwitega ubutabera muri uru rubanza, cyane ko ruzaba rushingiye ku bimenyetso byatanzwe ndetse bizeye ko abacamanza bazakoresha ubunararibonye basanzwe bafite bagatanga umwanzuro ukwiye.

Ku kijyanye no kuba hari Abanyarwanda bifuza ko abo baba bakurikiranyweho ibyaha bya Jenoside bari mu mahanga bari bakwiye kujya boherezwa kuburanishirizwa mu Rwanda, mu rwego rwo kwizera guhabwa ubutabera bukwiye, Juvens avuga ko ibyo baya byiza ariko mu gihe bidashobotse badakwiye kubigiraho impungenge.

Yagize ati: "Byakabaye byiza hakagaragara abatangabuhamya bamubonye, bavuga bati, twamubonye abikora bakamushinja, hakagaragara n’abavuga bati, twebwe ntabo twamubonye bakamushinjura byose bikagaragarira aho icyaha cyabereye, ariko byose iyo bidashobotse nta kibazo, ikingenzi ni uko ubutabera bubaho”.

Me Ntampuhwe akomeza avuga ko kuri ibi byaha byo ku rwego mpuzamahanga birimo na Jenoside byo ku rwego mpuzamahanga, Igihugu icyo ari cyo cyose umuntu ucyekwaho ibyo byaha kiba gifite ububasha bwo kumukurikirana, n’inshingano zo kumwohereza aho bashaka kumuburanisha cyangwa cyo kikamuburanisha.

Ati: "Ibyo rero nibyo birimo birakorwa ubungubu, u Bufaransa niba bwarahisemo buti, turamuburanisha, ikingenzi ni uko buzashingira ku mategeko, ku byabaye, ku bimenyetso byatanzwe, hanyuma bugafata icyemezo gikwiye”.

Ku kijyanye no kuba Dr Rwamucyo agiye kuburanishwa nyuma y’imyaka 30, Jenoside yakorewe Abatutsi ihagaritswe, Juvens avuga ko u Rwanda mu 2006, rwari rwaratanze impapuro zimuta muri yombi ndetse ibikorwa byo kumukoraho iperereza bitangira mu 2008 kandi rwose ko bibabaje kubona imyaka ingana gutyo ishira hataratangwa ubutabera ku mpande zombi, yaba ushinjwa cyangwa uregera indishyi.

Agira ati: "Kuva 2008 kugeza uyu munsi, harimo imyaka 16, iyo myaka rero mu byukuri ni myinshi, ariko ikingenzi ni uko ubutabera buba. Kuba bukererewe ni ikibazo, sinavuga ngo si ikibazo, haba ku ushinjwa, kuko aba mu gihirahiro muri icyo gihe kirekire no kubifuza ko ibyo bamushinja bigaragara, nabo urumva aba ari umutwaro uremereye gutegereza muri iyo myaka yose, ibyiza rero ni uko ubutabera bwakabaye vuba”.

Me Ntampuhwe akomeza avuga ko impamvu ahanini bisa nk’ibitinda ku gutanga ubutabera muri izi manza, akenshi biterwa n’uko Ubutabera bugomba kwitonderwa kuko umuntu aba ashinjwa ibyaha bikomeye cyane, bigasaba kwitonderwa kugira ngo hatazafatwa ibyemezo bihutiweho, birimo kugirwa umwere cyangwa guhamwa n’ibyaha hatarakozwe iperereza neza haba ku bimenyetso bishinja ndetse n’ibishinjura hanyuma umucamanza akazabona icyo ashingiraho.

Me Ntampuhwe, yongeraho ko bitewe no kuba abaza gukora iperereza baturuka mu nzego z’ubutabera zo mu Bufaransa, nabyo biri mu bintu bitinza iryo perereza.

Ikindi agaragaza cyatewe n’itinda ry’uru rubanza rwa Rwamucyo, harimo n’imigendekere y’imanza, kuko mu rubanza rwe hagiye hafatwa ibyemezo bitandukanye birimo no gufungwa, ariko urukiko rw’ubujurire rwa Versaille ruza gusaba ko arekurwa.

Ati: "Ariko ntwabwo rwavuze ngo iperereza rihagarare, birumvikana ryarakoje hagati aho. Ariko mu gihe dosiye irimo gukorwa hagiye hafatwa ibyemezo binyuranye, bimwe bikabaho kujuririrwa mu nkiko zinyuranye, urumva rero igihe rujuririwe nabyo bituma bigenda bitinda”.

Ku bijyanye no kuba Dr Rwamucyo yaba yarahinduye imyorondoro ye irimo amazina cyangwa guhabwa ubwenegihugu, nk’uko abenshi bahunze u Rwanda bakurikiranwaho ibyaha bya Jenoside akenshi baba barahinduye imyirondoro, Juvens avuga ko ntaho amakuru yatanzwe abigaragaza ndetse n’ubwo atuye mu Bubiligi ariko akaba azaburanishirizwa mu Bufaransa, nta bwenegihugu bw’ibi bihugu byombi yigeze ahabwa ndetse ko U bufaransa bwamwimye ubuhungiro yari yarasabye mu mwaka wa 2002.