Mu Kagari ka Sabusaro hari abatekereza ko kurera neza abo wabyaye ari bwo butwari bukomeye

Ubwo bizihizaga Umunsi w’Intwari tariki ya 1 Gashyantare 2024, uwitwa Emmanuel Hategekimana yagize ati “Kurera neza umuryango uguturukaho ni bwo butwari bukomeye. Erega burya tugira icyo tumarira Igihugu ari uko twabaye abantu bazima! Iyo twabaye babi ntacyo tuba tukimariye Igihugu, ahubwo tuba dushaka kugisubiza inyuma.”

Akomeza agira ati “Ubwo rero abana tubyaye iyo babaye bazima, buba ari ubutwari kuri se na nyina.”

Jean Damascène Amani na we ati “Umuntu nakwita Intwari ni ukunda bagenzi be, cyangwa se akaba yatanga nk’amakuru ku kibi gitegurwa, bityo ikibi cyari guhemukira benshi kigakumirwa.”

Olive Nyiransengimana we avuga ko afatiye ku bo abona badashaka gukora bateze kuzafashwa cyangwa kwiba, asanga no kwigira ari Ubutwari.

Ati “Ubutwari ni ukuba utunze nk’iyo nka, ukabana neza n’abantu, wabona amafaranga ugashaka ukuntu wateza imbere urugo rwawe.”

Jean de Dieu Sinamenye we ngo n’ababagezaho iterambere ni Intwari, bityo akaba yiteguye kwita Intwari uzabazanira imodoka zibageza i Huye, kuko kugeza ubu abatabasha kubona amafaranga ya moto bakora urugendo rw’amasaha atatu cyangwa ane.

Ati “Twagize icyifuzo cyo kubona imodoka zitujyana mu mujyi, PSF yiyemeza kuzabidukorera. Urumva na bo bazaba bakoze gitwari! Hari n’ahantu muri aka Kagari kacu hataragera amashanyarazi. Uwabidukorera na byo byaba ari Ubutwari da!”

Naho ku bijyanye n’ibinyuranye n’Ubutwari, ni ukuvuga ubugwari, Dancille Mukagisanura agira ati “Ibigwari ni ba bandi babyuka bafashe mu mifuka, ba bandi biba iby’abandi. Ababona abandi bubaka bo bagatekereza kubasenyera na bo ni ibigwari.”

Emmanuel Hategekimana na we ati “Kuba udakora ugatungwa no gusabiriza ni ubugwari. Umuntu wateguye Jenoside rwose namugaya, ni ikigwari cya burundu. Ubiba amacakubiri, uhakana akanapfobya Jenoside na we ni ikigwari. Kimwe n’umuntu urenganya undi.”
Marie Claire Joyeuse

Abitanze ngo stade yubakwe bambitswe imidari

Babitangaje mu gihe bizihizaga umunzi mukuru w’Intwari z’u Rwanda, mu Murenge wa Nyamiyaga mu Karere ka Kamonyi, bagataha sitade bubatse yuzuye itwaye asaga Miliyoni 180Frw, uruhare rwabo rukaba rubarirwa hejuru ya 70%.

Major General Fred Gisa Rwigema, waguye ku rugamba rwo kubohora u Rwanda yari anayoboye, ari mu Ntwari z’Imanzi we n’umusirikare utazwi wameneye Igihugu amaraso ngo kibohorwe.

Ibikorwa yakoze na n’ubu ntibizibagirana mu mitima y’Abanyarwanda, byagera iwabo ku ivuko mu Murenge wa Nyamiyaga, abaturage bakagaragaza ko bazakomeza kubaha izina rishimangira ibikorwa yakoze by’indashyikirwa, birimo no kumenera amaraso Igihugu.

Niyonagize Adrian wo mu Murenge wa Nyamiyaga, avuga ko ibikorwa bya Fred Gisa Rwigema bibaha imbaraga zo gukora cyane ngo biteze imbere, bityo ibyo yaharaniye bibashe kugerwaho kuko ineza yashakiraga Abanyarwanda badakwiye kuyisubiza inyuma.

Sitade yitezweho kuzamura impano mu bakiri bato

Agira ati “Tugomba kugana ibikorwa by’iterambere, nta mugore ukibyara ngo ahagarike akazi cyangwa acikishirize amashuri. Tuba turiho ni uko hari abatumeneye amaraso, Fred Gisa rero yabimburiye abatumeneye amaraso, ngo tube turi abo turi bo, ni yo mpamvu ikivi yasize tugomba kucyusa”.

Undi musaza agira ati “Murabizi ko Gisa Fred yavukiye hano, igikorwa nk’iki cyo kwiyubakira Sitade ni we tubikomoraho kuko na we yashoboye byinshi kubera kwitanga. Natwe tugomba kumwigiraho ntiduhore dutegereje ko byose tuzabihabwa ntacyo dukoze, natwe tugomba kuba Intwari”.

LODA ihamya ko ibikorwa byo kwiyukabira sitade ari iby’Ubutwari

Umuyobozi mukuru wa LODA, Nyinawagaga Claudine, avuga ko azajya atanga urugero rw’Akarere ka Kamonyi, ku kuba barakoresheje neza ubushobozi bahawe butari bwinshi bakabasha kwiyubakira Sitade izafasha abana gukura bidagadura, bakunda siporo bikabarinda kurangara no kwishora mu biyobyabwenge.

Nyinawagaga avuga ko utundi Turere dukwiye kwigira kuri Kamonyi

Agira ati "Ubwo bufatanye muzabuhorane kuko iki ni igikorwa cy’Ubutwari, kuko mwabashije gukoresha bike mugakora umushinga wa VUP watanze igikorwa nk’iki".

Yongeraho ati “Ibikikorwa by’Ubutwari ntibizahagarare, mukomeze mube hafi abaturage bareke kumva ko bagira umwanda, kugira ngo abaturage bigire babifashijwemo na Leta aho kumva ko Leta ari yo izatuma bigira, biheshe agaciro ntabyo kubyara ngo Leta irere, nta businzi kuko ari ingeso z’ubugwari".

Avuga ko bazakomeza gukorana n’Akarere ka Kamonyi, kugira ngo ibyatanzweho ibyifuzo byo kugeza amashanyarazi n’imihanda ku baturage bigerweho, kuko udusantere twinshi twa Nyamiyaga nta mashanyarazi yo ku muyoboro mugari tugira, bigatuma ishoramari ryaho rikigenda buhoro.

Umuyobozi w’Akarere ka Kamonyi, Dr. Nahayo Sylvere, na we ahamya ko ibikorwa by’Ubutwari mu baturage ba Kamonyi bizarushaho kwigaragaza, bagira uruhare mu bibakorerwa no kwihangira udushya turimo kureba kure, bagahitamo ibibafitiye akamaro kurusha ibindi.

Sitade ifite n’ahakorerwa imikino yo gusiganwa ku maguru

Mu gikorwa cyo kubaka Sitade yuzuye itwaye asaga miliyoni 180frw, abaturage bazanye ubushobozi burimo n’amafaranga n’imirimo y’amaboko, kuko LODA yo yari yatanze gusa Miliyoni 47Frw, bubaka ikibuga kiriho ibice byo gukiniraho, igice cyo gufasha abasiganwa ku maguru, gusimbuka, gutera imihunda, igisoro n’imikino gakondo na yo igomba gutezwa imbere.

Sitade ya Ngoma i Nyamiyaga batashye ku mugaragaro

Sitade ya Ngoma i Nyamiyaga batashye ku mugaragaro

Ni umuhanda winjira hagati mu ngo, uvuye ku muhanda munini wa Rubirizi cyangwa aho bita Samuduha, ukamanuka usa n’ujya mu gishanga cya Rubirizi.

Umukuru w’Umudugudu wa Beninka, Ndayahoze Valens, avuga ko abazi uwo muhanda mbere bahageze ubu ngubu babona itandukaniro rikomeye.

Yagize ati “Hari ahantu hari ibyondo birenze ubwenge, ku buryo kuhanyura byasabaga ko ukuramo inkweto ahantu hareshya n’ikirometero, ukitwaza izindi nkweto zo kwambara uharenze. Nta modoka yahanyuraga. Umushinga wo kubaka uyu muhanda wabaye igisubizo cyiza rwose ku buryo bugaragara.”

Umukuru w’Umudugudu wa Beninka, Ndayahoze Valens, avuga ko umuhanda mbere warangwaga n’ibyondo, ubu bawishyiriyemo kaburimbo

Uwo muhanda wubatswe mu byiciro (phases) bibiri, ukaba ufite agaciro ka Miliyoni 43 n’ibihumbi 780 mu mafaranga y’u Rwanda.

Ni umuhanda watangiye kubakwa mu mwaka wa 2022 mu kwezi kwa kane, icyiciro cya mbere gisozwa mu kwa cyenda 2023 gitwaye Miliyoni 24 n’ibihumbi 650 Frw.

Amafaranga asigaye ari hafi muri Miliyoni 18, bakaba bamaze kwegeranya abarirwa muri Miliyoni 12. Bategereje ko abandi baturage batanga imisanzu yabo, bagahita batangira ibikorwa by’icyiciro cya kabiri cyo kurangiza imirimo isigaye kugira ngo uwo muhanda ube utunganye neza nk’uko babyifuza.

Ndayahoze ati “Turashaka kuwukora ukaba mwiza nk’iriya mihanda Leta yubaka, kandi twebwe turawubaka ku mafaranga yacu.”

Bashimira by’umwihariko uwitwa Gasana Emmanuel wemeye gutanga Miliyoni 25 wenyine, akaba amaze gutanga Miliyoni 20, gusa n’ubundi uwo muhanda ukaba ari ingenzi kuri we kuko werekeza aho afite ibikorwa bye by’inyubako zo kubamo zikodeshwa (apartments).

Gasana Emmanuel ufite inyubako kuri uyu muhanda, yagaragaje ko iki gikorwa cyo kwiyubakira umuhanda kibafitiye akamaro kanini

Umudugudu wa Beninka mu Kagari ka Rubirizi mu Murenge wa Kanombe ufite imihanda umunani, harimo itatu minini n’indi itanu mito ishamikiye ku yindi. Imihanda itandatu muri yo irimo kaburimbo, yose ikaba yaragiye ishyirwamo itwaye miliyoni zibarirwa muri 300 bigizwemo uruhare n’abaturage rungana na 100%.

Mu gihe Umujyi wa Kigali ugira gahunda yo kunganira ibikorwa nk’ibi by’abaturage byo kwiyubakira imihanda, abo muri uyu Mudugudu bo bavuga ko na bo basabye ariko ubwo bwunganizi butarabageraho, bagatekereza ko bshobora kuba biterwa n’uko ababusabye babukeneye ari benshi.

Umunyamabanga Nshingwabikorwa w’Umurenge wa Kanombe, Nkurunziza Idrissa, avuga ko muri rusange uwo Murenge ugizwe n’Imidugudu 45. Ashima Umudugudu wa Beninka akavuga ko ari umudugudu ntangarugero muri uwo Murenge, kubera uburyo abawutuye bajya inama bakiyubakira ibikorwa remezo, ndetse bakikemurira n’ibindi bibazo.

Umunyamabanga Nshingwabikorwa w’Umurenge wa Kanombe, Nkurunziza Idrissa

Gitifu Nkurunziza asaba abaturage gukomeza kugira uruhare mu bibakorerwa no kubibungabunga. Yagize ati “Niba umuturage yagize uruhare mu kwiyubakira umuhanda, agafatanya n’ubuyobozi, wa muhanda ntazabona umuntu urimo kuwangiza ngo amwihorere.”

Mu birori byo kwizihiza Umunsi w’Intwari z’u Rwanda i Kanombe mu Mudugudu wa Beninka, abagaragaje ibikorwa by’indashyikirwa biteza imbere ako gace bashimwe, urubyiruko rusabwa kwirinda ibidafite umumaro nk’ibiyobyabwenge n’ubunebwe, basobanurirwa amateka y’Intwari u Rwanda rusingiza, bashishikarizwa kugera ikirenge mu cy’izo Ntwari z’u Rwanda.

Umuhanzi Senderi yasusurukije abitabiriye ibi birori

Abayobozi bashimiye abafatanyabikorwa mu iterambere ry’aka gace no muri serivisi zitandukanye zigamije imibereho myiza y’abaturage

Habayeho ikiganiro ku butwari no ku ntwari z’u Rwanda muri rusange

Mudacogora Jean de Dieu yashimiwe kuba arera abana batatu b’impfubyi kuva muri 2020

Umuyoboro w’amazi abaturage bamurikiwe wa Kilometero 53 watwaye Miliyari 2.3Frw

Ibi babitangaje bahereye ku muyoboro w’amazi wa Nyarubira, ureshya na Kilometero 53, wubatsweho amavomo 34, uheruka kuzura mu Murenge wa Ruli; imirimo yo kuwubaka ikaba yarashowemo Miliyari ebyiri na Miliyoni zisaga 300Frw, ukazageza amazi meza ku ngo zisaga 8000.

Nyuma yo kuwumurikirwa ku wa Kane tariki 1 Gashyantare 2024, ubwo hizihizwaga Umunsi w’Intwari, abaturage batangaje ko uje kubaruhura imvune baterwaga n’urugendo bakoraga bajya gushaka amazi kure, ndetse ukaba n’igisubizo ku ndwara z’inzoka zaterwaga n’isuku nke.

Uzabakiriho Yohani wo mu Mudugudu wa Gataba Akagari ka Ruli ati "Kugira ngo tubone amazi meza byadusabaga gukora urugendo rw’isaha irenga tujya ahari amasoko, abana n’abagore bakirirwa banigana n’amajerekani ku mitwe bikabavuna cyane, bamwe bagacyererwa amasomo yewe n’imirimo yo mu rugo ikadindira. Kuba aya mazi bayatwegereje hafi, byongeye akaba ari na meza, ni igisobanuro gifatika cy’ibyo Intwari zacu zaharaniye ko tugeraho byiza nk’ibi. Navuga ko ibi bitwongereye ishema n’icyizere cy’uko n’ibindi bifatika byiza, biri imbere na byo tuzabigeraho".

Iterambere ry’Ubuhinzi abaturage bagaragaza ko ritari gushoboka iyo Intwari zititangira Igihugu

Uretse amazi meza abaturage begerejwe, hari n’imiryango itishoboye yamurikiwe inzu 12 zirimo izubatswe bushyashya n’izasanwe, mu rwego rwo gukura ubuzima bw’abayigize mu kaga kuko babaga mu nzu banyagirirwamo, ndetse inyinshi zendaga guhirima.

Bucyensenge Jean de Dieu wo mu Mudugudu wa Gahondo Akagari ka Ruli, ni Umugabo wubatse ufite n’abana babiri. Ubuzima bubi yari abayemo bwo kutagira icyo yinjiza, bwamubereye ingorabahizi ntiyabasha kubona amikoro yo gusana inzu bari batuyemo. None akaba ashima uburyo bamutuje aheza nyuma yo kuyisana.

Ati "Inzu yendaga kumpirimaho, kuko ntari kubona ubushobozi bw’amafaranga. Nahoranaga umutima uhagaze, ntinya ko isaha ku isaha izatugwaho kuko yavaga, ishaje, iri hafi kugwa. Mu by’ukuri nari mbabaye mu buryo buteye inkeke dore ko nko mu gihe cy’imvura njye n’umugore n’abana twajyaga kugama mu baturanyi. Ariko nshima ubuyobozi bwiza bwangobotse, bukaza bukayishyira hasi bukongera kuyisana bundi bushya, ubu ikaba ari inzu nziza, yagutse kandi ijyanye n’igihe. Mu by’ukuri ibyishimo byandenze".

Imiryango itishoboye yorojwe Inka ndetse n’amatungo magufi ngo ibashe kwikura mu bukene

Aborojwe inka n’amatungo magufi, na bo biyongera ku bindi bikorwa by’iterambere bikomeje gushyirwaho umunsi ku munsi muri Gakenke, harimo ibyumba by’amashuri 9, ibyumba by’umukobwa 3 n’ibifasha abanyeshuri kwimenyereza imyuga hamwe n’izindi nzu 64 ndetse n’ibigo nderabuzima byasanwe mu Mirenge igize aka Karere, muri uyu mwaka, aho abaturage bashimangira ko batari kubyigezeho iyo hatabaho ubwitange bw’Intwari ndetse n’Ingabo za RPF Inkotanyi zabohoye Igihugu.

Dusabemariya Febronie ati "Ibi bikorwa tubikesha ubuyobozi bwiza burangajwe imbere na Nyakubahwa Paul Kagame, udasiba kutwereka urugero rwiza rw’ubutwari ntabwo n’ibyo Intwari zaharaniye. Umuco adutoza wo gushyira hamwe, urukundo no gufashanya ni byo bitugejeje kuri ibi byiza. Natwe tugiye gushyiraho akacu, tubisigasire, twibungabungira umutekano dukumire ikibi aho cyava kikagera".

Guverineri w’Intara y’Amajyaruguru, Mugabowagahunde Maurice, yashimangiye ko urugendo rwo guhagarika Jenoside yakorewe Abatutsi, kugarurira Igihugu umutekano no kubaka ubumwe bw’Abanyarwanda, ababiharaniye aribo Ntwari z’u Rwanda, bikomeje guhesha u Rwanda ishema ku ruhando mpuzamahanga.

Umuryango wa Bucyensenge wishimiye gutuzwa mu nzu yisanzuye kandi nziza

Yahereye aha asaba abaturage gutoza abana umuco w’Ubutwari, kugira ngo bazakure bagera ikirenge mu cy’Intwari.

Ati "Icyo dusabwa uyu munsi ni ukugera ikirenge mu cyazo, twimakaza indangagaciro zaziranze. Ibyo tuzabigeraho mu gihe twihaye intego yo kurushaho gukunda Igihugu, kongera umuhate wo kucyitangira, tuba indashyikirwa kandi twubakira ku bunyangamugayo n’ubupfura. Urugendo turimo rw’iterambere rudusaba kurushaho kugira ubushishozi mu byo dukora, tugatinyuka guhangana n’ikibi mu gihe kije cyangwa kibayeho, tukakirwanya twivuye inyuma".

Ati "Turacyafite ibibazo by’amakimbirane akigaragara mu miryango ndetse n’ibibazo bishingiye ku mitungo n’amahugu, bigaragara hamwe na hamwe. Ibyo dukwiye gushishikazwa no kubikemura. Tukarwanya ubukene twimakaza isuku iwacu, tukarinda abana bacu igwingira, inda ziterwa abangavu ndetse n’ibiyobyabwenge byugarije Urubyiruko n’ibindi byose bikigaragara nk’inzitizi mu rugendo ruganisha ku butwari tukabirwanya dushize amanga".

Kuri iyi nshuro ya 30 hizihizwa Umunsi w’Intwari, uyu mwaka hazirikanwe insanganyamatsiko igira iti "Ubutwari mu Banyarwanda, Agaciro kacu".

Amateka yagarutsweho na Depite Bitunguramye Diogène, mu kiganiro yagejeje ku baturage kigaruka ku mateka y’Ubutwari bw’Abanyarwanda mbere y’umwaduko w’abakoloni, bwagaragariraga cyane cyane mu rugamba rwo kurinda ubusugire bw’Igihugu no kucyagura.

Mu Karere ka Gakenke ibikorwa bagenda bageraho babikesha ubwitange bw’Intwari

Yanagaragaje uburyo izi ndangagaciro zaje kuburizwamo n’Abakoloni, batangira bacamo Abanyarwanda ibice no kubabibamo urwango, abategetsi bagiye bajyaho yaba muri Repubulika ya mbere n’iya kabiri, na bo bakomereza kuri iyo myumvire n’imikorere, ibyaje Kugeza u Rwanda kuri Jenoside yakorewe Abatutsi.

Mu kwizihiza Umunsi w’Intwari, abaturage bishimiye ko Leta y’Ubumwe bw’Abanyarwanda, yihutiye gukosora iyo mikorere ikocamye ya politiki y’ivangura, ikimakaza umuco w’Ubutwari, ubu Abanyarwanda bakaba babayeho bunze ubumwe kandi batekanye.

Bavuga ko nta na rimwe bazigera batezuka muri uru rugendo, ahubwo bagiye gushyira imbaraga mu kurinda ibyagezweho no kubibungabunga.

Urubyiruko rwa Muhima ruhamya ko rwakwitangira Igihugu

Uru rubyiruko rwatangarije Kigali Today ko rugerageza kugera ikirenge mu cy’Intwari z’Igihugu, aho rwubaka ibikorwa remezo biteza imbere abaturage, ndetse bakaba biteguye no kwitangira Igihugu nubwo bidakorwa mu buryo bw’amasasu, ariko ko bafashe iya mbere mu guhangana n’urubyiruko rupfobya ibyo igihugu kimaze kugeraho.

Niyonsenga Jackson, uhagarariye imiyoborere myiza n’amategeko mu nama y’Igihugu y’Urubyiruko mu murenge wa Muhima, yavuze ko ntacyo atakora ngo yitangire Igihugu.

Ati “Habayeho urugamba rw’amasasu ariko kuri ubu ntirugihari, ahubwo hari urwo kurwanya abasebya Igihugu cyacu bakoresheje imbuga nkoranyambaga. Tujyaho natwe tuvuguruza ibyo bavuga tukerekana ukuri. N’iyo kandi byaba ngombwa ko Igihgu cyacu giterwa, urubyiruko turiteguye kuko wima Igihugu amaraso imbwa zikayanywa”.

Niyonsenga Jackson

Arongera ati “Gukunda Igihugu ni cyo cya mbere urubyiruko rukwiye gukorwa, uko amaraso adutemberamo abe ari ko urukundo rw’Igihugu rutembera muri twe”.

Mu butumwa bwe, yakomeje ashishikariza urubyiruko guharanira kuba Intwari nk’uko Inkotanyi zabigenje zitangira abandi, aho avuga ko ibyo bigaragazwa n’ibikorwa byo guharanira inyungu rusange, umuturage wese ajya ku isonga.

Asaba urubyiruko ruri mu mahanga kutumva ko bafite ubwenegihugu bw’ahandi, ahubwo bakiyumvamo Ubunyarwanda, bagafatanya n’abandi gukunda Igihugu, kugikorera no kukirinda.

Numukobwa Fabiola na we ati “Imbaraga zanjye mu guharanira ubutwari ni uko mbyiyumvamo, ndetse nkashishikariza bagenzi banjye kurangwa n’ibikorwa by’ubutwari, bibaye ngombwa nanjye namena amaraso ariko ngaharanira ubusugire bw’Igihugu, nsigasira ibyo izo Ntwari zatugejejeho”.

Ni igikorwa cyitabiriwe n’abantu batandukanye

Ku wa Kane tariki 1 Gashyantare 2024, Abayobozi bakuru barimo Minisitiri w’Intebe, Dr Edouard Ngirente, bunamiye Intwari z’Igihugu ku Gicumbi cy’Intwari i Remera.

Intwari zose z’ u Rwanda zizihizwa ku ya 1 Gashyantare buri mwaka. Uyu munsi utegurwa n’Urwego rushinzwe Intwari z’Igihugu, Imidari n’Impeta by’Ishimwe (CHENO).

Ibirori byabanjirijwe n’urugendo rugamije guha icyubahiro no gushimira Intwari zitangiye Igihugu

Umunyamabanga Nshingwabikorwa w’Akagari ka Niboye, Uwanyirigira Adelphine, avuga ko urwo rugendo rwari rugamije guha icyubahiro Intwari z’u Rwanda, kuko zakoze urugendo rutoroshye kugira ngo uyu munsi Abanyarwanda babeho batekanye.

Yagize ati “Batabaye u Rwanda, bamwe bemera no gutanga ubuzima bwabo kugira ngo barokore benshi. Urugendo rwari rugamije kubibuka no kubaha icyubahiro.”

Umunyamabanga Nshingwabikorwa w’Akagari ka Niboye, Uwanyirigira Adelphine, yashimiye abitabiriye ibirori byo kwizihiza umunsi w’Intwari z’u Rwanda

Muri urwo rugendo, hari aho bageraga bagahagarara, ubuyobozi bugaha ubutumwa abitabiriye urwo rugendo. Umunyamabanga Nshingwabikorwa w’Umurenge wa Niboye, Munyantore Jean Claude, yasobanuriye urubyiruko ibikorwa by’indashyikirwa n’ubwitange bwaranze Intwari z’u Rwanda, urubyiruko na rwo rwiyemeza gufatira urugero kuri izo ntwari mu bikorwa biteza imbere Igihugu.

Umunyamabanga Nshingwabikorwa w’Umurenge wa Niboye, Munyantore Jean Claude, yasabye urubyiruko gufatira urugero ku Ntwari zitangiye u Rwanda

Muri rusange muri urwo rugendo no mu birori byo kwizihiza umunsi w’Intwari, bamwe mu baturage babyitabiriye bari kumwe n’abana babo, abana bamwe bagaragaza ko banyuzwe n’ubutumwa bumvise, biyemeza na bo kurangwa n’ibikorwa by’ubutwari, aho hari uwiyemeje kuzaba umusirikare, undi avuga ko azafatira urugero rw’ibikorwa by’ubutwari kuri Perezida Paul Kagame.

Depite Christine Muhongayire yatanze ikiganiro cyagarutse ku butwari bw’Inkotanyi bwatumye u Rwanda rugera ku iterambere rufite ubu, ashima ubuyobozi bwiza Igihugu gifite ku isonga hakaba hari Umukuru w’Igihugu Paul Kagame, bamwe badatinya kwemeza ko na we ari Intwari.

Depite Christine Muhongayire yatanze ikiganiro ku butwari

Muri ibi birori hari n’abashimwe kubera ibikorwa byabo by’indashyikirwa biteza imbere Igihugu. Barimo Umudugudu wa Kinunga wubatse imihanda iriho n’amatara bitwara amafaranga arenga Miliyoni 115 n’Umudugudu wa Mwijuto wiyubakiye imihanda yatwaye amafaranga y’u Rwanda arenga Miliyoni 50.

Banashimiye ababohoye Igihugu bakiri mu kazi, ndetse n’abatakikarimo bari bitabiriye ibirori by’uyu munsi mukuru, aho bahagurukijwe bashimirwa uruhare bagize mu gutabara u Rwanda.

Mugabo Zylan, umwana witabiriye ibirori byo kwizihiza Umunsi w’Intwari, yavuze ko azaba Paul Kagame, ubwo yabazwaga na Depite Christine Muhongayire isomo yigiye ku Ntwari z’u Rwanda

Ineza Abiguel Tania we ati "Nzaba Inkontanyi ndinde Abanyarwanda"

Uhagarariye Umudugudu wa Mwijuto (hagati) yashyikirijwe igikombe cy’ishimwe kubera ibikorwa by’indashyikirwa

Umukuru w’Umudugudu wa Taba yashimiye Inkotanyi zabohoye u Rwanda

Perezida w’Inama Njyanama y’Akagari ka Niboye atanga ikaze

Abana baratozwa bakiri bato kuzaba Intwari

Minisitiri Munyangaju ashyikiriza Igikombe Police FC

Ni umukino wari uryoheye ijisho ku bari muri stade bizihiza Umunsi w’Intwari 2024, bareba uyu mukino w’irushanwa ry’uyu mwaka wahuje Police FC yasezereye Rayon Sports, na APR FC yahageze ihigitse Musanze FC.

Uyu mukino wari mwiza ku mpande zombi ariko APR FC yawinjiyemo mbere kurusha Police FC, maze bituma ku munota wa 12 ibona kufura imbere ku ruhande rw’ibumoso, ku ikosa ryakorewe Ishimwe Christian rikozwe na Shami Carnot. Uyu mupira w’umuterekano watewe neza na Ruboneka Jean Bosco, maze Nshimiyimana Yunusu yiba umugono abakinnyi ba Police FC arazamuka arabasumba maze afasha ikipe ye kubona igitego cya mbere.

Umunyezamu Pavelh Ndzila mu bihe bitandukanye mu gice cya mbere, yatabaye ikipe ya APR FC ubwo yakuragamo uburyo bumwe na bumwe bwa Police burimo ishoti ryatewe na Hakizimana Muhadjili, ndetse na Nsabimana Eric Zidane wagerageje ishoti rikomeye uyu munyezamu akarifata inshuro eshatu atari yafata umupira neza, ndetse bwa mbere arigarurira ku giti cy’izamu benshi barimo n’abakinnyi n’abatoza ba Police FC bikanze ko umupira wageze mu izamu.

Police FC yegukanye Igikombe cy’Intwari itsinze APR FC

APR FC na yo abarimo Ruboneka Jean Bosco wakinnye neza, bakomeje kuyishakira igitego cya kabiri ariko igice cya mbe kirangira ari igitego 1-0.

APR FC yatangiye igice cya kabiri isimbuza havamo Bizimana Yannick hajyamo Mugisha Gilbert. Ibi byahise bituma uyu musore wari winjiye ajya ku ruhande rw’ibumoso imbere Ruboneka Jean Bosco wahakinaga ajya hagati naho Shaiboub Eldin wakinaga inyuma ya rutahizamu ahita ajya kuba rutahizamu.Ku munota wa 61 Fitina Omborenga w’umukino uyu Munya-Sudani yahushije igitego cyari cyabazwe ubwo Fitina Omborenga yamuhinduriraga umupira mwiza ariko awuteye umunyezamu Rukundo Onesime akora akazi gakomeye awushyira muri koruneri.

Ku munota wa 68, APR FC yasimbuje ikuramo Thaddeo Lwanga wakinaga hagati yugarira, ishyiramo Niyibizi Ramadhan ukina asatira, ibi byari bisobanuye ko Nshimirimana Ismael Pitchou ahita akina hagati yugarira, uyu musore ukomoka mu Karere ka Rubavu agakina nka nomero umunani.

Peter Agbrevor Police FC ni we watsinze ibitego bibiri biyihesheje Igikombe cy’Intwari

Kuri uyu munota Police FC na yo yasimbuje ikuramo Niyonsaba Eric wakinaga imbere ibumoso, ishyiramo Aboubakar Djibrine Akuki. Uyu musore ukomoka muri Nigeria ku munota wa 75 yahinduriye umupira ku ruhande rw’iburyo imbere, maze Peter Agbrevor azamuka hejuru atsinda igitego n’umutwe yishyurira Police FC.

Police FC yahise ikomeza gukina ishaka igitego cy’intsinzi ari nako na APR FC ibigenza gutyo. Ku munota wa 90 w’umukino Police FC yabonye igitego cya kabiri gitsinzwe na Peter Agbrevor, n’ubundi ku mupira yahawe na Abedi Bigirimana, ku mupira wari urenguwe na Hakizimana Muhadjili.

Nyuma yo gutsinda iki gitego, umukino wahagaze iminota umunani kuko abakinnyi ba APR FC batacyemera dore ko umupira wavuyemo igitego urenguwe, umusifuzi wo ku ruhande yari yavuze ko ari APR FC irengura mu gihe Umutoni Aline wari hagati yavuze ko ari Police FC. Izi mpaka zarangiye n’ubundi igitego gikomeje kwemerwa maze Police FC itwara igikombe cy’Intwari 2024 itsinze ibitego 2-1.

Wari umukino w’ishiraniro

Mu bagore mu mukino wakinwe saa cyenda, AS Kigali yatwaye Igikombe itsinze Rayon Sports igitego 1-0.

Ubwo iri rushanwa ryaherukaga gukinwa mu 2020 ku makipe yo mu cyiciro cya mbere, APR FC ni yo yari yacyegukanye.

Ni umukino warebwe n’abayobozi batandukanye

Abaranzwe n’ibikorwa by’Ubutwari bagabiwe inka

Ni ku nshuro ya 30, umunsi w’Intwari wizihizwa, kuri iyi nshuro ukaba ufite insanganyamatsiko igira iti “Ubutwari mu Banyarwanda, Agaciro kacu".

Mu Karere ka Bugesera uyu munsi wibanze ku mbyino n’ibiganiro byahawe abaturage biganisha ku butwari. Nanone ariko baremeye bagenzi babo batishoboye babaha ibiribwa, ariko by’umwihariko hakaba haremewe umuryago wa nyakwigendera, Sibomana Ananias, wanze kwitandukanya n’Abatutsi mu ishuri ry’i Nyange ubwo babicaga, na Zigirumugabe Silas warokoye Abatutsi, igihe cya Jenoside yabakorewe mu 1994, abatwara ku mutwe mu cyibo.

Mu Karere ka Gatsibo, uyu munsi wizihirijwe mu Murenge wa Muhura, aho batatu bamugariye ku rugamba rwo kubohora Igihugu, bahawe inka mu rwego rwo kubashimira.

Akarere ka Kayonza, uyu munsi wanahujwe n’inama mpuzabikorwa y’Akarere, Guverineri w’Intara y’Iburasirazuba, Pudence Rubingisa, yibukije abiyitabiriye ko urugamba rw’amasasu rwarangiye, ahubwo hasigaye urugamba rwo kwiteza imbere.

Bishimiye inka bahawe

Yasabye abaturage kuvana amaboko mu mufuka bakitabira umurimo, ariko nanone asaba abayobozi n’abandi bakuru gushishikariza urubyiruko guhanga umurimo.

Yasabye urubyiruko kubyaza amahirwe Akarere gafite harimo ubukerarugendo, ubuhinzi n’ubworozi n’ubucukuzi bw’amabuye y’agaciro.

Mu Karere ka Kirehe, umunsi w’Intwari wizihirijwe mu Murenge wa Gatore, ibirori by’uyu munsi bikaba byibanze ku biganiro biganisha ku butwari, ariko n’abaturage bamurika ibikorwa byabo byabafashije kwiteza imbere.

Akarere ka Ngoma, urubyiruko rutandukanye rwaraye mu gitaramo cyo kwizihiza umunsi w’Intwari, aho bahawe ibiganiro bitandukanye byose biganisha ku butwari ndetse banibutswa ko batabigeraho badafite imyifatire myiza.

Byari ibirori bishyushye

Mu Mirenge yose igize Akarere ka Nyagatare, hizihijwe umunsi w’Intwari ariko ku rwego rw’Akarere ukaba wizihirijwe mu Murenge wa Mukama, Akagari ka Bufunda.

Umuturage witwa Nzabakiriraho Charles, yatanze ubuhamya bw’uko yiteje imbere kubera Ubuyobozi bwiza. Uyu ni umuhinzi w’urutoki kuko nibura ku kwezi asarura arenze 500,000Frw.

Abaturage bahawe ibiganiro byagarutse ku bikorwa by’Ubutwari byaranze Abanyarwanda, ku bwo kwitangira Igihugu. Abaturage basabwe kwagura ibitekerezo bakiga cyane kuko amashuri yabegereye bitandukanye na mbere, aho hari bamwe mu Banyarwanda babuzwaga kwiga.

Akarere ka Rwamagana ho abayobozi mu nzego zitandukanye bifatanyije n’abaturage ahatashywe imuhanda mishya ya kaburimbo ireshya na Kilometero 4.460, yuzujwe mu Mujyi wa Rwamagana.

Guverineri w’Intara y’Iburasirazuba, Pudence Rubingisa

Umuyobozi w’Akarere ka Rwamagana, Mbonyumuvunyi Radjab, yibukije abaturage ko umunsi w’Intwari ufasha Abanyarwanda kuzirikana Ubutwari bwaranze Intwari z’u Rwanda, n’igihango bafitanye na zo kandi ko bafite inshingano zo gukunda Igihugu, kugira uruhare mu burezi bw’abana, iterambere, umutekano no gusigasira ibyagezweho.

Abatabarutse umunani ndetse n’abakiriho ubu, bashyizwe mu cyiciro cya kabiri cy’Intwari zitwa Imena, bakaba bibukirwa hamwe n’abandi buri mwaka tariki ya 01 Gashyantare.

Phanuel Sindayiheba waganiriye na KT Press, yibukije ko mu ijoro ryo ku wa 18 rishyira 19 Werurwe 1997, ubwo barimo gusubiramo amasomo, ngo haje igitero cy’abacengezi cyica batandatu abandi barakomereka.

Sindayiheba ubu atuye mu Kagari ka Nyanza, Umurenge wa Gatenga mu Karere ka Kicukiro, hamwe n’umufasha we Uwamahoro Prisca, ni bamwe mu Ntwari zarokokeye muri icyo gitero, nyuma yaho baza kumvikana gushinga urugo, ubu bakaba bafitanye abana batatu.

Sindayiheba avuga ko byatangiye bumva urusaku rw’amasasu ahitaruye Ishuri, abacengezi ngo baza babyina indirimbo za poropagande zirimo iza Simon Bikindi, bavuza amafirimbi, barasa amasasu amena amadirishya.

Avuga ko umwe mu bayobozi b’abo bacengezi wari witwaje inkota, yinjiye mu mwaka wa Gatandatu ari kumwe n’abandi batatu, asaba abanyeshuri kwitandukanya, Abahutu bakajya ukwabo, Abatutsi ukwabo.

Sindayiheba avuga ko umukuru w’abo bacengezi yabanje kubabaza mu rurimi rw’Igifaransa niba bamuzi, na bo bakamuhakanira, ababwira ko baza kumubona, ariko yongeraho ijambo ati "Mwatworohereza, Abatutsi mukajya kuri ruriya ruhande, Abahutu namwe hariya!"

Sindayihe akomeza agira ati "Umukobwa witwaga Mujawamahoro Chantal wari uri imbere, ni we watubanjirije aravuga ngo ’nta Muhutu uri hano, nta n’Umututsi uhari, twese turi Abanyarwanda. Umucengezi ati "Ngo!" Twese dusubiriza icyarimwe tuti "Twese turi Abanyarwanda!"

Avuga ko abo bayobozi b’abacengezi bagiye hanze bagakora akanama gato, mbere yo gutera ibisasu bya gerenade mu ishuri, bongera kugaruka barasa mu ishuri bahereye kuri Mujawamahoro Chantal.

Sindayiheba avuga ko abanyeshuri batatu ari bo bahise bitaba Imana abandi bagera kuri 12 (na we arimo) bagakomereka.

Avuga ko abacengezi bahise bakomereza hirya mu mwaka wa Gatanu, na bwo babanza kubaza nk’ibya mbere, umwana witwaga Benimana Hélène abimburira abandi guhamya ko bose ari Abanyarwanda.

Ni igikorwa ngo kitarengeje iminota 25 (15 mu wa Gatandatu na 10 mu wa Gatanu), mbere y’uko abacengezi bikanze Inkotanyi bagahita bagenda, ako kanya haza umusirikare udafite imbunda anyura mu idirishya aza abahumuriza, akurikiwe na bagenzi be bitwaje imiti yo kubavura.

Yungamo ko imodoka za gisirikare hamwe na Toyota Hilux y’uwitwa Rwamasirabo Aloys, umucuruzi utuye i Nyange, ari zo zagejeje inkomere ku bitaro bya Kabgayi i Muhanga.

Muri rusange Intwari zatabarutse ako kanya na nyuma yaho ni Bizimana Sylvestre wavukiye mu Karere ka Kicukiro mu 1974, Mujawamahoro Marie Chantal wavukiye i Nyamasheke mu 1975, Mukambaraga Béâtrice wavukiye muri Karongi mu 1974 na Mukarutwaza Séraphine wavukiye mu Karere ka Gasabo mu 1975.

Hari na Benimana Hélène wavukiye i Nyange muri Ngororero mu 1979, Ndemeye Valens na we wavukiye i Nyange mu 1972, Niyongira Ferdinand wavukiye i Nyamagabe mu 1978 na Sibomana Annanie wavukiye mu Bugesera mu 1978, akaba yaraje kwitaba Imana muri 2018 azize uburwayi.

Abarokotse ubu bari mu Ishyirahamwe ryitwa Komeza Ubutwari, bakaba bakora imirimo itandukanye, aho bamwe ari abarezi, abashinzwe umutekano, abakozi mu nzego z’ibanze, ndetse ngo barimo n’umupadiri.

Imiryango y’Intwari yashyize indabo ku mva n’ibirango byazo ku Gicumbi cy’Intwari i Remera

Sindayiheba avuga ko ubu bakomeje Ubutwari nk’uko biri mu ntego ya ’Association’ yabo, ariko ngo afite impungenge z’uko atumva mu rubyiruko imvugo ya "twese turi Abanyarwanda", isubiza abigisha ivanguramoko ku mbuga nkoranyambaga.

Agira ati "Reka ngere ku butwari mu bijyanye no kurinda Igihugu ndetse no gukomeza Ubunyarwanda, uyu munsi dufite imbogamizi ikomeye cyane cyane kubera isakazamakuru ryihuta".

Ati "Hari bamwe mu bantu bafite ibitekerezo bisenya, bitandukanya Abanyarwanda, bahakana Jenoside ndetse bakayipfobya.Uuyu munsi urubyiruko rufite amahirwe yo gukoresha imbuga nkoranyambaga, kubibona bigatambuka ukaba ntibindeba, ubwo si ubutwari."

Minisitiri w’Intebe, Dr Ngirente yahagarariye Perezida wa Repubulika, Paul Kagame, uri muri Leta zunze Ubumwe za Amerika, akaba yaritabiriye Amasengesho arimo Umukuru w’icyo Gihugu, Joe Biden, ndetse akazayobora Ihuriro ry’Abanyarwanda bari hirya no hino ku Isi ryiswe Rwanda Day.

Nyuma y’uko Abayobozi bakuru bunamiye Intwari z’Igihugu, Minisitiri w’Ubumwe n’Inshingano Mboneragihugu, Dr Jean Damascène Bizimana, yayoboye igikorwa cyo gushyira indabo ku mva n’ibimenyetso by’Intwari z’Igihugu, igikorwa cyakozwe n’imiryango y’Intwari.

Ku Gicumbi cy’Intwari i Remera hashyinguwe Imanzi(urwego rwa mbere) Fred Gisa Rwigema, wabayeho mu myaka ya 1957-1990, hamwe n’Intwari yo mu rwego rwa kabiri rwitwa Imena, Agatha Uwiringiyimana (1953-1994).

Intwari y’Imena, Umwami Mutara III Rudahigwa Charles Léon Pierre (1991-1959) we yatabarijwe (yashyinguwe) i Mwima mu Karere ka Nyanza aho yari atuye.

Intwari y’Imena, Michel Rwagasana (1927-1963) bivugwa ko yajyanywe mu cyari Perefegitura ya Ruhengeri ari kumwe n’abandi, arasirwa ahitwa Nyakiriba munsi y’umusozi wa Nyamagumba, ahita ajugunywa mu cyobo rusange ngo cyari cyaracukuwe mu irimbi riri kuri uwo musozi wa Nyamagumba.

Intwari y’Imena, Félicité Niyitegeka (1934-1994) wakoreraga Ikigo cya Diyosezi ya Nyundo ku Gisenyi cyitwa Centre Saint Pierre, akaba ari cyo yiciwemo muri 1994 azira guhisha Abatutsi bahigwaga, yajyanywe gushyingurwa mu irimbi ryo ku Gisenyi.

Ni mu gihe bamwe mu bana b’i Nyange banze kwitandukanya babisabwe n’abacengezi mu 1997, bashyinguwe mu rwibutso rwabo ku ishuri bigagaho riri mu Karere ka Ngororero.

Reba ibindi muri iyi Video:

Amafoto: Eric Ruzindana

Video: Salomo George

Igitaramo cyo Kwizihiza Intwari z’u Rwanda cyabereye muri Kigali Exhibition &Culture Village (Camp Kigali)

Minisitiri Dr Bizimana Jean Damascène, wari umushyitsi Mukuru muri iki gitaramo gisingiza Intwari, yabwiye urubyiruko ko ubutwari bukwiye kugaragarira mu bikorwa byabo bya buri munsi. Yabasabye kurinda no kubungabunga ibyagezweho kugira ngo intambwe u Rwanda rwateye idasubira inyuma.

Yagize ati “Rubyiruko murasabwa gukomeza gukunda Igihugu, gushingira ku muco no kuvomamo ibidufasha gutera imbere, kwirinda no kurwanya ikoreshwa ry’ibiyobyabwenge, ndetse no kurwanya ingengabitekerezo ya Jenoside n’abayipfobya n’ibindi byose byasenya umuryango nyarwanda.”

Minisitiri w’Ubumwe bw’Abanyarwanda n’Inshingano Mboneragihugu, Dr Jean Damascene Bizimana, ni we wari umushyitsi mukuru

Minisitiri Bizimana yabibukije urubyiruko ko rugomba gukomeza kwiga indangagaciro zaranze Intwari z’u Rwanda kandi rukimakaza Ubumwe n’Ubudaheranwa by’Abanyarwanda.

Umuyobozi w’Umujyi wa Kigali, Samuel Dusengiyumva, yavuze ko iki gitaramo ari umwanya wo kuzirikana Intwari z’u Rwanda n’umurage zasize buri wese akabyubakiraho mu kubaka u Rwanda twifuza.

Mayor Dusengiyumva yavuze ko mu kwezi k’Ubutwari, Umujyi wa Kigali n’abandi bafatanyabikorwa bateguye Isangano ry’Urubyiruko ryiswe “Kigali Youth Festival” ryaranzwe n’ibikorwa birimo ibiganiro byahawe urubyiruko ku butwari, ibikorwa by’imyidagaduro, imurikabikorwa ry’urubyiruko n’ibindi.

Umuyobozi w’Umujyi wa Kigali, Dusengiyumva Samuel

Iki gitaramo cyaririmbyemo Itsinda rya RDF Military Band, umuhanzi Senderi Hit ndetse na Alyn Sano batanga ibyishimo ku bihumbi byiganjemo urubyiruko byitabiriye iki gitaramo gisingiza Intwari kibanziriza Umunsi w’Intwari z’u Rwanda wizihizwa tariki ya 01 Gashyantare buri mwaka.

Cyaririmbyemo kandi Itorero ry’Igihugu Urukerereza ndetse n’Itorero ry’Umujyi wa Kigali, Indatirwabahizi.

Umuhanzi Senderi Eric mu ndirimbo ze zitandukanye zisingiza Intwari ndetse n’indangagaciro zikwiye Umunyarwanda, yanyuze abitabiriye iki gitaramo

Abandi bitabiriye iki gitaramo ni Ngarambe François wigeze kuba Umunyamabanga Mukuru w’umuryango RPF Inkotanyi, kuri ubu akaba ari Umuyobozi Mukuru w’Urwego rushinzwe Intwari z’Igihugu, imidali n’impeta by’ishimwe(CHENO), n’abandi bayobozi batandukanye mu ngabo na Polisi y’u Rwanda.

Umuyobozi Mukuru w’Urwego rushinzwe Intwari z’Igihugu, imidali n’impeta by’ishimwe (CHENO), François Ngarambe

Iki gitaramo cyasoje ukwezi k’ubutwari kwabaye kuva tariki ya 05 Mutarama kurangwa n’ibikorwa bitandukanye.

Army Jazz Band yasusurukije abitabiriye iki gitaramo

Umuhanzi Esther ni umwe mu baririmbye muri iki gitaramo, akaba umuhanga mu gukirigita inanga

Itorero ry’Igihugu Urukerereza ryasusurukije abitabiriye iki gitaramo

Itorero Indatirwabahizi ryaserutse gitore muri iki gitaramo gisingiza Intwari z’u Rwanda

Mu mukino w’Itorero Indatirwabahizi abana bato bagaragaje ibyo bigiye ku Ntwari z’u Rwanda

Umuhanzi Alyn Sano yataramiye abitabiriye iki gitaramo

Gloria Mukamabano yayoboye iki gitaramo afatanyije na Marcel Ntazinda

Reba ibindi muri iyi Video:

Amafoto: Eric Ruzindana

Video: Salomo George

Abanyarwanda bemerewe gutanga kandidatire y’uwo babona waba Intwari

Umuyobozi ushinzwe Ubushakashatsi muri CHENO, Rwaka Nicolas, avuga ko umukozi wabaye indashyikirwa mu rwego runaka ashobora kuba afite ibigwi byamugeza ku rwego rw’Igihugu, akabishimirwa nk’intwari cyangwa agahabwa impeta y’ishimwe.

Rwaka agira ati "Wowe ntabwo wakwivuga imyato ngo nkwakire, ariko abo wakoreye baza bakavuga bati runaka yakoze neza kandi byagize akamaro gahebuje."

Akomeza avuga ko hashobora kuba hari n’Abanyarwanda cyangwa abanyamahanga, bakoze ibikorwa by’ubutwari mu mateka akomeye u Rwanda rwanyuzemo ariko batarabishimirwa.

Politiki y’Itangwa ry’Impeta z’Ishimwe yemejwe muri 2017, iteganya ko Abanyarwanda bashobora gushimira umuntu ku rwego rwabo, ariko ko iyo babonye ko ashobora gushimirwa ku rwego rw’Igihugu, ngo bashobora kumutangaho kandidatire.

CHENO ifite imbonerahamwe yuzuzwamo imyirondoro y’uwifurizwa gushimirwa, aho yakoreye ibikorwa by’ubutwari, igihe yabikoreye, akamaro byagize n’impamvu babona akwiriye kujya mu Ntwari z’Igihugu cyangwa guhabwa impeta y’ishimwe.

Inyandiko ngenderwaho mu gutanga amakuru ku bashyirwa ku rutonde rw’Intwari z’Igihugu, ivuga ko umuntu ushyirwa mu Rwego rw’Intwari z’Igihugu agomba kuba akurikirana ibyo yiyemeje kugeraho bikavamo igikorwa cy’ikirenga gifitiye abandi akamaro.

Ibi kandi aba agomba kubikora mu bupfura, mu kwihangana no mu bwitange buhebuje, kandi akirinda ubugwari mu migirire ye, akanirinda kugamburuzwa n’amananiza.

Iyi nyandiko ikomeza ivuga ko hashingiwe ku byo itegeko no 13 bis/2009 riteganya, Intwari irangwa no kugira umutima ukomeye kandi ukeye udatinya, akarangwa no gushyigikira icyiza, akagaragaza ikibi kandi agahangara kukirwanya kandiazi neza ingaruka.

Iyi nyandiko ikomeza ivuga ko Intwari irangwa no gukunda Igihugu, gushyira imbere no guharanira ubusugire, iterambere n’ishema by’Igihugu n’ubumwe bw’abagituye.

Intwari kandi ngo irangwa no kwitanga cyangwa kwigomwa inyungu zawe bwite uharanira inyungu rusange, byaba ngombwa ugahara ubuzima.

Intwari kandi igomba kugira ubushishozi bwo kureba kure no kumenya ukuri kutagaragarira
buri wese, ikagira ubwamamare mu bikorwa by’ubutwari bizwi kandi bishimwa na benshi.

Intwari igomba no kuba ari umuntu w’intangarugero urangwa n’ibikorwa bihebuje, bibera abandi
urugero rwiza, akaba umunyakuri kandi akaguharanira adatinya kuba yakuzira.

Intwari kandi igomba kurangwa n’ubupfura, ikagira umuco ugaragarira mu matwara meza, imibereho, imyifatire n’imibanire n’abandi, ikagira ubumuntu burangwa n’umutima ukunda abantu ku buryo buhebuje aho kubarutisha ibintu.

Ubwo Perezida Kagame yambikaga Impeta y’ishimwe Paul Farmer

Umuyobozi muri CHENO ushinzwe Ubushakashatsi, Rwaka Nicolas, avuga ko ’umudari’ ari ijambo rikomoka ku Gifaransa ’medaille’, rikaba ari ryo risobanura impeta mu Kinyarwanda, kubera iyo mpamvu ijambo ’umudari’ ngo ntabwo rigikoreshwa n’ubwo rikiri mu izina rya CHENO.

Impamvu CHENO icyitwa Urwego rushinzwe Intwari z’Igihugu Imidari n’Impeta by’Ishimwe, ngo ni uko mu Itegeko Nshinga rya Repubulika y’u Rwanda ari ko byanditse, bikazasaba guhindura ingingo zaryo zifite iyo nyito.

Ni ba nde bambitswe impeta z’ishimwe, amoko yazo ni ayahe?

Rwaka avuga ko abambikwa impeta z’ishimwe ari Abanyarwanda cyangwa abanyamahanga, bakoze ibikorwa bitandukanye bitewe n’izina rya buri mpeta, akaba ari gahunda yatangiye mu mwaka wa 2006.

Urwego CHENO rugaragaza ko kugeza ubu hari amoko arindwi y’impeta z’ishimwe ari yo Uruti, Umurinzi, Agaciro, Igihango, Indashyikirwa, Indangamirwa n’Indengabaganizi.

Uruti: Impeta y’ishimwe ryo kubohora Igihugu

Rwaka avuga ko iyi mpeta imaze kwambikwa Abanyarwanda n’abanyamahanga, abasirikare n’abasivili, bose hamwe babarirwa mu bihumbi atibuka neza umubare, barimo abaguye ku rugamba rwo kubohora Igihugu hamwe n’abakiriho.

Mu bakuru b’ibihugu n’abahoze ari bo bahawe impeta y’Uruti, harimo Perezida w’u Rwanda, Paul Kagame, uwa Uganda, Yoweri Kaguta Museveni, Mwalimu Julius Kambarage Nyerere wayoboye Tanzania, uwari Minisitiri w’Intebe wa Ethiopia, Meles Zenawi, hamwe n’abasirikare bakuru b’u Rwanda.

Umurinzi: Impeta y’ishimwe ryo kurwanya Jenoside

Iyi mpeta ihabwa Abanyarwanda n’abanyamahanga bagize uruhare mu kurwanya no guhagarika Jenoside, ikaba yarahawe abasirikare n’abagihozemo ndetse n’abasivili, baba bakiriho cyangwa baritabye Imana.

Iyi mpeta y’Umurinzi na yo ikaba imaze guhabwa ababarirwa mu bihumbi barimo abari abakuru b’ibihugu bavuzwe, abasirikare bakuru n’abasivili nka Twine Joy, Bahumura Joy, Kalimba Raphael, Gahongayire Odette, Mamashenge Consolé na Mukayuhi Jeannine.

Abandi bambitswe iyi mpeta y’Umurinzi barimo Gisimba Damas, Celestin Hakizimana, Zura Karuhimbi, Jean Marie Vianney Igisagara, John Mutambuka n’abandi.

Agaciro: Impeta y’Icyubahiro

Ni impeta ihabwa Umuyobozi w’Igihugu cyangwa uwa Guverinoma w’Umunyarwanda cyangwa umunyamabanga, Umukuru w’Umuryango mpuzamahanga cyangwa Umuyobozi ku rwego rw’ikirenga waranzwe n’ibikorwa biteza imbere inyungu z’u Rwanda muri politiki, mu bukungu n’imibereho myiza, haba mu Rwanda cyangwa ku rwego mpuzamahanga.

Impeta ya Agaciro imaze guhabwa abantu babiri gusa, ari bo Perezida wa Congo Brazzaville, Denis Sassou Nguesso, hamwe n’Umunyamabanga Mukuru w’Umuryango Mpuzamahanga uteza imbere Itumanaho ITU, Umushinwa Houlin Zhao.

Igihango: Impeta y’Ubucuti

Iyi mpeta y’ishimwe ihabwa umuntu cyangwa itsinda ry’ahantu bagaragaje ibikorwa by’indashyikirwa mu gutsura umubano n’ubutwererane hagati y’u Rwanda n’ibindi bihugu, kandi akaba agomba kuba yaratumye u Rwanda rugira isura nziza ku rwego mpuzamahanga.

Rwaka avuga ko iyi mpeta yatanzwe mu mwaka wa 2017 ku nshuti z’u Rwanda nka Paul Farmer washinze ibitaro bivura kanseri bya Butaro, Umuherwe Howard Buffet ufite Ishuri ry’Ubuhinzi ryitwa RICA hamwe n’ibikorwa by’u Buhinzi muri Kirehe na Bugesera.

Mu bandi bahawe impeta y’Igihango harimo John Dick wigeze kuyobora RDB, Hezi Bezalel, Gilbert Chagoury, Alain na Dafroza Mukarumongi Gauthier, Linda Melvern na Joseph Ritchie.

Indashyikirwa: Impeta y’Umurimo

Iyi mpeta ihabwa umuntu cyangwa itsinda ry’abantu bagaragaje ibikorwa by’intangarugero, byo guhanga ibishya bizamura Iterambere ry’u Rwanda, n’ubwo nta muntu n’umwe urayambikwa.

Indangamirwa: Impeta y’Umuco

Iyi mpeta ihabwa umuntu cyangwa itsinda ry’abantu bagaragaje ibikorwa by’ingirakamaro, kandi by’intangarugero biteza imbere Umuco nyarwanda, ariko na yo ikaba nta n’umwe urayihabwa.

Indengabaganizi: Impeta y’Ubwitange

Iyi mpeta ihabwa umuntu cyangwa itsinda ry’abantu bakoze ibikorwa mu buryo bw’intangarugero, birimo ubwitange buhebuje batitaye ku buzima bwabo kugira ngo bakize abandi, ikaba yarambitswe abari abasirikare babiri ba MINUAR muri 1994 bakomoka muri Ghana.

Gen Henry Kwami Anyidoho hamwe na Gen Joseph Null and Ikra, bari bayoboye Ingabo za Ghana zigize MINUAR (Umutwe w’Ingabo z’Umuryango w’Abibumbye zari zaraje kubungabunga Amahoro mu Rwanda), bambitswe na Perezida wa Repubulika, Paul Kagame, impeta y’Ubwitange ku isabukuru yo kwibohora mu mwaka wa 2022.

Perezida Kagame yashimiye Gen Henry Kwami Anyidoho na Gen Joseph Null and Ikra, kuba baragize uruhare mu gutabara abantu muri Jenoside yakorewe Abatutsi mu Rwanda, bakabarinda kwicwa.

Rwaka yagize ati "Umuntu wahawe impeta aba ari umukandida w’uko ashobora no kugirwa Intwari y’Igihugu, ariko bisaba ko hongera gukorwa ubushakashatsi, ukareba ko uwo muntu yagera ku rwego rw’Igihugu iyo ari Umunyarwanda."

Rwaka yakomeje avuga ko kuba umukuru w’Igihugu ari we wiyambikira abantu impeta z’ishimwe, ari agaciro katagereranywa, kandi ko CHENO ifite inshingano yo gukora ubuvugizi kugira ngo umuntu wahawe iyo mpeta abashe gukora ibikorwa by’indashyikirwa.

Umuyobozi Nshingwabikorwa w’Akarere ka Kicukiro, Mutsinzi Antoine

Mu mpanuro yahaye abitabiriye ibi birori biganjemo urubyiruko, Mutsinzi yagize ati “Kuba intwari si ukuba ufite amafaranga menshi, ni ukuba ufite umutima wo gukunda Igihugu cyawe, byaba ngombwa ukitangira ibikorwa bifitiye akamaro abandi.”

Yasabye abatuye muri Kicukiro guharanira ko ihora icyeye, ifite isuku, itarangwamo ibyaha, ahubwo ikaba Kicukiro irangwa n’ibikorwa byiza kandi abaturage babigizemo uruhare, abasaba no kwirinda kwangiza ibikorwa remezo biba byagezweho.

Umuyobozi Nshingwabikorwa w’Akarere ka Kicukiro yashimye uko Umurenge wa Kicukiro wateguye ndetse n’uko washyize mu bikorwa gahunda zijyanye n’Ukwezi k’Ubutwari.

Zimwe muri izo gahunda n’ibikorwa byaranze Ukwezi k’Ubutwari ku rwego rw’Umurenge wa Kicukiro harimo kuba abaturage b’uwo Murenge, bari kumwe n’abayobozi babo, tariki 26 Mutarama 2024, barasuye Ingoro Ndangamateka y’urugamba rwo guhagarika Jenoside yakorewe Abatutsi, iherereye ku Kimihurura ahakorera Inteko Ishinga Amategeko, bashima ubutwari bwaranze Inkotanyi, biyemeza kuzifatiraho urugero.

Bakozemo ibindi bikorwa birimo ibiganiro byatanzwe mu mashuri, ibiganiro byahawe urubyiruko n’ibindi byiciro bitandukanye, byibanze cyane cyane ku muco w’ubutwari, no kurwanya ibiyobyabwenge, by’umwihariko kuri iki Cyumweru bakaba barateguye igitaramo cyo gusoza ibyo bikorwa bari bamazemo iminsi.

Abahize abandi mu marushanwa yateguwe mu Kwezi k’Ubutwari bashimiwe

Habaye n’amarushanwa mu ndirimbo, mu mivugo, mu ikinamico no mu mupira w’amaguru, ku munsi wo gusoza ibyo bikorwa Ubuyobozi buboneraho gushimira ndetse no guhemba abagize uruhare muri ayo marushanwa agamije gukangurira abaturage kurangwa n’umuco w’ubutwari.

Nkurunziza Aimable, ari mu ikipe y’urubyiruko yahize ayandi mu marushanwa y’umupira w’amaguru. We na bagenzi be b’urubyiruko bashima impanuro bahawe zibereka uburyo bakwiye kwitwara kugira ngo bazabashe kugera ikirenge mu ntwari zagize uruhare mu kubohora Igihugu.

Nkurunziza na we asanga bishoboka ko umuntu wese yarangwa n’ibikorwa by’ubutwari nubwo yaba akiri muto. Yagize ati “Iyo umuntu ukiri muto yishoye mu byangiza ubuzima bwe nk’ibiyobyabwenge, biramuzahaza, no gukina wa mupira bikamunanira. Iyo wiyemeje kurangwa n’ibikorwa by’ubutwari, icyo ukora ugikora nk’akazi kandi ukanacyitangira. Ibintu byose ukora ufite intego ugamije kugeza ku bantu, na byo ni ubutwari.”

Umunyamabanga Nshingwabikorwa w’Umurenge wa Kicukiro, Mukandahiro Hydayat, yagarutse ku muco w’ubutwari mu rubyiruko, abibutsa uko bakwiye kwitwara kugira ngo bazabe intwari, abashishikariza kwirinda ibiyobyabwenge. Yagize ati “Niba dushaka Igihugu cyiza twifuza ejo hazaza, tugomba kuba dufite urubyiruko rufite ubuzima bwiza n’imyumvire myiza. Abagize uruhare mu kubohora Igihugu cyacu bamaze gukura, bakeneye ababasimbura. Tugomba rero gutegura ahazaza heza h’Igihugu duhereye ku bato.”

Umunyamabanga Nshingwabikorwa w’Umurenge wa Kicukiro, Mukandahiro Hydayat, yibukije urubyiruko ko ari rwo mizero y’ahazaza heza h’Igihugu

U Rwanda rwizihiza Umunsi w’Intwari z’Igihugu tariki ya 1 Gashyantare buri mwaka. Muri uyu mwaka, Umunsi w’Intwari z’Igihugu urizihizwa ku nshuro ya 30 ku nsanganyamatsiko igira iti: “Ubutwari mu Banyarwanda, Agaciro kacu”.

Urubyiruko rwifashishije impano zitandukanye rufite, rutanga ubutumwa bushishikariza abantu kurangwa n’umuco w’ubutwari

Umuhanzi Bushali yasusurukije abitabiriye iki gitaramo

Amafoto: Fraterne Rugwizangonga

Amakipe yombi yatangiriye umukino ku rwego rwo hejuru nta n’imwe irusha indi cyane. APR FC yari yabanjemo abakinnyi badasanzwe bakina barimo Rwabuhihi Placide wari mu bwugarizi hamwe na Banga Bindjeme Salomon, Kategaya Elia, Ndikumana Danny, Soulei Sanda mushya na Bizimana Yannick watahaga izamu.

Ku munota wa gatandatu, APR FC yazamukanye umupira yihuta maze Ndikumana Danny ageze mu rubuga rw’amahina ashyirwa hasi na Nduwayo Valeur, umusifuzi Dushimimana Eric atanga penaliti. Uyu mupira n’ubundi watewe na Ndikumana ahita atsinda igitego cya mbere cya APR FC.

Ndikumana Danny yatsinze igitego cya APR FC kuri penaliti

Musanze FC nubwo yari itsinzwe igitego, yagoye ikipe ya APR FC. Musanze FC ibifashijwemo na Kokoete Udo, na Solomon Adeyinka, yageraga kenshi imbere y’izamu rya APR FC ryari ririmo Pavelh Ndzila. Iyi kipe yashoboraga kubona igitego ku munota wa 18 ubwo kapiteni wayo Ntijyinama Patrick yateraga ishoti rikomeye ariko umunyezamu akarishyira muri koruneri. Amakipe yombi yakomeje gusatira ariko Musanze FC ikomeza gushaka igitego cyo kwishyura cyane, igice cya mbere kirangira ari igitego 1-0.

Mu gice cya kabiri, Musanze FC yakinnye umukino mwiza cyane kurusha ikipe ya APR FC dore ko yanagitangiye isatira cyane. Musanze FC ku munota wa 60, yasimbuje ikuramo Bertrand Ebode ishyiramo Tuyisenge Pacifique, mu gihe APR FC yakuyemo Kategaya Elie, Soulei Sanda na Ndikumana Danny, ishyiramo Mugisha Gilbert, Shaiboub Eldin na Kwitonda Alain bita Bacca.

Kategaya Elia agerageza gutwara umupira abakinnyi ba Musanze FC

Ku munota wa 68, Musanze FC yatsinze igitego cyo kwishyura cyatsinzwe na Solomon Adeyinka ariko umusifuzi wo ku ruhande, Umutesi Alice, avuga ko umupira utagiye mu izamu dore ko winjiye inshundura zigacika ukarenga inyuma. Abakinnyi ba Musanze FC bahise bafata umwanzuro wo kuva mu kibuga ntibongere gukina gusa nyuma y’ibiganiro byabereye hanze y’ikibuga no kureba ku mashusho, iki gitego cyemejwe umukino urakomeza.

Musanze FC yakomeje gusatira izamu rya APR FC cyane ari nako ihusha uburyo bwinshi bwakurwagamo n’umunyezamu Pavelh Ndzila. Nubwo yarushwaga ariko, APR FC na yo yakomezaga gushaka igitego cya kabiri harimo n’uburyo bwabonetse ku munota wa 95 ubwo Mugisha Gilbert yari agejeje umupira mu rubuga rw’amahina ariko birangira Muhire Anicet bita Gasongo awumukuyeho, umukino urangira ari igitego 1-1 batera penaliti.

Kwizera Tresor wa Musanze ubwo yari ahanganye na Soulei Sanda wa APR FC

APR FC ibifashijwemo n’umunyezamu Pavelh Ndzila wakuyemo penaliti ebyiri, yageze ku mukino wa nyuma w’irushanwa ryo kwizihiza Umunsi w’Intwari, itsinze Musanze FC yari yakinnye neza, kuri Penaliti 4-2.

APR FC ni yo iheruka kweguka iki gikombe mu 2020 ubwo irushanwa ryaherukaga gukinwa.

Abiganjemo urubyiruko bashimye ubuyobozi bwateguye iyi gahunda kuko bungukiyemo byinshi ku butwari bwaranze Inkotanyi

Icyo gikorwa cyitabiriwe n’abaturage barimo abakuze, urubyiruko ndetse n’abayobozi mu nzego zitandukanye, bose hamwe bakaba bari 193.

Umunyamabanga Nshingwabikorwa w’Umurenge wa Kicukiro, Mukandahiro Hydayat, yagize ati “Twaje kwiga amateka y’ubwitange bw’abarimo Intwari z’Igihugu, ndetse n’abandi tugifite uyu munsi bakiri mu nshingano, ngo twigire ku butwari bagize mu bihe byari bikomeye. Bashoboye kwitanga bahagarika Jenoside, aho babaga biteguye no gupfa.”

“Badusobanuriye ko muri iyi nyubako hari abasirikare 600 bonyine badafite ibikoresho bihagije, ariko bagerageje kwirwanaho kugeza babonye ubufasha bw’ingabo zari ziturutse mu bindi bice, babasha guhagarika Jenoside yakorerwaga Abatutsi. Twigiyemo ko umuntu ashobora kuba intwari mu bihe bikomeye aho umuntu ashobora kwemera kubura ubuzima kugira ngo abandi babubone.”

Ngendahayo Jean Paul ni umwe mu bitabiriye iki gikorwa. Avuga ko hari byinshi bungukiye mu gusura Ingoro Ndangamateka y’Urugamba rwo Guhagarika Jenoside.

Ngendahayo Jean Paul

Yagize ati “Hari ibyo tutari dusobanukiwe neza bijyanye n’itegurwa n’ishyirwa mu bikorwa rya Jenoside yakorewe Abatutsi, ndetse n’uruhare rwa Leta mu kongera kunga ubumwe bw’Abanyarwanda. Kuri jyewe ni igikorwa cy’ingirakamaro. Mu byo twigiye ku butwari bw’Inkotanyi harimo kugira intego ukumva ko icyo wiyemeje gukora byanze bikunze ugomba kukigeraho, kuko n’ingabo za RPA zabohoye Igihugu ni uko zari zifite intego yo gukura Abanyarwanda mu karengane zikabagarurira amahoro. Rero twese turamutse tugize intego y’igikorwa cyiza dushaka kugeraho, byazatuma twubaka iki gihugu cyacu, nk’uko Intwari zatubanjirije zabikoze kandi zikabigeraho.”

Musengayezu Jean de Dieu na we uri mu basuye iyo Ngoro Ndangamateka, akaba ari n’umuhuzabikorwa w’urubyiruko rw’abakoranabushake mu Murenge wa Kicukiro, avuga ko amateka biboneye ndetse bakanayasobanurirwa yabahamirije koko ko urubyiruko ari imbaraga z’Igihugu zubaka kandi vuba.

Musengayezu Jean de Dieu

Yagize ati “Nk’urubyiruko, iki gikorwa kiratwereka ibyo tugomba gukora, kandi rutwongereye imbaraga zo gutegura ejo hazaza heza, kandi tukaba twizeye ko tuzabigeraho nk’uko twabonye ko abahagaritse Jenoside bakabohora u Rwanda na bo bari urubyiruko, rero nkatwe nk’urubyiruko twiteguye kusa ikivi batangiye, kuko abenshi bageze mu zabukuru. Twahigiye byinshi, kandi tugiye kubishyira mu bikorwa.”

Ubuyobozi bw’Umurenge wa Kicukiro, buvuga ko muri uku kwezi k’Ubutwari batangiye tariki 05 Mutarama bakaba bagusoza kuri iki Cyumweru tariki 28 Mutarama 2024, bakozemo ibindi bikorwa birimo ibiganiro byatanzwe mu mashuri, ibiganiro byahawe urubyiruko n’ibindi byiciro bitandukanye, by’umwihariko kuri iki Cyumweru bakaba barateguye igitaramo cyo gusoza ibyo bikorwa bamazemo iminsi.

Hateganyijwe ibiganiro byimakaza umuco w’ubutwari, ndetse bakaba banahemba abatsinze amarushanwa mu ngeri zitandukanye, harimo ayari agamije kuzamura impano z’ubuhanzi z’abatuye muri uwo murenge mu ndirimbo, mu mivugo no mu ikinamico. Barateganya no gushimira urubyiruko rwitwaye neza mu mikino itandukanye yateguwe muri gahunda y’uku kwezi k’ubutwari.

Hateganyijwe n’ibiganiro bivuga ku muco w’ubutwari no kwirinda ibiyobyabwenge, hakaba haranatumiwe n’umuhanzi Bushali ususurutsa abiganjemo urubyiruko, cyane ko na bo bakangurirwa kurangwa n’umuco w’ubutwari guhera bakiri bato.

Basobanuriwe byinshi byerekeranye n’urugamba rwo guhagarika Jenoside yakorewe Abatutsi

Amafoto: Fraterne Rugwizangonga/Kicukiro

CHENO yatangiye gushakisha Intwari mu rubyiruko

CHENO ifatanyije na Minisiteri y’Urubyiruko hamwe n’Umujyi wa Kigali, barateganya guhura n’urubyiruko rurenga ibihumbi 200 muri Kigali, ruzitabira ibikorwa byo kwizihiza no gusingiza Intwari z’u Rwanda.

Guhera kuri uyu wa Gatanu tariki 05 Mutarama 2024, hatangijwe ibirori byiswe Isangano ry’Urubyiruko ririmo n’ibiganiro byabereye kuri Sitade ya IPRC Kigali (Kicukiro) guhera saa cyenda z’igicamunsi.

Umuyobozi Mukuru mu Mujyi wa Kigali ushinzwe Imibereho y’Abaturage n’Imiyoborere Myiza, Jean Paul Munyandamutsa, avuga ko urubyiruko rw’abakorerabushake (Youth Volunteers) rugera ku bihumbi 100 rurimo guteguzwa, hakiyongeraho n’abagize Komite z’Inama y’Igihugu y’Urubyiruko guhera mu midugudu.

Munyandamutsa avuga ko abagize amashyirahamwe y’imirimo itabarwa, abatarabashije gukomeza mu marushanwa ya Youth Connekt Awards, ndetse n’urubyiruko rubarizwa mu madini atandukanye, bose ubuyobozi bw’imirenge ngo bwasabwe kubamenyesha no kubahuza.

Umunyamabanga Nshingwabikorwa wa CHENO, Déo Nkusi hamwe na DG muri Minisiteri y’Urubyiruko, Tetero Solange, mu kiganiro n’Abanyamakuru kuri uyu wa Gatanu

Akomeza avuga ko Ubuyobozi bw’Uturere na bwo bufatanyije n’Abafatanyabikorwa (JADF) ndetse n’amashyirahamwe y’imikino, bateguye aho ibikorwa byo kwizihiza Ukwezi k’Ubutwari bizajya bibera, harimo ibyo kubakira abatishoboye, imurikabikorwa, ibitaramo, imikino n’ibiganiro.

Umunyamabanga Nshingwabikorwa wa CHENO, Déo Nkusi, avuga ko batangiye kugendera mu murongo watanzwe na Perezida wa Repubulika, Paul Kagame, mu ijambo risoza umwaka wa 2023, wavuze ko muri 2024 urubyiruko rugomba kugaragaza gahunda rufitiye u Rwanda rw’ejo hazaza.

Nkusi yagize ati "Iyo ushaka kubaka Igihugu uhera kuri bariya bakivuka ukaba ari bo uremamo ubutwari, ntabwo wavuga ngo ’tugiye kwiruka marato’ ngo uhere ku bafite imyaka 40."

Yakomeje agira ati "Muzarebe amashusho y’abantu basimbukaga urukiramende kera, umusore w’imyaka 18,20,25, yasimbukaga metero 2 na mirongo (z’ubuhagarike), uyu munsi iyo witegereje abasimbuka urukiramende ku Isi, ngira ngo ntawe uragera hariya, kandi bo barasimbuka bakagwa ahashashe."

Hatangijwe Isangano ry’urubyiruko

CHENO na Minisiteri y’Urubyiruko bavuga ko ubutwari butakireberwa mu gisirikare gusa, ahubwo ngo barifuza ugaragaza ubutwari mu kurwanya ubukene n’ubushomeri kandi atanywa inzoga n’ibindi biyobyabwenge.

Umuyobozi Mukuru ushinzwe guteza imbere Urubyiruko muri Minisiteri y’Urubyiruko, Tetero Solange, agira ati "Ntabwo waba Intwari uri umusinzi, kuko tuzi neza ibibazo inzoga zitera ku buzima bw’umuntu, bwa butwari tumwitezeho bukaba butashoboka."

Ukwezi k’Ubutwari kuzasozwa n’Igitaramo gisingiza Intwari z’Igihugu kizaba tariki 31/1/2024.

Bukeye bwaho ku wa 01 Gashyantare hazabaho umuhango wo guha icyubahiro Intwari z’Igihugu, uzayoborwa na Perezida wa Repubulika, Paul Kagame, ndetse ukazitabirwa n’abandi Bayobozi bakuru n’imiryango y’Intwari.

Hagati aho hirya no hino mu Gihugu hazabaho ibikorwa bitandukanye birimo ibiganiro, ubusabane, imikino, gutaha ibikorwa/kwishimira ibyagezweho, gushimira ababaye indashyikirwa, kugabirana, kuremera abatishoboye hamwe n’ibindi bikorwa bishimangira ubutwari, umuco n’ubumwe by’Abanyarwanda.

CHENO ivuga ko Abanyarwanda n’inshuti zabo hirya no hino ku Isi, na bo babifashijwemo na Minisiteri y’Ububanyi n’Amahanga hamwe na za Ambasade z’u Rwanda, bateguye uburyo bazizihiza umunsi w’Intwari z’Igihugu.