Kigali Today yaganiriye na bamwe mu bahanzi ngo yumve icyo babivugaho, bamwe bavuga ko amahirwe yo gutarama atabuze ahubwo ko ikibazo ari imiterere y’indirimbo zo kuririmbira imbere y’abanyacyubahiro.

Uwitwa Rumaga yagize ati “Erega amahirwe yo kujya muri izo nama no kuzitaramamo si cyo kibazo, ahubwo twe nk’abahanzi ni ibihe bihangano dufite bitugeza kuri ayo mahirwe? Kuko niba uririmba izo mu kabari ntabwo wajya kuzishyira mu rusengero. Abahanzi nitwe tugomba kureba ibihangano dukora n’aho bitugeza.”

Ku rundi ruhande, Ama G The Black we abona ari iterambere kubona Leta itekereza ku bahanzi, ati “Kuba badutekerezaho mu nama ni iterambere ku mpande zombi kuko ni bo bahitamo abo batumira.”

Itsinda rya Symphony Band ni rimwe mu bahanzi bakunze gutumirwa mu nama zikomeye mu gihugu. Umwe mu bagize iryo tsinda witwa Etienne Niyontezeho avuga ko ari amahirwe n’inzozi za benshi kuba bataramira ahantu nk’aho, na we agashima Minisitiri Utumatwishima wabisabiye abahanzi.

Ati “Ku muhanzi wese ni amahirwe n’inzozi za benshi kuba watarama imbere y’abayobozi batandukanye bo mu gihugu ndetse n’abashyitsi. Gusa hari abahanzi batabona ayo mahirwe bitewe n’ibihangano byabo bitajyanye n’izo nama kuko harimo ibishegu byinshi (amagambo y’urukozasoni). Twe tubona ayo mahirwe kuko dusubiramo ibihangano bitandukanye ntabwo ari ngombwa ko dukora ibyo twahimbye.”

Inama y’Igihugu y’Umushyikirano ibaye ku nshuro ya 19

Uyu mushyikirano witabiriwe n’abantu b’ingeri zitandukanye barimo abari mu nzego z’ubuyobozi bwa Leta, abikorera, imiryango itari iya Leta, abaturage bari hirya no hino mu gihugu ahari hateguwe ho kuwukurikiranira no kuhatangira ibitekerezo no kugaragaza ibibazo bafite. Wakurikiwe kandi n’abo mu nzego z’umutekano ndetse n’Abanyarwanda baba mu mahanga, ibyamamare muri muzika, mu mupira w’amaguru, mu itangazamakuru, n’abandi bo mu nzego zinyuranye.

Uyu mushyikirano wari umwanya mwiza wo kongera guhura kw’abawitabiriye no kungurana inama, bahana ibitekerezo byo gukomeza kubaka Igihugu.

Abadipolomate b’inshuti z’u Rwanda na bo bari mu bitabiriye iyi nama

Perezida Paul Kagame yavuze ko u Rwanda rwishimira intambwe imaze guterwa muri rusange nyuma y’imyaka 30 ishize u Rwanda ruhagaritse Jenoside yakorewe Abatutsi, ariko ko hakiri byinshi byo gukora kugira ngo Abanyarwanda bakomeze batere imbere.

Yanibukije abayobozi ko bagomba kuzuza inshingano zabo neza bakemura ibibazo by’abaturage ndetse bakarushaho kubegera aho bishoboka hose, bakirinda ko umwanya wabo wo gukora uba uwo guhora mu nama zihoraho.

Perezida Kagame kandi yabwiye Abanyarwanda ko bagomba gutekana kuko ubuyobozi n’inzego z’umutekano zizakomeza gusigasira umutekano w’Igihugu.

Muri uyu mushyikirano, Minisitiri w’Intebe, Dr Edouard Ngirente, yagaragaje ishusho ku byagezweho mu myaka irindwi ishize hashyirwa mu bikorwa Gahunda y’Igihugu yo Kwihutisha Iterambere (NST1). Ibikorwa by’ingenzi bimaze kugerwaho bikubiye mu nkingi eshatu ari zo Ubukungu, Imibereho myiza y’Abaturage n’Imiyoborere.

Inama y’Igihugu y’Umushyikirano iheruka yabaye kuva tariki ya 27 kugeza ku ya 28 Gashyantare 2023, yari yafatiwemo imyanzuro 13 yose ikaba yarashyizwe mu bikorwa ku kigero cya 91%.

Uyu mushyikirano wo ku nshuro ya 19 wabaye umwanya mwiza w’ibiganiro byatanzwe n’Abayobozi batandukanye byagarutse ku mibereho y’Abanyarwanda n’ibyo bagomba gushyiramo imbaraga kugira ngo bakomeze kubafasha kwiteza imbere.

Abo mu nzego z’umutekano bari mu bitabira iyi Nama

Minisitiri w’Urubyiruko n’Iterambere ry’Ubuhanzi Dr. Utumatwishima Jean Nepomuscene Abdallah ubwo yageraga kuri Kigali Convention Center ahabereye iyi nama yaje yitwaje ikayi n’ikaramu byo kwandikamo ibitekerezo n’inyunganizi byava mu musaruro w’iyi Nama ihuriza hamwe inzego zitandukanye z’Igihugu

Mu Mushyikirano habayeho gushyikirana! Urwenya n’ibitekerezo bifitiye Igihugu akamaro bigasangirwa na mbere y’uko Inama itangira

Inararibonye na zo ntizihezwa mu Mushyikirano

Iterambere ry’Igihugu ntirisiga urubyiruko kuko u Rwanda rw’ejo ari rwo rwubakiyeho, ba Nyampinga b’u Rwanda mu bihe bitandukanye na bo baritabiriye

Reba ibindi muri izi Videwo:

Amafoto + Videwo: Richard Kwizera & Eric Ruzindana/Kigali Today

Esther Ishimwe

Nk’uko byasobanuwe na Esther Ishimwe wavugiraga urubyiruko rwo mu Murenge wa Ntyazo, ikigo cy’urubyiruko mu Karere ka Nyanza ni kimwe, kikaba kiri mu Murenge wa Busasamana, ku buryo habera kure urubyiruko ruturuka mu Murenge wa Ntyazo, ndetse no mu gice cy’Amayaga muri rusange.

Yagize ati “Twebwe Umurenge wacu wa Ntyazo uri kure cyane, ku buryo bitajya bitworohera kuva yo ngo tuze gukurikirana amasomo kuri YEGO Center iri mu Murenge wa Busasamana.”

Yanavuze ko mu byo urubyiruko rwo ku Mayaga na rwo rwifuza kwigira muri YEGO Center, harimo imyuga yo kudoda no gusuka ndetse n’ikoranabuhanga, bigirira akamaro abahaturiye kuko bituma babasha kubona akazi no kwibeshaho, n’ab’abakobwa ntibagwe “mu mirimo mibi itabahesha agaciro.”

Mu bigo by’urubyiruko kandi ngo ruhabonera inama ku buzima bw’imyororokere, ku buryo n’abatuye mu gace k’Amayaga begerejwe YEGO Center, i Ntyazo, byabafasha kutagwa mu bibazo bituruka ku gukora imibonano mpuzabitsina bakiri batoya.

Ishimwe yagize ati “Hari abana b’abakobwa bajya bishora mu mibonano mpuzabitsina, atari uko babyifuza, ahubwo kubera ko babuze ababegera. Twebwe dutuye mu cyaro, hari ababyeyi baho batinya kuganiriza abana babo hanyuma bitewe n’imyaka bagezemo, bakisanga barakoze ibidakwiriye umwana w’umukobwa.”

Perezida wa Repubulika Paul Kagame, ari na we wari uyoboye iyi nama, yasabye ko ababifite mu nshingano bazabyitaho agira ati “Uwa Nyanza, ikigo cy’amahugurwa cy’urubyiruko, na byo ubwo byumvikanye, na byo byakurikiranwa.”

Hari abifuza ko YEGO Center yatangirwamo n’amahugurwa ku buhinzi

Urubyiruko rwo muri Nyanza rwibumbiye mu makoperative rutabashije gutanga ibitekerezo, rwo rwifuza ko amakoperative rurimo yaterwa inkunga, abari mu y’ubuhinzi n’ubworozi bo bakanifuza kongererwa ubumenyi mu bijyanye n’ibyo bakora, kuko akenshi barebera ku babyeyi babo baba batabizi neza.

Innocent Hitimana uyobora Koperative Dufatanye-Nyanza, ikora ubworozi bw’amafi n’ubw’inka, ikanahinga imbuto n’imboga, yagize ati “Nize imibare, ubutabire n’ibinyabuzima. Nifuza inyunganizi mu kongera ubumenyi ku bijyanye n’ubuhinzi n’ubworozi.”

Abitabiriye Inama y’Igihugu yUmushyikirano muri Nyanza

Kuri we kandi ngo nubwo atabasha gukomereza mu mashuri, ayo masomo yongerewemo atangirwa muri YEGO Center, ngo byafasha urubyiruko gukora neza ubuhinzi n’ubworozi, bityo n’abatabwitabira bakabona ko ari ingenzi.

Yagize ati “Nifuzaga ko muri YEGO Center bakongeramo amasomo ajyanye n’ubuhinzi. Byakangura urubyiruko, kandi ubuhinzi n’ubworozi ni inkingi z’ubukungu.”

Mu byo yifuza kumenya byimbitse, harimo nko kumenya ibihingwa bijyanye n’ubutaka runaka, kimwe n’ubundi bumenyi bwabafasha guhinga kinyamwuga.

Perezida Kagame yanenze abayobozi bakorana batavugana

Yatanze urugero rw’aho usanga abantu batavugana, kandi nta Minisiteri n’imwe cyangwa umuntu n’umwe, wabasha gukemura ikibazo wenyine, abaza impamvu ituma abantu badakorana na bagenzi babo.

Yagize ati “Sisitemu kugira ngo ikore neza, igomba guhererekanya amakuru, kuvugana, kuganira, kumva ibibazo kimwe no gushaka ibisubizo. Impamvu binanira abantu kugira ngo bumvikane bavugane ni iyihe? Kuko kenshi usanga abantu batavugana, kandi nta muntu umwe ushobora gukemura ibibazo, Minisiteri imwe ntishobora gukemura ibibazo, umuyobozi aho ari ho hose ntashobora gukemura ibibazo wenyine, ntibibaho, ntibishoboka”.

President Kagame yakomeje anenga abayobozi batakaza umwanya wabo bagakoresheje bakemura ibibazo bakawukoresha mu nama zidafite umumaro.

Ati “Ibyo wagombaga gukora mu nshingano zawe ufitiye ubushobozi, ugashaka ko habanza gutegurwa inama nabyo bigatwara iminsi, abazizamo bakaza bakererewe, baseta ibirenge, abandi na bo bakaza bakicaramo ntibagire icyo bavuga, ubundi bagataha, wahura na we wamubaza ngo wari uri he ati nari mu nama. Mu nama wari urimo wavuze iki, wayifashije iki, kwicaramo gusa? Ubuza abantu ‘oxygen’ mu cyumba wari wicayemo, nicyo watwayeyo gusa? Iyo ubigumana n’aho wari uri?”

Umukuru w’Igihugu kandi yagaragaje ko hari abayobozi bitwaza gutinya gukora amakosa, bigatuma badafata ibyemezo, aho gutinya ingaruka zo gukora ubusa.

Ati “Ariko baranabizi, ibyo bavuga ngo batinya gukora iki kugira ngo hatavamo ikosa, abenshi tuvuga ntabwo ari abantu usanga ari abo ku muhanda batazi n’icyo bakora, abo bavugwa ni abo twirirwa turihira amafaranga bafite za PHD, za Doctorat, bafite ibintu byose? Ibyo se wiga iby’iki? Nugaruka ukavuga ko utinya gukora ikintu ngo kitavamo ikosa, iyo ntabwo ari impamvu rwose”.

Arakomeza ati “Nagira ngo mbisubiremo kugira ngo mwese mwumve, ibyo bintu munabyivanemo muzabivane no mu magambo yanyu muvuga. Iyaba mwatinyaga, ntabwo wakora ku buryo cyangwa ntukore ku buryo abantu batakaza, ukwiye gutinya ko Igihugu gitakaza. Ni imikorere mibi, bikwiye guhagarara”.

Umukuru w’Igihugu yavuze ko iyi Nama y’Umushyikirano ibaye ku nshuro ya 19 yagenze neza, ndetse ko yari isobanutse kurusha izabanje, bigaragaza ko u Rwanda rutera imbere, ariko ko bidakwiye kugarukira aho, ndetse ko itaha igomba kuzagenda neza kurushaho.

Yongeye kwibutsa abayobozi mu nzego zitandukanye bitabiriye iyi nama, gutekereza ku myanzuro iyivuyemo kugira ngo barusheho gutera intambwe no gukora neza, bakosora vuba na bwangu ibyo basanze bitameze neza, cyane ko ibyinshi basanze biri mu bushobozi bwabo.

Amafoto: Eric Ruzindana

Harerimana Emmanuel atanga ubuhamya

Harerimana Emmenuel yavuze ko ubu ari umukozi wa Pariki y’Igihugu y’Ibirunga, utembereza ba mukerarugendo mu gusura ingagi n’ibindi, akaba yaranashinze Umuryango yise ‘Muhisimbi Voice of Youth in Conservation’, agamije gufasha abana b’abakobwa batewe inda z’imburagihe bikabaviramo kugira ubuzima bugoye.

Harerimana yatangiye ashima Perezida wa Repubulika Paul Kagame, watumye ashobora kwiga kuko kuba yarize amashuri yisumbuye na Kaminuza, ari byo byamufashije kuva mu bukene bukabije yari arimo we n’umuryango we.

Yagize ati “Nyakubahwa Perezida wa Repubulika, nk’uko nari maze kubivuga, mva mu cyaro hariya mu nkengero, ubuzima bwanjye iyo mutaburokora sinzi uko nari kuba ndiho, kuko navukiye mu muryango ukennye cyane aho kurya kabiri ku munsi byari amateka iwacu. Ntaho kuryama twagiraga, njya nibuka igihe twabaga twariye cyangwa tutariye ko mama yajyaga kuducumbikisha ku baturanyi kuko bari bafite inzu zihagije, twebwe iyo twagiraga ntitwashoboraga kuyiraramo”.

Yungamo ati “Nyakubahwa Perezida wa Repubulika, rero ndabashimira ko muri ya gahunda y’uburezi budaheza, kwiga byo byari inzozi, urebye sinanabitekerezaga. Muza gushyiraho gahunda yo kurihirira abana bava mu miryango ikennye, ni uko nagize amahirwe niga segonderi ndetse na Kaminuza, ubu nzi neza indimi z’Igifaransa n’Icyongereza”.

Harerimana avuga ko nyuma yo kwiga, kimwe n’urundi rubyiruko yatangiye kwibaza aho azavana akazi kandi aturuka mu muryango ukennye uba mu cyaro. Nyuma aza gutekereza uko yabyaza umusaruro amahirwe azanwa n’ubukerarugendo.

Ati “Nyakubahwa Perezida wa Repubulika, reka mbashimire cyane kuba mwarateje imbere ubukerarugendo bukorerwa hariya iwacu mu Kinigi, kuko nabonyemo amahirwe. Nashatse abasore n’inkumi bagenzi banjye, nti ese ko bano ba mukerarugendo barimo guca hano bagenda, bagata imyanda mu nzira, imihanda ikaba yangiritse, natwe twirirwa turyamanye za ‘dipolome’ hano, ntacyo twakora tukiyegerenya, tugatangira kugira umusanzu dutanga ku gihugu cyacu? Abasore barabyemera bati ni byo hari icyo twakora”.

Harerimana avuga ko ubwo batangiye ari itsinda ry’abasore n’inkumi bakora nk’abakorerabushake, batunganya inzira za ba mukerarugendo ndetse bakanazisukura. Nyuma ibigo bikora mu bukerarugendo birimo RDB n’ibindi, biza kubabonamo ingufu bibaha akazi, aho akaba ari ho yakuye akazi akora ko kuyobora ba mukerarugendo muri Pariki y’Ibirunga.

Ati “Ikibazo cyanjye kirakemutse, amafaranga ndayabonye, umukecuru wanjye inzu ndayimwubakiye, ariko uko naryaga, uko nanywaga, naje kwibuka igihe nabagaho ndiho nanjye ntagira icyo kurya, ntagira uburyo bwo kubaho”.

Harerimana avuga ko mu rwego rwo kuzirikana abandi bari mu buzima bugoye nk’ubwo yahozemo, yarebye abakobwa babiri bari baratewe inda ari abana, bakabyara bari mu bukene bukabije, butagira ibyo kurya, butagira imyambaro, butagira mituweri, yumva hari icyo yakorera abo bana.

Ati “Natangiranye abo bana mbaha ibyo kurya, nkabaha imyambaro, nkabarihira mituweri, ariko nza kubona ko nabyo bidahagije. Nibwo nagize igitekerezo, ntangira umushinga wo kwigisha abana kudoda, no kubaha ibyangombwa byose bikenewe, aho ubungubu tumaze gufasha abagera ku 171 ndetse twabahaye n’imashini.”

Harerimana avuga ko icyo yabwira urubyiruko, ari uko mu gihe umuntu abonye ikibazo atagomba kugitambuka, ahubwo agomba guhera aho, agakora kuko ubu urubyiruko rwahawe amahirwe angana, yaba uturuka mu cyaro cyangwa se mu Mujyi, yaba uturuka mu muryango ukize cyangwa se ukennye, ayo ngo akaba ari amahirwe akomeye cyane ku rubyiruko.

Yungamo ko abo bana bafasha, babanza kubaha iby’ibanze, kuko ngo abana baza bari mu mutuku, nta biryo nta myambaro, bakabanza gukemura icyo, ndetse bamwe ngo baza bahangayitse bakabanza guhumurizwa. Abigishwa imashini babamarana umwaka, nyuma bakabaha imashini bakajya kwihangira imirimo.

Muri abo bakobwa bari barabyariye mu rugo, Harerimana avuga ko abashoboye gusubira mu mashuri asanzwe basubirayo. Kugeza ubu hakaba hari barindwi basubije mu ishuri biga babamo, ku buryo ejo hazaza habo hazaba ari heza.

Ikindi n’abana babyaye, abageze igihe cyo kujya mu ishuri, abageze ku 105 biga mu mashuri abanza, aho akaba yaboneyeho umwanya wo gusaba abaterankunga n’abandi babishobora kuba baza bagafasha mu kurera abo bana.

Harerimana yavuze ko mu bindi bafasha abo bakobwa bari barabyariye mu ngo, ari ukubashakira amasoko y’ibyo badoda ‘Made in Kinigi’, kuko badoda imyenda myiza cyane, asaba n’abandi bose kuzaza kuyiguraho.

Amafoto: Eric Ruzindana

Kugira ngo icupa rimwe ry’inzoga rive mu mubiri bisaba amasaha 16

Yabivuze ku wa Kabiri tariki 23 Mutarama 2024, ubwo hatangizwaga Inama y’Igihugu y’Umushyikirano, asubiza ubutumwa bwari bwoherejwe n’umuturage witwa Appolinaire Nkubito, ubwo hakusanywaga ibitekerezo byanditswe ku mbuga nkoranyambaga.

Ubutumwa bwa Nkubito bwagiraga buti “Nyakubahwa Perezida wa Repubulika, gahunda ya Tunyweless ni nziza, nari narananiwe kugabanya kunywa inzoga nyinshi, mwibaze ko abana aribo bagiye kuzimvanaho. Nabwira umwana nti nzanira agacupa, akakazana ariko akongeraho ati tunyweless Papa, ikimwaro kikankora, none byarangiye ngiye kuzivaho burundu pe, ubu ntabwo ndenza amacupa abiri ku mugoroba”.

Nyuma y’ubwo butumwa, Perezida Kagame yafashe ijambo agaruka kuri gahunda ya Tunyweless, ati “Ndagira ngo tubanze duhindure imvugo, ireke kuba Tunyweless ahubwo twe kunywa”.

Kuri ubwo butumwa, Dr Nsanzimana yaburiye uwo muturage amusaba kugabanya inzoga, aho yavuze ko amacupa abiri ku munsi ari menshi cyane, yemeza ko bishobora kugira ingaruka ku buzima bw’umuntu.

Ati “Ku bijyanye no kunywa inzoga amacupa abiri ni menshi cyane, ubundi icupa rimwe kugira ngo umwijima ubashe kurikura mu mubiri ryabaye uburozi, bisaba amasaha nibura 16, ubwo rero agiye anywa amacupa abiri, ntabwo yazigera asinduka yajya ahora afite uburozi bw’inzoga mu mubiri”.

Dr Nsanzimana yakomeje agira ati “Tunyweless abantu bagakwiye kumva ko icyakabaye cyiza nk’uko Nyakubahwa Perezida wa Repubulika abivuze, ni ukutanywa na rimwe tukinywera amazi kuko nicyo kinyobwa kiruta ibindi, n’abandi bakagenda bagabanya gahoro gahoro tugana ahongaho”.

Gahunda ya Tunyweless yatangiye muri Nyakanga 2023, mu rwego rwo gushishikariza urubyiruko kwirinda kurenza urugero mu kunywa ibisindisha.

Ubukangurambaga bwa Tunyweless bwahawe inyito igira iti “Inzoga si iz’abato”, bukaba bukomeje no muri uyu mwaka wa 2024.

Abaturage bari bitabiriye Umushyikirano bifashishije iyakure

Abagarutse kuri ibi bo mu Karere ka Burera, bahera ku ngero z’imishinga y’imihanda harimo uwa Base-Kirambo-Butaro-Kidaho ureshya na Kilometero zisaga 60, wagiye usubikwa kenshi kuva aho imirimo yo kuwutunganya itangiriye, bakavuga ko nubwo umaze amezi macye imirimo yo kuwutunganya isubukuwe, batizeye ijana ku ijana ko itazongera gusubikwa nk’uko byakunze kugenda mu myaka itambutse.

Hakizimana Bosco wo mu Murenge wa Rugarama, agira ati "Uyu muhanda mu by’ukuri ukoreshwa n’abagenzi benshi bava mu Mirenge itandukanye bajya kwaka serivisi ku biro by’Akarere ka Burera, abava imihanda yose yo mu gihugu no hanze yacyo bajya kwivuza ku bitaro bivura kanseri bya Butaro, cyangwa abiga n’abigisha muri Kaminuza mpuzamahanga y’Ubuzima iri i Butaro. Ibyo byiciro byose byiyongera ku baturage bakora ubuhahirane no kugeza umusaruro ku masoko yo hirya no hino, ndetse na ba mukerarugendo bahagenderera bagamije gusura ibiyaga bya Burera na Ruhondo ndetse n’igishanga cy’Urugezi".

Ati "Kuva watangira gukorwa bwa mbere imyaka isaga 10 irinze, irangira ukorwa hashira kabiri abakozi bakazinga utwabo hamwe n’imashini ziwutunganya bakagenda iyo mirimo ikongera guhagarara utarangiye. Ntitujya tumenya mu by’ukuri ikibazo kiba cyabayeho ngo ni ikihe. Ibyo byagiye bidindiza iterambere ryacu ku buryo n’ubu nubwo bongeye gusubukura bakaba barimo kuwutunganya, icyizere cy’uko noneho bazawurangiza ntitugifite mu buryo bwuzuye. Dusanga iyi Nama yavuguta umuti urambye w’iki kibazo, uyu muhanda bakomeze bawukore bawusoze dutangire tuwubyaze umusaruro".

Ubwo yasobanuraga ibimaze kugerwaho muri iyi Manda y’imyaka 7 ishize, mu rwego rw’ubukungu bushingiye ku ikwirakwizwa ry’ibikorwa remezo by’imihanda, Minisitiri w’Intebe Dr Edouard Ngirente, yagize ati:

"Ni byinshi byakozwe ndetse tubasha kubigeraho ku kigero gishimishije, kuko nko mu bikorwa remezo byorohereza ubuhahirane, muri iki gihe cya Manda y’imyaka 7, hubatswe imihanda ya kaburimbo ihuza Uturere ireshya na Kilometero 1600. Muri yo twavugamo nk’umuhanda Base-Rukomo-Nyagatare, umuhanda Kagitumba-Kayonza-Rusumo, uwa Ngoma-Bugesera-Nyanza n’indi inyuranye, yiyongeraho indi ireshya na Kilometero 237, na yo ya kaburimbo yubatswe mu Mujyi wa Kigali".

Arongera ati "Ni imihanda yunganirwa n’indi y’imigenderano (feeder loads) harimo iyubatswe ndetse n’iyagiye isanwa, hagamijwe kunganira abahinzi n’aborozi kugeza umusaruro ku masoko, no gukura abaturage mu bwigunge, ireshya na kilometero 3700".

Abaturage bavuga ko hari imihanda ikorwa hanyuma igahagarara ntibamenye icyabaye bikabadindiza mu iterambere

Minisitiri w’Intebe Dr Ngirente, agaragaza ko mu mbogamizi zimwe na zimwe zatumye bimwe mu byari byitezwe bitagerwaho mu rwego rw’ubukungu, harimo nk’icyorezo cya Covid-19 cyibasiye Isi n’u Rwanda rudasigaye, ndetse binajyanye n’ikibazo cy’imihindagurikire y’ibihe cyagiye kibaho bikadindiza bimwe mu bikorwa byari byarateganyijwe. Icyakora ngo hakomeje gukorwa ibishoboka inzego zose zifatanyije mu kurushaho kubinoza.

Uretse imihanda, abaturage basanga n’ibindi bikorwa remezo nk’imiyoboro y’amashanyarazi, iyubakwa ry’amasoko, ikwirakwizwa ry’amazi meza, n’ubwo bakomeje kubyegerezwa ku bwinshi, kugeza ubu hakigaragara aho bigenda gacye gacye ku buryo hari n’abamara imyaka imirimo yo kubibegereza yaratangiye ariko ntiyihutishwe. Bagasanga ibi bibonewe igisubizo kirambye, iterambere ry’ubukungu n’imibereho myiza byabo bizarushaho kwihuta.

Perezida Paul Kagame

Hari mu mwanya wo gusubiza ibibazo bitandukanye byabazwaga n’abitabiriye iyi Nama y’Umushyikirano aho yari abajijwe ikibazo na Jimmy Mulisa, umwe mu bahoze bakinira ikipe y’Igihugu, Amavubi, ndetse akaba n’umutoza w’umupira w’amaguru, ubu akaba ari umutoza n’umuyobozi mukuru w’ishuri ry’umupira w’amaguru rya “Umuri Foundation”.

Jimmy Mulisa yatanze icyifuzo imbere ya Perezida Kagame, asaba ko hasubiraho amarushanwa hagati y’amashuri ndetse no mu marerero y’abakiri bato bigakurikiranwa no gutozwa kw’abagomba gukirikirana abo bana ndetse aboneraho no gusaba Perezida wa Repubulika kugaruka ku kibuga.

Perezida Kagame yasubije ko yumva ibyo bamusaba, ariko ko na we afite ibyo abasaba ndetse ko mu byatumye agabanya kuza ku kibuga ari bo byaturutseho cyane cyane ku bintu ngo yabonaga bidahindura imico n’imyumvire ishaje, ruswa n’amarozi. Perezida Kagame yasobanuye ko we ibyo atabijyamo ndetse ko ari na byo byatumye ahanini agera aho akabivamo.

Jimmy Mulisa wahoze ari umukinnyi w’ikipe y’Igihugu, Amavubi

Perezida Kagame kandi yakomoje ku mutoza w’Umunya-Serbia, Ratomir Dujković, wigeze gutoza Ikipe y’Igihugu hagati y’umwaka wa 2001 na 2004 aho uyu mutoza yigeze kumusura ubwo yari kumwe n’Ikipe y’Igihugu y’u Rwanda, ariko akaza gusezera avuga ko we atakomeza guhembwa amafaranga y’ubusa kuko nta kazi afite aho yavugaga ko buri mukinnyi wari uri aho yigira umutoza, bityo ko we abona ntacyo yaba amaze.

Ibi yabikomojeho ashaka kugaragaza ko hari ukwivanga mu kazi n’inshingano by’abandi, bityo bigatuma hari uruhande rudatanga umusaruro.

Perezida Kagame yakomeje avuga ko nibumva bakwiye gukora ibintu bizima, bagakora siporo nk’uko ikwiriye gukorwa, yagaruka, ari na ho yongeye kwibutsa Minisitiri wa Siporo Munyangaju Aurore Mimosa ko ibintu nk’ibyo bidakwiye kwihanganirwa na gato kuko bitajyanye n’indangagaciro ndetse ko bihabanye n’uko byakabaye bikorwa by’ukuri.

Perezida Kagame yavuze ko aho bizacyemukira hari uburyo bwa Leta buhari yaba mu gufasha ndetse n’abantu ku giti cyabo bashobora kubyunganira, asoza avuga ko atishimira ibintu nk’ibyo bidashira, ndetse we yizeza ko nibitungana azagaruka rwose.

Perezida Kagame yijeje abakunzi b’umupira w’amaguru ko azagaruka nibagira ibyo bashyira ku murongo

Amafoto: Eric Ruzindana

Ngabonziza(Uhagaze imbere ya micro) ubwo yagarukaga ku kibazo cyo kuba muri aka Karere nta gakiriro kaharangwa

Mu nama y’Igihugu y’Umushyikirano ibaye ku nshuro ya 19, ikaba yatangiye guhera ku wa kabiri tariki 23 Mutarama 2024, mu bibazo byayibarijwemo harimo n’icyagarutse kuri iki kibazo urubyiruko rugaragaza ko kikibabereye ingutu.

Ngabonziza, yakomoje ku rugendo rwe ubwo akirangiza amasomo y’imyuga mu ishuri rikuru ry’imyuga n’Ubumenyingiro rya IPRC Musanze, yashinze Kampani, aha akazi abakozi batatu bahoraho, biyongeraho abandi 35 bakora nka ba nyakabyizi. Avuga ko n’ubwo we yabashije gutera iyi ntambwe, akaba rwiyemezamirimo, hakiri urundi rubyiruko rwinshi rwize imyuga ariko rukaba rutagira ahantu rukorera.

Yagize ati “Hari urubyiruko rwinshi rwize imyuga irimo ububaji ndetse no gusudira, batagira aho bakorera n’abandi bakorera mu kajagari kubera tutagira Agakiriro mu Karere kose ka Burera. Mubitwemereye tukakabona, urubyiruko rwabona aho rukorera bityo n’abakeneye ibikoresho bikomoka ku bumenyi bw’imyuga bize bakagira aho babibonera, urubyiruko narwo rukabasha kubyungukiramo”.

Mu Mirenge 19 igize Akarere ka Burera, nta n’umwe ubarizwamo Agakiriro kari ku rwego rwujuje ibisabwa, n’akigeze gukorerwamo kahoze mu Murenge wa Rugarama mu myaka ishize, abagakoreragamo biganjemo abo mu Mirenge ya Gahunga, Rugarama, Cyanika na Kinoni bakuwemo, inyubako zako zegurirwa umushoramari wahahinduye uruganda rukora imyenda.

Uku kuba nta gakiriro, kuri bamwe ngo bakomeza kudindira n’Akarere kabo kadasigaye

Hassan Jean Aimé agira ati “Amahirwe y’iterambere rishingiye ku myuga ino aha ni macyeya cyane, kuko n’ubwo amashuri y’imyuga ya TVET atwegereye, ariko tuyarangiza abenshi banafite imishinga bakabaye bahita batangira gukora ikazamura imibereho yabo n’iy’Akarere, ariko usanga abantu bahitamo kwimukana ibyo bitekerezo, bakabyijyanira ahandi mu mwanya wo kubikoresha mu bizamura iterambere ry’Akarere”.

Ati “Hari n’abahera mu bushomeri cyangwa bagahitamo gukorera mu kajagari bitewe n’uko nta hantu hafatika hahari hazwi, hemewe ndetse hagutse twakorera tugashyira ahagaragara ubwo bumenyi. Nk’urubyiruko kuba tutagira Agakiriro biratubabaza cyane. Leta iramutse ikatwubakiye usibye no kukayoboka tukagakoreramo turi benshi, kajya kanafasha abantu gukomeza kwihugura biyungura ubumenyi mu buryo bwisumbuyeho”.

Mu Karere ka Burera habarirwa amashuri y’imyuga (TVET) agera muri 19, yiyongeraho andi mashuri yigisha imyuga mu gihe gito, kandi ugendeye ku mubare w’abagikurikirana mu buryo bw’imyigire ndetse n’abayirangije, ngo nta gushidikanya ko mu gihe haboneka agakiriro byagirira benshi akamaro.

Minisiteri y’Ubucuruzi n’Inganda, Dr Ngabitsinze Jean Chrysostome, ubwo yari ahawe umwanya wo gusubiza iby’iki kibazo, yavuze ko bagiye gukorana n’Ikigo NEP hakarebwa uko gishakirwa igisubizo.

Kugeza ubu intambwe imaze guterwa, ni ukureba uko haboneka ubutaka n’ingengo y’imari izifashishwa mu kubaka agakiriro nk’uko Nshimiyimana Jean Baptiste yabibwiye Kigali Today.

Ati “Agakiriro duteganya ko kazubakwa mu cyanya cyahariwe inganda. Karakenewe cyane, kandi dukomeje gukora ubuvugizi ndetse bitanga icyizere kuko intambwe yatewe yambere ari ugushaka ubutaka, igisigaye akaba ari uburyo bwo kubona ingengo y’imari izifashishwa mu kubwubaka”.

Ibi Minisitiri DR Utumatwishima yabitangaje kuri uyu wa Gatatu tariki 24 Mutarama 2024 ku munsi wa kabiri w’inama y’umushyikirano mu kiganiro kigaruka ku ruhare rw’urubyiruko mu kugena ahazaza h’u Rwanda.

Minisitiri Dr Utumatwishima abajijwe niba yarumvaga ko azaba we yasubije ko atigeze agira izo nzozi mu bwana bwe kuko yabyirutse yumva ari umuntu utagira ayo mahirwe.

Ati“Abantu benshi bari mu kigero cy’imyaka ya za 40 ntabwo bajya aho ngo bakubeshye ko bigeze bagira inzozi zo kuzaba abantu bakomeye bakazaba na ba Minisitiri kuko inzozi twari dufite mu bwana bwacu zari izo guhunga kuko icyo gihe turi abana bato igihugu cyacu cyari mu rugamba rwo kwibohora”.

Minisitiri Dr Utumatwishima avuga ko muri ibyo bihe iyo bagiraga umugisha ntibahunge ubwo andi mahirwe yari ahari yari ayo kubona ibyo kurya nabwo inshuro imwe ku munsi.
Minisitiri Dr Utumatwishima avuga ko abana benshi batagiraga inzozi zo kuziga kuko muri ibyo bihe hari ikibazo cyo kudaha amahirwe abantu bose kuko hari uduce tumwe tw’igihugu twemererwaga kuvamo abajya kwiga mu mashuri yisumbuye ndetse n’abana baturuka mu miryango ikize inafite bamwe bari mu butegetsi bwariho icyo gihe.

Minisitiri Dr Utumatwishima avuga ko nyuma ya Jenoside yakorewe Abatutsi nabwo ikizere cyari cyarayoyotse kubera ko bahoranaga igihunga cyo kumva ko bazabazwa ibyaha by’abo mi miryango yabo bakoze muri Jenoside bigatuma batabona amahirwe yo kwiga.

Ati “ U Rwanda rubohowe hari abantu bari bakiri mu masaka, ndetse hari n’abandi bari bararokotse Jenoside yakorewe Abatutsi, icyo gihe rero twiga mu mashuri yisumbuye ikizere cyari kigoye ko cyagaruka kubera ko twumvaga ko tuzabazwa ibyo abaturanyi, ba Data wacu na ba Masenge bakoze muri icyo gihe”.

Minisitiri w’Urubyiruko avuga ko barangije amashuri yisumbuye yari afite inzozi zo kuziga ubuganga barangije barabumuha nibwo ikizere cyatangiye kugaruka.

Ati “ Nubwo Ikizere cyagarutse icyo kuba Minsitiri cyo ntacyo nigeze ngira ninayo mpamvu uyu mwanya nshimira Nyakubahwa Perezida wa Repubulika ikizere yangiriye akanshyira mu buyobozi kandi ndabimushimira mu izina ry’abantu benshi cyane urubyiruko kubera ubuyobozi bwiza budaheza buha abanyarwanda bose amahirwe angana.

Minisitiri Dr Utumatwishima avuga ko urubyiruko rufite byinshi rwigira ku mu kuru w’igihugu cyane cyane kwicisha bugufi akegera abo ayobora akanabakemurira ibibazo ariko by’umwihariko akabagirira ikizere cyo kubashyira mu nshingano z’ubuyobozi bagafatanya kubaka igihugu.

Photo: Eric Ruzindana

Yabitangaje kuri uyu wa gatatu tariki ya 24 Mutarama 2024, mu nama y’umushyikirano mu kiganiro yatanze cyagarutse ku rugendo rw’ubumwe n’ubudaheranwa by’abanyarwanda mu myaka 30 ishize.

Minisitiri Bizimana, yavuze ko Jenoside yakorewe Abatutsi Mata 1994 igihagarikwa hari ibibazo byinshi birimo ko imanza z’abakoze Jenoside zitashoborafa kuba kuko nta tegeko rihana iki cyaha ryabagaho. Leta yariho mbere ya 1994 ntiyarishyizeho kubera ko Politiki yayo yari ishingiye ku ngengabitekerezo ya Jenoside.

Tariki 30 Kanama 1996 nibwo Inteko inshingamategeko ya Leta y’Ubumwe nibwo yaryemeje bituma imanza zitangira muri Mutarama 1997 ariko nabwo ikibazo gikomeza kuba ingorabahizi kuko mu myaka itanu hari hamaze kuburanishwa imanza 8,363 ku bantu 120,000 bari bafunze.

Muri Gicurasi 1998 na Werurwe 1999 habaye ibiganiro by’iminsi 23 bihuza abantu b’inararibonye batanga ibitekerezo birimo kwifashisha inkiko Gacaca mu kwihutisha imanza zishyirwaho n’itegeko mu mwaka wa 2001 zikora akazi kadasanzwe ko gutanga ubutabera bwunga.

Minisitiri w’Ubumwe bw’abanyarwanda n’inshingano mboneragihugu, Dr Jean damascene Bizimana, avuga ko mu myaka 10 zamaze zaciye imanza 1,958,634 zikoresheje amafaranga Miliyoni 52 z’amadorali y’Amelika, amadorali 50 ku rubanza rw’umuburanyi umwe.

Ni mugihe umuburanyi umwe mu rukiko rw’Arusha, umuburanyi umwe yatangwagaho amadorali y’Amelika miliyoni 20 mu myaka 20 ruca imanza 78 gusa.

Dr Bizimana, avuga ko Gacaca yagize uruhare rw’indashyikirwa mu kuzamura ubumwe bw’abanyarwanda nk’uko byagaragajwe n’ubushakashatsi bwakozwe mu mwaka wa 2018 ku ruhare rwazo mu kubanisha abanyarwanda.

Ati “Bwagaragaje ko 83% by’abemeye uruhare rwabo muri Jenoside babisabiye imbabazi baniyemeza baniyemeza gutandukana burundu n’ingengabitekerezo yayo naho 85% b’abiciwe bagize ubutwari bwo kubana neza n’ababiciye no gutanga imbabazi n’ubwo yari amahitamo atoroshye.”

Igipimo cy’ubumwe n’ubwiyunge mu banyarwanda nacyo ngo cyagiye kizamuka buri mwaka kuko kuko mu mwaka wa 2010 cyari kuri 82.3%, mu mwaka wa 2015 kigera kuri 92.5% naho 2020 kigera kuri 94.7%.

Avuga ko igipimo cy’ubumwe n’ubwiyunge gihari ubu kigaragaza ko 99% by’abanyarwanda bemeza ko bashyize imbere ubunyarwanda bakanakomera ku ndangagaciro zibwimakaza naho 94.6% bakemeza ko basobanukiwe amateka Igihugu cyanyuzemo.

Ni mugihe kandi ngo 97.1% bemeza ko babanye neza n’abaturanyi kandi bafatanya mu buzima bwabo bwa buri munsi.

Mu byemezo bya Politiki biza hejuru ya 90% abaturage bavuga ko ngo byatumye igipimo cy’ubumwe n’ubwiyunge kizamuka kuva Jenoside ihagarikwa harimo gukura amoko mu ndangamuntu, gusubiza abantu imitungo, kwegereza abaturage ubuyobozi n’ibindi.

Yagize ati “Kuvanaho indangamuntu zanditsemo amoko, gusubiza abantu imitungo no gusaranganya amasambu, gushyiraho ingabo z’u Rwanda zirimo n’abahoze mu ngabo zakoze Jenoside, gushyiraho imirimo nsimburagifungo ifasha kugorora abihannye bagasaba imbabazi no kuvugurura imiterere y’ubuzima muri gereza, gushyiraho inzego zirwanya ruswa n’akarengane, kwegereza abaturage ubuyobozi bakagira uruhare mu bibakorerwa, kwifashisha umuco nyarwanda, ubunzi, ubudehe, umuganda, ingando, girinka, itorero n’ibindi.”

Hari kandi ngo no kwimakaza umuco w’ibiganiro mu gushaka ibisubizo nko mu nama y’umushyikirano, mu ihuriro ry’imitwe ya Politiki n’ahandi.

Photos: Eric RUZINDANA

Minisitiri Nsanzimana avuga ko uyu mwaka uzajya kurangira ikibazo cy’ubuke bw’imbangukiragutabara cyabaye amateka

Byagarutsweho na Minisitiri w’Ubuzima, Dr. Sabin Nsanzimana, ku munsi wa mbere w’Inama y’Igihugu y’Umushyikirano ya 19, mu kiganiro yagezaga ku bayitabiriye ndetse n’Abanyarwanda bo mu bice bitandukanye bari bayikurikiye, ku ishusho y’uko urwego rw’ubuzima ruhagaze, by’umwihariko kuri serivisi zitangirwa muri urwo rwego.

Minisitiri Nsanzimana yavuze ko serivisi y’ubutabazi ku bagera kwa muganga, itaragera ku rwego rwiza, kubera ko hakirimo byinshi byo gukora, ariko hari n’ibyamaze gutangirwa.

Ati “Nko mu Mujyi wa Kigali bashobora kuba barabonye impinduka nto cyane, mu bijyanye n’imbangukiragutabara, uburyo igera k’uyihamagaye. Ubundi tuba twifuza ko yagera ku muntu mu minota itarenze 10, yakabya bikaba 15 bitewe n’aho uyihamagaye aherereye, ni yo ntego yacu, kandi hari hamwe bitangiye gukunda, igashyirwamo ikoranabuhanga, ariko mu gihugu hose dufite imbangukiragutabara 210 gusa, ubundi dukeneye nibura 500.”

Akomeza agira ati “Inkuru nziza ni uko hari imbangukiragutabara nibura 200 dutegereje muri aya mezi ari imbere, zamaze gutumizwa, ndetse iza mbere zikaba zaramaze kugera mu gihugu, ku bufatanye na Imbuto Foundation. Iza mbere ziratangwa kuri uyu wa kane ku bitaro byihutirwa, izindi zizagenda zikurikira, ku buryo uyu mwaka uzarangira nta kibazo cy’imbangukiragutabara kikiri mu Rwanda.”

Minisitiri Nsanzimana avuga ko nyuma yo kubona izo mbangukiragutabara, bazahita binjira mu cyiciro cyo kureba uko zakoreshwa neza, ku buryo uyihamagaye ayibona.

Ati “Uyihamagaye ayibone, hajemo ikoranabuhanga, umenye aho iherereye, ushobora kubireba kuri telefone yawe, ushobora ndetse no kubibona mu rindi koranabuhanga. Ibyo biraza gutuma wa muturage ukeneye serivisi ayibona koko, uri mu rugo agahamagara ubutabazi akabubona, ndetse na ba baganga b’inzobere kuko bazaba barangiza bakwira hose, umuturage akabona serivisi.”

MINISANTE igaragaza ko ahantu hakiri imbogamizi ari ku mubare w’abaganga ukiri muto, kubera ko nibura abaganga bane baba bagomba kwita ku barwayi igihumbi, mu gihe uyu munsi mu Rwanda umuganga umwe ari we wita ku barwayi igihumbi, ariko ngo hari ikirimo gukorwa ku buryo nibura mu gihe cy’imyaka ine, icyo kibazo nacyo kizaba cyamaze kuba amateka.

Minisitiri w’Ubumwe bw’Abanyarwanda n’Inshingano Mboneragihugu, Dr. Jean Damascene Bizimana

Ibi ni ibyagarutsweho mu kiganiro ku munsi wa kabiri w’Inama y’Igihugu y’Umushyikirano ku nshuro ya 19, cyagaragaje aho Igihugu cyavuye, aho kigeze n’aho giteganya kugera mu mibereho, imibanire n’imiyoborere.

Minisitiri w’Ubumwe bw’Abanyarwanda n’Inshingano Mboneragihugu Dr. Jean Damascene Bizimana yagarutse ku buryo DRC, ikomeje umugambi wo guhembera amacakubi binyuze mu mbwirwaruhame z’abayobozi bakuru no kwica Abatutsi mu bice bimwe by’icyo Gihugu.

Minisitiri w’Ubumwe bw’Abanyarwanda agaragaza ko Ingengabitekerezo ya Jenoside igaragara muri Repubulika Iharanira Demokarasi ya Kongo, ifite imizi kuva mu myaka ya 1980 aho ubutegetsi bw’u Rwanda na Congo bwanashinze Ishyirahamwe ryiswe (Magrivis) mu duce twa Rucuru na Masisi hagamijwe kwica Abatutsi.

Minisitiri Bizimana avuga ko hahise higishwa ingengabitekerezo ishingiye ku ivangura kuva icyo gihe kugeza na n’ubu, dore ko kugeza uyu munsi u Rwanda rucumbikiye Abanyekongo basaga ibihumbi 100, birukanwe muri DRC ariko amahanga akaba arebera ntacyo akora.

Agaragaza ko DRC yo ibyita ko abo ari Abanyarwanda basubiye iwabo, nyamara barameneshjwe n’icyo Gihugu ku bufatanye n’Interahamwe zari zimaze guhungirayo.

Agira ati, “Nk’uko mwabyibukije ejo Nyakubahwa Perezida wa Repubulika, ikibabaje ni uko Imiryango mpuzamahanga ikomeje kurebera icyo kibazo, kugeza ubu abasaga ibihumbi 100 bakaba bari mu Rwanda mu nkambi zitandukanye z’impunzi mu Rwanda”.

Ingengabitekerezo ya Jenoside yongeye kwaduka ku mbuga nkoranyambaga

Minisitiri Bizimana avuga ko ubu hirya no hino muri DRC Ingengabitekerezo ya Jenoside ikwirakwizwa, mu buryo bw’amagambo avugirwa ku mbuga nkoranyambaga bise (Tutsi Phobia), ndetse hakanumvikaba abayobozi bakuru b’Igihugu bayakoresha birengagije amasomo Isi ifatira muri Jenoside yakorewe Abatutsi mu 1994 yemeje n’Umuryango w’Abibumbye (ONU).

Minisitiri Bizimana vuga ko muri Kamena 1998 uwitwa Yerodia Ndomabasi, wari Minisitiri w’Ububanyi n’Amahanga wa DRC, yashishikarije Abanyekongo gutsemba Abatutsi baba Abanyarwanda cyangwa Abanyekongo akoresheje amagambo, asa neza n’ayakoreshwaga kuri Leta ya Habyarimana yo gushishikariza Abahutu kwica Abatutsi.

Yagiraga ati, “Abatutsi kuri twe ni nk’umwanda ni udukoko duto twitwa (vermines) dutera indwara abantu tugomba kuturimbura dukoresheje uburyo bwose n’ingamba zidasanzwe, ku ruhande rwacu twahisemo gukoresha umuti ushobora kwica no kurandura burundu utwo dukoko”.

Minisitiri Bizimana agaragaza ko amagambo ya Ndombasi wapfuye ataragezwa imbere y’ubutabera kubera gukingirwa ikibaba na DRC, asa neza n’ayakoreshwaga kuri radio RTLM yabibaga urwango avuga ko Abatutsi ari inyenzi, inzoka, inda n’andi abambura ubumuntu ngo babone uko bicwa.

Agira ati, “Iyo ni nayo ngengabitekerezo abategetsi b’ubu ba DRC bakomeje kwigisha, iteye kimwe n’iy’ingabo z’u Rwanda za cyera, mu nyandiko zo mu 1992 zashimangiraga ko Umututsi wese uba mu Rwanda no hanze yarwo ari we mwanzi w’u Rwanda, kandi ko n’abanyamahanga bafitanye isano nabo cyangwa bateye kimwe nabo ari abagambanyi”.

Minisitiri Bizimana yibukije abitabiriye Umushyikirano ku nshuro ya 19 ko hari abari abanyapolitiki kuri Leta ya Habyarimana bakoze Jenoside, binyuze mu kuyishishikariza Abaturage kandi bahamwe n’ibyaha bya Jenoside, kandi ko bikwiriye kubera isomo abokomeje gukinisha ubukangurambaga bwa Jenoside.

Amafoto: Eric Ruzindana/Kigali Today

Abajyanama bafasha byinshi mu buvuzi

Minisitiri w’Ubuzima Dr Sabin Nsanzimana avuga ko umubare w’abantu barwaye indwara zitandura ugenda wiyongera nubwo hari ingamba zafashwe mu kuzikumira ndetse ko hari intambwe nziza imaze guterwa mu kuzikumira kuko abantu benshi bamaze kwitabira kujya bipimisha.

Minsitiri Dr Sabin Nsanzimana avuga ko indwara zidakira zibasira abantu muri iki gihe ari indwara ya Cancer, indwara y’umutima, z’umuvuduko w’amaraso, n’indwara ya Diaybete.
Minisitiri Dr Sabin Nsanzimana avuga ko Abajayanama b’ubuzima bahawe amahugurwa bongererwa ubushobozi bwo gupima izo ndwara zitandura.

Ati “ Hari akamashi gasuzuma Diyabete umuntu wese ashobora gukoresha yabihaweh amahugurwa, abajyanama nabo twabahuguye uburyo gakoreshwa n’uburyo bashobora kuvura izo ndwara zidakomeye nkaho bashobora guha umuntu ibinini ashobora gufata igihe kirekire, kumenya uko umuvuduko w’amaraso umeze, baka babasha gufasha umurwayi”.

Abajyanama b’ubuzima basanzwe bafasha byinshi mu buvuzi birimo gukurikirana abagore batwite, imikurire y’umwana mu ngo mbonezamikurire, gusuzuma indwara ya Maraliya no gutanga ibinini by’inzoka ku bana bato ndetse no kujyira inama z’ubuzima mu midugudu aho batuye.

Minisitiri Dr Nsanzimana avuga ko kurwanya izi ndwara habayeho ubukanguramabaga bwo kuzimenyekanisha, aho zituruka, ikizitera kugirango abantu bazimenye ubundi banazirinde.
Ati “ Ziraturuka cyane cyane mu mibereho y’abantu ibyo barya ndetse n’ibyo banywa aha ndanibutsa abantu ko inzoga ari mbi kuko iyo umuntu azinyoye igihe kirekire zangiza umubiri ndetse hakaziramo n’indwara zitandura”.

Minisitiri w’ubuzima avuga ikindi gitera izi ndwara zitandura ari amafunguro ya buri munsi atarimo ibyo umubiri uba ukeneye byose cyanga hakaba harimo ibintu birenze ibyo umubiri ukeneye bigatuma abantu bagira ibiro byinshi cyane bityo hakaza ibinure mu mitsi iyobora amaraso bikamutera ubwo burwayi.

Minisitiri w’ubuzima avuga ko umuntu urengeje imyaka 35 akwiye kwipimisha rimwe mu mwaka kugira ngo amenye uko ahagaze ndetse yasanga afite ikibazo cy’izo nwara zidakira akabasha kwikurikiranya hakiri kare.

Minisitiri avuga ko mu mwaka wa 2023 abantu babashije kwipimisha indwara zitandura bageze kuri 89% basaga 3300000 mu bantu bagombaga kuzipimisha basaga miliyoni 3700000.

Kwimipisha indwara zidakira byibura rimwe mu mwaka

Ati “Uturere twaradufashije cyane kuko nitwo twagiye dushyiraho iyi gahunda yo gupima izi ndwara bituma tubasha no kumenya abazifite barapimwa bavurwa hakiri kare”.

Minisitiri w’Ubuzima ariko avuga ko uruhare rwa buri wese rukenewe kuko usanga hari uruhare rw’umuntu ku giti cye rujyanye no kumenya uburyo yitwara birimo imirire, no kwitabira gukora siporo kuko nayo ifasha mu kurinda indwara zitandura.

Minisitiri w’Ubuhinzi n’Ubworozi, Dr Ildephonse Musafiri

Yagize ati “Ndashima umurongo mwiza washyizweho ku bahinzi. Ndi umuhinzi-mworozi, uyu mwanya tukaba turimo kubyina intsinzi yo kubona ibyo kurya mu Banyarwanda. Icyo nshima ni uko ubuhinzi bwahawe nkunganire, kandi nkunganire ikaba yaratanze umusaruro, ubuhinzi bukaba bujyana n’ubworozi. Gusa mu bworozi dufitemo ikibazo kubera ko ubuvuzi bw’amatungo buhenze cyane, tugize amahirwe badushyiriramo Nkunganire”.

Ati “Impamvu tuyisaba ni uko iyo inka yakitse ugahamagara ‘veterineri’, ubushobozi bwo kugira ngo ayikuvurire usanga buhenze buri hejuru cyane. Ni muri urwo rwego rero twasabaga ko ubworozi nabwo bwahabwa Nkunganire, bukazamuka ku kigero cyo hejuru”.

Asubiza ikibazo cy’uwo muturage, Minisitiri w’Ubuhinzi n’Ubworozi, Dr Ildephonse Musafiri, yavuze ko hari serivisi aborozi bahabwa ku buntu, ariko ko ku bijyanye na nkunganire mu bworozi, bitahita bikunda, ahubwo ibyo kuvuza amatungo byoroheje, abaturage bajya babyikorera kugira ngo bafatanye na Leta.

Yagize ati “Nagira ngo mbamenyeshe ko amatungo tuyunganira mu bintu byinshi. Buriya inkingo zose zikingirwa amatungo ni ubuntu. Imiti yose dutanga irunganiwe. Hanyuma iyo habaye ibyorezo nk’uburenge na zino ndwara zitera zose tubivura ku buntu. Ubu rero kongeraho ibindi nko ku nka yarwaye indwara ikomeye, nabyo ni ibintu abantu barebaho, ariko hari ahandi bikemukira nko mu bwishingizi. Nabwo tubwunganira 40%”.

Ati “Icyo dushishikariza aborozi ni ukugira ngo nidukora bwa bworozi bw’umwuga, abantu bazabona inyungu mu byo bakora, bitume na cya kindi cyo kwivuriza amatungo bashobora kucyikorera. Dushaka Umunyarwanda ubasha kugira n’icyo yikorera mu bworozi bwe. Tubunganira rero byinshi, icyo tuzongera tukiganireho, ariko ugiye mu bwishingizi, aho tubunganira 40% byaba byiza kugira ngo n’ugira n’ikibazo itungo ryawe ripfuye ushumbushwe. Ariko ntabwo twumva ko twakomeza gutanga nkunganire nyinshi.”

Hari abifuza ko no mu bworozi hashyirwamo Nkunganire

Icyo kibazo cyabarijwe mu nama y’Igihugu y’Umushyikirano, yatangijwe na Perezida wa Repubulika Paul Kagame, ku wa Kabiri tariki 23 Mutarama 2024, aho wabaye umwanya ku Banyarwanda bari mu gihugu n’ababa mu muhanga, wo gutanga ibitekerezo, bashima ibyagezweho, abandi babaza ibibazo ndetse bahabwa ibisubizo hakurikijwe urwego bireba.

Perezida Kagame yemereye ubufasha abanyeshuri bagizweho ingaruka n’intambara yo muri Ukraine

Perezida Kagame nyuma yo kugezwaho ikibazo n’umwe mu banyeshuri, witwa Sine Denise na we wigaga muri Ukraine kimwe na bagenzi be bakaza guhunga intambara y’icyo gihugu n’u Burusiya, kuri ubu bakaba biga muri Pologne, cy’uko bagorwa no kubona amafaranga yo kwishyura ishuri kuko amashuri yo muri Pologne ahenda cyane, ugereranyije n’ayo bigagamo muri Ukraine.

Sine Denise yavuze ko ubwo intambara yatangiraga yumvaga intego ye yo kuzaba umuganga irangiye, ariko ubuyobozi bwiza bwatumye inzozi ze zikomeza kuba impamo, babasha gukomeza kwiga.

Ati “Turi abanyeshuri batandatu, bane tugeze mu mwaka wa kane mu bijyanye n’ubuvuzi, abandi bari mu mwaka wa kabiri. Turiga neza turatsinda. Ikibazo dufite ni uko amashuri hano ahenze cyane ku buryo akubye inshuro eshatu ayo twishyuraga muri Ukraine. Nyakubahwa Perezida wa Repubulika, twabasaga inkunga cyangwa inguzanyo, uko yaba ingana kose yadufasha.”

Umukuru w’Igihugu yavuze ko Leta izafasha aba banyeshuri, ubwo yasubizaga Sine, wari umugejejeho ikibazo cy’amafaranga y’ishuri.

Umukuru w’Igihugu yagize ati “Iby’abanyeshuri byo nta kibazo gikwiye kuba kiriho, Leta izabikemura nta kibazo.”

Perezida Kagame yasabye Minisitiri w’Intebe, Minisitiri w’Uburezi n’uw’Ubuzima, gukemura icyo kibazo ntihazagire unanirwa amashuri kubera ko yabuze ubushobozi.

Minisitiri w’Ubuhinzi n’Ubworozi, Dr Ildephonse Musafiri

Kwihaza mu biribwa ngo bizajyana no kongera umusaruro uboneka kuri hegitari nibura ukikuba kabiri.

Yagize ati “Turifuza ko ahava imifuka 10 y’ibishyimbo hazajya hava 20, ahavaga 20 have 40 turashaka gukuba nka kabiri mu myaka itatu, ine iri imbere. Tuzabigeraho ari uko tugeza imbuto n’ifumbire nziza ku bahinzi kandi ku gihe.”

Muri Gicurasi uyu mwaka kandi hazaba hakozwe ikarita izafasha umuhinzi kumenya ubwoko bw’ifumbire ubutaka bwe bukeneye akoresheje icyangombwa cy’ubutaka bwe.

Mu bworozi ngo hazongerwa ibiribwa haboneke ibiryo by’amatungo kandi nayo ari mu kiraro ndetse no kuvugurura intanga ku buryo umuntu azajya akerekwa ubwoko bw’inka zitanga umukamo ndetse umworozi akinigishwa uburyo ubwoko bw’inka yahisemo bugaburirwa aho kugura inka hanze.

Hari kandi kongera umusaruro w’inkoko n’amafi ku buryo ibyatumizwaga hanze bicika burundu harimo n’ibyo bacyurirwa.

Ati “Turashaka guca ibintu byo kuzana amafi hanze, ibintu byo kujya baducyurira indagara byateye turashaka kubirandura, buriya dufite isambaza mu kiyaga cya Kivu ziryoshye kurusha indagara, kuva Rubavu, Rutsiro, Nyamasheke, Rusizi hose bararoba buri munsi, tugiye gutuburiramo Tyrapia.”

Avuga ko hari umushinga bafatanyijemo n’abantu, Umuryango w’Ubumwe bw’Uburayi (EU), ku buryo mu myaka nk’itanu hazongerwa umusaruro w’amafi uziyongera ntihongerwe kuzana amafi aturuka hanze.

Mu buhinzi kandi ngo hazongerwa umusaruro w’ibyoherezwa hanze haterwa ibiti by’ikawa bishya bigasimbura ibishaje ndetse hakashyirwa imbaraga mu buhinzi bw’icyayi kuko kinakunzwe cyane ku ruhando mpuzamahanga.

Muri urwo rwego kandi harimo kongera umusaruro wa Avoka, urusenda, imiteja na marakuja nabyo bikoherezwa hanze ku bwinshi ariko no kongerera ibiribwa ubuziranenge kugira ngo amahoteri yo mu Gihugu atongera gukura ibiryo hanze y’Igihugu.

Yashishikarije urubyiruko n’abikorera kujya mu buhinzi haba mu guhinga, kongerera agaciro umusaruro ndetse no kubyohereza hanze y’Igihugu.

Umusaruro w’amata wikubye hafi kabiri ndetse n’ikoreshwa ry’inyongeramusaruro ryikuba inshuro nyinshi

Minisitiri w’Intebe, Dr Edouard Ngirente, avuga ko kuva mu mwaka wa 2017 ikoreshwa ry’inyongeramusaruro ryikubye inshuro zirenze ebyiri, imbuto z’indobanure zikoreshwa mu buhinzi zose zikaba zisigaye zituburirwa mu Rwanda ndetse n’umukamo w’amata uva kuri litiro 700,000 zigera kuri litiro 1,100,000 ku munsi.

Minisitiri w’Intebe avuga ko ingano y’inyongeramusaruro ikoreshwa mu buhinzi yiyongereye ku buryo yikubye inshuro zirenga ebyiri ahanini kubera nkunganire ya Leta.

Mu mwaka wa 2017 hegitari imwe yashyirwagaho ibiro 32 by’ifumbire ubu bikaba bigeze ku biro 70 ariko urugendo rukaba rukomeje kuko mu bihugu byateye imbere bageze ku biro 140 kuri hegitari n’ubwo mu Bihugu byinshi by’Africa bari ku biro 25 kuri hegitari.

Mu rwego rwo kongera ingano y’ifumbire ikoreshwa mu Karere ka Bugesera huzuye uruganda rutunganya ifumbire rukora toni 100,000 ku mwaka.

Minisitiri w’Intebe, Dr Edouard Ngirente

Ati “Nyakubahwa Perezida wa Repubulika Guverinoma y’u Rwanda ifatanyije n’abafatanyabikorwa twujuje uruganda ruvanga ifumbire mu Bugesera rukajya rukora toni 100,000 ku mwaka iyo fumbire ikazafasha abanyarwanda kuko ari ifumbire izajya ivangwa bitewe n’Akarere ugiye kuyishyiramo twizera ko izadufasha kongera umusaruro cyane mu rwego rw’ubuhinzi.”

Ku bijyanye n’ikoreshwa ry’imbuto z’indobanure ubu izikoreshwa zose zituburirwa mu Rwanda mu gihe mu mwaka wa 2019 izakoreshwaga zaraturukaga hanze y’Igihugu amafaranga yakoreshwaga mu kuzitumiza hanze ashyirwa mu gufasha abatubuzi bazo.

Mu rwego rwo gufata neza ubutaka kugira ngo butajyanwa n’isuri hakozwe amaterasi kuri hegitari zirenga 1,147,000 n’ubwo buri munyarwanda akomeza gusabwa gukora amaterasi mu mirima yabo.

Hongerewe ubuso bwuhirwa bwikubye hafi kabiri hagamijwe kugira ubuhinzi budashingiye ku mvura kandi birakomeza kuko ubu hari umushinga munini uzakorera mu Gihugu cyose ugamije kongera ubuso bwuhirwa ku buryo bizongera umusaruro ukomoka ku buhinzi.

Havuguruwe ubworozi bitabwa ku buzima bw’amatungo no kongera ibikorwa remezo by’ubworozi ku buryo byazamuye umukamo w’amata uva kuri litiro 700,000 ku munsi ubu ukaba ugeze kuri litiro hafi 1,100,000 ku munsi.

Yagize ati “Guverinoma yakomeje kongera imbaraga mu kuvugurura harimo kwita ku buzima bw’amatungo, kongera ibikorwa remezo by’amatungo n’ibindi. Ibi byagize uruhare mu kongera umukamo w’amata kuko burya twagira umukamo wa Litiro 700,000 ubu tugeze kuri Litiro hafi 1,100,000 ariko nanone urugendo rurakomeje ntabwo duhagararira aho dukomeza gufasha aborozi.”

Hashyizweho kandi gahunda zifasha abahinzi n’aborozi zirimo ubwishingizi bw’ibihingwa n’amatungo ariko ngo bakomeza gushishikariza aborozi kubwitabira kuko ngo bwatanze umusaruro mu gihe cy’ibiza.

Ubu bwishingizi na bwo Leta ngo ibushyiramo nkunganire aho kwishingira amatungo umworozi yitangira 60% naho Leta ikamutangira 40%.

By’umwihariko mu Karere ka Nyagatare hakaba harimo kubakwa uruganda rukora amata y’ifu ruzajya rutunganya Litiro 650,000 ku munsi akaba yanizeje ko amata ruzatunganya atazabura kuko hagiye hubakwa amakusanyirizo yayo kugira ngo agere ku ruganda atagize ikibazo.

Ni ibyagarutsweho na Minisitiri w’Ubuzima Dr. Sabin Nsanzimana kuri uyu wa kabiri tariki 23 Mutarama 2023, ku munsi wa mbere w’Inama y’Igihugu y’Umushyikirano irimo kuba ku nshuro yayo ya 19.

Agaruka ku ishusho y’uko ubuvuzi buhagaze mu Rwanda by’umwihariko kuri serivisi zo muri urwo rwego Abanyarwanda bakunze kujya gushaka mu mahanga, Dr. Sabin Nsanzimana yavuze ko ziri mu byiciro bitatu, birimo ibijyanye n’ubuvuzi bw’impyiko, ariko by’umwihariko kuyisimbuza, kubaga umutima ndetse n’ubuvuzi buhambaye bwo kuvura kanseri.

Minisitiri Dr. Nsanzimana avuga ko ibyo byiciro bitatu bigize nka 70% by’ibituma abantu bajya kwivuza mu mahanga.

Yagize ati “Guhera umwaka ushize, habaye impinduka, ku buryo nk’abajyaga gusimbuza impyiko hanze y’Igihugu byakorewe mu Rwanda, nta muntu numwe twigeze twohereza gusimbuza impyiko hanze y’Igihugu, kuko abagera kuri 14 bari bayikeneye bose bayiherewe hano mu Rwanda, ndetse muri iki cyumweru hari abandi bane barimo kuyihabwa mu bitaro by’Umwami Faisal.”

Minisitiri w’Ubuzima avuga ko abarimo gukora muri izo serivisi, baturuka muri Leta Zunze ubumwe za Amerika, batarimo gukora ubuvuzi gusa, kubera ko banigisha abaganga ba Abanyarwanda, ku buryo mu myaka itatu mu Rwanda hazaba hari abaganga bafite ubushobozi bwo kubikora, kugira ngo no mu bindi bitaro serivisi zo gusimbuza impyika no kubaga umutima zizajya zihatangirwa.

Minisitiri Dr. Sabin ati “Ubu dufite Abanyarwanda basaga 175 babazwe umutima, abana n’abakuru byose byakorewe mu bitaro bya Faisal hano mu Rwanda, igisigaye muri ibyo bitatu by’ibanze bituma tujya gushaka ubuvuzi kure, ni ukuvura indwara ya kanseri ndetse n’ibyuma biyibona aho igeze.”

Yongeraho ati “Na byo twizeye ko mu mezi ari imbere bizaba biri hano mu Rwanda, kuko ibisabwa byose twarabitangiye, ndetse n’abazakiduha, bisigaje ko barangiza kubikora bikagezwa hano, ari nacyo cyari gisigaye ku mwanya wa mbere gituma abantu bajya kwivuza hanze.”

Minisiteri y’Ubuzima ivuga ko byose bijyana no gutanga serivisi nziza, kandi ko bazi ko hari ibyo bataranoza, kuko hari ibyo basabwa n’abaturage, bazakomeza kunoza kandi mu buryo bwihuse, ku buryo uretse kuvura ibihambaye gusa, n’ibyoroshye guhera ku Mudugudu kuzamuka kugera ku rwego rw’Igihugu, umuturage abona serivisi nziza kandi akayibona vuba.

Minisitiri w’Intebe, Dr Edouard Ngirente, avuga ku buzima

Minisitiri w’intebe Dr Ngirente, avuga ko indwara ya malariya na yo yakunze kwibasira cyane abaturarwanda, kuri ubu umubare w‘abahitanwa na yo ukaba waravuye kuri 427 muri 2017, ugera kuri 35 mu 2023.

Minisitiri w’Intebe yavuze ko hazakomeza kongerwa umubare w’ibigo by’ubuvuzi, bitanga serivisi zihariye zitabonekaga mu Gihugu.

Muri ibi bigo harimo ibikora ubushakashatsi n’ibivura indwara zitandukanye, harimo umutima, kanseri, indwara zo mu mutwe, no kubaga mu buryo bugezweho.

Yakomeje avuze ko mu rwego rw’Ubuzima, Abanyarwanda bose bazakomeza kwegerezwa serivisi nziza z’ubuvuzi, no kugabanya ingendo bakora bajya kwivuza. Kuva mu 2017, hubatswe ibitaro bishya 6 (Gatunda, Gatonde, Munini, Nyabikenke, Byumba n’ibya Nyarugenge), byaje byiyongera ku bindi 52 byari bisanzwe mu Gihugu.

Bahawe umwanya wo kubaza no gutanga inyunganizi

Hubatswe kandi ibigo nderabuzima bishya 12 mu Turere dutandukanye, byiyongera kuri 495 byari bisanzweho, ndetse n’ibigo by’ubuvuzi bw’ibanze (Health Posts) nabyo byarongerewe biva kuri 473 byari mu Gihugu mu 2017 ubu bikaba bigeze ku 1,252.

Ati “Uko kwiyongera kw’ibikorwa remezo by’ubuvuzi hamwe no kunoza serivisi z’ubuvuzi zitangirwamo, byatangiye gutanga umusaruro ugaragara kuko dufashe nk’urugero, ababyeyi babyarira kwa muganga bageze ku kigero cya 93%”.

Gahunda zo kugabanya ubukene no gufasha Abanyarwanda kwiteza imbere zirakomeje, muri uru rwego rw’ubuzima hatanzwe inka zirenga ibihumbi 190 ziyongera ku bihumbi 290 zari zaratanzwe muri 2017.

Guverinoma kandi ntiyibagiwe n’ibikorwa remezo bya siporo n’imyidagaduro, kuko nabyo byakomeje kubakwa hirya no hino mu Gihugu.

Minisitiri w’Ubuzima, Dr Sabin Nsanzimana, yavuze ko Leta izakomeza kongera umubare w’abaganga kugira ngo Serivisi z’ubuvuzi zikomeze zigere ku baturage uko bikwiye.

Minisitiri Nsanzimana avuga ko ubu mu mwakwa umwe, abitabira amashuri y’ubuganga umubare umaze kwikuba gatatu, kuko mu mwaka umwe babona abagera kuri 300 mu gihe abigaga muri aya mashuri babaga ari 100 ku mwaka.

Amafoto: Eric Ruzindana

Perezida Kagame yamaze impungenge abatewe ubwoba n’amagambo y’abavuga ko bashaka gutera u Rwanda

Nubwo mu nama zo mu rwego rwo hejuru zibera mu Rwanda haba hari abashinzwe gusemura mu Cyongereza no mu Gifaransa, iyo Umukuru w’Igihugu afite ubutumwa bwihariye ashaka kugeza ku Banyamahanga, abyivugira mu Cyongereza kugira ngo yizere ko babyumvise 100% nta wundi binyuzeho.

Ni nako yabigenje mu ijambo ritangiza ku mugaragaro Inama y’Umushyikirano ibaye ku nshuro ya 19, ubwo yakomozaga ku magambo amaze iminsi avugwa n’Abakuru b’ibihugu by’ibituranyi baherutse kwerura bavuga ko bazatera u Rwanda.

Perezida Kagame yagize ati “Nabwiye inshuti zacu, izi nshuti zacu zifite imbaraga, ndetse nabivugiye ku mugaragaro…iyo ari ibintu bireba kurinda iki Gihugu cyababaye kuva kera kikabura umuntu ugitabara, nta n’umwe nkeneye gusaba uruhushya rwo gukora icyo tugomba gukora ngo twirinde. Nabivuze ku manywa y’ihangu, nabibwiye abarebwa n’iki kibazo kandi ni ko bizagenda. Nimujye iwanyu muryame…nta kintu kizambuka umupaka w’iki Gihugu cyacu gito…nihagira umuntu n’umwe ubigerageza….”

Perezida Kagame yakomeje agira ati “Rero ntimugatinye ibitumbaraye ….uba umeze nk’igipirizo umuntu ashobora gukozaho urushinge gusa …. aho twari turi mu myaka 30 ishize, nta kindi kintu kibi kirenzeho gishobora kutubaho, na none kandi ibyo bivuze ko nuramuka udushyize ahantu dushobora gutekereza ko dusa n’abasubiye muri cya gihe, aho uzitegure ko tuzarwana nk’abadafite icyo gutakaza, kandi abazabihomberamo si twe.”

Sinigeze nsubiza ibitutsi byaturutse mu Majyepfo, mu Burengerazuba…biriya ntawe byica, rero sinata umwanya wanjye, twe si uko duteye ariko bazashyira babone isomo ko bakoze ikosa rikomeye.”

Amashuri yubatswe yagabanyirije ingendo abana

Mu ijambo rye rigeza ku bitabiriye inama y’Igihugu y’Umushyikirano ya 19, ryagarukaga ku bikorwa Leta y’u Rwanda yagezeho mu gihe cy’imyaka irindwi ishize muri gahunda ya NST1, Minisitiri w’Intebe, Dr. Edouard Ngirente, yavuze ko mu rwego rwo gukomeza guteza imbere ireme ry’uburezi mu Rwanda, hakozwe ibikorwa bitandukanye birimo no kongera umubare w’ibyumba by’amashuri.

Minisitiri w’Intebe Dr Ngirente, yavuze ko hashyizwe imbaraga mu kugabanya ingendo abanyeshuri bakoraga no kugabanya ubucucike.

Ati “Abana bakoraga ibilometero bigera kuri 19 bajya kwiga, hubatswe amashuri kugira urwo rugendo abana bakora bajya banava ku ishuri rugabanuke, ariko n’umubare w’abana mwarimu yigisha mu ishuri ubucucike bwari bwinshi, kugira ngo nabwo bugabanuke.”

Yakomeje agira ati “Mu rwego rwo kongera ibigo by’amashuri hubatswe ibyumba by’amashuri ibihumbi 27, mu gihe cy’imyaka 6.5, bityo rero umubare w’ibyumba byigirwamo ugera ku bihumbi birenga 76 mu Rwanda, ibi byatumye umubare munini w’abanyeshuri wigira mu cyumba ugabanuka, aho twari dufite ikigereranyo cy’abanyeshuri 80 umwarimu yigishaga, ubu bageze kuri 55.”

Minisitiri w’Intebe, Dr Edouard Ngirente, ageza ijambo ku bitabiriye Umushyikirano

Amashuri yigisha imyuga (TSS) yariyongereye cyane, kubera ko kugeza ubu hirya no hino mu gihugu hari agera kuri 563, aho mu Mirenge 416 igize Igihugu, igera kuri 392 yose ifite nibura ishuri rimwe ryigisha imyuga, gahunda ikaba ari uko nibura buri Murenge ugira ishuri ryigisha imyuga.

Muri iyo myaka kandi hanavuguruwe amashuri makuru y’imyuga, ashyirwa ku rwego rwa Kaminuza, hagamijwe gufasha abanyeshuri barangiza mu mashuri yisumbuye kubona ayo bakomerezamo ari ku rwego rwa Kaminuza, aho mu bigo bimwe na bimwe hamaze gutangira icyiciro cya kabiri cya Kaminuza, hakaba hari na gahunda y’uko mu minsi iri imbere yajya atanga n’amasomo y’icyiciro cya gatatu cya Kaminuza (Masters), ku buryo umwana wize imyuga azajya aba ashobora guhera hasi akazamuka kugera arangije masters yiga imyuga.

Kubera imbaraga zashyizwe mu kwigisha abarimu, umubare w’ababifitiye ubushobozi wariyongere, kubera ko kuva muri 2022 umushahara w’abigisha mu mashuri abanza wongerewe ku kigero kirenga 80% by’umushahara wabo, mu gihe abigisha mu yisumbuye bongerewe kugera kuri 40%.

Ntibyagarukiye ku kongera umushahara wa mwarimu gusa, kubera ko Guverinoma y’u Rwanda yakomeje kongera ubushobozi bwa koperative Umwarimu Sacco, kugira ngo bifashe abarimu kuba babona inguzanyo iciriritse nka koperative ihuje abantu bahuje umwuga.

Hari n’izindi gahunda zagiye zifasha abanyeshuri zirimo iyo gutangira ifunguro ku ishuri, yatumye abana badakomeza guta ishuri ndetse no gutuma bamwe mu baritaye barisubiramo.

Perezida Paul Kagame

Ku kibazo cy’Umutwe wa M23 urwanira mu Burasirazuba bwa Repubulika Iharanira Demokarasi ya Congo, Perezida Kagame yavuze ko kugeza ubu atarumva impamvu ikibazo cyawo gihinduka ikibazo cy’u Rwanda, mu gihe uwo mutwe wa M23 ugizwe n’Abanye-Congo kandi ukaba urwanira muri Congo.

Yagize ati “Rimwe twari mu nama n’abayobozi, tugirana ikiganiro, hazamo kwivuguruza kwa bamwe mu bayobozi, icyo gihe mbwira abayobozi ba Congo, nti ntacyo turi bukemure, keretse nutubwira neza ibintu bifatika by’uko ikibazo gihagaze, icyo gihe ndabaza nti abantu bari muri M23 ni Abanye-Congo cyangwa si bo?. Icyo gihe kandi hari n’abandi bayobozi mu nama, avuga ko abari muri M23 ari Abanye-Congo. Icyo gihe anavuga ko yabivuzeho ku buryo bweruye. Ngira ngo ni mu gihe yari muri Amerika cyangwa mu Bwongereza sinibuka neza. Avuga ko yabivuze kandi ko yemeza ko abo ari Abanye-Congo. None se baje guhinduka bate ikibazo cyacu? Ni gute bahinduka ikibazo cy’u Rwanda?”

“Naranamubajije nti ese uzi aho abo bantu, itsinda ry’abantu batangije iyi mirwano, uzi aho bavuye? Icyo gihe mbere y’uko anasubiza, Perezida w’Igihugu baturutsemo ni we wabivuze, aravuga ati, uyu mugabo yanze gukemura ibibazo byabo, ubwo rero biyemeza kwambuka umupaka basubira aho bakomoka. Icyo gihe narongeye ndamubaza nti kuki uhuza u Rwanda n’iki kibazo? Ndanamubaza nti kuki cya gihe warashe ku butaka bwacu? Kuko hari ubwo barasaga ibisasu bikagwa ku butaka bwacu mu Kinigi, hari abantu hano babizi. Ndamubaza nti uragira ibiki? Urashaka iki? Ubwo aravuga ngo bariya bantu bagombye gusubirayo, ndamubaza nti basubira he?”

Perezida Kagame yasobanuye ko abarwanyi ba M23 baje mu Rwanda bari hagati ya 500-600, baje bahunze hagati ya 2012-2013 bazanye intwaro zabo, icyo gihe u Rwanda rwarabakiriye mu cyahoze ari Kibungo muri Ngoma, n’intwaro zabo zihabwa ubutegetsi bwa Kinshasa. Igihe kimwe abayobozi b’abo barwanyi ngo batumiwe i Kinshasa mu biganiro, ariko bamarayo amezi atanu muri Hoteli nta muntu babonye bakorana ibiganiro, birangira bongeye baragenda nta kindi bagezeho uretse za fagitire nini za hoteri.

Yagarutse ku kibazo cy’umutwe w’iterabwoba wa FDLR ugizwe na bamwe mu basize bakoze Jenoside mu Rwanda, avuga ko igitangaje ari uko uwo mutwe utavugwa kandi ukaba umaze imyaka myinshi muri icyo gihugu, kuko na Perezida wa Repubulika Iharanira Demokarasi ya Congo hari ubwo yavuze ko ntawuriyo.

“Rimwe nabwiye Perezida wa Congo nti ntabwo uzi ko abo bantu bari ahantu aha n’aha, ndetse bakaba bashyiraho za bariyeri bagafunga imihanda bakaka abantu imisoro? Icyo gihe aravugaaa, mbese ahita yibuka ko ibyo bintu bimaze iminsi bibaho koko, noneho mpita mubwira nti none se uravuga iki? Ufite FDLR imaze igihe yarafashe ibice bimwe by’Uburasirazuba bwa Repubulika Iharanira Demokarasi ya Congo, ikaba yaka n’imisoro, warangiza ukavuga ko ntayihari?”.

Perezida Kagame yavuze ko mu bijyanye no kurinda umutekano n’ubusugire bw’u Rwanda, ibyo akora ntawe abanza kubisabira uruhushya cyangwa se uburenganzira.

Yagize ati “Ubwo rero nabwiye inshuti zacu, izi nshuti zacu zikomeye, nanabivuze neruye rwose, ko iyo hajemo ibyo kurinda iki Gihugu cyababaye igihe kirekire ntihagire n’uza gufasha, sinkenera uruhushya ruturuka ku muntu uwo ari we wese, rwo gukora icyo tugomba gukora mu rwego rwo kwirinda…Ibyo nabibwiye abafite aho bahurira n’iki kibazo”.

Yongeyeho ati “Nimujye mu ngo zanyu muryame musinzire nta kintu kizambuka imipaka y’Igihugu cyacu gito. Nihagira ubigerageza,…Ntimugatinye ibitumbaraye kuko rimwe na rimwe biba birimo ubusa. Hari ubwo haba harimo umwuka. Ntimuzi ibipirizo (balloon)? kuri balloon uba ukeneye urushinge gusa, iyo upfumuye ibyari birimo ukayoberwa aho bigiye. Ntimugatinye ibitumbaraye”.

Reba ibindi muri iyi video:

Amafoto: Eric Ruzindana/Kigali Today

Perezida Kagame avuga ko urubyiruko rufite uruhare runini rwo gukomeza kubaka Igihugu

Perezida Kagame yavuze ko umwaka wa 2024 udasanzwe ku gihugu, kuko gifite byinshi cyifuza gukora mu gihe hashize imyaka 30 cyibohoye, ndetse hahagaritswe Jenoside yakorewe Abatutsi.

Mu ijambo rye, Perezida Kagame yavuze ko ari umwanya mwiza wo kwishimira ibyo u Rwanda rumaze kugeraho, mu myaka 30 ishije Jenoside ihagaritswe, agaragaza ko Igihugu cyavuye mu icuraburindi cyongera kubakwa kigera ku ntego zacyo, ndetse no ku iterambere ariko urubyiruko narwo rufite umukoro wo gukomeza kubaka Igihugu, no gusigasira ibyagezweho birinda icyakongera kugisenya.

Ati “Imyaka 30 irimo ibintu bibiri, irimo ibyo byago twagize bya Jenoside yadutwariye umubare munini w’abacu, ariko irimo n’Igihugu cyahindutse kiba cyiza kandi gikwiye, kitari ikijyanye n’ayo mateka na yo twibuka”.

Perezida Kagame yavuze ko uyu mwaka Igihugu gifite byinshi kigamije gukora, ndetse hazirikanwa imyaka 30 ishize u Rwanda ruvuye mu icuraburindi rya Jenoside yakorewe Abatutsi.

Umukuru w’Igihugu yavuze ko iyi myaka yose ishize, hadakwiye kuba hari abagifite umugambi wo kwirengagiza ayo mateka mabi u Rwanda rwanyuzemo.

Ati “Biri mu bibazo dukwiye kuba duhangana na byo. Ubwo rero mu mikorere yacu dukwiye kuba tubishyira imbere kuko dukora tutibuka ibyo ngibyo, ushobora kugira n’ibibazo by’uko wabisubiramo.”

Perezida Kagame yavuze ko Urubyiruko rwavutse mu gihe cya Jenoside ubu bafite imyaka 30, ndetse n’abavutse nyuma yayo bose ari abari hanze n’abari mu gihugu, bagomba kumenya ko Igihugu kibategerejeho guhindura ubuzima bwacyo.

Ati “Icyo bivuze ni uko urwo rubyiruko rufite uko rwarezwe mu miryango, ndetse n’uko barezwe n’Igihugu mu buryo bwa Politiki, ibyo bibaha inshingano zo kugira uruhare runini rwo kubaka Igihugu mu myaka 30 yindi iri imbere. Bafite uruhare runini rwo guhindura ubuzima bw’Abanyawrwanda kurusha uko ba twebwe babigenje, bakwiye kubyumva batyo”.

Perezida Kagame yibukije urubyiruko ko ibyo rugomba kurwanya rubizi, bagomba kubihera ku mateka y’Igihugu cy’u Rwanda, ibindi ni bituruka hanze y’Igihugu bishobora gusubiza u Rwanda n’Abanyarwanda inyuma.

Ati “Bagomba kubyumva ku buryo bitatubuza kubaka Igihugu uko bikwiye. Urwo rubyiruko cyane cyane ni bo mbwira. Mugomba kumva uburemere bw’inshingano zanyu nk’abanyagihugu, nk’abantu. Mukwiriye kuba abantu bazima, mwiyubaka, bakubaka imiryango yabo, bakubaka n’Igihugu.”

Yibukije urubyiruko ko kugira ngo ibyo ubisohoze neza, icya mbere nta mpamvu n’imwe ikwiye kukubuza uwo ugomba kuba we, ugomba kurwanira uwo uri we ndetse.

Perezida Kagame yavuze ko aho u Rwanda rwavuye n’aho rushaka kujya, bikwiye kuba bishingiye mu mitima y’Abanyarwanda.

Umukuru w’Igihugu yavuze ko aho bashobora kujya hose bazasanga hariyo ibibazo, bityo ko bakwiye kwicara bagashakira umuti ibyabo, aho kubihungira aho bizeye ko batazabisanga kandi hose hari ibibazo.

Amafoto: Eric Ruzindana

Inama y’Igihugu y’Umushyikirano ibaye ku nshuro ya 19

Umukuru w’Igihugu ni we utumiza, akanagena abitabira inama y’Igihugu y’Umushyikirano ndetse akanayiyobora, aho imyanzuro yayo ishyikirizwa inzego zibishinzwe, kugira ngo zirusheho gutunganya imirimo zikorera abaturage.

Ikindi ni uko iteka rya Perezida wa Repubulika, rishobora guteganya ibindi byerekeye inama y’Igihugu y’umushyikirano.

Inama y’Igihugu y’Umushyikirano yabaye bwa mbere mu 2003, hakaba hari gahunda nyinshi zitandukanye zagiye zihindura ubuzima n’imibereho by’abaturage, harimo nka gahunda ya Girinka, Umurenge Sacco n’izindi gahunda zitandukanye.

Iyi nama y’Igihugu y’umushyikirano yaherukaga kuba ku nshuro ya 18 kuva ku ya 27 kugera ku ya 28 Gashyantare 2023, muri Kigali Convention Centre, iyoborwa na Perezida wa Repubulika, Paul Kagame.

Iyi nama yabaye umwanya wo gusuzuma aho gahunda za Leta zigeze zishyirwa mu bikorwa, no gufata ingamba zo kurushaho kwihutisha iterambere.

Ibiganiro byatanzwe byibanze ku byavuye mu Ibarura Rusange rya Gatanu ry’Abaturage n’Imiturire ryo mu 2022, guteza imbere ibikorwa by’ubumwe n’ubwiyunge bwubakiye ku muryango, no kubaka umuryango ushoboye kandi utekanye.

Nyuma y’ibyo biganiro ndetse no kungurana ibitekerezo, hafashwe imyanzuro igera kuri 13 ikubiye mu byiciro bitanu aribyo; urwego rw’Ubukungu, Uburezi, Ubuzima, Imibereho myiza n’Uburere mboneragihugu.

Muri iyo myanzuro harimo kunoza ingamba zo kongera umusaruro w’ibikomoka ku buhinzi n’ubworozi, gukemura vuba ikibazo cy’imodoka rusange zitwara abagenzi mu Mujyi wa Kigali, hagurwa izindi no kuvugurura gare z’imodoka ndetse no kongera imodoka zihuza imijyi itandukanye, hagendewe ku zikenerwa n’abagenerwabikorwa.

Hari kandi no kunoza imikorere ya One Stop Centre ya RDB, kugira ngo ihurize hamwe serivisi zose abantu bakenera, harimo n’izikenerwa n’abohereza ibicuruzwa mu mahanga, gukemura byihutirwa ibibazo bituma Internet idakora neza kandi ikiguzi cyayo kikaba gihenze, no kurushaho kunoza serivisi zitangwa n’Irembo no kongeramo izikenerwa zose.

Indi myanzuro yafashwe harimo gukomeza gufasha Abanyarwanda baba mu mahanga, gutanga umusanzu wabo mu iterambere ry’u Rwanda, gukomeza gushyira mu bikorwa ingamba zo guhangana n’izamuka ry’ibiciro.

Hari kandi gukemura ikibazo cy’ireme ry’uburezi mu byiciro byose by’amashuri, kugira ngo abarangiza kwiga bashobore guhangana n’ibibazo biri ku isoko ry’umurimo.

Naho mu rwego rw’ubuzima hari ugushyira mu bikorwa, mu gihe cy’imyaka ibiri, ingamba zo kurwanya igwingira ry’abana, kongera imbaraga mu gukumira indwara zitandura harimo kwisuzumisha hakiri kare, no kuvugurura ibikorwa remezo by’ubuvuzi, kongera umubare w’abakozi, kongera isuku ahatangirwa serivisi z’ubuvuzi, no kwakira neza abagana amavuriro.

Imyanzuro yafashwe mu rwego rw’imibereho myiza harimo gukomeza guteza imbere umuryango ushoboye kandi utekanye, mu gihe mu bijyanye n’uburere mboneragihugu hanzuwe ko hagomba gutezwa imbere ibikorwa by’ubumwe n’ubwiyunge, gukomeza kwigisha amateka, umuco n’indangagaciro nyakuri by’Igihugu, no kongera ingufu mu mikorere y’Itorero haba mu Rwanda no mu mahanga.

Inama y’Igihugu y’Umushyikirano itumizwa na Perezida wa Repubulika, igahuza Abanyarwanda bose, baba abari mu gihugu n’abaturuka hanze yacyo, kandi ikitabirwa n’inzego zose z’ubuyobozi bw’Igihugu.

Biteganyijwe ko n’ubundi nk’uko bisanzwe, Perezida Paul Kagame ari we uyifungura ku mugaragaro, akaza gutanga ijambo ry’ikaze ku bayitabiriye, anabagezeho uko Igihugu gihagaze.

Nyuma y’ijambo ry’Umukuru w’Igihugu, haraza gukurikiraho ikiganiro ku bukungu, kiza kwibanda ku kureba uko buhagaze mu nzego zitandukanye, n’icyakorwa kugira ngo birusheho kugenda neza, kiri buze kuba kirimo abarimo Minisitiri w’Imari n’igenamigambi, uw’Ubuhinzi n’Ubworozi n’uw’Ubuzima, kiyoborwe n’umuyobozi Mukuru wa RBA, Cleophas Barore.

Ku munsi wa kabiri ari na wo wa nyuma, Minisiteri y’Ubumwe bw’Abanyarwanda n’Inshingano mboneragihugu, izagaragaza ishusho y’u Rwanda n’Abanyarwanda mu nzira y’Ubumwe n’ubwiyunge, ikiganiro kizakurikirwa n’ikindi cyerekeranye n’uruhare rw’urubyiruko mu buyobozi n’ejo hazaza h’u Rwanda.

Hakazabaho gusangira ibitekerezo kw’abitabiriye inama, yaba mu cyumba irimo kuberamo cyangwa no hanze yacyo, yaba abari mu gihugu no hanze yacyo.

Bikabazakurikirwa n’ijambo rya Perezida Paul Kagame, risoza Inama y’Igihugu y’Umushyikirano ya 19.

Amafoto: Eric Ruzindana

Abantu batewe impungenge n’urubyiruko kuko rumaze kubatwa n’ibisindisha

Biteganyijwe ko i Kigali hazateranira Inama y’Igihugu y’Umushyikirano ya 19, guhera ku wa Kabiri tariki 23 kugera 24 Mutarama 2024, aho bimwe mu bizitabwaho by’ingenzi biza ku isonga harimo kurebera hamwe aho Igihugu kigeze mu kuzamura imibereho myiza y’Abanyarwanda no gushaka ibisubizo by’ibibazo byagaragaye.

Mu myanzuro 13 y’inama y’Igihugu y’umushikirano ya 18 yabaye muri Gashyantare 2023, uwa 12 wavugaga ko bagomba guteza imbere umuryango ushoboye kandi utekanye, aho by’umwihariko igika cyawo cya gatatu cyavugaga ko bagomba kongera ubukangurambaga bwo kwirinda ibisindisha no kurwanya ikoreshwa, ikwirakwiza n’icuruzwa ry’ibiyobyabwenge, n’icya kane kivuga ku gushyira mu bikorwa neza ibiteganyijwe n’amategeko abuza urubyiruko kunywa inzoga, kimwe n’ahana ikoreshwa ry’ibiyobyabwenge.

Ikibazo cy’urubyiruko rwugarijwe n’ibisindisha ndetse n’ikoreshwa ry’ibiyobyabwenge kandi kinagaragarira muri raporo zitandukanye zigaragaza ko ibibazo by’ubuzima bwo mu mutwe biri henshi mu gihugu, bijyanye n’amateka cyanyuzemo n’ubuzima bwa buri munsi bw’abaturage.

Imibare y’ibitaro bya Caraes Ndera igaragaza ko mu 2022/2023 bakiriye abantu 95,773, mu gihe muri 2021/2022 bari 96,357, ugereranyije na 74,363 bari bakiriye muri 2020/2021.
Bamwe mu baturage bavuga ko ikibazo cy’urubyiruko rwugarijwe n’ibisindisha ndetse n’ikoreshwa ry’ibiyobyabwenge kimaze gufata indi ntera, kubera ko umubare utari muto w’abari mu kigero cy’imyaka iri hagati ya 16 na 25 wamaze kubatwa nabyo.

Abo Kigali Today yashoboye kuganira na bo, batuye mu Turere twa Huye, Musanze, Bugesera ndetse no mu bice bitandukanye by’Umujyi wa Kigali, bayitangarije ko ari ikibazo gikomeye cyugarije cyane urubyiruko, kuko hari n’abakurizamo ingeso zirimo ubujura, ubusambanyi, no kwiyahura kuko abenshi baba ari abashomeri.

Hassan Nshimiyima wo mu Murenge wa Ngoma mu Karere ka Huye, avuga ko ikibazo cy’urubyiruko rwishora mu bisindisha n’ibiyobyabwenge giteye impungenge muri iki gihe.

Ati “Inzoga zariyongereye cyane mu rubyiruko, hari izo bita Dunda ubwonko, inzagwa baba bita ngo ni Umuneza, urubyiruko nirwo rubyivurugutamo cyane, ibiyobyabwenge nabyo babyishoramo cyane, tugereranyije n’imyaka yashize ubona byariyongereye, mbere ntabwo wababonaga, ariko wumve ko ubu nta n’ubwoba bakigira, kuko ubageraho rwose bakihagararira, ku buryo abo dufite barambura bakaniba, abo bita abamarine bo urahita bagahita bagufunga kaci, (Catch), bakakwambura.”

David Rogers wo mu Karere ka Musanze, avuga ko ibijyanye n’ibiyobyabwenge n’ibisindisha mu rubyiruko birimo kwiyongera cyane.

Ati “Jye mbona biri hejuru cyane, iwacu nabonye n’abakobwa basigaye barasaze ukuntu, wagira ngo abantu bose bagize ihungabana, sinzi ikibazo cyabaye muri iyi minsi, urubyiruko rwijanditse cyane mu biyobyabwenge, itabi, inzoga, n’abatarabinywaga urabona barimo ku byinjiramo, byabaye byinshi sinzi uko nabivuga, kuko Musanze isigaye iteye ubwoba, harimo icyitwa Mugo cyane, abana benshi barashize.”

Iby’urubyiruko rwugarijwe n’ibisindisha n’ikoreshwa ry’ibiyobyabwenge, binashimangirwa na raporo zitandukanye z’Urwego rw’Igihugu rw’Ubugenzacyaha (RIB) zigaragaza ko 70% by’abagana ibitaro bya Caraes Ndera ari urubyiruko.

Imibare ya RIB igaragaza ko muri 2018/2019 abakurikiranyweho icyaha cyo gukora, guhinga, guhindura, gutunda, kubika, guha undi, kugurisha mu gihugu ibiyobyabwenge cyangwa urusobe rw’imiti ikoreshwa nka byo, bari 6067.

Muri 2019/2020 iyo mibare yarazamutse igera 6759, mu gihe muri 2020/2021 bagabanutse bakagera kuri 5733, bongera kuzamuka muri 2021/2022 bagera kuri 6608.

Mu rwego rwo guhangana n’icyo kibazo, umwaka ushize wa 2023 Minisiteri y’Ubuzima (MINISANTE), yatangije ubukangurambaga burimo ubwo kurwanya inzoga by’umwihariko mu rubyiruko.

Ubwo yatangaga ubutumwa mu Ihuriro ry’urubyiruko ryahuriranye n’ubukangurambaga bwa #TunyweLess tariki 15 Ukuboza 2023, Madamu Jeannette Kagame, yavuga ko batakubaka Igihugu ngo hirengagizwe ubuzima bw’abagituye.

Yagize ati “Gukumira no kurandura burundu ikibazo cy’inzoga zikabije, ni ukurinda umutekano w’Umunyarwanda, umuryango we bwite ndetse n’umuryango mugari, ntabwo twakubaka Igihugu ngo twirengagize icyakwica ubuzima bw’abantu.”

Ubwo yari mu kiganiro Isesengura kuri RBA, Minisitiri w’Ubutegetsi bw’Igihugu Jean Claude Musabyimana, yavuze ko bashyize imbaraga mu kubaka umuryango ushoboye kandi utekanye, kuko iyo urangwamo amakimbirane, ariho hava ibibazo byinshi.

Ati “Kuyakumira n’inshingano dufite buri gihe, twatangiye ubukangurambaga bwo kugabanya ikoreshwa ry’inzoga cyane cyane mu rubyiruko, kubera ko inzoga zirarwangiza, twatangiye gahunda ya TunyweLess tuyigiramo uruhare mu buryo bunyuranye, tugerageza no gushyiraho uburyo bwo kugabanya amahirwe yo kurekura ibisindisha ngo bigere ku bantu benshi cyane, tugabanya amasaha yo ku bigurishaho”.

Akomeza agira ati “Nyuma ya saa saba z’ijoro twahisemo ko amaduka akingura atemerewe gutanga ibisindisha, tunashyiraho amabwiriza ajyanye no kubwira abantu bagurisha inzoga ko niba ubona umuntu yasinze ukamuha igisindisha uba ukora amakosa, harimo no gukumira ibiyobyabwenge, ku mipaka yacu twashyizeho uburyo bwo gukumira ibyinjira, cyane cyane ni kanyanga, urumogi n’ibindi bintu bitujuje ubuziranenge.”

Si mu Ntara gusa urubyiruko rwugarijwe n’ibisindisha n’ikoreshwa ry’ibiyobyabwenge, kubera ko n’abatuye mu Mujyi wa Kigali, bavuga ko nubwo hari amasaha ntarengwa yashyizweho ku bakora ubucuruzi bw’inzoga, abenshi mu rubyiruko basigaye bakorera ibirori, aho baba ntacyo bikanga ko gishobora kuburizamo ibikorwa byabo.

BRD ivuga ko uyu mushinga uzafasha ibi bigo kubona bus 120, maze bikazishyura ku nyungu ya 12% ku mwaka, mu gihe cy’imyaka 5.

Ibi bigo byahawe iyi nguzanyo ni RITCO, Remera Transport Cooperative, City Center Transport Cooperative, Nyabugogo Transport Cooperative hamwe na Jali Transport.
Twabibutsa ko ku wa gatanu w’icyumweru gishize, Umujyi wa Kigali wari watangaje ko haguzwe bus 100 zigahabwa ibigo 8 bizajya bitwara abagenzi mu mujyi wa Kigali.

Icyo gihe hari hanagaragajwe umubare w’imodoka buri kigo cyahawe aho Yahoo Car Express bavugaga ko ifite bisi 15, Remera Transport Cooperative ikagira bisi 10, Nyabugogo Transport Cooperative yo ikaba ifite bisi 10, City Centre Transport Cooperative ikaba ifitemo bisi 10 mu gihe S.UDire ct Services ifite bisi 5 naho Jali Transport ikagira bisi 13, 4G Ju Transport Ltd ikagira bisi 7 na RITCO ifitemo bisi 30.

Hagendewe ku bushakashatsi bwakozwe mu minsi yashize, umujyi wa Kigali wagaragaje ko hakenewe bisi 300 kugira ngo gahunda yo gutwara abantu n’ibintu irusheho kugenda neza.
BRD yatangaje ko yiteguye gutanga inguzanyo ku bashoramari babyifuza, ku kigero kingana na 70% bityo abakoresha bisi rusange bakarushaho kugenda neza, badatakaje umwanya kandi batekanye.

Iyi gahunda yo kongera imodoka zitwara abagenzi, ni umwe mu myanzuro y’inama y’igihugu y’umushyikirano yabaye umwaka wa 2023, aho hari hemejwe kugurwa bisi 300 ariko bikarangira hemejwe kugurwa bisi 200.

Bisi 100 muri izo zemejwe zamaze gushyikirizwa bene zo ndetse zanatangiye gutwara abagenzi mu mujyi wa Kigali, mu gihe izindi 100 zigera mu Rwanda bitarenze uku kwezi kwa mutarama 2024 nk’uko byatangajwe na Minisiteri y’ibikorwaremezo.

Biteganyijwe ko guhera tariki 23 kugera 24 Mutarama 2024, i Kagali hazaba hateraniye Inama y’Igihugu y’Umushyikirano, izaba irimo kuba ku nshuro yayo ya 19.

Umushyikirano ni urubuga Abanyarwanda baganiriramo iterambere ry’Igihugu, n’abayobozi bakabazwa inshingano zabo, uyu mwaka hakazasuzumwa aho Igihugu kigeze mu kuzamura imibereho myiza y’Abanyarwanda no gushaka ibisubizo by’ibibazo byagaragaye, ukazaba ari n’umwanya mwiza wo gutekereza ku rugendo rw’ubumwe n’ubudaheranwa bw’Abanyarwanda mu gihe hitegurwa kwibuka ku nshuro ya 30.

Kuba umushyikirano ari urubuga Abanyarwanda baganiriramo ibijyanye n’iterambere ry’Igihugu cyabo, niho bahera bavuga ko bishimira imyanzuro ifatirwamo, kuko iyo ishyizwe mu bikorwa birushaho kubafasha kwiteza imbere.

Mu nama y’Igihugu y’Umushyikirano ya 18 yabaye muri Gashyantare 2023, hafatiwemo imyanzuro 13, yarimo ujyanye no Kunoza imikorere ya One Stop Centre ya RDB, kugira ngo ihurize hamwe serivisi zose abacuruzi bakenera, harimo n’izikenerwa n’abohereza ibicuruzwa mu mahanga.

Ni umwanzuro wahise ushyirwa mu bikorwa, ibintu abakeneraga izo serivisi bavuga ko byarushijeho kuborohereza, kuko kuri ubu batagisiragizwa bajya gushaka serivisi imwe ku yindi ahantu hatandukanye, kuko byose babibonera muri iyo One Stop Centre.

Undi mwanzuro wari uwo kunoza ingamba zo kongera umusaruro w’ibikomoka ku buhinzi n’ubworozi, aho Minisiteri y’ubuhizi n’ubworozi (MINAGRI) igaragaza mu gihembwe cy’ihinga cya 2024 A, hitezwe ko umusaruro w’ibikomoka ku buhinzi uzikuba inshuro zigera kuri ebyiri, by’umwihariko ku gihingwa nk’ibigori.

Nta wavuga ku myanzuro yari yafatiwe mu Mushyikirano wa 18, ngo yirengagize ujyanye no gukemura vuba ikibazo cy’imodoka rusange zitwara abagenzi mu Mujyi wa Kigali, hagurwa izindi ndetse no kuvugurura gare no kongera imodoka zihuza Imijyi, aho ku ikubitiro Umujyi wa Kigali ku bufatanye n’inzego zifite aho zihuriye n’icyo kibazo, bamaze gushyira mu mihanda itandukanye imodoka rusange 100 zitwara abagenzi, mu rwego rwo koroherezaga abatindaga ku murongo, bikabaviramo gukererwa kugera ku kazi cyangwa mu ngo zabo.

Ni kuri ibyo bisubizo byavuye mu myanzuro y’inama y’Igihugu y’Umushyikirano ya 18, bamwe mu baganiriye na Kigali Today, baheraho bavuga ko izamuka ry’ibiciro rya hato na hato, ari kimwe mu bibazo by’ingutu byagaragaye mu mwaka ushize, bifuza ko byaganirwaho mu mushyikirano wa 19.

Alan Matsiko wo mu Murenge wa Kimironko, avuga ko yishimira ko imwe mu myanzuro yafatiwe mu mushyikirano uheruka yashyizwe mu bikorwa, bikaba byarabafashije, ari naho ahera asaba ko muri uyu umwaka ibijyanye n’izamuka ry’ibiciro byazahabwa umwanya bikahabwa umurongo.

Ati “Uyu munsi ikibazo gihari gikomeye, kuva uyu mwaka watangira, n’ushize, ni ibiciro bikomeje kuzamuka, ku buryo usanga nta muntu bitagoye, yaba ufite amikoro macye, n’ufite ahagije, usanga twese tuvunika iyo tugiye kw’isoko guhaha, ibiciro biragenda bizamuka buri munsi, ku buryo nibaza uko umuturage wo hasi abayeho. Numva Leta yagira icyo ibikoraho ikorohereza umuturage mu buryo bwo kubona ibintu bikenerwa buri munsi mu buryo bworoshye butabavuna, kuko imibereho y’umuturage ni ngombwa kugira ngo Igihugu gitere imbere.”

Mugenzi we wo mu Murenge wa Muhima ati: “Ujya ku isoko ufite ibihumbi bibiri ukabona birashize kandi n’ubundi ntacyo urabona mu byakujyanye, twifuza ko rwose mu mushyikirano ibintu by’izamuka ry’ibiciro, baramutse icyo kintu bakiganiriyeho, bakagiha umurongo, ku buryo ibiciro byagabanuka buri wese akibona ku isoko byazadufasha.”

Uretse ibijyanye n’izamuka ry’ibiciro, hari n’abifuza ko hazanaganirwa ku buryo hakongerwa abakozi mu bigo nderabuzima no mu mavuriro y’ibanze hakongerwa abakozi, kuko mu bice by’icyaro hari abagikora ingendo ndende bajya kwivuza banagerayo bagatinda kubona serivisi.

Ibindi bibazo birimo amakimbirane mu miryango, abana bata ishuri, na ruswa ikigaragara muri serivisi z’ubutaka.

Umusaruro w’amata wariyongereye ariko ibiciro byayo bikomeza kuzamuka

Imibare ya Minisiteri y’Ubuhinzi n’Ubworozi (MINAGRI) igaragaza ko 20% by’Abanyarwanda ari bo batabasha kwihaza mu biribwa, gusa mu rwego rwo guhangana ndetse no guhashya icyo kibazo, hari ingamba zitandukanye zagiye zifatwa, hagamijwe kongera umusaruro w’ibikomoka ku buhinzi.

Ikibazo cyo kongera umusaruro w’ibikomoka ku buhinzi cyanaganiriweho kinasohoka ari umwanzuro wa mbere, mu myanzuro 13 y’Inama y’Igihugu y’Umushyikirano ya 18, yateraniye i Kigali kuva tariki 27 kugera 28 Gashyantare 2023.

Uwo mwanzuro wavugaga ko hakwiye kunozwa ingamba zo kongera umusaruro w’ibikomoka ku buhinzi n’ubworozi harimo, Koroshya kubona inguzanyo zo guteza imbere ubuhinzi n’ubworozi, Gufasha aborozi kongera umukamo, Gushishikariza abahinzi n’aborozi kwitabira ubwishingizi bw’imyaka n’amatungo hamwe no gukemura ikibazo cy’udukoko n’indwara byangiza imyaka.

Muri iyo nama Minisitiri Musafiri yasabye ko ingengo y’imari ishyirwa mu buhinzi n’ubworozi yongerwa ikagera ku 10% y’ingengo y’imari y’Igihugu yose, ivuye kuri 8% yatangwaga, ubundi na bo bakayakoresha mu gutuma Abanyarwanda bihaza mu biribwa.

Mu rwego rwo kugera kuri iyo ntego, hafashwe ingamba zitandukanye zirimo kongera ubuso buhingwa, aho mu bice bitandukanye by’Igihugu ahari ubutaka budahingwa, basabwe kubuhinga cyangwa bugatizwa abashoboye kubuhinga mu rwego rwo kurushaho kububyaza umusaruro.

Hamwe mu hongerewe ubutaka bwo guhingaho ni mu Karere ka Bugesera, bongereye ubuso bugera kuri hegitari 700 ku zari zisanzwe zihingwa.

Ku bijyanye n’umusaruro w’ibikomoka ku bworozi nk’amata, MINAGRI igaragaza ko wiyongereye cyane, kubera ko nko muri 2005, mu Rwanda habonekaga litiro 142,500,000 ku mwaka, mu gihe uyu munsi zigeze kuri litiro zirengaho gato 1,060,000,000 aho byikubye inshuro hafi enye ku mata umunyarwanda anywa ku mwaka, kuko zavuye kuri litiro 20.5 zikagera kuri 78.7.

N’ubwo bimeze bityo ariko usanga ku isoko ibiciro by’amata n’ibiyakomokaho byaragiye byiyongera ugereranyije n’igiciro cyariho igihe amata yari macye, kuko mbere litiro y’amata mu bice by’Umujyi yari hagati y’amafaranga 250 na 300, mu gihe uyu munsi irimo kugura amafaranga 700 ku makaragiro atandukanye mu bice by’Imijyi.

Uretse amata y’amasukano yahenze n’akorwa n’uruganda Inyange yaguraga amafaranga 500 kuri ubu asigaye agura 800.

Si ku ruhande rw’ibikomoka ku bworozi gusa bigaragara ko umusaruro wagiye uzamuka, kubera ko n’iyo urebye no ku bikomoka ku buhinzi umusaruro wagiye uzamuka, kuko nko mu mwaka wa 2022 wari wazamutse ku gipimo cya 2%, muri 2021 byari 6%, naho 2020 byari 1%, mu gihe 2019 wazamutse ukagera kuri 5%.

Umusaruro w’ibikomoka ku buhinzi uzakomeza kuzamuka

By’umwihariko MINAGRI ivuga ko muri iki gihembwe cy’ihinga cya 2024 A hitezwe ko umusaruro w’ibikomoka ku buhinzi uzazamuka ukikuba inshuro zirenga ebyiri, ku musaruro usanzwe uboneka muri iki gihembwe, kubera ko mu bice bitandukanye by’Igihugu imvura yagiye igwa neza.

Kimwe mu bihingwa MINAGRI ivuga ko byitezwe ko umusaruro uzazamuka cyane ni ibigori, aho uziyongera ukagera kuri toni ziri hagati ya 650 na 800, uvuye kuri toni ziri hagati ya 350 na 400 wari uri ho.

Minisitiri Dr. Musafiri avuga ko kimwe mu byafashije mu kongera umusaruro w’ibikomoka ku buhinzi muri iki gihembwe cy’ihinga cya 2024 A, harimo kuvugurura uburyo ubuhinzi bukorwa mu nzuri.

Ati “Mbere amatungo yazengurukaga mu nzuri, bigatuma agira uburwayi akanatanga umukamo muke, ubu ngubu twaravuguruye, aho kera bahingaga 30%, ubu twarabihinduye, bemerewe guhinga 70%, ubworozi bugafata 30%, twarabitangiye binatuma umusaruro w’ibigori wiyongera ku buryo tuzarenza toni zirenga ibihumbi 600 muri uyu mwaka.”

Nubwo bimeze bityo ariko usanga ibiciro by’ibiribwa ku isoko byaragiye bizamuka cyane guhera mu mwaka wa 2020, ku buryo nko mu mwaka ushize wa 2023 hari aho mu Mujyi wa Kigali ikilo cy’ibirayi cyigeze kugera ku mafaranga y’u Rwanda 1500.

Mu kiganiro yagiranye na CNBC tariki 16 Mutarama 2024, ubwo yari mu Nama y’Ihuriro Mpuzamahanga ry’Ubukungu (World Economic Forum) yaberaga i Davos mu Busuwisi guhera tariki 15 kugera tariki 19 Mutarama 2024, Guverineri wa Banki Nkuru y’u Rwanda, John Rwangombwa, yavuze ko ubukungu bw’u Rwanda buzakomeza kuzamuka kugera ku gipimo cya 6,6% muri 2024, ubuhinzi n’ubworozi bikazabigiramo uruhare rukomeye.

Yagize ati “Uyu mwaka twiteze ko umusaruro w’ubuhinzi uzaba mwiza, kuko igihembwe cy’ihinga cya A cyagenze neza, kandi ubuhinzi bugira uruhare rukomeye mu bukungu atari mu kuzamura umusaruro mbumbe gusa, ahubwo no kuzamura ubushobozi bw’umuguzi ku baturage benshi bakora ubuhinzi, twiteze ko ubukungu bwacu buzakomeza kwihagararaho no gukomera muri uyu mwaka.”

Biteganyijwe ko muri uyu mwaka Inama y’Igihugu y’umushyikirano izaba guhera tariki 23 kugera 24 Mutarama 2024, aho izasuzuma aho Igihugu kigeze mu kuzamura imibereho myiza y’Abanyarwanda no gushaka ibisubizo by’ibibazo byagaragaye mu mwaka ushize, ukazaba ari n’umwanya mwiza wo gutekereza ku rugendo rw’ubumwe n’ubudaheranwa by’Abanyarwanda mu gihe begereza kwibuka ku nshuro ya 30.

Mu itangazo iyi minisiteri yasohoye mu kwezi k’Ugushyingo umwaka wa 2023, yari yavuze ko uko kwezi kurangira haje bisi 100. Icyo gihe 40 zari zamaze kuza hasigaye izindi 60.
Mu kiganiro Kigali Today yagiranye na Minisitiri w’ibikorwa remezo Jimmy Gasore, ku mugoroba wo ku munsi w’ejo, yavuze ko koko izo bisi zaje ndetse uyu munsi zitangira gukorera mu mihanda inyuranye zahawe.

Yagize ati: “Ni byo koko Bisi zaraje nk’uko twari twabivuze. Nyuma yaho habayeho kumenyesha abantu ko zihari, bityo abazifuza batangira gusaba kuzihabwa ngo bazikoreshe. Ibyo nabyo byarakozwe hakurikiraho gahunda yo kuzitanga, kuri uyu wagatanu turi bumurikire rubanda izo modoka, mumenye abazihawe n’aho zizajya zikorera”.

Iyi gahunda yo kongera imodoka ni umwe mu myanzuro yafatiwe mu nama y’igihugu y’umushyikirano, aho hagombaga kuza bisi 300 mu mezi atatu, nyuma biza kuba amezi atanu maze birangira abaye amezi hagati y’icyenda n’icumi kandi nabwo hakaba haraje imodoka 100 gusa, bitarenze mu mpera z’uku kwezi kwa mutarama 2024 hakazaza izindi 100 nk’uko byakomeje bigarukwaho na minisiteri y’ibikorwa remezo.

Inama y’Igihugu y’Umushyikirano yagarutse

Iryo tangazo rigira riti: “Uyu mwaka Inama y’Igihugu y’Umushyikirano izasuzuma aho Igihugu kigeze mu kuzamura imibereho myiza y’Abanyarwanda no gushaka ibisubizo by’ibibazo byagaragaye.”

Iyi nama kandi izaba umwanya mwiza wo kurebera hamwe urugendo rw’ubumwe n’ubudaheranwa by’Abanyarwanda mugihe u Rwanda rwitegura kwibuka ku nshuro ya 30, ndetse no guha urubyiruko ubushobozi bukenewe kugirango rukomeze kuba ku isonga mu iterambere rirambye.

Iyi nama y’Igihugu y’umushyikirano yaherukaga kuba ku nshuro ya 18 kuva ku ya 27 kugera ku ya 28 Gashyantare 2023, muri Kigali Convention Centre, iyoborwa na Perezida wa Repubulika, Paul Kagame.

Iyi nama yabaye umwanya wo gusuzuma aho gahunda za Leta zigeze zishyirwa mu bikorwa no gufata ingamba zo kurushaho kwihutisha iterambere.

Ibiganiro byatanzwe byibanze ku byavuye mu Ibarura Rusange rya Gatanu ry’Abaturage n’Imiturire ryo mu 2022, guteza imbere ibikorwa by’ubumwe n’ubwiyunge bwubakiye ku muryango no kubaka umuryango ushoboye kandi utekanye.

Nyuma y’ibyo biganiro ndetse no kungurana ibitekerezo, hafashwe imyanzuro igera kuri 13 ikubiye mu byiciro bitanu aribyo; Urwego rw’ubukungu, Uburezi, Ubuzima, Imibereho myiza n’Uburere mboneragihugu.

Muri iyo myanzuro harimo kunoza ingamba zo kongera umusaruro w’ibikomoka ku buhinzi n’ubworozi, gukemura vuba ikibazo cy’imodoka rusange zitwara abagenzi mu Mujyi wa Kigali, hagurwa izindi no kuvugurura gare z’imodoka ndetse no kongera imodoka zihuza imijyi itandukanye, hagendewe ku zikenerwa n’abagenerwabikorwa.

Hari kandi no kunoza imikorere ya One Stop Centre ya RDB kugira ngo ihurize hamwe serivisi zose abantu bakenera, harimo n’izikenerwa n’abohereza ibicuruzwa mu mahanga, gukemura byihutirwa ibibazo bituma interineti idakora neza kandi ikiguzi cyayo kikaba gihenze no kurushaho kunoza serivisi zitangwa n’Irembo no kongeramo izikenerwa zose.

Indi myanzuro yafashwe harimo gukomeza gufasha Abanyarwanda baba mu mahanga gutanga umusanzu wabo mu iterambere ry’u Rwanda, gukomeza gushyira mu bikorwa ingamba zo guhangana n’izamuka ry’ibiciro.

Mu burezi hari ugukemura ikibazo cy’ireme ry’uburezi mu byiciro byose by’amashuri kugira ngo abarangiza kwiga bashobore guhangana n’ibibazo biri ku isoko ry’umurimo.

Naho mu rwego rw’ubuzima hari ugushyira mu bikorwa, mu gihe cy’imyaka ibiri, ingamba zo kurwanya igwingira ry’abana, kongera imbaraga mu gukumira indwara zitandura harimo kwisuzumisha hakiri kare no kuvugurura ibikorwaremezo by’ubuvuzi, kongera umubare w’abakozi, kongera isuku ahatangirwa serivisi z’ubuvuzi no kwakira neza abagana amavuriro.

Imyanzuro yafashwe mu rwego rw’imibereho myiza ahrimo Glgukomeza guteza imbere umuryango ushoboye kandi utekanye, mugihe mu bijyanye n’uburere mboneragihugu hanzuwe ko hagomba gutezwa imbere ibikorwa by’ubumwe n’ubwiyunge, gukomeza kwigisha amateka, umuco n’indangagaciro nyakuri by’Igihugu no kongera ingufu mu mikorere y’Itorero haba mu Rwanda no mu mahanga.

Inama y’Igihugu y’Umushyikirano itumizwa na Perezida wa Repubulika, igahuza Abanyarwanda bose, baba abari mu gihugu n’abaturuka hanze yacyo, kandi ikitabirwa n’inzego zose z’ubuyobozi bw’Igihugu.