Dr Munyemana Sosthène

Ku wa Gatatu tariki 6 Werurwe 2024, nibwo itangazo ry’uru rukiko ryavugaga ko impande zose bireba ziburana kuri ubu busabe, hakemezwa niba afungurwa cyangwa afungwa.

Dr Munyemana Sosthène nyuma y’uko ahamijwe ibyaha bya Jenoside yajuririye iki cyemezo ndetse nyuma yaho asaba ko yafungurwa mu gihe ataraburana ubujurire bwe.

Dr Munyemana yaburanye mu mpera z’umwaka wa 2023, ku byaha yaregwaga bya Jenoside, ibyibasiye inyokomuntu n’ibindi bifitanye isano na Jenoside yakoreye i Tumba muri Huye mu 1994. Icyo gihe nyuma yo kumva abatangabuhamya batandukanye yahamijwe ibyaha, akatirwa gufungwa imyaka 24.

Biteganyijwe ko azabuburana ubujurire bwe mu mwaka utaha wa 2025 nk’uko byagarutsweho n’umwe mu bunganiraga abaregera indishyi muri uru rubanza, Me Gisagara Richard.

Ati: “Nkurikije gahunda y’inkiko za hano mu Bufaransa, ubu bujurire buzaburanwa nko muri 2025, kuko umwaka wa 2024 ufite imanza ebyiri zihateganyijwe kandi uru rukiko rukaba ruburanisha imanza ebyiri zonyine ku mwaka".

Me Gisagara ufite uburambe mu kunganira abaregera indishyi mu manza z’abasize bakoze Jenoside mu Rwanda zibera hanze y’u Rwanda, ubwo yaganiraga na Kigali Today mu mpera z’icyumweru gishize ubwo hasohokaga itangazo ko hagiye gusuzumwa ubusabe bwa Dr Munyemana washakaga gufungurwa, yari yavuze ko bitashoboka ashingiye ku kuba nta mpamvu ihari.

Me Gisagara icyo gihe yasobanuraga ko kuri we abona nta mpamvu n’imwe yatuma afungurwa. Ati: “Mu bantu bamaze kuburanishwa ku byaha nk’ibi mu bihe bitandukanye ndetse bagakatirwa kubera kugira uruhare mu iyicwa ry’Abatutsi ibihumbi cyangwa magana, nta n’umwe urahamywa ibyaha narangiza ngo asabe kuburana adafunze, urukiko rubimwemerere".

Yavugaga ko ibi bihabwa umuntu urwaye, kandi we nta burwayi agaragaza afite bwatuma adafungwa, kuba mu gihe amaze afunze ataburana atarigeze agaragaza ko uburenganzira bwe bwavogerewe, icya gatatu gikomeye akaba ari uko icyaha yahamijwe n’urukiko ari icyaha gikomeye.

Dr Munyemana Sosthène

Itangazo ryasohotse ku mugoroba wo ku wa Kane tariki 29 Gashyantare 2024, rivuga ko impande bireba zigiye kongera guhurira mu rubanza, hasuzumwa niba Dr Munyemana, yakwemererwa kuburana ari hanze.

Ibi bizaburanwa tariki 6 Werurwe 2024, mu Rugereko rw’Urukiko rw’Ubujurire rwa Paris ruherereye mu Bufaransa.

Umwe mu bunganira abaregera indishyi muri uru rubanza, Me Gisagara Richard, aganira na Kigali Today, mu busesenguzi bwe, yatangaje ko nubwo bishoboka ko yabyemererwa ariko ko bigoranye cyane, kuko nta mpamvu zikomeye zihari zashingirwaho n’urukiko mu kwemerera Dr Munyemana kuburana ari hanze.

Me Gisagara ufite uburambe mu kunganira abaregera indishyi mu manza z’abasize bakoze Jenoside mu Rwanda zibera hanze y’u Rwanda, yagize ati: “Usibye Muhayimana Claude wakoreye Jenoside ku Kibuye, agahabwa igifungo cy’imyaka 14, ni we wemerewe gusohoka mbere y’uko urukiko rumuha itariki yo kuburana ubujurire bwe. Undi wabyemerewe ni Bucyibaruta Laurent wari Perefe wa Gikongoro, kubera impamvu z’uburwayi. Kuri Munyemana rero sinabyemeza ko urukiko rwabimwemerera kuko impamvu zikomeye nk’izo z’uburwayi ntazo afite”.

Akomeza avuga ko biramutse bibaye byaba ari ubwa mbere bibaye kuko nta wundi byigeze bikorerwa bitewe n’impamvu zindi runaka.

Ashimangira ko Dr Munyemana atabihabwa kuko nta burwayi agaragaza afite bwatuma adafungwa, kuba mu gihe amaze afunze ataburana atarigeze agaragaza ko uburenganzira bwe bwavogerewe, icya gatatu gikomeye akaba ari uko icyaha yahamijwe n’urukiko ari icyaha gikomeye.

Me Gisagara asobanura ko kugeza uyu munsi kuri we abona nta mpamvu n’imwe yatuma afungurwa. Ati: “Mu bantu bamaze kuburanishwa ku byaha nk’ibi mu bihe bitandukanye ndetse bagakatirwa kubera kugira uruhare mu iyicwa ry’Abatutsi ibihumbi cyangwa Magana, nta n’umwe urahamywa ibyaha narangiza ngo asabe kuburana adafunze, urukiko rubimwemerere”.

Tariki 20 Ukuboza 2023, Dr Munyemana Sosthène nibwo yahamijwe ibyaha bitatu, ahanishwa gufungwa imyaka 24, nyuma tariki 28 Ukuboza 2023, bitangazwa ko yajuririye icyemezo cy’urukiko rwamuburanishije.

Me Gisagara avuga ko urubanza ku bujurire buzaburanwa nko muri 2025, kuko uyu mwaka wa 2024 ufite imanza ebyiri zihateganyijwe kandi uru rukiko rwa rubanda rukaba ruburanisha imanza ebyiri zonyine ku mwaka.

Dr Munyemana Sosthène

Si Dr Munyemana wajuriye gusa, kuko n’Ubushinjacyaha bw’Urukiko rwa Rubanda rw’i Paris mu Bufaransa bwahise bujurira, bitangazwa ku wa 28 Ukuboza 2023, ndetse ko yaba abunganira Dr Munyemana n’ubushinjacyaha, ngo batigeze bishimira imikirize y’urubanza.

Ubu bujurire buje bukurikira umwanzuro wafashwe n’Urukiko rwa Rubanda ruherereye i Paris mu Bufaransa rwategetse ko Dr Munyemana Sosthène uzwi nk’umubazi w’i Tumba afungwa imyaka 24, nyuma yo kumuhamya ibyaha bya Jenoside yakorewe Abatutsi. Ni mugihe we yaraburanye ahakana ibyaha.

Umwe mu bunganira abaregera indishyi muri uru rubanza Me Richard Gisagara aganira na KT Radio yatangaje ko abunganira Munyemana aribo batanze ubujurire kuko batanyuzwe n’imikirize y’urubanza.

Yagize ati: "Abunganira Munyemana nibo batanze ubujurire kuko batishimiye imikirize y’urubanza, ntabwo bitangaje kuberako baburanye bahakana icyaha burundu batanasaba wenda ko igihano cyakoroha ariko basaba ko bamuhanaguraho icyaha burundu."

Ubushinjacyaha bwari bwamusabiye guhamywa n’ibyaha bumukurikiranyeho birimo ibyaha bya Jenoside yakorewe Abatutsi, ibyaha byibasiye inyokomuntu ndetse n’ubwinjiracyaha muri icyo cyaha.

Me Gisagara yavuze kandi ko n’ubushinjacyaha bwajuriye hakaba hategerejwe igihe cyo guhamagarwa kugirango batangire kuburana mu bujurire.

Me Gisagara agaruka ku mpamvu ubushinjacyaha nabwo bwajuriye, yasobanuye ko mu Bufaransa iyo uwahamijwe icyaha ajuririye n’ubushinjacyaha nabwo buhita bujurira kugirango harebwe uburyo basaba igihano kisumbuye kurushaho.

Yagize ati: "Mu Bufaransa iyo umuntu icyaha gihamye ajuriye, n’ubushinjacyaha burajurira. Kuberako mu mategako iyo ubushinjacyaha budatanze ubujurire, urukiko rw’ubujurire ruziga urubanza rushyashya kandi rukarwiga hari ubujurire bw’uwashinjwe icyaha ariwe ujuriye wenyine, urukiko rw’ubujurire ntirushobora kuzamura ibihano ngo rubigeze hejuru, rushobora kubigabanya cyangwa rukabigumishaho uko byatanzwe."

Me Gisagara yakomeje avuga ko kandi nta bimenyetso bishyashya ubushinjacyaha bwagaragaje butanga ubu ujurire kuko ibyo bwari bufite byose bwarabitanze, uretse kuba wenda butaranyuzwe n’uburyo urukiko rwabyakiriye.

Ati: "Ubushinjacyaha bwari rwasabye bwasabye imyaka 30, noneho urukiko rutanga itageze kuri 30, nayo n’impamvu ihagije kugirango ubushinjacyaha bujurire."

Me Richard Gisagara

Yavuze ko uruhande rw’ubushinjacyaha ku bujurire bwatanze bwumvikana kubera ko icyaha cyo gucura umugambi wo gukora jenoside bikaba ari ubwa mbere gihamye umuntu mu Bufaransa bityo ko imyaka Munyemana Sosthène yakatiwe usanga idahagije bikaba byatuma habaho ubujurire.

Me Gisagara avuga ko icyaha cyahamijwe Munyemana cyo gucura umugambi wo gukora Jenoside akaba ari nabwo bwa mbere cyari gihamijwe umuntu Bufaransa ubusazwe urukiko rumukatira igihano kiri hejuru, ndetse mu matageko y’u Bufaransa kikaba gihanishwa igihano cya burundu.

Ati: "Ubundi itegeko riteganya igihano kiri hejuru, noneho urukiko rukagenda rukigena bitewe n’impamvu nyinshi, zirimo kuba rwabonye umuntu ashaje... cyangwa se rwabonye mu myiregurire ye hari impamvu nyoroshyacyaha bashobora kubona. Hari ibintu byinshi bashobora kugenderaho badatanga igihano nk’uko giteganyijwe n’amategeko."

Yungamo agira ati: "Mu mategeko y’u Bufaransa, igihano bateganya ni ikiri hejuru gusa ariko urukiko nirwo rugenda rwemeza kuko ntabwo ruba rufite ububasha bwo kugera ku gihano cyo hejuru. Hqnyuma icyaha cyo gucura umugambi wo gukora Jenoside gihanishwa igihano cya burundu mu Bufaransa."

Nk’umuntu ufite uburambe mu kunganira Abarokotse Jenoside mu 1994, mu manza cyane cyane zibera hanze y’u Rwanda, Me Gisagara, yavuze ko ubu bujurire buzaburanwa nko muri 2025, kuko umwaka wa 2024 ufite imanza ebyiri zihateganyijwe kandi uru rukiko rukaba ruburanisha imanza ebyiri zonyine ku mwaka.

Dr Munyemana Sosthène uzwi ku izina ry’ umubazi w’i Tumba (Le boucher de Tumba) yagize uruhare rukomeye muri Jenoside yakorewe Abatutsi mu Murenge wa Tumba (Huye) no mu yahoze ari Perefegitura ya Butare muri rusange.

Dr Munyemana yatangiye kuburanishwa ku wa 13 Ukuboza 2023, urubanza rwe rukaba rwari rubaye urwa Gatandatu u Bufaransa bukurikiranyeho Abanyarwanda bakekwaho uruhare muri Jenoside yakorewe Abatutsi.

Dr Munyemana Sosthène

Ni ibyaha yari amaze hafi amezi abiri akurikiranyweho n’Ubushinjacyaha, mu rukiko rwa rubanda rw’i Paris mu Bufaransa, akaba yarabikoreye i Tumba mu Karere ka Huye mu Majyepfo y’u Rwanda.

Mbere y’uko akatirwa imyaka 24, abari basanzwe bitabira urubanza hafi ya bose bari bahari, intebe zuzuye, harimo Abashinjacyaha bombi, abunganira abaregera indishyi, ndetse n’abunganira Munyemana bombi.

Inteko yiherereye mu gihe cy’amasaha hafi 24 ngo hafatwe umwanzuro, ayo masaha arangiye, Perezida w’urukiko yasabye Dr Munyemana guhagarara imbere y’urukiko, maze ahamywa ibyaha bya Jenoside n’ibyaha byibasiye inyokomuntu.

Dr Munyemana yaje mu rukiko mu gitondo cyo ku wa Kabiri aherekejwe n’umugore we. Ubwo Inteko yari mu mwiherero, Perezida w’Urukiko yasabye ko acungirwa umutekano aho yari ari mu rukiko kugira ngo atagira ahantu na hamwe ajya.

Akimara gukatirwa, yahobereye umugore n’umwana we, nyuma asanga Abajandarume bamwambika amapingu, baramujyana, abari mu rukiko barasohoka barataha.

Muri iyo myaka 24, ashobora gusaba kurekurwa cyangwa koroherezwa ukundi, ariko ntabwo yabikora mbere yo gufungwa byibura imyaka 8.

Perezida w’urukiko yashimiye inyangamugayo ku gihe zari zimaze mu rubanza ndetse n’abandi bose batanze umusanzu wabo.

Kuba Munyemana akatiwe n’urukiko, biri mu bizashimisha abo yahemukiye n’umuryango nyarwanda muri rusange.

Abatangabuhamya batandukanye bagiye batanga ubuhamya bumushinja ku kuba atarakoresheje ububasha yari afite mu gihe cya Jenoside ngo akize Abatutsi ahubwo ko yahisemo guhemuka, by’umwihariko ku kurimbura Abatutsi bahungiye kuri Segiteri Tumba, yari afitiye urufunguzo.

Munyemana n’umugore we ubwo bazaga mu rukiko gusomerwa

Mu magambo ya Munyemana, mbere y’uko akatirwa, yari yagize ati: "Banyakubahwa Bacamanza namwe Nyagamugayo mbanje kubashimira. Nsabye imbabazi niba hari aho naba ntaritwaye neza muri iyi minsi y’urubanza.”

“Sinagira icyo mvuga ntabanje kwihanganisha ababuze abantu bose muri Jenoside, nifatanyije na bo. Nihanganishije kandi abo mu muryango wanjye babuze ababo muri Jenoside, bamwe nkaba ntarabashije no kujya ku kiriyo no gushyingura ababo.”

Yakomeje agira ati: "Ndashimira umuryango wanjye mpereye ku mugore wanjye n’abana, n’abanshyigikiye bose barimo abanyunganiye mu mategeko bambaye hafi, iyo batabaho mba narashengutse umutima".

“Banyakubahwa bacamanza, nimujya kuncira urubanza, mutekereze ku kinsubiza icyubahiro, ku gisubiza icyubahiro igihugu cyanjye n’ikiremwa muntu. Ngiryo ijambo ryanjye rya nyuma kuri uru rubanza, Murakoze".

Madame Daphroza Gauthier wakurikiye uru rubanza kuva mu ntangiriro, yavuze ko Munyemana yagiye aho yari akwiye kujya. Ati: "Mu by’ukuri Munyemana agiye aho yagombaga kujya muri iyi myaka 29 yose ishize, ari hanze akora, abana n’umuryango we, n’ubwo byatinze ariko agiye aho yagombaga kuba yaragiye kera".

Madame Gauthier akomeza avuga ko kuba Ubushinjacyaha bwari bwaramusabiye gufugwa imyaka 30 akaba yahawe 24, ntacyo bitwaye, igikuru ari uko yahaniwe ibyo yasize akoreye Abatutsi i Tumba.

Yabwiye abahemukiwe n’uyu mugabo ko nubwo imyaka yari ibaye myinshi, ariko ko byibura Ubutabera bw’u Bufaransa bukoze kuba bwemeye gutanga ubutabera ku bagizweho ingaruka n’ibikorwa bya Munyemana wananiwe gukoresha imbaraga ze ngo akize Abatutsi ahubwo akitabira inama zateguraga umugambi wo kubarimbura ndetse agashishikariza Interahamwe kwica Abatutsi, harimo n’abo yagiye avuga ko bakwiye kurongorwa.

Munyemana ni muntu ki?

Munyemana yavutse tariki ya 9 Ukwakira 1955, avukira i Mbare, Komini Musambira muri Gitarama. Ababyeyi be ni Kangabo Balthazar na Nyirahabimana Charlotte.

Arangije amasomo muri Kaminuza i Butare, yagiye gukomereza amashuri muri kaminuza ya Bordeaux II mu Bufaransa mu bijyanye no kuvura indwara z’abagore (Gynécologie).

Dr Munyemana n’umwunganizi we mu mategeko

Yaragarutse akora mu bitaro bya Kaminuza ari nako atanga amasomo muri Kaminuza y’u Rwanda, Ishami ry’Ubuvuzi. Mu gihe cya Jenoside yakorewe Abatutsi yari atuye muri Selire ya Gitwa i Tumba. Yashakanye na Muhongayire Fébronie, babyarana abana batatu.

Itangazo ryashyizwe ahagaragara na CNLG rivuga ko muri Jenoside, umugore we atari mu Rwanda ahubwo yari mu Bufaransa.

CNLG yavugaga ko Munyemana we avuga ko yari muri konji guhera tariki 29 Werurwe kugera 9 Gicurasi 1994, ibi bikaba byaramuhaye umwanya uhagije wo gukora Jenoside.

Mu 1995 Umuryango Collectif Girondin pour le Rwanda” na “International Federation for Human Rights” (FIDH), zatanze ikirego kivuga ku ruhare rwe muri Jenoside, inkiko zigisuzuma muri 2001.

Nyuma yaho u Rwanda rwatanze impapuro zimufata, ashyirwa ku rutonde rwa Interpol guhera mu 2006. Muri 2008 yimwe sitati y’ubuhunzi naho tariki ya 16 Mutarama 2011 hemejwe ko akurikiranwa ku cyaha cya Jenoside (mis en examen pour Génocide), yamburwa urwandiko rw’inzira ndetse ategekwa kwitaba no gusinya kuri “gendarmerie” buri gihe.

Mu 2010 u Rwanda rwasabye ko yoherezwa mu Rwanda ariko u Bufaransa buranga, akaba ari na bwo bwamuburanishije kuva tariki 13 Ugushyingo kugeza tariki 20 Ukuboza 2023.

Dr Sosthène Munyemana

Mbere y’uko habaho umwiherero wabagize inteko iburanisha, Dr Munyemana Sosthène uzwi ku izina ry’umubazi w’i Tumba yabanje guhabwa umwanya ngo agire icyo avuga nyuma y’ibyaha ashinjwa ndetse n’umwanzuro w’urukiko.

Yagize ati: "Banyakubahwa Bacamanza namwe Nyagamugayo mbanje kubashimira. Nsabye imbabazi niba hari aho naba nta ritwaye neza muri iyi minsi y’urubanza.

Sinagira icyo mvuga ntabanje kwihanganisha ababuze abantu bose muri Jenoside, nifatanyije na bo. Nihanganishije kandi abo muri famille yanjye babuze ababo muri Jenocide, bamwe nkaba ntarabashije no kujya ku kiriyo no gushyingura ababo".

Yakomeje agira ati: "Ndashimira umuryango wanjye mpereye ku mugore wanjye n’abana, n’abanshyigiye bose barimo abanyunganiye mu mategeko bambaye hafi, iyo batabaho mba narashengutse umutima".

Banyakubahwa bacamanza, nimujya kuncira urubanza, mutekereze ku kinsubiza icyubahiro, ku gisubiza igihugu cyanjye n’ikiremwa muntu . Ngiryo ijambo ryanjye rya nyuma kuri uru rubanza, Murakoze".

Nyuma y’ijambo rye Perezidante w’urukiko yahise asaba abari mu rukiko gusohoka kuko inteko yari igiye kwiherera.

Munyemana we ntabwo yemerewe gusohoka mu rukiko, ahubwo ushinzwe umutekano yasabwe ku wumucungira aho yari ari.

Munyemana akurikiranyweho ibyaha bya Jenoside, ibyaha byibasiye inyokomuntu n’ubufatanyacyaha muri ibyo byaha.

Dr Sosthène Munyemana

Ibi byagarutsweho mu gitondo cyo kuri uyu wa Mbere, tariki 18 Ukuboza 2023, mu rukiko rwa rubanda rwa Paris mu Bufaransa.

Umushinjacyaha yagaragaje ko Munyemana, yagiye agerageza gutanga ibisobanuro bisa n’ibijijisha, akavuga ko gufungirana abantu muri segiteri byari ugutuma abantu babona aho bihisha abicanyi. Yasabye Inyangamugayo mu bushishozi bwazo kuumva icyo bisobanuye.
Hagarutswe ku itariki 7 Mata 1994 aho Munyemana yitabiriye inama, akanayitangamo ibitekerezo afasha gukwirakakwiza impuha ko inkotanyi zacengeye mu gihugu, ko zateye zishaka kubabuza umutekano, ko abantu bagomba kwirwanaho.

Ngo ayo magambo yatumye benshi bitabira ubwicanyi, cyane ko Munyemana wabivugaga ari umuntu wari wubashywe nk’umunyabwenge, umuganga uzwi, umwarimu wa kaminuza n’ibindi.

Umushinjacyaha yavuze ko i Tumba kugeza uyu munsi, abenshi mu bakoze Jenoside n’ahandi babuze abababashinja kandi barakoze ubwicanyi, bamwe baburiwe irengero, abandi baracyashakishwa, ariko ngo ibyo byose ntibikuraho ko jenoside yabaye, yakorewe ubwoko kandi ikaba ihereye mu nzego zo hasi nta na hamwe hasigaye. Umushinjacyaha yavuze ibi asobanurira inyangaugayo n’umucamanza muri rusange ko ababonetse kandi babigizemo uruhare bagomba guhanwa.

Mu nama ya tariki 7 Mata, Munyemana yemera ko yatoranyinjwe n’abaturage ngo abe muri komite ya Segiteri y’umutekano.Iyo nama yayobowe na konseye Bwanakeye.

Umushinjacyaha yagaragaje ko iyo komite atari umwihariko wa Tumba gusa kuko usanga zari zarashyizweho muri Ngoma yose ndetse no mu gihugu hose, zishinzwe gutegeka icyo Abatutsi bafashwe bakorerwa, gusahura, guhiga abatutsi, kumenya abatarapfa, gutema ibihuru ngo batihishamo, guhemba abicanyi, kubagabanya ibyasahuwe, no kwegera abayobozi ngo babagaragarize aho bageze bica ngo babatere inkunga muri uwo mugambi kugira ngo igikorwa kizagende uko cyateguwe nta kibyitambitsemo.

Mu Cyumweru gishize Dr Munyemana, mu ibazwe rye yavuze yemeje ko azi ko amarondo yakorwaga hafi y’iwe na Segiteri n’icyo yakoraga. Laurien Ntezimana ubwo yatangaga ubuhamya yabasobanuriye akamaro k’amarondo na Bariyeri ko katari ako guhangana n’inyenzi nk’uko abaturage babeshywaga, ahubwo byari ugufata Abatutsi no kubica, hakaba n’ahantu ho kugira inama y’ibikorwa byo kwica.

Icyo gihe Ntezimana yasobanuye ko ababaga muri izo komite babaga ari abantu ubwabo bafitiwe ikizere kandi bari mu mugambi umwe n’ibiri gukorwa. Ababagamo bitwaga des ’’Insiders’’ (abo mu kizuriu, mu mbere, ku ibere.... NDLR). Kuba a Munyemana yari muri izo komite byumvikana uruhare rwe mu byo izo komite zakoze.

Abatangabuhamya batandukanye bagaragaje ko komite y’umutekano ya Tumba, yarimo abantu b’ibyihebe gusa kandi biri mu mugambi wo kwica, barimo abitwa Remera, Ruganzu, Mambo, Bwanakeye wari ufite umugore w’umututsi (byasaga no kwigura) n’abandi.

Komite y’umutekano yari ishinzwe kugenzurea uko ubwicanyi bukorwa no kubushyigikira, Kureba udashyigikiye ubwicanyi bakamenya ko ari umwanzi, kureba uko ubwicanyi bukorwa, kwihutisha Jenoside kuko FPR yarushagaho kubasatira, kumenya uko amarondo na za Bariyeri bikora kuko byari mu bikoresho by’ibanze byifashishwaga mu kuvumbura no kwica abatutsi.

Ibyo kandi byashimangiwe n’abashakashatsi aho bavuze ko ayo marondo yabaga anafite ibikoresho birimo imbunda, Abatutsi bayafatirwagaho n’ababaga badafite amarangamuntu bahitaga bicwa cyangwa bakajya kwicirwa ahabugenewe.

Munyemana yashinjwe n’abatangabuhamya gutanga amabwiriza yatumye abagore bafatwa ku ngufu bafatiwe ku mabariyeri, bitanzweho amabwiriza n’abayoboraga icyo gihe kandi ko badashidikanye uruhare rwe kuko na we yari umuyobozi uvuga rikumvikana.

Umushinjacyaha yagarutse ku buhamya bw’umwe mu batangabuhamywa 67 bumviswe muri uru rubanza, wavuze ko yafashwe ku ngufu inshuro nyinshi ubwo Munyemana yavugaga ngo abagore n’abakobwa bakuze bafatwa ku ngufu batiriwe babajyana kuri Segiteri. Akenshi ngo byabaga ari uguhemba abicanyi kuko bakomeje akazi kabo neza.

Bivugwa ko habayeho ibijyanye no kuvuga ko abagore n’abana babanza kubabarirwa ariko nyuma baza kwicwa bitewe n’igihe abayobozi babaga babishakiye.

Umushinjacyaha yagaragaje ko ubwo Dr Munyemana yabazwaga n’abakoraga anketi yatangiye yemeza ko ari we wenyine wagiraga urufunguzo rwa Segiteri, ndetse ko abo yafungiragamo yagarukaga akabasanga uko yabasize.

Nyuma yaho yavuze ko bishoboka ko hari abandi babaga baragiraga urufunguzo, ko abishwe bavanywe muri Segiteri, avuga ko atari we wabafunguriraga bagiye kwicwa.

Umwe mu batangabuhamya muri uru rubanza kandi yavuze ko hari igihe yiboneye Munyemana aza kuri Segiteri aza agafungura ahari hafungiye Abatutsi, maze abari hagati ya 60 na 70 batwarwa n’abicanyi bajya Kubica.

Umushinjacyaha kandi yavuze ku itsinda ry’Abafatiwe ahitwa mu i Rango bakajyanwa kuri Segiteri ko nta n’umwe warokotse.
Kugeza uyu munsi umubare w’abageze kuri Segiteri ntabwo uzwi gusa bose barishwe uretse uwitwa Vincent Kageruka.

Umushinjacyaha yavuze ko abo Dr Munyemana, yinjijemo ari 10 ku munsi wa mbere, n’abandi basaga 30 ku inshuro ya kabiri, ariko akaba ngo yarinjijemo abari hagati 30 na 50.

Dr Munyemana Sosthène uzwi ku izina ry’umubazi w’i Tumba, ashinjwa ibyaha bya Jenoside, ibyaha byibasiye inyokomuntu n’ubufatanyacyaha muri ibyo byaha.

Umushinjacyaha mu mwanya utari muto yafashe agiye gusabira igihano Munyemana yagize ati: ”Mu minsi 100 abagera kuri 200 barishwe muri Butare. Hari abakwibaza niba mu Rwanda cyangwa muri Butare harabaye Jenoside n’ibyaha byibasiye inyokomuntu, Igisubizo ni YEGO”.

Akomeza agira ati: ” Gutunga urufunguzo rwa Segiteri, kurufunguza Segiteri agafungiramo abantu ashobora gufungurira cyangwa ntabikore, kuba abafungiwemo baravuze ko nta burenganzira na bumwe bari bafite bwo gukora ikidategetswe na Munyemana, kuba hari abo yari gufasha nk’abarwayi ntabikore kandi ari umuganga, kuba yari afite ububasha ku bantu bose bari bafungiwe kuri Segiteri, byose ni bimwe mu bigaragaza uruhare rwa Munyemana muri Jenoside, ibyaha byibasiye inyokomuntu kuko yabaye ikiraro gihuza abicanyi n’abicwa kandi yabitekerejeho”.

Umushinjacyaha yavuze ko Munyemana, yagize ubufatanyacyaha ubwo yafungiranaga Abatutsi muri Segiteri nyuma bakoherezwa kuri Perefegitura, bakaza kwicwa uretse Kageruka wabacitse. Ikindi, kugira uruhare mu ishyirwaho rya za bariyeri ziciweho abantu, ndetse no kuba yaragiye ku marondo yishe abantu abandi bakaba barahungabanye kubera ibyo babonye cyangwa bakorewe.

Mu gusoza Umucamanza yagize ati: “Banyakubahwa bacamanza, twagaragaje igihamya ko Munyemana yagize uruhare muri Jenoside. Nyangamugayo, ahasigaye ni ahanyu, ububasha ni ubwanyu, umwanzuro n’uburyo muca uru rubanza biragaragaza icyo Ubutabera bw’Ubufaransa ari bwo. kuri ubu bubasha mufite bwo guca uru rubanza, ni n’umwanya wo guca umuco wo kudahana, kuzirikana Jenoside yakorewe Abatutsi mu Rwanda”.

Yakomeje agira ati: “Turamushinja uruhare rwe mu gutegura ndetse no gutera inkunga Jenoside. Munyemana yahisemo kugira urwo ruhare kandi ibyo yahisemo byasorejwe kuri Jenoside yahitanye abarenga ibihimbi 200 muri Butare. Turamushinja kwigarurira ubuyobozi bwa Tumba muri Jenoside bugaragaza ubuhangange bwe. Byasojwe no guhunga kwe ubwo FPR yatsindaga FAR, akajya muri Zaire agakomereza i Burayi. Bacamanza namwe Nyangamugayo, gucira urubanza Munyemana mukamuhamya ibyaha twagaragaje biri mu biganza byanyu. Tumusabiye igihano cyo gufungwa imyaka 30”.

Nyuma y’ibi ubushinjacyaha bwagarutse ku bantu nka Munyemana bagize uruhare muri Jenoside, bahamwe n’ibyo byaha, bahabwa ibihano bitandukanye birimo gufungwa burundu, imyaka itandukanye, abo barimo abitwa:
1. Pascal Simbikangwa (inzego z’ubutasi)
2. Ngenzi O. na T. Barahira
3. Claude Muhayimana (chauffeur ku Kibuye)
4. Laurent Bucyibaruta (Perefe Gikongoro)
5. Philippe Hategekimana (Gendarme i Nyanza).

Ubushinjacyaha bwabwiye urukiko ko igihano bamuha kimukwiye ari bo bakizi bakurikije ibyo yakoze bafitiye ibimenyetso hagamijwe guha agaciro ubuzima bwa muntu, hanashingiye ko uwari gukiza abantu yagize uruhare umu kubarimbura.

Bwasabye urukiko kutita ku myaka ye, igihe urubanza rumaze n’imyaka Jenoside imaze ibaye, kuko kumuhana ari umwanya wo gutuma atekereza ku byo yakoze, no gutuma abo yatumye Babura ababo baruhuka kuko ubutabera buba bwakoze akazi kabwo.

Jenoside yakorewe Abatutsi mu Rwanda yahitanye abasaga Miliyoni imwe, nyamara hari abakomeje kuyipfobya no kuyihakana

Ibi ni ibyakomojweho mu gihe hakomeje urubanza rwa Dr. Munyemana Sosthène ushinjwa kugira uruhare muri Jenoside yakorewe Abatutsi mu Rwanda mu 1994, mu gihe cya Jenoside akaba yari umuganga w’abagore mu Bitaro bya Kaminuza i Butare.

Perezida wa IBUKA mu Bufaransa, Marcel Kabanda, yagize byinshi agaragaza kuva batangira kugira uruhare mu manza nk’izi, ndetse agaragaza imbogamizi babonamo ndetse n’ibyakosorwa kugira ngo ubutabera butangwe byuzuye kandi mu gihe gikwiye.

Yavuze ko IBUKA France, itangaza ko yinjiye mu byo gukurikirana abashinjwa kugira uruhare muri Jenoside ku rubanza rwa kabiri rwari rwerekeye ba Burugumesitiri ba Kabarondo, Tito Barahira na Ngenzi Octavien.

Perezida wa IBUKA mu Bufaransa, Marcel Kabanda, yavuze ko iburanisha ry’imanza ku bakurikiranyweho kugira uruhare muri Jenoside yakorewe Abatutsi ryatinze kuko byasabye imyaka 20 kugira ngo urubanza rwa mbere ruburanishwe.

Ati: "Hano imanza zaratinze. Urubanza rwa mbere rwabaye mu 2014, bivuze ko hari hashize imyaka 20 nta rubanza ruhari nyamara hari amadosiye abitse mu rukiko."

Yakomeje avuga nubwo byasabye iyo myaka ingana gutyo, nyamara kurega abakekwaho kugira uruhare muri Jenoside byatangiye mu 1995. Urubanza rwa mbere rwari urwa Capt. Simbikangwa, ndetse kuva icyo gihe hamaze kuba imanza esheshatu.

Kabanda yavuze ko impamvu nyamukuru yagiye ituma imanza zitinda kuburanishwa byatewe no kuba hariho ikintu cyo kutizera Leta y’u Rwanda, cyo kutizera abarokotse Jenoside yakorewe Abatutsi, ku buhamya batanga, ariko agaragaza ko kuba imanza zaratangiye na byo ari ibyo kwishimira.

Ati: "Umuntu arashinjwa hano i Paris ariko abamwunganira cyangwa abacamanza ukumva baravuga ngo ntabwo twumva ibyo bariya bantu bavuga, mu Rwanda abantu barabeshya, Leta ya Kagame ibashyiraho igitutu, ntabwo bavuga ukuri bavuga ibyo babwiwe."

Kabanda yavuze ko hari ibyari bikwiye guhinduka, abashijwa bagacirirwa imanza aho bikekwa ko bakoreye icyaha, bigakorwa n’abacamanza bumva neza ururimi baburanamo, bazi n’umuco nyarwanda.

Ati: "Nka bariya bunganira abacamanza twagereranya n’Inyangamugayo z’iwacu ni abantu bafata muri rubanda nta kintu gifatika kigendeweho, ariko burya inyangamugayo zo mu Rwanda ntabwo zari zizi amategeko ariko zari zizi u Rwanda kandi zacaga imanza ku musozi zizi n’abo zicira imanza ndetse n’abapfuye. Naho abangaba bo baraza bakumva ibivugwa nyuma bakazavuga niba uvugwa ari umwere cyangwa niba atari we."

Yavuze ko ibyo abantu bitwazaga ku bijyanye n’amategeko yo mu Rwanda harimo igihano cy’urupfu, no guca imanza hadakurikijwe amategeko ibyo byose byavuyeho.

Kabanda yanagarutse ku cyo bitwaza bavuga ko amategeko ahana Jenoside yagiyeho nyuma y’uko iba, agaragaza ko Leta yakoze Jenoside itari gushyiraho amategeko ayihana kandi igambiriye kuyikora.

Ati: "Jenoside yakozwe na Leta, none se yari gushyiraho amategeko ahana Jenoside kandi igambiriye kuyikora kandi izi ko hari n’ibindi byabaye mu 1963 byakwitwa Jenoside? Leta yagombaga gukora ibyo ishoboye byose ngo ayo mategeko ntajyeho kuko yari izi ko yazacirwa urubanza hakurikijwe ayo mategeko kandi ari yo yayashyizeho."

Perezida wa IBUKA mu Bufaransa, Marcel Kabanda

Yakomeje avuga ko mu Bufaransa hari abaciriwe imanza nyuma ya Jenoside yakorewe Abayahudi, ndetse kandi bikaba hakurikijwe amategeko yashyizweho nyuma yayo.

Kabanda yanagarutse ku mbogamizi zirimo n’iz’abatangabuhamya cyangwa abaregera indishyi bava mu Rwanda bagiye mu Bufaransa usanga ari n’ubwa mbere bageze muri icyo gihugu, bakagorwa n’ubuzima bahita bisangamo, asaba ko abashinjwa bajya bajyanwa mu Rwanda aho bashinjwa gukorera ibyaha bityo ntibirushye abatangabuhamya.

Ati: "Ibaze nkawe ari ubwa ubwa mbere uvuye mu Rwanda, ukubiswe n’imbeho, urabona ibintu utigeze ubona, baguhamagaye imbere y’abacamanza ngo ngaho tanga ubuhamya…......wowe urumva intambara waba urwana na yo kugira ngo uvuge ibintu byumvikana?"

Yakomeje agira ati: "Ibyiza bajya mu Rwanda bagacibwa imanza aho bashinjwa gukorera ibyaha n’abatangabuhamya ntibibarushye, bakavuga mu rurimi bumvikanaho kuko hari n’ubwo abasemuzi baba batumvise neza icyo yavuze bakabivuga nabi. Iyo umutangabuhamya erega atumva igifaransa ntiyahagarika usemura ngo amubwire ko asubiyemo nabi ibyo yavuze. Gusa abasemuzi ba hano bakora neza, ariko nanone kwirirwa hariya wumva ibintu bivugwa hari akantu kagucika."

Ku kijyanye no kuba imyaka ishize ari 30 Jenoside ibaye, mu manza esheshatu zabereye mu Bufaransa ababonye indishyi bakaba ari abo mu rubanza rumwe, hari icyizere ku barokotse Jenoside ku kuba bazabona indishyi baregeye cyangwa bazaregera bakazitsindira mu manza zindi zizakurikiraho, yavuze ko bizeye ko Leta ibyo yiyemeje byose izabikora.

Ati: "Twizeye ko Leta yiyemeje gutanga ibyo yateganyije ngo izi manza zibe izabikora. Imyaka ibaye 30, abakoze Jenoside nta mitungo bagifite cyangwa baranayigurishije ku buryo ntacyo bashobora gutanga. Gusa abatsindira indishyi niba ari benshi, abacamanza bazagera aho bajye bazigabanya kugira ngo bazakwirwe."

Ku mafaranga ntarengwa Leta yemeye gutanga angana n’amayero ibihumbi bitatu (asaga gato miliyoni enye z’amafaranga y’u Rwanda), yavuze ko Leta y’u Bufaransa ari yo igomba kureba uko ayo mafaranga yakoreshwa neza akagirira akamaro abatsindiye indishyi.

Ati: "Indishyi y’akababaro ntabwo ari impano, abakorewe ibyaha barayikeneye. Bitabaye ibyo byaba ari nka bya bindi byabaye muri Loni ku manza za TPIR, aho abantu 60 baciriwe imanza ariko nta ndishyi z’akababaro zabayeho."

Ku bijyanye n’mutekano w’abatangabuhamya n’abarokotse Jenoside baba mu Bufaransa, Perezida wa IBUKA muri iki gihugu, Marcel Kabanda, yashimangiye ko nta bibazo bijyanye no kubahohotera byari byabaho mu buryo ubwo ari bwo bwose, kuko hari serivisi zijyanye no kubacungira umutekano.

Ati: "Nta bikorwa ndumva hano mu Bufaransa byo guhohotera abarokotse Jenoside mu buryo ubwo ari bwo bwose. Ku bijyanye n’abatangabuhamya bava mu Rwanda cyangwa ahandi hirya no hino ku isi, hari serivisi ishinzwe kubacungira umutekano kuva bagera ino mpaka batashye. Nta kibazo cy’umutekano wabo gihari."

Urukiko rwamubajije icyo yifuza, ubwo yazaga gutanga ubuhamya kuri Ambasade y’u Bufaransa mu Rwanda, avuga ko asaba urukiko ko babaha ubutabera, abakoze ibyaha bose bakazagezwa imbere y’urukiko.

Uyu mutangabuhamya wabanje gusaba kwibutswa bumwe mu buhamya yatanze mu myaka yabanje, kuko hashize igihe ndetse hakiyongeraho uburwayi bwatumye yibagirwa bimwe ku buryo bisaba kumwibutsa.

Ubwo buhamya yavuzemo ko ngo yari atuye i Cyarwa, igitero kikaza kumutwara. Hanyuma abari bakigize batangira gushwana bibaza uko bamwica. Uwo bahisemo yarabyanze avuga ko yabakurikiye aje kwisahurira, kandi ko batamwica kuko atigeze abyara, bityo ko bamushyira abasirikare kugira ngo bitabakururira ibyago.

Baramujyanye, bahageze basanga abasirikare basinziriye. Abajandarume bababwira kumujyana kuri Segiteri, bagashaka Munyemana kuko ari we ufite urufunguzo.

Munyemana yagombaga ngo kumufungirana kugeza ku mugoroba, ubwo bagombaga kujyanwa kwicwa hamwe n’abandi.

Ngo baramuzamukanye, bamunyuza imbere yo kwa Straton bahura n’abajandarume, batangira gukankamira ba bicanyi kubera umunuko w’abicanyi, bariruka, we arakomeza ahura na Ngamije ari we wamuhishe, kuko umugore we yari umututsikazi.

Akomeza avuga ko ngo abagombaga kwicwa ntibari bakicirwa mu muhanda kubera umunuko, ngo bose bagombaga kujyanwa kuri Segiteri.

Abajijwe uwamubwiye aya magambo. Ati: "Ni abari bahagaze imbere yo kwa Perezida Sindikubwabo, ngo byavuzwe na Kanyabashi.”

Umutangabuhamya avuga ko ubwo igitero cyamujyanaga kuri Segiteri, bahuye n’abavuye gusahura.

Ati: "Hafi y’iwanjye twahuye n’abavuye gusahura, abandi bahita bavuga ngo dore abandi bari kwisahurira natwe turi muri aya! Bavaga gusahura kwa Ngamije aho nari ncumbitse. Bahise biruka na bo, bansiga njyenyine n’undi mugore. Uwo mugore nari naramugiriye neza, namusanze ku muhanda, njya kumuvuza. Ni we badusiganye, angira inama yo kuzamuka ngo akanyereka inzira igana kuri Segiteri, kugira ngo nticirwa mu nzira".

Uyu mutangabuhamya avuga ko mbere yo kujyanwa kuri Segiteri, ku mugoroba yafashwe agakubitwa, banamufata ku ngufu.

Kubera uko kuntu yari yakubiswe yaje kwikubita hasi, wa mugore amusiga aho! Igihe akangukiye, akomeza inzira igana kuri Segiteri, ahura na Ngamije watekerezaga ko yapfuye maze ajya kumucumbikira kuko na we yari afite umugore w’Umututsikazi yari yarashakiye indangamuntu yanditsemo ‘Hutu’. Ati: "Nibaza kukwica, bazatwicana, ngwino iwanjye. Twinjiye iwe, kubera uburyo umugore we yari muremure, yahuje ibiganza nkandagiraho, anzamura muri Plafond, akajya aba ari ho angaburirira buhoro buhoro, ariko nkarya duke kuko nangaga kujya kwituma".

Avuga ko yamaze muri Plafond igihe kinini uhereye tariki 21/04 kugeza tariki 3/7/1994, bahunze, avamo ku itariki 16/07/1994.

Avuga ko hari ubwo bamukuye mu nzu, kuko byari byavuzwe ko baza gusaka inzu ku yindi, bamuhisha mu ndabo zari mu gikari, hagwa imvura nyinshi cyane no gusaka ntibyabaho.

Mu butumwa yatanze kwa Porokireri w’i Butare mu 2002 na 2003, yavuze ko mbere y’uko Jenoside itangira iwabo yakoraga kwa muganga. Ngo yaje gutaha yerekana indangamuntu yanditsemo Tutsi, ngo baramureka arasohoka, ariko umusirikare ngo yaramukurikiye, amufatira ku ngufu mu ishyamba ryari aho, aranamukubita, agaruye ubwenge nibwo yasindagiye agera iwe mu rugo, bucya atwarwa na cya gitero.

Uyu mutangabuhamya yavuze ko Munyemana yari umuntu mwiza mbere, witaga ku barwayi ariko ukuntu yahindutse ngo byaramutangaje cyane.

Yemeza ko Munyemana yatereranye abicwaga muri Jenoside. Ati: "Ni umufatanyacyaha nk’abandi kuko atigeze akiza uwo ari we wese mu bicwaga. Hari imirambo myinshi, hari inkomere nyinshi, sinigeze mubona nk’umuganga afasha".

Ubwo igihe cyo kumubaza cyari kigeze nk’uko bisanzwe nyuma y’ubuhamya, Umucamana yabajije umutangabuhamya niba igihe yari yihishe muri plafond yarigeze abona Munyemana, asubiza ati: "Naramubonye aje mu nama kwa Ndindabahizi, hari nko mu ma saa kumi n’imwe, arimo atambuka abwira umuntu ngo tugomba kumenya aho Abatutsi bose batuye, nanone aza kuhanyura ari kumwe na Bwanakeye".

Umushinjacyaha yamusabye gusobanura neza uko yaboneraga Munyemana muri Plafond akanamumenyera ku ijwi rye kuko bakoranaga, ndetse amusaba no kuvuga ku burwayi yakuye ku kumara igihe kinini yihishe muri Plafond.

Umutangabuhamya yavuze ko yavuyemo atabona neza. Ati: "N’ubu simba mbabona neza. Kubera stress kandi nakurijemo diyabete, hypertension, byanansubije inyuma mu bukungu kuko ubu ntacyo mbasha kwikorera".

Munyemana asabwe kugira icyo avuga ku buhamya bw’uwo mubyeyi, yavuze ko atigeze agera kwa Jean Chrisostome (aho inama yaberaga umutangabuhamya avuga), ati: "Ndahazi ariko sinigeze njyayo Jamais jamais".

Mu bundi buhamya bwatanzwe n’umukobwa wa Bitira yavuze ko Jenoside yabaye ku itariki 21 Mata 1994, nyuma y’uko abantu bari mu ngo zabo bumvise amasasu araswa maze batangira guhunga.

Uyu mutangabuhamya kuri ubu ufite imyaka 43, avuga ko nyuma y’uko babaye benshi ku gasanteri, bababwiye kujya ku Kabakobwa. Bahageze bababwiye ko bahicara bagategereza ubufasha, ndetse bahamara iminsi ibiri, kikaba cyari ikibaya kinini bashyizemo Abatutsi.

Avuga ko ku munsi wa Gatatu, haje abantu bambaye imyenda ya gisirikare bashaka gutangira kubica, ariko babonye abantu ari benshi batabashoboye, basubirayo, ni uko abantu bari babarindiye aho, bababwira ko ibintu byahindutse abakuru muri bo babagiriye inama yo kuva aho kugira ngo batagwa aho bose, bityo ko bahunga.

Avuga ko we n’umwana w’amezi umunani yari ahetse bahise bazamukana na se barahunga.

Se yaramubwiye ati: "Wowe kuko uhetse umwana ntuce mu muhanda, ca mu biturage batakwicana n’umwana, noneho duhurire kuri Segiteri Tumba. Kuhagera byarangoye nahageze nyuma y’iminsi ibiri.”

Ati: “Nageze kuri Segiteri ndarunguruka, harimo abantu benshi, hari salle ikorerwamo inama, mbona Papa, asaba gufungura, ntabwo hari hafunze neza, ndasunika, Papa ahita ankurura anshyira mu kaguni, aranyicaza. Nari naniwe, ambaza niba hari icyo nanyoye, nariye, ... nuko ansabira amazi undi mubyeyi wari ufite amazi, ampaho ndanywa. Turaganira arambwira ngo wabonye bariya bantu? Ese abantu twasize Kabakobwa barishwe? Nti simbizi, ati bariya bantu ubonye mu modoka itambutse irimo abasirikare, nabonyemo na Dr Sosthene, nti ni uwa he se? Arambwira ngo ni un Docteur Gynécologue, uwamumpa, namusaba kukugumana akakumpishira".

Avuga ko yabajije niba hari icyo Docteur yabafasha baramutse bamubonye, amusubiza ko atabizi.

Baje gusohora abantu, babona abafite grenade bazengurutse Segiteri, barimo Munyemana, Remera, babanza kubasuhuza, se w’uyu mutangabuhamya yegera Sosthène ati: "Muraho Dogite"? Sosthène amusubiza atya: "Ntacyo mvugana nawe, urashaka iki? Ati: "Ndashaka kuguha uyu mwana wanjye uhetse undi".

Avuga ko se yari amufashe akaboko maze yiyumvira n’amatwi ye Dogiteri asubiza se ati: " Bitira mva imbere".

Nyuma abantu batangiye gusohoka ari benshi ise yongera kwegera Dogiteri maze aramubwira ati: "Bitira nta miteto igihari, ntabwo uzi ko Abatutsi bagomba kwicwa?"

Avuga ko nyuma Munyemana yaje kumuha Interahamwe ngo zimusubize iwe, nubwo hari harasenywe, ko nabakenera bazongera kujya kubamuzanira. Uyu mubyeyi wari uhetse umwana yari kumwe na se, nyina na basaza be babiri.

Akomeza avuga ko nyuma baje kujyanwa na Gashirabake wari ushinzwe ibitero, ashyira se ku ruhande, na bo bajya ku rundi, ise bamujyana ku cyobo cyari hafi ya Segiteri abo bandi babajyana ku kindi cyobo, ari nijoro.

Avuga ko tariki 6 Gicurasi, abo bajyanye kuri icyo cyobo bose bishwe arokoka we n’umwana gusa, kuko harimo abantu benshi ngo basubiye inyuma bihisha mu miringoti.

Nyuma baje guhishwa n’umuhutukazi wari warakuwe ku buyobozi kuko umugabo we yari umututsi, Gashirabake aza kuhabashaka ababwira ko badahari ababajije aho Bitira ari bamusubiza bati: "Jeanne wowe ntukiri umutegetsi ubu ni twe tuyobora. Bitira Munyemana yaramumpaye, namushyize aho abandi bajya. Wowe nta jambo ugifite".

Uyu mutangabuhamya mu gusoza ubutumwa bwe, yasabye urukiko ubutabera ati: "Ndifuza ko Urukiko rw’u bufaransa, bajya batubariza nk’uyu Sosthène bakatubariza aho abantu bacu bishwe bashyizwe, kuko hari abo tutarabona. Ndasaba ubutabera".

Dr Sosthène Munyemana

Uyu mutangabuhamya wemeje ko azi Munyemana atamwitiranya, yabishingiye ku kuba muri Jenoside ngo yari afite imyaka 25, yari umwalimu ndetse aho yigishaga Dr Munyemana yahatangaga amasomo y’igihe gito.

Avuga ko mu gihe cya Jenoside nta muntu wasohokaga, usibye abatangaga amabwiriza b’abategetsi b’icyo gihe, bakora n’amarondo.

Avuga ko bahabwaga gukora amarondo bose, bakajya mu miryango bagena abayakora. Iwabo ngo ni we warikoraga ariko rimwe ngo bageze iwabo bashaka kujyana se arabyanga ababwira ko se adafite imbaraga bityo ko ari we uzajya urijyaho.

Avuga nyuma y’ihanurwa ry’indege umutekano watangiye kuba mubi, ndetse bakabona impunzi ziturutse i Kigali bakagira ngo ni ho bizaguma gusa.

Nyuma amazu yatangiye gushya ku musozi w’iwabo n’abaturage batangira guhunga, noneho batangira gukora amarondo ateguye neza.

Akomeza avuga ko habayeho rero inama, yatumijwe na Bwanakeye wari Konseye, ababwira ko umutekano ureba buri muturage, kugira ngo ubwicanyi butagera muri Segiteri yabo.

Aho rero nibwo ngo Munyemana yahagurutse avuga ko atemeranya n’ibyo Konseye avuze, ati: "Umwanzi aturimo aha turi, ntabwo tujya gushakishiriza hirya no hino. Twatangiye kurebana kuko ubundi ijambo ryavugwaga n’umutegetsi cyangwa umunyabwenge nka Munyemana ryahabwagwa agaciro".

Munyemana ngo yavuze ko iwe hari Abahutu bahunze Inyenzi ariko ntabwo yavugaga ukuri kuko ngo nta Nyenzi zaturukaga i Burundi.

Umutangabuhamya yavuze ko Munyemana yabivuganye ijwi rikomeye (rya gitegetsi), nk’ufite ukuri. Ari nacyo cyatumye bahungabana.

Umucamanza yabajije umutangabuhamya niba abantu bose bari bazi ko Munyemana aziranye na Kambanda, ikaba impamvu y’iryo jambo, asubiza ko atari byo kuko nka we yari azi ko ari muganga gusa.

Ati "Nyuma rero yo kumwumva avuga ko umwanzi ari Umututsi, twe Abatutsi twagize ubwoba, hari ku itariki ya 17 Mata 1994 , bukeye ku itariki 18 Mata 1994, hatangiye ubwicanyi".

Akomeza avuga ko hari Abahutu bazengurukaga mu ngo ngo barebe ko abantu bahari bose, batangira amarondo n’abandi iyo tariki ya 18 Mata, hari umuntu waje utazwi, maze umujandarume aramubwira ngo hagarara, maze arahagarara umujandarume amurasaho, ntiyapfa, yari afite agasanduku karimo grenade, maze aramubaza ati: "Izi uzikuye he? Ati: "Nzikuye kwa Munyemana ari kuzitanga ngo yari umuhungu w’uwitwa Baritoromayo".

Uyu mutangabuhamya watanze ubuhamya bwe mu rurimi rw’Igifaransa ngo yumvise ko hari intwaro ziri guhabwa Abahutu, ahita ataha abwira iwabo ati: "C’est fini ntacyo gukora tugifite, turapfuye. Tariki 20 Mata nibwo twabonye abantu biruka banavuga ngo muhunge muhunge, tubona inyuma yabo hari igitero, natwe turahunga duseseye mu rugo. Twakomeje kubona abantu bafite za grenade n’imihoro aho twari twihishe mu murima. Baje gufata Papa, baramuzamukana bamujyana muri Segiteri".

Yongeyeho ko iyo bagufataga ntubarwanye, bakujyanaga kuri Segiteri, washaka kwiruka, bakakwicira aho, ariko wakwitonda bakakujyana kuri Segiteri.

Avuga ko kuri Segiteri habaga hari Munyemana, Ruganzu n’abandi.

Umucamanza yabajije umutangabuhamya niba yariboneye Abatutsi bajyanwa kuri Segiteri asubiza ko yabiboneye aho yari yihishe mu masaka.

Mu ikoti ry’ubururu na karuvate, uyu mutangabuhamya yasubijemo amadarubindi kugira ngo yerekane aho yari yihishe ku ikarita bamweretse, asobanurira urukiko ko banyuzwaga mu muhanda wajyaga kuri Segiteri gusa.

Uyu mugabo uvuga ko nta muntu n’umwe wamuhishe ahubwo yarokokeye muri uwo murima tariki 15 Kamena, ninjoro ngo yarasohokaga akegera ahari Bariyeri kugira ngo yumvirize ibyo bavugaga.

Hari igihe yumvise bavuga ko akiriho ( umutangabuhamya) maze ajya gushaka umuhisha, ariko aho ageze hose banga kumuhisha nyuma aza kubwira inshuti ye y’umujandarume witwaga Jean Pierre amusaba ko yamusabira aho ahishwa mu i Rango. Akomeza avuga ko mu i Rango na ho yari yihishe harimo urugendo rw’iminota 10 ariko yahakoresheje iminsi itandatu agerageza guhunga.

Avuga ko kubera Bariyeri nyinshi atabashije kugerayo ahubwo yageze hafi yo kwa Munyemana amubona kuri Bariyeri yariho ishusho ya Bikiramariya hafi yo kwa Munyemana.

Avuga ko ari Bariyeri yabagaho abantu bafite imihoro aho Munyemana yari kumwe na bo, ikaba yari igamije kubuza Abatutsi gutambuka, kubafata no kubica ndetse ko abari bayiriho batakoraga irondo.

Uyu mutangabuhamya avuga ko hari igihe ngo havuzwe IHUMURE, kugira ngo Abatutsi bihishe, abari iwabo bose basohoke ngo amahoro yahinze. Ati: "Aha nibwo Papa na bashiki banjye bafashwe na Ntirenganya, Papa ajyanwa ku cyobo aricwa, bashiki banjye barababwira ngo mugume aho igihe cyanyu ntikiragera".

Uyu mutangabuhamya yagaragarije urukiko muri make ubuzima yanyuzemo mbere yo gushyingura mu cyubahiro abo mu muryango we bari barajugunywe mu cyobo cyo kwa Karangwa.

Ati: "Reka mvuge kuri 2003. Twari tubizi neza ko Papa yapfuye, ariko buri gihe twajyaga kuri cya cyobo tukahashyira indabo duha icyubahiro, nyuma twasabye ko abantu barimo batabururwa, barabitwemereye, turataburura harimo abantu basaga 60, twataburuye umubiri ku mubiri, twabamenyaga kubera imyenda yabo, kubera ibyo twasanze mu mifuka yabo. Papa twakoze mu mufuka dusangamo ishapule n’indangamuntu bye (twabaye nk’abishimye tuti data turamubonye). Dutegura kumushyingura mu cyubahiro".

Akomeza agira ati: "Tubataburura twatangajwe no kubona za selenge n’uduflacon (uducupa tw’imiti), twibaza impamvu yabyo. Njye ni njye wari uhagarariye uko gutaburura, ndababwiza ukuri n’ubu ntitwamenye icyo izo nshinge na flacon zamaragamo".
Umucamanza amubwiye ko byavuzweho mu rukiko, aho hari ubuhamya buvuga ko hari inshinge zatewe abagore mu myanya y’ibanga nyuma bakajugunywa mu cyobo cyo kwa Karangwa.

Uyu mutangabuhamya wabajijwe inshuro eshatu mu bihe bitandukanye mbere y’uko uru rubanza rutangira, umucamanza yamwibukije ibyo yagiye atanga mu buhamya n’ibyo yagiye asubiza ndetse yongera kumubaza niba hari ikindi yumvise Munyemana avuga.

Ati: "Ni iki Munyemana kindi yavuze muri iyo nama? Asubiza yavuze ko Munyemana yavuze ko Abahutu bagomba guhaguruka bakirwanaho, ndetse ko mbere amarondo yakorwaga n’abantu bose bavanze (Abatutsi n’Abahutu) yari yateguwe, ariko nyuma ko byahindutse, kuva tariki 20 Mata 1994.

Abajijwe uko byagendaga nyuma yo gutaburura imibiri. Yavuze ko bajyanwaga muri stade niho haberaga iyo mihango kuko bari benshi nta handi bari gukwirwa. Ati: "Twari dufite amasanduku 50 ariko imwe ijyamo imibiri irenze itatu!!! Twari dufite imibiri hafi 250".

Uyu mutangabuhamya yavuze ko mbere y’uko se yicwa yabanje kumurikirwa Munyemana na Ruganzu akabona kwicwa, ko ibyo yabibwiye na Ntirenganya ubu ufunze, kuko yemeye ko yari mu bishe se w’uyu mutangabuhamya.

Uyu mutangabuhamya yasabye ko hatangwa ubutabera Munyemana akaryozwa ibyo yakoze kuko i Tumba habereye amahano aho ngo mu kwica batigeze barobanura umugabo n’umugore, umukuru n’umwana, umusaza cyangwa umukecuru. Yongeraho ko hari abagore baticwaga ako kanya ahubwo hari abo Interahamwe zabanzaga kubohoza bagakorerwa iyicarubozo nyuma bakabica.

Dr Sosthène Munyemana

Babibwiye abahagarariye umuryango uharanira uburenganzira bwa Muntu, Haguruka, ndetse na bamwe mu banyamakuru bibumbiye mu muryango w’abanyamakuru baharanira amahoro, Pax Press, babagendereye kuva kuwa kane tariki 23 kugeza ku wa gatanu tariki ya 24 Ugushyingo 2023.

Ni nyuma y’uko babasobanuriye iby’aho urubanza rwa Dr. Munyemana bigeze n’uko byatangiye, ndetse n’impamvu ataje kuburanira mu Rwanda.

Daphrose Mukandamage uvuga ko umugabo we yishwe akuwe mu biro bya Segiteri ya Tumba, bivugwa ko Dr. Munyemana ari we wari utunze urufunguzo rwaho, yagize ati "Tumenye ko arimo kuburanishwa, kandi biraduha icyizere cy’uko agomba kuryozwa ibyo yakoze."

Yunzemo ati "Kuba yari umuntu ukomeye akaba ubu ari kuburanishwa biraduha icyizere ko byanze bikunze tugomba kurenganurwa, uwakoze Jenoside wese akabiryozwa."

Gaudiose Nyirakamana na we ati "Kuba ari kuburanishwa bidufitiye akamaro kuko bitugaruramo kugira intego yo kubaho. Biduha kandi kumva ko byanga bikunda uwakoreye icyaha hano n’ubwo yaba adahari hari abari kumukurikirana."

Marie Claire Uwamahoro uhagarariye Ibuka mu Murenge wa Tumba na we ati "N’abatarafatwa bazafatwa kuko icyaha cya Jenoside kidasaza. N’iyo bapfa bataburanishijwe kandi, no guhora wihishahisha ku bw’icyaha na byo ni igihano."

Dr. Sosthène Munyemana nyuma ya Jenoside yahungiye mu gihugu cy’Ubufaransa aho yakomeje umwuga we wo kuvura indwara z’abagore mu bitaro by’ahitwa Villeneuve-sur-Lot, yahagaritse gukoramo afashe ikiruhuko cy’izabukuru.

Muri 2008 yimwe ubuhunzi mu Bufaransa, ari na wo mwaka Urukiko Gacaca rw’i Tumba rwamuhamijemo icyaha cya Jenoside yakorewe Abatutsi mu 1994, rukanamukatira igifungo cya burundu.

Muri Mutarama 2010 yarafashwe arafungwa hanasabwa ko yakoherezwa kuburanishirizwa mu Rwanda, ariko icyo cyifuzo kimwe agaciro mu Ukwakira 2010 hashingiwe ku kuba mu Rwanda yari kuburanishwa hifashishijwe amategeko yashyizweho nyuma y’icyaha aregwa.

Muri Mutarama 2011 habayeho imyigaragambyo yo kumwamagana nk’umwicanyi, imbere ya bya bitaro yakoragamo, hanyuma mu Ugushyingo 2011 arega Collectif Girondin Pour le Rwanda ari na yo yari yakoze imyigaragambyo, kumusebya kuko nta rukiko rwari rwaramuhamije kuba umujenosideri.

Icyo gihe yatsinze urubanza ariko ntiyahabwa indishyi yari yasabye kuko hari hacyigwa ku ruhare rwe muri Jenoside.

Muri 2021 ni bwo yongeye gushyikirizwa ubutabera, ubu akaba yaratangiye kuburana.

Dr Munyemana Sosthène

Uyu mutangabuhamya w’imyaka 56 utuye mu Karere ka Huye, avuga ko mu 1994 yari atuye i Tumba ahamaze imyaka 5, afite abana 2.

Avuga ko tariki 17 Mata 1994, Abahutu n’Abatutsi ba Tumba babonye umusozi wa Mubumbano hakurya yabo uri gushya bihutira kujya gutabara ngo bakumire ko byagera ku musozi wabo w’i Tumba

Umugabo we yari yajyanye n’abandi gukumira ibyo bitero, umwe mu bagabo yaje mu modoka ababaza impamvu bajya gukumira Inyenzi.

Abagabo bagarutse babwiye konseye Bwanakeye François ibiri kuba, Jeanne Sumuteto wari Resiponsabule na we abwira abaturage kujya kuri Segiteri mu nama y’igitaraganya.

Asobanura ko bagezeyo bahasanze abantu barimo Munyemana Sosthène, François, Ruganzu, Ntirabampa Venant, Remera Simeo wari Perezida wa CDR, ba Simpunga Appolinaire.

Bahise basohora Jeanne Sumuteto kuko umugabo we yari Umututsi, basohora kandi Kiyogori na Diyoniziyo kuko bari Abatutsi na bo.

Avuga ko icyo gihe Munyemana yafashe ijambo muri iyo nama ati: "Muri gukina mu biki ko hari abantu bari iwanjye bavuye iwabo wa madamu i Nyaruteja bahunze Inyenzi?"

Abari Abatutsi bose muri iyo nama ngo bakutse umutima, nyuma y’iryo jambo ndetse bahita bashyiraho itegeko ryo gushyiraho za bariyeri, zariho Abahutu n’Abatutsi ariko mu gihe gito birukana Abatutsi bababwira ko badashaka kubana n’Inyenzi.

Uyu mubyeyi avuga ko kuri 19 Mata 1994 nko mu ma saa munani, habaye inama yatumijwe na Munyemana Sosthène, Bwanakeye, Remera Simeon na Ntirabampa Venant.

Tariki 20 Mata 1994 ngo nibwo bumvise ko i Butare batangiye kwica Abatutsi barimo Karanganwa François n’umugore we Kamaraba ndetse banakomeretsa umukobwa we wari wavuye i Kigali witwa Esperance.

Ku ya 21 Mata Abatutsi bishwe n’Abahutu, Munyemana na Bwanakeye na Ntirabampa bavuze ko bica Abatutsi bakize, ko batica abakene

Imirambo y’abishwe yose yajugunywaga mu cyobo cyo kwa Karanganwa, ndetse yiboneye uwitwa Murera ashyize ku ngorofani umurambo wa Kamaraba Cecile, umudamu wa Karanganwa agiye kuwujugunya muri icyo cyobo bwa mbere.

Uwitwa Bwanakeye yaje gukurwa ku buyobozi ngo kuko atari afite ubushobozi bwo kuyobora irondo, nyuma baza kubura abagabo babo maze abagore harimo n’uyu watangaga ubuhamya bafatwa ku ngufu.

Avuga ko yabohojwe n’umugabo witwaga Saveri, akaba yaraje amubwira ko abayobozi bavuze ngo barongore abagore bakiri bato, amubwira ko babatanze bityo ko uko azajya amushaka adakwiye kumubura.

Undi mutangabuhamya avuga ko yiboneye imirambo ubwo yajyaga gushaka amazi kuri Segiteri ya Tumba, robine yamanukagamo amazi arimo n’amaraso
kubera abantu bari biciwe aho amazi ava hitwa mu Kadahokwa, amazi yari yivanze n’amaraso.

Mu kujyayo yageze aho Munyemana yari ahagaze ari kumwe na Kambanda, abegera nk’ushaka ubutabazi kuko Kambanda yari amuzi dore ko yajyaga mu rugo rwe kuko se wa KAMBANDA yari afite umugore wari nyirakuru, maze Munyemana ahita amubwira ati: ’’Abo bihorere tubabikiye abahungu bacu’’.

Yamusabye ngo gutanga Intwaro zari mu modoka ndetse yabwiwe ko harimo imbunda, iya mbere yahawe uwitwa WALTER, iya kabiri ihabwa uwitwa Fideli, umwana wa Kubwimana Felesiyani.

Avuga ko umugabo wari waramubohoje yamubwiye ko abapfuye bapfuye ariko ko bageze ku mpfu mbi cyane. Ati: ’’Abapfuye barapfuye ariko noneho tugeze ku mpfu mbi cyane’’

Yavugaga abagore bicwaga babateye inshinge mu myanya y’ibanga bakajugunywa muri icyo cyobo, ndetse ko yabonyemo Nyirabukwe asamba bamuteye inshinge ariko ntasobanukirwe, gusa ngo ku manywa Saveri yari yabimubwiye ko agiye kubona impfu mbi cyane.

Ati "Habayeho agashinyaguro kabaye ubwo inshinge zavaga kwa Munyemana Sosthène".

Avuga abishwe bo mu muryango we yagize ati: "Abantu barapfuye, databukwe Ngirumpatse, Nyirakamana Patirisiya mabukwe n’abandi. Ntabwo twumvaga ko muganga Munyemana tuzamubona".

Avuga ko rimwe ari ku Cyumweru saa munani, yabonye umugabo we yari azi ko yishwe ahingutse aje kubera ihumure ryari ryatangajwe. Ati: "Nakorewe ibintu bibi cyane , kubona umugabo wawe aje agasanga uri mu rugo utabasha kugenda kubera kurongorwa ushonje".

Muri uru rubanza rubera mu Rukiko rwa Rubanda i Paris mu Bufaransa, biteganyijwe ko ruzarangira tariki 19 Ukuboza uyu mwaka, ndetse hakazumvwa abatangabuhamya bateganyijwe bagera kuri 67 barimo 45 bazava mu Rwanda.

Iki gipangu cyagiye kigurwa n’abantu banyuranye, ariko hari kwa Dr Sosthène Munyemana

Boniface Kayitankore warokotse Jenoside, ubu akaba atuye ahitwa i Mpare mu Murenge wa Tumba mu Karere ka Huye, ari na ho yari atuye mu gihe cya Jenoside, ni umwe mu babihamya.

Bakoranye mu bitaro bya Kaminuza (CHUB), umwe (Kayitankore) akora umurimo wo gutwara abarwayi abakura mu bice bimwe abajyana mu bindi (brancardier) undi (Dr Munyemana) ari impuguke mu kuvura abagore, akanigisha mu ishami ry’ubuganga rya Kaminuza y’u Rwanda.

Kayitankore avuga ko Dr Munyemana yatangiye kugaragaraho amatwara yo kudashakira amahoro Abatutsi mu 1993, kuko yakunze kugaragara no ku kazi yambaye ingofero y’ishyaka MDR. Icyo gihe ngo yari umuMDR Power, kandi ngo ntiyari akiza ku kazi kenshi, nka mbere.

Bigeze mu gihe cya Jenoside yarushijeho kutaboneka ku kazi kuko ngo urebye atari akihagera, n’igihe ahaje akagira uruhare mu gutanga amabwiriza ku gutwara Abatutsi bari mu bitaro, bajya kwicwa.

Ibi ngo yagiye abimenya kuko yari yarahungiye mu bitaro, aho yabaye mu gihe cya Jenoside yihishe mu misarane, ibyaberaga mu bitaro akenshi akaba yarabireberaga mu idirishya.

Kayitankore anavuga ko Dr Munyemana ari mu bagenzuraga za bariyeri harimo n’iyo ku Mukoni, kandi ngo yabyiboneye n’amaso ye kuko ahunga ava i Mpare hari iminsi ibiri yamaze yihishe mu ishyamba ryo hafi yaho, mbere y’uko afata icyemezo cyo kujya kwihisha ku bitaro.

Anavuga ko yabwiwe ko murumuna we bakurikiranaga yahungiye i Tumba, akaza kujyanwa kuri Segiteri aho Abatutsi bajyanwagwa babwirwa ko bari kubahungisha, bakahabafungirana, ariko bakazajya bakuramo bake bake bajya kubica. Murumuna we na we ni ho yakuwe ajyanwa kwicwa.

Kuri Segiteri aho kandi ngo hacungwaga na Dr Munyemana Sosthène kuko ari we wabikaga urufunguzo rwaho.

Kuri Segiteri, aho Abatutsi b’i Tumba bafungiranwaga bakahakurwa bajya kwicwa. Bivugwa ko Dr Sosthène Munyemana na Konseye Bwanacyeye ari bo babikaga urufunguzo rwaho

Iby’uko urufunguzo rwa Segiteri rwabikwaga na Dr Munyemana, bityo akaba ashinjwa uruhare mu kwica abahahungishirijwe, binahamywa n’umudamu utarashatse ko amazina ye atangazwa, uvuga ko yari atuye ku Mukoni, ruguru gato yo kwa Sindikubwabo, abicanyi bakaza kumukura mu rugo tariki 21 Mata 1994 ngo bamushyire abasirikare bamwice, bo bagategeka ko yoherezwa kuri Segiteri.

Agira ati “Nibuka ko icyo gihe abari banjyanye babwiwe ko bari bushake Dr Munyemana kuko ari we wari ufite urufunguzo, bamubura bagashaka Konseye Bwanakeye.”

Mu nzira ngo bahuye n’umujandarume amukubita ikintu mu mutwe yitura hasi, abo bari kumwe bamusiga aho, aho azanzamukiye ahura n’umugabo wari umucumbikiye (yakodeshaga inzu ye), nuko ajya kumuhisha mu gisenge cy’inzu (plafond) iwe, ari na ho yabaye kugeza Jenoside irangiye.

Urugo yari yihishemo ngo rwari rwegeranye n’urwa Dr. Chrysostome Ndindabahizi kandi ngo urebye ni ho abari bayoboye Jenoside muri Tumba bahuriraga bagakora inama, ku buryo hari amakuru yaho yagiye amenya ayumvanye ababaga bari mu rugo.

Agira ati “Mu byo nagiye numva harimo kuba Dr Munyemana yarahazaga azanye na Dr Ndindabahizi, kandi iyo bahageraga nibwo inama yatangiraga. Najyaga numva hari n’abavuga ko ubwo Dr Munyemana yaje bari burye ngo kuko yahembaga ababaga bitwaye neza mu kazi, ni ukuvuga abishe Abatutsi.”

Dr Sosthène Munyemana (wambaye indorerwamo) ubu arimo araburanishwa n’inkiko zo mu Bufaransa

I Paris mu Bufaransa aharimo kubera urubanza ruregwamo Dr Munyemana Sosthène ushinjwa ibyaha bya Jenoside

Inzobere mu buvuzi bwo mu mutwe, Diana KOLINKOF, yasobanuye ku bunararibonye bwe mu kazi aho yasanze ko akenshi abashinjwa ndetse n’abakurikirana imanza hari ingaruka bagirwaho n’ibyo bumvira mu rukiko, cyane cyane mu batangabuhamya.

Avuga ko mu gihe cy’ibibazo by’intambara cyangwa irindi hohoterwa byaba ari ibiturutse ku bwoko, ku idini, abana n’abagore bagira ibibazo bikomeye, cyane ihohoterwa rishingiye ku gitsina.

Avuga ko hari abantu bagira ikintu cy’icyoba guhera ubwo bakagihorana, bikagorana kuba byakira cyangwa kuba byamushiramo.

Atandukanya abahuye n’ibibazo by’intambara, n’ababa barahuye n’ibindi bizazane bindi nk’imitingito, imyuzure, yavuze ko abahura n’ihohoterwa bagira ihungabana ryo mu rwego rwo hejuru.

Abagore bafashwe ku ngufu bo bagira ingorane zo mu rundi rwego, bahorana ipfunwe ry’uko abantu bose babibabonamo ko basambanyijwe ku ngufu, bagahorana isoni. Ibi ngo bituma no kumuvura bigorana kuko ahora asa n’uwihishe nanone mu bitekerezo.

Aba ngo kenshi ibyo babonye bihora bibagendamo nk’uko bareba filimi y’ibyo baciyemo.

Diana KOLINKOF, yabwiye urukiko ko rugomba kumenya ko abantu bahuye n’ihohoterwa cyangwa banyuze mu bizazane by’intambara, batabonye umwanya uhagije wo kuba baganirizwa ngo bakire ibikomere, n’ubwo na bo biba bitaboroheye kwirekura.

Avuga ko binagorana kenshi ko umuntu aza guhagarara nk’aho we ahagaze ngo atange ubuhamya nyabwo bw’ibyamubayeho. Ati: "mu nkiko hano abatangabuhamya babashishikariza kuza gutanga ubuhamya, ariko iyo ari mu rubanza atanga ubuhamya, abanza kwibaza ati ese ndabishobora? Ninabishobora se hari icyo biri bubyare mu gutanga wenda indishyi? Uwo ntangaho ubuhamya hari icyo bimubwiye? Ugasanga rimwe avuze ibidahura kubera ko hari icyo ari gutekereza mu mutwe. Yavuze ati iyo ari imbere y’uwabahemukiye mu rukiko amuri hafi, amubona, aba atekereza gusa ku butabera niba buzatangwa".

Diana KOLINKOF yongeyeho ko hari n’ubwo uwahemukiwe aba yumva undi mutangabuhamya wahemukiwe afite ubuhamya bushaririye kurenza ubwe, bityo bigatuma bagumana ibibarimo, ndetse ku bahuye n’ihohoterwa, bo bakagira ihungabana akenshi ryitwa agahinda gakabije.

Yatanze urugero rw’umuntu wahuye n’ihohoterwa, ubwo yatangaga ubuhamya imbere y’urukiko, yivayo aravuga noneho umwunganizi we aba ari we utangira kugira ikibazo kuko bimwe nibwo yari abyumvise, agatangira kwibaza niba ari ibyo ahimba kuko ngo ntiyari yarigeze ahura n’umugore wahohotewe kugeza ku gufatwa ku ngufu kandi akabivuga uko byakabaye.

Aha ni ho bamwe batangira kwibaza ko ubuhamya bumwe buba ari ibinyoma ngo kuko hari ubwo bishobora kugenda bigaruka igihe ari gutanga ubuhamya, byamukundiye gufunguka, filimi y’ubuzima yanyuzemo agashobora kuyivuga uko ari kuyireba.

Avuga ko hari uburyo bwiza bwo kubaganiriza nyuma cyangwa mbere, kugira ngo bibasohokemo buhoro buhoro basubize umutima hamwe.

Diana KOLINKOF yasabye ko bajya baha abatangabuhamya umwanya bakabanza bakavuga ibyababayeho mu mutuzo (batuje), na bo bakabanza bakabumva, cyane cyane ababa bavuga ibyababayeho ubwabo.

Yavuze ko abagore bafashwe ku ngufu bahora babona abagabo babafata nk’ibikoresho byabo, ku buryo bimugora kumva ko umugabo yamuha agaciro, umugore agahora na we abona umugabo ari ikindi kintu adasobanukirwa iyo aramutse atinyutse kumureba mu maso ndetse ko badatekana.

Yongeyeho ko ubuhamya bumwe na bumwe cyane cyane ubuvuga kuri Jenoside hari ubwo habamo kubeshya rimwe na rimwe, ngo bigasaba ko abaza ibibazo kugira ngo asobanukirwe, cyane cyane ibijyanye na Politiki.

Diana yabajijwe ku cyo bafasha abatanga ubuhamya, yaba abaturuka mu Rwanda, ababutanga kuri video, abazanwa mu Bufaransa cyangwa mu Bubiligi.

Yasubije ko babaganiriza bakagerageza kubanza kubabwira kumva batuje ndetse batekanye nubwo bigoye, ndetse no kubanza kubategura mu mutwe ku bw’ibyo bagiye guhura na byo.

Perezida w’Urukiko Marc SOMMERER yamubajije ingaruka umuntu nk’uyu agira ku ihungabana. Ati:"Ese agira umutwe udakira, ihungabana rihoraho cyangwa rya burundu? Ese bakwiye gushyirwa ahantu habo bonyine?”

Diane w’imyaka 79 yasubije agira ati: "Nakwifuriza umuntu kugira ihungabana ariko sinamwifuriza kuba mu ihungabana. Kuribamo ni ikindi kindi.”

Yagaragaje ko abantu baza gushaka mu Rwanda abatangabuhamya ndetse n’ababafasha, bakabahatira gutanga ubuhamya akenshi ngo ku mbaraga (batabishaka), ko atari byiza.

Mu manza zitandukanye, uyu mugore yavuze ko bigoye kuba umuntu yahagarara imbere ngo avuge ibinyoma burundu. Avuga ko n’abajya babivuga bari mu rukiko bashaka impapuro hari akabisoba uko byagenda kose.

Gusa avuga ko hari ubuhamya bwinshi butaravugwa na ba nyirabwo, aho hari abacecekanye byinshi. Atanga urugero rw’Umunyafurika y’Epfo utarigeze uvuga ibyamubayeho, ariko ubu akaba atangiye kubibwira abuzukuru be.

Yabajijwe niba hari igihe runaka gishira urwibutso umuntu afite mu mutwe rukaba rwakwihindura, avuga ko bishoboka kuko umuntu ashobora gusobanura ibintu uko bitagenze kandi yarabibayemo abizi neza.

Yabajijwe niba hari abantu bahuye we ubwe bafashwe ku ngufu mu gihe cya Jenoside yakorewe Abatutsi, avuga ko mu Rwanda bahuye benshi, kandi bagerageza kubivuga, bakaba biganjemo abagore bafashwe ku ngufu.

Yavuze ko biba byiza iyo umuntu avuga ubuhamya bwe mu rurimi rwe ngo kuko bituma muri we hasohokamo ukuri kwinshi hagendewe ku buryo akoresha, uko akurikiranya amagambo, ibimenyetso akoresha n’ibindi.

Yasobanuye kandi umwihariko w’abagore bafashwe ku ngufu mu gihe cya Jenoside yakorewe Abatutsi, nk’umuntu wahuye na bo, avuga ko mbere na mbere hari abagiye basaba abo bagore kuvuga uko bafashwe kandi ngo babivuge uko byagenze, kandi ari ibihe bishaririye ku banyarwandakazi (hari n’abo usanga barabikorewe inshuro nyinshi). Ati “ariko ndashima ubu ko batagisabwa kubivuga batyo.”

Yavuze ko mu Rwanda abakoze ibyo baba babizi neza ko bakora amahano, ariko kandi hakaba hari n’ababikora bumva ko ari nk’igihembo bari kwiha, ashimangira ko umwihariko wo uhari kuko birenze kubyumva

Me Jean Yves Dupeux uri mu bunganira Munyemana yamubajije uko bakwitwara ngo babone ukuri ku mutangabuhamya uri gushinja umukiriya wabo. Diane ati: "uragira ngo ngusubize gute? Sinzi icyo wifuza ko nkubwira".

Me Yves ati “hari ukuntu mu buhamya ushinja aba avuga ibintu ukumva akenshi hari abavuga ko babwiwe, cyangwa n’abavuga ko babibayemo kandi babishinja umuburanyi, ati ni gute twamukururira mu kuvuga ukuri?”

Diane yasubije avuga ko biterwa n’uburyo bamubaza, ariko akenshi uvuga ukuri mu mvugo birumvikana bitewe n’uko asobanura, uko abasubiza, uko byagenda kose hari ikivamo kigaragaza ko harimo ukuri. Ababwira ko atigisha uko bavoma mu muntu ukuri mu kubaza.

Me Yves ati: "nta buryo bwo kubaza buhari ngo umenye ukuri?"

Diane ati: "ntabwo"

Dr Sosthène Munyemana muri uru rubanza aregwa ibyaha byibasiye inyokomuntu, no gushishikariza abaturage kwica Abatutsi mu Mujyi wa Butare.

Biteganyijwe ko ruzarangira tariki 22 Ukuboza uyu mwaka humviswemo abatangabuhamya 70.

Dr Sosthène Munyemana

Dr Munyemana w’imyaka 68, nyuma ya Jenoside yakorewe Abatutsi, yahungiye mu Bufaransa kuri ubu akaba ari mu kiruhuko cy’izabukuru.

Munyemana wari uzwi ku izina ry’Umubazi wa Tumba (le boucher de Tumba), avugwaho uruhare rukomeye muri Jenoside yakorewe Abatutsi mu Murenge wa Tumba ho mu Karere ka Huye no mu cyahoze ari Perefegitura ya Butare muri rusange.

Ubwo Jenoside yabaga mu 1994, Munyemana yari umwarimu muri Kaminuza y’u Rwanda mu ishami ry’ubuvuzi, akabifatanya no kuvura indwara z’abagore mu bitaro bya Kaminuza bya Butare (CHUB).

Munyemana aregwa ibyaha byibasiye inyokomuntu, no gushishikariza abaturage kwica Abatutsi mu Mujyi wa Butare.

Abamushinja batanga urugero aho tariki 17 Mata 1994, Konseye Bwanakeye François yahamagaje inama yagombaga guhuza abaturage b’i Tumba ngo bige ku bijyanye n’umutekano, icyo gihe bemeza ko hajyaho za bariyeri n’amarondo. Icyo gihe muri Segiteri Mubumbano inzu zarashyaga nubwo ngo Munyemana we atabifashe uko.

Munyemana ngo yahise avuga ijambo rikarishye ashishikariza abantu kwica Abatutsi ati: “Umwanzi aturimo, nshumbikiye Abahutu 15 bavuye i Kigembe baje bahunga Inkotanyi zinjiriye i Burundi".

Bamwe mu batangabuhamya bazi Munyemana bavuga ko kandi mu gihe cya Jenoside, yambaraga amashara afite n’icumu, nyuma ngo yaje no kwitwaza imbunda. Ngo yagiraga urufunguzo rw’ibiro bya Segiteri ya Tumba aho yafungiraga Abatutsi mbere yo kubica.

Bivugwa ko Abatutsi bari barafungiranwe muri ibyo biro bapfuye nabi kuko bimwe amazi, ibyo kurya ndetse n’ubuvuzi.

Mu iperereza ryose ryakozwe, Munyemana ntiyigeze ahakana ko yari afite urufunguzo rw’ ibiro bya Segiteri ya Tumba, akavuga ko mu gihe cya Jenoside byabaye ubuhungiro ku bantu bashakaga aho bahungira.

Bivugwa ko abishwe mbere bari abize, abacuruzi n’abandi.

Inkuru dukesha ikinyamakuru Jeune Afrique ivuga ko Munyemana yari inshuti ya Kambanda wari Minisitiri w’Intebe mu gihe cya Jenoside ndetse ko iyo yajyaga i Butare Kambanda yararaga iwe, maze na we agashyira mu bikorwa amabwiriza yo kwica Abatutsi.

Ibi byatangiye nyuma y’uko MDR imaze gucikamo ibice bibiri, Kambanda atakaje umwanya we nka Perezida wa MDR muri Butare, ahanganye na Agathe Uwiringiyimana, Munyemana akaza ku isonga mu guteza umwuka mubi muri Butare icyo gihe.

Muri uru rubanza hazumvwa abatangabuhamya barenga 70.

Abagiye kunganira Munyemana Sosthène ari bo Jean-Yves Dupeux na Florence Bourg bavuze ko bakurikije igihe gishize Jenoside imaze ibaye mu rubanza batakabaye bashingira ku buhamya n’amatariki ngo bakurikirane umukiriya wabo.

Bati: "Ibi byose bishingiye gusa ku buhamya n’amatariki yo mu myaka 29 ishize. Biragoye cyane gushingira ku buhamya bushingiye ku bintu nk’ibyo bya kera. Mu by’ukuri, ikibazo cy’igihe ni ingenzi ku bibazo bifitanye isano na Jenoside.”

Rachel Lindon ugiye kunganira abaregera indishyi muri uru rubanza na IBUKA muri rusange, yavuze ko abatangabuhamya 26 ari bake cyane ukurikije ibyabaye, ariko avuga ko bizeye ubutabera. Ati: “Dutegereje ko ubutabera buzabaho".

Ibi kandi byanenzwe na Alain Gauthier uyobora umuryango bise ‘Collective of Civil Plaintiffs for Rwanda (CCPR)’, ugamije gukora ubushakashatsi ku madosiye y’Abanyarwanda bakekwaho Jenoside yakorewe Abatutsi mu 1994 bakidegembya mu Bufaransa batarigeze bakurikiranwa n’urukiko.

Yemeje ko abatangabuhamya ari bake cyane, avuga ko bitangaje kuba mu manza zose zizaba ubu ariko bizagenda, ahamya ko bitazagenda neza.

Munyemana ni muntu ki?

Munyemana yavutse tariki ya 9 Ukwakira 1955, avukira i Mbare, Komini Musambira muri Gitarama. Ababyeyi be ni Kangabo Balthazar na Nyirahabimana Charlotte.

Arangije amasomo muri Kaminuza i Butare yagiye gukomereza amashuri muri kaminuza ya Bordeaux II mu Bufaransa mu bijyanye n’indwara z’abagore (Gynécologie).

Yaragarutse akora mu bitaro bya Kaminuza ari nako atanga amasomo muri Kaminuza y’u Rwanda Ishami ry’Ubuvuzi. Mu gihe cya Jenoside yakorewe Abatutsi yari atuye muri Selire ya Gitwa i Tumba. Yashakanye na Muhongayire Fébronie babyarana abana batatu.

Itangazo ryashyizwe ahagaragara na CNLG rivuga ko muri Jenoside, umugore we atari mu Rwanda ahubwo yari mu Bufaransa.

CNLG yavugaga ko Munyemana we avuga ko yari muri konji guhera tariki 29 Werurwe kugera 9 Gicurasi 1994, ibi bikaba byaramuhaye umwanya uhagije wo gukora Jenoside.

Mu 1995 Umuryango Collectif Girondin pour le Rwanda” na “International Federation for Human Rights” (FIDH), zatanze ikirego kivuga ku ruhare rwe muri Jenoside, inkiko zigisuzuma muri 2001.

Nyuma yaho u Rwanda rwatanze impapuro zimufata, ashyirwa ku rutonde rwa Interpol guhera mu 2006. Muri 2008 yimwe sitati y’ubuhunzi naho tariki ya 16 Mutarama 2011 hemejwe ko akurikiranwa ku cyaha cya Jenoside (mis en examen pour Génocide), yamburwa urwandiko rw’inzira ndetse ategekwa kwitaba no gusinya kuri “gendarmerie” buri gihe.

Mu 2010 u Rwanda rwasabye ko yoherezwa mu Rwanda ariko u Bufaransa buranga.

Urubanza rwe biteganyijwe ko rutangira kuri uyu wa Mbere tariki 13 Ugushyingo rukazasozwa tariki 22 Ukuboza 2023.

Urukiko mpanabyaha rw’i Paris mu Bufaransa aho Sosthène Munyemana azisobanurira

Hari hashize imyaka 24 ubushinjacyaha bugerageza uko Munyemana yaryozwa ibyaha ashinjwa ariko inkiko zo mu Bufaransa zigakomeza kumugira umwere. Kuri ubu umucamanza umukurikirana yemeje ko hari ubuhamya bugaragaza ko akwiye kwisobanura ku byaha ashinjwa.

Impuzamiryango y’amashyirahamwe aharanira ko abakoze ibyaha bya Jenoside mu Rwanda bagezwa imbere y’ubutabera (CPCR) ihagarariwe n’Umufaransa Alain Gauthier, yakomeje kugaragaza ko itishimiye kuba Munyemana atagezwa imbere y’ubutabera.

Mu itangazo yashize ahagaragara, Alain Gauthier yatangaje ko nyuma y’uko ubusabe bwabo bwumviswe ubu bagiye gukurikirana dosiye y’undi Munyarwanda witwa Laurent Bucyibaruta wahoze ari Perefe wa Peregitura ya Gikongoro. Uwo nawe akurikiranywe kuva mu 2.000 ariko ubutabera ntacyo buranzura ku itabwa muri yombi rye.

Tariki 29 Werurwe 2019 kandi hategerejwe urundi rubanza rw’uwitwa Claude Muhayimana nawe ukurikiranyweho ibyaha bya Jenoside. Bose bagiye bamenyekana binyuze mu bikorwa byo gutunga agatoki bikorwa na CPCR.