Kayishema Fulgence (Ifoto: AFP)

Inkuru y’Ibiro ntaramakuru by’Abafaransa, ivuga ko Kayishema w’imyaka 63 yagaragaye mu rukiko yambaye ikoti ry’ubururu, ipantaro y’umukara, yicaye mu kazu kabarizwamo abakekwaho ibyaha, ngo yari atuje ubwo umushinjacyaha yasomaga ibyaha ashinjwa.

Umushinjacyaha Nathan Adriaanse wari muri uru banza, yashinje kayishema ibyaha bya Jenoside birimo kuba umufatanyacyaha w’abakoze Jenoside, ubwumvikane bugamije gukora Jenoside n’ibyaha byibasiye inyoko muntu, byakorewe muri Komine Kivumu muri Mata 1994.

Kayishema yari amaze igihe ashakishwa, akurikiranyweho uruhare muri Jenoside yakorewe Abatutsi mu 1994, mu cyahoze ari Perefegitura ya Kibuye muri Komine Kivumu, by’umwihariko agashinjwa guhirika Kiriziya y’i Nyange yaguyemo Abatutsi barenga 3000 bari bahahungiye bazeye kuhakirira.

Umushinjacyaha Mukuru w’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT), Dr Serge Brammertz, yavuze ko mu gihe cya vuba, Fulgence Kayishema, azoherezwa kuburanira mu Rwanda.

Ikinyamakuru The New Times cyavuganye na Serge Brammertz, akagitangariza ko yizeye ko Kayishema azoherezwa mu Rwanda mu byumweru bike biri imbere.

Serge Brammertz yavuze ko hakiri kare kuba yatanga ibisobanuro birambuye ku bigiye gukorwa nyuma y’uko Kayishema afatwa, gusa akaba yagaragaje ko yizera ko azoherezwa kuburanira mu Rwanda.

Biramutse bikozwe byaba bihuye neza n’icyifuzo cy’umuryango uharanira inyungu z’Abarokotse Jenoside (IBUKA), kuko Kayishema akimara gufatwa Umunyamabanga Nshingwabikorwa wa Ibuka, Ahishakiye Naphtal, yavuze ko byaba byiza azanwe mu Rwanda.

Ati “Nibyo koko yafashwe nyuma y’igihe kinini ashakishwa. Icyo twifuza nk’abarokotse ni uko yazanwa mu Rwanda aho yakoreye ibyaha, urubanza rwe rugakurikirwa n’abo yahemukiye mu rurimi bumva neza”.

Rwamasirabo Aloys ufite abana icyenda baguye muri Kiriziya ya Nyange, yavuze ko kuri we yumva yazanwa mu Rwanda, akareba ibyo yasize akoze ndetse nuko kuri ubu hameze nyuma y’imyaka 29 ishize yihishahisha.

Kuri ubu Kayishema afungiwe muri Gereza ya Pollsmoor mu Mujyi wa Cape Town, aho ategerereje icyemezo gishobora gutuma yoherezwa mu Rwanda.

Mu rubanza rw’uyu munsi, urukiko rwasubitse iburanisha rishyirwa ku itariki ya 2 Kamena 2023.

Fulgence Kayishema yatawe muri yombi ku wa Gatatu nyuma ya Saa Sita, mu gikorwa inzego z’ubutabera za Afurika y’Epfo zakoze zifatanyije n’Ubushinjacyaha Bukuru bwa IRMCT.

Urukiko Mpuzamahanga rwashyiriweho u Rwanda i Arusha muri Tanzania, rwamushyiriyeho impapuro zo kumuta muri yombi mu 2001.

Inyandiko y’ikirego ya ICTR yerekana ko muri Mata 1994, Kayishema n’abandi bemeranyije ku buryo bwo kwica no kurimbura Abatutsi muri Kivumu.

Hagati ya tariki 7 na 10 Mata 1994, abayobozi b’ibanze na polisi ya komine bagabye ibitero ku Batutsi bamwe baricwa, abandi bahungira kuri Paruwasi ya Nyange.

Tariki 15 Mata 1994, babyutse banaga amagerenade kuri Kiriziya yanga kugwa hasi, ndetse bakomwa mu nkokora n’imvura yagwaga, bukeye bwaho nibwo tariki 16 Mata 1994 bagarutse bahirika Kiriziya bakoresheje imashini nini ya Tingatinga, bityo igwira Abatutsi bari bahahungiye.

Kayishema Fulgence (Ifoto: AFP)

Itangazo ryatanzwe n’Umujyanama wihariye wa UNOSAPG, Alice Wairimu Nderitu, rivuga ko uyu muryango wishimiye ifatwa rya Kayishema Fulgence ryabereye muri Afurika y’Epfo mu gace ka Paarl rigizwemo uruhare n’inzego zinyuranye. Inzego zagize uruhare muri iri fatwa harimo Urwego rwasimbuye Urukiko Mpuzamahanga rwa Arusha (IRMCT) ndetse n’inzego z’ubuyobozi za Afurika y’Epfo.

Madamu Alice Wairimu Nderitu yanditse ati: “Nishimiye amakuru y’iri tabwa muri yombi kandi nizeye ko biranashimisha abacitse ku icumu n’imiryango y’abazizize Jenoside yakorewe Abatutsi mu Rwanda mu 1994”.

Iri tangazo rikomeza rivuga ko Fulgence Kayishema akekwaho kugira uruhare mu rupfu rw’abantu barenga 2000 harimo abagore, abagabo n’abana bari bahungiye kuri Kilizya Gatolika ya Nyange mu gihe cya Jenoside yakorewe Abatutsi. Muri 2001 Urukiko Mpuzamahanga Mpanabayaha Rwashyiriweho u Rwanda (ICTR) Rwamureze kandi rumukurikiranaho icyaha cya Jenoside, umugambi wo gukora Jenoside, ubufatanyacyaha muri Jenoside, ibyaha byibasiye inyokomuntu bishingiye ku bwicanyi n’ibindi byaha byakorewe mu cyahoze ari Komini Kivumu muri Perefegitura ya Kubuye mu 1994.

Uyu mujyanama avuga ku myaka irenga 20 Kayishema amaze ashakishwa yanditse ati: ”Guta muri yombi abakukiranyweho ibyo bakoze ni intambwe y’ingenzi yerekeye ibikorwa nyuma ya Jenoside”.

Yakomeje ati: “Iyo abakurikiranyweho ibyaha bikomeye bakoze badatawe muri yombi, tuba twatsinzwe dushobora kubona amateka yisubiramo”.

Yasoje avuga ko iyo ubutabera butanzwe bitagira uruhare gusa mu gukumira insubiracyaha ahubwo ko bigira n’uruhre mu bwiyunge ndetse no gukira ihungabana riterwa na Jenoside n’ibindi byaha bikomeye. Ibyo bifasha mu gusubiza agaciro abambuwe ubzima ndetse n’imiryango yabo. Abagishakishwa ku bw’uruhare bagize muri Jenoside yakorewe Abatutsi muri Mata 1994, Alice Wairimu Nderitu yabasabye kumanika amaboko bakishyikiriza ubutabera bakabazwa ibyo bakoze.

Nyuma yo guhunga igihugu, Kayishema yasabye ubuhungiro muri Eswatini, igihugu kiri rwagati ku butaka bwa Afurika y’Epfo, cyahoze kitwa Swaziland, ahageze yiyita Umurundi ku mazina ya Fulgence Minani.

Muri Eswatini ahavuye yerekeje muri Malawi yiyita Positani Chikuse, arakomeze yerekeza muri Afurika y’epfo ku mazina ya Fulgence Dende Minani, amaze kubona ibyangombwa arongera asubira ku izina rya Positani Chikuse yari yariyise ari muri Malawi.

Atabwa muri yombi kuwa 24 Gicurasi, yakoraga akazi k’ubusekirite (gucunga umutekano), mu gihe mbere ya Jenoside yakorewe Abatutsi mu Rwanda yari umuyobozi wa polisi ya komine (IP).

Urwego rwasigariyeho Inkiko Mpuzamahanga Mpanabyaha (IRMCT), ruvuga ko Kayishema wari umaze imyaka isaga 20 ashakishwa n’ubutabera, ashinjwa kuba ari we wicishije Abatutsi babarirwa mu 3000 barimo abana, abagore, abagabo, abakecuru n’abasaza bari bahungiye kuri kiliziya ya Nyange mu gihe cya Jenoside yakorewe Abatutsi mu 1994.

Muri 2001 ni bwo ibirego bishinja Fulgence Kayishema byagejejwe mu Rurukiko Mpanabyaha Mpuzamahanga rwashyiriweho u Rwanda (ICTR).

Akurikiranyweho ibyaha bya jenoside, ubufatanyacyaha muri jenoside n’ibyaha byibasiye inyokomuntu, jenoside, kwica n’ibindi byaha byakorewe ahahoze ari muri Komine Kivumu, Perefegitura ya Kibuye mu gihe cya Jenoside yakorewe Abatutsi.

Dosiye imurega ivuga ko ku itariki 15 Mata 1994, Kayishema, ari hamwe n’abandi bicanyi barimo padiri Seromba na Obedi Ruzindana, bishe abantu babarirwa mu 3000 barimo abagabo, abagore, abana n’abakuze bari bahungiye kuri kiliziya ya Nyange.

Kayishema we ubwe ashinjwa no kugira uruhare mu gutegura no gushyira mu bikorwa ubwicanyi, kugura no gutanga peterori yakoreshejwe bashaka gutwika urusengero rwari rwahungiyemo Abatutsi.

Amaze kubona ko uwo mugambi wanze, Kayishema n’abandi bagizi ba nabi bamufashaga bahise bajya kuzana tingatinga (Caterpillar) basenya inkuta za kiliziya zitura hejuru y’abari bahungiyemo, barangije Kayishema na bagenzi be bategeka ko abishwe bavanwamo bakanjyanwa mu byobo rusange hashize iminsi ibiri.

Iperereza ryatumye Kayishema atabwa muri yombi ryagizwemo uruhare n’ibihugu bitandukanye birimo u Rwanda, Leta Zunze Ubumwe za Amerika, Afurika y’Epfo na Eswatini binyuze mu nzego z’ubutabera n’izishinzwe abinjira n’abasohoko.

Fulgence Kayishema yatawe muri yombi nyuma y’igihe kirekire yari amaze yihisha (Ifoto: AFP)

Muri uko kubundabunda kwe yihisha ubutabera, Fulgence Kayishema yabifashwagamo n’umuyoboro w’abantu yizeraga barimo abo mu muryango we, abahoze mu ngabo zatsinzwe, abo mu nyeshyamba za FDLR ziganjemo abagize uruhare muri Jenoside yakorewe Abatutsi n’abandi bashyigikiye Jenoside yakorewe Abatutsi binyuze mu cyo bise ingengabitekerezo ya Hutu Power.

Kuvumburwa no gutabwa muri yombi bya Kayishema byabaye ah’abagabo n’akazi katoroshye kamaze umwaka wose, nk’uko byemezwa n’Urwego rwasigariyeho Inkiko Mpuzamahanga Mpanabyaha (IRMCT).

Kuva mu 2020, Itsinda ry’Ubushinjacyaha rishinzwe gutahura abantu bakihishe ubutabera rimaze kuvumbura abantu batanu bashinjwa uruhare muri jenoside barimo Félicien Kabuga urimo kuburana, Augustin Bizimana wapfiriye muri Brazaville mu 2000, Protais Mpiranya wapfiriye muri Zimbabwe mu 2006, na Phéneas Munyarugarama wapfiriye muri RDC mu 2002.

Abandi bagishakishwa ni Charles Sikubwabo, Charles Ryandikayo na Aloys Ndimbati.

Kayishema Fulgence wari warashyiriweho impapuro zimuta muri yombi kubera uruhare akekwaho mu iyicwa ry’Abatutsi biciwe muri Kiliziya ya Nyange tariki 15 na 16 Mata mu 1994 yatawe muri yombi kuwa Gatatu tariki 24 Gicurasi 2023.

Kayishema Fulgence yahoze yari umugenzacyaha mu yahoze ari Komine Kivumu, imwe mu makomine icyenda yari agize Perefegitura ya Kibuye.

Umunyamabanga Nshingwabikorwa wa IBUKA, Ahishakiye Naphtal, yavuze ko bishimiye aya makuru, dore ko Kayishema yafashwe nyuma y’igihe kinini ashakishwa.

Ahishakiye avuga ko Kayishema agiye gushyikirizwa ubutabera maze agakurikiranwa ku ruhare rwe muri Jenoside.

Rwamasirabo Aloys warokokeye kuri Kiliziya y’i Nyange, avuga ko byakabaye byiza ari uko azanywe kuburanishirizwa mu Rwanda, akareba amarorerwa yakoreye i Nyange n’uko hameze ubu. Ati “Twishimye ariko bibaye byiza yaza akahareba uko hameze, Kiliziya yasenye ndetse n’urwibutso ruruhukiyemo abacu ruhari”.

Rwamasirabo ufite abana icyenda baguye muri iyo Kiliziya avuga ko Kayishema yafatanyije na Padiri Seromba, Burugumesitiri Ndahimana Gregoire, Kanyarukiga Gaspard, Ndungutse n’abandi bari ku isonga mu kurimbura Abatutsi bari bahungiye muri Kiliziya.

Rwamasirabo avuga ko ku wa 15 Mata 1994, baje gutera Gerenade ndetse banagerageza kuhatwika biranga.

Ati “Ku wa 15 Mata batwitse Kiliziya yanga gushya ndetse bateramo Gerenade biranga, Abatutsi bagerageje kwirwanaho batera Interahamwe amabuye bazigeza hafi y’ahari isantere yitwa ku ishusho maze umusirikare umwe yurira inzu abateramo Gerenade bamwe barapfa abandi bacika intege basubira inyuma. Bazanye Tingatinga itangira guhirika Kiliziya ariko imvura iragwa bajya kuyibika kuri Komine bukeye tariki 16 Mata 1994 nibwo bagarutse barayihirika maze irimbura Abatutsi bose bari bahahungiye”.

Umunyamabanga Nshingwabikorwa wa IBUKA, Ahishakiye Naphtal, avuga ko Kayishema na Padiri Seromba n’abandi bayobozi batandukanye bagize uruhare mu gusenyeraho Kiliziya Abatutsi barenga 3000 bari bahahungiye.

Ahishakiye ati: “Ubwo yatawe muri yombi, igikurikiraho ni uko agiye kujyanwa mu nkiko. Icyo twifuza nk’Abarokotse Jenoside ni uko yakabaye azanwa mu Rwanda, urubanza rwe rugakurikiranwa n’Abanyarwanda ndetse n’Abarokotse rukaba mu rurimi bumva, bari hafi nta kiguzi kindi bisaba byaba ari ingenzi”.

Avuga ko kandi bifuza ko urubanza rwe rwahita rutangira nta yandi mananiza ku buryo aryozwa ibyo yakoze ntibibe nk’uko urubanza rwa Kabuga Félicien rwagenze aho bakomeza gusubika urubanza, bavuga ko afite ibibazo by’ubuzima.

Fulgence Kayishema

Umushinjacyaha Mukuru w’Urwego rwasigariyeho Inkiko Mpuzamahanga Mpanabyaha, (IRMCT), Serge Brammertz, yatangaje ko uyu Kayishema yari amaze imyaka irenga 20 yihisha ubutabera.

Serge Brammertz avuga ko bagerageje uburyo bwo guta muri yombi inshuro nyinshi Fulgence Kayishema ntibikunde, kubera ko hatabagaho ubufatanye n’ubuyobozi bw’igihugu yabaga abarizwagamo, ariko ubu arashimira ubuyobozi bwa Afurika Y’Epfo, ubufatanye yagaragaje bwo kumuta muri yombi agashyikirzwa ubutabera, akaryozwa ibyo yakoze.

Ati “Itabwa muri yombi rye rigamije ko nibura akurikiranwa n’inkiko, ku byaha akekwaho bya Jenoside yakorewe Abatutsi muri Mata 1994”.

Serge Brammertz avuga ko Jenoside ari icyaha gikomeye, Umuryango mpuzamahanga wiyemeje ko abayikoze bazakurikiranwa kandi bagahanwa. Iri fatwa rya Kayishema rigaragaza ko abayikoze bazakomeza gukurikiranwa bakabihanirwa, hatitawe ku gihe n’imyaka bizamara.

Kayishema akurikiranyweho kuba yaragize uruhare rukomeye mu bwicanyi bw’Abatutsi basaga 3000, bwakorewe kuri Kiliziya ya Nyange, ubu ni mu Karere ka Ngororero.

Mu gihe cya Jenoside yari umugenzacyaha ku rwego rw’icyahoze ari Komine, akaba yarafatanyije n’interahamwe ndetse akanabatoza uburyo bwo kwica Abatutsi, bakoresheje intwaro gakondo.

Kayishema kandi ari mu bateguye inama zo gukora Jenoside, ndetse akanakangurira interahamwe n’abahutu kuyishyira mu bikorwa.

Ari mu bazanye imashini yo gusenyera hejuru Kiliziya ya Nyange Abatutsi bari bayihungiyemo, nyuma iyo mashini ikagenda ica hejuru y’imirambo.

Amerika yashyizeho igihembo cya $5,000,000 ku muntu uzatanga amakuru kuri Kayishema Fulgence, ndetse n’abandi bantu bagishakishwa bagize uruhare muri Jenoside yakorewe Abatutsi mu 1994.

Biteganyijwe ko Fulgence Kayishema wagize uruhare muri Jenoside, azitaba urukiko ku wa Gatanu tariki 26 Gicurasi 2023 ruri i Cape Town.