Ibyo birori byanitabiriwe na Amb. Abdoulaye DIOP; Minisitiri w’Ububanyi n’Amahanga n’Ubutwererane Mpuzamahanga w’Igihugu cya Mali wari uhagarariye Guverinoma, Bwana Mossa Ag ATTAHER, Minisitiri ushinzwe Abanyemali baba mu Mahanga n’Umuryango w’Ubumwe bwa Afurika, na Bwana Redouane AG MOHAMED ALI, Minisitiri Komiseri ushinzwe ukwihaza mu biribwa.

Mu ijambo rye, Minisitiri Abdoulaye DIOP yashimye umubano uri hagati y’u Rwanda na Mali, yashimye ibyiza byinshi u Rwanda rwagezeho mu myaka 29 ishize rubohowe, ashima by’umwihariko ubudaheranwa bw’Abanyarwanda nyuma ya Jenoside yakorewe Abatutsi mu 1994, bushingiye ku buyobozi bwiza bwa Perezida Paul Kagame n’Umuryango FPR-Inkotanyi, wabohoye u Rwanda ndetse n’amahitamo y’Abanyarwanda y’ubumwe n’ubwiyunge, kureba imbere ariko batibagiwe amateka mabi banyuzemo ya Jenoside yakorewe Abatutsi.

Yagaragaje ko nk’Umunyemali wasuye u Rwanda akibonera uburemere bwa Jenoside yakorewe Abatutsi, hari byinshi amahanga yakwigira ku Rwanda harimo kwishakamo ibisubizo hashingiwe ku muco aho kubitega ku mahanga, kwigirira icyizere no kureba kure.

Yagaraje ko Perezida Kagame yagize uruhare mu gutuma Umugabane wa Afurika n’abawutuye, bagira ishema ryo kuba Abanyafurika bihesha agaciro, agaruka no ku ruhare rwe rukomeye mu mavugururwa y’Umuryango w’Ubumwe bwa Afurika.

Yagaragaje ko ibyo abantu batekereza ko bidashoboka, bishoboka iyo hari ubuyobozi bwiza nk’uko Perezida Kagame yakuye u Rwanda kure ubu rukaba rufite ijambo mu ruhando mpuzamahanga, kandi n’Abanyamali nk’Abanyafurika bibateye ishema.

Uwari uhagarariye Ambasade y’u Rwanda muri Mali ifite icyicaro i Dakar, Guillaume Serge Nzabonimana, Umujyanama wa Mbere muri iyo Ambasade, yagaragaje ko ari umunsi ukomeye mu mateka y’u Rwanda n’Abanyarwanda, kuko ubibutsa ubutwari bw’Ingabo zari iza FPR-Inkotanyi, zitanze ubutizigama, zigahagarika Jenoside yakorerwaga Abatutsi, zikabohora Igihugu n’Abanyarwanda.

Yagarutse ku butumwa Perezida Kagame yageneye Abanyarwanda kuri uwo munsi, aho yongeye kwibutsa amahitamo bakoze yo kuba umwe, kwihitiramo ibibabereye no kureba kure.

Yagaragaje ko kubera ubuyobozi bwiza burangajwe imbere na Perezida Kagame, Igihugu kitazimye ahubwo cyabonye amahoro n’umutekano, Abanyarwanda bongera kubona agaciro. Mu myaka 29 ishize, hubatswe inzego zishingiye kuri Demokarasi n’imiyoborere myiza, ubutabera kuri bose, uburenganzira bwa muntu harimo ihame ry’uburinganire n’ubwuzuzanye, no guharanira kwigira, aho Abanyarwanda ubwabo bishakamo ibisubizo bikemura ibibazo byabo.

Amb. Abdoulaye Diop, Minisitiri w’Ububanyi n’Amahanga n’Uhutwererane Mpuzamahanga

Hashyizweho icyerekezo 2025, nyuma y’icya 2020 aho imibereho myiza y’Abanyarwanda yatejwe imbere mu nzego zose, by’umwihariko mu burezi no mu buvuzi. Iterambere ry’ubukungu, ibikorwa remezo, ikoranabuhanga, kubungabunga ibidukikije, ubukerarugendo, umubano n’ibindi bihugu n’uburyo u Rwanda rwakira abarugana. Ukwibohora kwabereye Abanyarwanda isoko yo kureba mu cyerekezo kimwe cy’iterambere no kurinda ibyagezweho.

Yasabye Abanyarwanda by’umwihariko abakiri bato, gusubiza amaso inyuma bakareba amateka mabi banyuzemo, yagejeje u Rwanda kuri Jenoside yakorewe Abatutsi mu 1994 bakayakuramo amasomo atuma barushaho kurwanya ikibi, cyasubiza inyuma Igihugu kandi bakishimira ubuyobozi bwiza n’aheza bwabagejeje.

Alice Gasarabwe, Umuyobozi w’Umuryango w’Abanyarwanda baba muri Mali

Ibi birori byaranzwe n’umuvugo wateguwe n’Umunyemali, Salif Sanogo, warataga ibyiza u Rwanda rwagezeho, nyuma y’ibihe bibi rwanyuzemo, indirimbo nyarwanda zirata ibigwi by’Ingabo zahagaritse Jenoside zikabohora u Rwanda.

Inkuru dukesha Ambasade y’u Rwanda muri Senegal

Ambasaderi Jean Pierre Karabaranga

Ni igikorwa cyitabiriwe n’Abanyarwanda ndetse n’inshuti z’u Rwanda, abahagarariye ibihugu byabo n’Imiryango Mpuzamahanga muri Senegal, kibera kuri Monument de la Renaissance Africaine i Dakar.

Birame Mbarou Diouf, Umuyobozi Mukuru wa Monument de la Renaissance Africaine, yashimye umubano mwiza uri hagati y’u Rwanda na Senegal, n’imikoranire myiza hagati ya Ambasade y’u Rwanda muri Senegal na Monument de la Renaissance Africaine, mu bikorwa binyuranye by’umwihariko ubufatanye bwabaranze mu gutegura umunsi wo Kwibohora k’u Rwanda.

Yagaragaje ko igikorwa cyo gucana ingazi zigera ku 198 n’ishusho nini biranga Monument de la Renaissance Africaine, mu mabara y’ibendera ry’u Rwanda mu gihe hizihizwa ukwibohora kw’Abanyarwanda, atari ishema ku Banyarwanda gusa ahubwo ari ishema ku Banyafurika bose.

Ambasaderi w’u Rwanda muri Senegal, Jean Pierre Karabaranga, yagarutse ku mateka y’urugamba rwo guhagarika Jenoside yakorerwaga Abatutsi, no kubohora Igihugu byakozwe n’Ingabo zari iza FPR-Inkotanyi, zari ziyobowe na Perezida Paul Kagame.

Yerekanye ko mu gihe cy’ubukoloni na Leta zabukurikiye kuri Repubulika ya mbere n’iya kabiri, ubuyobozi bw’u Rwanda bwaranzwe na politiki mbi yo kwigisha ivangura n’amacakubiri, aho guharanira ubukungu n’iterambere by’Abanyarwanda, nubwo u Rwanda rwitwaga ko rwabonye ubwigenge mu 1962.

Yanagarutse kandi ku byo u Rwanda rumaze kugeraho bishingiye ku mutekano n’amahoro Igihugu gifite, ko mu myaka 29 ishize cyiyemeje kujya mu nzira y’iterambere ridaheza, ari ku Banyarwanda n’abanyamahanga bakomeje kugishoramo imari. Hari kandi ko gusura u Rwanda no kurushoramo imari byoroshye, ari ukuba abantu bahabwa Visa bageze ku kibuga kimwe no ku mipaka yarwo, uko kubona ibyangombwa byo gushora imari mu Rwanda byihutishwa.

M.Birame Mbarou DIOUF, Umuyobozi Mukuru wa Monument de la Renaissance Africaine

Amashuri na za kaminuza biri ku rwego mpuzamahanga, ubu yakira abanyeshuri bavuye imihanda yose. Gahunda yo kwakira inama zo ku rwego mpuzamahanga no guteza imbere ubukerarugendo, no kwakira neza abarusura.

Yagarutse ku gushimangira umubano harimo no kuba Abayobozi bo ku rwego rwo hejuru, bitabira gahunda zibera muri ibyo bihugu byombi harimo n’ingendo z’Abakuru b’ibyo bihugu, atanga ingero z’inama ya kabiri yo gutera inkunga Ibikorwa remezo muri Afurika yabereye muri Senegal muri Gashyantare 2023, yitabiriwe na Perezida Kagame, ndetse n’umwaka wa 2022 akaba yari yitabiriye umuhango wo gutaha Stade Abdoulaye WADE.

Muri Mutarama 2023 na Minisitiri w’Intebe w’u Rwanda akaba yaritabiriye indi nama ku bijyanye no Kwihaza mu Biribwa ku Mugabane wa Afurika. Bikaba binateganyijwe ko Perezida Macky Sall azitabira inama ya Women Deliver, izabera mu Rwanda muri uku kwezi kwa Nyakanga, izaba ibaye ku nshuro ya mbere ku mugabane wa Afurika.

Minisitiri Samba Ndiobène KA wari Umushyitsi Mukuru

Yabonyeho no gushimira Abanya-Senegal benshi bagiye mu Rwanda muri uyu mwaka, barimo n’Abayobozi b’Uturere, abashoramari n’itsinda ry’abitwa ‘influencers’ ku mbuga nkoranyambaga, biyemeje gushishikariza abandi gusura u Rwanda.

Uwari uhagarariye Guverinoma ya Senegal, Samba Ndiobene KA, Minisitiri w’Iterambere ry’Abaturage, ubufatanye n’uburinganire bw’Abenegihugu, yagaragaje ko kuri iyo tariki ya 04 Nyakanga 1994 aribwo amateka mabi u Rwanda rwanyuzemo yahindutse, nyuma yo guhagarika Jenoside yakorerwaga Abatutsi, Igihugu kigatangira urugendo rwo kiyubaka kugera ku rwego rwo kuba intangarugero mu gushyira hamwe, mu mibanire myiza, umutekano, n’imiyoborere myiza.

Yashimye byimazeyo imiyoborere ya Perezida Paul Kagame, iterambere rigaragarira buri wese yagajeje ku Banyarwanda kandi n’abandi Banyafurika bafatiraho urugero, by’umwihariko abakiri bato. Yagaragaje ko nyuma yo komora ibikomere byatewe na Jenoside yakorewe Abatutsi, u Rwanda rwateye intambwe ishimishije mu kubanisha Abanyarwanda, guteza imbere demokarasi no guhindura imibereho y’abaturage.

Yagaragaje ko u Rwanda na Senegal bifite amateka abihuza; ko ubutwari bwaranze Capitaine Mbaye Diagne, Umusirikare wa Senegal wari mu Rwanda mu gihe cya Jenoside yakorewe Abatutsi mu 1994 akitangira kurokora abahigwaga, akaza no kuhagwa, ari ikimenyetso n’isomo ry’ubumuntu bishimangira ubumwe buri hagati y’ibihugu byombi.

Yagaragaje ko umubano mwiza usanzwe hagati y’ibyo bihugu, abayobozi babyo bawushyize ku rundi rwego hashingwa za Ambasade muri ibyo bihugu n’ubufatanye ku rwego mpuzamahanga, kandi ko uzakomeza kurushaho gutera imbere. Yashimye uko Abanya-Senegal baba mu Rwanda bafashwe neza, bityo bagaragaza ko ari Igihugu cyabo cya kabiri.

Ibirori byo kwizihiza isabukuru y’imyaka 29 u Rwanda rwibohoye, byanaranzwe no kwerekana ibikorerwa mu Rwanda.

Ni imwe muri gahunda zateguwe mu gihe cy’iminsi 100 yo kwibuka Jenoside yakorewe Abatutsi mu Rwanda mu 1994, zateguwe na Ambasade y’u Rwanda ifatanyije n’Umuryango Ibuka-Senegal n’Umuryango w’Abanyarwanda baba muri icyo gihugu.

Urugendo barutangiriye kuri Place du Souvenir Africain mu Mujyi wa Dakar, ahari igice cyahariwe kwerekana amateka kuri Jenoside yakorewe Abatutsi mu 1994 (Exhibition), aho banafashe umunota wo kuzirikana inzirakarengane zishwe muri Jenoside, bagera kuri Kaminuza ya Cheikh Anta Diop basubira kuri Place du Souvenir Africain, aho baherewe ibiganiro.

Perezida wa Ibuka muri Senegal, Dr Yves Rwogera Munana, yagarutse ku mateka ya Jenoside aho yasobanuye ibyiciro byaranze imitegurire yayo. Yerekanye ko ingengabitekerezo yo kurimbura Abatutsi yatekerejwe n’agatsiko k’abantu bake, ariko uwo mugambi n’ubushake byo kurimbura igice kimwe cy’Abanyarwanda bigirwa gahunda y’ubuyobozi bw’Igihugu, aho bwakanguriye abaturage kubishyira mu bikorwa. Yagaragaje ko abishwe bataziraga icyo bakoze ahubwo baziraga gusa ko bagize igice cy’abagomba kurimburwa, bishingiye kuri iyo ngengabitekerezo.

Yagaragaje ibyiciro by’itegurwa rya Jernoside harimo gushyira abantu mu byiciro no kubaremamo ibice, aho mu Rwanda bamwe biswe Abahutu, abandi Abatutsi n’Abatwa, no kubereka ko batandukanye, guhabwa amazina ndetse n’ibimenyetso, kwamburwa uburenganzira bw’ubumuntu; gutegura gahunda yo gushyira mu bikorwa Jenoside nko gushinga imitwe y’abicanyi no kubaha ibiganiro n’ubutumwa birushaho kubabibamo urwango, hakoreshejwe imiyoboro itandukanye harimo n’itangazamakuru.

Hari kandi kugonganisha ibyiciro bibiri by’abantu (abicwa n’abica), gutegura urutonde rw’abagomba kurimburwa, gushyira mu bikorwa uwo mugambi wo gutsemba n’icyiciro cya nyuma cyo kuyihakana no kuyipfobya.

Dr Munana yavuze kimwe mu byo bazibandaho muri gahunda ya Ibuka-Senegal, harimo no kwigisha amateka ya Jenoside urubyiruko n’abakiri bato, kugira ngo nabo bazakomeze urugamba rwo kurwanya abahakana n’abapfobya Jenoside yakorewe Abatutsi.

Ikindi kiganiro cyibanze kuri icyo cyiciro cya nyuma cy’ihakana n’ipfobya bya Jenoside yakorewe Abatutsi, cyatanzwe na Jesicca Kabandana, aho ababikora bifashishisha cyane imbuga nkoranyambaga, barimo Abanyarwanda aho yatanze urugero rw’abibumbiye mu cyo bise Jambo News mu Gihugu cy’u Bubiligi.

Aba bihaye intego yo guhakana no gupfobya Jenoside yakorewe Abatutsi no gukwirakwiza ingengabitekerezo yayo, kimwe n’abanyamahanga barimo ba Judi River, Charles Onana, Michaela Wrong, Filip Reyntjens n’abandi batari bakandagiza ikirenge mu Rwanda cyangwa bafite uruhare mu mateka mabi ya Jenoside. Yasabye abantu bose kubarwanya by’umwihariko urubyiruko.

Ambasaderi w’u Rwanda muri Senegal, Jean Pierre Karabaranga, yagaraje ko urugamba rwo kurwanya abapfobya n’abahakana Jenoside rureba buri wese, kandi ko nta kabuza icyiza igihe cyose gitsinda ikibi.

Yerekanye ko n’ubwo abahakana n’abapfobya Jenoside bashyira imbaraga nyinshi mu bikorwa byabo bibi, ntacyo bizabagezaho kuko abantu benshi bibonera ukuri ku mateka ya Jenoside, cyane cyane binyuze mu bikorwa byo kwibuka haba mu Rwanda no mu mahanga; gutegura ingendo zo kwibuka nk’urwakozwe kuri uwo munsi.

Hari kandi ibimenyetso bigaragaza uko Jenoside yateguwe n’uko yashyizwe mu bikorwa, harimo n’inzibutso za Jenoside. Yaboneyeho no gushimira Igihugu cya Senegal binyuze muri Place du Souvenir Africain, cyemeye gutanga ahantu hashyizwe amateka kuri Jenoside yakorewe Abatutsi, aho buri wese uhanyuze amenya ukuri kwayo.

Yibukije ko urugamba rwo guhangana n’abahakana bakanapfobya Jenoside yakorewe Abatutsi rukomeje, kuko ibikorwa byabo byo kuyobya abakiri bato bikomeje. Asaba abanyeshuri, abakorera mu nzego zinyuranye, abitabiriye inama zishobora kuvugirwamo amateka ya Jenoside, abanyamahanga bahura n’abo badafite amakuru ahagije, gukomeza gutanga amakuru y’ukuri kuri Jenoside yakorewe Abatutsi.

Ambasaderi w’u Rwanda muri Senegal, Jean Pierre Karabaranga aganiriza abitabiriye icyo gikorwa

Yaboneyeho no kwibutsa abitabiriye urwo rugendo ko bazongera kwifatanya mu kwizihiza isabukuru y’imyaka 29, u Rwanda rubohowe n’Ingabo zari iza FPR Inkotanyi, zigahagarika Jenoside yakorerwaga Abatutsi zikabohora Igihugu n’Abanyarwanda politiki mbi y’ivangura n’amacakubiri. Iyo gahunda izaba tariki ya 04 Nyakanga 2022, kuri Monument de la Renaissance Africaine i Dakar.

Inkuru dukesha Ambasade y’u Rwanda muri Senegal

Tariki ya 24 Gicurasi 2023, hatanzwe ibiganiro ku bijyanye n’Isoko Rusange rya Afurika, (African Continental Free Trade Area /AfCFTA) ryitezweho kongera ishoramari no guhanga imirimo mishya muri Afurika ndetse rikongera iterambere ry’ubukungu ku mugabane wa Afurika, ariko hanagaragazwa ko kuri uyu mugabane hakenewe kubakwa ibikorwa remezo byoroshya ubuhahirane kugira ngo ibyo AfCFTA yiyemeje bizagerweho.

Hanatanzwe kandi ikiganiro kijyanye no gutwara abantu n’ibintu mu kirere ku mugabane wa Afurika, ahagaragajwe ko ubwikorezi bwo mu kirere muri Afurika bukiri hasi, ibiciro by’indege biri hejuru, ingendo ndende kubera ubuke by’indege n’ibindi.

Impuguke za AU zitabiriye inama zemeza ko umuti urambye w’iterambere by’umwihariko ku rubyiruko rwa Afurika, ari ukwishyira hamwe k’umugabane, kuzamurana mu bukungu, kwagura imipaka n’isoko ry’imirimo, ndetse no gufata ingamba z’iterambere rya Afurika muri rusange.

Ku itariki ya 25 habaye umugoroba w’igitaramo cyo kwizihiza uwo munsi, cyaranzwe no kwerekana umuco w’Ibihugu bya Afurika n’ibijyanye n’amafunguro y’umwimerere y’ibihugu bya Afurika. Uwo muhago warimo abahagarariye ibihugu byabo muri Senegal, wanitabiriwe na Madamu Annette Seck, Minisitiri wungirije wa Senegal, ushinzwe Abanyasenegal baba mu mahanga muri Minisiteri y’Ububanyi n’Amahanga n’Abanyasenegal baba mu mahanga.

Abafashe ijambo muri ibyo birori barimo Amb. Michel Regis Onanga Ndiaye, uhagarariye Igihugu cya Gabon akaba na Doyen w’Abambasaderi ba Afurika, Amb. wa Comores watanze ubutumwa bwa Perezida Azali Assoumani, uyoboye Umuryango w’Ubumwe bwa Afurika n’ubutumwa bwa Minisitiri Annette Seck, bose bagarutse ku kamaro k’amasezerano ashyiraho agace k’ubucuruzi n’ubuhahirane butagira umupaka muri Afurika, yashyizweho umukono i Kigali mu Rwanda ku wa 21 Werurwe 2018.

Bavuze ko ari amahirwe yo guteza imbere ishoramari kuri uwo mugabane, guteza imbere ubucuruzi, gushimangira ubudaheranwa bw’ubukungu bwa Afurika, hashingiwe ku ntego z’iterambere z’Isi z’icyerekezo 2023 na gahunda 2063 y’iterambere rya Afurika, hagashyirwa ingufu mu bucuruzi hagati y’ibihugu bigize uwo mugabane, no hagati yawo n’indi migabane hatezwa imbere inganda.

Hagarutswe no ku mbogamizi zatewe n’icyorezo cya COVID 19 n’intambara hagati y’u Bursiya na Ukraine, byatumye ibikomoka ibiciro ku buhinzi n’ingufu bizamuka cyane, ndetse n’ihindagurika ry’ikirere ryagize ingaruka ku musaruro.

Muri cyo gitaramo, itorero ry’Abanyarwanda baba muri Senegal ryasusurukije abari aho, ryerekana umuco nyarwanda binyuze mu ndirimbo gakondo, byanashimishije cyane abitabiriye icyo gitaramo.

Tariki ya 26 Gicurasi 2023, habaye umukino wahuje Abahagarariye Ibihugu bya Afurika muri Senegal, bakinnye n’ab’ibindi bihugu byo ku yindi migabane biri hamwe. Abahagarariye Ibihugu bya Afurika batwara igikombe nyuma yo gutsinda bagenzi babo bo ku yindi migabane, ibitego 5 kuri 1.

Inkuru dukesha Ambasade y’u Rwanda muri Senegal

Uhereye ibumoso: Grégoire Mushyirahamwe, PS muri MINEMA Philippe Habinshuti na Benoît Kalisa Bisamaza

Kuri uyu wa Kabri tariki ya 23 Gicurasi 2023, Umunyamabanga Uhoraho muri Minisiteri ishinzwe Ibikorwa by’Ubutabazi (MINEMA), Habinshuti Philippe, yakiriye intumwa zari zihagarariye Abanyarwanda baba muri Senegal na Mali, aribo Gregoire Mushyirahamwe na Benoit Kalisa Bisamaza, bamugejejeho iyo nkunga.

Bamubwiye ko Abanyarwanda batuye muri Senegal na Mali bababajwe cyane n’ibiza byatwaye ubuzima bw’abantu, bikanangiza ibikorwa by’abatuye mu Ntara zashegeshwe, kimwe n’ibikorwa remezo Igihugu cyashyizemo ubushobozi bwinshi.

Bagaragaje ko u Rwanda barufite ku mutima, ko barushakira imbuto n’amaboko kandi ko bashyigikira gahunda zose z’Igihugu n’Ubuyobozi bwacyo, burangajwe imbere na Nyakubahwa Perezida Paul Kagame, kandi ko batewe ishema no gufasha Igihugu cyabo uko babishoboye.

Bagaragaje ko hakenewe ubwitange bwa benshi kugira ngo hasanwe ibyangijwe n’ibiza bityo basaba abari mu Gihugu n’abari mu mahanga, gukomeza gutanga inkunga yabo uko babishoboye kandi ko abashyize hamwe nta kibananira.

Basabye n’abandi Banyarwanda aho bari hirya no hino ku Isi, gukomeza ubwo bufatanye basanganywe bwo gufasha abandi, cyane cyane ababa batunguwe n’ibyago nk’ibyo biza.

Mu butumwa bwo gushimira Abanyarwanda bo muri Senegal na Mali bagejejweho na Ambasaderi w’u Rwanda muri Senegal, Jean Pierre Karabaranga n’ubw’Abayobozi b’imiryango ibahuza bose, bagarutse ku bwitange Abanyarwanda batuye muri ibyo bihugu badahwema kugaragaza mu bikorwa binyuranye.

Mu myaka ishize bakoze n’ibindi bikorwa byo kugoboka abatishoboye nko kubafasha kwishyura ubwisungane mu kwivuza (mutuelle de santé), kubafasha kubona amashanyarazi (Cana challenge), gahunda ya Girinka, gahunda zo gufasha abatishoboye bakorera mu bihugu batuyemo, kimwe n’izindi gahunda zinyuranye z’Igihugu zirimo Kwibuka Jenoside yakorewe Abatutsi, Umunsi wo Kwibohora, Umunsi w’Intwari n’izindi gahunda aho Abanyarwanda bo muri Senegal na Mali bitanga batizigamye.

Umunyamabanga Uhoraho muri MINEMA, Habinshuti Philippe, na we yashimiye Abanyarwanda batuye muri Senegal na Mali inkunga batanze mu rwego rwo gufasha abagizweho ingaruka n’ibiza, aho mu gihe gito babashije gushyira hamwe iyo nkunga, ko ari umuco mwiza ukwiye kuranga Abanyarwanda aho bari hose.

Yababwiye ko inkunga imaze gutangwa hari ibibazo byihutirwaga byinshi yakemuye, kandi anabamenyesha ko ubu harimo gushyirwaho ingamba zo gukumira ibiza ku buryo burambye, kugira ngo bidakomeza guhitana ubuzima bw’abantu n’imitungo yabo n’iya rusange.

Inkuru dukesha Ambasade y’u Rwanda muri Senegal

Uyu mugabo yapimaga metero 2 na santimetero 72 (2.72), ndetse agapima ibiro 199. Yaje gupfa akiri muto cyane ku myaka 22 gusa azize indwara yitwa ‘Hypertrophie’, yatumaga agira imisemburo myinshi (hormones) ituma ingingo z’umubiri zikura mu buryo budasanzwe.

Uyu mugabo utari usanzwe bakundaga kumutazira akazina ka ‘Le géant d’Alton’ (Igihangange cya Alton) yaje gupfa ashyingurwa muri uwo mujyi muto yavukiyemo anawukuriramo, ariwo wa Alton.Yari umuhungu w’imfura wa Addie na Harold Wadlow, akagira abandi bavandimwe ariko bose bari bafite uburebure busanzwe.

Akivuka yari afite uburebure busanzwe nk’ubw’izindi mpinja. Yavutse apima ibiro 3.85, nyamara ku mezi 6 gusa yari amaze kugira santimetero 88 n’ibiro 13. Ku mezi 18 yari amaze kugira metero n’igice n’ibiro 28.

Byakomeje kugaragara ko akura bidasanzwe kuko ku myaka itanu gusa ubwo yigaga mu kiburamwaka, yari amaze kugira metero 1 na santimetero 64. Ku myaka 13 gusa yari amaze kugera kuri metero 2 na santimetero 18, ari nabwo yabaye umuscout wa mbere muremure ku Isi. Aha yambaraga imyenda nk’iy’abasore b’imyaka 17.

Robert Pershing Wadlow, kugeza ubu ntawe uragera ku burebure bwe

Ku myaka 18 yari amaze kugera kuri metero 2 na santimetero 53 agapima ibiro 143. Abashinzwe kumudodera imyenda bakoreshaga igitambaro kikubye inshuro nibura 3 ugereranyije n’icyo badodera abantu basanzwe. Ikirenge cye nacyo ntibyari bicyoroshye kumubonera inkweto kuko cyapimaga santimetero 47, ku buryo urukweto rwe rwaguraga Amadolari agera ku ijana y’icyo gihe mu 1930.

Byaje kurangira habonetse ikigo cyemera kujya kimukorera inkweto ku buntu, cyitwaga ‘International Shoe Company’, maze na we yemera kucyamamaza.

Se wa Robert Wadlow yari yarakuye intebe y’imbere mu modoka asigamo iy’inyuma gusa, kugira ngo umuhungu we ajye ashobora kuyicaramo, abone aho ashyira amaguru ye adasanzwe.

Mu 1937 ku myaka 19 gusa nibwo uyu mugabo udasanzwe yesheje umuhigo nk’umuntu wa mbere muremure ku Isi. Aha yapimaga metero 2 na santimetero 58.

Tariki 4 Nyakanga 1940, yaje kuremba ajyanwa mu bitaro aho yaje gupfa tariki 15 Nyakanga 1940 ku myaka 22. Aha yari amaze kugera ku burebure bwa metero 2 na santimetero 72, apima ibiro 199.

Robert Wadlow n’umuryango we harimo n’ababyeyi be

Kugeza ubu nta wundi muntu urarenza ubwo burebure ku Isi. Uyu munsi umuntu muremure ukiriho wanditswe muri cya gitabo cya ‘Guiness des Records’ ni uwitwa Sultan Kosen wo muri Turukiya, upima metero 2 na santimetero 51.

Inkweto yambaraga ntizabonekaga aho ari ho hose

Abanyarwanda baryitabiriye bishimiye uko ibicuruzwa bikorerwa mu Rwanda birimo ikawa, icyayi, urusenda, imitobe, imitako n’ibindi byakunzwe bikanagurwa, ndetse bibaha icyizere ko byarushijeho kumenyekana, n’ababikunze bamenya aho babishakira muri Senegal.

Iryo murikagurisha ryanabaye umwanya mwiza wo gusobanurira abasuye Stand y’u Rwanda amateka yarwo, harimo uko rwasenywe n’ubuyobozi bubi bwateguye bukanashyira mu bikorwa Jenoside yakorewe Abatutsi n’uko rwabohowe mu 1994, n’ubuyobozi bwiza rwagize n’icyerekezo cyarwo nyuma ya Jenoside yakorewe Abatutsi.

Basobanuriwe kandi ibijyanye n’umuco nyarwanda n’ubwiza nyaburanga bw’u Rwanda, harimo za pariki, inzu ndangamurage z’u Rwanda, hagamijwe guteza imbere ubukerarugendo dore ko abenshi mu bitabiriye iryo murikagurisha, ari abarerera muri iryo shuri baturuka mu bihugu bisaba 80.

Abasuye stand y’u Rwanda kandi banasobanuriwe ibijyanye n’amahirwe ari mu gushora imari mu Rwanda, ndetse hifashishijwe uburyo bw’ikoranabuhanga (QR code) bahabwaga kuri telefoni zabo, inyandiko zikubiyemo ibijyanye n’ubukerarugendo n’ishoramari mu Rwanda, ari nako bashishikarizwa kurusura.

Bamwe mu basobanuriye abaganaga stand y’u Rwanda, ni urubyiruko rw’Abanyarwanda biga mu mashuri yisumbuye mu Gihugu cya Senegal, nabo bagaragaje ko bishimiye ko bahawe amahirwe yo kumenya byinshi ku Gihugu cyabo, byabashyize ku rwego rwo kuba nabo babisobanurira abandi barimo n’abanyamahanga.

Inkuru dukesha Ambasade y’u Rwanda muri Senegal

Abakoze Jenoside ku Mayaga batarafatwa barasabirwa gufungirwa mu cyumba cy’umukara

Ibi byasabwe na Kabandana Callixte, umwe mu bagize inama y’ubuyobozi y’Umuryango IBUKA ku rwego rw’Igihugu, wari uhagarariye uwo muryango muri icyo gikorwa.

Kabandana yagarutse ku nzu y’amateka, imaze imyaka isabwa ngo yubakwe ku rwibutso rw’Akarere ka Ruhango ruri aho i Kinazi. Iyo nzu y’amateka izaba igize igice cya kane cy’urwo rwibutso, kuko hasanzwe hari ibindi bice bitatu aribyo imva ebyiri ziruhukiyemo imibiri isaga ibihumbi 63, ubusitani bwo kwibukiramo (Jardin de la mémoire) ndetse n’ubusitani bwo kwirwanaho kw’abanyamayaga (Jardin de la résistance).

Mu kugaragaza ko inzu y’amateka iri mu byihutirwa, Kabandana yagize ati “Nagira ngo nsabe iyo nzu y’amateka ibe mu byihutirwa, kuko twifuzamo n’icyumba cy’umukara, kugira ngo ba Barundi bariye imitima y’ababyeyi n’abavandimwe bacu byibura tube tubafunze mu mazina. Impamvu cyangwa icyaba gituma uyu munsi tutababona zizarangira, kandi nizitarangira abadukomokaho nibajya muri icyo cyumba, bazajye bamenya ko hari Abarundi bariye imitima ya ba se na ba sekuru batafashwe”.

Bacanye urumuri rw’icyizere

Yongeyeho ko icyo cyumba nikiboneka muri iyo nzu y’amateka, hazashyirwamo amazina n’amafoto ya ba ruharwa bandi batarafatwa, nk’uwari Burugumesitiri wa Komini Ntongwe Charles Kagabo, uzwiho ubugome burenze urugero burimo gushishikariza abaturage yayoboraga ngo bahungire kuri Komini abizeza kuhabarindira. Nyuma yahise abahamagarira abicanyi barimo abasirikare, abajandarume, interahamwe ndetse n’Abarundi bari impunzi zari zikambitse aho i Kinazi ahitwa i Nyagahama, maze babahukamo barabatsemba.

Hari kandi uwitwa Nsabimana Jacques wari umwarimu bari barahimbye Pilato kubera ubugome bwe. Uyu yari yarateye intebe ku cyobo cyari cyariswe CND ahitwa ku Rutabo, bakajya bamuzanira abatutsi akabacira urwa Pilato, ari naho izina ryakomotse. Hari n’abandi benshi batarafatwa barimo abari abakonseye.

Mu byakunze kugarukwaho cyane aha ku Mayaga ya Ntongwe, ni ubugome ndengakamere bwakoreshwaga mu kwica Abatutsi baho, cyane cyane ibyakozwe n’impunzi z’Abarundi birimo imbabura bari barashinze mu masangano y’imihanda mu Bulima bwa Kinazi, maze bamara kwica abatutsi bakabakuramo imitima bakayotsa.

Amatariki Abanyamayaga batajya bibagirwa ni aya 20 na 21 Mata, aho Burugumesitiri Kagabo yashutse Abatutsi bari barimo kwicirwa kuri Komini ngo bajye kuri Superefegitura mu Ruhango, aho babizezaga gucungirwa umutekano byisumbuyeho, maze basanga abicanyi bateguwe babategeye mu kibaya cya Nyamukumba babahukamo n’amasasu na za gerenade n’imihoro, barabarimbura harokoka mbarwa.

Abacitse ku icumu aho ku Mayaga bibumbiye mu muryango Amayaga Genocide Survivors Foundation (AGSF), bakaba basaba ko aho Nyamukumba naho hazashyirwa ikimenyetso cy’urwibutso rw’ubwicanyi ndengakamere bwahabereye.

Urwibutso rw’Akarere ka Ruhango ruri i Kinazi nirwo rukuru muri ako karere, rukaba kugeza ubu rushyinguyemo imibiri isaga ibihumbi 63.

Kabandana Callixte asaba ko inzu y’amateka yakwihutishwa kandi hagashyirwamo icyumba cy’umukara gifungirwamo amazina n’amafoto y’abicanyi batarafatwa

Buri mwaka hakorwa urugendo ruva Nyamukumba rukagera ku biro by’Umurenge wa Kinazi byahoze ari ibya Komine Ntongwe

Urwibutso rw’Akarere ka Ruhango ruri i Kinazi

Abitabiriye Kwibuka ku nshuro ya 29 Jenoside yakorewe Abatutsi, bagejejweho ubuhamya bwa Claire Ruyuki, wagarutse ku mateka mabi Abatutsi banyuzemo, aho bimwe uburenganzira mu Gihugu cyabo nk’abandi Banyarwanda, harimo uburenganzira bwo kwiga.

Ruyuki yavuze ko yari umuhererezi mu muryango w’abana bane, ariko Jenoside yakorewe Abatutsi igahitana ababyeyi be, abavandimwe bose ndetse n’abari mu rugo iwabo i Rusororo muri Gasabo. Yagaragaje ko Jenoside yakorewe Abatutsi yateguwe igihe kirekire, kuko ababyeyi be ubwabo bahuye n’ingaruka z’ingenbitekerezo ya Jenoside, aho bimwe uburenganzira bw’ibanze burimo kwiga no kubona imirimo mu Gihugu cyabo, bakabaho birwanaho mu buryo bugoye.

Yavuze ko Jenoside yabaye akiri ku ishuri i Ntendezi mu cyahoze ari Cyangugu afite imyaka 14, agaragaza uruhare rw’abayobozi barimo Perefe wa Cyangugu, Bagambiki Emmanuel mu gutsemba Abatutsi basaga ibihumbi bitanu bari bakusanyirijwe i Nyarushishi, barimo n’abanyeshuri b’Abatutsi bigaga i Ntendezi, baje kwicwa n’abasirikare n’interahamwe ku mabwiriza ya Bagambiki.

Ruyuki yanagarutse ku mibereho igoye abacitse ku icumu barimo imfubyi banyuzemo nyuma ya Jenoside, ashimira Leta y’u Rwanda yakoze ibishoboka byose ngo abayirokotse ntibaheranwe n’agahinda, ahubwo baharanire kubaho kandi neza.

Yasabye abantu bose kwamagana abagihembera amacakubiri, bakwirakwiza ingengabitekerezo ya Jenoside n’abahakana bakanapfobya Jenoside yakorewe Abatutsi.

Ambasaderi w’u Rwanda muri Mali, Jean Pierre Karabaranga, yibukije abitabiriye igikorwa cyo kwibuka Jenoside yakorewe Abatutsi, ko ari inshingano ya buri wese kuko bifasha gusubiza amaso inyuma, abanatu bakareba ibibi byakozwe mu mateka y’Abanyarwanda, aho Abatutsi bimwe uburenganzira, kugeza ku bwo kubaho ndetse bakanicirwa n’aho bakekaga ko nta watinyuka kuhakorera ubwicanyi, nko muri za Kiliziya hirya no hino mu Gihugu.

Yagaragaje ko abacitse ku icumu bataheranwe n’agahinda batewe n’amateka mabi banyuzemo, kandi asaba abantu bose guharanira ko Jenoside itazongera kubaho ukundi aho ari ho hose ku Isi.

Yibukije ko Inteko Rusange y’Umuryango w’Abibumbye, ndetse n’Umuryango wa Afurika Yunze Ubumwe, byemeje ko tariki ya 07 Mata buri mwaka, ari umunsi Mpuzamahanga wo kuzirikana Jenoside yakorewe Abatutsi mu Rwanda.

Ambasaderi Karabaranga yashimiye abantu bose baje kwifatanya n’Abanyarwanda mu kwibuka Jenoside yakorewe Abatutsi, agaragaza ko kwibuka ari umwanya wo kuzirikana inzirakarengane zishwe muri Jenoside, ukaba n’umwanya wo gufata mu mugongo abayirokotse, akaba yaboneyeho n’umwanya wo gushima ubutwari n’ubudaheranwa byabo.

Yerekanye ko abacitse ku icumu babaye aba mbere mu gushyigikira gahunda za Leta, harimo na Ubumwe n’ubwiyunge byafashije gusana Igihugu no kubaka u Rwanda rushya.

Yagaragaje ko intero y’Abanyarwanda ari imwe, ko Jenoside itazongera kubaho ukundi, no kugira ishema ryo kuba Abanyarwanda. Yerekanye ko kuba Jenoside yakorewe Abatutsi yarakozwe amahanga arebera, aho gutabara inzirakarengane agahitamo gucyura ingabo z’Umuryango w’Abibumbye zari mu Rwanda, byerekana guteshuka k’Umuryango mpuzamahanga ku nshingano zawo.

Ambasaderi Karabaranga yashimiye Ingabo zari iza RPF-Inkotanyi na Perezida Paul Kagame wari uziyoboye, bahagaritse Jenoside yakorerwaga Abatutsi bakanabohora Igihugu.

Alhamadou AG Ilyene, Minisitiri ushinzwe Abanyamali baba mu mahanga wari uhagaraiye Minisitiri w’Intebe wa Mali, Dr Choguel Kakola Maiga muri icyo gikorwa, yagaragaje ko Kwibuka ari umwanya wo kwifatanya n’Abanyarwanda mu kwibuka amateka mabi Igihugu cyabo cyanyuzemo, aho Jenoside yakorewe Abatutsi yahitanye abasaga miliyoni.

Yagaragaje ko habayeho uburangare bw’Umuryango Mpuzamahanga, inzirakarengane zisaga miliyoni zikicwa mu mezi atatu, bitanga inshingano yo kurwanya ikibi. Yerekanye ko by’umwihariko kwibuka bikwiye guha amasomo urubyiruko ku mateka ya Jenoside, ariko by’umwihariko ubutwari bwaranze Ingabo zahagaritse Jenoside.

Yagaragaje ko nyuma ya Jenoside Nyakubahwa Paul KAGAME yashyize mu Banyarwanda umuco wo gukunda igihugu cyabo, aho ubu cyabaye icyitegererezo ku bindi bihugu by’umwihariko u Rwanda rukaba ruhesha ishema Umugabane wa Afurika, bishingiye ku byagezweho nyuma ya Jenoside.

Yagaragaje ko Abanya-Mali bashima ubudaheranwa bw’Abanyarwanda, kuko bugaragaza ibyo ibihugu by’Afurika bifitiye ubushobozi mu gihe bifite abayobozi beza.

Ni igikorwa cyitabiriwe kandi n’abahagarariye ibihugu byabo n’imiryango mpuzamahanga ikorera muri Mali.

Abanyarwanda n’inshuti zabo bibutse Jenoside yakorewe Abatutsi

Mu bafashe ijambo, hari uhagarariye umujyi wa Milano, Singora Diana de Marchi ndetse na Consul w’u Rwanda muri uwo mujyi, Ofer Arbib. Bombi bamaganiye kure urwango rugeza abantu kuri Jenoside, bagaruka ku buryo u Rwanda rwabashije kwiyubaka nyuma y’imyaka 29, ndetse no gushyira ingufu mu bikorwa byose bihuza Abanyarwanda bakabasha kongera kubana, ndetse u Rwanda rukaba rumaze kuba icyitegererezo ku bindi bihugu.

Urubyiruko rwiganjemo abakiri bato, abenshi bavutse nyuma ya Jenoside yakorewe Abatutsi, nabo batanze ubutumwa bw’icyizere cy’ejo hazaza, bavuga ko n’ubwo bari bato bagomba kumenya ameteka, no kuzakomeza icyo gikorwa no guharanira ko ibyabaye bitazongera kubaho ukundi.

Ubuhamya bwatanzwe n’uwarokokeye mu Iseminari nto i Ndera, César Murangira, akaba n’umuyobozi wa Ibuka Suisse, wagarutse ku buryo yabuze umuryango hafi ya bose bishwe, akanasobanura uko ubwicanyi bwakorewe muri Seminari nto y’i Ndera bwagenze, ndetse agaruka no ku rugendo rwe rwo kwiyubaka nyuma yo kurokoka.

Mu ijambo ry’umuyobozi wa Ibuka Italia, Honorine Mujyambere, yavuze ko Jenoside yateguwe bitabaye impanuka, cyane ko byari byaraheye kera, kandi byose bugamije kwica abatutsi.

Agaruka ku buryo abantu bagerageza kugoreka Jenoside bayita andi mazina, ko igomba kuvugwa uko iri. Yagarutse ku minsi ijana, inzira y’inzitane banyuzemo mu gihe Abatutsi bicwaga urw’agashinyaguro.

Ati “N’ubwo hashize imyaka 29, ku barokotse ntabwo byibagirana, bihora bisa nk’aho ari ejo hashize, ahubwo bikagenda birushaho kuba bishya”.

Yashimye cyane uburyo abarokotse bakomeza kwiyubaka, bagakomeza gutwaza n’ubwo baba bafite ibikomere byo ku mubiri cyangwa se ibitagaragara, ariko bagahobera ubuzima bagaharanira kubaho.

Yashimiye kandi ubutwari bw’Ingabo z’Inkotanyi zahagaritse Jenoside kandi zigakomeza kuba hafi abayirokotse. Yashoje yamagana ubwicanyi bukorerwa abatutsi muri Congo (RDC).

Iki gikorwa cyashoje icyumweru cyo Kwibuka, kikaba cyari cyatangijwe n’urugendo rwo kwibukwa (walk to remember) rwabereye mu mujyi wa Roma ku wa Gatanu tariki 7 Mata 2023. Urwo rugendo rwateguwe n’abana b’Abanyarwanda biga mu Butariyani mu mujyi wa Roma, bafatanyije na Ibuka Italia.

Mu bindi byaranze icyo igikorwa harimo gushyira indabo ahari urwibutso rwa Jenoside yakorewe Abatutsi, hitwa Munincipio ya II ya Komini ya Roma, hacanwa urumuri rw’icyizere, hanasomwa amazina ijana mu rwego rwo kwibuka ba nyirayo, bitari ukwibuka imibaze yabo gusa.

Ambasaderi w’u Rwanda mu Butaliyani wari uhagarariwe n’Umujyanama wa kabiri, Madamu Ornella Kaze, washimiye Munincipio ya II yari ihagarariwe na Consigliere wayo Melle Lucrezia Colmayer, umwe mu bafashije Abanyarwanda kubona aho hantu ho kwibukira.

Yabashimiye icyo gikorwa cy’indashyikirwa, gifasha Abanyarwanda kwamagana ubwo bwicanyi bwakorewe abana b’u Rwanda, ndetse ashimira n’Inkotanyi zitanze abeshi bakamena amaraso yabo.

Umuhango wakomereje ahahoze Province ya Roma, urangwa n’indirimbo, imivugo, ubuhamya, ibiganiro ndetse n’impanuro z’ abayobozi.

Uhagarariye u Rwanda mu mujyi wa Roma (Consul), Enrico Lalia Morra, mu ijambo rye yibanze ku nsanganyamatsiko ya buri mwaka, yo kwibuka twiyubaka, ashimira urubyiruko rwitabira ibikorwa byo kwibuka, arusaba gukomerezaho, no gukora ku buryo umwaka utaha buri wese azazana abandi bana bagenzi be.

Hatanzwe ubuhamya bw’umwe mu bana ba Famille Igihozo, Kagabo Nkuranga Jean Pierre, wanyuze mu mateka asharira ariko ntaheranwe n’agahinda, akiyubaka na we akaba ubu ari umubyeyi.

Mu ijambo ry’umushyitsi mukuru, Madame Kaze, yavuze ko Jenoside itabaye impanuka nk‘uko abayihakana bakunda kubivuga, ko ahubwo yateguwe, ikanashyirwa mu bikorwa. Yibukije akamaro ko kwibuka, ko hatibukwa umubare ahubwo hibukwa abambuwe ubuzima. Yasoje ijambo rye yamagana ubwicanyi bukorerwa Abatutsi muri RDC.

Uhagarariye ibuka Mme Honorine Mujyambere, yashimiye abitabiriye icyo gikorwa cyo kwibuka, ashimira abitanze bose ngo icyo gikorwa kigende neza. Yashishikarije urubyiruko kumva ko kwibuka abacu nabo bibareba, anahumuriza abarokotse Jenoside yakorewe Abatutsi, ashimira ubutwari bwakomeje kubaranga. Mu gusoza yasabye amahanga kugira icyo akora ku bwicanyi burimo gukorerwa abatutsi b’Abanyekongo.

Icyo gikorwa cyo kwibuka cyabaye ku tariki ya 15 Mata 2023, kibera mu mujyi wa Milano mu Butaliyani.

Uhereye ibumoso, Murangira César, umuyobozi wa Ibuka Suisse, Angelo Galmarini (MC), Mujyambere Honorine, umuyobozi wa Ibuka Italia, Enrico Lalia Morra, Consul w’u Rwanda muri Milano na Rutagengwa Jean Paul uhagarariye Ibuka France (section ya Lyon)

Amb. Karabaranga yabagaragarije ko Abanyarwanda n’inshuti z’u Rwanda batuye muri Senegal bazaza kubashyigikira, kugira ngo bashobore kwegukana intsinzi nk’uko babikoze mu mikino yabereye i Dakar umwaka ushize.

Iyi kipe izahatana n’andi arimo US Monastir yo muri Tunisia yegukanye icyo gikombe mu mikino yo muri Gicurasi 2022 i Kigali mu Rwanda, AS Douane yo muri Senegal, Stade Malien yo muri Mali, KWARA Falcon yo muri Nigeria na ABC Fighters yo muri Côte d’Ivoire. Kugirango ishobore kuzakomeza mu mikino ya kimwe cya kane izabera i Kigali, kuva tariki 21 kugeza ku ya 27 Gicurasi 2023, igomba kuba mu makipe ane ya mbere muri iri tsinda.

Perezida wa REG BBC, Emmanuel Iyakaremye waje ayoboye ikipe ya REG BBC, yavuze ko byanze bikunze bazabona tike yo kuzakina imikino izabera mu Rwanda imbere y’abafana babo benshi, ndetse ko bazahatanira gusoza iyi mikino bari ku isonga nk’uko byagenze umwaka ushize.

Yagaragaje ko bizeye ko Abanyarwanda n’inshuti zabo bazabashyigikira uko bashoboye, nk’uko babigaragarije mu mikino yabaye umwaka ushize, kuko babateye ingabo mu bitugu aho bitabiriye ari benshi imikino yose REG yakinnye.

Bamwe mu Banyarwanda batuye muri Senegal nabo batangarije Kigali Today ko biteguye kuzajya gushyigikira ikipe ihagarariye Igihugu cyabo, ndetse bakanashishikariza n’inshuti zabo kuyitabira kandi bizeye ko izongera ikabahesha ishema.

Umukino wa mbere wa REG BBC uzaba tariki ya 12 Werurwe 2023, aho izahura na Kwara Falcon yo muri Nigeria.

Itsinda rya ‘Nile Conference’ rizakinira i Cairo mu Misiri, kuva tariki ya 26 Mata kugeza kuya 6 Gicurasi 2023, ririmo Al Ahly yo mu Misiri, Cape Town Tigers yo muri Afurika y’Epfo, City Oilers yo muri Uganda, CFV-Beira yo muri Mozambique, Petro de Luanda yo muri Angola na SLAC yo muri Guinea.

REG yisanze mu itsinda rimwe na US Monastil ibitse igikombe.

Kugira ngo utege imodoka ugende wagombaga kuba ufite iki cyangombwa

Minisitiri Dr Bizimana mu kugaragaza uko ingengabitekerezo ya Jenoside yabibwe kuva kera na Leta mbi zayoboye u Rwanda, yavuze uko muri 63 Abatutsi bo hirya no hino mu gihugu bishwe abandi bagahunga. Icyo gihe iwabo mu yahoze ari Perefegitura ya Gikongoro, habaye ubwicanyi bukabije kurusha ahandi, bituma bamwe mu bo mu muryango we barimo nyirakuru bahava baza gutura mu Bugesera aho bita ku Gahembe.

Yagize ati “Aha mu Bugesera mpafite amateka kuko nyogokuru niho bamuciriye muri 63. Ntangiye gukura najyaga nza kumusura, ariko nataha simbivuge nkabihisha kuko bitari byemewe! Abakuru barimo data na ba data wacu ntibari bemerewe kumusura. Hazaga jye gusa”.

Ati “Data na we wari warasigaye ku Gikongoro kubera ko yajyaga avura inka z’uwari Perefe Nkeramugaba, na we ntiyari yemerewe kuhava ngo aze gusura nyina mu Bugesera, ku buryo no muri 82 ubwo uwo nyirakuru yitabaga Imana, abo mu muryango we barimo n’umuhungu we ariwe Data batashoboye kujya kumushyingura”. Abari baraciriwe mu Bugesera nabo kandi ntibari bemerewe kuhava ngo bajye mu tundi turere.

Mu gushimangira iyi gahunda y’amacakubiri no gukandamiza Abatutsi, uwari Perezida Kayibanda ngo hari iteka yari yarasohoye muri 66, rivuga ko Abatutsi bahunze batemerewe kuza mu gihugu badafite uruhushya rwa Ambasaderi w’u Rwanda mu bihugu bahungiyemo. Abo mu gihugu nabo ntibari bemerewe kuva aho batujwe, ngo bajye mu bindi bice by’Igihugu.

Iryo teka ryanongeragaho ko n’uwaramuka atahutse, atemerewe gusaba imitungo yasize kuko ngo iba yabaye iya Komine.

Muri icyo gihe, uwitwa Sebatware André wahoze ari Perefe wa Kigali, yashyizeho amabwiriza avuga ko Abatutsi bo mu Bugesera batagomba kuhava kandi ko umuntu uzafatwa hari uwo atwaye mu modoka azabizira. Uko niko hashyizwe bariyeri ahitwa kuri Arete ari naho iryo zina ryavuye, kuko iyo imodoka yahageraga abapolisi baravugaga ngo “Arretez”, bishatse kuvuga ngo hagarara. Ni uko izina Arete rifata rityo kugeza ubu.

Habagaho n’uruhushya rwo gucumbika

Minisitiri Bizimana yasabye abanyamuryango ba GAERG gufatanya bagakomeza kurwanya ingengabitekerezo ya Jenoside, kuko igihari kandi ikomeje kwigishwa hirya no hino.

Iki gikorwa cya GAERG Turashima, cyahurije hamwe gahunda zirimo isabukuru y’imyaka 20 uwo muryango umaze ushinzwe, gushima Imana n’Igihugu ku bw’ubuzima bwiza no gufata ingamba zo kurushaho kubuha intego, kwishimira umusaruro uwo muryango wagezeho mu nzego no mu byiciro bitandukanye mu mwaka wa 2022, no gufata ingamba zo kurushaho kwiyubaka no kubaka Igihugu, ndetse no kurema icyizere n’ibyiringiro ku bandi barokotse Jenoside yakorewe Abatutsi bagifite intege nke muri gahunda z’iterambere n’ubudaheranwa.

Iyi gahunda yari yahawe insanganyamatsiko igira iti “Kubaho kuzana impinduka”, yanaranzwe n’ubusabane hagati y’abasaga 2000 barimo abanyamuryango ba GAERG, abafatanyabikorwa n’abagenerwabikorwa ndetse n’inshuti zabo bavuye hirya no hino mu gihugu.

Ni inama yitabiriwe n’ababarirwa muri bihumbi bine birenga barimo ibihangange ku isi biyobora ibihugu bikomeye. Iyi nama yagenze neza cyane ndetse abantu banyuranye ku isi bagaragaza amarangamutima yabo bashima u Rwanda rwagaragaje ubudasa mu gutegura neza inama yo mu rwego rwo hejuru nk’iriya. Bamwe mu bashyitsi ngo baba baratashye baseta ibirenge kubera uko bakunze u Rwanda!

Perezida w’u Rwanda Paul Kagame wanatorewe kuyora uwo muryango mu gihe cy’imyaka ibiri na we yashimiye abateguye iyi nama. Mu butumwa yanyujije ku mbuga nkoranyambaga yagize ati “Ndashimira abateguye CHOGM bose, inzego z’umutekano zarinze buri wese, abakozi bari ahabereye ibikorwa bose ndetse n’Abanyarwanda bagize uruhare mu migendekere myiza ya CHOGM 2022. Mwarakoze cyane guhesha ishema Igihugu.”

N’ubwo iyi nama yabaye ikanagenda neza cyane ariko, ku rundi ruhande hari abavuga ko barwanya Leta bari bamaze iminsi barasizoye mu itangazamukuru no ku mbuga nkoranyambaga basebya u Rwanda kugira ngo barebe ko baburizamo iyi gahunda yo kwakira CHOGM. Bamwe banagerageje guhungabanya umutekano ngo barebe ko byaba kidobya, inama ntibe cyangwa ntiyitabirwe.

Hari ibisasu byatewe mu Rwanda ubugira gatatu bivuye hakurya muri DRC mu gihe haburaga gato ngo inama itangire. Kuya 17/6/2022 mu gihe bamwe mu bashyitsi bari batangiye gusesekara mu gihugu nabwo hari umusirikiare wa Congo warasiwe ku mupaka ubwo yambukaga akarasa ku bapolisi b’u Rwanda na bo bakitabara bakamurasa akagwa aho. Ubwo niko imyigaragambyo hakurya muri Congo na yo yacaga ibintu bamagana u Rwanda bashinjaga gushyigikira M23. Bukeye bwaho ku ya 18/6/2022, abantu bitwaje intwaro bikekwa ko ari abo muri FLN barashe ku modoka itwara abagenzi muri Nyungwe bica umushoferi n’umugenzi.

Ibi byose byashimishaga cyane abavuga ko barwanya Leta y’u Rwanda kuko bakekaga ko byaba impamvu y’iburizwamo rya CHOGM cyangwa se ikaba itakwitabirwa.

Ibi byose nyamara byabaye impfabusa kuko inzego z’umutekano zabyitwayemo kigabo, zibungabunga umutekano neza maze abo ba kidobya bananirwa gukomeza gusopanya.

Igitangaje ariko ni uko aba bantu baba bavuga ko bakunda u Rwanda, ko baharanira kurushakira imbere heza. Aha ni ho wakwibaza ukuntu umuntu avuga ko akunda Igihugu hanyuma ntiyifuze ko cyagira ishema nk’iri cyagize. Akifuza gusenya ibyiza byagezweho, akifuza kwica abaturage n’ibindi byinshi bibi bigamije guha isura mbi Igihugu.

Ubundi umuntu wese ukunda Igihugu cye aba akwiye guterwa ishema no kubona gishimwa mu ruhando rw’amahanga kabone n’ubwo yaba hari abayobozi atavuga rumwe na bo. Aba akwiye kuryoherwa no kunezezwa no kubona u Rwanda ruserukana ishema n’isheja. Aba akwiye kwifuza ko izina ry’u Rwanda rihora rishimagizwa kubera ibyiza rugeraho aho guhora ahirimbanira kurusiga icyasha.

Aha ni ho abasoma n’abakurikira ibitangazwa na bariya babeshya ko baharanira ibyiza ku Rwanda, baba bakwiye gusesengura ibyo basoma cyangwa bumva mbere yo kubimira bunguri. Baba bakwiye gutandukanya amakuru mazima n’icengezamatwara risenya rigamije inyungu za bamwe (propaganda).

Iyo utayumvise ku maradiyo, uyagwaho mu binyamakuru, cyangwa se ku mbuga nkoranyambaga nka WhatsApp, Facebook, Twitter n’izindi.

Iyo ubajije mu miryango cyangwa inzego zigira aho zihurira no gukurikirana ibyaha n’izishinzwe umuryango cyangwa izishinzwe umutekano nka Polisi, nabwo usanga imibare y’abazira amakimbirane yo mu ngo hagati y’abashakanye ari myinshi cyane.

Imanza za gatanya mu nkiko na zo ziri mu zikunze kwiganza. Bamwe aho kwizirika ku bo bashakanye kandi babanye nabi, bahitamo kumesa kamwe bagasaba gutandukana.

Nyamara ariko hari n’abatari bake bakigendera kuri wa muco wa kera ngo niko zubakwa; ngo nta mugore udakubitwa; ngo abagabo niko bamera kubana na bo ni ugukomeza umutsi n’ibindi. Ugasanga buri munsi mu rugo ni imirwano, ariko uhohoterwa agashinga iryinyo ku rindi agashinyiriza. Iyo ari umugabo uhohoterwa bwo hari ubwo abihisha agira ngo adaseba mu bandi akitwa inganzwa, akemera agahebera urwaje nyamara ugasanga mu rugo ari induru gusa gusa.

Hari n’abagitsimbarara ku mahame y’amadini ngo kuko basezeranye kubana akaramata. Ngo Imana ntiyemera gutandukana, uretse gutandukanywa n’urupfu. Nyamara urwo rupfu hari ubwo ruterwa n’umwe mu bashakanye!

Aha ni ho nahereye nibaza impamvu umwe mu bashakanye yategereza ko undi azamukuramo ijisho cyangwa se akazanageza ubwo amuvutsa ubuzima nk’uko tujya tubibona.

Ese igihe kubana neza bidashobotse, kuki mutatandukana umwe akajya ukwe n’undi ukwe aho kubana nabi? Kuki umuntu yabaho mu buzima bumubihiye kugeza aho ashobora no kububura? Imiryango se yo aho kwirirwa yunga abantu mu bigaragara ko byarenze igaruriro, ahubwo ntibabagira inama yo gutandukana? Abana bavukira bagakurira mu mwiryane w’ababyeyi babo se bo bakurana ubuhe burere? Aho kurererwa mu rugo nk’urwo ntibyaruta batandukanye hanyuma urukiko rukagena uko bazajya barera abana babo?

Ngibyo ibyo maze iminsi nibaza. Nawe niba ubyumva nkanjye cyangwa ubyumva ukundi, dusangize uko ubibona.

Umuco wo gukaraba intoki umuntu atabitegetswe wakumira ibyorezo byinshi

Muri iyo mico n’imigirire ya buri munsi yari isanzwe imenyerewe twavuga nko gusuhuzanya abantu bahana ikiganza; guhoberana abantu bagwana mu byano; kwegerana n’ibindi birimo no gukaraba intoki ari uko umuntu abishatse cyangwa ari uko agiye kurya gusa.

Aho icyorezo kiziye rero, kimwe n’ahandi henshi ku isi, hari ibyahise bihinduka itegeko ndetse ubirenzeho agahanwa. Ibyo ni nko gukaraba intoki kenshi gashoboka kandi neza; kwambara agapfukamunwa; kwirinda gusuhuzanya bahana ibiganza cyangwa bahoberana; guhana intera n’ibindi byagiye bishyirwaho n’inzego z’ubuzima.

Mu gihe Covid yari ikirikoroza mu gihugu, aya mabwiriza yaragiye aba nk’umuco. Abantu barabitozwa binyuze mu kwigishwa, mu itangazamakuru, mu biganiro n’ahandi hose hashoboka ndetse ubirenzeho agacibwa amande cyangwa akabifungirwa.

Byaragiye bigera ubwo abantu babimenyera, abenshi bakibwiriza badategereje gukorera ijisho kuko bari baramaze kumva neza akamaro kabyo. Ntibyari bikiri nka bya bindi bavuga ngo ni ukurira inyama gutura!

Nyamara ubwo inama y’Abaminisitiri yatangazaga ko zimwe mu ngamba zari zisanzweho zitakiri itegeko, abantu benshi bariruhukije ndetse abazi kwizihirwa babinywera icupa bati sitwe twahera!

Tariki 13 Gicurasi, 2022, itangazo ry’inama y’Abaminisitiri ryasohotse rigira riti “Ntibikiri itegeko kwambara agapfukamunwa. Icyakora abantu barashishikarizwa kwambara agapfukamunwa igihe bari ahantu hafunganye kandi hahuriye abantu benshi. Abaturage barakangurirwa kandi gukomeza kwipimisha kenshi no kubahiriza ingamba zo kwirinda Covid 19.”

Bwatinze gucya, abantu benshi basubira ku kabo. Uyu munsi iyo witegereje, usanga iyo ngingo yo gushishikariza abahuriye ahari abantu benshi kubabwira kwambara agapfukamunwa byarabaye nko gusetsa imikara! Ahenshi byaba mu bukwe, byaba mu nsengero, byaba mu masoko, mu tubari n’ahandi, abambara utwo dupfukamunwa wababarira ku ntoki.

Ibyo gukaraba intoki nabyo ubundi byari isuku isanzwe. Nta muntu uyobewe ko intoki zibika umwanda mwinshi. Yemwe gutozwa gukaraba byanagaragaje ko byaje bikenewe, aho umuntu yakarabaga ugasanga ico ritagira ingano rivuye ku ntoki ze! Ese ni ngombwa koko ko haba abakorerabushake batwibutsa gukaraba intoki? Kuki se usanga abantu barabiretse kandi twari tumaze kumenya akamaro kabyo?

Reka ibyo guhana ibiganza byo rero ntiwarora! Ujya guha umuntu igipfunsi ati reka sha Corona yarashize. N’iyo yaba afite umwanda ungana ute ku ntoki, n’iyo yaba avuye mu bwiherero, n’iyo yaba ahinguye, ntatinya kuguha ikiganza azi neza ko cyanduye! Ngo niwo muco!

Ese guhana igipfunsi bigumyeho n’iyo Covid yaba yarashize byadutwara iki? Ntibyatuma turushaho kwirinda guhanahana umwanda wo mu ntoki. Guhoberana nabyo ngo ni umuco. Ngo iyo udahobeye umuntu ntuba umweretse ko umukunze cyangwa wari umukumbuye.

Ese n’iyo byaba ariwo muco, mu gihe umuco wahindutse ico ntitwawuca? Ubu se ko twaretse gusangira ku muheha byadutwaye iki? Ko tutakinywera itabi mu ruhame twabaye iki? Ese birakwiye ko dukaraba intoki ari uko duhagarikiwe na ba bana b’abakorerabushake?

Mbona hari ibyiza byinshi twigishijwe n’iki cyorezo twari dukwiye gukomeraho. N’iyo Covid yashira burundu (uretse ko ikinahari), hari byinshi twagumana bikaba umuco kuko byacubya byinshi byadukururiraga ibyorezo. Wowe ubibona ute?