Munyenyezi akurikiranyweho ibyaha birindwi birimo kwica nk’icyaha cya Jenoside, gucura umugambi wa Jenoside, gutegura Jenoside, ubufatanyacyaha muri Jenoside, kurimbura nk’icyaha cyibasiye inyokomuntu ndetse n’ubufatanyacyaha mu busambanyi.

Munyenyezi yitabye urukiko yunganiwe na Me Gatera Gashabana.

Ku ruhande rwe, Munyenyezi yasobanuye ko atarabona dosiye, asaba ko yakwemererwa kubona inyandiko yazanye, ndetse asaba no kwemererwa kuvugana n’umuryango we, kuko ngo bataravugana kuva yagezwa mu Rwanda.

Munyenyezi ubwo yari agejejwe mu Rwanda

Ibyo byaha ashinjwa byakorewe mu cyahoze ari Komini Ngoma muri Perefegitura ya Butare, ubu ni mu Karere ka Huye mu Ntara y’Amajyepfo.

Munyenyezi yoherejwe mu Rwanda na Leta Zunze Ubumwe za Amerika tariki ya 15 Mata 2021 nyuma yo kurangiza igihano cy’imyaka 10 yari yarakatiwe n’urukiko kubera kubeshya igihe yakaga Ubwenegihugu.

Umva muri iyi Video uko Umuvugizi wa RIB, Dr. Murangira B. Thierry, asobanura ibyaha akekwaho n’ibimenyetso byabyo.

Munyenyezi ashinjwa uruhare muri Jenoside yakorewe Abatutsi mu yahoze ari Perefegitura ya Butare mu Majyepfo y’u Rwanda.

Mu rukiko, byatangajwe ko mu kwezi kwa karindwi 1994 yahungiye muri Kenya, aho yabyariye abana b’impanga, nyuma akinjira muri Amerika nk’impunzi akabaho ahabwa ubufasha bw’abababaye.

Munyenyezi yize kaminuza, nyuma akora mu biro bya Leta, ariko nyuma aza gushinjwa ko yagize uruhare muri Jenoside i Butare aho ngo kuri za bariyeri yagaragazaga abagomba kwicwa.

Muri Amerika yahamwe n’icyaha cyo kubeshya urwego rw’abinjira n’abasohoka ku ruhare yaba yaragize muri Jenoside, kugira ngo abone ubwenegihugu bwa Amerika, akaba yari aherutse kurangiza igihano cyo gufungwa imyaka 10 yakatiwe kubera icyo cyaha.

Umugabo wa Munyenyezi witwa Arsene Shalom Ntahobari na nyirabukwe Pauline Nyiramasuhuko, bahamwe n’ibyaha bya Jenoside bakatirwa gufungwa n’urukiko rwa Arusha.

Habayeho kumuhererekanya ku mpande zombi

Muri iyi Video, umuvugizi wa RIB, Dr. Murangira B. Thierry, arasobanura ibyaha Munyenyezi akekwaho n’ibimenyetso byabyo.

Amafoto: Plaisir Muzogeye
Video: Roger Marc Rutindukanamurego