Idamange yitabye Urukiko

Muri ibyo harimo guteza imvururu n’imidugararo muri rubanda, gutesha agaciro ibimenyetso byerekeye kuri Jenoside, gutangaza amakuru y’ibihuha hakoreshejwe ikoranabuhanga, gutambamira ishyirwa mu bikorwa ry’imirimo y’igihugu, gukubita no gukomeretsa no gutanga sheki itazigamiye.

Idamange yahawe umwanya ngo agire icyo abivugaho, maze agira ati “Murakoze kumpa ijambo nyakubahwa Perezida w’urukiko, ibyo byaha byose nta na kimwe nemera”.

Ku bijyanye n’imvugo za Idamange zo kuvugira kuri Youtube, Umushinjacyaha yasobanuye ko bamukurikiranyeho icyaha cyo guteza imvururu cyangwa imidugararo muri rubanda, aho agaruka kuri videwo Idamange yatangaje agira ati “Abanyarwanda turambiwe gufatirwaho imyanzuro idahwitse”.

Umushincyaha akavuga ko izo mvugo za Idamange ‘wakomeje ahamagarira abantu kujya kwigaragambya ku biro by’Umukuru w’Igihugu (Village Urugwiro)’, ari icyaha kuko ngo cyateza imvururu muri rubanda.

Ku bijyanye n’icyaha cyo gutangaza amakuru y’ibihuha hakoreshejwe ikoranabuhanga, Idamange ashinjwa kuba yarakoze urutonde rw’abantu adafitiye gihamya ko bapfuye ngo bishwe na Leta, ndetse ko Umukuru w’igihugu nawe yitabye Imana kera, “Abanyarwanda bayobowe n’umuzimu”.

Umushinjacyaha ati “Iyo ni imvugo y’ibihuha ishobora gutera ubwoba abaturage, ni imvugo iteye isoni iharabika Nyakubahwa Perezida wa Repubulika”.

Uretse n’ibyo amagambo ya Idamange yafashwe nk’ibihuha, urukozasoni, gutukana no kwangisha abaturage ubuyobozi, kuko ngo yavuze ko Leta y’u Rwanda iriho ari baringa kandi abayobozi ari amabandi (abajura).

Ku bijyanye n’icyaha cyo gutesha agaciro ibimenyesto byerekeye Jenoside, Umushinjacyaha yakomeje asubiramo amagambo ya Idamange ngo wavuze ko “Coronavirusi yasimbuye iturufu rya Jenoside.

Idamgange ashinjwa kandi kuba yaravuze ko imibiri y’abishwe muri Jenoside icuruzwa amadevize akinjira, Leta ngo itondeka iyo mibiri mu nzibutso nk’isukari bacuruza, ikaba irisha Jenoside.

Umushinjacyaha akavuga ko ibyo bitari bikwiye kuvugwa n’umuntu uzi ibyabaye mu Rwanda, bigasobanura ko na we ubwe ngo ‘adaha agaciro bariya bantu bari mu rwibutso’.

Muri rusange Idamange arashinjwa ibyaha bikorerwa Igihugu, ibihungabanya umutekano, ibyo gupfobya Jenoside yakorewe Abatutsi ndetse n’icyo gutanga sheki itazigamiye.

Nyuma yo kubisobanurirwa ariko yatangiye avuga ko ku itariki 15 Gashyantare 2021, iwe hagiyeyo abantu umunani ahagana saa munani z’amanywa, bagasanga we ari ku ibaraza hejuru muri igorofa atuyemo.

Avuga ko hashize umwanya abantu bakorera Ubugenzacyaha bambaye impuzankano binjiye bakamusaba kumanuka hasi ntiyabikora, barazamuka bamwambika amapingu.

Ku cyaha cyo gukubita no gukomeretsa umupolisi, Idamange yavuze ko umupolisi ashobora kuba yarakomerekejwe n’urugi.

Ati “Sinzi uko uwo muntu byamugendekeye, nta n’ubwo nzi ko atari bagenzi be bamukomerekeje”.

Ku cyaha cyo gutesha agaciro ibimenyetso byerekeye Jenoside yakorewe Abatutsi, Idamange yavuze ko adashobora kugikora kuko ngo atari umuntu wapfobya Jenoside ahubwo ko n’uwabikora yamurwanya.

Ku cyaha cyo gutanga sheki itazigamiye, yavuze ko kitabayeho kuko ngo Nsabimana wahawe iyo sheki yari abizi neza ko nta mafaranga ari kuri konti ye.

Idamange amaze kwisobanura ku byaha aregwa yasoje agira ati “Ndasaba imbabazi abantu bumvise ko imvugo nakoresheje ziremereye zikababangamira. Ndabisabira imbabazi nk’Umunyarwanda utifuza gukomeretsa abandi”.

Idamange akomeza avuga ko “Guma mu rugo” ari yo yamuteye kuvuga amagambo akomeye kandi asesereza, akaba asaba kurekurwa kugira ngo asange abana be bakiri bato.

Iburanisha ryabaye Abacamanza bari mu Rukiko rw’Ibanze rwa Gasabo ruri i Kibagabaga, ariko Idamange we akaba yaburanye bamureba hifashishijwe iya kure mu buryo bw’ikoranabuhanga.

Ubushinjacyaha bwamusabiye gufungwa by’agateganyo iminsi 30, urukiko rukaba ruzabifataho umwanzuro ku wa Kabiri tariki 9 Werurwe 2021.

Idamange Iryamugwiza Yvonne

Idamange w’imyaka 42, akurikiranyweho ibyaha bitatu ari byo guteza imvururu cyangwa imidugararo muri rubanda, gukubita cyangwa kugirira urugomo abayobozi mu nzego za Leta no kwigomeka ku buyobozi.

Ku wa Mbere tariki 15 Gashyantare 2021, nibwo RIB yatangaje ko yataye muri yombi Idamange Iryamugwiza Yvonne, akekwaho guteza imvururu cyangwa imidugararo muri rubanda.

Yafashwe nyuma y’uko yari amaze imisi agaragara ku mbuga nkoranyambaga cyane cyane You Tube, avuga amagambo yanenzwe na benshi aho bavugaga ko yuzuyemo ihakana n’ipfobya rya Jenoside yakorewe Abatutsi mu 1994, no guharabika ubutegetsi bw’u Rwanda.

Mu ifatwa rye, Polisi y’u Rwanda yatangaje ko Idamange yakomerekeje umwe mu bashinzwe umutekano amukubise icupa mu mutwe.

Mu mashusho ya Idamange yatangajwe ku mbuga nkoranyambaga, Idamange avuga ko yanze kumvira ibyo Bamporiki yamusabaga gukora kuko binyuranyije n’umurongo uwo mugore yiyemeje.

Hon Bamporiki Edouard

Minisitiri Bamporiki amaze kubona ayo mashusho(video) ya Idamange, yashubije uwari wayashyize kuri Twitter ko yasuye Idamange nk’inshuti y’umuryango bamenyanye kuva kera(muri 2003), akaba ngo yari agiye kumugira inama.

Bamporiki yagize ati "Zari inshingano zanjye nk’umunyamategeko nkaba n’inshuti y’umuryango, kumwibutsa ibyaha n’ibihano nk’uko biteganywa n’amategeko, ibyo nabikoze mbyishimiye. Bitabaye ibyo igihe namaze mu ishuri ry’amategeko cyaba cyarabaye impfabusa, twamenyanye (na we) kuva muri 2003."

Urwego rw’Ubugenzacyaha (RIB) rwatangaje ku gicamunsi cyo ku wa mbere tariki 15 Gashyantare 2021, ko rwataye muri yombi Idamange Iryamugwiza Yvonne kubera kumukekaho guteza imvururu cyangwa imidugararo muri rubanda.

Nyuma y’amasaha make Komisiyo yo kurwanya Jenoside(CNLG) na yo yahise yongeraho ko Idamange agomba gukurikiranwaho ibyaha by’ingengabitekerezo ya Jenoside.

Polisi y’u Rwanda yo yatangaje ko Iryamugwiza yakomerekeje umwe mu bashinzwe umutekano akoresheje icupa yamuteye mu mutwe.

Abantu b’ingeri zitandukanye bari bamaze igihe bamagana Idamange bamubwira ko ibyo avugira kuri YouTube bihanwa n’amategeko y’u Rwanda.

Dr Jean Damascène Bizimana, Umunyamabanga Nshingwabikorwa wa CNLG

Ibi Dr Bizimana yabivugiye mu kiganiro yagiranye n’umunyamakuru wa RBA mu kiganiro cyitwa ’Imboni Musesenguzi’, cyari cyatumiwemo bamwe mu bakoresha imbuga nkoranyambaga ndetse n’umunyamategeko wavuze ko izo mbuga na zo zifatwa nk’uruhame.

Dr Bizimana yasobanuye ingingo ya 204 y’Itegeko riteganya ibyaha n’ibihano, avuga ko umuntu wese ukoresha imvugo mu ruhame, inyandiko z’ubwoko bwose, amashusho cyangwa ibimenyetso by’amoko yose bimanitswe, bitanzwe biguzwe cyangwa bigurishijwe cyangwa bitangajwe mu bundi buryo ubwo ari bwo bwose (na Youtube muri ubu buryo ngo irimo).

Uwangisha abaturage ubutegetsi buriho, uteza imvururu mu baturage ashaka ko basubiranamo cyangwa uteza imidugararo mu baturage muri Repubulika y’u Rwanda, iyo ahamwe n’ibyo byaha ahanishwa igifungo kiri hagati y’imyaka 10-15.

Dr Bizimana yibukije ko n’Itegeko ry’Ingengabitekerezo ya Jenoside hamwe n’ibyaha bifitanye isano na yo, ribuza igikorwa cyose gikorewe mu ruhame yaba mu bikorwa, mu nyandiko, mu mashusho cyangwa mu bundi buryo, biganisha ku gupfobya no guhakana Jenoside.

Yongeyeho ko ibyaha bifitanye isano n’ingengabitekerezo ya Jenoside harimo ibyo gupfobya, guhakana no guha ishingiro Jenoside, ndetse no gutesha agaciro ibimenyetso n’amakuru ajyanye na Jenoside, kwiba cyangwa kwangiza imibiri y’abazize Jenoside, gusenya, konona no gutesha agaciro urwibutso cyangwa ahashyinguye imibiri y’abazize Jenoside.

Ati "Mpagarariye n’aha, uwo mudamu Idamange mu magambo ye yavuze ko imibiri y’abazize Jenoside ari nk’ibicuruzwa bibyara amadevize, aha murumva rwose ko harimo imvugo yo gutesha agaciro urwibutso cyangwa se ahashyinguye imibiri y’abazize Jenoside".

Umunyamabanga nshingwabikorwa wa CNLG yavuze ko Itegeko Nshinga rivuga ko imibiri y’abazize Jenoside ikwiye icyubahiro n’agaciro kurusha abakiriho, asaba inzego z’ubutabera gukurikirana Idamange.

Umunyamategeko Jean Paul Ibambe we yahereye ku ngingo ya 38 y’Itegeko Nshinga rya Repubulika y’u Rwanda, avuga ko ubwisanzure mu gutanga ibitekerezo no gutangaza amakuru bitagomba kubangamira umudendezo n’uburenganzira bw’undi muntu.

Ibambe yavuze ko iyo ngingo ya 38 y’Itegeko Nshinga ivuga ko amategeko ateganya uburyo ubwo burenganzira bwubahirizwa, ariko amenshi muri ayo mategeko akaba yaragiyeho imbuga nkoranyambaga zitarakoreshwa nk’uko zikoreshwa muri iki gihe.

Ati "Abantu bibeshya ko ushobora gukorera ikintu ku mbuga nkoranyambaga ntube wabihanirwa, ariko mu by’ukuri Itegeko riteganya ibyaha n’ibihano rivuga ko ikintu gikorewe ku mbuga nkoranyambaga na cyo cyitwa uruhame".

Urwego rw’Ubugenzacyaha (RIB) rwatangaje ko Idamange Iryamugwiza Yvone afungiye kuri sitasiyo ya Polisi i Remera mu Mujyi wa Kigali.

Idamange yatawe muri yombi nyuma y’uko yari amaze iminsi agaragara ku mbuga nkoranyambaga, cyane cyane kuri YouTube avuga amagambo benshi bamaganiye kure bamushinja gupfobya Jenoside yakorewe Abatutsi mu 1994 no guharabika ubutegetsi buriho mu Rwanda.

Nyuma y’Itangazo rya RIB rivuga ko Idamange yafashwe agafungwa, Polisi y’u Rwanda na yo yakomeje ivuga ko uwo mugore akurikiranyweho ibyaha byo guteza imvururu cyangwa imidugararo muri rubanda, kwigomeka ku nzego z’umutekano no gukomeretsa umwe mu bashinzwe umutekano.

Idamange Iryamugwiza Yvonne yatawe muri yombi

Itangazo rya Polisi y’u Rwanda rivuga ko Polisi ifatanyije n’Urwego rw’Igihugu rw’Ubugenzacyaha (RIB), nyuma y’ubwo bugenzuzi, izo nzego zataye muri yombi Idamange Iryamugwiza Yvonne, akaba akekwaho ibyaha byo guteza imvururu cyangwa imidugararo muri rubanda, kwigomeka ku nzego z’umutekano no gukomeretsa umwe mu bashinzwe umutekano.

Polisi yatangaje ko Iryamugwiza yakomerekeje umwe mu bashinzwe umutekano akoresheje icupa yamuteye mu mutwe, ahita ajyanwa igitaraganya ku bitaro bya Kacyiru kugira ngo avurwe.

Idamange Iryamugwiza Yvonne

Umuvugizi w’umusigire wa RIB, Dr. Murangira B. Thierry, yemereye Kigali Today aya makuru, yirinda gutangaza byinshi ku itabwa muri yombi rya Idamange kugira ngo bitabangamira iperereza.

Uyu mugore kuri ubu ufungiye kuri sitasiyo ya RIB i Remera mu Mujyi wa Kigali atawe muri yombi nyuma y’uko yari amaze iminsi agaragara ku mbuga nkoranyambaga cyane cyane kuri YouTube avuga amagambo benshi bamaganiye kure bamushinja gupfobya Jenoside yakorewe Abatutsi mu Rwanda no guharabika ubutegetsi buriho mu Rwanda.

Komisiyo y’Igihugu yo Kurwanya Jenoside (CNLG) n’indi miryango itandukanye irwanya Jenoside yavuze kuri uyu mugore uvuga ko yarokotse Jenoside yakorewe Abatutsi, ibyo ariko bikaba bitamuha uburenganzira bwo kuyipfobya, nk’uko Dr Bizimana Jean Damascene, Umunyamabanga Nshingwabikorwa wa CNLG yabivuze.

Si iyo miryango gusa yahagurukiye kwamagana ubutumwa nk’ubwo buvuga ko Leta ikoresha Jenoside yakorewe Abatutsi mu bucuruzi.
Umuhanzi Massamba Intore yanditse ubutumwa bugira buti “igihugu cyacu cyarababaye kubera Jenoside yakorewe Abatutsi. Ntituzihanganira na rimwe uwo ari we wese upfobya agatesha agaciro amateka ya Jenoside agamije indonke, icyo yaba yitwaje cyose. Ntituzabyemera!”

Butera Knowless na we yagize ati “Gufata imibiri y’abacu bishwe ukayibonamo ubucuruzi ugatinyuka kubivugira mu ruhame ntibibabaje gusa ahubwo ni ukwigaragaza nk’aho utari uwacitse ku icumu rya Jenoside. Twamaganye imyumvire nk’iyo.”

Jules Sentore na we yagize ati “Uhakana agapfobya Jenoside yakorewe Abatutsi, agatesha agaciro amateka yayiranze uwo ni umubisha, ni umugome ukwiye guhanwa n’itegeko. Twamaganye mwene abo n’ababashyigikiye bose turabiyamye.”

Si abahanzi gusa, ahubwo n’abanyamakuru batandukanye bagiye bandika ubutumwa bugamije kwamagana abapfobya Jenoside yakorewe Abatutsi. Umunyamakuru Sandrine Isheja yagize ati “Utazi iyo ava ntamenya iyo ajya. Babyeyi ku bw’inyungu z’u Rwanda rw’ejo nimureke tubwize abana ukuri. Twirinde guhisha ndetse no kurwanya twivuye inyuma abapfobya Jenoside yakorewe Abatutsi n’abagoreka amateka.”

Guhera ibumoso Nizeyimana Olivier de Maurice, Ufitinema Aimée Gérard, Gasasira Jean Maurice

Ni nyuma y’uko uwo Idamange Iryamugwiza Yvonne uvuga ko yarokotse Jenoside yakorewe Abatutsi, yihandagaje akavugira kuri YouTube ko Leta y’u Rwanda ikoresha Coronavirus na Jenoside yakorewe Abatutsi mu nyungu zayo ariko abarokotse bagakomeza kubaho nabi.

Olivier De Maurice Nizeyimana uhagarariye IBUKA mu murenge wa Muhima, avuga ko kuba Jenoside yaratangiye gutegurwa kuva mu 1959, ikageragezwa mu myaka yakurikiyeho ahantu hatandukanye kugeza mu 1994 ubwo yashyirwaga mu bikorwa ku mugaragaro, bibabaje kubona hakiri abatinyuka gupfobya Jenoside yakorewe Abatutsi, bamwe ndetse ugasanga bemeza ko bayirokotse.

Nizeyimana agira “Abantu bapfobya Jenoside ntituzigera tubemerera, kwirirwa ubeshya amahanga kubera inda ya mpemuke ndamuke ! Ndagira ngo twese duhaguruke nk’abarokotse Jenoside turwanye abayihakana, abayipfobya, kugira ngo abana bacu tuzabarage igihugu cyiza kandi bazamenye amateka yacyo”.

Uwitwa Ufitinema Aimée Gérard warokokeye mu murenge wa Muhima, we asanga ijambo “Never Again – Ntibikongere Ukundi” ryaravuzwe bihagije, akaba atumva ukuntu hakiboneka abantu bafite ingengabitekerezo ya Jenoside, harimo n’abavuga ko bayirokotse, ati “Ducire birarura! Abana bacu ntibakwiye kunyura mu bihe bibi nk’ibyo twanyuzemo”.

Mugenzi we Gasasira Jean Maurice we avuga ko uriya watinyutse kuvuga amagambo atesha agaciro Jenoside yakorewe Abatutsi, ari ugutoneka abacitse ku icumu.

Gasasira ati “Uyu n’abandi ariko batari benshi, bikomeza kudukora mu nkovu, twe tuzi agaciro k’abacu. Abavuga nk’uriya babikoreshwa n’inda ya ‘mpemuke ndamuke’, nyamara twe iyadusize izi impamvu. Twizere Imana yacu kandi duhumure, duhobere ubuzima, ariko ikiruta byose duhagarare mu ijwi rimwe rigira riti ‘abacu bazize Jenoside yakorewe Abatutsi tuzahora tubazirikana’, naho bariya badusubiza inyuma, Imana izabadutsindira mu izina rya Yesu”.

Mu mpera z’umwaka ushize kugeza mu ntangiriro z’uku kwezi kwa Gashyantare 2021, Komisiyo y’igihugu yo kurwanya Jenoside (CNLG), yatangiye gusesengura ibiganiro bimwe na bimwe cyane cyane ibitangirwa kuri YouTube, igasanga harimo imvugo nyinshi ziganisha ku gupfobya no guhakana Jenoside yakorewe Abatutsi n’izikurura amacakubiri.

Umunyamabanga Nshingwabikorwa wa CNLG, Dr Bizimana Jean Damascène, avuga ko mu byo basesenguye harimo ibyatambutse kuri TV zikorera kuri YouTube zirimo Umubavu TV, Ukuri mbona, Umuryango TV, Real Talk TV n’ibindi ndetse n’amashusho ya YouTube ashyirwaho n’abantu ubwabo, CNLG iza gusanga harimo abarengereye bikabije.

Dr Bizimana ati “Hari n’ibyavuzwe n’uriya mugore Idamange nk’aho avuga ko Coronavirus ari iturufu igihugu gikoresha ngo nk’uko Jenoside yakorewe Abatutsi ari iturufu, ndetse akanongeraho ko imibiri y’abazize Jenoside iri ku nzibutso icuruzwa, igihugu kikavanamo amadovise yinjira mu gihe abarokotse Jenoside babayeho nabi”.

Idamange Iryamugwiza Yvonne

CNLG nyuma yo gusesengura ibyagiye bivugwa n’abantu batandukanye barimo n’uriya Idamange n’ubwo atari we shingiro, ku itariki 5 Gashyantare yasohoye itangazo ryibutsa abantu kwirinda ibikorwa bikwirakwiza ingengabitekerezo ya Jenoside, ibifitanye isano na yo n’ibindi byaha bibujijwe n’amategeko Igihugu kigenderaho.

Ni mu gihe habura amazi abiri ngo u Rwanda rwunamire ku nshuro ya 27 abishwe muri Jenoside yakorewe Abatutsi mu 1994, igahitana abarenga miliyoni imwe mu minsi ijana gusa.