Muri iryo jambo, yatanze urugero ku ngagi yise izina mu myaka 15 ishize aho yakomeje gukurikirana imibereho yayo, ayiha ibikenerwa byose none ikaba igeze ku rwego rwo kuba umutware w’umuryango.

Nk’uko yabivuze, ingagi ebyiri yise amazina zari zavutse ari impanga, zose azitaho mu buryo bushoboka bwose zibasha gukura neza.

Yagize ati “Mu muhango wo Kwita Izina ku nshuro ya mbere, wari umunsi ukomeye.

Nagize umwanya wo kwita izina abana b’ingagi, ni mu myaka 15 ishize. Ntabwo yari ingagi imwe, ahubwo zari zaravutse ari impanga. Ntabwo nazibereye umubyeyi gito, nazitayeho nishyura amafaranga y’ishuri, nkora n’uburyo bushoboka nkajya mvugana na zo, burya muri aka gace dufite internet yihuta”.

Akomeza agira ati “Umwe muri abo bana, yabaye ingirakamaro mu muryango. Ubu ni we mutware w’umuryango, ni Silverback. Yitwa Byishimo. Uwo mutware arishimye”.

Iyi ni yo ngagi yitwa Byishimo. Yahawe izina na Perezida Kagame muri 2005. Yavutse muri 2004, ivukana n’impanga yayo yitwa Impano (Ifoto: Pinterest)

Perezida Paul Kagame, yashimye ubwitange bw’abaturiye Pariki y’Ibirunga aho yemeza ko intambwe ubukerarugendo bumaze kugeraho mu Rwanda nk’uko byavuzwe n’ubuyobozi bwa RDB, ko itari kugerwaho hatabayeho ubufatanye bw’abaturage aho ingagi zihishimira ndetse na ba mukerarugendo bakaba baranyuzwe no gusura iyo Pariki.

Perezida Paul Kagame, yasabye abaturage gukomeza ubwo bufatanye mu gufata neza ingagi, kugira ngo zikomeze kubyazwa ibikomeza guteza imbere igihugu.

Ati “Niturushaho gufatanya no kwifata neza, bizakomeza kuzana inshuti nyinshi, abadusura benshi n’inyungu ku gihugu, ariko no kuri mwebwe ubwanyu, mu miryango ituye hafi hano muturanye na Pariki y’Ibirunga”.

Yashimiye n’abakozi ba RDB n’ubuyobozi bwayo bukurikirana iyo Pariki umunsi ku wundi, avuga ko ibyinshi byiza biri imbere.

Ati “Ibyo byiza tubisatire turushaho gukora neza”.

Ibyo birori byarimo na Perezida wa Repubulika Paul Kagame, n’abandi bashyitsi batandukanye, baba aba hano mu Rwanda n’abaturutse hirya no hino ku isi.

Akanyamuneza kari kose ku bitabiriye ibyo birori nk’uko bigaragara muri aya mafoto dukesha Urwego rw’Igihugu rw’Imiyoborere (RDB) n’umunyamakuru wa Kigali Today ufotora, Plaisir Muzogeye, ndetse n’amashusho (Video) yafashwe na Richard Kwizera wa Kigali Today.

Kanda munsi hagati urebe amashusho (Video) agaragaza uko uyu muhango wo Kwita Izina wagenze

Byari ibyishimo bikomeye kuri Niringiyimana gukora mu biganza bya Perezida Kagame

Uwo musore w’imyaka 23 uvuka mu Murenge wa Murambi mu Karere ka Karongi, ni umwe mu batoranyijwe mu byamamare byatumiwe mu gikorwa cyo kwita izina ku nshuro ya 15 abana b’ingagi 25 bavukiye muri Pariki y’Ibirunga, mu muhango wabereye mu Kinigi ku wa gatanu tariki 06 Nzeri 2019.

Yavuze ko atigeze agira inzozi zo kubonana na Perezida Paul Kagame kuko yumvaga bidashoboka, ariko ngo igikorwa yakoze cyo guhanga umuhanda mu gace atuyemo, kimugejeje ku rwego rwo gusuhuzanya na Perezida bakanicarana.

Agira ati “Ndumva nezerewe, ni ubwa mbere nari nkoze mu ntoki za Perezida Kagame. Sinigeze mbitekereza no mu buzima, kuko numvaga bidashoboka nta hantu twahurira. Ariko namukoze mu ntoki turanicarana, ntoranywa no mu bantu bakomeye bo kwita izina. Guhura na Perezida Paul Kagame, ni ishimwe ngiye kuratira iwacu”.

Niringiyimana wise ingagi izina “Nimugwire”, yavuze ko yarihisemo mu cyifuzo cyo kugira ngo zibyare zororoke zigwire mu gihugu.

Ati “Impamvu nahisemo ririya zina, ni uko nabonaga ari ngombwa ko zikwirakwira mu Rwanda, zikororoka zikaba nyinshi kugira ngo tugwize amadevise mu Rwanda. Icyambabaje gusa ni uko nabaye nk’ubyishe mu kuvuga izina nise ingagi ndajijinganya”.

Yavuze n’uburyo yahamagariwe kuza kwita izina, n’uburyo yageze mu Kinigi avuye i Karongi. Ngo yaje mu modoka yo mu bwoko bwa V8 aho baje kumufata mu rugo mu cyaro atuyemo.

Ngo byabaye nk’igitangaza kuri we kugendera muri iyo modoka yabwiwe ko ifite agaciro k’amafaranga y’u Rwanda Miliyoni 100.

Yagize ati “Ni ubwa mbere ntangiye gutemberezwa u Rwanda. Barampamagaye kuri telefoni bambwira ko nzaza kwita izina. Nimugoroba nibwo banyoherereje imodoka yo mu bwoko bwa V8, ngo igura miliyoni 100. Kugenda muri iyo modoka nabonye ari ibintu by’icyubahiro”.

Yavuze n’impamvu nyamukuru yamuteye kugira igitekerezo cyo gukora uwo muhanda. Niringiyimana avuga ko igitekerezo cyo kubaka umuhanda yakigize mu mpera z’umwaka wa 2015.

Ngo byatewe n’abarwayi bavaga mu kigo nderabuzima cya Mwendo bakajyanwa mu bitaro bya Kirinda, bakagerayo bibagoye kubera inzira mbi.

Ngo ubwo yari mu murima ahinga hamwe n’ababyeyi be, hanyuze abantu bari bahetse umubyeyi arembye cyane. Ngo ubwo bari bamuhetse mu ngobyi, baranyereye bamutura hasi ahava aniha cyane.

Ati “Ubwo nari mu murima mpingana n’ababyeyi banjye, hanyuze abantu bahetse umubyeyi wari urwaye aturutse mu kigo nderabuzima cya Mwendo. Bagenda bamuhetse mu ngobyi basesera mu bihuru. Icyo gihe imvura yari yaguye hanyerera, baranyerera bamutura hasi umurwayi ahava agenda aniha. Niba yarageze kwa muganga i Kirinda amahoro simbizi, ntabwo nabashije gukurikirana amakuru ye ngo menye niba yarabaye muzima cyangwa niba atarabayeho”.

Avuga ko kuva uwo munsi yafashe gahunda yo guhanga umuhanda muri ako gace, aho yakoresheje imbaraga ze akora umuhanda ureshya n’Ibirometero 7.

Ngo nta muntu wigeze amufasha uretse umugitifu w’akagari gaturanye n’ako atuyemo wasanze aharura uwo muhanda aramushima. Ngo umunsi umwe yamwoherereje abaturage bo kumuha umuganda aho baharuye ahareshya na metero esheshatu.

Agira ati “Nta muntu wigeze amfasha, uretse Gitifu w’akagari ka Mwendo. Yaraje arambwira ati wa mwana we watekereje neza. Bampa umuganda umwe wo ku wa gatatu aho banyoherereje abantu 12 baraza baramfasha. Bakoze metero niba ari esheshatu, ni uwo muganda bampaye. N’ejobundi bampaye undi muganda w’ukwezi bakora ahareshya na metero 12”.

Avuga ko ubwo yakoraga uwo muhanda, abenshi bagiye bamuca intege bamwe bakamwita umusazi, ariko ntibimuce intege kuko yabaga azi ko ari gukorera igihugu cye nubwo ari mu buzima bumugoye.

Ati “Nubwo ntabashaga kubona imirire ihagije ariko ntabwo byambujije gukora”.

Uwo musore avuga ko aho ageze harenze ubushobozi bwe kuko uwo muhanda wagonze umugezi, aho hakenewe ikiraro. Avuga ko icyizere afite ari uko Leta izamufasha ikamushyiriramo ikiraro, n’ahandi hasabwa gukoreshwa imashini zabugenewe zikahakora mu rwego rwo kumworohereza kugira ngo igikorwa yatangiye agisoze amahoro.

Yasabye urubyiruko gukora cyane, baharanira kuzamura iterambere ry’igihugu badategereje gusa inyungu zijya mu mifuka yabo.

Reba hano uko Niringiyimana asobanura uburyo baje kumutwara ngo ajye kwita izina ingagi

Ni mu muhango ngarukamwaka wo Kwita izina ku nshuro ya 15 wabaye ku wa gatanu tariki 06 Nzeri 2019, mu Murenge wa Kinigi mu Karere ka Musanze, mu nkengero za Pariki y’Igihugu y’Ibirunga, aho abana b’ingagi 25 biswe amazina.

Mu ijambo rye, Perezida wa Repubulika Paul Kagame yashimiye uburyo abaturage bafata neza ibidukikije, ingagi zikaba zikomeje kororoka.

Ati “Ndashimira cyane abaturage ba Musanze n’abavuye ahandi. Murakoze cyane. Ndabashimira ko mwifata neza mugafata neza n’ibidukikije. N’ubwo byavuzwe ko twese tubifitemo inyungu, hari ubwo bamwe batamenya ibyo bafitemo inyungu bikabapfana ubusa, ariko mwe abaturage ba Musanze ndabashimira cyane”.

Perezida wa Repuburika yavuze ko mu gihe ingagi zifashwe neza, na zo zitanga umusaruro ku gihugu, atanga urugero rw’ingagi yise izina irakura ihinduka umutware w’izindi.

Agira ati “Ndibuka mu myaka icumi ishize, ubwo wari umunsi ukomeye wo Kwita Izina, nagize umwanya wo kwita izina, ntabwo ingagi yari imwe zari impanga. Ntabwo nabaye umubyeyi gito ngo nite izina nindangiza nigendere, natanze amafaranga y’ishuri abana bariga, nkagira n’umwanya wo kuganira na bo. Hari uburyo bwa interineti hafi aho. Imwe muri abo bana yahindutse ingirakamaro, ivamo umuyobozi w’izindi uwo nari nahaye izina rya Byishimo”.

Perezida Kagame avuga ko iterambere riva muri Pariki y’Ibirunga, rituruka ku bufatanye bw’abafatanyabikorwa banyuranye, barimo Abanyarwanda ndetse n’Abanyamahanga.

Asaba abaturage kurushaho kwita kuri Pariki y’Ibirunga mu rwego rwo gukomeza gukurura ba mukerarugendo, bazanira ubukungu igihugu.

Agira ati “Banyarwanda mwese muri hano, abaje n’abatabashije kuza hano, ndabashimira mbabwira ko ibyo mukora twifuza ko bibagaragarira ko ari inyungu kuri mwe”.

Yavuze ko Leta yashyiriyeho abaturage umugabane ungana na 10% y’ibiboneka muri Pariki y’ibirunga mu rwego rwo kurushaho kubateza imbere.

Agira ati “Twashyizeho umugabane wa 10% w’ibiboneka muri Pariki kugira ngo bigaruke muri mwebwe, bibateze imbere biteze n’igihugu imbere hanyuma dukomeze dukorere hamwe dufatanye, ndetse turusheho kongera amafaranga ava muri iyi Pariki y’Ibirunga”.

Nyuma y’ijambo rya Perezida Paul Kagame, abaturage baganiriye na Kigali Today, bavuze ko banyuzwe n’iryo Jambo ryo kubashimira uruhare rwabo mu iterambere rya Pariki, bizeza Perezida ko bagiye gushyiramo imbaraga barushaho kubungabunga iyo Pariki.

Uwitwa Jambo Gihame Jean Baptiste yagize ati “Ndashimye cyane, Perezida turamubonye kandi atubwiye ijambo ryiza, adusabye gukomeza kurinda Pariki yacu, kandi natwe tumwemereye ko tutazahwema gukora ibyo adusabye, duteza Pariki yacu imbere kugira ngo ba mukerarugendo biyongere n’amafaranga aze mu gihugu”.

Uwizeyimana Odette we yagize ati “Ijambo rya Perezida wacu narikurikiye yadusabye gukomeza kubungabunga Pariki yacu, kugira ngo ibiyivamo bidufashe gutera imbere. Hari uburyo ba mukerarugendo baza tukabafasha bakadusigira n’amafaranga, turarushaho kubyitaho”.

Pandasi Jean Baptiste ati “Uyu munsi watunejeje cyane kuko kuva batubwiye ko ingagi ziyongereye, hari inyungu kuri twe kandi n’akazi kiyongereye. Aho dutangiye kumenya akamaro ka Pariki tukayibungabunga twarushijeho kubona iterambere.Twari ba rushimusi ariko ubu ni twe dusigaye tuyirinda kuko twamenye akamaro kayo. Impanuro za Perezida turazikurikiza dukomeze duteze imbere Pariki yacu n’amafaranga arusheho kwinjira”.

Umuyobozi w’Ikigo cy’Igihugu Gishinzwe iterambere(RDB), Clare Akamanzi, na we yunze mu ijambo rya Perezida Kagame, ashimira abaturage bakoze cyane batuma umusaruro uva muri Pariki wiyongera kurushaho.

Agira ati “Mu myaka icumi ishize, ntawashidikanya kuvuga ko umubare w’ingagi wiyongereye cyane. Twageze kuri byinshi kandi dufatanyije, amafaranga dusarura ku bukerarugendo mu ngagi yariyongereye, uruhare rwayo ku bukungu bw’igihugu rwariyongereye, imisoro ikomoka ku bukerarugendo yariyongereye. Ibi byose twabigezeho ku ruhare rwanyu nk’abaturage. Dufatanye kubungabunga Pariki nk’umutungo twese dusangiye”.

Guverineri Gatabazi JMV yashimiye abafatanyabikorwa, by’umwihariko RDB ku ruhare idahwema kugaragaza mu kuzamura iterambere ry’abaturiye Pariki y’ibirunga, mu kongera ibikorwa remezo binyuranye bifitiye abaturage akamaro.

Ati “Turashimira RDB nk’ikigo kibishinzwe, n’umushinga wa SACOLA bafatanya aho abaturage bamaze kugezwaho amazi meza, kubakira abatishoboye, amashuri, amavuriro ibiro by’imirenge n’ibindi bikorwa by’iterambere bagiye bateramo abaturage inkunga.

Guverineri Gatabazi yavuze ko iyo Pariki y’Ibirunga ikomeje kuzamura iterambere ry’Intara y’Amajyaruguru, ahamaze kubakwa Hoteli 50 zirimo izifite inyenyeri eshanu, n’amacumbi yifashishwa mu gucumbikira umubare munini w’abagana Pariki n’abasura Intara y’Amajyaruguru.

Guverineri Gatabazi, avuga ko imbogamizi zikiri ku bibazo by’imihanda imwe n’imwe igana muri Pariki itameze neza ku buryo bibangamira bamwe mu basura Pariki.

Abaturiye Pariki y’Ibirunga bishimiye kwakira Perezida Kagame

Yabivugiye mu muhango wo Kwita Izina abana b’ingagi wabereye mu Kinigi mu karere ka Musanze, kuri uyu wa gatanu 06 Nzeri 2019.

Muri uyu muhango, Perezida Kagame yashimiye abaturage bitabiriye uyu muhango, ndetse n’abandi batumiwe muri uwo muhango muri rusange, ariko by’umwihariko ashimira abatoranyijwe kwita amazina abana b’ingagi 25.

Perezida kagame yabashimiye abavuga mu mazina buri umwe, agira ati “Nagira ngo mbashimire kandi mumfashe mwese tubashimire”.

Perezida Kagame yaganiraga na Hailemaliam desaleign wahoze ari Minisitiri w’intebe wa Ethiopia (umwe mu bise amazina abana b’ingagi)

Perezida Kagame yavuze ko Leta yifuza ko ibyo abaturage baturiye Pariki y’Ibirunga bakora bibazanira inyungu, ari yo mpamvu hashyizweho umugabane wa 10% y’ibiboneka muri iyo pariki, kugira ngo bigaruke mu baturage bibateze imbere.

Yagize ati “Niturushaho gufatanya no kubifata neza, bizakomeza kuzana inshuti nyinshi, abadusura benshi, n’inyungu nyinshi ku gihugu no kuri mwebwe ubwanyu mu miryango ituye hafi hano muturanye na Pariki y’Ibirunga.

Yunzemo ati “Ndagira ngo rero dukomereze aho, dufatanye. Ndashimira n’abashyitsi bifatanyije natwe bavuye kure, n’abandi bazakomeza kuza, kubera ko bamenya ko abaturage b’u Rwanda, abaturiye ibirunga bifata neza, bafata neza ingagi, baturanye nazo, kubera ko tuzivanamo ibiduteza imbere”.

Perezida Kagame kandi yanashimiye Urwego rw’Igihugu rw’Iterambere (RDB) n’abakozi ba Parikiy’Ibirunga bose , by’umwihariko abarinda Pariki, anashimira uburyo RDB ibikurikirana umunsi ku munsi.

Ati “Dukomereze aho, dufatanye, dukore byinshi, ni ko bikwiye, ni byo u Rwanda rwifuza”.

Dore amwe mu mazina yiswe abana b’ingagi n’abayabise

Ambasaderi Ron Adams yise umwana w’ingagi izina rya Igihango, Nicolas Adarberth amwita Irembo, Umuhanzi Meddy amwita Inkoramutima, umutoza Van Gaal we yamwise Indongozi, Hailemariam Desaleign yamwise Umukuru, Emmanuel Niringiyimana yamwise Mugwire, naho umuhanzi w’icyamamare w’umunya Amerika Ne-Yo, we yamwise Biracyaza.

Pariki y’Ibirunga isurwa na benshi

Abaganiriye na Kigali Today, bavuga ko biteguye neza umuhango ugiye kuba kuri uyu wa gatanu tariki ya 06 Nzeri 2019, wo kwita amazina abana 25 b’ingagi bavutse muri uyu mwaka wa 2019.

Bavuga ko umuhango wo kwita izina abo bana b’ingagi, bazi n’agaciro kawo kuko ngo bamwe ubuzima bwiza babayeho babukesha ibyo ingagi zinjiza mu gihugu.

Rusanganwa Philippe ati “Ntawe utashima igikorwa cyo Kwita Izina abana b’ingagi, kuko aho zitugejeje nitwe tuhazi. Reba umujyi wa Musanze uko usa, hari ahandi urawubona?Iyo abantu baje kuzisura basiga amafaranga natwe abaturage tukabona akazi tugahembwa tukagaburira ingo zacu. Ingagi zifite agaciro rwose ziragabura, ni nazo zazamuye Kinigi n’aka karere ka Musanze”.

Abahoze ari ba rushimusi ubu bakora ubukerarugendo bushingiye ku muco aho bigisha no kumasha

Karenzi Emmanuel agira ati “Kwita izina ni igikorwa twese nk’Abanyarwanda twiyumvamo. Ntako bisa kuba abanyamahanga baza urujya n’uruza baje gusura ingagi mu Rwanda. Ingagi ni umutungo w’igihugu, ni ubusugire bw’igihugu umwihariko kuri twe Abanyakinigi”.

Abo baturage bavuga ko akarusho, mu Kwita izina buri mwaka abana b’ingagi baba bavutse, ko baba biteguye guhura n’umukuru w’igihugu, amahirwe bavuga ko barusha utundi turere.

Buri mwaka bita amazina abana b’ingagi bavutse

Umwe mu bagore bakora akazi ko gusukura mu muhanda agira ati “Turi gukora isuku, Perezida wacu aradusura. Murumva ni akarusho kuba dufite ingagi, tuba twiteguye ko buri mwaka tuzasurwa na Perezida. Ingagi zifite akamaro, nk’ubu ndi gukora isuku ariko nizeye no guhembwa kubera ko ingagi hari icyo zinjiza”.

Karenzi Emmanuel arongera ati “Muzi ko ari twe dufite umwihariko wo kubona Perezida wa Repuburika buri mwaka!Turaba twabukereye twabyambariye twagiye kwakira Umukuru wacu w’igihugu, n’abashyitsi bose bazaza. Twumvise ko haraza n’abatoza bakomeye ku mugabane w’i Burayi barimo ba Van Gaal batoje Manchester United”.

Ba mukerarugendo bashimishwa no gusura Pariki y’Ibirunga

Naho umukecuru Kankera we ati “Ndi umukecuru, ariko ubu ndazamutse ndare yo nakire Perezida wacu. Twishimiye kumubona. Ibi byose ni ingagi abatazigira ntabwo bazamubona vuba. Reka ingagi zikomeze zihabwe agaciro zikurure abatuzanira amafaranga mu gihugu natwe dukire”.
Hari n’abahoze ari ba Rushimusi bemeza ko bamaze gutezwa imbere n’ingagi nyuma y’uko bamaze kumenya agaciro kazo bahitamo kuzirinda nyuma y’igihe kinini bazihiga.

Abibumbiye mu makoperative anyuranye ahuriye mu kigo ‘Gorillas Gardians’ gikora ubukerarugendo bushingiye ku muco, baremeza ko bamaze gutera imbere aho bubatse inzu, bagura amatungo babikesha gukora ubukerarugendo bushingiye ku muco.

Gorillas Gardians ni ikigo cyahoze cyitwa ‘Iby’iwacu’ gihuza amakoperative 10 agizwe n’abanyamuryango bakabakaba 1,300 bahoze ari ba rushimusi muri Pariki y’Ibirunga.

Rwoyiza Jean Damascene, umwe mu bahagarariye ikigo cya Gorillas Gardians, avuga ko babaga mu buzima bwo guhiga inyamaswa bangiza Pariki.

Ngo babagaho batazi akamaro Pariki ifitiye igihugu, bakumva ko ubuzima bwo guhiga badashobora kubuvamo mu gihe babonaga bubatunze.

Avuga ko igitekerezo cyo kuva mu buhigi bangiza Pariki bica n’inyamaswa, cyaturutse ku munyamahanga witwa Edwin, aturutse mu Rwego rw’iiigihugu rw’Iterambere (RDB).

Ati “Twatangiye ubuhigi kera, njye nari umwana ariko najyanaga n’umubyeyi wanjye tujya guhiga inyamaswa. Ni njye wamutwazaga inyama z’inyamaswa yishe.

Abari ba rushimisi mu bukerarugendo bushingiye ku muco bakora n’ubuvuzi gakondo

Haje kuza umuterankunga witwa Edwin wahoze muri RDB, atugira inama yo kwihuriza mu makoperative tukava mu bikorwa bibi byo kwangiza Pariki no kwica inyamaswa”.

Avuga kandi ko nyuma yo kwigishwa, bahagaritse ubuhigi bihuriza mu ma koperative aho batangiye guhuza imbaraga n’ibitekerezo ubu bakaba bamaze kugera ku iterambere mu bukerarugendo bushingiye ku muco bubinjiriza asaga miliyoni eshanu z’amafaranga y’u Rwanda mu kwezi.

Agira ati “Mu kwihuriza hamwe twagiye tugabana imirimo binyuze mu makoperative habamo ababyinnyi b’intore, abakaraza, aberekana amateka y’ubwami, kwerekana uko Umunyarwanda yengaga urwagwa akoresheje intoki, ubuvuzi gakondo uko abanyarwanda bavuraga bakoresheje imiti y’ ibyatsi”.

Icyo kigo gikoresha abakozi 31 bahembwa buri kwezi, abanyamuryango basanzwe bagafashwa korora amatungo magufi ahamaze gutangwa ihene zisaga 1200.

Buri kwezi kandi 70% y’amafaranga yinjiye mu kigo ahabwa amakoperative hagamijwe kurushaho gufasha abanyamuryango mu iterambere ry’ingo zabo nk’uko Rwoyiza akomeza abivuga.

Nyirasafari Belancille wo mu murenge wa Kinigi, umwe mubibumbiye muri ayo ma koperative nyuma yo gukora ibikorwa byo kwangiza Pariki ashaka inkwi, avuga ko yamaze kwiteza imbere abikesha umwuga we w’ububoshyi.

Bamurika n’umuco wo guhamiriza

Ati “Nahoraga mu ishyamba nangiza Pariki ngo ndashaka inkwi, nyuma yo kwibumbira muri koperative COOPAV, ubu ndi umuboshyi w’ibyibo, uduseke n’ibindi, ku kwezi ninjiza amafaranga amfasha kwigisha abana no gutunga urugo”.

Bizimana Jean Bosco wo muri iyo koperative avuga ko akora ibihangano mu biti, birimo kubaza inkoni. Ngo bimaze kumuteza imbere kuko yubatse inzu nziza agura n’umurima.

Hari n’ibikorwa bihanitse byubatswe ahaturiye Pariki y’Ibirunga

Mu gukomeza kubungabunga Pariki y’Ibirunga, hashinzwe ishyirahamwe ryitwa ‘SACOLA’, rihuriyemo abaturage baturiye Pariki y’Ibirunga, mu rwego rwo kubungabunga iyo Pariki no guteza imbere imibereho myiza y’abaturage, aho iryo shyirahamwe rimaze gukora ibikorwa binyuranye by’iterambere.

Nsengiyumva Pierre Celestin, Umuyobozi w’iryo shyirahamwe rya SACOLA, avuga ko bafasha abaturage kwiteza imbere mu burezi, mu bworozi no mu bindi.

Ati “Buri mwaka turihira amafaranga y’ishuri abanyeshuri 40 mu mashuri yisumbuye baturuka mu miryango itishoboye. Tukaba tumaze kurihira abagera ku 120. Tumaze kubaka ibyumba by’amashuri binyuranye, dufasha n’abaturage batishoboye kububakira no kubarihira mituweri, tubaha inka n’ibindi bikorwa binyuranye”.

Bereka ba mukerarugendo ubukwe bwa kinyarwanda

Iryo shyirahamwe rimaze no kugera ku bikorwa byiterambere biri ku rwego ruhanitse aho bamaze kubaka na Hoteli y’icyitegererezo yitwa ‘Hotel Silvaback Lodge’ icumbikora ba Mukerarugendo batandukanye, aho icyumba kimwe cyishyurwa amadorari 1000 mu ijoro rimwe, nk’uko Nsengiyumva akomeza kubivuga.

Ati “Ni Hotel ihambaye, aho kuyicumbikamo umuntu umwe yishyura amadorari 1000 mu ijoro rimwe uko urayemo bigakomeza kwikuba. Abayigana baba ari benshi ku buryo uku kwezi kwa cyenda kose kwamaze gufatwa”.

Mu Kinigi, nyuma y’imyaka 25 ishize hamaze kubakwa ibikorwaremezo binyuranye birimo hoteli esheshatu ziri ku rwego rwo hejuru, na Hoteli esheshatu ziri ku rwego ruringaniye. Izo hoteli zikaba zifite uruhare rukomeye mu kuzamura iterambere ry’abaturage nk’uko bivugwa na Uwingeri Prosper, Umuyobozi wa Pariki y’igihugu y’Ibirunga.

Agira ati “Dufate nka SACOLA, iyo urebye ibikorwa ifite, mu mwaka itanga miliyoni zirenze 300 mu baturage, ariko wareba aho hoteli yubatse no kuba itanga imisoro igatanga na miliyoni zisaga 300 buri mwaka, usanga akenshi zijya mu bikorwa by’iterambere, amashuri, ibikorwa by’ikoranabuhanga, amavuriro, amazi, amashanyarazi no guhindura imibereho y’abaturage dufatanyije. Duhereye kuri Bisate na Singita, ni abantu ubona tutibazaho ahubwo ubona ko bafite icyo bazaniye abaturage”.

Uretse ibyo bikorwa remezo, inyungu ziva mu musaruro w’ubukerarugendo bwa Pariki y’Ibirunga, abaturiye iyo Pariki bahabwa 10% y’ibyinjijwe n’ubukerarugendo yifashishwa mu kuzamura iyo mishinga irimo gukwirakwiza amazi n’amashanyarazi, kubaka amashuri n’amavuriro n’ibindi.

Bahinga n’imiti bifashisha mu buvuzi gakondo

Perezida Kagame hamwe n’abise amazina abana b’ingagi muri 2017

Uretse abayobozi b’ibigo bikomeye n’imiryango mpuzamahanga batumirwa mu muhango wo Kwita Izina, hari abandi bazwi mu mikino. imyidagaduro, no mu bindi bitandukanye.

Muri uyu mwaka wa 2019, hari ibyamamare ku rwego rw’isi byitezweho kuza mu Rwanda birimo umuhanzi w’umunyamerika Ne-Yo uzanaririmba mu gitaramo kizaba ku wa 07 Nzeri 2019, Louis Van Gaal watoje ikipe ya Manchester United na FC Barcelone, umunyamideri n’umukinnyi wa filimi w’umwongereza Naomi Campbell, n’abandi banyuranye.

Muri iyi myaka 3 ishize, ibindi byamamare byifatanyije n’u Rwanda mu muhango wo kwita izina ku butumire bw’urwego rw’igihugu rushinzwe iterambere RDB.

Dore bamwe muri bo:

Laureano Bisan Etamé-Mayer: Uwo benshi bakunda kwita Lauren yakiniye ikipe ya Arsenal yo mu bwongereza kuva muri 2000 kugera muri 2007. Ni umwe mu bakinnyi beza bugarira izamu Arsenal yagize mu myaka 20 ishize, akaba yaranakiniye ikipe y’igihugu cya Cameroun.

Izina yahaye umwana w’ingagi ni “IKIPE”

Laureano Bisan Etamé-Mayer, wahoze akinira ikipe ya Arsenal

Alexa Gray: Ni umunya Canada w’ikirangirire mu mukino w’intoki wa Volley Ball. Umwana w’ingagi yamwise “Kunesha”

Dr. Olusegun Obasanjo: Yabaye Perezida w’igihugu cya Nigeria, akaba n’umwe mu bakunze kuza mu Rwanda mu birori bitandukanye. Uretse kuba yaramenyekanye kubera kuyobora igihugu cy’igihangange muri Afurika, na nyuma y’uko avuye kuri uyu mwanya yakomeje kwamamara kubera ubunararibonye muri Politiki bwatumaga ajya gutanga ibiganiro bikomeye akanaba umuhuza w’ibihugu bitandukanye.

Obasanjo (ubanza iburyo) yise ingagi izina rye rya Aremu

Umwana w’ingagi yamwise “Aremu” izina rya kabiri rya Obasanjo, risobanura ngo buri mwana wese ni ingenzi mu muryango.

Theo Kgosinkwe & Nhlanhla Nciza: Aba ni abaririmbyi b’ibyamamare bo muri Afurika y’Epfo umukobwa n’umuhungu bagize itsinda rya Mafikizolo. Aba bise umwana w’ingagi “Akeza” ni na bo baririmbye mu gitaramo cyo kwita izina 2018.

Theo Kgosinkwe na Nhlanhla Nciza na bo baje mu Kwita Izina muri 2018

Strive Masiyiwa: ni umunya-Zimbabwe, akaba n’umwe mu baherwe bari muri Afurika bashoye imari mu itumanaho n’ikoranabuhanga. Forbes iherutse gutangaza ko afite umutungo wa Miliyali 2 na miliyoni 300 z’amadolari ya Amerika.

Strive Masiyiwa

Umwana w’ingagi yamwise “ISHUSHO”

Alex Scott: Ni umukinnyi mpuzamahanga w’umwongerezakazi wakinnye mu makipe atandukanye harimo Arsenal yakiniye hagati ya 2012 na 2018.

Umwana w’ingagi yamwise “Izahabu”

Patience Ozokwor: Uyu ni umukinnyi wa Filme akaba umunyamideri ndetse n’umuririmbyi w’indirimzo zaririmbiwe Imana wo muri Amerika wo muri Nigeria ndetse amaze kwamamara cyane ku mu gabane wa Afurika.

Umwana w’ingagi yamwise “Inkesha”

Veronika Vařeková: ni Umunyamideri wo muri Repubulika ya Tchèque uzwi cyane mu Burayi mu kumurika no guhanga imideri igezweho.

Izina yahaye umwana w’ingagi ni “Ubwiza”

Strive Masiyiwa(wa kabiri iburyo) hamwe na Olusegun Obasanjo na Graca Machel wahoze ari umugore wa Nelson Mandela baje muri gahunda yo Kwita Izina muri 2018

Mu bandi bazwi cyane bise izina mu myaka 3 ishize, harimo umuririmbyi w’umunyarwanda The Ben wahaye ingagi izina rya ‘Uruyange’.

Harimo kandi Howard Buffett, umushoramari w’umunya Amerika ndetse na Sean Penn: umukinnyi wa Filimi akaba n’umugabo w’umuririmbyi Madonna.

Mugisha Benjamin (The Ben) muri 2017 yise umwana w’ingagi ‘Uruyange’

Ne-Yo

Ni igitaramo gishobora kwandika amateka kubera impamvu nyinshi zirimo umubare w’abazacyitabira bashobora kugera ku bihumbi icumi. Ni n’igitaramo kandi gishobora kwitabirwa n’abashyitsi bakomeye bazaba bavuye impande z’isi baje mu muhango wo Kwita Izina abana b’ingagi.

Urwego rw’igihugu rushinzwe iterambere RDB rwamaze kwemeza ko Ne-Yo azaba ari kumwe n’itsinda ry’abantu 17 muri iki gitaramo barimo ababyinnyi, umufasha kuvanga imiziki ndetse n’abashinzwe inyungu ze, bikavugwa ko bagera mu Rwanda kuri uyu wa kane tariki 5 Nzeri 2019.

Shaffer Chimere Smith uzwi nka Ne-Yo mu muziki ni umunyamerika ufite uruvange rw’amaraso akomora kuri nyina umwe ufite inkomoko muri Afurika na se ukomoka mu Bushinwa.

Ababyeyi be bose bari abanyamuziki, ariko ntabwo yagize amahirwe yo kurerwa na bombi kuko batandukanye akiri muto arerwa na nyina gusa ari na we wamuhaye imyitozo ya mbere yo kuririmba.

Amaze gutandukana na se, Nyina yamujyanye gutura mu mujyi wa Camden wo muri Arkansas, bimukira mu Mujyi wa Las Vegas aho yatangiye kuririmba mu matsinda y’abana yitwa GoGo mu muziki, ndetse bitangira kumuhira, indirimbo ze zitangira kunyura mu biganiro bya Televiziyo byari bikunzwe mu myaka y’1989 n’1990.

Kugera mu mwaka w’2000, Smith (akazina yakundaga kwitwa) nibwo yaretse kuririmba mu matsinda atandukanye, atangira umuziki ku giti cye, anahindura izina yitwa Ne-Yo.

Ntabwo yahise amenyekana cyane bitewe n’imiterere y’umuziki wo muri Amerika, ariko yari umuhanga mu kuririmba, azi kubyina no kwandika indirimbo, ndetse zimwe mu ndirimbo yanditse yajyaga azigurisha n’abahanzi b’ibyamamare muri Amerika.

Mu 2004, yanditse indirimbo yitwa ‘Let Me Love You’ ayihera umuhanzi Mario indirimbo iramenyekana cyane, abantu bamenya ko ari Ne-Yo wayanditse ahita agira amahirwe yo gusinyana amasezerano n’inzu ya Def Jam ngo ajye ayandikira indirimbo.

Iyi nzu yasinyishije Ne-Yo yari ikomeye cyane kuko yari yarashinzwe n’ikigo Universal Music Group, kandi yarimo abahanzi bakomeye nka Big Sean, Ludacris, ikabamo na Jay-Z wari n’umuyobozi wayo.

Iyi nzu kandi ni yo yazamukiyemo Kanye West, Rihanna, Jehne Aiko, Justin Bierber, Nas, Two Chains, Iggy Azalea n’abandi.

Guhera muri Def Jam, Ne-Yo yaretse kwandika indirimbo aziha abandi atangira kwiyandikira indirimbo anaziririmba aza gushyira hanze umuzingo yise ‘In My own World’ yariho indirimbo ‘Stay’, yaje no kujya ku rutonde rw’indirimbo zikunzwe cyane (Billboard) ariko ntiyagera kure.

Kumenyekana bidasanzwe ku masoko y’umuziki ku isi yose, byakomeye mu 2008 ubwo Ne-Yo yashyiraga hanze umuzingo wa gatatu (album) witwa Year of the Gentleman. Uyu muzingo wariho indirimbo zakunzwe cyane nka Miss Independent, Closer, She got her own, Mad n’izindi.

Miss independent ni yo ndirimbo yatumye iyi album izamuka cyane, kuko yatangiye ari iya 98 mu ndirimbo 100 zikunzwe cyane muri Amerika, ariko irazamuka igera ku mwanya wa 7 kandi imara ibyumweru 32 kuri Billboard.

Yagize umwihariko wo gusubirwamo cyane n’abahanzi batandukanye barimo Jay Z, Fabulous, Kanye West n’abandi batandukanye. Iyi ndirimbo yatumye Ne-Yo ahabwa ibikombe bitandukanye kandi bikomeye, birimo BET Awards, Mobo Awards, n’ibihembo by’amashusho bitangwa na MTV.

Ne-Yo ukunda kwambara ingofero cyane kubera kutagira umusatsi, ni umwe mu bahanzi bubashywe muri Amerika kandi ufite ibigwi kuko uretse kuririmba asanzwe ari n’umukinnyi wa Sinema.

Louis Van Gaal yageze i Kigali aho yitabiriye umuhango wo Kwita Izina

Kugera mu Rwanda kwa Van Gaal kwemejwe n’umwe mu bayobozi mu Rwego rw’igihugu rw’iterambere (RDB) mu ishami ry’ubukerarugendo, utashatse ko amazina ye atangazwa.

Yemereye KTPress ati “Ni byo yahageze, mu gihe dutegereje ibindi byamamare nabyo bigomba kwitabira Kwita izina.

Ifoto ya Van Gaal ageze I Kigali na yo yakomeje kuzenguruka ku mbuga nkoranyambaga.

Uwitwa Moses Mutabazi kuri Twitter, yanditse ati “Urakaza neza mu Rwanda Van Gaal. Reka tuvuge Kwita Izina, twiyibagize ibya Manchester United byose”.

Welcome in Rwanda 🇷🇼 Louis Van Gaal, let us talk Kwita Izina and forget Everything about Manchester United😂@RDBrwanda @cakamanzi pic.twitter.com/GHeEvwVa4z

— Mutabazi Moses (@MUTABAZIMoses13) September 4, 2019

Umuyobozi wa RDB Clare Akamanzi, nawe yasangije abandi ubutumwa bwa Mutabazi, nk’igihamya cy’uko iyu mugabo wamamaye mu gutoza umupira w’amaguru ku mugabane w’Uburayi yageze mu Rwanda.

U Rwanda ruritegura umuhango ngarukamwaka ukomeye cyane, wo kwita amazina abana b’ingagi, uzwi nka Kwita Izina, ukazaba kuwa 06 Nzeri 2019.

Van Gaal ni umwe mu byamamare bategerejweho kuzita amazina abana b’ingagi muri uwo muhango, aho azaba ari kumwe n’ibindi byamamare nka Tony Adams, wakiniye ikipe ya Arsenal.

Aganira n’abanyamakuru mu kwezi gushize, Umuyobozi w’ishami ry’ubukerarugendo muri RDB, Belize Kaliza, yavuze ko mu bandi bantu b’ibyamamare bazitabira Kwita izina ya 209, hazaba harimo umuririmbyi w’Umunyamerika Ne-Yo, umuhanzi n’umuririmbyi w’Umunyarwanda uba muri Amerika Meddy, Sherrie Silver, Naomi Campbell, n’abandi.

Kuva muri 2005, Kwita Izina ni umuhango ukomeye mu Rwanda, unagendana n’ibindi birori.

Muri uyu mwaka, abana 26 b’ingagi ni bo bazahabwa amazina, hakazaba kandi harimo igikorwa cy’inama ya kabiri ya kaminuza Nyafurika y’imiyoborere (Africa Leadership University), iteganyijwe kuva kuwa 08 kugeza kuwa 09 Nzeri, isiganwa ry’amagare rizwi nka ‘Akagera’s Rhino Cycling Velo Race’ ryabaye tariki ya 24 Kanama, ndetse n’igitaramo cyo Kwita Izina (Kwita Izina Mega Concert) kizaba kuwa 07 Nzeri 2019, muri Kigali Arena.

Umuhango wo Kwita Izina uzabera mu Kinigi mu ntara y’Amajyaruguru, ugendana n’ibindi bikorwa bigamije impinduka ku baturage baturiye Pariki.

Mu kwezi gushize RDB yahaye inka 729 abaturage abaturage batishoboye baturiye Pariki y’Ibirunga, nk’uruhare rwabo ku bikomoka mu bukerarugendo.

Leta itanga 10% by’ibikomoka mu bukerarugendo, mu gufasha abaturage baturiye za pariki.

Inka zatanzwe mu karere ka Nyabihu, ni umwe mu mishanga 36 Leta yashyizemo miliyari 1.5 Frw mu mwaka w’ingengo y’imari wa 2018-2019.

Ni amafaranga menshi, ugereranije na miliyoni 741 Frw, zatanzwe mu mwaka wari wabanje wa 2017-2018.

RDB ivuga ko mu mwaka ushize wa 2018, pariki zinjije miliyoni 21.1 z’amadorari ya Amerika (Miliyari 19 Frw).

Imishinga yegerezwa abaturage harimo kwegerezwa amazi meza, kubakirwa amakusanyirizo y’amata, ibigo nderabuzima, amashuri no kubakira abatishoboye.

RDB na EAP bateguye igitaramo hamwe n’abahanzi batumiwemo bagiranye ikiganiro n’abanyamakuru ku bijyanye n’imyiteguro y’icyo gitaramo

Ni ku nshuro ya 15 u Rwanda rutegura umuhango wo kwita izina abana b’ingangi. Kimwe mu bikorwa biteganyijwe bizajyana no kwita izina abo bana b’ingagi ni igitaramo kizitabirwa na Ne-Yo, Meddy, Riderman, Bruce Melody na Charly&Nina. Icyo gitaramo giteganyijwe kuba ku itariki 07 Nzeri 2019 muri Kigali Arena, aho kwinjira bizatangira saa kumi n’imwe z’umugoroba.

Umuyobozi Mukuru w’Ishami rishinzwe Ubukerarugendo no Kubungabunga Ibidukikije, Ariella Kageruka, yagize ati “Umutungo w’u Rwanda ni Abanyarwanda, ni yo mpamvu tuzana ibyamamare bitandukanye mu gihugu kugira ngo babone u Rwanda mu ndorerwamo y’ibitaramo n’ibyishimo ndetse dukomeza kumenyekanisha gahunda ya Visit Rwanda.”

Umuyobozi wa East African Promoters, Mushyoma Joseph yagize ati “Twifuje ko abahanzi bo mu Rwanda bidagadurira mu nzu Kigali Arena twahawe n’Umukuru w’Igihugu. Ni yo mpamvu ku bo twari twatangaje bazitabira kwita izina concert ari bo Ne-Yo na Meddy twongeyemo itsinda rya Charly na Nina, Riderman, na Bruce Melody akaba ari bo bazataramira abazitabira igitaramo.”

Yakomeje kandi avuga ko guhera kuri uyu wa gatandatu tariki 31 Kanama 2019 batangira ibikorwa byo gutegura aho igitaramo kizabera ati “Uko mubona Kigali Arena ni na rwo rwego igitaramo kizaba kiriho”

Bamwe muri abo bahanzi bavuze ku byo barimo gutegurira abakunzi babo bazitabira igitaramo cyo Kwita Izina.

Gatsinzi Emery uzwi nka Riderman yagize ati “Twiteguye gushimisha Abanyarwanda.”

Meddy we yagize ati “ nazanye na band yuzuye, style zitandukanye, muri make niteguye kubereka impande nyinshi za Meddy. Byose bizaba biri ku murongo decoration, amajwi n’amatara ndetse na performance ubwayo.”

Igitaramo kizaba ari full live. Hazaba hari aba DJs ari bo dream team bagizwe na DJ Marnaud , DJ TOXXYK ndetse na DJ Miller naho amatike yo kwinjira ni 3000 rwf, 10000 rwf, 25000 rwf na 50000 rwf . Biteganyijwe ko umuhanzi Ne-Yo azazana n’itsinda ry’abantu 17 bazamufasha muri icyo gitaramo.