Senderi International Hit

Senderi uzwi cyane mu ndirimbo z’injyana ya ‘Afro bit’, ejo ku wa Gatatu tariki 3 Werurwe 2021 yasohoye indirimbo nshya yise ‘Muri Hehe’, yibutsa abafana be gukomeza kumuzirikana no kumukunda nk’uko byahoze, ivuga ku busugire bw’igihugu no kwiyumvamo Ubunyarwanda kurusha mbere.

Muri iyo ndirimbo Senderi akangurira Abanyarwanda bari mu gihugu, ababa hanze yacyo n’inshuti z’u Rwanda bo mu ngeri zose, gushyigikira gahunda za Guverinoma z’iterambere ry’igihugu.

Aha avuga nka gahunda zo guteza imbere ubuzima n’isuku, gutanga imisoro, ubukerarugendo, Umuganda, amahoro n’umutekano nka bimwe mu by’ingenzi mu kubumbatira ubusugire bw’igihugu.

Muri iyo ndirimbo kandi, Senderi abaza abafana be niba bagihari kandi bahagaze neza ndetse biteguye gushyigikira izo gahunda za Leta, ari nazo ashyira imbere mu butumwa buri mu ndirimbo ze.

Muri hamwe mu nyikirizo y’iyo ndirimbo hagira hati “Niba muhari, nimuze twirukane ubwo bwigunge”, igisubizo kuri iyo ntero kikagira kiti “Ntugire ikibazo, twese turacyahari”.

Senderi avuga ko hashize umwaka wose atabonana n’abafana be nk’uko yabigaragarije mu kiganiro yagiranye n’umunyamakuru kuri Whatsapp, nyuma gato yo gushyira indirimbo ye kuri You Tube.

Ati “Sinabashije kujya mu bitaramo byo mu gihugu hirya no hino, aho twishimiraga iterambere u Rwanda rwagezeho”.

Senderi ngo ahereye kuri ibyo, yahisemo gutura indirimbo ye abitanga baza ku ruhembe rw’umuheto mu guhangana n’icyorezo cya Covid-19, abayobozi mu nzego z’ibanze, abashinzwe umutekano, abanyamakuru n’abakorerabushake mu gufasha gukumira icyo cyorezo, kuko abo bose bari ku ruganmba kuva Covid-19 yagera mu Rwanda muri Werurwe 2020.

Yongeraho ko iyo ndirimbo ye yiteguye kuyiririmba, aho agira ati “Niteguye kuririmba iyi ndirimbo yanjye imbona nkubone mu gihe tuzaba twatsinze urugamba turwana na Covid-19. Amasengesho yanyu yarasubijwe”.

Abakozi ba SKOL mu gikorwa cy’umuganda

Ibyo bije nyuma y’undi mwaka wagenze neza, aho urwo ruganda ruherereye mu Nzove mu karere ka Nyarugenge mu Mujyi wa Kigali, rwafashije abaturage baruturiye mu buryo butandukanye bibahindurira ubuzima ndetse n’aho batuye hatera imbere.

Muri uwo mwaka, SKOL yafashije abaturage 450 kwikura mu bukene bityo babasha gufasha abana babo kwiga, kugira imirire myiza, ubuzima bwiza ndetse no kurengera umwana.

Nko mu bijyanye n’uburezi, SKOL yafashije abana 152 bo mu mashuri abanza, 62 mu yisumbuye n’urubyiruko 11 mu mashuri y’imyuga n’ubumenyingiro (TVET), urwo ruganda rwabishyuriye amafaranga y’ishuri, rubagurira imyenda y’ishuri n’ibikoresho ndetse hakaba na gahunda yo kubakurikirana ngo barebe ko batsinda neza.

Muri abo 11 biga imyuga, barindwi bararangije naho bane muri bo babonye akazi, kandi abarangije bose bahawe ibikoresho by’ibanze.

Mu biruhuko, urubyiruko rwahawe amahugurwa y’ingenzi arimo ubuzima bw’imyororokere, gukunda igihugu no kwihangira umurimo.

Kwiteza imbere mu bukungu

Mu myaka 10 SKOL imaze yashyigikiye ibikorwa biteza imbere Abanyarwanda muri rusange, abakozi bayo n’abaturiye uruganda by’umwihariko ibishyiramo n’amafaranga.

Urugero nko muri 2020, buri muryango uri mu bagenerwabikorwa wahawe ibihumbi 120 by’Amafaranga y’u Rwanda yo gutangiza umushinga ubyara inyungu, ndetse urwo ruganda ruha ibimina bitatu amafaranga ibihumbi 200 kuri buri kimwe yo kubyongerera ubushobozi, abanyamuryango bakaba barabanje guhugurirwa gucunga umutungo.

Ubuyobozi bwa SKOL buhamya ko ubwo bufasha bwagiriye akamaro kanini abaturage mu mibereho yabo.

Buti “Amatsinda yo kwizigamira yagize akamaro nk’uko abandi baturage batayarimo babigaragaza, aho nabo bifuza kuyajyamo. Ubu buri tsinda ryakiriye nibura abanyamuryango bashya 10 baturutse mu baturanyi babo”.

Yongeraho ko ayo matsinda kugeza ubu amaze kwizigamira amafaranga y’u Rwanda agera kuri miliyoni icyenda n’ibihumbi 800.

Uretse gufasha abaturage baturiye urwo ruganda, runafasha abakozi barwo aho buri mwaka hari amafaranga rushyira mu makoperative bibumbiyemo ngo barusheho kwiteza imbere.

Imirire n’isuku

Muri iyo gahunda yo gufasha abaturage, banahuguwe ku isuku, isukura ndetse n’imirire myiza hagamijwe guteza imbere urwo rwego.

Ibyo byatumye 95% by’imiryango y’abagenerwabikorwa kugeza ubu yarikoreye uturima tw’igikoni turimo imboga, imiryango yose ubu ifite ubukarabiro, irenga 95% ifite ubwiherero bwiza naho 80% ifite aho gutura hatunganye.

Iyo gahunda kandi yitaye ku bantu bafite virusi itera SIDA, banashishikarizwa gufata imiti igabanya ubukana bw’icyo cyorezo ari ko banafashwa mu mibereho myiza, ndetse itera inkunga amatsinda atandatu y’urubyiruko mu kurwongerera ubushobozi.

Kurengera abana n’ibidukikije

SKOL yahuguye abita ku bana ku burenganzira bw’umwana ndetse no ku kwita ku bana bato, inakangurira abantu kwandikisha abana bavuka. Yakoze kandi ubukangurambaga kugira ngo imiryango ibane mu buryo bwemewe n’amategeko.

Ubu abana bose bo mu miryango y’abagenerwabikorwa baranditse mu bitabo by’irangamimerere naho imiryango 90% yarasezeranye byemewe n’amategeko.

SKOL kandi ishishikajwe no kurengera ibidukikije ibungabunga urusobe rw’ibinyabuzima, akaba ari yo mpamvu yashoye amafaranga mu ruganda rwo gutunganya amazi yakoreshejwe, ayamaze gutunganywa ubu akaba yifashishwa mu kuvomera ikibuga cy’umupira w’amaguru cy’urwo ruganda.

Muri urwo rwego rwo kurengera ibidukikije, SKOL yatangiye gukoresha amacupa y’ibirahure mu gupfunyika amazi yo kunywa icuruza azwi nka ‘Virunga Water’.

Ubuyobozi bwa SKOL Breweries Limited buvuga ko urwo ruganda rutaje mu Rwanda kugira ngo rukore ibicuruzwa bishimisha ababigura gusa kugira ngo rubone inyungu, ahubwo ngo rugomba kugira n’uruhare mu iterambere ry’abaturage, mu mibereho myiza y’abakozi barwo n’iy’Abanyarwanda muri rusange.

Ubwo buyobozi buvuga kandi ko uruganda rwa Nzove ubu rufite ubushobozi bwo gukora metero kibe 80 ku isaha (80m3/hr), ubu rurimo kwagurwa kugira ngo rugere ku bushobozi bwa metero kibe 120 ku isaha (120m3/hr), ndetse rukanagura hafi 3% by’umuceri wose wera mu Rwanda.

Innocent Bulindi (iburyo), Umuyobozi Mukuru wa BDF

Byabaye nyuma y’aho abo bayobozi ba BDF bamaze igihe kirenga isaha bisobanura kuri miliyari 2.8 z’amafaranga y’u Rwanda yasohotse muri icyo kigo ntikigaragaze impapuro zisobanura uko yakoreshejwe, nk’uko byagaragaye muri raporo y’Umugenzuzi Mukuru w’Imari ya Leta y’umwaka w’ingengo y’imari 2018-2019.

Raporo y’Umugenzuzi Mukuru w’Imari ya Leta, Obadiah Biraro, yerekanye ko kuva muri 2012 hari miliyari 4.7Frw BDF yasohoye ariko ntibashe kugaragaza impapuro zerekana icyo yakoze.

Biraro na we wari mu Nteko yagize ati “Muri ayo mafaranga, 20% byayo yashowe mu mishinga itagira icyo igarura, kandi agera muri miliyoni 600Frw, ni ukuvuga ari hafi 25% yaburiye mu bikorwa by’imyiteguro”.

Abadepite bamenye kandi ko BDF itakoze ibyari biri mu nshingano zayo z’ibanze zo gufasha imishinga mito n’iciriritse kubona inguzanyo, ahubwo ifasha imini. Urugero ngo icyo kigo cyatanze ingwate ku nguzanyo za miliyari 25.1Frw ku yari ahari angana na miliyari 49.2Frw kuva muri 2011 kugeza muri Kanama 2019.

Ingwate kuri izo nguzanyo zatanzwe ngo zahawe ibigo 217 binini, BDF ngo ikaba yaranyuranyije n’intego yayo y’ibanze yo kubanza kwita ku mishinga mito n’iciriritse, nk’uko iyo raporo ibigaragaza.

Iyo raporo yerekana kandi ko hari ibigo bini 13 byagaragarije BDF ko byahombye byishyurirwa agera kuri miliyari 1.6Frw, bihwanye na 54% by’ibihombo byagaragarijwe icyo kigo kikanabyemeza.

Ibyo ngo bisubiza inyuma gahunda yo kwishingira imishinga mito n’iciriritse ngo igere ku nguzanyo, ndetse bikanabangamira gahunda yo kugabanya ubukene abantu bihangira imirimo binyuze mu mishinga mito nk’uko Biraro yabisobanuye.

Abadepite babajije Umuyobozi Mukuru wa BDF, Innocent Bulindi, impamvu y’ayo makosa, avuga ko inguzanyo zatanzwe ndetse zishingiwe n’icyo kigo hanyuma ba nyiri imishinga barahomba biba ngombwa kubishyurira igice cy’ingwate.

BDF yegetse amakosa ku itegeko rigena imikorere yayo, ariko abadepite bavuga ko byagombye kuba byaragaragajwe mbere bigakosorwa bityo bikagirira akamaro abaturage.

Bulindi yemeye icyo cyaha agira ati “Iyo mpamvu ndayiretse, ndanasaba imbabazi”, gusa yakomeje asobanura ko bagenzuye imishinga yahawe inguzanyo uko byari biteganyijwe.

Andi makosa abadepite bagaragaje, ngo ni uko BDF yatanze ingwate za 813,860,394Frw ku bigo 11 itabanje gusuzuma uburambe bw’imishinga yabyo, ititaye ku masoko, imiterere y’imishinga, niba igishoro gihagije ndetse niba ibikorwa remezo nk’amashanyarazi byari bihagije.

Ibyo ngo byagize ingaruka zikomeye kuko BDF yishyuye miliyoni 452.3Frw bihwanye na 56% by’ingwate yari yishingiye.

Nyuma y’amasaha y’ibisobanuro, abadepite bagaragaje ko batanyuzwe batekereza ko BDF yaje ititeguye gusobanura uko yakoresheje imari nk’uko Hon Valens Muhakwa, Perezida wa PAC abivuga.

Ati “Twahagaritse kubumva kubera impamvu imwe, nyuma y’isaha n’igice tuganira tunabumva, twasanze abayobozi ba BDF baje batiteguye bihagije, biba ngombwa ko tubaha undi mwanya ngo babanze basome raporo”.

PAC yahise isubizayo BDF ngo igende yitegure izagaruke ku itariki 7 Ukwakira 2020, ifite ibisobanuro bihagije ku ikoreshwa ry’imari nk’uko bigaragara muri raporo y’Umugenzuzi Mukuru w’Imari ya Leta.

Abarebwa n’urwo rubanza ni 32 barimo bane (4) bo mu ngabo z’u Rwanda (RDF), Maj (Rtd) Mudathiru, naho abandi ni abasivili barimo Abanyarwanda, Abarundi n’Abagande, benshi bakaba baregwa kwinjira mu mutwe wa P5 ukorera muri Repubulika Iharanira Demokarasi ya Congo (DRC), ufite intego yo guhungabanya umutekano w’u Rwanda.

Abaregwa bagejejwe imbere y’urwo rukiko i Kanombe kuri uyu wa Kabiri tariki 15 Nzeri 2020, nyuma y’amezi abiri imanza zihagaritswe kubera icyorezo cya Coronavirus, ariko zikaba zigiye gukomeza nk’uko byari biteguye.

Benshi mu baregwa bemeye icyaha cyo kwinjira mu mitwe y’iterabwoba yitwara gisirikare yakoreraga muri RDC no mu Burundi, igamije guhungabanya umutekano w’u Rwanda, ariko ko batayigiyemo ku bushake bwabo.

Umwe mu baregwa witwa Nsanzimana Patrick ni umusivili w’Umunyarwanda wagiye i Burundi muri 2003 gukora akazi k’ubuganga, nyuma ngo aza guhura n’Umurundi witwa Eugène amubwira ko yamubonera akazi kamuhemba neza.

Ibyo yavuze ariko bitandukanye n’ibyo yari yavuze mu bugenzacyaha, kuko byo bivuga ko yari yasanze batayo y’abaganga aho yahise azamurirwa ipete ari muri P5, ahita anaherekezwa yambuka umupaka ajya muri DRC gukomerezayo akazi.

Nsanzimana yavuze kandi ko ngo kubera ko yari umushomeri yahise yemera gukora ako kazi ari nabwo yisanze muri P5, ngo agerageza gutoroka biramunanira.

Umucamanza yamusabye kwerekana igihamya ko nta bushake yari afite bwo kujya muri uwo mutwe, Nsanzimana asubiza ko uwabihamya ari Maj (Rtd) Mudathiru.

Ati “Ku itariki 28 Werurwe 2018 nagerageje gutoroka biranga kuko nafashwe, ibyo byakwemezwa na Mudathiru kuko yabimpaniye. Nongeye kugerageza gutoroka nabwo birananira nyuma yo kumva amasasu menshi, mfite n’imvune”.

Yongeyeho ko Mudathiru yari umusirikare mukuru muri P5 wari ushinzwe ibikorwa, bityo ko yari azi inshuro zose uwo Nsanzimana yagerageje gutoroka bikanga.

Nsanzimana yemera ko yinjiye muri P5 ariko ko atabishakaga, atirengagije ko ingabo z’u Burundi zamuhaye imyenda n’ibikoresho bya gisirikare zinamufasha kwambuka ajya muri RDC.

Mudathiru uyu munsi wari wanze guhagarara imbere y’abacamanza kuko atari afite avoka we ndetse akaba atarakira ukuguru, aho yicaye ariko hari icyo yavuze ku byo Nsanzimana yari amaze kuvuga.

Ati “Ndashaka gusobanura ko Nsanzimana yari umusirikare mukuru, kandi ko bose bazaga muri P5 bakabanza kubazwa niba bazi ibyo bajemo, bagasubiza bati “Yego”, bivuze ko bose bari bazi icyo baje gukora”.

Icyakora Mudathiru yemeje ko hari benshi mu bari barinjiye muri uwo mutwe bagerageje gutoroka bamaze kumenya neza icyo ugamije, kimwe n’abandi bumvaga batishimiye kuwubamo.

Ati “Hari abageragezaga gutoroka ariko benshi bagafatwa bakagarurwa, nzi ko Nsanzimana yatorotse inshuro ebyiri ariko biramunanira. Gusa si njye wababereye inzitizi mu itoroka ryabo kuko ishyamba ryabaga rifunguye”.

Mu bandi bireguye harimo Joseph Gatwere ukomoka muri Uganda, Umurundi witwa Jean Minani, Umunyarwanda Jean Bosco Habyarimana n’abandi, bose bavuze ko bagiye muri P5 ariko batigeze babisaba ahubwo bashutswe ndetse baranashimutwa bisanga muri RDC.

Bavuga kandi ko bagerageje gutoroka ntibyabakundira kuko ishyamba ryababanye rinini kandi nta mafaranga bari bafite nubwo ngo bari barijejwe guhembwa, kuko nka Minani ngo yari yaremerewe umushara w’Amadolari ya Amerika 150 buri kwezi, wagombaga guturuka muri RNC.

Bavuga kandi ko ibyo byose Maj (Rtd) Mudathiru yari abizi kuko ari we wari ubayoboye, gusa we akaba yabiteye utwatsi mu rukiko.

Yagize ati “Amakuru yo guhembwa nanjye narayumvaga ariko babeshywe n’ababazanye, ibyo banshinja rero simbyemera kuko ntabizi”.

Urubanza rurakomeza kuri uyu wa Gatatu tariki 16 Nzeri 2020, aho urukiko rukomeza kumva abandi biregura kuri icyo cyaha cyo kwinjira mu mutwe w’iterabwoba witwara gisirikare.

Iyo mpano ifite agaciro k’ibihumbi 150 by’Amadolari ya Amerika, yashyikirijwe u Rwanda mu gitondo cyo kuri uyu wa 7 Nzeri 2020, ikaba yatanzwe na Ambasaderi Ahmed El Ansary ku ruhande rwa Misiri, yakirwa na Minisitiri w’Ubuzima Dr Daniel Ngamije ku ruhande rw’u Rwanda.

Iyo mpano ni igice cy’ibyo Misiri yiyemeje byo gutanga miliyoni enye z’Amadolari ya America ku bihugu bigize Umuryango wa Afurika Yunze Ubumwe (AU), mu rwego rwo kubifasha guhangana na Covid-19.

Minisitiri Ngamije yavuze ko iyo nkunga izagabanya ubwandu bwa Covid-19 mu baganga, inagabanye ubwiyongere n’impfu zishamikiye kuri icyo cyorezo mu bigo by’ubuzima byo hanze y’Umujyi wa Kigali.

Ati “Hari ikizere cy’uko urukingo rw’icyo cyorezo ruzaba rwabonetse mu mezi atatu ari imbere, gusa turacyakeneye byombi, ni ukuvuga urukingo n’ubuvuzi. Ni yo mpamvu iyo nkunga twari tuyikeneye kugira ngo turinde abantu bafite ibyago byinshi byo kwibasirwa na Covid-19”.

Kuva tariki 14 Werurwe uyu mwaka, u Rwanda rumaze kugira abantu 19 bishwe na Covid-19, ikaba yaribasiye cyane cyane abasabzwe bafite izindi ndwara zitandura nka diyabete.

Kugeza ku Cyumweru tariki 6 Nzeri 2020, mu Rwanda abanduye icyo cyorezo ni 4,374 bagaragaye mu bipimo 439,893, abamaze gukira ni 2,235 mu gihe abakirwaye ari 2,120.

Ku ruhande rwa Misiri, Ambasaderi Ansary yavuze ko iyo mpano ari imwe mu zo icyo gihugu gisanzwe gitanga mu rwego rw’ubuzima, ari na ho hashingiye ubufatanye hagati y’ibihugu byombi.

Agira ati “Twishimiye ubu bufatanye mu rwego rw’ubuzima, kandi mu gihe kiri imbere hari umushinga ukomeye duteganya (kubaga umutima), gusa sinshaka kugira icyo nawuvugaho ubu, nzawuvugaho igihe kigeze”.

Umuyobozi mukuru ushinzwe Afurika muri Minisiteri y’Ububanyi n’Amahanga y’u Rwanda, Shakira Umutoni, yavuze ko iyo mpano iturutse mu bufatanye hagati y’ibihugu byombi bwakomeje gutanga umusaruro mu bice bitandukanye, cyane cyane ubuzima n’umutekano.

Ayo mahugurwa yatangijwe kuri uyu wa gatatu tariki 19 Gashyantare 2020, arahabwa abagore bakora imyuga yo kuboha, kudoda n’ubukorikori bunyuranye bo mu makoperative yo mu mirenge ya Gisozi na Gatsata yo mu Karere ka Gasabo n’uwa Kimisagara muri Nyarugenge.

Umwe muri abo bagore batangiye amahugurwa, Kanyange Domina w’imyaka 38, ubarizwa muri koperative ‘Injishi’ igizwe n’abanyamuryango 17 baboha uduseke, akaba yinjiza ibihumbi 50 by’Amafaranga y’u Rwanda buri kwezi.

Kanyange abona ayo mafaranga nyuma yo gukora udukomo dutatse 60, ariko ngo kuba adafite ubumenyi buhagije mu kuyobora bizinesi ye ni inzitizi ku nzozi ze zo kwinjiza ibihumbi 150 ku kwezi kugira ngo azamure imibereho y’umuryango we.

Kanyange avuga ko ubwo bumenyi buke bwatumaga atinya kwaka inguzanyo itubutse muri Banki ngo azamure ibikorwa bye.

Ati “Nari ntarahabwa amahugurwa ku kuyobora bizinesi, bityo bigatuma ntinya gusaba inguzanyo nini muri Banki yamfasha gutangiza bizinesi yanjye bwite. Ibyo ni byo byamfasha kuzamura amafaranga ninjiza”.

Inzozi za Kanyange ngo ni ukwinjiza amafaranga menshi bigatuma abana be biga mu mashuri meza, akagura moto yo gutwara abagenzi ndetse akubaka n’inzu ikodeshwa, ariko ntabwo yigeze abigeraho, gusa akizera ko izo nzozi azazikabya.

Abagore baboha bazamara ibyumweru bitatu bongererwa ubumenyi na ‘Agaseke Project’, bakizera ko azarangira bahungukiye byinshi bizabafasha kuzamura ibikorwa byabo kuko bazaba bamenye gukora igenamigambi, bityo batinyuke gufata inguzanyo zitubutse.

Umuyobozi mukuru wa Resonate Workshops, Norette Turimuci, yavuze ko ayo mahugurwa agamije gutuma abagore bigirira icyizere.

Ati “Muri aya mahugurwa ku buyobozi bwa bizinesi, tuzubaka ikizere mu bagore kuko cyari imbogamizi ku buringanire n’ubwuzuzanye. Icyo ni cyo cyakomeje kubabuza amahirwe atandukanye”.

Akomeza avuga ko ibyo ari byo bizatuma abagore bavuga bati “Turashoboye”, bivuze ko atari ngombwa ko bahora bategeye amaboko abagabo.

Muri 2018, imibare ku rwego rw’igihugu yagaragaje ikinyuranyo kinini mu bagabo n’abagore bari muri bizinesi. Muri bizinesi 142,029 zari zihari, 101,665 zari iz’abagabo, bihwanye na 71.58% naho bizinesi 38.018 zikaba iz’abagore bihwanye na 26.77%.

Muri 2013 Resonate yahuguye abagore basaga 8,000, naho muri 2019 ihugura 2,115, muri abo 46% batangiye bizinesi zabo naho 31% biga amasomo yisumbuye mu myuga.

Ibyo ni byo byatumye BK ishora miliyoni imwe y’Amanyarwanda muri ayo mahugurwa kugira ngo abagore bunguke ubwenge bityo n’imishinga yabo itere imbere, hanyuma baziyongere ku bakiriya b’iyo Banki.

Umukozi wa BK ushinzwe itumanaho mu bucuruzi, Dahlia Umulinga, avuga ko gushora amafaranga mu gufasha umugore ari ingirakamaro.

Ati “Gushora amafaranga mu kongerera ubushobozi abagore ni ingenzi kuri Banki yacu kuko twizera ko ibyo bigira uruhare mu kuzamura ubukungu, mu gihe umugore anongerewe ubushobozi mu by’imari”.

Resonate Workshops ni umuryango wo mu karere ka Afurika y’Iburasirazuba wita ku guteza imbere abagore n’urubyiruko, ubafasha kwiyubakamo icyizere.

Ibyo ubuyobozi bwa BK bwabitangaje ku wa 30 Kanama 2019, ubwo bwagiranaga ikiganiro n’abanyamakuru, mu rwego rwo kugaragaza ibyo iyo banki yagezeho mu gihembwe cya kabiri cya 2019 ndetse no mu gice gishize cy’uwo mwaka.

Umuyobozi mukuru wa Banki ya Kigali, Dr Diane Karusisi, avuga ko iyo ntego bumva bishoboka kuyigeraho akurikije uko umutungo w’iyo banki wagiye uzamuka.

Agira ati “Ubu dufite umutungo mbumbe w’arenga gato miliyari imwe y’Amadolari ya Amerika. Turebye mu gihe cyashize, umutungo wagiye uzamukaho hagati ya 15% na 25% buri mwaka, twizera ko mu myaka itanu cyangwa itandatu iri imbere tuzaba twageze kuri iriya ntego twihaye”.

Kugeza ku itariki 30 Kamena 2019, iyo banki ngo yungutse miliyari 14.6 z’Amafaranga y’u Rwanda, bihwanye n’izamuka rya 8.5%.

Mu gihe nk’icyo kandi, umutungo mbumbe wa BK ngo wazamutseho 22.1%, bihwanye na miliyari 893.2 Frw, cyane ko inguzanyo itanga ziyongereye ku kigero cya 35.1% bihwanye na miliyari 650.2Frw.

Ikindi ngo muri ayo mezi atandatu ya 2019, amafaranga abakiriya ba Banki ya Kigali bizigamiye n’ayo bagiye babitsa yazamutseho 16.8%, bihwanye na miliyari 551.7Frw, naho imigabane y’abanyamuryango bayo ikaba yarazamutseho 57% bihwanye na miliyari 204Frw.

Mu Gushyingo umwaka ushize wa 2018, BK nka Banki ya mbere mu Rwanda ifite umutungo mwinshi, yatangiye gushora imari ku isoko mpuzamahanga ry’imari, ku wa gatanu tariki 30 Kanama 2019 ngo ikaba yarakiriwe ku isoko rya Nairobi muri Kenya.

Iyo banki ubu irimo gukora ku buryo umwaka wa 2021 warangira ifite miliyoni imwe y’abakiriya bakava ku bihumbi 350 ifite ubu.

Umuyobozi ushinzwe imari muri BK, Nathalie Mpaka, avuga ko kongera abakiriya bisobanuye kongera imari.

Ati “Niba tugeze kuri miliyoni y’abakiriya, bivuze ko tuzaba tubakubye gatatu mu myaka itatu, bisobanuye ko tubigezeho n’imari izahita yiyongera, ubwizigame buziyongera ndetse n’inguzanyo ziyongere”.

Dr Karusisi yavuze kandi ko mu bindi byatumye BK yunguka kurushaho, ari abakiriya yabonye bashya binyuze muri gahunda yise ‘Ikofi’ yagenewe abahinzi-borozi. Ni gahunda iyo banki yatangije muri Gicurasi uyu mwaka, ubu ikaba ikoreshwa n’abagera ku bihumbi 160 mu mezi atageze kuri atatu.

Ishami ry’ubwishingizi na ryo riri mu byunguye iyo banki nubwo ngo hari aho bitagenze neza, kuko ryinjije miliyoni 974Frw mu gihembwe cya mbere cy’uyu mwaka, mu gihe ryari ryinjije miliyoni 357Frw mu gihe nk’icyo cy’umwaka ushize, bihwanye n’izamuka rya 172.5%. Icyakora muri rusange iryo shami ngo ryahombye miliyari 0.9Frw nk’uko raporo zabyerekanye.

Ku rundi ruhande, ishami ry’ubwishingizi ngo ryavuye ku mari ya miliyari 1.9Frw muri 2018, ikaba yari igeze kuri miliyari 2.4Frw kugeza ku itariki 30 Kamena 2019, bihwanye n’izamuka rya 28.2%.

Umuyobozi w’ishami ry’ubwishingizi muri BK, Alex Bahizi, avuga ko iryo zamuka ryatewe n’uko iyo banki yabyinjiranyemo intego.

Ati “Byatewe n’uko twinjiye mu by’ubwishingizi dufite ubudasa, burimo gutanga serivisi nziza utasanga ahandi. Urugero, twebwe dushobora kwishyura umukiriya wacu mu gihe kitarenze iminota 30 bitewe n’ibiri mu makuru twahawe”.

Umuyobozi w’ishami rishinzwe iby’imigabane muri iyo banki, Carine Umutoni, yavuze ko barimo gutegura uburyo bazakundisha icyo gice cy’imari Abanyarwanda kuko ngo hakiri benshi babitinya.