Minisitiri w’Abakozi ba Leta n’Umurimo, Rwanyindo Kayirangwa Fanfan

MIFOTRA yatangaje icyo kiruhuko ibinyujije kuri Twitter, isobanura ko hashingiw.e ku cyemezo cya Perezida wa Repubulika, Paul Kagame.

Uyu munsi wo ku wa gatanu utanzweho ikiruhuko, nyuma y’uko mbere yaho ku wa kane tariki 04 Nyakanga 2019 nabwo wari umunsi w’ikiruhuko hizihizwa umunsi wo kwibohora.

Muri icyo cyumweru kandi ku wa mbere tariki 01 Nyakanga 2019 ku munsi w’Ubwigenge nabwo wari umunsi w’ikiruhuko.

Hashingiwe ku Cyemezo cya Nyakubahwa Perezida wa Repubulika @PaulKagame,Minisiteri y'Abakozi ba Leta n'Umurimo irabamenyesha ko kuwa Gatanu tariki ya 05.07.2019 ari umunsi w'ikiruhuko rusange mu rwego rwo gukomeza Kwizihiza Umunsi wo #Kwibohora25. @FRwanyindo @rbarwanda @aasiimwe

— MIFOTRA (@RwandaLabour) July 4, 2019

H.E. The President of the Republic of Rwanda @PaulKagame has declared Friday 05.07.2019 a public holiday in Rwanda as #Rwanda continues to celebrate the Liberation Day #Kwibohora25. Happy Liberation Day to all of you. @Frwanyindo @PSF_Rwanda @rbarwanda @aasiimwe @RwandaGov pic.twitter.com/HpRxYKRsro

— MIFOTRA (@RwandaLabour) July 4, 2019

Yolanda MUKAGASANA

Abahutu benshi bari baramaze kuba imbata z’urwango kuko babeshywe ku mateka yacu. Ibyo byose ntawabibonaga, yaba umuturarwanda cyangwa umunyamahanga. Ndetse hari n’Abatutsi batabibonaga. Nibwira ko bose babyumvise aho inkubiri y’amashyaka itangiriye, Amajyepfo n’amajyaruguru bagashyamirana bapfa uturere.

Mu 1994 Jenoside irangiye ni ho numva utinangiye umutima yabyumvise.

Abanyarwanda bari hanze bose siko bari Abatutsi nyamara ntibyaburaga kuvugwa
nk’ihame. Impunzi zabayeho nabi zihezwa mu bihugu zahungiyemo, ndetse nk’uko
mu Rwanda bamwe bihinduje amoko ngo babone imibereho, niko n’impunzi
z’Abanyarwanda zimwe zihinduye amazina ngo ajyane n’ay’ibihugu zahungiyemo,
n’ubu bamwe baracyayitwa.

Uwavuga ko kwibohora bitamugezeho ni nde?

Inka zitirirwaga Abatutsi nubwo ntazo bari bakigira. Iyo bicwaga n’inka zaricwaga
zikaribwa. Nyamara hari abana bazingamye, abandi bwaki yaratongoye. Abicaga
Abatutsi banabasenyeraga, kuko bumvaga kwica Umututsi
yaragombaga kujyana n’ibye abicanyi batabashije kurya no kwikorera.

Uwavuga ko atari aboshywe azambwire nzabimwerke.

Abakoloni batwambuye Ubunyarwanda none twarabwishubije. Baduciyemo amoko atatu none twishubije Ubunyarwanda. Umuco nyarwanda waraboshywe biratinda.

Indirimbo zavugaga ku Rwanda zemerwaga hakurikijwe uwazihimbye cyangwa
uziririmba kurusha gukurikira impano y’umuhimbyi cyangwa ijwi ryiza
ry’umuririmbyi.

Nta bisigo byari bikibaho. Nta kuvuga amazina y’inka mu bukwe.

Hari hashyizwe imbere kurya kandi mu Kinyarwanda nta biryo mu bukwe. N’ubu
nibaza ko bitazacika kuko uretse n’umuco waciwe n’amacakubiri, n’imico
mvamahanga yaratubase ngo ni ryo terambere.

Kubyukurutsa byaracitse nyamara inka zarazutse zirororoka. Ubu ntiwabaza umwana kubyukuruka ngo akubwire icyo bivuga. Umubyeyi yarabyaraga inka
zikamukamirwa. Inka zaratekaga abana ntibarware ubworo, inshuti zigatabara kugeza hari ibyaye. Ibyacitse byo ni byinshi kandi byari byiza, kuko byerekanaga ubudasa bw’umuco nyarwanda. None shenge birimo biragaruka tubikesha kwibohora, ariko inzira iracyari ndende.

Abagore bari baragowe

Iyo tuvuze kwibohora ntibivuga gusubira inyuma ngo twibagirwe iterambere. Niba
hari ababohowe, abagore ni intangarugero. Abagore bari baragowe. Umugore
yasigajwe inyuma n’ubuyobozi bwa gikoloni, kiliziya ndetse na Repubulika zose
zabanjirije kwibohora, n’ubu urugamba rwo kwibohora ruracyakomeza.

Nyamara ntibaburaga kuvuga ko ukurusha umugore akurusha urugo.
Umugore wavugwaga ni uwuhe? Ni ubwiza? Ni ubwenge? Ni umutima? Sinabimenya.

Umugore nta gaciro yari akigira, haba aho yavutse ndetse n’aho yashatse. Iyo atabyaraga aho yashatse, nta burenganzira yagiraga aho yashatse. Iwabo na ho byose byabaga iby’abahungu.

Ndetse ababyeyi mu kuraga ntibibagirwe kuvuga ngo haramutse hagize umukobwa
ugaruka kuruhira iwabo bakavuga umuhungu azaruhiraho. Umugore uretse kuruhira iwabo nta bundi burenganzira yari ahafite. Uretse ko na kera bitari shyashya kuko ngo nta mugore wuriraga inzu. Ubu kubera iterambere umugore akora akazi kose nka musaza we cyangwa se umugabo we.

Umugore ntiyajyaga ku rugamba ndetse ni yo mpamvu Ndabaga yabaye iciro ry’umugani. Ubu abakobwa n’abagore bari mu ngabo zacu.
Abagore baraducungira umutekano. Abagore barajya mu butumwa bw’amahoro hose ku isi.

Abagore ni abayobozi. Abagore barashora imari bakagira ibigo byabo bwite. Abagore baragenda amahanga kuko ngo akanyoni katagurutse katamenya iyo bweze.

Iyo tuvuze kwibohora tujye twibuka no kubohoka tutibagiwe kubohorwa.

FPR -Inkotanyi yaratubohoye

Ntabwo ari ibanga ni FPR-Inkotanyi yatwibukije ko tuboshye kandi dushobora
kwibohora. FPR -Inkotanyi yaratubohoye. Ariko se tuyifasha kwibohora natwe
tukabohoka? Abantu bamwe baracyaboshye mu mitwe yabo.

Hari abakiboshywe n’ingengabitekerezo ya Jenoside. Abo banze kubohoka rwose. Hari ababaswe n’ibiyobyabwenge bibwira ko ari wo muti w’ibibazo by’ubuzima. Nyamara bakibagirwa ko yaba inzoga, urasinda ugasinzira, wakanguka ukabisanga. Ufata ibiyobyabwenge ugaseka ugasinzira wakanguka ugasanga birekereje, ndetse wabitindamo bikakuyobya ubwenge bikongera ibyo wahungaga.

Uyu munsi umuturage wese wo mu Rwanda afite ijambo. Dufite aho tuvugira
n’uburenganzira bwo gutanga ibitekerezo. Dufite uburenganzira bwo gukora icyo
dushaka uretse kugira nabi. Ariko kubohoka kwiza ni ukumenya ko aho
uburenganzira bwacu burangirira ari ho ubw’abo turi kumwe butangirira. U Rwanda ni urw’Abanyarwanda twese nta n’umwe uhezwa.

Twite ku bana b’Abanyarwanda kandi twibuke ko na bo bafite uburenganzira, ubwenge, ijambo n’ibitekerezo, tubakunde kandi tubatege amatwi, tubigishe ibifite akamaro.

Ubu aho ibintu bigeze, FPR- Inkotanyi yaratubohoye, aho tugeze nitwibohore kuko
kwibohora nyako gusigaye ni mu mutwe wa buri Munyarwanda, mu myumvire no
mu bikorwa bituma tudasubira aho FPR-Inkotanyi yadukuye.

Nitwibohore umutima wanga twite ku mutima ukunda u Rwanda n’Abanyarwanda, tutazongera kugwa muri bya bindi byigeze kutuboha bikazadutsikamira tutakigira urwinyagamburiro.

Nitwibohore ibyangiza ubuzima bwacu, ubukene, umwanda, ibiyobyabwenge
by’ubwoko bwose, twibohore amashyari n’inzangano zitagira impamvu.
Tugire umutima muntu ukunda u Rwanda n’Abanyarwanda nta kuvangura. Twikunde kuko kwikunda nyako ni ukwanga umugayo, tugaharanira indangagaciro nyarwanda, tukanga icyadusubiza inyuma.

Dusigasire ibyo twagezeho twiyushye akuya, kandi duhange n’ibindi. Igihugu cyacu gikomeze kuba bandebereho ku isuku, ku mubano
wacu nk’Abanyarwanda watangaje abanyamahanga. Mu w’1994, u Rwanda rwari
urw’imirambo, ibyobo n’ibyanira, rwari urw’imfubyi n’abapfakazi. Aho rugeze ruteye ishyari abatarwifurizaga amahoro, rugatera ubwuzu abarukunda, abarushenye bo barahekenya kuko batumvaga aho twahera twiyubaka.

Ariko tureke kwirara kuko inzira ni ndende kandi iracyari inzitane, nituve ku kwirara kuko kwirara biraza igiteme. Gusenya byoroha kurusha kubaka, ariko ubushake buruta byose.

Rubyiruko mwebwe Rwanda rw’ejo nimuhagurukire igihugu cyanyu, ejo u Rwanda rutaba incike kandi rwarabyaye. Iki gihugu muzabyariramo mukagira abuzukuru n’abuzukuruza, nimukireme neza uko mucyifuza, muzagisigire abo muzabyara ari u Rwanda rw’amata n’ubuki.

Namwe babyeyi babyarira u Rwanda, ngo umubyeyi gito
araga abana ibyamunaniye kandi aho si ho tugomba kugana. Dushyire hamwe
twubake u Rwanda tuzarage abana igihugu cyiza. Kwibohora ntibirarangira,
nidukomeze tubohore ibisigaje kubohoka kandi ipfundo ni twe turifite.

Ukwibohora kwiza bana b’u Rwanda kuva ku mwana kugera ku mukuru.
Nkotanyi simbibagirwa. Sinibagirwa ko mwabohoye Abanyarwanda twese, ab’imbere n’abo hanze.

Nkotanyi z’amarere, Abanyarwanda benshi bishwe babatinya kuko batari babazi, Nkotanyi z’amarere zabohoye zikabohora n’interahamwe, uyu munsi zikaba
zarabaye Abanyarwanda nk’abandi twese, Nkotanyi zadusubije icyizere cyo kubaho no guseka, Nkotanyi zaduhaye igihugu hari abatakigiraga kandi barakivukiyemo bakagituramo.

Nkotanyi zatumye Umunyarwanda wese yishyira akizana mu Rwamubyaye akabona umwanya wo gutekereza no guhimba atavuga ko ejo ashobora kuba adahari, Nkotanyi zatumye ubukene burimo bukendera mu bana b’u Rwanda,
Nkotanyi mbabwire iki ?

Ndabakunda kandi ndanabashima. Icyo mbagaya ni kimwe gusa, ntimwandika amateka yanyu ngo urubyiruko ruyamenye azigishe ubutwari ruzasigira abana rubyara. Gukunda igihugu ukagiha byose kugeza no ku maraso yawe, kwihanganira inzara usize byinshi, gukunda utavanguye, ibyo rwabigiraho byo ni byinshi ariko ni ngombwa ngo bishyirwe mu bitabo ndetse abana babyige no mu mashuri.

Imana y’u Rwanda ihoranne natwe, tugire Umunsi mwiza wo kwibohora.

Yolanda MUKAGASANA

Ibi umukuru w’igihugu yabigarutseho kuri uyu wa 04 Nyakanga 2019 ubwo hizihizwaga ku nshuro ya 25 umunsi mukuru wo kwibohora.

Perezida Kagame yifurije Abanyarwanda n’abanyamahanga umunsi mwiza wo kwibohora, asobanura ko kwibohora ari uburenganzira, ubumwe, amajyambere, n’umutekano, abantu bakagira gutera imbere mu byo bifuza byose.

Perezida Kagame yashimiye abaje kwifatanya n’u Rwanda. Yasobanuye ko kubaho kw’u Rwanda kwari mu marembera ubwo igice cy’abaturage cyahigwaga, abarenga miliyoni imwe bakicwa, ariko Inkotanyi zigatabara zigahagarika Jenoside.

Perezida Kagame ati “Tariki 04 Nyakanga ingabo zacu zari zimaze guhagarika Jenoside. Kuva icyo gihe buri mwaka tugira icyunamo bikaba bimaze kuba inshuro 25. Uko igihe gihita ni ngombwa kwibutsa ko urugamba rwo guhagarika Jenoside rutari intambara ya gisirikare nk’izo dusanzwe tuzi. Rwari urugamba rwo kurokora abahigwaga.”

Perezida Kagame yagarutse ku bwitange bwa batayo y’ingabo z’Inkotanyi zari ku Nteko Ishinga amategeko ashima umurava n’ubutwari zagaragaje mu rugamba rwo kubohora igihugu.

Yagize ati “Botswaga igitutu cy’amasasu, kandi izindi ngabo zacu zidafite uko zibatabara. Ariko zashoboye kugera kuri iyi sitade no kurokora ibihumbi by’abantu bari bahahungiye. Aha ni hamwe mu hantu henshi bashoboye kurokora abantu. Ni mwe mwitangiye igihugu cyacu, kandi n’ubu muracyagikorera nta gucogora.”

Perezida Kagame avuga ko hari benshi mu barwanye urugamba rwo kwibohora batanze ubuzima bwabo bakabubura, ashima ubutwari bwabaranze.

Ati “Ese ubwo butwari n’ubumuntu byavuye hehe? Igisubizo kiroroshye: Ni icyizere twari dufite mu bumwe n’agaciro by’Abanyarwanda. Iki cyizere ni cyo cyabaye intangiriro y’urugamba rwo kwibohora.”

“Intego yari ukubaka u Rwanda nk’igihugu abantu bose bafitemo uburenganzira bungana, ni ukuvuga kugira Repubulika nyakuri.”

Umukuru w’igihugu yibukije ko mu myaka myinshi yashize, Abanyarwanda bafatwaga nk’ibikoresho abafite imbaraga n’ububasha bakoreshaga uko bashatse.

Ati “Akababaro k’impunzi mu mahanga, n’ikandamizwa n’ubukene by’abari mu gihugu byose byari bifite inkomoko imwe. Kwibohora ntabwo byari bigamije gusubizaho ibya kera, ahubwo bwari uburyo bwo guhanga igihugu gishya kandi cyiza."

“Uru rugamba rwari ngombwa kandi nta kundi byajyaga kugenda. Ni biba ngombwa ko bidusaba kongera kurwana, turiteguye! Iki cyerekezo cy’ubumwe n’ubutabera cyatumye benshi badutera ingabo mu bitugu kuko kijyanye neza n’umutima w’ubumuntu. Gihamya y’ibi yari mu bikorwa aho kuba mu magambo gusa.”

Perezida Kagame yongeyeho ati “Muri iyi myaka 25 ishize twagerageje kuyobora igihugu cyacu mu murongo w’intego zo kwibohora twaharaniye. Imyitwarire y’ingabo zacu ni kimwe mu bibigaragaza.”

Yashimiye ubutwari bw’abari mu Rwanda barwanyije politiki y’amacakubiri, ndetse n’imbaraga abaturage uyu munsi bashyira mu guhindura igihugu kugira ngo kirusheho kuba cyiza.

Ati “Ibi byatumye ibyo benshi bibwiraga ko bidashoboka bishoboka. Urugero ni nko kongera kubaka icyizere, amahoro no gukorera hamwe. Ariko na none ntabwo dukwiye kwirara ngo twumve ko twageze iyo tujya.”

“Izi ngabo zihagaze imbere yacu hamwe n’abandi bose bagize uruhare muri uru rugamba ntabwo batatiye igihango. Berekana neza ishusho y’iki gihugu, ni na yo mpamvu ari inshingano ya buri munyarwanda gukomeza ibyo tumaze kugeraho no kubyubakiraho.”

Perezida Kagame yakomoje no ku cyo kwibohora k’u Rwanda bivuze ku mugabane wa Afurika, avuga ko u Rwanda ruzi neza ko urugendo rwo kwibohora k’u Rwanda rufite aho ruhuriye n’urugamba rugari rwo kubohora umugabane wa Afurika.

Ati “Twese dusangiye intumbero y’ubwigenge no guhindura imibereho yacu ikarushaho kuba myiza. Uyu mugabane wacu ntabwo wahora ugengwa n’ibibera ahandi. Imyumvire yacu igomba kuba iyo gushingira kuri twebwe ubwacu mbere na mbere.”

Perezida Kagame yashimiye ingabo zo mu bihugu by’Umuryango w’Iburasirazuba bwa Afurika zaje kwifatanya n’u Rwanda mu birori byo kwibohora, zikaba zimaze n’iminsi ziri mu Rwanda ziri mu bikorwa zihuriramo byo kuvura abaturage ku buntu.

Yashimiye n’abaje bahagarariye amashyaka ya politiki, abagaba b’ingabo baturutse mu karere u Rwanda ruherereyemo n’abavuye ahandi baje kwifatanya n’Abanyarwanda mu birori byo kwizihiza umunsi mukuru wo kwibohora.

Perezida Kagame yavuze ko hari byinshi bitari bimeze neza ubu byabaye byiza ari na cyo kwibohora bivuze, avuga ko ibyagezweho bigomba kurindwa.

Ati “Ibyo Abanyarwanda bagezeho biragaragara nta wabihakana, ariko tugomba gukomeza kwicisha bugufi tukemera ko ikibazo gikomeye ari ukubisigasira. Amateka twayasize inyuma yacu, tureba ahazaza twese hamwe nk’umuryango. Dukomeze rero dushyigikire izi ndangagaciro, buri wese agire uruhare ku giti cye ndetse tubitoze n’abadukomokaho. Ntituzongere kuyoba haba na rimwe. Mbifurije mwese umunsi mwiza wo kwibohora.”

Mu buryo buvuga butabumbuye umunwa, abanyabugeni bashushanyije amateka y’urugamba rw’amasasu rwarwanywe n’ingabo zari iza Rwanda Patriotic Army (RPA), bakoresheje ibihangano bibumbye.

Ibi wabisanga ku nteko ishinga amategeko ahari amateka y’urugamba rwo kubohora igihugu, ndetse n’i Kinyinya mu karere ka Gasabo ahitwa kuri Burende.

Nyuma y’urwo rugamba haza umusaza ku ngoro y’Umuryango FPR-Inkotanyi (i Rusororo), urimo gutungira agatoki abana babiri bahetse ibikapu, ameze nk’utanga icyerekezo bagomba kuganamo.

Abanyabugeni bakomeza gushushanya ibyagezweho mu duce dutandukanye tw’igihugu, aho bavuga ko ari ibikorwa by’iterembere bigenda bigerwaho n’abaturage nyuma y’icyerekezo bahawe na Perezida wa Repubulika, Paul Kagame.

Twahera ku bibumbano by’ingagi biri imbere y’ibiro by’Umujyi wa Kigali, ndetse n’iyo uwusohotsemo werekeza mu Majyaruguru mu buturo bwazo, uhura n’ibindi bibumbano ahitwa i Shyorongi ku rugabano rwa Nyarugenge na Rulind y’Amajyaruguru.

Ukomeje urugendo rugana ku gusura ingagi ziri mu birunga, ugera ku bindi bibumbano byazo ku isoko ryo mu mujyi w’akarere ka Musanze, kamwe mu buturo bw’izi nyamaswa zisigaye hake ku isi.

Ikigo gishinzwe iterambere (RDB), kivuga ko mu myaka icyenda ishize, ba mukerarugendo baje gusura ingagi mu Rwanda bamaze gutanga amadolari ya Amerika arenga miliyoni 107$, akaba avunjwe mu manyarwanda arenga miliyari 100 (ararenga miliyari 11 z’amafaranga buri mwaka).

Iki kigo kivuga ko nyuma ya Jenoside yakorewe Abatutsi mu 1994, abasura ingagi bagiye biyongera buri mwaka kugera kuri 604 muri 2016, bavuye kuri 242 muri 1981.

Mu rugendo rwo kuva i Kigali werekeza i Musanze, biragoye ndetse ubanza bidashoboka ko imodoka itwaye abagenzi yareka guhagarara imbere yo kwa Sina Gerard witwa Nyirangarama (mu karere ka Rulindo).

Uyu mucuruzi ni umwe mu bahora bagaragariza Perezida wa Repubulika, Paul Kagame ko bibohoye mu bukene ndetse banagira uruhare rwo kububohora abandi Banyarwanda.

Sina Gerard utunganya ibinyobwa n’ibiribwa akabicuruza mu Rwanda no mu mahanga, avuga ko akoresha abakozi bakabakaba 1,000 ndetse akanahemba imiryango irenga 3,000 imucuruzaho umusaruro w’ibikomoka ku buhinzi n’ubworozi.

Afite ishuri rye aho abana 891 bigira ubuntu kuva ku burezi bw’incuke kugera ku cyiciro cya mbere cy’amashuri yisumbuye, atanga imisanzu mu bikorwa bitandukanye by’iterambere ry’akarere n’igihugu muri rusange.

Umuhanzi Habimana Venuste wabumbiye Sina Gerard ikibumano cy’umugore usukira imbata (ibishuhe) amazi, avuga ko uwo mugore agereranywa n’abakozi baho baba barimo kwicira isari abahisi n’abagenzi.

Ku bantu bavuye i Musanze berekeza mu karere ka Rubavu, ku marembo y’umujyi wa Gisenyi bakirwa n’ikibumbano cy’ubwato burimo umuntu utungiye undi urutoki imbere hirya y’aho bareba.

Igihangano kibumbye mu karere ka Rubavu

Kabakera Jean-Marie Vianney wabumbye icyo gihangano, avuga ko yashatse kugaragaza uburyo abatambagira mu kiyaga cya Kivu bakoresheje ubwato, batazabona imyidagaduro ikorerwa ku nkombe zacyo gusa, ahubwo ko mu mazi magari yacyo ari isoko y’amafi n’amashanyarazi ya gazi metane.

Ati “Ubuyobozi bw’akarere bwadusabye kubikora gutyo mu rwego rwo kwerekana uburyo iki kiyaga kizabyazwa umusaruro utari uwo kuroba no kogamo gusa”.

Guhera mu mwaka wa 2009 nibwo Leta y’u Rwanda ku bufatanye n’ibigo byazobereye mu by’ingufu z’amashanyarazi, yatangiye umushinga wo gucukura gazi metane mu kiyaga cya Kivu, kuri ubu ikaba itanga megawati zirenga 26 z’amashanyarazi.

Leta y’u Rwanda ivuga ko kugeza ubu inganda zo mu gihugu hose zitanga amashanyarazi angana na megawati 221, zikaba zaravuye kuri megawati 100 mu myaka 10 ishize.

Kabakera akomeza yerekeza mu Majyepfo, aho ateganya kugaragaza uburyo akarere ka Nyaruguru gateza imbere ubukerarugendo bushingiye ku myemerere, akaba azahabumbira ishusho ya Bikira Mariya mu mujyi wa Kibeho.

Amahembe y’inka ku marembo ya Musée muri Huye

Kuva i Nyaruguru ukanyura i Huye ku mahembe y’inka ari mu maremo y’Ingoro Ndangamurage y’u Rwanda, utambuka umujyi wa Nyanza na Ruhango ugahura n’ikindi kibumbano mu mahuriro y’imihanda y’umujyi w’akarere ka Muhanga.

Ni ikibumbano cy’umuntu ufashe amafaranga n’igikarayi kiyungurura amabuye y’agaciro, ‘akaba asobanura akamaro ubucukuzi bufitiye ako karere n’igihugu muri rusange’, nk’uko Kabakera wakibumbye abisobanura.

Ikibumbano cy’umugabo ufite inoti n’igikarayi kiyungurura amabuye y’agaciro, mu karere ka Muhanga

Raporo yasohowe na Banki Nkuru y’u Rwanda (BNR) muri Gashyantare 2019, igaragaza ko mu mwaka ushize wa 2018 amabuye y’agaciro yahaye Leta amadolari ya Amerika miliyoni 284.5, ni ukuvuga amanyarwanda akabakaba miliyari 280Frw.

Kabakera Jean-Marie Vianney ni we wakomereje i Burasirazuba mu marembo y’umujyi wa Rwamagana, akaba yarahabumbiye umugore n’umugabo bafite amafaranga bakuye mu buhinzi bw’ikawa.

Uyu munyabugeni yanakomereje mu mujyi rwagati wa Rwamagana naho ahabumbira insina ifite igitoki kinini cyeze.

Umukozi ushinzwe ubuhinzi mu karere ka Rwamagana, Innocent Ukizuru, avuga ko ako karere kamaze imyaka ibiri yikurikiranya ku mwanya wa mbere mu mihigo, bitewe n’ubuhinzi.

Ati “Uretse kuba ikawa na macadamia ari byo bihingwa ngengabukungu byiganje muri aka karere, urutoki na rwo nk’igihingwa ngandurarugo ruri ku buso bunini, kandi rurera cyane ku buryo hegitare imwe itanga toni zibarirwa hagati ya 24 na 30”.

Raporo ya BNR y’uyu mwaka wa 2019, ikomeza igaragaza ukwiyongera k’umusaruro w’ikawa, aho wavuye ku madolari ya Amerika miliyoni 54.9 ugera ku madolari ya Amerika miliyoni 68.7 muri 2018, ni ukuvuga amafaranga y’u Rwanda arenga miliyari 65.

Kabakera yakomereje i Nyagatare atambutse ku kibumbano cy’inka y’ifirizoni mu mujyi w’akarere ka Kayonza cyabumbwe n’abandi batari we, aho yabumbiye inka z’inyambo.

Ikibumbano cy’inka muri Nyagatare

Ikibumbano cy’inka mu mujyi wa Kayonza

Ikigo gishinzwe guteza imbere ubuhinzi n’ubworozi (RAB), kigaragaza ko kuva muri 2013 kugera muri 2018, umusaruro w’amata mu Rwanda wavuye kuri toni 445,000 ugera kuri toni 816,000 ku mwaka, ni ukuvuga litiro zirenga miliyoni ebyiri ku munsi.

Abahanzi b’abanyabugeni baganiriye na Kigali today bavuga ko urugendo rukomeje rwo kugaragaza isura y’u Rwanda mu buryo buvuga butanditse cyangwa budasakuza.

Siporo nka kimwe mu bikorwa bihuza abantu bikabakura mu bwiyunge ni imwe mu nzira igihugu cyakomerejemo urugamba rwo kwibohora.

Kimwe mu byaranze siporo muri iyi myaka 25 ni ibikorwaremezo bigezweho byatumye igihugu kigirirwa icyizere cyo kwakira bwa mbere mu mateka, amarushanwa mpuzamahanga akomeye arimo CHAN,Igikombe cy’Afurika cy’ibihugu ku batarengeje imyaka 20 na Tour du Rwanda.

N’ubwo urugamba rwo kwibohora rugikomeza,hari ibikorwaremezo bigaragaza intambwe igihugu kimaze gutera mu bikorwaremezo bya siporo n’imyidagaduro.

Kigali Arena, mu nyubako nziza za siporo muri Afurika

Mu mujyi wa Kigali, akarere ka Gasabo mu murenge wa Remera, huzuye inzu y’imikino izwi nka Kigali Arena.Ni inyubako iteye amabengeza imbere n’inyuma kandi ijyanye n’igihe.

Kigali Arena ifite ubushobozi bwo kwakira abantu ibihumbi 10 bisanzuye ikaba iri no ku rwego rwo kwakira amarushanwa abera mu nzu (indoor) yo ku rwego rw’isi.

Biteganyijwe ko iyi nyubako izaberamo imikino y’igikombe cy’Afurika cya basketball kizabera mu Rwanda muri 2021 ikaba ishobora kuzakira umwe mu mikino ya Shampiyona ya Basketball muri Leta Zunze za Amerika (NBA).Bimaze kumenyerwa ko hari imikino micye ya NBA ibera hanze ya Leta Zunze za Amerika u Rwanda rukaba ruri ku isonga mu bihugu byitezweho kwakira umwe muri iyi mikino mu myaka iri imbere.

Stades ziringaniye ziri kubakwa mu turere two mu Rwanda

Ku nkunga ya Perezida wa Republika, mu turere twa Bugesera, Nyagatare na Ngoma, hari kubakwa Stade nziza zigezweho aho buri Stade izajya yakira byibura abantu ibihumbi bitatu, imirimo yo kuzubaka ikaba igomba gusozwa muri Nyakanga/2019.

Izi sitade zizaba zifite ubwatsi bw’ubukorano, zikazaba zifite igice gitwikiriye, ndetse n’ahandi hadatwikiriye ariko abafana bakazabasha kwicara neza, bitandukanye n’uko mu myaka ishize ibi bibuga byari bimeze.

Imirimo yo kubaka Stade ya Nyagatare igeze kure

Stade ya Bugesera yamaze gushyirwamo ubwatsi bw’ubukorano

Stade ya Ngoma yo yamaze gutahwa

Stades zindi zaravuguruwe, izari ibitaka zashyizweho ubwatsi bugezweho, zinahabwa inyongera y’ibibuga by’imyitozo …

Abakiniye ku bibuga byo mu Rwanda hambere aha ntibakwibagirwa imikingo yabagamo, ivumbi ritumuka, gusa ubu bene ibyo bibuga biri kuba amateka, ukinira kuri Stade Huye na Kamena z’ubu, ntiyamenya uko abahakiniye mu myaka ishize bari babayeho nk’uko bitangazwa na Nshimiyimana Canisius wakiniye kuri ibi bibuga byombi hambere.

Kuri Stade Kamena ni uku byagaba byifashe nyuma y’umukino

Aha hahoze ari mu myanya y’icyubahiro kuri Stade Kamena

Canisius wahoze akinira Mukura twamusanze kuri Stade Kamena iyo yibutse ibibuga bahoze bakiniraho, akibuka imvune za hato na hato kubera kutareshya kw’ikibuga, ashima Perezida Kagame wabafashije kubona ibibuga bigezweho.

Yagize ati “Iki kibuga cya Kamena cyahozemo imikingo, umupira waridundaga nkatwe twakinaga inyuma ugashiduka ukoze penaliti, benshi bagiye bavunikira aha, ariko ubu abana barakina bisanzuye bagakina umupira usukuye, nabigereranya n’aho twe twahoze dukinira ngashima Perezida Kagame waduhaye izi mpano z’ibibuga bigezweho”

“Nta bushobozi twari dufite bwo kwakira umupira wa nijoro, ariko ubu abantu na nyuma y’akazi barakina, ubona ko nka Huye Stade yahoze yicaramo abantu nka 1500 nyuma yo kuvugururwa yanahinduye isura y’umujyi.”

Imvune ziterwa n’ibibuga bibi zaragabanutse

“Ndibuka nk’umukinnyi bita Ngendakumana Djuma Saidi wigeze gukukira iryinyo kuri iki kibuga, nanjye hari inkovu mfite ku kuboko mpita nibuka Kamena ya kera ubwo twari twakinnye n’Intare, iyo rero mbonye iki kibuga abana bari gukiniraho nta n’umwe unyerera nanjye numva nishimye, kuko iyo twajyaga gukina twabanzaga kumenamo vidange ngo imiswa igende” Canisius aganira na Kigali Today

Stade Kamena ikoreshwa nk’ikibuga cy’imyitozo ubu irasa neza, ikibuga cyiza ndetse n’urwambariro

Usibye Stade Kamena, i Huye hari na Stade Huye, iyi yanakiriye CHAN irushanwa rya kabiri muri Afurika mu mupira w’amaguru, byari ubwa mbere habereye irushanwa mpuzamahanga , yakira imikino yo guhatanira itike yo kwerekeza mu gikombe cya Afurika.Abaturiye aka karere bagaragaje ibyishimo byo kubona Sitade ya Huye ivuguruye,bwa mbere mu mateka bakabasha no kureba imikino ya nijoro ku matara.

Musanze, ubu naho ikibuga cya Stade Ubworoherane cyaravuguruwe

Sitade Ubworoherane yo mu karere ka Musanze yakirirwaho imikino y’ikipe y’akarere Musanze FC.Gusa iki kibuga cyananiwe kwakira imikino myinshi bitewe n’uko cyari cyarangiritse.

Iyo imvura yagwaga imikino yarasubikwaga ariko ibi byabaye amateka nyuma y’aho iyi sitade ivururiwe aho igashyirwamo ubwatsi bwiza buri ku rwego nk’urwa Sitade Amahoro, ni sitade yatashywe tariki 9 Gashyantare 2017, ikaba ifite igice gitwikiriye, urwambariro rujyanye n’igihe ndetse n’ubwiherero,Imirimo yo kuvugurura iyi sitade yatwaye miliyoni 170RWf.

Stade Ubworoherane yashyizwemo ubwatsi bwiza

Iyi Stade iheruka kuvugururwa igashyirwamo ubwatsi bwiza buri ku rwego nk’urwa Stade Amahoro, ni Stade yatashywe tariki 9 Gashyantare 2017, ikaba ifite igice gitwikiriye, urwambariro rujyanye n’igihe ndetse n’ubwiherero, aho imirimo yo kuvugurura iyi Stade yatwaye Miliyoni 170RWf.

I Rubavu baruhutse gukinira mu makoro

Mu karere ka Rubavu, habarizwa Sitade Umuganda, igizwe n’ikibuga cy’imyitozo cy’ubwatsi bw’ubukorano kizitiwe gifite urwambariro, ubwogero n’ubwiherero, hatarimo icyo kibuga cy’imyitozo stade Umuganda igizwe n’igice gisakaye n’ikidasakaye, ibyumba by’urwambariro bine, ubwogero ndetse n’ubwiherero.
Isanzwe yakira abafana ibihumbi 6000, nayo ifite umwihariko wo kuba mu masitade afite ubushobozi bwo kwakira imikino ku manywa na nijoro.

Abatuye i Rubavu nabo ntibasigaye, Stade Umuganda yaravuguruwe

Nduhirabandi AbdulKharim uzwi nka Coka, yarahakiniye, arahatoreza, nawe ubu yumva ashimishijwe no kubona umwana atanga umupira ibuye ntiriwugarure

“Ubu urabona ko iki ari ikibuga kigezweho, urigisha umupira hano umupira ukabona gutembereza umupira birakunda, mbere ntiwari kumenya niba kuba umupira utagenda ari ikosa ry’umukinnyi, ariko ubu umwana aratembereza umupira bigaragara, habagamo amabuye,amakoro,imikingo, kabisa ubu turashimira ubuyobozi bwadufashije kubona ibintu twafataga nk’inzozi”

Mbere umupira wakinwaga ku manywa gusa

Usibye Sitade Amahoro yahozeho amatara yatumaga hashobora kuba imikino ya nijoro, ubu ku bibuga bya Rubavu, Huye, Stade ya Kigali i Nyamirambo, hashobora kubera imikino yo mu masaha akuze, aho ibyo bibuga byose byashyizweho amatara.
Ubu mu Rwanda harabarirwa Sitade 10 zifite ubwatsi bugezweho bw’ubukorano ari zo Stade ya Kigali I Nyamirambo, Stade Mumena, Stade ya Kicukiro, Stade Umuganda i Rubavu, Stade Huye, Stade Kamena, Stade ya Muhanga, Stade ya Ngoma, Stade ya Bugesera, Stade ya Nyagatare.

Hari kandi ibibuga by’imiyitozo nabyo bifite ubwo bwatsi ari byo ikibuga cya Ferwafa, ikibuga cya Shyorongi, ikibuga cy’imyitozo cya Rubavu, hakaba Sitade zifite ubwatsi busanzwe kandi butunganyije neza harimo Sitade Amahoro na Stade Ubworoherane y’i Musanze.

Gymnase ya Gisagara yakuye abaturage mu bwigunge

Byari bimenyerewe ko ibikorwa bya siporo byinshi biherereye mu mujyi wa Kigali, ibindi bicye bikaba mu yindi mijyi mito igize u Rwanda, gusa mu karere gafatwa nk’icyaro ka Gisagara, bababashije kwiyubakira inzu y’imikino, izwi nka Gymnase, ahashobora gukinirwa imikino irimo Basketball, Volleyball, Sitting Volleyball, Sitball n’imikino njyarugamba ndetse n’impande zayo hakaba hari ikibuga cya Beach volleyball.

Ni inyubako ibereye ijisho, ibereye abafana, aho bagera ku 1500 bayijyamo bakicara neza, ikaba ari nayo nzu y’imikino ifite uburebure busumba izindi mu kujya hejuru mu Rwanda, ikaba yaruzuye itwaye akayabo ka miliyoni 922 frw.

Ubwo twayisuraga, twasanze hari kubera imyitozo y’abafite ubumuga bakina Sitting volleyball, umwe mu bo twaganiriye yatubwiye ari igikorwa cy’indashyikirwa , badutangariza ko ibi babikesha imiyoborere myiza, by’umwihariko ikaba ari n’ikipe irimo abamugariye ku rugamba barimo abo mu ngabo z’ubu RDF ndetse n’iza kera (Ex-FAR).

“Iyi nyubako yaradufashije cyane, ibikomere bya buri munsi, hano turakina twisanzuye, nkatwe abafite ubumuga twarasubijwe, turashimira Ubuyobozi bw’u Rwanda na Perezida Kagame, ubu twari kuba turi gukinira mu zuba, abacitse amaguru inkovu zikongera zigakomereka, ariko hano nta mvura nta zuba, muri make turishimye”

Iyi nyubako yubatse ku buryo bwa Etage aho ushobora kureba umukino uyiberamo wicaye mu myanya yo hasi cyangwa hejuru, ikaba ifite ibyumba by’urwambariro, ahakorerwa Gymtonic , ubwiherero, ibyumba 4 bikoreshwa mu buvuzi bw’ibanze, ifite na cave cyangwa inzu zo hasi zifashishwa nk’ububiko bw’ibikoresho by’imikino.

Africa Rising Cycling Center, kimwe mu bigo bibiri bikomeye by’imyitozo muri Afurika

Uyu ni umwe mu mikino imaze kuba ubukombe mu Rwanda, ukunzwe n’abantu benshi, by’umwihariko abawukina bakaba banitwara neza haba mu marushanwa mpuzamahanga akinirwa mu Rwanda ndetse no hanze y’u Rwanda, aho ubu ndetse u Rwanda runafite abakinnyi bakina nk’ababigize umwuga hanze y’u Rwanda.

Ikigo cyitwa Africa Rising cycling Center ni kimwe mu bigo by’imyitozo bibiri bikomeye muri Afurika kikagira igaraje ry’amagare rya mbere muri Afurika.Iki kigo kiri ku rwego mpuzamahanga kimaze kwakira amakipe aturutse mu bihugu bitandukanye ku isi aza gukoreramo imyitozo harimo na Direct Energie yo mu Bufaransa,Team Novo Nordisk yo muri Leta Zunze Ubumwe za Amerika.

Perezida w’impuzamashyirahamwe y’umukino w’amagare ku isi (UCI) David Lappartient aherutse gusura iki kigo atangaza ko kigiye kuzafatwa na UCI kikaba kimwe mu bigo byemewe kizajya cyitorezwamo n’abakinnyi baturutse mu bihugu bitandukanye by’Afurika.

Iki kigo kandi kimaze kwakira amakipe y’ibihugu ibitandukanye byo muri Afurika birimo Eritrea, Ethiopia, Nigeria, Zambia, u Burundi, Burkina Faso ndetse kuri iyi tariki ya kane Nyakanga u Rwanda rwizihirizaho umunsi wo kwibohora ku nshuro ya gatanu, muri iki kigo hari abakinnyi 25 b’ikipe y’igihugu ya Repuburika Iharanira Demokarasi ya Congo baje kuhakorera imyitozo yimbitse bitegura isiganwa rya Tour de la RDC.

Harimo igaraje ry’amagare riri ku rwego rwa mbere muri Afurika, icyumba cy’igororamitsi (massage) amacumbi y’abakerarugendo aho hafite ubushobozi bw’ibyumba bya kwakira abakerarugendo 12 ku ijoro, ibyuma bifite igikoni,ubwogero n’Ubwiherero, Interineti, hakabamo ndetse n’amacumbi y’abakinnyi n’abayobozi , iduka rishobora kwifashishwa mu kugurisha imyenda ya Team Rwanda, aho abakinnyi barira, ndetse n’icyumba gikorerwamo igeragezwa ry’Ubuzima bw’abakinnyi.

Mu bindi iki kigo gishinzwe uretse kwita ku buzima bw’abakinnyi harimo guteza imbere ubukerarugendo muri aka gace aho gifasha abakerarugendo ku babakodesha amagare yo kugendaho, aho ku masaha atatu igare rikodeshwa amadollars 75 y’abanyamerika naho ku munsi rigakodeshwa $135.

Muri iki kigo kndi harimo kubakwa ikibuga cyagenewe amagare bakinisha bayasimbutsa BMX Extreme Sports, inzira y’uyu mukino ikaba yaramze gutunganwa nk’uko mubibona hasi ku mafoto agaragaza udukingo ayo magare azajya asimbuka.

Sitade ya Gahanga ya Cricket

Uwo ni umukino wa Cricket, benshi mu Banyarwanda ntibarawumenya cyane, gusa batangiye kugenda bawumenya bitewe n’uduhigo abanyarwanda bawukina bagiye bakora, ku ikubitiro Eric Dusingizimana yakoze amateka yo kumara amasaha 51 agarura udupira dukoreshwa muri uyu mukino, ahita yandikwa mu gitabo cyandikwamo abakoze ibidasanzwe ku isi (Guiness World records).

Byatumye mu Rwanda hubakwa Stade y’akataraboneka muri uyu mukino

Mu karere ka Kicukiro, ahitwa i Gahanga, ubu hubatse Stade ya mbere muri
Afurika utabariyemo igihugu cy’Afurika y’Epfo, ikaba iri kubakwa bivuye ku nkunga zitandukanye, zahereye kuri Leta y’u Rwanda yatanze ubutaka bwo kubakamo iyi Stade bungana na Hegitari 4.5, ndetse inabasonera imisoro isanzwe itangwa ku bikorwa nk’ibi ingana na 18% by’ingengo y’imari y’uyu mushinga.

Iyi Stade yubatse i Gahanga, ifite uburebure bwa metero 124, ubugari bwa metero 137, aho ifite ikibuga cy’ubwatsi, aho abafana bicara (Tribune nto) igizwe n’urwambariro, na Club aho umuntu yafatira icyo kunywa,

Nyuma yo kubaka iyi Stade byiswe phase ya mbere, hanateganyijwe phase ya kabiri yo kubaka ikibuga kindi cya cricket, gishobora kuzajya cyifashishwa nk’ikibuga cy’imyitozo.

Stade y’i Gahanga yatashywe ku mugaragaro na Perezida Kagame (Amafoto)

Ibikorwa by’ingabo z’u Rwanda byafashije Leta kuzigama arenga miliyari 12

MINADEF ivuga ko Ingabo z’Igihugu zavuye abaturage 104,416 indwara zananiranye, zahingiye abantu mu masambu yabo angana na hegitari 139.75, zinabakorera imirimo itandukanye ihurijwe mu mishinga 73,380.

MINADEF ikomeza ivuga ko ingabo zubatse imidugudu 47 y’icyitegererezo mu turere 18 two hirya no hino mu ntara zose z’igihugu, harimo inzu 360 zubakiwe abarokotse Jenoside yakorewe Abatutsi mu 1994.

Abaturage bubakiwe inzu zigezweho ku bufatanye bw’ingabo z’igihugu

Hanabayeho kubaka ibiraro (amateme) 10 mu turere 11, ibitaro bibiri, imihanda ireshya na kilometero 283,233, ndetse no kuremera abaturage batishoboye amatungo arimo inka 2,672, inkoko 9,820, hamwe n’ifumbire ingana n’ibiro 3,322.

By’umwihariko mu karere ka Nyarugenge, Umukuru w’Igihugu yatashye ibikorwa bitandukanye byatwaye amafaranga arenga miliyari umunani, birimo inzu 240 zubatswe mu mudugudu wa Karama, akagari ka Nyabugogo mu murenge wa Kigali.

Perezida Kagame yanamurikiwe umuhanda Ruliba - Nyamirambo

Izi nzu ziri mu nyubako eshatu zahawe abaturage bavuye mu bice bishobora kubateza kwicwa no kwangirizwa n’ibiza (amanegeka) ku misozi ya Kigali.

Umujyi wa Kigali uvuga ko mu mwaka ushize wa 2018 wafatanije n’inzego zitandukanye zirimo abakuru b’ingabo gukora inyigo, bagasanga ingo 13,670 ziwutuyemo mu buryo bushobora kubateza ibyago bikabije, akaba ari ho havuye igitekerezo cyo kubakira bamwe i Karama.

Umwe mu bahawe inzu, Mukangira Marie avuga ko yari atuye hagati ya za ruhurura ebyiri mu nzu iva ku buryo iyo imvura yagwaga ari mu rugo ngo yasangaga yuzuriwe n’amazi.

Ati “Nategaga ibintu byo kureka amazi mu nzu imbere bitewe no kuvirwa, nageze ubwo mbona inzu nziza ndayifuza ntazi ko nzayibona, none ndabashimira Nyakubahwa Perezida wa Repubulika ko nayigezemo”.

Uretse inzu zubakiwe abatishoboye bo muri Nyarugenge, Perezida Kagame yanatashye ibyumba 24 byongerewe mu nyubako zigize urwunge rw’amashuri rwa Karama, ndetse n’ubworozi bw’inkoko 7,500 zahawe abakuwe mu manegeka.

Perezida Kagame yatashye urwunge rw’amashuri rwa Karama

Umujyi wa Kigali wanamurikiye Perezida Kagame umuhanda wa kaburimbo ureshya na kilometero zirindwi, witezweho kuzagabanya umuvundo w’imodoka ku Giticyinyoni na Nyabugogo, ukaba uva ku kiraro cya Nyabarongo ugahinguka i Nyamirambo.

Kuwa 3 Nyakanga, Bonhomme yawugize ngarukamwaka wo gukoreraho igitaramo mu Rwanda, ariko uyu mwaka yongeyeho igitaramo cya kabiri azakorera mu gihugu cy’Ububiligi agamije gutaramana n’Abanyarwanda baba mu mahanga ngo asobanure akazi gakomeye kakozwe n’inkotanyi ubwo zarokoraga abatutsi bicwaga.

Inyito ‘Inkotanyi ni Ubuzima’, Bonhome yayikomoye mu buhamya bwinshi yajyaga atega amatwi ubwo yabaga yitabiriye ibiganiro byo kwibuka hirya no hino mu Rwanda.

Ati “Ndi umuntu ukunda gutega amatwi cyane ubuhamya bw’abarokotse. Akenshi umuntu yatangaga ubuhamya akavuga uko yihishe mu rufunzo, uko yari abunze mu masaka, ukuntu yabaga mu gisenge cy’inzu, akavuga urwo rugendo rwose, ariko yagera inyuma ukumva aravuze ngo [Ngiye kubona mbona Inkotanyi ziraje]. Icyo gihe mpita numva ko ubuhamya bugiye kurangira kuko ahita avuga ukuntu amaze kubonana n’Inkotanyi zahise zimutabara”.

Bonhomme avuga ko abantu babaga bihishe bakumva Inkotanyi, ngo bumvaga ijwi rivuga riti “Muhumure, abakiriho ntabwo mugipfuye”.

Iri jambo kuri Bonhomme arifata nk’iryatanze ubuzima ku Batutsi bari bataricwa, ariko akanongeraho ko n’ababaga bakomeretse Inkotanyi zabavuzaga cyangwa abashonje zikabashakira icyo kurya.

Iyi niyo mpamvu yahise ahimba indirimbo yitwa Inkotanyi ni Ubuzima, anategura ibitaramo ngarukamwaka mu ijoro ryo kwibohora, agamije kugaragaza ko Inkotanyi zatanze ubuzima.

Ikindi gituma ategura ibi bitaramo, ngo mu gihe cy’iminsi 100 yo kwibuka, abarokotse benshi baba bafite agahinda mu minsi yo kwibuka, agahitamo kubasusurutsa ngo binjire mu munsi wo kwibohora babohotse mu mitima.

Uretse igitaramo cyo mu ijoro ryo kuwa 3 Nyakanga amaze gukora inshuro 2, ubu Bonhomme yahisemo kwagura amarembo, kuko ku itariki 20 azataramira mu Bubiligi mu gitaramo nk’icyo akorera mu Rwanda, agamije gutaramana n’Abanyarwanda baba i Burayi.

Ati “Ndashaka gusangira n’Abanyarwanda baba i Burayi ibyishimo by’ubuzima twahawe n’Inkotanyi ubwo zarokoraga Abatutsi bicwaga muri Jenocide”.

Bonhomme amaze kubaka izina mu ndirimbo zo kwibuka ndetse n’izivuga ubutwari bw’Inkotanyi, akaba n’umwe mu Banyarwanda bamaze gukorera ibitaramo byinshi i Burayi muri gahunda yo kwibuka.

Perezida Kagame yabivugiye mu muhango wo gutaha umudugudu w’icyerekezo wa Karama mu murenge wa Kigali mu karere ka Nyarugenge, kuri uyu wa 3 Nyakanga 2019, watujwemo imiryango 240 igizwe n’abatishoboye ndetse n’abari batuye mu manegeka.

Perezida Kagame yavuze ko mu nyigisho ze zo kwemera Imana, nta hari iby’uko hari ibice by’isi byabereyeho gukena.

Yagize ati “Abenshi hano mwemera Imana, none se mwibwira ko yaremye isi, ikarema abantu ariko u Rwanda na Afurika ikabiremera guhora biraho biganya, bisabiriza, bikennye. Mwibwira ko Imana yaremye ibyo bice by’isi, ivuga ngo bimwe bimere neza ibindi bimere nabi! Jye mu nyigisho zanjye zo kwemera Imana ibyo nta birimo”.

Arongera ati “Mu nyigisho jyewe nzi zo kwemera, ni ukuvuga ngo muri wowe, muri jyewe harimo ubushobozi n’uburenganzira bwo kumera neza nk’uko abantu bakwiye kuba bamera neza aho baba bari hose. Igikenewe ni ubufatanye n’abandi ariko duhereye hano iwacu”.

Perezida Kagame yavuze kandi ko ubuzima bwiza ari ubwa buri Munyarwanda, bityo ko butagomba kugera kuri bamwe.

Ati “Ndashaka ko buri Munyarwanda wese agira ubuzima bwiza, agezwaho ibyiza bimuteza imbere kandi afitemo uruhare. Uko ni ko tuzaba dushingira ku ijambo ‘kwibohora’, ariko noneho tukagira ibikorwa kurusha amagambo, ni byo twifuriza Abanyarwanda, ni rwo rugamba turimo kuko urundi rwarangiye”.

Izo nzu zatujwemo abo bantu ni inzu zigezweho zirimo n’ibikoresho byose, hakaba hari izifite agaciro ka miliyoni 22.4Frw kuri imwe n’iza miliyoni 19.8Frw, zigatandukanywa n’ingano yazo bitewe n’umubare w’abazitujwemo.

Perezida Kagame yakomeje asaba abahawe inzu muri uwo mudugudu kuzifata neza, bakazigirira isuku ariko iyo suku igahera ku mibiri yabo, cyane ko bafite ibikenerwa byose birimo n’amazi meza.

Uwo mudugudu watujwemo imiryango 240 igizwe n’abari batuye mu manegeka ndetse n’abandi baturage batishoboye.

Ni umudugudu ugizwe n’inzu zo guturamo, ukaba kandi urimo ibyangombwa byose bikenerwa mu buzima bwa buri munsi nk’amashuri (inshuke, abanza n’ayisumbuye), isoko, ivuriro n’ibindi.

Ataha uwo mudugudu, Perezida wa Repubulika Paul Kagame yavuze ko yifuriza abatuye habi bose kuhava, ariko ko umuvuduko wo kubavanamo uzaterwa n’amikoro ndetse n’uburyo abamaze gutura heza bazaba bitwaye.

Asaba abaturage bahawe inzu zo kubamo kuzifata neza ndetse no kwifata neza ubwabo bagira isuku, kugira ngo batadindiza ingamba zo guteza imbere imibereho.

Perezida Kagame yagize ati ”Gutura heza ni byo nifuriza abantu bose badafite aho gutura, ariko umuvuduko uzaterwa n’amikoro hamwe n’uburyo abahawe ibi bikorwa babifata neza ndetse n’uburyo bifata neza nabo ubwabo”.

Yasabye abaturage batujwe muri uyu mudugudu kuzafata neza inzu bahawe, ariko bakanifata neza ubwabo, bakagira isuku n’imibereho myiza.

Ati “Birabanza bigahera ku bari muri ayo macumbi ko babanza bakayafata neza ubwabo. Amacumbi ntakabasenyukireho, muba mufite icyo mwakora ngo amacumbi atabasenyukiraho, wawundi wabonye icumbi agasubira aho yari ari, ibyo mubifite mu bushobozi bwanyu.

Namwe mukwiye kwifata neza ubwanyu, ntabwo wafata ikintu neza, utarifata neza ubwawe. Harimo amazi meza, mushobora kuyakoresha mu kuyanywa, kuyatekesha, ntimukibagirwe no kuyakaraba. Nibyo navugaga ko ibindi byose utabifata neza utihereyeho”.

Perezida Kagame kandi yasabye abaturage ko kugira ngo Kwibohora bigerweho neza, ibivugwa byose bigomba guhsyirwa mu bikorwa kuko ariw rwo rugamba Abanyarwanda bafite rwo kurwana.

Yagize ati “Abenshi hano ntimwemera Imana? Mwibwira ko Imana yaremye isi, ariko u Rwanda na Afurika ikabiremera guhora bisabiriza? Mu nyigisho zanjye zo kwemera Imana ibyo ntabwo birimo.

Mu nyigishio jye nzi zo kwemera, ni ukuvuga ngo muri wowe, muri jyewe harimo ubushobozi, uburenganzira, bwo kumera neza nk’uko abantu bakwitye kuba bamera neza aho baba bari hose”.

Mukangira Maria, umwe mu baturage batujwe mu mudugudu wa Karama, yavuze ko yari atuye mu manegeka, hagati ya Ruhurura ebyiri, kuburyo iyo imvura yagwaga yose yamunyagiraga n’abana be.
Yashimiye Perezida wa Repubulika kubw’inzu nziza yahawe, avuga ko ubu agiye kuva mu kiciro cya kabiri cy’ubudehe yari arimo, akajya mu cya gatatu.

Ati “Umunsi umwe nagiye ahubakwaga izo nzu, narazitegereje ndaturika ndarira! Nyakubahwa Perezida wa Repubulika, wampaye inzu nziza cyane y’icyitegererezo, wakoze cyane, nzahora nkubaha uri umubyeyi wanjye. Nabaga mu cyiciro cya kabiri, ubu ndahita njya mu cya gatatu, kugira ngo ubufasha mwampaga buhabwe n’abandi”.

Col. Rugazora yasobanuye ubutumwa bukubiye mu gitabo Perezida Kagame yasohoye

Hari mu gitaramo cyo gutegura isabukuru yo kwibohora ku nshuro ya 25, aho yibukije urubyiruko rusaga 500 rwari rwitabiriye, ko gukora cyane kandi rugakorera hamwe ruzamurana, ari wo musingi wo kwiteza imbere, nk’uko bikubiye mu mpanuro zo muri icyo gitabo.

Ashingiye ku ngingo ya mbere y’icyo gitabo, Col. Rugazora asanga Abanyarwanda bakwiye kurangwa n’ishyaka ryo gukunda igihugu kuva ukirimuto kandi ukagira intego.

Mbere y’igitaramo cyo Kwibohora hatangijwe urugendo ruhuriweho n’urubyiruko rwo mu Karere ka Nyanza

Col. Rugazora avuga ko icyatumye yongera kwishimira na bagenzi be bafatanyije urugamba rwo kubohora igihugu, ari ukugira umuyobozi ufite intego kandi uhora atanga impanuro zuzuye ubwenge, kandi ko ibyo yababwiye byose bigaragara buri gihe bishyirwa mu ngiro.

Asobanura ingingo ya mbere y’icyo gitabo cyanditse mu rurimi rw’icyongereza avuga ko impanuro ya mbere ivuga ko iyo ugeze ku kintu wavunikiye uhora ubyishimira, kandi ko bidakwiye ko umuntu yishimira icyo abonye atavunitse.

Agira ati “Twishimira ko urugamba rwo kubohora igihugu cyacu twarurwanye nk’Abanyarwanda, nk’abana b’u Rwanda ndetse benshi muri twe ntabwo twari tuzi u Rwanda, kuko hari abavukiye mu mahanga ari impunzi.

“Iyo tubonye uyu munsi igihugu cyacu gitera imbere, byuzuza neza intego Umuryango FPR Inkotanyi yashyize imbere ngo irwanire kubohora igihugu cyacu, ntabwo twashyize amaboko mu mifuka ngo dutegereze ak’imuhana kazaza imvura ihise”.

Umukuru w’igihugu kandi agaragaza mu ngingo ya kabiri, ko kugira ngo ugere ku ntego ugomba kubanza gusobanukirwa n’uwo uri we kandi ukabyemera kuko ari bwo umenya inzira ucamo ushaka kugera ku cyo wifuza.

Guverineri Gasana yari yitabiriye igitaramo

Perezida Kagame na we asaba urubyiruko gutekereza icyo rwakora ku giti cyarwo

Ukurikije ingingo umukuru w’igihugu Paul Kagame yagejeje ku rubyiruko rukoresha imbuga nkoranyambaga ndetse n’abanyamkuru bari bitabiriye ikiganiro cyo gutegura isabukuru ya 25 yo kwibohora kandi, asa nk’unenga kuba urubyiruko rugikomeje gusaba gufashwa kubona icyo rukora aho kugaragaza icyizere rwifitiye mu byo rushoboye kwikorera.

Agira ati “Urubyiruko ntirwari rukwiye gutegereza kubwirwa ibyo rugomba gukora, mukwiye guhora mutekereza ku giti cyanyu icyo mwumva mwabasha gukora, ibyo wiyemeje gukora byaba byiza cyane kurusha kuba uri gukora ibyo wabwiwe n’abandi.

“Muhere aho ngaho, uko urubyiruko rugenda rukura niko rukwiye kugenda rubona icyo rwakora cyaruteza imbere cyarugirira akamaro, ku giti cyarwo, umuryango, n’igihugu muri rusange. Mukomeze mwibaze ku cyo mwe ubwanyu mwakora, abo mwagikorana, n’aho mwagikorera”.

“Mukomeze muri uwo murongo, byagera aho mukibonera ibyo mwariho munsaba, abo mujya muntumaho, ngo urubyiruko urubyiruko…, imvugo urubyiruko ahubwo yamaze kuba nk’ indirimbo, urubyiruko imbaraga, abayobozi b’ejo hazaza, nabyo ni byiza, ariko imvugo nk’izo dukwiye kuzibyaza mo umusaruro ufatika”.

Abayobozi b’Akarere ka Nyanza n’Ingabo na bo bitabiriye urugendo

Nyuma y’izo mpanuro urubyiruko rwo mu Karere ka Nyanza rugaragaza ko rugiye gusubiza amaso inyuma, rukarushaho kunyurwa n’ibyo rufite kandi rugasigasira ibyagezweho, rugamije gutezwa imbere n’ibyo ubwarwo rushoboye gukora.

Clementine Uwamaliya wiga muri Kaminuza ya UNILAK ishami rya Nyanza, yagaragaje ko yanyuzwe n’ibiganiro byabakanguriye kuva mu bujiji bubahatira kwishora mu biyobyabwenge n’imibonano mpuzabitsina idateguwe ituma babyara imburagihe.

Agira ati “Dukwiye kuva mu magambo tugashyira mu bikorwa ibyo tuvuga ko turi imbaraga z’igihugu, tukareba kure dusigasira ibyagenzweho ari nako tunareba ibyo dukwiye kuba dukora”.

Kamanzi Peter uyobora umuryango w’abanyeshuri ba UNILAK avuga ko nk’abanyeshuri bari kurangiza Kaminuza badakwiye gutekereza kuzataha bajya gutegera Leta amaboko, ko ahubwo ubumenyi bwo ku ishuri buzabafasha kwiteza imbere bihangira imirimo.

Agira ati ”Ntabwo twagendera ku byo kuvuga ko Leta yadufasha gusa, twe ubwacu dukwiye kwiha ijambo nibwo tuzaba tugaragaje ko dushoboye, nkeka ko dukwiye kureba ibyo twakora tukihangira imirimo nibwo tuzaba twihesheje ishema n’igihugu cyacu muri rusange”.

Urubyiruko rw’abanyeshuri n’abamotari bitabiriye urugendo rwo Kwibohora

Ibi biganiro byabereye muri Kaminuza ya UNILAK ishami rya Nyanza, byari byateguwe mu gitaramo cyo kwibohora ku nsanganyamatsiko igira iti: “Kwibohora k’u Rwanda, Impamvu yo kubaho kwacu”.

Umuhanzi Emmery Gatsinzi wamenyekanye ku izina rya Riderman cyane cyane mu njyana ya R&B, ni umwe mu bahanzi bazasusurutsa abantu mu gitaramo cyo kwibohora 25.

Asaba urubyiruko ko mu gihe u Rwanda rwitegura kwizihiza ku nshuro ya 25 umunsi wo Kwibohora, bagomba kurangwa n’umutima wo gukunda igihugu no gusigasira ibyagezweho.

Riderman aragi ati “Kwibohora ni byiza, urubyiruko ntirugahe umwanya mwinshi abashaka kubashora mu bibi, ahubwo ruharanire gusigasira ibyiza byagezweho runabungabunga ubusugire bw’igihugu, bitandukanya n’abashaka kwangiza ibyagezweho”.

Mariya Yohana, ni umuhanzikazi wamenyekanye cyane kubera indirimbo ye “Insinzi” irata ubutwari bw’ingabo z’igihugu.

Mariya Yohana avuga ko mu gihe u Rwanda rwitegura kwibuka ku nshuro ya 25, abanyarwanda cyane cyane urubyiruko bakwiriye kwigira ku bandi bari mu kigero cyabo bafashe iya mbere mu kubuhora igihugu cyabo.

Mariya Yohana aragira ati “Urubyiruko rumenye amateka y’uko u Rwanda rwabohowe n’urubyiruko kubera ubwitange bwo gukunda igihugu. Ndasaba urubyiruko gukunda iguhugu babe banakwitangira igihugu cyabo, kugira ngo agahinda k’ubuhunzi ntikazongere kubaho ukundi.

Kwibohora bibe isomo kuri buri wese, kuko ukunda iwabo agomba gusigasira ibyagezweho akabirinda ikibi icyo ari cyo cyose”.

Umuhanzi Ruhumuriza James wamenyekanye ku mazina ya King James nawe ni umwe mu bahanzi bazitabira igitaramo cyo Kwibohora 25.

Mu kwitegura ibirori byo kwibohara, King James asaba urubyiruko gusigasira ibyagezweho nyuma ya Jenoside yakorewe Abatusti mu Rwanda mu mwaka 1994.

Aragira ati “Ni byiza kuba buri muntu wese abasha kuba yagira ijambo, twaribohoye. Hari ibyagezweho kandi hari n’ababikoze, rero urubyiruko ubu ni uruhare rwacu kubibungabunga no kubirinda umwanzi wese washaka kubihungabanya”.

Muri iki gitaramo cyo Kwibohora 25 kandi hazanagaragaramo umuhanzi Bruce Melodie.

Nawe arasaba urubyiruko kudatwarwa n’ikoranabuhanga cyangwa ibindi biva ahandi, ngo birengagize gusigasira ibyiza bagezeho.

Bruce Melodie ati “Nyuma y’uko hari abitanze bakabohora igihugu cy’u Rwanda, hari byinshi twagezeho, ni ngombwa rero ko nkatwe urubyiruko twakagize uruhare mu gusigasira ibyiza byagezweho”.

Umuhanzi Clarisse Karasira, wamenyekanye mu ndirimbo zirata umuco nyarwanda, nawe azitabira iki gitaramo.

Nyuma yo gushyira hanze indirimbo ‘Imitamenwa’ irata ubutwari bw’ingabo z’u Rwanda mu kubohora igihugu, mu kwizihiza umunsi wo kwibohora ku inshuro ya 25, kuri we asanga ari uruhare rw’abahanzi kurata ibigwi by’ingabo zabohoye u Rwanda.

Karasira aragira ati “Abanyarwanda bakwiye kujya buri gihe bazirikana intwari zatanze ubuzima bwazo mu kubohoza igihugu, ndetse n’abakomeje gusigasira ubusugire bw’igihugu burangwa n’imiyoborere myiza ndetse n’iterambere rusange. Abanyarwanda bakwiriye gushyira imbaraga mu gukomeza kubaka igihugu”.

Abahanzi nyarwanda bazitabira iki gitaramo cyo kwibohora ku nshuro ya 25 kizaba tariki ya 4 Nyakanga harimo, Riderman, Muyango, Mariya Yohana, Sgt. Robert, Bruce Melodie, King James, Charly na Nina, Buravan, Clarissa Karasira, Nsengiyumva, ndetse bikaba bivugwa ko hari n’umuhanzi uzaturuka mu karere u Rwanda Ruherereyemo.

Charly na Nina nabo bazitabira igitaramo cyo Kwibohora25

Mu kiganiro kigamije gutegura isabukuru yo Kwibohora ku nshuro ya 25 cyabaye kuri uyu wa 02 Nyakanga 2019, Umukuru w’Igihugu yatangarije abanyamakuru hamwe n’urubyiruko rw’Abanyarwanda n’abanyamahanga bakoresha imbuga nkoranyambaga, ko hakiri urundi rugamba.

Avuga ko mu myaka 25 ishize igihugu cyarimo kwiyubaka, ariko ko hakomeje urugamba rwo gusobanurira abanyamahanga impamvu y’amahitamo y’Abanyarwanda atandukanye n’ubushake bwabo.

Perezida Kagame ati “Kugeza ubu umuryango nyarwanda ufite ibyiyumvo by’icyizere, kugira icyo watunga n’ejo hazaza, ndetse no kuva ku kutagira amikoro abantu bagatangira ibindi bihe bikomeye”

Umunyamakuru wa KT Press, Edmund Kagire, yabimburiye abandi mu kubaza ikibazo

“Muri make twarwanye intambara imwe ikaba isa n’iyarangiye, ariko hari indi yo gukomeza kugaragaza no gusobanura ikintu cyose dukoze”.

“Biragaragara ko ibintu byose twagiye dukora byaba bitarabaye byiza imbere y’andi mahanga, hari abatekerezaga ko twakora ibintu mu buryo butandukanye n’ubwo twe twabikozemo”.

“Ni mu gihe twebwe twabonaga ko ibyo dukora ari byo bidukwiriye kandi bitubereye, ni yo mpamvu rero hagiye habaho uko kutumvikana kw’impande zombi”.

Perezida Kagame avuga ko hari Abanyarwanda babarirwa muri za “miliyoni zigera nko muri eshatu” bari barahajejwe hanze y’igihugu ndetse n’akarengane gakomeye kagaragaraga mu gihugu imbere.

Mu bitabiriye ikiganiro cyatanzwe na Perezida Kagame hari uwamubajije ikintu kimushimisha kurusha ibindi, amusubiza ko ashimishwa no kubaho ndetse no kwitanga aharanira buri gihe icyageza u Rwanda ku byiza.

Perezida Kagame asaba urubyiruko kudategereza guhabwa amabwiriza y’icyo rugomba gukora, ahubwo ngo umuntu wese ufite icyo ashoboye kiri mu nyungu z’abandi, ngo afite inshingano zo kukigeraho atitaye ku bamutera ubwoba.

Akomeza asaba Abanyarwanda kwirinda gukomeza kubeshwaho n’inkunga, ahubwo ko iyo bahawe ngo igomba kubahesha ubushobozi bwo kutazongera gufashwa.

Ati “Hari ibitagombera guhabwa inkunga kugira ngo bikorwe, nk’ikijyanye no kwita ku isuku”.

Perezida Kagame avuga ko muri iyi myaka 25 ishize ubukungu bwagiye buzamuka ku muvuduko yishimira, ariko ko hatagomba kubaho kwirara.

Yolanda MUKAGASANA

Mu burere nabonye nkiri muto, nigishijwe no gushimira uwangiriye neza. Nibaza ko ari umuco wacu urimo ukendera nitutawuhagurukira. Nimunyemerere rero nshimire Inkotanyi ineza yandutiye byose muri 1994 kuko hashize imyaka 25, izina ryanjye ritanditse ku Rwibutso.

FPR mwebwe Nkotanyi z’icyo gihe, ndabashimira byimazeyo. Nari mfite ivuriro ryitwaga « Mpore » natangiye muri 1992 ku Cyivugiza. Nabwiraga Mpore abo twari dusangiye amateka, nyamara ntibagiwe n’abandi.

Umurwayi wese wahansanze yatashye yorohewe kubera ubumuntu yahasanze. Umubyeyi yarahabyariraga, igikoma cya mbere kikava iwanjye. Ariko 94 igeze bose barabyibagirwa, iyo FPR itabaho nanjye mba naribagiranye.

Mpigwa bukware n’abo nashubije ubuzima, uwansekeraga arampunga, uwansangaga ngo muvure arampiga ngo anyambure ubuzima, Jye yibagirwa aho namukuye ati ‘ntaramubona sinaruhuka’ Ati ‘Iyo Nyenzi Yolanda tutayibonye Inyenzi ntitwabamara.’

Ariko ntibatumaze nubwo hasigaye ngerere, kuko Inkotanyi zagobotse. Bangize umupfakazi narabavuye, bangira icyo bo bise incike mbaha urubyaro. Sinari Imana ngo ndarema impinja nyamara bo biciyemo impinja mu babyeyi. Kandi gupfa uboshye atari ikintu umubyeyi aba asaba kubohoka. Inzirakarengane bahitanye, zaringinze biratinda ahubwo uvuze bakamukwena. Ariko abicanyi uwababaza icyo impinja mwazihoye mwabibonera igisubizo?

Nkotanyi mwabonye byinshi bibi, nyamara mwari urubyiruko. Bamwe mwasanze iwanyu ari umuyonga, musiga imiryango mirisanga. Babagize urwitwazo ngo inyangarwanda zararuteye, nyamara murubohora.

Nkotanyi ko mwabonye byinshi, ndetse hari na bamwe muri twe mwarushije, bamwe muri twe bakavurwa ihungabana, mwe harya ni nde waribavuye ? Mwebwe se ntimwari urubyiruko? Ibyo ntawabitekereje, mwarumiwe murarekerera.

Na ya ntore izirusha intambwe, umugaba wanyu yo kabyara, sinzi icyo namubwira. Burya hari amagambo abura uko avugwa, nyamara umutima ubitse byinshi, ugahitamo kwicecekera, bagakeka ko udatekereza, kuko ntacyo umunwa wasohoye.

Nkotanyi z’amarere, uwavuga ubumuntu bwanyu muri biriya bihe bya Jenoside, uretse kubashimira ko mwabohoye igihugu, ibindi sinabibonera amagambo.

Jye mbashimira iminsi mwanyongereye ngo mbeho, umwanzi akabona ko bishoboka. Umutima muntu mwanyeretse, n’abampigaga wabagezeho, ariko se bamwe ubu barabizi?

Iyo mubona n’uyu munsi bamwe bagifite ipfunwe ryo kutarangiza akazi bari biyemeje nyamara ntawe mwibagiwe kwereka umutima muntu ndetse kugeza n’uyu munsi kubona bakoresha imbaga nyarwanda, ikibagirwa igihango, ikibagirwa ko tuva inda imwe? Nimukomeze urukundo mwerekanye, mukomeze ubutwari bwabaranze, Imana ihoze urwa Gasabo.

Rubyiruko namwe mutabibonye, nimumenye kandi musigasire amateka yanyu, ubashyiramo urwango mumugendere kure, kuko ugendana urwango muri we byanga bikunda ni we rugaruka, akazasamwa n’igihango, kuko urwango rumunga umutima.

Iyo ubyutse ukagenda uhekenya amenyo wibuke ko ari ayawe atari ay’uwo wanga. Mugere ikirenge mu cya bakuru banyu, namwe mube Inkotanyi mu butwari no mu rukundo.

Gukotana si ukurwana, kuba inkotanyi ni mu mutwe wawe, ukanga umugayo n’ubutindi, ukanga icyagusubiza inyuma, kandi kuba inkotanyi nyayo ni ukugira umutima muntu ukagirira neza umwanzi wawe, ukamwereka inzira y’ubumuntu, kuko ntabwo aba acyifitemo.

Dore mubayeho neza mu gihugu cyiza, nimusigasire amahoro mutayasinda. Muve mu biyobyabwenge mutere imbere kuko utatera imbere wayobye ubwenge.

Mukundane mukunda igihugu nk’umubyeyi wabibarutse, mureke icyatuma mudatera imbere. Mukotanire kuva mu bujiji, mukotanire kuva mu bukene, mukotanire kwiha agaciro, mukotanire gukomeza igihugu, mugiheshe icyubahiro kitagira umupaka.

Iki gihugu muzabyariramo mukuzukuruza, mukagira ubuvivi n’ubuvivure, muzarage abana ibitabananiye, mubarage ibisubizo aho gusiga ibibazo, musige umugisha aho gusiga umuvumo, musige izina aho gusiga umugani.

Abarokotse bagenzi banjye, bavandimwe dusangiye aka agahinda, nimwirinde ubaca intege. Nimwirinde ugoreka amateka, ngo iyo inkotanyi zidatera ntitwari gushira, nk’aho ubwicanyi bwasimburanye mu Rwagasabo, inkotanyi zari zihari. Ntitwiyibagize ko abenshi muri bo bari bataranavuka

Ngo iyo zidahanura indege, nyamara ntitwiyibagize, ese ko nta wari ukirota kunyura i Kanombe, izo nkotanyi zanyuze he? Twigwa mu mutego w’abatindi bavuga ko abacu bazize amakosa yacu. Agashinyaguro ntaho karajya, ahubwo tujye dushishoza, kandi ntitwirengagize amateka kuko ibyabaye byageragejwe kuva kera. Ntitukirengagize ukuri tukuzi, intimba ntizadutere kuba intati.

Nkotanyi bana b’u Rwatubyaye,
Muragaseka buri gitondo
Murakabyara mwororoke, inkotanyi zibe twese
Murage ubutwari abo rwibarutse
Muragahorana amahoro n’amahirwe,
Muragahorana amata ku ruhimbi

Mwatumye Gihanga asekera u Rwanda
Ikiguzi mwatanze ntawe utakibonye
Abana benshi batabaye ntibatabaruke
Ikiguzi nk’icyo cyahwana n’iki?
Ndabibuka Nkotanyi z’amarere
Murwana muhetse impinja

Ndabibuka Nkotanyi z’amarere
Mwikoreye abo mwarokoye
Ndabibuka nkotanyi z’amarere
Mudatoranya abo muvura
Nidukomeze urugamba rwo kutubohora

Igihe mugihari amahanga aradusanga
Igihe mugihari turatera imbere
Igihe mugihari Umutekano ni wose
Igihe mugihari ubukene burahunga
Igihe mugihari ntiduhungabana
Igihe mugihari dukingiwe n’ingabo.

Nimukomeze mutubohore ibikituboshye
Ubukene n’ubujiji biratugose, mutubohore no mu myumvire birakenewe
Mukomeze mutubohore ubukene n’urwango byadusabitse
Mutubohore Abanyarwanda umutima wanga twambarire gukunda,
Dukunde urwatubyaye mugongo mugari uhetse twese
Tuzagire umunsi mwiza wo kwibohora

Yolanda MUKAGASANA

Ingoro y’inteko ishinga amategeko mu isura nshya

Kugeza ubu, uretse ‘Kigali Convention Center’, nta yindi nzu ivugwa cyane aho ku Kimihurira itari iyo nzu y’icyicaro cy’inteko ishinga amategeko, imaze ukwezi kurenga isizwe amarangi yera.

Ubu, usanga hari abavuga batebya bayigereranya n’inzu irimo ibiro bya Perezida wa Leta zunze ubumwe za Amerika ‘White House’, nk’uko bivugwa na Ngarambe Emmanuel, ukora umwuga wo gutwara abantu muri taxi voiture.

Ngarambe mu rwenya rwinshi yagize ati, “Ubu noneho natwe dufite “White House” yacu ”.

Mu masaha ya nijoro ni uko iba igaragara

Iyo nzu yahoze yitwa ‘Conseille Nationale de Developpement (CND)’, imaze imyaka makumyabiri n’itanu itarasigwa amarangi yera. Hari igihe yasizwe irangi, ariko igumana amabara yari ifite mu gihe igihugu cyabohorwaga.

Hari abantu batandukanye bavuga ko bishoboka ko iyo sura nshya y’inzu ikoreramo inteko ishinga amategeko, igaragaza ko u Rwanda rumaze kwiyubaka nyuma yo kuva muri Jenoside.

Iyo nzu kandi ni yo ya mbere yacumbikiye abasirikare 600 b’Inkotanyi ba Batayo ya gatatu y’ikitwaga ‘Rwanda Patriotic Army (RPA)’, abo bakaba baragize akamaro gakomeye cyane kuko uretse kurinda abanyapolitiki bari kumwe muri iyo nzu, banarokoye ibihumbi by’Abatutsi bicwaga muri icyo gihe.

Ku itariki 3 Nyakanga 2019, biteganijwe ko hazerekanwa filimi mbarankuru yiswe “The 600” cyangwa se “Ba 600” ugenekereje mu Kinyarwanda, iyo filimi ikaba igamije kwereka Abanyarwanda uko iyo Batayo yitwaye mu gihe cya Jenoside yakorewe Abatutsi mu 1994, ndetse n’uko izo ngabo muri rusange zagejeje Abanyarwanda ku kwibohora n’umutekano bafite uyu munsi.

Nk’uko bitangazwa na Richard Hall, watunganije iyo filimi, “The 600 ni ingenzi cyane kuko ni filimi igamije guha icyubahiro abitanze ku rugamba, hazirikanwa ubutwari bwabaranze, ndetse ni no kuzirikana abaguye muri Jenoside yakorewe Abatutsi.”

“Ikindi kandi ni filimi igaragaza isano yari hagati y’abasirikare ba “RPA” n’abaturage bageragezaga kurokora, icyo kikaba cyari kimwe mu bikorwa byari bigoye mu rwego rwa gisikirikare, kuko bakijyanishaga no guhagarika Jenoside.”

Ingoro y’inteko ishinga amategeko, uyirebeye ahitwa ku Gishushu

Uko abo basirikare 600 bageze muri iyo nzu, ubu ikoreramo inteko ishinga amategeko, amateka agaragaza ko ku itariki 28 Ukuboza 1993, Batayo igizwe n’abasirikare 600 batojwe neza, bahagurutse ku Mulindi wa Byumba, ahari icyicaro gikuru cya “RPF” baza i Kigali baherekejwe n’ingabo z’umuryango w’abibumbye zari mu butumwa mu Rwanda. (UN Assistance Mission in Rwanda “Unamir”).

Abo basirikare 600, ni bamwe mu bari bagize “RPA” yari iyobowe na RPF- Inkotanyi yatangije urugamba rwo kubohora igihugu mu 1990.

Nyuma yo gusinyana amasezerano yo guhagarika intambara na guverinoma yari ku butegetsi icyo gihe, byari byemejwe nk’uko byavugwaga mu masezerano ko RPF izahagararirwa ku rwego rwa 40%, hanyuma imyanya isigaye ikaba iya goverinoma yari ku butegetsi.

Gusa ibyo ntibyigeze bijya mu bikorwa, ahubwo izo ngabo zari ziyobowe na Lt. Gen. Charles Kayonga ubu uhagarariye u Rwanda mu Bushinwa, icyo gihe akaba yari afite ipeti rya “Lieutenant Colonel”, zatangiye kuraswa n’umutwe w’ingabo zari zishinzwe kurinda uwahoze ari Perezida wa Repubulika Habyarimana Juvenal.

Nk’uko bigaragazwa n’amwe mu mateka, ibisasu byaraswaga abo basirikare 600, byaturukaga i Kanombe ahari ikigo cya gisirikare gikomeye, gituranye n’ikibuga mpuzamahanga cy’indege cya Kanombe, ubu ni mu Karere ka Kicukiro.

Ibindi bisasu byaturukaga ku musozi wa Rebero, umusozi ubona ko witegeye Umujyi wa Kigali neza.

Nk’uko amakuru aturuka muri “RDF” (Rwanda Defence Force), abigaragaza, ibyo byakurikiwe no kuraswa gukomeye kw’ingoro y’inteko ishinga amategeko, kandi ni yo yari icumbikiye abasirikare ba ‘RPA’.

Kuri ubu hari ikimenyetso (monument) cy’imbunda ihanura indege (The 12.7 mm anti-aircraft gun), kiri hejuru y’ingoro y’inteko ishinga amategeko.

Nk’uko bigaragazwa n’amakuru aturuka mu ishyinguranyandiko ya RDF (archives), iyo mbunda yafashije cyane mu guhangana n’ibisasu byaraswaga bivuye mu birindiro byavuzwe haruguru, icyo gihe byari bifitwe n’ingabo za Habyarimana.

Umwe mu bakoreshaga iyo mbunda yari hejuru y’inteko ishinga amategeko, ni uwitwa Rwabinumi David wagiye mu kiruhuko cy’izabukuru afite ipeti rya “Majoro”, akaba atarashoboye kugira ibyo atangariza Kigali Today. Birashoboka ko azatanga ubuhamya burambuye muri filimi “The 600”.

Maj. Rtd David Rwabinumi umwe mu basirikare 600 wakoreshaga imbunda yari hejuru y’inteko ishinga amategeko

Iraswa ry’iyo nzu yari icumbikiye abasirikare 600 ba RPA, ryatangiye mbere y’uko guverinoma y’agateganyo irahira. Ubwo indege y’uwari Perezida Habyarimana Juvenal yahanurwaga ku itariki 6 Mata 1994, Jenoside yahitanye ubuzima bw’Abatutsi barenga miliyoni itangira ubwo.

Kuva ubwo, Batayo ya gatatu ya RPA, yahanganye n’ibitero bikomeye, bituma inahindura ubutumwa yari ifite bwo kurinda abanyapolitiki, itangira guhagarika Jenoside.

Ibihumbi by’Abatutsi batangiye kujya ku nzu ikoreramo inteko ishinga amategeko, bahungiye ku basirikare ba “RPA”, abenshi muri bo bakaba bararokokeye muri iyo nzu.

Ishimwe Clementine yari afite imyaka 20, ubwo ababyeyi be bageragezaga guhungira muri iyo nzu ubu ikoreramo inteko ishinga amategeko.

Aganira na Kigali Today yagize ati ”Iryo joro twumvise urusaku rw’amasasu menshi, papa araza atubwira ko indege yari itwaye uwari Perezida Habyarimana Juvenal yarashwe. Icyo gihe twumvise ko iryo ari ryo herezo ryacu”.

Ishimwe yibuka ko, muri iryo joro nyine, Ise yagarutse, akabategeka kwitegura bakava aho bari batuye ubu hitwa “Sonatubes” mu Karere ka Kicukiro, bakajya ahakorera inteko ishinga amategeko muri iki gihe.

Yagize ati “Twaragiye muri iryo joro, kugeza tugeze ku nteko, abasirikare ba RPA badushyira mu nzu zari aho mbere yo kutujyana i Byumba mu gice cyari kirinzwe n’Inkotanyi. Uko ni ko umuryango wanjye warokotse”.

Ishimwe avuga ko ingoro y’inteko ishinga amategeko imuza mu bitekerezo buri munsi.

Yagize ati “Nkunda iriya nzu. Ariko cyane cyane amabara yayo y’umweru mashya avuga byinshi ku Kwibohora. Nkunda ririya bara ryera, rishushanya amahoro. Iriya nzu yaturokoye abicanyi. Ntitwabona uko twashimira ingabo zari iza RPA”.

Abayobozi bo ku Nteko ishinga amategeko, bo babwiye Kigali Today ko amarangi mashya yasizwe kuri iyo nzu, ntaho ahuriye no Kwibohora ku nshuro ya 25, uzizihizwa ku itariki ya 4 Nyakanga. Ibara ryera risobanura umutekano, ubwiza, isuku, bigaragaza uko u Rwanda rufatwa ku rwego mpuzamahanga.

Nubwo irangi risize ku ngoro y’inteko ishinga amategeko ryahinduwe, ibimenyetso by’amasasu yarashwe kuri iyo nzu biracyagaragara, kugira ngo bizakomeze kuba urwibutso rwo Kwibohora.

Uku ni ko yahoze isa itarasigwa amarangi mashya

Abato babyiruka, cyane cyane abakomoka kuri abo basirikare 600, ndetse n’abarokotse ayo masasu, bajye babireba bavuge bati “Harakabaho u Rwanda, harakabaho abarubohoye”.

Iki gikorwa gihuza ingabo zo mu karere kibaye ku nshuro ya kabiri kikaba kizwi nka EAC CIMIC (Civili Military Cooperation) Medical Outreach. Gihuriwemo n’ingabo zaturutse mu bihugu bya Kenya, Sudani y’Epfo, Tanzania na Uganda zose ziri mu bitaro by’Uturere tune two mu Ntara y’Iburasirazuba.

Abaganga bo mu Ngabo za Kenya bari kwakira abarwayi mu bitaro by’Akarere ka Rwamagana, ab’Ingabo za Tanzania bakaba bari mu bitaro bya Gahini mu Karere ka Kayonza, ab’Ingabo za Sudani y’Epfo bari ku bitaro by’Akarere ka Nyagatare naho abaganga b’Ingabo za Uganda bakaba baherereye ku bitaro by’Akarere ka Bugesera biri mu Mujyi wa Nyamata hose zifatanya n’Ingabo zo mu bitaro bikuru bya gisirikari by’u Rwanda.

Biteganyijwe ko iki gikorwa kizasozwa hizihizwa Umunsi wo Kwibohora ku nshuro ya 25 uzizihizwa tariki 04 Nyakanga 2019 mu Rwanda nk’uko byemejwe n’inama y’umuryango wa EAC ishinzwe ubutwererane yateranye tariki 06 Mata 2019 muri Tanzania.

Col Dr Jean Chrysostome Kagimbana ukuriye ibitaro bikuru bya gisirikari by’u Rwanda avuga ko aya ari amahirwe yo kugira ngo Ingabo zo mu karere zungurane ubumenyi butandukanye kandi zirusheho kwagura umubano.

Ahamagarira abaturage kugana aba baganga muri iki cyumweru ngo badacikanwa n’amahirwe kuko hari inzobere mu buvuzi butandukanye zibavurira ubuntu.

Mu Karere ka Rwamagana ahari ingabo za Kenya (KDF), Col Dr Justino Muinde avuga ko iki ari igikorwa kigenda kizenguruka mu karere hose nyuma y’uko umwaka ushize cyabereye muri Uganda, bityo kizakomereza n’ahandi mu mwaka utaha.

Mu karere ka Bugesera aho ingabo za Uganda zavuraga abaje ku bitaro bya Nyamata, Col Dr Joseph Asea waje aziyoboye yavuze ko igikorwa nk’iki kigamije kubaka ugushyira hamwe kw’ingabo zo mu karere kugira ngo intego z’Umuryango wa EAC zishobore kugerwaho.

Yongeraho ko biri kugenda neza mu buryo bwa kivandimwe kuko ngo biyumva nk’aho ari bamwe akanashimira igihugu cyabakiriye n’uburyo abarwayi bafashwa kubona serivisi baje gushaka.

Kuva muri Mata uyu mwaka, Ingabo z’u Rwanda zatangije ibikorwa by’Ingabo z’u Rwanda mu iterambere ry’abaturage kizwi nka ‘RDF Citizen Outreach Programme’ aho ingabo zikora ibikorwa bitandukanye bigamije iterambere ry’Abanyarwanda nk’uko zibisabwa n’itegeko.

Abarwayi bagera ku 137,900 ni bo biteganyijwe ko bazaba bamaze kuvurwa mu gihugu hose kugeza iki gikorwa gisoje.

Zimwe mu nzu zubakiwe abatishoboye mu karere ka Gasabo, zatashywe kuri uyu wa gatandatu

Ubuyobozi bw’aka karere buvuga ko nyuma yo gukemura ibyo bibazo hazakurikiraho urugamba rwo gushakira abaturage imirimo bakora bakibeshaho.

Rwamurangwa Stephen uyobora akarere ka Gasabo avuga ko ibikorwa byahawe abaturage kugira ngo bizihize isabukuru yo kwibohora ku nshuro ya 25, hatavugwa amagambo gusa kandi hari abantu bakiboshywe n’ubukene.

Agira ati "Twiyemeje ko mu mwaka utaha, Umunyarwanda wese wujuje ibyangombwa by’umunyagasabo atishoboye azaba yubakiwe inzu, aho mu mazu 317 twari twariyemeje, hasigaye 23 gusa ataratangira kubakwa".

Akarere ka Gasabo kavuga ko ibikorwa byose byatashywe kuwa gatandatu birimo inzu 74 kubakiye abaturage, inzu y’ababyeyi n’abana mu bitaro bya Kacyiru, hamwe n’ibyumba by’amashuri 19 bifite agaciro ka miliyari umunani.

Bamwe mu barokotse Jenoside yakorewe Abatutsi bahawe inzu mu murenge wa Jali

Rwamurangwa akomeza agira ati "Urugamba rukurikiyeho ni urwo gushakira abaturage imirimo yabafasha kwiteza imbere, harimo kubahangira imishinga y’ubuhinzi, ubworozi n’ahakorerwa imyuga inyuranye".

Akomeza avuga ko umwaka wa 2019/2020 uzarangira buri cyumba cy’ishuri muri Gasabo kitarenza abana 50, mu rwego rwo kugabanya ubucucike mu mashuri bwagiye bugaragara hirya no hino mu gihugu.

Urwunge rw’amashuri rwa Kagugu mu murenge wa Kinyinya, ni rwo rwari rufite ubucucike buri hejuru ku buryo ngo hari n’aho icyumba cyicarwamo n’abana 100.

Akarere ka Gasabo kavuga ko kavuguruye serivisi zo kubyaza no kwita ku babyeyi n’abana bavutse mu bitaro bya Kacyiru

Mu baturage bahawe inzu harimo uwarokotse Jenoside yakorewe Abatutsi mu 1994, Felicité Kabasinga w’imyaka 81, akaba avuga ko yari yarubakiwe inzu y’ibiti igasenyuka.

Nyuma yo guhabwa inzu Kabasinga yagize ati "Ubu nibwo nanjye navuga ko mbohowe kuko nari nkiboshywe no kutagira aho mba".

Abatishoboye bahawe inzu zo kubamo barimo abari batuye ahashobora kubateza ibyago, abarokotse Jenoside yakorewe Abatutsi ndetse n’abamugariye ku rugamba.

Akarere ka Gasabo kavuga ko nta cyumba cy’ishuri kigomba kurenza abana 50 mu rwego rwo kugabanya ubucucike

Uwitwa Rutayisire John wamugariye ku rugamba akaba yahawe inzu mu murenge wa Gikomero, avuga ko agomba gufasha abaturanyi be kugira icyo bakora bakiteza imbere.

Rutayisire agira ati "Tugiye kwishyira hamwe dushake icyo gukora cyaba ubuhinzi, ubworozi bw’inkoko, ububaji n’ibindi, turi abantu bafite ibitekerezo bizima ntacyo tuzaba".

Hari abaturage bagiye bava mu mujyi rwagati bajya gutura ahitaruye nk’i Gikomero, Rutunga na Jali bavuga ko kumenyera kuhatura bikibagora.

Ishimwe Hubert yanyoye urumogi yiga mu mwaka wa 5 w’abanza aza kwisanga Iwawa

Yabivuze kuwa gatatu 26 Kamena 2019, ubwo hasozwaga icyumweru cyahariwe kurwanya ibiyobyabwenge.

Ishimwe avuga ko yatangiye kunywa urumogi yiga mu mwaka wa gatanu w’amashuri abanza, abihawe n’uwari inshuti ye magara.

Avuga ko yatangiye barusangira, birangira amenye aho arurangura nawe atangira kurucuruza.

Avuga ko yataye ababyeyi ajya kwibera muri Kigali kubera ko bamucyahaga, ariko nyuma aza gufatwa ajyanwa mu kigo ngororamuco cya Iwawa, akaboneraho kugira ainama urubyiruko zo kwirinda ibigare.

Urubyiruko rwasabwe kwirinda ibigare by’inshuti mbi bishobora kubashora mu biyobyabwenge

Ati “Natangiye kunywa urumogi na za kanyanga kubera inshuti mbi nkiri muto. Navuye iwacu njya i Kigali, nabayeho nabi ndya ibyatawe mu kimoteri nyamara iwacu ntacyari kibuze. Urubyiruko rwirinde ibigare n’inshuti mbi.”

Ishimwe avuga ko avuye Iwawa yasubiye mu mashuri atitaye ko abo biganaga bari bayageze kure, ubu akaba yarasoje ayisumbuye.

Ubu ni umucuruzi woroheje, afatanya n’ubuhinzi bw’umwuga yigiye Iwawa.

N’ubwo ubucuruzi bwe n’ubuhinzi akora bitaratera imbere cyane, Ishimwe avuga ko ubu ibikorwa bye bifite igishoro kibarirwa mu bihumbi 500 by’amafaranga y’u Rwanda, kandi ko akomeje urugamba rwo gukora akiteza imbere.

Ishimwe kandi asaba Minisiteri y’urubyiruko ko yifuza kuzenguruka igihugu cyose abwira urubyiruko ububi bw’ibiyobyabwenge, kugira ngo barusheho kubyirinda.

Minisitiri w’Urubyiruko Rosemary Mbabazi, we avuga ko mugihe Abanyarwanda bitegura kwizihizwa ku nshuro ya 25 umunsi wo kwibohora, bakwiye kwibohora ingeso mbi zose zidindiza iterambere cyane cyane ikoreshwa ry’ibiyobyabwenge.

Minisitiri Mbabazi agira ati “Ubu turi mu rugamba rwo kwiteza imbere, turifuza ko twagira ubukungu bwiza ariko buzira ibiyobyabwenge, no kwibohora ku bukene, ku biyobyabwenge izo ngeso mbi zose zidusubiza inyuma nizo twibohoraho cyane.”

Musenyeri Alex Birindabagabo avuga ko kurandura ibiyobyabwenge bidakwiye kubamo imikino, ngo biharirwe Polisi y’igihugu gusa, kandi bireba buri Munyarwanda.

Musenyeri Birindabagabo avuga ko abantu bose bahagurutse ibiyobyabwenge byacika mugihe gito

Agira ati “Abanyarwanda twese duhagurutse, amadini yose agahaguruka, abaturage bose bagahaguruka ntabwo byatunanira mu gihe kitari kirekire twaba tubirangije.”

Musenyeri Birindabagabo avuga ko impamvu ibiyobyabwenge bidacika ari uko kubikumira byahariwe Polisi y’igihugu gusa.

Avuga ko ari umwana, umuturage n’ubuyobozi babigizemo uruhare ababicuruza babura aho babicururiza bakabicikaho.

Mu gusoza icyumweru cyahariwe kurwanya ibiyobyabwenge, mu karere ka Nyagatare hangijwe ibiyobyabwenge binyuranye, bifite agaciro ka miliyoni hafi 12 z’amafaranga y’u Rwanda.

Hangijwe ibiyobyabwenge bifite agaciro ka miliyoni zirenga 11