Imbuto y’indobanure itanga umusaruro ukubye kabiri iya gakondo

Imibare itangwa na RAB, ivuga ko iyo uhinze imbuto zatubuwe ubona umusaruro uri hagati ya toni 35 na 40 kuri hegitari imwe bitewe n’agace, mu gihe uwahinze imbuto abaturage bihunikiye atarenza toni 17 kuri hegitari.

Byatangajwe n’umukozi wa RAB warimo amurika iyo mbuto, mu imurikagurisha ku bikomoka ku buhinzi n’ubworozi, ryaberaga ku Murindi mu mujyi wa Kigali, mu kwezi gushize kwa Kamena 2019.

RAB kandi ivuga ko imbuto y’indobanure ishobora kwihanganira ibihe bibi nk’imvura nyinshi, izuba ryinshi ndetse n’izindi ndwara, kuruta imbuto zihunikwa n’abaturage.

Umukozi wa RAB Elias Munyankera, avuga ko impamvu itera abahinzi b’ibirayi kutabona umusaruro uhagije, ari uko bumva ko bashaka umusaruro mwinshi mugihe gito, bigatuma bahora bahinga imbuto imwe igihe cyose.

Yakomeje agira ati “Ni uko abaturage bagura imbuto ahantu hatandukanye, kandi batazi neza iyo mbuto inshuro ihinzwe.Iyo imbuto ihinzwe igihe kirekire ntishobora gutanga umusaruro ukwiriye nk’uko umuhinzi abishaka".

Elias Munyankera (ubanza ibumoso), agira abahinzi inama yo guhinga imbuto z’intuburano

Mu mbuto zituburwa harimo iyitwa kinigi, kirundo, izihirwe, nkunganire, kaze neza na twihaze.

RAB ivuga ko imbuto zitubuwe ziboneka kubatubuzi bakorera hirya no hino mu mirenge.

Izi mbuto zageragerejwe muturere dutandukanye harimo Musanze, Burera, Korongi, Nyamagabe, Rulindo, Rutsiro, Rwamagana, Kayonza, na Nyaruguru.

Elias Munyankera avuga ko kugira ngo umuhinzi akomeze kubona umusaruro mwinshi, agomba gukoresha ifumbire y’imborera n’imvaruganda icyarimwe, kuko atari byiza gukoresha imvaruganda gusa kuko ishobora gutuma umusaruro utuba.

Agira ati “Ifumbire y’imvaruganda ntabwo igomba gukoreshwa yonyine, igomba kuvangwa n’ifumbire y’imborera.”

Yibutsa abaturage kandi ko imbuto zahunitswe n’abaturage ziba zifite indwara nyinshi, kuburyo hari n’izo abaturage batera imyaka ikuma itarera.

Yagize ati “Iyo rero nk’izo mbuto uzisaruye ukongera ukazibika ukazazitera, ntushobora kuzabona umusaruro ungana n’uwo wabona warateye imbuto y’indobanure.”

Belise Irinatwe, umuhinzi wo mu karere ka Burera wahinze kuri izi mbuto z’intuburano, ahamya ko hari itandukaniro ku mbuto zatubuwe n’imbuto zahunitswe n’abaturage.

Hari abatuyrage bahise bafata umwanzuro wo guhinga imbuto yatubuwe

Agira ati “Izi mbuto z’intuburano nasanze zitanga umusaruro mwinshi kuko urugero nabaha, nageragereje mu murima nasaruragamo ibiro 600, ariko nasaruyemo ibiro 1500. Urumva ko ntaho umusaruro uhuriye”.

Undi muhinzi wo mukarere ka Burera mu murenge wa Gahunga, avuga ko na we agiye gushaka uko yahinga imbuto y’intuburano kuko yaguze ibirayi n’abaturage bigera kuri toni, akaba nta n’biro 400 yigeze asarura.

Imodoka nini ziraba zitegereje ko imirimo yo kubaka irangira

Nta gihe kizwi cyatangajwe uyu mupaka usanzwe urangwa n’urujya n’uruza rw’imodoka uzongera gufungurwa ku modoka nini (amkamyo), gusa hari amakuru avuga ko imirimo yo kuwubaka isigaye ishobora gutwara ukwezi kumwe.

Tariki ya 7 Kamena 2019, nibwo Ikigo cy’imisoro n’amahoro (RRA) cyatangaje ko umupaka wa Gatuna uhuza u Rwanda na Uganda mu Majyaruguru ufunguye by’agateganyo ku modoka nini, nyuma y’uko wari wafunzwe mu kwezi kwa Werurwe uyu mwaka, kubera imirimo yo kubaka umupaka uhuriweho n’ibihugu byombi (One Stop Border Post).

Uko gufungwa byatumye imodoka nini zakoreshaga uwo mupaka wa Gatuna zijya kuzenguruka zigakoresha umupaka wa Kagitumba n’uwa Cyanika, ibintu abacuruzi bo muri Uganda bavuze ko ari ukubera ibibazo bya politiki biri hagati y’ibihugu byombi.

Imodoka nini ziraba zikoresha umupaka wa Kagitumba n’uwa Cyanika

U Rwanda rwo rwavuze ko uko gufunga umupaka by’agateganyo ku modoka nini, bwari uburyo bwo korohereza abakora imirimo yo kubaka umupaka.

Ikigo cy’igihugu gishinzwe ubwikorezi (RTDA) kivuga ko ubu iyo mirimo igenda neza n’uko yateguwe, abubaka bakaba barongerewe igihe ngo bakosore ibintu bicye, byagaragaye mu minsi umupaka wari ufunguye by’agateganyo mu gihe cy’iminsi 10.

Umunyamabanga wa Leta muri Minisiteri y’Ububanyi n’amahanga ushinzwe ibikorwa by’Umuryango wa Afurika y’Uburasirazuba, Amb. Olivier Nduhungirehe, yabwiye Kigali Today ko “umupaka uzongera gufungurwa nyuma y’isuzuma”, gusa ntiyatanze igihe nyakuri uyu mupaka uzongera kwemerera imodoka nini kuhanyura bihoraho.

Umuyobozi mukuru wungirije ushinzwe ishami rishinzwe abasora, akaba n’umuvugizi wa RRA, Drocella Mukashyaka, yavuze ko RRA itegereje inama izahabwa na RTDA ku kuba imirimo yo kubaka umupaka yararangiye.

Ati “Twari twongeye gufungura umupaka wa Gatuna ku modoka nini mu gihe cy’igerageza ry’ibyumweru bibiri, hanyuma RTDA ikagenzura niba hari ibigomba gukosorwa mu myubakire, bigakosorwa.

Umupaka wa Gatuna uzafungurwa burundu ku modoka nini, nyuma y’uko ushyikirijwe Leta y’u Rwanda, gusa uracyakoreshwa n’ibinyabiziga bitoya".

Yongeraho ko kuri ubu, imodoka nini zikomeza gukoresha umupaka wa Kagitumba na Cyanika, mu gihe imirimo yo kubaka igikomeje ku mupaka wa Gatuna.

Umuyobozi mukuru wa RTDA Imena Munyampenda, yabwiye Kigali Today ko hari ibintu bicye bikeneye gukosorwa ku myubakire y’umupaka wa Gatuna.

Ati “Ni imirimo ya nyuma. Kubaka inyubako byararangiye. Ibisigaye ni ibintu bicye nka parikingi (parking)”.

Mu gihe imirimo yo kubaka igikomeje, ubu umupaka wa Gatuna ukora ku gipimo cya 30%, hatambuka imodoka nto n’izitwara abagenzi.

Leta y’u Rwanda kandi ikomeza kwibutsa Abanyarwanda ko hari amagana y’Abanyarwanda bakomeje gufungirwa muri Uganda mu buryo bunyuranije n’amategeko, mu gihe hari abandi birukanwe bakagarurwa mu Rwanda.

U Rwanda kandi rushinja Uganda kuba ishyigikira ikanatera inkunga imitwe igamije guhungabanya umutekano w’u Rwanda.

Ku bw’izo mpamvu, Leta y’u Rwanda kuva muri Werurwe uyu mwaka wa 2019, igira Abanyarwanda inama zo kutajya muri Uganda kubera umutekano wabo.

Nk’uko bisobanurwa na komiseri wungirije ushinzwe abasora muri RRA, Mukashyaka Drocella, aba bagabo bafatiwe mu kabari kitwa Abeza Village gaherereye mu Murenge wa Muhima, Akarere ka Nyarugenge, bafatanwa ibirango byerekana ko inzoga zasorewe imisoro izemerera gucuruzwa (tax stamps), ndetse bafatanwa n’imipfundikizo hamwe n’ibirango by’uruganda.

Mukashyaka yagize ati “Iperereza rirakomeje kuko ntabwo turagera ku ruganda ngo tumenye ingano y’izi nzoga ndetse n’ibirango by’ibikorano biri gukorwa.”

Yavuze kandi ko aba bantu uko ari babiri bagiye gukurikiranwa n’inzego zibishinzwe, bahamwa n’ibyaha bakabihanirwa n’amategeko.

Abafashwe ni Tugiramahoro Cyriaque ufite akabari kitwa Abeza Village ndetse na Theophile Dufatanye uvuga ko atari azi ibyo atwaye kuko we yari yahawe akazi ko gutwara ibintu.

Mu ijoro ryo ku wa mbere tariki 10 Kamena 2019, nibwo aba bagabo bafashwe. Theophile dufatanye, ni umwe muri aba bagabo.

Yagize ati ”Nafashwe ntumwe ibi bintu mureba hano mu gafuka ariko njyewe sinzi ikirimo, kandi sinzi n’ibyo ari byo kuko njyewe bampamagaye ndaza njya kuzana ibyo bari bantumye ariko icyantunguye ni uko nkigera hano nabonye abapolisi, bahita banyambikana amapingu hamwe na nyiri akabari”.

Cyriaque Tugiramahoro ahakana ibyaha aregwa, akavuga ko adakora inzoga, ahubwo ko inzoga agurisha azirangura muri Nyabugogo. Avuga ko atazi niba ari inkorano cyangwa atari zo cyakora ngo azirangura ahantu hemewe.

Komiseri wungirije ushinzwe abasora muri RRA avuga ko umucuruzi wese ugiye kugura ibicuruzwa nka biriya akwiye kubaza aho abigura niba byarishyuye imisoro ku byaguzwe kuko impapuro ziba zihari.

Ati “Aramutse abonye impapuro zitandukanye n’izo yabonye mbere icyo gihe yabaza impamvu, bitaba ibyo akaba yatanga amakuru kuri RRA”.