Emir Al Thani uyoboye igihugu cya mbere gifite umuturage ukize kurusha ahandi ku isi, yageze mu Rwanda ku cyumweru, agirana ibiganiro na Perezida wa Repubulika y’u Rwanda Paul Kagame ndetse abayobozi ku mpande zombi bashyira umukono ku masezerano y’imikoranire agera kuri ane.

Kuri uyu wa mbere, Sheikh Al Thani w’imyaka 38, ari kumwe na Perezida wa Repubulika y’u Rwanda Paul Kagame basuye Parike y’Akagera, ituwe n’inyamaswa eshanu z’ubukombe (Big five) ari zo, Intare, Inzovu, ingwe, Inkura n’imbogo.

Abayobozi barongojwe imbere na minisitiri w’intebe w’u Rwanda Dr Edouard Ngirente, mu gitondo cyo kuri uyu wa kabiri, baherekeje Sheikh Tamim bin Hamad Al Thani hamwe n’abandi bayobozi mu gihugu cye bari kumwe.

Abayobozi ku mpande zombi bashyira umukono ku masezerano imbere ya Perezida Kagame na Emir Al Thani

Ni Amasezerano y’imikoranire mu nzego enye ari zo; umuco, Siporo, Ubukerarugendo n’ubucuruzi ndetse n’iby’ingendo zo mu kirere.

Ni amasezerano yashyizweho umukono k’uruhande rw’u Rwanda na minisitiri w’umuco na Siporo, umuyobozi wungirije w’ikigo cy’igihugu cy’Iterambere, n’umuyobozi w’agateganyo w’urwego rw’igihugu rushinzwe ubwikorezi bwo mu kirere.

Mbere y’uko umunsi wa mbere w’uruzinduko rw’umuyobozi w’ikirenga wa Qatar urangira, Perezida Kagame yakiriye kumeza Emir Al Thani hamwe n’abandi bayobozi bakuru muri iki gihugu kitarangwamo umukene, kikaba gikungahaye kuri peteroli ndetse no kuri Gaz z’umwimerere.

Umuyobozi w’Ikirenga w’Igihugu cya Qatar (the Emir of Qatar) aje mu Rwanda mu ruzinduko rw’akazi rw’iminsi itatu. Akigera ku kibuga mpuzamahanga cy’indege cya Kigali i Kanombe, yakiriwe na Perezida w’u Rwanda, Paul Kagame.

Ibihugu byombi byahise bishyira umukono ku masezerano y’ubufatanye mu byerekeranye n’umuco, ibyerekeranye na siporo no mu birebana n’ubukerarugendo n’ibikorwa by’ubucuruzi ndetse bisinya n’amasezerano arebana n’ingendo z’indege hamwe n’arebana na sosiyete ya Qatar Airways.
Ayo masezerano yasinyiwe imbere y’abakuru b’ibihugu byombi.

Uruzinduko rwa Sheikh Tamim bin Hamad Al-Thani ni rwo rwa mbere agiriye mu Rwanda. Rukurikiye urwo Perezida Paul Kagame yagiriye muri Qatar mu mpera z’umwaka ushize guhera tariki 14 Ugushyingo 2018.

Urwo ruzinduko rwa Perezida Kagame rw’iminsi ibiri rwari rugamije kwimakaza umubano ushingiye ku bufatanye n’ubuhahirane hagati y’ibihugu byombi.

Muri urwo rwego rw’ubufatanye n’ubuhahirane, u Rwanda na Qatar basinyanye amasezerano ku by’ ingendo z’indege, ubutwererane n’ubuhahirane, kurengera ishoramari, ndetse n’amasezerano y’ubufatanye mu bukungu, ubucuruzi ndetse na tekinike.

Inteko Ishinga Amategeko y’u Rwanda yemeje ayo masezerano yashyizweho umukono hagati y’u Rwanda na Qatar.

Yakiriwe ku kibuga cy’indege na Perezida Kagame

Amafoto: Plaisir Muzogeye