Muri icyo kiganiro cyagarutse ku bibazo by’umutekano byabaye muri aka karere harimo Jenoside yakorewe Abatutsi mu Rwanda ariko bagaruka no ku ntambara za hato na hato zakunze kurangwa muri Congo mu myaka 25 ishize.

Perezida Tshisekedi yiyamamaza yasezeranyije abaturage ko icya mbere azakora ku ikubitiro ari ukurandura imitwe yitwaje intwaro ihungabanya umutekano wa Congo n’uw’ibihugu by’ibituranyi.

Umunyamakuru witwa Patrick Smith wari uyoboye ikiganiro yabajije Perezida Kagame icyo avuga kuri ayo masezerano ya Tshisekedi yo kurandura iyo mitwe no kugarura amahoro mu karere, mu gihe nyamara icyo kibazo kimaze igihe kirekire cyarananiranye, abazwa niba n’imiryango ihuriyemo ibihugu byo mu karere hari icyo yakora kuri icyo kibazo.

Perezida Kagame yabanje gushimira Perezida Tshisekedi umaze iminsi mu Rwanda, avuga ko hari icyo bisobanuye ku Rwanda, ku bitabiriye inama, ndetse no ku bandi batandukanye.

Yagarutse ku bibazo byaranze akarere u Rwanda ruherereyemo avuga ko kuri ubu ntawe ukwiye kubyikuraho ngo abigereke ku bandi, ahubwo ko ubu igikenewe ari uguhangana na byo no gushakira hamwe uburyo byarangira.

Yavuze ko abanyepolitiki n’abaturage b’ibyo bihugu bakwiye gukorera hamwe mu kurangiza ibyo bibazo no kugera ku mpinduka zifuzwa.

Ati “Ntitwabigeraho twirengagije impamvu nyamukuru z’ibyo bibazo zaba iza kera n’iza vuba zituma muri aka karere hakomeza kurangwa umutekano muke.”

Perezida Kagame yagarutse kandi ku banyapolitiki b’ibihugu byo muri aka karere, asobanura ko bagomba kumva igikenewe no guha ijambo umuturage mu bimukorerwa, ariko n’abayobozi b’ibihugu bagakorana kuko ikibazo cy’igihugu kimwe kigira n’ingaruka ku bindi bihugu.

Umukuru w’igihugu cy’u Rwanda yavuze ko ibyo bihugu byifitemo ubushobozi bwatuma bikemurira ibyo bibazo.

Ku byo Tshisekedi yemereye abaturage byo kurandura imitwe yitwaje intwaro, Perezida Kagame yagize ati “Tugomba kumwizera, kandi twiteguye gufatanya.

Perezida wa Repubulika ya Demokarasi ya Congo, Félix Tshisekedi, asabwe kugira icyo avuga kuri iyo mikoranire mishya yifuzwa mu karere, na we yemeje ko ibihugu byo mu karere bikwiye kubana neza.

Ati “Ibihugu byacu bizahora bituranye iteka n’iteka. Twebwe dufite inshingano z’igihe gito, ariko ibihugu byacu byo bizakomeza guturana.”

“Rero imirwano n’intonganya za hato na hato ntacyo bimaze, ni uguta igihe twakagombye gukoresha twiyubaka.”

Perezida Tshisekedi yavuze ko we na Perezida Kagame babonye igihe gihagije cyo kuganira, amufatiraho urugero rw’uko ari umuntu uharanira iterambere, kuruta guhora mu bushyamirane bwa hato na hato.

Ati “Uwo ni we nshakaho ubufatanye.”

Ku kibazo cy’imitwe yitwaje intwaro yiganje cyane cyane muri Congo, Perezida Tshisekedi yavuze ko muri rusange ntacyo barwanira ahubwo ko ari abantu bashakira amaramuko mu bikorwa by’ubugizi bwa nabi.

Yavuze ko hariho gahunda yatangiye yo gukura abo bantu muri ibyo bikorwa bitemewe birimo n’ubucukuzi bw’amabuye y’agaciro bagashyirwa mu buzima busanzwe. Icyakora na none yavuze ko hari imitwe imwe n’imwe iteye impungenge harimo nk’inyeshyamba za ADF zikomoka muri Uganda, avuga ko bisaba ko ibihugu byombi bizakorana mu kurangiza icyo kibazo.

Perezida Tshisekedi yavuze ko muri rusange ibihugu byo mu karere u Rwanda ruherereyemo bikwiye kureba ibyo bihuriyeho bikabibyaza umusaruro birimo nk’ikiyaga cya Kivu gishobora kubyazwamo Gaz Methane yafasha abaturage b’ibihugu bituriye icyo kiyaga. Yavuze no ku rugomero rw’amashanyarazi rwa Rusizi rwafasha ibihugu by’u Rwanda, u Burundi na Congo, ndetse no guteza imbere ubucuruzi hagati y’ibihugu byo mu karere.

Ati “Abaturage babyo bamaze imyaka amagana n’amagana babana, kandi bazakomeza kubana. Rero hari ibintu byinshi bafatanya bibyara inyungu. Ni yo mpamvu dukwiye guharanira kuzana amahoro n’iterambere.”

Perezida Tshisekedi yavuze ko uko biri kose ibihugu bigomba kubana neza kuko bizaturana akaramata.

Ku bibazo by’u Rwanda na Uganda, Perezida Tshisekedi yabajijwe niba Congo ntacyo yakora ngo ibihugu birusheho kubana neza.

Tshisekedi yavuze ko agirana ibiganiro n’abayobozi ku mpande zombi ariko ko bikiri ibanga. Yavuze ko hari ibibazo hagati y’ibihugu ariko ko bigomba gukemurwa kandi ko hari icyizere ko bitazafata intera yo hejuru.

Ati “Icyo dukeneye ni ukubaka ibiraro, aho kubaka inkuta hagati y’ibihugu byacu.”

Amafoto: Plaisir Muzogeye

Ni inama yanitabiriwe n’abakuru b’ibihugu barimo Felix Tshisekedi wa Repubulika Iharanira Demokarasi ya Congo, Perezida wa Ethiopia Sahle-Work Zewde, Perezida wa Togo Faure Gnassingbé, minisitiri w’intebe wa Cote d’Ivoire n’abandi.

Félix Tshisekedi ashyira indabo aho ibihumbi 250 by’Abatutsi bishwe muri Jenoside bashyinguye ku Rwibutso rwa Jenoside rwa Kigali

Tshisekedi yageze i Kigali ku cyumweru tariki 24 Werurwe 2019 maze mu gitondo cyo kuri uyu wa mbere asura Urwibutso rwa Jenoside rwa Kigali ruri ku Gisozi, rushyinguyemo ababarirwa mu bihumbi 250 bibishwe muri Jenoside yakorewe Abatutsi.

Ayobowe na Honoré Gatera, Umuyobozi w’Urwibutso rwa Jenoside rwa Kigali, Perezida Tshisekedi yasobanuriwe amateka ya Jenoside yakorewe Abatutsi, ingaruka yagize ku muryango nyarwanda ndetse n’intambwe u Rwanda rumaze gutera mu kwiyubaka muri iyi myaka 25 ishize Jenoside ibaye.

Guverinoma yiyise iy’abatabazi, yashyize mu bikorwa umugambi wa Jenoside yakorewe Abatutsi, imaze kuneshwa, abari bayigize biganjemo abateguye bakanashyira mu bikorwa umugambi wa Jenoside yakorewe Abatutsi, kimwe n’imbaga ya bamwe mu baturage bagizwe ibikoresho muri uwo mugambi, yahungiye muri DRC.

Perezida Félix Tshisekedi asobanurirwa amateka ya Jenoside yakorewe Abatutsi

Aba ni bo baje kuvamo umutwe witwaje intwaro wa FDLR ugamije guhungabanya umutekano w’u Rwanda. Uyu mutwe, umaze imyaka irenga 20 ukorera ibikorwa byawo bya gisirikare ku butaka bwa DRC.

Ibitangazamakuru binyuranye byo mu Rwanda no muri Uganda bimaze iminsi byandika ko ishyaka rya RNC rya Kayumba Nyamwasa na ryo rifite umutwe w’inyeshyamba witoreza i Minembwe muri DRC, mu mugambi wo guhungabanya umutekano w’u Rwanda.

Mu kiganiro n’abanyamakuru mu ntangiriro z’uku kwezi, Dr Richard Sezibera, Minisitiri w’Ububanyi n’Amahanga w’u Rwanda, yavuze ko Perezida Félix Tshisekedi, agaragaza ubushake bwo gukorana n’u Rwanda mu by’ubucuruzi ndetse no gukumira no guta muri yombi abashaka guhungabanya umutekano w’u Rwanda bari ku butaka bwa DRC.

Perezida Kagame yatanze ingero nke muri nyinshi z’uburyo hari ibicuruzwa byinshi biva mu Rwanda bigana ku cyambu cya Mombasa muri Kenya ariko byagera muri Uganda bikabuzwa gukomeza kandi nta mpamvu itangwa.

Yagize ati “Twari dufite imizigo ijya Mombasa. Kugira ngo tugereyo tugomba guca muri Uganda. Igisekeje, ni uko twembi (ndavuga u Rwanda na Uganda) tudakora ku Nyanja, ariko twebweho iyo dushatse gukoresha iyo nzira, dufungiranwa ubugira kabiri, kuko Uganda irongera ikadufungirana.”

“Imodoka zari zikoreye amabuye y’agaciro zigana Mombasa zafungiwe muri Uganda mu gihe cy’amezi atanu, dushatse kubaza ikibazo uko giteye mu bashinzwe imisoro, dusanga iyo mizigo yari yujuje ibisabwa. Tubajije na bagenzi babo muri Uganda na bo batubwira ko nta kibazo, ko bazemereye gukomeza urugendo.”

Yavuze kandi ko babajije impamvu zafashwe maze abazihagaritse muri Uganda bakavuga ko ari itegeko bahawe rituruka hejuru. Avuga ko abababwiye aya makuru atari n’Abanyarwanda ati “Abo nta n’ubwo ari Abanyarwanda, ni abashoramari b’abanyamahanga. Ni umushoramari w’umudage.”

Perezida Kagame kandi yatanze urugero rw’amata yaganaga muri Kenya maze agapfira mu nzira bitewe no kuyabuza gukomeza urugendo kandi nta mpamvu.

Ati “Hari abashoramari b’Abanyakenya barimo bajyana amata muri Kenya…, bakura amata mu Rwanda, muri Uganda n’ahandi. Ndibwira ko bafite ubushobozi bwagutse bwo kuyatunganya. Ayo mata yangiwe gukomeza urugendo muri Uganda hashira iminsi, bituma ibihumbi bya za litiro byangirika.”

Perezida Kagame yanagaragaje uburyo Abanyarwanda bakomeje gukorerwa iyicarubozo ndetse avuga ko ntako u Rwanda rutagize ariko Uganda ntigire icyo ikora.

Ati “Dufite amagana y’Abanyarwanda bafashwe bagafungirwa muri za gereza, amezi menshi ndetse n’imyaka muri Uganda. Ubu ntabwo barimo bacirwa imanza ahubwo bakomeje baborera muri za gereza muri Uganda. Urebye ni nk’aho Uganda iri kuvuga ngo ntimuze mu gihugu cyacu.”

Avuga ko bagaragarije iki kibazo Guverinoma ya Uganda kuva mu myaka ibiri ishize ariko ntihagire igikorwa. “Niba mufite Abanyarwanda bakoze ibyaha muri Uganda, mubikemure mu buryo bukurikije amategeko.”

Uretse no kuba nta butabera aba bantu bari guhabwa, yavuze ko nta n’ubwo bari kwemererwa gusurwa na ambasade. Ambasaderi ati “N’abandi ba dipolomate ntabwo bashobora kujya kubasura kuko bamwe muri aba bantu bafungiye muri za gereza zitazwi.”

Perezida Kagame kandi yasobanuye ku bijyanye no gufunga umupaka, yerekana ko u Rwanda rufite imipaka itatu iruhuza na Uganda, ariko umwe gusa akaba ari wo utari gukora uko bikwiye.

Yagize ati “Ni umwe gusa utari gukora ku buryo busanzwe kubera ibikorwa by’ubwubatsi. Urakora nko kuri 20 cg 30% kandi turizera ko mu byumweru bike uza kuba ukora bisanzwe. Ikibazo rero ni ubushake bwa politiki mbere y’uko biba ikindi.”

Ubwo u Rwanda rwarimo rwakira inama ku rujya n’uruza n’isoko rusange muri Afurika yabereye hano AfCFTA, nyuma y’iminsi ibiri Perezida Kagame yahise ajya muri Uganda.

Yagize ati “Nahise nsura Uganda. Ese muzi icyari kinjyanyeyo? Mu by’ukuri ni ugukemura iki kibazo ndi kuvugaho. Nagiye kureba Perezida wa Uganda ndamubaza nti ese ibi ni ibiki? Kuki ari uku biri kugenda? Nanaboneyeho kubwira abayobozi muri kiriya gihugu ibyari byaganiriwe mu nama hano.

Ndamubwira nti hari imishinga minini ireba Afurika iri kuganirirwa hariya ariko ibihugu byombi biri kugongana muri ibi bintu umuntu atabona n’uko asobanura. Ndamubaza nti ese kuki tutakorana ngo ibi bintu tubikemure kugira ngo twese twungukire muri ino mishinga iri kuganirwaho ku rwego rw’umugabane? Iyo ni yo mpamvu yari yanjyanyeyo ariko hari ibintu ntashobora gusobanura. Kuko byarakomeje.”

Yitabiriye inama mpuzamahanga y’abayobozi b’ibigo bikomeye (African CEOs Forum) ibera i Kigali kuva kuri uyu wa mbere tariki 25 Werurwe 2019 kugeza tariki 26 Werurwe 2019.
Iyo nama iraba ku nshuro ya karindwi.

Perezida wa Ethiopia Sahle-Work Zewde, ni we mugore wa mbere watorewe kuyobora icyo gihugu, akaba yaratowe ku itariki ya 25 Ukwakira 2018.

Amafoto: Plaisir Muzogeye