Perezida Kagame na Minisitiri w’intebe Narendra Modi bagabira abaturage ba Rweru Inka

Uwo muyobozi aherekejwe na Perezida Kagame basuye abaturage bo mu Murenge wa Rweru mu Mudugudu w’icyitegererezo, aho Minisitiri w’intebe w’u Buhinde Narendra Modi yari agiye kubagabira inka 200.

Narendra Modi amaze kugabira abo baturage yagize ati" Nanyuzwe n’igihe gito maranye n’abaturage ba Rweru, wari umusogongero w’ubuzima bw’icyaro mu Rwanda."

Nyuma yo gusura abo baturage Minisitiri w’intebe w’u Buhinde aherekejwe na Perezida Kagame bagiranye ikiganiro n’abashoramari bo mu bihugu byombi.

Minisitiri Narendra yanyuzwe n’umwanya muto yamaze mu Karere ka Bugesera

Minisitiri Narendra yababwiye ko ibihugu byombi bifite umugambi wo kuzamura ubukungu n’ubuhahirane, akaba abasaba kubigiramo uruhare kugira ngo bigerweho.

Ati" Ibihugu byacu bifite byinshi byageraho bifatanije. Dufite amahirwe menshi tugomba kubyaza umusaruro, cyane cyane mu cyaro ndetse no mu nganda nto".

Abaturage ba Rweru bakiranye ubwuzu abo bayobozi bombi

Nyuma yo kubonana n’abo bashoramari, Minisitiri w’intebe Narendra Modi yasoje uruzinduko rwe rw’iminsi ibiri yagiriraga mu Rwanda.

Yaherekejwe na Perezida Kagame ku Kibuga cy’indege cya Kanombe aho yahise akomereza urugendo rwe mu gihugu cya Uganda.

Minisitiri w’intebe Narendra Modi yunamiye abishwe muri Jenoside yakorewe Abatutsi bashyinguye mu Rwibutso rwa Jenoside rwa Kigali

Mu butumwa yatanze nyuma yo gusura urwo rwibutso, yavuze ko amateka yarubonyemo yamukoze ku mutima cyane, anashimira ubutwari bw’Abanyarwanda bwabafashije kwikura mu kaga Jenoside yakorewe Abatutsi yari yabasizemo.

Yagize ati" Jenoside yakorewe Abatutsi mu Rwanda ni ikimenyetso gikomeye cyerekana ububi bw’icyaha cyakorewe inyoko muntu. Ndashimira imbaraga Leta y’u Rwanda yashyizemo nkanashimira Abanyarwanda muri rusange bahisemo kwiyunga no kubaka amahoro. Imana ihe iruhuko ridashira abishwe."

Nyuma yo gusura Urwibutso rwa Jenoside rwa Kigali, uwo muyobozi yakomereje mu Karere ka Bugesera mu Murenge wa Rweru, aho ateganya kugabira imiryango yatujwe mu Mudugudu w’icyitegererezo wa Rweru inka 200.

Uwo muyobozi mu ijambo yagejeje ku Banyarwanda akigera mu Rwanda, yashimiye Perezida Kagame wimakaje inzira y’amahoro nyuma ya Jenoside yakorewe Abatutsi igahitana abasaga Miliyoni.

Iyo nzira ngo ni yo yabaye inkingi yo kwihuta mu iterambere u Rwanda rurimo, ari na yo mpamvu u Buhinde butazahwema gushyigikira u Rwanda muri iyo nzira y’iterambere rwahisemo.

Minisitiri Narendra yeretswe amateka yaranze Jenoside yakorewe Abatutsi

Yatanze ubutumwa bufata mu mugongo Abanyarwanda bunabaremamo icyizere cy’ejo hazaza heza

Perezida Kagame aganira na Minisitiri w’intebe w’u Buhinde Narendra Modi

Minisitiri Narendra yavuze ko kubaka amahoro byabaye inkingi yatumye u Rwanda rushobora gutera imbere mu buryo bwihuse nyuma ya Jenoside yakorewe Abatutsi, ubu rukaba rugana aheza.

Ibyo ngo bizatuma u Buhinde butazahwema gufatanya n’u Rwanda mu kwihutisha iterambere mu nzego zose.

Yagize ati” Ni amahirwe ko u Rwanda rwagize u Buhinde umufatanyabikorwa mu by’ubukungu. Tuzakomeza gutanga umusanzu mu iterambere ry’ubukungu bw’u Rwanda muri rusange twita cyane cyane mu kuzamura ubukungu bw’icyaro, ikoranabuhanga, itumanaho n’ibindi.”

Minisitiri Narendra yanavuze ko mu rwego rwo kurushaho gutanga umusanzu mu iterambere ry’u Rwanda, u Buhinde bazashyira imbaraga muri gahunda basanganywe yo guhugura Abanyarwanda benshi, bakabongerera ubumenyi n’ubushobozi muri gahunda zitandukanye z’iterambere.

Ibyo ngo bizatuma baza gushyira mu bikorwa ubwo bumenyi mu Rwanda bubyare umusaruro mu gihugu.

Uwo muyobozi kandi yanavuze ko mu biganiro byihariye yagiranye na Perezida Kagame, baganiriye ku bintu bishya u Buhinde bwashoramo imari mu iterambere ry’u Rwanda.

Muri ibyo harimo gutunganya ibikomoka ku mpu, ndetse no gutunganya ibikomoka ku Mata.

Mu rwego rwo guteza imbere ubucuruzi, Minisitiri Narendra yavuze ko yazanye n’abashoramari benshi, bakaba bafite gahunda yo guhura na bagenzi babo b’Abanyarwanda ku munsi w’ejo bakaganira ku buryo bateza imbere ubuhahirane hagati y’ ibihugu byombi.

Yagize ati” Ejo Njyewe na Perezida Kagame tuzahura n’umuryango mugari w’abashoramari bo mu bihugu byombi, tujye inama z’uko ubucuruzi bwatera imbere, kandi inama bazatugira tuzazishyira mu bikorwa .”

Ibiganiro hagati y’Abayobozi b’ibihugu byombi ni byo byabimburiye gahunda yo gusinya amasezerano y’ubufatanye

Muri gahunda Minisitiri w’Intebe Narendra Modi afite, harimo no kugabira abaturage batujwe mu mudugudu w’ikitegererezo wa Rweru inka 200.

Perezida Kagame yamushimiye kuri iyo nkunga yateye Abanyarwanda igamije cyane cyane gushyigikira gahunda ya Leta ya "Gira inka Munyarwanda", igamije gufasha Abanyarwanda kugira ubuzima bwiza.

Yagize ati” Nyakubahwa Minisitiri w’Intebe, tugushimiye inkunga ukomeje gutera gahunda ziteza imbere igihugu cyacu, cyane cyane gahunda ya "Gira inka”.

Mu Koroshya ubuhahirane n’ubucuruzi hagati y’ibihugu byombi, Minisitiri Narendra yavuze ko mu gihe gito u Buhinde buba bwafunguye ambasade mu Rwanda.

Iyo ambasade ngo izoroshya urujya n’uruza rw’Abaturage b’ibi bihugu, birusheho gutsura umubano.

Perezida Kagame avuga kuri iyi gahunda yo gushyira icyicaro cya Ambasade y’u Buhinde mu Rwanda yagize ati” Dutegereje kuzakira Uhagarariye u Buhinde i Kigali, ibi bikazakomeza gushimangira umubano wacu.”

Mu ruzindo rw’iminsi ibiri rwa Minisitiri w’intebe w’U Buhinde Narendra Modi ari kugirira mu Rwanda, hasinywe amasezerano umunani y’ubufatanye hagati y’ibihugu byombi.

Aya masezerano akaba arebana n’ubufatanye mu mutekano, Ubucuruzi n’ubuhahirane, umuco, Ubuhinzi n’ubworozi, Gutunganya ibikomoka ku mpu, n’ Ubushakashatsi mu by’ubuhinzi n’ubworozi.

Hanasinywe amasezerano y’inguzanyo ingana na Miliyoni 100 z’amadorari ya Amerika azafasha mu kwagura icyanya cyahariwe inganda, n’andi ya miliyoni ijana z’amadorari azafasha mu mishinga itandukanye y’ubuhinzi.

Minisitiri w’Intebe w’u Buhinde Narendra Modi yakiriwe na Perezida Paul Kagame

Mu ruzinduko rw’uwo muyobozi hakaba hateganijwe gusinya amasezerano y’ubufatanye mu nzego zitandukanye zigamije iterambere ry’ibihugu byombi zirimo, ubukungu, uburezi, ikoranabuhanga, itumanaho, ubuhinzi, umutekano, ubuvuzi n’ibindi.

Uwo muyobozi kandi azagirana ibiganiro na Perezida wa Repubulika Paul Kagame, nyuma y’ibyo biganiro asure icyanya cyahariwe inganda (Special Economic Zone), aho bateganya kuzashora asaga miliyoni 100 z’Amadorari mu rwego rwo kwagura icyo cyanya.

Uwo muyobozi kandi azasura Urwibutso rwa Jenoside rwa Kigali yunamire imibiri isaga ibihumbi 250 irushyinguyemo, nyuma agirane ibiganiro n’umuryango mugari w’Abahinde bakora ubucuruzi mu Rwanda ndetse n’itsinda ry’abashoramari baje bamuherekeje.

Muri urwo ruzinduko rw’iminsi ibiri, Minisitiri w’intebe w’u Buhinde Narendra Modi, azanerekeza mu Karere ka Bugesera mu Murenge wa Rweru, aho ateganya kugabira imiryango yimuriwe mu Mudugudu w’icyerekezo wa Rweru inka 200, izo zikaba zizagurwa mu Rwanda.

Muri uyu mwaka abashoramari baturuka mu Buhinde baza mu Rwanda bariyongereye bava kuri 66 bagera kuri 91. Abo bashoramari bakaba bibanda cyane mu ikoranabuhanga n’itumanaho ICT, mu buhinzi , mu mahoteri, ndetse no mu burezi aho bazanye kaminuza ya Mahatma Gandhi.

Abanyarwanda nabo ntibatanzwe mu gushora imari mu Buhinde, aho bo bakora ibijyanye no kohereza ibyuma bya Aluminium, hakaba abohereza ibinyampeke, ndetse n’ibikomoka ku mata.

Gahunda ya Girinka ni gahunda iranga Abanyarwanda

Ikinyamakuru New Dehli cyatangaje ko izo nka azaha abatuye umudugudu w’ikitegererezo wa Rweru, ari inka z’inyarwanda zitazatezwa ikibazo n’ikirere gishya.

Minisitiri w’u Buhinde ushinzwe imibanire mpuzamahanga, T S Tirumurti, yavuze ko umuhango wo gutanga inka ari agace gakomeye mu rugendo rwose rwa Minisitri Modi.

Yagize ati “Kugabira inka abaturage bizaba ari igikorwa cyo gushima Abanyarwanda kubera uburyo babanira neza n’Abahinde bahatuye.”

Minisitiri Modi kandi azajya ku rwibutso rwa Jenoside rwa Kigali kugira ngo arebe amahano ya Jenoside yakorewe Abatutsi mu 1994.