Perezida Kagame ubwo yasezeraga kuri Perezida Nyusi

Ku isaha y’isaa Saba zo kuri uyu wa Gatandatu tariki 21 Nyakanga ni bwo Perezida Kagame yamuherekeje ku kibuga cy’indege cya Kanombe.

Perezida Nyusi utaricaye mu minsi yamaze mu Rwanda, uretse gusura ibikorwa bitandukanye mu gihugu, birimo icyanya cyahariwe inganda giherereye i Masoro, urwibutso rwa Jenoside rwa Kigali, ikigo gishinzwe guteza imbere udushya mu ikoranabuhanga (KLab), ingoro y’umwami yo mu Rukali i Nyanza agasoreza ku mupaka muto wa Rubavu, yanagiranye ibiganiro na Perezida Kagame.

Ibihugu byombi byasinyanye amasezerano y’ubufatanye mu bya politiki no mu bikorwaremezo.

Perezida Nyusi akigera ku mupaka wa Rubavu-Goma

Perezida Filipe Nyusi yarageze Ku mupaka muto uhuza u Rwandana,Congo uzwi nka Petite bariyeri, areba uburyo Abanyarwanda n’Abanyecongo ibihumbi bahahirana.

Aganira n itangazamakuru, Perezida Nyusi yatangaje ko afurika iri kwitegura gufungura imipaka.

Yagize ati “Turimo turaganira gufungura umupaka mu bihugu by’ Afurika. Uyu ni Umwitozo wo kureba ubwo ntagitandukanya abanyafurika, urareba uburyo Abanyarwanda n’Abanyecongo bisanzura mubuhahirane.

“Ubu ni bwo buzima bw’Abanyafurika tugomba gukora, tugafungura imipaka bakabyaza umusaruro amahirwe dufite."

Uyu mupaka ukoreshwa n’abaturage ibihumbi 45 ku munsi, Abanyarwanda baturiye umupaka wa Congo bahabwa amakarita bakoresha mu byuma bambuka hatabaye kwaka laissez passe na passport.

Uyu mupaka ukoresha koranabuhanga ry’amakarita rikoreshwa n’abantu ibihumbi birindwi. Abaturage bari basanzwe bakoresha Jeto kubera baturiye umupaka.

Ikoranabuhanga ryatangiye gukoreshwa kuva 2013.

Abantu bakoresha iri koranabuhanga ni Abanyarwanda batuye mu Mirenge ya Gisenyi, Rubavu, Nyamyumba, Bugeshi, Busasamana na Rugerero.

Uyu mupaka uhorana urujya n’uruza rw’abaturage

Bamwe mu baturage bategereje kwambuka

Kureba andi mafoto menshi kanda AHA

Amafoto: Plaisir Muzogeye

Perezida Kagame na Perezida Nyusi bemeranyije kubaka umuno ntangarugero

Abaperezida bombi babitangarije mu kiganiro bagiranye n’abanyamakuru kuri uyu wa Gatanu tariki 20 Nyakanga 2018.

Ni ikiganiro cyabaye ku munsi wa Kabiri w’uruzinduko rwa Perezida wa Mozambique mu Rwanda, nyuma y’aho yari avuye ku rwibutso rwa Jenoside rwa Kigali.

Perezida Kagame yavuze ko ibihugu byombi bigambiriye guteza imbere ubufatanye muri politiki ariko byose bigakorwa ku nyungu z’abaturage b’ibihugu byombi.

Yagize ati "Mu guteza imbere umubano wacu, bizanadufasha kugira uruhare mu guteza imbere ibindi bihugu bya Afurika dusanzwe dufitanye imikoranire itandukanye."

Hasinywe amasezerano menshi agamije ubufatanye hagati y’ibihugu byombi

Perezida Nyusi yavuze ko kugira ngo igihugu cye gihitemo kubaka umubano n’u Rwanda ari inzira Abanyarwanda bahisemo yo kudaheranwa n’amateka yabaranze, ahubwo bagashyira umurimo imbere.

Ati “Iki gihugu ni gito ntikinakize, ariko gifite abaturage bakora cyane kugira ngo bikemurire ibibazo, ni yo mpamvu turi hano kugira ngo na twe turebe inzira banyuzemo na twe tuyigane. Perezida Kagame ubwo yari iwacu na we hari ibyo yabonye byafasha Abanyarwanda.”

Perezida Nyusi yavuze ko ibihugu byombi, bifite amahirwe n’ubushobozi bishobora kubyaza inyungu, bikagirira ababituye akamaro ndetse n’umugabane wa Afurika muri rusange.

Ibihugu byombi byasinye amasezerano atandukanye ashingiye ku mikoranire muri politiki, koroshya urujya n’uruza mu buhahirane no guhana ubumenyi.

Ku munsi wa kabiri w’uruzinduko rwe mu Rwanda, Perezida Nyusi yasuye urwo rwibutso kuri uyu wa Gatanu tariki 20 Nyakanga 2018, mu rwego rwo kwirebera ubukana bwa Jenoside yakorewe Abatutsi mu 1994.

Yatemberejwe anasobanurirwa ibyaranze amateka y’u Rwanda mbere na nyuma ya Jenoside, ashyira indabo ku mva zishyinguyemo iyo mibiri.

Perezida Nyusi yunamiye imibiri y’inzirakarengane zazize Jenoside yakorewe Abatutsi

Perezida Nyusi akigera ku Gisozi yakiriwe n’itsinda ry’abashinzwe gucunga uru rwibutso

Perezida Nyusi yari aherekejwe n’abayobozi batandukanye barimo Minisitiri w’Umuco na Siporo Uwacu Julienne

Bamusobanuriraga amateka yaranze buri gice cyo muri urwo rwibutso

Bamusobanuriraga amateka yaranze buri gice cyo muri urwo rwibutso

Ibyo ni ibice bitandukanye yagiye yerekwa

Nyuma yo gusura urwibutso, yanditse mu gitabo cy’abashyitsi

Nyuma yagiranye ikiganiro n’abanyamakuru

Kureba andi mafoto menshi kanda AHA

Amafoto: Plasir Muzogeye

Perezida Kagame yaraye yakiriye ku meza Perezida wa Mozambique Filipe Nyusi

Perezida Kagame yabitangaje ubwo yakiraga ku meza Perezida w’icyo gihugu, Filipe Nyusi, uri mu Rwanda, ku mugoroba wo kuri uyu wa Kane tariki 20 Nyakanga 2018.

Yagize ati "Nabwiye Perezida Nyusi ko mu minsi iri imbere tuzafungura Ambassade i Maputo. Ibi bizadufasha gukomeza gushimangira ubuhahirane hagati y’ibihugu byacu."

Perezida Kagame yemeza ko gukorera hamwe n’ibihugu ari yo nzira yo kugera ku iterambere ry’umugabane wa Afurika.

Ati "Nta yindi nzira izadufasha gukomeza urugamba rwo Kwibohora, uretse guhuza imbaraga n’ubushobozi tugamije guhindura ubuzima bw’abaturage bacu."

Mozambique ni kimwe mu bihugu bya Afurika yo munsi y’ubutayu bwa Sahara gituwe n’Abanyarwanda benshi, kandi abenshi muri bo bahakorera ibikorwa bijyanye n’ubucuruzi.

Andi mafoto

Abaperezida bombi banasangiye n’abaminisitiri bashinzwe ububanyi n’amahanga b’ibihugu byombi

Bataramiwe n’intore z’u Rwanda

Uyu muhango wari watumiwemo n’abandi bayobozi bakuru ndetse n’abahagarariye ibihugu byabo mu Rwanda

Kureba andi mafoto menshi kanda AHA

Amafoto: Fulgence Kwizera

Perezida Kagame yakira Perezida wa Mozambique Filipe Nyusi ku Kibuga cy’Indege cya Kanombe

Kuva kuri uyu wa Kane tariki 19 Nyakanga kugeza tariki 24 Nyakanga 2018, u Rwanda rurakira abakuru b’ibihugu bitatu. Uwa mbere wa Mozambique yakiriwe na Perezida Kagame ku gicamunsi cyo kuri uyu wa Kane tariki 19.

Perezida Nyusi yatangiye uruzinduko rwe asura agace kahariwe inganda kazwi nka ’Kigali Special Economic Zone’. Kuri uyu mugoroba, Perezida Nyusi wa Mozambique arakirwa ku meza na Perezida Kagame.

Ku munsi wa kabiri w’uruzinduko rwe, Perezida Nyusi azasura Urwibutso rwa Jenoside rwa Kigali, aho azunamira abazize Jenoside yakorewe Abatutsi muri 1994.

Azasura kandi ibigo by’ikoranabuhanga bikorera muri Telecom House, anasure Ingoro y’Umwami mu Rukari mu Karere ka Nyanza.

Perezida Nyusi kandi azagirana ibiganiro na Perezida Kagame mbere y’uko aba bakuru b’ibihugu bombi bagirana ikiganiro n’itangazamakuru.

Ku munsi wa nyuma w’uruzinduko rwe, Perezida Nyusi azasura inyubako itangirwamo serivisi zihuriweho ku mupaka w’u Rwanda na Repubulika iharanira Demokarasi ya Congo izwi nka ’La Corniche One Stop Border Post’.

Uruzinduko rwa Perezida Nyusi ruje rukurikira urwo Perezida Kagame yagiriye muri Mozambique mu mwaka wa 2016.

U Rwanda na Mozambique bifitanye umubano wihariye, aho ibihugu byombi bifitanye amasezerano y’ubufatanye n’ubuhahirane mu buhinzi n’ingendo zo mu kirere.

Indege y’u Rwanda, RwandAir, izatangira ingendo mu gihugu cya Mozambique mu minsi iri imbere.

Azasoza uruzinduko rwe mu Rwanda kuwa Gatandatu tariki 21 Nyakanga, bukeye bwaho tariki 22 Nyakanga Perezida w’u Bushinwa na we ahite aza mu Rwanda azasoze uruzinduko rwe tariki 23 Nyakanga .

Uwo munsi na bwo Perezida Kagame azarara yakiriye Minisitiri w’u Buhinde nawe uzaba uje mu ruzinduko rw’iminsi ibiri kugeza tariki 24 Nyakanga.

Itangazo rya Perezidansi ya Repubulika ryatangaje ko izi ngendo zigamije kongera imibanire ibihugu byombi bisanzwe bifitanye.

Itangazo rikomeza rivuga kandi ko buri muyobozi azaba aherekejwe n’umwe mu bayobozi bashinzwe ishoramari mu rwego rwo kureba amahirwe ari mu Rwanda, cyane cyane mu bikorwaremezo, ubucukuzi bw’amabuye y’agaciro, ubuhinzi n’ikoranabuhanga n’itumanaho.

Abayobozi bose bazanaganira ku mikorere y’Umuryango wa Afurika yunze Ubumwe (AU), Perezida Kagame ayoboye.

Perezida Nyusi yatemberejwe mu gice cyahariwe inganda

Kureba andi mafoto ya Perezida Nyusi akigera i Kigali kandaAHA

Amafoto: Plaisir Muzogeye