Ubuyobozi bwiza no kutajenjekera ruswa ni kimwe mu byatumye Uruganda rwa Volks Wagen rutinyuka gukorera mu Rwanda

Umuyobozi w’ibikorwa bya rwo muri Africa y’Epfo n’agace ko munsi y’ubutayu bwa Sahara, Thomas Schäfer, yavuze ko icyerekezo 2025 cy’uru ruganda ari ukugeza ibikorwa bya rwo mu bice bitandukanye by’isi.

Mu gihe hari benshi bibaza impamvu uru ruganda rwahisemo gukorera mu Rwanda, avuga ko byatewe n’imiyoborere myiza iri mu Rwanda.

Ati “Impamvu ntayindi ni ubuyobozi bwiza, kutajenjekera ruswa, iterambere ry’ubukungu, u Rwanda rurayoboye mu guhanga udushya n’ikoranabuhanga, Kigali iri ku isonga muri gahunda ya smart city, ariko icy’ingenzi kurusha ibindi, ni uko VW n’u Rwanda bisangiye icyerekezo”

Imodoka za VW zizajya ziteranyirizwa muri uru ruganda

Perezida wa Repubulika y’u Rwanda Paul Kagame ubwo yatangizaga ku mugaragaro ibikorwa by’uruganda rwa VolksWagen (VW) kuri uyu wa gatatu tariki 27 Kamena 2018, yavuze ko Africa idakeneye kuba ingarani y’imodoka zakoze.

Mu myaka ibiri ishize ni bwo hatangiye ibiganiro hagati y’uruganda VolksWagen na Leta y’u Rwanda binyuze muri RDB, ibiganiro byari bigamije gutangiza uruganda rwateranyiriza imodoka mu Rwanda.

Perezida Kagame yavuze ko mu Rwanda hari imodoka nyinshi zishaje, ku buryo mu gihe kiri imbere ikoranabuhanga rihujwe no guhanga udushya mu kugurisha no gusangira imodoka, bizafasha abantu kubona imodoka nshya zo gukoresha, bitabaye ngombwa ko baba batunze izabo bwite.

Yagize ati “Nyinshi mu modoka ziri mu mihanda yacu zirashaje, nyinshi zakozwe mu kinyejana gishize, zihumanya ikirere cyane kubera igihe zimaze ugereranyije n’imodoka nshya.

Africa ntabwo ikeneye kuba ingarani y’imodoka zakoze, cyangwa ikindi kintu cyose cyakoze (...) Ntekereza ko twebwe Abanyafrica, Abanyarwanda dukwiye ibyiza, kandi iyi ni inzira imwe yo kwerekana uburyo twabishobora.”

Perezida Kagame yavuze ko Africa idakwiye kuba ingarani y’imodoka zishaje

Ikompanyi CFAO icuruza ibintu bitandukanye birimo n’imodoka, ni yo izakora akazi ko guteranya, guhererekanya no gucunga imodoka za VW mu Rwanda, binyuze mu ishami ryayo mu Rwanda, CFAO Rwanda Motors.

Umuyobozi wa yo Zarak Khan yijeje u Rwanda n’akarere muri rusange ko bazashyira ku isoko imodoka nziza kandi zizewe.

Perezida Kagame yavuze ko ku ikubitiro bamwe batizeraga ko imodoka z’abadage zateranyirizwa mu Rwanda, ashima abagize uruhare kugeza ubwo izi modoka zitangira guteranyirizwa mu Rwanda.

Umukuru w’igihugu yavuze ko ibihugu bya Africa y’Uburasirazuba bikwiye kugira ubufatanye mu kubaka agace k’inganda, kugira ngo ibi bihugu bitere indi ntambwe yo kugira inganda zikora imodoka aho kugira iziziteranya.

Gusa ariko inkuru y’itangira ry’uruganda rwa VW mu Rwanda ngo ni inkuru nziza u Rwanda rwabarira amahanga. Perezida Kagame yagize ati “Uru ruganda rugaragaza mu buryo budashidikanywaho amateka mashya mu rugendo u Rwanda rwatangiye rwo guhindura ubukungu bwa rwo.

Akamaro karwo kandi kazanagera no kuri Africa muri rusange. Ahubwo reka nababwire, ibi bimpaye indi nkuru nziza yo kubara mu minsi mike iri imbere, dufite inama ya Africa yunze ubumwe nzayobora, bizaba ari ibyishimo kuri njye mbwira abantu iyi nkuru nziza”

Izi modoka zirakomeye kandi zirizewe

Uretse kuba imodoka z’uru ruganda zizagurishwa ku bazikeneye, runafite gahunda itari isanzwe yo kuzikodesha ku muntu wese wakenera imodoka yo gukoresha, akazajya ayitira yifashishije Application ya Telefoni yitwa Move App.

Imodoka za VW Polo zateranyirijwe mu Rwanda zizajya zigurishwa ku bihumbi 23,881 by’amadollars, izo mu bwoko bwa Passat zigurishwe ku bihumbi 37,674, Tiguan zigurishwe ku bihumbi 37,719, Amarok ku bihumbi 44,559, naho Teramont zigurishwe 48,156 by’amadollars ya Amerika.

Kureba andi mafoto menshi kanda AHA

Perezida Kagame yafunguye ku mugaragaro uruganda rwa Volkswagen mu Rwanda

U Rwanda rwanditse andi mateka yo kugira uruganda ruteranya imodoka, igikorwa kije kiyunga ku yindi mishinga myinshi rwatangiye yo kurufasha kuba ubukombe.

Kuri uyu wa Gatatu tariki 27 Kamena 2018, Perezida Kagame yafunguye ku mugaragaro uruganda rw’Abadage rwa Volkswagen ruzajya tuteranya imodoka zigurishwa mu Rwanda no mu karere.

Igikorwa yemeza ko ari inkuru nziza kuri Afurika bitewe n’amateka y’u Rwanda n’intego y’aho rwifuza kugera mu bukungu.

Yagize ati “Ndibuka ko imodoka ya mbere nabonye mu Rwanda ndi umwana, mbere y’uko twirukanwa muri iki gihugu, ari imodoka ya Beetle (Gikeri). Icyo gihe moteri yazo yabaga inyuma. None uyu munsi twongeye kubona imodoka za Volkswagen mu Rwanda zihakorerwa.”

Perezida Kagame yasuzumye imodoka yakozwe na VW

Perezida Kagame yavuze ko mbere y’uko amasezerano yo gutangiza urwo ruganda mu Rwanda atangazwa, abantu benshi batiyumvishaga ko uruganda nka Volkswagen rushobora kuza gukorera mu Rwanda.

Ariko yemeza ko gutangira k’urwo ruganda bihise bihindura isura y’urugendo rugana ku bukungu bw’u Rwanda.

Ati “Ni inkuru nziza kuri Afurika kuko bigaragaza ko inganda zikomeye z’i Burayi zitamenyekanisha ibyo zikora muri Afurika gusa kuko zanahakura abaguzi.”

Perezida Kagame yanavuze ko gukora imodoka nshya bizakuraho imyumvire yo kumva ko Afurika ari ho hajugunywa ibintu byakoreshejwe n’abandi.

Perezida Kagame afungura ku mugaragaro uruganda rwa VW mu Rwanda

Uruganda rwa Volkswagen rutangije igice cyo mu Rwanda nyuma y’igihe kigera ku mwaka rutegerejwe na benshi, mu Karere u Rwanda ruherereyemo.

Ruzatangira rukora amoko abiri y’imodoka ari yo Hatchback Polo na Passat, nk’uko Michaella Rugwizangoga Umuyobozi wa Volkswagen mu Rwanda yabitangaje.

Yavuze ko imodoka 150 za mbere zizakorwa, zizakora mu buryo bwo kuzikodesha, mbere y’uko batangira kuzigurisha ku baturage.

Umuyobozi mukuru wa Volkswagen muri Afurika y’Epfo, Thomas Schafer, yavuze ko politiki y’u Rwanda yo gukorera mu mucyo no kutihanganira ruswa ndetse n’umutekano igihugu gitanga biri mu byabakuruye baza gukorera mu Rwanda.

Imwe mu modoka abakozi barimo guteranya

Kureba andi mafoto menshi kanda AHA

Amafoto: Plaisir Muzogeye

Izi ni imodoka za VW ziri gutanga serivise zo gutwara abashyitsi bitabiriye Transform Africa 2018

Muri Mutarama uyu mwaka, umuyobozi w’uru ruganda muri Africa y’Epfo, Thomas Schaefer, yari yatangaje ko guteranyiriza izo modoka mu Rwanda bishobora gutangira mbere y’uko ukwezi kwa gatanu kurangira.

Ibi yabivuze ubwo yasobanuriraga abanyamakuru kuri uyu mushinga uru ruganda rufite wo kwinjira ku isoko ryo mu Rwanda.

Icyo gihe yavuze ko urwo ruganda ruzatangira guteranyiriza imodoka mu Rwanda ruhereye ku modoka zo mu bwoko bwa VW Polo, VW Passat [zo mu bwoko bwa Sedan] na VW Teramont (SUV).

Mu nama ya Transform Africa 2018 iri kubera i Kigali hagaragaye imodoka z’ubwoko bwa VW Passat ziri gutwara abantu bitabiriye iyo nama zibavanye ku kibuga cy’indege cya Kanome zibajyana kuri Kigali Convention Center ahari kubera inama.

Thomas Schaffer uhagarariye Volkswagen muri Afurika y’Epfo na Clare Akamanzi uhagarariye RDB bamaze gusinya amasezerano y’uko VW izatangira gukorera mu Rwanda

Bamwe mu babonye izo modoka bavugaga ko zigaragaza ko uruganda VW rwaba rwamaze gutangiza imirimo yo guteranyiriza imodoka mu Rwanda.

Ariko Michaella Rugwizangoga uhagarariye VW mu Rwanda yavuze ko igihe cyo gutangira guteranyiriza imodoka za VW mu Rwanda cyigijwe inyuma, bikazatangira mu kwezi kwa Kamena 2018.

Abinyujije ku rubuga rwe rwa Twitter yagize ati “Izi modoka (VW Passats) zavanywe hanze mu rwego rw’ubufatanye uruganda rwa VW rufitanye n’inama ya Transform Africa.

Uru ruganda rwatangaje ko ruzaha akazi abakozi 1000 nirutangira gukorera mu Rwanda. Biteganijwe ko mu Rwanda ruzatangirana ingengo y’imato ya miriyoni 20 z’amadollars.

Mu mwaka wa 2016, nibwo Leta y’u Rwanda yagiranye amasezerano n’uruganda rwa Volkswagen, yo gutangiza uruganda mu Rwanda ruteranya imodoka

André Bouffioux, umuyobozi wa Siemens muri Afurika yo hagati ari mu Rwanda

Uruganda rw’Abadage rwa Siemens rwatangaje icyifuzo cyarwo cyo gushora imari mu ikoranabuhanga rizashyirwa mu iyubakwa ry’umuhanda wa Gare ya moshi wa Isaka-Kigali.

Umuyobozi w’uru ruganda mu gice cya Afurika yo hagati, Andre Bouffioux, yavuze ko uru ruganda rusanzwe rufite ubunararibonye mu bijyanye no gushyira ikoranabuhanga rigezweho ku nzira za Gare ya moshi.

Yagize ati “Dufite tekinoloji zijyanye n’igihe zikora mu mihanda ya Gare ya moshi kandi tukaba tuziko uyu mushinga (Isaka-Kigali) ukeneye ishoramari. Niyo mpamvu twatangiye gutekereza ku ishoramari twahakorera.”

U Rwanda na Tanzania byamaze kwemeranya ku iyubakwa ry’uyu muhanda wa kilometero 400, uzatangira kubakwa mu kwezi k’Ukwakira 2018.

Uruganda rwa Siemens rukaba rwahise rwohereza ikipe y’abantu batanu baje kureba ibijyanye n’amahirwe ashobora kuba muri uyu mushinga. Ubusanzwe uruganda rwa Siemens rwari ruzwi mu bijyanye no gukora ibikoresho by’ikoranabuhanga nka za telefoni.

Ariko kuva uyu mushinga wa Gare ya moshi watangira kuvugwa watumye batekereza ko hari ibindi birenze bakora muri aka karere, nk’uko bakomeza babitangaza.

Mu yindi mishinga Siemens yakozeho, yagiye ikora ibijyanye no gushyiramo uburyo butuma ibintu byikoresha (Automation), ibijyanye no gushyiraho umuriro w’amashanyarazi (Electrification) n’ibindi bituma imirimo ikorerwa mu nzira za Gare ya moshi zigenda neza.

Bouffioux avuga ko bitarenze ukwezi kwa Werurwe uyu mwaka, Siemens izagirana ibiganiro na Leta y’u Rwanda mu rwego rwo kureba ahantu h’ingenzi uru ruganda rwahera rushora imari, haba mu ikoranabuhanga, ibikorwaremezo, ubuzima n’ingufu.

Bouffioux yizera ko akurikije aho bakorera muri Afurika hagera kuri 26, u Rwanda rufite ibikenewe byose kugira ngo narwo ruhaze.

Ati “Twahisemo u Rwanda kubera ubushake rugaragaza, umutekano no kuba rushaka kubaka ibintu biramba. Mu mezi atatu tuzahura na Perezida n’abahagarariye guverinoma kugira ngo tuganire ku ishoramari ry’imyaka itanu dushaka gukorera aha.”

Umuyobozi w’Urugaga rw’Abikorera mu Rwanda, Stephen Ruzibiza yabwiye Kigali Today ko iri shoramari riramutse rikozwe rizazamura uburyo ubucuruzi bukorwa mu Rwanda, harimo kugabanya ikiguzi gikoreshwa mu gutumiza ibikoresho by’ikoranabuhanga.

Uruganda rwa Siemens ruteganya kuza mu Rwanda mu gihe hari urundi ruganda rw’Abadage rwa Volkswagen (VW) rwamaze gukandagiza ikirenge ku isoko ry’u Rwanda ruje gukora imodoka zikorewe mu Rwanda.

2018 irashira Abanyarwanda batangiye gutwara imodoka zikorerwa mu Rwanda

Kuri uyu wa kane tariki 18 Mutarama 2018, ubuyobozi bwa VW bwatangaje ko buzatagirana ingengo ya miliyari 20 z’amadolari zo kwihashisha gukora imodoka za mbere, aho ruzaba rukorera mu gice cyahariwe inganda cya “Kigali Special Economic Zone.”

Umuyobozi wa VW muri Afurika y’Epfo, Thomas Schaefer yavuze ko uru ruganda ruzakenera abakozi igihumbi bazaturuka mu karere u Rwanda ruherereyemo.

Yavuze ko nta gihindutse mu mpera za Gicurasi uyu mwaka ari ubwo imirimo yo gukora imodoka yaba yatangiye. Hakazaherwa ku modoka zo mu bwoko bwa VW Passat, Polo n’amajipe yo mu bwoko bwa Teramont.

Clare Akamanzi, umuyobozi w’Ikigo cy’Igihugu cy’Iterambere (RDB), yavuze ko u Rwanda rwishimiy kuva uruganda rwa VW ruje gukorera mu Rwanda. Avuga ko gukorera mu Rwanda k’uru ruganda bizagirira igihugu akamaro.

Ati “Twizeye ko ubu bufatanye buzaha urubyiruko amahirwe yo kubona imirimo.”

Yavuze ko gushora imari mu Rwaanda wa VW ari ikimenyetso cy’uko abashoramari bakomeje kwiyongera, mu gihe ku ruhande rwa VW bemeza ko bahisemo gukorera mu Rwanda kubera uburyo igihugu cyorohereza abashoramari.

VW izakorera mu Rwanda ikora nka sosiyete Nyarwanda, aho izajya ikora imodoka ziciriritse, zoroshye gukorwa kandi kinywa lisansi nke ntizanduze n’ikirere.

Thomas Shaefer, umuyobozi wa Volkswage muri Afurika y’epfo na Francis Gatare, umuyobozi wa RDB bashyira umukono ku masezerano

Ayo masezerano yasinywe tariki ya kuri uyu wa 21 Ukuboza 2016, ateganya ko imodoka, Volkswagen izajya iteranyirizwa mu Rwanda, zizaba zihendutse kandi zidahumanya ikirere.

Ayo masezerano yo gukora imodoka za Volkswagen zidahumanya ikirere (ThinkBlue cars) ateganya ko muri 2017 Volkswagen izubaka uruganda bazajya bateranyirizamo izo modoka.

Izanatunganya aho bazajya bazisuzumira (service station), ndetse inahugure abakanishi bo mu Rwanda bazajya bazikanika.

Ni amasezerano azatuma kandi mu Rwanda haba ikigo cy’icyitegererezo cya Volkswagen kuko biri no muri gahunda y’urwo ruganda yo kwagura ibikorwa byarwo muri Afurika.

Volkswagen izaba kandi itanga uburyo bushobora gutuma umuntu atunga imodoka ayiguze ubwe cyangwa ayifatanyije n’abandi.

Icyo gihe imodoka ziba ziri ahabugenewe wayikenera ukagenda ukayifata nyuma yo kurangiza gahunda zawe ukayihasubiza kugira ngo n’undi uyikeneye ayikoreshe, ndetse hakabaho n’uburyo bwo gukodesha nk’uko umuntu akodesha tagisi.

Volkswagen yamaze guteganya ingengo y’imari ya miliyoni 1 y’ama-Euro azifashishwa mu kubaka urwo ruganda rwayo mu Rwanda, guhugura abakozi no gutunganya aho bazajya bazisuzumira, byose bikazakorwa nyuma y’inyigo izakorwa mu ntangiriro za 2017.

Uruganda ruteranyirizwamo imodoka mu Rwanda ruzaba ari urwa gatutu Volkswagen igize muri Afurika, nyuma y’urwo muri Afurika y’Epfo aho Volkswagen imaze imyaka 60 ikorera hamwe n’urwo muri Kenya rwafunguwe kuri uyu wa 21 Ukuboza 2016.

Thomas Shaefer, umuyobozi wa Volkswage muri Afurika y’epfo, ubwo basinyanaga amasezerano n’u Rwanda, yagize ati “Twaje mu Rwanda kuko twizera ko ari ahantu heza ho gushora imari.

Intego yacu ni ukwagura ibikorwa muri Afurika kandi u Rwanda ni rwo ruza ku isonga umuntu atakwirirwa agiraho ikibazo arushoyemo imari.”

Mbonigaba, umunyarwanda ufite uruhushya rwo gutwara imodoka ariko akaba ntayo atunze abona Volkswagen nk’igisubizo ku nzozi yari afite zo kuyitunga.

Agira ati “Guverinoma ikwiye gutangira gutekereza uko yakwagura imihanda yayo kuko hari Abanyarwanda benshi bazahita bakenera gukoresha izo modoka (za Volkswagen).”

Umuhango wo gusinya amasezerano hagati ya Leta y’u Rwanda n’uruganda rwa Volkswagen witabiriwe n’abantu batandukanye

Francis Gatare, umuyobozi wa RDB washyize umukono kuri ayo masezerano ku ruhande rw’u Rwanda, avuga ko amasezerano basinyanye na Volkswagen ari intangiriro za gahunda y’u Rwanda yo guteza imbere ibikorerwa mu Rwanda kandi agaragaza icyizere Ubudage bufitiye u Rwanda.

Agira ati “Aya masezerano y’ubufatanye ni ikimenyetso ko u Rwanda ari umufatanyabikorwa mwiza kandi nyuma y’ubumenyi tuzungukiramo hamwe no guteza imbere ibikorerwa mu Rwanda, bizafasha Volkswagen gukomeza kubaka izindi nganda hirya no hino muri Afurika.”

Imodoka bazaheraho bateranya harimo izo mu bwoko bwa Tiguan Passat ziri mu modoka za Volkswagen zikunzwe cyane ku isoko.

Uruganda rwa Volkswagen rugiye kujya ruteranyiriza mu Rwanda imodoka zarwo zitangiza ikirere

Cyakora n’ubwo ibiciro bitazaba bihanitse, Shaefer avuga ko bizajya biterwa n’ubwoko bw’imodoka umukiliya yifuza dore ko bateganya ko mu zo bazahateranyiriza harimo na “Limousine”.

Aya masezerano kandi azatuma u Rwanda rucika kugukoresha imodoka zishaje zitumizwa mu Buyapani, i Dubai n’ahandi.

Gatare yagize ati “Ibiciro ntibizaba ikibazo muri mikoranire na Volkswagen, turateganya ko Umunyarwanda azatunga imodoka nziza.

Mu Rwanda hagiye kujya hakorerwa imodoka za Volkswagen

Aya masezerano ateganyijwe gusinywa kuri uyu wa Gatatu tariki ya 21 Ukuboza 2016, hagati ya Francis Gatare, Umuyobozi mukuru wa RDB na Thomas Schaefer, Uhagarariye Volkswagen yo muri Afrika y’Epfo ndetse na Dr Herbert Diess, Umuyobozi mukuru wa Volkswagen ku rwego rw’isi araba ahari.

Nk’uko bitangazwa n’Ubuyobozi bwa Volkswagen, aya masezerano ngo ashingiye kuri gahunda bise “VW’s ThinkBlue”, yerekeranye no gukora imodoka zibonerwa amapiyesi mu buryo bworoshye (easy to maintain).

Ashingiye kandi mu gukora imodoka zitangiza ibidukikije zihumanya ikirere, kuko ziba zikoresha lisansi nkeya kandi zigasohora umwotsi mucye.

Muri aya masezerano hakubiyemo amategeko abiri agenga ibijyanye n’imyuka isohoka mu modoka yangiza ikirere agomba kubahirizwa na Volkswagen, nk’uko byasohotse mu itangazo RDB yashyize hanze.

Muri ayo mategeko harimo irijyanye no kubungabunga umwuka , ryemejwe muri Nyakanga 2016.

Harimo kandi n’umushinga w’itegeko rigena ibijyanye no gupima imyotsi isohoka mu binyabiziga, ryakozwe n’ikigo cy’iguhugu cyita ku bidukikije (REMA).

Uwo mushinga w’itegeko wakozwe na REMA uteganya ko ibinyabiziga bitwara abantu n’ibintu mu buryo bw’ubucuruzi, zazajya zisuzumwa kabiri mu mwaka, naho ibinyabiziga by’abantu ku giti cyabo, bigasuzumwa rimwe mu mwaka gusa .

Ubuyobozi bwa Volkswagen butangaza ko aya mategeko buzayubahiriza neza, kuko ngo uru ruganda rugamije gukora imodoka zinywa lisensi nkeya ku buryo bushoboka.

Nk’uko ari intego y’uruganda rwa “Volkswagen” yo gukora imodoka zikundwa na rubanda “People’s car”, ubuyobozi bw’uru ruganda butangaza ko ariyo mpamvu bwifuje kuzana uru ruganda mu Rwanda.