Minisitiri Jean De Dieu Rurangirwa n’umuyobozi wa KT Kyung-lim Yun nyuma yo gusinya amasezerano

Internet ya 4G ifatwa nk’imwe mu mpinduramatwara z’ahazaza muri serivisi zitandukanye zirimo ubuvuzi, imitangire ya serivisi no mu nganda.

Mu gihe mu Rwanda hateraniye inama ya Transform Africa yiga ku guhindura Afurika umugabane wifashisha ikoranabuhanga mu iterambere, Ikigo cy’Abanyakoreya gisakaza internet ya 4G (KT) cyasinyanye amasezerano na Guverinoma y’u Rwanda yo kugifasha gukwirakwiza iyi internet no hirya y’imbizi zarwo.

Umuyobozi w’icyo kigo Kyung-lim Yun yavuze ko icyo kigo kiteguye gufasha u Rwanda kugera ku cyerekezo 2020 rwifashishijwe ikoranabuhanga mu guhindura ubuzima bw’abaturage.

Yagize ati “Tugomba guhanga udushya tujyana no kuba internet ya 4G yarakwirakwijwe mu gihugu hose. Ndabizeza ko kuba KT ishobora kugera ku isi hose izafatanya n’u Rwanda mu guhanga udushya tuzatuma ibindi bihugu birureberaho.”

Abayobozi batandukanye bari bitabiriye umuhango wo gusinya ayo masezerano

Minisitiri w’Ikoranabuhanga mu Rwanda Jean de Dieu Rurangirwa, na we yemeza ko gukwirakwiza 4G mu Rwanda hose bitazasiga ireme ry’uburezi, kongera ireme ry’ubuvuzi no guteza imbere ubuhinzi ariko hibanzwe ku bukungu.

Mu 2013 ni bwo icyo kigo cyagejeje internet ya 4G bwa mbere mu Rwanda, nyuma y’imyaka ibiri yari imaze kugezwa ahangana na 26% mu Rwanda. Uyu mwaka igeze kuri 95% ariko gahunda ni ukuyigeza mu gihugu cyose 100% bitarenze 2020.

Salissou Hassane Latifa wo muri Niger yegukanye Ms Geek Africa 2018 ahembwa sheki ya miliyoni eshatu z’amanyarwanda

Umushinga we w’agashya yahanze mu ikoranabuhanga watsinze indi mishinga, akaba yarahimbye App yitwa Saro, izafasha abayikoresha gutabaza serivisi z’ubutabazi kugira ngo bazimenyeshe aho bakoreye impanuka.

Iyo App kandi ngo izafasha abakora ubutabazi kohereza inama z’uko umuntu wagize impanuka yakorerwa ubutabazi bw’ibanze mbere y’uko abakora serivisi z’ubutabazi bagera aho impanuka yabereye.

Umushinga w’agashya w’uyu mukobwa watsinze indi mishinga y’abandi bakobwa bane bari bageranye ku cyiciro cya nyuma cy’irushanwa, ariko na yo ikaba yashimwe kuko “izagira uruhare mu gukemura ibibazo umugabane wa Africa ufite” nk’uko Angela Ngang’a, ukorera ikigo cy’ikoranabuhanga cya Microsoft akaba no mu bakemurampaka yabivuze.

Salissou Hassane Latifa yakoze ikoranabuhanga ryitwa Saro rifasha umuntu ukoze impanuka gutabarwa byihuse no guhabwa ubutabazi bw’ibanze

Muri batanu bageze mu cyiciro cya nyuma cy’irushanwa harimo Abanyarwanda babiri bakaba bakurikiranye ku mwanya wa kane n’uwa gatanu.

Hashize imyaka itanu itsinda ry’abagore n’abakobwa rizwi nka “Girls in ICT” ritegura irushanwa rya Ms Geek, rishishikariza abakobwa kwiga amasomo ya Science, Technologie, Engeneering na Mathematics (STEM), kugira ngo bifashishije ikoranabuhanga bagire uruhare mu gushaka ibisubizo by’ibibazo Africa ifite.

Mu mwaka ushize nibwo irushanwa rya Ms Geek ryagutse rijya ku rwego rw’umugabane wa Africa, ku buryo ribaye ku nshuro ya kabiri kuva rigiye kuri urwo rwego.

Abategura irushanwa rya Ms Geek Africa bavuze ko abari basabye kuryitabira basaga 200, hakaba harabaye amajonjora kugeza ubwo haboneka uwaryegukanye.

Salissou Hassane Latifa wegukanye iri rushanwa yatangajwe mu kiganiro cya nyuma cyitwa Women Summit cyasoje inama ya Transform Africa 2018.

Batanu barushanwaga barimo babiri b’Abanyarwanda

Umunyamabanga nshingwabikorwa wa gahunda ya Smart Africa, Dr. Hammadou Touré yavuze anashimangira ko intego z’iyi nama zagezweho uko byari byitezwe, kuko habaye ibiganiro byinshi ndetse hanasinywa amasezerano hagati y’imiryango isaga 600 yari yitabiriye Transform Africa.

Yavuze ko Smart Africa yonyine yasinye amasezerano arindwi y’ubufatanye, azihutisha gahunda ya Smart Cities in Africa, no kugeza umuyoboro wa internet kuri bose kugira ngo urubyiruko rubone uburyo bwo guhanga udushya.

Minisitiri w’ikoranabuhanga, Rurangirwa Jean de Dieu n’Umuyobozi wa Swift- Xi Kenji Fukuoka nyuma yo gusinyana amasezerano

Ayo masezerano yasinyiwe mu nama ya Transform Africa iri kubera i Kigali kuva ku wa mbere tariki 07 Gicurasi 2018.

Iyi kompanyi ya Swift-Xi ikorera mu Mujyi wa Kobe mu Buyapani, ikaba itanga serivisi z’ikoranabuhanga n’ubucuruzi burimo n’ubw’utudege tutagira abapilote (Drones).

Umuyobozi wa yo Kenji Fukuoka yavuze ko bazifashisha izo Drones mu kuvugurura imibereho ya bamwe mu Banyarwanda.

Yagize ati “Intego yacu nyamukuru, ni ugufungura isoko ryo mu Rwanda mu bijyanye n’utudege twa drones. Indi ntego ni ugukemura ibibazo by’imibereho y’abaturage dukoresheje drones, ariko nanone tugahanga akazi muri iki gihugu dukoresheje drones”

Iyi kompanyi ifatanyije n’ishuri ryitwa Kobe Institute of Computing ngo bakiriye abanyeshuri basaga 40 b’Abanyarwanda bahawe bourse na guverinoma y’Ubuyapani.

Aya masezerano yasinyiwe mu nama ya Transform Africa iri kubera i kigali

Minisitiri w’ikoranabuhanga, Rurangirwa Jean de Dieu, yavuze ko bishimishije kuba ubufatanye bw’impande zombi bugeze ku yindi ntera, yongeraho ko ikoranabuhanga ry’iyi kompanyi rizagira akamaro mu nzego zitandukanye z’ubuzima bw’Abanyarwanda.

Yagize ati “Tuzakorana na Swift-Xi duteza, twiyemeje gutegura amahugurwa ku rubyiruko rwacu, kandi turi gufatanya kugira ngo turebe uko iri koranabuhanga twarihuza n’ubuzima rusange, rigafasha urubyiruko, rikifashishwa mu buhinzi n’ahandi.

Ni amahirwe akomeye ku rubyiruko rwacu kubona ubumenyi no kubona imirimo, ariko nanone bikatugira sentre y’ikoranabuhanga muri Africa”

Uretse aya masezerano yasinywe hagati ya Minisiteri y’urubyiruko n’ikompanyi ya Swift-Xi, hanasinywe andi masezerano hagati ya Smart Africa n’ikigo cya Inmarsat n’ibindi bifatanyije nka Tillman Digital Cities na CivicConnect.

Ikigo cya Inmarsat gitanga serivisi zitumanaho rya satelite, amasezerano cyo n’ibindi bigo by’ikoranabuhanga byasinyanye na Smart Africa, akaba agamije kurushaho guteza imbere imijyi ya Africa muri gahunda yitwa Smart cities in Africa.

Umunyamabanga nshingwabikorwa wa TAS Dr Hamadu Toure yasinya amasezerano n’abayobozi b’ibigo by’ikoranabuhanga bishyigikiye Smart cities in Africa

Umuyobozi mukuru wa Imbuto Foundation Umutoni Sandrine avuga ko ibisubizo by’ibibazo urubyiruko rufite bigomba kuva mu rubyiruko

Yabisabye ku wa kabiri tariki 08 Gicurasi 2018, mu biganiro nyunguranabitekerezo muri gahunda y’inama ya Transform Africa iri kubera i Kigali.

Ibiganiro umuryango Imbuto Foundation wari wateguriye urubyiruko muri gahunda y’iyi nama, byari bishingiye ku nsanganyamatsiko igira iti “The New Lens: Know, Treat, Suppress”

Byari mu rwego rwo gutanga urubuga ku rubyiruko, kugira ngo rutange ibitekerezo by’uko hahangwa udushya mu ikoranabuhanga twafasha kurandura SIDA mu mwaka wa 2030.

Raporo y’ishami ry’umuryango w’abibumbye ryita ku bana UNICEF yo mu 2016, igaragaza ko 73% by’ubwandu bushya bwa virusi itera SIDA mu rubyiruko bugaragara muri Africa.

Iyi nama yari yitabiriwe n’abantu baturutse mu nzego zitandukanye z’igihugu

Umuyobozi w’Imbuto Foundation yavuze ko imibare y’ubwandu bushya iteye inkeke, na cyane ko biteganyijwe ko urubyiruko rwa Africa ruzaba rugera kuri miliyoni 750 mu mwaka wa 2060.

Yagize ati “Ntitwaterera iyo cyangwa ngo ntiduterwe ubwoba n’indwara ikomeje kwiyongera. Kurwanya SIDA birasaba ko twese duhagurukira kuyikumira no kuyishakira umuti.

Turi hano tubabwira ko mugomba kugira uruhare mu gushaka ibisubizo by’ibibazo bibugarije, mu gihe hifashishwa ikoranabuhanga kugira ngo ibyo bisubizo bijyane n’ibihe tugezemo”

Umuyobozi w’Imbuto Foundation yanavuze ko urubyiruko rukwiye guhabwa amakuru nyayo ku bijyanye n’ubuzima bw’imyororokere, kugira ngo rumenye uburyo rushobora gukumira ubwo bwandu bushya.

Gusa ariko Viateur Rurema, ukorera umuryango witwa Kigali Hope uvugira urubyiruko rubana na virusi itera SIDA, yagaragaje ko bamwe mu banyeshuri banduye baterwa ipfunwe no kujya gufata imiti igabanya ubukana bari ku ishuri, ku buryo na byo bikwiye gutekerezwaho.

Dr Nsanzimana Sabin Umuyobozi mukuru ushinzwe kurwanya SIDA muri RBC

Kuri icyo kibazo, Dr. Sabin Nsanzimana, ukuriye ishami rishinzwe gukumira SIDA mu kigo cy’igihugu gishinzwe ubuzima, RBC, yavuze ko icyo kibazo kizwi kandi hari ingamba zafashwe zo gutanga imiti y’igihe kirekire.

Yagize ati “Tuzi icyo kibazo kuva nko mu myaka itanu ishize, kandi hari ingamba zafashwe zo guha umurwayi ibinini by’igihe kirekire, ariko nanone tukigisha abayobozi b’ibigo by’amashuri gushyiraho uburyo bwafasha abanyeshuri gufata imiti mu buryo bw’ibanga”

Dr Nsanzimana yanavuze ko hari n’ubushakashatsi bukorwa bugamije kuvumbura imiti y’igihe kirekire bashobora gutera umuntu ufite ubwandu bwa SIDA.

Umuryango Imbuto Foundation weretse abitabiriye ibyo biganiro uburyo gahunda ya iAccelerator yatangijwe mu mwaka wa 2016, yatumye urubyiruko rwishakamo ibisubizo ku bibazo birwugarije bijyanye n’ubuzima bw’imyororkere.

Dr Nsanzimana yanavuze ko hari n’ubushakashatsi bukorwa bugamije kuvumbura imiti y’igihe kirekire yahabwa ufite ubwandu bwa SIDA

Muri byo harimo application yitwa Umbrella itanga amakuru ikanigisha abakobwa uko babara igihe cy’uburumbuke ndetse n’ikiganiro cyitwa Tubiganire Show cyigisha ababyeyi n’abana kugirana ibiganiro birambuye ku buzima bw’imyororekere n’imihindagurikire y’umubiri.

Perezida Kagame mu nama ya Transform Africa

Perezida Kagame yemeza ko amafaranga abarirwa muri za miliyoni atikirira mu kunyereza imisoro n’abohereza imitungo yabo hanze, byose bikoreshejwe neza byagirira umugabane akamaro.

Yabitangaje ubwo yafunguraga ku mugaragaro inama yiga ku guhuza Afurika hifashishijwe ikoranabuhanga “Transform Africa” iteraniye i Kigali, kuri uyu wa Kabiri tariki ya 8 Gicurasi 2018.

Yagize ati “Ntituri abakene, habe na mba. Ikibazo gihari kiri mu mutwe aho twumva ko tutakoresha ubushobozi bwacu, ahubwo tugaharira abandi imishinga yacu y’igihe kirekire. Ni ukuvuga ko ayo twakorera yose, ariko dukomeza kuba abakene.”

Perezida Kagame yavuze ko ntawukwiye kwitwaza iyo mvumvire ngo avuge ko ituruka k’ubukoloni, ahubwo ko Abanyafurika bakwiye gushaka ikintu gituma basigara inyuma.

Izi ni imodoka za VW ziri gutanga serivise zo gutwara abashyitsi bitabiriye Transform Africa 2018

Muri Mutarama uyu mwaka, umuyobozi w’uru ruganda muri Africa y’Epfo, Thomas Schaefer, yari yatangaje ko guteranyiriza izo modoka mu Rwanda bishobora gutangira mbere y’uko ukwezi kwa gatanu kurangira.

Ibi yabivuze ubwo yasobanuriraga abanyamakuru kuri uyu mushinga uru ruganda rufite wo kwinjira ku isoko ryo mu Rwanda.

Icyo gihe yavuze ko urwo ruganda ruzatangira guteranyiriza imodoka mu Rwanda ruhereye ku modoka zo mu bwoko bwa VW Polo, VW Passat [zo mu bwoko bwa Sedan] na VW Teramont (SUV).

Mu nama ya Transform Africa 2018 iri kubera i Kigali hagaragaye imodoka z’ubwoko bwa VW Passat ziri gutwara abantu bitabiriye iyo nama zibavanye ku kibuga cy’indege cya Kanome zibajyana kuri Kigali Convention Center ahari kubera inama.

Thomas Schaffer uhagarariye Volkswagen muri Afurika y’Epfo na Clare Akamanzi uhagarariye RDB bamaze gusinya amasezerano y’uko VW izatangira gukorera mu Rwanda

Bamwe mu babonye izo modoka bavugaga ko zigaragaza ko uruganda VW rwaba rwamaze gutangiza imirimo yo guteranyiriza imodoka mu Rwanda.

Ariko Michaella Rugwizangoga uhagarariye VW mu Rwanda yavuze ko igihe cyo gutangira guteranyiriza imodoka za VW mu Rwanda cyigijwe inyuma, bikazatangira mu kwezi kwa Kamena 2018.

Abinyujije ku rubuga rwe rwa Twitter yagize ati “Izi modoka (VW Passats) zavanywe hanze mu rwego rw’ubufatanye uruganda rwa VW rufitanye n’inama ya Transform Africa.

Uru ruganda rwatangaje ko ruzaha akazi abakozi 1000 nirutangira gukorera mu Rwanda. Biteganijwe ko mu Rwanda ruzatangirana ingengo y’imato ya miriyoni 20 z’amadollars.

Mu mwaka wa 2016, nibwo Leta y’u Rwanda yagiranye amasezerano n’uruganda rwa Volkswagen, yo gutangiza uruganda mu Rwanda ruteranya imodoka

Perezida Kagame yemeza ko Ikoranabuhanga ryakwihutisha kwihuza kwa Afurika

Guhera mu ntangiriro za 2000 u Rwanda rwatangiye gukoresha ikoranabuhanga mu gushakisha uko rwakwikura mu bukene bwakurikiye Jenoside yakorewe Abatutsi mu 1994.

Kuva icyo gihe u Rwanda rwatangiye gukora ku buryo buri serivisi zitangwa na gahunda z’ubukungu zashyirwagaho zabaga zishingiye ku ikoranabuhanga.

Ibyo byarufashije mu kwihutisha ubukungu, ku buryo buri mwaka ruzamuka ku kigero cya 7%, ikigero gifatwa nk’ibitangaza ku rwego rw’isi ku gihugu cyari cyarazahaye nk’u Rwanda.

Perezida Kagame akizera ko inzira y’u Rwanda ishobora kubera Afurika isomo, cyane cyane ko uyu mugabane ugifite imbogamizi mu guhuriza hamwe imishinga iganisha ku iterambere.

Agira ati “Hakenewe ko habaho n’ubushake muri politiki kugira ngo natwe duhuze umugabane wacu. Ariko hanakenewe ko hahangwa udushya kugira ngo uko kwihuza kwihutishwe.”

Yabitangaje ubwo yafunguraga ku mugaragaro inama ya Transform Africa, igamije gushaka uko ikoranabuhanga ryatezwa imbere ku mugabane wa Afurika.

Minisitiri w’Ubucuruzi n’Inganda Vincent Munyeshyaka afata "Selfie"

Perezida Kagame yatanze ingero zitandukanye zigaragaza uburyo Afurika igorwa no kwihuza, nyamara ikoranabuhanga ryabigiramo uruhare mu buryo bworoshye.

Ati “Ndabizi ko bamwe mu bari hano bahagaze ahantu henshi ari muri Afurika cyangwa se ahandi mbere yuko bagera inaha. Hari nubwo kugira ngo ugere inaha bigusaba kubanza kunyura mu migi y’i Burayi ukabona kuza mu ya Afurika.”

Kureba andi mafoto menshi kanda AHA

Amafoto: Plaisir Muzogeye

Perezida Kagame ubwo yatangizaga inama ya Broadband Commission

Yabitangaje ubwo yafunguraga ku mugaragaro inama ya Komisiyo y’Umurongo Mugari wa internet hagamijwe Iterambere Rirambye.

Iyi nama ya komisiyo ayoboye afatanyije n’umuherwe witwa Carlos Slim, yayitangije ku mugaragaro kuri uyu wa Mbere tariki 7 Gicurasi 2018. Iyi nama kandi ni igice kimwe mu bigize inama ngari ya Transform Africa iteraniye i Kigali.

Perezida Kagame avuga ko kugira ngo Afurika igere ku bukungu yifuza bisaba ibikorwa remezo bijyanye n’umurongo mugari wa internet ubasha kugerwaho na buri wese mu bushobozi bwe.

Yagize ati “Ingano ya Afurika, imiterere yayo ndetse n’uburyo ituwe bituma tugomba gukoresha uburyo bw’ikoranabuhanga butandukanye kugira ngo tugeze umurongo mugari (ibyogajuru, fibre optic, telefone zigendanwa kuri bose.”

Perezida Kagame avuga ko ikoranabuhanga rikoreshwa muri Afurika ahantu hose haba mu bucuruzi, mu burezi, no mu buzima, rishingiye kuri uyu murongo mugari wa internet.

Asaba ko nk’abayobozi, bakwiye kuyobora impinduka ziganisha mu guhanga ibishya no gushyiraho gahunda n’uburyo kugira ngo umurongo mugari wihutishwe aho byatinze.

Iyi nama yitabirwa n’abantu bakomeye kandi baturutse ku isi hose

Iyi nama ya Transforma Africa ije ari nk’indoheshabirayi ku Rwanda rwiyemeje kuba ihuriro mpuzamahanga ryo kwakira abashyitsi baturutse hirya no hino ku isi.

Iyi nama izamara iminsi ine, si inama gusa ahubwo ni n’ihuriro ry’abantu bakora mu bijyanye no guteza imbere ikoranabuhanga haba muri Afurika no ku isi hose.

Amateka y’u Rwanda n’impinduka byaruranze biri mu bikurura abantu baturutse imihanda yose, kuko bibaha icyizere cy’uko nta kidashoboka.

U Rwanda rufatwa nk’ibitangaza bya Afurika kuva mu myaka ya nyuma y’ubwigenge bw’ibihugu bya Afurika, Abanyarwanda nabo kandi barabigendera. Ibyo byose biri mu bikurura usuye u Rwanda kuko yakirwa n’icyizere cy’igihugu kirangamiye iterambere ritigeze rigerwaho n’undi wese muri Afurika.

Si ibintu byizanye ahubwo byasabye ubuyobozi bufite intego n’abaturage bashaka guhindura amateka yabaranze mu myaka 60 ishize na mbere yahoo.

Inama ya Transform Africa 2018 u Rwanda ruzakira guhera kuri uyu wa mbere, ni kimwe mu bikorwa bigaragaza kugira imitekerereze irenze imbibe (Thinking Big) ku gihugu.

Transform Africa yatangiye ari igitekerezo kigamije kugira u Rwanda igihugu giteye imbere kibifashijwemo n’ikoranabuhanga (Smart Rwanda) yaje guhinduka Smart Africa.

Transform Africa ni ryo huriro rikuru kandi rikomeye kuri uyu mugabane ryavuye mu bitekerezo by’Abanyafurika bigakorwa n’Abanyafurika.

Kwakira iyi nama ku Rwanda kandi ni n’umwanya wo gukomeza gushimangira ko kwakira abagana u Rwanda ari imwe mu ntego igihugu kiyemeje yo gukomeza gufungura imiryanho y’igihugu kandi buri wese uje agataha anyuzwe.

Twabateguriye ibintu bitanu biranga iyi nama bigatuma iba itandukanye n’izindi u Rwanda rwakira:

Amahirwe yo gutahana igishoro

Igishoro ni kimwe mu bigora urubyiruko rufite imishinga y’ikoranabuhanga, cyane cyane ko kuyisobanura mu ma banki biba bigoye. Ariko muri iyi nama urubyiruko ruba rufite amahirwe atandukanye yo guhatana utsinze agahabwa igishoro cyo kuzamura umushinga we.

Uzitabira iri rushanwa azatahana agera muri miliyoni 20Frw

Amwe mu marushanwa azaba ari kuba mu gihe inama ya Transform Africa izaba irimo

Ms.Geek na ryo ni irushanwa ry’abakobwa gusa bakora mu bijyanye n’ikoranabuhanga

Ibiganiro

Iyi nama ihuriramo abantu bakomeye mu gushyiraho politiki zijyanye n’ikoranabuhanga, abaterankunga, abahanga mu by’ikoranabuhanga ndetse n’abandi bantu bakijijwe na ryo. Nta kabuza uba ari umwanya mwiza ku bayitabiriye kuko babasha kwiyumvira uko ahandi bikorwa.

Haba harimo ibiganirongiro bitandukanye n’ibyo dusanzwe tumenyereye muri politiki

Muri iyi nama kandi hakorerwa ’deals’ zitandukanye

Imyidagaduro

Haba hateganyijwe ibikorwa byinshi byo gususurutsa abashyitsi

Abanyabugeni na bo baba babukereye mu myiteguro y’ibyo bazamurika

Ni umwanya mwiza kandi wo kwereka abanyamahanga umuco w’u Rwanda n’uko imyidagaduro yahoo ikorwa. Abafite ibi bikorwa nabo baba babukereye kugira ngo bamare irungu abashyitsi baje mu Rwanda.

Amadovise

Akamaro ko kwakira inama nk’izi ntikagarukira kwicara muri hoteli nziza abantu bakaganira gusa, kuko ari n’umwanya w’Abanyarwanda kumurika ibikorwa bakora cyane cyane ibijyane n’umuco nyarwanda. Abitabirye baba bifuza gutahana urwibutso rw’ingendo bakoze. Kuri iyi nshuro rero ni umwanya mwiza ku bacuruzi bo mu Rwanda gutegurira abanyamahanga bazabagana icyo bazagenda bibukiraho u Rwanda.

Hari ababa baje kumurika ibikorerwa mu Rwanda kandi bakinjiza menshi

Abenshi bafata akanya bagatemera igihugu. Aha ni muri Pariki y’Akagera hasurwa na benshi

Tekinoloji nshya

Akenshi inama ya Transform Africa iba ari umwanya ku Rwanda wo kumurikirwaho tekinoloji nshya zigezweho ku isi. Abitabira izi nama baba biteguye kubona agashya mu duherutse gushyirwa ku isoko ku isi. Ibi nabyo bifite icyo bisobanuye ku gihugu kuko hari aho usanga izo tekinoloji zimaze imyaka irenga itanu zitarahakandagira.

Uwo yasuzumaga irobo yaje kumurikwa

Ababa baje kumurika tekinoloji nshya nabo ntibagira ingano