Perezida Kagame mu kiganiro na bamwe mu bayobozi bahuriye iki kiganiro

Perezida Kagame yemeza ko u Rwanda ari igihugu gito ariko cyahisemo inzira yagutse kugira ngo kiteze imbere.

Yabitangarije mu biganiro yahuriyemo n’abayobozi batandukanye, aho ari mu Bwongereza mu nama y’umuryango wa Commonwealth.

Iki kiganiro cyari kiyobowe na David Cameron wigeze kuyobora u Bwongereza, cyari kibanze ku ntege nke z’ibihugu, iterambere ry’ubukungu n’amajyambere.

Yagize ati “Urugero rw’u Rwanda rutwereka ko intege nke ku bihugu atari ibintu bihoraho. Ni ikibazo gishobora gukemuka."

“Intege nke z’ibihugu, nk’uko tumaze kubibona, ni ikibazo gishobora kugwirira ibihugu bito n’ibinini, ibikennye n’ibikize. Ibi bigira ingaruka ku bwiyongere bw’ubukungu n’iterambere ry’abantu.”

Perezida Kagame yemeza ko u Rwanda ari urugero rw’uko nta gihugu kitakomera

Perezida Kagame yasobanuraga ko u Rwanda rwahisemo kwimika gukorera mu mucyo no gukangurira buri muturage kubazwa ibyo ashinzwe, byose bigamije gufasha igihugu gutera imbere.

Yavuze ko nta kintu gikorerwa mu Rwanda kitagira ugikurikirana cyangwa ngo gisobanurwe uko gikorwa n’impamvu gikorwa, akaba yabisobanuye yifashishije urugero rw’inkunga.

Ati “Mbese abaterankunga bakomeza gutera inkunga ibihugu nta kubaza uko ikoreshwa? Mu Rwanda, twashyizeho uburyo bufasha impande zose kumenya uko inkunga ikoreshwa, n’umusaruro itanga. Abaturage bacu nabo twabahaye umwanya wabo mubyo dukora.”

Perezida Kagame ari mu Bwongereza mu nama y’umuryango wa Commonwealth, uhuriyemo ibihugu 53 byahoze bikolonizwa n’u Bwongereza.

Ibi biganiro bizwi nka ’round table’ byari byitabiriwe n’abayobozi batandukanye bakomeye ku isi

Perezida Kagame n’Igikomangoma Harry

Henry ni igikomangoma cyo mu bwami bw’u Bwongereza bwishyize hamwe, usanzwe ukomeye muri iki gihugu.

N’ubwo ibyo baganiriye bitatangajwe ariko amakuru agera kuri Kigali Today aremeza ko batabuze gukomoza ku bukerarugendo n’ibungabunga ry’ibidukikije.

Mu Kuboza umwaka ushize Igikomangoma Henry yagizwe Perezida w’Umuryango African Parks, umuryango ushizwe kurengera no kubungabunga pariki n’ahantu nyaburanga muri Afurika.

Uyu muryango ukaba ukora aka kazi ufatanyije na leta na guverinoma z’ibi bihugu n’abaturage. Mu Rwanda uyu muryango ushinzwe Pariki y’Akagera, isanzwe yinjiza arenga miliyari 1,5Frw.

Igikomangoma Henry asanzwe akunda ibijyanye no kurengera ibidukikije. Amakuru avuga ko umuryango we w’ibwami wagize uruhare mu kwimura inzovu muri Malawi, igikorwa gifatwa nka kimwe mu bikomeye ku isi byo gukura inzovu zivanwa hamwe zijyanwa ahandi.

U Rwanda by’uwihariko narwo ruhagaze neza mu kurengera ibidukikije, aho Guverinoma y’u Rwanda yahise inashyiraho gahunda yo gusangiza abaturage 10% by’amafaranga aturuka mu madovize pariki zo mu Rwanda zinjiza.

Mu kwezi k’Ugushyingo Perezida Kagame yanahawe igihembo cy’umuperezida wateje imbere ubuyobozi budasiga inyuma kurengera ibidukikije n’inyamaswa.

Pereda Kagame yagiye mu Bwongereza kwitabira inama y’abakuru b’ibihugu na za guverinoma 53 bagize uyu muryango uhuriyemo ibihugu byahoze bikolonizwa n’u Bwongereza.

Umunyamabanga mukuru wa Common Wealth, Patricia Scotland, aheruka guhura na Perezida Kagame

Aya makuru yatangajwe na ambasaderi w’u Rwanda mu Bwongereza Yamina Karitanyi anashimangirwa na ambasaderi w’u Bwongereza mu Rwanda Jo Lomas.

Umuryango wa Commonwealth washinzwe n’Umwamikazi w’u Bwongereza, nyuma y’uko ibihugu byinshi u Bwongereza bwakolonije biboneye ubwigenge.

Uyu muryango wagiriyeho mu rwego rwo gufashanya hagati y’ibi bihugu, byinshi muri byo byari byugarijwe n’ubukene, kugira ngo bizamurane.

Mu 2009 ni bwo u Rwanda rwinjiye muri uyu muryango ugizwe n’ibihugu 53 biherereye ku migabane yose y’isi u Bwongereza bwigeze gukoroniza.

Stade ya Cricket ya Gahanga iri mu mishinga yubatswe biciye mu nkunga ya Common Wealth

Kuva rwakwinjiramo hari inyungu zitandukanye rwawugiriyemo, zirimo gufatanya n’ibindi bihugu biwugize guharanira uburenganzira bwa muntu, guteza imbere urubyiruko no kurengera ibidukikije.

Perezida Kagame nawe ubwe ari mu bemeza ko uyu muryango ufite akamaro, aho yagize ati “Commonwealth ni umuryango ufite imbaraga zituruka ku gushyirahamwe kw’abawugize.

"Abagize uyu muryango nibatabyitaho ngo bahurize hamwe bizatuma ucika intege. Ariko nidushyira hamwe nta kizatunanira.”