col Rugambwa Albert yabwiye urubyiruko kwitegura kumenera igihugu amaraso kuko ari cyo kiguzi

Yabibasabye kuri uyu wa 01 Gashyantare 2018 ubwo hizihizwaga umunsi w’intwari ku rwego rw’Akarere ka Nyagatare, wabereye Mu mudugudu wa Kagitumba akagari ka Kagitumba.

Muri uyu murenge wa Matimba wabereyemo ibi birori, ni ho ahatangirijwe urugamba rwo kubohora igihugu ku ya 01 Ukwakira 1990.

Ibi birori byitabiriwe n’urubyiruko rwaturutse mu mirenge itandukanye yo mu Karere ka Nyagatare

Col Rugambwa yagarutse ku butwari bwaranze Maj Gen Gisa Fred Rwigema wari ufite byose mu gihugu cya Uganda, ariko akabita akaza kurwanira igihugu kugira ngo abari barahejejwe hanze babone uburenganzira mu gihugu cyabo.

Ati "Buri guhugu kigira abakirema, Nyakwigendera Rwigema yasize imitungo yose aza ku rugamba kandi abizi ko yahasiga ubuzima kuko urugamba si ubukwe, yarwaniraga twese ngo tubone igihugu bamwe bari barahejwemo."

Col Rugambwa yavuze ko bakoze imyitozo ya Gisirikare ari 800 bagasoza urugamba ari 6 gusa

Agaruka ku mateka y’urugamba, Col Rugambwa yavuze ko kugira uyu mudendezo Abanyarwanda bafite bawukesha amaraso y’abarwitangiye.

Ati "Twakoze imyitozo ya gisirikare muri 1989 turi 800, ubu dusigaye turi 6 gusa. Mwebwe rubyiruko mumenye ko ikiguzi cy’igihugu ari amaraso, mwitegure kuyatanga niba mushaka kuguma mu mudendezo mufite."

Yishimiye ko ibyo baharaniye byagezweho kuko ubu uwiga atsinda akajya mu ishuri yahamagawemo hatarebwe ubwoko, ndetse ngo bamwe banahabwa buruse zo mu mahanga, bakajya kwigayo kubera amanita, hatarebwe amazuru, akarere cyangwa se inkomoko y’umuntu.

Urubyiruko rwitabiriye uyu munsi mukuru w’Intwari rumaze kumva izi mpanuro, rwatashye rwiyemeje kugira uruhare mu kurinda no gusigasira ibyagezweho.

Rwaniyemeje kandi kuzatera ikirenge mu cya bagenzi babo b’urubyuruko banze akarengane n’ubugome bwakorerwaga Abanyarwanda, bagatanga ubuzima bwabo bagamije gusigira ababyeyi, abavandimwe ndetse n’inshuti zabo igihugu kizira umwiryane.

Perezida Kagame yunamiye Intwari zishyinguye ku gicumbi cy’Intwari

Iki gikorwa asanzwe agikora buri mwaka aho asura igicumbi cy’Intwari giherereye i Remera, akunamira intwari ziharuhukiye, akanahashyira indabo.

Kuri uyu wa Kane tariki 1 Gashyantare 2018, nabwo aherekejwe n’abandi bayobozi bunamiye intwari zihashyinguye.

Muri iki gicumbi haruhukiye Intwari zirimo Gen. Maj Fred Gisa Rwigema n’umusirikare utazwi bari mu cyiciro cy’Intwari z’Imanzi.

Abo mu muryango wa Fred Gisa Rwigema bashyira indabo ku mva ye

Harimo kandi Umwami Mutara III Rudahigwa, Rwagasana Michel, Uwiringiyimana Agathe, Niyitegeka Félicité n’Abanyeshuri b’i Nyange banze kwitandukanya ubwo baterwaga n’abacengezi mu 1997. Aba bari mu cyiciro cy’Intwari z’Imena.

Insanganyamatsiko y’uyu mwaka igira iti "Dukomeze Ubutwari, Twubake u Rwanda twifuza."

Mu mirenge yose igize u Rwanda naho abaturage bizihije uyu munsi, hakaba hari n’aho bagiye bashimira abaturage bagiye bagaragaza ubutwari.

Kureba andi mafoto kanda AHA

Parmehutu bisobanura “Parti du Mouvement de l’Emancipation Hutu”. Yatangiwe n’Abahutu b’Abahezanguni ihitana benshi mu Batutsi abandi barahunga, barimo umwami Kigeli V.

Akazi k’uyu musore kari ako gushishikariza urubyiruko rw’Abahutu kwanga Abatutsi no kubatsemba.

Ku myaka 19 y’amavuko ni bwo yari ahawe ako kazi katoroshye, ariko we ntiyakoresha ububasha yari ahawe ngo atandukanye Abanyarwanda ahubwo ahitamo kubunga.

Inkuru tugiye kubagezaho ni iya Damien Gatoyire, umusaza ufite imyaka 78 y’amavuko ubu, utuye mu Kagali ka Gasange mu Murenge wa Gatsibo mu Ntara y’i Burasirazuba.

Kuri iki gihe bigaragara ko ananiwe kubera imyaka ariko iyo umuvugishije haba muganira cyangwa kuri telefone, aba yibuka adasobwa buri gice cy’ubuzima bwe kuva mbere ya 1959 kugeza ubu. Agira ati “Cyari igihe gikomeye.”

Yabitangarije umunyamakuru wa Kigali Today wari wamugendereye mu rugo rwe aho atuye i Gasange.

Byagenze gute kugira ngo abe intwari?

Ubwo Guverinoma yari iyobowe na Perezida Gregoire Kayibanda yahirikaga ubutegetsi bwa cyami, yahise ahabwa inshingano zo kuyobora urubyiruko aho yari atuye muri komine Giti, ubu habaye mu Karere ka Gicumbi mu Ntara y’Amajyaruguru.

Ati “Yari misiyo mbi ariko nahisemo icyerekezo kimwe cyo gufata inshingano zitandukanye n’izo bari bampaye. Ahubwo natangiye gushishikariza urubyiruko kutumvira izo gahunda za guverinoma.”

Ibyo Gatoyire yakoze nubwo byari byiza ariko byashoboraga kumutwara ubuzima. Ariko avuga ko yari yiteguye icyaba cyose. Ati “Gufata icyemezo cy’ubutwari ntago ari ibintu bisanzwe. Ni ibintu bikuzamo utanabitekerejeho.”

Ubwo ibikorwa byo guhiga bukware Abatutsi byari birimbanyije, Gatoyire we yacaga ku ruhande agashishikariza urubyiruko kutivanga muri ibyo bikorwa byibasiraga inzirakarengane.

Ati “Nk’urugero, nakundaga kwibutsa urubyiruko rw’Abahutu ko hari Abatutsi bahaye inka ababyeyi babo nkabasaba kububaha nk’uko ababyeyi babo babikora. Ibi hari ukuntu byabagaruragamo ubumuntu.”

Ibikorwa bye byagize akamaro kuko nta Mututsi wigeze agirirwa nabi aho yari atuye mu Murenge wa Kigabiro mu 1959, mu 1973 n’i 1994.

Ubwo Kayibanda nawe yahirikwaga ku butegetsi na Perezida Juvenal Habyarimana mu 1973, Gatoyire yakomeje kuzamuka mu ntera.

Nubwo nta mashuri yari afite, ariko nta muntu wamurushaga gukundwa iwabo muri Kigabiro. Ku butegetsi bwa Habyarimana, yagizwe Umunyamabanga Nshingwabikorwa w’umurenge, na nyuma ya Jenoside akomeza akazi kugeza mu 2006 habaye amavugurura mu nzego z’ibanze.

Ubwo Jenoside yakorewe Abatutsi yabaga mu 1994, Gatoyire we yari yaramaze kunga abaturage bose bagize segiteri yayoboraga.

Yarokoye Abatutsi benshi akoresheje imbunda ya karachinikov “AK47”

Abifashijwemo n’imbunda yari yarahawe yo kwirindisha, Gatoyire yayikoresheje mu gufasha Abatutsi guhunga.

Ati “Komini Giti yari ituranye na Komini Murambi yari yarabaye kimomo kubera ubwicanyi bwakorerwaga Abatutsi buyobowe n’uwitwa Jean Baptiste Gatete. Icyo gihe nari maze kumenyekana ko mpisha Abatutsi, bituma nanjye batangira kumpiga. Rimwe na rimwe nakoreshaga imbunda nari mfite nkarinda Abatutsi.”

Gotoyire avuga ko yari afite ubwato yahishaga mu nzu ye, bukaba ari nabwo yakoreshaga ku gucikisha Abatutsi banyuze mu kiyaga cya Muhazi. Ati “Nabikoraga mu gihe cy’ijoro buri munsi.”

Ariko ntiyibuka umubare w’abo yakijie. Ati “Bari benshi. Bamwe muri bo bazaga kwaka ubuhungira iwanjye, mu gihe abandi bo nabafashaga kwambuka bahungira mu bihugu duturanye.”

Yashimwe na Guverinoma

Mu gihe igihugu cyari muri Jenoside Abatutsi bicwa umusubizo, abantu bake babashije kugira ubutwari nk’ubwa Gatoyire.

Mu 2015, guverinoma yabaruye abagera ku 6.000 bagaragayeho ubutwari ariko 17 nibo bagaragaje ubutwari ndengakamere, bahabwa “Umudari w’Umurinzi w’Igihango.”

Mu ijambo rye muri uyu muhango wabaye muri 2015, Perezida Paul Kagame yavuze ko ibyo abo bantu bakoze nta muntu uwo ari wese wabishobora.

Ati “Iyo ndebye aba bantu n’ibyo bakoze, numva nanjye ntari gushobora ibyo bakoze cyane cyane ko babikoze nabo bishobora kubagiraho ingaruka.”

Gatoyire na bagenzi be bashimiwe n’Umuryango wa Unity Club, iyoborwa na Madame Jeannette Kagame ikaba yarashinzwe n’abagore b’abayobozi n’abigeze kuba abayobozi.

Unity Club yiyemeje kwimakaza ubwiyunge n’amahoro kugira ngo u Rwanda rubashe kugera ku iterambere rirambye.

Gatoyire ufite abana icyenda, yashimwe mu ba mbere kubera kugaragaza ubumwe, kubaha ubutabera n’ikiremwamuntu muri Jenoside na nyuma yayo.

No mu gace atuyemo abantu baracyamwubaha, nk’uko bitangazwa n’Umunyamabanga Nshingwabikorwa w’Umurenge wa Gasange, Jean Claude Ndayisenga. Ati “Ubutwari bwe ntago buzibagirana. Mu karere kose azwi nk’intwari.”

Habaye ikiganiro cyo kuvuga ku mateka y’ubutwari bwo mu Rwanda

Ni ku nshuro ya mbere mu Banyarwanda baba muri aka gace, Abanyarwanda bari bizihije Umunsi w’Intwari z’u Rwanda, usanzwe wizihizwa tariki 1 Gashyantare buri mwaka.

Mu birori byabaye byaranzwe n’busabane ndetse n’ikiganiro ku mateka y’ubutwari mu Rwanda, bahawe na Brig. Gen Nyakarundi uhagarariye ingabo z’u Rwanda i Washington.

Umusi w’Intwari wizihizwa kw’itariki ya mbere Gashyantare buri mwaka, ubu ukaba ugiye kwizihizwa ku nshuro ya 24.

Brig Gen Nyakarundi yabasobanuriye ko ubutwari mu Rwanda bwahozeho kandi uwagiraga ubutwari buruta ubw’abandi mu ntambara zo kwagura u Rwanda yagororerwaga, akanahabwa Impeta cyangwa Umudari w’ubutwari n’Umwami.

Yagize ati “Ibikorwa by’umuntu nibyo bimugira Intwari. Twese Abanyarwanda aho turi, dukomeze duharinire gukora ibikorwa by’Ubutwari byubaka u Rwanda Twifuza, duhereye aho tuba.

“Murangwe n’indangagaciro Nyarwanda, mwigishe abana Ikinyarwanda, muharanire kandi mukomeze kwitanga, kwitabira ibikorwa by’umuryango, gushyira hamwe n’ibindi nk’ibyo byubaka.”

Yavuze ko uyu muco wo gushima Abanyarwanda babaye intwari wongeye kugarurwa na Leta y’Ubumwe nyuma ya Jenoside yakorewe Abatutsi mu 1994.

Yavuze ko abashimwa ari Abanyarwanda baranzwe no gukunda igihugu kugera ubwo bakitangiye. Bagomba kuba kandi bararanzwe n’Ubupfura, kwitanga bikomeye, kubera abandi intangarugero, kudacika intege kubera inzitizi zitandukanye no gushishoza.

Yavuze ko u guverinoma yongereyeho n’izindi mpeta, zahawe inshuti z’u Rwanda zakoze ibikorwa by’indashyikirwa.

Habayeho n’ubusabane ku Banyarwanda