Mme Seraphine Mukantabana, umuyobozi w’ikigo gishinzwe gusubiza mu buzima busanzwe ingabo zavuye ku rugerero

Aratangaza ibi mu gihe Umuryango RPF-Inkotanyi uri kwizihiza isabukuru y’imyaka 30 umaze ubayeho.

Mme Seraphine Mukantabana wabaye Minisitiri ushinzwe gucyura impunzi, ni umubyeyi w’imyaka 56 y’Amavuko. Yavukiye i Kimbogo mu Karere ka Rusizi mu mwaka wa 1961.

Umunyamakuru wa Kigali Today yaramusuye bagirana ikiganiro kirambuye ku bijyanye n’uruhare rw’umugore mu guca ubuhunzi no guteza imbere imiyoborere myiza.

Umunyamakuru: Tunyurire mu mateka yawe mbere yo guhunga muri 1994.

Mme Mukantabana: Amateka y’ubuhunzi ku Banyarwanda kuva muri 1959 nanjye nakuze nyumva, ndetse na ba mama wacu bahungiye muri Kongo, bakajya baza kudusura cyangwa natwe tukajya kubasura.

Natangiye gusa n’aho mbisobanukirwa cyane mu mbwirwaruhame z’uwari Perezida Juvenal Habyarimana, wasabaga impunzi ziri hanze gufata ibyangombwa by’aho bahungiye, kuko yavugaga ko u Rwanda rwuzuye.

Ariko nk’umuntu ubirebera hanze, akababaro n’agahinda k’impunzi sinakumvaga icyo gihe; nakumvise nanjye bimbayeho guhera muri 1994; mu gihe cya Jenoside yakorerwaga Abatutsi.

Twatangiye kurara rubunda, tuva mu rugo nta kintu tujyanye turinda twambuka muri Kongo, nta kindi nari mfite uretse umwenda nari mpetsemo umwana muto.

Twararaga twirundanije ku gasozi, umuntu yibaza ati “Ese turarya?” Ubuzima bwari butandukanye 100% n’ubwo twari dusanzwemo.

Mme Seraphine Mukantabana ahamya ko nta cyiza cy’ubuhunzi

Twatangiye ubuzima bw’agasuzuguro, aho na mayibobo ivuga ngo turi “Rwandais” (turi Abanyarwanda), ukumva ni nk’igitutsi; bakatwirukana ngo ‘subira iwanyu’.

Umunyamakuru: Ndabyumva; ni iki watangiye gukora nyuma yo kubona ibyo byose bikubaho?

Mme Mukantabana: Nagiye ndi kumwe n’abana, gufata ibiryo aho babirwanira, mbona umuntu ushaka gutema umufuka kugira ngo abiyorere hasi, ariko yarahushije atema umuntu bituma nzinukwa.

Nahise mbwira umugabo (wanjye) ko ngiye gushaka ikiraka ku muzungu wayoboraga umushinga (ONG) hafi aho, ngira amahirwe imvura iragwa, njya kugama ahantu hari utwana tw’impinja nsanga imivu y’amazi yenda kudutembana.

Natangiye gutanga amabwiriza ari nako nterura utwana tumwe utundi nkaduheka; haza umuzungu ati “Wowe uhawe kuyobora icyo gihande’, uko niko natangiye akazi nkajya mpembwa amadolari atatu ku munsi, akadutunga twese mu rugo (umugabo n’abana).

Twavuye i Kibumba twambukiranya Kongo-Kinshasa yose twerekeza muri Kongo-Brazzaville; ni urugendo rw’amaguru twamazemo umwaka kuva muri 1996-1997 (hareshya na kilometero 2,224.5(km), ariko twagendaga duca ingando.

Twagezeyo abantu bose barananiwe bikabije, navuga ko ari jye wakanyakanyaga; benshi batangiye kujya bapfa umusubirizo, nibwo natangiye gukora ubuvugizi no kwandikisha umuryango w’Abanyarwanda i Brazzaville, nyuma yaho ubufasha bwatangiye kutugeraho.

Twarafashanyaga ariko jye ngira amahirwe hari umuzungu w’inshuti yacu waje kunyoherereza imishani ikora fotokopi y’impapuro, ni ibyo byadutungaga.

Umunyamakuru: Ubwo waba waratekerezaga kuzongera kugaruka mu gihugu cyawe?

Mme Mukantabana: Ni icyo nta kindi cyambagamo; ariko nta makuru mazima ku gihugu cyacu twabonaga uretse amabi y’abavugaga ibinyoma; naribazaga nti ‘Ese ko abandi bagabye urugamba bagataha mu gihugu cyabo, kuki twe tutabikora!’

Ariko habaga harimo kwibeshya kuko abandi bagabye urugamba kubera ko babuzwaga gutahuka, ariko ku ruhande rwacu siko byari bimeze ahubwo ubuyobozi bwadushishikarizaga gutahuka.

Ntabwo byari ngombwa gutaha ku ngufu, n’ubwo twari tugifite ubwoba bw’uko nta mahoro aragaruka. Guhera muri 2004 nibwo twatangiye kubona abantu batubwira ko mu Rwanda ari amahoro.

Minisitiri Mukantabana avuga ko muri 2004 aribwo Abanyarwanda babaga i Brazzaville babonye amakuru avuga ko mu Rwanda ari amahoro

Twaje gusaba HCR (Ishami ry’umuryango w’abibumbye ryita ku mpunzi) kutuzana mu Rwanda kureba; naraje ndatembera ndetse mbonana n’abayobozi bamwe na bamwe; ariko naje kubuzwa kuza mu Rwanda ubwo bafataga umubyeyi wanjye bakamufunga, mbibona nk’akarengane, nubwo nyuma yaho yaje kurenganurwa arafungurwa.

Mu mwaka wa 2010, Nyakubahwa Perezida wa Repubulika yaradusuye muri Congo-Brazzaville, nyuma yaho hakomeje kuza n’abandi bayobozi baje kuduhumuriza, bijyana n’uko mu Rwanda habereye Inama y’Umushyikirano icyo gihe.

Abana banjye bitabiriye Umushyikirano, barakirwa neza bafata amakuru yose, bagarutse barashimye u Rwanda, barabitwereka jye na Papa wabo, tubemerera gutaha natwe twiyemeza ko nta gisibya muri 2011 tuzataha.

Natangiye gukangurira impunzi nayoboraga kugira ngo baze dutahane, bamwe bishimira icyemezo nafashe abandi barakinenga, ndetse ndanabasezera mbabwira ko ntazongera kubayobora.

Naje nzanye n’abana babiri b’impfubyi; nageze mu Rwanda ku itariki 11 Kanama 2011 ndakirwa neza, ndetse na Papa yari ahari. Bampaye aho ndara ariko ntangira kwibaza aho njya gushaka akazi.

Natangiye kwegeranya impapuro njya gusaba akazi muri Minisiteri y’imicungire y’ibiza no gucyura impunzi (MIDIMAR).

Bitewe n’uko kari akazi kadahoraho, naje kugirwa Komiseri muri iyo Komisiyo ya RDRC mbere y’uko mba Ministiri muri MIDIMAR.

Aho hose nabaga mfite aho mpuriye no gufasha umuntu ukennye, umuntu ubabaye, ibi ni ibintu byanjye.

Ako kazi kose nagiye ngakora nishimye kugeza n’ubu kuko ntabwo byumvikana kugirirwa icyizere nari umuntu w’impunzi ndetse nari muri ruhande rurwanya igihugu nahunze.

Ubu ni ubudasa bw’igihugu cyacu kandi bugamije ko buri Munyarwanda yiyumva mu gihugu cye, ndetse binashimangira ubumwe n’ubwiyunge.

Umunyamakuru: Dusoza, ni uruhe ruhare Umunyarwandakazi yagira kugira ngo ateze imbere imiyoborere n’imibereho myiza?

Mme Mukantabana: Ubwo buzima bugoye bwose, umugore niwe ubabara cyane; hari aho umugabo agera akabudika, nawe akamera nk’umwana.

Ariko umugore n’ubwo byamuyobera bite, arakutiriza agashakisha abana bakabona icyo kurya. Nanone abagore ni bo bamenya ko ahantu hari amahoro cyangwa adahari, kuko abagabo bo bazanamo inyungu nyinshi zirimo iza politiki; yabona ukuri akakwirengagiza.

Aho Makantabana akiri Minisitiri wa MIDIMAR yari yasuye impaunzi ari kumwe n’abakozi b’ishami ry’umuryango w’abibumbye wita ku mpunzi

Muri iki gihugu cyacu hari amahoro; umuntu ufite umutima ushaka kureba akabona inzu zizamuka, ntabwo wakubaka inzu ahatari amahoro; ntiwavuga ngo nta mahoro umuntu akinga urugo rwe akajya mu kazi akagaruka, umwaka ugashira, ibiri igashira.

Abakiri mu buhunzi rero nabagira inama yo kudakomeza gushakisha impamvu zatuma bataza, bagahitamo gutaha kuko umubyeyi gito araga umwana we ubuhunzi.

Bitandukanye ariko n’umuntu ufite uko abayeho hanze, aho kugira ngo ate ibintu bye atahe yongere atangire ubuzima bundi bushya, ahubwo yashaka ibyangombwa by’u Rwanda agakomeza agakora, ariko igihe cyose ashakiye akaba yaza mu gihugu cye.

Umunyamakuru: Muri iki gihe Umuryango RPF-Inkotanyi urizihiza isabukuru y’imyaka 30, ese ahazaza hawo urahabona ute?

Mme Mukantabana: Urebye aho igihugu cyavuye muri 1994 n’aho kigeze ubu, navuga nti ‘harakabaho RPF-Inkotanyi’. Politiki igihugu gifite ni politiki yubaka ishingiye ku mashyaka ya Politiki menshi kandi buri wese akaba avuga uko yakubaka igihugu cye.

Iyi gahunda yo kubaka u Rwanda ruzira amacakubiri n’inzangano nituyikomeza, iki gihugu kizakomeza kuba icyigererezo, RPF rero imyaka imaze, ikoze byinshi byiza, navuga nti “RPF komereza aho.”

Mukantabana ubwo yahaga ikiganiro abahoze mu mitwe yitwaje intwaro bari bari mu kigo cya Mutobo

Kagame mu muhango wo kwizihiza isabukuru y’imyaka 30 umuryango FPR-Inkotanyi umaze ushinzwe

Yabitangarije muri kongere y’umuryango FPR-Inkotanyi kuri uyu wa Kane tariki 14 Ukuboza 2017, yabereye ku cyicaro cya FPR giherereye i Rusororo.

Yavuze ko umuryango wa FPR-Inkotanyi washinzwe kugira ngo uhe Abanyarwanda ubumwe n’umurongo uganisha ku hazaza habereye abatuye u Rwanda.

Yavuze ko FPR yashakaga guha Abanyarwanda agaciro n’umutekano bari bambuwe, ariko bamwe mu baharaniye ko bigerwaho ntibakomeza uwo murongo ahubwo bashyira inyungu zabo imbere y’inyungu rusange z’abo baharaniye kubohora.

Yagize ati “Abo banyamuryango bagiye batatira ayo mahame y’umuryango bagashyira inyungu zabo bwite imbere y’inyungu z’Abanyarwanda bose cyangwa imbere y’iz’umuryango FPR-Inkotanyi, icyo gihe bishyize mu ntege nke mu maso y’abo banyamahanga.”

Kagame yavuze ko ibyo biha urwaho umuntu wananiwe kurwanya Abanyarwanda aturutse hanze, bikamworohera kuko ahera kuri abo bari mu muryango akabakoresha mu nyungu ze.

Yavuze ko ikibabaje ari uko nabo iyo icyo bakoreshwa kirangiye bajugunywa bagasigara babayeho bicuza.

Ati “Bababwira ko nibagerageza kujya muri iyo nzira, bazababa iruhande bakabafasha (…), uva hano barakugize igitangaza nawe ari ko wabyumvaga ndetse ushaka kuba umuyobozi w’igihugu, byananirana ugashimishwa n’uko bagutwaye iwabo uri umurinzi kuri banki cyangwa kuri kiyosike cyangwa wirirwa uterura amakarito ya caguwa.”

Yavuze ko ariko abaturage b’u Rwanda bareba kandi ari bo bahitamo uvuga ukuri n’utakuvuga.

Yibukije abanyamuryango ba FPR-Inkotanyi ko imyaka 30 uyu muryango umaze ari umusingi ukomeye kuko hari ibintu byinshi u Rwanda rumaze gukora. Yavuze ko ariko imyaka 30 yibutsa abanyamuryango ba FPR-Inkotanyi ko ubuzima bwabo atari ho bugarukira.

Perezida Kagame ageza Ijambo ku banyamuryango ba FPR Inkotanyi

Yabitangaje kuri uyu wa Kane tariki 14 Ukuboza 2017, ubwo hizihizwaga isabukuru y’imyaka 30 umuryango FPR-Inkotanyi umaze ushinzwe.

Yagize ati “Nk’abanyamuryango ba RPF, ntidukwiye kwirata ngo hari ibyo abantu bakwiye kutwigiraho. Ibyo bitandukanye n’abo turibo n’indangagaciro zacu. Mureke ahubwo duhe imbaraga gukemura ibibazo no guhangana n’ibibazo tutarabasha gukemura tubishakire ibisubizo.”

Yavuze ko uyu muco umaze no kugera mu bato, avuga ko bikomeje nta hazaza Abanyarwanda baba bari gusigira abazabaho ejo.

Yavuze kandi ko hari ibibazo byinshi u Rwanda rugihanganye nabyo, akaba ariyo mpamvu bikwiye kwibandwaho ku gushakirwa umuti aho kwirata bike byagezweho.

Ati “Dukwiye guhora twibaza ngo ni uruhe rugero dutanga, duha urubyiruko? Umurage dukwiye kubaha ni uwo kureba uko twakubaka igihugu cyacu no gukomeza abo turibo turushaho kubaka ubumwe bwacu.”

Abanyamuryango ba FPR Inkotanyi bitabiriye Kongere y’Umuryango i Rusororo

Iyi si inshuro ya mbere Perezida Kagame asabiye mu ruhame ko iyo mvugo yo “kwigira ku Rwanda” icika mu Banyarwanda.

Yatangaje ko n’abayobozi bakuru ajya abibasaba kugira ngo Abanyarwanda barebe ibibateza imbere aho guhugira mu magambo.

Andi mafoto menshi kanda hano

Mkapa wigeze kuba Perezida wa Tanzania niwe wari umushyitsi mukuru muri iyi nama

Yabitangaje kuri uyu wa Kabiri tariki 12 Ukuboza 2017, ubwo yagezaga ijambo ku bitabiriye inama mpuzamahanga yateguwe n’Umuryango FPR mu rwego rwo kwizihiza isabukuru y’imyaka 30 uyu muryango umaze ushinzwe.

Yavuze ko Perezida Kagame yagize uruhare rukomeye mu gutuma u Rwanda rugera kuri byinshi, bityo akaba abishimirwa na benshi ku mugabane wa Afurika. Yagize ati “Perezida Kagame yagize uruhare rukomeye mu bikorwa by’iterambere tubona mu Rwanda.”

Yasabye kandi ibihugu bya Afurika gukora ibishoboka byose bigaha urubyiruko icyizere cy’ubuzima bwiza, ku buryo ruhindura ibitekerezo byo kumva ko ubuzima bwiza buba i Burayi gusa.

Bazivamo, umuyobozi wungirije wa FPR-Inkotanyi yavuze ko u Rwanda rutakiri insina ngufi

Umuyobozi wungirije wa RPF-Inkotanyi, Christophe Bazivamo yavuze ko ibihugu bya Afurika bikwiye kureka kurangwa n’umuco wo kwikubira cyane cyane ku mashyaka aba yatsinze amatora.

Ati “Ndasaba ibihugu bitandukanye bya Afurika ko byajya bisangira ubuyobozi aho kwiharira byose.”

Iyi nama yitabiriwe n’abayobozi n’abashakashatsi baturutse mu bihugu bitandukanye .Ikaba ari imwe mu bikorwa bitegura kwizihiza isabukuru y’imyaka 30 Umuryango FPR-Inkotanyi umaze ushinzwe.

Madame Jeannette Kagame yari yitabiriye iyi nama

Iyi nama iraganira ku nsangamatsiko igira iti "Kwibohora kuganisha ku iterambere: Guteza imbere no guha agaciro Afurika".

Iyi nama yatumiwemo abahanga n’abashakashatsi baturutse hirya no hino ku isi

Inama yabereye ku Cyicaro gishya cya FPR-Inkotanyi

Madame Jeannette Kagame nawe yari yitabiriye iyi nama

Byatangajwe na Hon. Odda Gasinzigwa mu nama nkuru idasanzwe y’ihuriro ry’abagore bari mu muryango FPR Inkotanyi, kuri uyu wa Gatandatu tariki 2 Ukuboza 2017. Iyo nama iri muri gahunda yo gukomeza kwizihiza imyaka 30 uyo muryango umaze.

Yagize ati “Inkotanyi zijya ku rugamba zari zifite intego yo kubohora igihugu Abanyarwanda bamwe bari baravukijwe. Iyo ntego rero no gukorera hamwe ni byo byatumye zitsinda urugamba kandi n’amagore bafashe iyambere mu gutabara.”

“Ndagira inama rero abagore yo gukora nk’Inkotanyi niba bashaka kugera ku ntego bihaye ibaganisha ku iterambere.”

Hon. Oda Gasinzigwa ari mu batanze ikiganiro

Rwiyemezamirimo witwa Christella Kwizera wize ‘Engineering’ nyuma ya Jenoside, ubu akaba afite ikigo cye gikora iby’amazi (Water Access Rwanda), avuga ko atigeze abona ihezwa.

Ati “Leta iyobowe na FPR Inkotanyi ntacyo itampaye, nakuze mbona mfatwa kimwe na basaza banjye bitandukanye na kera kuko narize ndaminuza kimwe nabo, ubu nkaba nikorera. Mfite kandi icyizere cy’uko imbere ari heza kuko Leta yacu ikomeje kwita kuri buri Munyarwanda n’abagore by’umwihariko.”

Avuga kandi ko gukora ari kare “Ni ugukora umuntu agifite ingufu kuko uzabasha kubika amafaranga uzakenera umaze gukura akakugoboka, naho nubika imbaraga uzazikenera ntazo ugifite.”

Abagore bagize ihuriro ry’abagore rishamikiye ku muryango FPR bari babukereye

Hon Mureshyankwano Marie Rose, we yavuze ko umugore yatangiye kugira agaciro kuri Leta iyobowe na FPR Inkotanyi.

Ati “Kera umugore yashoboraga kuba akora akazi ka Leta ariko atazi amafanga ahembwa ahubwo azwi n’umugabo kandi ntagire n’uruhare mu kugena uko akoreshwa. Iyi Leta ni yo yadusubije agaciro kuko nta murimo n’umwe wemerewe umugabo umugore atakora, harebwa ubushobozi, ni ubudasa bwayo.”

Muri iyi nama, abagore bose intero ni imwe yo kwishakira ibisubizo by’ibibazo bahura na byo, cyane ko ngo Leta ibashyigikiye.

Iyi nama irategura isabukuru y’imyaka 30 umuryango FPR umaze ushinzwe

Umuyobozi wa FPR Inkotanyi mu Karere ka Gasabo Rwamurangwa Steven mu mirimo yo kubaka ikigo Mbonezamikurire mu Kagali ka Gasagara

Iki kigo kizuzura mu mpera z’uku kwezi, gifite ubushobozi bwo kwakira abana barenga 100, kikazatwara asaga miliyoni 40 nk’uko Umuyobozi w’Umuryango wa FPR mu Karere ka Gasabo, Rwamurangwa Steven yabitangaje.

Yagize ati" Iki kigo kizaba gikubiyemo ibikorwa bikomatanyije byita ku mikurire y’ umwana kuva agisamwa kugeza igihe avukiye, ndetse bikita no ku mikurire ye kugeza yujuje imyaka itandatu".

Imirimo yo kubaka iki kigo irarangirana n’ukwezi k’ukuboza

Iki gikorwa kandi ngo kigamije kunganira ababyeyi mu gutanga uburere bufite ireme, kugira ngo abana bazavemo Abanyagihugu bazima banyuze mu nzira zifatika z’imikurire.

Mutesi Bernadette uhagarariye Urugaga rw’abagore b’abanyamuryango ba FPR Inkotanyi mu Kagali ka Gasagara, yavuze ko iki kigo kije kuruhura abagore bo muri aka gace bajyaga babura aho basiga abana babo bato bajya ku turimo twabo.

Ati" Abenshi mu bagore bo muri aka gace batunzwe no guhinga ndetse n’ubucuruzi, ariko bagorwaga cyane no kubona aho basiga abana babo bagiye mu kazi, kandi nta n’ubushobozi bufatika bafite bwo kwishyura abakozi babasigarana"

Yakomeje agira ati "Iki kigo kije kutubera igisubizo kandi kiranaturuhuye nk’ababyeyi, niyo mpamvu tutazahwema gushimira Umuryango wa FPR Inkotanyi udusshoboza ibi byose".

Ku bijyanye no kwizihiza isabukuru y’imyaka 30 umuryango wa FPR Inkotanyi umaze, Mutesi avuga ko nk’abagore bishimira ko wabakuye mu bwigunge, ubatoza kwishyira hamwe bagakora bakanizigamira, ubu bakaba bameze neza n’imiryango yabo.

Ibikorwa byo kubaka Ibigo Mbonezamikurire Abanyamuryango na FPR Inkotanyi bari kubyubaka hirya no hino mu gihugu, bikaba byitezweho kuzamura ireme ry’imikurire y’abana, ndetse no kwita ku buzima bw’ababyeyi barerera igihugu.

Minisitiri Gen Kabarebe ahamya ko urubyiruko rwa FPR-Inkotanyi rufite ishyaka nk’iry’urubyiruko rwabohoye igihugu

Yabitangarije muri kongere y’urubyiruko rushamikiye kuri FPR-Inkotanyi yabaye kuri iki cyumweru tariki ya 26 Ugushyingo 2017, ku cyicaro gikuru cy’uyu muryango i Rusororo mu Karere ka Gasabo.

Minisitiri Gen James Kabarebe ari mu b’ingenzi barwanye urugamba rwo kubohora igihugu, guhera mu mwaka wa 1990. Avuga ko abona ishyaka ry’urubyiruko rw’icyo gihe ari rimwe n’iry’urubyiruko rwa none.

Agira ati “Urubyiruko rw’iki gihe hari aho ruhuriye n’urwo muri 1990, kuko namwe ndabona tubahagurukije ngo mutabare igihugu mwabikora, ariko aho mukorera haratandukanye.”

Akomeza avuga ko 99% by’ababohoye igihugu bari urubyiruko.

Ahamya ko urugamba rwo muri 1990 rwari urwo gutanga amaraso ku rugamba ariko urw’iki gihe ngo ni urwo guhangana na byinshi birimo ingengabitekerezo ya Jenoside no kurinda ubusugire n’ubukungu bw’igihugu.

Agira ati “Igikenewe kuri ubu ni urubyiruko rufite uburere, rutari rwa rundi rutekereza kujya mu muhanda. Uburambe bw’ibyamaze kubakwa buri mu maboko yanyu, ntabwo ari twe tugomba kubirinda.”

Gen Kabarebe yagaragaje icyizere afitiye urubyiruko rwa FPR-Inkotanyi

Bimwe mu byo yasabye urubyiruko kwitaho cyane ni ukurwanya ingengabitekerezo ya Jenoside ivugwa cyane cyane mu mahanga, guharanira kubana neza n’ibihugu bikikije u Rwanda kuko ari ho runyuza ibicuruzwa.

Rumwe mu rubyiruko rwitabiriye iyo Kongere ya FPR-Inkotanyi rwagaragaje ko rumaze kwiteza imbere ruhereye ku busa.

Urubyiruko rwa FPR-Inkotanyi na rwo rwagaragaje ko rwiteje imbere ruhereye ku mafaranga make

Uwitwa Uwamariya Assoumpta yerekanye uburyo yinjiza amafaranga abikesheje umushinga we wo gukora divayi muri Beterave.

Ahamya ko kuri ubu ageze ku mari irenga miliyoni 5RWf, yarahereye ku bihumbi 20RWf mu myaka ine ishize.

Umunyamabanga mukuru w’umuryango FPR-Inkotanyi, Francois Ngarambe yabwiye urubyiruko ko rugomba kuba abarinzi b’ibyagezweho, barwanya ibiyobyabwenge, isuku nke, n’imirire mibi

Biteganijwe ko ku itariki ya 20 Ukuboza 2017 ari bwo umuryango FPR-Inkotanyi uzizihiza isabukuru y’imyaka 30 umaze ubayeho.

Umunyamabanga mukuru w’umuryango FPR-Inkotanyi, Francois Ngarambe atanga ikiganiro