Utubari ducuruza Shisha twatangiye gukurikiranwa

Ni umukwabo wakozwe kuri uyu wa 15 Ukuboza 2017 nyuma gato y’itangazo rya Minisiteri y’ubuzima ryamaganaga ubucuruzi n’ubunywi bw’itabi rizwi nka Shisha ku butaka bw’u Rwanda kubera ingaruka zaryo ku buzima.

Umuyobozi wungirije ushinzwe imibereho myiza y’Abaturage mu karere ka Musanze Uwamaliya Marie Claire yabwiye Kigali Today ko uwo mukwabo wakozwe hagati ya saa yine na saa sita kuri uyu wa 15 Ukuboza 2017.

Yagize ati " Umukwabo wakorewe mu tubari tunyuranye two mu mujyi wa Musanze hafatwa Shisha esheshatu"

Akomeza avuga ko Shisha zafatiwe muri uwo mukwabo zahise zishyirwa mu maboko ya Polisi y’Umurenge wa Muhoza hirindwa ingaruka yakomeza guteza ku buzima bw’abaturage.

Yunzemo ati "Ni igikorwa kizakomeza hirya no hino mu karere ka Musanze kikagendana no kwigisha abaturage ububi bwayo kuko kwigisha ari uguhozaho".

Uwamariya Marie Claire avuga ko batangiye gushyira mu bikorwa Gahunda ya Minisante nk’uko yabitangaje

Polisi y’igihugu ibinyujije ku rukuta rwayo rwa Tweeter nayo yahise itangaza ko yatangiye gushyira mu bikorwa icyemezo cyo guca burundu Shisha cyafashwe na Minisiteri y’Ubuzima mu Rwanda ndetse kigahita gitangira no kubahirizwa.

Yahamagariye abaturage kuyitungira urutoki uwabona aho banywa Shisha cyangwa icururizwa bakayiha amakuru hakoreshejwe umurongo wayo wa telefoni itishyurwa ariwo 112.

Umwe mu batsimbaraye mu gucuruza shisha yatawe muri yombi

Mu Rwanda itabi rya Shisha ryabuzanyijwe na Minisiteri y’ubuzima nyuma y’uko ikinyamakuru cya Kigali Today cyandika mu cyongereza KT Press gikoze inkuru icukumbuye igaragaza uburyo yifashishwa mu kunywa ibiyobyabwenge bya Marijuana n’urumogi.

Ibyo bikiyongera ku mabwiriza y’ishami ry’umuryango w’Abibumbye ryita ku buzima agaragaza ko umwotsi wa Shisha ufite ubushobozi bwo guteza indwara zibasira ibihaha, umutima n’izindi ndwara ku munywi wayo.

Nshuti avuga ko ari inzozi zibaye impamo gutangira guhagararira u Rwanda ku myaka 14

Nshuti uvuka mu Karere ka Gasabo yiga mu mwaka wa gatatu mu ishuri ryisumbuye ry’ubumenyi rya Musanze (Ecole des Sciences de Musanze), riherereye mu Ntara y’Amajyaruguru.

Yatoranijwe nyuma yo gutsinda ku manota 82,5% amarushanwa yo kwandika neza inkuru mu rurimi rw’Icyongereza yari ahanganyemo n’abandi banyeshuri barenga 400. Ayo marushanwa yari ahuje abanyeshuri baturutse mu bigo by’amashuri yisumbuye yo hirya no hino mu gihugu.

Aganira na Kigali Today, Nshuti witeguye kujya guhagararira igihugu, yatangaje ko gukunda gusoma ibitabo akora ubushakashatsi no gushyira ingufu mu rurimi rw’Icyongereza biri mu byamufashije kwitwara neza.

Agira ati "Ntabwo nsanzwe mba uwa mbere hari ubwo nsinda cyangwa ngatsindwa gusa ibanga nakoresheje nta rindi uretse gukunda gusoma ibitabo ngashyira ingufu mu rururimi rw’Icyongereza."

Gutsinda ayo marushanwa byaramushimishije ariko aracyakomeza kwitegura kugira ngo azitware neza ubwo azaba ahanganye n’abandi bakomoka mu bihugu bigize Umuryango w’Afurika y’Iburasirazuba (EAC).

Ati "Ibyakorwaga kera ntibyaheshaga agaciro umwana w’umukobwa ariko ubu ubwo nabaye uwa mbere neretse abakobwa ko dushoboye rwose ntidukwiye kwitinya nibwo butumwa naha bagenzi banjye."

Umuryango wishimiye ko umwana wabo agiye guhagrarira igihugu

Marara Camille umubyeyi wa Nshuti utuye mu Karere ka Gasabo, avuga ko yishimiye inkuru yo kumva ko umwana we yahize abandi akaba yatoranijwe kuzahagararira u Rwanda. Ariko ngo ntibatunguwe n’impano bamubonagamo.

Amwenyura yagize Ati “Nshuti, akiri n’umwana muto twamubonagamo impano kuko yakundaga gusoma. Akiri mu mashuri abanza muri La fontaine nibwo yatangiye kwigaragaza mu mpano y’indimi.

Se yahishuye ko Nshuti atari we mwana we wa mbere ugaragaje impano, kuko na mukuru we yigeze gutsinda amarushanwa yo kuvuga Icyongereza. Nshuri niwe muto mu bana bane bavukana.

Marara agira inama umwana we kuzakomeza kwitwara neza akigirira icyizere akamenya gahunda y’igihugu, kumenya imirongo ngenderwaho y’igihugu no kumenya imikorere ya EAC muri rusange.

Ati: Ndamusaba gutuza kandi akamenya ko ahagarariye igihugu akabyifatamo neza kuko ni ibintu by’agaciro.

Ishuri Nshuti yigaho ni iry’abihayimana muri Diyoseze Gatorika ya Ruhengeri

Ikigo cye na cyo cyatewe ishema no guhagararirwa

Padiri Jean Claude Mbonimpa uyobora ishuri ry’ubumenyi rya Musanze yabwiye Kigali Today ko ashimishijwe n’ishema Nshuti yihesheje akanarihesha ikigo n’igihugu muri rusange.

Ati: Iyo usomye inyandiko uyu mwana yanditse ubona ko mu Rwanda abana batangiye gusobanukirwa imikorere ya EAC. Bihesheje ishema umwana kuko byaramwubatse bimuhaye n’icyizere cyo kumva ko ashoboye, bihesheje ishema uru rugo rwacu nk’ishuri risanzwe ryitwara neza mu masomo y’ubumenyi kuba rero no mu ndimi tubonye umwana urihagararira ni ishema rikomeye.

Umukozi ushinzwe amarushanwa ya EAC yo kwandika imyandiko muri Minisiteri y’uburezi (MINEDUC) Habinana Jacques yatangaje ko ayo marushanwa yitabiriwe n’ibigo byose byifuje kuyitabira mu gihugu.

Akomeza avuga ko icyo ibyo bigo byasabwaga ari ugushishikariza abana bo mu mwaka wa mbere kugeza mu mwaka wa kane w’amashuri yisumbuye kwitabira ayo marushanwa.

Habimana avuga ko abanyeshuri batanu batoranijwe bazahabwa ibihembo ku rwego rw’igihugu n’ibigo bigaho bihembwe, kuko biba bifatwa nk’ibigo by’indashyikirwa mu bindi cyane cyane ikigo kiba cyaturutseho umwana wabaye uwa mbere.

Mu mpera z’umwaka wa 2017 nibwo abanyeshuri batoranijwe mu Rwanda uko ari batanu bazerekeza mu Mujyi wa Arusha muri Tanzaniya guhagararira u Rwanda bazafashwa gusura ahantu hatandukanye.

Uko ari 30 bazaba bahagarariye ibihugu bigize Umuryango wa EAC hazatoranywamo batanu bazahembwa mu nama bazahuriramo n’abakuru b’ibyo bihugu. Igihembo gikuru kingana n’Amadorari y’Amerika 1.500 kizegukanwa n’uzaba yahize abandi.

Abana batanu bazahagararira u Rwanda muri EAC ni abakobwa batatu n’abahungu babiri, uwa mbere ni uwo muri Ecole des Sciences de Musanze, Nshuti Allegra, uwa kabiri ni uwo muri Fawe Girls School, Mukundente Jessica, akurikirwa n’uwo muri GS ST Joseph Kabgayi Ntwari Ipolain uwa kane ni uwo muri GS Kigeme Igiraneza Yannick undi ni Mugeni Uwera Esther wo muri Gashora Girls Academy.

Insanganyamatsiko bakozeho inyandiko zabo mu ndimi zikoreshwa muri EAC yagiraga iti “Ni akahe kamaro ko kwishyira hamwe kw’ibihugu bigize umuryango wa Afurika y’Iburasirazuba. Ese ni iki bizamarira abaturage b’ibi bihugu mu kuzamura imibereho yabo?"