Perezida Kagame yagaragaje aho amavugurura muri AU ageze

Perezida Kagame yabitangarije mu kiganiro yagejeje ku bitabiriye inama y’ikigo cya Brookings, yigaga ku mpinduka mu mikorere y’Afurika yunze Ubumwe (AU), kuri uyu wa Kane tariki 21 Nzeri 2017.

Perezida Kagame yavuze ko ari intambwe nziza ugereranije n’igihe iyo myanzuro imaze ifashwe. Yavuze ko icyo cyemezo cyatumye ibihugu birushaho kumenya akamaro ko kwigira kuko buri wese yifuza ko amafaranga yatanze acungwa neza.

Yagize ati "Komisiyo y’Afurika yunze Ubumwe ikora neza si inyungu kuri Afurika gusa, ahubwo ni kuri buri wese ku isi."

Perezida Kagame ni we washinzwe kuyobora itsinda rishinzwe gukora amavugurura y’Afurika yunze Ubumwe. Muri ayo mavugurura ayarangije gukorwa akanemezwa, harimo iryo kugira komisiyo idategereza inkunga ziva mu mahanga, ahubwo hakarebwa uko ibihugu bigize uyu muryango byayishakamo.

Ni aho havuye igitekerezo cy’uko buri gihugu cyajya gitanga umusanzu ungana na 0.2 ku ijana by’amafaranga gisoresha ku bicuruzwa byinjira muri icyo gihugu.

Perezida Kagame ubwo yagezaga ijambo ku nama rusange y’Umuryango w’Abibumbye

Yabitangaje kuri uyu wa Gatatu tariki 20 Nzeli 2017, mu ijambo yagejeje ku bitabiriye inama rusange y’Umuryango w’Abibumbye iteraniye ku cyicaro cyawo mu Mujyi wa New York muri Leta zunze Ubumwe z’Amerika.

Yagize ati “Umuryango w’Abibumbye ugomba gufata abantu bose ushinzwe kimwe ukanabubaha, kugira ngo intego yo gufasha abantu kugira ubuzima bwiza igerweho. LONI igomba gukoresha amafaranga ihabwa neza nta kuyasesagura.”

Perezida Kagame yagiye ahura n’abayobozi bakuru b’ibihugu, anatanga ibiganiro mu nama zitandukanye

Yashimye Umunyamabanga mukuru wa LONI, António Guterres, uruhare agira mu guhindura imikorere y’uyu muryango atanga ingero za bimwe yashoboye gukora mu minsi ishize birimo gutangiza umushinga w’ivugururwa ry’Umuryango w’Abibumbye no gushakira umuti ikibazo cy’ihohoterwa rishingiye ku gitsina.

Yavuze kandi ko hagikenewe ingufu zihagije kugira ngo abatuye isi bahangane n’imihindagurikire y’ikirere, kubaka amahoro arambye no guteza imbere abaturage. Avuga ko amikoro agihari ariko imbaraga zo kubyubahiriza zo zikiri nke.

Yavuze ku guhuza isi binyuze muri internet yihuta ya Broadband, ndetse n’intego z’ikinyagihumbi zashyizweho na LONI kimwe n’icyerekezo cy’Afurika cya 2063. Asaba ko gukorana bya hafi ari bimwe mu bizafasha iyo mikorere kugerwaho.

Ati “Gukorera hamwe mu buryo bwubaka, biduha icyizere cyo gutegurira abana bacu ahazaza hababereye.”

Perezida Kagame yavuze byinshi ku buyobozi bwe.

Perezida Kagame yabitangaje mu kiganiro yahaye impuguke mpuzamahanga n’abayobozi batandukanye bitabiriye inama rusange y’Umuryango w’Abibumbye iteraniye i New York.

Yabitangaje yifashishije ingero za vuba za Congo na Libiya ubwo yasubizaga ikibazo cy’umwe mu mpuguke wari umubajije ku kuba ayobora igihugu gito kidafite ubukungu ariko kikabasha gutera imbere ugereranije n’umuturanyi wacyo nka Congo ifite ibikenewe byose ariko ikaba yaribasiwe n’intambara.

Uwabajije icyo kibazo yasaga nk’aho agaragaza ko Congo ari yo yitera ibibazo ifite. Ariko Perezida Kagame yamusubije ko uko atari ko kuri ijana ku ijana,kuko umuryango mpuzamahanga uvuga ko uharanira amahoro nta na hamwe wayagaruye muri Afurika.

Yagize ati “Mbere na mbere icyabujije Abanye-Congo kugira intambwe batera ni hagati ya Congo ubwayo n’umuryango mpuzamahanga utajya ufata amasomo kuko buri kintu uyu muryango wagizemo uruhare nta kindi wakoze uretse kucyangiza.”

Icyo kiganiro cyari kitabiriwe n’impuguke n’abayobozi batandukanye.

Yavuze ko bigaragazwa n’amafaranga menshi uyu muryango watakarije muri Congo ubinyujije muri ’UN" kugira ngo igarure amahoro mu myaka 20 ariko nta musaruro, ahubwo bigahita bitanga indi shusho y’ikibazo.

Ati “Iyo urebye ko nta musaruro byatanze, ikibazo ntabwo cyaba Congo ahubwo ni abo bafite aho bahurira bafite ikibazo kuko ku buryo bumwe cyangwa ubundi baranagiteje.”

Yahishuye ko hari n’igihe cyageze akabaza abashinzwe misiyo zo kugarura amahoro muri Congo impamvu amafaranga akoreshwa mu basirikare barenga ibihumbi 20 ba "UN"muri Congo atari gushyirwa mu baturage bagakemura icyo kibazo ku bundi buryo.

Libiya: Urugero rw’ugutsindwa kwa “Demokarasi”

Perezida Kagame ni umwe mu bagiye berura bakavuga ko ikitwa demokarasi y’Uburayi n’Amerika kidakwiye kuba igikangisho kuri Afurika. Akavuga ko ashyigikiye demokarasi ko ibaho ariko ntiyifuza ko ibonwa mu ishusho imwe kandi ibihugu bitandukanye.

Muri icyo kiganiro yongeye kubazwa iki kibazo, ariko avuga ko abifuza ko muri Afurika hajyaho demokarasi birengagiza ko ari abaturage bihitiramo ahubwo bikarangira abo bigisha demokarasi ari bo bashaka guhitiramo abaturage icyo bashaka.

Ati “Ni gute nzavuga ko nisanzuye uri kuntegeka uburyo ngomba kubaho ubuzima bwanjye.”

Yakomoje kuri Libiya, yemeza ko n’ubwo yari ifite ibibazo by’ubuyobozi ndetse n’umuyobozi wayo Maoumar Kadhafi atumvikana na benshi, icyo gihugu cyagaragaje ko nta na rimwe umuntu azahitiramo abaturage b’ikindi gihugu icyo bifuza.

Ati “Libiya nta demokarasi. Kadhafi yari afitanye ibibazo na benshi muri Afurika. Wenda yari abifitanye n’abaturage be hari n’ibindi bibazo biturutse hanze ya Libiya. (Umuryango mpuzamahanga) waragiye utera ibibombe muri Libiya birangira na Kadhafi apfuye.

Yunzemo ati “None ikibazo ni iki… Ni ibiki biri kuba muri Libiya ubu? Abantu bashakaga gushyiramo demokarasi bari he? Ese iyo demokarasi irahari? Dushobora kuvuga ingero nyinshi muri Afurika.”

Yavuze ko hari ahari ibibazo muri Afurika ariko buri kibazo gisaba igihe runaka nta mpinduka ishobora kuba mu ijoro rimwe.

U Rwanda si ubusitani buri wese yuhiramo indabo

Perezida Kagame kandi yasubije no ku kibazo cy’abashinja ubuyobozi buriho gukandagira uburenganzira bwa muntu no kutubahiriza uburenganzira bw’itangazamakuru. Yavuze ko abenshi babivuga nta bushakashatsi bakoze cyangwa ari abatekereza ko ibyo bifuza bigomba gukorwa.

Yavuze ko Abanyarwanda ari abantu bafite agaciro kandi bafite intego kimwe n’undi muntu wese uri aho ari ho hose ku isi.

Ati “Abanyarwanda barahari kandi ni abantu nka buri wese uri aha. Ni nk’aho u Rwanda abantu barufata nk’umurima w’indabo buri wese aza akavomerera indabo.

"Igice cy’ubuzima bwanjye cyose nakibayeho mu myobo ndwanira ubuzima bwanjye. Sinari nzi ko nshobora kuramuka. Icyo narwaniraga nta muryango mpuzamahanga wagombaga kukimpa n’ubu icyo nshaka ntibakimpa.”

Yavuze ko kuri ubu,ikimushishikaje ari ugukorera Abanyarwanda icyabateza imbere kandi agakoresha imbaraga zishoboka zose kugira ngo abigereho.

Perezida Kagame yabitangarije mu nama yigaga ku buhahirane hagati y’Afurika n’Amerika, yateranye kuri uyu wa Kabiri tariki 19 Nzeli 2017.

Yagize ati "Hashize imyaka u Rwanda rwarakomeje kuza imbere mu korohereza ishoramari. Hari impamvu imwe yatumye bigerwaho. Ni abantu twahaye inshingano. Twashoye imari mu bantu kugira ngo tugire abantu bafite ubumenyi n’ubwenge bwo gukora ibikenewe."

Perezida Kagame yongeyeho ko kugira ngo u Rwanda rubashe kugira uruvugiro mu ruhando rw’amahanga, byasabye ko Abanyarwanda bahindura imyumvire, bakisubiramo buri wese akareba icyo yamarira mugenzi we.

Yavuze ko ibyo byagombaga kujyana n’uko nta Munyarwanda ukwiye kumva ko azarambya agategereza ak’imuhana. Yavuze kandi ko Abanyarwanda bazi ko batakwishoboza byose, ari yo mpamvu bemera ko bakenera abafatanyabikorwa kuruta abaterankunga.

Iyo nama ni imwe muri nyinshi Perezida Kagame yitabiriye, muri iyi minsi ari mu nama rusange y’Umuryango w’Abibumbye iteraniye ku cyicaro cyawo i New York.

Perezida Kagame na Perezida Macron w’u Bufaransa.

Bahuriye mu nama rusange y’Umuryango w’Abibumbye iteraniye i New York muri Leta zunze ubumwe z’Amerika.

Mu ruzinduko Perezida Kagame yatangiye mu mpera z’icyumweru gishize, yahuye n’abayobozi b’ibihugu batandukanye ariko by’umwihariko guhura na Perezida w’Ubufaransa ni byo byagarutsweho cyane.

Ibyo biterwa n’amateka ahuje ibihugu byombi, cyane cyane kubera uruhare u Rwanda rushinja Ubufaransa muri Jenoside yakorewe Abatutsi mu 1994 igahitana abarenga miliyoni.

U Rwanda n’Ubufaransa bifitanye amateka maremare.

Perezida Kagame yakomeje ahamya ko Ubufaransa bukwiye gushyira bukemera uruhare rwabwo muri Jenoside, ikintu Guverinoma zose zasimburanye ku butegetsi bw’Ubufaransa zitigeze zikozwa.

Mu matora aherutse muri icyo gihugu cy’Ubufaransa , Perezida Kagame yatangaje ko yizera ko uyu muyobozi ukiri muto kandi ufite imyumvire itandukanye n’iy’abamubanjirije hari icyo azahindura ku byagiye bikorwa mbere ye.

Yagize ati "Hari ikintu gishya dutegereje kuri Perezida Macron, kwihutira gushyiraho imikorere mishya no gushyira iherezo ku myaka ishize y’urujijo."

N’ubwo Perezida Macron we atarerura ngo avuge k’u Rwanda, ariko bimwe mu byo yatangaje bisa n’ibitanga icyizere cy’uko afata ahashize h’Ubufaransa muri Afurika.

Kuri iyi nshuro, ibiganiro byabahuje byari bigamije ahanini kureba ku bibazo bibangamira amahoro n’umutekano muri Afurika.

Mu bandi bagiranye ibiganiro na Perezida Kagame, harimo Minisitiri w’Intebe wa Isiraheli na Minisitiri w’Intebe w’Ububiligi.

Perezida Kagame ari kurahira kuzayobora igihugu mu myaka irindwi iri imbere.

Perezida Kagame yamaze iminsi igera kuri 20 azenguruka igihugu mu bikorwa byo kwiyamamaza.

Muri iyo minsi yose abaturage bamwerekaga ko bamushyigikiye haba mu ndirimbo, mu mivugo kimwe no mu bindi bikorwa bakoraga bijyanye no kwiyamamaza.

Muri izo ndirimbo hari iyaje kwamamara yitwa “Nda ndambara nyandera ubwoba”, yaririmbiwe bwa mbere mu Karere ka Rubavu, iririmbwe n’umuturage wayihimbye ayikomeye kuri imwe mu ndirimbo zo guhimbaza Imana.

Perezida Kagame yakira ibendera nk’ikimenyetso cy’ubuyobozi bw’igihugu.

Muri iyo ndirimbo hari aho baririmba ngo “Nda Ndambara yantera ubwoba, iyarinze Kagame izandinda! Nta ndambara yandera ubwoba!” iyo ndirimbo yakunzwe kuko iririmbwe mu Kigoyi, ururimi ruvugwa mu duce tw’Uburengerazuba.

Nyuma y’iminsi mike indirimbo yaje kuba imwe mu ndirimbo zari zikunzwe ku buryo, uwayihimbye yatangiye gutumirwa aho kagame yabaga yagiye hose.

Nyuma y’uko ibikorwa byo kwiyamamaza birangiye, Kagame akegukana intsinzi, yatunguranye ubwo yemezaga ko iyo ndirimbo ari yo yamuteye amarangamutima ariko ikanamuha ingufu zo kumva ko ashyigikiwe kandi atewe ishema no kuyobora Abanyarwanda.

Perezida Kagame asinyira indahiro amaze gutanga yo kuyobora igihugu.

Yabitangaje ubwo yarahiriraga kuyobora u Rwanda mu yindi myaka irindwi, kuri uyu wa Gatanu tariki 18 Kanama 2017. Yagize ati “Hari indirimbo igaragaza ibyishimo byo gukorera hamwe iyo mwanyuze mu bibazo byinshi.

Ni indirimbo abaturage bandirimbiraga. Iyo ndirimbo ni iyo bahinduye bayikuye ku ndirimbo ihimbaza Imana ivuga ngo “Nta ntambara yantera ubwoba.”

Perezida Kagame yatanze urugero kuri iyo ndirimbo, ashaka kugaragaza ingufu zo guhuriza hamwe kuko bituma n’abafite intege nke bibongerera ingufu.

Abitabiriye umuhango wo kurahira bari bizihiwe.

Ati “Iyo turwana dufite impamvu, nta gikwiye gutuma tugira ubwoba kuko Imana iba iri ku ruhande rwacu.”

Iyumvire inkomoko y’indrimbo "Nda ndambara yandera ubwoba"