LWA n’abafatanyabikorwa baratabariza imiryango ikennye irimo abana bafite ubumuga

Uyu muryango ukorera i Bumbogo mu karere ka Gasabo, ugaragaza ko bamwe mu bagabo bamara kubyara abana, babona bafite ubumuga bagahitamo gutandukana n’abo bashakanye.

‘LWA’ ikomeza ivuga ko hari n’imiryango igira umwana ufite ubumuga igashaka uburyo yamwikiza ikoresheje kumuheza mu nzu, kumwicisha inzara cyangwa indwara.

Umuyobozi wa LWA, Gilbert Kubwimana agira ati:”Umuryango wacu wamenye ko hari abana babiri bapfuye bazize ako kato n’agahinda baterwa n’ababyeyi babo cyangwa abaturanyi”.

Asaba inzego zitandukanye gufata ingamba zo kwita ku miryango yabyaye abana bafite ubumuga, mu rwego rwo gukumira ko bazagirirwa nabi.

Ku rundi ruhande, uwitwa Mukayiranga Julienne w’imyaka 28 avuga ko yabyaye abana babiri bafite ubumuga bimuviramo gutandukana n’uwo bashakanye.

Ati:”Nabyaye uwa mbere umugabo arabyihanganira, mbyaye uwa kabiri ahita ata urugo agenda abanje no kungurishiriza inzu, nsigara nzererana n’abana ntagira aho mberekeza”.

Nzikobankunda Ildefonse nawe wabyaye umwana ufite ubumuga, avuga ko abaturanyi be bamushyize mu kato bavuga ko urugo rwe rufite abadayimoni, nawe akemeza ko yabanje gukeka ko umugore we yaba afite imyuka mibi.

Umwarimu muri Kaminuza y’u Rwanda, Dr Sagahutu Jean Baptiste avuga ko ubumuga ku bana ahanini ngo burimo guterwa n’ubuzima bubi bw’umubyeyi utwite.

Akomeza asobanura ko indwara zifata abana bamaze kuvuka, ziganjemo iziteza umubiri guhinda umuriro, nazo ngo ziri ku isonga mu birimo guteza ubumuga.

‘Love with Actions’ wemeza ko kubyara abana bafite ubumuga bikomeje gutuma abagore n’abagabo batandukana, ugasaba ko bakwigishwa ndetse abakennye bagafashwa kubona ibitunga ingo zabo.

Uyu muryango uvuga ko wagiriye inama ababyeyi b’ingo 25, ubafasha kwiga imyuga ndetse unavuza abana bafite ubumuga, ariko ngo iki ni nk’igitonyanga mu nyanja ukurikije umubare munini w’imiryango yifuza gufashwa mu gihugu hose.

Mu 2050-umunyarwanda azaba yinjiza-ibihumbi 12 by’amadolari

Ibi yabitangarije mu kiganiro ku cyerekerezo 2050 yatangiye mu nama y’umushyikirano.

Minisitiri Gatete yavuze ko icyerekezo 2050 kizibanda guteza imbere ku rwego rwo hejuru ubuzima bwiza bw’Abanyarwanda.

Yagize ati“Kuri ubu buri Munyarwanda arakorera amadolari 720, muri 2020 azaba yinjiza amadolari 1,240, muri 2035 azaba yinjiza amadolari 4,035, ariko akazaba ageze ku madolari 12,476 muri 2050”.
Ibi ariko ngo birasaba ko ubukungu bwazamuka ku muvuduko wa 10%

Aha ngo u Rwanda ruzaba rushobora kwihaza ku birirwa, Abanyarwanda bose bafite amazi meza, umuriro w’amashanyarazi ndetse n’ibindi byangombwa byose nka internet.

Ikindi buri Munyarwanda azaba adafite impungenge y’ikizamutunga mu zabukuru igihe azaba adashobora gukora kuko azaba yarateganyirije ay’izabukuru n’ubuvuzi.

U Rwanda ruzaba rufite imyubakire by’imijyi n’ibikorwaremezo biri ku rwego rw’imijyi ikomeye ku isi.

Ibi bizajyana no guteza imbere ugutwara abantu n’ibintu hakorejesheje ibinyabiziga bigezweho ndetse n’indege.

Minisitiri Gatete asobanura ko kongerera agaciro ku gipimo cyo hejuru ibiva mu buhinzi, ubucukuzi no gukoresha ikoranabuhanga biri mu bigomba kugerwaho muri 2050.

Igihugu kizateza imbere kandi umubano n’ubuhahirane n’ibihugu by’ibituranyi ndetse n’amahanga, rukazaba rufite isura nziza n’ijambo rikomeye mu ruhando mpuzamahanga.

Gatete yavuze ko ibihugu byinshi byo ku mugabane w’i Burayi n’Aziya byavuye mu cyiciro cy’ibihugu biri mu nzira y’Amajyambere mu myaka 15 gusa, u Rwanda narwo rukaba ruzabigeraho nk’uko rwageze kuri byinshi mu myaka 20.

Avuga kandi ko kugira ngo u Rwanda rwinjire mu bihugu bifite ubukungu bukomeye n’abaturage babayeho neza, hagomba gukangurira abaturage guhindura imyumvire, iterambere bakarigira iryabo biteganyiriza.

U Rwanda kandi ngo ruzashingira ibi ku mutungo kamere wabwo w’ubutaka n’ibiburimo, ikoranabuhanga, kwishakamo ibisubizo, gukunda umurimo n’indangagaciro z’ubumwe n’ubunyangamugayo.