Abanyamakuru bagaragaje ko uwo mushinga w’itegeko uzatuma bakora batisanzuye

Muri uwo mushinga w’itegeko handitsemo ko umunyamakuru ukoza isoni mu magambo, mu bimenyetso, ibikangisho,ibishushanyo cyangwa inyandiko umwe mu bagize Inteko ishinga amategeko, Guverinoma abashinzwe umutekano n’undi wese ushinzwe umurimo rusange w’igihugu mu gihe ari mu kazi aba akoze icyaha.

Mu gihe iryo tegeko ryaramuka ritowe n’umutwe w’abadepite, uwahamwa n’icyo cyaha bivugwamo azahanishwa gutanga ihazabu ingana n’ibihumbi 500RWf ariko na none ntijye hejuru ya miliyoni 1RWf.

Ingingo ya 163 iteganya ko umuntu wahinduye amashusho n’amagambo ateganyirizwa ibihano bitari munsi y’amezi atandatu ariko ntibinarenze umwaka.

Ingingo ya 257 yo iteganya ko gusebya umukuru w’igihugu bihanishwa igifungo kuva ku myaka itanu ntikirenze imyaka irindwi n’ihazabu iva kuri miliyoni 5RWf kugeza kuri Miliyoni 7RWf.

Nubwo izo ngingo zitari zitaratorwa ariko zikomeje guteza impaka mu banyamakuru hirya no hino mu gihugu.

Abanyamakuru bakomeza bagaragaza ko izo ngingo zihana umunyamakuru wasebanije zizababangamira kuko zizatuma batisanzura mu kazi kabo.

Ibyo byatumye ku itariki ya 05 Ukuboza 2017, Urwego rw’abanyamakuru bigenzura (RMC) n’Ishyirahamwe ry’abanyamakuru mu Rwanda (ARJ) rugirana ibiganiro n’abanyamakuru.

Abanyamakuru batanze ibitekerezo ari benshi kandi bihabwa agaciro bizezwa ko bazakorerwa ubuvugizi

Muri ibyo biganiro abanyamakuru bagaragaje ko izo nzego zabashyiriweho zihagije mu kuba zafatira icyemezo umunyamakuru wagaragaje ubunyamwuga budahwitse; nk’uko Gatera Stanley abisobanura.

Agira ati “Umunyamakuru wakoze amakosa,Urwego rw’abanyamakuru bigenzura ruhabwe ingufu rubashe kumukurikirana.”

Mugenzi we Mugabe Robert ukorera Great Lakes Voice avuga ko hari uburyo bwinshi bwo guhana umunyamakuru atarinze kujyanwa mu nkiko.

Agira ati “Guhana biri ukwinshi hari ukukwambura ikarita ntuzongere kuba umunyamakuru, hari gusaba imbabazi n’ibindi bitandukanye.”

Gusa ariko hatunzwe agatoki abanyamakuru batera ubwoba abantu babakangisha ko bagiye kubakoraho inkuru, abo bahamagarirwa kureka iyo ngeso itari iya kinyamwuga; nk’uko byagarutsweho na Andre Gakwaya ukorera ikinymakuru kitwa "Rwanda News Agency".

Barore Cleophas ukuriye RMC yagaragaje ko nubwo abanyamakuru batishimiye uwo mushinga w’itegeko na bo bagomba kugaragaza ubunyamwuga mu kazi kabo.

Agira ati “Hakenewe abantu baha agaciro umwuga wabo n’ubufatanye hagati y’inzego zibahagarariye.”

Barore Cleophas uyobora RMC (hagati) Muganwa Gonzague uyobora ARJ (ku ruhande iburyo) na Mugisha Emmanuel, umunyamabanga nshingwabikorwa wa RMC (ku ruhande ibumoso)

Claude Harindintwari asuzuma imwe mu modoka y’abakiriya

Harindintwari akimara kurangiza amashuri ye muri iri shuri ntiyigeze atekereza ko yakorera amafaranga agera kuri miliyoni, ariko inzozi zaje kuba impamo kuko mu mwaka umwe yahise yinjiza miliyoni zisaga 15Frw.

Yize muri VTC Gacuriro ibijyanye no gusuzuma ibinyabiziga hifashishijwe ikoranabuhanga (Diagnostic). Amafaranga yahakuraga yayaguzemo ibikoresho byo gusuzuma bye bwite,bituma abasha gukorera abantu batandukanye aninjiza amafaranga.

Kuri ubu yashinze ikigo cye cyigisha ingororangingo(Gym Tonic) gifite agaciro ka miliyoni 6.5Frw, akagira n’umushinga w’ibihumyo ufite agaciro ka miliyoni 3.5Frw n’ibindi bikorwa bitandukanye bigera kuri Miliyoni 15Frw.

Imwe mu myenda badoda

Kuri ubu arateganya gutumiza hanze ibikoresho bigizwe ahanini n’imfunguzo z’imodoka zo mu bwoko bwa Benz, akajya yicurira imfunguzo akoresheje Prorogramu ya mudasobwa.

Yagize ati “Nabashije gukorera amafaranga ndayabika nongeraho ayo nakoreye mbasha kugera ku gishoro cyamfashije kwiteza imbere”

Muri icyo kigo cya VTC Gacuriro kandi higwamo ibintu bitandukanye bijyanye no gukora imyuga ifasha igihugu kwihuta mu burezi bukenewe.

Nyirarukundo Winfried ufite imyaka 20 wiga muri iryo shuri, avuga ko mu mezi atanu ahamaze yahungukiye byinshi mu budozi ku buryo nagera hanze azaba afite ubumenyi buhagije.

Ubuyobozi bw’ikigo cya VTC Gacuriro buvuga ko bwishimira kumva ko abanyeshuri bwigishije iyo bageze hanze bagira icyo bamarira umuryango Nyarwanda, kuko bakoresha ibikoresho bigezweho mu ikoranabuhanga, nk’uko byemezwa na Munyaneza Faustin wigisha mu ishami ry’ubukanishi.

Aha ni mu igaraji rya VTC Gacuriro aho bigishiriza abanyeshuri

Banigira ku kibaho ibyo bagiye gukora

Ati "Gutunganya imodoka zigezweho kuri ubu bisaba kuba ufite ibikoresho bigezweho. Niyo mpamvu abanyeshuri barangiza hano babona akazi mu buryo bwihuse kuko ibikoresho bahasanga baba babimenyereye."

VTC Gacuriro itanga ubumenyi mu gutunganya imisatsi, ubukanishi bw’imodoka, amashanyarazi, guteka, ubudozi, ubwubatsi, gusudira no gutunganya ibikomoka ku bihingwa.

Icyo kigo cyatangiye mu 1973 ariko kiza guhagarara kubera Jenoside yakorewe Abatutsi mu 1994. Cyongeye gutangiza amasomo mu 1998, aho kugeza ubu kimaze gushyira ku isoko abagera ku 7.005.

Cyusa amurika igitabo yanditse cyitwa "Ntibavuga, Bavuga"

Uwo mwana w’imyaka 10 ni umwe mu bana 15 bamuritse ibitabo banditse ubwo hatangizwaga gahunda yiswe “Gira Igitabo aho uri” kuri uyu wa kane tariki ya 23 Ugushyingo 2017,umuhango wabereye mu Mujyi wa Kigali.

Cyusa avuga ko yagize icyo gitekerezo yiga mu mwaka wa gatanu w’amashuri abanza nyuma yo kubona ko hari bamwe mu bana bagenzi be n’abandi bantu batandukanye batavuga Ikinyarwanda uko bikwiye .

Uwo munyeshuri wiga mu kigo cy’amashuri cya “Mother Mary School” yanditse igitabo kitwa “Ntibavuga Bavuga” kirimo imivugire inoze y’Ikinyarwanda.

Cyusa avuga icyo gitabo kizafasha cyane abanyamahanga baza mu Rwanda kimwe n’Abanyarwanda batazi imivugire inoze y’ururimi rwabo.

Muri icyo gitabo hari ahanditse ngo “Umwami ntaryama, Umwami aribambika.”

Kugira ngo icyo gitabo cyandikwe, Cyusa avuga ko yabifashijwemo n’ababyeyi be ndetse n’abarezi bo ku kigo yigaho.

Cyusa asobanura igitabo yanditse

Mugenzi we witwa Izabayo Beza Ange Benita ufite imyaka 11, wiga mu kigo cy’amashuri cya "Inyange Byumba" kiri mu Karere ka Gicumbi yanditse igitabo cyitwa “Duharanire indangagaciro za Kinyarwanda.”

Avuga ko yanditse icyo gitabo agendeye ku babyeyi bigisha umwana wabo kubeshya ariko umwana akanga kubishyira mu bikorwa.

Agira ati "Nasanze atari indangagaciro zikwiye Umunyarwanda mbyandikaho igitabo."

Abo bana kimwe n’abandi bamuritse ibitabo baturutse hirya no hino mu gihugu.

Bamenyekanye ubwo abanditsi b’ibitabo bo mu Rwanda bajyaga mu bigo by’amashuri kureba abana banditse inkuru nziza kugira ngo zizandikwe mu bitabo bityo bigere kuri benshi bazisome.

Abo bana basaba bagenzi babo kurushaho gusoma no kwandika kugira ngo n’abandi bazavuka bazagire umuco wo gusoma no kwandika.

Abana bamuritse ibitabo bari kumwe n’abayobozi batandukanye

Gahunda ya “Gira Igitabo aho uri” yatangijwe ku bufatanye bwa Minisiteri y’umuco na Siporo n’umuryango mpuzamahanga wita ku bana (Save The Children) n’umuryango “Arise Education”.

Muri iyo gahunda bashishikariza abana kugira umuco wo gusoma no kwandika kandi ababyeyi bakababera urugero.

Umuhuzabikorwa w’umushinga Arise Education, Mutesi Gasana avuga ko mu rwego rwo gukomeza gushishikariza abantu gusoma bateganya no gushyira ibitabo mu modoka zitwara abagenzi.

Agira ati “Turashaka ko bazajya basoma barangiza bakagenda. Turashaka ko bijya mu igenamigambi ry’urugo nk’uko tugura n’ibindi, tukagura n’ibitabo."

Minisitiri w’umuco na Siporo, Uwacu Julienne avuga ko ibitabo byo gusoma bikiri bike. Niyo mpamvu akangurira Abanyarwanda kwandika.

Gusa ariko ngo n’abasoma ibihari baracyari bake.Gusa ngo hari icyizere ko bazagenda biyongera.

Umubare w’abitabira ibizami bya leta wariyongereye

Ubufatanye bw’inzego zitandukanye mu gukangurira abana kwitabira ishuli, buri mu ngamba z’ibanze zatumye habaho ubwiyongere bungana na 29% mu mashuri abanza na 6,8% mu yisumbuye.

Umubare w’abanyeshuri barangije icyiciro rusange cy’amashuri yisumbuye ni 98,268 bagizwe n’abakobwa 53,618 n’abahungu 44,650.

Mu cyiciro cya kabiri cy’amashuri yisumbuye n’inderabarezi bose hamwe ni 44,037 bagizwe n’abakobwa 23,536 n’abahungu 19,785.

Mu 2016 abiyandikishije gukora ibizamini mu mashuri yisumbuye bageraga 133,221. Uyu mwaka bageraga ku 142,305.

Kuri uyu wa kabiri tariki 21 Ugushyingo 2017, nibwo ibizamini bya Leta ku rwego rw’igihugu byatangiye mu gihugu hose.

Umunyamabanga wa Leta muri MINEDUC Isaac Munyakazi, watangije ibizamini bya Leta ku mugaragaro ku Rwunge rw’amashuri rwa Remera Protestant riherereye mu Karere ka Gasabo, yasabye abanyeshuri kugaragaza igihango bafitanye n’igihugu,

Yagize ati "Mwerekane ko ibyo mwahawe n’abarezi banyu, ababyeyi hamwe n’igihugu mugiye kubishyira mu bikorwa."

Ibizamini biteganijwe gutangira kuri uyu wa kabiri tariki 21 Ugushyingo kugeza ku itariki 1 Ukuboza 2017.

Hateganijwe ibizamini 11 mu cyiciro rusange n’ibizamini 20 byo mu mashami 15 y’uburezi rusange (General Education) n’ibizamini 20 mu mashami 4 y’inderabarezi, kuva uyu munsi kugeza ku itariki 10 Ukuboza 2017.

Ikigo cyatangirijweho ibizamini ku rwego rw’igihugu ari cyo Groupe Scolaire Remera Protestant, cyakoreweho n’abanyeshuri 400 baturutse mu bigo bitatu ari byo King David, Matters Secondary School na Groupe Scolaire Remera Protestant.

Aba ni abari bitabiriye gahunda yo gutangiza ku mugaragaro kugira hifashishijwe ingufu zikomoka ku mirasire y’izuba

Gahunda yo kuhira yari isanzwe ikoreshwa hifashishwa amamashini akurura amazi akoresha mazutu na esanse bigahenda cyane abazikoresha. Ubu buryo ngo buzorohereza abahinzi kuko imirasire y’izuba yo byoroshye kuyibona.

Nk’uko bivugwa n’uhagariye Ishami ry’umuryango w’abibumbye mu Rwanda Atter Maiga, ngo ubu buryo bwatanze umusaruro mu bindi bihigo, ngo niyo mpamvu mu Rwanda bifuje ko bikoreshwa kugira ngo byongere umusaruro.

Ati"Mu gihugu nka Mali ahatangijwe ibi bikorwa byatanze umusaruro kuko usanga uburyo busanzwe bukoreshwa mu kuhira, hakoreshwa mazutu na Lisansi kandi birahenze mu gihe imirasire y’izuba ihendutse".

Ibi ngo bizafasha kuba bakuhira ahantu hanini kandi bikanakorwa imusozi bidatwaye amafaranga menshi nko gukoresha Lisansi na Mazutu.

Umunyamabanga wa Leta muri Minisiteri y’ubuhinzi n’ubworozi Nsengiyumva Furgence, asanga gukoresha imirasire y’izuba bizafasha no kuba abahinzi bakuhira imusozi mu gihe cy’izuba.

Avuga ko bizabateza imbere kuko byasabaga ko babanza gutegereza ko imvura igwa abakoreshaga imashini zuhira, bikabatwara amafaranga menshi ugereranyije n’ubu buryo bushya.

Kugeza ubu Minisiteri ivuga ko iki gikorwa kizatwara amafaranga y’u Rwanda agera kuri Miliyari 2,5. Umuturage akazishyura 50% asigaye Leta ikayishyura muri gahunda ya Nkunganire.

Aba bari kurebera hamwe uburyo bafasha abahinzi kuhira hakoreshejwe imirasire y’izuba

Iki gikorwa kizashyirwa mu bikorwa ku bufatanye n’ishami ry’umuryango w’abibumbye na Ministeri y’ubuhinzi n’ubworozi.

Uretse ibi bikorwa kandi iri shami rifasha mu bikorwa bitandukanye nko gufasha abahinzi kubona amakuru hifashishijwe ikoranabuhanga nko kumenya amakuru y’ihindagurika ry’ikirere, guhinga kinyamwuga n’izindi gahunda zo kuvana abaturage mu bukene.

Uru rusengero barusengeragamo rumeze gutya

Urusengero rw’iryo torero riyoborwa mu Rwanda na Bishop Rugagi Innocent, rwafunzwe, ruherereye mu Murenge wa Ruhango hafi y’ibiro by’Akarere ka Ruhango.

Umuyobozi w’Akarere ka Ruhango, Mbabazi Francoix Xavier avuga ko iryo torero ryafungiwe urusengero kuko rwashoboraga gushyira mu kaga abarusengeragamo.

Agira ati “Twabasabye guhagarika ibikorwa by’iri torero kuko inyubako rikoreramo zitujuje ibisabwa n’amategeko agenga imyubakire.”

Akomeza avuga ko yavuganye n’abakuriye urwo rusengero bakamubwira ko amafaranga yo kubaka urusengero rwujuje amabwiriza ahari, bakaba bazarwubaka bidatinze.

Ubwo twandikaga iyi nkuru twagerageje kuvugana n’uyobora urwo rusengero mu Karere ka Ruhango kugira ngo agire icyo avuga ku bijyanye na rwo ariko inshuro zose twamuhamagaye terefone ye yari ifunze.

Uru rusengero barusengeragamo rumeze gutya

Inzu isengerwamo n’iryo torero yubakishije ibiti, igasakazwa amabati. Ntabwo ihomye ku mbande ahubwo ikikijeho imbingo zireshya na metero imwe.

Bigaragara ko haramutse haje umuyaga mwinshi urwo rusengero rwagwa ku bantu barusengeramo .

Umwe mu batuye ahakorera iryo torero, utifuje ko izina rye ritangazwa,na we ahamya ko urwo rusengero rwari kuzahirima mu gihe imvura ivanze n’umuyaga yaba iguye.

Agira ati “Ndebera nawe iyi nzu imeze nk’ikiraro idasenywa mu gihe iziyirusha ubwiza zubatswe bitemewe zasenywe zigashyirwa hasi.”

Ubuyobozi bw’Akarere buvuga ko inzu zubatse mu buryo bunyuranije n’amategeko zigomba gusenywa kandi zimwe muri zo zatangiye gusenywa.

Uburyo bwa SMS bugiye kwiyongera ku bundi bwari busanzwe bwo gufasha abahinzi kumenya iteganyagihe ku ihinga (Photo: Plaisir Muzogeye)

Meteo Rwanda yatangiye gukorana n’abahinzi bya hafi mu rwego rwo gukuraho imbogamizi bahura nazo mu kutamenya amakuru y’igihe cy’ihinga.

Ubu buryo bwo gukoresha ubutumwa bugufi buje bwiyongera ku guhanahana amakuru byakorwaga ku maradiyo n’abajyanama b’ubuzima bageraga mu baturage.

Ku wa gatanu tariki 30 Nzeli 2017, abakozi b’icyo kigo bahuguye abakozi b’Akarere ka Ruhango bashinzwe ubuhinzi, abajyanama b’ubuhinzi n’abafatanyabikorwa batandukanye mu Karere ka Ruhango ku ikoreshwa ry’iteganyagihe

Twahirwa Anthony ushinzwe iteganyagihe n’uko rishyirwa mu bikorwa muri Meteo Rwanda, avuga ko amakuru bafite abahinzi bazayabyaza umusaruro.

Yagize ati “Turashaka ko amakuru dufite abahinzi bayabyaza umusaruro tuzajye dukomeza kubaha andi makuru kugira ngo bayakoreshe uko bikwiye.”

Twahirwa Anthony ushinzwe iteganyagihe n’uko rishyirwa mu bikorwa muri Meteo Rwanda

Byiringiro Emmanuel umuyobozi w’ubuhinzi, ubworozi n’umutungo kamere muri ako karere avuga ko amakuru y’iteganyagihe atuma babasha kubwira abahinzi icyo bagomba guhinga bitewe n’igihe imvura izagwira.

Yongeraho ko hateganywa kugeza amakuru ahagije ku bajyanama b’ubuhinzi, kuko amakuru y’iteganyagihe asanzwe agera ku rwego rw’akarere n’umurenge aho bakoresha imbuga nkoranyambaga za Watsap.

Ati “Twavuganye n’abashinzwe iteganyagihe tubaha numero z’abajyanama b’ubuhinzi aho bazajya bahabwa amakuru ku iteganyagihe. Icyo amakuru adufasha ni uko niba tuzi ngo imvura izagwa mu mezi ane, tumenya ko tugomba kubwira abahinzi icyo bagomba guhinga bitewe n’uko buri gihingwa kigomba kugira igihe kigomba kwerera.”

Safari Gaspard umujyanama w’ubuhinzi mu Mudugudu wa Muremera mu Murenge wa Kabagari, avuga abajyanama b’ubuhinzi batari basobanukiwe n’uko iteganyagihe rikora bigatuma hari bamwe babyumva ukundi.

Meteo Rwanda, ibinyujije mu bajyanama b’ubuhinzi, isaba abaturage gukurikiza amakuru ibaha no kwegera abashinzwe ubuhinzi mu mirenge n’abajyanama b’ubuhinzi. Ibyo ngo bizabafasha kugira amakuru ajyanye n’igihe nyacyo cy’ihinga aho guhora mu rujijo.

Ahahinze umuceri mu gishanga cya Base

Abo bahinzi bibumbiye muri Koperative "CORIBARU" bavuga ko igiciro cy’umuceri ari gito, kuko bahabwa 270Frw mu gihe iyo bagereranije n’ibyo baba bakoze bumva bakwiye guhabwa nka 350Frw. Bamwe muri bo bavuga ko hari igihe basanga bakorera umuceri wo kurya bahabwa iyo bamaze kuwutonora.

Nyirabizimana Grace avuga ko ibyo batanga ari byinshi kurusha ibyo binjiza. Ati"Urebye dutahira uwo baduha tukarya gusa."

Ubuyobozi bw’Akarere buvuga ko hashyizweho itsinda ryo kubyigaho bakarebera hamwe n’abahinzi uko igiciro cyakongerwa hatagize ubangamirwa.

Aha berekanaga aho bahinga umuceri

Abahinzi bakorera ubuhinzi bw’umuceri muri icyo gishanga cya Base giherereye mu Murenge wa Bweramana, bavuga ko ibikorwa byabo bitajyanye n’igiciro cy’umuceri babaha ku kiro kimwe, nk’uko abaganiriye na Kigali today babivuga.

Ubuyobozi bw’Akarere buvuga ko hashyizweho itsinda ry’abakozi b’Akarere ryo kwiga icyo kibazo, bakarebera hamwe niba ibyo abo bahinzi bavuga ari ukuri iryo tsinda ngo rizafasha abahinzi n’uruganda kubyigaho neza nk’uko Mbabazi Francoix Xavier uyobora ako karere abivuga.

Visi Perezida wa Komisiyo ishinzwe ubuhinzi, ubworozi n’ibidukikije mu Nteko ishinga amategeko y’u Rwanda Semasaka Gabriel,yasabye abo bahinzi kudacika intege kuko ibiciro birimo kwigwaho n’impande bireba.

Kugeza ubu,mu karere ka Ruhango hahinze hegitare zigera kuri 500 z’umuceri. Bamwe muri abo bahinzi bavuga ko igiciro fatizo cyongerewe byaba bijyanye n’igihe u Rwanda rugezemo kuko guhinga, kubagara, kuyoboramo amazi no gusarura bibatwara menshi ariko ngo bajya guhembwa bagasanga barakoreye make.

Ibi birori byitabiriwe n’umuyobozi w’ishyirahamwe ry’uyu mukino mu Rwanda Utabarutse Theogene hamwe n’ushinzwe gushakisha impano muri Ministeri y’umuco na Siporo Habyarimana Florent.

ishuri ryisumbuye rya Kigoma rikomeje gutanga umusaruro ufatika muri Handball

Ibikombe bigera ku 10 birimo n’ibyo bakuye muri FEASSA bavuga ko babikesha kuba barubatse uyu mukino wa Handball bahereye ku bana ndetse kugeza abakinnyi benshi bari mu makipe akomeye ndetse n’iy’igihugu baturuka muri iri shuri, nk’uko byatangajwe n’umuyobozi w’iki kigo Kamali Steve

Yagize ati “Abakinnyi b’iki kigo bamaze guhagararira ishuri hanze y’igihugu mu mikino y’abanyeshuri kandi harimo n’abahagararariye igihugu kuko harimo abakina mu ikipe y’igihugu y’abatarengeje imyaka 20 ndetse na 17”.

Iki kigo kimaze kwegukana ibikombe 10

Perezida w’ishyirahamwe ry’umukino wa Handball mu Rwanda Utabarutse Theogene na we yashimiye uburyo iki kigo gihesha u Rwanda n’ishuri ryabo muri rusange, aho iri shuli ryatanze umusanzu ugaragara mu makipe akina Shampiona ndetse no mu makipe y’igihugu.

Utabarutse Theogene, Perezida wa FERWAHAND ashyikirizwa igikombe iki kigo cyakuye muri FEASSA iheruka kubera UGANDA

Iki kigo kiri mu batanze abakinnyi benshi bitabiriye igikombe cy’Afurika cy’abatarengeje imyaka 17 cyabereye muri Mali umwaka ushize, ndetse na Kapiteni w’iyi kipe akaba yari umunyeshuri w’I Kigoma witwa Karenzi Yannick.

Mu ikipe y’igihugu kandi itarengeje imyaka 20 yegukanye umwanya wa gatanu mu gikombe cy’Afurika cy’abatarengeje imyaka 20 cyabereye muri Senegal, abakinnyi ba Kigoma barimo Nshimiyimana Alexis na Karenzi Yannick bari mu bari muri iyi kipe.

Minisitiri Uwacu Julienne aha abana amata.

Umuganura wizihijwe bwa mbere mu kinyejana cya cyenda, nk’uko Mutangana Steven ukuriye ishami ry’umuco muri Ministeri y’umuco na Sport yabitangarije mu Karere ka Nyanza ahizihirijwe umuganura ku rwego rw’igihugu kuri iki cyumweru tariki 27 Kanama 2017.

Yavuze ko guhuza Umuganura n’ubumwe bw’Abanyarwanda ari uko muri iki gihe bishimangira iyo ngingo ikaba no mu kirangantego cya Repubulika.

Yagize ati "Ntabwo ari tombora kuko twagize igihe cyo kububura ariko mbere y’aho twarabuhoranye."

Wari umwanya wo kwibukiranya ibigize umuco Nyarwanda byose birimo n’imbyino.

Mutangana avuga ko wari umuhango wo kwishimira ibyo bagezeho mu buhinzi bakabyishimira bigaragaza ko kwigira kw’Abanyarwanda byahozeho na mbere.

Mu ijambo rye, Minisitiri w’Umuco na Siporo Uwacu Julienne yasabye abafite icyo batanga kuba baha bagenzi babo batagize iyo babona, kuko umuganura bisobanuye gusangira.

Umuganura mu Rwanda rwo hambere wizihizwaga mu gihe cy’umwero w’amasaka bakishimira uburumbuke kandi bikaba n’igihe cyo gusabana ku muryango mugari hamwe n’abaturanyi.

Umuganura nibyo birori bikuru bijyanye n’umuco byizihizwa mu Rwanda.

Umwe mu basaza waganiriye na Kigali Today avuga ko ise yabimubwiraga akiri muto ari umushumba.

Ati "Iyo igihe cy’Umuganura cyageraga bashakaga amarwa ya Kinyarwanda yo ku rusyo, bakaba bafite umutsima w’amasaka,amata y’inka,isogi bagashyiramo n’ibirunge bagaha abakurambere".

Akomeza avuga byagiraga umuco wo kubahana ugasanga umwana yubaha umubyeyi, nta mukazana wavugaga sebukwe mu izina.

Uyu muhango kandi wabereye no mu midugudu hirya no hino mu gihugu.Uwo munsi wabanjirijwe n’igitaramo cyabereye i Nyanza kizwi ku izina rya "Nyanza Twataramye". Abantu barahura bakongera bakibutswa uko mu Rwanda rwo hambere bataramaga n’indangagaciro zarangaga Abanyarwanda ari nako bigisha urubyiruko rw’ubu.

Insanganyamatsiko y’uyu mwaka yari "Umuganura isoko y’ubumwe n’ishingiro ryo kwigira."

Kureba andi mafoto menshi y’Umuganura kanda AHA

Kureba andi mafoto menshi y’igitaramo cyabanjirije Umuganura kanda AHA

Iribagiza avuga ko igihingwa cya Geranium cyakuye umuryango we mu bukene

Igihingwa cya Geranium kigurishwa amababi. Ayo mababi ajyanwa mu nganda agatungwanywa neza akavamo umushonge wifashishwa mu gukora amasabune n’imiti yica udukoko.

Uwo mushonge kandi unakoreshwa mu nganda zitunganya ibijyanye n’isuku yo kwa muganga.

Iribagiza avuga ko yatangiye kugihinga mu mwaka wa 2012, kuri hegitari eshanu. Ahamya ko imyaka itanu ishize ahinga Geranium, amaze kwinjiza miliyoni 20RWf.

Akomeza avuga ko ayo mafaranga yayakuye mu kugirisha ibibabi bya Geranium no kugurisha ingemwe zayo.

Avuga ko Geranium yera gatatu mu mwaka. Ibibabi asaruye abigurisha ku ruganda rubitunganya bakamwishyura 200RWf ku kiro kimwe.

Iribagiza atangaza ko buri mwaka yinjiza abarirwa hagati ya miliyoni 2RWf na miliyoni 3RWf ayakuye mu kugurisha amababi ya Geranium gusa.

Igihingwa cya Geranium ni uko kiba kimeze mu murima. Aha uyu muntu ari gusarura amababi yacyo

Akomeza avuga kandi ko,ingemwe z’icyo gihingwa agurisha, nazo zimwinjiriza atari make. Urugemwe rumwe arugurisha 20RWf. Izo ngemwe azigurisha ku bandi bahinzi bifuza kuzihinga.

Iribagiza avuga ko abaze, mu myaka itanu ishize ahinga Geranium, amaze kwinjiza miliyoni yamufashije gukura umuryango we mu bukene.

Agira ati “Kuva natangira kugihinga maze gukuramo arenga Miliyoni 20 nanakodesheje indi mirima kuko nshaka guhinga kuri hegitari zigera kuri 20 mvuye kuri eshanu.”

Akomeza avuga ko ayo mafaranga yose yatumye abasha kurihira abana be amashuri yisumbuye na kaminuza. Yatumye kandi yihangira n’indi mirimo irimo uwo gutwika amatafari.

Geranium ivamo amavuta yifashishwa ahantu hatandukanye nko mu nganda zikora imibavu

Abaturage bo mu Karere ka Ruhango by’umwihariko ab’i Gafunzo bigaragara ko igihingwa cya Geranium cyabazamuye ku buryo banibumbiye hamwe batangiza koperative ihinga kandi igatunganya icyo gihingwa.

Abibumbiye muri iyo Koperative yitwa COCUGEGA, bavuga ko ibibabi bya Geranium babitunganya bakabikuramo amavuta. Litiro imwe yayo mavuta bayigurisha Amadorari 250, abarirwa mu bihumbi 210RWf.

Kugira ngo babone ayo mavuta, bafata ibibabi bya Geranium ibiro 250 bakabivanga na litiro 250 z’amazi ubundi bakabishongesha (Distillation) bakabyazamo amavuta.

Izi mitiweri bafite bazishyuriwe n’Abanyarwanda baba muri Guinée-Conakry

Abo baturage bo mu Murenge wa Cyabakamyi, bashyikirijwe izo mitiweri ku wa kabiri tariki ya 22 Kanama 2017. Izo mitiweri zose zishyuwe n’Abanyarwanda baba muri Guinée-Conakry.

Abashyikirijwe izo mitiweri barabyishimiye bavuga ko ari ikintu cy’agaciro kuba Abanyarwanda baba mu mahanga batekereza abatishoboye baba mu Rwanda, nk’uko Mukamuyenzi Adela abivuga.

Agira ati “Nari naravunitse narabuze uko nivuza, ndera abana b’imfubyi nari narabuze uko mbishyurira mitiweri none barayibonye. Ndanashimira n’abo Banyarwanda baba mu mahanga."

Abaturage bahawe mitiweri bavuga ko usanga mu murenge wabo hari imiryango ibanye nabi bigatuma itabasha kumvikana uburyo yakwishyura mitiweri. Ibyo ngo bituma barembera mu rugo,nk’uko uyu abitangaza.

Agira ati “Umugabo wanjye n’iyo agiye gupagasa agaruka ambwira ko nta kintu yigeze abona ko atabasha kwishyurira abana twabyaranye bane. Ubu rwose barankoreye kuko nzabasha kuvuza abana banjye najye nindwara mbashe kujya kwa muganga."

Umuyobozi wungirije w’Akarere ka Nyanza ushinzwe imibereho myiza y’abaturage, Mutesi Solange ahamagarira abaturage b’Umurenge wa Cyabakamyi kwitabira ubwisungane mu kwivuza kuko ari inyungu zabo.

Umurenge wa Cyabakamyi uza mu mirenge ya nyuma mu gutanga ubwisungane mu kwivuza ku rwego rw’Intara y’Amajyepfo mu gihe undi Murenge wa Busasamana nawo wo muri Nyanza uza ku mwanya wa mbere muri iyo Ntara.

Ubuyobozi bw’Akarere buvuga ko bugiye gukora ubukangurambaga bwimbitse muri aba baturage babakangirira kwitabira gutanga amafaranga y’ubwisungane mu kwivuza.

Ndatimana Mustafa wambaye imyeru na mugenzi we bose bakomerekeye ku rugamba rwo kubohora igihugu imbere y’amazu bubakiwe babamo.

Kuri ubu u Rwanda ruragendwa kandi rufatwa nk’inyenyeri ya Afurika nyuma y’imyaka 23 ruvuye mu icuraburindi rya Jenoside yakorewe Abatutsi.

Kugira ngo bigerweho byasabye ubwitange bwa bamwe mu bari bakiri bato, bemeye gusiga ibyabo n’ubuzima bwabo, kugira ngo bagarure amahoro no kwisanzura mu Banyarwanda.

Benshi basize ubuzima mu rugamba rwo kwibohora, abandi bakomerekera ku rugamba ariko icyo baharaniye kigerwaho.

Karemera Aron wambaye ishati y’umweru na mugenzi we bose bakomerekeye ku rugamba basaba urubyiruko gutera ikirenge mu cyabo.

Ndatimana ni umwe muri bo. Yacitse akaboko nyuma yo guta umuryango we n’amashuri, ariko iyo asubiramo iyo nkuru ubona nta kwicuza bigaragara ku isura ye kuko aba yisekera.

Avuga ko impamvu yamuteye kwinjira igisirikare ari ibibazo byari mu gihugu atitaye ku ngaruka yahura nazo.

Agira ati “Kubera ibibazo byari mu gihugu sinitaye ku ngaruka nahura nazo kimwe n’izo umuryango wanjye wari guhura nazo biramutse bimenyekanye.”

Ndatimana wakomerekeye muri uru rugamba aho yacitse akaboko, avuga ko aticuza igikorwa yakoze kuko byagiriye akamaro Abanyarwanda.

Asaba urubyiruko gutera ikirenge mu cyabo bagakomereza aho bagejeje.

Mugenzi we Karemera Aron nawe wakomerekeye ku rugamba aho yacitse akaguru, avuga ko ubusanzwe mu buzima bwe agira urubyiruko inama zo gukunda igihugu.

Ati "Ubusanzwe negera urubyiruko nkarugira inama zo gukunda igihugu no kugiteza imbere. Mfite abana 12 harimo n’abiga muri kaminuza. Umwe muri bo yinjiye igidsirikare kubera gukunda igihugu."

Munezero Alphonse ukuriye inama y’igihugu y’urubyiruko mu Karere ka Ruhango, avuga ko kuri urubyiruko rukwiye kurebera ku bitanze bakabohora igihugu kuko icyo gihe banganaga nkabo.

Ati "Urugamba rw’amasasu rwararangiye igisigaye ni uguteza imbere igihugu nabo ubwabo biteza imbere kuko urugamba rw’amasasu rwararangiye."

Umuyobozi w’Akarere ka Ruhango Mbabazi Francoix Xavier, asaba urubyiruko kurebera ku bayobozi b’ingabo bariho ubu kuko mu myaka 23 ishize nabo bari bakiri urubyiruko abasaba gutera ikirenge mu cyabo.

Polisi yafashe mudasobwa zari zibwe zanagurishijwe

Izi mudasobwa zari zaribwe mu rwunge rw’amashuri rwa Nyamagana ruherereye mu murenge wa Ruhango.

Polisi ivuga ko n’izindi eshatu zisigaye bazikozaho imitwe y’intoki.
Abazibye bishe amadirishya babasha kwinjiramo. Mu bakurikiranyweho iki cyaha harimo n’abazamu barariraga iri shuri.

Umugenzacyaha mukuru akaba n’umuvugizi wa Polisi mu ntara y’Amajyepfo Insepector of Police Emmamnuel Kayigi avuga ko izi mudasobwa zafashwe ku bufatanye n’abaturage batanze amakuru.

Yagize ati"Gutangira amakuru ku gihe nibyo byafashije Polisi. Nyuma yo kwibwa izi mudasobwa zageze ku muturage zigurishwa, abona uburyo zigurishwamo harimo ikibazo. Nibwo yatanze amakuru zigenda zifatwa imwe ku yindi tugeza kuri izi mureba 27.

N’izindi eshatu zisigaye zirimo gushakishwa amakuru dufite ni uko ziri mu mujyi wa Kigali turazikozaho imitwe y’intoki."

Umuyobozi w’urwunge rw’amashuri rwa Nyamagana Bakarere ashima Polisi y’u Rwanda ubushishozi ikorana akazi kayo n’uburyo yabashije gufata izi mudasobwa.

Ati"Turashimira Polisi y’igihugu ubwitange n’umurava bakoranye iki gikorwa izi mudasobwa zikabasha kugaruzwa".

Umuyobozi w’ikigo kandi avuga ko hafashwe ingamba zo gushakisha amakampani yabigize umwuga mu gucunga umutekano kuko ubusanzwe bakoreshaga abaturage basanzwe.

Izi mudasobwa zibwe zari zifite agaciro ka Miliyoni 6 hakaba hafashwe izifiteb agaciro ka Miliyoni 5 n’ibihumbi Magana ane.

Abakurikiranyweho iki cyaha nikibahama bazahanishwa igifungo kiri hagati y’imyaka ibiri kugeza kuri ine n’ihazabu y’amafaranga agera kuri Miliyoni 12.

Ikarita nshya y’ubwisungane mu kwivuza

Bavuga ko kugeza ubu imyaka yatangiye kwera ku buryo abaturage babasha kubona amafaranga yo gutanga mu bwisungane mu kwivuza.

Umuyobozi w’ako karere wungirije ushinzwe imibereho myiza Kambayire Annonciata yavuze ko ibimina byo kwishyura ubwisungane mu kwivuza bizafasha Akarere kuza mu myanya ya mbere.

Yagize ati"Buri mudugudu ugomba kugira itsinda ryo gutanga amafaranga mu bimina bakazajya bagera igihe cyo kwishyura bararangije kwizigamira"

Ibi kandi byanagarutsweho na Guverineri w’Intara y’Amajyepfo Mureshyankwano Marie Rose watangarije kigalitoday ko ibimina bifasha abaturage kuko baba barishyuye hakiri kare.

Abandi bavuga ko kuba imyaka yareze muri aka karere ku buryo bushimishije bizatuma batanga ayo mafaranga nk’uko Mbarubukeye Emmanuel uyobora umudugudu wa Nyamutarama mu Murenge wa Mbuye abivuga.

Ati"Mu minsi yashize habayeho ikibazo cy’amapfa bituma tutabasha kwishyura ubwisungane mu kwivuza ariko ubu ibishyimbo byareze abaturage barimo kwitabira gutanga ubwisungane"

Ibi kandi abihurizaho n’ubuyobozi bw’Akarere bwizera ko umubare w’abatanga ubwisungane mu kwivuza uziyongera kuko babashije kweza imyaka nk’uko Kambayire abivuga.

Ati"Iyo ugeze mu bice by’amayaga usanga imyumbati yareze ku buryo abaturage usanga bayanitse,ibishyimbo n’amasaka nabyo byareze ku buryo nta gushidikanya abaturage bazatanga ubwisungane mu kwivuza kandi turabibakangurira "

Akarere ka Ruhango kaje ku mwanya wa 26 mu kwitabira ubwisungane mu kwivuza, mu mwaka ushize, ariko bavuga ko bagiye gushyira imbaraga mu bukangurambaga.

RDF ihamya ko izahana yihanukiriye umusilikare warashe umuturage

Muri uyu muhango wabereye mu Murenge wa Kibirizi mu Karere ka Nyanza ku mugoroba wo kuri uyu wa 11 Gicurasi 2017, Maj Gen Jack Nziza yihanganishije umuryango wa nyakwigendera awizeza ko uzabona ubutabera bukwiye, ndetse ko n’ubuyobozi bw’Ingabo buzabahora hafi.

Yagize ati” Biragoye kugira icyo umuntu yavuga kirenze ibi, gusa wa muco w’Abanyarwanda wo guhana by’intangarugero tuzawukora.”

Umuvugizi w’ingabo z’igihugu Lt Colonel Rene Ngendahimana, yavuze ko ibikorwa nk’ibi byo kwibasira abaturage bitazigera byihanganirwa muri RDF.

Ati"Akababaro mufite natwe niko dufite kuko umuco nk’uyu ubusanzwe si uwacu.”

Nyakwigendera Ntivuguruzwa yasezeweho mu cyubahiro

Kalisa Aime Callixte mukuru wa Nyakwigendera yavuze ko umuryango wabo ushimira by’umwihariko RDF kuba yarabafashe mu mugongo, ndetse anahamya ko uyu musirikare arasa murumuna we yabikoze ku giti cye, atabikoze mu izina rya RDF.

Ati"Mu by’ukuri uriya wakoze biriya si urwego rw’ingabo rwamutumye ahubwo yabikoze ku giti cye. Ibyo nkanabishingiraho nshimangira ko ibyagiye byandikwa bitandukanye bitunga urutoki RDF bitarimo ukuri.

Icyo nshima rero ni uko atari urwego rw’ingabo rwamutumye kuko iyo aba ari bo, ntibaba baje kudufata mu mugongo ngo badushyigikire kuri ubu buryo.”

Nyakwigendera Ntivuguruzwa yashyinguwe mu cyubahiro

Umusirikare warashe Ntivuguruzwa, akurikiranwe n’ubushinjacyaha bwa gisirikare, ahamwe n’ibyo byaha yakoze yahanishwa ingingo ya 140 y’amategeko ahana y’u Rwanda, agahabwa igihano cy’igifungo cya burundu.

Abaturage 15000 b’i Nyanza bagejejweho umuyoboro w’amazi meza

Ku wa gatatu tariki ya 26 Mata 2017, nibwo hatashywe umuyoboro w’ayo mazi n’Umusigiti wubatse mu Murenge wa Kibirizi, byose byuzuye bitwaye Miliyoni zisaga 60RWf.

Abaturage bagejejweho uwo muyoboro w’amazi ni abo mu Kagari ka Mututu, Umurenge wa Kibirizi bangana na 8000 n’abo mu Kagari ka Gahombo mu Murenge wa Kigoma bangana na 7000.

Umwe muri abo baturage witwa Musoni Hussein avuga ko batarabona uwo muyoboro w’amazi bavomaga amazi mabi y’ibishanga.

Agira ati “Indwara zajyaga zigaragara muri aka gace zishingiye ku isuku nke zizagabanuka kuko amavomo twari dufite amazi yaturukaga ku Rurumanza mu Karere ka Muhanga hakaba igihe abura tugashoka amazi y’ibishanga n’ay’Akanyaru.”

Mugenzi we witwa Mukeshimana Fatuma asanga amazi meza azabarinda indwara zari zarabibasiye kubera ko bavomaga amazi abandi bameseyemo.

Agira ati “Amazi twakoreshaga twayavomaga ahahinze umuceri kandi abakora muri icyo gishanga babaga bamaze kuyameshesha imyenda yabo banayakarabye ashotse tukayavoma. Ikindi kandi hano mu cyaro guteka amazi ntibikorwa.”

Saadi Ibuni Zaidi ageza ijambo ku baturage ba Mututu muri Nyanza

Uwo munyemari Saadi Ibuni Zaidi yageze bwa mbere mu Rwanda i Nyanza mu mwaka wa 2015. Yarahageze Abayisilamu baho bamwereka imishinga bafite, abatera inkunga, bayishyira mu bikorwa.

Nyuma y’aho ngo nibwo yatangiye ibikorwa byo gufasha n’abandi baturage batandukanye bo muri Nyanza.

Usibye ibyo bikorwa byatashywe yanakoze n’ibindi bikorwa by’iterambere birimo kugabira inka abatishoboye no kubishyurira mitiweri.

Saadi Ibuni Zaidi avuga ko yakunze u Rwanda kuva akirugeramo. Ibi ahanini ngo yabitewe n’imiyoborere myiza n’umutekano yahasanze.

Akomeza abwira abaturage begerejwe uwo muyoboro w’amazi kuyakoresha neza akabafasha kugira ubizima bwiza.

Agira ati “Amazi yagufasha mu kugira isuku, kuyaha amatungo n’ibindi bikorwa bitandukanye bya muntu bikenera amazi. Ndumva rero aya mazi azafasha abaturage mu mibereho yabo."

Ntazinda Erasme,Umuyobozi w’Akarere ka Nyanza avuga ko abaturage bamaze kugezwaho amazi meza babarirwa muri 74%.

Uwo musigiti bawubakiwe na Saadi Ibuni Zaidi

Minisitiri Kaboneka arasaba urubyiruko kurwanya amacakubiri

Ibi Minisitiri Kaboneka yabivugiye i Nyanza ubwo hibukwaga abazize Jenoside yakorewe Abatutsi biciwe mu Mujyi wa Nyanza no mu nkengero zawo, umuhango wabaye kuri uyu wa 23 Mata 2017.

Yagize ati"N’ubwo umwana agomba kubaha umubyeyi we akamwumvira ariko nusanga umubyeyi wawe akwigisha ivangura ntuzamwumvire uzamusuzugure."

Muri aka karere kandi hiciwe Abatutsi bahungaga baturutse mu cyahoze ari Kibuye, ubu hasigaye ari mu karere ka Karongi.

Abarokotse Jenoside yakorewe Abatutsi bo muri Nyanza bongeye gusaba ababa bazi ahari imibiri y’abishwe muri Jenoside itarashyingurwa, ko bahavuga kugirango nabo bashyingurwe mu cyubahiro.

bamwe mu bitabiriye umuhango wo kwibuka muri Nyanza

Ruhengeka Vedaste ati"Nk’ubu sindabona aho data ashyinguye kandi abamwishe bafungiye muri gereza ya Mpanga.

Kubaho utarashyingura uwawe wumva biteye agahinda ukumva muri wowe buri gihe hari icyo ubura."

Ibi kandi byagarutsweho n’umunyamabanga nshingwabikorwa wa Komisiyo yo kurwanya Jenoside Bizimana Jean Damascene, wavuze ko kuba hari imibiri igenda igaragara bikigaragaza ingengabitekerezo ikiri muri bamwe mu Banyarwanda.

Ati"Ugasanga imibiri igenda igaragara ari uko barimo kubaka inzu, abasiza bakayigeraho mu gihe ababishe bari muri ako gace bashobora gutanga amakuru yafasha ngo bashyingurwe mu cyubahiro.

Ibi ni ibigaragaraza ko hakiriho ingengabitekerezo muri bamwe. "

Abantu batandukanye bunamiye abazize Jenoside ku Rwibutso rwa Nyanza

Mu bushakashatsi bwakozwe na CNLG guhera mu mwaka wa 1995 kugeza 2015 bwagaragaje ko ingengabitekerezo yagabanutseho 84,3%.

CNLG kandi ivuga ko mu mwaka washize(2016), mu cyumweru cyo kwibuka abantu 236 bagaragaweho ingengabitekerezo mu gihe uyu mwaka zitagera kuri 50.

Gare ya Ruhango nta nyubako zihagije ifite zakorerwamo

Umwe mu bamotari bakorera muri iyi gare avuga ko mu gihe cy’imvura bajya kugama inyuma ya gare kuko batabona aho bakugama.

Mu gihe cy’izuba nabwo imodoka ngo ziba zibatera ivumbi kuko bigaragara ko hatakozwe ngo harangire neza.

Yagize ati"Mu gihe cy’imvura tujya kugama mu maduka yo mu mujyi kuko hano utapfa kubona aho wakwikinga kandi ni nako bimera mu gihe cy’izuba."

Gasangwa Jean Luke umugenzi wari muri iyi gare yavuze ko n’uburyo yubatse bibangamye kandi bishobora guteza impanuka.

Ati"Iyi gare yubatse ahantu hateza impanuka mu buryo bwihuse.
Iyo uturutse Muhanga uhagera umanuka. Waba unaturutse mu bice bya Huye ukahagera umanuka. Ibi ku bwanjye mbona byateza impanuka mu buryo bwihuse"

Uretse kuba iyi gare itaruzura ku buryo ikemura ibibazo by’abahagenda hari n’abavuga ko uburyo hateye ubwaho harutwa n’aho yahoze kuko ho hari hitaruye gato umuhanda munini ku buryo hatateza impanuka.

Abatuye Ruhango banavuga ko bidindiza ubucuruzi kuko nta nyubako zirimo zacururizwamo, kandi ariho haba horoshye kubona abaguzi.

Mbabazi Francoix Xavier umuyobozi w’Akarere ka Ruhango, avuga ko yatashywe by’agateganyo ariko ku bufatanye n’abafatanyabikorwa ikaba izagurwa, ikaba nini ikajya ikorerwamo ibikorwa bitandukanye.

Ati"Ku bufatanye n’abikorera mu karere ka Ruhango biyemeje kuba bakubaka indi nzu yakwifashishwa n’abandi bakenera gukorera muri gare.

Bityo rero n’abakenera izindi servisi bazazibona ariko mu gihe bitarakorwa Akarere kazashaka ibisubizo byihuse"

N’ubwo iyi Gare abayikoresha bavuga ko ari nto ikeneye kwagurwa, kugera ubu usibye kuba hatari amazu menshi yakorerwamo, n’abantu bakabona aho bikinga imvura, imodoka ziyikoreramo si nyinshi ku buryo zabura imyanya.

Igice cya "Gerenade" yaturikanye Bayisenge

Ibyo byabereye mu Mudugudu wa Nyamagana mu Kagari ka Nyamagana mu Murenge wa Ruhango, mu gitondo cyo kuri uyu wa gatatu tariki ya 12 Mata 2017.

Bayisenge ufite imyaka 26 yari arimo ahinga, akubita isuka kuri iyo “Gerenade” yari iri mu butaka, yo mu bwoko bwa “Stik” ihita imuturikana, imukomeretsa mu maso mu buryo bworoheje. Yahise ajyanwa kwa muganga.

Nahayo, Umunyamabanga nshingwabikorwa w’Umurenge wa Ruhango yemeje ayo makuru avuga ko byabaye saa mbiri n’igice za mu gitondo.

Polisi y’Igihugu ikangurira abaturage kwirinda gukinisha ibyuma batazi no kumenyesha inzego z’umutekano ahantu hose hakekwa kuba ibisasu.

Abacungagereza bo mu Rwanda bakira minisitiri Mamadou Ismael Konate

Tariki ya 7 Werurwe, Mamadou Ismael Konate yasuye ishuri ILPD ryigisha amategeko no kuyashyira mu bikorwa riherereye i Nyanza, anasura gereza mpuzamahanga yubatse i Mpanga.

Yagize ati"Twakiriye abagororwa bagera kuri 20 b’Abanyarwanda. Ninsubirayo nzababwira ko mu Rwanda hari gereza nziza kuruta izibateganyirijwe ahandi, ko nta mpamvu batakorera ibihano byabo mu Rwanda. "

Yashimye uko inkiko Gacaca zakoze agasanga no muri Afrika bikwiye hakurikijwe umuco wa buri gihugu.

Ati"Uyu ni umwihariko w’u Rwanda ibihugu bya Afrika bikwiye kwigiraho kuko buri gihugu gifite umuco wacyo cyabyazamo umusaruro, ugendeye kuri Gacaca mu Rwanda. Nanjye ngiye kujyana Gacaca iwacu nk’igihugu cyahuye n’ibibazo".

Yabanje gusura ishuri rikuru ryigisha ibijyanye n’ ishyirwa mu bikorwa ry’amategeko ILPD giherereye mu Mujyi wa Nyanza aho yishimiye imikorere y’iki kigo anifuza ko habaho ubufatanye hagati y’ibihugu byombi.

Minisitiri Mamadou Ismael Konate aganira n’umugororwa wo muri Sierra Leone

Umunyamabanga uhoraho muri Ministeri y’ubutabera Karihangabo Isabelle yavuze ko ibihugu byombi bizafatanya bigasangira ubumenyi ku micungire y’abagororwa.

Yavuze kandi ko abacungagereza bo mu Rwanda bashobora no kuzajya muri Mali bagasura Abanyarwanda bafungiyeyo, bakabasobanurira uko abagororwa bo mu Rwanda bafashwe.

Mu bindi byavuzwe ni uko habaho ubufatanye hagati y’ishuri rikuru ryigisha ibijyanye n’ishyirwa mu bikorwa ry’amategeko ILPD, n’abanyamategeko bo muri Mali kuko yasanze ibihigirwa bitaba muri Mali.

Muri iyi Gereza mpuzamahanga ya Mpanga yakiriye abagororwa umunani bakomoka muri Sierra Leone, muri bo babiri barangije ibihano byabo. Bose bafungiwe ibyaha by’intambara bakoreye muri icyo gihugu.

Minisitiri Mamadou Ismael Konate yashimye imikorere ya gereza ya Mpanga

Igihugu cya Mali cyarakiriye abakatiwe n’urukiko mpuzamahanga rwashyiriweho u Rwanda ruherereye i Arusha muri Tanzania (TPIR) bageraga kuri 20 ubu hasigaye abagera kuri 16, bane barangije ibihano.

Aha niho hakoreraga gare ya Ruhango

Iyi gare igiye kumara ukwezi yimuriwe muri metero zisaga 500 uvuye muri iri soko, mbere yari iri hamwe n’isoko bigatuma abayigana barijyamo nta kanya bifashe.

Kwimurwa kwayo rero ngo byatumye abagenzi baguraga ibicuruzwa batabona umwanya wo kurijyamo nk’uko abahacururiza babivuga.

Umwe ati"Twe baraduhombeje ku buryo bugaragara ariko ubu keretse uwagarura gare ya Ruhango kandi ntibyashobokaga".

Undi ati"Njye nabimenye hakiri kare mva mu bucuruzi kuko nabonaga nta bakiliya nzabona mpitamo kubyihorera ubu nzashaka uko nakora ibindi bimbeshaho"

Bavuga ko kuva gare yakwimurwa hari abacururizaga muri iri soko bimutse bajya gushaka ahandi bacururiza kuko nta bakiliya babonaga.

Ubuyobozi bw’Akarere ka Ruhango bwo butangaza ko abantu badakwiye gucuruza barangamiye kuri gare.

Gare yimuriwe muri metero 500 uvuye aho yahoze

Ikindi bavuga ko ubuto bwa gare bwatumye bashyiramo abacuruza ibikenerwa n’abagenzi mu ngendo zabo nk’uko umuyobozi w’Akarere ka Ruhango Mbabazi Francoix Xavier abivuga.

Ati"Kuri ubu muri gare haracyari hato. Twabanje gushyiraho uburyo habanza gucururizamo abantu bafite ibikenerwa n’abagenzi bahanyura"

Uyu muyobozi kandi asaba abacuruzi kwitabira iri soko kuko hari abacuruzi benshi bagiye kuhimukira bitewe n’uko hari inzu zifatwa nk’amanegeka ba nyirazo bazasabwa kuzivugurura bityo abahacururizaga bakajya muri iri soko.

Ati"Ririya soko tuzabanza kurivugurura dusigemo amarangi kuko harimo ku ruhande rwegereye gare ahasizwe amarangi hejuru y’andi ku buryo tuzabanza kuhavugurura. "

Ubuyobozi bw’Akarere kandi buvuga ko kwimura gare bizaca akajagari karangwaga muri iyi yari yegeranye n’isoko rya Ruhango.

Ahatabarizwa Umwami Kigeli V Ndahindurwa hari hagitunganywa. Aho ni ahari umusezero w’Umwami Mutara III Rudahigwa

Umwami Kigeli V Ndahindurwa aratabarizwa kuri iki cyumweru tariki ya 15 Mutarama 2017.

Mu ma saa cyenda zo ku wa gatandatu tariki ya 14 Mutarama 2017, ubwo Kigali Today yageraga ahari kubera imyiteguro yo kumutabariza, yasanze imirimo yo kubaka ahazakirirwa umugogo hakirimo gutunganywa.

Hari hari abafundi bacyubaka, abandi bari gukora isuku ku musezero w’Umwami Mutara III Rudahigwa n’abandi bari gutunganya ahakirirwa abatabaye.

Ahakirirwa abatabaye ni mu Rukari ahari ingoro y’Umwami. Biteganyijwe ko hakirwa abantu barenga 2500. Aho ni naho hasomerwa misa yo kumusezeraho bwa nyuma indi mihango yo kumutabariza igakomereza i Mwima.

Imirimo yo gutabariza Umwami Kigeli V Ndahindurwa yari irimbanyije, abafundi bacyubaka

Misa yo gusezera ku Mwami Kigeli V Ndahindurwa irabera mu Rukari ahari Ingoro y’Umwami

Ingoro y’Umwami mu Rukari

Aha niho hazabera igitambo cya Misa cyo gusezera Umwami Kigeli V Ndahindurwa

Amafoto: Sesonga Junior

Abakozi umunani b’Akarere ka Nyanza bafunze bakekwaho kunyereza amafaranga yagenewe abaturage

Tariki ya 14 Ugushyingo 2016 nibwo aba bakozi batawe muri yombi. Barimo n’abatakiri mu kazi.

Bafungiye kuri sitasiyo ya Polisi ya Busasamana; nkuko byemezwa n’umuvugizi wa Polisi mu Ntara y’Amajyepfo akaba n’umujyenzacyaha muri iyo ntara; CIP André Hakizimana.

Abo bakozi bafunze harimo umuyobozi w’Umurenge wa Nyagisozi n’umukozi wari ushinzwe VUP muri uwo murenge.

Harimo kandi umukozi w’Akarere ka Nyanza wari ushinzwe imiyoborere myiza n’umukozi wari ushinzwe imibereho myiza y’abaturage muri ako karere.

Amakuru agera kuri Kigali Today avuga ko hari n’abandi bashobora gukurikiranwa mu minsi iri imbere kuko hagikorwa iperereza ngo bamenyekane neza.

Turacyakurikirana iby’iyi nkuru

ACP Badege Theos atanga inama yo kubahiriza umuvuduko wanditse ku byapa byo ku mihanda

Uyu muryango wahitanywe n’iyi mpanuka ugizwe na Nkurayije w’imyaka 51 n’umugore we Musabyimana Alice w’imyaka 51 n’abana babiri babo Mfitumukiza w’imyaka 12 na Tumukunde w’imyaka 9.

Iyi mpanuka yabereye mu Murenge wa Byimana ahazwi nko ku Ntenyo mu Karere ka Ruhango.

Abayibonye bavuze ko yatewe n’umuvuduko mwinshi w’uwari utwaye, wamaze kugonga abo bantu agahita ava mu modoka akiruka.

Umuvugizi wa Polisi y’igihugu ACP Theos Badege, yavuze ko polisi ikiri gushakisha uwarutwaye iyi modoka kugira ngo akurikiranwe kuri iyo mpanuka yatewe n’umuvuduko ukabije.

Ati “ Turacyakora iperereza kuri iyi mpanuka, ndetse polisi iracyashakisha uwari uyitwaye kugirango akurikiranwe”.

Ubushakashatsi bwagaragaje ko impanuka nyinshi zibera mu Rwanda ziterwa n’umuvuduko mwinshi.

Polisi itanga inama ku batwara ibinyabiziga yo kurushaho kubahiriza umuvuduko usabwa n’ibyapa byo mu muhanda, mu rwego rwo kwirinda impanuka.

Iburyo Komiseri Mukasine Marie Claire, Mureshyankwano Marie Rose na Munyantwari Alphonse

Asimbuye Muntantwari Alphonse wagizwe Guverineri w’Intara y’Iburengerazuba.

Bamutoreye mu nama idasanzwe y’umuryango RPF yateranye kuri iki cyumweru tariki ya 13 Ugushyingo 2016.

Mu banyamuryango 607 batoye, Mureshyankwano yatowe na 573 agira amajwi angana na 94,3%.

Akimara gutorwa yatangaje ko agiye gushyira imbaraga mu kongerera ubushobozi urwego rw’Umudugudu, kuko rufatwa nk’inkingi ya mbere mu banyamuryango.

Yagize ati" Icy’ingenzi mu rwego rw’umuryango ni ukwegera abaturage cyane cyane mu rwego rw’Umudugudu kuko niho umuturage aba.

Ikindi ni ugushishikariza abayobozi gukemura ibibazo by’abaturage batishoboye, kuko tugomba gufatanya n’abaturage kubagezaho iterambere rirambye".

Guverineri Mureshyakwano ageza Ijambo ku banyamuryango ba RPF nyuma yo gutorwa

Komiseri Mukasine Marie Claire wari intumwa y’umuryango RPF ku rwego rw’igihugu, yasabye buri munyamuryango kubera abandi urugero mu byo akora byose.

Ati "Dukwiye kuba intangarugero mu mvugo no mu ngiro, abatubona bakatwigana, ndetse bakanatugana bakaba abanyamuryango.”

Komiseri Mukasine Marie Claire ageza ijambo ku banyamuryango ba RPF Inkotanyi

Uyu muhango waberaga ku cyicaro cy’uyu muryango ku rwego rw’Intara y’Amajyepfo, wasojwe n’ihererekanya bubasha hagati y’aba bayobozi.

Abanyamuryango ba RPF muri aka karere bari bitabiriye aya matora

Umuvugizi wa ADEPR Bishop Sibomana Jean

Yabitangarije mu muhango wo gutangiza icyumweru cy’umuryango mu itorero ADEPR mu Rwanda, cyatangiriye mu Karere ka Ruhango, tariki ya 07 Ugushyingo 2016.

Agira ati “Tuzita cyane cyane ku burere bw’umwana w’umukobwa bitavuze ko n’abahungu bibagiranye.

Dutoza ababyeyi kuzana abana ku cyumweru kugira ngo babashe kwigishwa. Turashaka abantu bubaka igihugu bakanubaha Imana.”

Akomeza avuga ko hashize imyaka itandatu batangije gahunda y’icyumweru cy’umuryango. Kandi ko bagendera ku nsanganyamatsiko ya Leta kugira ngo babashe gutanga umusanzu wabo mu kubaka umuryango nyarwanda.

Minisitiri w’Iterambere ry’Umuryango, Nyirasafari Espérence ashishikariza abayobozi b’amatorero n’amadini yo mu Rwanda gukomeza kugira uruhare mu burere bw’abana.

Avuga ko uburere bw’umwana buhera bwa mbere ku babyeyi be, abayobozi b’amadini n’amatorero na bo gushyiraho akabo kugira ngo bagarure mu murongo abayoboke babo bite ku burere bw’abana.

Agira ati “Abana bata imiryango bakajya mu mihanda kuko baba basanga hari amakimbirane. Amadini n’matorero barasabwa kugira ubufatanye kuko twese dutahiriza umugozi umwe.”

Minisitiri wa MIGEPROF (uwa kabiri iburyo) yakanguriye abanyamadini n’amatorero gukomeza kwita ku burere bw’abana

Amakimbirane mu miryango afatwa nk’impamvu nyamukuru itera abana ubuzererezi kuko abana babura umutekano mu rugo bagahita bajya mu muhanda.

Kubera iyo mpamvu ngo hateganyijwe ibihano ku babyeyi bizagaragara ko ari bo batuma abana babo baba inzererezi.

Ababyeyi batandukanye bahamya ko bagiye guhindura imyitwarire yabarangaga mu kwita ku miryango yabo.

Ubwo hatangizwaga icyo cyumweru cyahariwe umuryango, itorero ADEPR ryarihiye mitiweri abaturage 300 bo mu Karere ka Ruhango.

Izo ni imbwa za Sibomana ziryamye mu rugo iwe. Zirirwa zibunga ntazifungirana

Aba baturage bavuga ko izo mbwa iyo ziriye abantu cyangwa amatungo nta gikorwa ngo nyirazo ahanwe cyangwa ngo avuze abo zariye.

Mukarugira Marie Chantal, utuye muri ako kagari avuga ko imbwa z’uwo muturanyi wabo, witwa Sibomana Aimable, ziriye umwana we. Yagiye kumvuza amafaranga amushira nyara ngo Sibomana ntacyo yamufashije.

Agira ati “Uyu mugabo nta na kimwe yigeze amfasha. Nagurishije uduhene twanjye kugeza aho mpagarikiye.

Nategeshaga 2000RWf kujya i Nyanza nkongeraho n’ayo kurya, amafaranga aragenda anshiriraho burundu. Nibwo twahagaritse kongera kwivuza kuko nawe ntacyo yigeze adufasha ngo tuvurwe.”

Umukecuru witwa Niyonsaba we atuye mu murenge wa Kinazi, wo mu karere ka Huye, uhana imbibi na Cyotamakara. Avuga ko izo mbwa zamuririye ihene agasaba ko yakwishyurwa izo hene ze.

Agira ati "Zandiriye ihene azihagarikiye ku buryo namureze ku mukuru w’Umudugudu ariko aduca amazi (aradusuzugura). Icyo nasabaga ni uko yandihira ihene kuko ni zo zimbeshejeho."

Sibomana ngo atunze imbwa ebyiri. Abaturage bahamya ko ari zo zisagarira abantu zikabarya kandi ngo ntajya azikingiza.

Ikibazo cy’izi mbwa cyageze kuri Guverineri w’Intara y’Amajyepfo, Mureshyankwano Marie Rose ahwiturira ubuyobozi gukurikirana icyo kibazo.

Yavuze ko abariwe n’imbwa za Sibomana agomba kubavuza kandi n’amatungo y’abaturage zariwe akayishyura.

Agira ati "Ntibyemewe niba umuntu afite imbwa agomba kuyifunga ku buryo itarya abantu. Polisi irabafasha ikibazo mugikurikirane. Bayobozi b’Akagari n’Umurenge mumenye niba izo mbwa zikingiye.”

Guverineri Mureshyankwano yasabye abantu batunze imbwa kuzikingiza kandi bakanazifungira mu ngo zabo.

Ubwo twakoraga iyi nkuru ntitwabashije kubona Sibomana ngo agire icyo atangaza ku byo abaturage bamushinja. Twagiye no mu rugo iwe ntitwahamusanga ahubwo twahasanze imbwa ze.

Guverineri Mureshyankwano yakiriye ibitabo bikubiyemo ibyagezweho n’ibiteganya gukorwa mu Ntara y’amajyepfo

Yabitangaje mu muhango w’ihererekanyabubasha hagati ye n’uwo asimbuye ku buyobozi bw’iyo ntara, Guverineri Munyantwari Alphonse, tariki ya 25 Ukwakira 2016.

Guverineri Munyantwari, usigaye ayobora intara y’Iburengerazuba, yeretse umusimbuye ko mu myaka itanu yari amaze ayobora intara y’amajyepfo, hubatswe gare y’imodoka igezweho n’amasoko yubatswe n’abikorera.

Iki kandi ngo assize abaturage bafite amazi meza babarirwa muri 77% naho abafite amashanyarazi ari 20,3%.

Yabwiye Guverineri Mureshyankwano ko ibyo byagezweho kubera ubufatanye bw’abayobozi n’abaturage bwatumye bakora nk’ikipe imwe. Ngo ni ngombwa ku bukomeza.

Mureshyankwano abaye guverineri wa kane w’Intara y’amajyepfo

Guverineri Mureshyankwano avuga ko yishimiye kuyobora ikipe itsinda. Imyaka 10 yamaze ari intumwa ya rubanda ngo ni umusingi ukomeye uzamufasha mu gukomeza guteza imbere Intara y’Amajyepfo.

Agira ati “Ndabizeza ubwitange. Imbaraga ndazifite, n’ubushake ndabufite. Niteguye kuzakira inama n’ibitekerezo byanyu.”

Nubwo hari byinshi byagezweho mu ntara y’amajyepfo, haracyari abaturage bakennye babarirwa muri 38,4% n’abandi bakennye cyane babarirwa muri 12,9%.

Ikindi kandi hari ibikorwa remezo bitakozwe birimo imihanda nka Huye-Kibeho, Gasoro-Nyamata na Huye Kitabi, batekerezaga gushyiramo kaburimbo.

Guverineri Munyantwari yahawe impano y’umupira izajya imwibutsa ko yabaye guverineri wa gatatu w’Intara y’Amajyepfo

Ibi byose Guverineri Mureshyankwano yabwiwe ko agomba kuzabyitaho.
Umunyamabanga wa Leta muri Minisiteri y’ubutegetsi bw’igihugu, Vincent Munyeshyaka yavuze ko mu bikorwa by’imihigo uturere two mu ntara y’amajyepfo twakunze kuza mu myanya ya mbere.

Yabwiye Guverineri Mureshyankwano, ko afite umusingi mwiza wo gukoreraho, ko ahasigaye ari ahe.

Agira ati “Aho utangirira haragaragara. Intambwe yari imaze guterwa uzakore ku buryo mukuba kabiri izatewe.”

Umunyamabanga wa Leta muri Minaloc, yavuze ko Intara y’ amajyepfo yakunze kuza mu myanya y’imbere mu mihigo, Mureshyankwano na we afite aho gutangirira

Mureshyankwano abaye umuyobozi wa kane w’Intara y’Amajyepfo, nyuma ya Alphonse Munyantwari, Fidèle Ndayisaba na Eraste Kabera.

Uretse kuba yari amaze imyaka 10 ari intumwa ya rubanda, mu mirimo yakoze harimo no kwigisha no kuba umujyanama w’inama y’igihugu y’abagore mu Karere ka Rutsiro.

Abayobozi batandukanye bari bitabiriye uwo muhango

Mu karere ka Nyanza abantu batanu baturikanwe n’igisasu

Ibi byabereye mu mudugudu wa Nyabusheshe, akagari ka Butara mu murenge wa Kigoma, kuri uyu wa 25 Nzeli 2016.

Aba abana batoraguraga ibyuma byashaje bagurisha bizwi ku izina ry’Injyamani, batoraguramo igisasu.

Ubwo bagikinishaga bagikorogoshora, cyabaturikanye umwe muri bo ahita apfa, abandi batatu n’umugabo bari kumwe barakomereka, nk’uko abaturage babivuga.

Ubuyobozi bw’umurenge wa Kigoma buvuga ko umugabo ari mu kigero cy’imyaka 37, abana bo bakaba hagati y’imyaka umunani na 12. Uwapfuye yari afite imyaka 12.

Abakomeretse bajyanwe ku bitaro bya Nyanza, bari kuvurwa.

Umunyamabanga nshingwabikorwa w’umurenge wa Kigoma Gasore Clement avuga ko bikimara kuba ubuyobozi bw’akarere bwihutiye kuhagera.

Icyo abayobozi basabye abaturage ni ukwirinda gukinisha ibyuma batazi.

Ubwo twakoraga iyi nkuru twashatse kumenya icyo inzego z’umutekano zibivugaho, ariko ntitwabasha kuvugana n’ubuyobozi bwa Polisi. Turacyayikurikirana.

Babiri barwariye mu bitaro bya Nyanza bamerewe nabi

Umunyamakuru wa Kigali Today uri mu Karere ka Nyanza avuga ko abo bagore babiri babazanye mu bitaro bya Nyanza banegekaye kuburyo batabasha no kuvuga. Bari kwitabwaho n’abaganga kuva tariki ya 19 Nzeli 2016.

Babasanze aho basengeraga ku musozi witwa Runga mu murenge wa Rwabicuma ho mu karere ka Nyanza. Bababonye nyuma yuko abahaturiye batabaje.

Umwe mu barwariye mu bitaro bya Nyanza, yavutse mu mwaka wa 1968. Avuka mu murenge wa Rwabicuma ariko yari yarashakiye mu murenge wa Ntyazo. Yari amaze igihe atagera iwabo; nkuko Mupfuyisoni Helevanie umurwaje, abisobanura.

Agira ati “Twasanze afite ibitabo bya Bibiliya n’iby’indirimbo ariko dusanga yanegekaye atabasha no kuvuga.”

Akomeza avuga ko yirirwa mu mashyamba aho asengera mu idini ry’Abakusi. Ashobora ngo kuba afite ikibazo cyo mu mutwe.

Undi murwayi akomoka muri Nyamagabe. Arwajwe n’umukobwa we witwa Nyinawumuntu Devota. Nyinawumuntu avuga ko hari hashize imyaka ibiri baramubuze.

Yagize ati "Hashize imyaka ibiri tutazi aho aherereye. Mbere bajyaga basengera i Runga ari benshi ariko tuza kubabura kugeza magingo aya, ntitwari tuzi aho aherereye."

Akomeza avuga ko bamenye aho aherereye nyuma yuko abamubonye ku musozi wa Runga bamurangishije. Basanze nta ndangamuntu na mitiweri afite. Kuko ngo idini basengeramo ry’Abakusi ritabyemera. Yari afite ibyangombwa bisimbura indangamuntu.

Dr Yannick Lokombo, umuganga mu bitaro bya Nyanza, yatangarije Kigali Today ko abo barwayi bombi bagejejwe mu bitaro bameze nabi. Bari bafite umwuma no gutakaza isukari. Ahamya ko bari kubitaho ku buryo bafite icyizere ko bazataha vuba.

Umunyamabanga Nshingwabikorwa w’umurenge wa Rwabicuma, Bizimana Egide, avuga ko kuri uwo musozi babasanzeho ari batatu gusa. Nta burwayi bundi bari bafite. Banegekajwe n’inzara. Ahamya ko n’uwapfuye yishwe n’inzara.

Asaba abasenga kubikorera ahantu hazwi. Byaba ari ukubikora mu buryo budasanzwe bakabisabira uburenganzira mu buyobozi.

Byatangajwe n’umuyobozi w’ Akarere ka Ruhango Mbabazi Francois Xavier, mu muhango wo gusinyana n’imirenge igize aka karere imihigo, wabaye kuri uyu wa kane tariki ya 15 nzeli 2016.

Mbabazi Francois Xavier umuyobozi w’Akarere ka Ruhango

Mu mihigo basinye biyemeje gukoresha ikoranabuhanga mu gutanga serivise, aho bahigiye kubyaza umusaruro urubuga rwa Irembo.

Irembo ni urubuga Leta yashyizeho rufasha abaturage kubona serivise zitandukanye bakenera ku buryo bwihuse, hifashishijwe ikoranabuhanga.
Umuyobozi w’Aka Karere avuga ko muri uyu mwaka w’imihigo, bagomba kwegereza abaturage izi serivise zitangirwa kuri uru rubuga, kugirango barusheho koroherwa.

Ati” Kubona ibyangombwa byasabaga umuturage kuva mu byo arimo, agafata igihe kinini abyirukaho.

Gukoresha ikoranabuhanga bizafasha abaturage gusaba ibyangombwa, batagombye kuva mu byo barimo”.

Harelimana Jean Paul wakoresheje serivise za Irembo, ashima uburyo byihuta kandi bitagoranye, kugirango serivise igere kuyisaba.

Ati" Nakoresheje urubuga rwa Irembo nsaba icyemezo cy’abajya mu mahanga mbikora nshidikanya. Ariko nagiye kubona mbona barampamagaye barakimpaye.

Nahise numva n’izindi serivisi zisaba gukoresha irembo nzajya nzitabira, ndetse ndanashihikariza abandi kuzikoresha kuko bitagoranye"

Abayobozi b’Imirenge igize akarere ka Ruhango bahigiye kubyaza umusaruro urubuga rwa Irembo

Urubuga rwa Irembo rugaragaraho serivise zigera kuri 17, zirimo inyinshi abaturage bakenera mu buzima bwabo bwa buri munsi.

Zimwe muri izo serivise harimo, gusaba ibyangombwa by’ubutaka, icyemezo cy’amavuko, icyemezo cyo gutwara ibinyabiziga, gusaba icyangombwa cyo kujya mu mahanga n’izindi nyinshi.

Ukeneye serivise ku rubuga rwa Irembo, yandika muri mudasobwa cyangwa muri telephone ye ikoresha interineti www.irembo.gov.rw, agasaba serivise yifuza akayihabwa mu gihe gito.

Abakozi b’Akarere n’abafatanyabikorwa mu kucyubaka nabo bacyambukiyeho ku ikubitiro.

Iki kiraro cyatwaye agera kuri miliyoni 50Frw, gishobora kugendwaho n’amatungo nk’inka, kikananyuzwaho ibintu bifite uburemere bwa toni 12,5.

Abaturage bavuga ko iki kiraro kigiye kubakemurira ibibazo bishingiye ku kurohama kwa hato na hato kw’abana babo, bajyaga kwiga bambutse uwo mugezi hamwe n’ibicuruzwa. Bavuga ko byateraga ibibazo mu migenderanire n’ubutwererane hagati y’iyo mirenge.

Umunyamabanga Nshingwabikorwa w’Umurenge wa Nyagisozi Nsengiyumva Alfred, yavuze ko iki kiraro kizazamura abaturage mu rwego rw’imibereho. Abishingira ko kizongera urujya n’uruza rw’ibicuruzwa hagati y’iyo mirenge.

Yongeraho ko kizifashishwa mu kugira aka gace nka kamwe mu hantu nyaburanga, hasurwa n’abaturutse mu yindi mirenge.

Umunyamabanga Nshingwabikorwa w’agateganyo w’Akarere ka Nyanza Bwana Nkurunziza Enock, yasabye abaturage kurinda kiriya kiraro ngo hatagira icyaruhungabanya. Yavuze ko kitaweho neza gishobora kumara imyaka 70 kigikomeye.

Iki kiraro cyubatswe ku bufatanye bw’Akarere ka Nyanza n’umushinga Bridging for prosperty.

Bamwe mu bari mu mahugurwa.

Byavuzwe nyuma y’amahugurwa y’iminsi ibiri yari agenewe aba banyamategeko mu kigo cyigisha byisumbuyeho amategeko giherereye mu Mujyi wa Nyanza, kuri uyu wa gatanu tariki 2 Nzeri 2016.

Abayitabiriye akwiriye inzego zitandukanye, kugira ngo hirindwe imanza zishobora kumara igihe kirekire mu gihe zishobora gukemurwa mu gihe gito kandi mu bwumvikane.

Umunyamabanga uhoraho muri Ministeri y’Ubutabera (MINIJUST) Karihangabo Isabelle yatangaje ko biri mu nshingano za ministeri gukemura impaka hirindwa amakimbirane bongerera ubumenyi abanyamategeko ba Ministeri n’ibigo bya Leta.

Yagize ati "Gukemura impaka impaka ni bishya ugereranyije n’inkiko. Hari ubwo usanga imanza ziba ari nyinshi bikanatinda.

Ikibazo cyakemutse mu bwumvikane ni cyo cyiza kuko gifasha abakigiranye kwiyunga bikaruta uko ikibazo cyabo cyaba cyakemuriwe mu nkiko kuko binongera imibanire yabo.”

Muhire Yves ni umwe mu bahuguwe akaba ari umunyamageko wa komisiyo y’abakozi ba leta, avuga ko ubu buryo bukumira amafaranga yatangwaga na leta igihe hajemo ubukererwe kandi byakongera amafaranga yatangwa.

Avuga ko ubu buryo kandi bwihutisha kurangiza ibibazo kandi bukazashyirwa mu masezerano bukifashishwa mu gihe habayeho amakimbirane.

Bizakurikiranwa n’abanyamabanga bahoraho ba Leta bakuriwe n’umunyamabanga wa Leta uhoraho muri Ministeri y’ubutabera.

Ati "Nk’ubu ushobora gusanga ibirego biri kwakirwa muri uku kwezi bishobora kuzakirwa mu kwezi kwa karindwi umwaka utaha.Mu gihe ubu buryo bwakemura ikibazo mu gihe cy’amezi atatu.

Hari inyungu rero ko cyarangira vuba kurenza uko cyamara igihe mu nkiko ufite ikibazo aba afite inyungu ko cyarangira. Kuko igihe, amafaranga n’umwanya wo gutegereza byabatwatra igihe."

Ubu buryo bwo gukemura impaka hatitabajwe inkiko buje mu rwego rwo kunganira abunzi, kuko ikibazo cyagakwiriye kumara igihe mu nkiko kizajya gikemurwa mu gihe gito kandi kigafasha mu mibanire yabo.