Syirambere Jean de la Paix avuga ko Inama ikwiye kwiga ku buryo bakoroherezwa kubona amavuta bifashishije Mitiweri

Shyirambere Jean de la Paix uvuka mu Murenge wa Busogo mu Karere ka Musanze, avuga ko ibibazo byabo bikwiye gufatirwa umwanya muri iyi nama bigashakirwa ibisubizo birambye.

Agira ati “Iyi nama ntizasozwe hatavuzwe ku bibazo byacu byihariye cyane cyane ikirebana no kubona amavuta aturinda izuba. Bishobotse tukazajya tuyahabwa twifashishije Mitiweri byadufasha cyane.”

Ibibazo by’Abafite ubu bumuga muri rusange birimo kuba batabona neza, kuba bibasirwa na Kanseri y’uruhu ndetse n’Amavuta ahenze yihariye asigwa ku ruhu rwabo atabasha kwishyurwa hakoreshejwe Mitiweri.

Amwe mu mavuta yifashishwa n’abafite ubumuga bw’uruhu

Mu bindi byifuzwa n’abafite ubumuga bw’uruhu, harimo no guhumurizwa kubera ubwoba bukabije bahorana, bwo gukeka ko bashobora kwicwa na bamwe babita ko ari imari mu bihugu byo mu karere u Rwanda ruherereyemo.

Uretse ibi bisabwa n’abafite ubumuga bw’uruhu mu Ntara y’amajyaruguru hari n’abandi bagize ibyo bifuza ku nama ya 14 y’umushyikirano.

Umurerwa Liliane w’imyaka 22 utuye mu Mudugudu wa Gikwege mu Kagari ka Mpenge mu Murenge wa Muhoza muri Musanze, yifuza ko inama y’umushyikirano yazigirwamo uburyo bwo kongera ubwinshi bw’inganda ziteza imbere ibikorerwa mu Rwanda.

Ati “Caguwa ntigifite umwanya mu Rwanda. Rero icyo nasaba abazaba bari muri iyi nama bazige ku buryo bwo kongera inganda ziteza imbere ibikorerwa mu Rwanda”.

Umurerwa Liliane

François Kayiranga umuhanzi Nyarwanda ukorera umuziki mu karere ka Musanze, asaba ko iyi nama yaziga ku iterambere ry’abahanzi mu Rwanda.

Ati“Niba amakipe atandukanye afashwa gutera imbere n’abahanzi Nyarwanda babishoboye badashorwamo imari bagafashwa kuzamura impano zabo.”

Kayiranga Francois arasaba ko hakwigwa ku iterambere ry’abahanzi

Mupenzi Esdras ukorera umwe mu miryango itegamiye kuri Leta mu karere ka Musanze, asaba ko muri iyi nama hafatirwamo imyanzuro ikarishye, yo kongera ibihano ku banyereza ibyagenewe abatishoboye.

Agira ati “U Rwanda rwagejeje abaturage barwo kuri byinshi ariko abarya iby’abakene bagatuma badatera imbere bazashakirwe uburyo bukarishye bwo kubibaryoza.

Aba nibo batuma bamwe bahora munsi y’umurongo w’ubukene, kandi ibibafasha kwiteza imbere baba babigenewe n’Igihugu”.

Mupenzi Esdras asaba ko hakazwa ibihano bihabwa abanyereje ibyabatishoboye

Uwamahoro Claudine utuye mu karere ka Burera avuga ko mu Karere atuyemo, bifuza cyane kwegerezwa Ibikorwaremezo, kuburyo biganiriweho muri iyi nama byaba ingirakamaro kuri bo.

Ati “Mu karere kacu hari hamwe hataragera umuriro w’amashanyarazi, amazi, imihanda n’ibindi. BIganiriweho bakabitugezaho twabifata neza tukabibungabunga bikadufasha kwihutisha iterambere”.

Uwamahoro Claudine asanga inama y’umushyikirano yazareba uburyo abaturage barushaho kwegerezwa ibikorwaremezo

Kayitsinga Faustin Umunyamabanga Nshingwabikorwa w’Umurenge wa Cyanika mu karere ka Burera, yifuza nawe ko umuhanda wa Musanze - Cyanika wazibandwaho, kuko ubushize bari basabye ko ukorwa bikaba bitarakorwa.

Ati “Turifuza ko umwanzuro wo gukora uyu muhanda utarashyizwe mu bikorwa mu mwaka ushize, ko wakomeza ugakurikiranwa kugira ngo uyu muhanda uduhuza n’ubugande ukorwe.

Bizatuma abaturage barushaho gukora neza n’umusaruro wacu ukagera ku isoko ku buryo bwihuse”.

Biteganyijwe ko inama ya 14 y’umushyikirano izaba ku itariki ya 15 na 16 Ukuboza 2016 ikazabera i Kigali muri Convention Center iyobowe n’Umukuru w’Igihugu cy’u Rwanda, Paul Kagame.

Insanganyamatsiko y‘iyi nama iragira iti” Dufatanyije twubake u Rwanda twifuza”.

Bavuga ko ari uburyo bwo kwereka Abanyarwanda baba hanze ko abari mu gihugu babazirikana, bikabafasha nabo gusubiza amaso inyuma bibuka igihugu bakomokamo.

Uwase Moise asanga Rwanda Day yibutsa abanyarwanda ko nta mazi ashyuha ngo yibagirwe iwabo wa mbeho

Uwase Moise wo mu Karere ka Gicumbi, avuga ko Rwanda Day yibutsa Abanyarwanda baba hanze umugani uvuga ko nta mazi ashyuha ngo yibagirwe iwabo wa mbeho.

Agira ati “ Iki gikorwa kibibutsa kudacika ku muco wabo, ngo bimakaze uwo mu bihugu babamo”.

Mbabazi Agnes nawe wo muri aka karere, avuga ko iki gikorwa kigira akamaro ku iterambere ry’igihugu n’abagituye.

Ati” Nyuma ya Rwanda day, tubona abanyarwanda baba hanze baza gushora imari mu Rwanda bakanatanga imirimo mu bucuruzi bwabo, bigatuma mu gihugu haza iterambere.”

Mbabazi Agnes avuga ko Rwanda Day yibutsa abatuye hanze bumva ko bagifite agaciro mu gihugu cyabo

Mukantarindwa Speciose avuga ko asanga Rwanda Day ituma Abanyarwanda baba hanze bongera kumva ko bafite agaciro mu gihugu .

Ati “ Kuba perezida Kagame abakumbura akabagenera umwanya wo kubasura, birushaho gutuma igihango bafitanye n’u Rwanda cyiyongera.”

Mukantarindwa Speciose avuga ko Rwanda Day yibutsa ababa hanze ko bafite uruhare mu kubaka igihugu nubwo batakibamo

Niyitegeka Zephyrin wo mu Murenge wa Rusasa mu Karere ka Musanze, we avuga ko uyu munsi ari uwahariwe kumurika ibikorerwa mu Rwanda, kugira ngo bimenyekane mu ruhando mpuzamahanga.

Ati “Icyo mbona imariye abanyarwanda ni ugutuma ababa banze bamenya icyerekezo igihugu gifite, bakakigiramo uruhare.”

Niyitegeka Zephyrin avuga ko Rwanda Day inibutsa ababa hanze kudacika ku muco

Rwanda Day yo muri uyu mwaka, iteganyijwe ku wa Gatandatu tariki 24 Nzeli 2016.

Abanyarwanda baturutse mu Rwanda bazahurira na bagenzi babo baturutse mu bihugu bitandukanye, muri Leta zunze ubumwe za Amerika , muri Leta ya California, mu Mujyi wa San Francisco.

Muri uyu mwaka bazaganira ku buryo Abanyarwanda bashingira ku muco bakagera ku iterambere rirambye.

Insanganyamatsiko y’uyu mwaka igira iti” Umunsi w’Umuco Nyarwanda, umurage w’agaciro.”

Abaturage bo mu Karere ka Rulindo bahamya ko bibohoye kurembera mu rugo kubera mituweri.

Babitangaje tariki ya 04 Nyakanga 2016, ubwo mu Rwanda hizihizwaga, ku nshuro ya 22, Umunsi Mukuru wo Kwibohora.

Abaturage bavuga ibyo, cyane cyane ni abo mu Karere ka Burera. Muri ako karere hari ibigo nderabuzima 19 n’Ibitaro bya Butaro bizwiho kuvura kanseri. Mu tugari 69 tugize ako karere hafi ¾ byatwo, dufite amavuriro aciriritse.

Mpakaniye Lazare, w’imyaka nka 90 utuye mu Kagari ka Kabaya kamaze umwaka gahawe ivuriro riciriritse, avuga ko bibohoye ikibazo cyo gusangira ibini cyari cyarabokamye. Abarwayi ngo basangiraga imiti kandi batanarwaye indwara imwe, bamwe bikabaviramo gupfa.

Avuga ko ibyo byaterwaga no kuba batuye kure y’ivuriro ku buryo aho bajyaga kwivuriza ku Kigo Nderabuzima cya Gitare, bageragayo bakoresheje igihe kibarirwa mu isaha bagenda n’amagaru, bamwe bagahitamo kwigumira mu rugo bakaremberayo.

Agira ati “Kwa muganga baguhaye ibinini noneho wavayo wawundi urwaye uti ‘reka muhe ibinini’. Uko ni ko kwabaga gusangira ibinini rero… (abawayi bamwe) barapfaga nyine! Barapfaga rwose!”

Akomeza avuga ko ibyo byabaye amateka. Kuri ubu ngo iyo umuntu arwaye ahita yihutira kujya ku ivuriro begerejwe, bakamuha imiti, agakira.

Amavuriro aciriritse yegerezwa abaturage ngo yatumye bacika ku ngeso yo gusangira ibinini.

Abaturage bo mu Ntara y’Amajyaruguru bakomeza bavuga ko kwibohora ikibazo cyo gusangira ibinini ndetse no kurembera mu rugo babikesha kandi gahunda y’ubwisungane mu kwivuza, Mituweri.

Abaturage bo mu Kagari ka Rutonde, Umurenge wa Shyorongi ho mu Karere ka Rulindo, bemeza ko Mituweri ituma batajya kwivuza magendu, akaba ari yo mpamvu kuri ubu ababarirwa muri 99% bamaze kuyigura.

Kubera agaciro baha Mituweri, abo baturage bakoze amatsinda yo kuzigama no kugurizanya bityo bikaborohera kubona 3000Frw byo kuyigura.

Aba baturage bakomeza bavuga ko bibohoye byinshi birimo n’ubujiji. Ibi bishimangirwa n’abaturage bo mu Murenge wa Shingiro mu Karere ka Musanze bavuga ko bari baboshywe n’ubujiji kubera ko mbere atari buri wese wajyaga mu ishuri.

Nsingirankabo Aloys avuga ko mbere nta mwana wamenyaga ubwenge ngo atsinde atari umwana w’umuyobozi, ariko yishimira ko ibyo bitakibaho.

Agira ati “Icyo nshimira Imana ni uko ubungubu mu kwibohora mfite abana batatu barangije amashuri yisumbuye”.

Abaturage bo mu Murenge wa Gicumbi bishimira ko bibohoye ubukene bukabije.

Aba baturage bavuga ko kandi ibyo byose bijyana n’iterambere bamaze kugeraho nyuma y’imyaka 22 u Rwanda rwibohoye. Mironko Thicien, umuturage wo mu Karere ka Gicumbi, avuga ko kuri ubu ari umworozi.

Ubwo bworozi bwamuzaniye amashanyarazi mu nzu, butuma kandi arihira abana be mu mashuri. Ibyo byose ngo yabigezeho abikesha kwibumbira muri koperativi hamwe n’abandi babikesha imiyoborere myiza.

Abayobozi batandukanye barimo Guverineri w’Intara y’Amajyaruguru, Bosenibamwe Aimé, basaba abaturage gusigasira ibyo byiza byose bamaze kugeraho, babungabunga umutekano kandi baharanira gukorera igihugu no kukitangira.