KT TV
Niger : Urukiko rwa ECOWAS rwategetse ko Mohamed Bazoum afungurwa agasubizwa ubutegetsi
Urukiko rw’Umuryango w’Ubukungu bw’Ibihugu byo mu Burengerazuba bwa Afurika (ECOWAS/CEDEAO), rwategetse ko Mohamed Bazoum wahoze ari Perezida wa Niger, agahirikwa ku butegetsi tariki 26 Nyakanga 2023, ubu akaba afunganywe n’umuryango we, afungurwa.
Inkuru yanditswe n’ikinyamakuru Le Figaro, ivuga ko urwo rukiko rwasabye ko uwo mwanzuro uhita wubahirizwa Mohamed Bazoum ufunganywe n’umuryango we agahita arekurwa byihutirwa.
Urwo rukiko rufite icyicaro i Abuja, rwanzuye ko uregwa ( ni ukuvuga ubutegetsi bw’igisirikare buriho i Niamey) buhita burekura nta yandi mananiza abo bwafunze.
Umucamanza wasomye uwo mwanzuro yagize ati “Uregwa yababujije uburenganzira bwabo bwo kudafungwa binyuranyije n’amategeko”.
Urukiko rwanasabye ko Mohamed Bazoum ahita asubizwa mu mwanya we wa Perezida wa Repubulika ya Niger.
Urwo rukiko ruvuga ko hari uburenganzira bwe buteganywa n’amategeko bwahutajwe ndetse n’uburenganzira bwa politiki.
Kuva Mohamed Bazoum yahirikwa ku butegetsi tariki 26 Nyakanaga 2023, afungiye iwe mu rugo, hamwe n’umugore we Haziza n’umuhungu we Salem.
Abanyamategeko ba Mohamed Bazoum baregeye urwo rukiko rwa CEDEAO, basaba ko rutegeka ko arekurwa ndetse hakaboneka ituze mu gihugu riteganywa n’itegeko nshinga.
Mu mwanzuro abo bavoka batanze mu rukiko, barugaragarije ko afunze binyuranyije n’amategeko, kandi ko umugore we n’umwana we babujijwe uburenganzira bwo kwishyira bakizana.
Ibitekerezo
Ohereza igitekerezo
|
|
