Perezida Emmanuel Macron

Itangazo rya Perezidansi y’u Bufaransa ryasohotse kuri uyu wa kane rigira riti, « Bijyanye n’amabwiriza ariho ubu yashyizweho n’inzego z’ubuzima kandi akurikizwa ku bantu bose, Perezida wa Repubulika arajya mu kato mu minsi irindwi. Azakomeza gukora no kuzuza inshingano ze, hifashishijwe gahunda y’iya kure (à distance)».

Muri iryo tangazo kandi Perezidansi yanatangaje ko Umukuru w’icyo gihugu yagaragaje ibimenyetso by’ibanze by’umuntu wanduye Coronavirus «premiers symptômes».

Mu ntangiriro z’iki cyumweru, abakorana na Perezida Emmanuel Macron bya hafi, bari babwiye ikinyamakuru Le Figaro ko Perezida Marcon yipimishije inshuro nyinshi kuva icyorezo cyatangira kandi ko nta na rimwe baramusangamo Coronavirus.

Brigitte Macron, umufasha wa Emmanuel Marcon, we yigeze gukurikiranwa mu bahuye n’abanduye Coronavirus «cas contact»,ariko ngo hari hashize amezi menshi ibyo bibaye. Gusa kugeza ubu, nta n’umwe muri bo wari warigeze agaragaza ko afite iyo virusi.