Yagize ati “Igihugu duturanye cy’u Burundi, hari amateka yagiye agaruka cyangwa yatumye abantu batagenderana uko bikwiye, igikwiye ni ukureba uko bikemuka, politiki nziza ni cyo ivuga, abantu bagombye kuba bakwiye kubana bagahahirana, naho kutumvikana bikagira uko birangira, ni byo twifuza. Umuyobozi mushya w’igihugu cy’u Burundi n’abo afatanyije na bo, ubwo iyo politiki niba ariho baganisha ntibazasanga tugoranye nk’ibihugu bituranye.”

Perezida Kagame abitangaje mu gihe umubano w’u Rwanda n’u Burundi wakunze kurangwamo agatotsi cyane cyane kuva muri 2015 aho mu gihugu cy’u Burundi habaye imyivumbagatanyo bitewe n’amatora y’umukuru w’igihugu ataravuzweho rumwe bigakurura umwuka mubi ndetse abaturage babarirwa mu bihumbi bahunga igihugu naho abandi baricwa.

Amateka ya vuba y’ibihugu byombi agaragaramo ingero z’umutekano wagiye uhungabana, imipaka irafungwa, ubuhahirane burahagarara, abaturage bamwe b’i Burundi bahungira mu Rwanda, u Burundi bushinjwa gucumbikira no gushyigikira abahungabanya umutekano w’u Rwanda, n’ibindi.

Perezida Kagame avuga ko u Rwanda rwiteguye gukorana na Perezida watorewe kuyobora igihugu cy’u Burundi na Guverinoma yashyizeho mu gihe afite politiki nziza yo kubana no guhahirana n’ibihugu by’abaturanyi, bakarenga amateka yagiye atandukanya ibihugu byombi ahubwo bakubakira ku biteza imbere abatuye ibihugu byombi.