Perezida Kagame yavuze ibi kuri uyu wa gatatu, tariki 13 Gashyantare 2019, mu kiganiro imbonankubone na Michael Milken uyoboye ishuri Milken Institute, ikiganiro cyabereye i Abu Dhabi.

Yagize ati “Nakuriye mu nkambi aho namaze imyaka 20 kimwe n’abandi Banyarwanda benshi. Twakuriye mu biruhije byinshi, ibibazo ari uruhuri ari ko twibaza uko bizarangira”.

Ishuri Milken Institute ni ishuri ryigenga ry’ubukungu ribarizwa muri Santa Monica, i California muri Leta Zunze Ubumwe za Amerika (USA).

Iri shuri rishyira hanze ubushakashatsi ndetse rikanakira inama zigamije kureba udushya mu mahame mu bijyanye n’imari muri USA n’ahandi ku isi.

Nyuma ya Jenoside yakorewe Abatutsi mu Rwanda mu 1994, isi yari yamaze gutera ikizere u Rwanda, yibwira ko igihugu kitazongera kubaho ukundi.

Perezida Kagame, yavuze ko abanyarwanda batigeze bagorwa n’inzira y’ubwiyunge.

Yagize ati “Iyo ufite ibigoye imbere yawe, ukarwana intambara z’ubwigenge, ikibazo uhita uhura nacyo ni ukumenya icyo wakora ngo ushyireho uburyo waharaniye, bwaha buri wese ubuzima bwiza”.

Perezida wayoboye urugamba rwo kubohora igihugu, no guhagarika Jenoside, yatanze ubuhamya bw’uko hari ubwo yagiye yegerwa na bamwe mu barokotse bamubaza ibibazo byinshi bijyanye na politike y’ubwiyunge.

yagize ati “Umwe mu barokotse yarambajije ati kuki mu rugendo rwo kubaka igihugu, wahise kutwikoreza umusaraba uhatse igisubizo kuri iki kibazo kinini?

Naramusubije nti hagati yawe wowe warokotse ndetse n’uwakoze Jenoside, hari umuntu umwe nagira icyo nsaba kandi ni wowe. Bo ntacyo bafite batanga. Ariko wowe nagusaba gutanga imbabazi, ngo tugerageze kurenga ibigoye kugirango tubashe gutera imbere, ngo twubake igihugu”.