Perezida Kagame yashimiye William Ruto wegukanye intsinzi (Ifoto yo mu bubiko)

Mu butumwa yanditse kuri Twitter, Perezida Kagame yagize ati “Mu izina rya Guverinoma no mu izina ry’Abaturage b’u Rwanda, ndashimira abavandimwe, abaturage ba Kenya, ku bw’amatora yabaye mu mahoro. Ndashimira kandi Dr William Samoei Ruto watorewe kuyobora Kenya.”

Muri ubwo butumwa, Perezida Kagame yavuze ko Guverinoma y’u Rwanda ifite inyungu nyinshi mu mubano mwiza w’u Rwanda na Kenya.

On behalf of the Government and People of Rwanda, I congratulate our Brothers and Sisters, the People of Kenya, for conducting peaceful elections on 9 August 2022. I also congratulate H.E. Dr William Samoei Ruto, the President-Elect.

— Paul Kagame (@PaulKagame) August 16, 2022

Guverinoma y’u Rwanda, ibinyujije muri Minisiteri y’Ububanyi n’Amahanga n’Ubutwererane Mpuzamahanga, na yo yashimiye Repubulika ya Kenya kubera amatora meza yagize.

Itangazo ryasohowe n’iyo Minisiteri, rivuga ko Guverinoma n’abaturage b’u Rwanda, bashimira cyane Guverinoma n’abaturage ba Repubulika ya Kenya, kubera imigendekere myiza y’amatora yabaye ku itariki 9 Kanama 2022.

Iryo tangazo rikomeza rivuga ko Guverinoma y’u Rwanda, iha agaciro gakomeye ubutwererane buri hagati ya Kenya n’u Rwanda, ndetse ikaba ishaka gufata uyu mwanya ngo yongere kugaragaza ubushake ifite bwo kurushaho gukomeza ubucuti busanzwe hagati y’ibihugu byombi.

Dr. William Ruto yegukanye intsinzi nyuma y’uko yari ahanganye bikomeye na Raila Odinga wari ushyigikiwe na Uhuru Kenyatta wayoboraga icyo gihugu mu myaka icumi ishize. Ruto yabonye amajwi 50.49% mu gihe Odinga bari bahanganye we yabonye amajwi 48.85%.

The Government of Rwanda congratulates His Excellency @WilliamSRuto on being elected as the new President of the Republic of Kenya. pic.twitter.com/BOQVnyso4P

— Ministry of Foreign Affairs & Int'l Cooperation (@RwandaMFA) August 16, 2022