Abayobozi ba Afurika y’Epfo bamaganye ibyo bashinjwa na Leta zunze Ubumwe za Amerika, ko hari ubwato bw’u Burusiya bwaje gutwara intwaro ku cyambu kiri hafi ya Cape Town mu mpera z’umwaka ushize wa 2022.

Ku wa Kane tariki 11 Gicurasi 2023, Ambasaderi wa Amerika muri Afurika y’Epfo, Reuben Brigety, yavuze ko abizi neza ko hari ubwato bw’u Burusiya bwafatiwe ibihano na Leta zunze Ubumwe za Amerika bwaje gupakira intwaro buzikuye ahitwa ‘Simon’s Town base’ mu Kwezi k’Ukuboza 2022, akomeza avuga ko uko kohereza intwaro bitari mu murongo w’ibyo icyo gihugu cya Afurika y’Epfo cyari kiyemeje byo kutagira uruhare cyangwa uruhande kijyaho(neutrality) mu ntambara u Burusiya bwagabye kuri Ukraine.

Afurika y’Epfo ngo ni kimwe mu bihugu bifitanye umubano mwiza n’u Burusiya ku Mugabane wa Afurika, na nyuma y’uko bugabye igitero muri Ukraine, ariko Afurika y’Epfo itangaza ko nta ruhande ibogamiyeho, kandi iri no mu bihugu byifashe mu bijyanye no gutora imyanzuro ya UN ku ntambara y’u Burusiya muri Ukraine (UN resolutions on the war).

Ibiro bya Perezida wa Afurika y’Epfo, Cyril Ramaphosa, byatangaje ko iperereza rikuriwe n’umuntu wahoze ari umucamanza, rikurikirana ibyo birego bya Amerika.

Ku wa Gatanu tariki 12 Gicurasi 2023, Minisitiri ushinzwe ubugenzuzi bw’intwaro, akaba n’umuvugizi wa Minisiteri y’ububanyi n’amahanga wa Afurika y’Epfo yavuze ko Igihugu cye kitigeze cyohereza intwaro mu Burusiya mu Kwezi k’Ukuboza 2022.

Minisitiri Mondli Gungubele avugira kuri Radio yo muri icyo gihugu yitwa ‘702 Radio’ yagize ati, “ Ntitwigeze twemeza iyoherezwa ry’intwaro n’imwe mu Burusiya...”

Gusa uwo muyobozi ntiyigeze avuga niba hari ubwato butwaye intwaro bwaba bwaravuye muri Afurika y’Epfo n’ubwo bitaba byari byemejwe n’ubuyobozi bw’icyo gihugu.

Leta zunze ubumwe za Amerika zatangaje ko ibihugu bitanga intwaro cyangwa inkunga ku Burusiya, bizajya byangirwa kugera ku masoko ya Amerika.