Valerie Spruill avuga ko iyi nkuru mbi yayimenye abibwiwe na nyirarume. Akimara kumva iyo nkuru y’incamugongo yahise ashakisha uko yamenye niba aribyo cyangwa bamubesya, bituma akoresha ibizamini bya ADN yifashishije umusatsi akuye mugisokozo cy’uwahoze ari umugabo we Percy Spruill, maze asanga ibyo yabwiwe ari ukuri.

Uyu mubyeyi atanga ubuhamya bw’ubuzima bwe yavuze ko yatangiye kugira ibibazo afite imyaka icyenda, ubwo yarerwaga n’ababyeyi be yari aziko ari bo be ariko akaza kumenya ko ari sekuru na nyirakuru.

Bamusobanuriye ko mama we yari indaya kandi ko batari bazi papa we n’imyirondoro ye. Ariko mu by’ukuri mama we Christine nyakuri yajyaga aza kumusura; ariko iyo yazaga Valerie yatekerezaga ko ari inshuti y’umuryango.

Hashize imyaka itari mike,Valerie yahuye na Percy Spruil wari umushoferi w’amakamyo barakundana nyuma y’igihe gito barabana ndetse babyarana abana batatu. Mu mwaka w’1998 nibwo uwo mugabo we yaje kwitaba Imana. Muri 2004 ni ukuvuga nyuma y’imyaka itandatu apfuye, nibwo nyirarume yamuhishuriye ko umugabo we yari se.

Ibi byahise biba igikomere kuri Valerie mu gihe yari amenye ko byari bizwi n’abantu benshi kuko byagaragajwe n’abantu yabajije bakamubwira ko hafi ½ cy’abatuye umujyi wa Akron bari babizi; nk’uko bitangazwa n’urubuga www.7sur7 dukesha iyi nkuru.

Buri gihe Valerie ashaka gusobanura imyitwarire y’umugabo we ari nawe papa we. Agira ati “Ntekereza ko yari abizi ariko ko yari afite ubwoba bwinshi bwo kubimbwira”.

Valerie avuga ko kuba yarabitangaje atari uko yanga umugabo we ahubwo ngo yemeye gushyira ahagaragara ibyamubayeho, kugira ngo abashe kumenya by’ukuri abavandimwe be, baba basaza be cyangwa bakuru be na barumuna be.

Iyo nkuru ngo igomba kuvugwa kuko abana bafite uburenganzira bwo kumenya aho bakomoka, nubwo gushyira ahagaragara ukuri bishobora gutera ingaruka nk’uko abivuga.

Marie Josée Ikibasumba