Melissa Galka yapfuye afite imyaka 17 y’amavuko azize impanuka y’imodoka yo mu bwoko bw’ivatiri mu mwaka w’2004. Iminsi mike nyuma y’urupfu rwe nibwo se, Gary, yatangiye kugira ibitekerezo bidasanzwe, atangira kwiyumvisha ko ari umukobwa we wapfuye yakundaga by’agahebuzo ushaka ko baganira; nk’uko byatangajwe na 7s7.be.

Gary Galka agira ati “umukobwa wanjye yatangiye ankomangira ku muryango, ahindagura amashene ya televiziyo, azimya itara, umunsi umwe ndetse yaje mu cyumba cyanjye maze numva yicaye ku nkengero z’igitanda cyanjye”.

Ni muri icyo gihe uyu mugabo w’umuhanga mu birebana n’amashanyarazi yahise afata icyemezo cyo gukora imashini izajya imufasha kuganira n’umukobwa we wapfuye.

Kuri we, ngo iyo mashini ye yakoze ibashije kuba yamenya amajwi mato cyane atamenyerewe, nk’amajwi y’ihindagurika ry’ubushyuhe ndetse ikamenya no kuvumbura igicucu cy’umuntu cyangwa ikintu runaka mu mwijima.

Gary kandi yahise anakora agasanduku yise “agasanduku ka za roho’’, aka ko ngo kamufasha kubika ibisubizo cyangwa se ibiganiro yagiranye n’ ibinyabuzima bitagaragara.

Umuryango wa Gary wemeza ko iyi mashini ikora kuko umukobwa wabo Melissa wapfuye ajya aboherereza ubutumwa nk’umuntu bumvikana neza. Urugero ngo ni ku munsi w’isabukuru y’amavuko ya Melissa, baganiriye kandi yanoherereje se ubutumwa bugira buti “Papa, bite, ndagukunda”.

Gary yafashe icyemezo cyo gushyira iyi mashini y’itumanaho ridasanzwe ku isoko avuga ati “Ndizera ko ubuhamya bw’umuryango wacu buzemeza abantu bumva ko kuganira n’abapfuye bidashoboka, nyishyize ku isoko mu rwego rwo gufasha abandi babyeyi nka njye bapfushije abana babo mbere ko hari uburyo bwabafasha kuba muri ako gahinda ko kubura abana babo”.

Egide Kayiranga