Mu Mudugudu wa Mirama I mu Kagari ka Nyagatare, ho mu Murenge wa Nyagatare mu Karere ka Nyagatare ni ho uyu Niyonzima Jean Bosco w’imyaka 28, wakoraga akazi ko gucukura amabuye no kuyapakira mu modoka ku gasozi ka Mirama yaguye amaze kunywa ubushera.

Abantu bari bumiwe.

Umwe mu bagore babiri bava inda imwe avuga ko bahuye na we bamutira amayinite (airtime) kuri terefone nyuma bamusaba gusangira ubushera yari asanze banywa, bamaze litiro ya mbere osomye ku ya kabiri ahita agwa hasi ashiramo umwuka.

Habanabakize Olivier, uturanye n’akabari k’ubushera Niyonzima yaguyemo, avuga ko we na mbere yari yagize impungenge z’iri sangira.

Yagize ati “Njyewe mu mutima wanjye byandimo, urimo kumbwira ko umuntu w’umugabo ugiye gusengererwa n’abagore ubushera havukamo ikibazo. Njye mu mutima byandimo ko ikibazo kiribuvuke none byabaye.” Habanabakize Olivier ariko, avuga ko atabakekagaho uburozi.

Matabaro Jean Marie Vianney bakoranaga, we avugako Niyonzima yazize ashira amakenga abo basangiraga.

Agira ati “Yigenzaga abaturage bose bamubonye mu muhanda. Njye rwose ndemeza ko azize abagambanyi. Nta kindi ni amarozi rwose, baramunanguye!”

Nyamara ariko, Nyiransabimana Agnes, umugore wa nyakwigendera, yemeza ko umugabo we yafashwe ku cyumweru avuye ku kazi. Ngo yamubwiye ko yanywereye Kambuca mu Mudugudu wa Mirama ya I, yagera no muri Mirama ya I aho atuye akahanywa indi ariko agahita aruka amaraso.

Ngo ku wa kabiri yorohewemo ku buryo yanatekeye abana mbere yo kujya kunywa ubwo bushera amaze kunywa ibinini bya Malariya nubwo ngo yanacishagamo akaruka amaraso.

Nyiransabimana akomeza agira ati “Yagwa mu Bushera cyangwa Kambuca byose birashoboka. Gusa yafashwe ku cyumweru yanyoye kambuca ariko yari yatangiye koroherwa, najye birantunguye.”

Twagerageje kuvugana n’Ubuyobozi bw’Umurenge wa Nyagatare kuri iki kibazo ariko ntibyadushobokera.

SEBASAZA Gasana Emmanuel