Amakuru yatangajwe na televiziyo CCTV yo mu Bushinwa yerekanye inkuru ibabaje y’umusore witwa Tao Hsiao wiyahuye nyuma yo gushwana n’umukobwa bari bajyanye guhaha.

Aba ni abatabaye batwaye umurambo wa Tao wari umaze gushiramo umwuka.

Uyu musore ngo yasimbutse ava mu igorofa ya karindwi mu isoko yari yajyanyemo n’uwo mukobwa, yihonda hasi ahita apfa byose bikomotse ku kutumvikana na mucuti we.

Uyu musore n’umukobwa ngo bari bamaze amasaha atanu mu isoko, umukobwa ahaha imyenda. Ku isaha ya gatanu ngo umukobwa yabwiye umusore ko bajya mu rindi duka ryarimo inkweto ngo zagurishwaga make kuko zari zagabanyirijwe ibiciro kubera iminsi mikuru yo gusoza umwaka yegereje.

Aha ngo niho hatangiye amahane n’ubwumvikane bucye kuko ngo abari mu isoko bumvise umuhungu abwira nyamukobwa ko afite inkweto zihagije. Televiziyo CCTV yavuze ko ngo abari baje guhaha bayibwiye ko umusore yatakambiye umukobwa agira ati “Inkweto ufite kugeza ubu zamaze kuba nyinshi cyane ku buryo n’iyo wakwambara inkweto buri munsi twazasaza utarazihetura.”

Umukobwa ariko ngo yashakaga kugura izindi nkweto cyane ku buryo atihanganiye ko mucuti we amwangira kujya mu iduka rindi batangira gushwana no kubwirana amagambo mabi, umukobwa amubwira ko ntacyo azaba amumariye niyanga ko bagura izindi nkweto nshya, ndetse ko azaba abihije burundu umunsi mukuru wa Noheli burundu.

Ngiryo iduka bahahiragamo, umusore yiyahuye asimbutse aturutse hejuru.

Aha ngo niho umusore yageze ananirwa kwihangana, ahita afasha hasi ibikapu byuzuye imyenda bari baguze, ni uko asimbukira hasi avuye mu igorofa rya karindwi bari bari guhahiramo, akigera hasi ahita asandara ashiramo umwuka.

Umuvugizi w’iduka rikomeye aba bakunzi bahahiragamo riherereye mu ntara ya Jiangsu mu burasirazuba bw’Ubushinwa yabwiye CCTV ko bahise batabaza inzego z’ubuzima ariko ngo abatabazi bahageze basanga byarangiye, umusore yashizemo umwuka.

Ahishakiye Jean d’Amour