Uyu mukecuru wo mu mujyi wa Seattle muri Amerika yemeza ko muri iriya minsi yose nta kindi yashyize mu kanwa uretse amazi n’agakombe k’icyayi kamwe ku munsi ngo amaze igihe yiyumvamo kuzakora icyo gitangaza n’ubwo muri benshi babigerageje mbere ye ntawe urabigeraho, ndetse bamwe bakaba barashizemo umwuka mu gihe babigeragezaga.

Inzobere mu binyabuzima yitwa Ronald Hoffman yabwiye ikinyamakuru The Guardian dukesha iyi nkuru ko imiterere y’ibimera inyuranye cyane n’iy’umuntu, bityo ngo bikaba bidashoboka ko umuntu yavoma ibimutunga mu rumuri ruva ku zuba no mu mwuka wo mu kirere.

Dr Hoffman yagize ati “Ni koko ibimera byose bivoma amafunguro yabyo mu rumuri rw’izuba ariko uturemangingo dutuma ibyo bishoboka twitwa chloroplasts ni umwihariko w’ibihingwa nta muntu urabaho udufite kandi utadufite ntiwavoma ibikubeshaho mu rumuri rw’izuba.”

Naveena Shine ushaka kubaho atarya ngo agatungwa n’umwuka n’urumuri rw’izuba.

Iyi nzobere iremeza ko mukecuru Shine nakomeza kutarya ingingo ze zizaremara akaba yanapfa. Madamu Shine we ariko aremeza ko azabigeraho kuko ngo yiyumvisemo ijwi rikomeye rimubwira guhagarika kurya amafunguro asanzwe, ndetse ngo ibyo abaganga n’impuguke bavuga ni ukwibeshya abantu babayemo igihe kirekire ariko gukwiye guhinduka.

Uyu mukecuru ati “Maze iminsi numva ijwi ridasanzwe rimpamagarira gukora ikintu cy’akataraboneka kandi kidasanzwe. Gusa ndemeza ko nzabigeraho nkagaragariza isi ko umuntu ashobora nawe kubaho adafata ku mafunguro asanzwe, akabeshwaho n’izuba nk’ibimera byose.”

Uyu mukecuru aravuga ndetse ko ngo azi inshuti ye yamaze imyaka itatu itarya n’ubwo bigoye kubyemera. Ubu rero nawe ngo arashaka kubigaragaza. Mu mwaka wa 2003 nibwo Umunyamerika witwaga David Blaine yaciye agahigo ko kumara igihe kirekire atariye ubwo yamaraga iminsi 44 mu kabati gafunze atagira icyo afata.

Mu mwaka ushize wa 2012 nabwo Umunyesuwedi yemeje rubanda ko yamaze amezi abiri atunzwe n’urubura gusa aho yari yarikingiranye mu modoka ye. Nyamara ariko inzobere zose mu buzima bw’abantu zemeza ko muntu yabasha kubaho iminsi irenze 60 atariye.

Undi mugore wo mu gihugu cya Australia witwa Jasmuheen yemeje ko yamaze imyaka myinshi nawe atagira icyo arya, ariko ubwo bamukoreshaga igerageza bamukurikirana yananiwe kurenza iminsi itatu kuko abaganga bamutahuyeho kunanirwa gukabije, kubura amazi mu mubiri no kugaragaza ibimenyetso by’indwara y’umutima.

Bivugwa ko hari abayobotse ibitekerezo bya Jasmmuheen bakareka kurya, ariko ngo haje gupfamo abantu bane.

Ahishakiye Jean d’Amour