Brenda yapfuye mu mwaka wa 2011, azize kanseri y’udusabo tw’intangangore. Hasigaye ukwezi ngo apfe, yandikiye radiyo yo mu karere yari atuyemo ka Des Moines Iowa yitwa "Star 102.5". Iyi baruwa ariko yagejejwe kuri iyi radiyo mu cyumweru gishize, nyuma y’uko umugabo we abashije kubona undi mukunzi, nk’uko Brenda yari yabyifuje.

Kuwa gatanu tariki 20/12/2013, iyi radiyo yatumiye David, ari we mugabo wa Brenda, nuko ibaruwa yandikiwe n’umugore we isomwa na we ahari.

Icyifuzo cya mbere cya Brenda cyari uko radiyo "Star 102.5" ituma umukunzi w’umugabo we yirirwa yishimye umunsi wose: « Muzatume yishima kandi mumumbwirire ko nishimiye ko yiyemeje kubana n’umuryango wanjye. Muti ‘Ndagukunda uwo uri we wese’».

Brenda Schmitz.

Brenda yanifuje ko abana be bazabasohokanira ahantu bazabasha kwishimana n’umukunzi wa se, ahantu batazigera bibagirwa na rimwe.

Yifuje na none ko abakozi b’ibitaro byamwitayeho ubwo yari arwaye bagira igihe bahuzwa, bakishimira hamwe kandi bagahabwa ibyo kurya n’ibyo kunywa, nk’uburyo bwo kubashimira uko bita ku barwaye kanseri.

Babifashijwemo n’iyi radiyo, habashije kuboneka amafaranga yo gutuma ibyifuzo bya Brenda byose bishyirwa mu bikorwa. Abana be uko ari bane, papa wabo hamwe n’uwo bazabana ndetse n’abana b’uyu mugore babiri, bagiye i DisneyWorld mu biruhuko by’iminsi ine.

Iyi nkuru dusoma kuri 7sur7.be ndetse no kuri 10news.com , ivuga ko ubusanzwe mu gihe cya Noheri, iyi radiyo "Star 102.5" ikunda kwakira ibyifuzo by’abantu, ikabitangaza, hanyuma hakavamo ibibonerwa abaterankunga. Icyakora, ngo mu myaka 20 bamaze bakora iki gikorwa, ngo ni ubwa mbere babonye bene iki cyifuzo.

Scott Allen, umuyobozi w’iyi radiyo kandi ati « nta wari muri sitidiyo utararize ubwo twasomaga iyi baruwa. Twumvise twese dushaka kugira icyo twakorera Brenda n’umuryango we”.

Marie Claire Joyeuse