Chinamhora uyobora umudugudu wa Domboshova yabwiye ikinyamakuru Herald ko abakirisitu basengana na Vhangare batahuye ko atwite kandi umugabo we amaze igihe apfuye. Babimubajije, yababwiye ko atwite inda yatewe n’umuhungu we, kandi ibi bibaye ubwa kabiri, kuko inda ya mbere yo yavuyemo itarageza igihe cyo kuvuka.

Bijya gutangira, umugabo wa Vhangare witwaga Agripah yarwaye indwara ikomeye yamuteraga kuva amaraso mu mitsi yo mu mutwe. Inama y’umuryango yasabye Matsvara kuva aho yabaga mu mujyi akajya kwita kuri nyina, akamufasha mu buzima bwa buri munsi.

Hashize amezi make, Vhangare yongoreye incuti ze ko atwite inda y’umuhungu we ariko kubera ko umugabo we yari akiriho, abakuru b’umuryango bahanishije Matsvara gutanga inka nyinshi z’impongano, nabo bamwemerera kubigira ibanga.

Ubusanzwe, imico yo muri ako gace ihana cyane abakoranye imibonano mpuzabitsina bafitanye amasano akomeye nk’aya y’umwana n’umubyeyi we.
Vhangare yaje kugira ibyago inda ivamo, nyuma n’umugabo we aza gutabaruka.

Uyu mubyeyi yasigaye wenyine, ariko ngo umuhungu yanze ko aba umupfakazi burundu, bakomeza kwibanira kugera ubwo muri uyu mwaka yongeraga kumutera inda, noneho irakura iba nkuru, Vhangare atangira gusiba kujya mu materaniro n’amasengesho mu ruhame n’abandi.

Abo basenganaga baje kumusura, basanga atwite inda y’amezi atanu, bumva ari amahano bayamenyesha umuyobozi uyobora umudugudu wabo. Umukuru w’umudugudu yashatse abasore b’intarumikwa ngo bajye kuboha izo nkorabibi ariko Matsvara na nyina babimenya kare, abajyaga kubafata bahageze basanga inzu ibahamagara.

Chinamhora yabwiye ikinyamakuru the Herald ko yasabye abakuru b’imidugudu bagenzi be kumufasha gutahura aho abo bantu bihishe, bagahanwa by’intangarugero, bikazabera isomo n’abandi babikora.

Ahishakiye Jean d’Amour